V2025

පුවත්

රංගජීව සහ ඔහුට වෙඩි තැබූ ලොකු පැටියා එකම රෝහලේ !

පොලිස් මත්ද්‍රව්‍ය නාෂක කාර්යාංශයේ පොලිස් පරීක්‍ෂක නියෝමාල් රංගජීව  වෙත පිළියන්දල ප්‍රදේශයේදී වෙඩි තැබීමේ සිදුවීමට අදාළව සැකපිට බන්ධනාගාර ගතකර සිටින පාතාල සාමාජිකයකු බන්ධනාගාර ජේලර් වරුන්ගේ පහරදීමකට ලක්ව බන්ධනාගාර රෝහලට ඇතුළත්කර  ඇති බව බන්ධනාගාර ආරංචිමාර්ග සඳහන් කරයි.

වාර්තා වන  ආකාරයට  සුජීව රුවන් කුමාර නොහොත් ලොකු පැටියා නම් පාතාල සාමාජිකයා මෙසේ ප්‍රහාරයට ලක්ව ඇති අතර අදාළ පහරදීම සඳහා ජේලර්වරුන් 20ක් පමණ සම්බන්ධ බවද දැනගන්නට ඇත.

මෙසේ පහරකෑමට ලක්වූ පාතාල සාමාජිකයා මේ වන විට ඇතුලත් කර සිටින රෝහලේම  වැලිකඩ බන්ධනාගාරයේ වෙඩි තැබීම සම්බන්ධයෙන් සැකපිට අත්අඩංගුවට ගෙන රක්ෂිත බන්ධනාගාර ගත කර සිටින පොලිස් මත්ද්‍රව්‍ය නාෂක කාර්යාංශයේ පොලිස් පරීක්‍ෂක නියෝමාල් රංගජීව ද ප්‍රතිකාර ලබමින් සිටින බවද එම ආරංචිමාර්ග සඳහන් කරයි.

මේ පිළිබඳ වැඩිදුර තොරතුරු දැනගැනීම වෙනුවෙන් අප බන්ධනාගාර ප්‍රධානීන් ඇමතීමට උත්සාහ කලත් එය සාර්ථක වුයේ නැත.

Comment (0) Hits: 536

මිහින් ලංකා ප්‍රථම අධ්‍යක්ෂ මණ්ඩලය : අනුමැතියකින් තොර පත්කිරීමක් !

මිහින් ලංකා ගුවන් සේවයේ ප්‍රථම අධ්‍යක්ෂ මණ්ඩලය පත් කර ඇත්තේ රජයේ අනුමැතියකින් තොරව බව අනාවරණ වී ඇත. ඒ, ශ්‍රී ලන්කන් ගුවන් සේවය, මිහින් ලංකා සහ ශ්‍රී ලන්කන් කේටරින් ආයතනවල සිදුවූ දූෂණ සහ අක්‍රමිකතා සම්බන්ධයෙන් සොයා බලන ජනාධිපති කොමිසමේ සාක්ෂි විභාගයේදිය. 

අදාළ කොමිසම අද (11) 4 වන දිනයටත් රැස්වූ අතර එහිදී අනාවරණ වී ඇත්තේ මිහින් ලංකා ප්‍රථම අධ්‍යක්ෂ මණ්ඩලය පත් කිරීමට අදාළව රජය කිසිදු අනුමැතියක් හෝ බලය පැවරීමක් සිදුකර නොමැති බවය.

Comment (0) Hits: 451

ගොඩහේවාගේ වංචා නඩුව ඔක්තෝබරයට කල්යයි !

ශ්‍රී ලංකා විනිමය හා සුරැකුම් කොමිසමට අයත් රුපියල් ලක්ෂ 50ක මුදලක් නීතිවරෝධී ලෙස ලබාදුන් බවට චෝදනා එල්ල වී ඇති එම කොමිසමේ හිටපු සභාපති ආචාර්ය නාලක ගොඩහේවා ඇතුළු විත්තිකරුවන් තුන්දෙනෙකුට එරෙහිව ගොනු කර ඇති නඩු විභාගය ඔක්තෝබර් 16 වනදා දක්වා කල් තැබීමට කොළඹ මහාධිකරණය  නියම කර ඇත.

එම නඩුව අද(11) කොළඹ මහාධිකරණ විනිසුරු ආර්.ගුරුසිංහ මහතා ඉදිරියේ කැඳවනු ලැබූ අවස්ථාවේ මෙම නියෝගය නිකුත් කල අතර ඊට හේතුවූයේ  විත්තිය වෙනුවෙන් පෙනී සිටි නීතිඥවරයා අසනීප තත්ත්වයෙන් පසුවන බැවින් නඩු විභාගය කල් දමන මෙන් ඔහුගේ නීතිඥවරුන් සිදුකල ඉල්ලීමක්ය.

