පුවත්

හිටපු මුදල් අමාත්‍ය මංගල සමරවීර විසින් "ශ්‍රී ලංකාවේ නින්දිත සියවස"මැයෙන් විශේෂ නිවේදනයක් නිකුත්කර ඇත.

අදාළ සම්පූර්ණ නිවේදනය පහත දැක්වෙයි.

ශ්‍රී ලංකාවේ නින්දිත සියවස !

“දැන් සිදු වන සෑම දෙයක්ම මීට පෙරද සිදුවී ඇති බවත්, ඒවා නැවත සිදුවනු ඇති බවත් නිරන්තරයෙන් මෙනෙහි කරන්න. අතීත ඉතිහාසයෙන් රඟ දක්වන සමස්ත නාට්‍ය හා එක සමාන දර්ශන සියල්ල සමාන වන අතර වෙනස් වන්නේ එහි නළුවන් පමණකි.” - මාකස් ඕරෙලියස්

චීන කොමියුනිස්ට් පක්ෂයේ ශත සංවත්සරය වෙනුවෙන් සමරු කාසියක් නිකුත් කිරීමේ පෙර නොවූ විරූ පියවරක් ශ්‍රී ලංකා මහ බැංකුව විසින් ගෙන ඇති බව ජුනි 27 සන්ඩේ ටයිම්ස් පුවත්පත විසින් වාර්තා කරන ලදී. මෙම සිද්ධිය සිදු වන්නේ ශ්‍රේෂ්ඨාධිකරණය විසින් අපගේ ස්වෛරීභාවය උල්ලංඝනය කළ හැකි වගන්ති කිහිපයක් ඉවත් කිරීමට ප්‍රථම ආණ්ඩුව විසින් හදිසියේ පාර්ලිමේන්තුවට ඉදිරිපත් කර සම්මත කර ගන්නට උත්සහ කල ඉදිරි වසරවලදී අපේ රටවල ස්වාධීනත්වයට බරපතල තර්ජනයක් එල්ල කල හැකි කොළඹ පෝට් සිටි කෙටුම්පතෙහි උණුසුම යන්නටත් මත්තෙනි.

එපමණක් නොව නොබෝ දිනක ශ්‍රී ලංකාවේ ප්‍රමුඛ පෙළ විකාශන ආයතනයක් වන හා ඇතැම් විට සත්‍ය ලෙස රටේ ස්වාධීන එකම නාලිකාව වන සිරස නාලිකාව (මා ද පසුගිය දශක තුන තුළ කැබිනට් අමාත්‍යවරයකු ලෙස සේවය කළ විවිධ කාල පරිච්ඡේදයන් තුළ එහි විවේචන වලට ලක් විය) විසින් කල හෙළිදරව්වක් මගින් පාලක පවුලේ ජේෂ්ඨ කැබිනට් අමාත්‍යවරයෙකුගේ අනුග්‍රහය යටතේ චීන හමුදා නිල ඇඳුමින් සැරසුණු චීන පුද්ගලයින් දකුණේ පළාතේ (තරුණ විරැකියාව ඉහළම මට්ටමක පවතින) ඓතිහාසික වටිනාකමක් ඇති වැවක් හෑරීමේ කටයුතු වල යෙදෙන ආකාරය අපි දුටුවෙමු.

මෙම සිද්ධි දකින පුද්ගයකුට සිතට නැගෙන කාරනා දෙකකි. එනම් අද රාජ්‍යතන්ත්‍රය තුල ඉතා ලිහිල් ලෙස භාවිතා වන ව්‍යාතිරේක ප්‍රදේශගතකරණය මිත්‍ර රටක් සමඟ රාජ්‍ය තාන්ත්‍රික සබඳතා අඛණ්ඩව පවත්වාගෙන යාමක් ලෙස සැලකිල්ලට ගම්ද නැතහොත් මෙය ශ්‍රී ලංකාවේ ස්වෛරීභාවය දැඩි ලෙස උල්ලංඝනය කිරීමක් ලෙස සැලකිය යුතුද යන්නයි.

අනාගත ඉතිහාසඥයින් මෙම කරුණ ශ්‍රී ලංකාවේ නින්දිත සියවස’ හි ආරම්භය ලෙස හඳුන්වනු ඇත්ද?

චීනය ලෝකයේ ශ්‍රේෂ්ඨතම හා වඩාත්ම පුරාණ රටවලින් එකකි. එය රටකට වඩා ශිෂ්ටාචාරයකි. සහස්‍ර ගණනාවක් පුරා පාලනය කළ “ආකාශ රාජවංශිකයින්” අති මහත් රාජ්‍යයක් පාලනය කිරීම සඳහා මෙලොවට එවන ලද ස්වර්ගීය නියෝජිතයන් බව අවංකවම විශ්වාස කළහ. හොන්ගුඕ රාජධානිය විසින් ම්ලේච්ඡ වූ ලෝකයක් ශිෂ්ටසම්පන්න කළහ. අධිරාජ්‍යයා මනුෂ්‍ය වර්ගයාගේ උත්තරීතර පරමාධිපතියා ලෙස සලකන ලදී. ඔහු බොහෝ විට “මනුෂ්‍යත්වයේ අධිරාජ්‍යයා” ලෙස හඳුන්වනු ලැබූ අතර ඔහුගේ රාජ්‍ය තාන්ත්‍රිකයින් “ආකාශ උසාවියේ ස්වර්ගික දූතයන්” ලෙස එකල හැඳින්විණි. ඔවුන් හොන්ගුඕ විශ්වයේ කේන්ද්‍රය ලෙස සැලකූ අතර, එම නිසා බාහිර ලෝකයේ ‘ම්ලේච්ඡයන්’ සමඟ සියලු අන්තර්ක්‍රියා සීමිත විය.

ම්ලේච්ඡයන් ලෙස සලකන ලද අයවලුන්ගේ භාෂා විශේෂ අවසරයකින් තොරව ඉගෙනීම / පරිවර්තනය කිරීම තහනම් කරන ලද අතර, රාජධානිය තුළට ඇතුළුවීම සහ සංචාරය කිරීම ද තහනම් කරන ලදී. ගුවැන්ෂු වරාය (කැන්ටන්) පමණක් විදේශිකයින්ට ඔවුන්ගේ වෙළඳාම සඳහා විවෘතව තිබුණි. වික්ටෝරියා රැජිනගේ තානාපතිවරයාට පවා අධිරාජ්‍යයා හමු වීමට ඉඩක් ලැබෙන තුරු සති ගණනාවක් වරාය අවට රැඳී සිටීමට සිදු විය. පසුව රාජකීය මණ්ඩපයේ දී ඉංග්‍රීසි රාජ්‍ය තාන්ත්‍රිකයා අධිරාජ්‍යයා ඉදිරියේ ‘කව්ටෝ’ (ඔහු ඉදිරියේ වැඳ වැටීම සහ නළල තුන් වරක් බිම ස්පර්ශ කිරීම) කිරීමට එකඟ වීමේ පදනම මත බීජිං අධිරාජ්‍යයා බැහැදැකීමට අවස්තාව ලබා දීමට තීරණය විය.

17 වන ශතවර්ෂයේ අධිරාජ්‍යවාදයේ දියුණුවත් සමඟ බටහිර බලවතුන් වෙළඳාම / වාණිජමය අරමුණු සඳහා මෙම අතිවිශාල රාජධානියට පිවිසීමට නැවත නැවතත් උත්සාහ කළ නමුත් චීනය එම හිරු නොබසින අධිරාජ්‍යයේ කොටසක් බවට පත් කිරීමට බ්‍රිතාන්‍යයන්ට යටත් විජිතකරණය කළ නොහැකි වූ ආසියානු රටවල් කිහිපයෙන් එකක් විය.

නැගෙනහිර ඉන්දියානු සමාගම 1600 දී ආරම්භ කරන ලද්දේ ඉන්දියානු සාගරයේ සහ චීනයේ වෙළඳ හා වාණිජ කටයුතු ප්‍රවර්ධනය කිරීමේ අරමුණෙනි. 1800 වන විට එකී සමාගම ලෝක වෙළඳාමෙන් අඩකට වඩා ඔවුන්ගේ දායකත්වයෙන් සිදු වූ අතර ඔවුන් බ්‍රිතාන්‍ය අධිරාජ්‍යයට සහ ඉන්දියානු යටත්විජිත රාජ්‍ය සඳහා අඩිතාලම එලන ලදී. 1757 දී නැගෙනහිර ඉන්දියානු සමාගම් පාලනය විසින් ඉන්දියාවේ විශාල ප්‍රදේශවල මිලිටරි බලය ක්‍රියාත්මක කරමින් සහ බ්‍රිතාන්‍ය ඔටුන්න ඉන්දියාවේ සෘජු පාලනය භාර ගන්නා තෙක් 1858 දක්වා ප්‍රාදේශීය පරිපාලන කටයුතු ද ඔවුන් විසින් සිදු කරන ලදී. ඔවුන් විසින් බ්‍රිතාන්‍ය ඔටුන්නේ අග්‍රමානික්‍ය වූ ඉන්දියාවේ අබිං වගා කර අධිරාජ්‍යයේ සෑම අස්සක් මුල්ලක් නෑරම ඒවා ‘ස්වදේශිකයන්ට’ විකුණනු ලැබීය. 1839 දී අබිං යුද්ධය චීනයට එරෙහිව ආරම්භ වූයේ කින්ග් රාජවංශය විසින් සිය විශාල වෙළඳපොල බ්‍රිතාන්‍ය අබිං වෙළෙඳුන්ට විවෘත කිරීම සඳහා දැඩි ප්‍රතිරෝධයක් දැක්වීම හමුවේ ය. එහි ප්‍රතිඵලයක් ලෙස බ්‍රිතාන්‍යයන් චීනයේ ප්‍රධාන වරාය අවහිර කිරීමට නියෝග කළ අතර සාමය සඳහා චීන ජාතිකයන් යෝජනා කිරීමට පෙර පුරාණ අගනුවර වන නැන්ජින් නගරයට පහර දීමට සූදානම් විය.

