V2025

ආර්ථික

පාරිභෝගික අධිකාරිය ගමට යයි !

තරගකාරී වෙළෙඳපොළ තුළ පාරිභෝගික අයිතිය සුරක්ෂිත කර ගන්නා ආකාරය පිළිබඳව ගමින් ගමට ගොස් පාරිභෝගිකයන් දැනුවත් කිරීමේ වැඩසටහනක් හෙටට (15) යෙදෙන ජාත්‍යන්තර පාරිභෝගික දිනයට සමගාමීව ක්‍රියාවට නංවන බව පාරිභෝගික කටයුතු අධිකාරියේ සභාපති ආචාර්යය ලලිත් සෙනවීර පවසයි.

ජාත්‍යන්තර පාරිභෝගික අයිතීන් පිළිබඳ දිනයේ මෙවර තේමාව වන්නේ “විශ්වාසදායී සුහුරු නිෂ්පාදන“ යන්නය.

කර්මාන්ත හා වාණිජ කටයුතු සහ දිගුකාලීනව අවතැන් වූ පුද්ගලයන් නැවත පදිංචි කිරීම සහ සමූපකාර සංවර්ධන අමාත්‍ය රිෂාඩ් බදියුදීන්ගේ උපදෙස් මත මෙම වැඩසටහන ක්‍රියාත්මක කෙරේ.

තරගකාරී වෙළෙඳපොළ තුළ පාරිභෝගික අයිතිය සුරක්ෂිත කර ගන්නේ කෙසේ ද යන්න පිළිබඳවත්, “ස්මාට් නිෂ්පාදන“ පිළිබඳවත් ජනතාව දැනුවත් කිරීම මෙහි අරමුණයි. ඒ අනුව පාරිභෝගිකයන් විසින් මිලදී ගන්නා විද්යුත්, විදුලි උපකරණ, ඩිජිටල් උපකරණ සහ උපාංග සඳහා අවම මාස 06ක වගකීමක් ලබා ගැනීම, එකී වගකීම සිංහල, දෙමළ, ඉංග්‍රීසි භාෂා ත්‍රිත්වයෙන්ම මුද්‍රණය කර තිබේද යන්න විමසිලිමත්වීම, භාණ්ඩයේ නිෂ්පාදිත, අවසන් දින සහ අත්‍යාවශ්‍ය තොරතුරු වෙනස් කර ඇති සහ විකෘති කරන ලද උපකරණ උපාංග මිලදී ගැනීමෙන් වළකින ලෙස පාරිභෝගිකයින් දැනුවත් කිරීම, ස්මාට් උපකරණ (ජංගම දුරකථන, ටැබ්, ලැප්ටොප් ඇතුළු සුහුරු (ස්මාට්) නිෂ්පාදන) මිලදී ගැනීමේදී අනුගමනය කළ යුතු ක්‍රියා මාර්ග, ඔන්ලයින් ක්‍රමයට උපකරණ උපාංග මිලදී ගැනීමේදී පාරිභෝගික ආරක්ෂාව සැලසෙන්නේ කෙසේ ද යන්න පිළිබඳව දැනුවත් කිරීම මෙහිදී සිදු කෙරේ.

මෙම වැඩසටහන මාර්තු 31 වනදා දක්වා ක්‍රියාත්මක කිරීමට සැලසුම් කර ඇත.

Comment (0) Hits: 368

ව්‍යාජ ඊ මේල් එකක් ගැන මහ බැංකුවෙන් නිවේදනයක් !

ව්‍යාජ විද්‍යුත් තැපැල් පණිවුඩයක් පිළිබඳව ශ්‍රී ලංකා මහ බැංකුව මහජනතාව දැනුවත් කරමන් නිවේදනයක් නිකුත් කරයි.
 
උපුටා ගැනීම.
 