පාර්ලිමේන්තු මන්ත්‍රී නාමල් රාජපක්ෂ මහතා යටතේ ක්‍රියාත්මක වූ තාරුණ්‍යට හෙටක් සංවිධානයේ කටයුතු සඳහා ශ්‍රී ලංකා විනිමය හා සුරැකුම් කොමිසමට අයත් රුපියල් ලක්ෂ 50ක මුදලක් නීති විරෝධී ආකාරයට ලබාදීම තුළින් පොදු දේපල පනත යටතේ වරදක් සිදුකර ඇතැයි චෝදනා කරමින් එම කොමිසමේ හිටපු සභාපති ආචාර්ය නාලක ගොඩහේවා ඇතුළු විත්තිකරුවන් තුන්දෙනෙකුට එරෙහිව නීතිපතිවරයා මෙම නඩුව පවරා ඇත.

Comment (0) Hits: 579

බැඳුම්කර සල්ලි ගැන අහන්න : දයාසිරි CID කැඳවයි !

පර්පෙචුවෙල් ටෙ‍්‍රෂරීස් සමාගමේ හිමිකරු වන අර්ජුන් ඇලෝසියස්ගෙන් මුදල් ලබාගත් සිද්ධියට ප්‍රකාශයක් ලබාදීම සඳහා පාර්ලිමේන්තු මන්ත්‍රී දයාසිරි ජයසේකර අද (11) පෙරවරුවේ අපරාධ පරීක්ෂණ දෙපාර්තමේන්තුව වෙත කැඳවා ඇත.

ආරක්ෂක අංශ වාර්තා සඳහන් කරන ආකාරයට මෙහිදී හුදු ප්‍රකාශයක් පමණක් ලබා ගැනීමට නියමිත අතර අත්අඩංගුවට ගැනීමක් සිදුවන්නේ නැත.

දයාසිරි ජයසේකර මන්ත්‍රීවරයා පර්පෙචුවෙල් ටෙ‍්‍රෂරීස් සමාගමේ හිමිකරු වන අර්ජුන් ඇලෝසියස්ගෙන් මුදල් ලබාගත් බවට පසුගියදා කථාබහක්  ඇතිවූ අතර ඊට අදාළ විශේෂ  ප්‍රකාශයක් කරමින් දයාසිරි මන්ත්‍රීවරයා තමන්ට 2015  මැතිවරණ සමයේ රුපියල් මිලියනයක චෙක්පතක් ලැබී ඇති බව පිළිගනු ලැබිණ.

එසේම මීට අදාළ  සාක්ෂි සහිත වාර්තාවක් ප්‍රශ්නගත බැඳුම්කර ගනුදෙනුව සම්බන්ධ නඩු විභාගය හමුවේද ඉදිරිපත්ව ඇත.

Comment (0) Hits: 576

රාජපක්ෂ සමයේ සිදුකල අපරාධ කිහිපයක විමර්ශන කඩිනම් කරයි !

ජ්‍යෙෂ්ඨ මාධ්‍යවේදී ලසන්ත වික්‍රමතුංග ඝාතනය, මාධ්‍යවේදී ප්‍රගීත් එක්නැළිගොඩ අතුරුදහන් කිරීම, ද නේෂන් පුවත්පතේ සම කර්තෘ කීත් නොයාර් පැහැරගැනීම සහ රගර් ක්‍රීඩක වසීම් තාජුඩීන් ඝාතනය ඇතුළු සිදුවීම් කිහිපයකට අදාළ විමර්ශන මෙම වසර අවසානයට පෙර අවසන් කිරීමට ජනාධිපතිවරයා සහ අග්‍රාමාත්‍යවරයා අතර ඉකුත්දා පැවති හමුවකදී තීරණය කර ඇති බව මව්බිම පුවත්පත වාර්තා කර ඇත.

වාර්තා කර ඇති ආකාරයට සම්මුති ආණ්ඩුවේ කටයුතු සම්බන්ධව මතුවී ඇති මතභේද ඉවත්කර එය ඉදිරියට පවත්වාගෙන යාම සම්බන්ධව සාකච්ඡා කිරීමට පක්ෂ දෙකෙහි ජ්‍යෙෂ්ඨයින් මහගමසේකර මාවතේ පිහිටි ජනාධිපති නිල නිවසේ හමුවී ඇති අතර එහිදී මෙම තීරණය ගෙන ඇත.

අදාළ තීරණය සම්බන්ධව පොලිස්පතිවරයා කැඳවා ඒ මොහොතේදීම අවශ්‍ය උපදෙස් ලබාදීමට ජනාධිපතිවරයා කටයුතු කර තිබෙන බවද එම පුවතේ සඳහන්ව ඇත.

Comment (0) Hits: 535

ශ්‍රීලනිප 16 කණ්ඩායම සහ ගෝඨාභය අතර විශේෂ හමුවක් !

ආණ්ඩුවෙන් ඉවත් වූ ශ‍්‍රී ලංකා නිදහස් පක්‍ෂයේ මැති ඇමතිවරුන් 16 සහ ආරක්ෂක අමාත්‍යංශයේ හිටපු ලේකම් ගෝඨාභය රාජපක්‍ෂ අතර විශේෂ හමුවක් අඟහරුවාදා (12) පස්වරු 3.00 ට මිරිහාන, නුගේගොඩ පිහිටි හිටපු ආරක්‍ෂක ලේකම්වරයාගේ නිවසේදී පැවැත්වීමට නියමිත බව වාර්තා වෙයි.

