පුවත්

තවත් කොරෝනා මරණ 61ක් සෞඛ්‍ය සේවා අධ්‍යක්ෂ ජනරාල් විසින් ඊයේ දිනට (28) අදාළව තහවුරු කර ඇති අතර ඊට අදාළ නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (29) නිකුත්කර ඇත.

ඒ අනුව කාන්තාවන් 36 දෙනෙකු සහ පිරිමි පුද්ගලයින් 25 දෙනෙකු මෙලෙස මරණයට පත්ව ඇත.

මේ සමග මෙරටින් නිල ලෙස නිවේදනය කර ඇති මියගිය කොවිඩ් ආසාදිත පුද්ගලයින්ගේ ගණන 12,847ක් දක්වා ඉහළ ගොස් ඇත.

ජාඇල , බෝපිටිය ශා.නිකොලා දේවස්ථානයට ලැබුණු , ත්‍රස්ත ප්‍රහාරයක් සම්බන්ධයෙන් ඊයේ පෙරවරු 10.05 පමණ , අදාළ දේවස්ථානය වෙත පැමිණි නිළ ඇඳුමෙන් සැදුම්ලත් නාවුක හමුදා නිලධාරීන් කණ්ඩායමක් විසින් , එම අවස්ථාවේ මීසම් පාලක පියතුමා දේවස්ථානයේ නොසිටි බැවින්, එහි සේවිකාවකට ප්‍රහාරයක් එල්ලවීමේ අවධානමක් ගැන හෙළිකර තිබුණි. එම කරුණු පහත පහත පරිදිය.

I - යලිත් බෝම්බ ප්‍රහාරයක් එල්ලවීමේ අවධානමක් ඇති බවත්,

II - නාඳුනන කිසිවෙකු දෙවස්ථානයට ඇතුළත් කර නොගන්නා ලෙසත්,

III - පියතුමන්ලා ලෙස "සුදු ලෝගු" ඇඳගෙන , බෝම්බකරුවන් පැමිණිය හැකි බවත්,

IV - අනෙකුත් දේවස්ථානත් දැනුවත් කළ යුතු බැවින්, පියතුමා පැමිණෙන තුරු රැඳී සිටිය නොහැකි බව කියමින් එකී නාවික හමුදා නිලධාරීන් පිටව ගොස් ඇත…

ත්‍රස්ත ප්‍රහාරයක් ගැන තොරතුරු විශ්ලේෂණය හෝ තහවුරු කරගත් තොරතුරක් නොවෙයි…!

නමුත් වත්මන් ආරක්ෂක ලේඛම් ජනරාල් කමල් ගුණරත්න විසින් මාධ්‍ය නිවේදනයක් නිකුත් කරමින් කියා සිටින්නේ එකී ත්‍රස්ත ප්‍රහාරයක් එල්ලවීමේ තොරතුර විශ්ලේෂණයකින් හෝ තහවුරු කර ගැනීමකින් තොරව කළ දැනුම් දීමක් බැවින් අනවශ්‍ය කළබලයක් ඇතිකරගත යුතු නොවන බවයි.

ත්‍රස්ත ප්‍රහාර ගැන වගකීම් විරහිතව මෙසේ ප්‍රකාශ කළ හැකිද?

මෙරට මෙන්ම ජාත්‍යන්තර වශයෙන් ආන්දෝලනාත්මක කථිකාවතක් මෙන්ම විදෙස්ගත සැබෑ දේශප්‍රේමී ශ්‍රී ලාංකික පිරිස්, පාස්කු ප්‍රහාරයේ මහමොළකරුවන් හෙලිකොට පාස්කු ප්‍රහාරයේ වින්දිතයින්ට වහාම සාධාරණය ඉෂ්ඨ කරන ලෙස උද්ඝෝෂණ කරන අල්ලපනල්ලේ මෙසේ කිතුණු සමාජය තුළ නැවතත් ත්‍රස්ත ප්‍රහාර පිළිබඳ තහවුරු නොකළ පුවත් පැමිණීම ප්‍රශ්න සහගතය. ® වගකිවයුතු ආරක්ෂක අංශ නිලධාරීන් හට විශ්ලේෂණයකින් තහවුරුවකින් තොරව මෙසේ තොරතුරු සමාජගත කළ හැකිද?

® එම තොරතුරු නිසාවෙන් කිතුණු සමාජය තුළ සමාජීය කැළඹීමක් ඇතිවී නම් ඒ පිළිබඳ වගකීම භාරගන්නේ කවුරුන්ද..?

® එසේ වගකීම් විරහිතව, රාජ්‍ය බුද්ධි අංශ විසින් තහවුරු නොකළ තොරතුරු සමාජගත කිරීමේ වගකීම භාරගන්නේ කවුරුන්ද? එකී නිලධාරියාට එකී තොරතුර ලභා දෙන්නේ කවුරුන් විසින්ද?

® පාස්කු ප්‍රහාරයේ මහමොළකරුවන් සොයා නීතිය ක්‍රියාත්මක කරන ලෙස ලොව පුරා විශාල හඬක් නැගෙද්දී, පාස්කු ප්‍රහාරයේ මහමොළකරු "අල්ලා දෙවියන්" බව, ප්‍රසිද්ධ මාධ්‍ය නාලිකාවට පැමිණ බොදු බලසේනා සංවිධානයේ නිර්මාතෘ ගලබොඩ අත්තේ ඟාණසාර හිමි කරන ප්‍රකාශයත්, ඉදිරියේ තවත් ත්‍රස්ත ප්‍රහාරයක් සිදුවීමට නියමිත බවට සිදුකළ ප්‍රසිද්ධ ප්‍රකාශයත් අතර මෙකී අණතුරු ඇඟවීමට යම් සම්බන්ධයක් තිබේද?

මෙසේ වගකීම් විරහිත ප්‍රකාශයන් හා එකී ප්‍රකාශ තුළින් ඇතිවිය හැකි අනවශ්‍ය ගැටලු වලට මාධ්‍ය නිවේදනයක් මගින් සිදුකරන ප්‍රකාශයක් පමණක්ම සෑහේද යන්න අදාල බලධාරීන්ගේ මෙන්ම සබුද්ධික පුරවැසියන්ගේද විශේෂ අවධානයට යොමුවිය යුතු කරුණකි..

සුමුදු මද්දුමආරච්චි

මිලානෝ ඉතාලිය.

මුල් අයිතිකරුවන් වෙත මුදා හරින ලෙසට කොළඹ අතිරේක මහේස්ත්‍රාත්වරයා සහ මාතලේ මහේස්ත්‍රාත්වරයා නියෝග කළ හීලෑ අලි ඇතුන් 15 දෙනා, වනජීවි ආරක්‍ෂක රාජ්‍ය අමාත්‍යවරයා නිකුත් කළ අතිවිශේෂ ගැසට් නිවේදනය යටතේ ලියාපදිංචි කිරීම ලබන මස 13 වැනිදා තෙක් වළකාලමින්, සෝභිත රාජකරුණා සහ ධම්මික ගනේපොළගෙන් සමන්විත අභියාචනාධිකරණ විනිසුරු මඩුල්ලක් විසින් අද (29) අතුරු නියෝගයක් නිකුත් කර තිබේ

අභියාචනාධිකරණය මෙම අතුරු නියෝගය නිකුත් කර ඇත්තේ, නීතියට පටහැනිව අල්ලා ගනු ලබන අලි ඇතුන් අදාළ ගැසට් නිවේදනය යටතේ ලියාපදිංචියට කිරීමට ඉඩ සලසා ඇති බව සදහන් කරමින්, ඒම ක්‍රියාව වළකාලන ලෙස ඉල්ලා පරිසර යුක්ති කේන්ද්‍රය සහ සත්ව අයිතිවාසිකම් ක්‍රියාකාරීන් පිරිසක් ගොනු කර තිබූ රිට් පෙත්සමක් සලකා බලමිනි.

එසේම අධිකරණය විසින් මුදා හරින ලෙස නියෝග කර තිබෙන “සුජීවා” නැමැති ඇතින්නිය සහ ඇගේ පැටවා වනජීවී දෙපාර්තමේන්තුව භාරයේ තවදුරටත් රඳවා තබන ලෙසද අභියාචනාධිකරණය නියෝග කර ඇත.

පරිසර යුක්ති කේන්ද්‍රයේ අධ්‍යක්ෂ හේමන්ත විතානගේ, පත්‍රගොඩ කංකානම්ගේ දිලේනා, පංචාලි මධුරංගි පනාපිටිය, මහේෂි නලින්කා මුණසිංහ, වාද්දුවගේ විශාඛා පෙරේරා තිලකරත්න, පාහියන්ගල ආනන්ද සාගර හිමි මෙහි පෙත්සම්කරුවන් වන අතර.

වනජීවී රාජ්‍ය අමාත්‍ය විමලවීර දිසානායක, වනජීවී සංරක්ෂණ අධ්‍යක්ෂ ජනරාල් චන්දන සූරියබණ්ඩාර, ජාතික සත්වෝද්යාන දෙපාර්තමේන්තුවේ අධ්‍යක්ෂ ජනරාල්, අපරාධ පරීක්ෂණ දෙපාර්තමේන්තුවේ විශේෂ විමර්ශන ස්ථානාධිපති (අංක 01), පොලිස්පති සී.ඩී වික්‍රමරත්න, කොළඹ අතිරේක මහේස්ත්‍රාත් එස්. ප්‍රභාකරන්, මාතලේ මහේස්ත්‍රාත් සී. වික්‍රමනායක සහ නීතිපතිවරයා වගඋත්තර කරුවන් ලෙස නම් කර සිටිති.

