පුවත්

රුසියානු ජනාධිපති ව්ලැදිමිර් පුටින් සහ තමන් අතර අද (06) දුරකථන සංවාදයක් පැවැත්වූ බව ජනාධිපති ගෝඨාභය රාජපක්ෂ පවසයි .

පවතින ආර්ථික අර්බුදය හමුවේ ඉන්ධන ලබා ගැනීම සඳහා ණය ක්‍රමයක් ලබා දෙන ලෙසට තමන් රුසියානු ජනාධිපතිවරයාගෙන් ඉල්ලා සිටි බවත්, මේ වන විට අත්හිටුවා ඇති ඒරෝෆ්ලෝට් ගුවන් සේවයේ මෙහෙයුම් කටයුතු යළි ආරම්භ කරන ලෙස ද රුසියානු ජනාධිපතිවරයාගෙන් ඉල්ලා සිටි බවත් ජනාධිපති ගෝඨාභය රාජපක්ෂ සඳහන් කර ඇත .

ජනාධිපති ගෝඨාභය මේ බව සඳහන් කර ඇත්තේ සිය ට්විටර් සටහනක් තබමින්ය.

අතීතයේදී රුසියාව විසින් ශ්‍රී ලංකාවට සහය දැක්වූ කරුණු සම්බන්ධයෙන් තමන් ස්තුතිය පළකළ බවද ජනාධිපතිවරයා එහිදී සඳහන් කර ඇත .

සංචාරක, වෙළෙඳ සහ සංස්කෘතිය වැනි අංශවල ද්විපාර්ශ්වික සබඳතා ශක්තිමත් කර ගැනීම අපගේ ජාතීන් දෙක අතර පවතින මිත්‍රත්වය ශක්තිමත් කිරීම සඳහා ප්‍රමුඛ වන කරුණු සම්බන්ධයෙන් ද මෙහිදී සාකච්ජා කළ බව ජනාධිපතිවරයා සඳහන් කර ඇත .

කොටුව ජනාධිපති මන්දිරය අසල පැවැත් වූ විරෝධතාවයක් අතරතුරදී අත්අඩංගුවට ගත් හිරුණිකා ප්‍රේමචන්ද්‍ර  ඇතුළු 12 දෙනෙකු පොලිස් ඇප මත මුදාහැර තිබේ.

ඔවුන් එලෙස විරෝධතාවයේ නිරත වුණේ, ජනධිපතිවරයාට එරෙහිවයි.

පසුව පොලීසිය හිරුණිකා ප්‍රේමචන්ද්‍ර  ඇතුළු පිරිස අත්අඩංගුවට ගෙන කොළඹ වරාය පොලිස්ථානයට රැගෙන ගියේ ය.

අග්‍රාමාත්‍ය රනිල් වික්‍රමසිංහ වහාම මුදල් අමාත්‍ය ධුරයෙන් ඉවත්විය යුතු බව අමාත්‍ය ධම්මික පෙරේරා අද(06) පෙරවරුවේ විශේෂ මාධ්‍ය හමුවක් කැඳවමින් සඳහන් කළේය

ඔහු මෙහිදී සඳහන් කරන්නේ රනිල් වික්‍රමසිංහ අග්‍රාමාත්‍යවරයාට ආර්ථිකය ගොඩගැනීම සඳහා කිසිදු සැලැස්මක් නොමැති බවයි.

එවැනි සැලැස්මක් තිබේ නම් තමා සමග විවාදයකට එන ලෙසත් ධම්මික පෙරේරා අමාත්‍යවරයා , අග්‍රාමාත්‍ය රනිල් වික්‍රමසිංහට අභියෝග කළේය.

ධම්මිකගේ කිපුණේ ඇයි ?

කෙසේ වුවත් දේශපාලන විචාරකයන් පවසන්නේ ධම්මික පෙරේරා අමාත්‍යවරයකු වීමට පෙර අංක එකේ කැසිනෝ ව්‍යාපාරිකයාව සිටි බව අමතක නොකළ යුතු බවයි .

පසුගියදා අග්‍රාමාත්‍ය රනිල් වික්‍රමසිංහ විසින් ශ්‍රී ලංකාවේ කැසිනෝ ව්‍යාපාරයේ නිරත ආයතන නියාමනය කිරීමට සහ ඒවායින් විධිමත් ලෙස නියමිත බදු අයකර ගැනීමට හැකිවන ආකාරයට සූදු බදු පනත සංශෝධනය කිරීමට කැබිනට් යෝජනාවක් ගෙන ආ බවත් ඔවුන් සිහිපත් කරයි.

මෙතෙක් කාලයක් සූදු බදු නිසි ලෙස රාජ්‍ය ආදායමට එක්නොවූ බවත් ඒ ආශ්‍රිතව බදු නොගෙවීම සම්බන්ධයෙන් පවා ව්‍යාපාරිකයන්ට චෝදනා ඇති බවත් ඔවුන් පවසයි .

එසේම මේ මොහොතේ රනිල් වික්‍රමසිංහ සම්බන්ධයෙන් ජනතා අවිශ්වාසය ගොඩනගන්න බැසිල් රාජපක්ෂ ගේ දේශපාලන ව්‍යාපෘතිය විය හැකි බවත් දේශපාලන විචාරකයන් පවසයි .

පසුගියදා බැසිල් රාජපක්ෂ පාර්ලිමේන්තු මන්ත්‍රී ධූරයට සමුදුන් අතර ඔහු වෙනුවට පොදුජන පෙරමුණේ ජාතික ලැයිස්තු මන්ත්‍රී ධූරයෙන් පාර්ලිමේන්තු පැමිණියේ ධම්මික පෙරේරා ය.

රනිල්ගේ යෝජනාව !

මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා ලෙස ,අග්‍රාමාත්‍ය රනිල් වික්‍රමසිංහ ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇත.

ඊට අනුව ,2010 අංක 17 දරන කැසිනෝ ව්‍යාපාර (නියාමනය කිරීමේ) පනත සහ 1988 අංක 40 දරන ඔට්ටු ඇල්ලීම සහ සූදු බදු පනත මඟින් ශ්‍රී ලංකාවේ කැසිනෝ කර්මාන්තය නියාමනය කිරීම සඳහා වන විධිවිධාන පනවා ඇත.

