ජනාධිපති,
ගෝඨාභය රාජපක්ෂ මැතිතුමා,
දේශපාලන බලය යොදාගෙන නාවලපිටිය දුම්රිය ඉඩම් අත්පත් කර ගැනීම නතර කරන ලෙස ඉල්ලීම.
දේශපාලන බලය අයුතු ලෙස යොදා ගනිමින් ආණ්ඩුවේ අමාත්‍ය වරයෙකු වන මහින්දානන්ද අළුත්ගමගේ මහතා නාවලපිටිය දුම්රිය ඉඩම් බලහත්කාරයෙන් අල්ලා ගැනීමට කටයුතු කරමින් සිටී.
නාවලපිටිය ආසනයේ නිවාස 100 ක මධ්‍යම පාන්තික නිවාස ව්‍යාපෘතියක් ලෙස මහල් නිවාස සංකීර්ණයක් ඉදිකිරීම සඳහා දුම්රිය දෙපාර්තමේන්තුව සතු අක්කර 02 ක පමණ දුම්රිය ඉඩම මේ ආකාරයෙන් අත්පත් කර ගැනීමට කටයුතු කරමින් ඇත. ප්‍රදේශයේ දේශපාලන බලවතා ලෙස අළුත්ගමගේ මහතා ඔහුගේ දේශපාලන හිතවතුන් පිරිසක් සහ දුම්රිය නිලධාරීන් පිරිසක් මෙම භූමිය පරීක්‍ෂාකර ඇති අතර, කිසිදු දුම්රිය නිලධාරියෙක් භූමිය පවරා දීමට එකඟතාවය ප්‍රකාශකර නැත. එහෙත් දුම්රිය දෙපාර්තමේන්තුවේ වගකිවයුතු සියළු නිලධාරීන් මෙම භූමිය පවර දීමට එකඟතාවය ප්‍රකාශකර ඇතැයි අසත්‍ය තොරතුරු සඳහන් කර කිසිදු ගෙවීමකින් තොරව මෙම ඉඩම බලහත්කාරයෙන් අත්පත් කර ගැනීමට අමාත්‍ය වරයා කටයුතු කරමින් ඇත.
මෙම භූමියට අමතරව, පර්චස් 79.35 ක ප්‍රමානයක දුම්රිය රක්‍ෂිත ඉඩමක් මහින්දානන්ද පදනමට තාවකාලිකව බදු පදනම යටතේ ලබාදී ඇති අතර, මහින්දානන්ද අළුත්ගමගේ මහතාගේ නමින් තවත් පර්චස් 11.5 ක දුම්රිය රක්‍ෂිත ඉඩම් කොටසක් ලබා දී ඇත. මෙම භූමිය බදු පදනම මත තාවකාලිකව ලබාදී ඇති බැවින්, එහි කිසිදු ස්ථීර ගොඩනැගිල්ලක් ඉදිකිරීමට හැකියාවක් නොමැති අතර, වෙනත් අයගේ පරිහරණයට පත්කිරීමට ද නොහැකිය. එසේ වුවත් එම භූමියේ ස්ථීර තට්ටු ගොඩනැගිලි ඉදිකර ඇති අතර, පිටස්තර අයගේ පරිහරණයට ලබා දී ඇත. මීට අමතරව දුම්රිය සේවක නිලනිවාස බලහත්කාරයෙන් අත්පත් කරගැනීමට කටයුතු කරමින් ඇත.
ඇමති වරයාගේ කාර්යභාරය විය යුත්තේ ”සෞභාග්‍යයේ දැක්ම ” යටතේ නාවලපිටිය දුම්රිය නගරයක් ලෙස සලකා, දුම්රිය සේවය පුළුල් කිරිමට අළුත් යෝජනා ඉදිරිපත් කරමින් ඒවා ක්‍රියාත්මක කිරීම වුවද, මේ දක්වා එවැනි කිසිදු වැඩ පිළිවෙලක් යෝජනා වී නොමැති බවද පෙන්වා දෙමු. ඇමති වරයාගේ දේශපාලන උවමනාව මත, රාජ්‍ය දේපලක් වන දුම්රිය රක්‍ෂිත භූමිය යොදා ගනිමින් ස්ථීර ගොඩනැගිලි ඉදිකිරීම නිසා දුම්රිය සේවය සංවර්ධනය කිරීමට දැඩි බාදාවක් වන බවද පෙන්වා දෙමු.
ජනතාවගේ ඡන්ද බලාගෙන රාජ්‍ය සම්පත් බලහත්කාරයෙන් අත්පත් කරගෙන මහින්දානන්ද ඇමති වරයා සිදුකරන දුම්රිය ඉඩම් මංකොල්ලය වහාම නතර කරන ලෙසත්, දුම්රිය දේපල යොදාගනිමින් නාවලපිටිය ප්‍රදේශයේ සිදු කරන ජාවාරම් නතර කරන ලෙසත් ඔබතුමාගෙන් ඉතා ගෞරවයෙන් ඉල්ලා සිටිමු.
ස්තූතියි.
එස්.පී.විතානගේ
සමකැඳවුම්කරු,
දුම්රිය වෘත්තීය සමිති සන්ධානය.
නාවලපිටිය ආසනයේ නිවාස 100 ක මධ්‍යම පාන්තික නිවාස ව්‍යාපෘතියක් ලෙස මහල් නිවාස සංකීර්ණයක් ඉදිකිරීම සඳහා දුම්රිය දෙපාර්තමේන්තුව සතු අක්කර 2ක පමණ ඉඩමක් දේශපාලන බලය යොදා අත්පත් කර ගැනීමේ තැතක් සම්බන්ධව ජනාධිපති ගෝඨාභය රාජපක්ෂ වෙත ලිඛිත පැමිණිල්ලක් යොමුකර ඇත.
දුම්රිය වෘත්තීය සමිති සන්ධානයේ සම කැඳවුම්කරු විසින් අදාළ පැමිණිල්ල සිදුකර ඇති අතර එහි චෝදනාව එල්ල කර ඇත්තේ අමාත්‍ය මහින්දානන්ද අලුත්ගමගේ වෙතය.
එහිදී ලිඛිත පැමිණිල්ල සිදුකරමින් ජනාධිපතිවරයා වෙතින් ඉල්ලා ඇත්තේ ජනතාවගේ ඡන්ද බලාගෙන රාජ්‍ය සම්පත් බලහත්කාරයෙන් අත්පත් කරගෙන මහින්දානන්ද ඇමති වරයා සිදුකරන දුම්රිය ඉඩම් මංකොල්ලය වහාම නතර කරන ලෙසත්, දුම්රිය දේපල යොදාගනිමින් නාවලපිටිය ප්‍රදේශයේ සිදු කරන ජාවාරම් නතර කරන ලෙසත්ය.
ජනාධිපතිට යොමුකළ පැමිණිල්ල මෙන්න !
දුම්රිය වෘත්තීය සමිති සන්ධානය විසින් ජනාධිපති ගෝඨාභය රාජපක්ෂට යොමුකළ ලිඛිත පැමිණිල්ල පහත දැක්වෙයි.