V2025

ආර්ථික

සංචාරක කර්මාන්තයට අදාළ ව්‍යාපාර සඳහා බදු සමාවක් - ඇමති මංගල

පුද්ගලයන් 250කට අධික පිරිසකට මරු කැඳවමින් එල්ල වු පාස්කු ප්‍රහාරය හේතුවෙන් බලපෑම් එල්ල වූ සංචාරක කර්මාන්තයට අදාළ ව්‍යාපාර සඳහා බදු සමාවක් ලබා දීම සම්බන්ධයෙන් අවධානය යොමුව ඇතැයි මුදල් අමාත්‍ය මංගල සමරවීර පවසයි.

විදේශිකයන් සහ කතෝලික බැතිමතුන් ඉල්ලක කර එල්ල වූ ත්‍රස්ත ප්‍රහාරයෙන් පසු ඇති වූ ආරක්ෂක තත්ත්වයන් සැලකිල්ලට ගනිමින් අදාළ කර්මාන්තකරුවන් විසින් ද මෙම බදු විරාම පිළිබඳ ඉල්ලීම් කර ඇති බව බ්ලූම්බර්ග් රූපවාහිනිය සමග සම්මුඛ සාකච්ඡාවකට එක් වෙමින් අමාත්‍යවරයා පවසයි.

‘‘ටියුනීසියාව, බාලි වගේ මේ වගේ තත්ත්වයන්ට මුහුණ දුන් රටවල් දිහා බලපුවා ම අපිට කියන්න පුළුවන් නිසි ක්‍රියාමාර්ග යටතේ වසරක, වසර එක හමාරක වගේ කාලයක් තුළ මෙරට සංචාරක කර්මාන්තය නැවත යථා තත්ත්වයට පත් වෙයි කියල‘‘. අමාත්‍යවරයා පැවැසීය.

මෙම ප්‍රහාර හේතුවෙන් ඇ.ඩො. බිලියන 87ක් පමණ වන සංචාරක ආදායමට 5%ක පමණ බලපෑමක් වනු ඇතැයි අපේක්ෂා කරනවා.

2009න් අවසන් වූ දශක තුනක යුද්ධයෙන් වගේ ම පසුගිය දා ඇති වූ දේශපාලන අර්බුදයෙන් අපේ ආර්ථික වර්ධනයට බලපෑම් එල්ල වුණා. යුද්ධයෙන් පස්සෙ පස් ගුණයකින් විතර සංචාරකයන් පැමිණීම ආදායම් වාර්තා බිඳ හෙළන මට්ටමට වර්ධනය වුණා.‘‘

‘‘ලොකුම අවධානම විය හැක්කේ මෙවැනි ප්‍රහාර දිගින් දිගටම ඇති වීමයි. අපි හිතනව එය අපට කළමනාකරණය කර ගන්න පුළුවන් වෙයි කියල. ඒ වගේ ම මෙවැනි ප්‍රහාර නැවත ඇති නොවෙයි කියලත් අපි හිතනවා. ශ්‍රී ලංකාවේ ආර්ථිකය හෙමින් නමුත් ස්ථාවර ලෙස ඉදිරියට යමින් තියෙනවා.‘‘ යැයි ද අමාත්‍යවරයා පැවැසීය.

මෙහිදී මහ බැංකු අධිපති ආචාර්ය ඉන්ද්‍රජිත් කුමාරස්වාමි කියා සිටියේ හතර වැනි කාර්තුවේ 1.8%ක පැවැති ආර්ථික වර්ධන වේගයට සංචාරක ව්‍යාපාරය පහත වැටීමෙන් එල්ල විය හැකි බලපෑම ප්‍රකාශ කිරීමට තරම් කාලය ගතවී නොමැති බවයි.

Comment (0) Hits: 296

ලංකාවට ඩොලර් මිලියන 1.8 ක ප්‍රදානයක් !

දේශගුණික බලපෑම් අවම කිරීමේ ක්‍රියාකාරී ව්‍යාපෘතිය ක්‍රියාත්මක කිරීම සඳහා ලෝක බැංකුවේ ප්‍රතිසංස්කරණය හා සංවර්ධනය සඳහා වන අන්තර්ජාතික බැංකුව වෙතින් ඇමෙරිකානු ඩොලර් මිලියන 1.8 ක ප්‍රදානයක් සිදුකර ඇත.

නිවේදනයක් නිකුත් කරමින් මුදල් අමාත්‍යාංශය මේ බව සදහන් කරන අතර එහි වැඩිදුරටත් මෙසේද සදහන් වෙයි.

මෙම ව්‍යාපෘතියේ අරමුණු වන්නේ, ජාතික දේශගුනික විපර්යාස සදහා වූ ප්‍රතිපත්ති, ක්‍රමෝපාය හා ක්‍රියාකාරකම් ක්‍රියාත්මක කිරීමට සහ වෙළඳ පොල හෝ වෙළද පොල නොවන අවම කිරීමේ භාවිතවන් නිර්මාණය කිරීම සදහා ශ්‍රී ලංකාව තුල ධාරිතාවයන් හා පද්ධතීන් ශක්තිමත් කිරීමයි.

මෙම අරමුණට ලගා වීම සදහා ජාතික අධීක්ෂණ ,වාර්තකරණ හා තහවුරු කිරීම් පද්ධතියක් නිර්මාණය කිරීම, ව්‍යාපෘති හෝ පහසුකම් මට්ටමේදී පරිසරයට නිකුත් කිරීම් අවම කිරීම සදහා එම පද්ධති යොදා ගැනීම, ශ්‍රී ලංකා කාබන් ණය යෝජනා ක්‍රමය සදහා ආයතනික ,නීතිමය හා තාක්ෂණික රාමු නිර්මාණය කිරීම සිදුවේ. එමෙන්ම කාබන් මිල නියම කිරීමේ උපකරණ සදහා මාර්ග සැලැස්මක් සංවර්ධනය කිරීම,අදාල ආයතන හා පාර්ශ්වකරුවන් ගේ උපදෙස් ලබා ගැනීම සම්බන්ධිකරණය කිරීමද ඉහත අරමුණු වලට ලගා වීමට උපකාරී වේ.

මෙම ව්‍යාපෘතිය පහත සඳහන් අංගයන්ගෙන් සමන්විත වේ

 අවම කිරීමේ ප්‍රතිපත්තිමය අරමුණු, භූ දර්ශනය සහ විකල්ප විශ්ලේෂණය

කාබන් මිල නියම කිරීමේ උපකරණ ක්‍රියාත්මක කිරීම සඳහා තාක්ෂණික හා ආයතනික / නියාමන සූදානම් සංරචක

දේශීය කාබන් මිල නියම කිරීමේ උපකරණ ක්‍රමාංකනය වැඩිදියුණු කිරීම

සංවිධානය, සන්නිවේදනය, උපදේශනය සහ හැකියා වර්ධනය

 මෙම ව්‍යාපෘතිය සදහා මහවැලි සංවර්ධන හා පරිසර අමාත්‍යාංශ ලේකම්ගේ මූලිකත්වයෙන් ව්‍යාපෘති අධීක්ෂණ කමිටුවක් ස්ථාපනය කරනු ලැබේ. අමාත්‍යාංශ හා දෙපාර්තමේන්තු කිහිපයක සම්බන්ධීකරණය හා සක්‍රිය සහභාගිත්වය සඳහා ව්‍යාපෘති අධීක්ෂණ කමිටුව වගකීම දරයි.