2010 අංක 17 දරන පනත යටතේ ශ්‍රී ලංකාව තුළ කැසිනෝ ව්‍යාපාර පවත්වාගෙන යාම සඳහා බලපත්‍ර ලබා දිය යුතු නමුත්, එකී පනතේ විධිවිධාන බලාත්මක කිරීම සඳහා අවශ්‍ය නියෝග මෙතෙක් නිකුත් කර නොමැති වීම හේතුවෙන් මේ දක්වා කිසිදු කැසිනෝ ව්‍යාපාරයකට එකී පනත යටතේ බලපත්‍ර නිකුත් කර නොමැත.

එම තත්ත්වය යටතේ දැනට කැසිනෝ ව්‍යාපාරයේ නිරත ආයතන වෙතින් විධිමත් පරිදි අදාළ බදු අයකර ගැනීමට අපහසු වී තිබේ.

එබැවින්, එවැනි ව්‍යාපාර නියාමනය කිරීමට සහ රජයට අයවිය යුතු නියමිත බදු අයකර ගැනීමේ අරමුණින් 2010 අංක 17 දරන කැසිනෝ ව්‍යාපාර (නියාමනය කිරීමේ) පනත යටතේ නියෝග නිකුත් කිරීමටත්, 1988 අංක 40 දරන ඔට්ටු ඇල්ලීම සහ සුදු බදු පනතට යෝග්‍ය සංශෝධන හඳුන්වා දීම සඳහාත් අවශ්‍ය පියවර ගැනීම පිණිස මෙම යෝජනාව ඉදිරිපත් කර ඇත.

ආන්ඩුවට සැලැස්මකුත් නෑ. සැලස්මක් ගැන කතාකරන්න අපිට ඉඩ දෙන්නෙත් නෑ ” ශ‍්‍රී ලංකා පොදුජන පෙරමුණ පාර්ලිමේන්තු මන්ත‍්‍රී ආචාර්ය නාලක ගොඩහේවා කියයි.

ඔහු මෙසේ පවසා ඇත්තේ තම ෆේස් බුක් ගිනුමේ සටහනක් තබමිනි.

‘ආන්ඩු පක්ෂයේ ප්‍රධාන සංවිධායක කාර්යාලයෙන් උදේ කතාකරල මට කියනවා රටේ වත්මන් ආර්ථික අර්බූදය ගැන කතා කරන්න විනාඩි 3 යි දෙන්න පුලුවන් කියලා. විනාඩි 3 කින් මොනවද කියන්න පුළුවන්. එයාල වරු ගනන් කාලය දෙන අය මොනවද කියන රට හදන සැලැස්ම ?

ඊයේ අගමැති තුමා පාර්ලිමේන්තුවේ කල කතාවේ මම නම් දැක්කේ නෑ සැලැස්මක්. ආන්ඩුවට නිසි සැලැස්මක් නැති නිසා තමයි අද IMF එකත් පස්ස ගහන්නේ.

රජය කල යුතු, කල හැකි බොහෝ දේවල් තියෙනවා. උදාහරණයක් වශයෙන් රටේ ආදායම් හා වියදම් කලමණාකරනයේදී රාජ්‍ය ආයතන ප්‍රතිව්‍යුහගත කිරීමේ අවශ්‍යතාවය ගැන අගමැතිතුමා හෝ එකම කැබිනට් මන්ඩල සාමාජිකයෙක් විවෘතව කතා කරනවා මෙතෙක් මම අහලා නෑ.

පාර්ලිමේන්තුවේ COPE කමිටුවේ විමර්ශණයට ලක්වෙන රාජ්‍ය ආයතන 420 ක් පමන තිබෙනවා. මේ අතරින් මහා භාන්ඩාගාරය අඩුම ගානේ වාර්ෂිකව අධ්‍යයනයක් වත් කරන්නේ ආයතන 52 ක් ගැන පමනයි. ඔවුන් කියනවා මේ ආයතන 52 ක් උපායමාර්ගිකව වැදගත් කියලා. ඒ කියන්නේ ඉතුරු 370 ව උපායමාර්ගිකව කිසිම වැදගත් කමක් නෑ රජයට. ඒවා තියෙන නිසා පවත්වාගෙන යනවා. හැබැයි ඒවා නඩත්තු කරන්න වාර්ෂිකව මේ රටේ ජනතා මුදල් වියදම් කරනවා.

රාජ්‍ය ආයතන වෙනුවෙන් මේ රට විශාල ආයෝජනයන් කොට තිබෙනවා 2021 වන විට ලංකාවේ ප්‍රධානතම රාජය ආයතන 52 පමනක් සතුව තිබෙන සම්පත්වල වටිනාකම රුපියල් ට්‍රිලියන 12.437 එහෙමත් නැත්නම් බිලියන 12,437 ක්. කොටින්ම කියනවා නම් රජයේ අවුරුදු 12 ක විතර ආදායමට සමානයි මේ ආයතන 52 පමනක් තියෙන සම්පත්. මේ වගේම තවත් විශාල සම්පත් ප්‍රමාණයක් රජයේ ඉතුරු ආයතනත් ගත්තොත් තියෙනවා. දැන් අහන්න මේ හා විශාල සම්පත් ප්‍රමාණයක් කලමණාකරනය කරලා මේ රාජ්‍ය ආයතන රජයට වසරකට ගෙවන්නේ කීයද කියල. 2021 වසරේ ගෙවලා තියෙන්නේ රුපියල් බිලියන 30 යි. අර කොරෝනා කාලේ අඩු ආදායම් ලාභීන්ට රුපියල් 5000 දෙනකොට එකවරකට මේ බිලියන 30 ඉවර වෙනවා. ඊටත් වඩා වැදගත් කාරනේ තමයි මේ රාජ්‍ය ආයතන සියල්ල එකතු වෙලා රජයට රුපියල් බිලියන 30 ක් දෙන කොට රජය මේ ආයතන නඩත්තු කරන්න රුපියල් බිලියන 360 භාන්ඩාගාරයෙන් වියදම් කරලා තියෙනවා.

