V2025

ආර්ථික

ශ්‍රී ලංකා මහ බැංකුව රුපියල බේරාගන්නා මෙහෙයුම අරඹයි

එක්සත් ජනපද ඩොලරයට සාපේක්ෂව රුපියලේ අගය පහත වැටීම වළක්වා ගැනීම සඳහා ඩොලර් මිලියන 136.65 ක් වෙළෙඳපොළට නිකුත් කළ බව ශ්‍රී ලංකා මහ බැංකු අධිපති ආචාර්ය ඉන්ද්‍රජිත් කුමාරස්වාමි පවසයි. 

මහ බැංකු අධිපතිවරයා මේ බව සඳහන් කර සිටියේ ඊයේ  (11) මහ බැංකු පරිශ්‍රයේ පැවති මාධ්‍ය හමුවකට එක්වෙමින්ය.

මෙම කාලපරිච්ඡේදයේ දී ඩොලර් මිලියන 30 ක් වෙළෙඳපොළෙන් මහ බැංකුව මිල දී ගත් බවත් මේ අනුව රුපියල ආරක්ෂා කිරීම සඳහා ශුද්ධ වශයෙන් ඩොලර් මිලියන 100 ක් මහ බැංකුව වියදම් කර ඇති බවත් මහ බැංකු අධිපතිවරයා වැඩිදුරටත් සඳහන් කර ඇත.

Comment (0) Hits: 421

2017 වසරේ ශ්‍රම බලකායේ වර්ධනයක් !

2016 වසරට සාපේක්ෂව පසුගිය 2017 වසරේ මෙරට ශ්‍රම බලකාය  සියයට 3.1කින් වර්ධනය වූ බව  ශ්‍රී ලංකා මහබැංකුව පවසයි.

පසුගියදා නිකුත් කළ මහ බැංකු වාර්තාවේ මේ බව දැක්වෙන අතර  වයස අවුරුදු 15ට වැඩි ආර්ථික වශයෙන් සක්‍රිය ජනගහණය ලෙස අර්ථ දැක්වෙන ශ්‍රම බලකාය 2016 වසරේදී මිලියන 8.31ක් වූ අතර, 2017 වසරේදී මිලියන 8.56 දක්වා වර්ධනය වී ඇති බවද එහි දැක්වෙයි.

එසේම ඊට අනුව ශ්‍රම බලකායේ වර්ධනයත් සමඟ මෙරට සේවා නියුක්ති ජනගහණය ද සියයට 3.3කින් වර්ධනය වී ඇති අතර, සේවා වියුක්තිය පහත වැටී ඇත.

Comment (0) Hits: 517

ළමා ගිණුම් බද්දෙන් නිදහස් : කතුවරුන්ටත් ඉල්ලූ සහනය ලැබෙයි

ළමා ගිණුම්වල පොළිය මත  පනවා තිබූ බදු මුදල මුළුමනින්ම අහෝසි කිරීමට මුදල් හා ජනමාධ්‍ය අමාත්‍ය මංගල සමරවීර නිලධාරීන් වෙත උපදෙස් නිකුත් කළ බව වාර්තා වෙයි.

ඒ අනුව වයස අවුරුදු 18 ට අඩු බැංකු ගිණුම් හිමි දරුවන්ගේ තැම්පත් මුදලෙහි පොලිය රුපියල් 5000 ට වැඩි නම් එම පොළිය මත පනවා තිබූ 2.5%ක බදු අයකිරීම මින් ඉදිරියට සිදුනොවන අතර එය බදු රහිත තත්ත්වයට පත්වේ.

එසේම ග්‍රන්ථ කතුවරයන්ගේ කර්තෘ භාගය සඳහා පනවා තිබූ බදු මුදල් සංශෝධනය කර එය මසකට රුපියල් 50000ක් දක්වා සහ වසරකට රුපියල් ලක්ෂ 5ක් දක්වා බද්දෙන් නිදහස් කිරීමටද අමාත්‍යවරයා කටයුතු කර ඇත.

මේ බව අනාවරණය වුයේ ඊයේ (10) මුදල් අමාත්‍යංශයේ පැවති මාධ්‍ය හමුවේදීය.

ළමා ඉතුරුම් සහ ගත්කතුවරයින් සම්බන්ධව ලැබුණු ජනතා පැමිණිලි සැලකිල්ලට ගෙන මෙම තීරණ ගැනීමට කටයුතු කළ බව එහිදී අමාත්‍ය මංගල සමරවීර සඳහන් කර සිටියේය.

එසේම ගත්කතුවරුන් සම්බන්ධව සිදුකළ බදු සංශෝධනයේ ප්‍රතිලාභය මෙරට පොත් ලියන අති බහුතරයකට හිමිවන බවත් අදාළ ප්‍රශ්න සම්බන්ධව තමන් දැනුවත් කළ සැමට ස්තුති කිරීමටද මෙය අවස්ථාව කරගන්නා බවද අමාත්‍යවරයා පවසා සිටියේය.

මේ අතර  නව බදු ක්‍රමය යටතේ වැට් බද්ද ක්‍රමයෙන් පහත හෙලීමට අවස්ථාව ලැබෙනු ඇති බව මුදල් හා ජනමාධ්‍ය අමාත්‍ය මංගල සමරවීර සඳහන් කර තිබෙන අතර ඒ දේශිය ආදායම් කොමසාරිස් සංගමයේ වාර්ෂික සමුළුවට එක්වෙමින්ය.

එහිදී  අමාත්‍යවරයා වැඩිදුරටත් සඳහන් කර ඇත්තේ  2020 වසර වන විට වක්‍ර බදු අඩු කිරිම රජයේ සැලසුම වී ඇති බවත් ඒ තුළ අති බහුතරයක් ජනතාවට බදු මත ඇතිවන පීඩනයෙන් සහනයක් ලැබීමට අවස්ථාව උදාවන බවත්ය.

Comment (0) Hits: 450

උපාධිධාරීන් 20,000 කට ජුනි මාසයේ පත්වීම්

රැකියා විරහිත උපාධිධාරීන් රාජ්‍ය සේවයේ පුහුණුවට බඳවා ගැනීමේ සම්මුඛ පරීක්ෂණ මේ වන විට අවසන් කර ඇති බවත් එහිදී තෝරාගත් උපාධිධාරීන් 20000කට ලබන ජූනි මාසයේදී පත්වීම් ලබා දෙන බව ජාතික ප්‍රතිපත්ති හා ආර්ථික කටයුතු අමාත්‍යංශය පවසයි.