1842 දී නැන්ජින් ගිවිසුම මගින් චීනයට හොංකොං බ්‍රිතාන්‍යය වෙත පැවරීම, වන්දි වශයෙන් ඩොලර් මිලියන 6ක් ගෙවීම සහ වෙළඳාමට ඉඩ සැලසෙන ලෙස වරායන් පහක් විවෘත කිරීම සහ බටහිරයන්ට පදිංචියට අවසර දීම සිදු කරන ලදී. චීනය විධිමත් ලෙස යටත් විජිතකරණයට ලක් නොවූවත්, නැන්ජින් ගිවිසුම මගින් යතාර්ථයෙන් එය බ්‍රිතාන්‍ය අධිරාජ්‍යයේ යටත් විජිතයක් බවට පත් කළ අතර කින්ග් රාජ්‍ය සභාවට ඔවුන්ගේ වාණිජ හා විදේශ ප්‍රතිපත්ති වල ස්වාධීනත්වයේ වැඩි කොටසක් අහිමි විය.

මෙම ගිවිසුමේ දක්වා ඇති ව්‍යාතිරේක ප්‍රදේශගතකරණ මූලධර්මය මගින් වූයේ චීන ස්වෛරීභාවය දැඩි ලෙස උල්ලංඝනය වීමකි. එමෙන්ම ගිවිසුම් වරායන්හි වෙසෙන අබිං වෙළෙඳුන් යටත් වුයේ ඔවුන්ගේ රටවල නීතිවලට මිස චීන නීති වලට නොවේ.

අද චීනයේ “නින්දාවේ සියවස” ලෙස හැඳින්වෙන සමාජ සිද්ධිදාමය එතනින් ආරම්භ විය.

අවුරුදු දෙසීයකට ආසන්න කාලයකට පසු, 21 වන සියවසේ මුල් කාර්තුව අවසන් වෙමින් පවතින අතර, චීනය දැන් මිලිටරි සුපිරි බලවතෙකු වීමේ අභිලාෂය සහිතව ලෝකයේ ප්‍රමුඛතම ආර්ථිකයක් බවට පත්වීමට සූදානම්ව සිටී. පෙර ශතවර්ෂ වල නැගෙනහිර ඉන්දියා සමාගම මෙන්, චීනයේ ආයෝජන, වෙළඳ හා වාණිජ අංශය දැන් එක් තීරයක් හා එක් මාවතක් මුල පිරීම වෙයි. එක් තීරයක් හා එක් මාවතක් වැඩපිළිවෙල 2013 දී ආරම්භ කර 2017 දී චීනයේ ව්‍යවස්ථාවට ඇතුළත් කර ඇත. එක් තීරයක් හා එක් මාවතකට අනුව, මෙම පියවර “කලාපීය සම්බන්ධතාවය වැඩි දියුණු කිරීම සහ දීප්තිමත් අනාගතයක් වැලඳ ගැනීමේ උත්සාහයකි.” ඇත්ත වශයෙන්ම නැගෙනහිර ඉන්දියා සමාගම ද ලෝකයේ වැඩි කොටසක් යටත් විජිතයක් බවට පත් කළේ ‘ම්ලේච්ඡයන්’ ශිෂ්ටාචාරගත කිරීමේ සමාන ‘උතුම් පරමාර්ථයකින්’ සහ ස්වදේශිකයින්ට ‘දීප්තිමත් අනාගතයක්’ පොරොන්දු වෙමිනි.

එක් තීරයක් හා එක් මාවතක් යනු අලුත් තෑගි කඩදාසිවලින් ඔතා ඇති පැරණි සංකල්පය නොවේද?

මෑතකදී ශ්‍රේෂ්ඨාධිකරණයේ අභියෝගයට ලක් වූ කොළඹ වරාය නගර පනත, ඉදිරි වසරවලදී ශ්‍රී ලාංකිකයන් සඳහා මෑත කාලින ට්‍රෝජන් අශ්වයෙකු හෝ නැන්ජින් ගිවිසුමක් බවට පත්විය හැකිය. කිසිදු පරීක්ෂාවක් නොමැති, පාර්ලිමේන්තු අධීක්ෂණය නොමැති වරාය නගරය ඔවුන්ටම විශේෂිත වූ නීතියක් ඇති නගරයක් නිර්මාණය වනු ඇත; එය දේශීය හා ජාත්‍යන්තර මාෆියාව සඳහා ජාත්‍යන්තර මුදල් විශුද්ධිකරණය සඳහා මධ්‍යස්ථානයක් වනු ඇත. තවද ඉන්දියානු සාගරයේ සාමය හා ස්ථාවරත්වය ආරක්ෂා කිරීම / යටත් කර ගැනීම සඳහා සුපිරි බලවතුන් සඳහා ජාත්‍යන්තර ඔත්තු බැලීමේ මධ්‍යස්ථානයක් බවට මෙම ව්‍යාතිරේක ප්‍රදේශගතකරණය වූ දේපළ කොටස පත්වීමේ සම්භාවිතාව හුදු මන:කල්පිතයක් ලෙස බැහැර නොකළ යුතුය.

ශ්‍රී ලංකාවට ඍජු විදේශීය ආයෝජන අත්‍යවශ්‍ය වේ. එබැවින් මේ ගොඩ කරන ලද ඉඩම තුල ජාත්‍යන්තර මූල්‍ය මධ්‍යස්ථානයක් තිබීම ඉතා හොඳ අදහසකි. නමුත් එය ජාත්‍යන්තර නීතිය සහ සහභාගීත්වය මත පදනම් වූවක් මිස හුදෙක් තනි රටක හෝ දෙකක අවශ්‍යතාවයන්ට සේවය කිරීම සදහා නොවිය යුතුය. ඇත්ත වශයෙන්ම එවැනි ව්‍යාපාරයක් සඳහා පළමු යෝජනාව පැමිණියේ 2000 දී අපේම ශ්‍රී ලාංකික සමාගමකිනි. කෙසේ වෙතත් එවැනි යෝජනා අපගේ ස්වෛරීභාවයට බලපෑමක් එල්ල කරමින් පැමිණිය යුතු නොවේ; එය අපගේ වෙළඳාමෙන් 60% ක් සපයන අපගේ මිතුරන් නැති කර ගැනීමෙන් සිදු විය නොහැක. කිලෝමීටර් 20 ක් පමණක් දුරින් පිහිටි අපගේ අසල්වැසි රාජ්‍ය වන ඉන්දියාව සමඟ ඇති මිත්‍රත්වය හීන කිරීමෙන් එය කළ නොහැකිය. ශ්‍රී ලංකාවට තෙල්, දියමන්ති, රන් හෝ තඹ ආකර නොමැත. නමුත් ලෝකයේ ඉතා කාර්යබහුලම නැව් මාර්ගවලින් එකක් ඇති සුන්දර දූපතක් සහ ඊට අනුකූල භූගෝලීය පිහිටීමක් අපට ලැබී ඇත.

එබැවින් අපගේ ඉදිරි පරම්පරාවන් වෙනුවෙන් ධනය හා සමෘද්ධිය ඇති කිරීම සඳහා අපගේ රටේ පිහිටීම උපරිම ලෙස ප්‍රයෝජනයට ගනිමින් ඉන්දියානු සාගරය සාමයේ සහ ස්ථාවරත්වයේ කලාපයක් ලෙස පවත්වාගෙන යාම සහතික කිරීම සඳහා සියලු රටවල් සමඟ මිත්‍රශීලීව කටයුතු කිරීම අපට වඩාත් සුභවාදී වේ. සුපිරි බලවතුන් අතර සිදුවන මහා බල අරගලයක දී එක් කණ්ඩායමක හෝ වෙනත් කණ්ඩායමක ඉත්තෙකු වීමට ශ්‍රී ලංකාවට නොහැකිය. උදාහරණයක් ලෙස 1960 දශකයේ මුල් භාගයේ කියුබාව දෘෂ්ටිවාදාත්මක නොවන මූල්‍යමය කාරණා නිසා කියුබානු රජයට ඇමරිකා එක්සත් ජනපදයෙන් කිලෝමීටර් 65 ක් දුරින් න්‍යෂ්ටික මිසයිල සවි කිරීමට සෝවියට් සමාජවාදී සමූහාණ්ඩුවට අවසර දීමට සිදු විය. මෙය න්‍යෂ්ටික යුද්ධයක් දක්වා යාමට ඉඩ තිබිණි.

ජාත්‍යන්තර ප්‍රජාව සමඟ ගැටුම්කාරී හා හුදෙකලා ප්‍රතිපත්තියක් අනුගමනය කිරීමට ශ්‍රී ලංකාවට නොහැක. විශේෂයෙන්ම මෙවැනි වසංගත තත්ත්වයන් හා ජාත්‍යන්තර වෙළඳාම ඇත යුගයක බහුපාර්ශ්වීයත්වය ඉදිරි මාවතයි. ස්වෛරීභාවය පිළිබඳ වෙස්ට්ෆේලියානු සංකල්පය තවදුරටත් වලංගු නොවන අතර අපගේම ජනතාවගේ අභිවෘද්ධිය සඳහා වන අපගේ ජාත්‍යන්තර බැඳීම් හා වගකීම්වලට අප අවනත විය යුතුය.

නිදහසින් පසු සෑම රජයක්ම පාහේ අනුගමනය කළ විදේශ ප්‍රතිපත්තියට ශ්‍රී ලංකාව ආපසු යා යුතුය. ජාත්‍යන්තර අනුපිළිවෙලෙහි අපගේ සාපේක්ෂ “වැදගත්කම” සුළු වුවත් , ශ්‍රී ලංකාව ලෝක ප්‍රජාව අතර බොහෝ ආදරණීය හා ගෞරවනීය සාමාජිකයෙකි. වොෂිංටන් සිට බෙයිජිං දක්වා, නවදිල්ලියේ සිට ක්‍රෙම්ලිනය දක්වා, ඩව්නිං වීදියේ සිට ටෝකියෝ දක්වා, බ්‍රසල්ස් සිට ගානා රාජ්‍ය දක්වා අපගේ නායකයින් ඉතා විවෘතව හා ආදරයෙන් පිළිගනු ලැබීය.

නමුත් අද එය එසේ නැත.

අද, නිද්‍රාචාරින් ප්‍රපාතයට ඇවිදගෙන යන ලෙස, එක් එක් නින්දා වලට මුහුණ දෙමින් අප අපේ පුතුන් හා දියණියන් නොසිතූ විරූ බියකරු අනාගතයක් කරා තල්ලු කරමින් සිටිමු.

නවතින්න, සිතන්න, සලකා බලන්න.