Notice from Central Bank of Sri Lanka EPF“ යන මැයෙන් ශ්‍රී ලංකා මහ බැංකුවේ සේවක අර්ථසාධක අරමුදල් දෙපාර්තමේන්තුව නමින් ව්‍යාජ  ලෙස පෙනී සිටිමින් ප්‍රධාන වශයෙන්  ශ්‍රී ලංකාවේ මූල්‍ය ආයතන ඉලක්ක කරමින් වංචනික විද්‍යුත් තැපැල් පණිවිඩ හුවමාරු වෙමින් පවතින බවට ශ්‍රී ලංකා මහ බැංකුවට වාර්තා වී ඇත.
 
ශ්‍රී ලංකා මහ බැංකුවේ අර්ථසාධක අරමුදල් දෙපාර්තමේන්තුව විසින් එවන් කිසිදු දැනුම්දීමක් කිසිදු අයුරකින් හෝ සිදු කර නොමැති බව මහජනතාව සහ මූල්‍ය ආයතන වෙත දැනුම් දීමට කැමැත්තෙමු. තව ද, මෙවන් වංචනික විද්‍යුත් තැපැල් පණිවිඩ සම්බන්ධයෙන් අවදියෙන් සිටින මෙන් ශ්‍රී ලංකා මහ බැංකුව මහජනතාවගෙන් හා මූල්‍ය ආයතන වෙතින් ඉල්ලා සිටින අතර “Notice from Central Bank of Sri Lanka EPF“ යන මැයෙන් ඔබ වෙතට පැමිණෙනු ලබන සැක කටයුතු විද්‍යුත් තැපැල් පණිවිඩ හෝ එහි ඇමුණුම් හෝ ඊට අදාළ සම්බන්ධක (Links) විවෘත කිරීමෙන් වළකින මෙන් අවවාද කර සිටිමු.
Comment (0) Hits: 430

බදු ගැන ලොකු කතා බොරු : ලංකාවේ බදු එකතු කිරීම සමාජවාදී වියට්නාමයටත් වඩා සහනදායි !

ආණ්ඩුවේ බදු ප්‍රතිපත්තිය ජනතාව මත බදු පිට බදු පණවන්නක් බවට එල්ල කෙරෙන ප්‍රකාශ සාවද්‍ය බවත් පටු දේශපාලන වාසි අපේක්ෂාවෙන් එල්ලකෙරෙන මෙම චෝදනා හේතුවෙන් ලංකා ආර්ථිකයට අහිතකර බලපෑමක් සිදුකරන බව මුදල් අමාත්‍යංශ ආරංචිමාර්ග සඳහන් කරයි.

එම ආරංචිමාර්ග පෙන්වා දෙන්නේ කලාපයේ රටවල් අතර ලංකාවේ බදු ප්‍රතිපත්තිය ජනතාවට සහනදායි වන බවත් වක්‍ර බදු අඩුකර සෘජු බදු වැඩිකර ගැනීමේ ප්‍රතිපත්තිය තුළ පොදු ජනතාවට ඉමහත් සහනයක් හිමිවන බවයි.

ලංකාවේ පෞද්ගලික බදු අයකිරීම කලාපයේ අනෙක් රටවලට සාපේක්ෂව අඩු බව තහවුරු කරමින් මුදල් අමාත්‍යංශ ආරංචිමාර්ග පහත දත්ත අනාවරණය කරයි.

Capture001

ඒ අනුව කාම්බෝජය හැර මියෙන්මාරය, ඉන්දුනීසියාව , මැලේසියාව, වියට්නාමය, තායිලන්තය සහ ඉන්දියාව යන රටවල් පුද්ගලික බදු ගණනයේදී ලංකාවට සාපේක්ෂව ඉහළ අගයක් ගෙන තිබේ. එසේම මුදල් අමාත්‍යංශ ආරංචිමාර්ග පෙන්වා දෙන්නේ සමාජවාදී රටක් බව කියන වියට්නාමය සමඟ සැසඳීමේදී ලංකාව සමාජ වෙළඳපොල ආර්ථිකයක් ලෙස ඉතා සහනදායි බදු ප්‍රතිශතයක් සහිත රටක් බව තහවුරු වන බවද එම ආරංචිමාර්ග දක්වයි.