පෞද්ගලික අංශයේ ව්‍යාපාරක කරන කොට අපි return on investment ගැන කතා කරනවා. ඒ කියන්නේ ආයෝජනයට සාපේක්ශව ප්‍රතිලාබ. බැංකුවේ සල්ලි දාල අවුරුද්දට 15 ක් ගන්න පුලුවන්නම් ව්‍යාපාරය කරල අඩුගානේ 25% ක වත් ප්‍රතිලාබයක් තියෙන්න ඕනේ නේද. නමුත් මේ රජයේ ව්‍යාපාර වල return on investment කීයද ? බිලියන 12,000 ට බිලියන 30 කියන්නේ 0.25% ( සීයට දසම 25 යි)

මොන අපරාධයක්ද මේක . මොනවටද මේ ව්‍යාපාර තියන් ඉන්නේ ?

මම මුලින් කියපු රාජ්‍ය ආයතන 52 ක් අවුරුද්දකට 12 % ක ප්‍රතිලාබයක් රටට දුන්නා නම් ඒ කියන්නේ වසරකට රුපියල් බිලියන 1,400 ක්. ඒ කියන්නේ රාජ්‍ය ආදායම දෙගුන කරන්න පුළුවන් මේ උපායමාර්ගිකව වැදගත් කියන රාජ්‍ය ආයතන 52 නිසියාකාරව කලමණාකරනය කිරීමෙන් පමනක්.

ඉතුරු ආයතන 370 නම් තියාගෙන ඉදලා කිසිම වැඩක් නෑ ඒවා අනිවාර්‍යයෙන්ම එක්කෝ වහලා දාන්න ඕනේ නැත්නම් ප්‍රතිව්‍යුහගත කරන්න ඕනේ.

මේ රාජ්‍ය ආයතනවල අති විශාල නාස්ති හා දූෂණයන්ද සිදුවන බව පොදු ව්‍යාපාර පිලිබඳ පාර්ලිමේන්තු කමිටුව හමුවේ නිතර ඔප්පු වෙනවා. මේ නිසා ලාබ ලබන ආයතනවලත් ඒ සම්පත්ම වඩා කාර්‍යක්ෂමව කලමනාකරණය කිරීමෙන් ඊට වඩා ආදායමක් ලබා ගන්නට බැරිද යන ප්‍රශ්ණය ඇසිය යුතුයි. පාඩු ලබනා ආයතන වලත් තත්වය එයමයි. මේ බොහෝ ආයතනවල ඇත්තේ කලමණාකාරීත්ව දුර්වල තාවයයි. රාජ්‍ය ආයතන වල 220,000 සේවකයෝ වැඩකරනවා. මේ අයගෙන් උපරිම ඵලදායිතාව ලබා ගන්න ආන්ඩුව වැඩ කරනවද . ඒ අයට හරි පුහුණුව ලබාදීලා, අතිරික්ත සේවකයන් ඉන්න තැන්වලින් සේවකයන් අඩු තැන් වලට මාරු කරලා, ඉලක්ක ලබා දීලා, නිසි සේවය අගය කරන්නත් බොරු කරන අයට අවස්ථා නොදෙන්නත් පුලුවන් සැලසුම් හදලා මේ ආයතන පාලනය කරන්න ඒ කලමණකාරීත්වයන්ට පුළුවන් වෙන්න ඕනේ.

ඒ නිසා සියල්ලටම පෙර මේ ආයතනවලට ලාබ ඉපයීම සඳහා පැහැදිලි ඉලක්ක ලබා දී ඒ සඳහා දක්ෂ කලමණාකරුවන් පත් කල යුතුයි. ඉලක්ක සපුරා නොගන්නා ආයතන වසා දමනු ලබන බව කල් තබා දැනුම් දී ප්‍රතිපල පෙන්වීමට ඒවාට නිශ්චිත කාල සීමාවක් ලබා දිය යුතුයි.

තව බොහෝ දේවල් තියෙනවා දැන් හරි කරන්න පටන් ගත යුතු.

– මාධ්‍ය ඒකකය

වරාය, නාවික හා ගුවන් සේවා අමාත්‍ය ධුරයෙන් තාවකාලිකව ඉවත් වීමට නිමල් සිරිපාල ද සිල්වා කටයුතු කර තිබේ.

නම සඳහන් නොකරමින් ජපානයේ සමාගමක් වෙතින් අමාත්‍යවරයකු කොමිස් මුදලක් ඉල්ලීම සම්බන්ධයෙන් විපක්ෂ නායකවරයා ඊයේ (05) පාර්ලිමේන්තුවේ දී චෝදනාවක් එල්ල කළේය .

ඒ සම්බන්ධයෙන් වහාම විධිමත් පරීක්ෂණයක් සිදු කරන ලෙස ජනාධිපති ගෝඨාභය රාජපක්ෂ නියෝග කර ඇති බවත් වාර්තා වෙයි .

පරීක්ෂණ කටයුතු නිමවන තෙක් ජනාධිපතිවරයාගේ උපදෙස් මත අමාත්‍යවරයා මෙම පියවර ගෙන ඇති අතර ඊට අදාළ ලිපිය පහත දැක්වෙයි .

හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර ඇතුළු 09 දෙනෙක් කොටුව පොලීසිය අද (06) අත්අඩංගුවට ගෙන ඇත .

ඒ ඔවුන් ජනාධිපති මන්දිරය ආසන්නයේ ඔරලෝසු කනුව ළඟට පැමිණ විරෝධතාවයක නිරතව සිටියදීය.

පොලිස් මාධ්‍ය ප්‍රකාශක පවසන්නේ අත්අඩංගුවටගත් පිරිස අතර හිරුණිකා ප්‍රේ්මචන්ද්‍ර සමඟ කාන්තාවන් 05 දෙනෙක්ද පිරිමි පුද්ගලයින් 04 දෙනෙක්ද සිටින බවය.