ප්‍රජාතන්ත්‍රවාදය සහ නිදහස, යුක්තිය සහ නීතියේ ආධිපත්‍යය, විවිධත්වය තුලින් එකමුතුවීම, බහුපාර්ශ්වීයත්වය සහ ජාත්‍යන්තර සහයෝගීතාව අපට ඉදිරියේදී ඇති එකම මාවතයි.

මංගල සමරවීර

ආණ්ඩුවේ ෆැසිස්ට් හැසිරීම විවේචනය කරමින් විපක්ෂ නායක සජිත් ප්‍රේමදාස නිවේදනයක් නිකුත්කර ඇත.

ඒ ජනතා විමුක්ති පෙරමුණේ නාමල් කරුණාරත්න සහ සමන්ත විද්‍යාරත්න අත්අඩංගුවට ගැනීමට පොලිසියේ ඇති සූදානම සම්බන්ධවය.

අදාළ නිවේදනය පහත දැක්වෙයි.

තමා පාර්ලිමේන්තු මන්ත්‍රීවරයකු ලෙස දිව්රුම් දෙන්නේ, තමන්ට අදාළ අමාත්‍යාංශය ජනාධිපති වරයා විසින්, ගැසට් කිරීමෙන් පසුව බව , 'පොහොට්ටු' පක්ෂයේ ජාතික සංවිධායක , බැසිල් රාජපක්ෂ විසින් ජනාධිපතිවරයා හා අගමැතිවරයා වෙත දැනුම් දී ඇතැයි, ආණ්ඩුවේ අභ්‍යන්තර ආරංචිමාර්ග සඳහන් කරනවා.

එසේම, තම අමාත්‍යංශයේ රාජ්‍ය ඇමතිවරයා ලෙස මහාචාර්ය රන්ජිත් බණ්ඩාර පත්කළ යුතු බවට වූ කොන්දේසියක් ද බැසිල් රාජපක්ෂ විසින් ඉදිරිපත් කර ඇතැයිද සඳහන්.

බැසිල් රාජපක්ෂගේ පාර්ලිමේන්තු සම්ප්‍රාප්තිය සම්බන්ධයෙන් ඊයේ, ජනාධිපතිවරයාගේ මිරිහාන නිවසේ පැවති සාකච්ජාවේදී , පැහැදිලි තීන්දුවක් ගෙන නැතත්, පසුව රාජපක්ෂ සහෝදරයින්ගේ නැගෙණියක වන ප්‍රීති චන්ද්‍රදාස ,ඇමරිකාවේ සිට පවුලේ සියලු පාර්ශවයන්ට කතාබහ කොට , කිසියම් එකඟතාවයක් ඇතිකරලීමට මැදිහත්ව ඇතැයි ද , එම ආරංචිමාර්ග සඳහන් කරනවා.

අගමැති මහින්ද රාජපක්ෂ මුදල් අමාත්‍යාංශය බැසිල් රාජපක්ෂ වෙත පැවරීමට එකඟතාවය පළකර තිබුනද, පසුව තත්ත්වය වෙනස් වුනා.

ආණ්ඩුවේ අභ්‍යන්තර ආරංචි මාර්ග සඳහන් කරන ආකාරයට , බැසිල්වාදී සමාජ මාධ්‍ය ක්‍රියාකාරීන් විසින් සිදුකරනු ලැබූ පුර්ව ප්‍රචාරක කටයුතු වලින්, ජනාධිපතිවරයා හා අගමැතිවරයා ෆේල් බවට ජනමතයක් ඇතිවීම, ජනාධිපතිවරයාගේ හා අගමැතිවරයාගේ කනස්සල්ලට හේතුවී තිබෙනවා.

ඔවුන්ගේ මාධ්‍ය උපදේශකයන් පෙන්වා දී ඇත්තේ බැසිල්වාදින් සමාජ මාධ්‍ය තුළ කළකී දේ හේතුවෙන් මහින්ද ගෝඨාභය යන දේශපාලන ප්‍රතිරූප වෙත සිදුවූ හානිය බරපතළ බවයි. එය ඉදිරි දේශපාලන කටයුතු සඳහා ද හානිකර බැවින් වහාම අත්හිටුවීමට කටයුතු කරන ලෙසයි.

බැසිල්වාදී සමාජ මාධ්‍ය ක්‍රියාකාරීන් මෙන්ම, බැසිල්වාදී මැති ඇමතිවරුන් පසුගිය දින වල අවධාරණය කර සිටියේ, රටේ බඩු මිල අඩුකිරීමට, ඉන්දන මිල අඩුකිරීමට බැසිල් පාර්ලිමේන්තු පැමිණිය යුතු බවයි. එසේම බැසිල්ට මොළ 7 ඇති බවත් , යුද ජයග්‍රහණයේ පවා පිටුපස හිටි බලවේගය බැසිල් බවත් එහිදී සඳහන් වුනා.

කෙසේවුවද බැසිල් රාජපක්ෂ විසින් පාර්ලිමේන්තු ඒමට කොන්දේසි ඉදිරිපත් කරන්නේ ජනාධිපතිවරයා හා අගමැතිවරයා සම්බන්ධයෙන් සැකයක් මතුව ඇති නිසාදැයි සමජ මාධ්‍ය ක්‍රියාකාරීන් ප්‍රශ්න කරනවා.

දේශපාලන වාර්තාකරු

යුගදනව් ඩීසල් බලාගාරයෙන් 51% කොටස් ඇමෙරිකානු සමාගමකට විකිණීම සඳහා කැබිනට් පත්‍රිකාවක් ඉදිරිපත් කර ඇතැයි සතිඅන්ත සන්ඩේ ටයිම්ස් පුවත්පත වාර්තා කරයි.

මෙම කැබිනට් පත‍්‍රිකාව මුදල් අමාත්‍යාංශය විසින් ඉදිරිපත් කර ඇති බව ද එම වාර්තාවේ සඳහන් වේ.

එම බලාගාරයේ කොටස් වලින් 23.9%ක් ඇති සේවක අර්ථසාධක අරමුදල තම කොටස් මෙරිකානු සමාගමකට පැවරීම ප්‍රතික්ෂේප කිරීම හේතුවෙන් මහා භාණ්ඩාගාරය සතු ව ඇති කොටස් 51% මෙසේ පැවරීම සඳහා රජය අනුමැතිය ඉල්ලා ඇත.

පොදුජන පෙරමුණේ ජාතික සංවිධායක බැසිල් රාජපක්ෂ ‘මොළ හතක්’ ඇති නායකයෙක් බවත් ඔහුට දුරදක්නා නුවණක් ඇති බවත් පොදුජන පෙරමුණේ පාර්ලිමේන්තු මන්ත්‍රී අමරකීර්ති අතුකෝරළ සඳහන් කරයි.

මාධ්‍ය හමුවක් අමතමින් මන්ත්‍රීවරයා මෙම අදහස් දැක්වූ අතර වත්මන් ආණ්ඩුව බලයට පත්වූ ආසන්නයේදීම මන්ත්‍රීවරුන් 115 දෙනෙකුගේ අත්සනින් යුතු ලිපියක් ජනාධිපති ගෝඨාභය රාජපක්ෂට සහ අග්‍රාමාත්‍ය මහින්ද රාජපක්ෂට භාරදී බැසිල් රාජපක්ෂ පාර්ලිමේන්තුවට ගෙන එන ලෙස ඉල්ලා සිටි බවත් පැවසීය.

නමුත් තමන් දැම්ම පාර්ලිමේන්තු නොඑන බව කියමින් බැසිල් රාජපක්ෂ ඒ අවස්ථාවේ එය ප්‍රතික්ෂේප කළ බවද ඔහු පැවසීය.

නමුත් කොරෝනා අර්බුදය හමුවේ ආර්ථිකය බරපතළ තත්ත්වයකට පත්ව ඇති නිසා බැසිල් රාජපක්ෂ මේ මොහොතේ පාර්ලිමේන්තුවට පැමිණීම අත්‍යවශ්‍ය බවද ඔහු අවධාරණය කරයි.

අද (03) සමාජ මාධ්‍ය වෙබ් අඩවි කිහිපයක බැසිල් රාජපක්ෂ ගේ පාර්ලිමේන්තු පැමිණීම සම්බන්ධව රාජපක්ෂ පවුලේ අභ්‍යන්තර සාකච්ඡාවක් ගැන තොරතුරු වාර්තා කර තිබුණා.

බැසිල් රාජපක්ෂගේ පාර්ලිමේන්තු පැමිණීම සම්බන්ධව රාජපක්ෂ පවුලේ පැවති සාකච්ඡාව කිසිදු තීරණයක් නොමැතිව අවසන්ව ඇති බව ආණ්ඩුවේ අභ්‍යන්තර දේශපාලන ආරංචි මාර්ග සඳහන් කරනවා.

එසේම මේ සාකච්ඡාව පැවති කාලය පුරා බැසිල් රාජපක්ෂ කිසිදු අදහස් දැක්වීමක් සිදුකර නොමැති බවත් වාර්තා වනවා.

ලැබී ඇති තොරතුරු අනූව අද ජූලි 3 වනදා ජනාධිපති ගෝඨාභය රාජපක්ෂ ගේ මිරිහාන නිවසේදී මේ සාකච්ඡාව පැවැත්ව තිබෙනවා.

දිවා භෝජනයත් සමග රාජපක්ෂ පවුලේ පිරිස පමණක් මීට සහභාගීව ඇති අතර වෙනත් කිසිදු පාර්ශ්වයක සහභාගීත්වයක් සිදුව නෑ.

සාකච්ඡාව ආරම්භයේ අග්‍රාමාත්‍ය මහින්ද රාජපක්ෂ , ගෝඨාභය රාජපක්ෂ , චමල් රාජපක්ෂ , නාමල් රාජපක්ෂ , ශෂීන්ද්‍ර රාජපක්ෂ , මාලක චන්ද්‍රසේන සහ නිපුණ රණවක සිට ඇති අතර බැසිල් රාජපක්ෂ ගේ සහභාගීත්වය සිදුව ඇත්තේ පසුවයි.

පිරිස අතර සාකච්ඡාව ඇරඹීමට පෙර ජනාධිපති ආර්‍යා අයෝමා රාජපක්ෂ වෙත ගොස් තිබෙන අමාත්‍ය නාමල් රාජපක්ෂ " බාප්පට කැමති තීරණයක් ගන්න .. ඕන එකක් වෙනුවෙන් බාප්පා එක්ක ඉන්නවා " යැයි පවසා ඇති බවත් වාර්තා වනවා.