සමාගම් බදුත් ලංකාවේ අඩුයි !

මේ අතර එම ආරංචිමාර්ග වැඩිදුරටත් සඳහන් කර සිටින්නේ කලාපයේ වෙනත් රටවලට සාපේක්ෂව ලංකාවේ සමාගම් බදු ප්‍රතිශතයද ඉතා පහල අගයක් ගන්නා බවය. නමුත් ලංකාවේ දේශපාලනය දුරදිග සිතා බැලීමකින් තොරව බදු ප්‍රතිපත්තිය සම්බන්ධව සිදුකරන විවේචන හේතුවෙන් සමාගම් සහ ආයෝජකයන් සැකයෙන් මේ දෙස බලන බවත් ඒ හේතුවෙන් ආර්ථිකය ප්‍රසාරණය කරගැනීම පවා දුෂ්කරව ඇති බවද එම ආරංචිමාර්ග වැඩිදුරටත් පෙන්වාදෙයි.

එසේම ලංකාවේ කුඩා සහ මධ්‍ය පරිමාණ ව්‍යාපාර වෙතින් අයකරනු ලබන්නේ 14%ක සමාගම් බද්දක් බවත් තවද සංචාරක, තොරතුරු තාක්ෂණ හා කෘෂි කර්මාන්තය සහ සියලු අපනයන සමාගම් වෙතින් අයකරන්නේ 14%ක බදු මුදලක් බවද මුදල් අමාත්‍යංශ ආරංචිමාර්ග අවධාරණය කරයි.

මංගල සමරවීර මුදල් අමාත්‍යවරයා මෙසේ 14%ක් තරම් අඩු බදු ප්‍රතිශතයක් හඳුන්වාදී ඇත්තේ අපනයන වෙළඳපොල ශක්තිමත් කිරීමට සහ කුඩා සහ මධ්‍ය පරිමාණ ව්‍යවසායකයන්ට ඉහළට ඒමට අවස්ථාවක් සැළසීම වෙනුවෙන් බවද එම ආරංචිමාර්ග තවදුරටත් සඳහන් කරයි.

ඒ සම්බන්ධව තහවුරු කරගැනීමට අමාත්‍යංශ ආරංචිමාර්ග පහත නිදර්ශනය දක්වයි.

Capture002

Comment (0) Hits: 374

මහ බැංකුව බිලියන 90ක භාණ්ඩාගාර බිල්පත් නිකුත් කරයි !

ශ්‍රී ලංකා මහ බැංකුව විසින් මේ වසරේ ගත වූ කාලය තුළ රුපියල් බිලියන 90ක භාණ්ඩාගාර බිල්පත් නිකුත් කර තිබේ.

ශ්‍රී ලංකා මහ බැංකුව නිවේදනයක් නිකුත් කරමින් සදහන් කළේ භාණ්ඩාගාරයේ ඉල්ලීම මත මෙම භාණ්ඩාගාර බිල්පත් නිකුත් කර ඇති බවයි.

විදෙස් රටවලින් ලබාගෙන ඇති ණය සහ පොලිය ගෙවීම සඳහා මෙම භාණ්ඩාගාර බිල්පත් යොදා ගැනීමට පියවර ගෙන ඇති බව මහ බැංකුව සඳහන් කළේය.

ජාතික වශයෙන් වැදගත් සුවිශේෂි අවස්ථාවන් වලදී භාණ්ඩාගාරයේ ඉල්ලීම මත භාණ්ඩාගාර බිල්පත් නිකුත් කිරිමට මුදල් මණ්ඩලය බැදී සිටින බව මහ බැංකුව පෙන්වා දෙයි.

මෙලෙස නිකුත් කර ඇති භාණ්ඩාර බිල්පත් වලින් කොටසක් ලබන මාසයේදී ආපසු ගෙවීමට රජය එකඟවී ඇති බව ද මහ බැංකුව නිකුත් කළ නිවේදනයේ සඳහන්ය.

