අගමැති රනිල් වික්‍රමසිංහ මහතා තනතුරෙන් ඉවත් කිරීමට ගත් උත්සාහය නියත වශයෙන්ම ව්‍යවස්ථා විරෝධී හා ප්‍රජාතන්ත්‍ර විරෝධී පියවරයන් බව ප්‍රජාතන්ත්‍රවාදය සඳහා වූ නීතිවේදීන් ගේ සංවිධානය පෙන්වා දෙයි.
අද (28) කොළඹදී පැවැත්වූ මාධ්‍ය හමුවක් අමතා කතා කළ ව්‍යවස්ථා කටයුතු පිළිබඳව ජ්‍යෙෂ්ඨ නීතිවේදී ලාල් විජේනායක මහතා පැවසුවේ දැනට උද්ගත වී තිබෙන ව්‍යවස්ථාමය අර්බුදය වළක්වා ගැනීම සඳහා වහාම පාර්ලිමේන්තුව කැඳවිය යුතු බවයි.
මෙම මාධ්‍ය හමුවේදී අදහස් දැක්වූ ව්‍යවස්ථා කටයුතු පිළිබඳ විශේෂඥයෙක් වන පාර්ලිමේන්තු මන්ත්‍රී ආචාර්ය ජයම්පති වික්‍රමරත්න මහතා මෙවැනි ව්‍යවස්ථා විරෝධී පියවරයන් ගැනීම හේතුවෙන් ජන ජීවිතය අඩාල වී ජාත්‍යන්තර වශයෙන් රට හුදෙකලා විය හැකි බවට අනතුරු හැඟවීමක් කළේය.
19 වැනි ආණ්ඩුක්‍රම ව්‍යවස්ථා සංශෝධනය මගින් ජනාධිපතිවරයාට තිබූ අසීමිත බලතල සීමා කිරීමට ගත් පියවර නොතකා මෙලෙස ව්‍යවස්ථා විරෝධීව කටයුතු කිරීමට උත්සාහ කිරීම 2015 දී හැට දෙලක්ෂයක ජනතා බලාපොරොත්තුව හා ජනතා පරමාධිපත්‍යය උල්ලංඝනය කිරීමක් බව ආචාර්ය ජයම්පති වික්‍රමරත්න මහතා තවදුරටත් පෙන්වා දුන්නේය.
