නාගරික පොදු ප්‍රවාහන සේවා ආයතනයක් ලෙස Lanka Metro Transit (Pvt) Ltd ඊයේ (08) සිට සිය පරිපාලන කටයුතු ආරම්භ කළේය.

ඒ අනුව, ලබන වසරේ මැද කාර්තුවේ සිට එහි ප්‍රවාහන මෙහෙයුම් කටයුතු ආරම්භ කිරීමට සියලු කටයුතු සූදානම් බව ප්‍රවාහන අමාත්‍යංශය සඳහන් කරයි.

ශ්‍රී ලංකාවේ නාගරික පොදු ප්‍රවාහන පද්ධතිය ශක්තිමත් කිරීම සඳහා ආරම්භ කර ඇති මෙම පොදු ප්‍රවාහන සේවය පිළිබඳ පිළිබඳ අවධාරණය කරමින් ප්‍රවාහන, මහාමාර්ග, වරාය සහ සිවිල් ගුවන්සේවා අමාත්‍ය, බිමල් රත්නායක  සඳහන් කළේ,

“පොදු මගී ප්‍රවාහනය සුවපහසු කිරීමට නව රජයේ අයවැයෙන් රුපියල් මිලියන 3000 ක් වෙන්කරලා තිබෙනවා. ඒ යටතේ බස් මිලදී ගැනීම සඳහා මේ වනවිට ටෙන්ඩර් කැඳවලා තිබෙනවා. අපි සතුටු වෙනවා, මෙට්‍රො බස් සමාගම අලුතෙන් ආරම්භ කරද්දි, ලබාගන්නා බස්, අධ්‍යක්ෂ මණ්ඩලය, සේවක පිරිස් වගේම මගී ජනතාවත් නව අදහස් වලින් යුත් පිරිසක් වේවි. ලබන වසරේ මැද වනවිට මේ නව බස් රථ ජනතා සේවයට කැපකිරීමට හැකිවෙතැයි බලාපොරොත්තු වෙනවා. 

පිරිසිදු, සාධාරණ, මෙන්ම සුවපහසු මගී ප්‍රවාහන සේවයක් වෙනුවෙන් ජනතාවට විශාල බලාපොරොත්තුවක් මෙන්ම අවශ්‍යතාවක් තිබෙනවා. ඒ ජනතා සිහිනය ඉටු කරන්න තමයි අපි මේ සැරසෙන්නේ. ප්‍රථමයෙන් බස්නාහිර පළාත තුළ ක්‍රියාත්මක කෙරෙන මේ මෙට්‍රෝ බස් සේවාව, සමස්ත රට තුළම ව්‍යාප්ත වේවි. ඕනෑම දෙයක් ආරම්භ කිරීමේදී විශාල කැපකිරීම් සිදු කිරීමට සිදුවෙනවා. නමුත් එහි ප්‍රතිඵල ඉතාමත් ලස්සනයි. පවුලට ලැබුණ අලුත් දරුවෙක් රැක බලාගන්නා ආකාරයෙන් සෑම කෙනෙක්ම මේ නව සේවාව ආරක්ෂා කරගනීවි යැයි බලාපොරොත්තු වෙන” බවය.

 

නියමු ව්‍යාපෘතියක් වශයෙන් බස්නාහිර පළාත තුළ ප්‍රථමයෙන් ක්‍රියාත්මක කෙරෙන මේ සඳහා බස් රථ 100ක් ලබාගැනීමට මේ වනවිට ටෙන්ඩර් කැඳවා තිබේ. තවද ඒ සඳහා 2025 අයවැයෙන් රුපියල් මිලියන 300ක් පමණ වෙන්කර තිබෙන අතර, 2026 අයවැයෙන් තවත් රුපියල් මිලියන 200ක් වෙන්කිරීමට බලාපොරාත්තුවන බව ප්‍රවාහන මහාමාර්ග, වරාය සහ සිවිල් ගුවන් සේවා අමාත්‍යාංශය සඳහන් කරයි.