 ඇමරිකා එක්සත් ජනපදයේ වොෂිංටන් හි අප්‍රේල් 8-14 දිනයන්හි පැවති ලෝක බැංකු හා ජාත්යන්තර මූල්ය අරමුදලේ වාර්ශික රැස්වීම් අතරතුරදී ඉහත කී බහු-ආධාර සැපයුම් භාර අරමුදල් ප්‍රදානය කිරීමේ ගිවිසුම 2019 අප්‍රේල් 11 වන දින ,ශ්‍රී ලංකා රජය වෙනුවෙන් මුදල් අමාත්‍යාංශ ලේකම් ආර්.එච්.එස්.සමරතුංග සහ ලෝක බැංකුව වෙනුවෙන් දකුණු ආසියානු කලාපයේ ලෝක බැංකුවේ උප සභාපති හර්ට්විග් ෂාෆර් විසින් අත්සන් කරන ලදී.

0 7

 

 

Comment (0) Hits: 290

රුසියානු සංචාරකයින් පිරිසක් සමඟ සංචාරක කර්මාන්තය ඔසවයි !

ශ්‍රී  ලංකාවට සංචාරකයන්ගේ පැමිණීම බොහෝ සෙයින් බිඳ වැටී තිබියදීත්, රුසියානු සංචාරකයන් 52 ගෙන් සමන්විත පිරිසක් මොස්කව් නුවර සිට අද(01) උදෑසන කටුනායක ගුවන් තොටුපළ වෙත පැමිණ තිබේ.

මොවුන් රුසියාවේ මොස්කව් නුවර සිට පැමිණි, රුසියානු ගුවන් සේවයට අයත් එස්.යූ- 6265 දරන ගුවන් යානයෙන් අද උදෑසන 8.20 ට කටුනායක ගුවන් තොටුපළ වෙත පැමිණ ඇත.

මෙහිදී අදහස් දැක්වූ සංචාරකයන් පිරිස කියා සිටියේ , වර්තමාන ශ්‍රී ලංකාවේ තත්ත්වය පිළිබඳව රුසියාවට ද ආරංචි වූ බවත් , එහෙත් තමන් නොබියව , සැලසුම් කළ පරිදි මෙම සංචාරය සඳහා ශ්‍රී ලංකාවට පැමිණි බවත්ය.

මෙම රුසියානු සංචාරකයන් පිරිස ශ්‍රී ලංකාවේ දින 12 ක් ගත කිරීමට අපේක්ෂා කරන අතර , ඔවුන් වැලිගම , හික්කඩුව , බෙන්තොට ආදී ප්‍රදේශවල නවාතැන් ගැනීමට සැලසුම් කර ඇති අතර , ඊට අමතරව සීගිරිය , නුවරඑළිය සහ ඇල්ල ආදී ප්‍රදේශ නැරඹීමට යාමට ද නියමිතය.

මෙම සංචාරය ශ්‍රී ලංකාවේ පෞද්ගලික සංචාරක ප්‍රවර්ධන ආයතනයක් විසින් සංවිධානය කර තිබුණි.

Comment (0) Hits: 306

ඉන්ධන මිල වැඩි කරන්නේ නෑ - ඇමති මංගල

ජාත්‍යන්තර වෙළෙඳපොළේ ඉන්ධන මිල අඛණ්ඩව වැඩිවෙමින් පවතින පසුබිමක් යටතේ මිල සූත්‍රය අනුව ඉන්ධන මිල ඉහළ නැංවිය යුතු වුව ද, මෙම උත්සව සමයේ දී ජනතාවට සහන සලසනුවස් ඉන්ධන මිලෙහි කිසිදු වෙනසක් සිදු නොකරන බව මුදල් අමාත්‍ය මංගල සමරවීර පවසයි.

මේ සම්බන්ධව නිවේදනයක් මුදල් අමාත්‍යංශය විසින් නිකුත්කර තිබේ.

ඊට අනුව ජාත්‍යන්තර වෙළෙඳපොළේ ඉන්ධන මිල අඛණ්ඩව ඉහළ යමින් පවතින අතර පසුගිය මාර්තු මාසයේ ඇ.ඩො. 67ක්ව පැවැති බොර තෙල් බැරලයක මිල අද වන විට ඇ.ඩො. 74 දක්වා ඉහළ ගොස් තිබෙන අතර එසේ ජාත්‍යන්තර ඉන්ධන මිල වැඩි වුව ද මෙම උත්සව සමයේ දී ජනතාවට සහන සැලසීමේ අරමුණෙන් කිසිදු ඉන්ධන වර්ගයක මිල වැඩි නොකිරීමට රජය තීරණය කර ඇත.

මාර්තු මස 10 වැනි දා කෙරුණු ඉකුත් මිල සංශෝධනයේ දී ද උත්සව සමය එළඹීම සැලකිල්ලට ගෙන ජනතාවට සහන ලබා දීමේ අරමුණෙන් ජාත්‍යන්තර වෙළෙඳපොළේ මිල ඉහළ යාමට සාපේක්ෂව මෙරට ඉන්ධන මිල ඉහළ දැමුණේ ඉතා සුළු වශයෙනි.

Comment (0) Hits: 294

ADB මහ සමුළුවට : ඇමැති මංගල ඇතුළු පිරිසක් ෆීජි යයි !

ආසියානු සංවර්ධන බැංකුවේ 52 වැනි වාර්ෂික මහ සභා රැස්වීමට සහභාගී වීම සඳහා මුදල් අමාත්‍ය මංගල සමරවීර ඇතුළු දූත පිරිස ෆීජි රාජ්‍ය බලා පිටත්ව ගොස් තිබේ.

රැස්වීම මැයි මස 2 වැනි ද සිට 5 වැනි දා දක්වා පැවැත්වෙයි.

මේ බව මුදල් අමාත්‍යාංශය නිකුත්කර ඇති නිවේදනයක සදහන් වන අතර එහි මෙසේද සදහන් වෙයි.

ආසියානු සංවර්ධන බැංකු නියෝජිතයන්, රාජ්‍ය නොවන සංවිධාන නියෝජිතයන්, නිරීක්ෂණ රටවල නියෝජිතයන්, ජාත්‍යන්තර සංවිධානවල නියෝජිතයන් සේම පෞද්ගලික අංශයේ නියෝජිතයන් සමග අන්‍යෝන්‍ය සබඳතා වර්ධනය කර ගැනීමට මෙම රැස්වීමේ දී සාමාජික රටවල නියෝජිතයන්ට අවස්ථාව ලැබෙනු ඇත.

