පුවත්

ඉන්ධන මිල වැඩි කරන ලෙසත් එසේ නොකරන්නේ නම් ඉන්ධන මත පනවා ඇති බදු ඉවත් කරන්නැයි බලශක්ති අමාත්‍ය උදය ගම්මන්පිල විසින් මුදල් අමාත්‍ය බැසිල් රාජපක්ෂ ගෙන් ලිඛිත ඉල්ලීමක් කර ඇති බව වාර්තා වෙයි.

තමන් අද (18) දිනයේ මෙම ඉල්ලීම කළ බවක් බලශක්ති අමාත්‍යවරයා සඳහන් කළේය.

කෙසේ වෙතත් තෙල් සංස්ථාව විසින් ඉල්ලා ඇති මිල සංශෝධනය ලබා දුන හොත් එය ඉතිහාසගත මිලක් වනු ඇති බවද පැවසූ අමාත්‍යවරයා පාරිභෝගිකයා අපහසුවට පත්වන පරිදි මිල වැඩි කිරීමට සූදානම් නැති බවද කියා සිටියේය.

ඉන්ධන මිල වැඩි කිරීමේ තීන්දුව බලාත්මක කිරීමට අවස්ථාව ඇත්තේ මුදල් අමාත්‍යවරයා වෙතයි. නමුත් මීට පෙර ඉන්ධන මිල ඉහළ දැමීමට වත්මන් ආණ්ඩුව ක්‍රියාකර, එහි වගකීම භාරගෙන ඉල්ලා අස්වන ලෙස පොදුජන පෙරමුණේ ප්‍රධාන ලේකම් පාර්ලිමේන්තු මන්ත්‍රී සාගර කාරියවසම් ප්‍රසිද්ධ ලිපියක් හරහා ඛනිජ තෙල් අමාත්‍ය ගම්මන්පිල වෙත දැනුම්දෙනු ලැබිණ. 

නමුත් දැන් සියල්ල මුදල් ඇමති බැසිල් රාජපක්ෂ වෙත යොමුකරන උපක්‍රමයක් ගම්මන්පිල අමාත්‍යවරයා දියත්කර ඇත. මේ සම්බන්ධයෙන් දේශපාලන විචාරකයන් පවසන්නේ ඉන්ධන මිල වැඩි කරන තීන්දුව ගන්නේ බැසිල් රාජපක්ෂ මුදල් අමාත්‍යවරයා බව ජනගතවීම ඔහුගේ ඉදිරි දේශපාලන කටයුතු වලට අහිතකර බවයි.

පාස්කු ඉරිදා එල්ල වූ බෝම්බ ප්‍රහාරය වළක්වා ගැනීමට ක්‍රියා නොකළැයි චෝදනා ලැබ සිට හිටපු ආරකෂක ලේකම් හේමසිරි ප්‍රනාන්දු නිදොස් කොට නිදහස් කිරීමට ත්‍රිපුද්ල මහධිකරණ විනිසුරු මඩුල්ල අද (18) තීරණය කර ඇත.

නාමල් බලල්ලේ,ආදිත්‍ය පටබැඳි සහ මොහොමඩ් ඉර්ෂඩීන් යන ත්‍රිපුද්ගල විනිසරු මඩුල්ල ඉදිරියේ මෙම නඩුව විභාගය ගැණුනි.

එසේම පාස්කු ඉරිදා ප්‍රහාරය වැළැක්වීමට අපොහොසත් වීම සම්බන්ධයෙන් හිටපු පොලිස්පති පුජිත් ජයසුන්දරට එරෙහිව එල්ල වී තිබූ සියලු චෝදනාවලින් ඔහුද නිදොස් කොට නිදහස් කිරිමට කොළඹ මහාධිකරණය අද නියෝග කරනු ලැබිණ.

නිමල් ලන්සා මහතා රාජ්‍ය අමාත්‍ය ධූරය හොබවන ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍යාංශයේ ලේකම් මහාචාර්ය රංජිත් දිසානායක  වෙනත් ආයතනයකට මාරු කිරීමේ සූදානමක් පවතින බව රජයේ ආරංචි මාර්ග සඳහන් කරයි.