මේ අතර ජනවාරි මස 31 වන දිනට ප්‍රථම තවත් ඇමෙරිකානු ඩොලර් මිලියන 500ක පමණ මුදලක් විදෙස් ණය සහ පොලිය ලෙස ගෙවීමට රජයට සිදුව තිබේ.

පසුගිය 14 වන දින ද රජය විසින් ඇමෙරිකානු ඩොලර් බිලියනයක මුදලක් විදෙස් ණය සහ පොලිය වශයෙන් ගෙවීම සිදු කළේය.

Comment (0) Hits: 466

ඔබේ දරුවාගේ ගිණුමේ : මිලියන 1.2 ට වඩා තැන්පතු නැත්නම් බදුත් නෑ !

සියලුම ළමා ගිණුම්වලින් අයවැය යෝජනා හරහා බදු මුදල් අයකරන්නට එක්සත් ජාතික පෙරමුණ ආණ්ඩුව කටයුතු කරන බවට පළවන පුවත සාවද්‍ය බව මුදල් අමාත්‍යංශ ආරංචිමාර්ග තහවුරු කරයි.

මෙම ළමා ගිණුම් ආශ්‍රිත බදු අයකිරීම සම්බන්ධව පළවන පුවත් සම්බන්ධව සිදුකළ විමසීමකදී මුදල් අමාත්‍යංශයේ ඉහළ නිලධාරියෙකු මේ බව අවධාරණය කර සිටියේය.

එහිදී ඔහු පෙන්වා දුන්නේ ළමා ගිණුම් ආශ්‍රිත බදු ගණනය කිරීම සිදුවන්නේ මාසික පොලිය රුපියල් 5000ට වැඩි ගිණුම් වලින් පමණක් වන බවය. ඒ බව වැඩිදුරටත් සඳහන් කරමින් එම නිලධාරියා පැහැදිළි කර සිටියේ මාසික පොළී ආදායම රුපියල් 5000 කට වඩා වැඩිවීමට නම් අදාළ ළමා ගිණුමේ තැම්පත් මුදල රුපියල් මිලියන 1.2ක් වත් තිබිය යුතු බවය.

මෙරට සාතිශය බහුතරයක් ජනතාවගේ දරුවන් සතුව රුපියල් මිලියන 1.2 ට වැඩි තැම්පත් නොමැති බවත් එතරම් මුදලක් නොමැති ළමා ගිණුම් වල පොළිය මත බදු පැනවීමක් සිදුනොවන බවද ඔහු පැවසීය. එසේම ඔහු වැඩිදුරටත් සඳහන් කර සිටියේ ඉතාම ඉහළ ආදායම් ඇති පාර්ශවයන් වෙතින් පමණක් අයකරන මෙම බදු මුදල සම්බන්ධව සාවද්‍ය පුවත් වාර්තා වලට නොරැවටෙන ලෙසත් මේ වන විට බදු ප්‍රතිපත්තිය සකස්කර ඇත්තේ වක්‍ර බදු අඩුකර සෘජු බදු වැඩි කිරීම බැවින් සාමාන්‍ය ජනතාවට බදු බර සම්බන්ධ අනවශ්‍ය බියක් ඇතිකර නොගත යුතු බවය.

Comment (0) Hits: 587

බහුමාදිලි ප්‍රවාහන මධ්‍යස්ථානයක් බත්තරමුල්ලට

මහනගර හා බස්නාහිර සංවර්ධන අමාත්‍යංශයේ මහනගර වියාපෘතියක් ලෙස සුපිරි වෙළඳ සංකීර්ණයක් ද සහිත බහුමාදිලි ප්‍රවාහන මධ්‍යස්ථානයක් Multimodal Transportation Hub බත්තරමුල්ල ප්‍රදේශයේ ඉදිකිරීමට රජය තීරණය කර ඇත.

