ජනාධිපතිවරණයෙන් ජයග්‍රහණය කළහොත් තමා කොළඹ නිවාස ප්‍රශ්නයට මහල් නිවාස හා නගර නිවාස සංකල්පය ඔස්සේ ස්ථිර වශයෙන් ම විසඳුමක් ලබා දෙන බව ජනාධිපති අපේක්ෂක සජිත් ප්‍රේමදාස කිරුලපන පැවති ජනාධිපතිවරණ ප්‍රචාරක රැලියකදී පැවසීය.
අගනුවර බල ප්‍රදේශයේ නවීනතම සංවර්ධන වැඩපිළිවෙලක් ක්‍රියාත්මක කරන බව ත් තමාගේ රාජ්‍ය පාලනයක් යටතේ ඉදිරියේදී සිදු කරන මානව ජනාවාස වැඩසටහන යටතේ මුඩුක්කුවල, වතු නිවාසවල, ජීවත් වන දුක්විඳින ජනතාවට විසඳුම් ලබා දෙන බව ත් විපක්ෂ නායකවරයා පැවසීය.
රණසිංහ ප්‍රේමදාස මැතිතුමාගෙන් පසු අගනුවරට කුඩම්මාගේ සැලකිල්ලක් පමණක් ලැබුණු බව ත් වර්තමාන අනුප්‍රාප්තික ජනාධිපතිවරයා කොළඹ නිවාස ගැටලුවට කිසිදු විසඳුමක් නොදුන් බව ත් ප්‍රේමදාස චෝදනා කළේ ය.
වාර ගණනාවක් අගමැති වී රටේ ජනාධිපති වූ නමුත් නිවාස ප්‍රශ්නයට තිරසර වැඩපිළිවෙලක් දියත් කිරීමට රනිල් වික්‍රමසිංහට නොහැකි වූ බව විපක්ෂ නායකවරයා පැවසීය.
මේ අතර, පාසල් දූ දරුවන්ට දිවා ආහාර ලබා දෙන ලෙස ඉල්ලීම කළ නමුත් රනිල් වික්‍රමසිංහගේ ආණ්ඩුව තමාට හිනා වූ බව ත් සජිත් ප්‍රේමදාස මහතා ජන රැලියේදී මතු කළේ ය.
දැරියන්ගේ සෞඛ්‍ය ගැන කතා කළ විටදීත් ජනතාවට සහන දෙන්නැයි කී අවස්ථාවේදීත් ඇතැම් අය තමාට විවිධ පද හැදූ බව ත් කී විපක්ෂ නායකවරයා සත්‍ය කවදා හෝ ජය ගන්නා බව ත් වැඩිදුරට ත් කීය.
