Language Switcher

V2025

නිල නිවේදනයත් පිට වුණා: ගෝඨා තවමත් ඇමරිකන්! (Update)

මාර්තු 01 වෙනිදා සිට ජුනි 30 වෙනිදා දක්වා කාලය තුළ ඇමරිකානු පුරවැසිභාවය ඉවත් කෙරුණු පුද්ගලයන්ගේ ඇමරිකානු පෙඩරල් නිල ගැසට් ලේඛනය ද මේ වනවිට නිකුත්ව ඇති අතර එහිද 'පොහොට්ටු' පක්ෂයේ ජනාධිපති අපේක්ෂකයාගේ නම් සඳහන් නොවේ.

ඒ සම්බන්ධයෙන් ක්‍රියාකාරී දේශපාලන සමාජ ක්‍රියාකාරිකයකු වන ඕෂල හේරත්ගේ FB පිටුවේ එම ඇමරිකානු ගැසට් නිවේදනය පළකර ඇත.

osha

නිල නිවේදනය මෙතැනින්...

-----------------------------------------------------------------------------

ගෝඨා 'ඇමරිකානු පුරවැසිභාවය' තියාගෙන ශ්‍රී ලංකා පාස්පෝට්එකක් ගත්තේ කොහොමද ?

ශ්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂගේ "ඇමරිකානු පුරවැසිභාවය" සම්බන්ධයෙන් යළි කතාබහක් ඇති වී තිබේ.

ඒ එක්සත් ජනපද පුරවැසිභාවය අහෝසි කෙරුණු පුද්ගලයන්ගේ නම් දැක්වෙන ඇමරිකානු රජය විසින් අන්තර්ජාලයේ පළ කරන ලද දෙවැනි කාර්තුවේ නාම ලේඛනය තුළත් ඔහුගේ නම ඇතුළත් නොවීම හේතුවෙන්ය.

ඒ සමබන්ධයෙන් ට්විටර් පණිවිඩයක් නිකුත් කරමින් අමාත්‍ය හර්ෂ ද සිල්වා ප්‍රශ්න කර තිබුණේ "ඇමරිකානු පුරවැසිභාවය අහෝසි කරන පුද්ගලයන්ගේ නම් දැක්වෙන ඇමරිකානු රජයේ දෙවැනි කාර්තුවේ නාම ලේඛනය තුළ ගෝඨාභය රාජපක්ෂගේ නම සඳහන් නොවන විට ඔහුට ශ්‍රී ලංකාවේ පුරවැසිභාවය ලබා දුන්නේ කෙසේද?" යනුවෙනි.

harsha 2019.0815

ගෝඨාභය රාජපක්ෂ පසුගිය මැයි මාසයේ ශ්‍රී ලංකා විදේශ ගමන් බලපත්‍රයක් ලබා ගෙන තිබු අතර එහි ද්විත්ව පුරවැසි මුද්‍රාවක් නොමැති වීම තමා දැන් ශ්‍රී ලාංකික පුරවැසියකු බවට සහතිකයක් යැයි මාධ්‍යයට ප්‍රකාශ කර තිබිණ.

පුරවැසිභාවය ගැන ගැටළු තිබියදී ඔහුට මේ ආකාරයට ශ්‍රී ලංකා විදේශ ගමන් බලපත්‍රයක් ලබාදීම ගැන පරීක්ෂණයක් පවත්වන ලෙස ඉල්ලා සිවිල් ක්‍රියාකාරීන් පිරිසක් මේවනවිට වැඩබලන පොලිස්පතිවරයා වෙත පැමිණිල්ලක්ද යොමුකර තිබේ.

'අපේ අපේක්ෂකයා ගැන වද වෙන්න එපා' -නාමල්

අමාත්‍ය හර්ෂ ද සිල්වා වෙත ප්‍රතිචාර දක්වමින් විපක්ෂයේ පාර්ලිමේන්තු මන්ත්‍රී නාමල් රාජපක්ෂ නිකුත් කළ ට්විටර් පනිවුඩයක දැක්වුණේ ශ්‍රී ලංකා පොදුජන පෙරමුණේ අපේක්ෂකයා ගැන වද නොවන ලෙසය. ගැටලුව ඇත්තේ ඔහුගේ ලියකියවිලි නම් එය ඉදිරිපත් කළ හැකි බවත් නාමල් රාජපක්ෂ සිය පණිවුඩයේ සඳහන් කර තිබිණි.

පසුව හර්ෂ ද සිල්වා අමාත්‍යවරයා සිය ට්විටර් පණිවිඩය ඉවත්කරගෙන තිබිණි.

Namal08.15

ජනාධිපති අපේක්ෂක ගෝඨාභය රාජපක්ෂ අමෙරිකානු පුරවැසිභාවය ඉවත් කර නීත්‍යානුකූලව ශ්‍රී ලංකාවේ පුරවැසිභාවය ලබා ගෙන ඇති බව එක්සත් ජනතා නිදහස් සන්ධාන පාර්ලිමේන්තු මන්ත්‍රී බන්දුල ගුණවර්ධන ද අද (15) පැවති මාධ්‍ය හමුවකදී පැවසිය.

