පුවත්

අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ, ජ්‍යේෂ්ඨ පොලිස් අධිකාරී ශානි අබේසේකර  සහ අනෙකුත් සියලුම දේශපාලන සිරකරුවන්ට එරෙහි ද්වේශ සහගත දඩයම, රජය වහාම නතර කළ යුතු බව පාර්ලිමේන්තු මන්ත්‍රීනි තලතා අතුකෝරල අවධාරණය කරයි.

මන්ත්‍රීවරිය නිවේදනයක් නිකුත්කරමින් මේ අවධාරණය සිදුකර සිටි අතර  ශානි අබේසේකර  දේශපාලනමය වශයෙන් පීඩාවට පත් නොකරන ලෙසත් එහිදී ඉල්ලා ඇත.

නිවේදනය නිකුත් කරමින් තලතා අතුකෝරල මන්ත්‍රීවරිය වැඩිදුරටත්  අවධාරණය කරන්නේ ජ්‍යේෂ්ඨ පොලිස් අධිකාරී ශානි අබේසේකරගේ සිරගත කිරීමේ සිදුවීම යුරෝපීය පාර්ලිමේන්තුව විසින්ද පසුගිය සතියේ සාකච්ඡාවට බඳුන් කළ බවය.

මේ මොහොතේ ලංකාව ප්‍රබල ලෙස ඩොලර් හිඟයකට මුහුණදී සිටින බව රාජ්‍ය අමාත්‍ය දයාසිරි ජයසේකර පවසයි.

පැනනැගී ඇති ප්‍රශ්නය ඩොලර් හිඟය නිසා බවත් විපක්ෂය මොන කතා කිව්වත් එය පාලනය කිරීමට පහසු කරුණක් නොව රටක් ලෙස මුහුණදීමට සිදුව ඇති තත්ත්වයක් බවත් රාජ්‍ය අමාත්‍යවරයා පවසයි.

ඔහු මේ බව සඳහන් කර සිටියේ තෙල් මිල ඉහළ දැමීම සම්බන්ධව මතුව ඇති අර්බුදකාරි තත්ත්වය සම්බන්ධව මාධ්‍ය කළ විමසීමකදිය.

තෙල් මිල මේ මොහොතේ වැඩිවීම ගැන තම පක්ෂය එකඟ නැති බවත් ඔහු පැවසීය. එසේම තෙල් මිල ඉහළ දැමීම කැබිනට් මණ්ඩලය , ජීවන වියදම් ඇමති අනුකමිටුව ගනුලැබූ තීන්දුවක් බවත් ඔහු පැවසීය.

මන්ත්‍රී වාහන වෙනුවට ගිලන්රථ ගෙන ඒමට ආණ්ඩුව කටයුතු කළ යුතු බවත් මේ මොහොතේ අවශ්‍යතාවය එය බවත් පාර්ලිමේන්තු මන්ත්‍රී හර්ෂ ද සිල්වා පවසයි.

මන්ත්‍රීවරයා මේ බව සඳහන් කර සිටින්නේ නිවේදනයක් නිකුත්කරමින් වන අතර එය පහත දැක්වෙයි.

ජීවන වියදම දිනෙන් දිනම ඉහළ යමින් තිබේ. කොවිඩ්-19 වසංගත තත්ත්වය පාලනය කර ගැනීමට අසමත් වූ ආණ්ඩුව රට මහා ආර්ථික හා සමාජ අර්බුදයක් කරා තල්ලු කරමින් සිටී. මරණ බියෙන් තැතිගත් ජනතාව ජීවත්වන්නට බලාපොරොත්තුවක් අයදමින් සිටින අවස්ථාවක ආණ්ඩුව කළ යුත්තේ පාර්ලිමේන්තු මන්ත්‍රීවරුන්ට වාහන ආනයනය කිරීම නොවේ.

ඒ සියලු මුදල් කොව්ඩ් වසංගතය පරාජය කිරීමට සහ ජනතා සහන වෙනුවෙන් යෙදවීමයි. මේ නිසා, ජනතාවාදී විපක්ෂය ලෙස මා මීට දින තුනකට පෙර පැවසූ පරිදිම සමගි ජන බලවේගයේ නායක සජිත් ප්‍රේමදාස මහතා ප්‍රමුඛ සමගි ජන බලවේගය ආණ්ඩුවෙන් ඉල්ලා තිබෙන්නේ පාර්ලිමේන්තු මන්ත්‍රීවරුන් සඳහා මහජන මුදල් වලින් වාහන ආනයනය කිරීමේ ආණ්ඩුවේ යෝජනාව වහාම නතර කරන ලෙසයි. එම මුදල්ද ජනතා සුබ සිද්ධිය වෙනුවෙන් යොදවන ලෙසත් රට සහ ජනතාව කෙරෙහි මෙයට වඩා සැබෑ ආදරයකින් කටයුතු කරන ලෙසත් සමගි ජන බලවේගය මේ අවස්ථාවේ ආණ්ඩුවෙන් ඉල්ලා ඇත.