ආණ්ඩුවේ අභ්‍යන්තර දේශපාලන ආරංචි මාර්ග සඳහන් කරන ආකාරයට බැසිල් රාජපක්ෂ පැමිනි අවස්ථාවේ ජනාධිපති ගෝඨාභය " මොකද මේ වෙන්නේ ?" කියා මදක් උස් හඬින් අසා ඇති නමුත් බැසිල් රාජපක්ෂ ඊට කිසිම ප්‍රතිචාරයක් දක්වා නෑ.

අනතුරුව අග්‍රාමාත්‍ය මහින්ද රාජපක්ෂ කතාබහ ආරම්භ කරමින් පවසා ඇත්තේ , " මෙන්න දැන් බැසිල් පාර්ලිමේන්තු එන්න ඕන කියනවා" යනුවෙන් පවසමින්.

නමුත් ඒ අවස්ථාවේ ද බැසිල් රාජපක්ෂ කිසිදු ප්‍රතිචාරයක් දක්වා නැති බවයි වාර්තා වන්නේ.

පසුව ශෂීන්ද්‍ර රාජපක්ෂ සහ මාලක චන්ද්‍රසේන පවසා ඇත්තේ නිහඬව නොසිට මේ ගැන සාකච්ඡා කල යුතු බවයි.

ඒ අනුව ශෂීන්ද්‍ර කතාව ආරම්භ කරමින් " දැන් පාර්ලිමේන්තු ආවහම බැසිල් බාප්පට මොකක්ද ලැබෙන ඇමතිකම යනුවෙන් විමසා තිබෙනවා.

මාලක චන්ද්‍රසේන අසා ඇත්තේ බැසිල් මාමට පාර්ලිමේන්තු යන්න කවුද ඉල්ලා අස්වෙන්න යන්නේ , යනුවෙන්.

නමුත් මේ කිසිම අවස්ථාවක බැසිල් රාජපක්ෂ කිසිම ප්‍රකාශයක් සිදුකර නැති බවයි ආණ්ඩුවේ අභ්‍යන්තර දේශපාලන ආරංචි මාර්ග සඳහන් කරන්නේ .

ඒ අනුව අද රාජපක්ෂ පවුලේ මේ සාකච්ඡාව අවසන්ව ඇත්තේ කිසිදු තීන්දුවක් නොමැතිවයි.

කෙසේ වුවත් මේ සාකච්ඡාව සහ එහි සංයුතිය සම්බන්ධව මේ වන විට ආණ්ඩුව අභ්‍යන්තරයේ දැඩි විරෝධයක් මතුවෙමින් ඇති බවත් වාර්තා වෙනවා.

රටේ අනාගතය සහ ආණ්ඩුවේ ඉරණම සම්බන්ධ තීන්දු පවුලේ දෙතුන් දෙනෙකු ගන්නා 2010-2014 සමයට නැවත ගොස් ඇති බව දක්වමින්.

මේ වන විට කැබිනට් මණ්ඩලය තුළ පමණක් රාජපක්ෂ පවුලේ 4 ක් නියෝජනය කරන අතර සමස්ථ අමාත්‍ය මණ්ඩලයේ රාජපක්ෂලා 5 ක් සිටිනවා. බැසිල් රාජපක්ෂ ගේ පාර්ලිමේන්තු පැමිණීමත් සමග කැබිනට් මණ්ඩලය තුළ රාජපක්ෂලා 5 වන අතර අමාත්‍ය මණ්ඩලය තුළ 6. මේ වන විට සමස්ථ රාජ්‍ය ආයතන වලින් ද 60% ක් මේ රාජපක්ෂ පවුලට නතුව තිබෙනවා.

ආණ්ඩුව අභ්‍යන්තරයේ ව්රෝධය මතුව ඇත්තේ තනි පවුලක් රට පාලනය කිරීමේ පැරණි පුරුද්ද මතුව ඇති බව සඳහන් කරමින්.

දේශපාලන වාර්තාකරු

බැසීල් රාජපක්ෂ පාර්ලිමේන්තු පැමිණියා කියා රටට සුරබි දෙන පහළ නොවන බව ශ්‍රීලනිප මහ ලේකම් රාජ්‍ය අමාත්‍ය දයාසිරි ජයසේකර පවසයි.

වත්මන් අමාත්‍ය ධුර නිර්මාණය කළේත්, ඒවාට පුද්ගලයන් පත් කළේත්, මැටිවැඩ සහ බතික් ආදී ලෙසින් විහිළු සහගත අමාත්‍යංශ නිර්මාණය කළේත් බැසිල් රාජපක්ෂ බවත් ඔහු පවසයි.

ගෝඨාභය රාජපක්ෂගේ කැබිනට් මණ්ඩලයක් අද නොමැති බවත් දයාසිරි ජයසේකර, ශ්‍රී ලනිපය පසෙකට තබා තිබීම ගැන කනගාටු වන බවත් ඔහු පැවසීය.

ශ්‍රිලනිප ස්ථාවරය මෙන්ම බැසිල් විරෝධී විමල් පාර්ශ්වය ඇතුළු පක්ෂ 8 කණ්ඩායමේ ස්ථාවරය ලෙස පෙන්නුම් කරන්නේ බැසිල්වාදීන් විසින් ජනාධිපති ගෝඨාභය රාජපක්ෂ තනි කිරීමට උත්සහකරන මේ අවස්ථාවේදී ඔහුව දේශපාලනික වශයෙන් ශක්තිමත් කළ යුතුය යන්නයි.

කෙසේ වුවත් සාමාන්‍යයෙන් රාජපක්ෂ කඳවුරක සිට ප්‍රධාන පෙළේ රාජපක්ෂවරයෙකු විවේචනය කිරීම සහ එයත් මෙතරම් බරපතළ ලෙස සිදුකිරීම සිදුනොවන්නකි. දේශපාලන විචාරකයන් පෙන්වා දෙන්නේ මේ සඳහා එක්කෝ ප්‍රබල රාජපක්ෂවරුන්ගේම හෝ නැත්නම් වෙනත් විශ්වාසවන්ත දේශපාලන උපක්‍රමයක් තිබිය යුතු බවයි.

වඩාත් විශේෂ සිදුවීමක් ලෙස පෙන්නුම් කරන්නේ ශ්‍රී ලංකා නිදහස් පක්ෂයේ සභාපති , හිටපු ජනාධිපති මෛත්‍රීපාල සිරිසේන හැර එම පක්ෂයේ ප්‍රමුඛ පෙළේ නායකයන් කිහිපදෙනකුම බැසිල් විරෝධී සහ ආණ්ඩුවේ සමහර ව්‍යාපෘති ප්‍රසිද්ධියේ විවේචනය කිරීමය.

ත්‍රස්තවාදය වැළක්වීමේ පනත අහෝසි කරන ලෙස ඉල්ලා යුරෝපා පාර්ලිමේන්තුව විසින් පසුගිය මාසයේ සම්මත කරගන්නා ලද යෝජනාව පරිදි ආණ්ඩුව කටයුතු නොකළොත් ලංකාවට GSP+ බදු සහනය මෙන්ම ත්‍රස්ත විරෝධි කටයුතු සඳහා ලබාදෙන ආධාරද අහිමිවීමේ අනතුරක් මතුව තිබේ.

මෙසේ බදු නොගෙවා යුරෝපා වෙළඳපොලේ භාණ්ඩ අලෙවියට GSP+ සහනය හරහා ශ්‍රී ලංකාවට ලබාදී තිබූ වාසිදායක තත්වය අහිමි වීමේ අනතුර මතුවීමත් සමග ශ්‍රී ලංකාණ්ඩුව ත්‍රස්තවාදය වැළැක්වීමේ පනත වෙනස් කිරීමට පියවර ගන්නා බව යුරෝපයට දැනුම් දී තිබේ.

පනත “සමාලෝචනය කිරීම සඳහා” ක්‍රියාමාර්ග අනුගමනය කරමින් සිටින බව සහ “ප්‍රතිසන්ධානයේ නිශ්චිත ක්ෂේත්‍රයන්හි ප්‍රගතිය” සම්බන්ධයෙන් යුරෝපා සංගමයට දැනුම් දුන් බව විදේශ අමාත්‍යාංශය ප්‍රකාශ කරයි.

ත්‍රස්තවාදය වැළැක්වීමේ පනත යටතේ වරදකරුවන් කොට දඬුවම් නියම කරනු ලැබ සිටි හිටපු එල්ටීටීඊ සාමාජිකයින් දහසය දෙනෙකු ජනාධිපතිවරයා විසින් නිදහස් කර යැවීමද එහිදී ප්‍රධාන වශයෙන් දැනුම් දී ඇත.

දෙමළ සිරකරුවන් නිදහස් කළ දාම විශේෂ සමාවකින් මුදා හරිනු ලැබූ දුමින්ද සිල්වා සම්බන්ධයෙන් යමක් සාකච්ඡා කළේ දැයි විදේශ අමාත්‍යාංශය හෝ යුරෝපා සංගමය හෝ ප්‍රසිද්ධියට පත් කර නැත.

"ඒ අනුව, ජුනි 25 වැනි දින විදේශ අමාත්‍යාංශය විසින්, දැනට පවත්නා නීති සම්පාදනය, අතීත භාවිතයන් සහ ජාත්‍යන්තර විශිෂ්ට පරිචයන් අධ්‍යයනය කිරීමත් සමඟ 1979 අංක 48 දරණ ත්‍රස්තවාදය වැළැක්වීමේ පනතේ විධිවිධාන නැවත සලකා බැලීම සඳහා සිදුකෙරෙන කාර්යයන් පිළිබඳව යුරෝපා සංගමයට දැනුම් දී ඇත."

එක්සත් ජාතික පක්ෂය දෙකඩ කිරීම වරදක් බව දැන්වත් තේරුම් ගෙන අඩුපාඩු සකසා ගන්නා ලෙස මහනුවර - යටිනුවර ආසනයේ කුරුඳුවත්ත ශ්‍රී සුදර්ශනාරාමාධිපති යටිවැල්දෙනියේ මේධංකර හිමියන් සමගි ජනබලවේගය පක්ෂයේ ජාතික ලැයිස්තු පාර්ලිමේන්තු මන්ත්‍රී තිස්ස අත්තනායකට අවධාරණය කර ඇත.

