පුවත්

අස්වැසුම ප්‍රතිලාභීන්ට දීමනා ගෙවීම හෙට සිට ආරම්භ කරන බව සුභසාධක ප්‍රතිලාභ මණ්ඩලය සදහන් කරයි.

ඒ අනුව සියලු ගැටලු විසඳා අවසන් වූ ප්‍රතිලාභීන්ට මෙම දීමන පළමු අදියරේ දී ම ලබා ගැනීමට හැකිය.

මුදල් මුදා හැරීමේ ගැටලු මතුවීමත් සමඟ ප්‍රතිලාභ ගෙවීම් ප්‍රමාදයන් සිදු විය.

කෙසේ වෙතත් මේ වනවිට සුබ සාධක මණ්ඩයට නව සභාපතිවරයෙකු පත් වීමත් සමඟ එම ගැටලු නිරාකරණය කර තිබේ.

රට ගොඩනැගීම සඳහා යළිත් එක්සත් ජාතික පක්ෂ මහ ගෙදරට එන්නැයි එජාප කොළඹ දිස්ත්‍රීක් නායක රවී කරුණානායක සමගි ජන බලවේගයේ සියලු දෙනාගෙන් විවෘත ආයාචනයක් කර සිටියි.

පරණ කෝන්තර අමතක කර අපේ මහ ගෙදරට ඇවිත් අලුත් රටක් හදන අපේ අලුත් ගමනට සහයෝගය ලබා දෙන්නැයි ඔහු සජබ නායකයින්ගෙන් හා පාක්ෂිකයින් ගෙන් ඉල්ලා සිටියේ, 'සිරස' නාලිකාවේ විකාශනය වූ "ඉලක්කය" වැඩසටහනට සහභාගී වෙමිනි.

එක්සත් ජාතික පක්ෂය දෙකඩ කිරීම පසුපස බරපතල කුමන්ත්‍රණයක් තිබු බවත්, හිටපු ජනපතිවරයෙක් ඒ කුමන්ත්‍රණය පිටුපස සිටි බවත් ඔහු එහිදී සඳහන් කළේය.

රනිල්ට උදව් කළ යුතුයි!

ජනපති වික්‍රමසිංහ විසින් රට ගොඩනැගීමට දරන උත්සාහයට සියලු පක්ෂ එක්විය යුතු කාලය එළඹ ඇතැයි ද එජාප කොළඹ දිස්ත්‍රීක් නායකයා එහිදී කියා සිටියේය.

අපේ රට ඉතා දරුණු ජාතික මට්ටමේ අර්බුදයකට මුහුණ දෙන බවත්, එය ආර්ථික දේශපාලන හා සමාජ ගැටලු වලින් යුක්ත බවත් මෙම ජාතික අර්බුදයෙන් ගොඩ ඒමට නම් සියලු දෙනා එකට එකතු වී පොදු ජාතික ප්‍රතිපත්තියක් සහිත අලුත් වැඩපිළිවෙළට යා යුතු බව ද හිටපු මුදල් අමාත්‍යවරයා මෙහිදී අවධාරණය කර සිටියේය.

රට මුහුණ දී සිටින ගැටළු කිහිපයක් සහ ඉදිරි දේශපාලන ගමන් මග පිළිබඳව මෙම වැඩ සටහනේ දී ඔහු මෙලෙස අදහස් පළ කර සිටියේය.

'' ඉතා දරුණු ලෙස පරිහානියට පත්ව තිබූ ආර්ථිකය සහ දේශපාලන පරිසරය වෙනස් කොට මිනිස්සුන්ට හුස්මගෙන සැනසිල්ලේ ජීවත්වෙන්න පුළුවන් වටපිටාවක් හදන්න ජනාධිපති වික්‍රමසිංහ බලවත් උත්සහයක් දරමින් සිටිනවා. රට පත්ව තිබූ තත්ත්වයට වඩා හොඳ මට්ටමක තිබුණත් මම විශ්වාස කරන්නේ නැහැ ජනතාවට සියලු දේවල් වලින් පරිපූර්ණ වෙලා තියෙනවා කියලා ... ජනතාව ජීවත් වෙන්නේ බොහොම අමාරුවෙන්. 2048 වර්ෂය දක්වා අලුත් දියුණු රටක් හදන්න යන වැඩපිළිවෙලේ දී ඉදිරි වර්ෂ කිහිපය තුල ජනතාවගේ ආර්ථිකය ගොඩනගා ගන්නා වූ අලුත් ක්‍රියාමාර්ග හඳුන්වා දිය යුතුව තිබෙනවා.

දේශපාලනික වශයෙන් භේදභින්න කම් අතහැර අලුත් රටක් දියුණු රටක් ගොඩනගන්න පක්ෂ පාට භේදයකින් තොරව එකමුතු විය යුතුව තිබෙනවා. ඒ නිසයි මම මුලින් කිව්ව වගේ සජබයටත් ආයෙ මහ ගෙදරට එන්න කියල ආරාධනා කළේ. හරීන්, මනුෂ,වගේම හැරිසන් ගත්ත මග ගන්න කියලා මම සියලු දෙනාට ආරාධනා කරනවා එනිසා මහ ගෙදරට නැවත එන්න කියලා.

එජාපය දෙකඩ කිරීම පිටුපස කුමන්ත්‍රණයක්! පරණ කෝන්තර අමතක කරමු!

බොහෝ දෙනාට ගැටලුව තිබ්බේ රනිල්ට ජනපති වෙන්න බෑ කියල කියලා එහෙම බොරු මතයක් හදලා කුමන්ත්‍රණය කරලා තිබ්බා ඒත් අද එතුමා ජනාධිපති වෙලා.. ඒ හින්දා අපි ඔක්කොටම අපිට 2020 ඡන්දය නොදුන් විසිනම ලක්ෂයක් වූ පාක්ෂිකයන්ටත් නැවත එකතු වෙන්න අවස්ථාව ඇවිල්ල තියෙනවා. එක්සත් ජාතික පක්ෂය දෙකඩ කළේ කුමන්ත්‍රණකාරී වැඩපිළිවෙළක් මගින්. ඒකට හිටපු ජනපතිවරයෙකු වගකිව යුතුයි. නමුත් අද ඔක්කොටම තේරිලා තියනවා මොකද වෙලා තියෙන්නෙ කියලා. එනිසා අපි පරණ කෝන්තර අමතක කරලා රට වෙනුවෙන් වැඩ කළ යුතුයි.

