පුවත්

ඍජු බදු වැඩි කර, රටේ ආදායම වැඩි නොකළ හොත් නැවත පෝලිං යුගයකට යාමට සිදුවෙන බව ජනාධිපති රනිල් වික්‍රමසිංහ පවසයි.

ණය ප්‍රතිව්‍යුහගතකරණය සාර්ථක කරගෙන නිවැරදි ආර්ථික කළමනාකරණයක් ඇති කිරීමට රජය සූදානම් බවද ජනාධිපතිවරයා අවධාරණය කළේය.

ජනාධිපති රනිල් වික්‍රමසිංහ මේ බව සඳහන් කළේ බදු ප්‍රතිපත්තිය සම්බන්ධයෙන් අද (19) විශේෂ ප්‍රකාශයක් සිදු කරමිනි.

රටේ ආදායම වැඩි නොකර ආර්ථිකය ශක්තිමත් කිරීමට හැකියාවක් නොමැති බව පෙන්වා දුන් ජනාධිපතිවරයා රට ගොඩගැනීමට නම් අකමැත්තෙන් වුවද අසීරු තීන්දු තීරණවලට එළැඹිමට සිදු වන බව පැවසීය.

ජනාධිපති රනිල් වික්‍රමසිංහ මහතා සිදු කළ සම්පූර්ණ ප්‍රකාශය පහත දැක්වේ.

ලංකාවේ ණය ප්‍රතිව්‍යුහගතකරණ වැඩසටහනේ වැදගත් පියවරක් පසුගිය සතියේ සිදු වුණා. මුදල් රාජ්‍ය ඇමතිතුමා යටතේ කණ්ඩායමක් වොෂින්ටන් නුවර පැවැති ජාත්‍යන්තර මූල්‍ය අරමුදලේ වාර්ෂික (ඔක්තෝබර් 07) රැස්වීමට සහභාගී වුණා. ඒ අවස්ථාවේ දී ජාත්‍යන්තර මූල්‍ය අරමුදලේ ප්‍රධානත්වයෙන් ලංකාවට ණය ලබා දුන් රටවල් හා ණය ලබාදුන් සමහර පුද්ගලික ආයතන සමඟ රැස්වීමක් පැවැත්වූවා. 75 දෙනෙකුට වැඩි පිරිසක් සෘජුව සහ සූම් තාක්ෂණය ඔස්සේ එම රැස්වීමට සහභාගී වුණා.

ලංකාවට ණය ලබාදුන් ප්‍රධාන රටවල් 03 වන ජපානය, චිනය සහ ඉන්දියාව සමඟ පොදු වේදිකාවකට පැමිණ සහන ලබාදීමට ගතයුතු ඉදිරි පියවර කුමක්ද යන්න සාකච්ඡා කිරීම මෙහි මූලික අරමුණ වුණා.

ජාත්‍යන්තර මූල්‍ය අරමුදලත්, ශ්‍රී ලංකාවත් මේ රැස්වීමේ දී පෙන්වා දුන්නේ, පොදු වේදිකාවක තිබෙන අවශ්‍යතාව. ඉන්දියාව සහ චීනය ඒ පිළිබඳ තවදුරටත් විමර්ශනය කර පිළිතුරු ලබා දෙන බව දන්වා තිබෙනවා. ඒ වගේම ද්වී පාර්ශ්වික සාකච්ඡාත් අවශ්‍ය වෙන්න පුළුවන් කියලා දැනුම් දී තිබෙනවා.

තවත් රටවල් ගණනාවක් මෙයට සහභාගී වුණා. විශේෂයෙන් අමෙරිකාවේ, භාණ්ඩාගාරයේ සහකාර ලේකම්වරයෙක් මේ සාකච්ඡාවට පැමිණියා. මේ සියල්ල සිදු කිරීමට අපිට අවස්ථාව ලැබුණේ ජාත්‍යන්තර මූල්‍ය අරමුදල සමඟ සාකච්ඡා කර අපි ගත් තීන්දු ක්‍රියාත්මක කරන නිසයි.

ලංකා රජයේ ආදායම් පිළිබඳව එක් කාරණයක් මතුව තිබෙනවා. 2015 ජාත්‍යන්තර මූල්‍ය සංවිධානයේ නියෝජිතයන් මෙරටට පැමිණි අවස්ථාවේ ප්‍රාථමික අය වැයෙහි අතිරික්තයක් අවශ්‍යය බව අපිට දැනුම් දුන්නා. ඒ වගේම අපි 2017-2018 වර්ෂවල ඒ අතිරික්තය ලබා දුන්නා. නමුත් 2019 පාස්කු ඉරිදා බෝම්බ ප්‍රහාරය නිසා එය අඩු වුණා. ඒ ගැන විශාල ප්‍රශ්නයක් ඇති වුණේ නැහැ. අපිට ප්‍රාථමික අය වැයෙහි අතිරික්තයක් තිබෙන නිසා අපේ ආදායම වැඩිකරගන්න අපිට පුළුවන් වෙයි කියා ඒ අය බලාපොරොත්තු වුණා.
එදා අපේ ආදායම තිබුණේ දළ දේශීය නිෂ්පාදනයෙන් 14.5%ක් - 15%ක් අතර ප්‍රමාණයක්. එහෙත් ක්‍රමානුකූලව මෙය 17%-18%කට වැඩි කරගන්න පුළුවන් කියලා තමයි අපි එකඟ වුණේ.

නමුත් 2019 නොවැම්බර් මාසයේදී මේ රටේ බදු විශාල ලෙස අඩු කළා. එවිට රජයේ ආදායම 8.5%කට අඩු වුණා. එහිදී ජාත්‍යන්තර මූල්‍ය අරමුදල මෙම ගිවිසුම්වලින් ඈත් වෙලා ආධාර ලබා දීමට නොහැකි බව ප්‍රකාශ කළා.

අපිට රුපියල් බිලියන 600ක්, 700ක් පමණ ඒ වසරේ අහිමි වුණා. ඒ එක්කම කොවිඩ් වසංගතයටත් අපිට මුහුණ දීමට සිදු වුණා. ලංකාවේ ආර්ථිකය කඩා වැටීමට ප්‍රධාන හේතු වුණේ මෙම තත්ත්වයයි.

අපේ ප්‍රාථමික අය වැයේ අතිරික්තයත් ලබාගත යුතු බවට ජාත්‍යන්තර මූල්‍ය අරමුදල අපිට දැනුම් දුන්නා. ඔවුන්ගේ සහාය අවශ්‍ය නිසා අපිත් එයට එකඟ වුණා.

අනිත් කරුණ තමයි රටේ ආදායම දළ දේශීය නිෂ්පාදනයෙන් 8.5% සිට 14.5%ක් දක්වා වැඩි කිරීමට තීරණය කිරීම. එය එකවර සිදු කිරීම අසීරු කාර්යයක්. ඒ නිසා 2026 වන විට රටේ දළ දේශීය නිෂ්පාදනයෙන් 14.5%ක් දක්වා ආදායම වැඩිකර ගැනීමට අපි සැලසුම් කර තිබෙනවා.
රටේ ආදායම් වැඩි කර ගන්නේ කෙසේ ද කියා පළමුවෙන්ම අපට සිතන්න සිදු වෙනවා. ආදායම අඩු වූ නිසා අපි මුදල් මුද්‍රණය කර තිබෙනවා. ඒ අනුව පසුගිය වසර දෙකේ දී මුද්‍රණය කළ මුදල් ප්‍රමාණය රුපියල් බිලියන 2300ක්. ඒ නිසා උද්ධමනය 70% - 75%ක් දක්වා ඉහළ ගියා. ඒ වගේම ආහාර උද්ධමනය ඊටත් වඩා වැඩි වී තිබෙනවා.

මේවා පාලනය කිරීමත් අවශ්‍යයි. ඒ වගේම ආදායම ලබා ගැනීමටත් අවශ්‍යයි. එබැවින් ජාත්‍යන්තර මූල්‍ය අරමුදල සමඟ පැවති මෙම සාකච්ඡාවලදී අලුත් බදු ක්‍රමයක් ඉදිරිපත් වුණා. අපනයන කර්මාන්තවලටත් බදු ගෙවන්න අවශ්‍යයි කියලා ජාත්‍යන්තර මූල්‍ය අරමුදල දැනුම් දී තිබුණා.