මෙම වාහන ආනයනය වෙනුවෙන් විවෘත කළ ණයවර ලිපි අවලංගු කිරීමට බැරිම නම් මෙම වාහන වෙනුවට 1990 සුවසැරිය සඳහා හදිසි අවශතාවයක් සේ සලකා ගිලන් රථ 112 ක් ගෙන්වීමට පියවර ගන්නා ලෙස මා ආණ්ඩුවෙන් ඉල්ලා සිටිනවා. මහජන මුදල් මන්ත්‍රීවරුන්ට වාහන ගෙන්වීම සඳහා භාවිතා නොකළ යුතුයි.

ඉන්ධන මිල වැඩි කිරීමේ තීරණයක් තීරණයේ වගකීම බලශක්ති අමාත්‍යවරයාගේ කර මත වැඩ පැටවීමේ වෑයම හෙළාදකින බව ආණ්ඩුව නියෝජනය කරන පක්ෂ 08 විසින් සඳහන් කරයි.

අද  (14) අදාළ පක්ෂ 8 හි නියෝජිතයින් ගේ අත්සනින් නිකුත්කර ඇති නිවේදනයේ මේ බව සඳහන් කර ඇති අතර ඉන්ධන මිල ඉහළ දැමීම ජනාධිපති සහ අගමැති ගේ ප්‍රධානත්වයෙන් පැවති ජීවන වියදම් පිළිබඳ ඇමති අනුකමිටුව ගනුලැබූ තීන්දුවක් බවත් එහි සඳහන් කර ඇත.

අදාළ නිවේදනය පහත දැක්වෙයි.

බැසිල් රාජපක්ෂ ලංකාවේ සිටියේ නම් ඉන්ධන මිල ඉහළ දැමීමට ඉඩනොදෙන බවට රාජ්‍ය අමාත්‍ය නිමල් ලංසා සිදුකර ඇති ප්‍රකාශය සම්බන්ධව ආණ්ඩුව අභ්‍යන්තරයේ යළිත් විරෝධයක් මතුව ඇත.

ඒ ආණ්ඩුවේ බැසිල් හිතවාදි පාර්ශව තවදුරටත්  ඉන්ධන මිල ඉහළ දැමීමට තීන්දු කළ සැබෑ තත්ත්වය වසංකර පෞද්ගලික දේශපාලන වාසියක් ගැනීමට බැසිල් පාර්ශ්වය කටයුතු කරන බව පවසමිනි.

මේ බව මතුකරන බැසිල් විරෝධී පාර්ශ්ව සඳහන් කරන්නේ ලෝක වෙළෙඳපොළ තුළ ඉන්ධන මිල ඉහළ යාම තවදුරටත් දරාගත නොහැකි බව තක්සේරු කරමින් ඉන්ධන මිල අවස්ථා දෙකකට ඉහළ දැමීම සඳහා තීරණයක් ගෙන තිබුණත් එය  පසුව වෙනස් කළ  බවය.

එම ආරංචි මාර්ග සඳහන් කරන ආකාරයට ඉන්ධන මිල ඉහළ දැමීම සම්බන්ධව සාකච්ඡා කිරීමට ජීවන වියදම් ඇමති අනුකමිටුව රැස්වීමට පෙර දිනයේ බැසිල් රාජපක්ෂ, ජනාධිපති ලේකම් පීබී ජයසුන්දර අමතා තෙල් මිල ප්‍රශ්නය ගැන කතාබහක් සිදුකර ඇත.

පීබී ජයසුන්දර ට බැසිල් දුන්න උපදෙස ?

එහිදී ජනාධිපති ලේකම් පීබී ජයසුන්දර හරහා බැසිල් රාජපක්ෂ දැනගෙන ඇත්තේ ඉන්ධන මිල අවස්ථා දෙකකදී ඉහළ දැමීම සඳහා තීරණය කර ඇති බවය.

ඒ අනුව පළමු අවස්ථාවේ රුපියල් 10.00ක් සහ දෙවන අවස්ථාවේ රුපියල් 10.00 ක් වන ලෙස වැඩිකිරීම හැර විකල්පයක් නැති බව පීබී ජයසුන්දර පවසා ඇත.

එම අවස්ථාවේ  බැසිල් රාජපක්ෂ කියා ඇත්තේ  අවස්ථා දෙකකදී ජනතාව වෙතින් බැනුම් නොඅසා එකවර බැනුම් ඇසීම ප්‍රමාණවත් බවත් ඒ අනුව  ඉන්ධන මිල එකවර ඉහළ දැමීමට සුදුසු බවය.

