පුවත්

නිවෙස් තුළ රඳවා සිටින කොරෝනා ආසාදිතයින් රැකබලා ගැනීමේ නව වැඩපිළිවෙළක් අද(28) ආරම්භ කෙරිණි.

ඒ, සෞඛ්‍ය අමාත්‍ය පවිත්‍රා වන්නිආරච්චිගේ ප්‍රධානත්වයෙනි.

නිවාස ආශ්‍රිත කොරෝනා ආසාදිතයින් රැකබලා ගැනීම සිදුවන්නේ,1390 සෘජු දුරකතන අංකය ඔස්සේය.

සෞඛ්‍ය අමාත්‍යාංශය සඳහන් කළේ, නිවෙස්වල රඳවා සිටින ආසාදිතයින්, විශේෂඥ වෛද්‍යවරුන් ඇතුළු වෛද්‍ය කණ්ඩායමක් දිනපතා දුරකතනය මගින් අධීක්ෂණයට ලක් කරන ක්‍රමවේදයක් ක්‍රියාත්මක කෙරෙන බවය.

ඊට විශේෂඥ වෛද්‍යවරුන් ඇතුළු වෛද්‍යවරුන් 400 දෙනෙකුට අධික සංඛ්‍යාවක් දායක වන බව ද සෞඛ්‍ය අමාත්‍යාංශය සඳහන් කළේය.

මේ යටතේ ප්‍රාදේශිය වෛද්‍ය නිලධාරීන්ගේ අධීක්ෂණයට යටත්ව රෝගීන් වර්ගීකරණය කෙරෙන අතර ඔවුන් ක්‍රමානුකූලව රෝහල්ගත කිරිමේ වැඩපිළිවෙළක් ද සකස් කර තිබේ.

නිවෙස් තුළ රඳවා ගත හැකි රෝග ලක්ෂණ නොමැති හෝ රෝග ලක්ෂණ අවම රෝගීන් ඔවුන්ගේ අවදානම් තත්ත්වයන් හා නිවෙස්වල රැඳී සිටීමේ හැකියාව යන කරුණු පදනම් කර ගනිමින් වැඩපිළිවෙළ ක්‍රියාත්මකයි.

එමගින් රෝග ලක්ෂණ ඇති අවුරුදු 60ට වැඩි සංකූලතා සහිත රෝගීන්ට හා අවදානම් ඇතිවීමේ ප්‍රවණතාව වැඩි රෝගී කාණ්ඩවලට රෝහල්ගත කිරීමේදී මූලිකත්වය ලබා දීමට හැකිවන බවත් සෞඛ්‍ය අමාත්‍යාංශය සඳහන් ක⁣ළේය.

වැඩපිළිවෙළ තුළින් රෝහල් ධාරිතාව මනා කළමනාකාරීත්වයකින් යුතුව භාවිත කළ හැකි වන අතර වෛද්‍ය අවධානය වැඩිපුර අවශ්‍ය රෝගීන්ට ප්‍රමුඛතාව ලබාදීම තුළින් මරණ සංඛ්‍යාව ද අඩුකර ගත හැකි බව සෞඛ්‍ය අමාත්‍යාංශය සඳහන් කළේය.

අමාත්‍යාංශය සඳහන් කළේ, කොරෝනා තුන්වන රැල්ලත් සමග සීඝ්‍රයෙන් පැතිර යන ප්‍රභේද රට තුළ ව්‍යාප්තිය හේතුවෙන් රෝගීන් සංඛ්‍යාවේ වර්ධනයක් හා රෝගීන් යොමු කෙරෙන රෝහල්වල හා අතරමැදි ප්‍රතිකාර මධ්‍යස්ථානයවල දැඩි තදබදයක් හටගෙන තිබෙන බවය.

එම තත්ත්වය බොහෝ දුරට පාලනය කර තිබුණ ද, බස්නාහිර පළාත හා රෝගීන් වැඩි වශයෙන් වාර්තාවන දිස්ත්‍රික්කවල රෝගීන්, රෝහල්වලට යොමු කිරිමේ ප්‍රමාදයක් ඇතිවීම පිළිබඳව ද සෞඛ්‍ය අමාත්‍යාංශයේ දැඩි අවධානය යොමු වී තිබෙන බව අමාත්‍යාංශය වැඩිදුරටත් පවසයි.

ඉන්දීය ඩෙල්ටා සැර කොරෝනා වයිරසය ආසාදනයවූ තවත් පුද්ගලයකු කහතුඩුව ජයලිගම ප්‍රදේශයෙන් හමුවී ඇතැයි කහතුඩුව සෞඛ්‍ය වෛද්‍ය නිලධාරී ධනුක පද්මරාජ පවසයි.

අදාළ පුද්ගලයා 47 හැවිරිදි අයෙකු වන අතර ඔහු කොළඹ, කොම්පඤ්ඤවීදිය ප්‍රදේශයේ ප්‍රධාන පෙළේ ඉදිකිරිම් ආයතනයක සේවයේ නියුතු අයෙකු බවට හඳුනාගෙන තිබේ.

ආසාදිත පුද්ගලයා මේ වන විට පොළොන්නරුව කොවිඩ් ප්‍රතිකාර මධ්‍යස්ථානය වෙත යොමුකර ඇත.

මේ අනුව මේ දක්වා මෙරටින් හමු වී ඇති ඉන්දීය ඩෙල්ටා සැර කොරෝනා වයිරසය ආසාදනය වූ පුද්ගලයන් සංඛ්‍යාව අටකි.

මේ පිළිබඳ තොරතුරු හෙළිවීමෙන් පසු එම ආසාදිත පුද්ගලයාගේ මව බිරිඳ සහ පුත්‍රයා නිරෝධායනයට යොමු කර ඇති අතර,  එසේම ඔහු ජීවත්වූ මාර්ගය ආරක්ෂක පියවරක් ලෙස තාවකාලිකව වසා දැමීමට පියවර ගත් බවත් ප්‍රදේශයේ අහඹු පී.සී.ආර් පරීක්ෂණ සියයක් කිරීමට කටයුතු යොදා ඇති බවත් පද්මරාජ පැවසීය.