රජයේ ඉහළ බලධාරීන් ඔහුගෙන් මේ සම්බන්ධයෙන් විමසා ඇතැයිද එම ආරංචි මාර්ගවලින් පැවසේ.

ඔහු වෙනත් රාජ්‍ය අමාත්‍යාංශයකට හෝ රජයේ වෙනත් ආයතනයක ඉහළ තනතුරකට පත් කිරීමට බොහෝ දුරට ඉඩ ඇති බව ද වාර්තා වේ.

ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලන්සා මහතා එම අමාත්‍යාංශයේ ලේකම් මහාචාර්ය රංජිත් දිසානායක මහතා සමඟ ඇතිවූ බව කියන මත ගැටුමක් හේතුවෙන්, සිය පෞද්ගලික කාර්ය මණ්ඩලය ද අමාත්‍යාංශයෙන් ඉකුත්දා ඉවත් කර ගත්තේය.

එම පෞද්ගලික කාර්ය මණ්ඩලය ඊයේ දිනයේද අමාත්‍යංශය නොසිටි බව එම ආරංචි මාර්ග වලින් පැවසේ.

– lankadeepa

කැලණිතිස්ස සංයුක්ත චක්‍ර බලාගාරය ඉන්ධන නොමැතිකම හේතුවෙන් අද (17) රාත්‍රියේදී හදිසියේ නතර කර ඇති බව වාර්තා වෙයි.

ලංකා විදුලිබල මණ්ඩලය සඳහන් කරන ආකාරයට එම බලාගාරය නතර වීමෙන් ජාතික විදුලි පද්ධතියට මෙගාවොට් 160ක ධාරිතාවයක් අහිමි වෙයි.

එම බලාගාරය නැප්ටා නැමැති ඉන්ධනවලින් විදුලි ජනනය සිදුවන අතර විදුලි බල මණ්ඩල ආරංචි මාර්ග සඳහන් කරන්නේ නැප්ටා ඉන්ධන නිම වීම හේතුවෙන් අද රාත්‍රී 8.20ට පමණ බලාගාරයේ ජනන කටයුතු නතර කළ බවය.

ජූඩ් ක්‍රිශාන්ත පියතුමන් ප්‍රකාශයක් ලබාදීම සඳහා බව කියමින් අද (17) පොලිස් අපරාධ විමර්ශන කොට්ඨාසය (CID) වෙත කැඳවා ඇත.

කොළඹ අගරදගුරු පදවියේ ජන සන්නිවේදන අධ්‍යක්ෂක ගරු ජූඩ් ක්‍රිශාන්ත පියතුමන් CID ට කැඳවා ඇත්තේ අමාත්‍ය ප්‍රසන්න රණතුංග සිදු කළ ප්‍රකාශය සම්බන්ධයෙන් පරීක්ෂණයක් පවත්වන ලෙසට කළ පැමිණිල්ලක් අනුවය.

පාස්කු ප්‍රහාරයට හිටපු ජනාධිපති මෛත්‍රීපාල සිරිසේන වගකිව යුතු බවට අමාත්‍ය ප්‍රසන්න රණතුංග මහතා සිදු කළ ප්‍රකාශය සම්බන්ධයෙන් පරීක්ෂණයක් පවත්වන ලෙසට උන්වහන්සේ අපරාධ පරීක්ෂණ දෙපාර්තමේන්තුව හමුවේ පැමිණිල්ලක් සිදු කරනු ලැබුවේ පසුගිය වසරේ දෙසැම්බර් 10 වන දිනය.

මාස දෙකකට පමණ පසුව අදාළ පැමිණිල්ලට අනුව ප්‍රකාශයක් ලබා ගැනීම සඳහා ජූඩ් ක්‍රිශාන්ත පියතුමන් අද දිනයේ දී අපරාධ පරීක්ෂණ කොට්ඨාසය විශේෂ ඒකකයට කැඳවා ඇත.

කැඳවීමට අනුව ජූඩ් ක්‍රිශාන්ත පියතුමන් අද(17) පෙරවරු 9.45ට පමණ අපරාධ පරීක්ෂණ දෙපාර්තමේන්තුවට පැමිණ තිබිණ.

