ඔබේ පියා සහ බාප්පා කඩිනමින් ඇමරිකාවට ගෙන්වා ගන්නා ලෙස ආයාචනය කරමින් ගෝඨාභය රාජපක්ෂ ජනාධිපති ගේ පුතා වන මනෝජ් රාජපක්ෂ වෙත ප්‍රසිද්ධ වීඩියෝවක් නිකුත් කිරීමට දෙරණ මාධ්‍ය ජාලයේ ජනප්‍රිය නිවේදකයකු වන විශ්ව ලංකා කටයුතු කර ඇත.
මේ වන විට එම වීඩියෝව සමාජ මාධ්‍ය තුළ දැඩි අවධානයක් දිනාගෙන ඇත.
" තාත්තේ, ඔයාට ලංකාව පාලනය කරන්න බෑ. බාප්පවත් එක්කගෙන ආපහු ඇමරිකාවට එන්න.. සර්ගේ පුතා දකිනතුරු ශෙයා කරන්න " යන ශීර්ෂයෙන් යුතුව එම වීඩියෝව නිකුත්කර ඇත.
එහිදී ඔහු වැඩිදුරටත් පවසා සිටින්නේ ගෝඨාභය රාජපක්ෂ ජනාධිපති මිනිසුන්ගෙන් බැනුම් ඇසිය යුතු කෙනෙකු නොවන බවත් මේ වන විට බැසිල් රාජපක්ෂ රටම බංකොලොත් තත්වයට පත් කර ඇති හෙයින් ඉතිරි වී තිබෙන දෙයින් හෝ ශ්‍රී ලංකාවාසීන්ට දුකක් කරදරයක් නැතිව ජීවත් වීමට නම් වහාම බැසිල් රාජපක්ෂ සහ ගෝඨාභය රාජපක්ෂ ජනාධිපති අමෙරිකාවට ගෙන්වා ගන්නා ලෙසයි.
විශ්ව ලංකා දෙරණ මාධ්‍ය ජාලයේ ජනප්‍රිය නිවේදකයකු වන අතර අනෙක් පසින් දෙරණ මාධ්‍ය ජාලයේ හිමිකරු වන දිලිත් ජයවීර , වත්මන් ජනාධිපති ගෝඨාභය රාජපක්ෂ ගේ දේශපාලන ආගමනයේ සිට ජනාධිපති කරවීම දක්වා සුවිශේෂ මැදිහත්වීමක් සිදුකළ අයෙකු ලෙස ප්‍රසිද්ධ ය. එසේම ඔහු ජනාධිපති ගේ ළඟම මිතුරෙකු බවත් ප්‍රසිද්ධ රහසකි.
විශ්ව ලංකා සමාජ මාධ්‍ය වෙත නිකුත්කළ වීඩියෝව පහත දැක්වෙයි.