අපනයන ආර්ථිකයක් තිබෙන රටවල් බදු ගෙවන බව ඔවුන් පෙන්වා දුන්නා. ඒ වගේම ඔවුන් සඳහන් කළේ අපේ පළමුවෙනි අපනයන ආර්ථිකය වුණේ වැවිලි කර්මාන්තය බවත්, බ්‍රිතාන්‍ය පාලන කාලයේ දී තේ, පොල්, රබර් සෑම වැවිලි ක්ෂේත්‍රයකින්ම බදු ගෙවීම සිදු කළ බවත්ය. ඒ නිසා අපි එම ඉලක්කයට ගමන් කරනව නම් බදු ගෙවන්න සිදු වෙයි කියා දැනුම් දුන්නා.
ඒ ගැන දැන් අපනයන ක්ෂේත්‍රය අපෙන් ප්‍රශ්න කර තිබෙනවා. එම කරුණු ජාත්‍යන්තර මූල්‍ය අරමුදලට ඉදිරිපත් කරන්න අපි බලාපොරොත්තු වෙනවා.

දෙවන කාරණය පුද්ගලික බදු. අපි වැඩිපුරම බදු ලබාගත්තේ වක්‍ර බදු ලෙසයි. රටේ දුප්පත් සාමාන්‍ය ජනතාවටත් එම වක්‍ර බදු ගෙවීමට සිදු වුණා. අපි සෘජුව ලබාගත් බදු ආදායම 20%යි. 80%ක ප්‍රමණයක් ලබාගත්තේ වක්‍ර බදු වලින්.

විශේෂයෙන්ම ඒ පිළිබඳ ජාත්‍යන්තර මූල්‍ය අරමුදලට ප්‍රශ්න තිබුණා, ඒ අය කිව්වේ සෘජු බදු වලින් ලබාගන්න බදු ප්‍රමාණය 20%කට වඩා වැඩි විය යුතු බවයි. නැත්නම් මෙය සාර්ථක නොවන බවත්, සාමාන්‍ය ජනතාවටත් බදු ගෙවීමට සිදුවන බවත් ඔවුන් පෙන්වා දුන්නා.

ඒ නිසා මෙම ක්‍රමවේදයට අනුවත්, 2026 ඉලක්ක ළඟා කර ගැනීම සඳහාත් මෙම බදු අය කිරීම ලක්ෂ 02ක අදායමක් ලබන අයගෙන් සීමා කළ හැකි ද යන්න පිළිබඳව භාණ්ඩාගාරයත්, ජාත්‍යන්තර මූල්‍ය අරමුදලත් සාකච්ඡා කළා, එහෙත් ඒ අරමුණ ඉටු වුණේ නැහැ. අවසානයේ සිදු වුණේ ලක්ෂයකට වැඩි ආදායමක් ලබන පිරිසගෙනුත් ආදායම් බදු අය කිරීමයි. මේ පිළිබඳ රටේ විශාල ප්‍රශ්නයක් ඇති වී තිබෙනවා.

මෙවන් පසුබිමක් තුළ මෙම බදු ක්‍රමය අනුගමනය නොකළහොත් අපිට අවශ්‍ය ඉලක්ක කරා ළඟා වීමට නොහැකි විය හැකියි. අපි එකඟ වූ ඉලක්කය වන්නේ 2026 වන විට දළ දේශීය නිෂ්පාදනයෙන් 14.5%ක - 15%ක ආදායමක් ලබා ගැනීමයි. අපි මේ වැඩපිළිවෙළින් ඉවත් වුණොත් ජාත්‍යන්තර මූල්‍ය අරමුදලේ ආධාර අපිට ලැබෙන්නේ නැහැ. ජාත්‍යන්තර මූල්‍ය අරමුදලේ සහතිකය ලැබෙන්නේ නැත්නම් ලෝක බැංකුව, ආසියානු සංවර්ධන බැංකුව වැනි ජාත්‍යන්තර මුල්‍ය ආයතනවලත්, සහයෝගය ලබාදෙන අනෙකුත් රටවලත් සහාය අපිට හිමි වන්නේ නැහැ. එහෙම වුණොත් අපිට නැවත පෝලිං යුගයට යන්න වෙනවා.

මීටත් වඩා අසීරු කාලයක් අපට ඉදිරියේදී ඇති විය හැකියි. මෙම ණය ලබාගෙන ණය ප්‍රතිව්‍යුහගතකරණ වැඩපිළිවෙළට අපි යා යුතුයි. අපි මේ කටයුතු කැමැත්තෙන් කරන්නේ නැහැ. අකමැත්තෙන් හෝ අපිට සමහර තීරණ ගන්න සිදු වෙනවා. ඒවගේම එම තීරණ පිළිබඳ අපි විටින් විට සලකා බලනවා.

ණය ප්‍රතිව්‍යුහගත කිරීමේ වැඩසටහන සාර්ථක කර ගන්නවා වගේම, මහකන්නයේ අපිට හොඳ අස්වැන්නක් ලැබුණාම එයින් ආර්ථික වාසියක් ලබාගෙන ඉදිරියට යන්න අපි බලාපොරොත්තු වෙනවා. එමගින් අපිට තිබෙන ආර්ථික පීඩාව අඩු වෙනවා. ඒ වගේම අපේ විදේශ විනිමය සංචිතය වැඩි කර ගැනීම පිළිබඳ සාකච්ඡා කර තිබෙනවා. මෙම පියවර කිහිපය ක්‍රියාත්මක කළ විට අපිට ඉදිරියට යා හැකියි.

අද අපේ රට ඉතා අසීරු කාලයකට මුහුණ පා සිටිනවා. ඒ අසීරු කාලයේ අසීරු තීරණ ගන්න වෙනවා. වෙන කවුරුත් ඉදිරිපත් නොවූ අවස්ථාවක මම ඒ අසීරු කටයුත්ත භාරගත්තා. ඉතින් මම හිතුවා මේ පසුබිම ගැන සියලුදෙනා දැනුවත් කරන්න මට යුතුකමක් තිබෙනවා කියලා. මේ ගැන තවදුරටත් සාකච්ඡා කරන්න ආණ්ඩුව සූදානම් බව ද සඳහන් කරන්න කැමතියි.

ඊයෙ පාර්ලිමේන්තුවේදි විවාදෙට ගත්තේ, ඛනිජ තෙල් විශේෂ විධිවිධාන පනත. ඒකත් එක්තරා ආකාරයක ආන්දෝලනාත්මක පනතක්. ඒත් ජන්ද විමසීම උඩින්ම දිනුම්. ඒත් ආණ්ඩු පක්ෂයේ හැමෝගෙම ඔලුවෙ තිබ්බෙ, 22 ක ගැන. විපක්ෂයෙ සමහරුත් එහෙමයි .

ඇත්තටම මොකෝ මචන් වෙන්නෙ.

මොකද මල්ලි අපි දැන් කරන්නෙ.

ඈ ...සර් කොහොමද දැන් අපි මේ වැඩේ කරන්නෙ.

දීලත් බෑ නොදිත් බෑ...

අත කැපුවත් මම නම් ජන්දෙ දෙන්නෙ නෑ..

පාර්ලිමේන්තු කොරිඩෝවල ඇහුණෙ, ඔන්න ඔය වගේ කතන්දර .

කොහොමින් කොහොමහරි ජන්දෙ දෙන්නෙම නෑ කියල සමහරු දැනටමත් කියල ඉවරයි .

22 ගේන්නෙ ජාත්ත්‍යන්තරය දිනා ගන්න කියන කතාවත් බොරුවක් වෙලා තියෙන්නෙ .පෙරේදා කණ්ඩායම් රැස්වීමෙදි ජාත්ත්‍යන්තර කතාව බොරුවක් බව වජිර අබේවර්ධන ඒක තහවුරු කලා.

සජබෙ නම් ජන්දෙ දෙනව කියලයි දැනට ආරංචිය. සජබෙ දුන්නොත් අපි දෙන්නෙ නෑ කියලත්, ආණ්ඩුවෙ කට්ටියක් කියනවලු.

ගෙදර ගියොත් අඹු නසී මග හිටියොත් තෝ නසී තැනට 22 කැරකිලා තියෙන්නෙ.

