යහපාලන ආණ්ඩුව බලයට පත්වීමෙන් පසුව විධායක ජනාධිපති ක්‍රමයේ බලතල කිසියම් මට්ටමකින් කප්පාදු කරමින් 19 වන ව්‍යවස්ථා සංශෝධනය සිදුකල ද, ජනාධිපති මෛත්‍රීපාල සිරිසේන මහතා එහි ඇතැම් කරුණු නොසලකා කටයුතු කරන බවට එක්සත් ජාතික පක්ෂයේ ඇතැමුන් චෝදනා කරමින් සිටින බව 'සිරිකොත' එජාප මුලස්ථාන ආරංචිමාර්ග වලින් වාර්තාවේ.
ජනාධිපතිවරයා මෑතක සිට අගමැතිවරයා ගෙන් කිසිඳු විමසීමකින් හෝ දැනුවත් කිරීමකින් තොරව රාජ්‍ය අමාත්‍යවරුන් පත් කිරීම මෙම විවේචනයට හේතුවී තිබේ.
ජනාධිපතිවරයා විසින් ශ්‍රීලනිප පාර්ලිමේන්තු මන්ත්‍රී පියසේන ගමගේ මහතා නීතිය හා සාමය සහ දක්ෂිණ සංවර්ධන රාජ්‍ය අමාත්‍ය ධුරයට පත්කර කිරීම අගමැතිවරයා හෝ විෂයබාර අමාත්‍යවරයා දැනුවත්ව නොසිටි බව පැවසේ.
එජාප ඇමතිවරුන් කිහිප දෙනෙකු මෙම කාරණය සම්බන්ධයෙන් ව්‍යවස්ථා විශේෂඥයින් පිරිසකගේ මතය විමසා ඇතැයි ද ඉහත ආරංචිමාර්ග වැඩිදුරටත් පවසයි.