ජපානයේ ටයිසෙයි නැමැති ආයතනයෙන් නැමති සමාගමෙන් කොමිස් ඉල්ලූ බවට මෙරට ජපන් තානාපති කාර්‍යාලය හරහා බරපතළ චෝදනාවකට ලක්වූ අමාත්‍ය නිමල් සිරිපාල ද සිල්වා කැබිනට් අමාත්‍ය ධූරයෙන් ඉවත් කිරීමට ආණ්ඩුවේ ප්‍රධානීන් තීන්දුවක් ගෙන ඇති බව වාර්තා වෙයි .

ඒ අනුව දේශපාලන ආරංචි මාර්ග සඳහන් කරන්නේ අද ( 06) අමාත්‍යවරයා ධූරයෙන් ඉවත් කිරීමට හෝ ඉල්ලා අස්වීමක් නිවේදනය කිරීමට නියමිතව ඇති බවය.

ටයිසෙයි සමාගම 1987 දී ආරම්භ කරන ලද ජපන් සමාගමකි.. එහි ප්‍රධාන ව්‍යාපාර ක්ෂේත්‍රයන් වන්නේ ගොඩනැඟිලි ඉදිකිරීම්, සිවිල් ඉංජිනේරු විද්‍යාව හා දේපළ වෙළඳාම් සංවර්ධනය ය.

2020 වසරේදී කටුනායක බණ්ඩාරනායක ජාත්‍යන්තර ගුවන් තොටුපළේ බහු මට්ටමේ පර්යන්ත ගොඩනැඟිල්ලක් ඉදිකිරීම සඳහා ටයිසෙයි සමාගමට ඩොලර් මිලියන 564ක කොන්ත්‍රාත්තුවක් ලබා දී තිබිණ.

ජපානයේ ටයිසෙයි නැමැති ආයතනයෙන්, මෙරට කැබිනට් ඇමතිවරයෙක් පගාවක් ඉල්ලා ඇති බව , විපක්ෂ නායක සජිත් ප්‍රේමදාස, ඊයේ (05) පාර්ලිමේන්තුවේ දී හෙළිදරව් කළේය.

එම සිදුවීම දැනගත් ජනාධිපතිවරයා, බොහෝ සේ කලබල වූ බවත්, පගාව ඉල්ලූ ඇමතිවරයා කවුද කියා ජනාධිපතිවරයාගෙන්ම අහලා දැන ගන්න යනුවෙන් ද විපක්ෂ නායකවරයා පැවසීය .

එහිදී වැඩිදුරටත් ඔහු මෙසේද පැවසීය .

“ ගරු කතානායකතුමනි, මේ රටේ දූෂණ වංචා හොරකම් සියල්ලක්ම නතර කරන්නට ඕනේ. මම ගරු අගමැතිතුමාගෙන් අහනවා. ජනාධිපතිවරයා බොහෝ ලෙස කලබල උනාලු දැනට කැබිනට් එකේ ඉන්න ඇමතිවරයා ජපානයේ ටෙයිසෙයි කියන කොම්පැනියෙන් පගාවක් ඉල්ලලා. මම අහනවා මෙහෙම දූෂිත ආණ්ඩුවක් තුළ රට ගොඩනගන්න පුළුවන් ද?. එහෙනම් අග්‍රාමාත්‍යතුමා අපෙන් ඇහුවා විසඳුම්. කරුණාකරලා තමන්ගෙ කැබිනට් මණ්ඩලයේ දූෂිත ක්‍රියාකාරකම් කරන, කොමිස් ගන්න, පගා ගන්න අය ඉවත් කිරීම. ටෙයිසෙයි කම්පැනියෙන් පගාවක් ගත්තෙ කවුද? ජනාධිපති තුමාගෙන් ම අහගන්න. “

අපොස උසස් පෙළ, අපොස සාමාන්‍ය පෙළ සහ 05 ශ්‍රේණිය ශිෂ්‍යත්ව විභාගය පැවැත්වෙන දින වකවානු අධ්‍යාපන අමාත්‍ය සුසිල් ප්‍රේමජයන්ත පාර්ලිමේන්තුවේදී අද (5) ප්‍රකාශයට පත් කළේය.

අමාත්‍යවරයා එම දින වකවානු ප්‍රකාශ කළේ කෑගලු දිස්ත්‍රික් මන්ත්‍රී උදයකාන්ත ගුණතිලක සභාව කල්තබන අවස්ථාවේදී යොමු කළ ප්‍රශ්නයකට පිළිතුරු දෙමිනි.

එහිදී සුසිල් ප්‍රේමජයන්ත අමාත්‍යවරයා මෙසේද ප්‍රකාශ කළේය.

" පසුගිය උසස් පෙළ විභාගයේ ප්‍රතිඵල ලබන අගෝස්තු මාසයේදී නිකුත් කෙරෙනවා. මීළඟ උසස් පෙළ විභාගය ඒ ප්‍රතිඵල නිකුත් කර අඩු තරමින් මාස තුනකින් පසු බොහෝවිට නොවැම්බර් දෙසැම්බර් පැවැත්වීමට බලාපොරොත්තු වෙනවා. එසේම මේ වසරේදී පැවැත්විමට නියමිත 5 ශ්‍රේණිය ශිෂ්‍යත්ව විභාගය උසස් පෙළ ආරම්භ කිරීමට පෙරාතු දිනයක පවත්වීමට අපේක්ෂා කරනවා. මේ වසර අවසානයේ තිබෙන අපොස සාමාන්‍ය පෙළ විභාගය ලබන වසරේ පෙබරවාරි මාර්තු පැවැත්වීමට සැලසුම් කරලා තියෙනවා.

ප්‍රධාන විභාග දෙකක් අතර යම් කාල පරිච්ඡේදයක් අවශ්‍ය කටයුතු සැලසුම් කිරීම සඳහා විභාග දෙපාර්තමේන්තුවට ලබාදීම අවශ්‍යයි. අපොස උසස් පෙළ විභාගය පසු ගිය සැරේ පැවැත්වුණා. ඒ විභාගයේ ප්‍රතිඵල පරික්ෂා කිරීම අවසන් අදියරේ පවතිනවා.