එක්සත් ජාතික පක්ෂය කියන්නේ හැම වෙලේම රටේ ආර්ථිකය සහ අර්බුදවලින් බේරාගත් රට ගොඩ දාපු පක්ෂයක්. ඒ වගේම හැම ආගමකටම, සෑම ජන වර්ගයකටම, එකවගේ සලකපු පක්ෂයක්. නාගරික වගේම, ග්‍රාමීය ප්‍රජාවටත්, ජාති, ආගම්, කුල භේදයකින් තොරව මෙරට එක්සත් කළේත් එක්සත් කරන්නත් පුළුවන් යූඑන්පී එකට විතරයි.

මොකද මම එහෙම කියන්නේ අද මේ රට දියුණු කරන්න අත්‍යවශ්‍ය සාධකයක් තමයි සංහිඳියාව සහ සාමය. මේ රට ගොඩනගන්න හැමෝම එකතු කරන්න අලුත් බලවේගයක් අද ගොඩනගන්න අවශ්‍ය වෙලා තිබෙනවා. ඒ අලුත් බලවේගය හදන්න අලුතින් හිතලා අලුත් විදිහට වැඩ කරන්න ඕනේ ඒකට නායකත්වය දෙන්න සුදුසුම නායකයා තමයි වර්තමාන ජනාධිපති වරයා. විනාශකාරී,ජාතිවාදී දේශපාලනය වගේම අන්තවාදී වාමාංශික ව්‍යාපාරයත් මේ රට බිඳ වට්ටපු හැම මොහොතකම රට බේරා ගෙන ගොඩ ගත්තේ යූඑන්පී එක.

රාජ්‍ය සේවයේ කඩිනම් ප්‍රතිව්‍යුහගත කිරීමක් අත්‍යවශ්‍යයි

අද දාහත් ලක්ෂයක් ව සිටින රාජ්‍ය සේවය ගත්තහම මහජනතාවට ලොකු බරක් වෙලා තිබෙනවා. මොකද මහජන බදු මුදලින් තමයි ඔවුන්ට වැටුප් ගෙවන්න වෙලා තිබෙන්නේ. සමස්තයක් විදියට ගත්තම හොඳ රාජ්‍ය සේවකයින් සිටිනවා. නමුත් සියයට දෙකක් පමණ වූ දූෂිත නිලධාරීන් නිසා සමස්ත රාජ්‍ය සේවයම අකාර්යක්ෂම වෙලා තිබෙනවා. ඒ නිසා ප්‍රතිව්‍යුහගත කිරීමක් අත්‍යවශ්‍යමයි. මම එහෙම කියන්නේ මහජනතාවට සේවය ලබාදීම ඉලක්ක කරගත් දියුණු රාජ්‍ය සේවයක් හදන්න එක තුලින් මහජනතාවට මිත්‍රශීලී වඩා හොඳ රාජ්‍ය සේවාවක් ලබා දෙන්න මේ තුළින් හැකි වෙනවා.

ලෝකයට ගැළපෙන ලෙස ලංකාව ගොඩ නැඟුවේ සහ වෙනස් කළේ හැම මොහොතකම එක්සත් ජාතික පක්ෂය. ඉන් ප්‍රධාන වෙන්නේ ජේ ආර් ජයවර්ධන ජනාධිපතිවරයා විසින් 1977 විවෘත ආර්ථිකය හඳුන්වා දීම. ඒකෙ අඩුපාඩු ඇති හැබැයි ඒක තමයි විසඳුම සිංගප්පූරුව මැලේසියාව විතරක් නෙමෙයි චීනය පවා අද එකට ගිහිල්ලා.

රටක් දියුණුවීමට නම් ප්‍රතිව්‍යුහගත කිරීමක් අත්‍යවශ්‍යමයි. මහජනතාවට බරක් ඇති වෙලා තිබෙන පාඩු ලබන රාජ්‍ය ආයතන වලට ලබා දිය යුතු හොඳම විසඳුම ඒකයි. එහෙම නොවුණොත් වෙන්නේ අහිංසක ජනතාව හැමදාම මේවා නඩත්තු කරන්න බදු මුදල් ගෙවන්න සිද්ධ වෙන එකයි.

IMF එක කියන විදිහට අපි ප්‍රතිව්‍යුගත කිරීම අත්‍යවශ්‍ය නැහැ. සුද්දට ඕනි විදිහට නෙමේ අපේ ආර්ථික සැලසුම් ක්‍රියාත්මක කළ යුත්තේ ලංකාවට ඔබින ආකාරයටයි. එනිසා මම හිතන විදිහට මීට වඩා අපි විධිමත් සැලසුම් වලට යා යුතුයි.

මොකද මම 2016 මුදල් අමාත්‍යවරයා විදිහට දින සියයේ වැඩපිළිවෙළ තුළින් රටේ ආර්ථිකය ශක්තිමත් කරන වැඩපිළිවෙළක් ක්‍රියාත්මක කළ එනිසා ප්‍රායෝගිකව මම දන්නවා කරන්න ඔනි විදිහ. අපි රාජ්‍ය සේවකයින්ට රුපියල් දහදාහක වැටුප් වැඩි කළේ ආදායම උපයාගෙනයි. අනෙකුත් සහන ලබා දුන්නෙත් අන්න ඒ විදියටයි. ඒ නිසා ඉදිරි වර්ෂය තුළ අපි එවැනි වැඩපිලිවෙලකට යා යුතුයි.

වර්තමාන ජනාධිපතිවරයාට ඒක කරන්න පුළුවන් ශක්තිය කියනවා එනිසා අපි සියලු දෙනා ඒකට සහයෝගය ලබා දීමයි කළ යුත්තේ.

theleader.lk

පවතින වියළි කාලගුණ තත්ත්වය තවදුරටත් පැවතියහොත් ජල විදුලිය නිෂ්පාදනය කළ හැකි වන්නේ තවත් සති 04ක කාලයකට පමණක් බව ලංකා විදුලිබල මණ්ඩලය පවසයි.

පවතින වියළි කාලගුණය හමුවේ ජල විදුලිය නිෂ්පාදනය සියයට 15 දක්වා පහළ වැටී ඇති බවද වාර්තා වෙයි.

තාප විදුලි නිෂ්පාදනය හේතුවෙන් කප්පාදුවකින් තොරව මේ වනවිට විදුලි බලය ලබාදීමට හැකියාව පවතින බවද එම මණ්ඩලය සඳහන් කළේය.

ආරුගම්බේ සංචාරක කලාපය දෙස් විදෙස් සංචාරකයන්ගේ ආකර්ෂණය දිනාගත් මෙන්ම ඉහළ ආදායමක් ඉපැයිය හැකි සංචාරක කලාපයක් ලෙස සංවර්ධනය කිරීමේ වැඩපිළිවෙළ කඩිනමින් ක්‍රියාත්මක කරන බව ජනාධිපති රනිල් වික්‍රමසිංහ  පැවසීය.

