පුවත්

අත්අඩංගුවට ගෙන රක්ෂිත බන්ධනාගාර ගත කර සිටි හිටපු අමාත්‍ය මර්වින් සිල්වා ඇතුළු තිදෙනෙකු තවදුරටත් රක්ෂිත බන්ධනාගාරගත කර තිබේ.

ඒ කිරිබත්ගොඩ ප්‍රදේශයේ ඉඩම් වංචා කිරීමේ සිදුවීමකට අදාළව පැවැත්වෙන නඩුව විභාගයට ගත් අවස්ථාවේදීය.

මෙම නඩුව මහර මහෙස්ත්‍රාත් අධිකරණයේදී විභාගයට ගත් අතර එහිදී දැනට අධිකරණය මගහරිමින් සිටින හිටපු රාජ්‍ය අමාත්‍යවරුන් වන ප්‍රසන්න රණවීර සහ මිල්රෝයි පෙරේරා අත්අඩංගුවට ගැනීමටද වරෙන්තු නිකුත් කර තිබේ.

බදුල්ල දිස්ත්‍රික් පාර්ලිමෙන්තු මන්ත්‍රී චාමර සම්පත් මහතා යළි මැයි මස 19 වනදා දක්වා රක්ෂිත බන්ධානාගාර ගත කිරිමට නියෝග කර තිබේ.

ජනමාධ්‍යවේදීන්ට ලැබිය යුතු ශිෂ්‍යත්ව, විදේශ සංචාර හා රක්ෂණාවරණ පසුගිය කාලයේදී වැඩි වශයෙන් ලබාගත්තේ රජයේ නිලධාරීන් හා ජනමාධ්‍ය හැඳුනුම්පත හොර පාරෙන් ලබාගත් පිරිසක් යැයි රජයේ ප්‍රවෘත්ති අධ්‍යක්ෂ ජනරාල් හර්ෂ බණ්ඩාර පැවසීය.

රජයේ මාධ්‍ය හැඳුනුම්පත ලබා දීම සඳහා ප්‍රමිතිගත නිර්ණායක ඉදිරිපත් කළ පසු ගිය වසරට සාපේක්ෂව අයැදුම්පත් සංඛ්‍යාව 3,500කින් පමණ අඩු වීමෙන් මේ කරුණ පැහැදිලි වන්නේ යැයි ද අධ්‍යක්ෂ ජනරාල්වරයා කීවේය.

රජයේ මාධ්‍ය හැඳුනුම්පත කලක් තිස්සේ ශිෂ්‍යත්ව හා රක්ෂණාවරණ ආදී වරප්‍රසාද ලබා ගැනීම සඳහා අවභාවිත වී ඇතැයිද එසේ සුදුසුකම් නොමැතිව කලක් තිස්සේ හැඳුනුම්පත් ලබා ගත් පිරිස මෙම නිර්ණායක හඳුන්වා දීමෙන් පසු අඩුවන්නට ඇති බවට ප්‍රවෘත්ති දෙපාර්තමේන්තුව නිරීක්ෂණය කරන්නේ යැයි ද ඔහු අවධාරණය කළේ ය.

2025 වසරට ද වලංගු වන සේ ලබාදුන් මාධ්‍ය හැඳුනුම්පත් 685ක් හැරුණු විට 2024 වසරේ දෙසැම්බර් 31 වන දායින් අවලංගු වූ මාධ්‍ය හැඳුනුම්පත් සංඛ්‍යාව 7,300ක් වන බව අධ්‍යක්ෂ ජනරාල්වරයා සඳහන් කළේ ය.

නව නිර්ණායක අනුව අමාත්‍යාංශවල පෞද්ගලික කාර්ය මණ්ඩලවලට හා රාජ්‍ය ආයතනවල කාර්ය මණ්ඩලවලටද මාධ්‍ය හැඳුනුම්පත් ලබා දුන්නේ නැතැයි කී හෙතෙම රජයේ ප්‍රවෘත්ති අධ්‍යක්ෂ ජනරාල්ට හා අමාත්‍යාංශවල මාධ්‍ය ලේකම්වරුන්ට මෙතෙක් කලක් මාධ්‍ය පරිපාලක වශයෙන් දුන් හැඳුනුම්පතද මේ වසරේ නිකුත් නොකළේ යැයි කීවේ ය.

මෙසේ ප්‍රමිතිගත නිර්ණායක හඳුන්වා දුන්නේ ද මාධ්‍යවේදීන් සමග කළ සාකච්ඡාවලින් පසුව බව ද අධ්‍යක්ෂ ජනරාල්වරයා පැවසීය.

තොරතුරු එකතු කිරීමේ හා දැනුම් දීමේ කාර්යයේ නිරත පිරිස්වලට මාධ්‍ය හැඳුනුම්පත ලබා දීම සම්බන්ධයෙන් කිසියම් ගැටලුවක් ඇතැයි ද එම තත්ත්වයන්ට අදාළව ශ්‍රී ලංකා තරුණ ජනමාධ්‍යවේදීන්ගේ සංගමය මානව හිමිකම් කොමිෂන් සභාවට කළ පැමිණිල්ලක් දැනට විභාග වෙමින් ඇතැයි ද ඔහු සඳහන් කළේ ය.

මානව හිමිකම් කොමිෂන් සභාව ඊට අදාළව දෙන නිර්දේශ අනුව දැනට පවතින නිර්ණායක සරල කිරීමට ප්‍රවෘත්ති දෙපාර්තමේන්තුව සූදානම් බව ත් එසේ අලුතින් නිකුත් කරන මාධ්‍ය හැඳුනුම්පත්ද එකතු වූ විට උපරිමය 5000ක් පමණ වීමට ඉඩ ඇති බව ත් අධ්‍යක්ෂ ජනරාල්වරයා වැඩිදුරට ත් පැවසීය.

