පුවත්

කාන්තාවන්ට මත්පැන් මිලදී ගැනීමේ සහ රාත්‍රී 10.00 දක්වා මත්පැන් වෙළඳසැල් විවෘතව සම්බන්ධව නිකුත් කළ ගැසට් නිවේදනය අවලංගු කිරීමට ජනාධිපතිවරයා ගනුලැබූ තීරණය බාල ජනප්‍රියත්වය පතා සිදුකළ ක්‍රියාවක් බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා සඳහන් කරයි.

කොළඹ පැවති මාධ්‍ය හමුවකට එක්වෙමින් ජවිපෙ ප්‍රධාන ලේකම්වරයා මේ අදහස් පලකළ අතර එහිදී ඔහු වැඩිදුරටත් සඳහන් කර සිටියේ අදාළ ගැසට් නිවේදනය නිකුත් කර තිබෙන්නේ අමාත්‍යාංශයක් බැවින් ඊට අදාළ තීන්දු තීරණ ගතයුතුව තිබුණේද අමාත්‍ය මණ්ඩල හමුවකදී බවත් එසේ නොමැතිව මැතිවරණ වේදිකාවක මෙවැනි තීරණ ගැන කතා කිරීම ජනාධිපතිවරයාට සුදුසු නොවන බවය.

එසේම අදාළ සිදුවීම සම්බන්ධව ජනාධිපතිවරයා දැනුවත් වුයේ රේඩියෝව හරහා බව පැවසීමත් මීට පෙර රටේ පොහොර හිඟය දැනගත් බව කීවේ පත්තරෙන් බව පැවසීමත් තුළ රටේ තීන්දු තීරණ ගැනීම සම්බන්ධව ගැටළු සහගත තත්ත්වයක් පෙන්නුම් කරන බවද ප්‍රධාන ලේකම් වරයා සඳහන් කර සිටියේය.

මුදල් හා ජනමාධ්‍ය අමාත්‍යංශය විසින් කාන්තාවන් සඳහා මත්පැන් මිලදී ගැනීම සහ ඒ ආශ්‍රිත රැකියා කිරීම සම්බන්ධව පැවති තහනම ඉවත් කරමින් නිකුත් කළ ගැසට් පත්‍රය අවලංගු කිරීම පිළිබඳ හෙළ බොදු සවිය සංවිධානයේ සභාපති බුදුගල ජිනවංස හිමි ජනාධිපතිවරයාට පුණ්‍යානුමෝදනා කර ඇත.

මේ බව දැනුම්දෙමින් සභාපති හිමියන් විසින් ජනාධිපතිවරයා වෙත ලිපියක් යොමුකර ඇති අතර තවද මෙවැනි සදාචාරමය සහ සංස්කෘතිකමය වැනි සංවේදී කාරණා වලදී ජනාධිපතිවරයා සහ අග්‍රාමාත්‍යවරයා දැනුවත් නොකිරීම සම්බන්ධව කණගාටු වන බවද එම ලිපියේ සඳහන් කර ඇත.

එසේම මෙයින් මතුවට ඉහත කී අන්දමේ යෝජනා ගෙන ඒමට පෙර ජනාධිපතිවරයා දැනුවත් කරන ලෙස සියළු අමාත්‍යවරුන්ට නියෝග කරන ලෙසද අවධාරණය කරන බවද අදාළ ලිපියේ සඳහන්ය.

 එහි වැඩිදුරටත් සඳහන් කර ඇත්තේ වත්මන් යහපාලන රජය අපහසුතාවයට පත්කිරීමේ සංවිධානාත්මක කුමන්ත්‍රණයක් රජය තුළින්ම ක්‍රියාත්මක බව අද වන විට පැහැදිළි වන බවය.

කාන්තාවන්ට මත්පැන් මිලට ගැනීමට ඉඩකඩ සලසමින් ආණ්ඩුව විසින් ජනවාරි 10 බදාදා නිකුත් කරන ලද චක්‍රලේඛය අවලංගු කරන බව ජනාධිපති මෛත්‍රීපාල සිරිසේන පවසයි.

මත්පැන් මිල දී ගැනීම සහ මත්පැන් වෙළෙඳසැල්හි රැකියා කිරීම සම්බන්ධයෙන් වසර හැටක පමණ කාලයක් කාන්තාවන්ට බල පැවැත්වුන තහංචි ඉවත් කරන බව නිවේදනය කර තිබුණේ මුදල් ඇමති මංගල සමරවීර විසිනි.

මේ ඒ සම්බන්ධයෙන් සමාජ ක්‍රියාකාරීනියක් හා ප්‍රවීණ චිත්‍රපට අධ්‍යක්ෂිකා ඉනෝකා සත්‍යාංගනී mirrorarts වෙත මෙසේ අදහස් දක්වා ඇත.

''මම පොදුවේ මත්පැන් විරෝධී කෙනෙක්. ඒක පුරුෂ පාර්ශ්වයට වගේම ස්ත්‍රී පාර්ශ්වයටත් අදාළයි. මම වයින් ටිකක් වත් නොබොන කෙනෙක්. ඒක මගේ ෙපෟද්ගලික ස්ථාවරය. නමුත් ඒක සමාජයකට අදාළ වෙන්න නැහැ.

අලුතින් ඇතිකරල තියෙන තත්ත්වය ගැන කතා කරද්දි මට මෙහෙම කියන්න පුළුවන් . අවශ්‍යතාවක් තියෙන කෙනා මත්පැන් අලෙවි සැල්වලට යන්න දුන්නත් නැතත් ඒ අවශ්‍යතාව ඉටුකරගන්නවා. ඉතින් එතනදි ස්ත්‍රීන් සඳහා ඇතිකරපු යම් ආකාරයක ලිහිල් කිරීම හුඟක් අයට ප්‍රශ්නයක් වෙන්නෙ ඇයි කියන එක ගැටලුවක්. ඒක ස්ත්‍රී ද පුරුෂ ද කියල වෙනසක් නැතිව තමන්ට අවශ්‍ය දේ ලබාගැනීමට තිබෙන නිදහස පිළිබඳව ගැටලුවක් මතුකරන්න අවශ්‍ය නැහැ.

මොකද ස්ත්‍රී පුරුෂ කියන දෙපාර්ශවයටම ජීවිතේදි තමන්ට අවශ්‍යයයි කියල හිතෙන දෙයක් ලබාගැනීමට එකම පොදු තත්ත්වයක් තිබිය යුතුයි.

ස්ත්‍රීන්ට එක කොන්දේසියකුත් පිරිමින්ට තව කොන්දේසියකුත් තිබීම සාධාරණ නැහැ.

ඒ කොහොම වුණත් පොදුවේ ගත්තම මම මත්ද්‍රව්‍ය විරෝධී කියන තැනයි ඉන්නෙ. නමුත් මේ ලිහිල් කිරීම සම්බන්ධව ලොකුවට කතාකරන්නවත් ස්ත්‍රී පුරුෂ කියල විශේෂත්වයක් ඇති කරන්නවත් අවශ්‍ය නැහැ.

මොකද ඔය ලිහිල් කිරීම කළත් නැතත් අවශ්‍ය කෙනා අවශ්‍ය දේ ලබාගන්නවා. මෙතනදි මතු කළ යුත්තෙ ඇයි මේ තරම් කලබල වෙලා ඉන්නෙ කියන කාරණය විතරයි.''

(mirrorarts.lk )

මත්පැන් මිල දී ගැනීම සහ මත්පැන් වෙළෙඳසැල්හි රැකියා කිරීම කාන්තාවන්ට තහනම් කරමින් පනවා තිබු යල්පැන ගිය නීති ඉවත් කරමින්, රජය විසින් නිකුත් කල ගැසට් නිවේදනය අවලංගු කර හෙට (16) තවත් ගැසට් නිවේදනයක් නිකුත් කරන බව මුදල් හා මාධ්‍ය අමාත්‍යංශය පවසයි.

ජනාධිපතිවරයා විසින් අද දින සිදුකර ඇති ලිඛිත නියෝගයකට අනුව පෙර ගැසට් නිවේදනය අවලංගු කිරීමේ ගැසට් නිවේදනය නිකුත්කරන බව එම අමාත්‍යංශයේ ප්‍රකාශකයකු පැවසුයේ 'නිව්ස් ටියුබ්' කල විමසීමකදීය.

එසේ අවලංගු කිරීමට යන්නේ, වසර 60 අධික කාලයක් කාන්තාවන්ට නීත්‍යානුකූලව මත්පැන් මිලට ගැනීම වළකාලමින් පනවා තිබු තහනම ඉවත්කරමින් සුරාබදු ආඥා පනත යටතේ මුදල් හා ජනමාධ්‍ය අමාත්‍යවරයා පසුගිය 10 වැනිදා නිකුත්කළ විශේෂ ගැසට් නිවේදනයයි.

මුදල් ඇමතිවරයා නිකුත්කළ ගැසට් නිවේදනය අවලංගු කරන ලෙස තමා මුදල් අමාත්‍යංශයේ බලධාරීන්ට උපදෙස්දුන් බව ජනාධිපති මෛත්‍රිපාල සිරිසේන මහතා ඊයේ (14) පස්වරුවේ අගලවත්ත ප්‍රදේශයේ පැවති ශ්‍රීලනිප ජනහමුවක් අමතමින් පැවසීය. ඒ, මුදල් හා මාධ්‍ය අමාත්‍යවරයා ඉන්දියාවේ නිල සංචාරයක නිරතව සිටියදීය.

