ගාල්ල බන්ධනාගාරය තුල ඇති තදබදය අවම කිරිම සදහා සුළු වැරදි මත බන්ධනාගාරගතව සිටි රැදවියන් 18 දෙනෙකු ඊයේ (25) ස්කයිප් තාක්ෂණය ඔස්සේ ගාල්ල ප්‍රධාන මහේස්ත්‍රාත් හර්ෂණ කැකුණවෙල වෙත ඉදිරිපත් කිරිමෙන් පසු ඇප මත නිදහස් කොට තිබෙන බව වාර්තා වෙයි.
එලෙස ඇප මත මුදා හැර ඇත්තේ පිරිමි පුද්ගලයින් 16 දෙනෙක් සහ කාන්තාවන් දෙදෙනෙකි.
මෙලෙස ඇප මත මුදාහරින ලද රැඳවියන්ට ඉදිරි නඩු දිනයකදි ඉදිරිපත්වන ලෙස ප්‍රධාන මහේස්ත්‍රාත්වරයා නියෝග කොට ඇත. ගාල්ල බන්ධනාගාරය තුල දැනට රැඳවියන් 1000 කට ආසන්න සංඛ්‍යාවක් රඳවා සිටියි.
පසුගියදා අධිකරණ සේවා කොමිෂන් සභාව නිකුත් කළ නිවේදනයක සඳහන් වුයේ, ඇප ලබාදීම සහ බන්ධනාගාර ගත කිරීමේ දිනයන් දීර්ඝ කිරීමේ කටයුතු වලදී රැඳවියන් බන්ධනාගාරයේ සිට වීඩියෝ තාක්ෂණය ඔස්සේ සම්බන්ධ කර ගන්නා ලෙසයි.
මෙසේ බන්ධනාගාර තුල ඇති තදබදය අවම කිරිම රජය තීන්දු කර ඇත්තේ කොරෝනා වෛරසය තර්ජනය සැලකිල්ලට ගනිමිනි.
කොවිඩ්19 ආසාදිත පුද්ගලයෙක් අනුරාධපුර බන්ධනාගාරයේ සිටින බවට පැතිරගිය ආරංචියත් සමග මාර්තු 21දා ඇතිවූ ගැටුමෙන් වෙඩි ප්‍රහාරයට ලක්වූ රැඳවියන් දෙදෙනෙකු ජීවිතක්ෂයට පත්විය.