මේ සම්බන්ධව මාධ්‍ය වෙත ප්‍රකාශයක් කරමින් මන්ත්‍රී චන්දිම වීරක්කොඩි සඳහන් කර ඇත්තේ   තම කණ්ඩායමේ ඉදිරි දේශපාලන සැළසුම් හා ආණ්ඩුවට එරෙහි ජනමතයක් ගොඩ නැඟීම පිළිබඳව මෙහිදී සාකච්ඡා කරන බවය.

එසේම ඉදිරියේදී ඒකාබද්ධ විපක්‍ෂයේ නායක පාර්ලිමේන්තු මන්ත‍්‍රී දිනේෂ් ගුණවර්ධන, ජාතික නිදහස් පෙරමුණ, පිවිතුරු හෙළ උරුමය, ප‍්‍රජාතන්ත‍්‍රවාදී වාමංශික පෙරමුණ හා ජනතා විමුක්ති පෙරමුණ සමඟද සාකච්ඡා කිරීමට බළාපොරොත්තු වන බවද මන්ත‍්‍රීවරයා සඳහන් කර ඇත.

 ශ්‍රී ලංකා නිදහස් පක්‍ෂයේ 16 මන්ත‍්‍රී කණ්ඩායම මීට පෙර හිටපු ජනාධිපති මහින්ද රාජපක්‍ෂ සහ විපක්‍ෂ නායක ආර්.සම්පන්ධන් යන මහත්වරුන් සමඟද සාකච්ඡා කර ඇත.

Comment (0) Hits: 457

මඩ මෛත්‍රීගේ බොරුවලට එරෙහිව නලින්ද නඩු මගට !

තමන් සම්බන්ධයෙන් බොරු ප්‍රචාර ගෙනයන මෛත්‍රී ගුණරත්න නැමැත්තාට එරෙහිව අධිකරණමය ක්‍රියාමාර්ග ගන්නා බව ජනතා විමුක්ති පෙරමුණේ පාර්ලිමේන්තු මන්ත්‍රී වෛද්‍ය නලින්ද ජයතිස්ස සඳහන් කරයි.

පසුගිය 09 වනදා රාත්‍රී ශ්‍රව්‍ය දෘෂ්‍ය මාධ්‍යවල පළවූ එම සාවද්‍ය ප්‍රවෘත්තිය සම්බන්ධයෙන් සිය ෆේස්බුක් පිටුවේ සටහනක් යොදමින් වෛද්‍ය නලින්ද ජයතිස්ස මහතා මේ බව සඳහන් කර තිබේ.

“මා විසින් මාධ්‍යවේදී මහේෂ් සේනානායක මහතා හරහා ඇලෝසියස්ගෙන් මුදල් ලබාගත් බව මෛත්‍රී ගුණරත්න විසින් කරන ප්‍රකාශය පිළිබඳව…

ඇලෝසියස්ගෙන් මුදල් ලබාගැනීම පිළිබඳ කරුණු සහිතව හෙළිදරව් වූ අය දැන් ඒ චෝදනා අන් අය මත පටවා, තමන්ට එල්ලවී ඇති චෝදනා නොමග යැවීම සඳහා පසුගිය දින කිහිපය පුරා උත්සාහ කරණු ලැබීය. මේ “මෛත්‍රීගේ” හඬ පිටුපස සිටින පුද්ගලයා කවුදැයි හඳුනාගැනීම අපට අපහසු නැත.

මේ පිළිබඳව මෛත්‍රී ගුණරත්නට එරෙහිව නීතිමය ක්‍රියාමාර්ග ගැනීමට කටයුතු කරමි.

කප්පරක් දූෂණයේ යෙදෙමින් මුළු සමාජයම ගඳගස්වන මෙවැනි පුද්ගලයන් පිළිබඳව තීරණ ගැනීම ජනතාවට බාර කරමි.” යැයි ඒ මහතා සිය ෆේස්බුක් පිටුවේ සඳහන් කර තිබේ.

Nalinda Jayathissa FB

Comment (0) Hits: 548

මහින්දගේ බදු ප්‍රතිපත්තිය බන්දුල කියයි : ඒ, වක්‍ර බදු වැඩිකර - ගජමිතුරන්ට සහන දීමයි

මහින්ද රාජපක්ෂගේ නායකත්වයෙන් යුතු රජයක් පත්වූ වහාම නව දේශීය ආදායම් පනත සංශෝධනය කර  2006/10 පනතේ පිටු 44ක් පුරා ලබාදුන්  ආකාරයට සිය ගජමිතුරු නඩයට පමණක් බදු සහන ලබාදෙන බව එම පාර්ශවය  ප්‍රසිද්ධියේ සඳහන් කර ඇති බව වාර්තා වෙයි.

ඒ  ඒකාබද්ධ විපක්ෂය නියෝජනය කරන පාර්ලිමේන්තු මන්ත්‍රී බන්දුල ගුණවර්ධන අද (10)  පැවති උත්සවයකට එක්වෙමින් සිදුකර තිබෙන ප්‍රකාශයක් නිසාය.

එහිදී බන්දුල ගුණවර්ධන මන්ත්‍රීවරයා සඳහන් කර ඇත්තේ  2006 වසරේදී මහින්ද රාජපක්ෂ මහතාගේ ආණ්ඩුව තුළින් බදු සහන විශාල ප්‍රමාණයක් දුන් බවත් නව දේශීන ආදායම් පනත මඟින් එම සහන පිටු දෙකකට සීමා කර පසුගිය ආණ්ඩුවෙන් ලබාදුන් බදු සහන කප්පාදු කර ඇති බවද ඔහු සඳහන් කර ඇත. 