( mawbima | Bingun Menaka Gamage)

පළාත් පාලන ආයතන මැතිවරණය පැවැත්වීම හේතුවෙන් රට පුරා සියලුම පාසල්වලට අද (05) සහ හෙට (06) නිවාඩු ලබාදී තිබේ. එම පාසල් නැවත අනිද්දා (07) ආරම්භ වන අතර මැතිවරණ රාජකාරි සඳහා යොදා ගන්නා ඇතැම් පාසල් 8 වැනිදා ආරම්භ වේ.

පළාත් පාලන ආයතන ඡන්ද විමසීමේ ඡන්ද පෙට්ටි සහ අනෙකුත් බඩු බාහිරාදිය ජ්‍යෙෂ්ඨ ඡන්ද ස්ථානාධිපතීන් වෙත භාරදීම සහ ආපසු භාර ගැනීමේ මධ්‍යස්ථාන හා ප්‍රතිඵල වගුගත කිරීමේ මධ්‍යස්ථාන ලෙස යොදා ගන්නා පාසල් ගොඩනැඟිලි, අධ්‍යාපන විද්‍යාපීඨ සහ උසස් තාක්ෂණ ආයතන සම්බන්ධව අධ්‍යාපන අමාත්‍යංශ ලේකම් නාලක කලුවැව මහතාගේ අත්සනින් යුතුව ලිපියක් නිකුත් කරමින් මෙම නිවාඩුව අනුමත කර තිබේ.

ඒ අනුව මැයි 7 වෙනිදා නිවාඩු ලැබෙන පාසල්......

ගල්කිස්ස වෙරළ පාරේ අද(05) උදෑසන සිදුවූ වෙඩි තැබීමකින් තුවාල ලැබූ තරුණයෙක් මියගොස් තිබේ.

ඒ, කළුබෝවිල ශික්ෂණ රෝහලට ඇතුළත් කිරීමෙන් අනතුරුවයි.

යතුරුපැදියකින් පැමිණි දෙදෙනෙකු, මිලිමීටර 9 වර්ගයේ ගිනි අවියකින් ඔහුට වෙඩි තබා ඇත.

මියගොස් ඇත්තේ, දෙහිවල පදිංචි 19 හැවිරිදි තරුණයෙකි.

මෙලෙස ජීවිතක්ෂයට පත්ව ඇත්තේ, ඕබන් පෙදෙස, දෙහිවල ප්‍රදේශයේ පදිංචිව සිටි තරුණයෙකු බව සඳහන්ය.

ගල්කිස්ස පොලීසිය සිද්ධිය සම්බන්ධයෙන් වැඩිදුර විමර්ශන සිදුකරනු ලබයි.

වියට්නාම් ජනාධිපති ලුඕං කුඕං (Luong Cuong) ගේ ආරාධනයකට අනුව ජනාධිපති අනුර කුමාර දිසානායක  වියට්නාමයේ රාජ්‍ය සංචාරයක් සඳහා දිවයිනෙන් පිටත්ව යාම හේතුවෙන් අමාත්‍යාංශ 04ක් සඳහා වැඩබලන අමාත්‍යවරු පත් කර තිබේ.

ජනාධිපතිවරයා යටතේ පවතින ඩිජිටල් ආර්ථික අමාත්‍යාංශය, ආරක්ෂක අමාත්‍යාංශය සහ මුදල් හා ක්‍රම සම්පාදන සහ ආර්ථික සංවර්ධන අමාත්‍යාංශය යන අමාත්‍යාංශ සඳහා මෙන්ම අමාත්‍ය විජිත හේරත් මහතා යටතේ පවතින විදේශ කටයුතු, විදේශ රැකියා සහ සංචාරක අමාත්‍යාංශය සඳහා වැඩබලන අමාත්‍යවරු පත් කර ඇත.

ඒ අනුව මුදල් හා ක්‍රම සම්පාදන සහ ආර්ථික සංවර්ධන වැඩබලන අමාත්‍යවරයා ලෙස කම්කරු අමාත්‍ය හා ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු ද,

ඩිජිටල් ආර්ථික වැඩබලන අමාත්‍යවරයා ලෙස ඩිජිටල් ආර්ථික නියෝජ්‍ය අමාත්‍ය එරංග වීරරත්න ද,

ආරක්ෂක වැඩබලන අමාත්‍යවරයා ලෙස ආරක්ෂක නියෝජ්‍ය අමාත්‍ය අරුණ ජයසේකර ද,

විදේශ කටයුතු, විදේශ රැකියා සහ සංචාරක වැඩබලන අමාත්‍යවරයා ලෙස විදේශ කටයුතු , විදේශ රැකියා නියෝජ්‍ය අමාත්‍ය අරුන් හේමචන්ද්‍ර ද පත් කර තිබේ.

වියට්නාමයේ රාජ්‍ය සංචාරයක නිරතව සිටින ජනාධිපති අනුර කුමාර දිසානායක සහ වියට්නාම් කොමියුනිස්ට් පක්ෂයේ මහලේකම් ටූ ලැම් අතර හමුවක් සිදුව තිබෙයි.

එම පක්ෂ මධ්‍යම කාරක සභා මූලස්ථානයේදී මෙම හමුව සිදුවූ බවයි වියට්නාම මාධ්‍ය වාර්තා කරයි.