සංවර්ධනය විය යුතු ක්ෂේත්‍ර හඳුනා ගනිමින් නිසි සැලැස්මක් ඔස්සේ එම කටයුතු ක්‍රියාවට නංවන ලෙස නිලධාරීන්ට උපදෙස් දුන් ජනාධිපතිවරයා ආරුගම්බේ වෙරළ තීරයේ ප්‍රචලිත දියමත ලිස්සා යාම වැනි ක්‍රීඩා ප්‍රවර්ධනය කිරීමෙන් ඉහළ ආදායමක් උපයා ගැනීමට ඇති හැකියාව ද පෙන්වා දුන්නේය.

ජනාධිපති රනිල් වික්‍රමසිංහ  මේ බව සඳහන් කර සිටියේ ආරුගම්බේ සංචාරක කර්මාන්තයේ නියුතු ව්‍යාපාරිකයන් සමඟ අද (25) පෙරවරුවේ පැවති හමුවේදීය.

සංචාරක ක්ෂේත්‍රයේ මතුව ඇති ගැටලු සොයා බැලීමට කැඳවා තිබූ මෙම සාකච්ඡාවට රාජ්‍ය නිලධාරීන් මෙන්ම සංචාරක කර්මාන්තය ආශ්‍රිත රැකියාවන්හි නියුතු පිරිස් ද එක්ව සිටියහ.

2035 වසර වන විට ගෝලීය දළ දේශීය නිෂ්පාදිතයෙන් 10%ක් හිමිවන්නේ සංචාරක ව්‍යාපාරය මඟින් බව ලෝක වාර්තා පෙන්වා දෙන බව මෙහිදී සඳහන් කළ ජනාධිපතිවරයා ඒ සඳහා ශ්‍රී ලංකාව ද සූදානම් කළයුතු බවත්, සංචාරක ක්ෂේත්‍රයෙන් ලැබෙන ආදායම මගින් ශ්‍රී ලංකාවේ මූල්‍ය ගැටලුවලට සෘජුව විසඳුම් ලබාගැනීමට හැකියාව පවතින බවත් පැවසීය.

නැගෙනහිර පළාතේ සංචාරක කරමාන්තය අදියර දෙකක් යටතේ සංවර්ධනය කළ යුතු අතර, ඉදිරි වසර 10 තුළ එම කටයුතු සම්පූර්ණයෙන් අවසන් කිරීමට අපේක්ෂා කරන බව ද ජනාධිපති රනිල් වික්‍රමසිංහ මහතා සඳහන් කළේය.

මේ අතර ජනාධිපති රනිල් වික්‍රමසිංහ මහතා අද (25) උදෑසන අම්පාර දිස්ත්‍රික්කයේ ආරුගම්බේ හා පීනට් ෆාම් වෙරළ තීරයේ නිරික්ෂණ චාරිකාවකට ද එක් විය.

එම සංචාරක ප්‍රදේශවල පවතින අඩුපාඩු පිළිබඳව සොයා බැලූ ජනාධිපතිවරයා එහි පැමිණ සිටි සංචාරකයන් සමඟ සුහඳ කතා බහක ද නිරත විය.

ඉන් අනතුරුව පැවති සාකච්ඡාවේ දී සංචාරක ක්ෂේත්‍රයේ පවතින ගැටලු පිළිබඳව දීර්ඝ වශයෙන් විමසා බැලිණි.

ආරුගම්බේ වෙරළ තීරය සංචාරක කලාපයක් ලෙස සංවර්ධනය කිරීමේ දී එහි පවතින ධීවර වරාය ධීවරයන්ට අවශ්‍ය පහසුකම් සමඟ වෙනත් ස්ථානයක ස්ථාපනය කිරීමට ඉදිරිපත් කර ඇති යෝජනාව පිළිබඳ මෙහිදී පාර්ලිමේන්තු මන්ත්‍රී ඩබ්ලිව්.ඩී. වීරසිංහ ජනාධිපතිවරයා දැනුවත් කළ අතර ඒ පිළිබඳව කඩිනම් පියවර ගත යුතු අතරම මෙම ප්‍රදේශය සංචාරක කලාපයක් ලෙස වෙන්කර ගනිමින් සංවර්ධනය කිරීමේ අවශ්‍යතාව ජනාධිපතිවරයා පෙන්වා දුන්නේය.

එසේම මෙම ප්‍රදේශයේ සංචාරක ව්‍යාපාරයේ නිරත වූවන්ට ව්‍යාපාරික ස්ථාන සඳහා ස්ථීර ඔප්පුවක් නොමැතිකම හේතුවෙන් මතුව ඇති ගැටලු පිළිබඳව ද ජනාධිපතිවරයාගේ අවධානය යොමු කෙරුණු අතර ඒ පිළිබඳව ද වාර්තාවක් කඩිනමින් ලබාදෙන ලෙසත්, ඊට විසඳුම් ලබාදීමට අපේක්ෂා කරන බවත් ජනාධිපති රනිල් වික්‍රමසිංහ  සඳහන් කළේය.

ව්‍යාපාරික ස්ථානවලට සහ එහි පැමිණෙන සංචාරකයන්ට මුහුණදීමට සිදුව ඇති පානීය ජල ගැටලුව පිළිබඳව ද මෙහිදී අවධානය යොමු කෙරිණි.

ආරුගම්බේ ප්‍රදේශයේ පානීය ජල ගැටලුව විසඳීම සඳහා යෝජිත හැඩ ඔය පානීය ජල ව්‍යාපෘතියේ ඉදිකිරීම් කටයුතු අවසන් වීමට තවත් වසර කිහිපයක් ගත විය හැකි බැවින් නාවික හමුදාවේ සහය ඇතිව දැනට පවතින ස්වභාවික කුඩා ජල මූලාශ්‍ර සඳහා ප්‍රතිආශ්‍රැතකරණ ජල පිරිපහදු යන්ත්‍ර සවි කිරීම පිළිබඳව සොයා බලා වාර්තාවක් ලබා දෙන ලෙසද ජනාධිපතිවරයා නිලධාරීන්ට උපදෙස් දුන්නේය.