20,000ක් පමණක් තෝරාගත් අදාළ සම්මුඛ පරීක්ෂණ සඳහා උපාධිධාරීන් 57000ක් සහභාගීව ඇත.

කෙසේ වුවත් මෙම බඳවාගැනීම් සිදුකරන්නේ 2016 දෙසැම්බර් මස 31 හෝ ඊට පෙර උපාධිය ලබා ගත් පිරිස් වන බව සඳහන් කරන අමාත්‍යංශය ඔවුනට  මාසිකව රුපියල් 20000ක දීමනාවක් ලබාදීමට නියමිත බවද වාර්තා වෙයි.

එසේම මෙතෙක් වසර දෙකක්ව තිබූ ඔවුන්ගේ පුහුණු කාලය වසරක් දක්වා අඩු කිරීමට ද රජය තීරණය කර තිබෙන බවද අමාත්‍යංශ ආරංචිමාර්ග සඳහන් කර සිටියි.

Comment (0) Hits: 502

අමරවීර වට්ටක්කා ප්‍රශ්නය විසඳයි !

වෙළඳපොළ මිල පහළ වැටී විකුණාගත නොහැකිව ගොවීන් වෙත මහත් පීඩාවක්ව තිබෙන වට්ටක්කා අස්වැන්න මිලදී ගැනීම සඳහා මහා භාණ්ඩාගාරය විසින් රුපියල් ලක්ෂ 50ක මුදලක් කෘෂිකර්ම අමාත්‍යංශය වෙත  ලබා දී ඇති බව වාර්තා වෙයි.
 
ඒ අනුව අදාළ  මුදල් මේ වන විටත් දිස්ත්‍රික් කෘෂිකර්ම නිලධාරීන් වෙත මුදා හැර ඇති බවත්  වට්ටක්කා අස්වනු මිලදී ගෙන සුදුසු පරිදි වෙළඳපළට නිකුත් කිරීමේ වැඩපිළිවෙළක් අරඹන ලෙස අමාත්‍යංශය එම නිලධාරීන්ට උපදෙස් දී ඇති බවද කෘෂිකර්ම අමාත්‍යංශ ආරංචිමාර්ග සඳහන් කර සිටියි.
 
එසේම කෘෂිකර්ම අමාත්‍ය මහින්ද අමරවීර සඳහන් කර සිටින්නේ  අස්වනු අළෙවි කර ගැනීමට නොහැකිව  වට්ටක්කා ගොවීන් මුහුණදී ඇති දුෂ්කරතාව සලකා බලා ඔවුන් ආරක්ෂා කිරීම වෙනුවෙන්  තමා භාණ්ඩාගාරයෙන් මෙම මුදල ඉල්ලා සිටි බවය.
 
අමාත්‍යවරයා මේ බව සඳහන් කර ඇත්තේ නව ඇමති ධූරයේ වැඩ භාර ගැනීමෙන් පසු ප්‍රථම වරට ගොවිජන සේවා දෙපාර්තමේන්තුවේ කටයුතු නිරීක්ෂණය කිරීම සඳහා ඊයේ(08) එහි ගිය අවස්ථාවේය. 
 
එසේම වගා කටයුතු වලදී වෙළඳපොළ සහ කාළගුණික තත්වයන් සැලකිල්ලට ගනිමින් විද්‍යාත්මක ප්‍රවේශයක් තුළ ගොවීන්ව  වගාකටයුතු සඳහා යොමු කරවීමට  ගොවිජන සේවා දෙපාර්තමේන්තුව පියවර ගතයුතු බවත්  අමාත්‍යවරයා එහිදී සඳහන් කර ඇත. 
Comment (0) Hits: 525

ශ්‍රී ලංකා මහ බැංකු වාර්තාව : මුදල් හා ජනමාධ්‍ය අමාත්‍යවරයා වෙත පිළිගන්වයි !

ශ්‍රී ලංකා මහ බැංකුවේ 2017 වාර්ෂික වාර්තාව මුදල් හා ජනමාධ්‍ය අමාත්‍ය මංගල සමරවීර  වෙත පිළිගැන්වීම ඊයේ (26) එම අමාත්‍යංශයේදී සිදුවිය.

ශ්‍රී ලංකා මහ බැංකු අධිපති ආචාර්ය ඉන්ද්‍රජිත් කුමාරස්වාමි මහතා විසින් අමාත්‍යවරයා වෙත වාර්තාව පිළිගන්වනු ලැබිණ.

මුදල් හා ජනමාධ්‍ය අමාත්‍යාංශ ලේකම් සහ මූල්‍ය මණ්ඩලයේ සාමාජික ආචාර්ය ආර්.එච්.එස්. සමරතුංග, මහ බැංකු නියෝජ්‍ය අධිපතිවරුන් වන ආචාර්ය පී. නන්දලාල් වීරසිංහ,

කේ.ඩී. රණසිංහ, සී.ජේ.පී. සිරිවර්ධන, ආර්ථික පර්යේෂණ අධ්‍යක්ෂ  ආචාර්ය යුතිකා ඉන්ද්‍රරත්න, අතිරේක අධ්‍යක්ෂවරුන් වන ආචාර්ය සී. අම

Comment (0) Hits: 530

එන්ටර්ප්‍රයිස් ශ්‍රී ලංකා හී අරමුණ මංගල මැනිලා නුවරදී හෙළිකරයි

ශ්‍රී ලාංකිකයන් සතුව පවතින සහජ ව්‍යවසායකත්ව හැකියා දියුණු කොට ව්‍යවසායකත්ව පාරාදීසයක් ගොඩනැගීමේ අරමුණින් එන්ටර්ප්‍රයිස් ශ්‍රී ලංකා’ ජාතික වැඩපිළිවෙළ හඳුන්වා දුන් බව මුදල් හා ජනමාධ්‍ය ඇමැති මංගල සමරවීර අන්දහන් කරයි.