තමන් මෙම ආණ්ඩුවේ කිසිම තනතුරක් බලාපොරොත්තු නොවන බවත් තමන් කිසිදු ඇමති ධුරයක් හෝ වෙනත් තනතුරක් ඉල්ලා නැති බවත් හිටපු ජනාධිපති, පාර්ලිමේන්තු මන්ත්‍රී මෛත්‍රීපාල සිරිසේන සඳහන් කරයි.

හිටපු ජනාධිපති මෛත්‍රීපාල සිරිසේන ලබන මස 06 වෙනිදා තමන් ඇමති ධුරයක දිවුරුම් දීමට නියමිත බවට පළ වන මාධ්‍ය වාර්තා අසත්‍ය බව හිටපු ජනාධිපතිවරයාගේ මාධ්‍ය ඒකකය පවසයි.

ඒ පිළිබදව පළවන  වාර්තා ආසත්‍යක් බව සඳහන් කරමින් මාධ්‍ය වෙත නිවේදයක් නිකුත් කර ඇති අතර, එම නිවේදනයක පහත සදහන් වේ.

අද (28) උදෑසන 6 .00 සිට රත්නපුර සහ මොනරාගල දිස්ත්‍රික්කවල ග්‍රාම නිලධාරී වසම් හා ප්‍රදේශ කිහිපයක් හුදෙකලා කළ බව කොවිඩ් – 19 පැතිරීම වැලැක්වීමේ ජාතික ක්‍රියාන්විත මධ්‍යස්ථානය පවසයි.

රත්නපුර දිස්ත්‍රික්කයේ නිවිතිගල පොලිස් වසමේ නොරගල්ල , නොරගල්ල ඉහළ , යක්දෙහිවත්ත, පීන්කන්දවත්ත- 1, පාතකඩ , පීන්කන්දවත්ත -3 යන ප්‍රදේශ සහ මොනරාගල පොලිස් බල ප්‍රදේශයේ නක්කලවත්ත හා මිල්ලකැලේවත්ත අද (28) උදෑසන සිට හුදෙකලා කළ බව යුද හමුදාපති ජෙනරාල් ශවේන්ද්‍ර සිල්වා පවසයි.

ස්වාධීන එන්නත් උපදේශන විශේෂඥ කමිටුවෙන් ප්‍රජා වෛද්‍ය පීඨයට සම්බන්ධ මහාචාර්ය නීලිකා මලවිගේ ඉල්ලා අස්වී තිබෙන බව වාර්තා වෙයි.

මීට පෙර කොළඹ උතුර (රාගම) වෛද්‍ය පීඨයට අනුබද්ධ මහාචාර්ය ඒ. පත්මේෂ්වරන්ද අදාළ කමිටුවෙන් ඉල්ලා අස්වී තිබුණි.

විශේෂඥ වෛද්‍යවරුන් වන ආනන්ද විජේවික්‍රම, වෛද්‍ය රජීව ද සිල්වා, වෛද්‍ය කාන්ති නනායක්කාර (වෛරස් විද්‍යා), මහාචාර්ය චන්න රණසිංහ (ශ්වසන වෛද්‍ය), ආචාර්ය ලක්කුමාර් ප්‍රනාන්දු (ළමා රෝග විශේෂඥ) සහ වෛද්‍ය හසිත තිසේරා (වසංගත රෝග විද්‍යා) යන අයද මෙම කමිටවුට ඇතුළත් සිටියහ.

මෙම කමිටුව විසින් ලොව බොහෝ රටවල එන්නත් කරන වැඩපිළිවෙල සහ ලෝක සෞඛ්‍ය සංවිධානයේ නිර්දේශ පිළිබඳව මනා අධ්‍යනයකින් පසු මෙරටට එන්නත් කරන වැඩපිළිවෙලක් නිර්දේශ කළ නමුත් අවසානයේ සිදුවූයේ එය විවිධ පුද්ගලයන්ගේ අවශ්‍යතාවය පරිදි වෙනස් වීමට ලක්වීමයි.

මේ අතර ජාතික ඖෂධ නියාමන අධිකාරියේ ස්වාධීන විශේෂඥ කමිටුවේ සාමාජිකයෝ නිවේදනයක් නිකුත් කරමින් සඳහන් කර සිටියේ බෝවන රෝග පිළිබඳ ජාතික උපදේශක කමිටුව (NACCD) දුන් උපදෙස් අනුව එන්නත්කරණ වැඩසටහන ක්‍රියාත්මක කළේ නම්, පසුගිය මාස කිහිපය තුළ සිදුවූ බොහෝ මරණ වළක්වා ගත හැකිව තිබූ බවය.

ඔවුන් ඒ සම්බන්ධව සෞඛ්‍ය අමාත්‍යාංශ ලේකම් ද දැනුවත් කිරීමට කටයුතු කර තිබිණ.

බැසිල් රාජපක්ෂ පාර්ලිමේන්තු එන දිනය ජූලි 06 නොව ජූලි 08 බව ආණ්ඩු හිතවාදි සමාජ මාධ්‍ය වාර්තා කර ඇත.

නිරෝධායන නීති අනුව 6 වෙනිදා පාර්ලිමේන්තු පැමිණීමට ඉඩක් නැති බැවින් 8 වෙනිදා ඒ සඳහා යොදාගෙන ඇති බවත් එම මාධ්‍ය වාර්තා වල දැක්වෙයි.

මන්ත්‍රී ධූරයේ දිවුරුම් දීමෙන් පසුව "ආර්ථික සංවර්ධන" අමාත්‍යවරයා ලෙස දිවුරුම්දීමට නියමිත බවත් එම මාධ්‍ය වාර්තා සඳහන් කරයි.