වියට්නාමය සහ ශ්‍රී ලංකාව අතර වසර 55ක රාජ්‍යතාන්ත්‍රික සබඳතා තවදුරටත් ශක්තිමත් කිරීම පිළිබඳව මෙහිදී දීර්ඝ වශයෙන් සාකච්ඡා කර ඇත.

එමෙන්ම ජනාධිපතිවරයා හෙට (05) දිනයේදී වියට්නාම් ජනාධිපති සහ අගමැතිවරයා සමඟ නිල සාකච්ඡාවන්හි නිරත වීමටද නියමිතයි.

හෝ චී මිං නගරයේ පැවැත්වෙන එක්සත් ජාතීන්ගේ වෙසක් දින උත්සවයේ ප්‍රධාන ආරාධිත අමුත්තා ලෙසද ජනාධිපතිවරයා සහභාගී වන අතර එහි ප්‍රධාන දේශනය ද පැවැත්වීමට ද නියමිත ය.

සංචාරය අතරතුර දෙපාර්ශවය අතර ගිවිසුම් කිහිපයකට අත්සන් තැබීමට ද නියමිතය.

විදේශ කටයුතු, විදේශ රැකියා සහ සංචාරක අමාත්‍ය විජිත හේරත් ද මෙම අවස්ථාවට එක්ව ඇත.

සංවිධානාත්මක අපරාධකරුවෙකු වන ලන්තුවා හන්දි සුජීව රුවන් කුමාර ද සිල්වා හෙවත් ලොකු පැටී අපරාධ පරික්ෂණ දෙපාර්තමේන්තුවේ නිලධාරීන් පිරිසක් විසින් දිවයිනට රැගෙනවිත් තිබේ.

ජාත්‍යන්තර පොලීසිය මගින් රතු නිවේදන නිකුත් කර සිටි ඔහු, පසුගියදා බෙලරූස් රාජ්‍යයේදී එරට ආරක්ෂක අංශ විසින් අත්අඩංගුවට ගත්තේ ය.

ඒ අනුව අපරාධ පරික්ෂණ දෙපාර්තමේන්තු කණ්ඩායම ඔහු රැගෙන ආවේ බෙලරූස් රාජ්‍යයේ සිටයි.

කොස්ගොඩ සුජී සහ මාකඳුරේ මධුෂ් යන සංවිධානාත්මක අපරාධකරුවන් සමග කටයුතු කර ඇති ඔහු පසුව ලොකු පැටී නමැති අපරාධ කණ්ඩායමක් පිහිටුවා ගෙන ඇතැයි පොලීසිය සඳහන් කළේ ය.

මෙම සැකකරුට එරෙහිව අධිකරණවල විභාග වන නඩු පහත පරිදි වේ.

• 2016.05.21 වන දින වැලිපැන්න පොලිස් වසමේදී හෙරොයින් ග්‍රෑම් 23 ක් සන්තකයේ තබාගැනීම හා ජාවාරම සම්බන්ධයෙන් කළුතර මහාධිකරණයේ නඩුවක් විභාග වෙමින් පවතී.
• එමෙන්ම 2017.05.09 වන දින පිළියන්දල පොලිස් වසමේදී වෙඩි තබා මනුෂ්‍ය ඝාතනය හා බරපතළ තුවාල සිදු කිරීමට ආධාර අනුබල දීම සම්බන්ධයෙන් කැස්බෑව මහේස්ත්‍රාත් අධිකරණයේ නඩුවක් විභාග වෙමින් පවතී.
• 2017.06.15 වන දින හෙරොයින් ග්‍රෑම් 299 ක් සන්තකයේ තබාගැනීම හා ජාවාරම සම්බන්ධයෙන් කළුතර මහාධිකරණයේ නඩුවක් විභාග වෙමින් පවතී.
• 2021.10.08 වන දින වැලිපැන්න පොලිස් වසමේදී විදේශීය රටක නිෂ්පාදිත ජීව අත්බෝම්බයක්, මෙරට නිෂ්පාදිත රිවෝල්වරයක් හා පතරොම් සන්තකයේ තබාගැනිම සම්බන්ධයෙන් මතුගම මහේස්ත්‍රාත් අධිකරණයේ නඩුවක් විභාග වෙමින් පවතී.

මේ අතර තවද මෙම සැකකරු විසින් විදේශගතව සිටිමින් පහත අපරාධ මෙහෙයවා ඇති බවට අනාවරණය වී ඇත.

• 2022.08.24 වන දින අහුංගල්ල පොලිස් වසමේදී පුද්ගලයෙකුට වෙඩි තබා තුවාල සිදු කිරීම.
• 2022.09.23 වන දින අහුංගල්ල පොලිස් වසමේදී පුද්ගලයෙකුට වෙඩි තබා ඝාතනය කිරීම.
• 2022.10.12 වන දින අහුංගල්ල පොලිස් වසමේදී ටි 56 වර්ගයේ ගිනි අවියකින් වෙඩි තබා පුද්ගලයෙකු ඝාතනය කිරීම.
• 2024.01.18 වන දින අම්බලන්ගොඩ පොලිස් වසමේදී මාළු ව්‍යාපාරිකයෙකු ඝාතනය කිරීමට පැමිණෙමින් සිටි සැකකරුවෙකු ගිනි අවියක් සමඟ අත්අඩංගුවට ගැනීම.
• 2024.07.08 වන දින අතුරුගිරිය පොලිස් වසමේදී ටි 56 වර්ගයේ ගිනි අවියකින් වෙඩි තබා පුද්ගලයන් දෙදෙනෙකු ඝාතනය කර සිව් දෙනෙකුට තුවාල සිදු කිරීම.