අමාත්‍යවරයා මේ බව සඳහන් කර ඇත්තේ පිලිපීනයේ මැනිලා නුවර පැවැත්වුණු ආසියානු සංවර්ධණ බැංකුවේ 51 වැනි වාර්ෂික සමුළුව අමතමින්ය.

රජය 2018 අයවැයෙන් එන්ටර්ප්‍රයිස් ශ්‍රී ලංකා ජාතික වැඩපිළිවෙල හඳුන්වාදීමට සමගාමීව අලුත් ව්‍යවසායක පරපුරක් බිහි කිරීමට මුල්‍ය යෝජනා ක්‍රම ගණනාවක් හඳුන්වාදුන් බවත්  ඒ යටතේ රටපුරා විසිරුණු සුළු හා මධ්‍ය පරිමාණ ව්‍යවසායක පරපුරක් බිහි කිරීමට මෙන්ම කාන්තාවන්ට, සුවිශේෂී බලගැන්වීම් ලබාදීමට යෝජනා කර ඇති බවද අමාත්‍යවරයා එහිදී පෙන්වාදී ඇත.

එසේම ලංකාව වඩා වේගවත් ආර්ථික හා සාමාජයික වර්ධනයක් අපේක්ෂා කරන රටක් ලෙස රටේ ජනතාවට නව රැකියා, නව ආදායම් උත්පාදන මාර්ග සලසාදීමට කටයුතු කරන බවත්  එන්ටර්ප්‍රයිස් ශ්‍රී ලංකා වැඩපිළිවෙළ හරහා ඒ වෙනුවෙන් විශාල දායකත්වයක් සැපයෙන බවද සඳහන් කර ඇත.

තවද  2017 වසරේ   ඩොලර් බිලියන 1.9ක්  ලෙස ලංකා ඉතිහාසයේ වැඩිම සෘජු විදේශ ආයෝජන ලබාගන්නට හැකිවීම විශාල ජයග්‍රහණයක් බව සඳහන් කර ඇති අමාත්‍යවරයා තවදුරටත් එම තත්ත්වය වර්ධනය කරමින් ආර්ථිකය ශක්තිමත් කිරීමට ඇතැම් ආර්ථික ක්ෂේත්‍ර සහ නීති රීති ප්‍රතිසංස්කරණය කරන්නට කටයුතු කළ බවත් එම කටයුතුද මේ වන විට සාර්ථකවී ඇති බවද පෙන්වාදී ඇත.

එමෙන්ම  රාජ්‍ය ණය කළමනාකරණය ඉතාම වැදගත් කටයුත්තක් ලෙස සලකා තම රජය ක්‍රියා කරන බවත් ඒ වෙනුවෙන් සාර්ථක පියවර ගනිමින් සිටින මේ පසුබිමේ ආසියානු සංවර්ධන බැංකුවේ වැඩිදුර  දිරිගැන්වීම්  අපේක්ෂා කරන බවද අමාත්‍යවරයා සඳහන් කර ඇත.

ආසියානු සංවර්ධන බැංකුව ලංකාවේ  දිගුකාලීන මිත්‍රශීලී සංවර්ධන පාර්ශ්වකරුවෙක් වන බවත්  එමඟින් අපේ රටේ සමාජ, ආර්ථික, යටිතල පහසුකම් සංවර්ධනයට, මානව සම්පත් සංවර්ධනයට ලබාදී ඇති අති මහත්වූ  දායකත්වයට ස්තුති කරන අතර එම  මිත්‍රශීලීභාවය අඛණ්ඩව පවත්වා ගන්නා බවද අමාත්‍යවරයා එහිදී සඳහන් කර ඇත.

PIC 02

Comment (0) Hits: 480

ඉදිරි මාස 3 තුළ රුපියල අවප්‍රමාණයවීම සීමාවන ලකුණු !

ඉදිරි මාස දෙක තුනක කාලය තුළදී හම්බන්තොට වරායේ අවසාන ගෙවීම වශයෙන් මුදල් ලැබීමත් රටට මුදල් ගලා ඒමත් සමඟ  රුපියල තවදුරටත් අව ප්‍රමාණය වීම වලකිනු ඇති බව ශ්‍රී ලංකා මහ බැංකු අධිපති ආචාර්ය ඉන්ද්‍රජිත් කුමාරස්වාමි සඳහන් කරයි.

ඔහු මේ බව සඳහන් කර සිටියේ 2017 වාර්ෂික මහ බැංකු වාර්තාව නිකුත් කිරීම වෙනුවෙන් ඊයේ(26) පැවැති මාධ්‍ය හමුවකදී වන අතර  විනිමය අනුපාත තීරණයවීම වෙළෙඳපල මත සිදුවීමට ඉඩහැර ඇති බවත් ඒ  සඳහා මහ බැංකුව අඩු මැදිහත්වීමක් දක්වා ඇති බවද එහිදී පැවසීය.

නමුත් කවුරුන් හෝ රුපියල  අවප්‍රමාණය කිරීමට උත්සහ ගන්නේ  නම් විදේශ විනිමය අනුපාතය නියත අගයේ පවත්වා ගැනීමට මැදිහත් වන බවද ඔහු ප්‍රකාශ කළේය.

මේ අතර මහ බැංකුවේ ජ්‍යේෂ්ඨ නියෝජ්‍ය අධිපති අචාර්ය නන්දලාල් වීරසිංහ සඳහන් කර සිටින්නේ   රුපියලේ අගය ඩොලරයට සාපේක්ෂව වෙනස් වුවද විදේශ ණය සම්බන්ධයෙන් ගැටළුවක් නොවන බවයි.

Comment (0) Hits: 489

අඩු මිලට තෙල් දීලා : සංස්ථාවේ පාඩුව රුපියල් බිලියන 217යි

අඩු මිලට ඉන්ධන සැපයීම හේතු කොට 2017 වසරේ  ඛනිජ තෙල් නීතිගත සංස්ථාව රුපියල් බිලියන 217 ක අලාභයක් ලබා ඇති බව ශ්‍රී ලංකා මහ බැංකු ආරංචිමාර්ග සඳහන් කරයි.