හීලෑ අලි ලියාපදිංචිය විධිමත් කිරීම සඳහා අයිතිකරුවන් වෙත ආපසු අලි බාර දීමට අදාළව වනජීවි ආරක්‍ෂක රාජ්‍ය අමාත්‍ය විමලවීර දිසානායක නිකුත් කළ අතිවිශේෂ ගැසට් නිවේදනය (අංක 2241/41) ක්‍රියාත්මක කිරීම අත්හිටුවන ලෙස අතුරු නියෝගයක් නිකුත් කරන ලෙස පෙත්සම්කරුවෝ ඉල්ලා සිටිති.

නීතීඥ නිම්මි සංජීවනී මහත්මිය මගින් ගොනු කළ පෙත්සමේ මෙසේද සදහන් වේ.

“ආසියානු අලියා ආසියා කලාපයට විශේෂිත වූ වදවීමේ තර්ජනයට ලක් වූ සත්වයෙකි. ශ්‍රී ලංකාවේ වන සත්ව සහ වෘක්ෂලතා ආඥා පනත යටතේ ආරක්ෂිත සත්වයෙකු ලෙස ප්‍රකාශයට පත් කර ඇත. නිසි ලෙස ලියාපදිංචි නොකළ අලි ඇතුන් ළග තබා ගැනීම දඩුවම් ලැබිය හැකි වරදකි.

පසුගිය අගෝස්තු 19 වැනිදා ප්‍රකාශිත පත් 2241/41 දරණ අතිවිශේෂ ගැසට් නිවේදනය විධි විධාන මගින් නීතියට පටහැනිව අල්ලා ගනු ලබන අලි ඇතුන්ද ලියාපදිංචියට ඉඩ සලසා ඇත. මෙම ගැසට් පත්‍රයේ විධි විධානයන්ට අනුව අල්ලා ගනු ලබන අලි ඇතුන් වානිජ ක්‍රියා සදහා භාවිතා කිරීමට ඉඩ කඩ සැලසේ. ඊට අමතරව මෙම ගැසට් පත්‍රයේ විධි විධාන යටතේ තබා ගන්නා අලින්ට යම් හිරිහැරයක් සිදුවුවහොත් චූදිතයින්ට නීතියෙන් ගැලවී යාමටද ඉඩ අවස්ථාද ඇත. මෙම ගැසට් නිවේදනයේ විධි විධානයන් වනසත්‍ව හා වෘක්ෂලතා ආරක්‍ෂක ආඥාපනතේ විධි විධානයන්ට පටහැනිව නිකුත් කර තිබේ.

හීලෑ අලි ඇතුන් 14 දෙනෙකු මුදා හැරීම සඳහා කොළඹ අතිරේක මහේස්ත්‍රාත්වරයා සහ මාතලේ මහේස්ත්‍රාත්වරයා නොබෝදා ලබා දුන් නියෝගය වනසත්‍ව හා වෘක්ෂලතා ආරක්‍ෂක ආඥාපනතේ විධි විධානයන්ට ද පටහැනි වේ. ඊට අමතරව මෙම නඩුවලදී අදාළ අලි මුදා හැරීමට නීතිපතිවරයා විසින් ඉදිරිපත් කළ කරුණු දණ්ඩ නීති සංග්‍රහයේ 112, 162, 181, 199 යන විධි විධානයන්ටද පටහැනි වේ.

ඒබැවින් හීලෑ අලි ලියාපදිංචිය විධිමත් කිරීම සඳහා අයිතිකරුවන් වෙත ආපසු අලි බාර දීමට අදාළව වනජීවි ආරක්‍ෂක රාජ්‍ය අමාත්‍ය විමලවීර දිසානායක මහතා නිකුත් කළ අතිවිශේෂ ගැසට් නිවේදනය බලරහිත කරන ආඥාවක් නිකුත් කරන ලෙසද, ඒ යටතේ

කොළඹ හා මාතලේ මහේස්ත්‍රාත්වරුන් දුන් නියෝග අහෝසි කරන ලෙසද, අදාළ අති විශේෂ ගැසට් පත්‍රය යටතේ ලියාපදිංචි කොට අලි ඇතුන් ලග තබා ගන්නා පුද්ගලයින්ට එරෙහිව නීතිය මගින් කටයුතු කරන ලෙසට වගඋත්තරකරුවන්ට නියෝග කරන ලෙසද, වනසත්‍ව හා වෘක්ෂලතා ආරක්‍ෂක ආඥාපනතේ යටතේ ලියාපදිංචි කළ නොමැති අලි ඇතුන් ලග තබා ගන්නා පුද්ගලයින්ට එරෙහිව නඩු පවරන ලෙස නියෝග කරන ලෙසද, පෙත්සම්ක්රුවෝ සිය පෙත්සමෙන් ඉල්ලා සිටිති.”

පෙත්සම්කාර පාර්ශවය වෙනුවෙන් ජනාධිපති නීතීඥ සංජීව ජයවර්ධන, නීතීඥ රවිනද්‍රනාත් දාබරේ සහ නීතීඥ නිල්මල් වික්‍රමසිංහ පෙනී සිටියහ.

(Lanka truth )

ජාතිික ඖෂධ නියාමන අධිකාරියේ දත්ත මකා දැමීම සම්බන්ධයෙන් අත්අඩංගුවට ගත් මෘදුකාංග ඉංජිනේරුවරයා සිය නිවසේ සිට ඒ සදහා පැය 05 ක කාලයක් වැයකර ඇතැයි වාර්තා වෙයි.

නියෝජ්‍ය සොලිසිටර් ජනරාල් දිලීප පීරිස් අද (29) කොළඹ මහේස්ත්‍රාත් අධිකරණය හමුවේ සිදුකළ කරුණු දැක්වීමේදී මේ බව අනාවරණය කර ඇත.

දත්ත මැකීම සම්බන්ධයෙන් කෙරුණු විමර්ශනයේදී හෙළිවූ වූ තොරතුරු මත අපරාධ පරීක්ෂණ දෙපාර්තමේන්තු නිලධාරීන් මෘදුකාංග ඉංජිනේරු වරයාව අත්අඩංගුවට ගනු ලබන්නේ ඊයේ (28) දිනයේ ය.

සැකකාර එම ඉංජිනේරුවරයා අද කොළඹ අතිරේක මහේස්ත්‍රාත් ශලනි පෙරේරා මහත්මිය හමුවට ඉදිරිපත්කරනු ලැබීය.

එහිදී අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පීරිස් මහතා අධිකරණයට සදහන් කරනු ලැබුවේ මෙම සැකකරු සිය නිවසේ සිට පද්ධතියට ඇතුවී පැය 05 ක් ගතකරමින් දත්ත මකා දමා ඇත්තේ පසුගිය ජුලි 09 වෙනිදා බවය.

මෙම දත්ත මැකීමේ සිදුවීම ඩිජිටල් ත්‍රස්තවාදයක් බවද දිලීප පීරිස් අධිකරණය හමුවේ අවධාරණය කළේය.

මෙතෙක් විමර්ශන අවසන්ව නොමැති බැවින් සැකකරුට ඇප ලබා නොදෙන ලෙසට නියෝජ්‍ය සොලිසිටර් ජනරාල් දිලීප පීරිස් මහතා අධිකරණයෙන් ඉල්ලා සිටියේය.

ඊට අධිකරණයෙන් යහපත් ප්‍රතිචාරයක් ලැබෙමින් සැකකරුව ලබන 6 වැනිදා දක්වා රක්ෂිත බන්ධනාගාර ගත කිරීමට අතිරේක මහේස්ත්‍රාත් සලනි පෙරේරා මහත්මිය නියෝග කළාය.

ලංකා සතොස ආයතනයට අයත් සුදුළුෑණු කිලෝග්‍රෑම් 54,000 ක් සහිත කන්ටේනර් දෙකක් ඉවත් කිරීමට ආධාර අනුබල ලබා දුන් බව කියන තැරැව්කරුවකු ලබන 01 තෙක් රක්ෂිත බන්ධනාගාර ගත කිරීමට වැලිසර මහේස්ත්‍රාත් හේෂාන්ත ද මෙල් නියෝග කර ඇති බව වාර්තා වෙයි.

මෙලෙස රක්ෂිත බන්ධනාගාර ගත කර ඇත්තේ මට්ටක්කුලිය පදිංචි කමල් කුමාර නමැත්තෙකි.

සුදුළුෑණු  වංචාව සම්බන්ධයෙන් පෑලියගොඩ පොලිස් විශේෂ විමර්ශන ඒකකය සැකකාර තැරැව්කරු අත්අඩංගුවට ගෙන ඇත්තේ සාපරාධී විශ්වාසය කඩ කිරීම, දූෂණයට ආධාර අනුබලදීම යන චෝදනා සම්බන්ධයෙන් පෙරේදා (28) ය.

රුපියල් ලක්ෂ 74ක් වටිනා සතොස ආයතනයේ සුදුලුනු කිලෝ 54,860- ක් තම අහිමතය පරිදි පෞද්ගලික වෙළෙඳ ආයතනයකට අළෙවි කර සාපරාධී විශ්වාසය කඩ කළැයි ලංකා සතොස මූල්‍ය අංශයේ නියෝජ්‍ය සාමාන්‍යාධිකාරී (මූල්‍ය) සුසිර පෙරේරා දින 14ක් රක්ෂිත බන්ධනාගාර ගත කරීමෙන් පසු රුපියල් ලක්ෂයක මුදල් සහ රුපියල් ලක්ෂ 50 බැගින් වූ ශරීර ඇප දෙකක් මත මුදා හැරිමට අධිකරණය නියෝග කර තිබිණී.