පොහොට්ටු ලේකම්ගේ  හැසිරීම පුදුමසහගතයි !

ඒ අනුව ජීවන වියදම් ඇමති අනු කමිටුව ඒ යෝජනාව සඳහා එකඟතාව පළකර ඇත. 

දැන් ආණ්ඩුවේ බැසිල් විරෝධී පාර්ශ්ව කියන්නේ ඉන්ධන මිල එකවර ඉහළ දැමීම සඳහා උපදෙස් නිකුත්කළ බැසිල් රාජපක්ෂ සිය පක්ෂ  ලේකම් හරහා නිවේදනයක් නිකුත්කරමින් සිදුකළ ක්‍රියාව කිසිසේත් අදහාගත නොහැකි ක්‍රියාවක් බවය.

පළමු අවස්ථාවේ පක්ෂයේ නිල ලිපි ශීර්ෂයෙන් ප්‍රධාන ලේකම් සාගර කාරියවසම් හරහා ගම්මන්පිල අමාත්‍යවරයා ට ඉල්ලා අස්වීම සඳහා ප්‍රසිද්ධ නිවේදන නිකුත්කළ පසුව දැන් දෙවැනි අවස්ථාවේ උග්‍ර බැසිල් පාක්ෂික ලංසා වැනි උදවිය යොදවා කරවන ප්‍රකාශ ඉතා බරපතළ බවත් එම ආරංචි මාර්ග පවසයි.

නාමලුත් හිටියා !

ඔවුන් පෙන්වා දෙන්නේ මේ පිටුපස ඉතා පැහැදිලිව ජනාධිපති සහ අග්‍රාමාත්‍යවරයා රටේ ජනතාව හමුවේ දැඩි අපහසුතාවකට පත්කිරීමේ කුමන්ත්‍රණයක් ගැනත් සැකසංකා මතුවන බවය. එසේම අදාළ තෙල් මිල ඉහළ දැමීම සඳහා වූ සාකච්ඡාවේ අමාත්‍ය නාමල් රාජපක්ෂ ද  සිටි බවත් මේ කරන ප්‍රකාශ හරහා සියළු දෙනා ජනතාව හමුවේ දුෂ්කරතාවකට පත්ව ඇති බවත්ය.

ඛනිජ තෙල් විෂයභාර අමාත්‍යවරයාට ඉන්ධන මිල තීරණය කිරීමේ හැකියාවක් නැති බව  ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී චන්දිම වීරක්කොඩි  සඳහන් කරයි.

ඉන්ධන මිල තීරණය කරන්නේ මුදල් අමාත්‍යංශය විසින් බවද මිල තීරණය කිරීමේ දී අවශ්‍ය නම් ඛනිජ තෙල් අමාත්‍යවරයාගේ අදහස් ලබාගත හැකි වුවද මිල තීරණය අවසාන වශයෙන් කරන්නේ මුදල් අමාත්‍යාංශ විසින් බවත් පනත අනුව  මුදල් අමාත්‍යවරයාට පැවරී ඇතැයි ද ඔහු පැවසීය.

චන්දිම වීරක්කොඩි මන්ත්‍රීවරයා මේ බව සඳහන් කර සිටියේ මාධ්‍ය වෙත ප්‍රකාශයක් කරමින් වන අතර ඔහු යහපාලන ආණ්ඩුවේ ඛණිජ තෙල් අමාත්‍යවරයකු විය.

රජයක් ලෙස මේ මොහොතේ රටට විහිළු සපයමින් සිටින බව ද ආණ්ඩු පක්ෂය නියෝජනය කරන මන්ත්‍රීවරයා තවදුරටත් සඳහන් කර සිටියේ ය.

බැසිල් රාජපක්ෂ සිටියා නම් ඉන්ධන මිල මේ ආකාරයෙන් ඉහළ දැමීමට ඉඩ නොදෙනු ඇති බව රාජ්‍ය අමාත්‍ය නිමල් ලාන්සා පවසයි.

මාධ්‍ය වෙත ප්‍රකාශයක් සිදුකරමින් ඔහු මේ බව සඳහන් කර ඇති අතර එනිසා ඉන්ධන මිල අඩු කිරීම සඳහා මැදිහත් වන්නැයි බලශක්ති අමාත්‍ය උදය ගම්මන්පිලගෙන් ඉල්ලා සිටින බවද පැවසීය.

එමෙන්ම ජනාධිපති අගමැති ඇතුළු කමිටුවද මේ සඳහා අවධානය යොමු කළ යුතුව ඇතැයි ද රාජ්‍ය අමාත්‍යවරයා පවසයි.

එක්ස්ප්‍රස් පර්ල් (MV X-Press Pearl) නෞකාවේ කපිතාන්වරයා අපරාධ පරීක්ෂණ දෙපාර්තමේන්තුව(CID) විසින් අත්අඩංගුවට ගනු ලැබූ බව පොලීසිය පවසයි.