සජිත් ඇතුලු සජබෙ සහාය නිල වශයෙන් ගන්න, රනිල් ලොක්කගෙ වැඩි කැමැත්තක් නෑලු. මොකද සජිත් ළග නැවෙන්න රනිල් අකමැතියිනෙ. පක්ෂය කඩල ගත්ත එකට, රනිල් තාමත් ඉන්නෙ සජිත් එක්ක මලපැනල. පෙරේදා කණ්ඩායම් රැස්වීමෙදිත් මොකක්දෝ කතාවක් මැද්දෙ රනිල් සජිත්‍ට හොඳ ටොක්කක් ඇණලා ..

''කලු කණ්නාඩි දාගෙන, ඉස්කෝලෙ ළමයි දාන බෝල්වලට ගැහුවට රටේ ප්‍රශ්න විසදෙන්නෙ නෑ කියල එයා දැනගන්න ඕනි.''

රනිල් මේ හින්ට් එක ගැහුවෙ, පහුගිය දවසක සජිත් ඉස්කෝලෙක ක්‍රිකට් ගහන නිව්ස් එක දැකල වෙන්නෙ ඕනි....

කොහොමහරි ආණ්ඩුවෙ වැඩි පිරිසක් තාම කියන්නෙ 20 ටත්, ජන්දෙ දීල ආයේ ඒකෙම අනික් පැත්ත කරන්න , 22 ටත් දෙන්න බෑ කියලලු. ඒකෙත් ඉතින් පොඩි ඇත්තක් නැත්තෙම නෑ.

 දේශපාලන වාර්තාකරු

තිළිණි ප‍්‍රියමාලි නම් කාන්තාව සමඟ තමන්ගෙ පින්තූරයක් ගන්නා ලද්දේ කුමන අවස්ථාවේද තමන්ට මතක නැති බව නීතිඥ නාගානන්ද කොඩිතුවක්කු පවසයි .

ඔවුන් හමු වූයේ කෙසේදැයි මතක නැති බවක් නීතිඥ නාගානන්ද කොඩිතුවක්කු සඳහන් කරයි.

කෙසේ වෙතත් තමන් ඇය වෙත මුදල් ආයෝජනය කිරීමක් හෝ කිසිදු ව්‍යාපාර කටයුත්තක නිරත නොවූ බවද ඔහු සඳහන් කර සිටියි.

නීතිඥ නාගානන්ද කොඩිතුවක්කු මේ බව සඳහන් කරන්නේ අන්තර්ජාල නාලිකාවක සාකච්ඡාවකට එක්වෙමිනි.

කෙසේ වුවත් රුපියල් බිලියන ගණනාවක මුල්‍ය වංචා සම්බන්ධයෙන් තිළිණි ප‍්‍රියමාලි රහස් පොලීසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් පසු මේ වන විට රක්ෂිත බන්ධනාගාර ගත කර සිටියි.

ඊට අදාළ වැඩිදුර විමර්ශන ද සිදුවෙයි .

හිටපු ජනාධිපති ගෝඨාභය රාජපක්ෂට අධිකරණය හමුවේ පෙනී සිට නොතීසි නිකුත් කරන ලෙස ශ්‍රේෂ්ඨාධිකරණය දැනුම් දී ඇත .

ඒ ශ්‍රේෂ්ඨාධිකරණයේ විභාග වෙමින් ඇති නඩුවක් පෙත්සමක් සම්බන්ධයෙන් පෙත්සම්කාර පාර්ශවයේ නීතිඥවරුන් විසින් කල ඉල්ලීමක් සලකා බැලීමෙන් පසුවය.

වාර්තා වන ආකාරයට ලලිත් හා කුගන් යන මානව හිමිකම් ක්‍රියාකාරීන් දෙදෙනා අතුරුදහන් වීම පිළිබඳව පැවැත්වෙන නඩු විභාගයේ සාක්ෂි ලබාදීම සඳහා හිටපු ජනාධිපතිවරයා ජනාධිපති ධුරය දරද්දී කැඳවීමට නොහැකි බව අභියාචනාධිකරණය විසින් තීන්දු කර ඇති තීන්දුව බල රහිත කරමින් ඔහු අධිකරණයට කැඳවන්නැයි පෙත්සම්කාර පාර්ශ්වය ඉල්ලා ඇත.

ඒ අනුව ශ්‍රේෂ්ඨාධිකරණය විසින් දැනුම් දුන්නේ ගෝඨාභය රාජපක්ෂ මහතාට යළි දෙසැම්බර් මස 15 වැනිදා අධිකරණය හමුවේ පෙනී සිටින ලෙස නොතීසි නිකුත් කරන ලෙසයි.

පාර්ලිමේන්තුව ඇතුලේ පක්ෂ හා ස්වාධීන කන්ඩායම් ගනනාවක් එක එක පැතිවලට බෙදිලා , අච්චාරුවක් වෙලා තියෙන නිසා, ඊලඟ මැතිවරණයකදී, කාට බලය යයිද කියන එක ගැන, ඔය ඩීලස්ලා, රෑට රෑට සෙට් වුනාම, කතාවෙන ප්‍රධානම ටොපික් එක ලු..

සාමාන්‍යයෙන් දේශපාලනයේදී, කන්ඩායමකට හිස ඔසවන්න, ජාතික තලයේ නායකයෙක් ඕනේ. නමුත් අද ජාතික තලයේ නායකයෝ ඉන්නේ, බොහොම කිහිපදෙනයි. මෙන්න මේ හේතුව නිසා තමයි, සමහරු චන්ද්‍රිකා , ගෝටාභය වගේ හිටපු ජනාධිපතිලව, ආපහු දේශපාලනයට ගේන්න උත්සාහ කරන්නේ.

පහුගිය දිනවල, ගෝඨාගේ පරණ හිතවත්තු සැහෙන පිරිසක්, ගෝඨා හම්බ වෙන්න ගිහින් , ආයේ දේශපාලනයට එන්න කියලා , ආරාධනා කරාලු. මුලින් මුලින් නම්, ගෝඨා කියලා තියෙන්නේ මම කිසිම දවසක, ආයේ දේශපාලනයට එන්නේ නෑ කියල..

හැබැයි දැන් දවස් දෙක තුනකට කලින්, ගෝඨා තමුන්ට ඉතාම හිතවත්, කේන්දර ඔස්තාර් කෙනෙක්ට කතා කරලා , පොඩ්ඩක් වෙලාව බලල දෙන්න කියල , කියල තියනව ලු..

කොහොමටත් ඔය ලොකු පුටුවල හිටපු අයට, ඒක නැති වුනාම ටික කාලෙකින්, ආයේ ආසාව එනවා. පේන්නේ නැද්ද මහින්ද. තාම දාල යන්න බෑනෙ. ඒ නිසා ගෝටටත් ආ‍යේ ආසාවක් හිතුනොත්, පුදුම වෙන්න දේකුත් නෑ. හැබැයි වැඩේ තියෙන්නේ , ග්‍රවුන්ඩ් එකේ තියන විරෝධය තාම එහෙමට බැහැල නැති එක..

හැබැයි ආයෙත් ග්‍රවුන්ඩ් එක හදල දෙන්න , ගිනිගේලා ලොකු ට්‍රයි එකක් දෙන පාටක් තමයි පේන්න තියෙන්නේ ..

-දේශපාලන වාර්තාකරු

දේශීයව ඖෂධ නිෂ්පාදනය කිරීම කෙරෙහි මේ වනවිට රජය ප්‍රමුඛ අවධානයක් යොමු කර ඇති හෙයින් ඒ සඳහා ඖෂධ කර්මාන්ත ශාලා ශ්‍රී ලංකාව තුළ ආරම්භ කිරීමට විදෙස් ආයෝජකයින්ට අවස්ථාව ලැබී ඇතැයි සෞඛ්‍ය අමාත්‍ය කෙහෙලිය රඹුක්වැල්ල පවසයි.

කර්මාන්ත ක්ෂේත්‍රයේ ඉහළ තාක්ෂණික දැනුමක් සහිත කොරියානු වැනි රාජ්‍යයන්හි ආයෝජකයින් ඇතුළු විදෙස් ආයෝජකයන්ට මේ සඳහා අවස්ථාව සැලසී ඇතැයිද අමාත්‍යවරයා කීය.

ශ්‍රී ලංකාවේ කොරියානු තානාපති වූන්ජින් ජියෝං (Woonjin Jeong) අද(18) සෞඛ්‍ය අමාත්‍යාංශයේදී සෞඛ්‍ය අමාත්‍ය ආචාර්ය කෙහෙලිය රඹුක්වැල්ල හමුවූ අවස්ථාවේදී අමාත්‍යවරයා මේ බව කීය.

