විනෝදාස්වාද

ලංකාවේ සංගීත ක්ෂේත්‍රය තාක්ෂණය සහ ආකර්ශණීය ශ්‍රව්‍ය දෘශ්‍ය පරාසයන් අතික්‍රමණය කරමින් තිබෙන අවධියක, එකී පරාසයන්හි රසය රසික සමූහයේ සන්තෘප්තිය උදෙසා නිමැවුණු තිළිණි රුද්‍රිගෝ යොවුන් ගායන ශිල්පිණියගේ පළමු මියුසික් වීඩියෝව 'තනියහන' එළඹෙන සැප්තැම්බර් මස 26 වැනිදා අන්තර්ජාලයට නිකුත් කිරීම සිදුවේ.

මෙම මියුසික් වීඩියෝවේ ගී පද රචනය දිල්ශි තත්සරණ විසින් සිදුකර ඇති අතර, මියුසික් වීඩියෝවේ තිර රචනය සහ අධ්‍යක්ෂණය දක්ෂ නිර්මාණකරුවෙක් ‍වන චාමර ගුරුගේ විසින් සිදුකර තිබේ.

නවීන වීඩියෝ තාක්ෂණය සහ ගීයේ සියුම් අර්ථ සමූහයන් රසිකයන්ගේ හදවත ස්පර්ශවන ආකාරයෙන් රූපගත කර ඇති මෙම ශ්‍රව්‍ය දෘශ්‍ය නිර්මාණයට ජනප්‍රිය රංගන ශිල්පීන් සහ ශිල්පිනියන් වන ජයනි සේනානායක, යශෝධා රසඳුනි, ශ්‍යාමිලා කල්හාරි, මනෝජා ෆඩිනැන්ඩස්, මල්කා නූපෙහේවා, අමන්දා උදානි රුද්‍රිගෝ සහ ගීත් රත්නායක රංගනයයෙන් දායකත්වය ලබාදී ඇත.

එසේම මෙම 'තනියහන' සොඳුරු නිර්මාණයේ තාල නිර්මාපාකයා වන්නේ හර්ෂ අරවින්ද ය, එසේම එහි සමස්ත නිෂ්පාදන සහය මාධව මංචනායක විසිනි.

ළමා ලෝකයේ කතා රැජිනියක, ජ්‍යෙෂ්ඨ හා ප්‍රවීණ චිත්‍ර ශිල්පිනියක මෙන්ම ළමා කතා ලේඛිකාවක වූ සිබිල් වෙත්තසිංහ මහත්මිය ඊයේ (30) රාත්‍රියේ අභාවප්‍රාප්ත වූවාය. 1927 ඔක්තෝබර් 31 වැනිදා දකුණු ලක, ගාල්ලේ, ගිංතොට දී උපන් ඇය මියයනවිට 93 හැවිරිදි වියේ පසුවූවාය.

සිබිල් වෙත්තසිංහ මහත්මිය ළමුන් අතර ජනප්‍රිය වූයේ ‘සිබිල් නැන්දා’ ලෙසිනි.

ගිංතොට මිශ්‍ර පාසැලෙන් මූලික අධ්‍යාපනය ලැබූ ඇය ගැමි මිහිරෙන් පිරි ගිංතොට හැරදා අට හැවිරිදි  වියේ දී කොළඹට පැමිණියේ මව්පියන් කොළඹ පදිංචියට පැමිණි නිසාය. අනතුරුව ඇය අධ්‍යාපනය ලැබුවේ කොළඹ, බම්බලපිටිය ශුද්ධවූ කන්‍යාරාමයෙනි.

ගම හැරදා කොළඹට පැමිණියත් තමන් හදවතින් ජීවත් වන්නේ ගම්මානයේය යන්න ඇයගේ මුවෙහි නිරන්තරයෙන් රැඳී තිබිණි. ඇය ගෘහ නිර්මාණ ශිල්පිනියක කිරීමට මව්පියන් ගේ කැමැත්ත වුවද පාසල් සමයේ සිට ඇය සිතුවම් ඇඳීමට දැක්වූ දක්ෂතාව ඇගේ පියා හඳුනාගත් බැවින් ඇයට අති දක්ෂ චිත්‍ර ශිල්පිනයක වන්නට මං පෑදිණි.