මරණ දඬුවමට ලක්ව බන්ධනාගාරගතව සිටි හිටපු නියෝජ්‍ය පොලිස්පති වාස් ගුණවර්ධනට එරෙහිව අධිකරණය හමුවේ පවතින නඩුවකට අසත්‍ය සාක්ෂි ඉදිරිපත් කළ බවට චෝදනා ලැබ සිටි අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ජ්‍යෙෂ්ඨ පොලිස් අධිකාරි ශානි අබේසේකර ඇතුළු පොලිස් නිලධාරීන් 04 දෙනෙකු නිදොස් කොට නිදහස් කරන ලෙස ගම්පහ මහේස්ත්‍රාත් ශිලිණි පෙරේරා නියෝග කළා ය.

පොලිස් පරීක්ෂකවරුන් වන සුගත් මෙන්ඩිස්, නිශාන්ත සිල්වා හා උපපොලිස් පරික්ෂක ආර්. ප්‍රේමතිලක එලෙස නිදොස් කොට නිදහස් කෙරුණු සෙසු සැකකරුවෝ වෙති.

නඩුව ඉදිරියට පවත්වාගෙන යාමට තරම් ප්‍රමාණවත් සාක්ෂි පැමිණිලි පාර්ශවය ඉදිරිපත් කර නොමැති බැවින් එම සැකකරුවන් සිව් දෙනා නිදොස් කොට නිදහස් කිරීමට නීතිපතිවරයාගෙන් උපදෙස් ලැබී ඇති බවට එම දෙපාර්තමේන්තුව වෙනුවෙන් පෙනී සිටි නීතිඥවරුන් අධිකරණයට දැක්වූ කරුණු සලකා බැලීමෙන් අනතුරුව මහෙස්ත්‍රාත්වරිය එසේ නියෝග කළා ය.

සැකකරුවන් පිරිස නිදහස් කරන ලෙසට නීතිපතිවරයා දී තිබෙන උපදෙස් නැවත සලකා බලන ලෙස ද සිද්ධිය සම්බන්ධයෙන් විමර්ශන සිදුකළ කොළඹ අපරාධ කොට්ඨාසය අධිකරණය ඉල්ලා සිටියේ ය.

යම් නඩුවක් ඉදිරියට පවත්වාගෙන යන්නේ ද එම නඩුවට අදාළ සැකකරුවන් නිදහස් කරන්නේ ද යන්න පිළිබඳව නිගමනය කළ යුත්තේ නීතිපතිවරයා මිස විමර්ශන නිලධාරීන් නොවන බව ද සැකකරුවන් වෙනුවෙන් පෙනී සිටි නීතිඥ චමින්ද අතුකෝරළ කරුණු දක්වමින් අධිකරණය හමුවේ පැවසීය.

දෙපාර්ශවය දැක්වූ කරුණු සලකා බැලූ මහෙස්ත්‍රාත්වරිය සැකකරුවන් සිව් දෙනා නිදොස් කොට නිදහස් කළ අතර ගිනි අවි ආඥා පනත හා ලංකා දණ්ඩ නීති සංග්‍රහ පනත අනුව කොළඹ අපරාධ විමර්ශන කොට්ඨාසය මගින් සැකකරුවන් සිව් දෙනාට එරෙහිව චෝදනා ඉදිරිපත් කර තිබිණි.

වාණිජ බැංකු පොලී අනුපාතිකය අඩු කිරීම සඳහා වන චක්‍රලේඛය අද (25) දිනයේදී නිකුත් කරන බව මුදල් රාජ්‍ය අමාත්‍ය රංජිත් සියඹලාපිටිය කියයි.

අමාත්‍යවරයා මේ බව ප්‍රකාශ කළේ යටියන්තොට නගරයේදී අද දහවල් පැවති වැඩසටහකනික් අනතුරුව මාධ්‍ය වෙත අදහස් දක්වමිනි.

මෙහිදී තවදුරටත් අදහස් දක්වමින් අමාත්‍යවරයා සඳහන් කළේ රටේ පැවති ආර්ථික වාතාවරණය හමුවේ ගණුදෙනුකරුවන් අධෛර්මත් කර උද්ධමනය පාලනය කිරීමේ අරමුණෙන් බැංකු පොලී අනුපාතකය ඉහළ නැංවූ බවයි.

ඒ අනුව උද්ධමනය පහළ ගොස් ඇති බැවින් මහ බැංකුව විසින් දෙවතාවකදී බැංකු පොලී අනුපාතිකය පහළ දැමූවද වාණිජ බැංකු ඒ අනුව කටයුතු නොකළද මේ වතාවේ නව බැංකු පොලී අනුපාතික නීතියක් බවට පත් කරමින් අද දිනයේදී නව චක්‍රලේඛය නිකුත් කරන බවයි.

ඒ අනුව නව උකස් පොලී අනුපාතිකය 18% ක් ලෙසත් , බැංකු අයිරා පොලී අනුපාතිකය 23% ක්, ක්‍රෙඩිට් කාඩ්පත් සඳහා 28% ක් ආදී වශයෙන් පොලී අනුපාතිකයන් ක්‍රියාත්මක වන බවද අමාත්‍යවරයා එහිදී සඳහන් කළේය.

වෙළෙඳපොළ පොලී අනුපාත තීරණය කෙරෙන මහ බැංකුවේ ප්‍රතිපත්ති පොලී අනුපාතික තවදුරටත් නොවෙනස්ව පවත්වා ගෙන යෑමට තීරණය කර තිබේ.

ඒ අනුව මහ බැංකුව වාණිජ බැංකුවලට ණය ලබා දීමේදී අය කරන පොළිය වන නීත්‍ය ණය පහසුකම් අනුපාතිකය 12% ක් වනු ඇති.

වාණිජ බැංකුවල ඉතුරුම් සඳහා මහ බැංකුව ගෙවන පොළිය හෙවත් නිත්‍ය තැන්පතු අනුපාතිකය 11% කි.

ශ්‍රි ලංකා මහ බැංකුව සිය මුල්‍ය ප්‍රතිපත්තිය ලිහිල් කරමින් අවස්ථා ගණනාවකදී සිය ප්‍රතිපත්ති පොළී අනුපාතික පහළ දැමුවේ ය.

ඊට අමතරව වාණිජ බැංකු මහ බැංකුවේ අනිවර්යෙන් පවත්වා ගත යුතු ව්‍යවස්ථාපිත සංචිත අනුපාතය ද පහළ දැමුවේ ය.

කෙසේ වෙතත් ශ්‍රි ලංකා මහ බැංකුවේ මුදල් මණ්ඩලය නිරීක්ෂණය කර ඇත්තේ, ඊට සමාගාමීව වෙළෙඳපොළ ණය පොලී අනුපාතික පහණ ගොස් නොමැති බවයි.