එම බහුමාදිලි ප්‍රවාහන මධ්‍යස්ථානය ඉදිකිරීමේ ටෙන්ඩරය ‘ඒසර් ’ නමැති ඩුබායි සමාගමකට පැවරීමට පසුගියදා පැවැති කැබිනට් රැස්වීමේදී අනුමැතිය ලබා දී තිබේ.

මහනගර හා බස්නාහිර සංවර්ධන අමාත්‍යාංශය විසින් ටෙන්ඩර් කැඳවා අදාළ ඩුබායි සමාගම තෝරාගෙන ඇත.

ඒ සඳහා කැබිනට් සංදේශය අමාත්‍ය මණ්ඩලය වෙත ඉදිරිපත් කරන ලද්දේ මහනගර හා බස්නාහිර සංවර්ධන ඇමැති පාඨලී චම්පික රණවක මහතා විසිනි.

පෞද්ගලික ආයෝජනයක් ලෙස මෙම බහුමාදිලි ප්‍රවාහන මධ්‍යස්ථානය ඉදිකෙරෙන අතර ආයෝජනය කෙරෙන මුදල රුපියල් කෝටි 400ක් පමණ වේ.

Comment (0) Hits: 442

සමුපකාරය පාසලට ගෙනෙන : ඇමති රිෂාඩ්ගේ "නැණ ශක්ති" ඇරඹේ !

පාසල් සමූපකාර සමිති ආරම්භ කිරීම සහ සමූපකාර අලෙවිසැල් පිහිටුවීම සඳහා මූලාධාර ලබාදීමේ "නැණ ශක්ති" වැඩසටහන කර්මාන්ත හා වාණිජ කටයුතු, දිගුකාලීනව අවතැන්වූ පුද්ගලයන් නැවත පදිංචි කිරීම සහ සමූපකාර සංවර්ධන අමාත්‍ය රිෂාඩ් බදියුදීන්ගේ ප්‍රධානත්වයෙන් කොළඹ, වොක්ෂෝල් වීදිය, කර්මාන්ත හා වාණිජ කටයුතු අමාත්‍යාංශ ශ්‍රවණාගාරයේ දී අද (26) පැවැත්විණි.

මෙම ව්‍යාපෘතිය යටතේ එක් පාසලකට රුපියල් ලක්ෂ 05ක මුදලක් පිරිනැමේ. පාසලේ 6 සිට 13 ශ්‍රේණි දක්වා සිසුන්ගේ සහභාගීත්වයෙන් පාසල් සමූපකාර සමිති පිහිටුවනු ඇත.

මෙම අවස්ථාවට කර්මාන්ත හා වාණිජ කටයුතු අමාත්‍යාංශයේ ලේකම්. කේ.ඩී රංජිත් අශෝක, සමුපකාර කොමසාරිස් එස්.එල්. නසීර්. සමූපකාර නායකයන්, පාසල් සිසුන් ඇතුළු පිරිසක් සහභාගී වූහ.

52744529 10212486283981690 1321892613317459968 n

Comment (0) Hits: 386

ඉතුරුම් ගිණුම් පොළිය මත රදවා ගැනීමේ බදු සීමාව ඉහළ දමයි !

ජ්‍යෙෂ්ඨ පුරවැසියන්ගේ ඉතුරුම් ගිණුම්හි පොලිය මත අයකළ රඳවා ගැනීමේ බදු සීමාව ඉහළ නංවාලීමට මුදල් හා ජනමාධ්‍ය අමාත්‍යාංශය කටයුතු කර ඇත.

ජ්‍යෙෂ්ඨ පුරවැසියන්ගේ ඉතිරිකිරීම් ගිණුම් වලට ලැබෙන මාසික පොලී ආදායම රුපියල් 125000 දක්වා වන තෙක් රඳවා ගැනීමේ බද්දෙන් නිදහස් කර තිබූ අතර එය පොලී ආදායම රුපියල් 250,000 දක්වා දෙගුණයක් බවට පත්කර තිබෙන බවද මුදල් අමාත්‍යාංශය සඳහන් කරයි.