මෙම සිද්ධිය සම්බන්ධයෙන් ඉකුත් 26 වැනිදා පොලීසිය අත්අඩංගුවට ගෙන අධිකරණයට ඉදිරිපත් කළ ව්‍යාපාරිකයකු වන වේලායුදම් ශ්‍රීධරන් නැමැත්තා ද ලබන 01 වැනිදා තෙක් රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග නිකුත් කර ඇත.

CID ගැනත් විමර්ශනයක් !

මේ අතර පුවත්පත් කතුවරුන් ඇතුළු මාධ්‍යවේදීන්ගෙන් ප්‍රශ්න නොකරන ලෙස දැනුම්දීමක් කර තිබියදීත්, එම දැනුම්දීම අනුව කටයුතු නොකළ බව පවසමින් අපරාධ පරීක්ෂණ දෙපාර්තමේන්තුවේ නිලධාරීන් සම්බන්ධව වහාම විමර්ශනයක් සිදුකරන්නැයි මහජන ආරක්ෂක අමාත්‍ය සරත් වීරසේකර පොලිස්පතිවරයාට උපදෙස් දී ඇති බවත් වාර්තා වෙයි.

තවද සුඳුලූණු සිද්ධිය සම්බන්ධව පෑලියගොඩ විශේෂ අපරාධ විමර්ශන ඒකකය මඟින් සිදුකෙරෙමින් පවතින පරීක්‍ෂණ අපරාධ පරීක්‍ෂණ දෙපාර්තමේන්තුව වෙත පවරා පුළුල් පරීක්‍ෂණයක් සිදු කරන ලෙසද අමාත්‍යවරයා විසින් පොලිස්පති වරයාට උපදෙස් ලබා දී ඇති බවටත් මාධ්‍ය වාර්තා පළවෙයි.

පුවත්පත් කතුවරුන් ඇතුළු මාධ්‍යවේදීන්ගෙන් ප්‍රශ්න කිරීමට අපරාධ පරීක්ෂණ දෙපාර්ත මේන්තුව තීරණය කර තිබුනේ වෙළඳ අමාත්‍යංශය යටතේ පවතින සතොස ආයතනයේ සුදු ලූණු වංචාව සම්බන්ධයෙන් වාර්තා පළ කළ පුවත්පත් කතුවරුන් සහ මාධ්‍යවේදීන් පිලිබඳ තොරතුරුද ඇතුළත්ව වෙළඳ ඇමති බන්දුල ගුණවර්ධන අපරාධ පරීක්ෂණ දෙපාර්තමෙන්තුවට ගොනු කළ පැමිණිල්ලක් අනුවය.

කොවිඩ් වසංගත ව්‍යාප්තිය හමුවේ එය පාලනය කිරමට සංචරණ සීමා පැනවීමක් ලෙස ක්‍රියාත්මක වූ නිරෝධායන ඇඳිරි නීතිය ඔක්තෝබර් 01 වෙනිදා අලුයම 4.00 සිට ඉවත් කර ඇත.

මේ බව මාධ්‍ය වෙත දැනුම් දෙමින් හමුදාපති ජනරාල් ශවේන්දු සිල්වා සදහන් කළේ ජනපති උපදෙසින් මේ තීන්දුව ක්‍රියාත්මක බවය.

එසේම ඇදිරි නීතිය ඉවත් කිරීමෙන් අනතුරුව මහජනතාව අනුගමනය කළ යුතු සෞඛ්‍ය මාර්ගෝපදේශ හෙට (30) දිනයේ නිකුත් කෙරෙනු ඇති බවද ජනරාල් ශවේන්දු සිල්වා පැවසීය.

"මේ ආණ්ඩුව ලේ වැකි කුමන්ත්‍රණයක නියැලෙනවාද කියන සාධාරණ ප්‍රශ්නය මතුවී තිබෙනවා. මේ රටේ සියලුම පූජ්‍ය පක්‍ෂවලින් අපි ඉල්ලන්නේ හීටට එරෙහිව ඉදිරියට එන්න කියලා. ඇති තරම් ලේ වැගිරූ, භිතියට පත්වුණු රටක නැවත එවැනි තත්වයක් ඇතිවීම වැළැක්වීමට පෙරට එන්න කියලා අපි ඕනෑකමින් ආරාධනා කරනවා." යැයි ජනතා විමුක්ති පෙරමුණේ නායක , පාර්ලිමේන්තු මන්ත්‍රී , අනුර කුමාර දිසානායක පවසයි.

අද (29) ජවිපෙ මූලස්ථානයේ පැවති මාධ්‍ය හමුවකදී අදහස් දක්වමින් මන්ත්‍රීවරයා මේ අදහස් දැක්වූ අතර , එහිදී වැඩිදුරටත් මෙසේද පැවසීය.

අසාර්ථක පාලකයන් හැම වෙලාවෙම ජනතාව අතර අනියත බියක්, සැකයක් ඇති කරනවා. පාස්කු ප්‍රහාරය විශාල වශයෙන් උපයෝගී කරගෙන බලයට අවාට පස්සේ ඔවුන්ටම දැන් පාරා වළල්ලක් වී තිබෙනවා. මේ ප්‍රහාරය ඔවුන් බලය ලබාගැනීම සඳහා කරන ලද කුමන්ත්‍රණයක්ද කියලා සමාජයේ මතයක් ගොඩනැගෙමින් තිබෙනවා. පාස්කු ප්‍රහාරය වෙලාවේදී කාදිනල්තුමා විශාල කාර්යභාරයක් ඉටු කරමින් කතෝලික ජනතාව සන්සුන් කර තබාගත්තා.

කතෝලික ජනතාවගේ තිබුණු විරෝධය ප්‍රචණ්ඩකාරී තත්වයකට පත් නොකිරීම වෙනුවෙන් කාදිනල්තුමා ඉටුකළ කාර්යභාරය අද මේ ආණ්ඩුවේ ඉන්න මැති ඇමතිවරුන්ගේ විශාල පැසසුමකට ලක්වුණා. නමුත් අද වෙනකොට කාදිනල්තුමා දෙවුර මත පටවා ගත් බර එහෙමම තිබෙනවා. නිරවුල් නොවුණු තැන් පිළිබඳව කාදිනල්තුමන් ජනාධිපතිවරයාට ලිඛිතව දන්වා තිබුණා. ඊට ප්‍රතිචාර වශයෙන් නීති නිලධාරියෙකුගෙන් ලිපියක් යවා තිබුණා.

ප්‍රහාරය ආවරණයක් කරගත් පාලකයන් කාදිනල්තුමා පවරා ගත් ශුද්ධ වූ අයිතිය සම්බන්ධයෙන් කිසිදු තැකීමක් කරන්නේ නැහැ. කොමිෂන් සභා වාර්තාවේ ඇතැම් කොටස් නිීතිපති දෙපාර්තමේන්තුවට පවා යවා නැති බවට සැකයක් ඇතිවී තිබෙනවා. ඒ සම්බන්ධයෙන් කාදිනල්තුමා විවිධ ප්‍රකාශ සිදුකරමින් ඉන්නවා. නමුත් මේ තත්වය උපයෝගී කරගෙන ආවේගකාරී ගැටුම් නිර්මාණය කිරීමට විවිධ කණ්ඩායම් ආණ්ඩුව විසින් යොදා ගන්නවා.

පාලකයා අසාර්ථක වන හැම වෙලාවෙම හැංගෙන්නේ ජාතිවාදය සහ ආගම්වාදය තුළයි. සැඟවී සිටි පරණ කසකරුවන් වඳ කොත්තු, වඳ ඇඳුම්, වඳ දොස්තරලා, කර තියාගෙන ගිය අය වේගයෙන් කරළියට ඇවිත් තිබෙනවා. ජාතික රූපවාහිනිය, අයි.ටී.එන්. නාලිකාව යොදාගෙන ඒ කසකරුවන් ප්‍රධානම මත දක්වන්නන් බවට පත්කරගෙන තිබෙනවා. බරපතළ ප්‍රහාරයකට සූදානම් වන බවට ප්‍රහාරයක් සැඟවී ඉන්න බවට ප්‍රකාශ සිදුකරනවා.

ඔවුන් ඉන්න තැන දන්නා බව පවා ප්‍රකාශ කරනවා. ඒ සම්බන්ධයෙන් අපරාධ පරීක්‍ෂණ දෙපාර්තමේන්තුවට පැමිණිලි ගණනාවක් ලැබී තිබුණත් කිසිම පරීක්‍ෂණයක් කරන්නේ නැහැ. ජාතික රූපවාහිනිය, අයි.ටී.එන්. නාලිකාව ඔවුන්ට යොදා ගැනීමට දුන් ඩලස් අලහප්පෙරුම ගැන ලැජ්ජා වෙනවා. ජාතික සමගිය ගැන වාක්‍ය කණ්ඩවලින් ප්‍රබන්ධ නිර්මාණය කරන ඇමතිවරයෙක් සිටින වෙලාවකදී මේ කසකරුවන් නැවත ප්‍රහාරයක් පටන් ගෙන තිබෙනවා.

රසායනික පොහොර අත්හිටුවීමත් සමඟ මෙරට වගාවන්ට යෙදීම සඳහා චීනයෙන් ආනයනය කිරීමට නියමිත කාබනික පොහොර නිදර්ශක නැවත වතාවක් මෙරට පරීක්ෂණවලදී අසමත් වී ඇති බව නිල වශයෙන් තහවුරු වෙයි.

ඒ අනුව කෘෂිකර්ම දෙපාර්තමේන්තුවේ ජාතික ශාක නිරෝදායන ඒකකය මගින් සිදුකරන ද පරීක්ෂණයේදී දෙවැනි වරට ඒවා එසේ අසමත් වී ඇත.