ඒ තිස්ස අත්තනායක මන්ත්‍රීවරයා ආශීර්වාද ලබාගැනීමට " සදහම් යාත්‍රා " වැඩසටහනට අනුව පන්සල ගිය අවස්ථාවේය.

එහිදී එක්සත් ජාතික පක්ෂය දෙකඩ කර දුර්වල කිරීම හේතුවෙන් ජනතා ප්‍රශ්න වෙනුවෙන් පෙනීසිටිම දුර්වල වී ඇති බවත් එහි සම්පූර්ණ වගකීම ඔබලා ගතයුතු බවත් උන්වහන්සේ තිස්ස අත්තනායක මන්ත්‍රීවරයා ට සඳහන් කර ඇත.

එසේම "ආණ්ඩුවට තුනෙන් දෙකක බලයක් ලබාදුන්නෙත් ඔබලා. දැන් එහෙනම් ජනතාව ගැන මීට වඩා වැඩි වැඩකොටසක් ඉටුකරන වගකීම තිබෙනවා" යනුවෙන් ද පවසා ඇතැයි වාර්තා වෙයි.

පාර්ලිමේන්තු මන්ත්‍රී තිස්ස අත්තනායක සමග මේ ආශීර්වාද ලබාගැනීම සඳහා කඩුගන්නාව නගර සභාවේ විපක්ෂ නායිකාව වන ෆවයිනා මොහිදීන් සහ යටිනුවර ප්‍රාදේශීය සභාවේ විපක්ෂ නායක චම්පික නිලන්ත ද ඊට එක්ව ඇත.

කඩුගන්නාවේ ෆවයිනා සහ යටිනුවර චම්පිකත් හොඳට අහගෙන !

ඔවුන් දෙදෙනාම එක්සත් ජාතික පක්ෂයෙන් මන්ත්‍රී ධූර ලබා මේ වන විට සමගි ජනබලවේගය ට එක්වූවන්ය.

.මෙහිදී මේධංකර හිමියන් ඔවුන්ට පවසා ඇත්තේ , එක් පක්ෂයකින් ජන්දය ගෙන මන්ත්‍රී ධූර ලබා වෙනත් පක්ෂයකට පැණීම ශිෂ්ට සමාජයට ගැලපෙන දේශපාලනයක් නොවන බවයි.

පක්ෂය මාරු කිරීමට අවශ්‍ය නම් මන්ත්‍රී ධූරයෙන් ඉල්ලා අස්වෙන්න තිබූ බවත් ඒ හැර මේ සිදුකරන ක්‍රියාව ශිෂ්ට සමාජය පිළිකුල් කරන බවත් පවසා ඇත.

එබැවින් දේශපාලනය කිරීමේදී නින්දිත වැඩ වෙනුවට යහපත් මනුස්සයෙක් වී සමාජයට යහපතක් කරන්න වෙහෙසෙන්න කියාත් උන්වහන්සේ පවසා ඇත.

මේ ආකාරයට තිස්ස අත්තනායක මන්ත්‍රීවරයා අවස්ථා කිහිපයකම පන්සල් වෙත ගිය විට එජාපය දෙකඩ කිරීම හේතුවෙන් විපක්ෂය දුර්වල වී ඇති බවට චෝදනා එල්ලවූ බවත් වාර්තා වෙයි.

තිස්ස : හැළුවාද ? හැළුනාද ? සජිත්ව ?

මේ අතර සදහම් යාත්‍රා වැඩසටහන අතර තුර තිස්ස අත්තනායක මන්ත්‍රීවරයා උපුටා දක්වමින් ලංකා ලීඩ් නිව්ස් වෙබ් අඩවිය වාර්තා කර ඇත්තේ "ඉදිරි ජනාධිපතිවරණය වෙනුවෙන් සමගි ජනබල සංධානයක් ලෙස විපක්ෂය ඒකරාශී කිරීමට කටයුතු කර අපේක්ෂකයකු ඉදිරිපත් කිරීමට සූදානම් බවත් ඊට එක්සත් ජාතික පක්ෂයද දායකත්වය ලබාදිය හැකි බව" පැවසූ බවයි.

එහිදී වැඩිදුරටත් අදහස් දක්වමින්,”සමගි ජන බලවේගය විහාරස්ථාන සමඟ ගනුදෙනු කරන්නේ කිසිවකු අනුකරණය කිරීමට නොවේ. අපේ රටේ කිසිවකුට පන්සල පල්ලිය කෝවිල අමතක කර ගමනක් යා නොහැකියි.සමගි ජන බලවේගය සදහම් යාත්‍රා වැඩපිළිවෙළ ක්‍රියාත්මක තියෙන්නෙත් ඒ අනුවයි. අපේ ගමන පන්සල පල්ලිය කෝවිල ආදී සියලු ආගමික ස්ථාන කේන්ද්‍ර කරගෙන ගමනක් යමින් සිටිනවා.” යනුවෙන් පවසා සිටියේය, යනුවෙන් එම පුවතේ සඳහන් කර ඇත.

වඩාත් විශේෂ කරුණ වන්නේ සජබ සන්ධානයේ ජනාධිපති අපේක්ෂකයා ලෙස සජිත් ප්‍රේමදාස ගේ නම තිස්ස මන්ත්‍රීවරයා සඳහන් කළ බවක් සඳහන් නොවීමය.

රට තුළ රසායනික පොහොර ආනයනය එක්වරම නතර කිරීම හේතුවෙන් ගොවියා දැඩි අර්බුදයකට මුහුණ පා සිටින බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ශාන් විජේලාල් ද සිල්වා සඳහන් කරයි.

අම්බලන්ගොඩ දී මාධ්‍ය වෙත අදහස් දක්වමින් ඔහු මේ බව සඳහන් කර ඇති අතර කාබනික වගාවකට රට සූදානම් කළ යුත්තේ ක්‍රමානුකූලව බවත් එය එක්වරම සිදුකිරීම හේතුවෙන් ගොවි අර්බුදයක් ඇති වීම වැළැක්විය නොහැකි බවත් පැවසීය.

කාබනික පොහොර භාවිතයෙන් වගාව පවත්වාගෙන යාමට හැකි නම් තමා මෙන්ම රටට ආදරය කරන සියලු දෙනා කැමැති බවත් පැවසූ ඔහු එනමුත් එය එකවර කළ හැකි දෙයක් නොවන බව බොහෝ දෙනෙකුගේ හැඟීම් වී ඇතැයි ද මන්ත්‍රීවරයා සඳහන් කර ඇත.

ජනාධිපතිවරයා විසින් මෙම තීරණය ගත්තේ රටවැසියාට ඇති ආදරය නිසා වුවත් එම වැඩපිළිවෙළ කළ යුත්තේ කාලානුරූප යයිද මන්ත‍්‍රීවරයා පැවසීය.

රට තුළ මේ මොහොතේ මතු වී ඇති ගොවි අර්බුදය ගැන අවධානය යොමු කර රජය ඒ පිළිබඳව යම් සහනදායී ක්‍රියාමාර්ගයක් ගනු ඇතැයි විශ්වාස කරන බවද මන්ත්‍රීවරයා තවදුරටත් පැවසීය.

මීට පෙර අමාත්‍ය මහින්ද අමරවීර පොහොර හිඟය සම්බන්ධව ජනතාව වෙතින් සමාව ඉල්ලීය.

වත්මන් ආණ්ඩුවෙන් ශ්‍රී ලංකා නිදහස් පක්ෂය ඈත්කර වීමේ ප්‍රධාන වගකිවයුත්තා වන්නේ බැසිල් රාජපක්ෂ මහතා බව ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස සඳහන් කරයි.

ඔහු මේ බව සඳහන් කර සිටියේ මහනුවර දී මාධ්‍ය වෙත අදහස් දක්වමින් ය.

එහිදී ඔහු වැඩිදුරටත් මෙසේද පැවසීය.

”කවුරුත් විශ්මකර්මයෝ ඇවිල්ලා කරන්න දෙයක් නෑ. බැසිල් රාජපක්ෂ තමයි මේ සන්ධානේ යම් අර්බුදයක් නිර්මාණය කරන්න පදනම් වෙච්ච පුද්ගලයා. ශ්‍රී ලංකා නිදහස් පක්ෂයට ලැබිය යුතු ජාතික ලැයිස්තු, ඒ වගේම නිලතල ඒ කාරණා, ඒ වගේම පක්ෂය කොන් කිරීමේ කටයුතු ආරම්භ වුනේ ඒ අවස්ථාවලදී.

එතුමා මං හිතන්නේ මේ අර්බුද සහ සියල්ල මැද එතුමාට පුළුවන් කළමනාකරණය කරගන්න. ඇමති මණ්ඩලයට ආවත්, නාවත් මේ ක්‍රියාවලිය තුළ බලවත්ම පුද්ගලයා එතුමා. ඉතින් මං හිතන්නේ එතුමා හිටියා කියලා එතුමා අතින් වෙච්ච මහා ආශ්චර්යමත් දේවල් පේන්න නෑ. ඒ වගේම එතුමා ඇවිල්ලා මං හිතන්නේ දැන් කිව්වා වගේ තෙල් මිල අඩු කරයිද ? එතකොට බඩු මිල අඩු කරයිද ? අපි බලන් ඉමු. ආශ්චර්යමත් සිදුවීම් ඒ ආකාරයෙන් සිද්ධ වෙනවා ද කියලා.

ජනතාව විචාරශීලිව බලන් ඉන්නවා මේ දිහා. අපි හිතන් හිටියා මේ ආණ්ඩුවට අපිත් සහයෝගය දීලා මහා විශාල දේවල් කරයි කියලා. අඩු ගානේ පාරදෘශ්‍යභාවයෙන්. මං හිතන්නේ තරුණ පරම්පරාව අතරෙ කලකිරීමක්, ඉච්ඡාභංගත්වයක් වෙහෙසකාරී බවක් ඇති කරලා තියෙනවා.