ඒ අනුව ජ්‍යෙෂ්ඨ පුරවැසියන්ගේ ඉතුරුම් ගිණුම්වලට සියයට 5 ක් වන රඳවා ගැනීමේ බද්ද අයකරනු ලබන්නේ මාසික පොලී ආදායම රුපියල් 250,000 වඩා වැඩි වුවහොත් වැඩිවන ප්‍රමාණයට පමණක් වන බවද එම අමාත්‍යාංශය කියයි.

ඇතැම් රාජ්‍ය ආයතනවල හා පෞද්ගලික ආයතනවල සේවකයින් විශ්‍රාම යෝජනා ක්‍රම යටතේ විශ්‍රාම ගන්නා අතර එහිදී ඔවුන්ට ලැබෙන මුදල් ඉතිරිකිරීමේ ගිණුමක තැන්පත් කිරීමට වැඩි අවස්ථාවක් සලසාදීමේ අරමුණින් එම පියවර ගත් බවද මුදල් අමාත්‍යාංශය කියයි.

රඳවා ගැනීමේ නව බදු සීමාවන් අප්‍රේල් මස 01 වැනිදා සිට ක්‍රියාත්මක කෙරේ.

Comment (0) Hits: 452

ඊළඟ අයවැයෙන් පොහොර මිටිය නොමිලේ !

මෙවර අයවැය යෝජනා අනුව, රුපියල් තුන්දහස් අටසියයක් වටිනා පොහොර මිටිය මුදල් අයකිරීමකින් තොරව නොමිලේ ලබාදීමට රජය යෝජනා කර ඇති බව ඇමැති පී හැරිසන් මහතා පාර්ලිමේන්තුවේ දී ඊයේ(21) ප්‍රකාශ කළේය.

දැනට මෙම පොහොර මිටිය රුපියල් තුන්දහස් තුන්සියයක සහනාධාරයක් යටතේ රුපියල් පන්සියයට ලබාදෙන බවත් පොහොර සහනාධාරය කප්පාදු කිරීමට රජය කටයුතු කර නොමැති බවත් ඇමැතිවරයා සඳහන් කළේය.

වත්මන් රජය පොහොර සහනාධාරය කප්පාදු කර ඇති බවට වැරදි මතවාදයක් සමාජ ගත කරන්න ඇතැමුන් උත්සාහ කළ ද වත්මන් රජය කිසිසේත් පොහොර සහනාධාරය කප්පාදු කර නොමැති බවත් ඇමැතිවරයා සඳහන් කළේය.

ඇමති පී. හැරිසන් මහතා මේ බව සඳහන් කළේ විපක්ෂ නායක මහින්ද රාජපක්ෂ මහතා 27/2 යටතේ මතු කළ ප්‍රශ්නයකට පිළිතුරු දෙමිනි.

Comment (0) Hits: 510

ගෑස් මිලේ වැඩිවීමක් නෑ - පාරිභෝගික කටයුතු අධිකාරියේ අධ්‍යක්ෂ ජනරාල් !

ගෑස් මිල වැඩිකරන ලෙසට ගෑස් බෙදාහරින සමාගම් ඉල්ලීමක් සිදුකල පමණින් මිල වැඩිකිරීමක් ලබාදිය නොහැකි බවත් ඊට පෙර ඉල්ලීමට බලපා ඇති සාධක සම්බන්ධව තවදුරටත් සලකා බැලීමට අවශ්‍ය බව පාරිභෝගික කටයුතු අධිකාරියේ අධ්‍යක්‍ෂ ජනරාල් එම්. එච්. එම්. තවුසර් පවසයි.

කිලෝ ග්‍රෑම් 12.5 ක් වන ගෘහස්ථ ගෑස් සිලින්ඩරයක මිල රුපියල් 359 කින් ඉහළ දමන ලෙසට ගෑස් බෙදාහරින සමාගම් දෙකක් පාරිභෝගික කටයුතු අධිකාරියෙන් කර ඇති ඉල්ලීම සම්බන්ධයෙන් විමසූ අවස්ථාවේ ඔහු මේ බව සඳහන්කර ඇත.