ජාතික ශාක නිරෝධායන සේවයේ අධ්‍යක්ෂ එම්. වික්‍රමාරච්චි විසින් කෘෂිකර්ම දෙපාර්තමේන්තුවට හා කෘෂිකර්ම අමාත්‍යංශයට ඊයේ (28) මේ බව දැනුම් දී ඇති බව වාර්තා වෙයි.

අදාල පොහොර වලට සිදුකරන පරීක්ෂණ අනුව ඒවා ජීවානුහරණය කර නැති බවත් ක්‍ෂද‍්‍ර ජීවින් සිටින බවත් එමගින් දැනුම්දි ඇති බවත් වාර්තා වෙයි.

ඒ අනුව එම පොහොර මෙරටට ආනයනය කිරීමට සුදුසු තත්ත්වයක නැති බවත් වා ආනයනය නොකරන බවත් කෘෂිකර්ම දෙපාර්තමේන්තුවේ අධ්‍යක්ෂ ජනරාල්වරයා සඳහන් කරයි.

CID විමර්ශනයත් තේරුමක් නෑ !

කෙසේ වුවත් චීනයෙන් ආනයනය කිරීමට යෝජිත කාබනික පොහොර බව කියන ද්‍රව්‍ය වල පළමු නිදර්ශක වල ඉතාම අහිතකර ක්ශුද්‍ර ජීවීන් අඩංගු බව අනාවරණය වීම සමග කෘෂිකර්ම අමාත්‍යවරයා පවසා සිටියේ ඒ සම්බන්ධයෙන් අපරාධ පරීක්ෂණ දෙපාර්තමේන්තුවට පැමිණිලි කරන බවය.

අතර මගදී අදාළ නිදර්ශක වෙත ක්ශුද්‍ර ජීවීන් ඇතුල් කිරීමක් ගැනත් සැකසංකා ප්‍රසිද්ධියේ පළවිය. කෙසේ වුවත් මේ දෙවැනි දර්ශක පරීක්ෂණ ප්‍රතිඵල පෙන්වාදී ඇත්තේ ඒ සියලු කතා කතා මිස වැඩි දෙයක් නොවන බවය.

කතා පැත්තකින් තැබූ පසුව ප්‍රශ්නය එන්නේ ගොවීන්ට ය. ඒ දැන් ගොවීන්ට පොහොර කෝ කියාය.

කොහොම නමුත් මේ චීන අපද්‍රව්‍ය අනාවරණය කර ගැනීමට හැකිවීම මේ වන විට කාබනික පොහොර අදාළ චීන සමාගමෙන් ගෙන්වීමට ගෙන තිබූ තීරණය හකුළාගෙන ඇති බවත් වාර්තා වෙයි.

ශ්‍රී ලංකා නිදහස් පක්ෂය ඉදිරි පළාත් සභා මැතිවරණයක් අවස්ථාවේ දේශපාලන තීන්දුවක් ගැනීමේ සූදානමක් සම්බන්ධයෙන් ඉඟිකෙරෙන ප්‍රකාශයක් එම පක්ෂයේ මහ ලේකම් රාජ්‍ය අමාත්‍ය දයාසිරි ජයසේකර සිදුකර ඇත.

ඒ පක්ෂය ඉල්ලා සිටියහොත් වයඹ පළාත් සභාවේ මහ ඇමැති අපේක්ෂක ධුරයට තරග වැදීමට තමා සූදානම් බවත්, වයඹ පළාතෙන් තමාට එවැනි ඉල්ලීම් ගණනාවක් දැනටමත් ලැබී ඇති බවත් පවසමිනි.

එහිදී ශ්‍රීලනිප මහ ලේකම්වරයා පැහැදිලිව පක්ෂය ඉදිරියේදී පුළුල් සන්ධානයක් ලෙස පැමිණෙන්නේ නම් එම තීරණය ගැනීමට එක පයින් සූදානම් බවක් පවසයි.

එසේම වයඹ පළාතේ හිටපු මහ ඇමැති විදිහට එම පළාතට විශාල වැඩ කොටසක් තමා ඉටු කර ඇති බවත්, තමාට වයඹ මහ ඇමැති ධූරය සම්බන්ධයෙන් පැහැදිලි වුවමනාවක් ඇති බව ඔහු එහිදී වැඩිදුරටත් සඳහන් කරයි.

මීට පෙරද අමාත්‍යවරයා, පාර්ලිමේන්තු මන්ත්‍රී ධූරයෙන් ඉවත්ව පළාත් සභා මැතිවරණයක් අවස්ථාවේ තරගකර ඉහළින් ජයග්‍රහණය කළ අයෙකි.

ඒ අනුව දේශපාලන විචාරකයන් පවසන්නේ ශ්‍රීලනිප වෙනම සන්ධානයක් වෙනුවෙන් පාක්ෂිකයින් පෙළඹවීමක් මේ හරහා පෙන්නුම් කරන බවයි.

ඇතැම් විට එය විපක්ෂයේ තරුණ දේශපාලන නායකයන් රැසක් එක්වන ජනප්‍රිය සන්ධානයක ස්වරූපය ගැනීමට ඉඩ ඇති බවත් විචාරක පුරෝකථනය වෙයි.

සහල් සඳහා පනවා තිබූ උපරිම සිල්ලර සහ තොග මිල ගණන්වලට අදාළ ගැසට් පත්‍ර අවලංගු කිරීමට ඊයේ (27) කැබිනට් මණ්ඩලය තීරණය කළ අතර ඒ සමග සහල් සඳහා නව සිල්ලර මිලක් නියම කිරීමට මහා පරිමාණ සහල් මෝල් හිමියන්ගේ සංගමය පියවර ගෙන තිබේ.

අද (28) පැවති මාධ්‍ය හමුවකට එක්වෙමින් එම සංගමයේ සභාපති, ඩඩ්ලි සිරිසේන මේ බව පැවසීය.

සහල් වර්ග තුනක් සඳහා මෙසේ නව සිල්ලර මිල නිවේදනය කර ඇත.

ඒ නාඩු සහල් කිලෝවක සිල්ලර මිල රු 115.00 ක්, සම්බා සහල් කිලෝවක සිල්ලර මිල රු 140.00ක් සහ කිරී සම්බා කිලෝවක සිල්ලර මිල රු 165.00 ක් වශයෙනි.

ජාතික ඖෂධ නියාමන අධිකාරියේ දත්ත මැකීමේ මගඩිය සම්බන්ධයෙන් සිදුකරන විමර්ශනවලට අදාළව මෘදුකාංග ඉංජිනේරුවරයෙක් අපරාධ පරීක්ෂණ දෙපාර්තමේන්තුව විසින් අද (28) අත්අඩංගුවට ගෙන ඇත.

මෙම මෘදුකාංග ඉංජිනේරුවරයා අත්අඩංගුවට ගෙන ඇත්තේ අදාළ දත්ත සිය නිවසේ සිට මකා දැමූබවට තොරතුරු අනාවරණය වූ නිසා බවත් සඳහන් වෙයි.

එම දත්ත පවත්වාගෙන ගිය එපික් ලංකා ටෙක්නොලොජීස් ආයතනයේපාරිභෝගික සහයක මෘදුකාංග ඉංජිනේරුවරයෙකු වන ඔහු මේ වන විට එම ආයතනයේ සේවයේ නිරතව නොසිටින බව අපරාධ පරීක්ෂණ දෙපාර්තමේන්තුව සදහන් කරයි.

එම සැකකරු දිවුලපිටිය වල්පිට පදිංචිකරුවෙක් බවත් මෙම දත්ත මැකීයාම සම්බන්ධයෙන් පැමිණීල්ල අපරාධ පරීක්ෂණ දෙපාර්තමේන්තුවට ජාතික ඖෂධ නියාමන අධිකාරිය විසින් කරනු ලබන්නේ ජූලි 22 වෙනිදා බවත් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතීඥ නිහාල් තල්දූව සදහන් කළේය.

පුවත්පත් කතුවරුන් සහ මාධ්‍යවේදීන් අපරාධ පරීක්ෂණ දෙපාර්තමේන්තුවට කැඳවීම පිළිකුලෙන් යුතුව හෙළාදකිමින් විපක්ෂ නායක සජිත් ප්‍රේමදාස නිවේදනයක් නිකුත්කර ඇත.

එම සම්පූර්ණ නිවේදනය මෙසේය.

මාධ්‍යයට සහ මාධ්‍ය නිදහසට එරෙහි තර්ජනය පිළිකුලෙන් යුතුව හෙළා දකිමු.

මාධ්‍ය නිදහසට බරපතළ තර්ජනයක් එල්ල කරමින් ලංකාදීප, දිවයින කර්තෘවරුන්ට, එහි මාධ්‍යවේදීන් කිහිපදෙනෙක්ට මෙන්ම තවත් මාධ්‍ය කිහිපයක මාධ්‍යවේදීන්ට අපරාධ පරීක්ෂණ දෙපාර්තමේන්තුවේ පෙනීසිටින ලෙස නියෝග නිකුත්කොට ඇති බව වාර්තා වේ. ප්‍රජාතන්ත්‍රවාදය අගයන සමාජයක භාෂණයේ සහ අදහස් ප්‍රකාශ කිරීමේ ඇති නිදහස සම්බන්ධයෙන් ආණ්ඩු ක්‍රම ව්‍යවස්ථාවේ 14(1) වගන්තියේ පැහැදිලිව දක්වා ඇති අතර එවැනි රටක මාධ්‍ය භූමිකාවට මෙවන් තර්ජන එල්ල කිරීමට කිසිවකුට හැකියාවක් නැත.