එහිදී පියතුමන්ගෙන් පැය 3ක් පුරා ප්‍රකාශ ගෙන ඇති බවත් වාර්තා වෙයි.

විදුලිය කප්පාදු නොකිරීම සඳහා මහජන උපයෝගිතා කොමිසම විසින් ලබා දී ඇති මාර්ගඋපදේශ ප‍්‍රායෝගිකත්වය ගැන ගැටළු මතුවන බව ලංකා විදුලිබල මණ්ඩලයේ විදුලි ඉංජිනේරු සංගමය සඳහන් කරයි.

දැනටමත් බලාගාර කිහිපයක් සඳහා ඉන්ධන නොමැති කම හේතුවෙන් නවතා දමා ඇති බවද එනිසා විදුලි සැපයුම නිසි පරිදි පවත්වාගෙන යාමේ ගැටලුකාරී තත්ත්වයක් මතුවී ඇතැයි ද එහි සභාපති අනිල් රංජිත් පවසයි.

දැනට අක‍්‍රිය වී ඇති ඇතැම් බලාගාර සඳහා ඉන්ධන ලැබීම සති දෙකක් පමණ ප‍්‍රමාද වන තත්වයක් මතුව ඇති බවත් ඔහු සදහන් කලේය.

එනිසා පවතින තත්වය මත විදුලි කප්පාදුවකින් තොරව පද්ධතිය පවත්වාගෙන යාම ඉතා අසීරු බවත් ඔහු පැවසීය.

අග්‍රාමාත්‍ය ලේකම් අනුර දිසානායක  'කොවිඩ්' ආසාදිත බවට තහවුරු වී ඇති බව වාර්තා වෙයි.

 අග්‍රාමාත්‍ය ලේකම් කාර්යාලය මේ බව තහවුරු කර ඇත.

වැඩිදුරටත් වාර්තා වන ආකාරයට කොවිඩ් රෝග ලක්ෂණ පෙන්වීම නිසා ඒ මහත පරීක්ෂණයකට යොමු වී ඇති බවත් එහිදී කොවිඩ් ආසාදිත බවට තහවුරු වී ඇති  බවත් එම නිලධාරියා වැඩිදුරටත් කීය.

අමාත්‍ය විමල් විරවංශ ගේ ෆේස්බුක් ගිණුමට සයිබර් ප්‍රහාරයක් එල්ලවී ඇති බව ඔහු විසින් සඳහන් කර සිටියි.

අමාත්‍යවරයා පවසන්නේ තම ෆේස්බුක් ගිණුම දින ගණනක සිට තමන්ට භාවිත කිරිමට නොහැකි වන අයුරින් පැවති බවය.

මේ වන විට සිය ගිණුමේ පාලනය තමන් ලබා ගත් බවත්, එම කාල සීමාවේදී ගිණුම ලබාගත් පුද්ගලයා විසින් සිදුකළ පොස්ට් ෂෙයාර් කිරීම් සඳහා වග විභාගයකින් තොරව අදහස් ප්‍රකාශ කළ අය සම්බන්ධයෙන් අනුකම්පා කරන බවට ද අමාත්‍යවරයා සිය ෆේස්බුක් ගිණුමේ සටහනක් තබමින් සඳහන් කර සිටියි.

වඳ සැත්කම් කළේ යැයි අසත්‍ය චෝදනා මත අනිවාර්යය නිවාඩු යැවූ තමන්ට හිමි හිඟ වැටුප් හා දීමනා ලබා දෙන ලෙස නියෝග කරන්නැයි ඉල්ලා කුරුණෑගල ශික්ෂණ රෝහලේ වෛද්‍ය සෙයිගු ෂිහාබ්දීන් මොහොමඩ් ෂාෆි ගොනු කළ රිට් පෙත්සමක් සලකා බැලීම සඳහා මාර්තු මස 04 වැනිදා කැඳවන ලෙස අභියාචනාධිකරණය විනිසුරු සෝභිත රාජකරුණා නියෝග කර තිබේ.