කෙසේ වුවත් දේශපාලන විචාරකයන් පෙන්වා දෙන්නේ වඩා වැදගත් වන්නේ බැසිල් රාජපක්ෂ පාර්ලිමේන්තු එන දිනය නොව ඔහු පැමිණි පසු කරන බවට ගෝලයන් කියන දේවල් කරන්න සමත් වෙයිද යන්නය.

නැත්නම් සිදුවන්නේ තවදුරටත් ජනතා අප්‍රසාදය වර්ධනය වීම බවත් ඔවුන් පවසයි.

බැසිල් රාජපක්ෂ පාර්ලිමේන්තු පැමිණීම සම්බන්ධව පසුගිය සමයේ වත්මන් ආණ්ඩුව බලයට ගෙන ඒමට මැදිහත් වූ භික්ෂුන් වහන්සේලා විරෝධය දක්වමින් ද සිටියි.

නිරෝගිමත් අනාගත පරපුරක් වෙනුවෙන් කාබනික පොහොර භාවිතයට ගත් පියවර කිසි විටෙකත් පසුපසට නොගන්නා බව ජනාධිපති ගෝඨාභය රාජපක්ෂ අස්ගිරි මහා නායක හිමියන් ප්‍රමුඛ මහා සංඝරත්නයට පැවසූ බව ජනාධිපති මාධ්‍ය අංශය පවසයි.

එමෙන්ම වැඩපිළිවෙළ ක්‍රියාවට නැංවීමේදී ගොවීන් අපහසුතාවට පත්වීමට ඉඩ නොතබන බව ද ජනාධිපතිතුමා සඳහන් කළ බවත් එහි දැක්වෙයි.

අදාළ නිවේදනයේ වැඩිදුරටත් මෙසේද සඳහන් වෙයි.

රසායනික පොහොර භාවිතය නිසා දිවයිනේ ප්‍රදේශ රැසක ගොවීන් වකුගඩු රෝගය ඇතුළු බෝ නොවන රෝග රැසකින් පීඩා විඳින අතර එමගින් පරිසරයට සිදුවන හානිය අති විශාලය. එමෙන්ම රසායනික පොහොර ආනයනය සඳහා වාර්ෂිකව ඩොලර් මිලියන 400කට අධික මුදලක් රජය වැය කරයි. විදේශීය ආයතන වෙත ඇඳී යන එම මුදල රටේ ගොවි ජනතාව වෙත ලබාදීමට කාබනික පොහොර භාවිතය මගින් හැකි වන බව ද ජනාධිපතිතුමා මහා සංඝරත්නයට පෙන්වා දුන්නේය.

අද (27) පෙරවරුවේ අස්ගිරි පාර්ශ්වයේ මහා නායක හිමියන් ඇතුළු මහා සංඝරත්නය බැහැදුටු අවස්ථාවේ ජනාධිපතිතුමා මේ බව පැවසීය.

2015 ට පෙර රජයේ නිලධාරීන් තීරණ ගැනීමේදී පසුබට නොවීම නිසා කෙටි කාලයක් තුළ රට තුළ දැවැන්ත සංවර්ධනයක් සිදු කිරීමට හැකි වූ බව ජනාධිපතිතුමා සඳහන් කළේය. එහෙත් එම නිලධාරීන් අසත්‍ය චෝදනා මත සිරගත වීම ඇතුළු විවිධ පීඩනයන්ට පසුගිය රජය සමයේ දී මුහුණ පෑමට සිදු වූ බව පෙන්වා දුන් ජනාධිපතිතුමා රජයේ වර්තමාන සංවර්ධන සැලසුම් ක්‍රියාත්මක කිරීමේදී නිලධාරීන් අනාගතයේ දී දඬුවම් විඳීමට සිදු වෙතැයි යන බියෙන් තීරණ ගැනීමට සහ ක්‍රියාත්මක වීමට මැලි වී ඇති බව සඳහන් කළේය. එම නිසා රට තුළ බොහෝ වැඩ කටයුතු අඩපණ වීම කණගාටුදායක තත්ත්වයක් බව ද ජනාධිපතිතුමා සඳහන් කරනු ලැබිණ.

කොවිඩ් වසංගත මර්දනයට සාර්ථකව මුහුණ දෙමින් රටේ උන්නතිය උදෙසා ජනාධිපතිතුමා ගෙනයන වැඩපිළිවෙළට අස්ගිරි මහා විහාර පාර්ශ්වයේ මහා නායක අතිපූජ්‍ය වරකාගොඩ ශ්‍රී ඥානරතන නාහිමියෝ ප්‍රසාදය පළ කර සිටියහ.

කොවිඩ් මර්දනය සඳහා සිදුකෙරෙන එන්නත්කරණ වැඩපිළිවෙළ පිළිබඳව ජනාධිපතිතුමා මහා නායක හිමියන් දැනුවත් කළේය. මහා නායක හිමියෝ සෙත් පිරිත් සඡ්ඣායනා කර ජනාධිපතිතුමා වෙත ආශිර්වාද පළ කළහ. මුතියංගණ රජමහා විහාරයේ භාරකාර ආචාර්ය පූජ්‍ය මුරුත්දෙණියේ ධම්මරතන හිමියෝ ද මේ අවස්ථාවට එක්ව සිටියහ.

අස්ගිරිය ගෙඩිගේ රජමහා විහාරය වෙත ගිය ජනාධිපතිතුමා අස්ගිරි මහා විහාර පාර්ශ්වයේ අනුනායක අතිපූජ්‍ය වෙඬරුවේ උපාලි හිමියන් බැහැදැක සුවදුක් විචාළේය. උන්වහන්සේ ද ජනාධිපතිතුමා ගෙන යන වැඩපිළිවෙළ ඇගයීමට ලක් කරමින් ආශිර්වාද පළ කළහ. අස්ගිරි මහා විහාර පාර්ශ්වයේ ජ්‍යෙෂ්ඨ සංඝසභික ආචාර්ය පූජ්‍ය ගොඩගම මංගල හිමියෝ ද මේ අවස්ථාවට එක්ව සිටියහ.