මුල් කාලයේ දී ඇය මාර්ටින් වික්‍රමසිංහයන්ගේ අපේ ගම, නාරද හිමියන්ගේ සදහම්පොත්, එච්.ඩී සුගතපාල මහතාගේ නවමග, ඩී.එෆ්.ඊ පනාගොඩ මහතාගේ හා කේ.ජී පෙරේරා මහතාගේ පද්‍ය රසය වැනි කෘතීන්ට සිතුවම් ඇන්දාය. ලංකාදීපය සමග එක්වූ පළමු කාන්තාව ලෙස ඇය ටයිම්ස් පුවත්පත් ආයතනය මගින් ප්‍රකාශයට පත්කළ පැරණි ලංකාදීප පුවත්පත හා එක්වූවාය.

අනතුරුව ඇය 1952 වසරේ දී ලේක්හවුස් ආයතනයේ සේවයට එක්ව තිබේ.

ලේක්හවුස් ආයතනයේ ජනතා පුවත්පතෙහි ප්‍රධාන චිත්‍ර ශිල්පිනිය ලෙස ද කටයුතු කර ඇති සිබිල් වෙත්තසිංහ මහත්මිය එම ආයතනය මගින් මුද්‍රණය කළ සන්ඬේ ඔබ්සවර්, සිළුමිණ, ඬේලිනිවුස්, සරසවිය, මෙන්ම උපාලි පුවත්පත් ආයතනය මගින් ප්‍රකාශයට පත්කළ බිංදු ආදී පුවත්පත්ද තම සිතුවමින් හැඩගැන්වූවාය.

ඇය ‘සූත්තර පුංචා’ ළමා කතාව සිතුවම් අඳිමින් රචනා කළේ ද සිළුමිණ පුවත්පත වෙනුවෙනි. සරසවිය පුවත්පත වෙනුවෙන් සරසවිය පුවත්පත වෙනුවෙන් රචනා කරමින් සිතුවම් ද ඇන්දාය.‘සූත්තර පුංචා’ එකල ළමයින් අතර බෙහෙවින් ජනප්‍රිය චරිතයක් විය.

සිබිල් වෙත්තසිංහ මහත්මිය විසින් සිතුවම් සහිතව රචනා කළ කුඩ හොරා ළමා කතාව පසුකලෙක දේශීයව මෙන්ම ජාත්‍යන්තරව ද ඉතා ජනප්‍රිය විය. ඇය 1955 දී මෙම කෘතිය රචනා කරමින් ජාත්‍යන්තර ළමා ප්‍රජාව ආක්‍රමණය කළා යැයි කිවහොත් නිවැරදිය.

ජපානයේ දී පැවැත්වුණු ළමා පොත් චිත්‍ර ශිල්පීන්ගේ තරඟයකදී ‘කුඩ හොරා‘ ළමා කතාවට ලෝකයෙන්ම තෙවෙනි ස්ථානය හිමිවූ අතර ජපානයේ පළ වූ ජනප්‍රියම විදෙස් කතාව ලෙස ද ටෝකියෝ නුවර ළමා පුස්තකාලය මගින් ‘කුඩ හොරා’ කෘතිය නම් කරනු ලැබිණි. ඇය විසින් රචනා කළ ‘දුවන රැවුල’ කෘතියට 2003 වසරේදී හොඳම සැලසුම්සහගත ළමා කෘතිය ලෙස සාක් සම්මාන හිමිවිය.

ඇගේ කෘතින් රුසක් දේශිය විදේශිය සම්භාවනාවට පාත්‍ර වී ඇති අතර ‘කුඩ හොරා’ කෘතිය ජපානය, චීනය, ඇමරිකාව, කොරියාව, පිලිපීනය, ස්විඩනය, නෝර්වේ, ඩෙන්මාර්කය, ඇතුළු රටවල් දොළහක දී ඉංග්‍රීසි ලන්දේසි දෙමළ ඇතුළු භාෂා ගණනාවකට පරිවර්තනය වී තිබේ.