එම පෙත්සම අද කැඳවනු ලැබූ අවස්ථාවේදී පෙත්සම්කාර වෛද්‍ය ශාෆි මහතා වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් තම සේවාදායකයාට එරෙහිව සිදුකරනු ලබන මූලික විනය පරීක්ෂණය කුරුණෑගල මූලික රෝහලේ අධ්‍යක්ෂ වෛද්‍ය චන්දන කැන්දගමුව විසින් සිදුකිරීම සම්බන්ධයෙන් විරෝධය පළ කරන බව කියා ඇත.

එම වෛද්‍යවරයා පක්ෂපාතී පුද්ගලයකු බවත් ඔහු සම්බන්ධයෙන් රාජ්‍ය සේවා කොමිසමට කරුණු දක්වා ඇති බවත් එම නීතිඥවරයා සඳහන් කර ඇත.

වගඋත්තරකරුවන් වෙනුවෙන් පෙනී සිටි අතිරේක සොලිසිටර් ජනරාල් සුමති ධර්මවර්ධන මහතා අධිකරණය හමුවේ කරුණු දක්වමින් ආණ්ඩුක්‍රම ව්‍යවස්ථාවේ 58 සහ 61 වගන්ති ප්‍රකාරව රාජ්‍ය සේවා කොමිසම හමුවේ පවතින කරුණක් පිළිබඳව කරුණු සලකා බැලීමට අභියාචනාධිකරණයට අධිකරණ බලයක් නොමැති බවට කරුනු දක්වා තිබේ.

දෙපාර්ශවය විසින් ඉදිරිපත් කළ කරුණු සලකා බැලූ විනිසුරුවරයා පෙත්සම සලකා බැලීම සඳහා මාර්තු මස 04 වනදා කැඳවන ලෙස නියෝග කර ඇත.

කුරුණෑගල ශික්ෂණ රෝහලේ අධ්‍යක්ෂ වෛද්‍ය චන්දන කැන්දගමුව, එහි හිටපු අධ්‍යක්ෂ ඒ.එම්.එස්. වීර බණ්ඩාර, සෞඛ්‍ය ඇමැති කෙහෙළිය රඹුක්වැල්ල, සෞඛ්‍ය අමාත්‍යංශ ලේකම් වෛද්‍ය එස්.එච් මුණසිංහ, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මෙහි වගඋත්තරකරුවන් වශයෙන් නම් කර තිබේ.

කුරුණෑගල ශික්ෂණ රෝහලේ සේවය කළ තමන් වඳ සැත්කම් කළ බවට අසත්‍යය සහ චෝදනා එල්ල වූ බව සඳහන් කරන පෙත්සම්කරු ඉන්පසුව අනිවාර්ය නිවාඩු යැවුණු බවත් සඳහන් කර ඇත.

එහෙත් තමන්ට හිමි විය යුතු හිඟ වැටුප් හා දීමනා මෙතෙක් ගෙවා නොමැති බව පෙන්වා දෙන පෙත්සම්කරු එම දීමනා සහ හිඟ වැටුප් ගෙවන ලෙස වගඋත්තරකරුවන්ට නියෝගයක් නිකුත් කරන ලෙසත් ඉල්ලා සිටී.

Lanka truth

එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහගේ උපදෙස් අනුව උතුරු නැගෙනහිර ඇතුළු දිවයිනේ සියලු දිස්ත්‍රික්ක ආවරණය වන පරිදි එක්සත් ජාතික පක්ෂය ආසන මට්ටමින් සාමාජික ප්‍රවර්ධන වැඩසටහන ක්‍රියාත්මක කරන්න සූදානම් බව වාර්තා වෙයි.

මෙම වැඩසටහන අධීක්ෂණය සඳහා එක්සත් ජාතික පක්ෂ ජ්‍යෙෂ්ඨයන් පළාත් සහ දිස්ත්‍රික්ක මට්ටමින් අනුයුක්ත කිරීමටද පක්ෂ නායක රනිල් වික්‍රමසිංහ පියවර ගෙන තිබේ.

ඒ අනුව පක්ෂ නියෝජ්‍ය නායක රුවන් විජයවර්ධන ඇතුළු පිරිසක් දිස්ත්‍රික් මට්ටමින් වගකීම් ගෙන පක්ෂ දේශපාලන කටයුතු මෙහෙය වීමට නියමිතය.

