පුවත්

සර්වජන බලයේ නායක, පාර්ලිමේන්තු මන්ත්‍රී, ව්‍යවසායක දිලිත් ජයවීර, ශ්‍රී ලංකාවට අලුතින් පත් වූ මහජන චීන සමූහාණ්ඩුවේ තානාපති වේයි හුවාක්සියාං මහතාව අද (04) කොළඹ පිහිටි චීන තානාපති කාර්යාලයේදී හමුවිය.

පැය දෙකකට ආසන්න කාලයක් පැවති මෙම හමුවේදී ද්විපාර්ශ්වික සබඳතා ශක්තිමත් කිරීම, චීන ආධාර යටතේ ක්‍රියාත්මක සංවර්ධන ව්‍යාපෘති, ආර්ථික සහයෝගිතාව, ව්‍යවසායකත්වය සහ ශ්‍රී ලාංකික තරුණ තරුණියන්ට උසස් අධ්‍යාපන අවස්ථා ලබා දීම පිළිබඳව පුළුල් ලෙස අවධානය යොමු විය.

ශ්‍රී ලංකාව වෙනුවෙන් චීනය ලබා දෙන දායකත්වයට ස්තූතියි

මෙහිදී අදහස් දැක්වූ දිලිත් ජයවීර, චීනය ශ්‍රී ලංකාව සමඟ පවත්වන දිගුකාලීන මිත්‍රත්වය සහ රටේ සංවර්ධනයට ලබා දෙන අඛණ්ඩ දායකත්වය අගය කළේය.
“චීනය ශ්‍රී ලංකාවේ වැදගත් මිතුරෙක්. මොකද චීනය අපේ රටට කරපු දේවල් එක්ක බලද්දී බලාපොරොත්තු වෙලා තියෙන්නේ ඉතාම සුළු දෙයක්,” යැයි ඔහු එහිදී අවධාරණය කළේය.
දේශීය ව්‍යාපාරවලට සහ තරුණ ව්‍යවසායකයින්ට වඩාත් තරඟකාරී සහ ස්වයංපෝෂිත වීමට ඉඩ සලසමින්, චීන ව්‍යවසායකත්ව දැනුම, ව්‍යාපාරික අත්දැකීම් සහ ප්‍රායෝගික විශේෂඥතාවයෙන් ප්‍රතිලාභ ලබා ගැනීමට ශ්‍රී ලාංකිකයන්ට වැඩි අවස්ථා ලබා දෙන ලෙසද හෙතෙම තානාපතිවරයාගෙන් විශේෂ ඉල්ලීමක් කළේය.

පානීය ජල ව්‍යාපෘති සහ සංවර්ධන සහයෝගිතා
ශ්‍රී ලංකාවේ ක්‍රියාත්මක වන චීන ආධාර ලබන සංවර්ධන ව්‍යාපෘති පිළිබඳව සර්වජන බලය දූත පිරිස දැනුවත් කිරීමට තානාපතිවරයා සැලකිය යුතු කාලයක් වැය කළේය. විශේෂයෙන්ම, නිදන්ගත වකුගඩු රෝගයෙන් පීඩාවට පත් ප්‍රජාවන්ට පිරිසිදු පානීය ජලය ලබා දීමේ මුලපිරීම් කෙරෙහි මෙහිදී විශේෂ අවධානයක් යොමු කෙරිණි. ආරක්ෂිත පානීය ජලය ලබා ගැනීමේ පහසුකම් වැඩිදියුණු කිරීම චීන තානාපති කාර්යාලයේ ප්‍රමුඛතාවයක් බවත්, එවැනි ව්‍යාපෘති මඟින් දහස් ගණන් ශ්‍රී ලාංකිකයන්ට ප්‍රතිලාභ සැලසිය හැකි බවත් තානාපතිවරයා අවධාරණය කළේය.

නව සංචාරක සහ අධ්‍යාපන අවස්ථා

සාකච්ඡාව අතරතුර, නුදුරු අනාගතයේ දී චීනයේ සංචාරය කිරීම සඳහා සර්වජන බලය දූත පිරිසට තානාපතිවරයා ආරාධනා කළේය. එමෙන්ම, චීනයේ උසස් අධ්‍යාපනය හැදෑරීමට අපේක්ෂා කරන ශ්‍රී ලාංකික තරුණ තරුණියන් සඳහා වන ශිෂ්‍යත්ව අවස්ථා පිළිබඳව මෙන්ම, හම්බන්තොට වරායේ නවතම වර්ධනයන් නිරීක්ෂණය කරමින් එහි ක්‍රියාකාරීත්වය සහ අනාගත විභවයන් පිළිබඳව සෘජු අවබෝධයක් ලබා ගැනීමටද දූත පිරිසට ආරාධනා කරනු ලැබීය.

හමුව අවසානයේදී, ශ්‍රී ලංකාවේ ජනතාවට ප්‍රතිලාභ සැලසෙන අයුරින් සහයෝගිතා අවස්ථා ගවේෂණය කිරීමට සහ අඛණ්ඩව සංවාද පවත්වා ගැනීමට දෙපාර්ශවයම එකඟතාව පළ කළ අතර, දිලිත් ජයවීර විසින් තානාපති වේයි හුවාක්සියාං හට සර්වජන බලය පක්ෂ මූලස්ථානයට පැමිණෙන ලෙස සුහද ආරාධනාවක්ද කළේය.

සභභාගීත්වය
මෙම අවස්ථාව සඳහා සර්වජන බලය නියෝජනය කරමින්,
• රොෂාන් රණසිංහ (සර්වජන බලය සභාපති සහ පොළොන්නරුව දිස්ත්‍රික් නායක)
• ආචාර්ය චන්න ජයසුමන (උප සභාපති සහ කොළඹ දිස්ත්‍රික් නායක)
• ගාමිණී වලේබොඩ (උපසභාපති සහ රත්නපුර දිස්ත්‍රික් නායක)
• අනුරාදා යහම්පත් (උප සභාපතිනි)
• නීතිඥ මධුර විතානගේ (මෙහෙයුම් ප්‍රධානී)
• ඉරංග මෙන්ඩිස් (ජාත්‍යන්තර සබඳතා ලේකම්)
• අනුරුද්ධ හේරත් (කුරුණෑගල දිස්ත්‍රික් නායක) යන අය සහ විධායක කමිටු නියෝජිතයෝ එක්ව සිටියහ. චීන තානාපති කාර්යාලය නියෝජනය කරමින් උපදේශකවරුන් වන මේයි ජින්ග් සහ ජින් එන්සේ යන අයද මෙම අවස්ථාවට සහභාගී වූහ.