වස විසෙන් තොර කාබනික වගාව ව්‍යාප්ත කිරීම සඳහා කාබනික වගාවේ යෙදෙන ගොවීන්ට පොහොර සහනාධාරය වෙනුවට මුදල් ප්‍රතිපාදන ලබාදීමට රජය තීරණය කර තිබෙන බව කෘෂිකර්ම අමාත්‍ය මහින්ද අමරවීර පවසයි.
අමාත්‍යවරයා මේ බව සඳහන් කර සිටියේ ඊයේ (20) අගුණුකොළපැලැස්ස තණකුඹුරුයායේ කාබනික වී වගාව නිරීක්ෂණය කිරීමේ අවස්ථාවට එක්වෙමින්ය.
වස විසෙන් තොර කාබනික ගොවිතැන ශක්තිමත් කිරීම රජයේ මූලික අරමුණ බවත් ඒ සඳහා වත්මන් රජය ප්‍රමුඛත්වය ලබාදෙන අතර ඒ අනුව අප රටේ ගොවීන්ට රසායනික පොහොර සඳහා සහනාධාර වැඩපිළිවෙලක් ක්‍රියාත්මක කරනවා මෙන්ම කාබනික වගාවේ යෙදෙන ගොවීන්ටත් පොහොර සහනාධාරය වෙනුවට මුදල් ප්‍රතිපාදන ලබාදීමට රජය තීරණය කර ඇතැයිද අමාත්‍යවරයා පවසා ඇත.
මේ වන විට අප රටේ කාබනික වී ගොවිතැනේ නිරත වන ගොවීන් ප්‍රමාණය 5000 ඉක්මවන බවත් කාබනික ගොවිතැන සඳහා තමන්ද සාමාජිකත්වය ලබාගෙන තිබෙන බවද අමාත්‍යවරයා සඳහන් කළ අතර ඒ අනුව තම කුඹුරුයායේ ද කාබනික වී ගොවිතැන ආරම්භ කළ බවද සඳහන් කර ඇත.