ජනාධිපතිතුමා අස්ගිරි මහා විහාර පාර්ශ්වයේ අනුනායක අතිජූජ්‍ය ආනමඩුවේ ධම්මදස්සි හිමියන්‍ බැහැ දැක ආශිර්වාද ලබා ගත්තේය.

අනතුරුව ජනාධිපතිතුමා අස්ගිරි මහා විහාර පාර්ශ්වයේ ලේඛකාධිකාරී ආචාර්ය අතිපූජ්‍ය මැදගම ධම්මානන්ද හිමියන් බැහැදැක උන්වහන්සේ සමග ද සුහද කතා බහක නිරත විය.

අස්ගිරි මහා විහාර පාර්ශ්වයේ නියෝජ්‍ය ලේඛකාධිකාරී අතිපූජ්‍ය නාරම්පනාවේ ආනන්ද හිමියන් බැහැදුටු ජනාධිපතිතුමා රජයේ වත්මන් වැඩපිළිවෙළ පිළිබඳව උන්වහන්සේ ද දැනුම්වත් කළේය.

ගැටඹේ රාජෝපවනාරාමයට ගිය රාජපක්ෂ මැතිතුමාට විහාරාධිපති පුජ්‍ය කැප්පෙටියාගොඩ සිරිවිමල ස්වාමින් වහන්සේ ඇතුළු මහා සංඝරත්නය සෙත් පිරිත් සජ්ඣායනා කර ආශිර්වාද කළහ.

දියවඩන නිලමේ නිලංග දෑල, බුද්ධශාසන අමාත්‍යාංශයේ ලේකම් මහාචාර්ය කපිල ගුණවර්ධන යන මහත්වරු ද මේ අවස්ථාවන්ට එක්ව සිටියහ.

– ජනාධිපති මාධ්‍ය අංශය

රසායනික පොහොර තහනම් කිරීමේ ක්‍රියාවලිය තුළ මෙරට දේශීය සහල් ව්‍යාපාරිකයන් විනාශ කිරීමේ කුමන්ත්‍රණයක් ක්‍රියාත්මක වන බව රාජ්‍ය අමාත්‍ය දයාසිරි ජයසේකර සඳහන් කරන බව ආණ්ඩුව හිතවාදි මාධ්‍ය වාර්තා කරමින් ඇත.

එම පුවතේ වැඩිදුරටත් සඳහන් කර සිටියේ කෙනෙකුගේ දෙන්නෙකුගේ ඉල්ලීම අනුව රසායනික පොහොර තහනම් කිරීම මගින් රට තුළ තිබූ සහලින් ස්වයංපෝෂිත තත්ත්වය නැති වී යනු ඇත බවය.

එසේම මේ හරහා සිදුවන්නේ සිංහල බෞද්ධ ව්‍යාපාරිකයන් විනාශ කිරීමේ වැඩපිළිවෙලක් බව පෙනී යන බවද රාජ්‍ය අමාත්‍යවරයා පෙන්වාදුන් බවත් එහි සඳහන් ය.

එම පුවතේ වැඩිදුරටත් මෙසේද සඳහන් කර ඇත.

ඉදිරියේ දී තවදුරටත් සහල් හිගය උග්‍ර වනු ඇති බවත් මේ හරහා විදේශයෙන් සහල් ආනයනය කිරීමට සිදු වනු ඇති බවත් පැවසූ රාජ්‍ය අමාත්‍යවරයා මෙමඟින් මෙරට සහල් ස්වයංපෝෂිත තත්ත්වය බිඳ වැටෙන බවද කියා සිටියේය.

කෙසේ නමුත් කාබනික පොහොර ව්‍යාපෘතියට විරුද්ධත්වයක් පල නොකරන නමුත් එය එක්වරම නොව ක්‍රමානුකූලව කළ යුතුව තිබූ දෙයක් බවද අමාත්‍යවරයාගේ අදහසයි.

චීන කොමියුනිස්ට් පක්ෂයේ සියවෙනි සංවත්සරය නිමිත්තෙන් ශ්‍රී ලංකා මහ බැංකුව සමරු කාසියක් නිකුත් කිරීමට සූදානම් වන බව වාර්තාවේ.

ශ්‍රී ලංකාවේ ජාතික වැදගත්කමක් සහිත අවස්ථා සැමරීම සඳහා කාසි නිකුත් කිරීම මහ බැංකුව සම්ප්‍රදායිකව සිදුකරනු ලබන නමුත් වෙනත් රටක දේශපාලන පක්ෂයක සැමරුමක් සඳහා ශ්‍රී ලංකා මහ බැංකුව කාසියක් නිකුත් කරන්නට යන්නේ ඉතිහාසයේ පළමු වතාවටය.

චීන කොමියුනිස්ට් පක්ෂයේ සියවන සැමරුම වෙනුවෙන් චීන මහ බැංකුව විසින් සමරු කාසි නිකුත් කිරීම පසුගිය සදුදා ආරම්භ කර ඇත.

ඒ අනුව රන් කාසි තුනක්, රිදී කාසි පහක් හා තඹ කාසියක් චීන බැංකුව විසින් නිකුත් කර ඇත.

ජනාධිපති ගෝඨාභය රාජපක්ෂ පසුගිය සිකුරාදා (25) ජාතිය ඇමතූ නමුත් මහජනතාව මුහුණ දෙන ගැටලු විසඳුවේ නැති බව එක්සත් ජාතික පක්ෂය පවසයි.