• අදහස් දැරීමේ හා පළ කිරීමේ නිදහස පිළිබඳ අයිතිය හැමදෙනාම සතු අයිතියක් බව මානව හිමිකම් පිළිබඳ විශ්ව ප්‍රකාශනය මගින්ද, සිවිල් හා දේශපාලන හිමිකම් පිළිබඳ එක්සත් ජාතීන්ගේ ප්‍රඥප්තිය මගින්ද, මානව හිමිකම් පිළිබඳ යුරෝපා සම්මුතිය මගින් ද, ඉතා පැහැදිලිව පිළිගෙන තිබේ.

• රටේ පවතින දූෂණ වංචා පිළිබඳව හෙළිදරව් කිරීම මාධ්‍ය සතු වගකීමක් වන අතර, ඒ වගකීම ඉටු කරන මාධ්‍යවේදීන්ව රහස් පොලිසියට කැඳවා ප්‍රශ්න කිරීමට හෝ, ඔවුන් ඉලක්ක කරගෙන තර්ජන එල්ල කිරීමට හෝ, ඔවුනට බලපෑම කිරීමට කිසිවෙකුට අයිතියක් නැති බව අවධාරණය කළ යුතුය.

• තොරතුරු දැනගැනීමේ පනත සක්‍රීයව පවතින අවස්ථාවක්ව තිබියදී කිසිසේත්ම මේ ආකාරයේ කැඳවීම් කිරීම කළ නොහැකි අතර, එවැනි ආවරණයක් නොතිබියදී වුවත් මාධ්‍යවේදීන්ට මෙවැනි තර්ජනාත්මක කැඳවීම් සිදු කිරීමේ අයිතියක් රහස් පොලිසියට නැත.

• එවැනි කැඳවීමක් සිදුකිරීම මාධ්‍යවේදීන්ට කළ අපහාසයක් වන අතර ඔවුන්ගේ මාධ්‍ය භූමිකාවට සිදුකරන ලද බරපතළ අනිසි තර්ජනයක් සේ ද අපි සලකමු.

• මේ රටේ දූෂණ වංචා හෙළිදරව් කරන මාධ්‍යවේදීන්ගේ අදීනත්වය අඩපණ කිරීමට පවා මෙම තර්ජනාන්විත ලිපි හේතු විය හැකි අතර,අපි එයට මාධ්‍ය නිදහසේ නාමයෙන් බරපතළ විරෝධය ප්‍රකාශ කරමු.

• අතීතයේ සිදු වූ යම් යම් වැරදි අනාගතයට උරුමකර දීම හෝ එය සාධාරණීකරණය කිරීම දියුණු ප්‍රජාතන්ත්‍රවාදය අගයන සමාජයක ශිෂ්ට සම්පන්න ක්‍රමවේදය නොවන අතර අප කළ යුත්තේ අඩුපාඩු සහ වැරදි වලින් පාඩම් උගෙන නිවැරදි මාවත තෝරා ගැනීමය.

• නියමින් හෝ අනියමින් මාධ්‍ය නිදහසට වැට බැඳීම, ඔවුන්ට තර්ජනය කිරීම, ඔවුන්ව වාරණය කිරීම අප අනුදකින දේශපාලනය නොවන අතර, අපේ නොවෙනස් ප්‍රතිපත්තිය වන්නේ මාධ්‍යයට පැවතිය යුත්තේ ස්වයංවාරණයක් පමණක් බවය.

එකී ප්‍රතිපත්තිය තිරසාර වන අතර කිසිදු හේතුවක් මත වෙනස් නොවන්නකි. මේ අභියෝග සහ තර්ජනයන්ට එරෙහිව සියලු මාධ්‍යවේදීන් සමඟ අප අත්වැල් බැඳ ගන්නා අතර ඔවුන්ට අවශ්‍යවන නීතිඥ සහායක් වෙත්නම් ඒ අනුග්‍රහය ලබාදීමට ද සමගි ජන බලවේගයේ නීතිඥ කණ්ඩායම සැදී පැහැදී සිටින බව අවධාරණය කරමු.

අතීතයේ වැරදි නිවැරදි නොවේ නම් අනාගතය අතිශයින් දුර්භාග්‍ය සම්පන්න වන බව අවධාරණය කරන අතර ප්‍රජාතන්ත්‍රවාදයේ ප්‍රධානතම කුළුණ වන මාධ්‍ය අරඹයා එල්ල වූ මේ පිළිකුල් සහගත තර්ජනය ඒ තර්ජනයටම අනන්‍ය වූ පිළිකුලෙන් යුතුව අපි හෙළා දකිමු.

සජිත් ප්‍රේමදාස

විපක්ෂ නායක

තවත් කොරෝනා මරණ 55 ක් ඊයේ (27) දිනට අදාළව සෞඛ්‍ය සේවා අධ්‍යක්ෂ ජනරාල් විසින් තහවුරු කර ඇති අතර ඊට අදාළ නිවේදනය අද (28) රජයේ ප්‍රවෘත්ති අධ්‍යක්ෂ ජනරාල් විසින් නිකුත්කර ඇත.

ඒ අනුව මෙරට කොරෝනා මරණ සංඛ්‍යාව 12,786 ක් දක්වා ඉහළ ගොස් තිබේ.

මියගිය අය අතර වයස අවුරුදු 30 – 59 අතර පුද්ගලයින් 16 ක් සහ අවුරුදු 60 වැඩි පුද්ගලයින් 39 ක් සිටීයි.

සැප්තැම්බර් 28 දිනට යෙදී ඇති තොරතුරුවලට ප්‍රවේශවීමේ ජාත්‍යන්තර දිනය නිමිත්තෙන් නිදහස් මාධ්‍ය ව්‍යාපාරය විසින් සංවිධානය කරනු ලැබූ මහජන සංවාදය සැප්තැම්බර් 25 සෙනසුරාදා දින පස්වරු 6.00 ට සූම් තාක්ෂණය ඔස්සේ මාර්ගගතව පවත්වන ලදී.

තොරතුරු දැනගැනීමේ පනත භාවිතා කරමින් ජය ගත් මොනරාගල මැතිවරණ නඩුව ප්‍රධාන කොට ගෙන පැවැත්වූ මෙම මහජන සංවාදයේ දේශකයින් ලෙස පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි, කොළඹ විශ්වවිද්‍යාලයේ සමාජ විද්‍යා අංශයේ ජ්‍යෙෂ්ඨ කතිකාචාර්ය ආචාර්ය එම්. ටී. එම් මහීස්, මහනුවර සමාජ සංවර්ධන ආයතනයේ ව්‍යාපෘති කළමනාකාරිනී යෝගොෂ්වරී ක්‍රිෂ්ණන් සහ කන්තලේ ජාතික සහයෝගිතා සංවර්ධන පදනමේ ව්‍යාපෘති කළමනාකරු සුරංග රූපසිංහ යන අය සහභාගී වූහ.

තොරතුරු පනත භාවිතා කරමින් ලබාගත් දත්ත හා තොරතුරු ඔස්සේ, මැතිවරණ අල්ලස් සම්බන්ධයෙන් පැවරූ නඩුවකින් ලබා ගත් ‌ඓතිහාසික නඩු තීන්දුව පිළිබඳ අත්දැකීම ගැන අදහස් දක්වමින් රෝහණ හෙට්ටිආරචිචි ප්‍රකාශ කළේ, 2018 වර්ෂයේ මොනරාගල මඳුරකැළේ පොදුජන පෙරමුණේ අපේක්ෂක විසින් ඡන්ද දායකයන්ට අල්ලස් ලබා දී ඇති බවට වාර්තා වීමෙන් පසු, පැෆරල් සංවිධානය, මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ ද සහාය ඇතිව ගොනු කරනු ලැබූ නඩුකරයෙන් ‌ ඓතිහාසික තීන්දුවක් ලැබී ඇති බවයි.

2021 සැප්තැම්බර් 13 දා මොනරාගල මහාධිකරණ විනිසුරු විසින් ලබා දුන් එම සුවිශේෂි තීන්දුවට අනුව මොනරාගල ප්‍රාදේශීය සභා මන්ත්‍රිවරයාගේ මන්ත්‍රී ධුරය අහෝසි කර ඇත. තවද එකී ජයග්‍රහණය තොරතුරු දැන ගැනීමේ පනත භාවිතා කරමින් මැතිවරණ දූෂණ සම්බන්ධයෙන් ලැබූ ප්‍රථම ජයග්‍රහණය බව ද ඔහු පැවසුවේය.

“පුරවැසි සමාජයට පාඩම් උගත හැක්කේ කෙසේද” යන තේමාව යටතේ අදහස් දැක්වූ ආචාර්ය එම්.ටී.එම් මහීශ් මහතා ප්‍රකාශ කළේ, සාමාන්‍ය පුරවැසියාට තම එදිනෙදා ජීවිතයේ සිදුවන සිද්ධීන් පිළිබදව තොරතුරු දැනගැනීමේ අයිතියක් ඇති නමුත් යම් යම් මාධ්‍ය ආයතන මගින් තොරතුරු විකෘති කරමින් පුරවැසියා වෙත ඒවා මුදාහරින නිසා පුරවැසියාට නිවැරදි තොරතුරු ලබා ගැනීමට නම් තොරතුරු පනත භාවිතා කරමින් තොරතුරු ලබා ගත හැකි බවයි.

තොරතුරු පනත භාවිත කිරීමේදී කඳුකර ජනතාව මුහුණ දෙන අභියෝග සහ ජයග්‍රහණ ගැන යෝගේෂ්වරී ක්‍රිෂ්ණන් අදහස් දැක්වූ අතර ග්‍රාමීය ජනතාවගේ ගැටළු සම්බන්ධව පැනනගින ගැටළු වලට තෝරතුරු දැනගැනීමේ පනත භාවිතා කරන විට උද්ගත වන අභියෝග සම්බන්ධව සුරංග රූපසිංහ මහතා අදහස් දක්වන ලදී.