ආසියා ෆැසිපික් කලාපයේ ආර්ථික සහ සමාජ සංවර්ධනය පිළිබඳ කරුණු සාකච්ඡා කිරීමට ආසියානු සංවර්ධන බැංකුවේ වාර්ෂික සමුළුව කදිම අවස්ථාවකි. සාමාජික රටවල් 67ක නියෝජිතයන් සහභාගී වන මෙම මහා සභා රැස්වීම සඳහා මුදල් අමාත්‍යං මංගල සමරවීර මහතා සමගින් ශ්‍රී ලංකාව නියෝජනය කරමින් භාණ්ඩාගාර ලේකම් ආචාර්ය ආර්.එච්.එස්. සමරතුංග, නියෝජ්‍ය ලේකම් ඒ.එම්.පී.එම්.බී. අතපත්තු, විදේශ සම්පත් දෙපාර්තමේන්තුවේ අධ්‍යක්ෂ ජනරාල් ප්‍රියන්ත රත්නායක සහ ජාතික ක්‍රම සම්පාදන දෙපාර්තමේන්තුවේ අධ්‍යක්ෂ ජනරාල් එස්.එස්. මුදලිගේ යන මහත්වරු ඇතුළු මුදල් අමාත්‍යාංශයේ ජ්‍යෙෂ්ඨ නිලධාරීහු ද සහභාගී වෙති.

ආසියානු සංවර්ධන බැංකුව ශ්‍රී ලංකාවේ ව්‍යාපෘති වෙනුවෙන් වාර්ෂිකව ඇ.ඩො. මිලියන 800ක පමණ සහන ණය ලබා දෙනු ලබන අතර 2019 වසර වෙනුවෙන් ව්‍යාපෘති යෝජනා 8ක් සඳහා ඇ.ඩො. මිලියන 815ක් ලබා දීමට නියමිත ය. වරාය පිවිසුම් අධිවේගී මාර්ග ව්‍යාපෘතිය මේ වන විටත් ක්‍රියාත්මක අතර ඒ වෙනුවෙන් වැය කෙරෙන මුදල ඇ.ඩො. මිලියන 300කි. මීට අමතරව දුම්රිය සේවය කාර්යයක්ෂම කිරීම සඳහා පැරැණි සංඥා සහ ප්‍රවේශපත් ක්‍රමවේදයන් නවීකරණය කිරීම සඳහා වූ ව්‍යාපෘතිය පිළිබඳ සාකච්ඡා මැයි මාසයේ කොළඹ දී පැවැත්වෙයි. ඊට වැය කිරීමට අපේක්ෂිත මුදල ඇ.ඩො. මිලියන 160කි.

ආසියානු සංවර්ධන බැංකුවේ වාර්ෂික සමුළුවට සමගාමීව සාර්ක් කලාපීය රටවල මුදල් අමාත්‍යවරුන්ගේ රැස්වීම ද ෆිජි දූපතේ නදී නගරයේ දී මැයි 02 දා පැවැත්වීමට කටයුතු සංවිධානය කර ඇත.

Comment (0) Hits: 300

නව නිපැයුම්කරුවන්ගේ කොමිසමට මහාචාර්ය රංගික හල්වතුර එයි

ශ්‍රී ලංකා නව නිපැයුම්කරුවන්ගේ කොමිසමේ නව කොමසාරිස්වරයා ලෙස මහාචාර්ය රංගික හල්වතුර මහතා පත්කර තිබේ.

විද්‍යා ,තාක්ෂණ හා පර්යේෂණ රාජ්‍ය අමාත්‍ය සුජීව සේනසිංහ මහතා විසින් මහාචාර්ය රංගික හල්වතුර මහතා මෙම තනතුරට පත්කොට ඇත.

මොරටුව විශ්වවිද්‍යාලයේ සිවිල් ඉංජිනේරු විද්‍යාව සම්බන්ධ මහාචාර්යවරයෙකු වන හල්වතුර මහතා 2017 වසරේදී ලෝක විද්‍යා ඇකඩමිය මඟින් පිරිනමනු ලබන තුන්වන ලෝකයේ හොඳම තරුණ විද්‍යාඥයාට හිමි සම්මානය දිනා ගැනීමට සමත් වූ අතර දැනට ශ‍්‍රී ලංකාවේ සිටින ලාබලාතම මහාචාර්ය වරයාද වේ.

වර්තමාන ශ්‍රී ලංකාවේ සිටින ඉංජිනේරු විද්‍යාව සම්බන්ධ ලාබාලතම මහාචාර්යවරයා වන රංගික හල්වතුර මහතා ප්‍රායෝගික නව නිර්මාණශිල්පියෙකු ලෙස නිර්මාණකරණයේ යෙදීමට නියමිතය.

Comment (0) Hits: 331

පසුගිය වසරේ ව්‍යාපෘති වෙනුවෙන් රු.බිලියන 84ක් ගෙවා අවසන් !

රජයේ අමාත්‍යාංශ හා විවිධ ආයතන මගින් ක්‍රියාත්මක කරන ලද විවිධ වැඩසටහන් සඳහා 2018 දෙසැම්බර් 31 වනවිට ගෙවිය යුතුව තිබූ රු. මිලියන 84,461 ක මුදලක් මේ වනවිට මහා භාණ්ඩාගාරය විසින් අදාළ අංශ වෙත ගෙවා ඇති බව මුදල් අමාත්‍යංශය සඳහන් කරයි.

නිවේදනයක් නිකුත් කරමින් අමාත්‍යංශය මේ බව සඳහන් කරන අතර අදාළ නිවේදනයේ මෙසේද දැක්වෙයි.

2018 දෙසැම්බර් 31 වනවිට විවිධ ව්‍යාපෘති ක්‍රියාත්මක කිරීම වෙනුවෙන් හා අනෙකුත් ගෙවීම් සඳහා රු. මිලියන 99,415 ක බිල් පවත්නා බව මහා භාණ්ඩාගාරය වෙත දැනුම් දී තිබුණි. එයින් 85% ක් මේ වනවිට ගෙවා ඇති අතර, ඉතිරි ගෙවීම් වලට අදාළ අඩුපාඩු පවතින බැවින් ඒවා නිරවුල් කළ වහාම එම මුදල්ද ගෙවීමට කටයුතු කරන බව මහා භාණ්ඩාගාරයේ ලේකම් ආචාර්ය ආර්.එච්.එස්. සමරතුංග මහතා පැවසීය.

