පුවත්

මෙරට සෞඛ්‍ය පද්ධතියට අවශ්‍ය ජිවිතාරක්ෂක ඖෂධ සඳහා භාවිතා කරන, ඇමෙරිකානු ඩොලර් මිලියන 1.5ක ඖෂධ එන්නත් තොගයක් මුකුල් මාධව් පදනම (Mukul Madhav Foundation) හා එක්සත් රාජධානියේ ඉන්දීය සම්භවයක් සහිත විශේෂඥ වෛද්‍යවරුන් කණ්ඩායමක් එක්ව සෞඛ්‍ය අමාත්‍යාංශය වෙත ඊයේ (06) පරිත්‍යාග කෙරිණි.

ඒ අනුව එම ඖෂධ එන්නත් තොගය සෞඛ්‍ය අමාත්‍ය ආචාර්ය කෙහෙලිය රඹුක්වැල්ල වෙත එම සංවිධාන එක්ව නිළ වශයෙන් බාර දෙනු ලැබීය. මෙහිදී අඩු රුධිර පීඩනය සහ කම්පනය සඳහා භාවිතා කරන එන්නත් (Hypotension Anaphylaxis Septic Shock) 140,000 ක තොගයක් හා නිර්වින්දන හා ප්‍රතිවිෂ ඖෂධ (Antidote treat organophosphate Poison and to reduce saliva during surgery) 150,000 ක් වශයෙන් මෙරට සෞඛ්‍ය පද්ධතියට ප්‍රදානය කෙරිණි.

මෙරට සෞඛ්‍ය ක්ෂේත්‍රය සඳහා ජිවිතාරක්ෂක ඖෂධ 14ක තොගයක් රටට අවශ්‍ය බවද, එම ජිවිතාරක්ෂක ඖෂධ සියල්ල මේ වනවිට මෙරට සෞඛ්‍ය පද්ධතිය තුළ පවතින බවද සෞඛ්‍ය අමාත්‍යාංශය පෙන්වා දෙයි.

අද ප්‍රදානය කෙරුණු එන්නත් තොගය සඳහා වන ප්‍රවාහන සහ අනෙකුත් පහසුකම් අශෝක් ලේලන්ඩ් ආයනතය විසින් සිදු කරනු ලැබූ අතර ඉදිරියටත් එම සංවිධානයන්හි සෞඛ්‍ය ප්‍රදානයන් සඳහා අදාළ පහසුකම් ලබා දීමට පියවර ගන්නා බව ශ්‍රී ලංකා අශෝක් ලේලන්ඩ් සමාගමේ කළමණාකාර අධ්‍යක්ෂ උමේෂ් ගෞතම්  පවසයි.

ශ්‍රී ලංකාව මුහුණ පා තිබෙන වත්මන් අභියෝග හමුවේ මෙවැනි හදිසි අවස්ථාවකදි මෙරට සෞඛ්‍ය ක්ෂේත්‍රයට සහයෝගය ලබාදීමට එක්වීම පිළිබඳව සෞඛ්‍ය අමාත්‍ය කෙහෙලිය රඹුක්වැල්ල  මෙහිදී ප්‍රසාදය පළ කළේය. 

 මෙම අවස්ථාවට සෞඛ්‍ය අමාත්‍යාංශයේ ලේකම් ජනක ශ්‍රී චන්ද්‍රගුප්ත, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන, කොවිඩ් 19 වසංගත රෝග කළමණාකරණ හා වෛද්‍යාධාර සම්බන්ධීකරණ වෛද්‍ය අන්වර් හම්දානි, ඉන්දීය මහ කොමසාරිස් කාර්යාලයේ පළමු ලේකම් ඉරීනා තාකූර්, ලංකා අශෝක් ලේලන්ඩ් සමාගමේ කළමනාකාර අධ්‍යක්ෂ උමේෂ් ගෞතම්, ඉන්දියානු සම්භවයක් ඇති වෛද්‍යවරුන්ගේ බ්‍රිතාන්‍ය සංගමයේ (BAPIO) නියෝජිත වෛද්‍ය කිත්සිරි එදිරිසිංහ, ඉන්දියානු ප්‍රධාන විධායක සංසදයේ කිෂෝර් රෙඩ්ඩි යන මහත්ම මහත්මීහු ද එක් වූහ.

අභියාචනාධිකරණයේ සභාපති විනිසුරු ලෙස, නිශ්ශංක බන්දුල කරුණාරත්න  අද පෙරවරුවේ දිවුරුම් දුන්නේ ය.

ඒ, ජනාධිපති කාර්යාලයේදී ජනාධිපති රනිල් වික්‍රමසිංහ  ඉදිරියේයි.

මේ අතර මහාධිකරණ විනිසුරු එම්. ඒ. ආර්. මරික්කාර්  ද අභියාචනාධිකරණ විනිසුරුවරයෙකු ලෙස ජනාධිපතිවරයා ඉදිරියේ දිවුරුම් දුන්නේ ය.

ගෑස් මිල ඉහළ දැමීම හේතු කොට ගෙන කිසිදු ආහාර ද්‍රව්‍යයක මිල ඉහළ දැමීමක් සිදු නොකරන බව ආපන ශාලා හිමියන්ගේ සංගමයේ සභාපති අසේල සම්පත් පවසයි.

මාධ්‍ය වෙත අදහස් දක්වමින් ඔහු සඳහන් කර සිටියේ, අල, ළූණු, පරිප්පු, පාන් පිටි සහ සීනි යන භාණ්ඩවල මිල වෙළෙඳපොළේ අඩු මිලකට ලබා ගත හැකි බව ය.

එබැවින් පාරිභෝගිකයාගේ යහපත වෙනුවෙන් අහාරවල මිල ඉහළ නොදමන බව අසේල සම්පත් ප්‍රකාශ කළේ ය.

“මේ වෙලාවේ සියලු ම ආපන ශාලා හිමියන්ගෙන් ඉල්ලා සිටිනවා ගෑස් මිල වැඩි වීම තුළ කිසිදු ආහාර පානයක මිල වැඩි කරන්න එපා. විදුලි බිල නම් වැඩිකළොත් අපිට අනිවාර්යයෙන් ම ඒ වැඩි කරන ගානට සාපේක්ෂව වැඩි කරන්න වෙනවා. ප්ලේන්ටියේ ඉඳලා. මොකද ප්ලේන්ටිය පවා හදන්නේ කරනට් එකෙන්.”