එහෙත් එම බදු සහන මොනවාද යන්න හෝ දැනට නව දේශීය ආදායම් පනත හරහා ඉපයීමට අපේක්ෂිත බදු ආදායම 20%කින් අඩු කිරීමට සංශෝධනය කරන බදු කොන්දේසි මොනවාද යන්නද කිසිඳු අවස්ථාවක ඔවුන් සඳහන් කරන්නේ නැත.

Comment (0) Hits: 582

ලංකා ඊ නිවුස් කර්තෘ වහාම අත්අඩංගුවට ගන්නා ලෙස මෛත්‍රී බ්‍රිතාන්‍යයෙන් ඉල්ලයි

ලංකා ඊ නිවුස් සංස්කාරක ප්‍රදීප් සඳරුවන් මහතා අත්අඩංගුවට ගැනීමට හෝ මෙරටට එවන ලෙසට ජනාධිපති මෛත්‍රීපාල සිරිසේන මහතා ඊයේ (9) දිනයේදී බ්‍රිතාන්‍යයෙන් ඉල්ලා සිටි බව වාර්තා වේ. මේ පිළිබඳ වාර්තා කරන සන්ඩේ ටයිම්ස් වෙබ් අඩවිය පවසන්නේ බ්‍රිතාන්‍ය මහ කොමසාරිස් ජේම්ස් ඩෝරිස් මහතා සමග පැවති කෙටි සාකච්ඡාවක් අතරතුරදී  ජනාධිපතිතුමා මෙම ඉල්ලීම සිදුකර තිබෙන බවයි.

ජනාධිපති ලේකම් ඔස්ටින් ප්‍රනාන්දු මහතා, ජනාධිපති සම්බන්ධීකාරක ශිරාල් ලක්තිලක මහතා හා ආරක්ෂක ලේකම් කපිල වෛද්‍යරත්න මහතා ද මේ හමුවට සහභාගී වී ඇතැයි වාර්තා වේ. මෛත්‍රීපාල සිරිසේන මහතා සම්බන්ධයෙන් ආන්දෝලනාත්මක ලිපි පළකිරීමත් සමග ලංකා ඊ නිවුස් වෙබ් අඩවිය පසුගිය නොවැම්බර් මස සිට විදුලි සංදේශ කොමිෂන් සභාව විසින් වාරණයට ලක්කෙරුණි.

ශ්‍රී ලංකා ගාර්ඩියන්

Comment (0) Hits: 698

රවීට යළිත් ඇමතිකම ! 

හිටපු අමාත්‍ය  රවි කරුණානායකට එළැඹෙන සතියේදී යලිත් අමාත්‍යධුරයක් හිමිවන බවට දේශපාලන ආරංචිමාර්ග සඳහන් කරයි.

වාර්තා වන ආකාරයට ඉදිරියේදී එජාප පසුපෙල මන්ත‍්‍රින් 06 දෙනෙකුට නියෝජ්‍ය ඇමති ධුර ලබාදීමක් ද සිදුවීමට නියමිතව ඇති අතර ඊට සමගාමීව රවී කරුණානායක මන්ත්‍රීවරයාට මෙම අමාත්‍යධුරය ලබාදීමට නියමිතව ඇත.

මේ සම්බන්ධව ජනාධිපතිවරයාගේ පාර්ශවයෙන් විරෝධයක් පලව නැති බවද වාර්තා වන අතර රවී  කරුණානායක මන්ත්‍රීවරයා  සම්බන්ධයෙන් චෝදනා ඇත්නම් මාස දෙකක් තුල ඒවා ගොනු කරන ලෙස දන්වා තිබූ කාලය  එළැඹෙන 15 වැනිදායින් අවසන් වන අතර නීතිපති දෙපාර්තමේන්තුවද   මන්ත්‍රීවරයාට  කැබිනට් ඇමති ධුරයක් ලබා නොදීමට තරම් කාරණාවක් නැති බව දැනුම්දී ඇති බවද වාර්තා වෙයි.

Comment (0) Hits: 476

ගාමිණී වියන්ගොඩ සිවිල් සමාජයෙන් ඉවත්වෙන්න සූදානම් !

තමන් අර්ජුන් ඇලෝසියස්ගෙන් හෝ ඔහුට අනුබද්ධ සමාගමකින් මුදල් අරගෙන ඇති බවට ඔප්පු කරන්නේ  නම් සිවිල් සංවිධාන ක්‍රියාකාරීත්වයෙන් ඉවත්වීමට සූදානම් බව පුරවැසි බලය සංවිධානයේ කැඳවුම්කරු ගාමිණි වියන්ගොඩ සඳහන් කර ඇත.

අද (10)  පැවති මාධ්‍යහමුවකට එක් වෙමින් ගාමිණී වියන්ගොඩ මහතා මේ බව සඳහන් කර ඇත.