රජයේ අමාත්‍යාංශ හා විවිධ ආයතන මගින් ක්‍රියාත්මක කරන ලද කොන්ත්‍රාත්, ඉදිකිරීම් හා ප්‍රසම්පාදන කටයුතු වෙනුවෙන් ගෙවිය යුතු මුදල් පිළිබඳ ඉල්ලීම් සෑම වසරකම දෙසැම්බර් මස අවසන් වනවිට ලැබූවිට එම මුදල් එළඹෙන වසරේ මුල් මාස 3 – 4 ක් ඇතුළත ගෙවීම් කිරීම 2015 වසරේ සිට අඛණ්ඩව සිදුවෙමින් පවතී.

එහෙත්, 2018 වසරේ අවසාන කාර්තුවේ අවිනිශ්චිත තත්ත්වයක් ඇතිවූ හෙයින් නියමිත පරිදි මෙම හිඟ මුදල් ගෙවීමේ ප්‍රමාදයක් විය. එමෙන්ම 2019 සඳහා වන අයවැය 2018 වසරේදී සම්මත කරගැනීමටද නොහැකි විය. 2019 වසර සඳහා වන අයවැය පාර්ලිමේන්තුවේ සම්මත කරගැනීම මේ වසරේ අප්‍රේල් 05 දක්වා ප්‍රමාද විය. මේ හේතුවෙන් 2018 වසරේ අවසාන වන විට ගෙවිය යුතු මුදල් පෙර වසර වලට වඩා විශාල ප්‍රමාණයෙන් එක්රැස් විය. ඒ අනුව 2018 වසර සඳහා ගෙවිය යුතුව තිබූ හිඟ මුදල් නිරවුල් කිරීම ප්‍රමාද වීමට මෙයද බලපෑවේය.

රජයේ ප්‍රසම්පාදන ක්‍රියාවලිය ඩිජිටල්කරණය කිරීම සඳහා මුදල් අමාත්‍ය මංගල සමරවීර මහතාගේ උපදෙස් මත භාණ්ඩාගාරයේ රාජ්‍ය මුදල් දෙපාර්තමේන්තුව විසින් කටයුතු සම්පාදනය කරමින් තිබෙන බැවින් 2015 වසරේද ආරම්භ කළ පරිදි යළිත් මෙම වසරේ සිට රජයේ සියලු ප්‍රසම්පාදන කටයුතු සඳහා ගෙවිය යුතු සියලු ගෙවීම් අදාළ ව්‍යාපෘතිය නිමවීමත් සමග ගෙවීමට හැකි වනු ඇත. 

Comment (0) Hits: 295

චීනය ලංකාවට රබර් සැකසුම් කලාපයක් දෙයි

ශ්‍රී ලංකාවේ රබර් ක්ෂේත්‍රයේ සංවර්ධනය උදෙසා ආයෝජනය කිරීමට චීන රජය එකඟතාවය පල කර ඇත.

ඒ සම්බන්ධයෙන් වන දෙරට අතර අවබෝධතා ගිවිසුම අත්සන් කිරීම සඳහා අමාත්‍ය නවින් දිසානායක මෙම මස අඟදී චීන සංචාරයකට එක් වීමට නියමිතය.

එම ව්‍යාපෘතියේ ප්‍රතිඵලයක් ලෙස විශේෂ රබර් සංවර්ධන කලාපයක් සහ ඊට සමාන්තරව රබර් ආශ්‍රිත කර්මාන්ත කලාපයක් ස්ථාපනය කිරීමට නියමිතව ඇත.

වැඩි ආර්ථිකයක් හිමි කර දෙන වැඩි ඵලදාවක් සහිත රබර් බීජ හා නව තාක්ෂණයද මෙහිදී රබර් ක්ෂේත්‍රයට හදුන්වා දීමට නියමිත අතර ස්වභාවික රබර් නිෂ්පාදනය කෙරෙන ප්‍රමුඛ පෙළේ රටක් ලෙස ශ්‍රී ලංකාව ස්ථානගත කිරීම එහි විශේෂ අරමුණක් වේ.

චීනයේ හයිනෑං රබර් සංවර්ධන කලාපය නියෝජනය කරමින් විශේෂ දූත පිරිසක් වැවිලි කර්මාන්ත අමාත්‍යාංශ පරිශ්‍රයේදී නවින් දිසානායක මහතා සමඟ විශේෂ සාකච්ඡාවකට එක් වෙමින් මේ පිළිබඳව සාකච්ඡුා කර ඇති අතර එහිදී හයිනෑං විදේශ කටයුතු හා අන්තර් ජාතික ආර්ථික සම්බන්ධතා පිළිබඳ ප්‍රධානී Jinglei han මහතා එහි මූලිකත්වය ගෙන කටයුතු කර ඇත.

Comment (0) Hits: 306

සංචාරක කර්මාන්තයට දැඩි හානි !

පසුගියදා දිවයිනේ ස්ථාන කිහිපයකටම එල්ල වූ මරාගෙන මැරෙන ත්‍රස්තවාදී බෝම්බ ප්‍රහාරයන් හමුවේ මෙම වසර තුළ පුරෝකථනය කරන ලද සංචාරක ඉපැයීම් ඩොලර් බිලියන 1.5 කින් පමණ අඩුවිය හැකි බව සංචාරක කර්මාන්තකරුවන් පවසයි.

මේ සම්බන්ධයෙන් ශ්‍රී ලංකා හෝටල් සංගමයේ සභාපති සනත් උක්වත්ත, Daily FT පුවත්පත වෙත පවසා ඇත්තේ මෙය ත්‍රස්තවාදීන් විසින් මෙරට හෝටල්වල සිටින සංචාරකයින් ඉලක්ක කර ගනිමින් ප්‍රහාරයක් සිදුකළ පළමු අවස්ථාව බවයි. මෙහි ප්‍රතිඵලයක් ලෙසින් 2019 වසර තුළ ඇස්තමේන්තු කරන ලද සංචාරක ආදායම ඩොලර් බිලියන 1.5 කින් පමණ දැවැන්ත ලෙස පහළ යා හැකි බවට ඇස්තමේන්තු කරන බව ඔහු මෙහිදී වැඩිදුරටත් කියා තිබේ.

ශ්‍රී ලංකාවේ විදේශ ඉපැයීම් ගලා එන තෙවැනි ස්ථානයට විශාලතම මූලාශ්‍රය වන්නේ සංචාරක කර්මාන්තයයි. 2018 වසරේ දී සමස්ත සංචාරක ඉපැයීම් වටිනාකම ඩොලර් බිලියන 4.4 ක් වන අතර එය 2017 වසරට වඩා 11.6% ක ඉහළ යාමක් ලෙසින් සටහන් වේ.

2019 දී ශ්‍රී ලංකාව ලොව අංක එකේ සංචාරක ගමනාන්තයක් ලෙසින් Lonely Planet විසින් නම් කරනු ලැබූ අතර මෙම වසරේ දී මිලියන 3 ක සංචාරකයින් ප්‍රමාණයක් හා ඩොලර් බිලියන 5 ක සංචාරක ආදායමක් වසර ආරම්භයේ දී ඇස්තමේන්තු කරන ලදී.