කොළඹ වරායට ඔබ්බෙන් වූ මුහුදේ නැංගුරම් ලා තිබියදී පසුගිය දා MV X-Press Pearl නෞකාව ගිනි ගැනිමට ලක් විය.

නෞකාවේ කපිතාන්වරයාට, ප්‍රධාන ඉංජිනේරුවරයාට සහ අතිරේක ඉංජිනේරුවරයාට රටින් පිටවීම වළක්වමින් කොළඹ අතිරේක මහේස්ත්‍රාත්වරයා පසුගිය ජුනි 01 වනදා නියෝගයක් ද නිකුත් කළේ ය.

අධිකරණය එම නියෝගය නිකුත් කළේ, නැවේ ගින්න සම්බන්ධයෙන් පරීක්ෂණ මෙහෙයවන අපරාධ පරීක්ෂණ දෙපාර්තමේන්තුව වාර්තාවක් ඉදිරිපත් කරමින් කළ ඉල්ලීමක් සලකා බැලීමෙන් අනතුරුවයි.

මේ අතර නෞකාවේ කපිතාන්වරයා ඇතුළු කාර්ය මණ්ඩලයෙන් අපරාධ පරීක්ෂණ දෙපාර්තමේන්තුව ප්‍රකාශ සටහන් කර ගැනීමට ද ඊට පෙර පියවර ගෙන තිබිණ.

අභියාචනාධිකරණයේ සභාපති, විනිසුරු අර්ජුන ඔබේසේකර  අද (14) පෙරවරුවේ ජනාධිපති කාර්යාලයේ දී ජනාධිපති ගෝඨාභය රාජපක්ෂ  ඉදිරියේ ශ්‍රේෂ්ඨාධිකරණ විනිසුරුවරයෙක් ලෙස දිවුරුම් දුන්නේය.

අභියාචනාධිකරණ විනිසුරු ප්‍රියන්ත ප්‍රනාන්දු, අභියාචනාධිකරණයේ නව සභාපතිවරයා ලෙස සහ මහාධිකරණයේ හිටපු විනිසුරු ශෂී මහේන්ද්‍ර  අභියාචනාධිකරණ විනිසුරුවරයෙක් ලෙස දිවුරුම් දුන්හ.

ජීවන වියදම් අනු කමිටුව විසින් තීරණය කළේ යයි පවසමින් මේ වන විට ආණ්ඩුව විසින් ඉන්ධන මිල ඉහළ දමා ඇති අතර, කෝවිඞ් 19 වසංගත තත්වය තුළ බඩුමිල කිහිප ගුණයකින් වැඩි වී තිබියදී එදාවේලවත් පිරිමසා ගත නොහැකිව සිටින ජනතාවට මෙසේ තෙල් මිල ද ඉහළ දැමීම සැලසුම් සහගතව සිදුකළ මරු පහරක් බවත්, කෝවිඞ් 19 තත්වය මත සංචරණ සීමා පනවා තිබියදී තම දෛනික රැකියාවන් හෝ ආදායම් මාර්ගවල නිරත වීමට නොහැකිව සිටින අඩු ආදයම් ලාභී ජනතාවට කිසිදු හව්හරණයක් නොතිබියදී මේ ආකාරයෙන් තෙල් මිල ද ඉහළ දැමීම තුළ සිදුවන්නේ තවදුරටත් වැඩිවන බඩු මිල ඉදිරියේ බඩගින්නේ සිටීමට බවත් නිවේදනයක් නිකුත් කරමින් වැඩකරන ජන බලය කියා සිටී. 

මේ පිළිබදව එම නිවේදනයේ වැඩිදුරටත් මෙසේද සදහන් වෙයි.

භූමිතෙල් මිල ද රු.7/- කින් ඉහළ දැමීම තුළ භූමිතෙල් භාවිතයේ යෙදෙන වතු සහ ධීවර ජනතාව දැඩි පීඩාවකට පත්වේ. සමස්ත වැඩකරන පන්තියෙන් බහුතරයක් තම ප‍්‍රවාහන මාධ්‍ය ලෙස භාවිතා කරනුයේ මෝටර් සයිකල්, තී‍්‍රවිලර් වැනි වාහනය. පෙට‍්‍රල් මිල රු.20/- න් වැඩි කිරීම තුළ එය වැඩකරන පන්තියේ බහුතරයකට ඍජුවම බලපාන අතර, සමස්තයක් ලෙස ජනතාවගේ ජීවන බර කිහිප ගුණයකින් ඉහළ යාම මෙම ඉන්ධන මිල ඉහළ යාම තුළ වැලැක්විය නොහැකිය. මේ තත්වය තුළ මෙම ඉන්ධන මිල ඉහළ යාම දැඩිව බලපානුයේ මෙරට වැඩකරන ජනතාවටය.