අද ප්‍රජාතන්ත්‍රවාදය සහ නිදහස සමග ඉතා පැහැදිලි පාලනයක් රට තුළ ඇතිවී තිබෙන බව එම රැලියේදී පැවසු ජනාධිපතිවරයා, එම නිදහස භුක්තිවිදීම මනුෂ්‍යත්වය තුළ සිදුවිය යුතු බවත් ඇතැම් අය එම නිදහස අහිමි කිරීමට අද මාර්ග සකසමින් සිටින බවත් කියා සිටියේය.

මේ අතර දේශපාලන විචාරකයින් පවසන්නේ, මත්පැන් මිල දී ගැනීම සහ මත්පැන් වෙළෙඳසැල්හි රැකියා කිරීම සම්බන්ධයෙන් වසර හැටක පමණ කාලයක් කාන්තාවන්ට බල පැවැත්වුන තහංචි ඉවත් කරමින් මුදල් හා මාධ්‍ය අමාත්‍ය මංගල සමරවීර මහතා නිකුත්කළ ගැසට් නිවේදනය අවලංගු කිරීම ව්‍යවස්ථාවේ මුලික අයිතිවාසිකම් උල්ලංඝනය කිරීමක් බවයි.

 සබැඳි පුවත් :

ව්‍යවස්ථාවට පටහැනියි : කාන්තාවන්ට වෙනස් ලෙස සැලකීමක් !

ශ්‍රී ලංකාව මත්ද්‍රව්‍ය සහ මිනිස් ජාවාරම මැඩලීමට මැලේසියාවේ සහාය හුවමාරු මධ්‍යස්ථානයක් ලෙස යොදා ගනිමින් ඇති බව නීතිය හා සාමය පිලිබඳ අමාත්‍ය සාගල රත්නායක පිළිගනියි.

ඇමතිවරයා එම පිළිගැනීම සිදුකළේ පොලිස්‌ මත්ද්‍රව්‍ය කාර්යාංශය මගින් 2016 දෙසැම්බර් 9 වැනිදා අත්අඩංගුවට ගත් කොකේන් කිලෝ 928යි ග්‍රෑම් 229ක ප්‍රමාණයක් අද (ජනවාරි 15) කටුනායක ආයෝජන කලාප පරිශ්‍රයේදී ප්‍රසිද්ධියේ විනාශ කිරීමේ අවස්ථාවට එක්ව සිටියදීය.

විනාශ කළ මත්ද්‍රව්‍ය තොගයේ වටිනාකම රුපියල් බිලියන 16.7ක් බව නීතිය හා සාමය පිලිබඳ අමාත්‍ය සාගල රත්නායක පවසයි.

"2015 සිට 2017 දක්වා අපි අත්අඩංගුවට ගත්ත කුඩා සහ විශාල මත්ද්‍රව්‍ය තොගවල වටිනාකම රුපියල් බිලියන 34.5ක් හෝ34.7ක් වෙනවා. එය අවුරුද්දක පොලිස් වැය ශීර්ෂයෙන් භාගයක් තරම් " අමාත්‍යවරයා සඳහන් කළේය.

සීනි සමඟ ගෙනා මත්ද්‍රව්‍ය තොගයක් අල්ලා ගත් අවස්ථාවක්

මෙතරම් විශාල මත්ද්‍රව්‍ය තොග හමුවීම මගින් ශ්‍රී ලංකාව මත්ද්‍රව්‍ය හුවමාරු මධ්‍යස්ථානයක් ලෙස යොදාගැනීමක් ලෙස හැඳින්විය හැකිදැයි විමසු විට ඇමතිවරයා පැවසුවේ "අපිව හුවමාරු මධ්‍යස්ථානයක් ලෙස යොදා ගන්නවා, නමුත් යම් ප්‍රමාණයක් ශ්‍රී ලංකාව තුළත් බෙදා හරිනවා. ඒක කඩන්න අපි විශාල සටනක් කරනවා" ඇමතිවරයා පවසයි.

 වැරදිකරුවන් නැහැ:

 ඉහත කී පරිදි විනාශ කරන ලද කොකේන් තොගය සම්බන්ධයෙන් මෙතෙක් කිසිවකු අත්අඩංගුවට ගෙන නැත.

කොකේන් තොගය ඉක්වදෝරයේ සිට ඉන්දියාව බලා යන නැවක් තුළ වූ කන්ටේනරයක තිබියදී ලද ඔත්තුවක් අනුව 2016 වසරේ අත්අඩංගුවට ගන්නා ලද බව ශ්‍රී ලංකා පොලිසිය පවසයි.

අල්ලා ගත් මත් තොගයක් නිරීක්ෂණය කරන ජනාධිපතිවරයා

 මෙපරිද්දෙන් බ්‍රසීලයේ සිට ආනයනය කරන ලද සීනි තොග සමඟ කොකේන් විශාල ප්‍රමාණයක් පසුගිය කාලයේ ශ්‍රී ලංකාව තුළට පැමිණ තිබුණි.

(බීබීසී සිංහල සේවය)

ජනාධිපතිවරයාගේ ධූර කාලය වසර 5ක් බව සඳහන් කරමින් ශ්‍රේෂ්ඨාධිකරණයේ තීන්දුව දැනුම්දී ඇති බව ජනාධිපති ලේකම් ඔස්ටින් ප්‍රනාන්දු සඳහන් කරයි.

ඊයේ එනම් 14 වනදා සවස ශ්‍රේෂ්ඨාධිකරණයේ තීරණය ජනාධිපති ලේකම් කාර්යාලය වෙත ලැබී ඇති අතර ඊට අදාළ වුයේ සිය ධූරකාලය වසර හයක් (06) දක්වා එනම් 2021 ජනවාරි 09 දක්වා දැරීම සඳහා කිසියම් හෝ නීතිමය බාධාවක් තිබේදැයි බලා දැනුම් දෙන ලෙස ජනාධිපතිවරයා විසින් අගවිනිසුරුවරයා වෙත සිදුකළ දැනුම්දීමය.

මෙම ශ්‍රේෂ්ඨාධිකරණ විමර්ශනය සඳහා සහභාගී වුයේ අගවිනිසුරු ප්‍රියසාද් ඩෙප්, ඊවා වනසුන්දර, බුවනෙක අළුවිහාරේ, සිසිර ද ආබෲ සහ කේ.ටී. චිත්‍රසිරි යන පංච පුද්ගල ශ්‍රේෂ්ඨාධිකරණ විනිසුරු මඩුල්ල විසින්ය.

මුල්ම අනාවරණය newstube.lk වෙතින්

ජනාධිපතිවරයාගේ ධූර කාලය වසර 5ක් ලෙස දක්වා ශ්‍රේෂ්ඨාධිකරණය තීන්දු කර ඇති බවට පළමු වරට පුවත ඊයේ රාත්‍රිය වන විට newstube.lk වෙබ් අඩවිය පලකළ අතර එම පුවත පහත දැක්වේ.

ජනාධිපති මෛත්‍රීගේ නිල කාලය වසර පහයි !

ජනාධිපති මෛත්‍රීපාල සිරිසේන මහතාට වසර පහක කාලයක් පදවියේ කටයුතු කළ හැකි බව ශ්‍රේෂ්ඨාධිකරණයේ බහුතරයකගේ තීන්දුව වී ඇතැයි නිල නොවන ආරංචිමාර්ග පවසයි.

ජනාධිපති මෛත්‍රීපාල සිරිසේන මහතා සිය නිල කාලය අවසන් වෙන නිශ්චිත කාල සීමාව පිළිබඳව විමසමින් අධිකරණය වෙත යොමු කර තිබු ඉල්ලීම සලාක බැලූ ශ්‍රේෂ්ඨාධිකරණය තම මතය ඊයේ (14) ජනාධිපතිවරයාට දැනුම් දී ඇතැයි පැවසේ.

ශ්‍රේෂ්ඨාධිකරණයේ මතය ප්‍රසිද්ධ කිරීම හෝ නොකිරීම ජනාධිපති මෛත්‍රිපාල සිරිසේන මහතාගේ අභිමතය අනුව සිදු වෙයි.

කෙසේවුවද ජනාධිපති කාර්යාලයේ ජ්‍යෙෂ්ඨ නිලධාරියකු පැවසුයේ ශ්‍රේෂ්ඨාධිකරණයේ පංච පුද්ගල විනිසුරු මඩුල්ලේ සාමාජිකයින් අතරින් තිදෙනෙකු විසින් ජනාධිපති මෛත්‍රීපාල සිරිසේන මහතාගේ නිල කාලය වසර හයක් ලෙස නිගමනය කර ඇති බවයි.

නීතිපතිගේ ස්ථාවරය :

අගවිනිසුරු ප්‍රියසාත් ඩෙප් මහතා ප්‍රමුඛ පංච පුද්ගල විනිසුරු මඩුල්ලක් ඉදිරියේ ජනවාරි 11දා මෙම කාරණය සළකා බලන ලද අවස්ථාවේදී අදහස් දැක්වූ නීතිපති ජයන්ත ජයසූරිය මහතා, ජනාධිපති මෛත්‍රීපාල සිරිසේන මහතාට වසර හයක කාලයක් පදවියේ කටයුතු කළ හැකිය යන්න තම මතය බව අවධාරණය කර සිටියේය.