ඒ අනුව වෙළෙඳපොළ ණය අනුපාතිකයන් සඳහා උපරිම සීමාවන් පැනවීම කෙරෙහි මුදල් මණ්ඩලයේ අවදානය යොමුව තිබේ.

මේ යටතේ උකස් ණය සඳහා වසරකට අය කළ හැකි උපරිම පොලී අනුපාතිකය 18% ක් ලෙසත් ණය කාඩ් පත් සදහා අය කර ගත හැකි උපරිම පොලීය 28% ක් ලෙසත්, ඊට අමතරව දඩ පොලිය 2% කට සීමා විය යුතු බවටත් මුදල් මණ්ඩලයේ අදහසයි.

ඒ සඳහා වන නියෝග නුදුරේදී නිකුත් කිරීමට අපේක්ෂා කරන බව ශ්‍රී ලංකා මහ බැංකුව නියෝග කළේ ය.

ලංකා ධීවර සංස්ථාවේ මත්ස්‍ය නිෂ්පාදන online ක්‍රමවේදය හරහා නිවසට ගෙන්වා ගැනීමට හැකි බව ධීවර රාජ්‍ය අමාත්‍යංශය පවසයි.

ධීවර රාජ්‍ය අමාත්‍ය පියල් නිශාන්ත ද සිල්වා සඳහන් කළේ, වර්තමාන වෙළෙඳපොළට සරිලන පරිදි යාවත්කාලීන කරමින් ධීවර සංස්ථා මත්ස්‍ය නිෂ්පාදන ආහාර සහ භාණ්ඩ බෙදා හරින සේවා හරහා නිවෙස් වෙත ගෙන්වා ගැනීමට පාරිභෝගිකයන් හට අවකාශය උදාකර දී ඇති බව ය.

ඊයේ (අගෝ. 23) නාරාහේන්පිට, ආර්ථික මධ්‍යස්ථාන පරිශ්‍රයේ පිහිටි H18 නම් වූ ධීවර සංස්ථා වෙළෙඳසලක් නවීකරණය කර නැවත විවෘත කිරීමේ අවස්ථාවට එක්වෙමින් අමාත්‍යවරයා මේ බව සඳහන් කළේ ය.

ඒ අනුව, පළමු අදියරේදී කොළඹ සහ තදාසන්න ප්‍රදේශවල ජනතාවට මෙම පහසුකම සැලසෙනු ඇත.

ධීවර අමාත්‍යංශය සහ ධීවර සංස්ථාව ද විවිධාකාර අභියෝගයන්ට මුහුණ දෙමින් සිටිය ද, දැක්මක් සහිතව ඉදිරියට යාමට උත්සහ දරන බව අමාත්‍යවරයා සඳහන් කළේ ය.

ශ්‍රී ලංකාවේ ජාතික හා ආගමික සංහිඳියාව බරපතල ලෙස අවදානමකට ලක් කල හැකි සිදුවීම් ගණනාවක්ම පසු ගිය කාලය තුළ වාර්තා වීම පිළිබඳව බලවත් ලෙස කනස්සල්ලට පත් ව සිටින බව පවසන 'සාධාරණ සමාජයක් සහා වන ජාතික ව්‍යාපාරය', රටේ සාමයට හා අන්තර් ආගමික සංහිඳියාවට හානි සිදු විය හැකි කුමන හෝ ක්‍රියාවකට සහය නොදක්වන ලෙසට සමස්ත ජාතියෙන් ඉල්ලා සිටියි.

'සාධාරණ සමාජයක් සහා වන ජාතික ව්‍යාපාරය' වෙනුවෙන් එහි සභාපති හිටපු කරු ජයසුරිය මාධ්‍ය නිවේදනයක් නිකුත් කරමින් එබව සඳහන් කර ඇත.

අප මාතෘභූමිය මත නැවත ලේ වැඟිරීමකට තුඩු දිය හැකි කිසිදු ක්‍රියාමාර්ගයකට වචන මාත්‍රයකින් හෝ එකඟත්වයක් පළ නොකරන ලෙසට ජාතියේ නාමයෙන්, රටේ අනාගත දරු පරපුරේ නාමයෙන්, එමෙන් ම අහිංසාවාදය පදනම් කරගත් පරමෝත්තම ධර්ම මාර්ගයන්ට අපව යොමු කළ අපගේ ශාස්තෘන් වහන්සේලාගේ නාමයෙන් මෙම ආයාචනය සිදු කරන බව හිටපු කතානායකවරයා කියා සිටියි.

 හිටපු කතානායක කරු ජයසුරියගේ නිවේදනයේ මෙසේද සඳහන් වේ.

 '' ආගමික ඉගැන්වීම් පදනම් කර ගත් සෑම දර්ශනයක්ම හා පූජනීයත්වයෙන් සළකන සෑම ආගමික සංකේතයක්ම සමස්ත මානව වර්ගය සතු වූ පූජනීය උරුමයන් වේ. ඒවා හුදු එක් ජන වර්ගයකට හෝ ආගමික ප්‍රජාවකට පමණක් සීමා වන අයිතිවාසිකමක් හෝ භෞතික වස්තූන් නොවන බව අප සියල්ලන්ම මැනවින් අවබෝධ කරගත යුතුව ඇත. එමෙන් ම පුරාවිද්‍යාත්මක වටිනාකමකින් යුත් ඕනෑම භෞතික වස්තුවක් හෝ කලාපයක් සැළකිය යුත්තේ සමස්ත මානව ප්‍රජාවටම සාඩම්බර විය හැකි ලෝක උරුමයක් ලෙසටය.

ජාතියක ප්‍රෟඪත්වය හෝ ආගමක උත්තරීතරත්වය රැඳී පවතින්නේ ඒවා මගින් සමස්ත ලෝකයටම දායාද කරන්නා වූ මහාර්ඝ පුරුෂාර්ථයන් හා මඟපෙන්වීම් මතය. අන්තවාදී, අධිපතිවාදී, හිංසාවාදී සෑම ක්‍රියාකාරකමක් මගින් ම සිදු කරන්නේ එකී මහාසාර ගුණයන් කෙලෙසා දැමීමකි.

එබැවින් තම ආගමට, උපන් රටට, සිය සංස්කෘතික උරුමයන්ට සැබෑ ආදරයකින් කටයුතු කරන සියල්ලන් වෙතින්ම අප ඉල්ලා සිටින්නේ අන්තවාදීන්ගේ උපක්‍රමයන්ට නතු නොවීමට වගබලා ගන්නා ලෙසට ය.තම ආගමට රටට හෝ ජාතියට කිසිදු ආකාරයේ නිගරුවක් නොවන ලෙස කටයුතු කරමින් මතු පරපුරට හෝ යහපත් රටක් උරුම කර දෙනු උදෙසා වගකීමෙන් යුතුව කටයුතු කරන ලෙසටය.''