ශ්‍රී ලංකා සංචාරක හා හෝටල් කළමනාකරණ ආයතනයට අනුව දිවයිනේ සියලූම සංචාරක හෝටල්වල 135,000 සිට 150,000 ක් දක්වා පිරිසක් සෘජුව සේවය කරනු ලබන බව වාර්තා වේ.

“මේ ඇති වූ ව්‍යසනකාරී තත්ත්වය හමුවේ හෝටල්කරුවන්ට මූල්‍යමය සහන ලබා දීමට පියවර ගන්නා ලෙස මම රජයෙන් ඉල්ලා සිටිනවා. අපට අප සේවකයින්ගේ ජීවිකාවන් සම්බන්ධයෙන් කටයුතු කිරීමට එය මහත් රුකුලක් වනු ඇත“යි යනුවෙන් උක්වත්ත මහතා මෙහිදී වැඩිදුරටත් කියා තිබේ.

Comment (0) Hits: 271

ලංකා පුත්‍ර බැංකුවේ : සියලු මෙහෙයුම් අවසන් !

ලංකාපුත්‍ර සංවර්ධන බැංකුවේ සියලුම මෙහෙයුම් 2019 මාර්තු 31 සිට නවතා දමා තිබේ.

මෙහිදී ලංකාපුත්‍ර සංවර්ධන බැංකුව සතු සියලූම වත්කම් හා වගකීම්, ප්‍රාදේශීය සංවර්ධන බැංකුව විසින් ක්‍රමිකව පවරා ගනු ලැබෙන අතර 2016 අයවැය යෝජනාවකට අනුව මෙම වැඩපිළිවෙල ක්‍රියාවට නැංවේ.

ඒ අනුව ලංකාපුත්‍ර සංවර්ධන බැංකුවේ දැනට පවතින මෙහෙයුම් ඉදිරියේ දී ප්‍රාදේශීය සංවර්ධන බැංකුව යටතේ ක්‍රියාත්මක වනු ඇත.

තවද ලංකාපුත්‍ර සංවර්ධන බැංකුවේ කාර්යමණ්ඩලයෙන්, ස්වෙච්ඡාවෙන් සේවය හැරයාමට තීරණය කරන ලද සාමාජිකයින් හැරෙන්නට සෙසු සියලු දෙනා ප්‍රාදේශීය සංවර්ධන බැංකුවට අන්තර්ග්‍රහණය කිරීමට නියමිතය.

2018 දෙසැම්බර් 31 දින සිට බලපැවැත්වෙන පරිදි ලංකාපුත්‍ර සංවර්ධන බැංකුවේ සමස්ත කොටස් හිමිකාරීත්වය මහාභාණ්ඩාගාරය විසින් පවරා ගනු ලැබූ අතර ඒ සඳහා සලකා බලන ලද මිල රු. බිලියන 1.47 ක් වේ.

මේ අනුව ප්‍රාදේශීය සංවර්ධන බැංකුව විසින් මහා භාණ්ඩාගාරය වෙත නව කොටස් නිකුතුවක් සිදුකර මෙම ගනුදෙනුව පියවීමට සැලසුම් කර ඇත.

Comment (0) Hits: 367

නිල සංචිත ඩොලර් බිලියන 7.6 ක් දක්වා ඉහළට !

ජාත්‍යන්තර ස්වෛරීත්ව බැඳුම්කර සාර්ථකව නිකුත් කිරීම හේතුවෙන් රටේ දළ නිල සංචිතය මේ වන විට එක්සත් ජනපද ඩොලර් බිලියන 7.6ක් දක්වා ඉහළ ගොස් ඇතැයි ශ්‍රී ලංකා මහ බැංකුව ප්‍රකාශ කරයි.

මේ වසරේ ජනවාරි මාසයේ දී ඩොලර් බිලියන 6.2ක් වූ නිල සංචිතය මාර්තු මාසයේ දී ඩොලර් බිලියන 7.6ක් දක්වා ඉහළ නැගීමට ප්‍රධාන වශයෙන් ඩොලර් බිලියන 2.4ක ජාත්‍යන්තර ස්වෛරීත්ව බැඳුම්කර නිකුතුව සාර්ථකව සිදු කිරීම බලපා ඇති බව මහ බැංකුව කියයි.

මේ වසර ආරම්භයේ ශ්‍රී ලංකා මහ බැංකුව කල්පිරුණු ජාත්‍යන්තර වශයෙන් පැවැති බැඳුම්කර සඳහා මුදල් ගෙවීමක් සාර්ථකව සිදු කෙළේය. ඒ නිසා රටේ නිල සංචිතය ඩොලර් බිලියන 6.2 දක්වා අඩු විය.

නමුත් නැවත වතාවක් සාර්ථක බැඳුම්කර නිකුතුවක් සමඟ අරමුදල් තර කර ගැනීම නිසා සංචිතය ඉහළ ගොස් ඇත. මේ සංචිතය දළ වශයෙන් අප රටේ මාස 4.3ක ආනයනික වියදමට සමාන අගයක් ගන්නා බව ද මහ බැංකුව පවසයි.

Comment (0) Hits: 298

ක්ෂුද්‍ර මූල්‍ය පනත අහෝසියි : නව ණය නියාමන පනතක් එයි !

2016 අංක 6 දරණ ක්ෂුද්‍ර මූල්‍ය පනත අහෝසි කිරීමට රජය කටයුතු කරමින් සිටින අතර ඒ වෙනුවෙන් වන නව සන්ශෝධිත පනත් කෙටුම්පතක් මේ වන විටත් සූදානම් කෙරෙමින් ඇති බව වාර්තා වෙයි.

එය "ණය නියාමන අධිකාරී පනත (Credit Regulatory Authority Act) නමින් මාස කිහිපයක් තුල ගෙන ඒමේ සූදානමක් ඇති බවත් වාර්තා වෙයි.

මේ බව අනාවරණය වූයේ ක්ෂුද්‍ර මූල්‍ය වින්දිතයන් සුරැකීමේ සාමූහික එකතුව වෙනුවෙන් සමාජ ක්‍රියාකාරිකයෝ පිරිසක් පසුගියදා මුදල් අමාත්‍ය මංගල සමරවීර මහතා, මහබැංකු අධිපති ඉන්ද්‍රජිත් කුමාරස්වාමි මහතා, මුදල් අමාත්‍යාංශ උපදේශක මනෝ තිත්තවැල්ල ඇතුළු රජයේ ඉහළ නිලධාරීන් පිරිසක් හමුවී උද්ගත ව ඇති අර්බුදය සම්බන්ධව පැවැත්වූ සාකච්ඡාවේදීය.

රට තුළ ක්ෂුද්‍ර මූල්‍ය කර්මාන්තය සම්බන්ධයෙන් සිය දිවි නසාගැනීම් 170 ක් වාර්තා වී තිබීමත්, සදාචාර නොවන අන්දමින් ණය අය කර ගැනීම නිසා හටගෙන තිබෙන මානව ඛේදවාචකයත් මුල්කරගෙන මෙම තීරණයට එළඹුණු බව එහිදී සඳහන් විය.