දේශිය ළමා කතා සඳහා නවතම ශෛලියක් හඳුන්වා දුන් ඇය ළමා මනස හඳුනා ගනිමින් ඉතා සංයමයෙන් ලියාපළ කෘතින් ගණන 250 කට ආසන්නය. ඇයටම විශේෂිත වූ ආරකින් ඇය ළමා චිත්‍ර නිර්මාණය කළාය.  ‘කැවුම් යෝධයා, ‘එන්දො මුත්තා’, ‘කිරියට ලැවරිය’, ‘අලිනෑම’, ‘අවිශ්වාසය’, ‘ඉදුණු පේර’, ‘දිය රකුසා’, ‘මහා ගිරා’, ‘කපුටා කළු වුණ හැටි’, ‘රන් පිහාටු’, ‘අමුතු කෑමක්’ ආදී ළමා කතා ගණනාවක් ඇය විසින් රචනා කර තිබේ.

එකල ඇය රචනා කළ උපහාස රසයෙන් යුත් තීරු ලිපි ද අතිශයින් ජනප්‍රිය විය.  රාජ්‍ය සාහිත්‍ය සම්මාන ඇතුළු දෙස් විදෙස් සම්මාන රැසක් ඇය හිමිකරගත්තාය.

ඇය 1971 දී ලේක්හවුස් ආයතනයෙන් සමුගත්තද ඇය මෑතක් වන තුරුම ග්‍රන්ථකරණයේ මෙන්ම සිතුවම් ඇඳීම ආදී කටයුතුවල නිරත වූවාය.

මෙරට විවිධ ප්‍රදේශවල දරුවන් 20,000ක් එක්කරගෙන එකම කෘතියක් අවසානයන් 20,000ක් සහිතව රචනා කරමින් ඉකුත් මාර්තු මාසයේ දී ඇය ගිනස් වාර්තාවක් ද පිහිටවූවාය.  ඒ ලෝක ළමා දිනයට සමගාමීව ”පුදුම පළිඟුව” ළමා කෘතිය රචනා කරමිනි.

සීමාසහිත සිලෝන් බිස්කට් සමාගමේ සංකල්පයක් අනුව රචනා කළ මෙම කෘතිය වෙනුවෙන් හිමිවූ ගිනස් වාර්තාවට අදාළ සහතිකය සිබිල් වෙත්තසිංහ මහත්මිය ඇතුළු දරු දැරියන් වෙත ප්‍රදානය කිරීම කොළඹ නෙළුම් පොකුණ රඟහලේදී ඉකුත් මාර්තු 5 වැනිදා උත්සවාකාරයෙන් පැවැත්විණ.

“මම කවදාවත් වයසට යන්නේ නැහැ. මම තවමත් පසුවන්නේ බොහෝ සුන්දර ළමා හිත් එක්ක. ඒක බොහෝ වැඩිහිටියන්ට තේරෙන්නේ නැහැ. ” යැයි ඇය වරෙක පැවසුවාය.

‘කවදා හරි මම මේ ලෝකෙන් යන දවසට යන්නේ පුදුමාකාර සතුටකින්...මම යන්නෙ ළමයින් වෙනුවෙන් මහා වස්තු සම්භාරයක් ඉතිරි කරලා. එහෙම හිතද්දී දැනෙන්නේ පුදුමාකාර සතුටක් ’ යැයිද ඇය කීවාය.

ළමා හදවත් හඳුනාගෙන ඇය කළ මෙම නිර්මාණ නිසා ලොවවටා සුවහසක් දරුවෝ සිබිල් නැන්දාට ආදරය කළහ.

ප්‍රවීණ පුවත්පත් කලාවේදියෙකු වූ ඩී.බී වෙත්තසිංහ මහතා සමඟ විවාහ වී සිටි සිබිල් වෙත්තසිංහ මහත්මිය දූ දරුවන් සිව් දෙනෙකුගේ මවක වූවාය.

සිබිල් වෙත්තසිංහ මහත්මියගේ අඩි පාරේ යමින් පසුකලෙක ළමා චිත්‍ර නිර්මාණයට පිවිසි ඇගේ දියණිය කුසලා වෙත්තසිංහ ද කලක් මාධ්‍යවේදිනියක වශයෙන් කටයුතු කළ අතර ඇය පසුකලෙක උපාලි පුවත්පත් සමාගමේ ‘බිංදු’ පුවත්පතේ කතුවරිය ද වූවාය.