බංග්ලාදේශයේ සහ නේපාලයේ විදේශ අමාත්‍යවරුන් වන ආචාර්ය ඒ.කේ. අබ්දුල් මොමන් සහ ආචාර්ය බිමලා රායි පෞද්‍යාල් 75 වැනි නිදහස් සංවත්සරයට සහභාගි වීම සඳහා ශ්‍රී ලංකාවට පැමිණ සිටින අතරවාරයේ දී අග්‍රාමාත්‍ය දිනේෂ් ගුණවර්ධන  අරලියගහ මන්දිරයේදී හමුවිය.

දකුණු ආසියාවේ කලාපීය සහයෝගීතාවයේ වැදගත්කම අමාත්‍යවරුන් දෙදෙනාම මෙහිදි අවධාරණය කළේය. දකුණු ආසියාතික රටවලට එකිනෙකාගේ අත්දැකීම්වලින් පාඩම් ඉගෙන ගත හැකි බව පෙන්වා දුන් ඔවුහු දකුණු ආසියානු කලාපීය සහයෝගීතා සංගමයේ (සාර්ක්) දැනට පවතින අවහිරතා සමීප සහයෝගීතාවයට බාධා පමුණුවන බව පෙන්වා දුන්හ.

නේපාල විදේශ අමාත්‍ය ආචාර්ය පෞද්‍යාල් දෙරට අතර ඓතිහාසික ආගමික හා සංස්කෘතික සබඳතා ගැන සඳහන් කළ අතර, බුදුන් උපන් ස්ථානයට පැමිණෙන බෞද්ධයන් විශාල සංඛ්‍යාවකට පහසුකම් සැලසීම සඳහා කොළඹට සහ කත්මණ්ඩුවට සීමා වී ඇති ගුවන් සම්බන්ධතාවයට ලුම්බිණියේ ගෞතම බුද්ධ ජාත්‍යන්තර ගුවන්තොටුපළ ඇතුළත් කර පුළුල් කළ යුතු බව පැවසීය.

නේපාලයට ශ්‍රී ලංකාවේ අධ්‍යාපන හා සෞඛ්‍ය ක්‍රමවලින් බොහෝ දේ ඉගෙන ගත හැකි බව පෙන්වා දුන් ඇය සමීප සහයෝගීතාවක අවශ්‍යතාව අවධාරණය කළාය. දකුණු ආසියාවේ කුඩා රටවල් එකට නැගී සිටිය යුතු බව ඇය පැවසුවාය.

බංග්ලාදේශ විදේශ අමාත්‍ය ආචාර්ය ඒ.කේ. අබ්දුල් මොමන් දකුණු ආසියානු අසල්වැසියන අතර පවතින ආංශික සහයෝගීතාව තවදුරටත් වැඩිදියුණු කිරීමේ වැදගත්කම ද අවධාරණය කළේය.

සමාජ මාධ්‍ය ක්‍රියාකාරී දර්ශන හඳුන්ගොඩට කොටුව මහෙස්ත්‍රාත් අධිකරණය විසින් ඇප ලබා දී තිබේ.

ඊයේ (05) රාත්‍රී ඩුබායි සිට මෙරටට පැමිණි අවස්ථාවේ දී අපරාධ පරීක්ෂණ දෙපාර්තමේන්තුව විසින් කටුනායක බණ්ඩාරනායක ජාත්‍යන්තර ගුවන් තොටුපොළේ දී ඔහු අත්අඩංගුවට ගෙන තිබිණ.

පසුව ප්‍රකාශයක් ලබාගැනීමෙන් පසු ඔහු කොළඹ කොටුව මහේස්ත්‍රාත් අධිකරණයට අද ඉදිරිපත් කළ අතර, එහිදී ඔහුට ඇප ලබාදීමට නියෝග කෙරුණි.

ප්‍රචණ්ඩත්වය ඉස්මතුවන අන්දමේ වීඩියෝවක් සමාජ මාධ්‍ය ජාලාවලට මුදාහැරීම සම්බන්ධයෙන් අපරාධ පරීක්ෂණ දෙපාර්තමේන්තුවට ප්‍රකාශයක් ලබාදීම මඟ හැර යාමේ චෝදනාව මත දර්ශන හඳුන්ගොඩ අත්අඩංගුවට ගනුලැබූ බව පොලිසිය පවසයි.

ඉකුත් වසරේ අරගල සමයේ මැයි 09 වැනිදා රාත්‍රියේ අරලියගහ මන්දිරය ඉදිරිපිට සිදුවූ කලහකාරී සිදුවීමේදී ප්‍රචණ්ඩත්වය ඉස්මතුවන අන්දමේ වීඩියෝවක් සමාජ මාධ්‍යවල මුදාහැරීම සම්බන්ධයෙන් ඔහුට එරෙහිව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාශය විමර්ශනයක් අරඹා තිබුණි.

පසුව එම විමර්ශනයට අදාළව දර්ශන හඳුන්ගොඩගෙන් ඉකුත් වසරේ මැයි 31 වන දින අපරාධ පරීක්ෂණ දෙපාර්තමේන්තුව පැය 04ක කාලයක් ප්‍රකාශ සටහන් කර ගනු ලැබීය.

වැඩිදුර විමර්ශන සඳහා ප්‍රකාශ සටහන් කර ගැනීමට ඔහුට මෙම වසරේ ජනවාරි 20 වන දින අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස දැනුම් දීම ලැබෙන අවස්ථාවේ ඔහු විදේශගතව සිටියේය.

එම තත්වය යටතේ අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාශය දර්ශන හඳුන්ගොඩට එරෙහිව අධිකරණ නියෝගයක් ලබාගෙන තිබිණ.

ඩුබායි රාජ්‍යයේ සිට ඊයේ රාත්‍රී යළි දිවයිනට පැමිණෙමින් සිටියදී දර්ශන හඳුන්ගොඩ කටුනායක ගුවන් තොටුපළේදී අත්අඩංගුවට ගෙන ඇත්තේ එම අධිකරණ නියෝගය අනුවය.