ජනාධිපති මෛත්‍රීපාල සිරිසේන මහතා සිය නිල කාලය 19 වන සංශෝධනය සම්මත කිරීමට පෙර ආරම්භ කර ඇති හෙයින් එම සංශෝධනයේ සඳහන් වන පරිදි ජනාධිපතිවරයාගේ ධූරකාලය වසර පහකට සීමා කරනු ලැබීම ඔහුට බල නොපාන බව නීතිපතිවරයාගේ තර්කය විය.

ජනතාව වසර හයකට පත් කළ ජනාධිපතිවරයකුගේ ධූර කාලය අඩු කිරීම ජනතාවගේ ඡන්ද බලය හා පරමාධිපත්‍යයට බලපාන කරුණක් වන හෙයින් ඒ සඳහා පාර්ලිමේන්තුවේ 2/3 ඡන්දයට අමතරව ජනමත විචාරණයක් මගින් ජනතා කැමැත්ත ද අවශ්‍ය කරන බව නීතිපතිවරයා පැවසිය.

"එහෙම නැත්නම් ජනාධිපතිවරයෙක් පත් වුනාම බලයේ සිටින ජනාධිපතිවරයකුගේ කාල සීමාව වසර දෙකක් හෝ තුනක් විය යුතු යයි නීති ගෙනැවිත් එම කාලය සීමා කරන්න පාර්ලිමේන්තුවට පුළුවන් වෙනවා. ජනමත විචාරණයක් අවශ්‍ය ඒ නිසයි" නීතිපති ජයන්ත ජයසුරිය මහතා, ශ්‍රේෂ්ඨාධිකරණය ඉදිරියේ කියා සිටියේය.

19 වන ආණ්ඩුක්‍රම සංශෝධනයේ සඳහන් වසර පහක ධූරකාලය මීළඟට පත් වෙන ජනාධිපතිවරයාගේ පටන් අනාගතයට වලංගු වන බව ඔහුගේ මතය විය.

නීතිපතිගේ මතය අභියෝගයට :

ඒකාබද්ධ විපක්ෂයේ ජී.එල්.පීරිස් මහතා වෙනුවෙන් පෙනී සිටි ජනාධිපති නීතිඥ මනෝහර සිල්වා මහතා නීතිපතිවරයාගේ මතය අභියෝගයට ලක් කරමින් ජනාධිපතිවරයාට ධූරයේ කටයුතු කළ හැක්කේ වසර පහක් පමණක් බව ආණ්ඩුක්‍රම ව්‍යවස්ථාවේ ඉතා පැහැදිලිව සඳහන් බව පෙන්වා දුන්නේය.

19 වැනි ආණ්ඩුක්‍රම ව්‍යවස්ථා සංශෝධනය වත්මන් ජනාධිපතිවරයාට ද බලපාන බව එහි පැහැදිලිව සඳහන් කර ඇති බව පැවසූ ජනාධිපති නීතිඥ මනෝහර සිල්වා මහතා, ජනාධිපතිවරයාට ඒ ගැන ගැටළුවක් තිබුණේ නම් එම අවස්ථාවේ ඒ ගැන අධිකරණය යා හැකිව තිබු බවත් සඳහන් කළේය.

ජනාධිපති මෛත්‍රිපාල සිරිසේන මහතාගේ නිල වෙබ් අඩවියෙන් උපුටා ගත් ජනාධිපතිවරයාගේ ප්‍රකාශයක් ඉදිරිපත් කළ නීතිවේදියා මෛත්‍රීපාල සිරිසේන ජනාධිපතිවරයාත් සිය ධූරකාලය අඩු කිරීමට කැමැත්ත පළ කර ඇතිබව පැවසීය.

 පදවියේ නිල කාලය වසර හතරකට සීමා කළ යුතු යයි තමා යෝජනා කළ බව ජනාධිපතිවරයා පවසා ඇත.

 19 වැනි ව්‍යවස්ථා සංශෝධනයට පෙර 2015 ජනවාරි 26 වැනි දින උත්සවයක් අමතමින් ජනාධිපති මෛත්‍රීපාල සිරිසේන මහතා තම ධූරකාලය ගැන මෙලෙස අදහස් දක්වා තිබුණි.

"විධායක ජනාධිපතිවරයකුට තියෙන අසීමිත බලතල ඉවත් කරලා පාර්ලිමේන්තුවට වැඩි බලයක් දීලා කටයුතු කිරීමේ කටයුතු මේ දිනවල කර ගෙන යනවා. මම පෙරේදා ඒ සාකච්ඡාවට සහභාගී වෙලා කිව්වා ''මගේ නිල කාලයට තියෙනවා අවුරුදු හයක්. මේක අවුරුදු හතරක් කරමුයි කියලා හිටන්. ඒත් ව්‍යවස්ථා විශේෂඥ කමිටුව සහ දේශපාලන නායකයන් අවුරුදු හතරට කැමති වුනේ නැහැ. අවුරුදු හතරකට සැරයක් මැතිවරණයකට යාම රටට හොඳ නැහැ කියල හිටන්. මගේ දැඩි ඉල්ලීම උඩ අවුරුදු හය පහ කරන්න ඒ ගොල්ලෝ කැමති වුනා. දැන් (අවුරුදු) හයෙන් එකක් ඒගොල්ලෝ අඩු කරලා තියෙනවා, පහෙන් ගෙදර යන්න ඒක මගේ ප්‍රතිපත්තිය"

ජනාධිපතිවරයාගේ ඉහත කී ප්‍රකාශය ඔහුගේ ධුර කාලය වසර පහක් කිරීමට කැමැත්ත දීමේ ප්‍රකාශයක් ලෙස ජනාධිපති නීතිඥ මනෝහර සිල්වා මහතා විසින් විග්‍රහ කරනු ලැබුණි.

වසර හයකට පත් වූ ජනාධිපතිවරයකුගේ ධූර කාලය අඩු කිරීම ජනතාවගේ ඡන්ද බලය හා පරමාධිපත්‍යයට බලපාන කරුණක් වන බවට නීතිපතිවරයා ඉදිරිපත් කළ තර්කයට අභියෝග කළ ජනාධිපති නීතිඥ මනෝහර සිල්වා මහතා, එවැනි බලපෑමක් ඇති කෙරෙන්නේ ඡන්දයක් කල් දැමීම නිසා වන අතර ඡන්දයක් පෙරට ගැනීම තුළින් එවැනි බලපෑමක් ඇති නොවන බවට ප්‍රතිතර්කයක් ඉදිරිපත් කළේය.

19 අතීතයට බල නොපාන්නේ නම් චන්ද්‍රිකා හා මහින්දටත් යළිත් අවස්ථාවක්?

ජනාධිපතිවරයාට 19 ව්‍යවස්ථා සංශෝධනය බල නොපාන්නේ නම් හිටපු ජනාධිපති මහින්ද රාජපක්ෂට හා චන්ද්‍රිකා කුමාරතුංගට ද එම සංශෝධනය බල නොපාන බව ශ්‍රේෂ්ඨාධිකරණය ඉදිරියේ අදහස් දැක්වූ ජනාධිපති නීතිඥ අලි සබ්රි මහතාගේ අදහස විය.

ජනාධිපති පදවිය දැරිය හැක්කේ දෙවරක් පමණක් බවට 19 වන සංශෝධනය මගින් ගෙන ආ නීතිය බලපාන්නේ 19 වන සංශෝධනය යටතේ ජනාධිපති පදවියට පත්වූ අයට පමණක් බවට ඔවුන් දෙදෙනාටත් කියා සිටිය හැකි බව පැවසූ ජනාධිපති නීතිඥ අලි සබ්රි මහතා, ජනාධිපති මෛත්‍රීපාල සිරිසේන මහතාගේ නිල කාලය වසර පහක් පමණක් බව තම මතය බව කියා සිටියේය.

ආචාරය ගුණදාස අමරසේකර මහතා වෙනුවෙන් පෙනී සිටි නීතිවේදියා අදහස් දක්වමින්, 2015 ජනාධිපතිවරණයේදී ලක්ෂ හැට දෙකක් ජනතාව ජනාධිපති මෛත්‍රිපාල සිරිසේන මහතාගේ බලතල හා ධුර කාලය අඩු කිරීම අනුමත කර ඇති බව සඳහන් කළේය.

දූෂණ විරෝධී පෙරමුණේ උලපනේ සුමංගල හිමියන්, ජනාධිපති නීතිඥ සාලිය පිරිස් සහ ශ්‍රී ලංකා නිදහස් පක්ෂයේ මහලේකම් දුමින්ද දිසානායක වෙනුවෙන් පෙනී සිටි ජනාධිපති නීතිඥ ෆායිස් මුස්තාෆා ජනාධිපතිවරයාට වසර හයක් කටයුතු කළ හැකි බවට තර්ක කළේය.

