විදේශ කටයුතු, විදේශ රැකියා සහ සංචාරක අමාත්ය විජිත හේරත් සහ ශ්රී ලංකා සංචාරක සංවර්ධන වැඩසටහන ක්රියාත්මක කිරීම සඳහා වූ ජනාධිපති කාර්යසාධක බලකායේ සාමාජිකයින් අතර හමුවක් ඊයේ (30) ජනාධිපති කාර්යාලයේ දී පැවැත්විණි.
ඩිජිටල් ප්රවේශ පත්රයක්
මෙරටට පැමිණෙන විදේශීය සංචාරකයින්ට නැරඹුම් ස්ථානවලට පිවිසීම පහසු වනු පිණිස ඩිජිටල් ප්රවේශ පත්රයක් හඳුන්වා දීමේ ක්රියාවලියෙහි ලබා ඇති ප්රගතිය මෙන්ම සංචාරකයින් ගේ වීසා සම්බන්ධ කටයුතු කඩිනමින් සිදු කිරීම කෙරෙහි ද මෙම සාකච්ඡාවේ දී අවධානය යොමු කෙරිණි.
තවද, සංචාරකයින් ගේ පහසුව සඳහා රට තුළ අභ්යන්තර ගුවන් සේවා විධිමත් කිරීමටත්, ඒවායේ පවතින ගැටලු පිළිබඳව මෙන්ම කටුනායක ගුවන් තොටුපොළ සහ සංචාරක ගමනාන්ත අතර බස් රථ සේවා ආරම්භ කිරීම පිළිබඳවත් මෙහි දී සාකච්ඡා කෙරිණි. මේ වන විට ආරම්භ කර තිබෙන බේරේ වැව පිරිසිදු කිරීමේ කටයුතුවල ප්රගතියද මෙහිදී විමසා බැලිණි.
සංචාරක ක්ෂේත්රයේ ප්රවර්ධනය වෙනුවෙන් නිවාඩු නිකේතන
එසේම මහවැලි අධිකාරිය සහ වාරිමාර්ග දෙපාර්තමේන්තුවට අයත් නිවාඩු නිකේතන සංචාරක ක්ෂේත්රයේ ප්රවර්ධනය වෙනුවෙන් යොදා ගන්නේ කෙසේ ද යන්න පිළිබඳවත් සංචාරකයින් මුහුණ දෙන ගැටලු සංචාරක පොලිසිය මගින් විසඳීම පිළිබඳවත් මෙහි දී සාකච්ඡා කෙරිණි.
තල්මසුන් නැරඹීමේ මධ්යස්ථානවල පවතින ගැටලු මෙන්ම, සංචාරක ක්ෂේත්රයේ නිරත වූවන් මුහුණ දී සිටින ගැටලු සම්බන්ධයෙන් ද මෙහිදී අවධානය යොමු විය.
සංචාරක නියෝජ්ය අමාත්ය රුවන් රණසිංහ, ජනාධිපති ලේකම් ආචාර්ය නන්දික සනත් කුමානායක, විදේශ කටයුතු, විදේශ රැකියා සහ සංචාරක අමාත්යාංශයේ ලේකම් අරුණි රණරාජා, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, ජාතික අයවැය දෙපාර්තමේන්තුවේ අධ්යක්ෂ ජනරාල් ජූඩ් නිලුක්ෂාන්, ජෝන් කීල්ස් සමූහ ව්යාපාරයේ සභාපති/ ප්රධාන විධායක නිලධාරී ක්රිෂාන් බාලේන්ද්ර ද, රාජ්ය නිලධාරීන්, ආරක්ෂක අංශවල ජ්යෙෂ්ඨ නිලධාරීන්, සංචාරක ක්ෂේත්රයේ ප්රධාන පාර්ශ්වකරුවන් ඇතුළු පිරිසක්ද මෙම අවස්ථාවට එක්ව සිටියහ.