ඉදිරියේදී දේශීයව ඖෂධ නිෂ්පාදනය සඳහා මේ වන විට ඉලක්කගත වැඩපිළිවෙළක් ක්‍රියාත්මක කෙරෙන බවත් ඒ අනුව ඉදිරි වසර කිහිපය තුළ එම වැඩපිළිවෙලට ප්‍රමුඛතාවය ලබා දෙමින් දේශීය නිෂ්පාදනය ප්‍රතිශතයක් ලෙස ඉහළ නංවන බවත් සෞඛ්‍ය අමාත්‍යවරයා කීය.

එමගින් එක් එක් වකවානුවන්හි රට තුළ ඇතිවන ඖෂධ හිඟයන් සඳහා සාර්ථක විසඳුම් ලබාදීමට අපේක්ෂා කරන බවද අමාත්‍යවරයා කොරියානු තානාපති වරයා හමුවේ පැවසීය.

සෞඛ්‍ය අමාත්‍ය කෙහෙලිය රඹුක්වැල්ල දැක්වූ අදහස් :

කොවිඩ් සමයේ පටන්ම කොයිකා (koica) ව්‍යාපෘතිය හා කොරියානු රජයේ ඒකාබද්ධතාවයෙන් ශ්‍රී ලංකාවට ඖෂධ උපකරණ රැසක් පරිත්‍යාග කළ බවත් ඒ සඳහා ස්තූතිවන්ත වන බවත් කීය. දෙරට අතර ශක්තිමත් සම්බන්ධතාවක් පවත්වා ගැනීමට එවැනි වැඩපිළිවෙල ඉවහල් වන බව ද අමාත්‍යවරයා පැවසීය.

ගැටලුකාරී ආර්ථික අර්බුදය හමුවේ වුවද සෞඛ්‍ය ක්ෂේත්‍රය කෙරෙහි රජය විශාල වශයෙන් කැප වන බවත් ඒ අතරින් පෝෂණ තත්ත්වය ඉහළ නැංවමේ කටයුතු මේ වන විට ආරම්භ කර ඇති බවත් එහිදී රජය ඒ සඳහා ප්‍රමුඛ අවධානය යොමු කර ඇති බවත් හෙතෙම පැවසීය. පෝෂණ තත්ත්වය නගා සිටුවීමේ කාර්ය සාධක බලකායක් මේ වන විටත් ආරම්භ කර ඇති බවත් යුනිසෙෆ් ආයතනය හරහා විශාල වශයෙන් සහයෝගය ලැබෙන බවත් අමාත්‍යවරයා වැඩිදුරටත් කීය. එමෙන්ම ත්‍රිපෝෂ වැඩසටහන නැවත ආරම්භ කිරීම පිළිබඳවද අමාත්‍යවරයා අදහස් දැක්වීය.

කොරියානු තානාපති Woonjin Jeong දැක්වූ අදහස් :

කොවිඩ් වසංගත සමයේ දෙරටම නව අත්දැකීම් වලට මුහුණ දුන් බවත් අභියෝග හමුවේ කොවිඩ් වසංගතය ජය ගත් බවත් ශ්‍රී ලංකාව ඒ සඳහා කටයුතු කළ ආකාරය ප්‍රශංසනීය බවත් පැවසීය.

කොරියානු රජය විසින් දැනටමත් නව රැකියා අවස්ථා නිර්මාණය කර හඳුන්වාදී ඇති බවත් ශ්‍රී ලංකාව සඳහා වැඩිවශයෙන් රැකියා වෙළඳපළ අවස්ථා ලබා දී ඇති බවත් මෙහිදී පැවසූ තානාපතිවරයා ඒ අනුව කොරියානු රැකියා කෝටාව ඉහළ නංවා ඇති බවත් කීය.

මෙම අවස්ථාවට සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන ද එක්ව සිටියේය.

විශ්‍රාම වයස සම්පූර් ණ කළ වෛද්‍යවරුන්ගේ සේවා කාලය වසරකින් දීර්ඝ කිරීමට අමාත්‍ය මණ්ඩල අනුමැතිය හිමිවූ බව කැබිනට් ප්‍රකාශක, අමාත්‍ය බන්දුල ගුණවර්ධන පවසයි .

අමාත්‍යවරයා අද (18) මාධ්‍ය හමුවකදී අදහස් දක්වමින් සඳහන් කර සිටියේ වෛද්‍යවරුන් වයස අවුරුදු 60දී විශ්‍රාම ගැන්වීමෙන් සෞඛ්‍ය සේවයේ මතුවිය හැකි ගැටලු සොයාබලා නිර්දේශ ඉදිරිපත් කිරීමට පත්කර තිබූ ඇමති අනුකමිටුවේ වාර්තාව සළකා බලා අමාත්‍ය මණ්ඩලය මෙම තීරණය ගත් බවය.

ඊට අනුව මේ වන විට වයස අවුරුදු 63 සම්පූර්ණ කර ඇති වෛද්‍යවරුන් පමණක් දෙසැම්බර් 31 දින විශ්‍රාම යා යුතු බවත්, වයස අවුරුදු 62 සම්පූර්ණ කර ඇති අය, අවුරුදු 63දීත්, දැනට වයස අවුරුදු 61 සම්පූර්ණ කර ඇති වෛද්‍යවරු 62 දීත්, වයස 60 සම්පූර්ණ කර ඇති වෛද්‍යවරු 61 දී සහ වයස අවුරුදු 59 සම්පූර්ණ වූ අය අවුරුදු 60 සම්පූර්ණ වන විටත් වශයෙන් තව වසරකින් විශ්‍රාම ලැබිය යුතුව ඇත.

මෙම සේවා දීර්ඝ කීරීම වසරකින් අවසන් වන අතර, ඉන්පසු රජයේ තීරණය පරිදි වෛද්‍යවරුන් වයස අවුරුදු 60න් විශ්‍රාම ලැබිය යුතු බවත් අමාත්‍යවරයා සඳහන් කළේය.

ඛනිජ තෙල් නිෂ්පාදන (විශේෂ විධිවිධාන) ( සංශෝධන) පනත් කෙටුම්පත වැඩි ඡන්ද 60 කින් පාර්ලිමේන්තුවේදී අද (18) සම්මත විය.

පනතට පක්ෂව ඡන්ද 77ක් ලැබුණු අතර විපක්ෂව ලැබුණේ ඡන්ද 17ක් පමණි.

පනත සම්බන්ධයෙන් ඡන්ද විමසීමක් බව ජාතික ජන බලවේගය පක්ෂයේ පාර්ලිමේන්තු මන්ත්‍රී විජිත හේරත් මුලසුනෙන් ඉල්ලීමක් කළ අතර ඡන්ද විමසීම පැවැත්වුණේ ඒ අනුවය.

එහිදී ජනතා විමුක්ති පෙරමුණේ මන්ත්‍රීවරුන් සහ ඡන්දය විමසන අවස්ථාවේදී සභාගර්භයේ සිටි සමගි ජන බලවේගය පක්ෂයේ මන්ත්‍රීවරුන් පිරිසක් පනතට විරුද්ධව ඡන්දය භාවිත කළහ .

පනත් කෙටුම්පත පිළිබඳ විවාදය දවස පුරා පැවැත්විණ.

ඉන්ධන ආනයනය කිරීම තවත් සමාගම් වලට පැවරීම සහ ගුවන්යානා ඉන්ධන වෙනත් අයට ගෙනවිත් ගබඩා කිරීම සඳහා අවශ්‍ය පහසුකම් සැලසීම යනාදී කටයුතු සඳහා මෙම පනත් කෙටුම්පත මගින් ප්‍රතිපාදන සැලසෙනු ඇත.

ලංකාවේ ශෘංගාර මූල්‍ය රැජන , තිළිණි ප්‍රියමාලි ගේ කතා , එකින් එක එලියට එනකොට, ඔය පොලිටීෂියන්ස්ලා, ඩීලස්ලා , නළු-නිලියෝ , දොස්තරලා වගේ වෘත්තියවේදීන් වගේ , මේ කී නොකී සෑහෙන කට්ටියකගේ රෙදි, එකින් එක ගැලවිලා යද්දී , ඔන්න අපේ ජනප්‍රිය සාදු වහන්සේලා කිපනමකගේ පැටිකිරියත්,, එලියට එන්න පටන් අරන්.