විකල්ප ප්‍රතිපත්ති කේන්ද්‍රය හා 'කැෆේ' මැතිවරණ නිරීක්ෂණ කණ්ඩායමේ රජිත් කීර්ති තෙන්නකෝන් මහතා ද තම නීතිවේදීන් මාර්ගයෙන් ජනාධිපතිවරයාගේ කාලය 2020 දී වසර පහක කාලයකින් අවසන් වන බව ශ්‍රේෂ්ඨාධිකරණය හමුවේ කියා සිටියහ.

මත්පැන් මිල දී ගැනීම සහ මත්පැන් වෙළෙඳසැල්හි රැකියා කිරීම සම්බන්ධයෙන් වසර හැටක පමණ කාලයක් කාන්තාවන්ට බල පැවැත්වුන තහංචි ඉවත් කරමින් මුදල් හා මාධ්‍ය අමාත්‍ය මංගල සමරවීර මහතා නිකුත්කළ ගැසට් නිවේදනය වහාම අවලංගු කරන ලෙස ජනාධිපති මෛත්‍රීපාල සිරිසේන මහතා ලබාදී ඇති නියෝගය ව්‍යවස්ථාවේ මුලික අයිතිවාසිකම් උල්ලංඝනය කිරීමක් බව දේශපාලන විචාරකයින් පවසති.

ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ ආණ්ඩුක්‍රම ව්‍යවස්ථාවේ III වන පරිච්චේදයේ මුලික අයිතිවාසිකම් යටතේ, ''කිසිම පුරවැසියකු වර්ගය, ආගම, භාෂාව, කුලය, ස්ත්‍රී පුරුෂ භේදය, දේශපාලන මතය හෝ උපන් ස්ථානය යන හේතු මත හෝ ඉන් කවර වූ හේතුවක් මත හෝ වෙනස්කමකට හෝ විශේෂයකට හෝ භාජනය නොවිය යුත්තේය.''

එසේම, ''ආණ්ඩුක්‍රම ව්‍යවස්ථාවට අනුව, වර්ගය, ආගම, භාෂාව, කුලය හෝ ස්ත්‍රී පුරුෂ භේදය යන හේතුන් මත හෝ ඉන් කවරහෝ හේතුවක් මත හෝ වෙළඳසල් වලට, පොදු භෝජනාගාරවලට, ආපනශාලාවලට, පොදු විනෝද ස්ථානවලට හෝ තම තමන්ගේ ආගමට අයත් පොදු පුජනීය ස්ථානවලට ඇතුල්වීම සම්බන්ධයෙන් යම් ආශාක්නුතාවයකට, බැඳීමකට, සීමාකිරිමකට නැතහොත් කොන්දේසියකට කිසිම තැනැත්තෙක් යටත් නොවන්නේය. ''

 සම අයිතිය තහවුරු කිරීමක් :

එසේ ආණ්ඩුක්‍රම ව්‍යවස්ථාව මගින් සම අයිතිය තහවුරු කර තිබිදීත්, එය නොසලකා වසර 60 අධික කාලයක් කාන්තාවන්ට නීත්‍යානුකූලව මත්පැන් මිලට ගැනීම වළකාලමින් පනවා තිබු තහනම ඉවත්කරමින් සුරාබදු ආඥා පනත යටතේ වන විශේෂ ගැසට් නිවේදනයක් මුදල් හා ජනමාධ්‍ය අමාත්‍යවරයා පසුගිය 10 වැනිදා අත්සන් තැබීය.

ඒ අනුව, මත්පැන් නිෂ්පාදනය කරන සහ අලෙවි කරන ස්ථානවල රැකියා කිරීමට මෙන්ම මත්පැන් මිලදී ගැනීමටද කාන්තාවන්ට පනවා තිබු වාරණය අහෝසිවිය.

ඒ අනුව වසර 60 අධික කාලයකට පසු වයස අවුරුදු 18 ඉහළ කාන්තාවන්ට නීත්‍යානුකූලව මත්පැන් මිලට ගැනීම සඳහා අවසර හිමිවිය.

කාන්තාවන්ට වෙනස් ලෙස සැලකීමක් සිදුවන බැවින් ඒ පිළිබඳ අවධානය යොමු කර 1955 වසරේ ක්‍රියාත්මක අදාළ නීතිය සංශෝධනය කිරීමට තීන්දු කළ බව රජය නිවේදනය කර තිබිණ.

අදාළ නීතිය සංශෝධනය කෙරුණු බව ජනවාරි 10 නිවේදනය කෙරෙනු අතර ඒ අනුව මත්පැන් අලෙවිසැල් තුළ සේවය කිරීම සඳහා ද කාන්තාවන්ට පූර්ව අනුමැතියක් අවශ්‍ය නොවිය.

දේශපාලන වාසි ලබාගැනීමට !

කෙසේවුවද, මත්පැන් සඳහා කාන්තාවන්ට පනවා තිබු වාරණයක් ඉවත්කරමින් මුදල් අමාත්‍යවරයා විසින් ජනවාරි 10 බදාදා නිකුත් කරන ලද චක්‍රලේඛය අවලංගු කරන බව ජනාධිපති මෛත්‍රීපාල සිරිසේන මහතා අද (14) අගලවත්තේ පැවති ශ්‍රීලනිප ප්‍රචාරක ප්‍රචාරක රැළියක් අමතමන් කියා සිටියේය.

ජනාධිපතිවරයා එහිදී මෙසේද පැවසිය.

''කාන්තා වන්ට අරක්කු කඩවලට වෙළෙඳසැල් වලට ගිහිල්ලා -බාර්වලට ගිහිල්ලා අරක්කු බෝතල් මිලට ගන්න නොහැකිය කියල නීතියක් තිබුණය- ඒ නීතිය වෙනස් කළාය කියල මට දැන ගන්න ලැබුනා...

මම මුදල් ඇමති මංගල සමරවීර ඇමතිතුමාට කතා කළා. එතුමා දැන් දවස් තුනක් ඉන්දියාවේ. මම අපේ අගමැතිතුමාට ඊයේ උදේ කතා කළා. ආණ්ඩුවේ ඇමතිවරු කීප දෙනෙකුට කතා කළා. මම කිව්වා- මේ දාල තියෙන අලුත් චක්‍රලේඛය - බාර් ඇරලා තියන්න - උදේ අටේ ඉඳන් රෑ දහය වෙනකම් - කාන්තාවන්ට බාර්වලින් අරක්කු ගන්න අවසර දෙන චක්‍රලේඛය වහාම ඉවත් කර ගන්නය කියල" ඔහු අවධාරණයෙන් සඳහන් කළේය.

"ඒ චක්‍රලේඛය හෙට සිට අහෝසි කරනවා-අවලංගු කරනවා.එවැනි තීන්දු තීරණ විතරක් නොවෙයි, මීට වඩා ලොකු දේවල් වලදී වුනත්"යනුවෙන් ජනාධිපතිවරයා කියා සිටියි.

පසුගිය සමයේ රාජපක්ෂවරුන් වෙනුවෙන් ක්‍රියාකාරිව සේවය කල භික්ෂුන් වහන්සේලා කිහිප නමකගේ ඉල්ලීම මත ජනාධිපතිවරයා මෙවැනි ප්‍රකාශයක් කලේ මෙම මැතිවරණයේදී දේශපාලන වාසිලබාගැනීම සඳහා බව දේශපාලන විචාරකයින් පවසති.

 සබැඳි පුවත් :

බැසිල්ගේ 'මිඩියා ගේම' ජයගනී : මංගලගේ ගැසට් නිවේදනය අවලංගු කරවයි !

අධික රථවාහන තදබදය සහ නාගරික කටයුතු විධිමත්ව කළමනාකරණය නොකිරීම හේතුවෙන් ජනතාව වායු දුෂණයේ ගොදුරක් බවට පත්වීමට විරෝධය පළකරමින් වෙනසක තාරුණ්‍ය සංවිධානය විරෝධතාවක් පවත්වනු ලැබිණ.

“හුස්ම ගැනීමට ඉඩ දියව්” යන සටන් පාඨයෙන් යුතුව මහනුවර සංවිධානය කර තිබු එම විරෝධතාවයේදී වායු දුෂණයට එරෙහිව බැනරයක්ද අත්සන් කෙරිණ.

තම විරෝධතාවයේ අරමුණ පැහැදිළි කරමින් වෙනසක තාරුණ්‍ය සංවිධානය සඳහන් කර සිටියේ වායු දුෂණය හේතුවෙන් ගර්භනී මවුවරුන්ගේ කළලවල සිටින කුඩාම දරුවා පවා මේ හේතුවෙන් ජීවිත කාලයටම බලපාන ආබාධ වලට ලක්වීමේ අවධානමක් ඇති බවත් මේ තත්ත්වය වෙනස් කිරීම සඳහා වගකිවයුත්තන්ට බලකිරීමට ජනතාව දැනුවත් කිරීමේ පියවරක් ලෙස මෙය සංවිධානය කළ බවය.

මෙම අවස්ථාව සඳහා වෙනසක තාරුණ්‍ය සංවිධායක සුජිත් කුරුවිට ඇතුළු ක්‍රියාකාරීන් සහභාගීව සිටියහ.