චීන මෝටර් රථ නිෂ්පාදන සමාගමක් වන BYD සමාගම එක්සත් රාජධානිය චීනයෙන් පිටත විශාලතම වෙළඳපොළ බවට පත්ව එක්සත් රාජධානියේ සිය නිෂ්පාදන අලෙවිය පෙර වසරේ සැප්තැම්බර් මාසයට සාපේක්ෂව මේ වසරේ සැප්තැම්බර් මාසයේදී 880% කින් ඉහළ නංවාගෙන තිබේ.

සමාගම පවසන්නේ පසුගිය මාසයේ එක්සත් රාජධානියේ මෝටර් රථ 11,271 ක් අලෙවි කළ බවත්, එහි Seal U ක්‍රීඩා උපයෝගිතා වාහනයේ (SUV) ප්ලග්-ඉන් දෙමුහුන් අනුවාදය එම විකුණුම්වලින් බහුතරයක් සඳහා දායක වූ බවත්ය.

යුරෝපීය සංගමය සහ ඇමරිකා එක්සත් ජනපදය වැනි අනෙකුත් ප්‍රධාන වෙළඳපොළවල් මෙන් නොව, චීන EV සඳහා එංගලන්තයේ තීරුබදු පනවා නොමැති බැවින්, BYD වැනි සමාගම් සඳහා එක්සත් රාජධානියේ ප්‍රධාන තරගකරුවෙක් බවට පත්ව තිබේ.

BYD, සැප්තැම්බර් මාසයේදී එක්සත් රාජධානියේ වෙළඳපොළේ එහි කොටස 3.6% දක්වා ඉහළ නංවා ගැනීමටද සමත්ව තිබේ.

ඉදිරි මාසවලදී සමාගම තවත් නව දෙමුහුන් සහ විදුලි මෝටර් රථ දියත් කරනු ඇති බව BYD හි එංගලන්ත කළමනාකරු බෝනෝ ගී පැවසීය. සිය 100 වන සිල්ලර වෙළඳසැල විවෘත කිරීමත් සමඟ බ්‍රිතාන්‍යයේ සන්නාමයේ අනාගතය "අතිශයින්ම උද්යෝගිමත්" බව ඔහු පැවසීය.

(ada.lk)

ශ්‍රී ලංකා මහ බැංකුව සතු නිල සංචිත වත්කම් ප්‍රමාණය අගෝස්තු මාසයට සාපේක්ෂව සැප්තැම්බර් මාසයේ දී 1.1%කින් ඉහළ ගොස් තිබේ.

අගෝස්තු මාසයේ දී ශ්‍රී ලංකාවේ නිල සංචිත වත්කම් අමෙරිකානු ඩොලර් බිලියන 6.17ක් ලෙස දැක්වුණු අතර එය සැප්තැම්බර් මාසයේ දී අමෙරිකානු ඩොලර් බිලියන 6.24 දක්වා ඉහළ ගොස් ඇත.

ශ්‍රී ලංකාවේ ආර්ථික අරමුණු සාක්ෂාත් කර ගැනීම සඳහා අත්‍යවශ්‍ය වන විදේශීය සෘජු ආයෝජන (FDI) ප්‍රමාණය අපේක්ෂිත මට්ටමට වඩා බෙහෙවින් පහළ අගයක පවතින බව ලෝක බැංකුව පෙන්වා දෙයි.

මේ පිළිබඳව ඔවුන් අනතුරු අඟවන්නේ, ආර්ථික ඉලක්ක සපුරා ගැනීම වෙනුවෙන් කඩිනම් ව්‍යුහාත්මක ප්‍රතිසංස්කරණ මාලාවක් ක්‍රියාවට නැංවීම අනිවාර්ය බව අවධාරණය කරමිනි.

ලෝක බැංකුව පවසන පරිදි, රටේ දළ දේශීය නිෂ්පාදිතයෙන් (GDP) සියයට 1.5ක මට්ටමක FDI තිබිය යුතු වුවත්, දැනට ළඟා කරගෙන ඇත්තේ සියයට 0.5ක් තරම් ඉතා සුළු අගයකි. රටේ සංවර්ධන අභිලාෂයන් වෙනුවෙන් මෙම අගය කිසිසේත්ම ප්‍රමාණවත් නොවන බව ඔවුන්ගේ මතයයි.