නිදහස් මාධ්‍ය ව්‍යාපාරය-

ඉතිහාසයේ කිසිදු දිනක සිදුව නැති ආකාරයට පුවතක් පළකිරීම හේතුවෙන් , ඊට අදාළ මෙරට ජාතික පුවත්පත් සියල්ලේම කතුවරුන් ඇතුළු, මාධ්‍යවේදීන්, සැප්තැම්බර් 28, එනම් අද, අපරාධ පරීක්ෂණ දෙපාර්තමේන්තුවට කැඳවා තිබිණ.

මෙම පුවතට අදාළ සිදුවීම වන්නේ කුප්‍රකට සතොස සුදුලූණු වංචාවයි.

සතොස සුදුළුණු වංචාව සම්බන්ධයෙන් වෙළෙඳ අමාත්‍ය බන්දුල ගුණවර්ධන අපරාධ පරීක්ෂණ දෙපාර්තමේන්තුවට පසුගියදා පැමිණිල්ලක් සිදුකර ඇත. ඊට අදාළව, ඔහු ගෙන් පැය 4ක 5ක පමණ ප්‍රකාශයක්, අපරාධ පරීක්ෂණ දෙපාර්තමේන්තුව පසුගියදා ගෙන තිබු බවත් දැනගන්නට ඇත.

වෙළඳ අමාත්‍යවරයාගේ එම ප්‍රකාශයේ දී පුවත්පත්වල මෙම වංචාව සම්බන්ධයෙන් පළවූ පුවත් පිළිබඳ පවසා ඇති බවත් මාධ්‍ය වාර්තාවල දැක්වෙයි.

ඒ අනුව අද අපරාධ පරීක්ෂණ දෙපාර්තමේන්තුවට කැඳවා තිබුණේ , මෙම සුදුලූණු වංචාව සම්බන්ධයෙන් ප්‍රවෘත්ති පළකළ, මෙරට ජාතික පුවත්පත් සියල්ලේම කතුවරුන් ඇතුළු මාධ්‍යවේදීන්ය.

දේශපාලන විචාරකයන් පවසන්නේ පුවතක් නිසා මේ ආකාරයට , සියලුම පුවත්පත් කතුවරුන් ප්‍රශ්න කිරීමට අපරාධ පරීක්ෂණයට කැඳවූ පළමු අවස්ථාව මෙය බවය.

එසේම එය මාධ්‍ය නිදහස සම්බන්ධයෙන් බරපතළ තත්ත්වයක් බවත් ඔවුන් අවධාරණය කරයි

මේ අනුව ඉදිරියට ආණ්ඩුවේ වංචා දූෂණ අනාවරණය කිරීම පමණක් නොව, සරල වාර්තාකරණයේ යෙදීමත්, අපරාධ පරීක්ෂණ දෙපාර්තමේන්තුවට යාමට සිදුවන්නක් බවට සංඥාවක් නිකුත්ව ඇති බව විචාරක අදහසයි.

එසේම මෙය මෙරට ජනමාධ්‍ය සහ මාධ්‍යවේදීන් ගේ වෘත්තීය නිදහස බරපතළ ලෙස උල්ලංඝනය කිරීමක් බවත් ඔවුන් පෙන්වා දෙයි.

වඩාත් අවාසනාවන්ත තත්ත්වයක් වන්නේ දේශපාලනඥයකු වීමට පෙර මාධ්‍යවේදියකු ලෙස කටයුතු කළ ඩලස් අලහප්පෙරුම ජනමාධ්‍ය අමාත්‍යවරයා ලෙස සිටින පසුබිමේ මෙවැන්නක් සිදුවීමයි.

දැනගන්නට ඇති ආකාරයට , සියලු පුවත්පත් කතෘවරුන්, මාධ්‍යවේදීන් අපරාධ පරීක්ෂණ දෙපාර්තමේන්තුවට කැඳවීම සම්බන්ධයෙන් අමාත්‍යවරයා දැනුවත් වූ මොහොතේ ඊට සි‍ය කණගාටුව පළකර ඇත.

එසේම මෙකී කැඳවීම සිදුකර ඇත්තේ , විෂය භාර අමාත්‍යවරයා නොදැනුවත්ව බවත් ආරංචි මාර්ග පවසයි.

කෙසේ වුවත් කැබිනට් තීන්දු දැනුම්දෙන ප්‍රවෘත්ති සාකච්ඡාව අවස්ථාවේ ඩලස් අමාත්‍යවරයා පවසා සිටියේ කිසිසේත් අනුමත කළ නොහැකි දෙයක් සිදුව ඇති බවයි. වහාම එය, අග්‍රාමාත්‍ය මහින්ද රාජපක්ෂ සමග සාකච්ඡා කර අවලංගු කරවූ බවත් එහිදී සඳහන් විය.

අද අදාළ කැඳවීමට නොයන ලෙස ජනමාධ්‍ය අමාත්‍යංශය මාධ්‍ය ආයතන වෙත දන්වනු ලැබුවේ ඒ අනුවය.

එහෙත් දේශපාලන විචාරකයන් මෙන්ම ජනමාධ්‍ය ක්‍රියාකාරීන් පවසන්නේ , ජනමාධ්‍ය අමාත්‍යවරයා නොදැනුවත්ව, සියලු පුවත්පත් කතුවරුන් සහ මාධ්‍යවේදීන් කැඳවීමට ගනුලැබූ තීන්දුව බරපතළ බවයි.

මේ ආකාරයට වැඩකටයුතු සිදුවෙනවා නම්, එහිදී දෙයාකාරයක අවධානමක් ඇති බව ඔවුන් පෙන්වා දෙනවා

එයින් පළමු වැන්න ආරක්ෂක අංශ ජනමාධ්‍ය අමාත්‍යවරයාගේ දැනුවත් භාවයෙන් තොරව මාධ්‍ය සම්බන්ධයෙන් කටයුතු කරන, බවට වන සංඥාවයි.

දෙවැනි කරුණ වන්නේ , ජනමාධ්‍ය විෂය පථයට අදාළව, ආරක්ෂක අංශ ගනුලබන තීන්දු තීරණ සම්බන්ධයෙන්, ජනමාධ්‍ය අමාත්‍යවරයා නොදැනුවත් වීමයි.

කොහොම නමුත් ඩලස් අලහප්පෙරුම අමාත්‍යවරයා ඉතිහාසයේ අපකීර්තිමත්ම සිදුවීමක් මේ ආකාරයට නවත්වා ගැනීමට කටයුතු කිරීම වැදගත් වෙයි. මාධ්‍ය නිදහස සම්බන්ධයෙන් නරක සේයාවක් අස්සෙන් වුවත් සිදුකළ මැදිහත්වීම අගය කළ යුතුයි.

තව ඩිංගෙන් ඩලස් දඩ බඩස් !

පුද්ගලයකු නීතිය විසින් සිරගත කරනු ලබන්නේ එම පුද්ගලයා යම් වරදකට වැරැදිකරුවකු වීම හෝ සැකකරුවකු වීම මතය. කුමන වරදක් සඳහා සිරගත වුවද, සිරකරුවන් බන්ධනාගාරය තුළ කල්ගත කළ යුත්තේ එහි නීති රීතිවලට යටත්වය. ඒ ආකාරයෙන් නීති සම්පාදනය කර ඇත්තේ සිරකරුවන් සතු මානුෂීය අයිතිවාසිකම් ආරක්ෂා කිරීම සඳහාය. බන්ධනාගාරගත සිරකරුවකුට සාමාන්‍ය පුද්ගලයකුට හිමි සියලු අයිතිවාසිකම් හිමි නොවන නමුත් මානුෂීය වශයෙන් ඔහු සතුවිය යුතු අයිතිවාසිකම් රැසක් නීතිය විසින් සුරක්ෂිත කර ඇත.

හිටපු බන්ධනාගාර රාජ්‍ය අමාත්‍ය ලොහාන් රත්වත්තේ මහතා අනුරාධපුර බන්ධනාගාරයට බීමතින් ඇතුළුවී එහි සිටි රැඳවූවන් කිහිප දෙනකුට තර්ජනය කළ බවට වූ පුවත බොහෝ දෙනාගේ අවධානයට යොමු වූයේ එය නීතියට පමණක් නොව සමස්ත මනුෂ්‍ය සංහතියටම නිගා දෙන සිද්ධියක් වීම නිසාය. මේ පිළිබඳ සිදු කෙරෙන පරීක්ෂණ තවමත් අවසන්ව නැති නමුත් එම සිද්ධියෙන් පසුව බන්ධනාගාර රාජ්‍ය අමාත්‍ය ධූරයෙන් ඉවත් වීමට රත්වත්තේ මහතා තීරණය කළේය.

එම සිද්ධියෙන් පසුව ඒ පිළිබඳ විවිධාකාරයේ මතවාද සමාජය තුළ පැතිරෙන්නට විය. බන්ධනාගාර කොමසාරිස්වරයා මෙන්ම ලොහාන් රත්වත්තේ මහතාද මාධ්‍යයට ප්‍රකාශ කළේ එවැනි ආකාරයේ සිදුවීමක් කිසිසේත්ම සිදු නොවූ බවය. කෙසේ නමුත් අදාළ සිදුවීම සම්බන්ධයෙන් සමාව ඉල්ලා සිටින බව අධිකරණ අමාත්‍ය අලි සබි්‍ර මහතා පසුගියදා පාර්ලිමේන්තුවේදී ප්‍රකාශ කිරීමද කැපීපෙනෙන සිදුවීමකි.