පළාත් පාලන ආයතන ඡන්ද විමසීම හේතුවෙන් විදෙස් ගමන් බලපත්‍ර නිකුත් කිරීමේ එක්දින සහ සාමාන්‍ය සේවා ලබන 05, 06 සහ 07 දිනවල සීමා කෙරෙන බව ආගමන විගමන දෙපාර්තමේන්තුව පවසයි.

එමෙන්ම පැය 24 සේවාව ද ඉහත දිනවලදී ක්‍රියාත්මක නොවනු ඇති.

මේ අතර, ලබන 06 සහ 07 දෙදින පුද්ගලයින් ලියාපදිංචි කිරීමේ දෙපාර්තමේන්තුවේ ප්‍රධාන කාර්යාලය සහ පළාත් කාර්යාලවල එක්දින සේවාව ඇතුළු සියලු මහජන සේවාවන් ක්‍රියාත්මක නොවන බව එම දෙපාර්තමේන්තුව පැවසුවේ ය.

මේ අතර, නිලධාරින් මැතිවරණ රාජකාරි සඳහා යෙදවීම හේතුවෙන් මැයි මස 5 වැනිදා සහ 6 වැනිදා බස්නාහිර පළාත් වාහන ආදායම් බලපත්‍ර නිකුත් කිරීමේ කවුළු වසා තබන බව බස්නාහිර පළාත් ප්‍රධාන ලේකම් කාර්යාලය පවසයි.

එම කාර්යාලය නිවේදනය කළේ, අදාළ කවුළු නැවත විවෘත කරන පළමු දිනයේදී දඩ මුදල් ගෙවීමකින් තොරව, නියමිත ගාස්තුව පමණක් ගෙවා වාහන ආදායම් බලපත්‍ර ලබාගත හැකි බවයි.

මේ අතර, පළාත් පාලන ඡන්ද විමසීම හේතුවෙන් දිවයිනේ සියලු පාසල්වලට මැයි 05 සහ 06 නිවාඩු දී තිබේ.

පළාත් පාලන ඡන්ද විමසීමට අදාළව තරග කරන දේශපාලන පක්ෂ හා අපේක්ෂකයන්ට ප්‍රචාරක කටයුතු සිදුකිරීම සඳහා ලබාදී තිබූ කාලසීමාව අද (03) මධ්‍යම රාත්‍රියෙන් අවසන් වේ.

මැතිවරණ නීතියට අනුව ඡන්ද විමසීම සිදුකරන දිනට පැය 48කට පෙර සියලුම ප්‍රචාරක කටයුතු අවසන් කළ යුතු බව මැතිවරණ කොමිසම සඳහන් කරයි.

එමෙන්ම පළාත් පාලන ආයතන මට්ටමින් පිහිටුවා ඇති නිවේදන මාධ්‍ය කාර්යාල හා එක් එක් කොට්ඨාස සඳහා පිහිටුවා ඇති නිවේදන කොට්ඨාස කාර්යාල හැර සියලු ප්‍රචාරක කාර්යාල අද මධ්‍යම රාත්‍රියෙන් පසුව ගලවා ඉවත් කළ යුතු වෙයි. එමෙන්ම වර්ග අඩි 60 ප්‍රමාණයේ දැන්වීම් පුවරු හැර අනෙකුත් සියලු සැරසිලි අද මධ්‍යම රාත්‍රි 12.00 වනවිට ඉවත් කළ යුතු බව ද මැතිවරණ කොමිෂන් සභාව දැනුම් දෙයි.

පළාත් පාලන ආයතන 339ක් වෙනුවෙන් සභිකයන් තෝරාපත් කර ගැනීම සඳහා ලබන 06 වැනිදා ඡන්ද මධ්‍යස්ථාන 13759කදී ඡන්ද දායකයන් එක්කෝටි හැත්තෑඑක් ලක්ෂ පනස්හය දහස් තුන්සිය තිස්අට දෙනකු ඡන්දය ප්‍රකාශ කිරීමට සුදුසුකම් ලබා තිබේ.

ඡන්ද ගණන් කිරීම එක් කොට්ඨාසයකට අදාළව එක් ඡන්ද මෙධ්‍යස්ථානයක් තෝරාගෙන එම ස්ථානයට ගෙන ගොස් සිදු කෙරේ. එදින සවස 5.00ට ඡන්ද ගණන් කිරීම ඇරඹෙයි.

අල්ලස් කොමිසමට පැමිණීමේ දිනය වෙනස් කර ගැනීමට අවශ්‍ය බවට හිටපු ජනාධිපති රනිල් වික්‍රමසිංහ යැවූ ලිපිය ජනාධිපති අනුර කුමාර දිසානායක  විසින් දැනගැනීම සම්බන්ධයෙන් ඇතිව තිබෙන කතා බහ පිළිබද සිරස රූපවාහිනී නාලිකාවේ පැවැති වැඩසටහනක දී මාධ්‍යවේදීන් ජනාධිපතිවරයාගෙන් විමසා සිටියේය.

ඊට පිළිතුරු ලබා දෙමින් ජනාධිපති අනුර කුමාර දිසානායක  ප්‍රකාශ කළේ තමන් එය දුටුවේ ප්‍රවෘත්ති හරහා බවයි.

එසේම රටේ ජනාධිපතිවරයා ලෙස තමන් එය දැනගත යුතු බව ද ඔහු සඳහන් කළේය.

ඊට අමතරව තමා එය දැනගැනීම අපරාධයක් නම්, නීති විශාරදයෙක් වන රනිල් වික්‍රමසිංහට නඩුවක් ගොනු කිරීමේ හැකියාවක් ද පවතින බව ජනාධිපතිවරයා වැඩි දුරටත් කියා සිටියේය.