එක්වරක් පමණක් භාවිත කරන ප්ලාස්ටික් අයිතම් 09ක් ඔක්තෝම්බර් මස 01 වැනිදා සිට ක්‍රියාත්මක වන පරිදි රට තුළ නිෂ්පාදනය හෝ අලෙවිය තහනම් කර ඇති බව මධ්‍යම පරිසර අධිකාරිය පවසයි.

ඊට අදාළ ගැසට් නිවේදනය පරිසර අමාත්‍ය නසීර් අහමඩ්  විසින් නිකුත් කර ඇත.

ඒ අනුව එක්වරක් පමණක් භාවිත කරන බීම බට, ප්ලාස්ටික් පිඟන්, කෝප්ප, හැඳි, ගෑරුප්පු සහ පිහි, ප්ලාස්ටික් මල්මාලා හා ප්ලාස්ටික් ඉදිආප්ප වට්ටි යන අයිතම ඔක්තෝම්බර් මස 01 වන දින සිට ක්‍රියාත්මක වන පරිදි තහනම් වේ.

ඒවා රට තුළ නිෂ්පාදනය, දේශීය භාවිතය සඳහා ආනයනය, විකිණීම, නොමිලේ පිරිනැමීම හෝ ප්‍රදර්ශනය කිරීම තහනම් වන අතර එම නියෝග කඩකරන්නන්ට එරෙහිව ජාතික පාරිසරික පනතේ විධිවිධානවලට අනුව නීතිය ක්‍රියාත්මක කරන බව මධ්‍යම පරිසර අධිකාරිය ප්‍රකාශ කළේය.

ශ්‍රී ලංකාවට අලුතින් පත්ව පැමිණි තානාපතිවරු දෙදෙනෙක් සහ මහකොමසාරිස්වරයෙක් අද (23) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ  වෙත සිය අක්ත පත්‍ර භාර දුන්හ.

ඉතාලි ජනරජය සහ ජර්මානු ෆෙඩරල් ජනරජය සඳහා නව තානාපතිවරුන් දෙදෙනෙක් පත්ව සිටින අතර, මහා බ්‍රිතාන්‍යයේ එක්සත් රාජධානිය සහ උතුරු අයර්ලන්තය සඳහා නව මහකොමසාරිස්වරයෙක් පත්ව සිටියි.

ජනාධිපති කාර්යාලය වෙත පැමිණි රාජ්‍ය තාන්ත්‍රිකයන් ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක  විසින් පිළිගනු ලැබීය.

අද අක්පත්‍ර භාරදුන් රාජ්‍ය තාන්ත්‍රිකයන්ගේ නාම ලේඛනය පහත දැක්වේ

1. Mr. Damiano Francovigh – Ambassador – designate of the Republic of Italy in Colombo.

( දමියානෝ ෆ්‍රැන්කොවිහ් මහතා – තානාපති – ඉතාලි ජනරජය)

    2. Mr. Andrew Patrick – High Commissioner – designate of the United Kingdom of Great Britain & Northern Ireland

(ඇන්ඩෘ පැට්‍රික් මහතා – මහ කොමසාරිස් – මහා බ්‍රිතාන්‍යයේ එක්සත් රාජධානිය සහ උතුරු අයර්ලන්තය)

      3. Dr. Felix Neumann- Ambassador – designate of the Federal Republic of Germany

(ආචාර්ය ෆෙලික්ස් නියුමාන් මහතා – තානාපති – ජර්මානු ෆෙඩරල් ජනරජය)

අක්ත පත්‍ර භාරගැනීමෙන් අනතුරුව ජනාධිපති රනිල් වික්‍රමසිංහ මහතා නව තානාපතිවරුන් සහ මහකොමසාරිස්වරයා සමඟ සුහද කතා බහක ද නිරත විය.

විදේශ කටයුතු රාජ්‍ය අමාත්‍ය තාරක බාලසූරිය, ජනාධිපති ලේකම් සමන් ඒකනායක, විදේශ කටයුතු අමාත්‍යාංශ ලේකම් අරුණි විජේවර්ධන යන අය ද මෙම අවස්ථාවට එක් සිටිය හ.

සිංගප්පූරු සංචාරය නිමා කරමින් ජනාධිපති රනිල් වික්‍රමසිංහ  ඇතුළු පිරිස ඊයේ (22) රාත්‍රී දිවයිනට පැමිණ තිබේ.

කටුනායක ගුවන්තොටුපොළ කාර්යභාර කළමනාකාරවරයා සඳහන් කළේ, ඊයේ රාත්‍රී 11.27 ට සිංගප්පූරු ගුවන් සේවයට අයත් යානයකින් ජනාධිපතිවරයා ඇතුළු පිරිස දිවයිනට පැමිණි බවයි.

දෙදින නිල සංචාරයක් සඳහා 21 වැනි දා ජනාධිපතිවරයා සිංගප්පූරුව බලා පිටත්ව ගියේ ය.

එහිදී ජනාධිපතිවරයා එරට ජනාධිපතිනිය, අග්‍රාමාත්‍යවරයා හා ආරක්ෂක අමාත්‍යවරයා ඇතුළු පිරිසක් හමු වී ද්විපාර්ශ්වික සාකච්ඡාවල නිරත වුණි.

සිංගප්පූරුවේ දෙදින නිල සංචාරයක නිරත ජනාධිපති රනිල් වික්‍රමසිංහ  සහ සිංගප්පූරු අග්‍රාමාත්‍ය ලී සියෙන් ලුන්ග් (Lee Hsien Loong) මහතා අතර නිල හමුව අද (22) දහවල් ඉස්තානා මන්දිරයේ දී සිදු විය.

මෙහිදී සිංගප්පූරු අග්‍රාමාත්‍යවරයා විසින් ජනාධිපති රනිල් වික්‍රමසිංහව ඉතා සුහදශීලිව පිළිගනු ලැබීය.

නායක දෙපළ අතර සුහද කතා බහකින් අනතුරුව දෙරට අතර ද්විපාර්ශ්වික සාකච්ඡා ආරම්භ කෙරිණි.

ශ්‍රී ලංකාව සහ සිංගප්පූරුව අතර පවතින සහයෝගීතාව ශක්තිමත්ව ඉදිරියට ගෙන යාම පිළිබඳ මෙහිදී නායකයන්ගේ අවධානය යොමු විය.