සිද්ධිය සම්බන්ධයෙන් විමර්ශන අඛණ්ඩව සිදුකරන බව පොලිසිය අධිකරණය හමුවේ කියා සිටියේය.

අද (06) මධ්‍යම රාත්‍රියේ සිට ක්‍රියාත්මක වන පරිදි ලාෆ් ගෑස් මිල ඉහළ දමා තිබෙයි

ඒ අනුව නව මිල ගණන් පහත පරිදි වෙයි.

12.5kg - රු : 200/= නව මිල රු: 5280/=
5kg - රු: 80/= නව මිල රු: 2112/=
2kg - රු: 32/= නව මිල රු: 845/=

ශ්‍රි ලංකාවේ කෘෂි රසායන ක්ෂේත්‍රයේ නිරත ප්‍රකට සමාගමක්වන 'ඔපෙක්ස් හෝල්ඩිංග්ස්' සමාගමේ කළමනාකාර අධ්‍යක්ෂ ඇතුළු ව්‍යාපාර ගණනාවක් හිමි ව්‍යාපාරිකයකුවන ඔනේෂ් සුබසිංහ ඉන්දුනීසියාවේ ජකර්තා හි දී අබිරහස් ලෙස මියගොස් ඇතැයි වාර්තා වේ.

මේ පිළිබඳව අනාවරණය කර 'ද මෝනිං' වෙබ් අඩවිය පවසන්නේ ඉන්දුනීසියා ජකර්තා නුවර සුඛෝපභෝගී මහල් නිවාසක මියගොස් සිටියදී අද (05) ඔහුගේ දේහය සොයා ගෙන ඇති බවයි.

ඔනේෂ් සුබසිංහ විවාහ වී සිටින්නේ බ්‍රසීලියානු ජාතික කාන්තාවක සමඟය. ඔනේෂ් ඇයත් ඔහුගේ 4 හැවිරිදි දියණිය තවත් නාඳුනන බ්‍රසීල ජාතික කාන්තාවකුත් සමග ජකර්තා හි පෞද්ගලික සංචාරයකට ගොස් ඇත.

 ව්‍යාපාරිකයාගේ බ්‍රසීල ජාතික බිරිය ගැන සැකයක්

ඔනේෂ් සුබසිංහ අවසන් වරට පසුගිය අඟහරුවාදා (02) කොළඹදී ඔහුගේ පවුලේ අය සමඟ සම්බන්ධ වී ඇති අතර ඉන් පසුව සම්බන්ධතා නොමැතිකම හේතුවෙන් ශ්‍රී ලංකාවේ සිටින පවුලේ සාමාජිකයන් මහල් නිවාස කළමනාකාරිත්වය අමතා සුබසිංහ පිළිබඳව සොයා බලන ලෙස ඉල්ලා ඇත.

ඔහු හෝ බිරිඳ සම්බන්ධ කර ගත නොහැකි තැන මහල් නිවාස කළමනාකාරීත්වය නිවසේ අගුලු කඩා ඇතුළු වෙද්දී මියගිය ඔනේෂ් සුබසිංහගේ ගේ සිරුර හමුවී ඇත.

පසුව මහල් නිවාසයේ සීසීටීවී දර්ශන පරීක්ෂා කිරීමේදී පෙනී ගොස් ඇත්තේ, ඔහුගේ බිරිඳ, දියණිය සහ නාඳුනන කාන්තාව අඟහරුවාදා එම නිවසින් පිටවී යන්නේ ‘බාධා නොකරන්න’ (Do nit Disturb) පුවරුවක්ද දොරේ එල්ලීමෙන් පසුවය. කෙසේ වුවද බිරිය හා දරුවාත් පැමිණි නාඳුනන කාන්තාවත් අඟහරුවාදා දෝහා බලා පිටත්ව යන ගුවන් යානයකින් රටින් පිටව ගොස් ඇති බව සොයාගෙන ඇත.

සුබසිංහ මහතා ඇමරිකා එක්සත් ජනපදයේ කෝනෙල් විශ්වවිද්‍යාලයෙන් විද්‍යාව පිළිබඳ උපාධියක් ලබා ඇති බව ඔපෙක්ස් හෝල්ඩිංග්ස් වෙබ් අඩවිය සඳහන් කරයි. ආයෝජන, ශාස්ත්‍රඥයන් සහ පළපුරුද්ද පිළිබඳ ඔහුගේ දැනුම OPEX හෝල්ඩින්ග්ස් වෙත ඉතා වැදගත් වූ අතර, ඔහු සාර්ථක වූ ව්‍යාපාරික අභියෝග භාර ගැනීමට ද ප්‍රසිද්ධ විය.

OPEX යනු දේශීය සහ ජාත්‍යන්තර වෙළෙඳපොළ සඳහා විශේෂිත දියර පොහොර නිෂ්පාදනය කරන ශ්‍රී ලංකාවේ පළමු සමාගම වේ.

 (lankasara.com)

මේ දින වල මුදල් අමාත්‍යංශය වියදමට මිස ඡන්දයට බිය නොවන බව මුදල් රාජ්‍ය අමාත්‍ය රංජිත් සියඹලාපිටිය පවසයි.

මාධ්‍ය වෙත අදහස් දක්වමින් රාජ්‍ය අමාත්‍යවරයා සඳහන් කළේ, අදායමට වඩා කිහිප ගුණයකින් වැඩි ප්‍රමාණයක වියදම් දැරීමට සිදුව ඇති කාලයක ඉහළින් කළමනාකරණය කරමින් මෙම ඡන්ද කටයුතු පවත්වා ගෙන යන බව ය.

“වියදම් ප්‍රමුඛතා අනුපිළිවෙළකට සකස් කර ගැනීම නිසා තමයි මාස කිහිපයකට කලින් දැක්ක කිලෝමීටර ගණන් දිග මිනිස්සු මැරී වැටුණු පෝලිම් අද දකින්න නැත්තේ, මහ බඩු හිඟය අද දකින්න නැත්තේ සහ ගොවියාට පොහොර ටික ලැබෙන්නේ. ඒ කළමනාකරණය සඳහා භාණ්ඩාගාරය විවිධකාර කළමනාකරණ චක්‍රලේඛ නිකුත් කරනවා.”

එම අවස්ථාවේදී මාධ්‍යවේදියෙකු ලබන 8 වන දා පාර්ලිමේන්තුවට පනතක් ගෙන ඒම පිළිබඳව ප්‍රශ්න කර සිටියේ ය.