මීට පෙර පවා FDI ප්‍රවාහය දළ දේශීය නිෂ්පාදිතයෙන් සියයට 1ක් පමණ වුවද, එය තවදුරටත් පිරිහීමකට ලක්ව ඇති බව ලෝක බැංකු නියෝජිතයෝ පෙන්වා දෙති. තවද, වියට්නාමය සහ මැලේසියාව වැනි සම කලාපීය රටවල් GDP යෙන් සියයට 3ක් වැනි ඉහළ FDI අගයන් වාර්තා කරන බවද ඔවුහු සඳහන් කළහ.

අද දින මෙරට තත්ත්වය යාවත්කාලීන කිරීමේ මාධ්‍ය හමුවකදී අදහස් දැක්වූ මාලදිවයින සහ ශ්‍රී ලංකාව භාර රිචඩ් වෝකර් මහතා ප්‍රකාශ කළේ, 2030 වන විට ඇමරිකානු ඩොලර් බිලියන 36ක FDI ප්‍රමාණයක් ආකර්ෂණය කර ගැනීමේ රජයේ ඉලක්කය කරා ලඟා වීමට නම් ශ්‍රී ලංකාවට විශාල වෙනස්කම් ගණනාවක් සිදු කිරීමට සිදුවන බවයි.

ඔහු විශේෂයෙන්ම අවධානය යොමු කළ පරිදි, ආයෝජකයින් ආකර්ෂණය කර ගැනීමේදී ඇති ප්‍රධානතම බාධාව වන්නේ ඉඩම් සඳහා ප්‍රවේශවීමේ දුෂ්කරතාවයයි. මෙරට ඉඩම්වලින් 80%ක්ම රජය සතු වීමත්, ඒවා නිලධාරිවාදය සහ අමාත්‍යාංශ පාලනය යටතේ පැවතීමත් නිසා විදේශීය ආයෝජකයෝ අධෛර්යමත් වෙති. මෙම තත්ත්වය කෘෂිකාර්මික අංශයේ ආයෝජන සඳහා විශේෂයෙන්ම අහිතකර ලෙස බලපා ඇත.

මීට අමතරව, දශක හයකටත් වඩා පැරණි කම්කරු නීති හේතුවෙන් ව්‍යාපාරික කටයුතු වල නම්‍යශීලීභාවය සීමා වීම තවත් ගැටලුවකි. මෙම නීති මගින් සමහර ක්ෂේත්‍රවල කාන්තාවන් සඳහා වන රැකියා අවස්ථා සීමා කිරීමද ආර්ථික වර්ධනයට බාධාවක් බව වෝකර් මහතා පෙන්වා දුන්නේය.

වෝකර් මහතා දැඩිව අනතුරු අඟවා සිටියේ, මෙම ව්‍යුහාත්මක ගැටලු නොවිසඳන්නේ නම්, විදේශ ආයෝජන සඳහා ගෝලීය වශයෙන් තරඟ කිරීමට ශ්‍රී ලංකාවට නොහැකි වනු ඇති බවයි. එබැවින්, FDI ප්‍රවාහය වැඩි කිරීමට සහ ආර්ථික ඉලක්ක සපුරා ගැනීමට නම්, ඉඩම් පාලනය වැඩිදියුණු කිරීම, කම්කරු රෙගුලාසි නවීකරණය කිරීම සහ වඩාත් ආයෝජක හිතකාමී ව්‍යාපාරික පරිසරයක් නිර්මාණය කිරීම අතිශය තීරණාත්මක පියවරයන් බව ලෝක බැංකුව අවධාරණය කර සිටී.

PRESS RELEASEOCTOBER 7, 2025
Sri Lanka’s Economic Recovery Remains Incomplete as Key Challenges Remain

ශ්‍රී ලංකාවේ ප්‍රමුඛතම හෝටලයක් වන කොළඹ හිල්ටන් හෝටලයේ අමුත්තන්ගේ කාමර ප්‍රතිසංස්කරණය කිරීමේ වැඩසටහන සාර්ථකව අවසන් කළ බව පසුගිය දා එම ව්‍යාපෘතිය මෙහෙයවූ හොටෙල් ඩිවෙලොපර්ස් (ලංකා) ලිමිටඩ් විසින් සඳහන් කරන ලදී. මෙම ව්‍යාපෘතිය හෝටලයේ අඛණ්ඩ පරිවර්තනීය ගමන කෙරෙහි බෙහෙවින් ඉවහල් වන වැදගත් සන්ධිස්ථානයක් වනු ඇත.