එම මාධ්‍යහමුවට එක්වු ශ්‍රී ජයවර්ධනපුර විශ්ව විද්‍යාලයේ ආචාර්ය, පුරවැසි බලය සංවිධානයේ සම කැඳවුම් කරු දඹර අමිල හිමියන් ප්‍රකාශ කළේ මෙම හයිය නිවැරදි භාවයේ ශක්තියක් බවය.

Comment (0) Hits: 504

පළා බබාලා ශ්‍රේෂ්ඨාධිකරණ නියෝග කඩකරලා - ඇමති අකිලගෙන් චෝදනා

පළාත් සභා කිහිපයක් ශ්‍රේෂ්ඨාධිකරණ නියෝගයට පිටුපා පළාත් පාසල්වල  ප්‍රාථමික  ශ්‍රේණි සඳහා  දරුවන් ඇතුළත්  කර තිබෙන බවට තොරතුරු වාර්තා වී ඇති බව  අධ්‍යාපන අමාත්‍ය  අකිල විරාජ් කාරියවසම් සඳහන් කරයි.

වයඹ සහ ඌව පළාත් සභාවල මෙවැනි සිද්ධි ගණනාවක් වාර්තා වී තිබෙන බවත්  දේශපාලකයින් හිතුමතේ තම  හිතවතුන්ගේ හා ඥාතීන්ගේ දරුවන් රැසක් මෙම පළාත් පාසල්වලට ඇතුළත් කර ඇති බවත් හෙළි වී තිබෙන බවත්   මෙවැනි අත්තනෝමතික ක්‍රියා කිසා  ගමේ පොඩි පොඩි පාසල් වැසී යා හැකි බවත් අමාත්‍යවරයා සඳහන් කර ඇත.

මේ හේතුවෙන් පන්ති කාමරයක සිසුන්  ප්‍රමාණය ක්‍රමානුකුලව  අඩු කිරීමට ශ්‍රේෂ්ඨාධිකරණය  ලබා දී ඇති නියෝගය පවා උල්ලංඝණයවී තිබෙන බවත්  මෙම බඳවා ගැනීම නව ජාතික අධ්‍යාපන ප්‍රතිපත්තිය සැකසීමේ වැඩපිළිවෙළටද  මරු පහරක්  බවත්  අමාත්‍යවරයා වැඩිදුරටත් සඳහන් කර තිබේ.

Comment (0) Hits: 477

අතුරුදන්වූවන් පිළිබඳ කාර්යාලයේ මීළඟ රැස්වීම ත්‍රිකුණාමලයේ !

අතුරුදන්වූවන් පිළිබඳ කාර්යාලයේ මීළඟ ප්‍රාදේශීය රැස්වීම ත්‍රිකුණාමලය  හින්දු සංස්කෘතික ශාලාවේදී  ජුනි 13 වනදා  පැවැත්වීමට නියමිතය.

අතුරුදන්වූවන්ගේ පවුල්වල සාමාජිකයින්, අතුරුදන්වූවන් පිළිබඳ කටයුතු කරන සිවිල් සංවිධාන සහ ජනමාධ්‍ය සමග මෙහි ඉදිරි කටයුතු පිළිබඳව අදහස් හුවමාරු කරගැනීමත් අතුරුදන්වූවන් පිළිබඳ කාර්යාලයේ ව්‍යුහය සහ මෙහෙයුම් කටයුතුවලට ජනතාවගේ යෝජනා ඇතුළත් කිරීම සඳහා ජනතා අදහස් විමසීමත් මෙම ප්‍රාදේශීය රැස්වීම්වලින් අපේක්ෂා කෙරේ.

ජනතාව සමග සංවාද කෙරෙන මෙම රැස්වීම් මාලාව  මේ වන විට  මන්නාරම, මාතර හා මුලතිව් දිස්ත්‍රික්කවලදී  පවත්වා ඇත.

අතුරුදන්වූවන් පිළිබඳ කාර්යාල පනත 2016 වසරේදී පාර්ලිමේන්තුවේ සම්මත වූ අතර කාර්යාලය සඳහා කොමසාරිස්වරුන් පත් කෙරුණේ 2018 මාර්තු 01 වනදාය.

Comment (0) Hits: 498

භූමිතෙල් සහනය හෙට සිට ! 

ධිවර ජනතාව ඇතුළු අඩු අදායම්ලාභී ජනතාව මුහුණ දී සිටින අපහසුතාව සළකා ලබන සඳුදා සිට අඩු මිලට භූමිතෙල් ලබා දීමට රජය තීරණය කළ බව ධිවර හා ජලජ සම්පත් සංවර්ධන සහ ග්‍රාමීය ආර්ථිකය පිළිබද රාජ්‍ය අමාත්‍ය දිලිප් වෙදආරච්චි  පවසයි.

භූමිතෙල් ගැටලුව පිළිබදව අග්‍රාමාත්‍ය රනිල් වික්‍රමසිංහ මහතා සමඟ ඉකුත් බදාදා පාර්ලිමේන්තුවේදී කරන ලද සාකච්ජාව සහ  මුදල් අමත්‍යවරයා ඇතුළු මහා භාණ්ඩාගාර ඉහළ නිලධාරීන් සමඟ සිදු කළ  සාකච්ජාවල ප්‍රතිඵලයක් ලෙස මෙලෙස භූමිතෙල් මිල පහත දැමීමට හැකි වූ බවද රාජ්‍ය අමාත්‍යවරයා සඳහන් කර ඇත.