ඊට පිළිතුරු දෙමින් සියඹලාපිටිය මහතා සඳහන් කළේ, මුදල් අමාත්‍යංශයට මේ සම්බන්ධයෙන් වන යෝජනාවක් ගෙන ඒමට කිසිදු අවශ්‍යතාවක් නොමැති බව ය.

“මුදල් අමාත්‍යංශය වගඋත්තරකරුවෙක් කරමින් මේ ඡන්දය පිළිබඳව ශ්‍රේෂ්ඨාධිකරණයට පෙත්සමක් ඉදිරිපත් කරලා තිබුණා යම් කිසි පුද්ගලයෙක්. මේ වෙලාවේ මුදල් අමාත්‍යංශයේ තිබෙන අසීරුතා පිළිබඳව දිවුරුම් පෙත්සමක් මුදල් අමාත්‍යංශයේ ලේකම්වරයා ශ්‍රේෂ්ඨාධිකරණයට ඉදිරිපත් කරා. ඒක මුදල් අමාත්‍යංශයේ යුතුකම. සැබෑ තත්ත්වය අධිකරණයට කියන එක. ඉන් එහාට ගිහිල්ලා 8 වන දාට පාර්ලිමේන්තුවට ඉදිරිපත් කරලා වියදම් කරන්න බැහැ කියලා එහෙම කිසිදු සූදානමක් මුදල් අමාත්‍යංශයට නැහැ.”

maubima

ආගමික සහ දේව අපහාසාත්මක අන්තර්ගතයන් ඇතුලත් වීම හේතුවෙන් පාකිස්තානය තුල විකිපීඩියා වෙබ් අඩවිය අවහිර කර ඇති බව පාකිස්තාන විදුලි සංදේශ අධිකාරිය පවසයි.

පසුගිය සෙනසුරාදා මෙම නිවේදනය නිකුත් කල අතර අදාල අන්තර්ගතයන් වෙනස් කිරීම සඳහා විකිපීඩියා වෙබ් අඩවියට පැය 24 ක සහන කාලයක්ද ලබා දී ඇති අතර එරට විදුලි සංදේශ අධිකාරිය ප්‍රකාශ කර ඇත්තේ විකිපීඩියාව එයට අනුකූල වීමට අපොහොසත් වූ බවයි.

කෙසේ වෙතත් අදාල විකිපීඩියා පදනම ප්‍රකාශ කරන්නේ මෙම තහනම දිගටම පැවතුනහොත් එය “පාකිස්තානයේ දැනුම, ඉතිහාසය සහ සංස්කෘතිය වෙත සෑම කෙනෙකුටම ප්‍රවේශ වීමේ අයිතිය අහිමිකිරීමක් වනු ඇති බවයි.

75 වන නිදහස් සැමරුම වෙනුවෙන් මෙරට ග්‍රාමීය ප්‍රදේශවල පොදු ප්‍රවාහන සේවාව වඩාත් ශක්තිමත් කිරීම සඳහා ඉන්දීය රජය විසින් මෙරටට ලබාදීමට නියමිත බස් රථ 500 අතරින් බස් රථ 50ක් ජනාධිපති රනිල් වික්‍රමසිංහට බාර දීම ශ්‍රී ලංකාවේ ඉන්දීය මහකොමසාරිස් ගෝපාල් බග්ලේ අතින් සිදු කෙරිණි.

ශ්‍රී ලංකාවේ ඉන්දීය මහකොමසාරිස්වරයා ඊට අදාල ලේඛන කොළඹ ජනාධිපති කාර්යාලයේ දී අද (05) පෙරවරුවේ ජනාධිපතිවරයාට බාර දුන්නේය.

පීත්ත පටි කපා බස් රථ දෙකක් විවෘත කළ ජනාධිපතිවරයා ඒවා නිරීක්ෂණය කිරීමට ද එක් විය. ප්‍රවාහන, මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන  ඉන්දීය රජයෙන් කරන ලද ඉල්ලීමකට අනුව 75 වන ජාතික නිදහස් සැමරුමට සමගාමීව මෙම බස් රථ ලබාදීමේ වැඩසටහන ක්‍රියාවට නැංවිණි.

එහි පළමු තොගය ලෙස බස් රථ 75ක් පසුගියදා ශ්‍රී ලංකා රජය වෙත බාර දෙනු ලැබීය.

තවත් බස් රථ 40ක ලියාපදිංචි කටයුතු මේ වන විට සිදු වෙමින් පවති.

ඒ අනුව බස් රථ 165 ක් මේ වන විට ශ්‍රී ලංකාවට ලබාදී ඇති අතර 2023 මාර්තු අවසන් වන විට බස් රථ 500 ලබාදීමේ ව්‍යාපෘතිය සම්පුර්ණ කිරීමට නියමිතය.

පාකිස්තානයේ හිටපු ජනාධිපතිවරයෙක් වන ෆර්වෙස් මුශාරෆ් මියගොස් ඇති බව විදෙස් මාධ්‍ය පවසයි.

ඩුබායි හි රෝහලක ප්‍රතිකාර ලබමින් සිටින අතරතුර ඔහු මියගොස් තිබේ.

ඔහු 79 හැවිරිදි වියේ පසුවිය.

අවයවවලට හානි වන දුර්ලභ රෝගයක් වන ඇමිලොයිඩෝසිස් නම් රෝගයෙන් හිටපු ජනරාල් පර්වේස් මුෂාරෆ් මහතා දීර්ඝ කාලයක් පීඩා විඳ ඇත.

අද (05) මධ්‍යම රාත්‍රියේ සිට ක්‍රියාත්මක වන පරිදි ලිට්‍රෝ ගෑස් මිල ඉහළ දමා ඇති බව ලිට්‍රෝ සමාගම පවසයි.

මේ අනුව කිලෝග්‍රෑම් 12.5ක ගෘහස්ථ ගෑස් සිලින්ඩරයක මිල රුපියල් 334කින් ඉහළ දමා ඇත.

ඒ අනුව කිලෝග්‍රෑම් 12.5ක ගෑස් සිලින්ඩරයක නව මිල රුපියල් 4,743ක් වේ.