යුද සමයේ LTTE සංවිධානය සතුව තිබී, යුද හමුදාව මගින් නිල වශයෙන් භාරයට ගත් සිවිල් වැසියන්ට අයත් රත්‍රන් සහ රිදී භාණ්ඩ අද (02) පැලවත්ත යුද හමුදා මුලස්ථානයේ දී වැඩබලන පොලිස්පති ප්‍රියන්ත විරසූරිය  වෙත බාර දෙනු ලැබීය.

ඒ අනුව ස්වර්ණාභරණ සහිත පාර්සල් 120ක් අද දිනයේදී පොලීසිය වෙත භාරදී තිබේ.

පොලිස්පතිවරයා විසින් බාරගත් එම රන් හා රිදී, අධිකරණ නියෝගයක් මත මැණික් හා ස්වර්ණාභරණ අධිකාරිය විසින් වටිනාකම තහවුරු කිරීමෙන් පසු ශ්‍රී ලංකා මහා බැංකුව වෙත ලබාදීමට නියමිතය.

මේ අතර අදාළ භාණ්ඩ සම්බන්ධයෙන් අනන්‍යතාවය තහවුරු කළ හැකි වුවහොත් එම භාණ්ඩ සිවිල් වැසියන්ට නැවත ලබාදීමට කටයුතු කළ හැකි බවද යුද හමුදාව පවසයි.

මෙම අවස්ථාවට ශ්‍රී ලංකා යුද හමුදා බුද්ධි අංශ අධ්‍යක්ෂ ජෙනරාල් මේජර් ජෙනරාල් දීප්ත ආරියසිංහ, වැඩබලන පොලිස්පති ප්‍රියන්ත විරසූරිය හා මැණික් හා ස්වර්ණාභරණ අධිකාරියේ සභාපති නවීන් සූර්යආරච්චි යන  සහභාගි වූහ.

ජීවිත තර්ජන පවතින බැවින් තමාට ආරක්ෂාව ලබාදෙන ලෙස දේශබන්දු තෙන්නකෝන් පොලීසියෙන් ඉල්ලීමක් කර තිබේ.

වැඩබලන පොලිස්පති ප්‍රියන්ත වීරසූරියගෙන් ඊයේ (01) ලිඛිතව අදාළ ඉල්ලීම සිදුකර ඇති බව වාර්තා වේ.

තමාගේ ආරක්ෂාව සම්පූර්ණයෙන් ඉවත්කර ඇති බැවින් ජීවිතයට තර්ජන පැවතීම හේතුවෙන් සුදුසු ආරක්ෂාවක් ලබාදෙන ලෙස දේශබන්දු තෙන්නකෝන්  පොලීසියෙන් ඉල්ලා ඇත.

දේශබන්දු තෙන්නකෝන්ට ජීවිත තර්ජන ඇද්ද යන්න පිළිබඳව පොලීසිය විසින් ආරක්ෂක තක්සේරුවක් කිරීමට නියමිත අතර ඔහුට ආරක්ෂාවක් ලබාදිය යුතු බවට නිර්දේශ කළහොත් එම ආරක්ෂාව ලබාදීමට පියවර ගන්නා බවද පොලීසිය සඳහන් කළේය.

සබරගමුව විශ්වවිද්‍යාලයේ තාක්ෂණික ඉංජිනේරු පීඨයේ දෙවැනි වසරේ අධ්‍යාපනය හැදෑරූ ඩී. ජී. සී. සී. ඩී. දයානන්ද සිසුවා සියදිවි හානි කරගැනීම පිළිබඳ සොයාබැලීමට මහාචාර්යවරුන් තිදෙනකුගෙන් යුක්ත කමිටුවක් පත් කළ බව විශ්වවිද්‍යාලයේ උපකුලපති මහාචාර්ය සුනිල් ශාන්ත ‘දිනමිණ’ට ඊයේ (01) පැවසා ඇත.

ජ්‍යෙෂ්ඨ මහාචාර්ය ඒ. ඒ. වයි. අමරසිංහගේ සභාපතිත්වයෙන් යුතු මෙම කමිටුවේ සෙසු සාමාජිකයන් ලෙස මහාචාර්ය ආර්. එම්. ඒ. ටී. රත්නායක, වයි. එස්. චන්ද්‍රසේකර මහත්වරුන් පත් කළ බව ද ඔහු පැවසුවේය. කමිටු වාර්තාව ඉතා ඉක්මනින් ලබාදීමට කටයුතු කරන බවත් මේ සිද්ධියට අදාළව විශ්වවිද්‍යාලයේ සිසුන් අතින් විනය විරෝධී කටයුත්තක් සිදුව ඇත්ද යන්න සොයාබැලීමක් සිදු කරන බවත් ඒ මහතා ප්‍රකාශ කළේය.විශ්වවිද්‍යාලයේ ඉංජිනේරු පීඨයේ දෙවැනි වසරේ අධ්‍යාපනය හදාරමින් සිටි මෙම සිසුවා මාර්ගගත ක්‍රමයට අධ්‍යාපනය හදාරමින් සිටි බවත් මාර්ගගත සිසුන්ට විශ්වවිද්‍යාලය අභ්‍යන්තරයේ නේවාසික පහසුකම් නොමැති බවත් ඔහු පැවසුවේය.