සමගි ජන බලවේගයේ පාර්ලිමේන්තු මන්ත්‍රීවරුන් වන මනෝ ගනේෂන්, කාවින්ද ජයවර්ධන සහ රෝහණ බණ්ඩාර යන මහත්වරුන් පසුගිය දිනෙක අනුරාධපුර බන්ධනාගාරයට ගොස් එහි රැඳවූවන් හමුවීමට තීරණය කළේ මෙවැනි පසුබිමකය. ඒ වන විට අමාත්‍ය නාමල් රාජපක්ෂ මහතාද එහි ගොස් අදාළ රැඳවූවන් මුණගැසී තිබිණි. බන්ධනාගාරය වෙත ගමන් කිරීම සඳහා දින නියම කරගත් සමගි ජන බලවේගයේ මන්ත්‍රීවරු තිදෙන ඒ පිළිබඳ නියමාකාරයෙන් බන්ධනාගාර උසස් නිලධාරීන්ගෙන් අවසර ගැනීමටද කටයුතු කර තිබිණි. කෙසේ නමුත් අනුරාධපුරයට ගිය මන්ත්‍රීවරු තිදෙනාට දැනගැනීමට ලැබුණේ තමන්ගේ පැමිණීම පිළිබඳ බන්ධනාගාර උසස් නිලධාරීන් අනුරාධපුර බන්ධනාගාර නිලධාරීන්ව දැනුවත් කර නැති බවය. ඒ හේතුවෙන් මන්ත්‍රීවරුන්ට බන්ධනාගාරය වෙතට ඇතුළු වීමට ඉඩ ලබාදිය නොහැකි බව එහි සිටි නිලධාරීන්ගේ මතය විය.

මේ හේතුවෙන් මන්ත්‍රීවරු තිදෙනා සහ එම අවස්ථාවේ එහි රාජකාරි කළ බන්ධනාගාර නිලධාරියා අතර මත ගැටුමක් ඇති වන ආකාරයද දක්නට හැකි විය. එහිදී මන්ත්‍රීවරු ප්‍රශ්න කළේ රජයේ ඇමැතිවරුන්ට බීමතින් රාත්‍රී කාලයේදී බන්ධනාගාරයට ඇතුළු විය හැකි නම් පෙර අවසරයද ලබාගෙන පැමිණි තමන්ට ඒ සඳහා අවස්ථාව හිමි නොවන්නේ මන්දැයි කියාය. එමෙන්ම පාර්ලිමේන්තු මන්ත්‍රීවරු ලෙස ජනතාව මුහුණ දෙන අසාධාරණයන් වෙනුවෙන් මැදිහත් වීමට තමන්ට අයිතියක් ඇති බවද මන්ත්‍රීවරු අවධාරණය කළහ.

එසේ වුවද, එහි සිටි නිලධාරියා ප්‍රකාශ කළේ තමන්ට එම අනුමැතිය ලබාදිය නොහැකි බවය. මන්ත්‍රීවරුන් තිදෙනා ඒ පිළිබඳ විමසීම සඳහා බන්ධානාගාරයේ උසස් නිලධාරීන් සම්බන්ධ කරගැනීමට උත්සාහ කළ නමුත් එම උත්සාහය සාර්ථක නොවීය. එබැවින් එහි සිටි බන්ධනාගාර නිලධාරියා හරහා අදාළ උසස් නිලධාරීන් සම්බන්ධ කරගැනීමටද මන්ත්‍රීවරු උත්සාහ කළහ. නමුත් එම උත්සාහයද අසාර්ථක වූයේ ඒ අවස්ථාවේ රැස්වීමකට සම්බන්ධ වී සිටින බැවින් මන්ත්‍රීවරු සමග දුරකතනයෙන් සාකච්ඡා කළ නොහැකි බව බන්ධනාගාර නිලධාරීන් දැනුම් දීමත් සමගිනි.

ඒ සමගම වහාම ක්‍රියාත්මක වූ හිටපු අමාත්‍ය මනෝ ගනේෂන් මහතා ඇති වී තිබෙන තත්ත්වය සම්බන්ධයෙන් කතානායකවරයා දැනුවත් කිරීමට පියවර ගත්තේය. ඉන් පසුව කාවින්ද ජයවර්ධන මන්ත්‍රීවරයාද කතානායකවරයාට සිද්ධිය දැනුම් දුන්නේය. මන්ත්‍රීවරුන්ට බන්ධනාගාරය තුළට ඇතුළු වීමට අවස්ථාව ලැබුණේ ඉන් අනතුරුවය. කතානායකවරයා බන්ධනාගාර නිලධාරීන්ට සිද්ධිය පිළිබඳ දැනුම් දීමෙන් පසුව අනුරාධපුර බන්ධනාගාරයේ උසස් නිලධාරියකු එම ස්ථානයට පැමිණි අතර ඒ වන විට විනාඩි හතළිස් පහකට අධික කාලයක් මන්ත්‍රීවරු එහි ගතකර තිබිණි.

මන්ත්‍රීවරු තිදෙන බන්ධනාගාරය වෙතට ගමන් කළේ එම උසස් නිලධාරියාද සමගය. එහිදී ත්‍රස්තවාදය වැළැක්වීමේ පනත යටතේ අත්අඩංගුවට ගෙන ඇති සිරකරුවන් 06 දෙනකු මුණගැසීමට මන්ත්‍රීවරුන්ට අවස්ථාව හිමි විය. පසුගියදා ලොහාන් රත්වත්තේ මහතා සම්බන්ධ සිදුවීමට මුහුණදී තිබුණේ එම සිරුකරුවන් හය දෙනාය.

ඒ අතරින් දෙදෙනකු අධිකරණය විසින් වැරැදිකරුවන් ලෙස නම්කර තිබුණු අතර අනෙක් සිරකරුවන් සිවු දෙනාම තවමත් බන්ධනාගාරගතව ඇත්තේ එල්.ටී.ටී.ඊ. සංවිධානයට අනුබල දීම සම්බන්ධයෙන් සැකකරුවන් ලෙසටය.

එම රැඳවූවන් සමග සාකච්ඡා කිරීමේදී මන්ත්‍රීවරුන්ට වැටහුණේ අදාළ සිදුවීම පිළිබඳ මාධ්‍ය ඔස්සේ වාර්තා වූ තොරතුරු 100%ක් නිවැරැදි බවය. ඇමැතිවරයා බන්ධනාගාරය තුළට පැමිණි ආකාරය සහ එහිදී සිදුවූ සිදුවීම් පෙළ සිරකරුවන්ගේ මුවින්ම දැන ගැනීමට මන්ත්‍රවරු තිදෙනාට හැකි විය. කෙසේ නමුත් රාජ්‍ය අමාත්‍යවරයා ඒ ආකාරයෙන් හදිසියේ බන්ධනාගාරය තුළට පැමිණියේ කුමන හේතුවකටදැයි යන්න ඒ කිසිවකු නොදැන සිටීමද කැපී පෙනෙන කරුණකි. සිරකරුවන් සියලු දෙනාම ප්‍රකාශ කළේ එයට හේතුව කුමක්දැයි යන්න තමන්ටද සිතාගත නොහැකි බවය. නමුත් එම සිද්ධියෙන් පසුව තම ජීවිත පිළිබඳ දැඩි අවිනිශ්චිතභාවයක් දැනෙන බවද රැඳවූවන්ගේ අදහස විය.

විශේෂත්වය වන්නේ එම රැඳවූවන් හය දෙනාගෙන් සිවු දෙනකුටම සිංහල භාෂාව ඉතා හොඳින් හැසිරවිය හැකි වීමය. දෙදෙනකුට සිංහල භාෂාව කතා කළ නොහැකි වුවත්, ඔවුන්ටද හොඳින් සිංහල තේරුම් ගැනීමේ හැකියාව ඇත. ඒ අතර සිටි එක් තරුණයකු වෙත මන්ත්‍රීවරුන්ගේ වැඩි අවධානය යොමු වූයේ ඔහු ඉතා හොඳින් සිංහල භාෂාව කතා කිරීම හේතුවෙනි. වසර දහතුනක් පුරා බන්ධනාගාරගතව සිටින එම තරුණයා මන්ත්‍රීවරුන්ට ප්‍රකාශ කළේ තමන්ට බන්ධනාගාරගත වෙද්දී, සිංහල පිළිබඳ කිසිදු දැනුමක් නොතිබූ බවත්, තමන් සිංහල ඉගෙන ගත්තේ බන්ධනාගාරය තුළදී බවත්ය.

“සිරගත වුණු එක හොඳයි නේද. හොඳට සිංහල ඉගෙන ගත්තනේ?” යනුවෙන් එහිදී එම තරුණයාට විහිළුවක්ද කිරීමට මනෝ ගනේෂන් මහතා පියවර ගත් අතර, කාවින්ද ජයවර්ධන මහතා ඔහුට ප්‍රකාශ කළේ නිදහස් වීමෙන් අනතුරුව ඔහු සතු සිංහල දැනුම යොදාගෙන දේශපාලනයට පැමිණීමේ හැකියාවද ඇති බවය.

එම සාකච්ඡාව අතරතුරේදී තමන් මුහුණ දුන් අවාසනාවන්ත සිදුවීම සම්බන්ධයෙන් දිගින් දිගටම කරුණු ඉදිරිපත් කිරීමට එම රැඳවූවන් පියවර ගෙන ඇත. එමෙන්ම තමන් කළ ඉල්ලීමකට අනුව අමාත්‍ය නාමල් රාජපක්ෂ මහතා තමන් හමුවීමට පැමිණි බවද, එහිදී තම ජීවිතවලට එල්ල වී ඇති තර්ජන පිළිබඳ දැනුවත් කිරීමට මෙන්ම තමන්ව තමන් උපන් භූමි ප්‍රදේශවලට ආසන්න බන්ධනාගාරයක් වෙත මාරුකර හරින මෙන් ඉල්ලා සිටි බවද රැඳවූවන් ප්‍රකාශ කර ඇත.

