Cryptocurrency යනුවෙන් ඉංග්‍රිසි බසින් හැඳින්වෙන පරිගණක ගත මුදල් එසේත් නොමැතිනම් “ක්‍රිප්ටෝ මුදල්” ලෙස හදුන්වාලනු ලබන ඩිජිටල් මුදල් මෑතකාලීනව ශ්‍රී ලාංකික තරුණ ප්‍රජාව අතර අන්තර්ජාලය හරහා මුදල් සෙවීමේ පහසු ක්‍රමයක් ලෙස ප්‍රචලිත වී ඇත.
ශ්‍රී ලංකාව තුළ විවිධ යූ ටියුබ් නාලිකා මගින්, ෆේස්බුක් හා වට්සැප් සමූහයන් මගින් විවිධ වර්ගයේ ක්‍රිප්ටෝ මුදල් වර්ග වෙත මුදල් ආයෝජනය කරන ලෙස ප්‍රචාරණ කටයුතු සිදුකරන මුවාවෙන් බොහෝමයක් පිරිස් සැබවින්ම සිදුකරන්නේ කිසිදු වගකීමක් හෝ වගවීමක් නැති පිරමිඩ ව්‍යාපාරයන්ට කොටස්කරුවන් සම්බන්ධ කිරීමක් බව ශ්‍රී ලංකා තොරතුරු තාක්ෂණ සංගමය පවසයි.
ශ්‍රී ලංකාවේ තරුණ ප්‍රජාව අතර ප්‍රචලිත “Lions Share” නම් ක්‍රිප්ටෝ මුදල් වර්ගය “සැක සහිත පිරමිඩ යෝජනා ක්‍රමයක්” ලෙස නවසීලන්ත වාණිජ කොමිෂන් සභාව විසින් ප්‍රකාශයට පත්කොට ඇති බව විදෙස් මාධ්‍ය මගින් වාර්තාකොට ඇත. අන්තර්ජාලය හරහා වෙළඳ කටයුතු සිදුකොට මුදල් සෙවීම සදහා ක්‍රිප්ටෝ මුදල් භාවිතා කළහැකි වුවත් “පරිගණක ගත මුදල් භාවිතය ආර්ථිකයට තර්ජනයක්” යන සම්මතයේ සිටින ශ්‍රී ලංකා මහ බැංකුවේ ක්‍රියාපිළිවෙත හේතුවෙන් තරුණ ප්‍රජාව නිසි අවබෝධයකින් තොරව තමාසතු මුදල් මෙවැනි පිරමිඩ ආයතනවලට ආයෝජනය කිරීමට පෙළබී තිබිම ඉතාමත් කනගාටුවට කරුණක් බව අප ශ්‍රී ලංකා තොරතුරු තාක්ෂණ සංගමය පවසයි.
ක්‍රිප්ටෝ මුදල් ශ්‍රී ලංකාව තුල භාවිතයට ගැනීම, ක්‍රිප්ටෝ මුදල් සදහා යම් නියාමනයන් සිදුකිරිම, ක්‍රිප්ටෝ මුදල් සම්බන්ධයෙන් ජනතාව දැනුවත් කිරීම ශ්‍රී ලංකා මහ බැංකුව සතු කාර්යයභාරයක් වන බැවින් මේ සම්බන්ධයෙන් කඩිනම් අවධානය යොමුකිරීමට කටයුතු කරන ලෙස ශ්‍රී ලංකා තොරතුරු තාක්ෂණ සංගමය පෙන්වා දෙයි.