කිලෝග්‍රෑම් 5ක ගෑස් සිලින්ඩරයක මිල රුපියල් 134කින් ඉහළ දමා ඇති අතර එහි නව මිල රුපියල් 1,904ක් වන බව ලිට්‍රෝ සමාගමේ සභාපතිවරයා පැවසුවේය.

කිලෝග්‍රෑම් 2.3ක ගෑස් සිලින්ඩරයක මිල රුපියල් 61කින් ඉහළ දමා ඇති අතර එහි නව මිල රුපියල් 883ක් වේ.

හැත්තෑ පස්වන අභිමානවත් නිදහස් දින සමරු උත්සවය වෙනුවෙන් නිදහස් චතුරස්‍රයේ පිහිටි මෙරට ප්‍රථම අග්‍රාමාත්‍ය, මහාමාන්‍ය ඩී.එස්.සේනානායක ශ්‍රීමතාණන්ගේ පිළිරුවට පුෂ්පෝහාර දැක්වීම අද පෙරවරුවේ පැවැත්විණි.

ඒ අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ, ආචාර්ය විජයදාස රාජපක්ෂ, හිටපු කථානායක ශ්‍රී ලංකාභිමාන්‍ය කරූ ජයසුරිය, කොළඹ නගරාධිපතිනී රෝසි සේනානායක යන මහත්ම මහත්මීන්ගේ ප්‍රධානත්වයෙන් ජනාධිපති උපදේශක රුවන් විජයවර්ධන, හිටපු අමාත්‍ය රුක්මන් සේනානායක මහත්වරුන්ගේ සහභාගිත්වයෙනි.

ශ්‍රී ලංකා පොලිස් දෙපාර්තමේන්තුවේ පරිහරණය සඳහා ජපාන රජය පරිත්‍යාග කළ යතුරුපැදි 150ක්, වෑන් රථ හා කුඩා වර්ගයේ බස් රථ 74ක් සහ සෝදිසි උපකරණ 115ක් ජනාධිපති රනිල් වික්‍රමසිංහ  වෙත සංකේතාත්මකව භාරදීම ඊයේ (03) පස්වරුවේ ජනාධිපති කාර්යාලයේ සිදු විය.

ජපාන විදේශ කටයුතු රාජ්‍ය අමාත්‍ය ටකෙයි ෂුන්සුකේ මහතා විසින් මෙම උපකරණ භාරදීමට අදාළ ලියකියවිලි ජනාධිපතිවරයා වෙත පිළිගන්වනු ලැබීය.

වාහන නිරීක්ෂණය කළ ජනාධිපතිවරයා ජපාන විදේශ කටයුතු රාජ්‍ය අමාත්‍යවරයා සමග සුහද කතා බහක ද නිරත විය.

ශ්‍රී ලංකා පොලිසිය සිදුකරන විමර්ශන පහසු කිරීම සඳහා ජපාන රජය මෙම පරිත්‍යාගය සිදු කර ඇත.

ශ්‍රී ලංකාවේ ජපාන තානාපති මිෂුකොෂි හිදෙකි මහතා ඇතුළු ජපාන නියෝජිත පිරිස සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක, ජාත්‍යන්තර කටයුතු පිළිබඳ ජනාධිපති අධ්‍යක්ෂ දිනුක් කොළඹගේ යන අය ඇතුළු පිරිසක් මෙම අවස්ථාවට එක්ව සිටියහ.

ජනාධිපති රනිල් වික්‍රමසිංහ සහ ඉන්දීය විදේශ කටයුතු රාජ්‍ය අමාත්‍ය වී. මුරලිදරන් අතර හමුවක් සිදුවී තිබේ.

අද (04) පස්වරුවේ ජනාධිපති කාර්යාලයේදී එම හමුව සිදුවී ඇති බව ජනාධිපති මාධ්‍ය අංශය සඳහන් කරයි.

13 වන ව්‍යවස්ථා සංශෝධනය බලාත්මක කිරීම සහ වාර්ගික සහජීවනය තහවුරු කිරීම සඳහා ගෙන ඇති පියවර සම්බන්ධයෙන් මෙහිදී සාකච්ඡා කර තිබේ.

මහජන උපයෝගීතා කොමිසමට (PUCSL) නව සාමාජිකයෙකු ලෙස ඩග්ලස් නානායක්කාර  පත් කර තිබේ.

ඒ, ජනාධිපතිවරයාගේ නිර්දේශ මත ආණ්ඩුක්‍රම ව්‍යවස්ථා සභාව විසිනි.

මහජන උපයෝගීතා කොමිසමේ සභාපති ජනක රත්නායක පැවසුවේ, නව පත්කිරීමත් සමග කොමිසමේ ඝන පූර්ණය සම්බන්ධයෙන් කිසිදු ගැටළුවක් මතු නොවන බව ය.

මොහාන් සමරනායක සහ උදේනි වික්‍රමසිංහ යන  ශ්‍රී ලංකා මහජන උපයෝගිතා කොමිසමේ සාමාජිකත්වයන් ඉල්ලා අස් වූයේ, ජනාධිපතිවරයා වෙත ලිපියක් යොමු කරමිනි.

ඉල්ලා අස්වීමට හේතු කිහිපයක් සඳහන් කරමින්, ඔවුන් සිය ඉල්ලා අස්විමේ ලිපිය ජනාධිපතිවරයා ඇතුළු බලධාරීන්ට යොමු කර තිබුණි.

මේ අතර, දෛනික විදුලිය කප්පාදුවට සිය අනුමැතිය මෙතෙක් ලබා දී නැතැයි, මහජන උපයෝගීතා කොමිසමේ සභාපති ජනක රත්නායක  පැවසීය.

කෙසේ වෙතත්, ඊයේ (03) සිට යළි විදුලිය කප්පාදු කිරීමට ලංකා විදුලිබල මණ්ඩලය පියවර ගෙන තිබුණි.