එසේම මහ බැංකුව පෙන්වා දෙන්නේ මීට වසර දෙකකට පෙර ලෝක වෙළෙඳපොළේ බොර තෙල් බැරලයක මිල ඩොලර් 48ක මට්ටමේ පැවතුණ ද එය මේ වන විට ඩොලර් 80ක් දක්වා ඉහළ ගොස් තිබෙන බවත් නමුත් අඛණ්ඩව වසර දෙකක් අඩු මිලට තෙල් සැපයීම සිදුකරන්නට ඛනිජ තෙල් සංස්ථාව කටයුතු කර ඇති බවය.

එසේම මෙරට තෙල් සැපයුමෙන් 80% ක් පමණ ඛනිජ තෙල් සංස්ථාව සිදුකිරීමත් පසුගියදා IOC සමාගම සිය තෙල් මිල ඉහළ දැමීමත් හමුවේ ඛනිජ තෙල් සංස්ථාවේ ඉන්ධන සඳහා ඉල්ලුම වැඩිවී ඇති බවත් ඒ හමුවේ පවතින අලාභය තවත් වැඩිවීමේ අවධාමනක් පවතින බවත් ශ්‍රී ලංකා මහ බැංකු ආරංචිමාර්ග පෙන්වා දෙයි.

තවද ඛනිජ තෙල් නීතිගත සංස්ථාව විසින් රාජ්‍ය බැංකු වෙත රුපියල් බිලියන 300ක් පමණ ණය ගෙවීමට තිබෙන අතර රජයේ ආයතන වෙතින් තෙල් සංස්ථාව වෙත විශාල ණය මුදලක් ගෙවීමට තිබෙන බවත් මහා බැංකුව සඳහන් කරයි. 

සංස්ථාව දැවැන්ත අලාභයකට මුහුණ දෙමින් සිටින  මේ තත්ත්වය රටේ ආර්ථිකයට බලවත් තර්ජනයක් විය හැකි බැවින් ඒ සඳහා කඩිනම් විසඳුමක් ලබාදිය යුතුව ඇති බවද එම ආරංචිමාර්ග සඳහන් කර සිටියි.

කෙසේ වුවත් ලෝක වෙළඳපොළේ තෙල් මිල ඉහළ යාම කෙසේ වුවත් රටේ තෙල් මිල ඉහළ නොදැමිය යුතු බවට ඇතැමුන් ව්‍යාජ අදහස් සමාජගත කරමින් සිටින බවද එහි ඉහළ නිලධාරියෙකු පැවසීය.

එහෙත් ඇත්ත කතාව වන්නේ මිල අඩුවට සංස්ථාව තෙල් සපයන්නේ පාඩුව දරාගෙන බවත් එම දාරගත් පාඩුව නැවත ගෙවීමට සිදුවන්නේ ජනතා බදු මුදල්වලින් ඇතුළු රාජයේ මුල්‍ය මුලාශ්‍ර වලින් බවද ඔහු අන්දහන් කරයි. එසේම ලෝක වෙළඳපොළේ තෙල් මිල ඉහළයාම ලංකා රජයට පාලනය කළ හැකි තත්ත්වයක් නොවන බවත් සඳහන් කළ එම නිලධාරියා වැඩිදුරටත් සඳහන් කර සිටින්නේ දේශපාලනය කරන උදවිය බලය සඳහා කියන විවිධ කතා සමඟ තෙල් මිල ප්‍රශ්නය පටළවා නොගත යුතු බවය.

Comment (0) Hits: 473

බොර තෙල් මිල වාර්තා ගත ලෙස ඉහළ යයි

ඉරානය සහ ඇමරිකා එක්සත් ජනපදය අතර ඇතිව තිබෙන දේශපාලන උණුසුම  සහ මැදපෙරදිග අර්බුද මත ලෝක වෙළඳපොළේ ඉන්ධන මිල වාර්තාගත ලෙස ඉහළ යමින් තිබෙන බව විදෙස් මාධ්‍ය වාර්තා සඳහන් කරයි.

ඒ අනුව වාර තුනකට පසුව වාර්තා වන ඉහළම මිල සටහන් කරමින් මේ වන විට බොරතෙල් බැරලයක මිල ඩොලර් 75ක් ලෙස සටහන්ව ඇති අතර මීට පෙර  බොරතලේ මිල මෙතරම් ඉහළ ගොස් ඇත්තේ 2015 මාර්තු මාසයේ දීය.

මුළුල්ලේ තෙල් මිල ක්‍රමයෙන් ඉහළ යමින් පැවති අතර, ඒ අනුව මේ වසර මුලදී පැවති පහළ මට්ටමේ තෙල් මිලට සාපේක්ෂව මේ වනවිට මිල 20% කින් ඉහළ ගොස් ඇත.

Comment (0) Hits: 691

ආරක්ෂක අංශවල මහාපරිමාණ ව්‍යාපාර නිසා වෙළඳපොල විකෘති වෙලා !

රාජ්‍ය ආරක්ෂක අංශ විසින් පවත්වාගෙන යනු ලබන  වෙළෙඳාම් හා කෘෂිකර්මාන්ත ව්‍යාපාර  ඒකාධිකාර බවට පත්වීමේ අවදානම හමුවේ ශ්‍රී ලංකාවේ ආර්ථිකයට මෙන්ම පොදු ජනතාවගේ ජීවිකාවටද එල්ලවී ඇති හානිදායක බලපෑම ගැන ශ්‍රී ලංකාවේ සංක්‍රාන්ති යුක්තිය නගා සිටුවීම අරමුණු කොටගත්, නීති අධ්‍යයනය සඳහා වන දකුණු ආසියා මධ්‍යස්ථානය (SACLS) සමීක්ෂණ වාර්තාවක් එළිදක්වා ඇත.

වැඩිම අවධානම උතුරු නැගෙනහිර ජනතාවට 

පශ්චාත් යුද සමයේ ආර්ථික ක්‍රියාකාරිත්වයක් නැති තැනක ක්ෂේත්‍ර ගණනාවක ව්‍යාපාරවලට හමුදා ආයතන ඇතුල්වීම නිසා ඇතිවී තිබෙන අයහපත් බලපෑම “බලය සහ ලාබය: ශ්‍රී ලංකාවේ හමුදා ව්‍යාපාර පිළිබඳ ගවේෂණය” නම් පිටු 46 කින් අදාළ වාර්තාව සමන්විත අතර ඊට අනුව මෙහි වැඩිම අවධානමක් මතුව තිබෙන්නේ හමුදාකරණයට යටත්වී සිටින උතුරු නැගෙනහිර ජනතාව වෙතය. 