කොවිඩ් තත්වය නිසා 2020- 21 වර්ෂවලදී බස්නාහිර පළාතේ පාසල් කාලය සියයට 50කින් පමණ අහිමි වුණා. පිට පළාත්වල එම කාලයේදී අහිමිවුණු පාසල් කාලය සියයට හතළිහකි.

යාල නැතහොත් රුහුණු ජාතික වනෝද්‍යාන සංකීර්ණයේ කලාප අංක 4 හි කුඹුක්කන්ඔය ආශ්‍රිත කයිලකුඹුර ප්‍රදේශයේ දැවැන්ත මැණික් කැනීම් ජාවාරමක් ක්‍රියාත්මක වේ.

ඔක්කම්පිටිය ප්‍රදේශයේ මැණික් ව්‍යාපාරිකයන් කිහිපදෙනෙකු ගේ මෙහෙයවීම යටතේ සේවකයන් 300 ක් පමණ යොදා ගෙන ජාතික වනෝද්‍යානයේ අක්කර සියයක් පමණ විනාශ කර මෙම ජාවාරම සිදු කෙරේ. බැකෝ යන්ත්‍ර හා යාන්ත්‍රික මැණික් ඉල්ලම් සේදුම් යන්ත්‍ර භාවිත කර සංවිධානාත්මක ව මෙම ජාවාරම ක්‍රියාත්මක කරයි.

මෙම නීතී විරෝධී ක්‍රියා හේතුවෙන් අලි - ඇතුන්ට ජාතික වනෝද්‍යානය තුළ ම රැකවරණය අහිමි වී එම සතුන් අවට ගම්මානවලට හා වගා බිම්වලට පිවිසීමෙන් අලි - මිනිස් ගැටුම් අලුතින් නිර්මාණය විය හැකි ය. එපමණක් නොව උග්‍ර නියං සමයක් පවතින මෙම කාල වකවානුව තුළ කුඹුක්කන්ඔයට මැණික් ඉල්ලම් සේදීමේ දී එක් වන අධික රොන්මඩ හේතුවෙන් එහි ජෛව ප්‍රජාව සම්පූර්ණයෙන් ම විනාශ වී යනු ඇත.

මෙම සියලු ක්‍රියාවන් සිදු කරන්නේ වන සත්ත්ව හා වෘක්ෂලතා ආරක්ෂක ආඥා පනත උල්ලංඝනය කරමිනි.

මෙම පනතේ 2 වන වගන්තියට අනුව 1969 ඔක්තොම්බර් මස 9 වන දින අංක 14875 දරන ගැසට් නිවේදනයට යටතේ හෙක්ටයාර 26418 ක් වන යාල ජාතික වනෝද්‍යානයේ කලාප අංක 4 ප්‍රකාශයට පත් කර තිබේ. මෙම පනතේ 5 වන වගන්තියට අනුව බලපත්‍රයක් නොමැති ව ජාතික වනෝද්‍යානයට ඇතුළු වීම ද නීති විරෝධී වෙයි.

පනතේ 6 වන වගන්තියට අනුව ජාතික වනෝද්‍යානයේ ශාක විනාශ කිරීම, ඉඩම් එළි කිරීම, පතල් හෑරීම ඇතුළු සියලු ක්‍රියාවන් නීති විරෝධී වේ.

පනතේ 67ආ1 උප වගන්තියට අනුව ජාතික වනෝද්‍යානයක ඕනෑ ම නීති විරෝධී ක්‍රියාවක නිරත වන පුද්ගලයකු වරෙන්තුවක් නොමැතිව අත් අඩංගුවට ගත හැකි ය.

එම ක්‍රියාවල නිරත වූ පුද්ගලයන්ට වනජීවී සංරක්ෂණ දෙපාර්තමේන්තුවේ නිලධාරීන්ට ඇප ලබා දීමේ හැකියාව නොමැති අතර පනතේ 63 වන වගන්තියට අනුව මහේස්ත්‍රාත් අධිකරණයක් වෙත ඉදිරිපත් කළ යුතු ය. මහේස්ත්‍රාත් අධිකරණයක් ඉදිරියේ වරදකරුවකු කරනු ලබන පුද්ගලයකුට රුපියල් විසි දහසත් ලක්ෂයත් අතර දඩයකට හෝ වසර 2 ත් 5 ත් අතර බන්ධනාගාර ගත කිරීමකට හෝ මෙම දඩුවම් දෙකට ම යටත් කළ හැකි ය.

එපමණක් නොව එම වරද නැවත අවස්ථාවක දී සිදු කර අධිකරණයෙන් වරදකරුවකු කරනු ලැබූ විට රුපියල් හතලිස් දහසත් ලක්ෂ දෙකත් අතර දඩයකට හෝ වසර 5 ත් 10 ත් අතර බන්ධනාගාර ගත කිරීමට හෝ මෙම දඩුවම් දෙකට ම යටත් කළ හැකි ය.

මෙම පනතේ 59 වන වගන්තියට අනුව ජාතික වනෝද්‍යානයක නීති විරෝධී ක්‍රියාවක නිරත වීමට ආධාර හෝ අනුබල ලබා දෙන තැනැත්තෙකු ද එම වරදට ම වරදකරුවකු වන්නේ ය.

නමුත් ඉන්දන අර්බුධයට මුහුණ දී සිටින වනජීවී සංරක්ෂණ දෙපාර්තමේන්තුවේ නිලධාරීන්ට නීති විරෝධී ක්‍රියාවල නිරත පුද්ගලයන් අත් අඩංගුවට ගෙන මෙම නීතී ක්‍රියාත්මක කිරීමට මෙහෙයුම් සිදු කිරීමට නොහැකි වී තිබේ. එහෙත් ජාවාරම්කරුවන් ඔක්කම්පිටිය ප්‍රදේශයේ ඉන්දනහල් වලින් ඉන්දන ලබා ගෙන අඛණ්ඩ ව ජාතික වනෝද්‍යානය විනාශ කරමින් මැණික් ජාවාරමේ නිරත වේ.

වනජීවී සංරක්ෂණ දෙපාර්තමේන්තුව අත්‍යවශ්‍ය සේවා යටතට එක් කර ප්‍රමාණවත් පරිදි වාහනවලට ඉන්දන ලබා නොදීම නිසා මෙම ජාවාරම්කරුවන් අත් අඩංගුවට ගෙන නීති ක්‍රියාත්මක කිරීමට නොහැකි ව තිබේ.