ඒ අනුව ලබන සදුදා සිට භූමිතෙල් ලීටරයක් රුපියල් 70 ත් 80 ත් අතර මුදලකට ලබාගැනීමට මෙරට ජනතාවට හැකි බවත්  අදාළ  අමාත්‍යාංශයේ රාජ්‍ය අමාත්‍ය මාධ්‍ය ඒකකය නිකුත් කල නිවේදනයේ දැක්වේ.

Comment (0) Hits: 439

අභාවප්‍රාප්ත සෝමවීරයන්ට අගමැතිගෙන් ශෝක ප්‍රකාශයක් !

ඊයේ (09) අභාවයට පත් ප්‍රවීන කලාකරුවකු වූ සෝමවීර සේනානායක සම්බන්ධව අග්‍රාමාත්‍ය රනිල් වික්‍රමසිංහ ශෝක ප්‍රකාශයක් නිකුත් කර ඇත.

ජුනි 09 වනදා නිකුත් කර තිබෙන ශෝක ප්‍රකාශය පහත පළවේ.

ප්‍රවීන සාහිත්‍යධර ටෙලිනාට්‍ය සිනමා තිර රචිත පුවත්පත් කලාවේදී සෝමවීර සේනානායක මහතා සාහිත්‍ය කලා ක්ෂේත්‍රයේ නොමැකෙන මතක සටහන් තැබූ ජ්‍යෙෂ්ඨ සාහිත්‍යධරයෙකි.

පාසල් ශිෂ්‍ය සමයේදී පුවත්පත් සඟරා සඳහා ලිපි ලියමින් ලේඛන කලාවේ අත්පොත් තැබූ ඔහු 1966 වසරේ විශ්වවිද්‍යාලයෙන් පිටවී ලේක් හවුස් ආයතනයේ රැකියාවට පිවිස මුල් කාලයේ චිත්‍ර කතා සඳහා කතා නිර්මාණය කරන්නේය. ලංකාවේ පළමු චිත්‍ර කතා පත්තරය වූ සතුට පුවත්පතේ චිත්‍ර කතා කිහිපයක් ලියමින් සාම්ප්‍රදායික චිත්‍ර කතා කලාවට නව මුහුණුවරක් ගෙන දෙන්නට සමත් විය.

පුවත්පත් කලාවේදියෙකු ලෙස කටයුතු කරන අතරම, 1972 වසරේ මාවතේ ගීතය නවකතාව පළ කිරීම සමග ඔහු නවකතාකරුවෙකු ලෙස අභිශේක ලබන්නේය. පොදු ජන හදට සමීප කතා රසයෙන් අනූන නවකතා ලියමින් පාඨක ප්‍රසාදය දිනාගත් සෝමවීර සේනානායකයන්, රූපවාහිනියේ ආගමනයත් සමග එකී නවීණ තාක්‍ෂණය සහ සාහිත්‍ය කලාවේ සුසංයෝගය මනාව වටහා ගනිමින් ටෙලි තිර කතා රචනයට පිවිසියේය. සෝමවීරයන්ගේ පළමු ටෙලි තිර කතාව ඔහුගේම නවකතාවක් ඇසුරෙන් ලියවුණු යශෝරාවයයි. නවකතාවක් ටෙලි නිර්මාණයකට නැඟී අතිශය සාර්ථක වූ පළමු අවස්ථාව ලෙස මෙය සැලකිය හැකිය.

ඔහු විසින් රචිත ප්‍රාසාංගික ටෙලිනාට්‍ය 30 ක් සහ 200 කට අධික ඒකාංගික තිර රචනා අතර, පළිඟු මැණිකේ, දූදරුවෝ, අසල් වැසියෝ වැනි ටෙලි නිර්මාණ අදත් ප්‍රේක්ෂක මනසින් මැකී නොවන සාර්ථක නිර්මාණ වේ. සිනමා තිර රචනයට ද දස්කම් පෑ ඔහු සමස්ත ජීවිතය සාහිත්‍ය කලාව වෙනුවෙන්ම කැප කළ අපේ කාලයේ සුවිශේෂ සාහිත්‍යධරයෙකි.

සෝමවීර සේනානායක මැතිතුමාගේ සදානුස්මරණීය සාහිත්‍ය කලා මෙහෙවරට ගෞරවනීය ආචාර්ය පුදකරමින් එතුමාට අමා මහ නිවන් සුව අත්වේවායි ප්‍රාර්ථනා කරමි.

රනිල් වික්‍රමසිංහ

අග්‍රාමාත්‍ය

Comment (0) Hits: 507

උතුරු නැගෙනහිර සංවර්ධනය මෙහෙයවන්න : විශේෂ කාර්ය සාධන බලකායක් !

උතුර - නැගෙනහිර පළාත් වල සංවර්ධන කටයුතු මෙහෙය වීමට හා අධීක්ෂණය කිරීමට 48 දෙනෙකුගෙන් යුත් කාර්ය සාධන බලකායක් පිහිටුවීමට ජනාධිපතිවරයා කටයුතු කර ඇති බව වාර්තා වෙයි.