කෙසේවුවද, මාර්තු 01 වෙනිදා සිට ජුනි 30 වෙනිදා දක්වා කාලය තුළ ඇමරිකානු පුරවැසිභාවය ඉවත් කෙරුණු පුද්ගලයන්ගේ නාම ලේඛනය බදාදා (අගෝස්තු 14) ප්‍රකාශයට පත් වූ අතර එහි ගෝඨාභය රාජපක්ෂගේ නම සඳහන් නොවේ. (එම ලිපිගොනුව 15 වෙනිදා වන විට ෆෙඩරල් රෙජිස්ටරයේ පළ කිරීමට නියමිත බව එහි සඳහන් විය)

මින් පෙර නිකුත් කළ 2019 පළමු කාර්තුවේ නාම ලේඛනයේ ද ගෝඨාභය රාජපක්ෂගේ නම ඇතුළත් නොවිණි.

කෙසේ වුවත් සිය ඇමරිකානු පුරවැසිභාවය ඉවත් කර ගත් බව සඳහන් කරමින් ගෝඨාභය රාජපක්ෂ විසින් ඒ බව දැක්වෙන ලියවිල්ලක් පසුගියදා අගෝස්තු 01 වෙනිදා ප්‍රසිද්ධියට පත් කළේය.

එහි සඳහන් වුයේ අප්‍රේල් 17 වෙනිදා කළ ඉල්ලීමකට අනුව මැයි 03 වෙනිදා පුරවැසිභාවය ඉවත් කර ඇති බවකි.

මේ අතර ඇමරිකානු පුරවැසිභාවය අහෝසි කරන පුද්ගලයන්ගේ නම් දැක්වෙන ඇමරිකානු රජයේ දෙවැනි කාර්තුවේ නාම ලේඛනයට ගෝඨාභය රාජපක්ෂගේ නම ඇතුළත් නොවීම ඉදිරි ජනාධිපතිවරණයට ඉදිරිපත් වීම සඳහා බාධාවක් වනු ඇතැයි පවසමින් සමාජ ජාල ඔස්සේ අදහස් පළ වී තිබේ.

ඇමරිකානු තානාපති කාර්යාලයේ ස්ථාවරය !

ගෝඨාභය රාජපක්ෂගේ "ඇමරිකානු පුරවැසිභාවය" මුල් කර ගනිමින් පළ වන මාධ්‍ය වාර්තා සම්බන්ධයෙන් බීබීසි සිංහල සේවය කොළඹ පිහිටි ඇමරිකානු තානාපති කාර්යාලයෙන් කරුණු විමසීමක් කර ඇති අතර එහි ප්‍රකාශිකාවක් සඳහන් කර ඇත්තේ, පුරවැසිභාවය වැනි පුද්ගලික කරුණු ගැන තානාපති කාර්යාලය අදහස් පළ නොකරන බවය.

අදාළ නම ලේඛනයේ සඳහන් සහ සඳහන් නොවන නම් සම්බන්ධයෙන් තානාපති කාර්යාලයට අදහසක් ප්‍රකාශ කළ නොහැකි බව ඇය වැඩිදුරටත් කියා තිබිණ.

පවතින නෛතික තත්ත්වය යටතේ ද්විත්ව පුරවැසියකුට මැතිවරණයකදී නාම යෝජනා දීම ප්‍රතික්ෂේප කිරීම හෝ ද්විත්ව පුරවැසිභාවය සම්බන්ධයෙන් නාමයෝජනාවලදී විරෝධතා පරීක්ෂා කිරීමේ හැකියාවක් මැතිවරණ කොමිසමට නොමැත.

sunanda 09.15

මැතිවරණය කොමිසමේ සභාපති මහින්ද දේශප්‍රිය පවසන පරිදි යම් අපේක්ෂකයෙකුගේ ද්විත්ව පුරවැසිභාවය ගැන ගැටළුවක් ඇතිනම් ඒ ගැන අධිකරණයේ සහය පැතිය හැක.

මේ අතර වත්මන් තත්ත්වය සම්බන්ධයෙන් ට්විටර් පණිවුඩයක් නිකුත් කරන ජ්‍යෙෂ්ඨ මාධ්‍යවේදී සුනන්ද දේශප්‍රිය පවසා තිබුණේ "ආරංචි මාර්ග පවසන පරිදි එවැනි තත්ත්වයක් ඇති වුවහොත් සහ නාම යෝජනා භාර දෙන දින විරෝධතා ඉදිරිපත් කළහොත් ඡන්දය පැවැත්වීමට පෙර, සති දෙකක් ඇතුලත විනිශ්චයක් ලබා දෙන ලෙස මැතිවරණ කොමිසම ශ්‍රේෂ්ඨාධිකරණයෙන් ඉල්ලීමක් කරනු ඇත," යනුවෙනි.

 (උපුටා ගැනීම් - බීබීසී සිංහල සේවය)

සබැඳි පුවත් :

ගෝඨා තවමත් ඇමරිකානු පුරවැසියන් : අලුත්ම සාක්ෂිය මෙන්න !