රාජයේ ආරක්ෂක අංශ තරු පංතියේ සංචාරක හෝටල්, කෘෂිකාර්මික ව්‍යාපාර,  විනෝදාස්වාද කර්මාන්තය ඇතුළු විවිධාකාර  ව්‍යාපාර වල යෙදෙමින් කෝටි ගණනින් ලාබ උපයන බවත් පශ්චාත් යුද පසුබිමේ ශ්‍රී ලංකා රජය විශාල හමුදාවක්  වෙනත් කර්මාන්ත වෙත යොමුකර වැටුප් ගෙවමින් නඩත්තු කරන ආකාරයද  එහි දක්වා ඇත.

figure11

 එසේම රාජ්‍ය අනුග්‍රහයෙන් ආරක්ෂක අංශ විසින් පවත්වාගෙන යන ව්‍යාපාර පරිපාලනය හෝ නෛතික අධීක්ෂණය හෝ කෙරෙන ආකාරයක් දැනගන්නට නැති බව පෙන්වා දෙන එම වාර්තාව වැඩිදුරටත් සඳහන් කර ඇත්තේ  මෙම ව්‍යාපාර තුළ සැලකිය යුතු මුල්‍ය ගනුදෙනු සිදුකරන නමුත් ඒවා සිදුවන්නේ  විගණකාධිපතිට හෝ පොදු මහජනතාවට හෝ වගකීමෙන් තොරව බවය. රාජ්‍ය සම්පත් යොදා ගනිමින් ආරක්ෂක අංශ මහත් ලාබ උපයන නිවාඩු නිකේතන, සංචාරක හා හෝටල් කර්මාන්තයට මහා පරිමාණයෙන් ඇතුල් වීම ඔවුන්ගේ නිල රාජකාරිය වන “ආරක්ෂාව සහ ජාතිය  ගොඩනැගීමට” කිසිදු සම්බන්ධයක් නැති බව පෙන්වා දෙන එම වාර්තාව ඒ තුළ වෙළෙඳපොල විකෘති කිරීමක්, සාමාන්‍ය වැසියන්ගේ ආර්ථික ඉඩප්‍රස්තා අහිමි කරලීමක් සිදුව ඇති බවද දක්වා ඇත.

 ඒ අනුව අදාළ වාර්තාව වැඩිදුරටත් අවධාරණය කර සිටින්නේ මෙම වෙළඳපොළ විකෘතිය නැති කිරීම සඳහා අදාළ  ව්‍යාපාර රජයට හෝ පෞද්ගලික අංශයට පවරන ලෙසය.  

සිවිල් ආරක්ෂක දෙපාර්තමේන්තුවේ ප්‍රගති වාර්තා අනුව 2014 වසරේ රුපියල් මිලියන 371.5 ක මුදලක් ඉපයූ ඔවුන්ගේ ආදායම 2016 වසරේ රුපියල් මිලියන 821.8 දක්වා වේගයෙන් ඉහල ගොස් ඇති ආකාරය.
chart1

නීති අධ්‍යයනය සඳහා වන දකුණු ආසියා මධ්‍යස්ථානය (SACLS)  නිකුත් කර ඇති වාර්තාව 

Comment (0) Hits: 533

ඩොලරය ඉතිහාසයේ වැඩිම අගය වාර්තා කරයි : 159 ඉක්මවයි

ඇමරිකානු ඩොලරයට සාපේක්ෂව ශ්‍රී ලංකා රුපියල අවප්‍රමාණයවීම  අද (25) සටහන් වුයේ ඩොලරයක විකුණුම් මිල රුපියල් 159.0445 ක් ලෙසය.

මුල්‍ය වෙළඳපොල ආරංචිමාර්ග සඳහන් කර සිටින්නේ මෙම අගය ශ්‍රී ලංකා ඉතිහාසයේ ඇමරිකානු ඩොලරයක් වාර්තා කළ වැඩිම විකුණුම් මිල ලෙසය.

මාස ගණනාවක සිට ඩොලරයේ අගය රුපියල් 150 ඉක්මවා පවතින අතර ඊට ප්‍රධාන හේතුව ලෙස මුල්‍ය වෙළඳපොළ විශ්ලේෂකයින් සඳහන් කර සිටින්නේ රටේ පවතින දේශපාලන අස්ථාවර භාවයයි.

මේ හේතුව මත නව ආයෝජන පැමිණීම සීමාවී ඇති බවත්, විදේශ විනිමය රට තුළට ගලා ඒම ඒ මත දුර්වලවී ඇති බවත් ආනයන වර්ධනයත් මීට දායකවී ඇති බවද ඔවුන් සඳහන් කරයි.

Comment (0) Hits: 474

කිරිපිටි මිල ඉහළයාම ගැන පාරිභෝගික අධිකාරියෙන් නිවේදනයක්

කිරිපිටි සඳහා වන නව මිල ගණන් වලංගු වන්නේ 2018-05-05 වනදා සිට නිෂ්පාදනය කරනු ලබන කිරිපිටි සඳහා බව පාරිභෝගික අධිකාරිය සඳහන් කරයි.

නිවේදනයක් නිකුත් කරමින් පාරිභෝගික අධිකාරිය මේ බව සඳහන් කරන අතර නව මිල වැඩි කිරීම දැනට වෙළඳපොළේ තිබෙන සම්පුර්ණ යොදය සහිත කිරි පිටි මිලට කිසිසේත්ම බල නොපාන බවද එහි සඳහන් කර ඇත. 

එසේම නව මිල ගණන් අනුව ආනයනික සම්පුර්ණ යොදය සහිත කිරිපිටි ග්‍රෑම් 400 පැකට්ටුවක මිල රුපියල් 20.00 සහ කිලෝ ග්‍රෑම් 1 කිරි පිටි පැකට්ටුවක මිල රුපියල් 50.00 කින්ද මිල ඉහළ යන බව එම නිවේදනයේ දැක්වේ. 