ශ්‍රී ලංකාවේ ජනතාවට දොස් පවරමින් තමා සහ ඔහුගේ රජය අසමත් වීමට හේතුව නිදහසට කරුණු ඉදිරිපත් කිරීමේ අවස්ථාවක් ලෙස ඔහු මෙම දේශනය භාවිතා කළ බවත් එම පක්ෂයේ අදහස වී තිබේ.

ජනාධිපති ගෝඨාභය රාජපක්ෂ ගේ ජාතිය ඇමතීම සම්බන්ධව නිවේදනයක් නිකුත්කරමින් එක්සත් ජාතික පක්ෂය මේ බව සඳහන් කරන අතර එහි වැඩිදුරටත් මෙසේද සඳහන් කර ඇත.

COVID-19 හි වර්ධනය වන තර්ජනය, කඩා වැටෙන ආර්ථිකය, පොහොර හිඟය, පාසල් අධ්‍යාපනයට ඇති බාධා සහ ජීවන වියදම ඉහළ යාම ඇතුළු රට තුළ ගැටලු රාශියක් තිබේ.

ජනාධිපතිවරයා මේ කිසිදු කරුණක් ගැන කතා කළේ නැත. ඔහු ඒ වෙනුවට නිදහසට කරුණු ඉදිරිපත් කළේ තම ප්‍රතිපත්ති ප්‍රකාශනයේ දක්වා ඇති පොරොන්දු කිසිවක් ක්‍රියාත්මක කිරීමට අපොහොසත් වීම වළක්වා ගැනීමෙන් මෙම ගැටලු විසඳීමට ඔහුට නොහැකි වූයේ මන්ද යන්නයි.

මෙම දුෂ්කර කාලවලදී නායකත්වය සහ බලාපොරොත්තුව ලබා දීම සඳහා ජනතාව ජනාධිපතිවරයා වෙත යොමුවී ඇති අතර, ඔහු තම අඩුපාඩුකම් නිසා ඔවුන්ට දොස් පවරමින් අවාසනාවන්ත ලෙස අසමත් වී තිබේ.

සිංහල හා දෙමළ අලුත් අවුරුද්දට පෙර අගුලු දැමීමක් ක්‍රියාත්මක කරන ලෙස වෛද්‍ය වෘත්තිකයන් ඔහුට උපදෙස් දුන් විට ඔහු ඒවා නොසලකා හැරියේය.

නව වසර භුක්ති විඳීමෙන් වෛරසයේ තුන්වන රැල්ලට හේතු වූ බවට ජනාධිපතිවරයා දැන් මහජනතාවට චෝදනා කරයි.

COVID-19 වෛරසය පැතිරීම පාලනය කිරීමට රජය අපොහොසත් වීම සහ එන්නත් කිරීමේ වැඩසටහන ක්‍රියාත්මක කිරීම ප්‍රමාද වීම නිසා රටට වරින් වර අගුලු දැමීමට සිදුවිය.

අගුලු දැමීම මහජනයාට බරපතල මූල්‍ය බරක් ඇති කරයි.

වෛද්‍ය වෘත්තිකයන්ගේ උපදෙස් පිළිපැද්දා නම් මේවා වළක්වා ගත හැකිව තිබුණි.

පසුගිය වසරේ නොවැම්බරයේදී සෞඛ්‍ය අමාත්‍යවරිය පාර්ලිමේන්තුවට පැවසුවේ COVID-19 එන්නත සඳහා අවශ්‍ය මාත්‍රාවන් මිලදී ගන්නා බවයි. කෙසේ වෙතත්, මෙම මිලදී ගැනීම් සිදු කරනු ලැබුවේ මෙම වසරේ මාර්තු මාසයේදී පමණි.

මෙම එන්නත් මාත්‍රාවන් මිල දී ගැනීම ප්‍රමාද වීමෙන් 600,000 කට අධික පිරිසකට ඔක්ස්ෆර්ඩ් ඇස්ට්‍රාසෙනෙකා එන්නත දෙවන මාත්‍රාව ලබා ගැනීමට නොහැකි විය.

2015-2019 කාලය තුළ ආර්ථිකයේ තත්වය පිළිබඳව ජනාධිපතිවරයා කළ ප්‍රකාශය වැරදිය.

2019 දී එක්සත් ජාතික පක්ෂය රජය භාර දෙන විට රට තුළ ඇමරිකානු ඩොලර් බිලියන 7.6 ක විදේශ සංචිත තිබුණි. අද වන විට විදේශ සංචිත ඇමරිකානු ඩොලර් බිලියන 4 ට වඩා පහත වැටී ඇත.

සංචිත වැඩි කරන්නේ කෙසේද සහ අපේක්ෂිත ණය ආපසු ගෙවීම් සම්බන්ධයෙන් කටයුතු කරන්නේ කෙසේද යන්න පිළිබඳව මෙම රජයට කිසිදු සැලසුමක් නොමැත. එක්සත් ජාතික පක්ෂ රජය යටතේ 2017 සහ 2018 යන කාලය වසර 60 කට පසු පලමු වතාවට රට ප්‍රාථමික අතිරික්තයක් භුක්ති වින්දා.

රජය වියදම් කරනවාට වඩා වැඩි ආදායමක් උපයමින් සිටින බැවින්, සංවර්ධන ව්‍යාපෘති සඳහා ණය ලබා ගැනීමට එක්සත් ජාතික පක්ෂයට හැකි විය.

ජනාධිපති මහින්ද රාජපක්ෂගේ කාලය තුළ ආර්ථිකය හොඳින් කළමනාකරණය වී ඇති බව ජනාධිපතිවරයා කියා සිටියේය.

මෙය නිවැරදි නම්, 20 වන ව්‍යවස්ථා සංශෝධනය යටතේ අග්‍රාමාත්‍ය මහින්ද රාජපක්ෂගෙන් බලතල ඉවත් කර පී.බී. ජයසුන්දර යටතේ ආර්ථිකය පවත්වාගෙන යාමට කටයුතු කර ඇත්තෙ ජනාධිපතිවරයාට තමාගේම අගමැති සහ අමාත්‍ය මණ්ඩලය කෙරෙහි විශ්වාසයක් නැද්ද?