අදාල දේශපාලන කටයුතුවල ප්‍රගතිය සම්බන්ධයෙන් පක්ෂ ජ්‍යෙෂ්ඨයන් විසින් එජාප මහ ලේකම් පාලිත රංගෙ බණ්ඩාරට සතිපතා වාර්තා කිරීමට නියමිතව ඇති බවත් වාර්තා වෙයි.

ත්‍රස්තවාදය වැළැක්වීමේ පනත වහා අහෝසි කරන්නැයි බලකරමින් ජනතා අත්සන් ලබාගැනීමේ පෙත්සමට අගරදගුරු මැල්කම් කාදිනල් රංජිත් ද අත්සන් තබා ඇති බව වාර්තා වෙයි.

දෙමළ ජාතික සන්ධානයේ මූලිකත්වය මත සියළු ජාතින් නියෝජනය වන සිවිල් හා දේශපාලන බලවේගවල සහායෙන් මෙම පෙත්සම් ව්‍යාපාරය දීපව්‍යාප්තව සිදුවන අතර කොළඹ දිස්ත්‍රික්කයේදී මෙම පෙත්සමට අත්සන් ලබාගැනීම කොටුව දුම්රිය පොළ ඉදිරිපිටදී සිදුවිය.

දෙමළ ජාතික සන්ධානයේ පාර්ලිමේන්තු මන්ත්‍රී රාසමානික්කම් ශානක්‍යන් අගරදගුරු හිමිපානන් හමුවී මේ පෙත්සම ඉදිරිපත් කර ඇති බවත් වාර්තා වෙයි .

අද මෙරට ඇති වී තිබෙන ආර්ථික ගැටලුවලට එකම හේතුව කොරෝනා නොවන බව ශ්‍රී ලංකා පොදුජන පෙරමුණේ ගාල්ල දිස්ත්‍රික් පාර්ලිමේන්තු මන්ත්‍රී ශාන් විජේලාල් ද සිල්වා පවසයි.

මන්ත්‍රීවරයා මේ බව සඳහන් කර සිටියේ හක්මන ප්‍රදේශයේදී මාධ්‍ය වෙත අඅදහස් දක්වමින්ය.

දීර්ඝ කාලයක් අනුගමනය කළ වැරදි ආර්ථික ප්‍රතිපත්ති හා කළමනාකරණය හේතුවෙන් අද තිබෙන ආර්ථික අර්බුදය ඇති වී තිබෙන බවද ඔහු සදහන් කර ඇත.

විදුලි අර්බුදය සමග ඩොලර් ප්‍රශ්නය ගැටගැසී ඇතැයි පැවසූ ඒ මහතා ආණ්ඩුව පිළිබඳ තුළ මේ පිළිබඳව විවිධ මත තිබුණද කොරෝනා වසංගතයට මුහුණ දුන් ලෝකයේ අනෙක් රටවල මෙවන් අර්බුදයක් උදාවී නැතැයිද පැවසීය.

ලංකා ආර්ථිකය තවමත් පිරිහෙමින් ඇති බවත් මේ වන විට වෙළෙඳ පොළේ නියම වටිනාකම අනුව ඩොලරයක් රුපියල් 250කට වඩා වැඩි බවත් වසර අවසානයේදී එය රුපියල් 300ක් වීමේ අවධානමක් ඇති බව හිටපු අග්‍රාමාත්‍ය , එක්සත් ජාතික පක්ෂයේ නායක රනිල් වික්‍රමසිංහ පවසයි.

විශේෂ ප්‍රකාශයක් නිකුත්කරමින් ඔහු මේ අදහස් දක්වා ඇත.

මේ වන විට මධ්‍යම පන්තියේ දරුණු කඩා වැටීමක් ඇති බවත් සමහරුන් මධ්‍යම පන්තියෙන් පිටතට ඇද වැටෙමින් ඇති බවත් ඔහු පවසයි.