අලුත්ම බයිට් එක රටම දන්න සාදු කෙනෙක් . වීඩියෝ එකින් එක එලියට එනකොට තමයි කාගේ කාගේත් තරම පේන්නේ .

මුල්‍ය වංචා චෝදනා මත,, රක්ෂිත බන්ධනාගාර ගත කර සිටින, තිළිණි ප්‍රියමාලි, නාරාහේන්පිට අභයාරාමාධිපති මුරුත්තෙට්ටුවේ ආනන්ද සාදු ගේ,, සුඛෝපභෝගී ජීප් රථයක් අරගෙන ගිහින්, වංචාවක් කරලා කියලා, ජවිපෙ වෘත්තිය සමිති නායක වසන්ත සමරසිංහ, පසුගිය දවසක මාධ්‍යවලට කියල තිබුනා.

වසන්ත සමරසිංහ ගේ කතාවට මුරුත්තෙට්ටුවේ ආනන්ද සාදු වහාම ක්‍රියාත්මක වුනා. පන්සලට මාධ්‍යවේදීන් කැඳවලා , තිළිණි ප්‍රියමාලි ඕවට නෑ කිව්වා..

V8 එක උස්සන් ගියේ, තිළිණි ප්‍රියමාලි නෙමෙයි කිව්වා.

උන්වහන්සේ කිව්වේ, පොදුජන පෙරමුණ නියෝජනය කරන, කොළඹ මහා නගර සභාවේ නාගරීක මන්ත්‍රී, ප්‍රියංකා ජයසේකර, ඒ ජීප් එක උස්සල , ගල් කළා කියලා.

ප්‍රියංකා ජයසේකරත් අත ඇරියේ නෑ .. තමන්ට එල්ල වන චෝදනා සම්බන්ධයෙන් රිටන් එක දුන්නා..

ගේම නම් ගේම කියාගෙන, ප්‍රෙස් එකක් තියලා, මුරුත්තෙට්ටුවේ සාදුව නැතිකළා..

තමන් V 8 එක සොරකම් නොකළ බවත්, සාදුගේ යෝජනාව මත සිදුකළ ව්‍යාපාරයක්,, පාඩු ලැබීමෙන් පස්සේ , අදාළ රථය විකුණා මුදල් ලබාගන්නා ලෙස, උන්වහන්සේම තමන්ට V 8එක ලබාදුන්නා කියලත්, ප්‍රියංකා ජයසේකර කියනවා.

"මුලින්ම කියන්න ඕන, මුරුත්තෙට්ටුවේ හාමුරුවන්ට අයිති වාහනයක් මම අරගෙන නෑ... මම හොරෙන් අරගෙනත් නෑ. 2017 ඇති වුණ සිදුවීමක් තමා ඔය කියන්නේ . ස්වාමීන් වහන්සේ එක්තරා ව්‍යාපාරයක් සඳහා, මුදල් යොදවන්න කියලා යෝජනා කළා. ඒ යෝජනාවට මම කැමති වෙලා, ඒකට මම මුදල් යෙදෙව්වා. නමුත් ඒ මුදල් යොදවපු ව්‍යාපාරය සාර්ථක වුණේ නැහැ. මම ඒ මුදල් ඉල්ලලා කරදර කරාම, මට ඔය වාහනය අරගෙන විකුණලා, මුදල් ටික ලබාගන්න කියලා තමයි, ස්වාමින් වහන්සේ මට කිව්වේ.

ස්වාමීන් වහන්සේ ඒ දීපු ලේඛන සහ කතා කරපු සියලුම තොරතුරු, මගේ ළඟ තියෙනවා. මේකේ ලේඛන ස්වාමින් වහන්සේ ළඟ තිබුණෙත් නෑ ඇත්තටම.

වාහන මෙරටට ගෙනල්ලා විකුණන ආයතනයක තමා ලේඛන තිබුණේ. V8 රථයේ කිසිම තැනක මුරුත්තෙට්ටුවේ හාමුරුවන්ගේ නම නම් තිබුණේ නෑ. ඒ වාහනය මට දීපු දවසේ ඉඳලා මගේ බෙන්ස් රථයයි, ජීප් රථයයි ස්වාමින් වහන්සේට පදින්න දුන්නා. මෑතක් වෙනකල් ස්වාමින් වහන්සේ පාවිච්චි කළා.

ඒ වාහනේ යම් දෝෂයක් පැන නැගුණා , මම වාහනය ගෙනල්ලා, ගැරෙජ් එකට දැම්මා. සමහරවිට ස්වාමීන් වහන්සේට ඒ කේන්තියත් ඇති. මම කෙරේ ස්වාමීන් වහන්සේ ඉල්ලන ඉල්ලන පාරට සල්ලි දුන්න එක විතරයි. බෞද්ධයෙක් විදියට මම අනුකම්පා කරනවා ස්වාමීන් වහන්සේට."

ප්‍රියංකා ජයසේකර ඒ විදියට මාධ්‍ය ඉස්සරහ ආනන්ද සාදුට දීලා ඇරියා.

මෙතනදී ප්‍රියංකා ජයසේකරත් හංගපු කාරණයක් තිබුනා. එකක් තමයි සාදුගේ යෝජනාව මත සිදුකළ ව්‍යාපාරය මොකක්ද කියන එක. ආරංචියේ හැටියට, ඒ දවස්වල මහින්දගේ කීමට පටන් අරන් තිබුන, රිවිර පත්තර ප්‍රොජෙට් එකට තමයි, ප්‍රියංකා සල්ලි දාලා තියන්නේ. පැතුම් එක්ක ලින්ක් එක හදල දීල තියන්නේ, ආනන්ද සාදු ලු.. ඒ වෙනකොටත් ඔය පත්තරේ කන්තෝරු කැල්ලක් තිබිල තියන්නේ පන්සලේ කොටසක ලු..

ප්‍රියංකා නොකියපු අනිත් කාරනේ තමයි, මුරුත්තෙට්ටුවේ ආනන්ද සාදුගේ, ඔය කියන V 8 ජීප් එක ගේන්න, පර්මිට් එක විකුනපු මන්ත්‍රීතුමා කව්ද කියන එක ? ඒ ගැන දන්නා කියන කව්රුහරි ඉන්නවා නම් කමෙන්ට් එකක් දාන්න .. මොකද ඒ කාරණෙත් හරිම වැදගත් ..

කොහොම වුනත් මෙතනදි , තවත් වැදගත් තොරතුරු ගොඩක් එලියට ඇවිත් තියනවා. පලවෙනි ප්‍රශ්නේ කව්ද ප්‍රියංකා ජයසේකර කියන්නේ.

කෙටියෙන් කිව්වොත් කොළඹ නගර සභාවේ පොහොට්ටු පක්ෂයේ , මන්ත්‍රීවරියක්.. BR තමයි ලැයිස්තුවෙන් දාලා තියනවයි කියන්නේ..

ආරංචිවල හැටියට , ප්‍රියංකා ෆොන්සේකාගේ පක්ෂයේ , බොරැල්ල ආසන සංවිධායක විදියට ඉඳලා තියනවා. ප්‍රියංකා ගේ මහත්තයත්, ෆොන්සේකාගේ පක්ෂයේ සංවිධායක කෙනෙක් විදියට ඉඳල තියනවා.. කෝට්ටේ නගර සභාවේ මන්ත්‍රී කෙනෙක් විදියට හිටිය ලු.. නෝනයි මහත්තයයි දෙන්නම, ආමි එකට සප්ලයිකරන බිස්නස් එකක් කළා කියලත් කියනවා. ඒ ටෙන්ඩර් කරන කාලෙලු, ෆොනිව අදුනගත්තයි කියන්නේ..

ඒ කතාවල ඇත්ත බොරු මොනවා වුනත්, පොහොට්ටුවට සෙට් වෙලා තියෙන්නේ BR හරහා .. පළාත් පාලන ආයතන චන්දේ වෙලාවේ, නාමයෝජනා ලැයිස්තු පරීක්ෂාකරන කණ්ඩායමට BR මෙයාව දාලා තියන්නේ නීතිඥවරියක් නිසා ලු.. ඒත් පොහොට්ටුවේ සමහර කාන්තා පාර්ශව කියන්නේ, ඔය නීතිඥ පට්ටම බොරු එකක් කියලා.