ආගන්තුක සත්කාර ක්ෂේත්‍රය තුළ පවතින ඉහළ තරඟකාරීත්වය හමුවේ මෙම හෝටලයේ වටිනාකම තවදුරටත් ඉහළ නැංවීමේ අරමුණින් මෙම ව්‍යාපෘතිය දියත් කෙරිණි.ශ්‍රි ලංකාවේ සංචාරක කර්මාන්තයේ ධනාත්මක ගමන් මග සහ එහි සුබවාදී දැක්ම කෙරෙහි ද මෙමඟින් මනා දායකත්වයක් සපයයි.

ශ්‍රී ලංකාවේ හෝටල් කර්මාන්තය තුළ වසර 35කට අධික අත්දැකීමක් සහ ඉතිහාසයක් ඇති කොළඹ හිල්ටන් හෝටලය නවීන මෙන්ම සුඛෝපභෝගී පහසුකම් රැසකින් සමන්විත අතර එහි අමුත්තන්ගේ කාමර සහ සූට්ස් 368ක් තිබේ.එපමණක් නොව වැඩිදියුණු කළ පොදු පහසුකම් රාශියක් මෙන්ම කාමර, අති නවීන භෝජනාගාර , අවන්හල් , රැස්වීම් පහසුකම් අන්තර්ගත වේ.

මේ සියලුම පහසුකම් ඔස්සේ හිල්ටන් හෝටල සන්නාමයේ ගෝලීය ප්‍රමිතීන්ට අනුව සේවාවන් පිරිනමනු ලැබේ.

2025 වසරේදී සමාගමේ ලාභදායිතාවය සහ කාර්යක්ෂමතාවය වර්ධනය කිරීමේ අරමුණින් උපායමාර්ගික සැලසුම් කිහිපයක්ම ක්‍රියාත්මක විය. සාර්ථක ණය ප්‍රතිමූල්‍යකරණය ද මීට ඇතුළත් වූ අතර එමඟින් ණය ගැනීමේ පිරිවැය සැලකිය යුතු මට්ටමින් අවම කරමින් මූල්‍ය නම්‍යශිලීත්වය ඉහළ නැංවීය.සමාගමේ ලාභදායිතාවය මෙන්ම දිගු කාලීන මූල්‍ය තිරසාරභාවය වර්ධනය කෙරෙහි එය ඉතා උපකාරී වේ.

මීට අමතරව මෙහෙයුම් කාර්යක්ෂමතාවය සහ තිරසාර ලාභදායිතාවය වැඩි දියුණු කිරීම වෙනුවෙන් පිරිවැය ප්‍රශස්ත කිරීමට ද සමාගම කටයුතු කර ඇත. මේ හරහා වැටුප් ලබාදීමේ ක්‍රියාවලිය වඩාත් විධිමත් කිරීම මෙන්ම මෙහෙයුම් සහ පරිපාලන කටයුතු සඳහා වැයවන පිරිවැය අවම කරමින් පිරිවැය තත්ත්වයන් වඩාත් යහපත් පරිදි කළමනාකරණය කිරීම පිළිබඳ අවධානය යොමු කර ඇත.

තරඟකාරී වෙළෙඳපල තුළ හෝටලයේ ආදායම් තත්ත්වය වර්ධනය කරගනිමින් එහි මෙහෙයුම් කටයුතු වඩාත් තරඟකාරී ලෙස පවත්වාගෙන යාම සඳහා අවශ්‍ය සම්පත් වෙන් කිරීමට සමාගම ක්‍රියා කර තිබේ. ඒ තුළින් කොළඹ හිල්ටන් හෝටලයේ වාණිජ සහ අලෙවිකරන හැකියාවන් තවදුරටත් ඉහළ නැංවේ.