මෙරට ආර්ථිකය වැටී ඇති අවාසනාවන්ත තත්ත්වය සහ ඊට පිළියම් ලබා ගැනීමට ජාත්‍යන්තර මූල්‍ය අරමුදල වෙත යායුතු බව විග්‍රහ කරමින් හිටපු අග්‍රාමාත්‍ය රනිල් වික්‍රමසිංහ සිදුකළ ප්‍රකාශය පහත දැක්වෙයි.

ආර්ථිකය තවමත් පිරිහෙනවා. ඩොලර් හිඟය විසදලා නෑ . රුපියලේ හිඟය තවමත් විසදලා නෑ . අද රුපියලේ නියම වටිනාකම වෙලදපොලේ වටිනාකම ඇත්ත වශයෙන්ම ඩොලරයට රුපියල් 250 යි . ඊටත් වැඩියි . මේ යන විදිහට මේක රුපියල 275 ටත් යන්න පුළුවන් . එතැනදී නවත්තගත්තේ නැත්තන් 300ට යනවා අවුරුද්ද අවසාන වෙන්න ඉස්සෙල්ලා .අන්න එහෙම තත්වයක් අපිට තියෙන්නේ ඒ නිසා විශාල හානියක් සිදුවෙලා තියෙනවා . විශේෂයෙන්ම දිළිඳු ජනග්‍රහණය ලක්ෂ 5 කින් වැඩිවෙලා තියෙනවා . තවත් වැඩිවෙන්න යනවා .

මධ්‍යම පන්තිය කඩාවැටිලා අමාරුවෙන් ජිවත් වෙන්නේ .සමහරුන්ට මධ්‍යම පන්තියෙන් පිටවෙන්න සිද්දවෙනවා . ගොවිතැන විනාශ වෙලා .කුඩා හා විශාල ව්‍යාපාරිකයන්ට තමන්ගේ වැඩ කටයුතු කරන්න භාණ්ඩ ලබාගන්න බැරිවෙලා තියෙන්නේ අන්න ඒ ප්‍රශ්නේ තියෙනවා . ඒවගේම ජුනි,ජුලි මාස වෙද්දී අපිට යලිත් ණය ගෙවන්න සිදුවෙනවා . මේ අවුරුද්දේ සම්පුර්ණයෙන්ම ඩොලර් බිලියන 6 ක් ණය ගෙවන්න තිබෙනවා . අපි තාම IMF එක්ක සාකච්ඡා කරලා නැහැ.

ඒ නිසා ජුනි,ජුලි වලට ණය ගෙවන්න අපිට මුදල් හොයාගන්න තිබෙනවා .තවත් අලුත් ප්‍රශ්නයක් ඇතිවෙලා තිබෙනවා .විදේශ විනිමය විශේෂයෙන්ම ගනුදෙනු බැංකු වලින් ඉවත්වෙලා දැන් කරන්නේ හවාලා ක්‍රමයට හවාලා ක්‍රමය තමයි ඒ වැඩකටයුතු කරන්නේ . ඒ නිසා බැංකු ක්‍රමය අතහැරලා තියෙන්නේ . ඉතින් මෙහෙම ප්‍රශ්න ගණනාවක් තියෙනවා . එන සතියේ IMF සංවිධානයේ ඒගොල්ලොන්ගේ ව්‍යවස්ථාවේ 4 වෙනි වගන්තිය යටතේ හැම සාමාජික රටක් එක්කම අවුරුද්දට සැරයක් ඒ ආර්ථික තත්වය ගැන සාකච්ඡා කරලා වාර්තාවක් දෙන්න ඕනේ . ගිය දෙසැම්බර් මාසේ IMF කණ්ඩායම ලංකාවට පැමිණියා . ඒ වාර්තාව එන සතියේ ඉදිරිපත් කරනවා කියල තමයි අපි දැනගෙන ඉන්නේ . එක IMFඅධ්‍යක්ෂක මණ්ඩලයෙන් අනුමත කරලා පිටකරන වැඩසටහනක් .