දෙරට අතර පුළුල් ආර්ථික හවුල්කාරිත්වයක් ඇති කර ගැනීම පිළිබඳව ද නායකයෝ දීර්ඝ ලෙස සාකච්ඡා කළහ.

එසේම පැරිස් සම්මුතියේ 6 වන වගන්තියට අනුව කාබන් හර කිරීම පිළිබඳ ශ්‍රී ලංකා රජය සහ සිංගප්පූරු රජය අතර සහයෝගීතාව සඳහා වූ අවබෝධතා ගිවිසුමට ද මින් අනතුරුව ජනාධිපති රනිල් වික්‍රමසිංහ  සහ සිංගප්පූරු අග්‍රාමාත්‍යවරයා ඉදිරියේ අත්සන් තැබිණි.

සිංගප්පූරුවේ වෙළෙඳ හා කර්මාන්ත ස්ථීර ලේකම් (සංවර්ධන) බේහ් ස්වන් ජින් මහතා (Beh Swan Gin) සහ සිංගප්පූරුවේ ශ්‍රී ලංකා මහ කොමසාරිස් සශිකලා ප්‍රේමවර්ධන  ගිවිසුමට අත්සන් තැබීය.

පැරිස් ගිවිසුමේ 6වන වගන්තිය මඟින් ජාත්‍යන්තර කාබන් වෙළෙඳාම යටතේ හරිතාගාර වායු විමෝචනය අඩු කිරීම අරමුණු කර ගනිමින් ලාභදායී අයුරින් සහයෝගයෙන් කටයුතු කිරීමට රටවලට අවස්ථාව ලබා දී තිබේ. ඒ අනුව පැරිස් ගිවිසුමේ සඳහන් රාමුව තුළ කාබන් හර කිරීම පිළිබඳ ශ්‍රී ලංකා රජය සහ සිංගප්පූරු රජය අතර සහයෝගීතාව සඳහා වූ අවබෝධතා ගිවිසුමට මෙලෙස අත්සන් තැබිණි.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජේවර්ධන, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග යන අය ද ජනාධිපතිවරයා සමග මෙම අවස්ථාවට එක්ව සිටියහ.

මේ අතර සිංගප්පූරුවේ තිරසර සහ පරිසරය පිළිබඳ අමාත්‍යවරිය වන ග්‍රේස් ෆු හායි ඉයෙන් (Grace FU Hai yien)  ද ඊයේ (21) පස්වරුවේ ජනාධිපති රනිල් වික්‍රමසිංහ  හමු වී සාකච්ඡා පැවැත්වීය.

යම් අයකු නීතිය අතට ගෙන ක්‍රියා කරන්නේ නම් හෝ එවැනි තත්වයක් ඇති කිරීම සඳහා අනුබල දෙන්නේ නම් ඒ ඕනෑම පුද්ගලයෙකුට හෝ සංවිධානයකට එරෙහිව තරාතිරම නොබලා නීතිය දැඩිව ක්‍රියාත්මක කරන බව මහජන ආරක්ෂක අමාත්‍ය ටිරාන් අලස්  අවධාරණය කරයි.

මහජන ආරක්ෂක අමාත්‍යවරයා නිවේදනයක් නිකුත් කරමින් මේ බව සඳහන් කර ඇත.

එම නිවේදනයේ සඳහන් වන්නේ වතුකරයේ වූ සිද්ධියක් සම්බන්ධයෙන් මහජන නියෝජිතයකු විසින් පසුගිය ඉරිදා දිනයේ ජනතාව ප්‍රකෝප කරනා ආකාරයෙන් වගකීම් විරහිතව සිදුකර ඇති ප්‍රකාශයක් සම්බන්ධයෙන් අවධානය යොමු ඇති බවය.

ප්‍රචණ්ඩත්වයට එරෙහිව ආත්මාරක්ෂාව සඳහා ප්‍රතිප්‍රහාර එල්ල කළ යුතු බවත්, රජය සහ නීතිය අපව ආරක්ෂා නොකරන්නේ නම් එය අපගේ අයිතියක් බවටත් එම මහජන නියෝජිතයා එදින කළ ප්‍රකාශ කර තිබු අතර සමාජ මාධ්‍ය ඔස්සේ ඊට පුළුල් ප්‍රචාරයක් ලබාදී තිබිණ.

මෙවැනි වෛරී ප්‍රකාශවල ගොදුරක් වී නීතිය අතට ගෙන කටයුතු නොකරන්නැයි මහජන ආරක්ෂක අමාත්‍යවරයා වතුකරය ඇතුළු සමස්ත ජනතාව ගෙන් කාරුණිකව ඉල්ලා සිටියි.

ඇතැම් දේශපාලකයන් ජන කොටස්වල ඡන්ද ලබාගැනීමේ පටු අරමුණ ඇතිව කරන ප්‍රකාශවල ගොදුරක් වී යම් අයකු නීතිය අතට ගෙන ක්‍රියා කරන්නේ නම් හෝ එවැනි තත්වයක් ඇති කිරීම සඳහා අනුබල දෙන්නේ නම් ඒ ඕනෑම පුද්ගලයෙකුට හෝ සංවිධානයකට එරෙහිව තරාතිරම නොබලා නීතිය දැඩිව ක්‍රියාත්මක කරන බව මහජන ආරක්ෂක අමාත්‍යවරයා අවධාරණය කර සිටියි.

ජාතික ගීය ගායනා කිරීම පිළිබඳ නව මාර්ගෝපදේශ මාලාවක් ස්වදේශ කටයුතු අමාත්‍යාංශය විසින් පත් කරන ලද කමිටුවක් මගින් හඳුන්වාදීමට යෝජනා කර තිබේ.

ගායන ශිල්පිනී උමාරා සිංහවංශ විසින් ජාතික ගීය නිවැරදි නොවන ආකාරයට ගායනා කර ඇත් ද යන්න සම්බන්ධයෙන් සොයා බැලීමට පත් කළ කමිටුව විසින් මෙම යෝජනාව ඉදිරිපත් කර ඇති බව සඳහන්ය.

ස්වදේශ කටයුතු අමාත්‍යාංශයේ අතිරේක ලේකම්වරයෙකු සහ විමර්ශන නිලධාරියෙකු අදාළ කමිටුවට පත් කළ අතර ඔවුන් මේ සම්බන්ධයෙන් යෝජනා කිහිපයක් ඉදිරිපත් කර තිබේ.

ඒ අනුව ජාතික ගීය ගායනා කළ යුතු ආකාරය පිළිබඳ අමාත්‍ය මණ්ඩල සංදේශයක් ඉදිරිපත් කර එය පාර්ලිමේන්තුව ඔස්සේ සම්මත කරගැනීම මෙමගින් යෝජනා කර ඇති බව සඳහන් ය.