මහමැතිවරණයට ඉදිරිපත් වන අවස්ථාවේ දී ශ්‍රී ලංකා නිදහස් පක්ෂය, පොදුජන පක්ෂය සමඟ වෙනමමත්, ඒ වගේම ගෝඨාභය රාජපක්ෂ මහතා සමඟත් වෙනම ගිවිසුම් ඇති කර ගත්තා. මේ ගිවිසුම්, එකඟතාවයන් කඩා බිඳ දමමින් තමයි ආණ්ඩුව පිහිටුව්වේ. පිහිටුව මුල් අවස්ථාවේදී ම, විශේෂයෙන්ම ශ්‍රී ලංකා නිදහස් පක්ෂයට එකඟ වෙච්ච ඇමතිකම් ලබා දීම විවිධ ආණ්ඩුකාර ලබා දීම ජාතික ලැයිස්තුව සම්පූර්ණ ලබා නොදීම. මේ වගේ කෙනෙහෙළිකම්වලින් තමයි ආණ්ඩුව ආරම්භ වුනේ. කෙනෙහිළිකම්වලින් ආරම්භ වෙච්ච ආණ්ඩුව අද වන විට බරපතල අර්බුදයක් දක්වා ගමන් කරමින් තිබෙනවා.

මේ වන විට විශේෂයෙන්ම අපේ සහෝදර, සන්ධානයේ ඉන්න සහෝදර සෙසු පක්ෂවල නායකයින්ට විරුද්ධව මත වාදයන් අදහස් ඉදිරිපත් වෙනවා. මේකේ තීරණාත්මක අවස්ථාව තමයි උදය ගම්මන්පිල ඇමතිතුමා වහාම එතනින් ඉවත් කිරීමට තිරණය කර ගනු ලබනවා. මේ සමඟම ඇති වෙලා තියෙනවා ආර්ථික අර්බුදය සමඟ දේශපාලන අර්බුදයක්”

ලෝක සෞඛ්‍ය සංවිධානයේ නව ශ්‍රී ලංකා නේවාසික නියෝජිත ආචාර්ය අලාකා සිං පසුගියදා සෞඛ්‍ය අමාත්‍යාංශයේදී සෞඛ්‍ය අමාත්‍ය පවිත්‍රා වන්නිආරච්චි හමුවී විශේෂ සාකච්ඡාවක් පවත්වා ඇත.

සෞඛ්‍ය අමාත්‍යංශය නිවේදනය කරන ආකාරයට මෙහිදී සෞඛ්‍ය අමාත්‍ය පවිත්‍රා වන්නිආරච්චි පවසා ඇත්තේ කොවිඩ් මර්දන වැඩපිළිවෙලේදී ලෝක සෞඛ්‍ය සංවිධානය විසින් ශ්‍රී ලංකාවට ලබාදුන් සහය ඉතා අගය කොට සලකන බවයි.

විශේෂයෙන් එන්නත්කරණ වැඩසටහනේදී ලෝක සෞඛ්‍ය සංවිධානය, ශ්‍රී ලංකාවට ප්‍රමුඛතාවය දී කොවැක්ස් ව්‍යාපෘතිය මගින් එන්නත් ලබාදීම සෞඛ්‍ය අමාත්‍යවරිය ලෙස,ශ්‍රී ලංකා ජනරජයේ කෘතවේදී ස්තූතිය පලකරන බවය.

මෙහිදී ලෝක සෞඛ්‍ය සංවිධානයේ නව ශ්‍රී ලංකා නේවාසික නියෝජිත ආචාර්ය අලාකා සිං පවසා ඇත්තේ ,ශ්‍රී ලංකාවේ කොවිඩ් මර්දනය සඳහා සෞඛ්‍ය අමාත්‍යාංශය විසින් දියත්කර ඇති වැඩපිළිවෙල ලෝක සෞඛ්‍ය සංවිධානය ඉතා අගය කරන බවයි, එබැවින් ශ්‍රී ලංකාවේ නියෝජිතවරිය ලෙස කොවිඩ් මර්දනය සඳහා අවශ්‍ය සියලු සහය ලබාදීමට කැපවෙන බවද ඇය සඳහන් කල බවය.

මෙම අවස්ථාවට සෞඛ්‍ය අමාත්‍යාංශයේ සැලසුම් ඒකකයේ අධ්‍යක්ෂ වෛද්‍ය ඇලන් ලුඩෝවයිඩ් සහ අමාත්‍යවරියගේ පෞද්ගලික ලේකම් කංචන ජයරත්න ද සහභාගී වූ බවව සෞඛ්‍ය අමාත්‍යංශ නිවේදනයේ සඳහන් කර ඇත.

ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් විසින් ෆේස්බුක් ඔස්සේ මාධ්‍යවේදී තරිඳු ජයවර්ධනට දක්වන ලද තර්ජනාත්මක ප්‍රතිචාරයක් සම්බන්ධව පොලිස්පති සී.ඩී. වික්‍රමරත්න වෙත ලිඛිත දැනුම්දීමක් සිදුකර ඇත.

මාධ්‍ය සංවිධාන එකමුතුව විසින් සිදුකර ඇති පැමිණිල්ලේ සඳහන් වන්නේ "මෑත කාලීන සිදුවීම් දෙස බලන විට ජ්‍යෙෂ්ඨ නියෝජ්‍ය පොලිස්පතිවරයා විසින් සිදු කර ඇති 'Borumai kiyanne soba dhahama jayagani - Aniwarwen see prbakaran and other Criminals' යන ප්‍රකාශය ඇතුළත් ප්‍රතිචාර දැක්වීමෙහි බරපතළ අනතුරු ඇඟවීමක් ගැබ්ව ඇති බව" ය.

එසේම මෑත සිදුවීම් සැලකිල්ලට ගෙන මාධ්‍යවේදියාගේ ආරක්ෂාව තහවුරු කරන ලෙසත් අදාළ ලිඛිත දැනුම්දීම හරහා සිදුකර ඇත.

මාධ්‍ය සංවිධාන එකමුතුව පොලිස්පති වෙත යොමුකළ ලිපිය පහත දැක්වෙයි.

2021-07-02

චන්දන වික්‍රමරත්න මහතා,

පොලිස්පති,

පොලිස් මූලස්ථානය,

කොළඹ.

ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් විසින් ෆේස්බුක් ඔස්සේ මාධ්‍යවේදී තරිඳු ජයවර්ධනට දක්වන ලද තර්ජනාත්මක ප්‍රතිචාරය සම්බන්ධවයි.

පොලිස්පතිතුමනි,

මාධ්‍යවේදී තරිඳු ජයවර්ධන විසින් ෆේස්බුක් සමාජ මාධ්‍ය ජාලයේ බෙදාගන්නා ලද ප්‍රවෘත්තියකට ප්‍රතිචාර දක්වමින් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් විසින් ඊයේ (01) ඔහුට අනියම් ආකාරයට කර ඇති තර්ජනය සම්බන්ධයෙන් මාධ්‍ය සංවිධාන එකතුවේ දැඩි අවධානය යොමු වී ඇත.

අදාළ ප්‍රවෘත්තිය සඳහන් ෆේස්බුක් පෝස්ටුව - https://m.facebook.com/story.php?story_fbid=4804876112874609&id=100000568041748

මාධ්‍යවේදී තරිඳු ජයවර්ධන විසින් අසත්‍ය ප්‍රවෘත්ති පළ කරන ලද බවත්, ඒවාට අදාළව සොබාදහම දඬුවම් කරනු ඇති බවත් දිගින්-දිගටම සඳහන් කර ඇති ජ්‍යෙෂ්ඨ නියෝජ්‍ය පොලිස්පතිවරයා, ප්‍රභාකරන්ට සහ අනෙකුත් අපරාධකරුවන්ට සිදුවූයේ කුමක් දැයි බලන ලෙස අවධාරණයෙන් කියා සිටී. මාධ්‍යවේදියා මෙහිදී තමන් ලියන ලද අසත්‍ය පුවත් මොනවාදැයි විමසා සිටියද, ඊට නිශ්චිත පිළිතුරක් දේශබන්දු තෙන්නකෝන් විසින් ලබා දී නැත. එක් අවස්ථාවකදී පමණක් පාස්කු ඉරුදින ප්‍රහාරය සම්බන්ධයෙන් වන ප්‍රවෘත්තියක් පිළිබඳව ඔහු සඳහන් කරයි.

තරිඳු ජයවර්ධන ප්‍රධාන කර්තෘ ධුරය දරන www.medialk.com පුවත් වෙබ්අඩවිය එම ප්‍රවෘත්තිය සඳහන් කර ඇති ආකාරය - https://medialk.com/archives/5653

එම ප්‍රවෘත්තියේ මූලාශ්‍රය වන්නේ 2021 ජුනි 29දා රජයේ ප්‍රවෘත්ති දෙපාර්තමේන්තුවේ පැවැති කැබිනට් තීරණ දැනුම් දීමේ මාධ්‍ය හමුවේදී තරිඳු ජයවර්ධන යොමුකරන ලද ප්‍රශ්නයකට ජනමාධ්‍ය ඇමැති සහ කැබිනට් ප්‍රකාශක කෙහෙළිය රඹුක්වැල්ල විසින් ලබාදුන් පිළිතුරයි.

මෑත කාලීන සිදුවීම් දෙස බලන විට ජ්‍යෙෂ්ඨ නියෝජ්‍ය පොලිස්පතිවරයා විසින් සිදු කර ඇති 'Borumai kiyanne soba dhahama jayagani - Aniwarwen see prbakaran and other Criminals' යන ප්‍රකාශය ඇතුළත් ප්‍රතිචාර දැක්වීමෙහි බරපතළ අනතුරු ඇඟවීමක් ගැබ්ව ඇති බව බව මාධ්‍ය සංවිධාන එකතුව වශයෙන් අපි විශ්වාස කරමු.

එසේම, අසත්‍ය පුවත් පළකරන ලද බවට චෝදනා කරමින් අත්තනෝමතික ලෙස අත්අඩංගුවට ගෙන මේ වනවිටත් රැඳවුම් භාරයේ සිටින බහුතරයකට එරෙහිව විධිමත්ව අධිකරණය ඉදිරියේ චෝදනා ගොනුකිරීමක් සිදුව නැති පසුබිමක නියෝජ්‍ය පොලිස්පති දේශබන්දු තෙන්නකෝන් මහතා විසින් මාධ්‍යවේදී තරිඳු ජයවර්ධනට දක්වන ලද ඉහත ප්‍රතිචාරය සම්බන්ධයෙන් දැඩි අවධානය යොමුකරන ලෙසත්, ඊට අදාළව විධිමත් විමර්ශනයක් සිදුකොට, මාධ්‍යවේදියාගේ ආරක්ෂාව තහවුරු කරන ලෙසත් අපි ඉල්ලා සිටිමු.