Comment (0) Hits: 312

ඇමති මංගල : සංවර්ධනය සඳහා ණය 2019 සමුළුවේ !

ඉරන්ගා රොනඩා රජුගේ සෘජු ආරාධනාව මත මුදල් ඇමැති මංගල සමරවීර ශ්‍රී ලංකාව නියෝජනය කරමින් නිව්යෝර්ක් නුවර පැවැති එක්සත් ජාතීන්ගේ සංවර්ධන කටයුතු සඳහා මූල්‍ය සේවා සැපැයීමේ ආර්ථික සහ සමාජ උපදේශන සමුළුවේ මුදල් ඇමැතිවරුන්ගේ රැස්වීමට සහභාගී විය.

මෙහි දී අමාත්‍යවරයා 'පරිපූර්ණ වර්ධනය ප්‍රවර්ධනය කිරීමෙන් අසමානතාව අවම වේ' යන මාතෘකාව යටතේ මෙවර පැවැති සාකච්ඡා සභාවේ දී ශ්‍රී ලංකාව මේ සම්බන්ධයෙන් ගෙන ඇති ක්‍රියාමාර්ග විස්තර කරමින්, 2018 වසරේ මැද භාගයේ සිට විශේෂයෙන් ග්‍රාමීය ප්‍රදේශ පදනම් කරගෙන තරුණ ව්‍යවසායකයන් 100,000ක් බිහි කිරීමේ අරමුණ ඇතිව ආරම්භ කළ එන්ටර්ප්‍රයිස් ශ්‍රී ලංකා ණය වැඩසටහන ඇතුළු සංවර්ධන කටයුතු සඳහා මූල්‍ය සම්පාදනයට ගත් ක්‍රියාමාර්ග ගැන තොරතුරු බෙදාගත්තේය.

සංවර්ධනය සඳහා ණය ලබා දීම තේමාව කරගත් මෙම සමුළුවේ ප්‍රධාන කටයුත්ත වූ 'සංවර්ධනය සඳහා ණය 2019 සමුළුව' අඩිස් අබාබා ක්‍රියාකාරී න්‍යාය පත්‍රය හඳුන්වා දී මෙතෙක් ගෙවී ඇති වසර 4 ඇතුළත ලබා දී ඇති ණයවලින් ඉටු වී ඇති කාර්යභාර පසු විපරම් කිරීමට, වේගයෙන් ව්‍යාප්ත වන සහ වෙනස් වන ප්‍රතිපත්ති හමුවේ සංගණනයන් පැවැත්වීම, නැඟී එන ආර්ථික සහ ආර්ථික නොවන අවදානම්වලට එරෙහිව ගතයුතු පියවර හඳුනා ගැනීම මෙහි දී සිදුවිය.

තිරසාර සහ සාධාරණ සංවර්ධනයක් වෙනුවෙන් හඳුනාගත් අභියෝග ජය ගැනීමට ශ්‍රී ලංකාව 2019 අයවැයෙන් ගෙන ඇති පියවර අමාත්‍යවරයා මෙහි දී ගෙන හැර දැක්වීය. මූල්‍යමය බාධා සහිත ශ්‍රී ලංකාව වැනි කාලගුණික විපර්යාසවලින් බැටකන රටවල්වලට මූල්‍ය සහාය ලබා දීමේ දී අන්තර්ජාතික සහයෝගය තිරසාර සංවර්ධන ඉලක්ක ජයගැනීමේ දී ඉතා වැදගත් වන බව අමාත්‍ය සමරවීර මෙම සමුළුව හමුවේ වැඩිදුරටත් කීවේය.

මෙම සංචාරයේ දී අමාත්‍යවරයා යුනිසෙෆ් සංවිධානයේ විධායක අධ්‍යක්ෂ හෙන්රිටා එච්. ෆෝ හමුවී පූර්ව ළමා විය සංවර්ධනය සම්බන්ධ කරුණු සාකච්ඡා කළේය. එක්සත් ජාතීන්ගේ සාමය ගොඩනැඟීමේ සහායක කාර්යාලයේ ක්‍රියාකාරකම් රැසකට ද සහභාගී වූ අමාත්‍යවරයා එක්සත් ජාතීන්ගේ මහා ලේකම්වරයා ඊයේ (17දා) හමුවීමටද නියමිතව තිබිණි.

Comment (0) Hits: 274

මධ්‍යම අධිවේගයේ අදියරකට : චීනයෙන් ඩො. මිලියන 989ක සහන ණයක් !

ආර්ථික සංවර්ධනය සඳහා සෘජු දායකත්වයන් සැපයීම මෙන්ම විවිධ ආර්ථික අංශයන්හි ඵලදායීතාවය හා කාර්යක්ෂමතාවය නැංවීම හරහා වක්‍රාකාර ප්‍රතිඵලයන් ද ඇති කරන බැවින් අන්තර් සම්බන්ධතාවයන් සහිත අධිවේගී මාර්ග ජාලය ද ඇතුළුව යටිතල පහසුකම් සංවර්ධනය කිරීම සඳහා ශ්‍රී ලංකා රජය විසින් ඉහළ වැදගත්කමක් ලබා දී තිබේ.

දැනට පවතින අධිවේගී මාර්ග ජාලයට ඌන පූර්ණයක් වශයෙන් කොළඹ නගරය, කුරුණෑගල සහ මහනුවර නගරයන් සමග සම්බන්ධ කිරීමේ අරමුණ ඇතිව මධ්‍යම අධිවේගී මාර්ග ව්‍යාපෘතිය යෝජනා වී තිබේ.

කඩවත අන්තර් හුවමාරුව මගින් පිටත වටරවුම් අධිවේගී මාර්ගය අදියර 11 හා අදියර 111, කොළඹ - කටුනායක අධිවේගී මාර්ගය හා මධ්‍යම අධිවේගී මාර්ගය යන අධිවේගී මාර්ග හතර සම්බන්ධ වන කඩවත නගරයෙන් මධ්‍යම අධිවේගී මාර්ගයේ පළමු අදියර ආරම්භ වේ. ආර්ථික වශයෙන් වැදගත් වන වරාය, ගුවන්තොටුපළ හා වාණිජමය නගර සහ විවිධ පළාත් සම්බන්ධ කරමින් හම්බන්තොට සිට කටුනායක හෝ හම්බන්තොට සිට නුවර දක්වා වන නොබිඳුනු සම්බන්ධතාවයක් මෙමගින් නිර්මාණය කරනු ඇත. සමස්ථ අධිවේගී මාර්ග ජාලයෙහි අන්තර් පළාත් සම්බන්ධතාවය හා කාර්යක්ෂමතාවය මෙම යෝජිත අධිවේගී මාර්ගය මගින් වැඩිදියුණු කරනු ඇත.