75 වන ජාතික නිදහස් සැමරුම වෙනුවෙන් ජනාධිපති රනිල් වික්‍රමසිංහ  ජාතිය අමතා සිදු කරන ලද විශේෂ ප්‍රකාශය (2023-02-04)

මම අද පවත්වන්නේ සාම්ප්‍රදායික නිදහස් දින කතාවක් නෙවෙයි. නිදහස ලබා ගැනීමට කැපවුණු, වෙහෙසුණු ඩී.එස්. සේනානායක මැතිතුමා ඇතුළු සියලු දෙනාටම ගෞරවය පුදකරමින් මම කතා කරන්න යන්නේ, අපට ලැබුණු නිදහස ගැන නෙවෙයි. අද අපට අහිමි වෙලා තිබෙන නිදහස යළි දිනාගැනීම පිළිබඳවයි.

මීට අවුරුදු 75කට කලින් ලංකාවට නිදහස ලැබූ අවස්ථාවේ කීර්තිමත් “ලන්ඩන් ටයිම්ස්” පුවත්පතේ කතුවැකියේ මෙසේ සඳහන් වුණා.

“ලංකාව නුදුරේදීම පෙරදිග ස්විස්ටර්ලන්තය බවට පත්වනු දැකීම අපේ අපේක්ෂාවයි” කියලා.

වෙනත් කිසිඳු පෙරදිග රටක් පිළිබඳව ඔවුන් එවැනි අපේක්ෂාවක් ඇතිකර ගත්තේ නැහැ.

එහෙත් වර්තමානයේ අපට සිදු වී ඇත්තේ කුමක්ද?

අද අපි ඉතිහාසයේ මෙතෙක් නොවූ විරු දැවැන්ත ආර්ථික අර්බුදයකට මුහුණ දෙමින් ඉන්නේ. මෑත ඉතිහාසයේ මෙවැනි බරපතළ තත්ත්වයකට අප මුහුණ දීලා නැහැ.

අපට එවැනි තත්ත්වයක් උදා වුණේ ඇයි? මේ තත්ත්වයට වග කියන්න ඕනෑ කවුද?

අපි ඇත්ත කතා කරමු. මේ තත්ත්වයට අපි සියලුදෙනාම අඩු වැඩි වශයෙන් වගකිව යුතුයි. අපි කාටවත් එකිනෙකාට ඇඟිල්ල දිගු කර වරද පටවන්න බෑ.

අපි මුල ඉදලාම වරද්දා ගත්තා. ඒ වරද නිවැරදි කර ගැනීමට උත්සාහයන් ගැනුණා. වෙහෙසීම් කෙරුණා. එහෙත් සියයට සියයක් නිවැරදි කර ගැනීමට හැකි වුණේ නැහැ.

නිදහස ලබාගැනීමේ දී ඩී.එස්. අනුගමනය කළ පිළිවෙත වුණේ ලංකාවාසී සියලුදෙනා එක්සත් කිරීමයි. සිංහල, දෙමළ, මුස්ලිම්, බර්ගර් කවරෙක් වුවත් ලාංකිකයන් ලෙස ඉදිරියට කටයුතු කළ යුතු බව ඔහු එදා කිව්වා.

නමුත් නිදහසින් පස්සේ අපි බෙදුණා. ජාති, ආගම්, පළාත් වශයෙන් බෙදුණා. එකිනෙකා කෙරෙහි සැකය, වෛරය ඇතිවන තෙක්ම බෙදුණා. විවිධ කණ්ඩායම්, බලය ලබා ගැනීමට මේ බෙදීම පාවිච්චි කළා. බලය වෙනුවෙන් තව තව බෙදීම් ඇති කළා. අපි ඒ අය ප්‍රතික්ෂේප කරනවා වෙනුවට ඒ අයටම බලය ලබා දුන්නා.

දේශපාලනයේ දී ඇත්ත වෙනුවට බොරු කිව්වා. ඇත්ත කියූ දේශපාලනඥයන් ජනතාව ප්‍රතික්ෂේප කළා. රටේ සැබෑ තත්ත්වය පෙන්වා දෙමින් ඊට පිළියම් හොයන අයට තැනක් ලැබුණේ නැති තරම්. බොරුවෙන් හිත සතුටු කරන අයට වැඩි පිළිගැනීමක් ලැබුණා. අප පොරොන්දු දේශපාලනයක හිර වුණා. අපට අයිති නැති, ණයට ගත්තු සම්පත් මත යැපුණා. වැඩි වැඩියෙන් ණය ගත්තා

“ආණ්ඩුව කියන්නේ සම්පත් උල්පතක්” කියන ආකල්පය අපි ඇතිකර ගත්තා. පාලකයන්ගේ යුතුකම ඒ උල්පතින් ලැබෙන විවිධ සම්පත් ජනතාවට බෙදාදීම කියලා බොහෝ දෙනෙක් හිතුවා. ඒ අනුව රැකියා බෙදා දුන්නා. සම්පත් බෙදා දුන්නා. උපකරණ බෙදා දුන්නා. මුදලුත් බෙදා දුන්නා.

අපි වැඩි හරියක් ඡන්දය දුන්නේ රට වෙනුවෙන් නෙවේ. අපි වෙනුවෙන් රස්සාවක් ගන්න, දරුවෙක් ඉස්කෝලෙට දාගන්න, ටෙන්ඩරයක් පාස් කරගන්න අපි ඡන්දය දුන්නා. අපි ඡන්ද අපේක්ෂකයන්ට වැඩ කළේ පුද්ගලික වාසි බලාගෙන.

අපි වැඩි හරියක් ඡන්දය ඉල්ලුවෙත් රට වෙනුවෙන් නෙවෙයි. අපි වෙනුවෙන්. බලය ලබා ගන්න. වරප්‍රසාද භුක්ති විඳින්න. වැඩිපුර ටිකක් හම්බ කරගන්න.

අපි පොරොන්දුවලට කොටු වුණා. සටන් පාඨවලට හිර වුණා. මේ සියල්ලේ ප්‍රතිඵලයක් හැටියට රටේ ආර්ථිකය දිනෙන් දින කඩා වැටෙන්න පටන් ගත්තා. අපි දේශපාලන පොරොන්දු ඉටු කිරීම සඳහාත් සටන් පාඨවලින් කියූ දේ සනාථ කිරීම සඳහාත් වැඩි වැඩියෙන් ණය ගත්තා.

අපි වැඩි වැඩියෙන් ණය ගත්තේ පරිභෝජනයට මිස ආයෝජනයට නෙවේ. නමුත් බුදුන් වදාළේ “ණය ගත යුත්තේ ආයෝජනයට මිස පරිභෝජනයට නෙවෙයි” කියලයි. අපි බෞද්ධකම ගැන කතා කරන ගමන්, බුදුන් වදාළ ධර්මයට පිටින් ගියා.