එහෙත් වනජීවී සංරක්ෂණ දෙපාර්තමේන්තුවේ ඉහල නිලධාරීන් මේ සඳහා මැදිහත් නොවීම නිසා පොලීසියේ හා විශේෂ කාර්යය බලකායේ උදව් මත මෙම ජාවාරම මැඩලීම සඳහා යොමු වීමට ද නොහැකි වී ඇත.

අලි - ඇතුන් ඇතුළු ව ඉතා විශාල ජෛව ප්‍රජාවකට වාසස්ථාන සපයන මෙරට සුවිශේෂී ම ජාතික වනෝද්‍යාන සංකීර්ණය තුළ මේ තත්ත්වය ඇති වී තිබීම හා එම තත්ත්වය පාලනය කිරීම සඳහා නිලධාරීන්ට හැකියාව නොමැති වීම කණගාටුවට කරුණකි.

සංවිධානාත්මක ව සිදු කරන මෙම ජාවාරම මැඩ පැවැත්වීම සඳහා අදාළ සියලු අංශවල මැදිහත්වීම ලබා දිය යුතු බව විශේෂයෙන් අවධාරණය කළ යුතු ය. එසේ නොමැති වුවහොත් නීතියේ ආධිපත්‍යය අහිමි කිරීම, ප්‍රජාතන්ත්‍රවාදී ව්‍යුහය බිඳ දැමීම, දූෂණ හා වංචා වර්ධනය කිරීමේ ප්‍රතිඵලයක් ලෙස හා එම තත්ත්වයන් මැඩපැවැත්වීමට ක්‍රියාමාර්ග නොගැනීමේ ප්‍රතිඵලයක් ලෙස දැනට දරුණු ලෙස වර්ධනය වී ඇති ආර්ථික හා දේශපාලන අර්බුදයට අමතර ව මෙම මැණික් ජාවාරම් හේතුවෙන් දැවැන්ත පාරිසරික අර්බුදයකට ද අපට ඉදිරියේ දී මුහුණ දීමට සිදු වනු ඇත.

සජීව චාමිකර

ඉඩම් හා කෘෂිකර්ම ප්‍රතිසංස්කරණ ව්‍යාපාරය

ශ්‍රී ලංකාවේ කැසිනෝ ව්‍යාපාරයේ නිරත ආයතන නියාමනය කිරීමට සහ ඒවායින් විධිමත් ලෙස නියමිත බදු අයකර ගැනීමට හැකිවන ආකාරයට සූදු බදු පනත සංශෝධනය කිරීමට නියමිතය.

මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා ලෙස ,අග්‍රාමාත්‍ය රනිල් වික්‍රමසිංහ ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇත.

ඊට අනුව ,2010 අංක 17 දරන කැසිනෝ ව්‍යාපාර (නියාමනය කිරීමේ) පනත සහ 1988 අංක 40 දරන ඔට්ටු ඇල්ලීම සහ සූදු බදු පනත මඟින් ශ්‍රී ලංකාවේ කැසිනෝ කර්මාන්තය නියාමනය කිරීම සඳහා වන විධිවිධාන පනවා ඇත.

2010 අංක 17 දරන පනත යටතේ ශ්‍රී ලංකාව තුළ කැසිනෝ ව්‍යාපාර පවත්වාගෙන යාම සඳහා බලපත්‍ර ලබා දිය යුතු නමුත්, එකී පනතේ විධිවිධාන බලාත්මක කිරීම සඳහා අවශ්‍ය නියෝග මෙතෙක් නිකුත් කර නොමැති වීම හේතුවෙන් මේ දක්වා කිසිදු කැසිනෝ ව්‍යාපාරයකට එකී පනත යටතේ බලපත්‍ර නිකුත් කර නොමැත.

එම තත්ත්වය යටතේ දැනට කැසිනෝ ව්‍යාපාරයේ නිරත ආයතන වෙතින් විධිමත් පරිදි අදාළ බදු අයකර ගැනීමට අපහසු වී තිබේ.

එබැවින්, එවැනි ව්‍යාපාර නියාමනය කිරීමට සහ රජයට අයවිය යුතු නියමිත බදු අයකර ගැනීමේ අරමුණින් 2010 අංක 17 දරන කැසිනෝ ව්‍යාපාර (නියාමනය කිරීමේ) පනත යටතේ නියෝග නිකුත් කිරීමටත්, 1988 අංක 40 දරන ඔට්ටු ඇල්ලීම සහ සුදු බදු පනතට යෝග්‍ය සංශෝධන හඳුන්වා දීම සඳහාත් අවශ්‍ය පියවර ගැනීම පිණිස මෙම යෝජනාව ඉදිරිපත් කර ඇත.

කන්දකාඩු පුනරුත්ථාපන මධ්‍යස්ථානයේ පසුගිය ජුනි (29) සිදුවූ රැදවියාගේ මරණය ඝාතනයක් බව අද (05) අනාවරණය කරගෙන ඇත.

එහිදී මොට ආයුධයකින් කළ පහරදීමක් මෙම මරණයට හේතුවී ඇති බවත් සිරුර පුරාම අභ්‍යන්තර තුවාල සිදුව ඇති බවත් එම තැලීම් තුවාලවල සංකූලතා හේතුවෙන් මරණය සිදුව ඇති බවත් පශ්චාත් මරණ පරීක්ෂණයෙන් පසු අධීකරණ වෛද්‍යවරයා විසින් තහවුරු කර ඇත.

අදාළ ඝාතනය සම්බන්ධයෙන් මේ වන විට සැකපිට ගුවන් හමුදවේ සහ යුද හමුදාවේ සැරයන්වරු සිව්දෙනෙකු පොලිස් අත්අඩංගුවට ගෙන ඇත .

ඒ පහරදීම පිළිබඳව සෙසු රැඳවියන් ලබාදුන් සාක්ෂි මතය.