කෝවිඞ් 19 වසංගතය තුළ පීඩාවට පත් තම රටවල ජනතාවට අනෙකුත් සෑම රටකම ආණ්ඩු විසින් විවිධ සහන සලසමින් තිබියදී ලංකාවේ වත්මන් ආණ්ඩුව මේ ආකාරයෙන් ජනතාවට පීඩනයට පත් කිරීම තුළින් පැහැදිලි වන්නේ රටේ ජනතාවගේ ජීවත්වීම සම්බන්ධයෙන් ආණ්ඩුවට වගේ වගක් නැති බවයි. තෙල් මිල වැඩි කළා පමණක් නොව ආණ්ඩුවේම මැති ඇමතිවරුන්ගෙන් සමන්විත ශී‍්‍ර ලංකා පොදු ජන පෙරමුණ විසින් තෙල්මිල වැඩිකිරීම සම්බන්ධයෙන් නිවේදනයක් නිකුත් කරමින් උදය ගම්මන්පිල අමාත්‍යවරයා ඉල්ලා අස්විය යුතු බව ප‍්‍රකාශ කිරීම තුළින් පෙන්නුම් කරන්නේ තවදුරටත් ජනතාව නොමග යවා ජනතා විරෝධය ද හකුලා දැමීමට ආණ්ඩුව සැලසුම් කර ඇති බවයි. උදය ගම්මන්පිල පමණක් නොව සමස්ත ආණ්ඩුවම ජනතාවට එල්ල කළ මෙම මරණීය ප‍්‍රහාරය සම්බන්ධයෙන් වගකිව යුතුය.

2020 වසරේ ලොව පුරා කෝවිඞ් 19 වසංගත ව්‍යාප්තියත් සමග ලෝක වෙළඳපොළේ තෙල්මිල ඍණ අගයක් ගත් අතර, එම අවස්ථාවේදී තෙල් මිල තඹ සතයකින්වත් අඩු කිරීමට කටයුතු නොකළ වත්මන් ආණ්ඩුව ජනතාව දැඩි දුෂ්කරතාවයන්ට මුහුණ දී ඇති තත්වය තුළ මැති ඇමතිවරුන්ට සැප වාහන ආනයනය, කායවර්ධන මධ්‍යස්ථාන සැකසීම, අධිවේගී මාර්ග ඉදිකිරීම වැනි හදිසියේ අත්‍යවශ්‍ය නොවන කටයුතු සඳහා මුදල් ආයෝජනය කරමින් සිටී. මෙවැනි දේ සඳහා මුදල් වෙන් කරමින් සිටියදී මුදල් රාජ්‍ය අමාත්‍ය අජිත් නිවාඞ් කබ්රාල් පවසන්නේ තෙල්මිල වැඩි කළේ රටේ මූල්‍ය ස්ථාවරයට බලපෑමක් ඇතිවීම වැලැක්වීමට බවයි.

තෙල්මිල වැඩි කිරීම හා ඒ සම්බන්ධයෙන් ආණ්ඩුවේ නියෝජිතයන් විසින්ම සිදු කරන මෙවැනි ප‍්‍රකාශවලින් පැහැදිලි වන්නේ තෙල් මිල ඉහළ දැමීම ආණ්ඩුව විසින් සැලසුම් සහගතවම සිදුකර ජනතාව රැුවටීමට ද සැලසුම් සහගතව කටයුතු කරමින් සිටින බවයි.

මේ තත්වය තුළ ඉහළ දැමූ ඉන්ධන මිල වහා අඩු කරන ලෙස වැඩකරන ජන බලය ලෙස අපි ආණ්ඩුවට බලකර සිටිමු.

මෙයට, වැඩ කරන ජන බලය වෙනුවෙන්,

ජොස්ප් ස්ටාලින් - 077311254
රවී කුමුදේශ් ජගත් ගුරුසිංහ
චින්තක බණඩාර

ඉන්ධන මිල ගණන් වැඩි කිරීම දේශීය ආර්ථිකය ශක්තිමත් කරන පොදු වැඩපිළිවෙළක එක් ප්‍රධාන සාධකයක් පමණක් බව ජනාධිපති මාධ්‍ය අංශය පවසයි.

ඉන්ධන මිල ගණන් ඉහළ දැමීම සම්බන්ධයෙන් විශේෂ නිවේදනයක් නිකුත් කරමින් ජනාධිපති මාධ්‍ය අංශය පවසන්නේ, එම තීරණය රටේ බැංකු පද්ධතිය ශක්තිමත් කර අඩු පොලී අනුපාත පවත්වා ගැනීමටත්, විදේශ විනිමය වියදම් අඩු කර විනිමය අනුපාතය ශක්තිමත් කර ගැනීමටත්, ජනතාවගේ සෞඛ්‍යය හා සුභසාධනය සුරක්ෂිත කර ගැනීමටත්, ආනයනය මත රඳා පවතින පරිභෝජන ආර්ථිකය, දේශීය නිෂ්පාදන මත රඳා පවතින ආයෝජන හා පරිභෝජන ආර්ථිකයක් බවට පරිවර්තනය කර ගැනීමට ගත් තීරණයක් බවයි.