ඒ අනුව, ශ්‍රී ලංකා රජය හා චීන රජය අතර ශ්‍රී ලංකාවේ යටිතල පහසුකම් සංවර්ධන ක්ෂේත්‍රයෙහි මූල්‍යමය සහයෝගීතාවය ශක්තිමත් කරමින්, කඩවත සිට මීරිගම දක්වා වන මධ්‍යම අධිවේගී මාර්ග ව්‍යාපෘතියෙහි පළමු අදියර සඳහා කොන්ත්‍රාත් මුදලින් 85%ක් ආවරණය වන පරිදි ඇ. එ. ජ. ඩො. මිලියන 989ක් වන සහනදායී ණය මුදලක් ලබා දීමට චීන අපනයන ආනයන බැංකුව එකඟ වී ඇත. ව්‍යාපෘතියේ ඇස්තමේන්තුගත මුළු වියදම (පිරිවැය) ඇ. එ. ජ. ඩො. මිලියන 1,164කි. තවදුරටත්, මෙම ණය මුදල චීන අපනයන ආනයන බැංකුව විසින් ශ්‍රී ලංකාව සඳහා අනුමත කරන ලද විශාලතම තනි ණය මුදල වේ.

දේශීය වාණිජ බැංකුවල මූල්‍යමය දායකත්වයෙන් මධ්‍යම අධිවේගී මාර්ග ව්‍යාපෘතියෙහි දෙවන අදියර ක්‍රියාත්මක කිරීම දැනටමත් ආරම්භ කර ඇති බැවින්, චීන අපනයන ආනයන බැංකුව මඟින් ලබා දෙනු ලබන මෙම ණය පහසුකම කුරුණෑගල දක්වා අධිවේගී මාර්ග ඡාලයෙහි සම්බන්ධතාවය තහවුරු කරමින් කඩවත සිට මීරිගම දක්වා වන කොටස වේගවත්ව ක්‍රියාත්මක කිරීමට පහසුකම් සලසනු ඇත.

ඒ අනුව, ශ්‍රී ලංකා රජය වෙනුවෙන් මුදල් අමාත්‍යාංශ ලේකම් ආචාර්ය ආර්. එච්. එස්. සමරතුංග සහ චීන අපනයන ආනයන බැංකුව වෙනුවෙන් ශ්‍රී ලංකාවේ පිහිටි චීන තානාපති කාර්යාලයේ, මහජන චීන සමූහාණ්ඩුවේ තානාපති, ගරු චෙනග් ෂුයුආන් (H E Cheng Xueyuan) විසින් 2019 මාර්තු මස 22 වන දින කොළඹ 01, මුදල් අමාත්‍යාංශයේදී ණය ගිවිසුම අත්සන් තබන ලදී.

 

 

 

Comment (0) Hits: 296

රුපියල ඉහළට !

මේ වසරේ ගෙවී ගිය කාලය තුළ ඇමෙරිකානු ඩොලරයට සාපේක්ෂව ශ්‍රී ලංකා රුපියලේ අගය 4.6%කින් ඉහළ ගොස් ඇත.

ශ්‍රී ලංකා මහ බැංකුව සතිපතා නිකුත් කරන දත්තවලට අනුව බ්‍රිතාන්‍යයේ ස්ටලිං පවුම්, ජපානයේ යෙන් සහ ඉන්දීය රුපියල යන මුදල් ඒකකවලට සාපේක්ෂව ද ශ්‍රී ලංකා රුපියලේ අගය ඉහළ ගොස් තිබේ.

ගෝලීය මූල්‍ය තත්ත්වය ලිහිල්වීම සහ විශේෂයෙන්ම ඇමෙරිකාව ඇතුළු දියුණු ආර්ථික සිය මුදල් ප්‍රතිපත්ති මුහුණුවර වෙනස් කිරීම හේතුවෙන් රජයේ සුරැකුම්පත් වෙළෙඳපොළ වෙත ලැබෙන විදෙස් ආයෝජන ගලාඒම් ද ඉහළ ගොස් ඇතැයි මහ බැංකුව සඳහන් කරයි.

එම වර්ධන තත්ත්ව සහ අපනයනකරුවන් ඔවුන්ගේ ඉපැයීම් රුපියල්වලට පරිවර්තනය කිරීම සහ උත්සව සමයේදී විදේශ සේවා නියුක්තිකයන්ගේ ප්‍රේෂණ ගලාඒම් ඉහළ යෑම යන කරුණු හේතුවෙන් ඇමෙරිකානු ඩොලරයට සහ අනෙකුත් මුදල් ඒකකවලට සාපේක්ෂව රුපියලේ අගය ඉහළ ගොස් ඇත.

මේ අතර ශ්‍රී ලංකා මහ බැංකුවේ අද (16) නිකුත් කළ දෛනික විනිමය අනුපාතවලට අනුව ඇමෙරිකා ඩොලරයක විකුණුම් මිල රුපියල් 176.45ක් ලෙසත් ගැනුම් මිල රුපියල් 172.61ක් ලෙසත් දැක්විණි.

Comment (0) Hits: 317

අපනයනය ඉහළට : ආනයන පහළට : අලුත් ආර්ථික දත්ත මෙන්න !

ආනයන වියදම් කැපී පෙනෙන ලෙස අඩු වීම සමඟ 2018 වසරේ දෙසැම්බර් මාසයේ දී වෙළෙඳ හිඟය පෙර වසරේ අනුරූප කාල පරිච්ඡේදයට සාපේක්ෂ ව සැලකිය යුතු ලෙස පහළ ගියේ ය. 2018 දෙසැම්බර් මාසයේ දී අපනයන වාර්ෂික පදනම මත සියයට 1.4කින් වර්ධනය වූ අතර, ආනයන සියයට 15.3කින් පහළ ගියේ ය.

2018 වසරේ දී මුළු භාණ්ඩ අපනයන එක්සත් ජනපද ඩොලර් බිලියන 11.9ක් දක්වා සියයට 4.7කින් වර්ධනය වූ අතර, ආනයන එක්සත් ජනපද ඩොලර් බිලියන 22.2ක් දක්වා සියයට 6.0ක ඉහළ යෑමක් වාර්තා කළේ ය. මේ අනුව, වෙළෙඳ හිඟය 2017 වසරේ දී වාර්තා වූ එක්සත් ජනපද ඩොලර් බිලියන 9.6ක සිට 2018 වසරේ දී එක්සත් ජනපද ඩොලර් බිලියන 10.3ක් දක්වා යම් ඉහළ යෑමක් වාර්තා කළේ ය.

2018 වසරේ දෙසැම්බර් මාසයේ දී සංචාරක ඉපැයීම් පෙර වසරේ අනුරූප කාල පරිච්ඡේදයට සාපේක්ෂ ව සියයට 4.8ක වර්ධනයක් වාර්තා කරමින් ශක්තිමත් මට්ටමක පැවති අතර, එම නිසා, 2018 වසරේ මුළු සංචාරක ඉපැයීම් එක්සත් ජනපද ඩොලර් බිලියන 4.4ක් දක්වා 2017 වසරට සාපේක්ෂ ව සියයට 11.6කින් වර්ධනය විය.