ගැසට් නිවේදනයකින් පත් කර ඇති එම කාර්ය සාධන බලකායේ ප්‍රධානියා ලෙස ජනාධිපතිවරයා පත්ව සිටින අතර  අගමැතිවරයා ද ඇතුළුව තවත් කැබිනට් අමාත්‍යවරු 15ක්, පළාත් දෙකේ ආණ්ඩුකාරවරු හා පළාත් ප්‍රධාන අමාත්‍යවරු දෙදෙනා , අමාත්‍යාංශ කිහිපයක ලේකම්වරු කිහිපදෙනෙක් සහ ත්‍රිවිධ හමුදා ප්‍රධානීන්ගෙන් එම කාර්ය සාධන බලකාය සමන්විතව ඇත.

යුද්ධය අවසන් වීමෙන් පසු උතුරු නැගෙනහිර පළාත් වල සංවර්ධන කටයුතු ආරම්භ වූ අතර ඒවා කඩිනම් කිරීම සඳහා ජනාධිපතිවරයා මෙම තීරණය ගෙන ඇති අතර ඒ අනුව මෙම කාර්ය සාධන බලකාය විසින් උතුරු හා නැගෙනහිර පළාත් වල ක්‍රියාත්මක සංවර්ධන ව්‍යාපෘතිවල ප්‍රගතිය පිළිබඳ සොයා බලන අතර තවදුරටත් ක්‍රියාත්මක කළ යුතු නව ව්‍යාපෘති සම්බන්ධයෙන් සැලසුම් සකස් කිරීමට නියමිතව ඇත.

අදාළ ප්‍රදේශවල ප්‍රමුඛ අවශ්‍යතා පිළිබඳ සලකා බලමින් එම ක්ෂේත්‍ර සහ පුද්ගල කණ්ඩායම් ඉලක්ක කර ගනිමින් මෙම නව වැඩපිළිවෙල ක්‍රියාත්මක අතර  මෙම සංවර්ධන ව්‍යාපෘති වල ආයෝජනය කිරීම සඳහා පෞද්ගලික අංශයට දායක විය හැකි බවත් එය ද්විපර්ෂික හෝ බහුපාර්ශ්වික විය හැකි බවද වාර්තාවී තිබේ.

Comment (0) Hits: 535

සුදර්ශනී පරදවපු හේතුව : ප්‍රසන්න හෙළිකරයි

නියෝජ්‍ය කථානායක තේරීමේ ඡන්දයේදී තමා සුදර්ශනී ප්‍රනාන්දුපුල්ලේ මහත්මියට ඡන්දය ලබා නොදුන්නේ සීදුව නගර සභාව එක්සත් ජාතික පක්ෂය ජයග්‍රහණය කරවීම සඳහා ඔවුන්ගේ සහය හිමිවූ නිසා බව පාර්ලිමේන්තු මන්ත්‍රී ප්‍රසන්න රණතුංග සඳහන් කරයි.

ආණ්ඩුවෙන් ඉවත්වූ මන්ත්‍රීවරුන් 16 දෙනා හිටපු ජනාධිපති මහින්ද රාජපක්ෂ මහතාගේ නායකත්වය යටතේ පොහොට්ටුව හෝ වත්මන් ජනාධිපතිවරයාගේ නායකත්වය යන දෙකෙන් එකක් තෝරාගත යුතු බවද මන්ත්‍රීවරයා සඳහන් කර ඇත.

කෙසේ වුවත්  සුදර්ශනී ප්‍රනාන්දුපුල්ලේ මන්ත්‍රීවරිය නියෝජ්‍ය කතානායක ජන්දය සඳහා ඉදිරිපත් වූයේ මහින්ද රාජපක්ෂගේ අනුදැනුමද ඇතිව බව ප්‍රසිද්ධ කාරණයකි. ඒ බව මන්ත්‍රීවරිය මෙන්ම ඒකාබද්ධ විපක්ෂය නියෝජනය කරන විමල්, ගම්මන්පිල මෙන්ම වාසු වැනි මන්ත්‍රීවරුන්ද අවධාරණය කර ඇත.

එසේම ප්‍රසන්න රණතුංග ඇතුළු මන්ත්‍රී කණ්ඩායමක්  සුදර්ශනී ප්‍රනාන්දුපුල්ලේ මන්ත්‍රීවරියට සහය නොදීම හේතුවෙන් විමල්,ගම්මන්පිල, වාසු ඇතුළු පිරිස ඒකාබද්ධ විපක්ෂයේ විශේෂ හමුවක්ද වර්ජනය කර සිටියේ ඊට විරෝධය දැක්වීමක් වශයෙන්ය.

තවද පසුගිය විශ්වාසභංග යෝජනාව ගෙනා  අවස්ථාවේ ප්‍රසන්න සහ මේ කණ්ඩායම අතර දරුණු බහින්බස් වීම් මෙන්ම ගුටි බැට හුවමාරුවකට ආසන්න සිදුවීම් ඇතිවූ බවද දේශපාලන ක්ෂේත්‍රයේ ප්‍රසිද්ධ රහසකි. ඒ මේ කිසිඳු පාර්ශවයක පෞද්ගලික ආරවුල් හෝ දේශපාලන ප්‍රතිපත්තිමය ප්‍රශ්න නොවේ. ප්‍රසන්න ඇතුළු පාර්ශවය බැසිල්වාදීන් වන අතර  ඒ අනුව මේ  බැසිල් - ගෝඨා දේශපාලන බල පොරයේ ප්‍රතිථලයකි.

