ජනාධිපති සිරිසේන දින 52 දේශපාලන කුමන්ත්‍රණය දියත් කිරීමත් සමග පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකාගේ ජීවිතයද අනතුරේ හෙළා ඇති බව අනාවරණය විය.
පාස්කු ඉරිදා ප්‍රහාරය සම්බන්ධව කැදවා ඇති විශේෂ පාර්ලිමේන්තු වාරයේදී සභාව අමතමින් අද (24) පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා මේ බව අනාවරණය කර සිටියේය.
එහිදී ෆොන්සේකා මන්ත්‍රීවරයා පවසා සිටියේ පසුගිය නොවැම්බර් 17 වනදා තමන්ට සපයා තිබූ විශේෂ කාර්‍ය බලකායේ ආරක්ෂාව ඉවත්කර ඇති බවයි.
එසේම තමන්ට සිටින පොලිස් ආරක්ෂක පිරිසට යාමට ඇත්තේ කිලෝමීටර් ලක්ෂ 6 ධාවනය කළ පැරණි ජීප් රථයක් බවත් ඒ වෙනුවට ලක්ෂ 2ක් වත් ධාවනය කළ ජීප් රථයක් ඉල්ලා සිටියද මෙතෙක් එය ලබාදී නොමැති බවත් ඔහු පැවසීය.
එහිදී අදහස් දැක්වූ සරත් ෆොන්සේකා මන්ත්‍රීවරයා
වෙනත් රටක මෙවැනි ප්‍රහාරයක් එල්ල වූ වා නම් සියලු දෙනාම ඉල්ලා අස්වෙන බවත් ලංකාවේ එවැනි දෙයක් ලංකාවේ සිදුනොවන නිසා ඔවුන්ට තම තනතුරුවල රැඳී සිටිය හැකි බවත් සඳහන් කළේය.
මෙම අදහස් දැක්වීමේදී ආණ්ඩු පක්ෂය මෙන්ම විපක්ෂය දැඩිව විවේචනය කිරීමටත් ඔහු කටයුතු කළේය.
“ එල්.ටී.ටී.ඊ. යට මේ තත්ත්වයට එන්න ගොඩක් කාලයක් ගියා.මේ අය එතනින් පටන් ගෙන තිබෙනවා. නමුත් මේ සංවිධාන දෙකේ අරමුණු දෙකක්.
තරුණයන් පිරිසක් නොමග ගොස් තිබෙනවා ඒ ගැන කනගාටුවෙනවා. මේක දරුණු විෂබීජයක්. ජනතාවගේ ජීවිත අවිනිශ්චිතව තිබෙනවා.
දැන් ආයෙත් අම්මයි තාත්තයි වාහන දෙකක වැඩට යනවා. දරුවෝ දෙන්න වෑන් දෙකක පාසල් යනවා. දැන් ජනතාව පරීක්ෂා කරන්න වෙයි. ආරක්ෂක කපොලු අරින්න වෙයි.
යුද්දෙ ඉවරවුණාම කානිවල් එකක් වගේ ජීවත් වුණා. ආර්ථිකයක් වශයෙන් ඉදිරියට යනවානම් ආරක්ෂාව අංක එකට තිබෙන්න ඕන. කාටවත් මේ වගකීමෙන් ගැලවෙන්න බෑ. ජාතික බුද්ධි ප්‍රධානී යොමුකළ ලිපියක් ජනපතිට යනවා. ආරක්ෂක කවුන්සියේ මේ ගැන කතා වෙන්න ඕන.
පොලිස්පති ඉවත් කළා කියලා මේ ප්‍රශ්ණය විසදෙන්නේ නෑ. බුද්ධි අංශ ශක්තිමත් කළ යුතුව තිබුණා.
බුද්ධි අංශ භාවිත කළේ අපෙන් පළිගන්නනයි. මෙකෙන් 7ක් 8ක් මැරුණත් තවත් 300ක් 400ක් විතර ඉන්නවා. මේක අවුරුදු ගාණක් තිස්සේ ආපු එකක්.
මෙතන පිළිගන්න නායකයෙක් ඉන්නවා. ජනාධිපති ගැන ප්‍රශ්ණයක් නෑ. මේක වුණාට පස්සේ එයා සිංගප්පූරුවේ සිට ආවේ රෑ 12ට. නමුත් හවස තුනට හා රාත්‍රී 9ට සිංගප්පූරුවෙන් ලංකාවට එන්න ගුවන් යානා තිබෙනවා.
ජනාධිපති බයි පාස් එකක් කරලා තිබුණානනම් එහෙම හැකියාවක් නැති වෙන්න තිබුණා. ජනාධිපති දුර්වලයි නම් අපිත් දුර්වලයි. කැබිනට් මණ්ඩලයත් දුර්වලයි.
ආරක්ෂක අමාත්‍යාංශය හා ආරක්ෂක ලේකම් වගකීම පැහැර හැර තිබෙනවා. නීතිය හා සාමය අමාත්‍යාංශය දරණ අය මගේ යාලුවෝ තමයි නමුත් ඒ අයට අත්දැකීම් නෑ.
මේ කාරණාවලට මෝරපු මිනිස්සු දාන්න ඕන. මෙහෙමගියොත් අලවංගු විතරක් ඉතුරුවේවි. දන්න පණ්ඩිතයෝනේ ගොඩක් මෙතන ඉන්නේ. මම ෆීල්ඩ් මාෂල් වුණේ කඩල විකුණලා නෙමයි. මගේ ප්‍රයෝජන ගන්න.අපි වැඩ කරන්න ලෑස්තියි.