2018 වසරේ දෙසැම්බර් මාසයේ දී විදේශ සේවා නියුක්තිකයන්ගේ ප්‍රේෂණ සියයට 13 කින් පහළ යෑමත් සමඟ 2018 වසරේ දී එක්සත් ජනපද ඩොලර් බිලියන 7.0ක් දක්වා සියයට 2.1ක සුළු අඩුවීමක් වාර්තා කළේය.

2018 වසරේ දෙසැම්බර් මාසයේ දී මූල්‍ය ගිණුම තුළ, රාජ්‍ය සුරැකුම්පත් වෙළෙඳපොළෙහි සහ කොළඹ කොටස් වෙළෙඳපොළෙහි ගෙවීම් වාර්තා විය.

ප්‍රධාන වශයෙන් වෙළෙඳ ශේෂයේ ඇති වූ හිතකර වර්ධනය පිළිබිඹු කරමින් විනිමය අනුපාතිකය වෙත වූ පීඩනය 2018 වසරේ දෙසැම්බර් මස අවසානයේ දී සාපේක්ෂ ලෙස අඩු විය.

දළ නිල සංච්ත 2018 වසර අවසානයේ දී එක්සත් ජනපද ඩොලර් බිලියන 6.9 ක් විය.

press 20190313 external sector performance december 2018 s 2

press 20190313 external sector performance december 2018 s 2A

Comment (0) Hits: 342

පෞද්ගලික අංශයේ අවම මූලික වැටුපත් ඉහළට !

පෞද්ගලික අංශයේ සේවකයින්ගේ අවම වැටුප ඉහළ නැංවීම සඳහා අවශ්‍ය කටයුතු කඩිනමින් ක්‍රියාවට නැංවීමට පියවර ගන්නා බව කම්කරු අමාත්‍ය රවීන්ද්‍ර සමරවීර පවසයි.

අමාත්‍යවරයා පෙන්වා දෙන්නේ පසුගියදා අග්‍රාමාත්‍ය රනිල් වික්‍රමසිංහ මහතා සමඟ පැවති සාකච්ඡාවකදී මේ සම්බන්ධයෙන් අවසන් එකඟතාවයකට පැමිණීමට හැකි වූ බවයි.

ඒ අනුව පෞද්ගලික අංශයේ සේවකයින්ගේ අවම වැටුප ඉහළ නැංවීම සඳහා අවශ්‍ය නෛතික ක්‍රියාමාර්ග ඉදිරි සතිය තුළ ක්‍රියාත්මක කරන බව රවීන්ද්‍ර සමරවීර අමාත්‍යවරයා සඳහන් කරයි.

පෞද්ගලික අංශයේ සේවකයින්ගේ අවම වැටුප ඉහළ නැංවීම වතුකම්කරුවන්ට ද බලපාන පරිදි සිදුකිරීමට සැලසුම් කර ඇති බව රවීන්ද්‍ර සමරවීර අමාත්‍යවරයා සඳහන් කර සිටියි.

මේ අතර ජාතික කම්කරු උපදේශක සභාවේ ආරංචි මාර්ග සඳහන් කරන්නේ මේ යටතේ පෞද්ගලික අංශයේ අවම මුලික වැටුප රුපියල් 12500ක් දක්වා ඉහල යනු ඇති බවය. දැනට පෞද්ගලික අංශයේ අවම මුලික වැටුප රුපියල් 10000.00 කි.

Comment (0) Hits: 326

පාරිභෝගික අධිකාරිය ගමට යයි !

තරගකාරී වෙළෙඳපොළ තුළ පාරිභෝගික අයිතිය සුරක්ෂිත කර ගන්නා ආකාරය පිළිබඳව ගමින් ගමට ගොස් පාරිභෝගිකයන් දැනුවත් කිරීමේ වැඩසටහනක් හෙටට (15) යෙදෙන ජාත්‍යන්තර පාරිභෝගික දිනයට සමගාමීව ක්‍රියාවට නංවන බව පාරිභෝගික කටයුතු අධිකාරියේ සභාපති ආචාර්යය ලලිත් සෙනවීර පවසයි.

ජාත්‍යන්තර පාරිභෝගික අයිතීන් පිළිබඳ දිනයේ මෙවර තේමාව වන්නේ “විශ්වාසදායී සුහුරු නිෂ්පාදන“ යන්නය.

කර්මාන්ත හා වාණිජ කටයුතු සහ දිගුකාලීනව අවතැන් වූ පුද්ගලයන් නැවත පදිංචි කිරීම සහ සමූපකාර සංවර්ධන අමාත්‍ය රිෂාඩ් බදියුදීන්ගේ උපදෙස් මත මෙම වැඩසටහන ක්‍රියාත්මක කෙරේ.

තරගකාරී වෙළෙඳපොළ තුළ පාරිභෝගික අයිතිය සුරක්ෂිත කර ගන්නේ කෙසේ ද යන්න පිළිබඳවත්, “ස්මාට් නිෂ්පාදන“ පිළිබඳවත් ජනතාව දැනුවත් කිරීම මෙහි අරමුණයි. ඒ අනුව පාරිභෝගිකයන් විසින් මිලදී ගන්නා විද්යුත්, විදුලි උපකරණ, ඩිජිටල් උපකරණ සහ උපාංග සඳහා අවම මාස 06ක වගකීමක් ලබා ගැනීම, එකී වගකීම සිංහල, දෙමළ, ඉංග්‍රීසි භාෂා ත්‍රිත්වයෙන්ම මුද්‍රණය කර තිබේද යන්න විමසිලිමත්වීම, භාණ්ඩයේ නිෂ්පාදිත, අවසන් දින සහ අත්‍යාවශ්‍ය තොරතුරු වෙනස් කර ඇති සහ විකෘති කරන ලද උපකරණ උපාංග මිලදී ගැනීමෙන් වළකින ලෙස පාරිභෝගිකයින් දැනුවත් කිරීම, ස්මාට් උපකරණ (ජංගම දුරකථන, ටැබ්, ලැප්ටොප් ඇතුළු සුහුරු (ස්මාට්) නිෂ්පාදන) මිලදී ගැනීමේදී අනුගමනය කළ යුතු ක්‍රියා මාර්ග, ඔන්ලයින් ක්‍රමයට උපකරණ උපාංග මිලදී ගැනීමේදී පාරිභෝගික ආරක්ෂාව සැලසෙන්නේ කෙසේ ද යන්න පිළිබඳව දැනුවත් කිරීම මෙහිදී සිදු කෙරේ.

මෙම වැඩසටහන මාර්තු 31 වනදා දක්වා ක්‍රියාත්මක කිරීමට සැලසුම් කර ඇත.

Comment (0) Hits: 312

Page 3 of 14