මත්පැන් සඳහා කාන්තාවන්ට පනවා තිබු වාරණ ඉවත්කරමින් මුදල් හා මාධ්‍ය අමාත්‍ය මංගල සමරවීර මහතා නිකුත්කළ ගැසට් නිවේදනය වහාම අවලංගු කරන ලෙස ජනාධිපති මෛත්‍රීපාල සිරිසේන මහතා මුදල් අමාත්‍යංශයේ ලේකම්වරයාට නියෝග කර ඇත.

අද අගලවත්තේ පැවති ශ්‍රීලනිප ප්‍රචාරක රැලියකදී ජනාධිපතිවරයා මේබව සඳහන් කළේය.

සුරාබදු ආඥා පනත යටතේ වන විශේෂ ගැසට් නිවේදනයට මුදල් හා ජනමාධ්‍ය අමාත්‍යවරයා පසුගිය 10 වැනිදා අත්සන් තැබීය.

ඒ අනුව, මත්පැන් නිෂ්පාදනය කරන සහ අලෙවි කරන ස්ථානවල රැකියා කිරීමට මෙන්ම මත්පැන් මිලදී ගැනීමටද කාන්තාවන්ට පනවා තිබු වාරණය අහෝසිවිය.

වයස අවුරුදු 18 ඉහළ කාන්තාවන්ට මත්පැන් මිලට ගැනීම සඳහා අවසර ලබා දීමට රජය තීන්දු කර තිබිණ.

ඒ අනුව වසර 60 අධික කාලයකට පසු කාන්තාවන්ට නීත්‍යානුකූලව මත්පැන් මිලට ගැනීම සඳහා අවසර හිමිවිය.

කාන්තාවන්ට වෙනස් ලෙස සැලකීමක් සිදුවන බැවින් ඒ පිළිබඳ අවධානය යොමු කර 1955 වසරේ ක්‍රියාත්මක අදාළ නීතිය සංශෝධනය කිරීමට තීන්දු කළ බව රජය පැවසීය.

අදාළ නීතිය සංශෝධනය කෙරුණු බව බදාදා (ජනවාරි 10) නිවේදනය කෙරෙනු අතර ඒ අනුව මත්පැන් අලෙවිසැල් තුළ සේවය කිරීම සඳහා ද කාන්තාවන්ට පූර්ව අනුමැතියක් අවශ්‍ය නොවිය.

 ජනාධිපති හා මංගල කෙටවීමේ මෙහෙයුමක් !

බෞද්ධ භික්ෂුන් වහන්සේලා හා 'ජාතික බලවේග' උසිගන්වා ප්‍රකාශ ලබා ගනිමින්...

 මුදල් අමාත්‍ය මංගල සමරවීර මහතා ඉලක්කකර කරගනිමින් මේ සතිය පුරා පුළුල් මාධ්‍ය මෙහෙයුමක් ක්‍රියාත්මක කල පොහොට්ටු පක්ෂයේ මහ මොලකරු වන හිටපු අමාත්‍ය බැසිල් රාජපක්ෂ මහතා, මුදල හා මාධ්‍ය අමාත්‍යංශය විසින් මත්පැන් සම්බන්ධයෙන් පසුගියදා සිදුකල සංශෝධන වලට එරෙහිව බෞද්ධ භික්ෂුන් වහන්සේලා හා 'ජාතික බලවේග' උසිගන්වා ප්‍රකාශ ලබා ගනිමින් මෙම ගැසට් නිවේදනය අවලංගු කරවා ගැනීමට බලපෑම් කරන ලෙසත්, ඒ හරහා ජනාධිපතිවරයා හා මුදල් ඇමතිවරයා අතර ගැටුමක් නිර්මාණය කරන ලෙසත් සිය මාධ්‍ය ජාලයට උපදෙස් දී තිබිණ.

බැසිල් රාජපක්ෂ මහතාගේ මෙම මාධ්‍ය මෙහෙයුම සඳහා, පසුගිය සමයේ නාමල් රාජපක්ෂ මහතා සමග ක්‍රියාත්මක වූ 'තාරුණ්‍යට හෙටක් ' සංවිධානයේ හිටපු සාමාජිකයින් කිහිප දෙනෙකුද යොදා ගෙන තිබිණ.

 සබැඳි පුවත් :

මංගල, ජනාධිපති හා අගමැති සමග කෙටවීමේ මෙහෙයුමක් !

මහබැංකු බැදුම්කර සිද්ධිය සම්බන්ධයෙන් විමර්ශනය කළ ජනාධිපති කොමිසමේ වාර්තාවේ පිටපතක් තමන්ට ද ලැබුන බව හිටපු අමාත්‍ය, පාර්ලිමේන්තු මන්ත්‍රී රවී කරුණානායක මහතා පවසයි.

කොළඹ - මට්ටක්කුලිය ප්‍රදේශයේ පක්ෂ කාර්යාලයක් විවෘත කිරීමේ අවස්ථාවකට ඊයේ එක්වීමෙන් අනතුරුව මාධ්‍යවේදීන් නැගූ ප්‍රශ්නවලට පිළිතුරු ලබාදෙමින් ඔහු මේ බව කියා සිටියේය.

බැඳුම්කර වාර්තාවේ පිටපතක් තමාවෙත ලබාදෙන්නැයි ඉල්ලමින් රවී කරුණානායක මහතා පසුගියදා ජනාධිපති ලේකම්වරයා වෙත ලිඛිත ඉල්ලීමක් ද කර තිබිණ. ඒ තොරතුරු දැනගැනීමේ පනත යටතේය.

එහෙත් ඔහුට මෙතෙක් නිල වශයෙන් එම වාර්තාව ලැබී නොමැත.

පිටපතක් නොනිල මට්ටමින් අගමැතිට

මේ අතර බැඳුම්කර වාර්තාවේ නිර්දේශ ඇතුලත් පිටු 11ක් ලිපිගොනුවක් පසුගිය 11ද අගමැතිවරයා වෙත ලැබී ඇතැයි තහවුරු නොකළ ආරංචිමාර්ග වලින් වාර්තාවේ.

 බැඳුම්කර ගනුදෙනුව විමර්ශනය කළ ජනාධිපති විමර්ශන කොමිසම පිටු දහසකට වැඩි වාර්තාවක් පසුගිය දෙසැම්බර් මස 30දා ජනාධිපති මෛත්‍රීපාල සිරිසේන මහතා වෙත බාරදෙනු ලැබුවද මෙතෙක් ප්‍රසිද්ධියට පත්කර නොමැති අතර එහි පිටපතක් අගමැතිවරයාට හෝ ලබාදී නොතිබිණ.

 අගමැතිවරයා වෙත ලැබී ඇති වාර්තාවේ, ජනාධිපතිවරයා කල විශේෂ ප්‍රකාශයේ සඳහන් කරුණු වලට වැඩි බරපතල කාරනා සඳහන්ව ඇතත් අගමැතිවරයාට හෝ හිටපු අමාත්‍ය රවී කරුණානායක මහතාට සෘජුව බලපාන නිර්දේශ එහි ඇතුලත්ව නොමැති බව ඉහත ආරංචිමාර්ග වැඩිදුරටත් අවධාරණය කර සිටියි.

 මේවනවිට ජනාධිපතිවරයා විසින් නීතිපතිවරයා සමඟද සාකච්ජා කර පාර්ලිමේන්තුව වෙත දන්වා ඒවා ඇත්තේ, බැඳුම්කර කොමිසම් වාර්ථාව මුලින්ම අල්ලස් හෝ දූෂණ විමර්ශන කොමිසන් සභාව, නීතිපති, හා මහබැංකුව වෙත යොමු කර ජනවාරි 17 හෝ ඊට ආසන්න දිනක පාර්ලිමේන්තුවේ සභාගත කිරීම සඳහා ඉදිරිපත් කරනු ලබන බවයි.

සබැඳි පුවත් :

බැඳුම්කර කොමිසමේ නිර්දේශ හොර රහසේ ම අගමැති අතට !

පවතින දේශපාලන අර්බුදයෙන් රට ගොඩගැනීම සඳහා පරිවාස ආණ්ඩුවක් ස්ථාපිත කලයුතු බව ජනාධිපති මෛත්‍රීපාල සිරිසේන මහතාගේ දේශපාලන කටයුතු සම්බන්ධිකාරක නීතිඥ ශ්‍රිරාල් ලක්තිලක මහතා අවධාරණය කර සිටියි.

භාරකාර ආණ්ඩුවක් පිහිටුවිය යුතු බවට ඔහු සති අන්ත පුවත්පතකට කර තිබු ප්‍රකාශය පිළිබඳව 'නිව්ස් ටියුබ්' කල විමසීමකදී ඔහු එබව සඳහන් කළේය.

'' රට මුහුණදී සිටින සියලු අර්බුදවලට අලුත් මුහුණුවරකින් මුහුණදිය යුතු වෙලා තියනවා. ඉදිරිදින කිහිපයේදී බැඳුම්කර වාර්තාවේ කරුණු අනාවරණය වෙනකොට, පසුගිය සමයේ සිදුවු බරපතල වංචා - දුෂණ සොය බැලු ජනාධිපති විමර්ශන වාර්තා එලියට එනකොට දේශපාලන ක්ෂේත්‍රයේ මුහුනුවර මුළුමනින්ම වෙනස් වෙනවා ..තවදුරටත් මේ විදියට යන්න බැරි තත්වයක් ඇතිවෙනවා.

