විදෙස්

පෞද්ගලික දේපළ අත්පත් කරගැනීම සඳහා ප්‍රථම වරට ඉඩ සළසමින් ව්‍යවස්ථා සංශෝධනයක් ඉදිරිපත් කිරීමට කියුබාව සැරසෙන බව විදෙස් මාධ්‍ය වාර්තා සඳහන් කරයි.

ඒ අනුව 1959 වසරේදී කියුබානු විප්ලවයෙන් ෆිදෙල් කස්ත්‍රෝ බලයට පැමිණීමෙන් 2011 වසරේ වරක් පමණක් සංශෝධනය වූ කියුබානු ව්‍යවස්ථාව වසර 7 කට පසුව යළිත් සංශෝධනයවීමට නියමිතව ඇත.

1959 කියුබානු විප්ලවයෙන් පසුව සැකසුණු ව්‍යවස්ථාවේ  පෞද්ගලික දේපළ අලෙවිය තහනම් කළ අතර, 2011 වසරේ එයට සංශෝධනයක් එක් කෙරිණ.

ඒ අනුව ඉදිරි සතියේ සිදුවන නව සංශෝධනය හරහා පෞද්ගලික දේපළ පරිහරණය සඳහා ඉඩ සළසමින් සකස් කර ඇති බව වාර්තා වන අතර ඒ  මගින් රාජ්‍ය ව්‍යවසාය පිළිබඳ නව විධිවිධානද ඇතුළත් කර ඇති බවද වාර්තා වෙයි.

එසේම නව කියුබානු ව්‍යවස්ථාව මේ වසරේදී ජනමත විචාරණයකටද ලක් කෙරෙනු ඇති බවද වාර්තා වෙයි.