ඔය ඉරිසියාවට කියන කතා වෙන්න ඇති..

ඒ කතා මොනවා වුනත්, අවුරුදු 4ක් සභාවේ හිටියත්, තාම සභා රැස්වීමක වචනයක් කතා කරලා නැති ලු.. ඒ වුනාට පවිත්‍රා නෝනගේ කැචර් කෙනෙක් නිසා,, මහින්ද ජනාධිපති තුමත් ලොකුවට හිතාගෙන ලු ඉන්නේ..

මහින්ද ලොක්කගේ විජේරාම ගෙදර තිබුන, ආගමික උත්සව කීපයක්ම,, පහුගිය කලේ සංවිධානේ කරලා තිබුනේ ඔය ප්‍රියංකා ලු... ඒ ඔය පූජ්‍ය මුරුත්තෙට්ටුවේ සාදුගේ ඉල්ලීමට ලු..

එක වෙලාවක සල්ලි නැතුව පැතුම්ල, රිවිර පත්තරේ නවත්තන්න ගියපු වෙලාවේ, ඔය ප්‍රියංකා මහින්දගේ කීමට , පත්තරේට කර ගැහුව ලු.. මාසයක් දෙකක් කරලා අත ඇරලා දාලා..

ඔන්න දැන් ඔය, මුරුත්තෙට්ටුවේ සාදු ගෙයි , ප්‍රියංකා ගෙයි වලිය බේරන්න, මහින්ද හිටපු ජනාධිපති තුමාගේ PA, දයා ගාල්ලගේ වැඩට බැහැල ලු.. දෙපාර්ශවය සමදාන කරන්න....

ඒ කියන්නේ හෙට අනිද්දා, මේ දෙන්න ප්‍රෙස් එකක් තියලා, මේ ඊයේ පෙරේදා කියපු කතා නෑ කියන්නත් ඉඩ තියනවා.. මොකද දෙගොල්ලම එකට වලඳපු එකට කාපු බීපු කට්ටිය.

- දේශපාලන වාර්තාකරු

මෙම වසරේ රාජ්‍ය ණය ලබාගැනීමේ සීමාව තවත් රුපියල් බිලියන 663 කින් ඉහළ නැංවීම සඳහා මුදල් අමාත්‍යවරයා ලෙස ජනාධිපති රනිල් වික්‍රමසිංහ ඉදිරිපත් කළ අමාත්‍ය මණ්ඩල සංදේශයකට අනුමැතිය හිමිවූ බව කැබිනට් ප්‍රකාශක අමාත්‍ය බන්දුල ගුණවර්ධන පවසයි.

අමාත්‍යවරයා මේ බව සඳහන් කර සිටියේ රජයේ ප්‍රවෘත්ති දෙපාර්තමේන්තුවේ දී අද (18) පැවති කැබිනට් තීරණ දැනුම්දීමේ මාධ්‍ය හමුවේදී අදහස් දක්වමිනි.

දැනට ණය ගත හැකි උපරිමය රුපියල් බිලියන 3844ක් බවපැවසු අමාත්‍යවරයා එය ඉහළ නැංවූයේ නැතිනම් රජයට දැරිය යුතු වියදම් දැරීමට නොහැකි වන බවත් පැවසීය.

සංහිඳියාව පිළිබඳ අමාත්‍ය මණ්ඩල අනුකමිටුවක් පිහිටුවීමට අමාත්‍ය මණ්ඩල අනුමැතිය හිමිව ඇති බව කැබිනට් ප්‍රකාශක බන්දුල ගුණවර්ධන පවසයි.

ජනාධිපති රනිල් වික්‍රමසිංහගේ සභාපතිත්වයෙන් මෙම අනුකමිටුව ශ්‍රී ලංකාවේ ජනකොටස් අතර සංහිඳියාව ප්‍රවර්ධනය කිරීම සහ උතුරු නැගෙනහිර ගැටුම්වලින් පසු නැවත පදිංචිවීම, ඉඩම් හා අතුරුදන් වූ පුද්ගලයන් සම්බන්ධයෛන් ජනතාව මුහුණදෙමින් සිටින ගැටලු සඳහා විසඳුම් ඉදිරිපත් කිරීම පිණිස පිහිටුවන බවත් අමාත්‍යවරයා පැවසීය.

අමාත්‍යවරයා මේ බව සඳහන් කර සිටියේ රජයේ ප්‍රවෘත්ති දෙපාර්තමේන්තුවේ දී අද (18) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

මෙම අමාත්‍ය මණ්ඩල අනුකමිටුවේ සෙසු සාමාජිකයන් ලෙස අග්‍රාමාත්‍ය දිනේෂ් ගුණවර්ධන, ධීවර අමාත්‍ය ඩග්ලස් දේවානන්දා, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජයදාස රාජපක්‍ෂ, විදේශ කටයුතු අමාත්‍ය අලි සබ්‍රි වන බවත් ඇමතිවරයා සඳහන් කළේය. මීට අමතරව ද්‍රවිඩ සහ මුස්ලිම් නියෝජිතත්වයන් දෙකක් ද මීට පත්කිරීමට නියමිත බවත් අමාත්‍යවරයා පැවසීය.

ඉන්ධන ලබා ගැනීමේදී රක්ෂණ වාරික සඳහා වැඩිපුර රක්ෂණ වාරික ගෙවීමක් සම්බන්ධයෙන් සාවද්‍ය තොරතුරු නිකුත් වෙමින් ඇති බව විදුලි බල සහ බලශක්ති අමාත්‍යංශයේ ජ්‍යේෂ්ඨ නිලධාරීන් පවසයි.

ඒ සම්බන්ධයෙන් වන තාක්ෂණික කරුණු පිළිබඳ ජනතාවට ඇත්තේ අවම අවබෝධයක් බව පවසන ඔවුන් එනිසා පහසුවෙන් යැවීමේ චේතනාවෙන් මෙම සාවද්‍ය මත ප්‍රචාරය කරමින් ඇති බවත් පවසයි.

එබැවින් ජනතාව අතර වැරදි මතයක් ඇති නොවීම පිණිස ඔවුන් මෙසේ කරුණු පැහැදිලි කිරීමක් සිදුකර සිටියි.

රට සාමාන්‍ය තත්ත්වයෙන් පවතිද්දී අර්බුදයකින් තොරව විදේශ විනිමය සංසරණය වන විට ඛනිජ තෙල් සංස්ථාව ( CPC ) විසින් මෙරටට ඉන්ධන ආනයනය කිරීමේදී රක්ෂණ වාරික (Premium) ගෙවනු ලැබුවේ ඇමරිකානු ඩොලර් ශත 15 සිට 2.50ක් අතර පරතරයක රක්ෂණ වාරිකයකි.

නමුත් ශ්‍රී ලංකාවේ ආර්ථිකය කඩා වැටෙද්දී, විදේශ ණය හිමියන් ගේ ණය ගෙවීම් අත් හිටු වූ පසුබිමේ සංස්ථාව විසින් ලබා ගත් ඉන්ධන සඳහා සැපයුම්කරුවන්ට ගෙවිය යුතු මුදල් පොරොන්දු කාලයේදී නොගෙවන විට සාමාන්‍ය තත්ත්වයන් යටතේ ගනුදෙනු කිරීමට කිසිවෙකු ඉදිරිපත් වන්නේ නැත.

සැපයුම්කරුවන් විසින් මෙරටට නැව් ගත කරන ඉන්ධන රක්ෂණය කිරීමේදී ඊට රක්ෂණ සමාගම් විසින් අතිරේක අවදානම් වාරික ප්‍රතිශතයක් ද එකතු කර ඇති අතර, එය විශේෂත්වයක් නොවේ. එය සාමාන්‍යයෙන් ව්‍යපාර වල සිදුවන සාමාන්‍ය ක්‍රමවේදයයි.

නමුත් එම අගය ඇමරිකානු ඩොලර් 12- 15 වුණ අවස්ථා ද පසුගිය කාලය පුරා ඉන්ධන අවදානම් වාරිකය (RISK PREMIUM) ගෙවන්නට සිදුවීම අවාසනාවන්ත තත්ත්වයකි. මේ වන විට මෙම වාරිකය ඉන්ධන බැරල මත, ප්‍රවාහනය කරන නැව් මත මෙන්ම එම සමාගම් වෙත නියමිත ගෙවීම් මත ද බලපායි. ඩොලර් විනිමය අනුපාත ඉහළ යාමත් මෙම තත්ත්වයට බල පා ඇති තවත් ප්‍රධාන සාධකයකි.