නවක වධ පනත යටතේ මේ සිද්ධියට අදාළව පොලීසිය මඟින් පරීක්ෂණයක් කරන බව ද ඔහු පැවසුවේය. -සන්ධ්‍යා කරුණාරත්න, රත්නපුර දිස්ත්‍රික් සමූහ

පොලීසියෙන් පුළුල් විමර්ශනයක්

සබරගමුව විශ්වවිද්‍යාලයේ තාක්ෂණික ඉංජිනේරු පීඨයේ දෙවැනි වසරේ අධ්‍යාපනය ලබමින් සිටි චරිත් දිල්ශාන් නැමැති 23 හැවිරිදි සිසුවා ගෙල වැලලාගෙන සියදිවි හානිකර ගැනීම විශාදය හේතුවෙන් සිදු වූවක් බව මූලික විමර්ශනවලින් අනාවරණය වූවත් සිසුවාට නවක වදය ලබාදී ඇති බවට ඔහු සමඟ අධ්‍යාපනය ලබන විශ්වවිද්‍යාල සිසුවෙක් පවසා ඇති බැවින් අධිකරණයට ඒ සම්බන්ධයෙන් අද (02) දින කරුණු වාර්තා කර පුළුල් විමර්ශනයක් සිදු කරන බව පුස්සැල්ලෑව පොලීසිය සඳහන් කරයි.

මෙම සිසුවා සියදිවි හානිකර ගැනීමට පෙර ලියා ඇති ලිපියකින් ද ඔහු දැඩි මානසික පීඩනයකින් කාලයක්ම පීඩාවිඳ ඇති බව තහවුරු වන බවත් ඔහු සියදිවි හානිකර ගැනීමට මුල්වී ඇත්තේ එම මානසික පීඩනය බවද එමඟින් පෙනීයන බවත් මේ සම්බන්ධයෙන් කළ විමසුමකදී මහනුවර හා මාතලේ දිසාව භාර නියෝජ්‍ය පොලිස්පති සුදත් මාසිංහ මහතා සඳහන් කළේය.

මෙම සිසුවා විශ්වවිද්‍යාලයේ පසුගිය 27 වැනිදා පැවති අලුත් අවුරුදු උත්සවයට සහභාගිවී පසුගිය 28 වැනිදා ගම්පොළ පිහිටි නිවසට පැමිණ ඇති බවත් ඒ පැමිණි අවස්ථාවේ සිටම ඔහුගේ හැසිරීමේ වෙනසක් තිබී ඇති බව පවුලේ ඥාතීන්ගෙන් කළ ප්‍රශ්න කිරීමේදී පෙනීයන බවත් පුස්සැල්ලෑව පොලීසිය සඳහන් කරයි.

සිසුවා සිය නිවසේදී ගෙල වැලලාගෙන සියදිවි හානිකරගෙන ඇත්තේ පසුගිය 29 වෙනිදා ය. මෙම මරණය සම්බන්ධයෙන් මූලික පරීක්ෂණ සිදුවූයේ සාමාන්‍ය සියදිවි හානිකර ගැනීමක් බව පැහැදිලි වුයේ යැයිද පුස්සැල්ලෑව පොලීසියේ උසස් නිලධාරියෙක් පැවසීය.

මෙම මරණය සම්බන්ධයෙන් පැවැති තත්ත්වය වෙනස් වෙමින් සමාජයේ දැඩි ආන්දෝලනයක් ඇති වන්නේ සිසුවාගේ දේහයට අවසන් ගෞරව දැක්වීමට ඊයේ (01) නි‍ෙවසට පැමිණි සබරගමුව විශ්වවිද්‍යාලයේ සිසුන් පිරිසක් අතරින් එක් සිසුවෙක් විසින් මියගිය සිසුවාගේ පියාට පැවසූ නවක වද සිදුවීමක් බවද එම නිලධාරියා කීය.

අලුත් අවුරුදු උත්සවයට සහභාගි වීමට ගිය මෙම සිසුවා එහිදී නවක වදයට ලක්වූ බවත් ඒ සම්බන්ධයෙන් ඔහු යම් පීඩනයකින් සිටි බවත් එම සිසුවා පවසා ඇති බව ද එම උසස් පොලිස් නිලධාරියා පැවසීය.

මේ ගැන සියදිවි හානිකර ගත් සිසුවාගේ පියා විසින් පොලීසියට පැවසීමෙන් පසු ඔහුගේත් නවක වදය සම්බන්ධයෙන් තොරතුරු පැවසූ සිසුවාගේත් කටඋත්තර පොලීසිය සටහන් කර ගත් බවත් එම උසස් පොලිස් නිලධාරියා කීය.

දිනමිණ

හිටපු ජනාධිපති රනිල් වික්‍රමසිංහ ගේ පෞද්ගලික ආරක්ෂක නිලධාරියා ලෙස කටයුතු කළ පොලිස් පරීක්ෂක අශෝක ආරියවංශ වහාම ක්‍රියාත්මක වන පරිදි කන්කසන්තුරේ පොලිස් කොට්ඨාශයට ස්ථාන මාරු කර තිබේ.

ඒ, අපරාධ පරීක්ෂණ දෙපාර්තමේන්තු රැඳවුම් භාරයේ සිටින සිවනේසතුරෙයි චන්ද්‍රකාන්තන් හෙවත් පිල්ලෙයාන්ට රනිල් වික්‍රමසිංහ ට දුරකතන ඇමතුමක් ලබාදීමට අවශ්‍ය බව පවසා අපරාධ පරික්ෂණ දෙපාර්තමේන්තුවේ විමර්ශන නිලධාරියෙකුට දුරකතන ඇමතුමක් ලබාදීමේ සිද්ධියක් හේතුවෙනි.

අදාළ ස්ථාන මාරුවීම ලබා දී ඇත්තේ වැඩ බලන පොලිස්පතිවරයා විසිනි.

අද (01) සිට බලපැවැත්වෙන පරිදි මෙම ස්ථාන මාරුව සිදුකර ඇතැයි පොලිස් මූලස්ථාන ආරංචි මාර්ග පවසයි.