ඒ නිසා ව්‍යවස්ථා වෙනසක් ගැන හිතනවා නම්, වසර දෙකකට වත් ජනාධිපතිවරයා යටතේ පරිවාස ආණ්ඩුවක් පිහිටුවිය යුතු වෙනවා'' යයි ශ්‍රිරාල් ලක්තිලක මහතා කියා සිටියේය.

ජනාධිපතිවරයාගේ ධුර කාලය සම්බන්ධයෙන් කල විමසීමේදී ඔහු කියා සිටියේ, ඒ සම්බන්ධ ශ්‍රේෂ්ඨාධිකරණ තීන්දුව අද දිනය තුලදී ජනාධිපතිවරයා වෙත ලැබීමට නියමිත බවයි.

මුදල් අමාත්‍යාංශය සතුව පැවති ශ්‍රී ලංකා මහ බැංකුව සිය යටතට ගෙන අගමැතිවරයා තම ගජමිතුරෙකු එහි අධිපතිවරයා බවට පත් කරන ලද්දේ මහ බැංකු මගඩිය සිදු කිරීම සදහාම වන නිසා මහ බැංකු බැදුම්කර මගඩියට සෘජුවම වගකිව යුතු අගමැතිවරයාව වහාම නීති හමුවට පැමිණ විය යුතු බව දූෂණ විරෝධී පෙරමුණේ සභාපති උලපනේ සුමංගල හිමියන් සඳහන් කරයි.

එසේම බැදුම්කර මගඩියේ සියලු වැරදි රවී කරුණානායක මන්ත්‍රීවරයා මත පැටවීමට රජය උත්සහ දරමින් සිටින බවක්ද පෙනීයන බව සඳහන් කල සභාපති හිමිනම අර්ජුන් මහේන්ද්‍රන් අත්අඩංගුවට ගැනීමට තබා ඔහු සිටින ස්ථානයවත් සොයා ගැනීමට නොහැකිවීම ගැන මෙරට නීතිය ක්‍රියාත්මක කරන ආයතන ලැජ්ජා විය යුතු බවද සඳහන් කළේය.

අගමැතිට හොරා කියන්න ඒකාබද්ධ විපක්ෂයට අයිතියක් නෑ

තවද ඒකාබද්ධ විපක්ෂයේ සිටින පල් හොරුන්ට බැදුම්කර මගඩිය ගැන කතා කිරීමට සදාචාරාත්මක අයිතියක් නොමැති බවත්, කෝටි ගණන් හොරා කන ලද බවට සිය බිරිද විසින්ම ඔප්පු කරන ලද මහින්දානන්ද අලුත්ගමගේ රනිල් වික්‍ර‍මසිංහට හොරා කියන බවත්, නයා ගැසුවා කියා අධිකරණය මගහැරපු රෝහිත අබේගුණවර්ධන, රනිල් වික්‍ර‍මසිංහට හොරා කීමට කිසිදු අයිතියක් නොමැති බවත් කියා සිටි උලපනේ සුමංගල හිමියන් රාජපක්ෂ හොරු සහ යහපාලන හොරු එක සිරගෙට ගාල් කළ යුතු බවද අවධාරණය කළේය.

යහපාලන කතා වැදිබණ කරන්න එපා

එම අවස්ථාවට එක්වූ දූෂණ විරෝධී උපදේශක නිශාන්ත වර්ණසිංහ සඳහන් කර සිටියේ මෙරට දේශපාලනයට පුර්වාදර්ශයක් සැපයිය යුතු පාර්ලිමේන්තුව තුළ පසුගියදා සිදුවු ගැටුම ඉතාම පිළිකුලින් යුතුව හෙලා දකින බවත් පාර්ලිමේන්තුව තුළ සිදුවන මෙවැනි සිද්ධි යහපාලනය පිලිබද අප කතා කරන සියල්ල වැදි බණ බවට පත් කරන බවත් ය.

පාර්ලිමේන්තුව තුළ පසුගියදා සිදුවු සිද්ධියට කතානායකවරයා වගකිව යුතු බවත් බැදුම්කර වාර්තාව ගැන සාකච්ඡා කිරීමට රැස් කරන ලද පාර්ලිමේන්තුවට අදාළ වාර්තාව ලැබී නැත්නම් කතානායකවරයා කළ යුතුව තිබුනේ පාර්ලිමේන්තුව කල්තැබීම බවත් එය සිදු නොකර බැදුම්කර සිද්ධියට අදාළ වෙනත් ප්‍ර‍කාශ කිරීමට ඉඩ දීමෙන් ඉහත ගැටුම සිදුවු බවද ඔහු පෙන්වා දුන්නේය.

හිටපු හොරුන්ට සමාවදීම නිසා අලුත් හොරු බිහිවුණා

මෙහිදී අදහස් දැක්වූ දූෂණ විරෝධී පෙරමුණේ සංවිධායක තුසිත බාලසූරිය කියා සිටියේ හිටපු හොරුන්ට නඩු නොඅසා සමාව දීම නිසා, නඩු නොඅසා නිදහස් කිරීම නිසා අලුත් හොරු රැසක් බිහිව ඇති බවත් පළාත් පාලන ආයතන වලට සියලුම පක්ෂවලින් හොර, මැර හා ජඩ අපේක්ෂකයන් ඉදිරිපත් වන බවට දූෂණ විරෝධී පෙරමුණට වාර්තා වීමට එය හේතුවක් වී ඇති බවත් ය.

කුඩු - ගණිකා - පාතාල කෙරුමන් මෙවරත් අපේක්ෂකයින්

හම්බන්තොට දිස්ත්‍රික්කයේ අගුණකොළපැලැස්ස ප්‍රාදේශීය සභාවය කුප්‍රකට කුඩු ව්‍යාපාරිකයෙක් මැතිවරණයට ඉදිපත් වන බවත්, කුරුණෑගල දිස්ත්‍රික්කයේ කුරුණෑගල නගර සභාවට ගණිකා ජාවාරමෙහි නිරත වන පුද්ගලයෙකු ඉදිරිපත් වන බවත්, කොළඹ දිස්ත්‍රික්කයේ කඩුවෙල නගර සභාවට කුප්‍ර‍කට පාතාල කල්ලි සාමාජිකයෙක් ඉදිරිපත් වන බවත් ඔහු විසින් හෙළිදරව් කළේය.

ඉදිරි කාලය තුළ තවත් දූෂිත අපේක්ෂකයන් නම් කිරීමට බලාපොරොත්තු වන බව පැවසු දූෂණ විරෝධී පෙරමුණේ සංවිධායක තුසිත බාලසූරිය ජනතාවගෙන් ඉල්ලා සිටියේ ඉදිරි පළාත් පාලන මැතිවරණයෙදී මෙම හොර, මැර සහ ජඩ අපේක්ෂකයන් පරාජයට පත් කරන ලෙසය.

newstube.lk දමිළ භාෂා සංස්කරණ වෙබ් අඩවිය www.tamil.newstube.lk අද(14) දීපවාලි දිනයට සමගාමීව මුදාහැරෙන බව සතුටින් දැනුම්දෙමු.

newstube.lk හී පළවන පුවත් සහ විශේෂාංග, EXCLUSIVE මෙන්ම දමිළ සමාජය මුල්කරගත් කාලීන දේශපාලන ආර්ථික තොරතුරැ රැසක අන්තරගතයෙන් යුතුව වඩාත් විශ්වසනීය වෙබ් මාධ්‍ය හැසිරීමක් පාඨක ඔබට ලබාදීමට තමන් සුදානම් බව දමිළ සංස්කරණයේ සහෝදර මාධ්‍ය කණ්ඩායම දන්වා සිටියි.

එසේම newstube.lk හී ඉංග්‍රීසි සංස්කරණයද මේ වන විට ක්‍රියාත්මක අතර isis.lk හරහා ඔබට ඊට යොමුවිය හැකිය.

දිවයින පුරා සිටින ග්‍රාමසේවක නිලධාරීන්ට 2 in 1 වර්ගයේ ටැබ් පරිගණක ලබාදීමේ විදුලි සංදේශ හා ඩිජිටල් යටිතල පහසුකම් අමාත්‍යංශයේ ව්‍යාපෘතිය සම්බන්ධව බරපතල සැකසංකා මතුව ඇති බව වාර්තා වෙයි.

මේ බව පෙන්වා දෙන ආරංචිමාර්ග සඳහන් කර සිටින්නේ රජයේ සියලු පිළිගත් ප්‍රසම්පාදන නීති-රීති උල්ලංඝනය කරමින් වැඩි ලංසු ඉදිරිපත් කළ සමාගමකට මෙම ටෙන්ඩරය ලබා දී ඇති බවය.

එසේම අඩු ලංසු ඉදිරිපත් කළ සමාගම් සිටියදී වැඩි මිලට ලංසු තැබූ සමාගමට එය ලබාදීම හමුවේ බරපතල අතයට ගනුදෙනුවක් සිදුව ඇති බවත් ඊට අදාළ අමාත්‍යංශයේ ප්‍රබලයින් කිහිපදෙනෙකුම සම්බන්ධ බවද එම ආරංචිමාර්ග සඳහන් කර සිටියි.