මෙහිදී තවදුරටත් කතා කළ අධ්‍යක්‍ෂ ජනරාල්වරයා මෙසේ ද පවසා ඇත.

එක පාරටම ගෑස් මිල වැඩිකරන්න අපි තීරණයක් දෙන්නේ නැහැ. ඉස්සෙල්ලම ගෑස් මිල වැඩි කිරීම සම්බන්ධව සොයා බැලිය යුතු සාධක පෙළක් තියෙනවා. ඒ සාධක ගැන සලකා බැලීමෙන් පසුවයි ගෑස් මිල වැඩි කරනවාද නැද්ද තීරණය කරන්නේ. කොහොම වුණත් ලෝක වෙළෙඳපොළේ තියෙන තත්ත්වය අනුව ගෑස් මිල වැඩිවීමක් වෙන්නේ නැහැ.

වර්තමානයේ ගෘහස්ථ ගෑස් සිලින්ඩරයක (කිලෝ ග්‍රෑම් 12.5) මිල රුපියල් 1733 කි. එම මිල රුපියල් 359 කින් වැඩි කළහොත් ගෘහස්ථ ගෑස් සිලින්ඩරයක මිල රුපියල් 2092 ක් දක්වා ඉහළ යනු ඇත.

Comment (0) Hits: 409

ATM යන්ත්‍රවලින් මුදල් ගන්නා විට පරික්ෂාකාරී වෙන්න !

පසුගිය දින කිහිපය පුරා කොළඹ ප්‍රදේශ කිහිපයකින් ව්‍යාජ කාඩ්පත් භාවිතයෙන් ATM යන්ත්‍ර මගින් මුදල් සොරා ගැනීම් වාර්තා විය.

කොල්ලුපිටිය, බොරැල්ල, දෙහිවල, යුනියන් පෙදෙස, වැල්ලවත්ත සහ පානදුර යන ප්‍රදේශවලින් එම සිදුවීම් වාර්තා වී තිබිණි.

මෙම සිදුවීම් ගැන බීබීසී සිංහල සේවය කළ විමසීමකදී අදහස් දැක්වූ ශ්‍රී ලංකාවේ ජාතික ගෙවීම් ජාලය (National Payment Network) හසුරුවනු ලබන ලංකා ක්ලියර් පුද්ගලික සමාගමේ සාමාන්‍යාධිකාරී චන්න ද සිල්වා කියා සිටියේ, "මෙම තත්ත්වය ගැන අපි දැනුවත්. අපි ගනුදෙනුකරුවන්ගෙන් ඉල්ලා සිටින්නේ සැම විට ම ATM යන්ත්‍රවලින් මුදල් ගන්නා විට පරීක්ෂාකාරී විය යුතුයි," යනුවෙනි.

මෙවැනි සොරකම් වළක්වා ගැනීමට ගත හැකි පියවර:

Chip සහිත බැංකු සහ ණය කාඩ්පත්වලට මාරු වීම
ATM යන්ත්‍ර භාවිත කරන විට රහස් අංකය අතින් ආවරණය කර ගැනීම
ක්ෂණික SMS සඳහා බැංකු සමග ලියාපදිංචි වීම

"මෙවැනි ම තත්ත්වයක් 2017 අප්‍රේල් මාසයේදීත් වාර්තා වුණා. විශේෂයෙන් ම දිගු සති අන්තවල තමයි මේ ආකාරයේ තාක්ෂණ භාවිතයෙන් සිදු වන මුදල් සොරකම් කිරීම් වාර්තා වන්නේ. අපි සියලු දෙනාගෙන් ඉල්ලා සිටිනවා විශේෂයෙන් සති අන්තවල විමසිල්ලෙන් සිටින ලෙස," ජාතික ගෙවීම් ජාලයේ සාමාන්‍යාධිකාරී චන්න ද සිල්වා වැඩිදුරටත් කීය.

