සියළුම පළාත් සභා එකම දිනයක කඩිනමින් පැවැත්වීම සඳහා යෝජනා කරමින් විශේෂ අමාත්‍ය මණ්ඩල පත්‍රිකාවක් ඉදිරිපත් කිරීමට ජනාධිපති සිරිසේන සූදානම් වන බව වාර්තා වෙයි.
දේශපාලන ආරංචිමාර්ග පෙන්වාදෙන ආකාරයට මේ වනවිට විසුරුවා නැති පළාත් සභා තුනද ඉක්මනින් විසුරුවා පළාත් සභා 9ම මැතිවරණ එකවර පැවැත්වීම සඳහා කැබිනට් තීරණයක් ගැනීම ගැනීම ජනාධිපති සිරිසේනගේ අපේක්ෂාව වී තිබේ.
තවදුරටත් වාර්තා වන්නේ අප්‍රේල් මස අග හෝ මැයි මස ආරම්භයේ පළාත් සභා මැතිවරණය පැවැත්වීම ද ජනාධිපතිගේ බලාපොරොත්තුව වන බවය.
තවද මෙම විශේෂ කැබිනට් පත්‍රිකාව එළඹෙන අමාත්‍ය මණ්ඩල හමුවට ඉදිරිපත් කිරීමට නියමිත අතර ඒ සමඟ ඊට පුළුල් ප්‍රචාරයක් ලබාදීමට ජනාධිපති මාධ්‍ය ප්‍රධානීන් දැනුවත් කර ඇති බවත් එම ආරංචිමාර්ග පවසයි.