වැඩිදුරටත් වාර්තා වන ආකාරයට මෙම ව්‍යාපෘතිය ආරම්භ වන්නේ 2017 වසරේ අයවැය යෝජනා යටතේය. ඊට අනුව දිවයින පුරා සියලු ග්‍රාම නිළධාරීවරුනට 2 in 1 වර්ගය ටැබ් පරිගනක ලබාදීමට යෝජනා වී ඇත.

ඒ අනුව අදාළ පරිගණක සැපයීමේ ටෙන්ඩරය සඳහා ලංසු තබන ලෙස දැනුම්දෙමින් 2017 අගෝස්තු 25 වැනිදා ඩේලි නිවුස් පුවත්පතේ දැන්වීමක් ප්‍රසිද්ධ කිරීමට ද අමාත්‍යංශය කටයුතු කර ඇත.

අමාත්‍යංශ ලේකම් සෙල්ලම් පෙන්වයි

එසේම ටෙන්ඩරය විවෘත කිරීමට නියමිතව තිබී ඇත්තේ 2017 සැප්තැම්බර් 21 වනදා අතර ඊට පළමුව 2017 සැප්තැම්බර් 08 වන දින පූර්ව ලංසු කැඳවීමේ හමුවක්ද පවත්වා ඇත. විදුලි සංදේශ හා ඩිජිටල් යටිතල පහසුකම් අමාත්‍යංශයේ ලේකම් වසන්ත දේශප්‍රිය ඇතුළු අමාත්‍යංශ නිළධාරීන් , ශ්‍රී ලංකා තොරතුරු තාක්ෂණ ආයතනයේ නිළධාරියෙකුද සහ ලංසුකරුවන් රැසක් මේ පූර්ව ලංසු කැඳවීමේ හමුවට සහභාගීව ඇත.

අනතුරුව 2017 වසරේ සැප්තැම්බර් 21 වන දින ග්‍රාම නිළධාරීන් වෙනුවෙන් 2 in 1 වර්ගයේ පරිගනක 7000 ක් ලබාදීම සඳහා වූ ටෙන්ඩරය විවෘත කර ඇති අතර ඒ ලංසුකරුවන් හය දෙනෙකුගේ සහභාගීත්වයෙන් යුතුවය.

දෙවැනි ලංසුවට මුල්තැන

වාර්තා වන ආකාරයට එහිදී සුදුසුකම් ලත් ලංසුකරුවන් අතරින් අවම ලංසු වටිනාකම රුපියල් මිලිනය 683 ක් ලෙස ඉදිරිපත්ව ඇති අතර දෙවැනි ලංසුව මිලියන 731 ක්ය. එහෙදී වැඩිම ලංසු වටිනාකම ඉදිරිපත් කර ඇත්තේ රුපියල් මිලියන 854 ක් ලෙසය.

රජයේ දැනට භාවිතා වන ප්‍රසම්පාදන ක්‍රියාවලියට අනුව නම් මෙවැනි මිලියන ගණනක ගනුදෙනුවකදී තාක්ෂණ ඇගයීම් කමිටුවක් හරහා ලංසුකරුවන්ගේ තාක්ෂණ ඇගයීම් පරික්ෂාවක් සිදුකල යුතු අතර ඒ හරහා එම ලංසුකරුවන් මෙම ප්‍රසම්පාදනය සඳහා සුදුසුද නැද්ද යන්න සනාථ කරගත යුතුව ඇත.

ජනාධිපති අභියාචනා මණ්ඩල වාර්තාව තවමත් නෑ

නමුත් මෙහිදී එවැන්නක් සිදුවී නොමැති බව වාර්තා වන අතර ඒ වෙනුවට සිදුව ඇත්තේ ලංසු ඉදිරිපත් කර දින 14 ක් ඇතුළත අමාත්‍යංශය ලේකම්වරයා විසින් මිලියන 731 ක ලංසුවක් ඉදිරිපත් කළ V S Information Systems ආයතනයට මෙම ටෙන්ඩරය ලබාදීමය. ඒ බව ලංසුකරුවන් සියලු දෙනා වෙත දන්වා යවන්නටද අමාත්‍යංශ ලේකම්වරයා කටයුතු කර ඇති බවද වාර්තා වන අතර අදාළ තීරණය සම්බන්ධව විරෝධයක් ඇත්නම් එය ජනාධිපති අභියාචනා මණ්ඩලය වෙත ඉදිරිපත් කරන ලෙසද එහිදී දැනුම්දී ඇත.

ඒ අනුව යමින් එක් ලංසුකරුවකු මේ තීරණය සම්බන්ධව විරෝධය පළකර ජනාධිපති අභියාචනා මණඩලයට පැමිණිල්ලක් ඉදිරිපත් කර ඇති අතර ඊට අදාලව 2017 ඔක්තෝබර් 27 වන දින ත්‍රිපුද්ගල කමිටුවක් මගින් විමර්ශනයක්ද සිදුකර ඇත.

මෙම විමර්ශනය සඳහා අමාත්‍යංශ ලේකම් වසන්ත දේශප්‍රිය, තාක්ෂණ කමිටුව නියෝජනය කළ නිළධාරීන් දෙදෙනෙකු සහ විරෝධතාවය ඉදිරිපත් කළ සමාගම සහභාගි වී ඇති නමුත් මේ වන තෙක් එම විමර්ශනයට කුමක් සිදුවීද යන්න වාර්තාවී නොමැත.

මේ හේතුවෙන් අදාළ ව්‍යාපෘතියද අතරමග නතර වී ඇති බවක් පෙනෙන්නට ඇති අතර ටෙන්ඩර් මණ්ඩලය සහ තාක්ෂණික කමිටුව නිවැරදිව කටයුත කළේ නම් මේ වනවිට අදාල ටැබ් පරිගණක ග්‍රාම නිළධාරීවරුන්ගේ අතට පත්විය යුතුව තිබිණ.

ලේකම් වසන්ත, මේ ෆොටෝ බොරුද

කෙසේ වුවත් ටෙන්ඩර් මණ්ඩලය සහ තාක්ෂණ කමිටවු නියෝජනය කළ නිළධාරීන් ටෙන්ඩරය ලබාදුන් සමාගම සමග සමීප හිතවත්කමක් ඇති බවට සාක්ෂි ලැබී ඇති අතර පහත ඡායාරූපයේ, විදුලි සංදේශ සහ ඩිජිටල් යටිතල පහසුකම් අමාත්‍යංශයේ ලේකම්වරයාගේ කරට අත දමාගෙන සිටින්නේ V S Information Systems ආයතනයට පරිගනක සැපයුම් සිදුකරන EZY නමැති සමාගමේ සේවය කරන කසුන් වර්ණකුලසූරිය නමැත්තාය.

එසේම ICT අයතනය ද EZY සමාගම හා සමීප සබඳතා පවත්වන අතර පහත ඡායාරූප එම ආයතනවල සේවය කරන්නන් ඇමරිකාවේ ලොස් ඇන්ජලීස් නුවරදී ලබාගත් ඡායාරූපද අප වෙත ලැබී ඇත.

අඩු ලංසු ඉදිරිපත් කළ ආයතන තිබියදී පෞද්ගලික හිතවත්කම් මත හෝ අල්ලස් මත හෝ රාජ්‍ය මුල්‍ය සමඟ පිස්සු නටන්නට රජයේ නිළධාරියෙකුට තබා කිසිවෙකුටවත් අයිතියක් නැත.

එසේම මේ ගැන සොයාබලා කඩිනමින් නිවැරදි ක්‍රියාමාර්ග විදුලි සංදේශ හා ඩිජිටල් යටිතල පහසුකම් අමාත්‍ය හරීන් ප්‍රනාන්දු කටයුතු නොකළහොත් ඔහුට අත්වන ඉරණම අලුතෙන් ලිවිය යුතු නැති අතර එය සේරටම වඩා හොඳින් හරීන් ඇමැති දන්නා බව අපගේ විශ්වාසයද වෙයි.

ශ්‍රී ලංකන් ගුවන් සේවයේ සහ මිහින් ලංකා ගුවන් සේවයේ සිදුවූ වංචා සහ දුෂණ සොයා බැලීමේ ජනාධිපති කොමිසම ලබන සතිය වන විට පත් කිරීමට සියළු කටයුතු සුදානම් කර ඇතැයි ජනාධිපති මෛත්‍රීපාල සිරිසේන සඳහන් කරයි.

ජනාධිපතිවරයා මේ බව සඳහන් කර ඇත්තේ පළාත් පාලනා මැතිවරණය වෙනුවෙන් එක්සත් ජනතා නිදහස් සන්ධානය විසින් දඹුල්ලේ සංවිධානය කර තිබු ජන රැළියක් අමතමින්ය.

කෙසේ වුවත් මේ සම්බන්ධව අප කළ සොයා බැලීමකදී දැනගන්නට ලැබුණේ ජනාධිපතිවරයාගේ මෙම තීන්දුව සම්බන්ධව ශ්‍රී ලංකා නිදහස් පක්ෂයේ ජේෂ්ට සාමාජිකයන් කිහිපදෙනෙකුම එකඟතාවයක් දක්වා නොමැති බවය.

