ශ්‍රී ලංකා නිදහස් පක්ෂයේ මධ්‍යම කාරක සභාවේ බහුතරයක් ආණ්ඩුවෙන් ඉවත්වීමේ යෝජනාවක් ඉදිරිපත් කර ඇති බව වාර්තා වෙයි.
ශ්‍රිලනිප අභ්‍යන්තර දේශපාලන ආරංචි මාර්ග සඳහන් කරන ආකාරයට පසුගිය ජූලි 08 වනදා පක්ෂයේ සභාපති හිටපු ජනාධිපති මෛත්‍රීපාල සිරිසේනගේ ප්‍රධානත්වයෙන් පැවති මධ්‍යම කාරක සභාවේ දී මේ යෝජනාව ඉදිරිපත්ව ඇත.
පවතින දේශපාලන තත්වය හමුවේ ශ්‍රී ලංකා නිදහස් පක්ෂය තවදුරටත් ආණ්ඩුව සමග කටයුතු කළ යුතුද නැද්ද යන්න පිළිබඳව එහිදී දීර්ඝ ලෙස සාකච්ඡාවට බඳුන් වී ඇත.
පවතින තත්ත්වය මත ආණ්ඩුවෙන් වහාම ඉවත් විය යුතු යයි මධ්‍යම කාරක සභා සාමාජිකයන් බහුතර පිරිසක් පෙන්වා දී ඇති අතර තවත් පිරිසක් විසින් පෙන්වා දී ඇත්තේ මේ අවස්ථාවේදී ආණ්ඩුවෙන් ඉවත් නොවිය යුතු බවයි.
කෙසේ වෙතත් බැසිල් රාජපක්ෂ දේශපාලන වශයෙන් බලවත් වීම, තවදුරටත් ශ්‍රිලනිපයට දක්වන කුඩම්මාගේ සැළකිල්ල, ඇතුළු කරුණු රැසක් ගැනත් මෙහිදී අවධානය යොමුකර ඇත. ඒ අනුව ආණ්ඩුව ජනතා අප්‍රසාදයට පත්වෙමින් තිබීම ගැනත් අවධානය යොමුකර තිබේ.
ඒ අනුව තීරණය වී ඇත්තේ, සුදුසු අවස්ථාව එනතෙක් කුමන තත්ත්වයක් යටතේ වුව ද ඉදිරියේදී පක්ෂය ශක්තිමත් කළ යුතු බවයි. ඒ සඳහා පක්ෂයේ සංවිධාන කටයුතු වේගවත් කරමින් ජනතාව අතරට පක්ෂය ගෙන යා යුතු බවටද තීරණයක් ගෙන තිබේ.