ප්‍රධාන පොලිස් පරීක්ෂක අශෝක ආරියවංශ, වසර 23ක් රනිල් වික්‍රමසිංහ ගේ ආරක්ෂක ඒකකයේ කටයුතු කළ අතර රනිල් වික්‍රමසිංහ ගේ පෞද්ගලික ආරක්ෂක නිලධරයා ලෙස වසර 15ක් සේවය කර ඇත.

මෙම ස්ථාන මාරුව තමන්ට එරෙහි දේශපාලන පලිගැනිමක් බව හිටපු ජනාධිපතිවරයාගේ අදහස් වී තිබේ.

මේ සම්බන්ධයෙන් නීතිමය පියවර ගැනිමට රනිල් වික්‍රමසිංහ ගේ අවධානය යොමු වි ඇතැයි ඔහුගේ දේශපාලන කාර්යාලයේ ප්‍රධානියකු පැවසිය.

ලෝක කම්කරු දිනය අදටයෙදී තිබේ.

තම ඉල්ලීම්, අයිතිවාසිකම් වෙනුවෙන් දිවි පුදා සටන් කළ කම්කරුවන් පැය අටේ වැඩමුරය ජය ගත් ලෝක කම්කරු දිනය අදට (01) යෙදී තිබේ.

කම්කරුවන්ගේ ලෙයින් බිහි වූ මෙදින වැඩ කරන ජනතාවගේ මැයි දිනය ලෙස ද සලකනු ලබයි. මෙවර මැයි දිනය සමරනු ලබන්නේ 139 වැනි වරටය.

අමෙරිකාවේ චිකාගෝ නුවර කම්කරු ජනතාව පැය අටේ වැඩමුරය ඉල්ලා ක්‍රියාත්මක කළ අරගලය ලොව ප්‍රථම කම්කරු සටන ලෙස හඳුන්වන අතර මේ සඳහා කම්කරුවන් 40,000ක් පමණ එක්ව සිට ඇත. එම සටන මර්දනය කිරීමට පොලීසිය කළ වෙඩි තැබීමෙන් කම්කරුවන් 11ක් මරුමුවට පත්ව තවත් කම්කරුවෝ 130ක් තුවාල ලැබූහ. වැඩවර්ජනයට එක් වූ කම්කරුවන් 100ක් පමණ පොලිස් අත්අඩංගුවට පත්විය.

මැයි 1 වැනිදා කම්කරු දිනය ලෙස සහ මැයි දිනය ලෙස ජාත්‍යන්තර වශයෙන් සැමරීමට මේ සටන අතිශය බලපෑවේය.

මැයි දිනය සමරමින් රට පුරා ස්ථාන 15කදී ප්‍රධාන රැලි 12ක්, පෙළපාළි 9ක්, පුෂ්පෝපහාර දැක්වීම් 3ක් හා රැස්වීම් 3ක් පැවැත්වේ.

සමගි ජන බලවේගය සංවිධාන කරන මැයි රැලිය තලවකැලේදී පැවැත්වෙන අතර අනෙකුත් රැලි, පෙළපාළි, රැස්වීම්, පුෂ්පෝපහාර දැක්වීම් හා රැස්වීම් කොළඹ හා ඒ අවට පැවැත්වේ.

මේ අනුව ජනාධිපති අනුර කුමාර දිසානායකගේ ප්‍රධානත්වයෙන් ජාතික ජන බලවේගයේ මැයි දින රැලිය ගාලුමුවදොර පිටියේදී අද (01) සවස 3ට පැවැත්වේ.

සමගි ජන බලවේගය සංවිධාන කරන මැයි රැලිය තලවකැලේ නගරයේදී විපක්ෂ නායක සජිත් ප්‍රේමදාසගේ ප්‍රධානත්වයෙන් සවස 2ට පැවැත්වීමට නියමිතය.

ශ්‍රී ලංකා පොදුජන පෙරමුණේ මැයි රැලිය නුගේගොඩ ආනන්ද සමරකෝන් එළිමහන් රංග පීඨයේදී පස්වරු 2ට පක්ෂයේ ජාතික සංවිධායක නාමල් රාජපක්ෂගේ ප්‍රධානත්වයෙන් පැවැත්වේ.

ශ්‍රී ලංකා නිදහස් පක්ෂය, එක්සත් ජනතා නිදහස් සන්ධානය සමඟ එක්ව පක්ෂයේ සභාපති නිමල් සිරිපාල ද සිල්වාගේ ප්‍රධානත්වයෙන් පක්ෂ මූලස්ථානයේදී රැස්වීමක් පැවැත්වීමට සැලසුම් කර තිබේ.

පෙරටුගාමී සමාජවාදී පක්ෂයේ මැයි දින රැලිය සවස 3ට කිරුළපන ලලිත් ඇතුලත්මුදලි ක්‍රීඩාංගණයේදී පැවැත්වේ. එහි නායක කුමාර් ගුණරත්නම්ගේ ප්‍රධානත්වයෙන් මෙය පැවැත්වෙන අතර පස්වරු 1ට කොළඹ බී.ආර්.සී. ක්‍රීඩාංගණයේ සිට ඇතුලත්මුදලි ක්‍රීඩාංගණය දක්වා මැයි පෙළපාළිය පැවැත්වේ.

හිටපු අගමැති දිනේෂ් ගුණවර්ධනගේ ප්‍රධානත්වයෙන් මහජන එක්සත් පෙරමුණ පවත්වන මැයි රැලිය අතුරුගිරිය ජනෝදාන ශාලාවේදී සවස 2.30ට පැවැත්වේ.