මේ සම්බන්ධයෙන් අප සමග අදහස් දැක්වූ සමගි ජන බලවේගයේ පාර්ලිමේන්තු මන්ත්‍රී කාවින්ද ජයවර්ධන මහතා සඳහන් කළේ එම රැඳවූවන්ගේ අයිතිවාසිකම් සම්බන්ධයෙන් දිගින් දිගටම පෙනී සිටීමට තමන් ඇතුළු සියලු මන්ත්‍රීවරුන් සූදානම් බවය. එමෙන්ම අදාළ සිදුවීමට සම්බන්ධ වූ අමාත්‍ය ලොහාන් රත්වත්තේ මහතා සම්බන්ධයෙන් නීතිමය පියවර ගැනීම පිළිබඳවද තමන් අවධානයෙන් සිටින බව ජයවර්ධන මහතා ප්‍රකාශ කළේය.

ජාති, ආගම් ලෙස මිනිසුන් වර්ග කිරීමට යෑමේ ඵල විපාක දශක ගණනාවක් පුරා අප අත්විඳිමින් සිටිමු. එබැවින් ජාතිය කුමක් වුවත්, අප මේ මොහොතේ එම සිරකරුවන් වෙනුවෙන් පෙනීසිටිය යුත්තේ ඔවුන්ද අපේ රටේ පුරවැසියන්ය යන හැඟීමෙනි. ඉහත ආකාරයේ දෙයක් සිදුව ඇත්නම් එය ඉතා බරපතළ කරුණක් වන බව අමුතුවෙන් කිව යුතු නැත. සිදු වූයේ කුමක්දැයි යන්න නිසියාකාරයෙන් විමර්ශනය කොට, වැරැදිකරුවන්ට නිසි දඬුවම් ලබාදෙන මෙන් අප ඉල්ලා සිටින්නේ ඒ නිසාය.

චන්දන පොන්නම්පෙරුම

(මව්රට )

මාධ්‍යවේදීන් රහස් පොලීසියට කැඳවීම ශීලාචාර සමාජයක නොවිය යුත්තක් බවත්, එවැන්නත් සිදුව තිබීම ගැන ජනමාධ්‍ය ඇමතිවරයා ලෙස තමාත්, රජයත් කණගාටුව පළ කරන බවත්, කැබිනට් මාධ්‍ය ප්‍රකාශක, ජනමාධ්‍ය අමාත්‍ය ඩලස් අලහප්පෙරුම  පැවසීය.

මෙම සිදුවීම ආණ්ඩුවක් ලෙස ප්‍රතික්‍ෂේප කරන බව කී අමාත්‍යවරයා එය නොවිය යුත්තක් බව ඉතා වගකීමෙන් ප්‍රකාශ කරන බව ද සඳහන් කළේය.

මාධ්‍යවේදීන් කිසිසේත් පොලීසියට, රහස් පොලීසියට කැඳවා ප්‍රශ්න කිරීම නොකළ යුතු බව අග්‍රාමාත්‍යවරයාද තමාට පැවසූ බව කී ඇමතිවරයා මාධ්‍ය ආයතන වෙත කිසි විටෙකත් රහස් පොලිස් නිලධාරීන් එවන්නේ නැති බව විෂය භාර ඇමති සරත් වීරසේකරත් ඉතා වගකීමෙන් පැවසූ බව කීවේය.

අමාත්‍යවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද(28) පැවති කැබිනට් ප්‍රකාශ දැනුම් දීමේ මාධ්‍ය හමුවේදී මාධ්‍යවේදියෙකු නැගූ පැනයකට පිළිතුරු දෙමිනි.

සුදුලූණු වංචාව සම්බන්ධයෙන් විෂය භාර අමාත්‍යවරයාට හා රාජ්‍ය අමාත්‍යවරයාට චෝදනා එල්ල කරමින් පාරිභෝගික කටයුතු අධිකාරියේ හිටපු විධායක අධ්‍යක්‍ෂ තුෂාන් ගුණවර්ධන මහතා කළ ප්‍රකාශයකට අදාළව ප්‍රශ්න කිරීම සඳහා එය වාර්තා කළ මාධ්‍යවේදීන් සහ එම පුවත්පත්වල කර්තෘවරුන් අපරාධ පරීක්‍ෂණ දෙපාර්තමේන්තුවට කැඳවා තිබීම සම්බන්ධයෙන් මෙහිදී එම මාධ්‍යවේදියා ජනමාධ්‍ය අමාත්‍යවරයාගෙන් ප්‍රශ්න කළේය.

එයට පිළිතුරු දෙමින් ඇමතිවරයා මෙසේ ද පැවසීය.

“පුවත්පත් කර්තෘවරුන් සහ මාධ්‍යවේදීන් රහස් පොලීසිය වෙත කැඳවා තිබූ නිවේදන අයිලන්ඩ් හා ලංකාදීප පුවත්පත් ආයතනවලින් මටත් යොමුකර තිබුණා. මේ ගැන අප බරපතල ලෙස කණගාටු වෙනවා. ආණ්ඩුවක් ලෙස මෙය ප්‍රතික්‍ෂේප කරනවා. මෙය නොවිය යුතු දෙයක් බව ඉතා වගකීමෙන් කියනවා. මේ සම්බන්ධයෙන් මා අගමැතිතුමාගෙන් විමසූ විට එතුමා ඉතා පැහැදිලිව පැවසුවේ මාධ්‍යවේදීන් කිසිසේත් පොලීසියට, රහස් පොලීසියට කැඳවා ප්‍රශ්න කිරීම නොකළයුතු බවයි. රහස් පොලිස් නිලධාරීන් කිසි ලෙසකත් මාධ්‍ය ආයතන වෙත එවන්නේ නැති බව විෂය භාර ඇමති සරත් වීරසේකරත් ඉතා වගකීමෙන් පැවසුවා.

ලංකාදීප පුවත්පතේ පළවූ කතුවැකියක් සම්බන්ධයෙන් එහි කතුවරයාට පවා ප්‍රකාශයක් ලබාදීමට පැමිණෙන ලෙස දැනුම් දී තිබුණා. ද අයිලන්ඩ් පුවත්පතේ ප්‍රවෘත්ති කර්තෘවරයා ඇතුළු හයදෙනෙක් පමණ මේ කැඳවූ අය අතර සිටියා.

හිටපු නිලධාරියෙක් සුදුලූණු වංචාව සම්බන්ධයෙන් වෙළඳ අමාත්‍ය බන්දුල ගුණවර්ධනට සහ රාජ්‍ය ඇමතිවරයාට ඇඟිල්ල දිගු කළ විට බන්දුල ඇමතිවරයා ඒ පිළිබඳ පැමිණිල්ලක් කළා. එතුමා මේ සම්බන්ධයෙන් ආයතන වශයෙන් කිසිවෙක් නම් කර තිබුණේත් නැහැ. බන්දුල ගුණවර්ධන වංචනික තක්කඩි දේශපාලනඥයකු නොවන බව අපි කවුරුත් දන්නවා. ඒ නිසා එතුමා ගොස් පැමිණිල්ලක් කිරීම යුක්ති සහගතයි. මෙහි වෙත තැනක පැටලිල්ලක් වී තිබෙනවා.

මේ සිදුවී තිබෙන්නේ ශිලාචාර සමාජයක නොවිය යුතු දෙයක්. ආණ්ඩුවක ගොරෝසු දරදඬු ඒකාධිපති නීතිවලට එරෙහිව පෑන අතට ගත් මාධ්‍යවේදියකු වී සිට ඩලස් අලහප්පෙරුම ජනමාධ්‍ය ඇමතිවරයා ලෙස සිටින මොහොතක මා කිසිසේත්ම මෙයට එකඟ නැහැ. මෙය බැහැර කිරීම ගැන අගමැතිතුමාට හා මහජන ආරක්‍ෂක අමාත්‍යවරයාට ස්තුතිය පළ කරනවා. ලංකාදීප කර්තෘවරයා ඇතුළු මාධ්‍යවේදීන්ට මා කණගාටුව පළ කරනවා.” යැයි ද අමාත්‍යවරයා පැවසීය.

ඉදිරියේදී කිසිදු ඉන්ධන හිඟයක් රට තුළ ඇති නොවන බව අමාත්‍ය  වෛද්‍ය රමේෂ් පතිරණ පවසයි.

කැබිනට් තීරණ දැනුම්දීමේ මාධ්‍ය හමුවට එක්වෙමින් ඔහු මේ බව සඳහන් කළේය.

ඩොලර් සංචිත අඩුවෙලා නිසා ඉන්ධන ආනයනයේ අර්බුදයක් තියෙනවා. ඒ නිසා ඔක්තෝබර් මස 01 වන දා දක්වා පැනවු නිරෝධායන ඇඳිරිනීතිය ඉවත්කිරීම සිදුනොවනවාදැයි එහිදි මාධ්‍යෙව්දින් නැගූ ප්‍රශ්නයකට පිළිතුරු දක්වමින් ඔහු පවසා සිටියේ,

"ඉතාම පැහැදිලවම කිසිම ඉන්ධන හිඟයක් නෑ. ආනයනය කිරීම සඳහා අවශ්‍ය ප්‍රතිපාදන රජය සතුව තිබෙනවා. ඒ නිසා ඉන්ධන හිඟයක් පිළිබඳ කිසිදු සැකයක් හෝ අනියත බියක් ලංකාවේ ජනතාව ඇති කරගත යුතු නෑ." යන්නයි.