Comment (0) Hits: 523

TNL අවහිර කිරීමට මගේ සම්බන්ධයක් නෑ - ජනාධිපති

ටී.එන්.එල්. රූපවාහිනියේ පොල්ගහවෙල විකාශනාගාරය අවහිර කිරීමට තමන්ගේ කිසිම සම්බන්ධයක් නැතැයි ජනාධිපති මෛත‍්‍රීපාල සිරිසේන පවසා ඇත.

පුවත්පතකට සම්මුඛ සාකච්ඡාවක් ලබා දෙමින් ජනාධිපතිවරයා මේ බව සඳහන් කර ඇති අතර  එම කටයුත්ත ආයතනික මට්ටමින් ගත් එකක් බවත් රටේ නීතිය ක‍්‍රියාත්මක වීමේදී කාටත් පොදු බවත් එහිදී සඳහන් කර ඇත.

එසේම ආයතනවලට බලය ලබා දී ඇති බවත් ඒ අනුව ඒවායේ නිලධාරීන් කටයුතු කර ඇති බවත් ජනාධිපතිවරයා සඳහන් කර තිබෙන අතර ඒ හැර තම පුද්ගලික බලපෑමක්‌ හෝ සම්බන්ධයක්‌ ටී.එන්.එල්. නාලිකාව අවහිර කිරීමට කිසිසේත්ම නැතැයිද ජනාධිපතිවරයා අවධාරණය කර තිබේ. 

දින 100 ගැන දන්නෙ නෑ කිව්වේ නෑ !

මෙහිදී සෝභිත හිමියන්ගේ ගුණ සමරු උලෙලේදී ජනාධිපතිවරයා විසින් දින 100 වැඩසටහන සම්බන්ධව දැක්වූ අදහස් ගැනද විමසා ඇති අතර  ඊට ජනාධිපතිවරයා මෙසේ ප්‍රතිචාර දක්වා ඇත.

‘දින 100 වැඩපිළිවෙළ පිළිබඳව මම පසුගිය දවස්‌වල පැහැදිලි කළා. රජයක්‌ විදියට එවකට තිබුණේ දින 100 හදා ගන්න එක නොවේ. පාර්ලිමේන්තුවේ 47 ක්‌ තියාගෙන, එක්‌සත් ජාතික පක්‌ෂයට දින 100 තුළ තිබුණා ආණ්‌ඩුක්‍රම ව්‍යවස්‌ථාව සංශෝධනය කරන්න, තුනෙන් දෙකේ ඡන්දය ලැබිය යුතු පනත් සම්මත කරන්න, දුම්කොළ, මද්‍යසාර, ඖෂධ පිළිබඳ පනත් සම්මත කරන්න. ඒ ඔක්‌කොම අපි සම්මත කළේ ශ්‍රී ලංකා නිදහස්‌ පක්‌ෂයේ මන්ත්‍රීවරුන්ගේ ඡන්දයෙන්. අද ඒ දේවල් අමතක වෙලා. මතක තිබුණත් ඒ දේවල් නොමැති බව පෙන්වමින් සමාජයට වෙන දෙයක්‌ පෙන්වන්න හදනවා. සමහරු ශ්‍රී ලංකා නිදහස්‌ පක්‌ෂය මම භාරගත් නිසා මේ ආණ්‌ඩුවට ප්‍රශ්න ගොඩක්‌ වුණා කියන්න කියලා හදනවා.

මම ශ්‍රී ලංකා නිදහස්‌ පක්‌ෂය භාරගත් නිසා තමයි, දින සියයේ වැඩපිළිවෙළේ බොහෝ දේවල් කරන්න පුළුවන් වුණේ. මම එදා කතාවේදී කිව්වේ, දින සියයේ වැඩපිළිවෙළ මම දන්නේ නැහැ කියලා නෙමේ… මේක හැදුවේ කවුද කියලා මම දන්නේ නැහැ කියලයි. ඒත් මගේ දේශපාලන විරුද්ධවාදීන්, ඇතැම් වෙලාවට මාධ්‍ය මේක සම්පූර්ණ විකෘති කරලා මේක මම දන්නේ නැහැ කියලා මම කිව්වා කියලා ප්‍රචාරය කළා. නමුත් මම පැහැදිලිව කිව්වේ මේ වැඩපිළිවෙළ හැදුවේ කවුද කියලා මම දන්නේ නැහැ කියන එකයි.

අපි ඒක ක්‍රියාත්මක කළා. ඇත්තටම ක්‍රියාත්මක කරන්න තිබ්බේ ඒක නෙමෙයි හරිනම්. මම ජනාධිපති ධුරයට පත්වුණු ගමන් පාර්ලිමේන්තුව විසුරුවා හරින්නයි තිබුණේ. එහෙම කළා නම් මේ තියෙන ගොඩක්‌ ප්‍රශ්න නැහැ. අලූත් පක්‌ෂ හැදෙන්නෙත් නැහැ’

Comment (0) Hits: 504

Page 401 of 492