ඒ අනූව මිනිත්තු 69 ක කතාවකින් ජනාධිපතිවරයා සම්පූර්ණ අවධාරණය පෙන්නුම් කළේ දිශානතීය රහිත ප්‍රකාශයකටය.

ශ්‍රී ලංකා ගුවන් විදුලි සංස්ථාවේ සභාපති ලෙස හඩ්සන් සමරසිංහ ජුනි 28 (හෙට ) වැඩ බාරගැනීමට නියමිත බව වාර්තා වෙයි.

හඩ්සන් සමරසිංහ ගේ සමීපතම පාර්ශව සඳහන් කරන ආකාරයට ජනාධිපති සහ අගමැති අදාළ තනතුර ඔහුට යෝජනා කර ඇත.

පසුගිය සමයේ පෞද්ගලික ගුවන් විදුලි සේවයක හඩ්සන් සමරසිංහ කටයුතු කළ අතර එහිදී වත්මන් ආණ්ඩුවේ කටයුතු දැඩිව විවේචනය කළේය.

කෙසේ වුවත් දැන් නැවත පසුගිය මහින්ද රාජපක්ෂ ජනාධිපති සමයේ මෙන් " ආණ්ඩුව "සුදු" කරන - විපක්ෂ කුඩු කරන " ගුවන් විදුලි මෙහෙය සිදුකිරීම ඇරඹෙනු ඇති බව ක්ශේත්‍රයේ ප්‍රවීණයන් පවසයි.

ඒ අනුව මේ වන විට SLBC සභාපති ධූරය දරන ජයම්පති බණ්ඩාර හීන්කෙන්දට තනතුරෙන් ඉවත් වීමට සිදුව ඇත.

කෙසේ වුවත් අද (26) දිනයේ ශ්‍රී ලංකා ගුවන් විදුලි සංස්ථාවේ නව පත්වීම් ලබාදීමේ සූදානමක් ගැනත් එහි සේවක සේවිකාවන් වාර්තා කරයි.

ඔවුන් පවසන ලෙස ගුවන් විදුලියේ වත්මන් සභාපති හීන්කෙන්ද තනතුරෙන් යාමට පෙර පත්වීම් ලිපි ප්‍රමාණයක් බෙදීමේ උත්සාහයක් පවතින අතර එය නියමිත කාර්‍ය පටිපාටියට අනුව සිදුවන්නක් නොවෙයි.

ඔවුන් චෝදනා කරන්නේ සභාපතිවරුන් මෙලෙස සිදුකරන පත්වීම් හේතුවෙන් සංස්ථාව දැඩි අර්බුදයකට මුහුණදී ඇති බවයි.

රට තුළ වී සහ සහල් යන වර්ග දෙකම ඇත්තේ මාසයක කාලයක පරිභෝජනය සඳහා අවශ්‍ය ප්‍රමාණයටත් අඩුවෙන් බව අමාත්‍ය බන්දුල ගුණවර්ධන මහතා පවසයි.

"මේ වනවිට සහල් මෝල් 84ක් තමන් සතුව පවතින සහල් තොගය ලෙස දක්වලා තියෙන්නෙ මෙට්‍රික් ටොන් 5034යි. සහල් මෝල් 96ක් වී මෙට්‍රික් ටොන් 230,000ක් තියෙන බව දන්වලා තියෙනවා.

එතකොට මේ වී, සහල් සියල්ලම ගත්තොත් මේ ඔවුන් එළිදරව් කරලා තියෙන තොරතුරු සත්‍යය නම් තව මසකට පමණයි සහල් සහ වී ප්‍රමාණවත්. මසකටත් නෑ. මක්නිසාදයත් එක් මසකට සහල් මෙට්‍රික් ටොන් 185,000ක් පමණ ලංකාවේ පරිභෝජනය කරනවා සාමාන්‍ය ජනතාව.

ඉතිං මේ තියෙනවා කියනවා ඕනෙ තරම්, හැබැයි ඒවා පාරිභෝගික කටයුතු අධිකාරියේ විධිවිධාන වලට අනුව ලියාපදිංචි කරන්නෙ නෑ. එහෙම නම් මේ තොග එළියට එන්නෙත් නැත්නම්, සහතික මිලට පාරිභෝගිකයාට උපරිම සිල්ලර මිලට භාණ්ඩ ලබාගන්නත් බැරි නම් රජය තීරණය කළා මෙට්‍රික් ටොන් ලක්ෂයක් ආනයනය කරන්න. කිසිදු සැකයකින් තොරව මේ මිල ගණන්වලට වඩා අඩුමිලට ආනයනය කරලා එය මේ උපරිම සිල්ලර මිල යටතේ අලෙවි කරන්න පුළුවන්කම හොඳටම තිබෙනවා.

රාජ්‍ය වාණිජ නීතිගත සංස්ථාව හරහා අද දින ප්‍රසිද්ධ තරගකාරී ටෙන්ඩර් කැඳවීම කරලා තියෙනවා" යනුවෙනුයි ඒ මහතා සඳහන් කළේය.

අමාත්‍ය බන්දුල ගුණවර්ධන මහතා මේ බව පැවසුවේ ඊයේ (25) පැවති මාධ්‍ය හමුවක් අමතමිනි.

LNW

අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබූ සිවිල් ක්‍රියාකාරී අසේල සම්පත් ඇප මත මුදා හැර තිබේ.

සැකකරු අද (26) පස්වරුවේ කොළඹ අතිරේක මහේස්ත්‍රාත් කාංචනා නෙරංජනී සිල්වා  හමුවට ඉදිරිපත් කිරිමෙන් අනතුරුව රුපියල් ලක්ෂ 05 බැගින් වූ ශරීර ඇප දෙකක් මත මුදා හැරිණ.