ලංකාවේ කොමියුනිස්ට් පක්ෂය ඇතුළු පක්ෂ කිහිපයක් එක්ව සමාජවාදී ජනතා පෙරමුණ ලෙස පවත්වන මැයි රැලිය කොළඹ හයිඩ් පිටියේදී සවස 3ට ඇරඹේ. මැයි පෙළපාලිය සවස 2ට කොම්පඤ්ඤවීදිය ඩී. මැල් පිටිය අසලින් ආරම්භ වේ.

සමසමාජ පක්ෂයේ මැයි රැලිය විහාරමහාදේවී උද්‍යානයේදී සවස 2ට පැවැත්වෙන අතර දෙවැනි පරපුර සංවිධාන කරන මැයි රැලිය පුස්තකාල ශ්‍රවණාගාර පරිශ්‍රයේදී එහි නායක උවිදු විජේවීරගේ ප්‍රධානත්වයෙන් පැවැත්වේ.

නිදහස් වෙළෙඳ කලාප හා පොදු සේවක සංගමය, ලංකා බැංකු සංගමය සංවිධාන කරන මැයි රැලිය මාලිගාවත්ත පී.ඩී. සිරිසේන ක්‍රීඩාංගණයේදී පෙ.ව 11ට පැවැත්වෙන අතර පෙළපාලිය පෙ.ව 10ට කොටුව දුම්රියපොළ අසලින් ආරම්භ වේ.

ලංකා වෙළෙඳ, කාර්මික සහ පොදු කම්කරු සංගමය සංවිධාන කරන මැයි රැලිය එම සංගම් පරිශ්‍රයේදී පැවැත්වේ. එක්සත් සමාජවාදී පක්ෂයේ මැයි රැලිය සවස 4ට කොස්ගස් හන්දියේදී පැවැත්වේ.

කම්කරු නායක ඒ.ඊ. ගුණසිංහ ජන්ම දින සැමරුම පෙ.ව. 11ට පිටකොටුව ඒ මහතාගේ පිළිරුව අබියසදී පැවැත්වෙන අතර හිටපු ජනාධිපති ආර්. ප්‍රේමදාස ගුණ සැමරුම උදේ 8.30ට කෙසෙල්වත්ත ඒ මහතාගේ පිළිරුව අබියසදී පැවැත්වෙයි.

මේ අතර සර්වජන බලය සංවිධන කරන සර්වජන සැමරුම වරකාපොළ නගරයේදීත් ජනසෙත පෙරමුණේ මැයි රැලිය කතරගමදීත් පැවැත්වේ.

ක්ලීන් ශ්‍රී ලංකා වැඩසටහන, පුද්ගලික අංශය සමග එක්ව අක්කර දහසක වන වගාවක් ස්ථාපනය කිරීමට සැලසුම් කර තිබේ.

ක්ලීන් ශ්‍රී ලංකා වැඩසටහන යටතේ රාජ්‍ය – පෞද්ගලික – ජනතා හවුල්කාරිත්වය යන (Public- Private – People Partnership) 4P සංකල්පයට අනුව ක්‍රියාත්මක කිරීමට යෝජිත මහා පරිමාණ ව්‍යාපෘතියක් ලෙස මෙම ව්‍යාපෘතිය සැලසුම් කර තිබෙන අතර ඒ පිළිබඳ මූලික සාකච්ඡාවක් ජනාධිපති කාර්යාලයේදී අද (30) පැවැත්විණි.

ව්‍යාපෘතියට අදාළ තාක්ෂණික කරුණු නිරාකරණය කර ගැනීමත්, ඉඩම් නිදහස් කර ගැනීමට අවශ්‍ය මූලික කරුණු පිළිබඳවත් මෙහිදී සාකච්ඡා කෙරිණි.

පරිසරය රැක ගැනීම වෙනුවෙන් මහජනතාවගේ, රජයේ මෙන්ම පුද්ගලික අංශයේ වගකීම සිහිපත් කරමින් අප රටේ ජෛව විවිධත්වය සුරැකීම, වන වැස්ම පුළුල් කිරීම සහ ස්වභාවික පරිසරයේ සුරක්ෂිත පැවැත්ම වෙනුවෙන් ඵලදායී ව්‍යාපෘති ගණනාවක් පුද්ගලික අංශයේද දායකත්වයෙන් ඉදිරි වසරේදී ක්‍රියාත්මක කිරීමට “ක්ලීන් ශ්‍රී ලංකා” වැඩසටහන සැලසුම් කර තිබේ.

ජනාධිපති ජ්‍යෙෂ්ඨ අතිරේක ලේකම් රසල් අපොන්සු, “ක්ලීන් ශ්‍රී ලංකා” වැඩසටහනේ අතිරේක ලේකම් එස්.පී.සී. සුගීස්වර යන අයගේ ප්‍රධානත්වයෙන් පැවති මෙම සාකච්ඡාවට කෘෂිකර්ම, පශු සම්පත්, ඉඩම් හා වාරිමාර්ග අමාත්‍යාංශයේ සහ පරිසර අමාත්‍යාංශයේ ජ්‍යෙෂ්ඨ නිලධාරීහු එක්ව සිටියහ.

ජනාධිපති අනුර කුමාර දිසානායක  විසින් වැඩබලන නීතිපතිවරයා ලෙස සොලිසිටර් ජෙනරාල් විරාජ් දයාරත්න  පත්කර ඇත.

නීතිපති පාරින්ද රණසිංහ මහතා ඉන්දියාවේ නිල සංචාරයක් සඳහා පිටත්ව ගොස් ඇති බැවින් ජනාධිපතිවරයා මෙම පත්කිරීම සිදු කර තිබේ.