2012 වසරේ සිට කිරි පිට මිල ඉහළ ගිය ආකාරය පහත වගුවේ දැක්වේ.

කර

Comment (0) Hits: 468

ඉන්ධන මිලේ වෙනසක් නෑ !

ඛණිජ තෙල් සංස්ථාව පාඩු ලැබුවත් මේ අවස්ථාවේ ඉන්ධන මිල වැඩි කර ජනතාව පීඩනයට පත් කිරීමට අදහස් නොකරන බව ඛනිජ තෙල් සංවර්ධන අමාත්‍ය අර්ජුන රණතුංග සඳහන් කර ඇති බව වාර්තා වෙයි.ඛණිජ තෙල් සංස්ථාව පාඩු ලැබුවත් මේ අවස්ථාවේ ඉන්ධන මිල වැඩි කර ජනතාව පීඩනයට පත් කිරීමට අදහස් නොකරන බව ඛනිජ තෙල් සංවර්ධන අමාත්‍ය අර්ජුන රණතුංග සඳහන් කර ඇති බව වාර්තා වෙයි.

ඊයේ (24) පැවති කැබිනට් මණ්ඩල හමුවේදී අමාත්‍යවරයා මේ බව සඳහන් කර ඇත.

එසේම ඛනිජ තෙල් වෘත්තීය සමිතිද පසුගියදා ඉල්ලා තිබුණේ නිවැරදි මිල සුත්‍රයක් හඳුවාදෙන තුරු ඉන්ධන මිලේ වෙනසක් සිදු නොකරන ලෙසය.

මීට පෙර ඉන්ධන මිල සඳහා මිල සුත්‍රයක් හඳුවාදීමට රජය තීරණය කර තිබූ අතර එය සකසන නිලධාරීන් අත්‍යාවශ්‍ය රාජකාරී කටයුත්තක් සඳහා විදෙස්ගතව සිටින බැවින් එය පසුවට කල් තැබීමට මුදල් හා ජනමාධ්‍ය අමාත්‍යංශය තීරණය කර තිබිණ.

Comment (0) Hits: 472

කිරිපිටි මිල ඉහළ දමන්න : ජීවන වියදම් කමිටුව නිර්දේශ කරයි

ආනයනික කිරිපිටි මිල ඉහළ දැමීම සඳහා ජීවන වියදම් කමිටුව පාරිභෝගික කටයුතු පිළිබඳ අධිකාරිය වෙත නිර්දේශ ඉදිරිපත් කර ඇති බවත් ඊට අනුව ආනයනික කිරිපිටි මිල වැඩිකිරිමට අදාළ ගැසට් නිවේදනය අද (04) පස්වරුවේ නිකුත් කිරීමට කටයුතු කරන බව පාරිභෝගික කටයුතු පිළිබඳ අධිකාරිය සඳහන් කරයි.

ඒ අනුව ගෑම් 400 කිරිපිටි පැකට්ටුවක මිල රුපියල් 20 කින් සහ කිලෝග්‍රෑමයක කිරිපිටි පැකට්ටුවක මිල රුපියල් 50කින් ඉහළ දැමීමට ජීවන වියදම් කමිටුව නිර්දේශ කර ඇත.
ආනයනික කිරිපිටි මිල 2015 වසරේ සිට වැඩි කර නොමැති අතර මිල වැඩිකිරීම සම්බන්ධයෙන් කිරිපිටි සමාගම් විසින් ඉල්ලීම් ඉදිරිපත් කර තිබූ බව වාර්තා වේ.

කෙසේවෙතත් ජීවන වියදම් කමිටු ආරංචිමාර්ග සඳහන් කර සිටින්නේ ආනයනික කිරිපිටි  සමාගම් ඉල්ලා සිටි මිලට වඩා අඩුමිලකින් කිරිපිටි මිල වැඩිකිරිමට ඊයේ (03) රැස්වූ අවස්ථාවේ තීරණය කළ බවය.

Comment (0) Hits: 519

ඉන්ධන සඳහා වූ මිල සූත්‍රය කල් යයි

ඉන්ධන මිල සම්බන්ධව රජය විසින් හඳුන්වාදීමට යෝජිත මිල සූත්‍රය හෙට (24) දිනයේ කැබිනට් මණ්ඩලය වෙත යොමු කිරීමට නියමිතව තිබුණත් එය ඉදිරිපත් නොකරන බව මුදල් හා ජනමාධ්‍ය අමාත්‍යංශයේ ජ්‍යෙෂ්ඨ නිලධාරියෙකු සඳහන් කරයි.ඉන්ධන මිල සම්බන්ධව රජය විසින් හඳුන්වාදීමට යෝජිත මිල සූත්‍රය හෙට (24) දිනයේ කැබිනට් මණ්ඩලය වෙත යොමු කිරීමට නියමිතව තිබුණත් එය ඉදිරිපත් නොකරන බව මුදල් හා ජනමාධ්‍ය අමාත්‍යංශයේ ජ්‍යෙෂ්ඨ නිලධාරියෙකු සඳහන් කරයි.

ඊට හේතුව ලෙස ඔහු සඳහන් කර සිටින්නේ ඉන්ධන සඳහාවූ මිල සූත්‍රය සකසන නිලධාරීන් රාජකාරී කටයුත්තක් සඳහා  විදෙස් සංචාරයක නිරතව සිටින බැවින් නියමිත වෙලාවට මිල සූත්‍රය සකස්කර අවසන් කිරීමට නොහැකිවී ඇති බවය.

එබැවින් ඊළඟ කැබිනට් මණ්ඩල හමුවට අදාළ මිල සුත්‍රය ඉදිරිපත් කිරීමට අපේක්ෂා කරන බවද ඔහු පැවසීය.

එසේම ජාත්‍යන්තර මුල්‍ය අරමුදලද සඳහන් කර තිබුණේ 2018 වසර තුළ ශ්‍රී ලංකාව ඉන්ධන මිල වෙනුවෙන් මිල සූත්‍රයක් හඳුවාදීමට නියමිතව ඇති බවය.