සමාගමේ ලාභදායිතාවය වැඩි දියුණු කිරීමේ අභිලාෂයෙන් වසර 08කට පසුව කොළඹ හිල්ටන් හෝටලය විසින් සතුටුදායක ජයග්‍රහණයක් ලබාගැනීමට කැපවෙමින් සිටියි. එමඟින් සමාගමේ උපායමාර්ගික ව්‍යාපෘති සහ තිරසාර මෙහෙයුම්වල විශිෂ්ටත්වය මැනවින් පිළිඹිබු වේ.

මෑතකාලීනව ප්‍රමුඛ පෙළේ තරු 5 හෝටල් කිහිපයක්ම මෙරට වෙළෙඳපල වෙත පැමිණීමත් සමඟ හෝටල් කර්මාන්ත ක්ෂේත්‍රය වෙත නව හෝටල් කාමර දහසකට අධික සංඛ්‍යාවක් අලුතින් එක් වී ඇත.එවැනි තරඟකාරී පසුබිමක් තුළ කොළඹ හිල්ටන් හෝටලය විසින් සාර්ථකව දියත් කළ මෙම සුවිශේෂී සැලසුම් බෙහෙවින් වැදගත් වේ.

හිල්ටන් හෝටලය විසින් 2026 වසරේදී ද සිය ආදායම් තත්ත්වය වැඩි දියුණු කිරීම සඳහා තවත් උපායමාර්ගික සැලසුම් රැසක් ක්‍රියාත්මක කිරීමට බලාපොරොත්තු වේ. ඒ අතර බොහෝ කලක සිට ඉදිකිරීමට සැලසුම් කරන ලද 'ශ්‍රී ලන්කන් කරී ලීෆ් රෙස්ටුරන්ට්' සහ හෝටලයේ ප්‍රධානතම 'ග්‍රෑන්ඩ් බෝල්රූම් ශාලාව' නවීකරණය කිරීම ප්‍රමුඛ වේ. හෝටලයේ ආහාර පාන සඳහා ලැබෙන ආදායම සැලකිය යුතු මට්ටමින් ඉහළ නංවමින් ලාභදායීතාවය වර්ධනය කිරීම මෙහි අරමුණයි.

ග්‍රෑන්ඩ් බෝල්රූම් ශාලාව

කොළඹ හිල්ටන් හෝටලය ව්‍යාපාරයේ ලාභදායිතාවය ඉහළ නැංවීමේ අරමුණින් හිල්ටන් මැනේජ්මන්ට් කෝර්පරේෂන් සමඟ ඇති ගිවිසුම පිළිබඳ නැවත සාකච්ඡා කිරීමේ ක්‍රියාවලියක නිරත වී සිටියි.මෙම ව්‍යාපෘති මඟින් සමාගමේ මෙන්ම එහි කොටස්කරුවන්ගේ ද සමස්ත වටිනාකම වර්ධනය කිරීමට බලාපොරොත්තු වේ.

Ada derana.lk

2025 වසරේ මුල් මාස අට තුළ ශ්‍රී ලංකාවේ අපනයන අංශය කැපි පෙනෙන සාධනීය මට්ටමක් සහ ස්ථාවර ප්‍රගතියක් පෙන්නුම් කරන බව අපනයන සංවර්ධන මණ්ඩලය පවසයි.

එසේම සමස්ත අපනයන ආදායම ඇමරිකානු ඩොලර් මිලියන 11554.32 ක් බවත් එය 2024 එම කාලයට සාපේක්ෂව 6.61% ක වර්ධනයක් බවත් එම මණ්ඩලය පෙන්වා දෙයි.

2025 අගෝස්තු මාසයේදී වෙළද භාණ්ඩ සහ සේවා යන අංශයන්හි මුළු අපනයන ආදායම ඇමරිකානු ඩොලර් මිලියන 1,607.58කි. මෙය 2024 අගෝස්තු මාසයට සාපේක්ෂව 2.57%ක වාර්ෂික වර්ධනයකි.

ශ්‍රී ලංකාවේ අපනයන අංශයේ ශක්තිය සහ වෙළදපොළ ප්‍රවේශය පුළුල් කිරිමටත්, ගෝලීය තරගකාරිත්වය වැඩි දියුණු කිරීමටත් ගත් උපායමාර්ගික උත්සාහයන්ගේ ධනාත්මක බලපෑම මෙයින් පිළිබිඹු කරයි.