අසේල සම්පත් ඊයේ (25) අත්අඩංගුවට ගෙන තිබුණේ, ඇස්ට්‍රසෙනෙකා එන්නත සම්බන්ධයෙන් සාමාජ මාධ්‍ය ඔස්සේ සාවද්‍ය ප්‍රකාශයක් සිදු කර ඇති බවට ඖෂධ නියාමන අධිකාරියේ සාමාන්‍යාධිකාරීවරයා අපරාධ පරීක්ෂණ දෙපාර්තමේන්තුවට කළ පැමිණිල්ලකට අදාළවයි.

පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති නීතිඥ අජිත් රෝහණ  අද (26) උදෑසන පැවුසවේ, ඇස්ට්‍රාසෙනෙකා එන්නත මෙරටට ගෙන්වා යම් බාල කිරීමක් කර ජනතාවට එන්නත්කරණය සිදු කරන බවට එමගින් ඔහු පවසා ඇතැයි, අදාළ පැමිණිල්ලේ සඳහන්ව ඇති බවයි.

පොලිස් මාධ්‍ය ප්‍රකාශකවරයා වැඩිදුරටත් සඳහන් කළේ, අපරාධ පරීක්ෂණ දපාර්තමේන්තුව මේ සම්බන්ධයෙන් විමර්ශනය කිරීමෙන් අනතුරුව පිළියන්දල, පැලැන්වත්තේදී අසේල සම්පත් අත්අඩංගුවට ගෙන තිබූ බවයි.

ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂට පාර්ලිමේන්තුවට පිවිසීම වෙනුවෙන් සිය ජාතික ලැයිස්තු මන්ත්‍රී අසුන ලබාදීමට පාර්ලිමේන්තු මන්ත්‍රී මහාචාර්ය රංජිත් බණ්ඩාර තීරණය කර ඇති බවට ආණ්ඩු හිතවාදි මාධ්‍ය සහ සමාජ මාධ්‍ය වාර්තා කරයි.

ඊට අනූව පාර්ලිමේන්තු මන්ත්‍රී ධූරයෙන් ඉවත් වන මහාචාර්ය රංජිත් බණ්ඩාර මහ බැංකු අධිපති ධූරයට පත් කිරීමට නියමිතය.

බැසිල් රාජපක්ෂ ජූලි 06 වනදා පාර්ලිමේන්තු මන්ත්‍රිවරයෙකු ලෙස දිවුරුම් දෙනු ඇති බවත් එම පුවත් වල සඳහන් වෙයි.

බැසිල් රාජපක්ෂට ආර්ථික සංවර්ධන අමාත්‍යධූරය ලබාදෙනු ඇති බවට ද වාර්තා පළ වන අතර ඒ අනුව බැසිල් රාජපක්ෂ හිටපු අමාත්‍යවරයා වෙනුවෙන් ආර්ථික සංවර්ධන අමාත්‍යංශය ලෙස නව අමාත්‍යංශයක්ද පිහිටු වීමට නියමිත බවත් එම මාධ්‍ය වාර්තා වල සඳහන් වෙයි.

අදාළ අමාත්‍යංශයට නාගරික සංවර්ධන අධිකාරිය හා ආයෝජන මණ්ඩලය ද එක්කරනු ඇති බවටත් සඳහන් ය.

එලඹෙන සඳුදා දිනයේ සිට අවුරුදු 60ට වැඩි පුද්ගලයින් සඳහා කොවිඩ් මර්දන එන්නත් ලබාදීමේ ක්‍රියාවලිය වේගවත් කිරීමට පියවර ගෙන ඇති බවත් ඒ අනුව තම ලඟම ප්‍රධාන රොහලෙන් එන්නත් ලබාගත හැකි බවත් රජයේ වෛද්‍ය නිලධාරීන්ගේ සංගමයේ විධායක සභික වෛද්‍ය ප්‍රසාද් කොළඹගේ පවසයි.

ඒ පිළිබඳව වැඩිදුරටත් අදහස් දක්වමින් ඔහු සඳහන් කළේ, “සෑම ප්‍රධාන රෝහලකම අපි එන්නත් කිරීමේ මධ්‍යස්ථානයක් ආරම්භ කරන්න සූදානම් කරලා තියෙනවා ලබන සඳුදා දිනයේ සිට. සියලුම 60ට වැඩි පුරවැසියන්ට. මේක දිනපතාම කෙරෙන වැඩපිළිවෙලක්. මේ සඳහා අවශ්‍ය වන්නේ තමාගේ හැඳුනුම්පත පමණයි. අපි ලබාදීලා තියෙනවා ඉල්ලුම් පත්‍රයක්. ඒක නිවසේදී පුරවාගෙන ආවොත් එන්නත ඉතාමත් ඉක්මණින් ලබාගන්න පුළුවන්.”

Lanka truth

යුරෝපා සංගමයට අයත් රටවල් වෙත යැවෙන තැපැල් භාණ්ඩ සම්බන්ධව යුරෝපා සංගමය ක්‍රියාත්මක කරනු ලබන බදු ප්‍රතිපත්ති ජුලි 01 වනදා සිට සංශෝධනය කර තිබේ.

තැපැල් දෙපාර්තමේන්තුව නිවේදනයක් නිකුත් කරමින් ඒ බව පෙන්වා දෙයි.

ඒ අනුව යුරෝපා සංගමයට අයත් රටවල් 26 සඳහා මෙම බදු ප්‍රතිපත්ති ක්‍රියාවට නැංවේ.

යුරෝපා සංගමය විසින් දැනුම් දී ඇති පරිදි තැපැල් පාරිභෝගිකයන්, අන්තර්ජාලය මගින් අලෙවි කටයුතුවල නිරතවන්නන් සහ අන්තර්ජාල අලෙවිසැල් විසින් යුරෝපා සංගමයට අයත් රටවල් වෙත යොමු කරන තැපැල් භාණ්ඩ සඳහා මෙම බදු ප්‍රතිපත්තීන් අදාළ වේ.