සිංගප්පුරුව ගොඩගන්න හැටි ඉගෙන ගන්න ලංකාවට ආපු ලී ක්වාන් යූ අවුරුදු ගණනකට පසුව මෙන්න මෙහෙම කියනවා.

“ඔබේ රටට මේ තත්ත්වය ඇති වුණේ අනවශ්‍ය ලෙස දේශපාලනයට මුල් තැන දීම නිසයි. ඔබේ රට ආදර්ශයට ගත්තා නම් අද සිංගප්පූරුවත් විනාශයි”

ඇත්තටම අපි දැන් විනාශය කරා ඇවිත් තියෙන්නේ. මේ තුවාලය හැමදාම පවත්වාගෙන යන්න කැමති අයත් ඇති. ඒත් මම ඒකට කැමති නෑ. අපි සැත්කමක් කරලා මේ තුවාලය හොඳ කර ගනිමු. ඒක අමාරුයි. වේදනාකාරියි. දුෂ්කරයි. නමුත් ඒ දුක, වේදනාව කෙටි කාලයකට වින්දොත් අපට තුවාලය නිට්ටාවටම සනීප කර ගන්න පුළුවන්.

සමහර දේශපාලන පක්ෂ පෙන්වා දෙන කෙටි පාරවල්වලින් මේ අර්බුදයෙන් අපට ගොඩඑන්න බැහැ. මේ අර්බුදය ජය ගෙන සැබෑ ආර්ථික හා සමාජයීය නිදහසක් ලබා ගන්න නම් අපට යන්න තියෙන්නේ එකම එක පාරයි. මේ නරා වළෙන් ගොඩඑන්න අපට තියෙන්නේ එකම එක ඉණිමගයි. මතක තියා ගන්න, දේශපාලන අවශ්‍යතා නිසා මේ ඉණිමග ඇදලා පැත්තකට දැම්මොත් අපට රටක් නැ. අපට හෙටක් නැ.

අප අද පත්ව තිබෙන ආර්ථික අර්බුදයේ බරපතලකම සහ අනතුර ගැන මම මීට කලින් අවස්ථා ගණනාවකදී පෙන්වා දුන්නා. මේ අවුරුද්දේ මුල් මාස හයක පමණ කාලය අතිශය දුෂ්කර වන බව මම කල් ඇතිවම කිව්වා. මේ දුෂ්කර තත්ත්වයට අකැමත්තෙන් වුණත් අපට මුහුණ දෙන්න සිද්ධ වෙනවා. රට වෙනුවෙන් ඒ දුෂ්කර තත්ත්වය විඳ ගන්න අපට සිද්ධ වෙනවා. දේශපාලන සීනිබෝල කතාවලින් මේ තත්ත්වයට විසඳුමක් ලැබෙන්නේ නෑ.

නිදහස් අධ්‍යාපනය නිසා මේ රටේ විශාල පිරිසක් දුගී බවෙන් මිදී මධ්‍යම පන්තිය වෙත පිවිසියත්, අද මේ රට ඔවුන්ගේ අපේක්ෂාවන් ඉටුකර ගැනීමට නොහැකි බිමක් බවට පත් වී තිබෙනවා. වැඩබිම්වල උරෙන්උර ගැටිය යුතු තරුණ පරපුර විදේශ ගමන් බලපත්‍ර ලබාගැනීමේ පෝලිම්වල තෙරපෙන අයුරු මා දකිනවා. අප එය වෙනස් කළ යුතුයි.

එසේ නම් අපි මේ ආර්ථිකය නවීකරණයකට ලක් කරමින් ලෝකයට විවෘත කළ යුතුයි. ජනතාව රැවටීමට ලක්කරමින් ඔවුන්ව සදාතනික දුප්පතුන්, යැපෙන්නන් බවට පත්කරන දූෂිත දේශපාලන කල්ලිවාදයත් පරාජයට පත්කළ යුතුයි. එය මේ රටේ තරුණ පරපුර බොහෝ කලක සිට බලාපොරොත්තු වූ "සිස්ටම් චේන්ජ්" නොහොත් ක්‍රම වෙනස යි.
ඒ සඳහා මගේ රජය නව ප්‍රතිසංස්කරණවාදී මාවතකට ප්‍රවේශ වී තිබෙනවා. ඒ වෙනුවෙන් ගනු ලබන තීන්දු, යම් වේදනාකාරී ස්වරූපයක් ගනු ලැබූව ද මේ අර්බුදයෙන් ගොඩ ඒමට නම් අපට ඒ පියවර අනුගමනය කිරීමට සිදු වෙනවා.

මේ අර්බුදය ජය ගන්න නම්, අපි පටු දේශපාලනයෙන් ඈත් විය යුතුයි. අපි එක මවකගේ දරුවන් සේ එකමුතුව මේ අභියෝගයට මුහුණ දිය යුතුයි. අභියෝගය ජය ගැනීමේ මාවත ශක්තිමත් කිරීමට හැකි උපරිමයෙන් දායක විය යුතුයි. සියලු භේද පසෙකලා ශ්‍රී ලාංකිකයන් ලෙස අපි සියලු දෙනා ඉදිරියට යා යුතුයි.

ඒ ඔස්සේ ශක්තිමත් නව ආර්ථිකයක් නිර්මාණය කර ගත යුතුයි. ඒ සඳහා මූලික පියවර හා පදනම දැන් සකස් කර අවසන්. ජාත්‍යන්තර මූල්‍ය අරමුදලේ සහාය ලබා ගැනීමට අවශ්‍ය දුෂ්කර කාර්යයන් අප සාර්ථකව අවසන් කර ගනිමින් යනවා. නොබෝ දිනකින් ඔවුන්ගේ එකඟත්වය ලබා ගැනීමට අපි අපේක්ෂා කරනවා.