ඒ වාර්තාව ලැබුණු ගමන් අපි කරන්න ඕනේ එක පාර්ලිමේන්තුවට ඉදිරිපත් කරන්න . පාර්ලිමේන්තුවට ඉදිරිපත් කරලා ඊටපස්සේ ඒ ගැන අපි විවාදයක් පවත්වමු . එක පක්ෂග්‍රාහී වෙන්න වුවමනා නෑ .මේ තත්වයට කවුද වගකියන්නේ කියල හොයන්න වැඩක් නැහැ . දැන් තියෙන ඒ වාර්තාවේ යෝජනා අනුව අපි සාකච්ඡා කරමු . එතනින් අපි බලමු මේ ගැන පොදු එකඟතාවයකට මුලික ප්‍රතිපත්ති ගැන පොදු එකඟතාවයකට එන්න පුලුවන්ද කියල .අපි එන්න ඕනේ . එක අපේ යුතුකමක් .

මොකද අපේ රටේ තියෙන්නේ එක ජාතික සම්පතයි . ඒ ජාතික සම්පත තමයි තරුණ පරපුර ඉංග්‍රීසි භාෂාවෙන් කියනවනම් MILLENNIALS හා GEN Z . ඔය කණ්ඩායම ගැන අපි හිතන්න ඕනේ . ඒ අයට අනාගතයක් ඇතිකරන්න ඕනේ . දැන් විස්වාසය නැතිවෙලා තියෙන්නේ . ආණ්ඩුව පාර්ලිමේන්තුව ගැන විස්වාසය කඩවෙලා තියෙන්නේ
. එහෙනම් ඒ අයට අනාගතයක් ඇතිකරන්න සැලැස්මක් තියෙන්න ඕනේ . අපිට කෙටිකාලින සැලැස්මකුත් ඕනේ . ඒ වගේම මේක ඉදිරියට ගෙනියන්න මධ්‍යම කාලීනව දීර්ඝ කාලීන සැලැසුම් ඕනේ . මේ සැලසුම් හදන්න අපිට එකඟවුණ එක ආර්ථික රටාවක් තියෙන්න ඕනේ . අවුරුදු 10,15,20 ගෙනියන එක ඒ අපේ යුතුකම . එකෙන් අපිට පැනලා යන්න බැහැ . අපි එතනින් පැනල ගියොත් මේ රටේ තරුණ තරුණියෝ අපිට සාප කරයි .

' උඹ රටේ අනාගතයත් නැතිකළා අපේ අනාගතයත් නැතිකළා ' කියල අපිට බනී . ඒ නිසා අපිම ඒ වගකීම ඉෂ්ට කරන්න වුවමනායි .

මාධ්‍යවේදී චමුදිත සමරවික්‍රමගේ නිවසට අසූචි ප්‍රහාරය එල්ල කළ අසූචී ප්‍රේමියා කවුද යන්න පිළිබඳව මේ අවස්ථාවේද කථා නොකරන බව ජනමාධ්‍ය අමාත්‍ය ඩලස් අලහප්පෙරුම පවසයි.

ඒ  කැබීනට් තීරණ දැනුම් දීමේ මාධ්‍ය සාකච්ඡාවට එක්වෙමිනි.

එහිදී අදහස් දක්වමින් අමාත්‍යවරයා පවසා සිටියේ වැසිකිළියක සැඟවී සිටින ප්‍රජාතන්ත්‍රවාදය නොහඳුන පිරිසක් මෙම ප්‍රහාරය එල්ල කර ඇත බවත්, අසූචි ප්‍රහාරයෙන් වහනය වන්නේ කුණුවූ සමාජයක කුණුවූ දුර්ගන්ධයක් බවත්ය.

මාධ්‍යවේදී චමුදිතට මෙලෙස එල්ල වූ ප්‍රහාරය රජය හෙළා දකින බවත් අමාත්‍යවරයා රජය වෙනුවෙන් මේ  ප්‍රකාශය කර සිටියේය.

මාධ්‍යවේදී චමුදිත සමරවික්‍රම ගේ පිළියන්දල පිහිටි නිවසට එල්ල වූ ප්‍රහාරයට පැමිණ මැරයින් හඳුනාගැනීම සඳහා සීසීටීවී දර්ශන පරීක්ෂාවට පොලිස් කණ්ඩායම් 9ක් යොදා ‍ඇතැයි ද ජනමාධ්‍ය අමාත්‍ය ඩලස් අලහප්පෙරුම මෙම මාධ්‍ය හමුවේදී පැවසිය.

