මුදල් අමාත්‍යවරයා ලෙස ඇතැම් විට පියකු මෙන් අමිහිරි දේවල් කිරීමට සිදුවිය හැකි බව බැසිල් රාජපක්ෂ පවසයි.
ඔහු මෙසේ සඳහන් කර ඇත්තේ අද (08) මුදල් අමාත්‍යවරයා ලෙස වගකීම් බාරගෙන මාධ්‍ය ඇමතූ අවස්ථාවේය.
“මේක ලොකු අමාරු කාර්යයක්. අපි අභියෝගය භාරගනිමු. අපි සියලුදෙනාම එකට වැඩකරමු කියන ඉල්ලීම කරමින්, අපේ අමාත්‍යාංශයේත් අපේ රජයේත් ඒ වගේම මගෙත් ප්‍රමුඛතාවය වෙන්නේ පොදු ජනතාවගේ අවශ්‍යතාවයන්. ඔවුන්ගේ ප්‍රමුඛතාවය අපේ ප්‍රමුඛතාවයයි. ඒ ප්‍රමුඛතාවයන් සියල්ල අපි දන්නවා. අපිට අවබෝධයක් තියෙනවා මොකද්ද ප්‍රශ්නේ කියලා. ඒක ජනාධිපතිතුමාට, අගමැතිතුමාට මේ රජයේ සියලුදෙනාට තියෙනවා. නමුත් සමහර වෙලාවට පියෙක් ට වගේ සමහර අමිහිරි දේවල් කරන්න වෙයි. ඒ වුණත් අපි ඒවා අවංකව ජනතාව වෙනුවෙන් කරන දේවල් කියලා අපි හිතනවා. ඒකට සහයෝගය දෙන්න.“ ඔහු පවසා ඇත.
ගෝලයන් කිව්වේ වෙන කතාවක් !
කෙසේ වුවත් බැසිල් රාජපක්ෂ මුදල් අමාත්‍ය ලෙස පත්ව පාර්ලිමේන්තු පැමිණීමට පෙර ආණ්ඩුවේ බැසිල්වාදි මැති ඇමතිවරුන් සඳහන් කර සිටියේ ඔහු පැමිණ සහන දෙනු ඇති බවය. ඉහළ දැමූ ඉන්ධන මිල පහත දමනු ඇති බවය.