මේ අතර ඉන්ධන මිල ඉහළ දැමීමට ප්‍රධාන හේතු ගණනාවක් පිළිබඳව ජනාධිපති , අගමැති හා විෂයභාර අමාත්‍යවරුන්ගේ සහභාගීත්වයෙන් පැවති ජීවන වියදම් කමිටුවේදී අවධානය යොමු වූ බව ද ජනාධිපති මාධ්‍ය අංශය නිකුත් කළ නිවේදනයේ සඳහන් ය.

ජනාධිපති මාධ්‍ය අංශය නිකුත් කළ නිවේදනය පහත සදහන් වේ.

තෙල් මිල ගනන් ඉහළ දැමීම නිසි ක්‍රමවේදයට අනුව ඇමැති අනුකමිටුවේද අනුමැතිය ඇතිව සිදු කළ බවත් තමාට තනියම තෙල් මිල ගනන් වැඩි කිරීමට තරම් පිස්සුවක් නැති බවද බලශක්ති අමාත්‍ය උදය ගම්මන්පිල මාධ්‍යයට ප්‍රකාශයක් කර තිබේ.

තෙල් මිල වැඩි කිරීමේ වගකීම විෂය භාර අමාත්‍යවරයා වන උදය ගම්මන්පිල විසින් භාර ගෙන ඔහු බලශක්ති අමාත්‍යධූරයෙන් ඉල්ලා අස්විය යුතු බවට පොදුජන පෙරමුණේ ප්‍රධාන ලේකම් සාගර  කාරියවසම් විසින් නිකුත් කළ නිවේදනයට ප්‍රතිචාර දක්වමින්  ගම්මන්පිල ඇමතිවරයා මෙම අදහස් පළ කර ඇත.

තෙල් මිල ගණන් ඉහළ දැමීමේ තීරණය මහා භාණ්ඩාගාරය විසින් අනුමත කොට තිබෙන බවත් තෙල් මිල වැඩි කිරීමේ තීරණය මෙන්ම එම තීරණය ක්‍රියාත්මක කලයුතු දිනය පවා තමන්ට ලබා දුන්නේ මුදල් අමාත්‍යංශයෙන් බවද ගම්මන්පිල අමාත්‍යවරයා පවසයි.

එම විෂය භාර අමාත්‍යවරයා වන්නේ මුදල් අමාත්‍යවරයා බවද මේ සියලු දේවල් පිළිබඳ තොරතුරු අද (13) මාධ්‍ය හමුවක් තබමින් රටට හෙළිදරව් කරන බවද අමාත්‍යවරයා පවසයි.

කොරෝනා වසංගතය හමුවේ ජනතාව තවත් අසීරුවට පත් කරමින් තෙල් මිල වැඩි කිරීම සම්බන්ධයෙන් විෂය භාර අමාත්‍යවරයා ලෙස උදය ගම්මන්පිල  වගකිව යුතු බවත්, ඒ වගකීම භාරගෙන වහාම අමාත්‍ය ධූරයෙන් ඉල්ලා අස්විය යුතු බවත් ශ්‍රී ලංකා පොදු ජන පෙරමුණ පෙන්වා දී ඇත.

මේ බව සඳහන් කරන නිවේදනයක් පොදුජන පෙරමුණේ  මහලේකම් පාර්ලිමේන්තු මන්ත්‍රී  සාගර කාරියවසම් ගේ අත්සනින් නිකුත්කර ඇත.

එහි වැඩිදුරටත් සඳහන් කර ඇත්තේ මෙවැනි වාතාවරණයකදී තෙල් මිල වැඩි කිරීම හමුවේ ආණ්ඩුව සහ ආණ්ඩුවේ ප්‍රධානීන් අප්‍රසාදයට පත් කිරීමේ වුවමනාවක් ගම්මන්පිල අමාත්‍යවරයා ට  තිබුණේදැයි සැක මතුවන බවයි.

විමල් පාර්ශ්වය එළවන තත්ත්වයක් !

සාමාන්‍යයෙන් මෙවැනි නිවේදනයක් විපක්ෂය වෙතින් නිකුත්කළ හැකි නමුත් සන්ධාන ආණ්ඩුවක පක්ෂයක් එහි තවත් පක්ෂයක නායකයෙක් ඉලක්ක කර නිකුත්කරන්නේ නැති බව දේශපාලන විචාරකයන් පවසයි.