ස්තූතියි.

මෙයට, විශ්වාසී,

මාධ්‍ය සංවිධාන එකතුව වෙනුවෙන්

ධර්මසිරි ලංකාපේලි,

ලේකම්,

මාධ්‍ය සේවක වෘත්තීය සමිති සම්මේලනය

සීතා රංජනී,

කැඳවුම්කරු,

නිදහස් මාධ්‍ය ව්‍යාපාරය

දුමින්ද සම්පත්,

සභාපති,

ශ්‍රී ලංකා වෘත්තීය ජනමාධ්‍යවේදීන්ගේ සංගමය

එන්.එම්.අමීන්,

සභාපති,

ශ්‍රී ලංකා මුස්ලිම් මාධ්‍ය සංසදය

කනපතිපිල්ලේ සර්වානන්ද

ලේකම්

දෙමළ මාධ්‍ය සංසදය

ඉඳුනිල් උස්ගොඩ ආරච්චි,

ලේකම්,

ශ්‍රීලංකා තරුණ ජනමාධ්‍යවේදීන්ගේ සංගමය.

පිටපත් -

1) සභාපති- ශ්‍රී ලංකා මානව හිමිකම් කොමිෂන් සභාව

කොවිඩ් නිසා හැමදේම නෑ බෑ කියලා නතර කළා නම් අද ජනතාවට මීට වඩා දුෂ්කරතා මතුවනු ඇතැයි ගරු අග්‍රාමාත්‍ය මහින්ද රාජපකෂ  අද (02) දින අරලියගහ මන්දිරයේ දී පැවසීය.

රුපියල් මිලියන 445ක් සහ රුපියල් මිලියන 127ක් වැය කරමින් ඉදි කළ දක්ෂිණ අධිවේගී මාර්ගයේ කපුදූව අන්තර් හුවමාරුව සහ පේරාදෙණිය රෝහල ඉදිරිපිට පදික උමං මාර්ගය විවෘත කළ අග්‍රාමාත්‍යතුමා, රුපියල් මිලියන 4999ක වියදමෙන් කොටුව ලෝටස් මාර්ගයේ  මහල් 17කින් යුතුව ඉදිකෙරෙන “සමුද්‍ර පහසුකම් සැලසීමේ මධ්‍යස්ථානයේ” වැඩ ආරම්භ කරමින් මේ බව සඳහන් කළේය.

අග්‍රාමාත්‍ය මහින්ද රාජපක්ෂ ඩිජිටල් තාක්ෂණය ඔස්සේ එහි සමරු ඵලක විවෘත කළේය.

එම ව්‍යාපෘතිය 2023 වසරේ අවසන් කිරීමට නියමිතය.

මේ අතර චීනයේ හුනාන් කන්ස්ට්‍රක්ෂන් ඉංජිනියරින් ගෘප් කෝපරේෂන් සමාගම රුපියල් මිලියන 127ක ඉදිකළ පේරාදෙණිය ශික්ෂණ රෝහල ඉදිරිපිට උමං මාර්ගය අද අග්‍රමාත්‍යවරයාගේ ප්‍රධානත්වයෙන් විවෘත කෙරුණි.

ඉන් අනතුරුව රුපියල් මිලියන 445ක වියදමින් කැතික් චීන සමාගම විසින් ඉදිකරනු ලැබු දක්ෂිණ අධිවේගී මාර්ගයේ කපුදූව අන්තර් හුවමාරුව ජනතා අයිතියට පත් කිරීමද සිදුවිය.

දක්ෂිණ අධිවේගී මාර්ගයේ කිලෝමීටර 130ක් දුරින් හමුවන සැතපුම් කණුව අසල මාතර - හක්මන මාර්ගයේ කොළඹ දිශාවට ප්‍රවිශ්ට වීමට හා පිටවීමට මෙම අන්තර් හුවමාරුව විවෘත කර තිබේ.

වර්ථමාන කෘෂිකර්ම ඇමති මහින්දානන්ද අලුත්ගමගේ විසින් පසුගිය අප්‍රේල් මස 12වන දින ප්‍රසිද්ධ දේශපාන වැඩසටහනකට සහභාගී වෙමින් කළ ප්‍රකාශය නම්…

"මම වගකීමෙන් කියනව,, මම කෘෂිකර්ම ඇමතිවරයා ඉන්න තුරු එක සහල් ඇටයක් පිට රටින් ගේන්න දෙන්නෙ නෑ...සීයට 3% ඒව ගැන මට කියන්න බෑ කීරි සම්බ ගැන..

මේ රටේ බහුතරයක් කන්නෙ නාඩු,, ඔබ පුදුම වෙන්න එපා අපි සහල් "ආනයනය කරනව" අපි සහල් පිටරට යවනව….සුදු කැකුලු රතු කැකුලු ගෙන්නන්නෙ නෑ…….

නිරතුරුවම පපුවට අත තබමින් වගකීමෙන් කියන සියලුම ප්‍රකාශ පාහේ දාර පුස්සක්වන අයුරු ජනතාවට අරුමයක් නොවනු ඇත…

තදියමින් බොරුකියන විට පැටලීම සමාන්‍ය තත්වයක් බව පසක් කරමින් සහල් අපනයනය කරනවා යන්න ප්‍රකාශ කළයුතුව තිබුනද අපි සහල් ආනයනය කරනවා ලෙස ප්‍රකාශ වූ බව හෝ පසක් නොවන්නේ තමා පවසන දේ ගැන නිවැරැදි අවබෝධයක් නොමැතිවීම විය හැක……

මාස දෙකහමාරක් යන්නට මත්තෙන් එම රූපවාහිනී නාළිකාවේම මහින්දානන්දලාට දිඨ්ඨ දම්ම වේදනීය කර්මයන්ට මුහුණ පෑමට සිදු උවත් වචන හරඹ වලින් සත්‍ය ජනගත වීම වැලැක්විය නොහැකි බව මහින්දානන්දලා අවබෝධ කරගත යුතු කාළය එළඹ ඇත.

මහින්දානන්ද වගකීමෙන් කළ ලෝක කුසලාන ගජබින්නාව……..!

මහජන නියෝජිතයකු, වගකිවයුතු පාර්ලිමේන්තු මංත්‍රී වරයකු අමාත්‍ය වරයකු ලෙස මැතිවරණ සමයේ තවත් මෙවැනිම ප්‍රකාශයක් සිදු කළහ…..එවක ලෝක ක්‍රිකට් කවුන්සිලයට ලෝක පූජිත ක්‍රීඩක,The Golden Cricketer නමින් විරුදාවලිය ලත් කුමාර් සංඟක්කාරගේ නම යෝජනා වූ අල්ලපනල්ලේ ඇමති මහින්දානන්ද වගකීමෙන් ප්‍රකාශ කරනවා කියමින් සඳහන් කළේ "අපි ලෝක කුසලානය වික්කා" එය ඉතා ආන්දෝලනාත්මක ප්‍රකාශයක් වෙමින් සංඟක්කාරටද අනගි අවස්ථාවක් මෙන්ම රටට අත්වීමට තිබූ කීර්තියද ගිලිහී ගියහ….

අර්ඹුදය දොරකඩටම ආවිටත් වගකීමෙන් මුසා බස් පවසා කා රවටන්නේද….?

පසුගිය සමයේ අධික එලවලු මිල යාමේදී පවා විනිවිද භාවයක් විද්‍යාත්මක ක්‍රමවේදයක් රහිත වචන හරඹ වලින් මාධ්‍ය සංදර්ශන මගින් ගැටලු විසඳන මහින්දානන්දලාගේ දේශපාලන භාවිතය හා සුජාතභාවය රටවැසියන් ඉතා මැනවින් අවබෝධ කරගෙන සිටින සමයක, උද්ගතව ඇති පොහොර ගැටලුව අනාගතයේ රට භයානක ආහාර හිඟයකට ඇද දමන බවට කෘෂි හා ආර්ථික විශේෂඥයින් පෙන්වා දී ඇත……

දැවැන්ත ආර්ථික කඩාවැටීමත් ඩොලර් සංචිත සීඝ්‍රයෙන් වැය වීමත් හමුවේ නොමිලේ රසායනික පොහොර දීමට අවශ්‍ය ඩොලර් සොයාගැනීම ගැටලුවක් වී ඇති සංදර්භයක රටේ ජනතාවට සත්‍ය නොපවසා, තව දුරටත් නියමාකාරයෙන් විද්‍යාත්මක පර්‍යේෂණාත්ම අත් හදාබැලීමකින් තොරව ක්‍රියාත්මක කරන කාබනික පොහොර ගැටලුවෙන් රටත් සමස්ත ජනතාවත් තවත් දැවැන්ත අර්බුදයකට තල්ලු වනවා නිසැකය………….

එදා වේලට වගකීමෙන් බොරු කියනවා වෙනුවට ක්ෂේත්‍රයේ සැබෑ ප්‍රවීනයන් කුසලතා ඇත්තන් එක්කොටගෙන වහාම අර්බුදයට පිළියම් සෙවීමට විෂය භාර ඇමතිවරයා ලෙස වගකීමෙන් කිරීම හැර ආණ්ඩුවේ නොහකියාව වසාගැනීමට වගකීමෙන් බොරු කීම තරම් නොවනු ඇත…

සුමුදු මද්දුමආරච්චි,

මිලානෝ,

ඉතාලිය.

සිය ජීවිත ආරක්ෂාවට තර්ජනයක් එල්ල වී ඇති බව සදහන් කරමින් ජ්‍යෙෂ්ඨ ක්‍රීඩා මාධ්‍යවේදියෙක් ජාත්‍යන්තර ක්‍රීඩා ජනමාධ්‍යවේදීන්ගේ දිනයේදි පොලීසියට පැමිනිල්ලක් ඉදිරිපත් කර තිබේ.