පහරදීමට යොදා ගත් අධිබලැති විදුලි රැහැනක අඩි 03ක පමණ කොටසක්ද, උණ පතුරු දෙකක් ද, කදවුරේ සඟවා තිබියදී පොලීසිය සොයාගෙන ඇති බවත් වාර්තා වෙයි .

මරණය සිදුව ඇත්තේ මෙම විදුලි රැහැනෙන් සහ උණ පතුරෙන් කළ පහරදීම්වලින් බවත් ඒ අනුව මෙම මරණය සම්බන්ධයෙන් ඉදිරි විමර්ශන පැවැත්වෙන්නේ ඝාතනයක් ලෙස සළකා බවත් පොලීසිය සඳහන් කරයි.

ලංකාවේ කිසිදු විධායක ජනාධිපතිවරයෙකු මුහුණ නොදුන් අවමන් සහගත අවස්ථාවකට ගෝඨාභය රාජපක්ෂ  අද මුහුණ දුන්නේය.

විධායක ජනාධිපතිවරු 06 දෙනෙකු වසර 44 ක ලංකා පාර්ලිමේන්තුව පැමිණ ඇත. එය අමතා ඇත. නමුත්, කිසිම අවස්ථාවක ජනාධිපතිවරයාගේ නම කියමින් පාර්ලිමේන්තුවෙන් පිටවන තැනට හු කියමින් විරෝධයක් එල්ල වූ වේ නැත.

2022 ජූලි 05 විධායක ජනාධිපති ගෝඨාභය රාජපක්ෂ පාර්ලිමේන්තුවට පැමිණ ටික වේළාවකින් පාර්ලිමේන්තු මන්ත්‍රීවරුන් විසින් ඉල්ල කළ විරෝධය, හූ හඩ නිසා පාර්ලිමේන්තුවෙන් නැගිය ගියේය.

ජනාධිපතිවරයෙක් සභාවේ සිටිය දී පාර්ලිමේන්තුව කල් තැබීමට සිදු වූවේ ද ලංකා ඉතිහාසයේ පළමු වතාවට ය.

දියවන්නා පාර්ලිමේන්තු කාමරයක දී ජේ.ආර්.ජයවර්ධන ජනාධිපතිතුමන්ට බෝම්බ ප්‍රහාරයක් එල්ල විය. එය ත්‍රස්ත ක්‍රියාවකි.

නව ආණ්ඩුක්‍රම ව්‍යවස්ථාවක් ඉදිරිපත් කරමින් චන්ද්‍රිකා බණ්ඩාරනායක කුමාරතුංග මහත්මිය (2000 අගෝස්තු) කතා කරන විට එදා විපක්ෂයේ සිටි එජාපය එයට විරෝධය දැක්වීය. ව්‍යවස්ථා කෙටුම්පත ගිණි තැබුවේය. නමුත්, චන්ද්‍රිකා තමන්ගේ පාඩුවේ තමන්ගේ කතාව කරගෙන ගියේය.

පාර්ලිමේන්තුවේ කතා කරන විට එයට වාචික විරෝධය දැක්වීම පාර්ලිමේන්තු සම්ප්‍රාදයට අනුකූලය. පාර්ලිමේන්තුව ඇත්තේ කතා කරන්න, විරෝධය දක්වන්ට අදහස් දක්වන්නටය. එදා චන්ද්‍රිකා ජනාධිපතිනිය තම ශක්තිය, ආත්ම විශ්වාසය දක්වමින් විපක්ෂයේ අභියෝගයට සභාවේ දී මුහුණ දුන්නාය.

ගෝඨාභය ජනාධිපතිවරයා ඉතිහාසගත වන්නේ සභාවට පැමිණි මොහොතේ සිට පිටව යන තුරු විරෝධයට ලක්වූ, ඒ ගැන පාර්ලිමේන්තු සම්ප්‍රදාය අනුව කිසිදු විරෝධයක්, ප්‍රතිචාරයක්, අභියෝගයක් නොකළ අයෙකු ලෙසය. සාමාන්‍ය යෙන් ජනපති, අගමැති, විපක්ෂ නායක, සභානායක, විපක්ෂයේ සංවිධායකට අනුපිළිවෙල අනුව කතානායකගෙන් තම මතය කියන්නට අවස්ථාව ලබාගත හැකිය. ජනපති ගෝඨාභයට තමන්ට එල්ල වන විරෝධයට වචනයක් කියාගත නොහැකි වූවේය.

කිසිවෙකුත් ජනාධිපතිවරයා (මතවාදීව) බේරාගන්නට සභාවට කරුණු දැක්වූවේ ද නැත. ‘ගෝඨා ගෝ හෝම්‘ යැයි කියන විට නැගිට ගියා පමණී.

රජිත් කීර්ති තෙන්නකෝන්

වී ගොවීන් රාජ්‍ය බැංකුවලින් ලබාගෙන ඇති නොගෙවූ ණය කපා හැරීමේ යෝජනාවකට අමාත්‍ය මණ්ඩල අනුමැතිය හිමිවී ඇත.

ඒ අනුව හෙක්ටයාර දෙකක් හෝ ඊට අඩු ඉඩම් ප්‍රමාණයක වී වගාව සඳහා ලබාගෙන ඇති ගෙවීමට අපහසු ණය මුදල් කපාහැරීමට අමාත්‍ය මණ්ඩල අනුමැතිය හිමිවී තිබේ.

අග්‍රාමාත්‍ය රනිල් වික්‍රමසිංහ මෙම යෝජනාව අමාත්‍ය මණ්ඩලයට ඉදිරිපත් කර ඇත.

පාස්කු ප්‍රහාරය හා ඉන්පසු ඇතිවූ කොවිඩ් වසංගත තත්වය හේතුවෙන් රට තුළ නිර්මාණය වූ ආර්ථික අර්බුදය තවදුරටත් තීව්‍ර වෙමින් සෑම ක්‍ෂේත්‍රයක් කෙරෙහිම ඍජු හා වක්‍ර ලෙක දැඩි බලපෑම් එල්ල කරමින් පවතින බවත්, සමස්ත ජනගහණයෙන් සියයට 30ක් පමණ වන ගොවි ජනතාවටද දරාගත නොහැකි තත්වයක් ඇතිවී ඇති බැවින් ඔවුන් ලබාගත් ණය ගෙවීම අතපසු වී ඇතැයි ද එම යෝජනාවේ දැක්වේ.