නිර්මාණ කරුවන්ට අත දෙන්නට නොපැකිලව කටයුතු කළ සිබිල් වෙත්තසිංහ මහත්මියගෙන් අත හිත ලැබූ නිර්මාණ කරුවෝ රැසකි.

සිබිල් වෙත්තසිංහ මහත්මියගේ දේහය මේ වනවිට නුගේගොඩ, ගංගොඩවිල, පැපිලියාන පාරේ, ඩයස් පෙදෙස, අංක 4 දරණ නිවසේ තැන්පත් කර ඇති අතර හෙට (2) උදෑසන නිවසේදී සිදුකෙරෙන ආගමික කටයුතු වලින් පසු පෙරවරු 10.30 ට දේහය නිවසේ සිට බොරැල්ල, ජයරත්න මල් ශාලාව වෙත ගෙන ඒමට නියමිත අතර 3 වැනිදා සවස 3.00 වන තුරු දේහය එහි තැන්පත් කර තැබෙනු ඇත.

සිබිල් වෙත්තසිංහ මහත්මියගේ දේහය පිළිබඳ අවසන් කටයුතු ලබන 3 වැනිදා පස්වරු 3.00 ට බොරැල්ල කනත්තේ දී සිදුකෙරේ. 

(ලංකාදීප)

සුපිරි බොලිවුඩ් නළු අමිතාබ් භච්චන් සහ ඔහුගේ පුත් අභිෂේක් භච්චන්ට ද කොරෝනා ආසාදනය වී තිබේ.

ඔවුන් දෙදෙනා රෝහල්ගතව ප්‍රතිකාර ලබන බව  අමිතාබ් භච්චන් ට්විටර් පණිවුඩයක් නිකුත් කරමින් සඳහන් කරයි.

ඉකුත් දින 10 තුළ තමන් ඇසුරු කළ සියලු දෙනාට නිරෝධායනය වන ලෙස ද අමිතාබ් භච්චන් වැඩිදුරටත් ඉල්ලා සිටියේ ය.

මේ අතර කොරෝනා ව්‍යාප්තිය උත්සන්න වීම හමුවේ ඉන්දියාවේ දැඩි අර්බුධකාරී තත්ත්වයක් උද්ගතව ඇත.

මේ අනුව අනිද්දා (14) පස්වරු 8.00 සිට සිට ලබන (22) අලුයම 5.00 දක්වා බෙංගලූරු නගරය සම්පූර්ණයෙන්ම වසා දමන බව කර්ණාටක ප්‍රාන්ත බලධාරීන් ප්‍රකාශ කළහ.

බෙංගලූරු නගරය මේ වනවිට කලාප අටකට බෙදා එහි කොරෝනා ව්‍යාප්තිය නිරීක්ෂණය කෙරෙන බව ද සඳහන් වේ.

කර්ණාටක ප්‍රාන්තයේ වැඩිම කොරෝනා ආසාදිතයන් වාර්තාවන්නේ බෙංගලූරු නගරයෙන් වන අතර මේ වනවිට නගරයෙන් වාර්තා වී ඇති කොරෝනා මරණ සංඛ්‍යාව 229 කි.

මේ වනවිට කර්ණාටක ප්‍රාන්තයේ සමස්ත කොරෝනා ආසාදිතයන් සංඛ්‍යාව සටහන් වන්නේ 36,216 ක් ලෙසයි.

වෛරස් ව්‍යාප්තිය හමුවේ ඉන්දියාවේ සෙසු ප්‍රාන්ත කිහිපයක් ද වසා දැමූ කාලය දීර්ඝ කිරීමට පියවර ගෙන තිබේ.

බටහිර බෙංගාලය සහ නාගලන්තය ප්‍රකාශ කළේ, ලබන 31 වැනි දා දක්වා එම ප්‍රාන්ත වසා දැමෙන බවය.

ගුවහාටි නගරය වසාදැමූ කාලය ද ලබන 19 වැනි දා දක්වා දීර්ඝ කර තිබේ.

අරුණාචල් ප්‍රදේශ් ප්‍රාන්තයේ ප්‍රදේශ රැසක් ද ලබන 20 වැනි දා දක්වා වසා දැමීමට පියවර ගෙන ඇත.