මිල සූත්‍රය ගැන වෘත්තීය සමිති අදහස 

මේ අතර යෝජිත ඉන්ධන සඳහා වන  මිල සූත්‍රය නිවැරදිව සකස්කර ඉදිරිපත් කරන තුරු ඉන්ධන මිල ඉහල නොදැමිය යුතු බව ලංකා ඛනිජ තෙල් ජාතික සේවක සංගමය සඳහන් කරයි.

අද (23) කොළඹ පැවති මාධ්‍ය හමුවකදී එම සංගමයේ නියෝජිතයන් මේ අදහස් පලකල අතර මේ වන විට ඛනිජ තෙල් සංස්ථාවේ දිනක පාඩුව කෝටි 19 ඉක්මවන බවද ඔවුන් සඳහන් කරයි.

එසේම අදාළ මිල සුත්‍රය හඳුන්වා දිය යුතුව ඇත්තේ ජාත්‍යන්තර නිර්ණායක අනුව බවත් එහිදී වරාය සහ රේගු බද්ද, නිෂ්පාදන බද්ද, ජාතිය ගොඩනැගීමේ බද්ද මෙන්ම නඩත්තු වියදම් සමඟ ඉන්ධන ලීටර් 1ක් සඳහා මේ වන විට රුපියල් 131.70ක් වැයවන බවත් ආණ්ඩුව මේ මොහොතේ මිල සූත්‍රය ගෙනෙනවා නම් තෙල් සංස්ථාවේ ණයබරද ආණ්ඩුව බාරගත යුතු බව ඔවුන් සඳහන් කර සිටියි.

Comment (0) Hits: 476

ජපානයේ ඉහළම පෙළේ සමාගමක් ලංකාවේ වැඩ අරඹන්න සුදානම් !

ජපානයේ ඉහළම පෙළේ ව්‍යාපාරික සමාගමක් වන Future science research incorporation ආයතනයේ සභාපති අකිහිකෝ මත්සුමුරා මහතාගේ ප්‍රධානත්වයෙන් පැමිණි ජපන් දූත පිරිසක් පසුගිය 01 වනදා කර්මාන්ත හා වාණිජ කටයුතු අමාත්‍ය රිෂාඩ් බදියුදීන් හමුවී තාක්ෂණයෙන් ඉහළ පරිසර හිතකාමී විද්‍යුත් ත්‍රිරෝද රථ නිෂ්පාදන සමාගමක් ශ්‍රී ලංකාවේ ආරම්භ කිරීම පිළිබඳ සාකච්ඡා කර ඇති බව වාර්තා වෙයි. 

මෙම දූත පිරිස සමග ජපානයේ අග්‍රාමාත්‍යතුමාගේ උපදේශක, ජපානයේ අමාත්‍ය මණ්ඩලයේ විශේෂ උපදේශක හිටපු පාර්ලිමේන්තු මන්ත්‍රීවරයෙකු හා පක්ෂ නායකයෙකු වන අරඉ නිරොයුකි ,ජපානයේ අග්‍රාමාත්‍ය සුපිරි උපදේශක කුතියෝ කුබෝටා  සහ ජපානයේ අග්‍රාමාත්‍යතුමාගේ පුද්ගලික ලේකම් හිරෝෂි ලිසුකා ද පැමිණි බව අමාත්‍යංශ ආරංචිමාර්ග සඳහන් කරයි.

1MAY

Comment (0) Hits: 509

යහපත් ව්‍යාපාරික නියැළීම් සාමය සහ යහපාලනය සඳහා උත්ප්‍රේරකයක් - ජනාධිපති

සමස්ථ ලෝකයම පාහේ පිරිසිදු හරිත චර්යාවන් සහ තිරසර ශක්තීන් නිර්මාණය කිරීමේ ලා වෙහෙස දරමින් සිටීන පසුබිමක ලංකාවද නීල-හරිත ආර්ථික වැඩපිළිවෙළ හරහා  පරමාදර්ශී රටක් බවට පත්වීමට අපේක්ෂා කරන බව ජනාධිපති මෛත්‍රීපාල සිරිසේන සඳහන් කරයි.

 පොදුරාජ්‍ය මණ්ඩලීය නායක සමුළුවට සමගාමීව ලන්ඩන් නුවර පැවැත්වුණු පොදුරාජ්‍ය මණ්ඩල ව්‍යාපාරික සංසදයේ ප්‍රධාන දේශනය කරමින් ජනාධිපතිවරයා මෙසේ පැවසීය.

 යහපත් වූ ව්‍යාපාරික නියැළීම් සාමය සහ යහපාලනය සඳහා වූ උත්ප්‍රේරකයක් බවත් ඒ තුළින් සමාජ වගකීම් ප්‍රතිෂ්ඨාපනය කළ යුතු අතරම එය නීතියේ ආධිපත්‍යයට අනුකූල වන අතරම සම්පූර්ණයෙන් දූෂණය බැහැර වූවක් විය යුතු බවත්  එවන් වූ ක්‍රියාමාර්ගයන් අදාළ වර්ධනය සහ පොදු වූ සෞභාග්‍යය ළඟා කරනු ඇති බවත් එහිදී ජනාධිපතිවරයා පවසා ඇත.

 පොදුරාජ්‍ය මණ්ඩල ව්‍යාපාරික සංසදයේ ප්‍රධාන දේශනය කරමින් ජනාධිපතිවරයා සිදුකළ කතාව පහත පළවේ. 

 මෙම පොදුරාජ්‍ය මණ්ඩලීය ව්‍යාපාරික සංසදයේ දී රජය, ව්‍යාපාරික ප්‍රජාව සහ සිවිල් සමාජය යන ක්ෂේත්‍රයන්හි  ප්‍රධාන පාර්ශ්වකරුවන් සමඟ, මම විශ්වාස කරන පරිදි, වර්තමානයේ දී ඉතා වැදගත් හා කාලෝචිත කරුණක් පිළිබඳව ආමන්ත්‍රණය කිරීමට හැකිවීම පිළිබඳව සතුටු වෙමි.

 සමාජයීය සාධාරණත්වය තිබෙන, සමෘද්ධිමත් හා තිරසර සමාජයක් සහිත ලෝකයක් බිහිකිරීම සඳහා 2030 වසර සඳහා තිරසර සංවර්ධනය සඳහා වූ න්‍යායපත්‍රයක් අනුගමනය කරමින් තිරසාර අනාගතයක් සඳහා පොදු පිළිවෙතක් අනුගමනය කිරීමට 2015 දී ලෝක ජාතීහු එකඟ වූහ.