මේ හේතුවෙන් ගොවීන් විසින් ලබාගෙන නොගෙවූ ණය බැංකු විසින් අක්‍රීය ණය ලෙස වර්ගීකරණය කර ඇතැයි ද එහි දැක්වේ.

එමෙන්ම රසායනික පොහොර වෙනුවට කාබනික පොහොර සඳහා යොමුවීමත් සමඟ ගොවි ජනතාව මුහුණ පා ඇති දුෂ්කරතාවය හා ඉදිරි මහ කන්නයේ දී වී වගාව සඳහා ණය ලබාගැනීමට යාමේදී ගොවීන් පත්වන අසීරුතාවය ද ද සැලකිල්ලට ගෙන රජය මෙම තීරණය ගෙන ඇත.

ඉදිරි සති කිහිපය තුළ තෙල් නැව් හතක් පමණ මෙරටට පැමිණීමට නියමිතව ඇති බව සංචාරක අමාත්‍ය හරීන් ප්‍රනාන්දු පැවසීය .

අමාත්‍යවරයා මේ බව සඳහන් කර සිටියේ අද (05) පාර්ලිමේන්තුවේදී පැවති විදේශ විනිමය පනත යටතේ නියෝග පිළිබඳ විවාදයේදී අදහස් දක්වමින් ය.

හරින් ප්‍රනාන්දු අමාත්‍යවරයා එහිදී මෙසේද සඳහන් කළේය.

මේවා කැබිනට් මණ්ඩලයේ මණ්ඩලයේ කතා වුණු දේවල්. ඩීසල් හතළිස් දාහක තොගයක් ලබන 8-9 අතර එනවා. දැවි තෙල් නැවක් 10-11 අතර එනවා. තවත් ඩීසල් නැවක් දාහතර වෙනිදා එනවා.
13-15 අතර විටොල් එකෙන් පැට්‍රෝල් එකක් එනවා. පහළොස් වැනිදා බොර තෙල් නැවක් එනවා. එදිනම ඉන්දීය තෙල් සමාගමෙන් වෙනම ඩීසල් එකක් එනවා. විසි දෙවෙනිදාත් තොගයක් එනවා.

අද විපක්ෂය කලබල වෙලා තියෙන්නේ මේ වැඩේ කරාවි කියලයි. මොකද මේක කළොත් ඒ ගොල්ලන් ඉවර වෙනවා. අපි කොහොම හරි මේක කරනවා.

මේ වෙලාවේ කවුරු හරි හොරකම් කරන එකෙක් ඉන්නවනම් ඌට වැහි නැති හෙණ ගහන්න ඕන. හැබැයි අද කෝප් එක තියෙනවා. 70 ට තියනවනම් එකසිය විස්සට ගන්නෙ මොන පිස්සාද. අරගලයට ව්‍යසනය ගෙනැවිත් වෛරය වපුරන්න හදනවා. එහෙම කරන අයට හරි යන්නේ නෑ මේක වට්ටලා කිසිම අයෙකුට කිසිම බම්බුවක් කරන්න බැහැ. මේ වෙලාවේ අපි කවුරුත් එකතු වෙන්න ඕන. නැත්නම් මේ රට ගොඩ දාන්න අමාරුයි.

කුරුණෑගල ඉන්ධන පිරවුම් හලක හමුදා නිළධාරියෙකු සිදු කළ පහරදීම ගැන යුධ හමුදාව පරීක්ෂණයක් ආරම්භ කළ බව මේ වන විට නිළ වශයෙන් ප්‍රකාශ කොට ඇත.

පසුගිය කාලයේදී හමුදාව සිවිල් වැසියන් වෙත එල්ල කරන ප්‍රහාර වල වීඩියෝ රාශියක් සමාජ ජාල හරහා වයිරල් වී ඇත. හමුදාව මේ ආකාරයට අමානුෂික ලෙස හැසිරෙන්නේ එජාමානව හිමිකම කාර්යාලය තුල ඔවුන්ට එරෙහිව පරීක්ෂණයක් සිදු කරන අතර තුරය.

තවත් අතෙකින් බංකොලොත් වී ඇති ලංකාවට, ඉන් ගොඩ ඒමට ජාත්‍යන්තර සහාය අත්‍යවශ්‍ය වී ඇත.නමුත් ලංකාවේ පාලකයන් ශිෂ්ඨසම්පන්න වන තාක් ජාත්‍යන්තරය උදව් කරන්නේ නැත. කුරුණෑගල සිදුවීම සම්බන්ධව හමුදාව ක්‍රියා කළ ආකාරය භයානකය. ඔවුන් එක් වරදක් වසා ගැනීමට වැරදි ගණනාවක් සිදු කොට ඇත.

1. ලුතිනල් කර්නල් කුමාරසිංහ විසින් සිවින් වැසියෙකුට පහරදීම
2. අදාල පහරදීම සමාජ ජාල වෙත අප්ලෝඩ් කළ ශසික හේරත්ට හමුදා නිලධාරීන් තර්ජනය කිරීම
3.පහරදෙන සිදුවීම විවේචනය කළ සමාජ ජාල ක්‍රියා කාරීන් මර්ධනය කිරීම

මේවන විට ලංකාවේ ප්‍රකට සමාජ ජාලා ක්‍රියාරිණියක් වන තුෂාරා වන්නිආරච්චි ඇතුලු පිරිසකගේ සමාජ ජලා ගිණුම් තාවකාලිකව අත්හි‍ටුවා ඇත. ඇය Colombo Now වෙබ් අඩවියේ විමර්ෂණ ප්‍රධානියා ලෙසද කටයුතු කරයි. ඇයගේ මුහුණුපොතේ ගිණුම තාවකාලිකව අත්හි‍ටුවීමට හේතුව හමුදා නිළධාරියා සිදුකළ අනීතික පහරදීම විවේචනය කිරීමය.

විශේෂ වාර්තාකරුවෙකු විසිනි