ශ්‍රී ලංකා මහ බැංකුවේ (CBSL) 75 වන සංවත්සරය සැමරීම සඳහා නව රුපියල් 2000 ක සමරු මුදල් නෝට්ටුවක් ඊයේ ජනාධිපති අනුර කුමාර දිසානායක වෙත පිළිගැන්වීය.

මෙම සමරු මුදල් නෝට්ටුව අද උදෑසන ජනාධිපති ලේකම් කාර්යාලයේදී මහ බැංකු අධිපති ආචාර්ය නන්දලාල් වීරසිංහ  විසින් ජනාධිපතිවරයා වෙත භාර දෙන ලදී.

මෙය ශ්‍රී ලංකා මහ බැංකුව විසින් නිකුත් කරන ලද පස්වන සමරු මුදල් නෝට්ටුවයි.

ජාතික සංවර්ධනයේ පදනම ලෙස ආර්ථික ස්ථාවරත්වය ශක්තිමත් කිරීම සඳහා බැංකුවේ නොසැලෙන කැපවීම පිළිබිඹු කරමින්, "සමෘද්ධිය සඳහා ස්ථාවරත්වය" යන සංවත්සර තේමාව යටතේ මෙම මුදල් නෝට්ටුව නිකුත් කර ඇත.

මෙම අවස්ථාවේදී, ජනාධිපතිවරයා මහ බැංකුවේ නිලධාරීන් සමඟ සුහද සාකච්ඡාවල ද නිරත විය.

මෙම අවස්ථාවට ජනාධිපති ලේකම් ආචාර්ය නන්දිකා සනත් කුමානායක, මහ බැංකුවේ ජ්‍යෙෂ්ඨ නියෝජ්‍ය අධිපතිනී කේ.එම්.ඒ.එන්. දවුලගල, සහකාර අධිපති කේ.ජී.පී. සිරිකුමාර සහ මුදල් දෙපාර්තමේන්තුවේ අධිකාරී පී.ඩී.ආර්. දයානන්ද යන සහභාගී වූහ.

හයිලන්ඩ් යෝගට් සහ දියර කිරි මිල අද සිට පහළ දමා තිබේ.

යෝගට් එකක මිල රුපියල් 10 කින් අඩු කර ඇති අතර එහි නව මිල රුපියල් 70 කි.

මිලිලීටර් 450 කල් තබා ගැනීමේ දියර කිරි පැකට්ටුවක් රුපියල් 25 කින් පහළ දමා ඇති අතර එහි නව මිල රුපියල් 200 ක් වෙයි.

මිලිලීටර් 900 කල්තබා ගැනීමේ දියර කිරි පැකට්ටුවක මිල අඩු කර ඇත්තේ, රුපියල් 60 කින් ය.

එහි නව මිල රුපියල් 380 කි.

මිල්කෝ සමාගම පැවසුවේ, මිලිලිටර් 450 දින තුනක දියර කිරි පැකට්ටුවක් රුපියල් 30 කින් පහළ දමා ඇති බවයි.

නව සේවක අර්ථසාධක අරමුදල් කළමනාකරණ පද්ධතියක් නිර්මාණය කිරීම සහ ක්‍රියාත්මක කිරීමට කැබිනට් අනුමැතිය හිමි ඇත. 

ශ්‍රී ලංකාවේ විශාලතම විශ්‍රාම අරමුදල වන සේවක අර්ථ සාධක අරමුදලේ මුළු සාමාජික ගිණුම් සංඛ්‍යාව මේ වන විට මිලියන 21.5 න් පමණ වන අතර, දායක මුදල් ප්‍රේෂණය කරනු ලබන ක්‍රියාකාරී සේවා යෝජකයින් සංඛ්‍යාව 77,000ක් පමණ වෙන බව වාර්තා සදහන් කරයි.

2024 ඔක්තෝබර් මාසය අවසන් වන විට අරමුදලේ මුළු වත්කම් ප්‍රමාණය රුපියල් ට්‍රිලියන 4.2 ක් වන අතර, පසුගිය වසර කිහිපය තුළ එහි වත්කම්වල වාර්ෂික වර්ධනය 9%ට වඩා ඉහළ අගයක් වාර්තා කරමින් අඛණ්ඩ වර්ධනයක් ළඟා කර ගෙන තිබේ.