ආර්ථිකය ශක්තිමත් කර ගැනීමෙන් විතරක් අපට සෑහීමකට පත්වෙන්න බෑ. අපි සමස්ත ක්‍රමයේ වෙනසක් සිදු කළ යුතුයි. මේ දේශපාලන ක්‍රමය, පාර්ලිමේන්තුව, විධායකය, රාජ්‍ය යාන්ත්‍රණය ආදී සියලු ක්ෂේත්‍ර යුගයට ගැළපෙන විදියට වෙනස් කළ යුතුයි. මේ වෙනස්වීම රටටත්, අපටත් දැනෙන යහපත් එකක් විය යුතුයි. අලුත් ක්‍රමවේදය තුළ තරුණයන්ගේ සහ කාන්තාවන්ගේ අදහස් මෙන්ම නියෝජනය සඳහාත් වැඩි ඉඩ කඩක් ලබා දිය යුතුයි.

මේ ක්‍රම වෙනස සඳහා අවශ්‍ය අණ පණත් ගණනාවක් අප පාර්ලිමේන්තුවට ඉදිරිපත් කරනවා.

ඒ වගේම උතුරු නැගෙනහිර ජනතාව මුහුණ දෙන විශේෂිත ගැටලු සම්බන්ධයෙන් කඩිනම් පියවර ගත යුතුයි. මේ වන විටත් අප ඒ සඳහා කැබිනට් අනුකමිටුවක් පත් කර තියෙනවා.
එහිදී ගන්නා තීරණ සහ ක්‍රියාත්මක කරන දින වකවාණු සියලු දේශපාලන පක්ෂ වෙත ලබා දෙනවා. ඔවුන්ගේ අදහස් අනුව ඒ කාර්යයන් ඉදිරියට ගෙන යනවා. ඉඩම් යළි මුදා හැරීම, සිරකරුවන් නිදහස් කිරීම වැනි කටයුතු සඳහා අප ප්‍රමුඛත්වය ලබා දී තියෙනවා. ඒ වගේම ඒකීය රාජ්‍යයක් තුළ උපරිම බලය බෙදීමක් උදෙසා පියවර ගන්නවා. නමුත් කිසිවිටෙක මේ රට බෙදන්නට අප ඉඩ දෙන්නේ නෑ.

 මා උත්සාහ ගන්නේ මතුපිටින් පෙනෙන රෝගී තත්ත්වයට වේදනා නාශක දෙන්න නෙවෙයි. රෝග නිධානයට පිළියම් කිරීමටයි. එය අසීරුයි. දුෂ්කරයි. නමුත් අප යා යුතු එකම මාර්ගය එයයි.

ජනාධිපතිධූරයට පත්වූ දා පටන් මට ගන්නට සිදු වුණ තීන්දු බොහෝමයක් ජනප්‍රිය තීන්දු නොවූ බව මම දන්නවා.

නමුත් ඒ තීන්දු නිසා අද මේ රටේ කිසිම පුරවැසියෙකු තෙල් පෝලිම්වල විජලනයෙන් මිය යන්නේ නැහැ. ගෑස් නොමැතිව බඩගින්නේ ඉන්නේ නැහැ. පොහොර නොමැතිව ශාප කරන්නේ නැහැ.

එම නිසා අරාජිකවාදී දේශපාලන බලවේගයන් කවර බාධක නිර්මාණය කළත් මම මේ රටට ආදරය කරන බහුතර ජනතාව සමඟ එක්ව, මේ නව ප්‍රතිසංස්කරණ වැඩසටහන ඉදිරියට ගෙන යනවා.

සාමය සංහිඳියාව පෙරදැරි කරගෙන එකමුතුව, සැලසුම් සහගතව ඉදිරියට ගියොත් අපට 2048 වෙද්දි සංවර්ධිත රාජ්‍යයක් බවට පත්වෙන්න පුළුවන්. ලෝකයේ වෙනත් කිසිඳු රටකට අතපාන්නේ නැති, දියුණු රටක් බවට පත්වෙන්න පුළුවන්. සැබෑ නිදහස උදාකරගන්න පුළුවන්.

අපේ දරු දැරියන්ට ලෝකයත් සමඟ තරග කළ හැකි අලුත් රටක් නිර්මාණය කිරීම අප සැමගේ වගකීමක්. ඒ නිසා මේ දුෂ්කර අවධිය ජය ගැනීමට එකට එක්වන ලෙස මම සියලු පාර්ශ්වයන්ගෙන් ඉල්ලා සිටිනවා.

අපි එකමුතු වෙමු ! අත්වැල් බැඳ ගනිමු !

එසේ අත්වැල් බැඳගෙන ඉදිරි වසර 25 සඳහා අප සකස්කරගෙන ඇති සැලසුම් අනුව, එක්සත් ගමනක් යමු. සියලු පාර්ශ්වයන්ගේ අදහස් අනුව ඒ සැලසුම් වඩාත් පෝෂණය කර ගනිමු. වඩාත් ශක්තිමත් කර ගනිමු. ඒවා වඩාත් ක්‍රමවත් සහ විධිමත් කර ගනිමු.

මේ වෑයමට එක් විය යුත්තේ ශ්‍රී ලංකාවේ වෙසෙන අප සැම පමණක් නොවෙයි. ලොව පුරා විවිධ රටවල වෙසෙන ශ්‍රී ලාංකිකයන් ද මේ ගමනට උර දිය යුතුයි. එක් විය යුතුයි. සියලුදෙනාම හැකි ශක්ති ප්‍රමාණයෙන් මේ ඉලක්ක ජය ගැනීමට සහාය විය යුතුයි.

ඉතින් අපි සියලුදෙනා එකට එක්ව වෙහෙසෙමු. එකාවන්ව කැපවෙමු. එක මවකගේ දරු කැලක් මෙන් එකතුවෙමු. අපේ රටට නිදහසින් අවුරුදු 100ක් පිරෙන 2048 වර්ෂයේ දී අපේ රට ලෝකයේ ඉහළින්ම ඇති රාජ්‍යයක් බවට පත් කර ගනිමු

ඔබ සැමට ස්තූතියි.

ජනාධිපති මාධ්‍ය අංශය
2023-02-04

2023 පළාත් පාලන ආයතන ඡන්ද විමසීම ට අදාළ දිස්ත්‍රික් මැතිවරණ ආරවුල් නිරාකරණ මධ්‍යස්ථානවල දුරකථන අංක පිළිබඳව දැනුවත් කරමින් මැතිවරණ කොමිසම නිවේදනයක් නිකුත් කර තිබේ.

එම තොරතුරු පහතින්,