නමුත් ඊට වෙනත් විකල්පයක්ද මේ වන විට රටට නොමැත. කිසිදු සැපයුම්කරුවෙක් මේ රටට ඉන්ධන නැවක් තියා බෝතලයක් වත් එවීම ප්‍රතික්ෂේප කළ මොහොතක රටේ අවශ්‍යතා ඉටු කරගන්නට අවම ආවස්ථික පිරිවැයක් දරමින් ඉන්ධන ගෙන්වීම පිළිබඳව ඉතාමත් විනිවිදභාවයකින් යුක්තව සාක්ෂි සහිතව බලශක්ති අමාත්‍යවරයා විසින් සියල්ලන් දැනුවත්කොට ඇත.

මින් පෙර ඉන්දියානු ණය ආධාර ( Indian credit line) යටතේ මෙරටට ඉන්ධන ගෙන්වීමේදී එරටින් පැනවූ විශේෂ කොන්දේසියක් වූයේ ඉන්ධන ලබා ගත හැක්කේ ඉන්දියානු සැපයුම්කරුවන් ගෙන් පමණක් බවය. ඒ අනුව IOC හරහා මෙරටට ඉන්ධන සැපයීමේදී සමාගම විසින් අය කල අවදානම් වාරිකය (RISK PREMIUM) එක් බැරලයකට ඇමරිකානු ඩොලර් 15ක් , 22 ක් , 28 ක් , 30ක් වැනි අගයන් ගනියි.

නමුත් අද වන විට මෙරට ආර්ථික තත්ත්වය කෙමෙන් කෙමෙන් සුබ දිශාවකට ගමන් කිරීමත් ශ්‍රී ලංකා මහ බැංකුවේ ක්‍රියා කලාපයත් මේ වන විට සංස්ථාව විසින් පෙර සැපයුම්කරුවන්ගේ සමස්ත ණය ප්‍රමාණයෙන් අඩකටත් වඩා වැඩියෙන් පියවීමත් හේතුවෙන් මෙම එක ක්‍රම ක්‍රමයෙන් අඩු කිරීමට අපගේ සැපයුම්කරුවන් කටයුතු කරමින් සිටියි.

පොදු ව්‍යාපාර පිළිබඳ කාරක සභාව (කෝප්) සඳහා පාර්ලිමේන්තු මන්ත්‍රී චරිත හේරත් නම් කර ඇත.

නියෝජ්‍ය කථානායක පාර්ලිමේන්තු මන්ත්‍රී අජිත් රාජපක්ෂ අද (18) පාර්ලිමේන්තුව අමතමින් ප්‍රකාශ කළේ, විපක්ෂයේ පාර්ලිමේන්තු මන්ත්‍රී ආචාර්ය හර්ෂ ද සිල්වාගේ ඉල්ලා අස්වීමෙන් පසු ඇති වූ පුරප්පාඩුව සඳහා චරිත හේරත් පත් කරන බවයි.

චරිත හේරත් මන්ත්‍රීවරයා මීට පෙර කෝප් කමිටුවේ සභාපතිවරයෙකු ලෙස කටයුතු කළත් මෙවර ඔහුව නම් කර තිබුණේ රජයේ ගිණුම් කාරක සභාව (කෝපා ) සඳහා ය.

පසුගියදා සාමාජිකයින් 27 දෙනෙකුගෙන් යුත් නව කෝප් කමිටුවක් ප්‍රකාශයට පත්කිරීමේදී චරිත හේරත් මන්ත්‍රීවරයා ඊට නම් නොකිරීම සම්බන්ධයෙන් ඔහු සිය සමාජ මාධ්‍ය ගිණුම් හරහා විරෝධය දක්වා තිබිණ.

එසේම පාර්ලිමේන්තුවේදී විපක්ෂ නායක සජිත් ප්‍රේමදාස විසින් ද සිය පක්ෂයේ පාර්ලිමේන්තු මන්ත්‍රී හර්ෂ ද සිල්වා කෝප් කමිටුවෙන් ඉවත් වීමට ස්වේච්ඡාවෙන් තීරණයක් ගෙන ඇති බව පවසා පුරප්පාඩුව සඳහා චරිත හේරත් මන්ත්‍රීවරයා නම් කරනු ලැබිණ.

කෙසේ වෙතත් කෝප් කමිටුවේ මෙවර සභාපති ධුරය දරන්නේ පොදුජන පෙරමුණේ පාර්ලිමේන්තු මන්ත්‍රී රංජිත් බණ්ඩාර ය.

පොදුජන පෙරමුණේ පාර්ලිමේන්තු මන්ත්‍රීවරයෙකු වුවත් චරිත හේරත් මහතා මේ වනවිට ආණ්ඩු පක්ෂයෙන් ඉවත්ව විපක්ෂයේ ස්වාධීන කණ්ඩායමක් සමඟ කටයුතු කරයි.

ඉදිරි මැතිවරණයට එක්ව තරග කිරීමට රනිල් - බැසිල් එකගතාවයක් යනුවෙන් පළවන පුවත් සාවද්‍ය බව විශ්වාසදායක කටයුතු ආරංචි මාර්ග සඳහන් කරයි.

එක්සත් ජාතික පක්ෂයේ ජ්‍යෙෂ්ඨයකු උපුටා දක්වමින් එම ආරංචි මාර්ග සඳහන් කරන්නේ මෙවැනි කිසිදු එකඟතාවක් ජනාධිපති රනිල් වික්‍රමසිංහ සහ බැසිල් රාජපක්ෂ අතර ඇතිව නොතිබෙන අතර , එම පුවත ජනතාව නොමග යැවීමට කිසියම් පාර්ශ්වයක් හිතාමතා නිර්මාණය කර තිබෙන්නක් විය හැකි බවය.

කෙසේ වුවත් 22 වන ව්‍යවස්ථා සංශෝධනය තුළ ඇති ද්විත්ව පුරවැසි භාවයට එරෙහි වගන්තිය සම්බන්ධයෙන් සංශෝධනයක් සඳහා ජනාධිපති වෙතින් ඉල්ලීමක් ඉදිරිපත් කර ඇති බව දැනගන්නට ඇති බවත් එම ආරංචි මාර්ග පවසයි .

එහිදී ජනාධිපති රනිල් වික්‍රමසිංහ ගේ ප්‍රතිචාරය වී ඇත්තේ අදාළ තීන්දුව ගැනීම පාර්ලිමේන්තුවේ කටයුත්තක් බවය.

එබැවින් ඒ පිළිබඳ විමසීම පාර්ලිමේන්තුවේදී ඉදිරිපත් කර තීන්දුවක් ගන්නා ලෙස ජනාධිපති රනිල් වික්‍රමසිංහ පවසා ඇති බවත් එම ආරංචි මාර්ග වැඩිදුරටත් පවසයි .

ඉසුරු බණ්ඩාර නැමැත්තා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ඇති බව වාර්තා වෙයි .

ඒ රුපියල් කෝටි ගණනක මූල්‍ය වංචාවක් සිදුකර ඇති බව කියන තිළිණි ප්‍රියමාලි ගේ ව්‍යාපාරික සහයකයා ලෙස කටයුතු කර ඇති පදනමින් බවත් වාර්තා වෙයි .

මේ වන විට සැකකාර තිළිණි ප්‍රියමාලි අත්අඩංගුවට ගෙන බන්ධනාගාර ගතකර ඇත.

ලබන වසර (2023 ) සඳහා වන විසර්ජන පනත් කෙටුම්පතට අනුව වැඩිම මුදලක් රාජ්‍ය පරිපාලන අමාත්‍යංශය වෙනුවෙන් වෙන්කර ඇති බව වාර්තා වෙයි .

ඒ අනුව රාජ්‍ය පරිපාලන , ස්වදේශ කටයුතු ,පළාත්පාලන සහ පළාත්සභා අමාත්‍යාංශය වෙනුවෙන් වෙන්කළ එම මුදල රුපියල් කෝටි අසූ පන් දහස් හයසිය විසි පහකි.

පාර්ලිමේන්තුවට හෙට (18 වැනිදා) ඉදිරිපත් කෙරේ.

මෙම පනත් කෙටුම්පතට අනුව ලබන වසරේ රජයේ වියදම රුපියල් කෝටි හත් ලක්ෂ අසූ හත් දහස් නවසිය හතළිස් නවය ඉක්මවයි.