ඒ අනුව යූරෝ 150 ට අඩු වටිනාකමකින් යුත් සියලුම තැපැල් භාණ්ඩ සඳහා යවන්නා විසින් යුරෝපා සංගමයට අයත් අදාළ රට වෙත සෘජුවම මෙම වැට් බදු ගෙවිය යුතු බව තැපැල්පතිවරයා අදාළ නිවේදනය මගින් පෙන්වාදී ඇත.

එමෙන්ම යූරෝ 150 ට වැඩි වටිනාකමකින් යුත් භාණ්ඩ සඳහා අදාළ රටේ බදු ප්‍රතිපත්තියට අමතරව අදාළ රජය විසින් තීරණය කරනු ලබන අනෙකුත් තීරු බදු ප්‍රතිපත්තීන්ට ද යටත් වන බැවින් තැපැල් භාණ්ඩ සඳහා වූ සියලුම බදු ගමනාන්තයේදී එම රටවල රේගුව විසින් භාණ්ඩය ලබාගන්නාගෙන් අය කර ගැනීමට කටයුතු කරන බවද තැපැල්පතිවරයා සඳහන් කරයි.

කෙසේවෙතත් වැට් බදු මුදල් සහ මෙහෙයුම් ගාස්තු ගෙවා භාණ්ඩය භාර ගැනීමට ක්‍රියා නොකළහොත් අදාළ රටේ තැපැල් පරිපාලනය හෝ රේගුව මෙම භාණ්ඩ සම්බන්ධව ගනු ලබන ඉදිරි ක්‍රියාමාර්ගයන් පිළිබඳ පාරිභෝගිකයින්ට වගකීමක් දැරීමට සිදුවන අතර ශ්‍රී ලංකා තැපැල් දෙපාර්තමේන්තුව මෙම බදු හෝ අනෙකුත් බදු ගෙවීම් පිළිබඳ කිසිදු අයුරකින් වගකීමක් නොදරන බවද තැපැල්පතිවරයා මෙරට ජනතාවට දැනුම් දෙයි.

මේ පිළිබද වැඩිදුරටත් විස්තර දැනගැනීම සදහා නිවේදනය පහත සදහන් වේ.

ජනාධිපතිවරයාගේ කතාවේ වාක්‍යක රාජ්‍යතාන්ත්‍රික භාවයේ ප්‍රශ්නයක් ඇති බව දේශපාලන විචාරකයන් පෙන්වා දෙයි.

ඒ ජනාධිපතිවරයා ජාතිය ඇමතීමේදී වසංගතයේ ආරම්භය චීනය බවත් එය ලොව පුරා පැතිරුණේ චීනයෙන් බවත් හැඟීයන ආකාරයට ප්‍රකාශ කර සිටිමය.

ජනාධිපති සිදුකළ කතාවේ මෙසේ සඳහන් වෙයි.

"මා ජනාධිපතිවරයා වශයෙන් පත් වී මාසයක් ගතවන්නටත් පෙර කොවිඩ් 19 වසංගතය චීනයෙන් ආරම්භ වී ලොව පුරා පැතිරෙන්නට පටන් ගත්තා."

මේ බව පෙන්වා දෙමින් විචාරකයන් පවසන්නේ කොරෝනා වෛරසය , වසංගතයක් ලෙස පැතිර යාමෙන් පසු චීනය විසින් ඔවුන් එය පාලනය කිරීමට කටයුතු කරන අතරම රාජ්‍යතාන්ත්‍රිකව එය ආරම්භ වූයේ චීනයෙන් නොවන බවට ලෝකය දැනුවත් කිරීමට විශාල පරිශ්‍රමයක් දැරූ බවය.

මෙම නිශ්චිත මොහොතේ පවා චීනයේ නිල ස්ථාවරය වන්නේ වෛරසය පැතිරීම ආරම්භ වූයේ චීනයෙන් නොවන බව යයිද දේශපාලන විචාරක මතය වී තිබේ.

ඔවුන් වැඩිදුරටත් පෙන්වා දෙන ආකාරයට ඇමෙරිකාවේ හිටපු ජනාධිපති ඩොනල්ඩ් ට්‍රම්ප් විසින් මෙය චීන වෛරසය ලෙස නවීකරණය කළ ද එය චීනයෙන් ආරම්භ වූවා යන කතාව නොකිරීමට පරිස්සම් වූ බවයි.

ලෝක සෞඛ්‍ය සංවිධානයත් ඇමරිකාවේ නව පරිපාලනය විසිනුත් විධිමත් පරීක්ෂණ කීපයක්ම පැවැත්වීමට කටයුතු කළත් තාමත් චීනය මෙහි ආරම්භය ලෙස නිල වශයෙන් පිළිගෙන නැත.

මෙම තත්ත්වය ලෝක දේශපාලනයේ තිබියදී ජනාධිපති විසින් මෙසේ පැවසීම සම්බන්ධව චීන ප්‍රතිචාරය කෙසේ වේදැයි ප්‍රශ්නයක් තිබෙන බව විචාරක අදහසයි.

මේ මත දැක්වීම චීනය කෙතරම් ඉවසයි ද යන්න අපට දැනගැනීමට හැකිවන්නේ ඉදිරියේදී ජනාධිපතිවරයා සම්බන්ධයෙන් ඔවුන් කටයුතු කරන ආකාරය අනුව බවත් දේශපාලන විචාරකයන් පවසයි.

රටේ රාජ්‍ය නායකයාගේ කතාවක් සැකසීම සහ ඊට සහභාගී වන උපදේශකයන් කතාවේ වචන, පෙළගැස්ම සහ අන්තර්ගතය ගැන කොතරම් සැලකිලිමත් වූවාද යන ප්‍රශ්නය මෙහිදී ඇතිවන බවත් ඔවුන් මතුකර දක්වයි.