 අප එකඟ වූ ක්‍රියාකාරී සැලැස්ම අතිශයින් දිරිමත් කරනසුලුය. එබැවින් මෙම අපේක්ෂාසහගත සංවර්ධන සැලසුම සාර්ථක ලෙස ක්‍රියාවට නංවා එයට ජීවය දීම අතිශයින්ම වැදගත්ය.

 දරිද්‍රතාවය මුලිනුපුටා දැමීම සඳහාත්, දේශගුණික විපර්යාසයට මුහුණ දීමටත්, සාමකාමී සමාජයක් ගොඩනැඟීමටත් ප්‍රධාන පාර්ශ්වකරුවන් එකට එකතුවී කටයුතු කළ යුතු බවට එකඟත්වයක් ඇති විය. මෙයට ආණ්ඩු පමණක් නොව, ව්‍යාපාර සහ   සිවිල් සමාජ ප්‍රජාවන් ද අයත් වේ. 

 ප්‍රතිපත්ති සම්පාදනයේ ප්‍රාථමික වගකීම රජය සතුවේ. බොහෝ රටවල්වල මෙන් ශ්‍රී ලංකාවේ ද රාජ්‍ය ප්‍රධානියා සහ රජය මෙම වගකීම් හි ප්‍රමුඛත්වය පෞද්ගලිකවම දරයි. අන්තර්ග්‍රාහී තිරසර ව්‍යාපාර ආකෘති තුළින් තිරසර සංවර්ධනයක් කරා ගමන් කළ හැකි  අතරම, මෙම ව්‍යාපෘතීන් දීර්ගකාලීන වීම ද ඉතා වැදගත් වේ.

 යහපත් වූ ව්‍යාපාරික නියැළීම් සාමය සහ යහපාලනය සඳහා වූ උත්ප්‍රේරකයක් වේ. ඒ තුළින් සමාජ වගකීම් ප්‍රතිෂ්ඨාපනය කළ යුතු අතරම එය නීතියේ ආධිපත්‍යයට අනුකූල වන අතරම සම්පූර්ණයෙන් දූෂණය බැහැර වූවක් විය යුතුය. එවන් වූ ක්‍රියාමාර්ගයන් අදාළ වර්ධනය සහ පොදු වූ සෞභාග්‍යය ළඟා කරනු ඇත.

 තිරසර සංවර්ධන ඉලක්ක කරා ළඟා වීමට අතිශය අවැසි යටිතල ව්‍යූහය ඇතිකරලීම සඳහා පොදු සහ පෞද්ගලික සහයෝගීතාව වර්ධනය වනු දැකීම දිරිගන්වන සුලුය.

 සමාජීය ලෙස වගකීම් සහගත පුද්ගලයන් ලෙස ඔබ සියලුදෙනා සිය ව්‍යාපාරයන්හි  නියැළීම්වලදී තාක්ෂණික සහ මූල්‍යමය දායකත්වය තුළින් තිරසර සංවර්ධන ඉලක්ක ළඟාකර ගැනීමට දායක වන ලෙස ඉල්ලීමට මා මෙය අවස්ථාවක් කරගනිමි.

 අද වන විට ලොව පිරිසිදු හරිත චර්යාවන් සහ තිරසර ශක්තීන් නිර්මාණය කිරීමේ ලා වෙහෙස දරමින් සිටී. තිරසර සංවර්ධන අරමුණු හඳුන්වාදීම සඳහා එකම ප්‍රමිතියෙන් යුත් පිවිසීමක් නොමැති අතර එක් එක් රටවල් තම මාවත එකී රටවල් විසින්ම නිර්මාණය කොටගෙන ඇත. 

 ශ්‍රී ලාංකීය රජය, තිරසර සංවර්ධන අරමුණු ඉටුකර ගැනීමේ ජාතික ප්‍රතිපත්තීන් ක්‍රියාත්මක කිරීම වේගවත් සහ යාවත්කාලීන කිරීම සඳහා තිරසර සංවර්ධනය පිළිබඳ විශේෂ වූ අමාත්‍යාංශයක් පිහිටුවා ඇත.

 අප රජයේ නීල-හරිත ආර්ථික වැඩපිළිවෙළ ශ්‍රී ලංකාවේ සමුද්‍රීය සහ අනෙකුත් ස්වාභාවික සම්පත්වල සම්පූර්ණ උපයෝගීතාවය පරිසරහිතකාමී සහ තිරසර භාවිතයෙන් යුතුව සනාථ කරනු ඇත.  

 මෙම ආර්ථික උපක්‍රමය හරහා වූ යහපත් ක්‍රමවේද ආමන්ත්‍රණය කිරීමේ පරමාදර්ශී රටක් බවට පත්වීමට ශ්‍රී ලංකාව අපේක්ෂා කෙරේ.

 මා මෙහි සහභාගිවී සිටින සියලු දෙනාගෙන්ම ඉල්ලා සිටින්නේ පොදුරාජ්‍ය මණ්ඩලීය සහ අනෙකුත් රටවල් සමඟ අත්වැල් බැඳගනිමින්, සමාජීය වගකීම සහ සමාජ අන්තර්ගතය සපථ කිරීමට කටයුතු කරන ලෙසටය.

 සිය ජනතාවන්ගේ උපරිම තෘප්තිය ඇති කිරීම උදෙසා සමාජ වගකීම දිනාගැනීමේ අරමුණ එමඟින් සාක්ෂාත් කරගැනීම සඳහා  සියලුම ව්‍යාපාරික ප්‍රජාව සහ රජයේ සහයෝගීතාවය මෙම කොටස්කරුවන් මත රැඳී පවතී. එම යහපත් ක්‍රමවේදය කරා මාවත විවර කරගැනීමට මෙහි සිටින සියලුදෙනාම කැපවීමෙන් සහ සැලසුම්සහගතව කටයුතු කරනු ඇතැයි අපේක්ෂා කරමි.

ස්තූතියි!

Comment (0) Hits: 515

Page 9 of 14