පුවත්

ඉහළ කඳුකර ප්‍රදේශයට ඇද හැලෙන ධාරානිපාත වර්ෂාවත් සමඟ වික්ටෝරියා ජලාශයේ සියලුම ස්වයංක්‍රීය වාන්දොරටු ඊයේ (12) දහවල් වන විට විවෘත වී තිබේ.

ස්වංක්‍රීය වාන් දොරටු අටම විවෘත වූ අතර එමගින් තත්පරයට ඝන අඩි 23,100ක ජලධාරිතාවක් රන්දෙණිගල ජලාශය වෙත මුදා හැරෙමින් පවතින බව වික්ටෝරියා වේල්ල කාර්යයභාර ඉංජිනේරු කාර්යාලය සඳහන් කරයි.

වික්ටෝරියා ජලාශයෙන් විශාල ජල ධාරිතාවයක් මුදා හැරෙන බැවින්, මහවැලි ගඟේ පහළ ප්‍රදේශ පරිහරණය කරන ජනතාව දැඩි විමසිල්ලෙන් පසුවන ලෙස ද වික්ටෝරියා ජලාශයේ කාර්යභාර ඉංජිනේරු කාර්යාලය තව දුරටත් දැනුම් දෙයි.

මේ අතර, මෙම තත්ත්වය හේතුවෙන් කියුබික් ඝන මීටර් මිලියන 801ක ධාරිතාවයෙන් යුක්ත රන්දෙණිගල ජලාශයේ සක්‍රීය ජල ධාරිතාව එහි සමස්ත ධාරිතාවෙන් සියයට 92 දක්වා ඉහළ ගොස් තිබේ.

නදීක දයා බණ්ඩාර - මහනුවර