ඔවුන් සඳහන් කරන ආකාරයට විශේෂ  කාරණය වන්නේ සන්ධාන ආණ්ඩුවේ ප්‍රධාන පක්ෂය විසින් එහි සාමාජික පක්ෂයේ නායකයකු ඉලක්ක කර මේ නිවේදනය නිකුත්කර තිබීමය.

ඒ අනුව ගම්මන්පිල අමාත්‍යවරයකු ලෙස අසමත් පමණක් නොව ආණ්ඩුවේ ප්‍රධාන පක්ෂයට අනුව ඔහු තවදුරටත් ඛණිජ තෙල් සහ බලශක්ති අමාත්‍යවරයා ලෙස සිටීම ඔවුන්ගේ අපේක්ෂාව නොවේ.

ඒ අනුව අමාත්‍ය ගම්මන්පිල ෆේල් අතර ඉල්ලා අස්විය යුතුව ඇත. ආණ්ඩුවේ හිටියත් වස්ත්‍රයක් ඇඳගෙන සිටිය නොහැකිය.

එසේම කාලයක් තිස්සේ රාජපක්ෂ කඳවුරේ ඇති විමල් - බැසිල් ගැටුමේ ප්‍රථිපලයක් ලෙස මේ නිවේදනය සැලකිය හැකි බවත් ඔවුන් පවසයි.

ගම්මන්පිල - විමල් නොමැති ආණ්ඩුවක් බැසිල් රාජපක්ෂ ඉදිරියේ සැලසුම් කරන බවත් දැන් ගම්මන්පිල - විමල් දේශපාලන අනාථයන් වෙනවාද නැද්ද යන්න ගැන තීන්දුවක් ගතයුතු බවත් ඔවුන් පෙන්වා දෙයි.

ජනතා විරෝධය යට යැවීමක් !

කෙසේ වුවත් තවත් පිරිසක් පවසන්නේ මෙය ආණ්ඩුව මේ දිනවල අත්හදාබලමින් සිටින දේශපාලන උපක්‍රමයක් බවය. එනම් ආණ්ඩුව සම්බන්ධව ජනතා විරෝධයක් පැමිණි විට ඒ විරෝධය වෙනතක යොමුකරන, විරෝධය සමනය කරන නිවේදනයක් නිකුත්කර සිටීමය.

ඊට ආසන්න උදාහරණයක් වන්නේ රටේ ජනතාව කොරෝනා වසංගතය හමුවේ පීඩිතව සිටියදී ආණ්ඩුව මැති ඇමතිවරුන් සඳහා සැප වාහන ආනයනය කිරීමට කටයුතු කිරීම සහ ඒ හමුවේ නැගුනු ජනතා විරෝධය අවස්ථාවේ අග්‍රාමාත්‍ය මහින්ද රාජපක්ෂ ගේ කාර්‍යාලය කටයුතු කළ ආකාරයයි.

එහිදී අග්‍රාමාත්‍ය කාර්‍යාලය නිවේදනයක් නිකුත්කරමින් කියා සිටියේ අදාළ වාහන ආනයනය අත්හිටුවීමට තීරණය කළ බවය. නමුත් නිවේදනය හරහා ජනතා විරෝධය සමනය කරගැනීමෙන් පසුව ආණ්ඩුව කියන්නේ අදාළ වාහන ආනයනය අත්හිටුවීමට නොහැකි බවය.

විචාරක අදහස මේ මොහොතේ  ගම්මන්පිල ට ඉල්ලා අස්වීමට කියන පොදුජන පෙරමුණ ටික දිනක් මේ කරුණේ එල්ලී සිට එය ජනතාවට අමතකවූ පසු සාමාන්‍ය ලෙස කටයුතු කරනු ඇති බවය.

එසේම ඉන්ධන මිල ඉහළ දැමීමේ වගකීම අමාත්‍යවරයා ගතයුතු නම්, මිල ඉහළ දැමීම ආණ්ඩුවේ ස්ථාවරය නොවේ නම් අමාත්‍යවරයාව තනතුරින් ඉවත් කිරීමට බලය ජනාධිපති ගෝඨාභය රාජපක්ෂ සතු බවත් විචාරක අදහසය.

කොරෝනා ආසාදිතයන් හා මරණ සංඛ්‍යාව අනුව ශ්‍රී ලංකාව ඉන්දියාවටත් වඩා ඉතා භයානක තැනකට ගමන් කරමින් සිටින බව රජයේ වෛද්‍ය නිලධාරීන්ගේ සංගමය පවසයි.