සේවක අර්ථසාධක අරමුදලේ කටයුතු සුමටව පවත්වා ගෙන යාම සඳහා විශාල ගනුදෙනු ප්‍රමාණයක් සැකසිය හැකි පරිශීලක ගිණුම් සහ දත්ත විශාල ප්‍රමාණයක් උපරිම කාර්යක්ෂමතාවකින් පවත්වාගෙන යාමට තරම් ශක්‍යතාවයකින් යුතු තොරතුරු තාක්ෂණ පද්ධතියක අවශ්‍යතාව හඳුනාගෙන තිබේ.

ඒ අනුව, නව සේවක අර්ථසාධක අරමුදල් කළමනාකරණ පද්ධතියක් නිර්මාණය කිරීම සඳහා ලෝක බැංකු සමූහයේ මූල්‍ය අංශ නවීකරණ ව්‍යාපෘතිය යටතේ 2021 වර්ෂයේදී ව්‍යාපෘතියක් ආරම්භ කර ඇති අතර, ඉන්දියාවේ PricewatertiouseCoopers Private Limitedහි උපදේශකත්වය යටතේ නව කළමනාකරණ පද්ධතියේ සැලසුම් සහ අවශ්‍ය පිරිවිතර සකස් කිරීම අවසන් කර ඇති බව සඳහන් වෙයි.

එම කරුණු සැලකිල්ලට ගනිමින් යෝජිත ව්‍යාපෘතිය ක්‍රියාත්මක කිරීම සඳහා පද්ධති සම්බන්ධකයෙක් (System Integrator) තෝරා ගැනීම සඳහා ප්‍රසපාදන ක්‍රියාවලිය ආරම්භ කිරීම පිණිස මුදල්, ක්‍රම සම්පාදන සහ ආර්ථික සංවර්ධන අමාත්‍ය වශයෙන් ජනාධිපතිවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇත.

එක්සත් ජනපද ඩොලරයේ විකුණුම් මිල රු. 300 න් පහළ මට්ටමට පැමිණ ඇති බව ශ්‍රී ලංකා මහ බැංකුව පවසයි.

ශ්‍රී ලංකා මහ බැංකුවේ දෛනික විනිමය අනුපාතික සටහනට අනුව අද (02) එක්සත් ජනපද ඩොලරයේ ගැනුම් මිල රුපියල් 290.30 ක් සහ විකුණුම් මිල රු. 299.35 ක් ලෙස සටහන්වේ.

ඩොලරයේ විකුණුම් මිල මෙලෙස රු. 300 සීමාවෙන් පහළට පැමිණ ඇත්තේ 2023 ජූනි 08 වන දිනෙන් පසුව පළමු වතාවට වීම විශේෂත්වයකි.

මේ අතර අද දින ඩොලරයේ මධ්‍ය අගය සටහන් වන්නේ රු. 295.62 ක් වශයෙනි.

2024 අප්‍රේල් මාසයේ දී 2.7% ක් ලෙස වාර්තා වූ මෙරට උද්ධමනය 2024 මැයි මාසය සඳහා 1.6% ක් දක්වා අඩු වී ඇති බව ජනලේඛන සහ සංඛ්‍යාලේඛන දෙපාර්තමේන්තුව පවසයි.

එමෙන්ම 2024 අප්‍රේල් මාසයේ දී 3.3% ක් ලෙස වාර්තා වූ ආහාර කාණ්ඩයේ ලක්‍ෂ්‍යමය උද්ධමනය 2024 මැයි මාසයේ දී 0.5% ක් දක්වා අඩු වී ඇති බව ඔවුන් සඳහන් කළේය.

එමෙන්ම, 2024 අප්‍රේල් මාසයේ දී 2.3% ක් වූ ආහාර නොවන කාණ්ඩයේ ලක්‍ෂ්‍යමය උද්ධමනය 2024 මැයි මාසයේ දී 2.4% ක් දක්වා වැඩි වී තිබේ.