වැටුප් ගෙවීම් ඇතුළු එදිනෙදා කටයුතුවලට අවශ්‍ය වන පුනරාවර්තන වියදම් සඳහා රුපියල් කෝටි හාරලක්ෂ හැටතුන්දහස් හාරසියයකට අධික මුදලක් වෙන් කර තිබෙන අතර සංවර්ධන ව්‍යාපෘති සඳහා වන මූලධන වියදම් වෙනුවෙන් වෙන් කෙරෙන මුදලරුපියල් කෝටි තුන් ලක්ෂ විසි හතර දහස් හාරසියය ඉක්මවා ඇත.

මුදල් අමාත්‍යාංශය වෙනුවෙන් රුපියල් කෝටි හැට එක් දහස් තුන්සිය අනූ තුනකට අධික මුදලක් ද ආරක්ෂක අමාත්‍යාංශය වෙනුවෙන් රුපියල් කෝටි හතළිස් එක් දහසක් ද වෙන් කෙරේ.

එමෙන් ම සෞඛ්‍ය අමාත්‍යාංශය සඳහා වෙන් කෙරෙන මුදල රුපියල් කෝටි තිස් දෙදහස් දෙසියයකට ආසන්න ය.

ප්‍රවාහන හා මහාමාර්ග අමාත්‍යාංශය වෙනුවෙන් රුපියල් කෝටි තිස් හත් දහස් දෙසිය හැට හතරකට අධික මුදලක් ද කෘෂිකර්ම අමාත්‍යාංශය වෙනුවෙන් රුපියල් කෝටි එකොළොස් දහස් පන්සියයක් ද වෙන් කර ඇත.

රුපියල් කෝටි විසිතුන් දහස්දෙසියයක් අධ්‍යාපන අමාත්‍යාංශය සඳහා ද රුපියල් කෝටි තුන්දහස් හත්සිය විස්සක් විදුලි බල හා බලශක්ති අමාත්‍යාංශය සඳහා ද වෙන් කර තිබෙන අතර ජනාධිපතිවරයා වෙනුවෙන් වෙන් කෙරෙන මුදල රුපියල් කෝටි තුන්සිය හැත්තෑ අටකට අධික ය.

( මූලාශ්‍රය lankadeepa )

ලෝක වෙළඳ මධ්‍යස්ථානයේ 34 වන මහලේ කාර්යාලයක් පවත්වාගෙන ගිය තිළිණ ප්‍රියමාලිට රුපියල් කෝටි 8 1/2 ලබා දුන් බව හිටපු ආණ්ඩුකාර අසාද් සාලි අපරාධ පරීක්ෂණ දෙපාර්තමේන්තුවට අද (17) පැමිණිල්ලක් ඉදිරිපත් කළ බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දූව පවසයි.

ආසාද් සාලි අපරාධ පරීක්ෂණ දෙපාර්තමේන්තුව වෙත පැමිණ ලියකියවිලි රැසක් සමග පැමිණිල්ල ඉදිරිපත් කළ බවද පොලිස් මාධ්‍ය ප්‍රකාශකවරයා පැවසීය .

පොලිස් මාධ්‍ය ප්‍රකාශකවරයා සඳහන් කරන ආකාරයට මෙම පැමිණිල්ලත් සමග මුදල් වංචා කිරීම සම්බන්ධයෙන් පැමිණි 11 ක් ඇයට විරුද්ධව මේ වන විට ලැබී ඇත .

තිළිණි ප්‍රියමාලි නමැති මෙම සැකකාරිය ලෝක වෙළඳ මධ්‍යස්ථානයේ හා කොටුව ක්‍රිෂ් ගොඩනැගිල්ලේ කාර්යාල පවත්වාගෙන යමින් ව්‍යාපාරිකයන් ඇතුලු ධන කුවේරයන්ගේ රුපියල් කෝටි ගණින් මුදල් වංචා කර ඇති බව අපරාධ පරීක්ෂණ දෙපාර්තමේන්තු ආරංචි මාර්ග පවසන අතර වැඩිදුර විමර්ශන ක්‍රියාත්මකය.

 ජනාධිපති නීතීඥ ආචාර්ය සංජීව ජයවර්ධන හා ආචාර්ය රාණී ජයමහ යන මුදල් මණ්ඩල සාමාජිකයින්ට විරුද්ධව නීතිමය ක්‍රියාමාර්ග ගන්නා ලෙස ශ්‍රේෂ්ඨාධිකරණය නියෝග කර ඇත .

අගවිනිසුරු ජයන්ත ජයසූරිය,  බුවනක අලුවිහාරේ, විජිත් මලල්ගොඩ, L.T.B දෙහිදෙනිය , මුර්දු N .B ෆර්නෑන්ඩු  ඇතුලු පංච පුද්ගල  විනිසුරු මඩුල්ල එම නියෝගය නිකුත්කර ඇත.

එම පංච පුද්ගල  විනිසුරු මඩුල්ල SC FR 195/2022 දරණ මූලික අයිතිවාසිකම් පෙත්සම විභාගයට ඉඩ ලබාදෙමින් දුන් නියෝගයේ එක් කොන්දේසියක් ලෙස මුදල් මණ්ඩලයේ වර්තමාන සාමාජිකයින් ලෙස කටයුතු කරන ජනාධිපති නීතීඥ ආචාර්ය සංජීව ජයවර්ධන හා ආචාර්ය රාණී ජයමහ යන අය 32B සහ 32C යන වගඋත්තරකරුවන් ලෙස නම්කරන මෙන් පෙත්සම්කරුවන්ට නියෝග කර තිබේ.

 ඉහත ඉල්ලුම්පතට අදාල කාලසීමාව තුල හිටපු මහ බැංකු අධිපතිවරුන් දෙදෙනෙක්, මුදල් මණ්ඩලයේ එවකට හිටපු සාමාජිකයන් දෙදෙනෙකු මෙම ඉල්ලුම්පතට වගඋත්තරකරුවන් ලෙස නම්කර ඇති බැවින් පංච පුද්ගල මහාධිකරණ විනිසුරු මඩුල්ලෙහි මතය වී ඇත්තේ අදාල කාලසීමාව තුළ මුදල් මණ්ඩලයේ කටයුතු කළ ඉතිරි සාමාජිකයින් දෙදෙනාද වගඋත්තරකරුවන් ලෙස නම් කලයුතු බවයි.

මෙම SC FR 195/2022 දරණ මූලික අයිතිවාසිකම් පෙත්සම ගොනුකර ඇත්තේ ආචාර්ය අතුලසිරි කුමාර සමරකෝන්, සූසඉඅප්පු නේවිස් මොරායස් සහ ආචාර්ය මහිම් මෙන්ඩිස් යන අය වන අතර එම පෙත්සම මගින් ඔවුන් හිටපු ජනාධිපති ගෝඨාභය රාජපක්ෂ, හිටපු අගමැති මහින්ද රාජපක්ෂ, අදාල කාලය තුළ හිටපු මුදල් ඇමතිවරුන්, හිටපු ජනාධිපති ලේකම්, හිටපු භාණ්ඩාගාර ලේකම් සහ හිටපු මහ බැංකුවේ අධිපතිවරුන් දෙදෙනෙකු  ඇතුළු 39 දෙනෙකු මෙම නඩුවේ වග උත්තරකරුවන් ලෙස නම්කර ඇත.

 අගවිනිසුරු ජයන්ත ජයසූරිය ඇතුළු විනිසුරු මඩුල්ල තවදුරටත් මෙම නඩුවෙහි 28 වන වග උත්තරකරු වන මුදල් මණ්ඩලයට පහත සඳහන් නියෝගය නිකුත් කර ඇත.

''2022.05.25 වන දින පැවති පොදු ව්‍යාපාර පිළිබද කාරක සභා රැස්වීමේදී ආචාර්ය සංජිව ජයවර්ධන සහ ආචාර්ය රාණි ජයමහ යන අය විසින් ඉදිරිපත් කරන ලද කරුණුවලට සම්බන්ධ සියලු ලේඛන ඉදිරිපත් කරන ලෙස 28 වන වගඋත්තරකරු වන ශ්‍රී ලංකා මහ බැංකුවේ මුදල් මණ්ඩලය වෙත නියම  කරනු ලබයි.විශේෂයෙන්ම,