කොළඹ පැවැත්වූ  මාධ්‍ය හමුවකදී එම සංගමයේ උප සභාපති නවීන් ද සොයිසා සඳහන් කර සිටියේ ජනගහනයට සාපේක්ෂව වාර්තාවන ආසාදිතයන් හා මරණ සංඛ්‍යාව සලකා බැලීමේදී ශ්‍රී ලංකාව ඉන්දියාවට වඩා ඉදිරියෙන් සිටින බවයි. අද වන විට ඉන්දියාවේ රෝගීන් වාර්තා වීම මිලියනයකට 80ක් වනවිට ශ්‍රී ලංකාවේ මිලියනයකට 136ක් වාර්තා වෙන බැවින් එය ඉන්දියාවේ මෙන් එකහමාර ගුණයක් ව ඇතැයි ද  ඔහු  පවසයි.

එසේම පසුගිය දිනවලදී සිදු කරනු ලැබූ පී.සී.ආර්. පරීක්ෂණ දත්ත සලකා බැලීමේදී මෙම තත්වයෙහි ඇති බරපතළකම තේරුම් ගත හැකිවේ.

විශේෂයෙන්ම සෞඛ්‍ය අමාත්‍යංශයේ සංඛ්‍යාලේඛන අනුව ජුනි 10 ආසාදිතයින් වාර්තා වී ඇත්තේ 2715 කි. එදින සිදුකරන ලද පී.සී.ආර්. එකතුව 19828 කි.

ඒ අනුව කොරෝනා රෝගීන් හමුවීමේ අගය සියයට 13.69 කි. එනම් ශ්‍රී ලංකාවේ සිදු කරනු ලබන සෑම පී.සී.ආර්. පරීක්ෂණ හතකින් එකක් කොවිඩ් ආසාදිතයකු බවට හෙළිවේ.

කොවිඩ් දත්තවල නිරවද්‍යතාවය සම්බන්ධයෙන් සෞඛ්‍ය අංශ ඇතුළු බොහෝ පාර්ශවයන්හි විරෝධය එල්ල වෙමින් තිබියදී මෙම තොරතුරු හෙළි වීමද විශේෂත්වයකි.

ඉන්ධන මිල ඉහළ දැමීම තුළ ආණ්ඩුව  සෑම අංශයකින්ම බරපතළ අසමත් භාවයක් පෙන්නුම් කරන අතර ඒ සමග ආණ්ඩු අභ්‍යන්තරයේ කාකොටා ගැනීම්ද යළියළිත් මතුවෙමින් තිබේ.

ආසන්නතම සිදුවීම වන්නේ ජනතාව ආදායම් මාර්ග අහිමිව වැටුප් පවා කප්පාදුවට ලක්ව අති දුෂ්කර තත්ත්වයක පසුවන අවස්ථාවේ ඉන්ධන මිල වැඩි කිරීම සම්බන්ධව වගකීම මුළුමනින්ම ඛණිජ තෙල් සහ බලශක්ති අමාත්‍ය උදය ප්‍රභාත් ගම්මන්පිල පිටින් යැවීමට ආණ්ඩුවේම පාර්ශ්ව කටයුතු කරමින් සිටීමය.

ඊට නිදර්ශනයක් නම් ශ්‍රී ලංකා පුවත්පත් මණ්ඩලයේ සභාපති මහින්ද පතිරණ ෆේස්බුක් ගිනුමේ සටහනක් තබමින් සමාජගත කිරීමට උත්සාහ කරන අදහසයි.

අදාළ සටහන මෙසේය.

රජයේ ආදායම් මාර්ග අඩපණ වීම යන කාරණා පසුබිමෙහි තබාගෙන වුව බලශක්ති ඇමතිවරයාගෙන් පහත ප්‍රශ්න අසන්නේ ඒවාට පැහැදිලි කිරීමක් අපේක්ෂාවෙනි. 

1, ලෝක වෙළඳපලෙහි තෙල් මිළ ඉතා අඩු මට්ටමක පැවති අවස්ථාවේ බලශක්ති අමාත්‍යාංශය ඉදිරියට සැලසුම් කරමින් තෙල් තොග ආනයනය නොකළේ ඇයි?

2, ලංකාවට බොරතෙල් වෙනුවට මිළ අධික පිරිපහදු කළ තෙල් ආනයනය කරන්නේ ඇයි? 

3, අඩුමිළ සහිත ඔපෙක් රටවලින් මිළ දී නොගෙන සිංගප්පූරු වෙළඳපොලින් තෙල් මිළට ගන්නේ ඇයි?

මේ සම්බන්ධව අදහස් දක්වමින් විචාරකයන් පෙන්වා දෙන්නේ මේ විමල් සහ බැසිල් පාර්ශ්ව ගැටුමක් බවය.

ගම්මන්පිල අමාත්‍යවරයා විමල් පාර්ශ්වය නියෝජනය කරන අතර එනිසා ඔහුගේ ඛණිජ තෙල් විෂය සම්බන්ධව දැක්ම සූක්ෂම ලෙස ප්‍රශ්න කර ඇති බවත් ඔවුන් පෙන්වා දෙයි.