වාර්තා වන ආකාරයට ශ්‍රී ලන්කන් ගුවන් සේවය සහ මිහින් ලංකා ගුවන්සේවයේ සිදුවූ බව කියවෙන වංචා සහ දුෂණ සම්බන්ධව ශිරන්ති රාජපක්ෂ මහත්මිය ඇතුළු රාජපක්ෂ පවුලේ ඥාතීන් රැසකගේ නම් සඳහන් වන බැවින් එය පක්ෂය සමඟි කිරීමේ උත්සාහයට බලපෑමක් කරනු ඇති බවද ඔවුන්ගේ අදහස වී ඇත.

ශ්‍රී ලංකන් ගුවන් සේවයේ සහ මිහින් ලංකා ගුවන් සේවයේ සිදුවූ වංචා සහ දුෂණ සොයා බැලීමේ ජනාධිපති කොමිසම පත්කිරීමේ මේ සුදානම සම්බන්ධව newstube.lk වෙබ් අඩවිය මීට පෙරද වාර්තා කළ අතර පසුගිය පුවත් සඳහා පහත සබැඳි වෙත යොමුවන්න.

මෛත්‍රීගේ නත්තල් තෑග්ගට සතුට පළවේ !මෛත්‍රීගේ නත්තල් තෑග්ගට සතුට පළවේ !

ශිරන්ති තිගැස්සේ : ජනාධිපතිට පණිවිඩ පිට පණිවිඩ එවයි !

 එජාපයේ ඉල්ලීම මත රාජපක්ෂලා දඬුකඳේ ගැසීමට ජනපති සැරසේ !

ශ්‍රී ලංකන් එයාර් අස්සේ - මිලියනේ වැටුප් ගැස්සේ

https://newstube.lk/news/297-srilankan-airlines

ගතානුගතික සමාජයක ලිංගිකත්වය මත පදනම් වූ දැඩි නීති ලිහිල් කිරීමේ එක් අදියරක් වශයෙන් සිය රටේ කාන්තාවන්ට පාපන්දු තරගයක් නැරඹීම සඳහා සෞදි අරාබිය පළමු වරට අවසර ලබා දී තිබේ.

ජෙඩා නුවර පිහිටි ක්‍රීඩාංගනය සිය පවුලේ සාමාජිකයන් සමග පැමිණ සිටි පාපන්දු රසිකාවියන්ගෙන් පිරී පැවතිණි.

සිකුරාදා (ජනවාරි 12) පැවති තරගය අතරතුර කාන්තාවන් වෙන් කර තැබුණ ද ඔවුන්ගේ සහභාගීත්වය සෞදි අරාබියේ සුවිශේෂී අවස්ථාවක් සනිටුහන් කරනු ඇත.

සෞදි අරාබිය නවීකරණය කිරීමේ අරමුණින් සමාජීය ප්‍රතිසංස්කරණ ගණනාවක් ක්‍රියාත්මක වෙමින් පවතී.

පාපන්දු තරගයට පෙරාතුව සිකුරාදා උදෑසන තවත් වෙනසක් පිළිබඳ සුළු සංඥාවක් ලැබිණි. සෞදි අරාබියේ කාන්තා පාරිභෝගිකයන් සඳහාම වෙන් වූ මෝටර් රථ ප්‍රදර්ශනාගාරයක් විවෘත කෙරිණි.

ප්‍රදර්ශනාගාරය තුළ වූ මෝටර් රථ කාන්තා පාරිභෝගිකයන්ගේ පරීක්ෂාවට ලක් වූ අතර කාන්තා රියදුරු තහනම ඉවත් වූ වහාම ඔවුන්ට එම මෝටර් රථ පරිහරණය කිරීම සඳහා අවසර හිමිවනු ඇත.

ජෙඩා ක්‍රීඩාංගනය තුළ පාපන්දු රසිකාවියන් සහ ඔවුන්ගේ පවුලේ සාමාජිකයන් පිළිගැනීමට සහ ඔවුන් වෙත අසුන් පෙන්වීම සඳහා කාන්තාවන් සේවයේ යොදවා තිබිණි.

එම සේවිකාවන් සහ පාපන්දු රසිකාවියන් යන දෙපිරිසම කළු පැහැති සම්ප්‍රදායික අබයා ඇඳුමෙන් සැරසී සිටියහ.

• සෞදි අරාබිය සහ එක්සත් අරාබි එමීරය පළමු වරට බදු හඳුන්වා දෙත
• සෞදි අරාබිය: ශ්‍රී ලාංකික රියදුරන්ගේ රැකියා අනතුරේද?
• ජෙඩා නගරයේ වෙසෙන පාපන්දු රසිකාවියක් වන තිස් දෙහැවිරිදි ලම්යා ඛලෙඩ් නසර් ඒඑෆ්පී පුවත් සේවය වෙත අදහස් දක්වමින් කියා සිටියේ තමන් ආඩම්බරයට පත් වන බවත් තරගය නැරඹීමේ බලාපොරොත්තුවෙන් පසුවන බවත්ය.

"අප සමෘධිමත් අනාගතයක් කරා යමින් සිටින බව මෙමගින් සනාථ කෙරෙනවා. මේ සුවිශාල වෙනස සියැසින් දැක ගන්න ලැබීම ගැන මම ආඩම්බර වෙනවා" යනුවෙන් ඇය වැඩිදුරටත් සඳහන් කළාය.

"බොහෝ රටවල් විසින් ගනු ලැබ ඇති ශිෂ්ටසම්පන්න ක්‍රියාමාර්ග සමග එක් වීමට සෞදිය පියවර ගැනීම ගැන මම ආඩම්බරයටත් දැඩි සතුටටත් පත්වෙනවා," යනුවෙන් ජෙඩා නගරයේ වෙසෙන තවත් තරුණියක් වන රුවයිඩා අලි ක්වාසම් කියා සිටියාය.

 සෙනසුරාදා පැවැත්වෙන දෙවන පාපන්දු තරගය සහ බ්‍රහස්පතින්දා පැවැත්වීමට නියමිත තෙවන පාපන්දු තරගය නැරඹීම සඳහාත් කාන්තාවන්ට අවසර ලබා දෙන බව සෞදි ආණ්ඩුව පසුගිය සතියේ නිවේදනය කළේය.

සෞදි අරාබියේ රජ පවුල සහ ආගමික ආයතන සුන්නි ඉස්ලාම් දහමට අයත් දැඩි වත්පිළිවෙත් හා තදින් කටයුතු කරති.

• සෞදි අරාබිය තුළ හැසිරීම සහ ඇඳුම් පැළඳුම් සම්බන්ධයෙන් අනුගමනය කරනු ලබන්නේ දැඩි පිළිවෙතකි.
• සෞදි අරාබිය තුළ පවතින නීතියට අනුව ගමන් බිමන් සහ රැකියාව බලා යාමේදී කාන්තාවන් සිය පවුලේ පුරුෂ සාමාජිකයෙකු එක්ව යා යුතුය.

සිය පවුලේ පිරිමි සාමාජිකයන් නොමැතිව සෞදි කාන්තාවන්ට කළ නොහැකි තව බොහෝ දේ ඇත:

• විදේශ ගමන් බලපත්‍රයක් සඳහා අයදුම් කිරීම
• විදෙස් ගතවීම
• විවාහ වීම
• බැංකු ගිණුමක් ආරම්භ කිරීම
• යම් ව්‍යාපාර ආරම්භ කිරීම
• බන්ධනාගාරයෙන් නිදහස් වීම
• වෛද්‍ය ප්‍රතිකාර ලැබීම

මේ අතර සෞදි අරාබියේ නිල නොලත් නායකයා ලෙස කටයුතු කරන ඔටුන්න හිමි මොහම්මඩ් බින් සල්මාන් කුමරු පවසන්නේ ප්‍රතිසංස්කරණ සිදු කරමින් රට නවීකරණයකට ලක් කරන බවය.

කාන්තාවන්ට රිය පැදවීම සඳහා පනවා තිබු තහනම ඉවත් කිරීමට ඔහු මෑතක දී කටයුතු කළේය.

පළාත් පාලන මැතිවරණය සඳහා ඉදිරිපත්වී ඇති අපේක්ෂකයින් අතුරින් 80 දෙනෙකු ඒ සඳහා නොසුදුසු පුද්ගලයින් බව මැතිවරණ කොමිසම සඳහන් කරයි.

මැතිවරණ කොමිසමේ ආරංචිමාර්ග සඳහන් කරන ආකාරයට වයස අවුරුදු 18ට අඩුවීම, රජයේ විධිවිධාන සහ ඉල්ලා අස්වීමේ ක්‍රියාපටිපාටිය අනුගමනය නොකළ සහ විවිධ අපරාධ ක්‍රියා වලට වැරදිකරුවන් වූ පුද්ගලයින් ඒ අතර සිටියි.

මේ වන විට එම පුද්ගලයන් මැතිවරණයෙන් ජයග්‍රහණය කළත් ඔවුන්ට එම මන්ත්‍රීධුර ලබානොදෙන ලෙස මැතිවරණ කොමිසම අදාළ පක්ෂවල ලේකම්වරුන්ගෙන් ඉල්ලා ඇති බවද එම ආරංචිමාර්ග සඳහන් කර සිටියි.