වී එෆ්.එම් ආයතනයේ ක්‍රීඩා අධ්‍යක්ෂ ධනුෂ්ක අරවින්ද ජුලි 2 සිකුරාදා මරදාන පොලිස් ස්ථානයේ අපරාධ අංශයට පැමිණිලි කර ඇත්තේ සිය නිවසට කිසියම් පුද්ගලයෙකු හෝ කිහිපදෙනෙකු අද (02) අලූයම් කාලයේදි නීතිවිරෝධීව ඇතුළු වී තමන්ගේ ලේඛන හා ක්‍රීඩා මාධ්‍යවේදියෙකු ලෙස ක්‍රියා කිරීමේදි තරගාවලි ආවරණය කිරීමේදි ලැබෙන හැදුනුම්පත් සෝදිසි කර බිම දමා ගොස් ඇති බවයි.

වසර 20කට ආසන්න කාලයක් රූපවාහිනී මාධ්‍යවේදියෙක් ලෙස සේවය කල ඔහු අවසන් වරට සේවය කර ඇත්තේ ස්වර්නවාහිනි ආයතනයේයි. ස්වර්නවාහිනියෙන් අසාධාරණ ලෙස සේවයෙන් ඉවත් කිරීම හේතුවෙන් ඔහු විසින් කම්කරු උසාවියට ඉදිරිපත් කල පැමිණිල්ලකට අදාලව නඩුවක්ද මේ වන විට විභාග වෙමින් පැවතින බවත්, එම නඩුවට අදාල ලියකියවිලි ද පැමිනි පිරිස අවුස්සා ඇති අතර ඇතැම් ලේඛන අතුරුදන් වී තිබෙන බවත් පැමිණිල්ලේ ඔහු ඉදිරිපත් කර ඇත.

"ක්‍රීඩා ජනමාධ්‍යවේදියෙකු ලෙස මාගේ ජිවිත ආරක්ෂාව එල්ලවී ඇති තර්ජනය ගැන වගේම සිදුවී ඇති දේ ගැන නිසි ආකාරයෙන් පරීක්ෂණයක් සිදුකරන ලෙස ඉල්ලා මම මරදාන පොලිස් ස්ථානයේ අපරාධ අංශයට මීට ස්වල්ප වේලාවකට පෙර පැමිණිල්ලක් ද සිදු කළා. " ඔහු සිය මුහුණු පොතේ සටහන් කර තිබේ.

ජාත්‍යන්තර ක්‍රීඩා ජනමාධ්‍යවේදීන්ගේ දිනයේදි මෙවැනි අවාසනාවන්ත සිදුවීමක් ප්‍රකාශ කිරීමට සිදුවීම ගැන අතිශය කණගාටුවට පත්වන බව මාධ්‍යවේදී ධනුෂ්ක අරවින්ද සදහන් කරයි.

පැමිණිල්ල ඉදිරිපත් කිරීමෙන් පසු පොලිස් නිලධාරීන් පැමිණ ඇගිලි සලකුණු සටහන් කරගෙන ගිය බව පවසන මාධ්‍යවේදියා වැඩි දුරටත් සදහන් කලේ නීතියෙන් සාධාරණයක් ඉටු වනු ඇතැයි බලාපොරොත්තු වන බවයි.

මොහොමඩ් ෆලීල් මර්ජාන් කියන්නේ පොදුජන පෙරමුණේ ජාතික ලැයිස්තු පාර්ලිමේන්තු මන්ත්‍රීවරයට ප්‍රසිද්ධ කලපුවක් ආසන්නයේ ඇමති කෙනෙකුගෙන් තගක් වැටිලා.

ආරංචි හැටියට ලකුණු දාගන්න කරපු වැඩක්.

කොහොම හරි තග දාලා කියලා තියෙන්නේ "ඇතුලේ දේශපාලන කතා පිටට දෙන්න එපා, ඒවට ලෑස්ති වෙන්න එපා. ඉල්ලා අස්වෙන්න කිව්වා නම් ඉල්ලා අස්වෙනවා.. " වගේ කයිවාරුවක්.

මේ කතාව කිව්ව ආණ්ඩුවේ ප්‍රබලයා නම් කිව්වේ ෆලීල් මර්ජාන් සත පහකට ඒ ඇමති තග ගණන් අරගෙන නෑ කියලා. මොකද බැසිල්ගේ ගෝලයා කියලා හිතලා ඇඳලා ඉන්නේ කියලා තමයි ඇතුලෙත් කථාව" කියලා.

ඒ වගේම තමයි ආණ්ඩුවේ ප්‍රබලයා මෙහෙමත් කිව්වා.

"ඔය කළපු ඇමතිලා වගේ නෙවෙයි ෆලීල්ලට අගමැති තුමා සලකන්නේ පවුලේ සමීපතම අය විදියට. ඒ නිසා තමයි මුල් වතාවෙ ඉල්ලා අස්වෙන්න යෝජනාව අහපු ගමන් මහින්ද රාජපක්ෂ මහත්තයා ඉදිරිපත් වුණේ.

"ඔබතුමා අස්වෙන්න එපා.. ඕනවෙලාවක අස්කරන්න බලාගෙන බැසිල් 7 දෙනෙක් පත්කරලා තියනවා. එයින් කෙනෙක් අස්වේවි. ඔබතුමා ජාතික ලැයිස්තුවට පත්කළේ මම. අනෙක ඔබතුමා අස්කලොත් ඉන්න මුස්ලිම් මිනිස්සු ටිකත් අපි එක්ක වෛර බැඳගනිවී .. අස්වෙන්න එපා'' කියලා.

මේ කතාව අපි මීට කලිනුත් වාර්තා කලා.

බිලියන ව්‍යාපාරිකයකු වන මොහොමඩ් ෆලීල් මර්ජාන් අගමැති මහින්ද රාජපක්ෂගේ සමීපතම හිතවතෙක්. ඔහුට ජාතික ලැයිස්තු මන්ත්‍රීකම පිරිනමා තියන්නේ කරපු උදව් උපකාරවලට කාලගුණ සැලකීමක් විදියට.

අනික තමයි 20 සම්මත කරගැනීමට වගේම විශේෂයෙන් බැසිල් රාජපක්ෂට ම අදාලවූ , ඩුවෙල් සිටිසන් වගන්තිය සම්මත කරගැනීමට මුස්ලිම් පක්ෂවල මන්ත්‍රීන් සම්බන්ධීකරණය සිදුකොට ඇත්තේ, මොහොමඩ් ෆලීල් මර්ජාන් මන්ත්‍රීවරයා.

ජාතික ලැයිස්තුවෙන් පත්වූ අලි සබ්රි අධිකරණ ඇමතිවරයා ඇති කාර්ය බහුලත්වය නිසා , ඒ මුස්ලිම් මන්ත්‍රීවරුන්ගේ දුක්ගන්නා රාළ බවට පත්වෙලා තියෙන්නේත් , මේ මොහොමඩ් ෆලීල් මර්ජාන් මන්ත්‍රීවරයා.

ඒ වගේ තත්වයක් ඇතුලේ ඔහුව ඉවත්කිරීමට ගන්නා උත්සාහය සම්බන්ධයෙන්, මුස්ලිම් මන්ත්‍රීවරුන්ගෙන් පමණක් නෙවෙයි , රාජපක්ෂවරුන්ට හිතවත් මුස්ලිම් ව්‍යාපාරික ප්‍රජාවෙන්ද එල්ලවී ඇත්තේ බලවත් විරෝධයක්.

" බලන්නකෝ, මේ හාදයෝ ලොක්කන්ගෙන් ලකුණු දාගන්න මේ මිනිස්සුන්ට අරවා මේවා කියනවා. මේ අයත් නැතිවුණොත් කියලා වැඩක් නෑ ඉතිං. මේ මිනිස්සු මොනවා වුනත් රාජපක්ෂලා එක්ක හිටපු මිනිස්සු. අර මොනවාද මහින්ද මහත්තයා පැරදුනු වෙලාවේ ඉක්මනින් ගිහින් මෛත්‍රී හම්බුණ අය.. මොනවා නැතත් මහින්ද මහත්තයාට ඕවා මතකයි."

" මම හිතන්නේ ෆලීල් ඔය පාර්ට් දාපු සිද්ධිය මහින්ද මහත්තයාට කියයි." ආණ්ඩුවේ ප්‍රබලයා අපිට කිව්වා.

දේශපාලන වාර්තාකරු

රුපියල් බිලියන එකයි දශම පහකට (රුපියල් කෝටි 150) අධික බදු ප්‍රමාණයක් රජයට ගෙවීම පැහැර හැරීම හේතුවෙන් බලපත්‍රය අත්හිටුවන ලද ඩබ්ලිව්.එම්. මෙන්ඩිස් සමාගමේ බලපත්‍රය සක්‍රීය කර මත්පැන් නිෂ්පාදනය ඊයේ (01දා) සිට නැවත ආරම්භ කිරීම සඳහා සුරාබදු දෙපාර්තමේන්තුව අවසර ලබාදී ඇත.

රජයට ගෙවිය යුතු හිඟ බදු ප්‍රමාණය ගෙවීමේ එකඟතාව මත මෙම අවසරය ලබාදුන් බව සුරාබදු කොමසාරිස් ජනරාල් උපුටා දක්වමින් දෙරණ මාධ්‍ය ජාලයට අයත් ද මෝර්නිං සහ අරුණ පුවත්පත් වාර්තා කර ඇත.

බදු පැහැර හැරීම ​හේතුවෙන් 2018 වර්ෂය ආරම්භයේදී මෙන්ඩිස් සමාගමේ මත්පැන් නිෂ්පාදන බලපත්‍රය සුරාබදු දෙපාර්තමේන්තුව විසින් අත්හිටවනු ලැබූ අතර එම හිඟ බදු මුදල් රජයට අයකර ගැනීම සම්බන්ධයෙන් පාර්ලිමේන්තුවේදී සාකච්ඡාවට ලක් විය.

මෙන්ඩිස් සමාගම 2011 වසරේ දී අර්ජුන් ඇලෝසියස් ගේ පර්පෙචුවල් ට්‍රෙෂරීස් සමාගම විසින් ගනු ලැබිණ. පසුගිය යහපාලන ආණ්ඩුව සමයේ ප්‍රශ්නගත බැඳුම්කර ගනුදෙනුවට මැදිහත් වූයේ වෙන සමාගමක් නොව අර්ජුන් ඇලෝසියස් ට අයත් පර්පෙචුවල් ට්‍රෙෂරීස් සමාගම ය.

මේ ආණ්ඩුව බලය ගත්තේ බැඳුම්කර හොරු අල්ලනවා කියමිනි.