එම කණ්ඩායම් සඳහා පොලිස් නිලධාරීන් 60ක් පමණ අනුයුක්ත කර ඇති බව ද අමාත්‍යවරයා  කීය.

එමෙන්ම මෙහිදී මාධ්‍යවේදීන් නැගූ ප්‍රශ්නයකට පිළිතුරු දෙමින් අමාත්‍යවරයා කියාසිටියේ “මෙය පොලිස් රාජ්‍යයක් නොවන බවත් කැබිනට් තීරණ දැනුම් දීමේ මාධ්‍ය හමුවේදී මාධ්‍ය අසන ප්‍රශ්න වෙනුවෙන් පොලීසියට මාධ්‍යවේදීන් කැඳවා ප්‍රශ්න කිරීමට නොහැකි බවයි” ඒ වෙනුවෙන් තමා‍ පෙනී සිටින බවත් හෙතෙම කීය.

ඩලස් අලහප්පෙරුම අමාත්‍යවරයා එහිදී වැඩිදුරටත් කියාසිටියේ, මාධ්‍යවලට අද වනවිට අසීමිත බලයක් පවතින බවත් එය අසීමිත වගකීමක් බව ද කිසියම් හෝ කරුණක් සමාජගත කිරීමේදී සිහිතබා ගත යුතු බවය.

ශ්‍රී ලංකා රූපවාහිනි සංස්ථාවේ අධ්‍යක්ෂ ජනරාල් ජයම්පති හීන්කෙන්ද සිය ධුරයෙන් ඉල්ලා අස් වී ඇති බව වාර්තා වෙයි.

වාර්තා වන ආකාරයට ඔහුට ඉල්ලා අස්වන ලෙසට ජනමාධ්‍ය අමාත්‍යංශයේ ලේකම් අනුෂ පැල්පිට  කර ඇති දැනුම්දීමකට අනුව මෙම ඉල්ලා අස්වීම සිදුව ඇති බවත් දැනගන්නට ඇත.

මේ අනුව පුරප්පාඩු වූ රූපවාහිනි සංස්ථාවේ නව අධ්‍යක්ෂ ජනරාල්වරයා ලෙස පරිපාලන සේවයේ ජ්‍යෙෂ්ඨ නිලධාරියකු පත්කිරීම සම්බන්ධයෙන් අවධානය යොමුව ඇති බවත් වාර්තා වෙයි.

සිවිල් ක්‍රියාකාරී ශෙහාන් මාලකට ඇප නියම කිරීමට මාළිගාකන්ද මහේස්ත්‍රාත් අධිකරණය නියෝග කර ඇත.

මැති ඇමැතිවරුන් ද ඉදිරි දිනවල පාපැදියෙන් ගමන් කරනු ඇති බව පරිසර ඇමැති මහින්ද අමරවීර පවසයි .

අමාත්‍යවරයා මේ බව සඳහන් කර සිටියේ  රජයේ ප‍්‍රවෘත්ති දෙපාර්තමේන්තුවේදී පැවති මාධ්‍ය හමුවකදීය.

එහිදි ඔහු වැඩිදුරටත් සඳහන් කර සිටියේ මැතිඇමතිවරුන්ට පාපැදියෙන් පැමිණීම ආරක්ෂක ප්‍රශ්න හේතුවෙන් එකවරම ක්‍රියාත්මක කළ නොහැකි වුවත් සතියකට හෝ මසකට දවසක් හෝ මැති ඇමැතිවරුන්ඨ පාපැදිය භාවිතා කිරීමේ හැකියාවක් පවතිනු ඇති බව තම විශ්වාසය බවයි. 

දැනටත් ඇතැම් රජයේ නිලධාරීන් පාපැදිවලින් තම රාජකාරියට එන බව ද පැවසූ අමාත්‍යවරයා ඔවුන් අගය කිරීම සඳහා වැඩපිළිවෙළක් සූදානම් කරන බවද සඳහන් කළේය.