මේ අතර වෛරස් ව්‍යාප්තිය හමුවේ සිය පුහුණුකරුවන් 180 දෙනාට රැකියා අවස්ථා ලබාදීමෙන් වළකින බව ඉන්දීය ගුවන් සේවය නිවේදනය කළේ ය.

මේ අනුව ඉන්දියාවේ සමස්ත කොරෝනා ආසාදිතයන් සංඛ්‍යාව අටලක්ෂ පනස්දහස ඉක්මවා තිබේ.

ඉන්දියාවෙන් වාර්තා වන සමස්ත කොරෝනා මරණ සංඛ්‍යාව සටහන් වන්නේ 27,755 ක් ලෙසයි.

මේ අතර වෛරස් ව්‍යාප්තිය ව්‍යාප්තිය උත්සන්නවීම හමුවේ වුවත් ආර්ථික කටයුතු නතර කළ නොහැකි බව ඉරාන ජනාධිපති හසන් රුහානි සඳහන් කළේ ය.

බෙල්ජියම, සිනමාහල්, කඩ සාප්පු සහ වෙනත් ආවරණය කළ ස්ථානවලදී මුව ආවරණ පැළඳීම අනිවාර්ය කර තිබේ.

ජපානයේ ඔකිනවාහි පිහිටි අමෙරිකානු හමුදා කඳවුරු දෙකකින් කොරෝනා ආසාදිතයන් 61 දෙනෙකු වාර්තා විය.

නවතම සංඛ්‍යා ලේඛනවලට අනුව ලොව පුරා කොරෝනා ආසාදිතයන් සංඛ්‍යාව එක් කෝටි විසි අට ලක්ෂය ඉක්මවා තිබේ.

ලොව පුරා කොරෝනා මරණ සංඛ්‍යාව සටහන් වන්නේ, 567, 034 ක් ලෙසයි.

ලොව කොරෝනා ආසාදනයෙන් සුවය ලැබූවන් සංඛ්‍යාව 74 ලක්ෂය ඉක්මවා තිබේ.

ලොව වැඩිම ටෙස්ට් කඩුලු ලාභියා වන මුත්තියා මුරලිදරන් 21 වන සියවසේ වටිනාම ක්‍රීඩකයා (Most Valuable Player) ලෙස විස්ඩන් ක්‍රිකට් මාසික සඟරාව විසින් නම් කර තිබේ.

ලොව ප්‍රමුඛ පෙළේ ක්‍රිකට් විශ්ලේෂණ සමාගමක් වන ක්‍රික්විස් සමඟ එක්ව මෙම සඟරාව 21 වන සියවසේ හොඳම ටෙස්ට් ක්‍රීඩකයින් 30 දෙනා නම් කර ඇති අතර ශ්‍රී ලංකාවේ දඟ පන්දු යවන ක්‍රීඩකයින් ලැයිස්තුවේ ඉහළින්ම සිටී.

“අපි 2000 වර්ෂයේ සිට දත්ත එක්රැස් කර ඇති අතර එම නිසා මෙම ලැයිස්තුව සකස් කර ඇත්තේ 2000-2020 කාල පරිච්ඡේදය සඳහායි ”යැයි විස්ඩන් ක්‍රිකට් මාසික අලෙවිකරණ අධ්‍යක්ෂ සෑම් ස්ටෝ පැවසීය.

“මුරලිගේ ටෙස්ට් කඩුලු 800 න්, ඔහු තරඟ 85 කදී කඩුලු 573 ක් ලබාගෙන ඇත්තේ 2000 ජනවාරි 1 සිට 2010 දක්වා ය. මෙම කාලය තුළ මෙම ප්‍රමාණයට වඩා ඉදිරියෙන් සිටින්නේ ජේම්ස් ඇන්ඩර්සන් නම් ක්‍රීඩකයා පමණි. නමුත් ඔහු මෙම කදුළු ප්‍රමාණය ලබාගෙන ඇත්තේ තරඟ 151ට ක්‍රීඩා කිරීමෙනි” යයි ස්ටෝ වැඩිදුරටත් පවසා තිබේ.