ඊට හේතුවී ඇත්තේ මෙරට ජාතික කොඩිය භාවිත කළ යුතු ආකාරය පිළිබඳ මාර්ගෝපදේශ සඳහන්ව තිබුණ ද ජාතික ගීය ගායනයේදී මධ්‍ය ස්වරයෙන් ගායනා කළ යුතු බවට ආණ්ඩුක්‍රම ව්‍යවස්ථාවේ පමණක් සඳහන්ව තිබීම ය.

කෙසේවෙතත් උමාරා සිංහවංශ ජාතික ගීය උච්ඡ ස්වරයෙන් ගායනා කර ඇති බවට කමිටුව විසින් හදුනාගෙන ඇති අතර එය ඇය විසින් ද පිළිගෙන තිබේ.

විමර්ශන කණ්ඩායම විසින් මීට අදාළ වාර්තාව පසුගියදා රාජ්‍ය පරිපාලන හා ස්වදේශ කටයුතු අමාත්‍යාංශ ලේකම්වරයා වෙත භාරදී ඇත.

චීනයේ බීජිං නෝමල් විශ්වවිද්‍යාලය (Beijing Normal University – BNU) හා අධ්‍යාපනික තොරතුරු තාක්ෂණය සඳහා වන යුනෙස්කෝ ආයතනය (UNESCO IITE) එක්ව සංවිධාන කරන ලද ගෝලීය සුහුරු අධ්‍යාපන සමුළුව – 2023 (Global Smart Education Conference) සඳහා ශ්‍රී ලංකාව නියෝජනය කරමින් අධ්‍යාපන අමාත්‍ය ආචාර්ය සුසිල් ප්‍රේමජයන්ත  සහභාගි විය.

චීනයේ බීජිං නෝමල් විශ්වවිද්‍යාලයේ දී එම සමුළුව පැවැත්වුණි.

2016 වර්ෂයේ දී ආරම්භ කරන ලද මෙම සමුළුවේ තේමාව වන්නේ ‘අධ්‍යාපන පරිවර්තනය සහ දත්ත කළමනාකරණයයි’.

එම තේමාවට අනුව 2023 වසරට අදාළ ව අධ්‍යාපනික ඩිජිටල්කරණය සහ යාවජීව අධ්‍යාපනය, දත්ත පාලනය හා ඥාන ගවේෂණය, කෘත්‍රීම බුද්ධි හා අධ්‍යාපනික සොයාගැනීම් පාලනය වැනි විෂයන් පිළිබඳ මෙහි දී සාකච්ඡා විය. ලොව පුරා විසිරී සිටින ප්‍රතිපත්ති සම්පාදකයන්, පර්යේෂකයන් සහ වෘත්තීකයන් මෙම සමුළුව‍ට සහභාගි විය.

ආචාර්ය සුසිල් ප්‍රේමජයන්ත  මෙම සමුළුවේ සමාරම්භක අවස්ථාවට සහභාගී වෙමින් තාක්ෂණික ව බලගැන්වීම් සහිත ව මෙරට අධ්‍යාපන පරිවර්තන ක්‍රියාවලිය සිදු කරගෙන යෑමේ දී මුහුණ දෙමින් සිටින අභියෝග හා ලද විවිධ අද්දැකීම් සම්බන්ධයෙන් කරුණු සහිත ව අදහස් දැක්වී ය. අමාත්‍යවරයාගේ දේශනය එම සමුළුවේ වැඩි අවධානයක් දිනාගත් අතර මෙරට අධ්‍යාපන ක්ෂේත්‍රය තුළ සිදු කෙරෙමින් පවතින අධ්‍යාපන පරිවර්තන ක්‍රියාවලිය සඳහා මෙහි දී ලද හැකි විශේෂඥ දැනුම ඉතා වැදගත් බව ද අමාත්‍යවරයා සඳහන් කළේ ය.

ජනාධිපති රනිල් වික්‍රමසිංහ සිංගප්පුරු ජනාධිපති හලීමා යාකොබ්  සමග සාකච්ඡාවක නිරත වී තිබේ.

සිංගප්පුරුවේ දෙදින නිල සංචාරයක නිරත ජනාධිපතිවරයා අද (21) පෙරවරුවේ එරට ජනාධිපතිවරිය හමු වු බව ජනාධිපති මාධ්‍ය අංශය පැවසීය.

ජනාධිපති රනිල් වික්‍රමසිංහ සිංගප්පුරු අග්‍රාමාත්‍ය ලී සියෙන් ලූන්ග් සහ ආරක්ෂක අමාත්‍ය නෙං එං හෙන් සහ පරිසර අමාත්‍ය ග්‍රේස් ෆූ හායි යෙන් යන අය අතර සාකච්ඡා කිරීමට නියමිතය.

දෙරට අතර ද්විපාර්ශ්වික සාකච්ඡාවලට අමතරව පැරිස් ගිවිසුමට අනුව කාබන් හර කිරීම පිළිබඳව අවබෝධතා ගිවිසුමකට ද සිංගප්පුරුව සහ ශ්‍රී ලංකාව අත්සන් තැබීමට නියමිත බව වාර්තා වේ.

මේ අතර, ජනාධිපති රනිල් වික්‍රමසිංහ  එරට ආරක්ෂක අමාත්‍ය ආචාර්ය එන් එන්ග් හෙන්  හමු වූ අතර එහිදී භූ දේශපාලනික වර්ධනයන් සහ කුඩා සමුද්‍රීය රටවල් සඳහා කලාපීය ස්ථාවරත්වයේ වැදගත්කම පිළිබඳව සාකච්ඡා කර තිබේ.

ප්‍රදේශ කිහිපයක් සඳහා උණුසුම් කාලගුණ තත්ත්වයක් පිළිබඳ අවවාදාත්මක නිවේදනයක් කාලගුණවිද්‍යා දෙපාර්තමේන්තුවෙන් නිකුත් කර ඇත.

ඒ අනුව උතුරු, උතුරු මැද, නැගෙනහිර සහ ඌව පළාත් සහ හම්බන්තොට දිස්ත්‍රික්ක සඳහා එම අවවාදාත්මක නිවේදනය බලපවත්වේ.

ඉහත ප්‍රදේශවල ජීවත්වන ජනතාවට මිනිස් සිරුරට දැනෙන උණුසුම අවධානය යොමු කළ මට්ටමක පැවතිය හැකි බව කාලගුණවිද්‍යා දෙපාර්තමේන්තුව එම නිවේදනයෙන් වැඩිදුරටත් සදහන් කරයි.