01

සංවිධාත්මකව ක්‍රියා කරන මෙම වංචනික කණ්ඩායම් ත්‍රිමාණ මුද්‍රණ තාක්ෂණය භාවිත කර ඉතා සූක්ෂම ලෙස කාඩ්පත් 'ක්ලෝන් කර' තිබෙන බවත් ඔහු පැවසීය.

එසේ ම මහ බැංකුව මේ වන විට සියලු බැංකුවලට තම පැරණි ATM යන්ත්‍ර, EMV (Euro Mater and Visa) තාක්ෂණයට යාවත්කාලීන කරන ලෙස දැනුම් දී ඇත.

"යම් කාඩ්පත් හිමියෙකුගේ ගිණුමෙන් මුදල් සොරකම් කර ඇතැයි හැඟී ගියහොත් වහා ම තම බැංකුව දැනුවත් කළ යුතුයි. එවිට එම ATM යන්ත්‍රයේ හිමිකාර බැංකුව බැඳී සිටිනවා ගනුදෙනුකරුට අහිමි වූ මුදල නැවත ලබා දීමට", චන්න ද සිල්වා හෙළි කළේය.

පොලිස් පරීක්ෂණ

පොලිසිය පැවසුවේ, මෙම සිදුවීම් සම්බන්ධයෙන් දැනට විදේශිකයින් තිදෙනෙකු අත්අඩංගුවට ගෙන බන්ධනාගාරගත කර ඇති බවය.

ඉන් දෙදෙනෙක් චීන ජාතිකයින් වන අතර ඔවුන් දෙදෙනා කොටුව මහේස්ත්‍රාත් අධිකරණය මගින් රක්ෂිත බන්ධනාගාරගත කළ බව පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර බීබීසී සිංහල සේවය සමග පැවසීය.

ඔවුන් දෙදෙනා අත්අඩංගුවට ගෙන තිබුණේ, ජනවාරි මස 20 සහ 21 දිනයන්හිදීය.

අනෙක් සැකකරු රුමේනියානු ජාතිකයෙකු බවත් ඔහු පානදුර මහේස්ත්‍රාත් අධිකරණයට ඉදිරිපත් කිරීමෙන් පසු පෙබරවාරි 18 වන දා දක්වා රක්ෂිත බන්ධනාගාරගත කළ බවත් පොලිස් අධිකාරී රුවන් ගුණසේකර පැවසීය.

මේ පිළිබඳව පරීක්ෂණ පවත්වන අපරාධ පරීක්ෂණ දෙපාර්තමේන්තුව සැකකරුවන් සතුව තිබී ව්‍යාජ කාඩ්පත් 200කට අධික සංඛ්‍යාවක්, කාඩ්වල තොරතුරු සොරා ගැනීමට උපයෝගී කර ගන්නා උපකරණ 3ක් සහ රුපියල් ලක්ෂ 12ක මුදලක් ද සොයා ගෙන ඇත.

(බීබීසී)

Comment (0) Hits: 441

2021 රාජ්‍ය ආදායම : දළ දේශීය නිෂ්පාදිතයෙන් 17% කට වඩා වැඩිකරන්න මංගල වැඩ

2019 වර්ෂය සඳහා වන විසර්ජන පනත් කෙටුම්පත 2018 ඔක්තෝබර් 09 වන දින පාර්ලිමේන්තුවට ඉදිරිපත් කරන ලද අතර, පාර්ලිමේන්තුව වාර අවසාන කරන ලද බැවින්, එකී පනත් කෙටුම්පත සඳහා පාර්ලිමේන්තුවේ අනුමැතිය ලබා ගැනීමට නොහැකි විය.

ව්‍යවස්ථාපිත ප්‍රතිපාදන අනුව නව විසර්ජන පනත් කෙටුම්පත නැවත ඉදිරිපත් කර අනුමැතිය ලබාගන්නා තෙක් 2019 වර්ෂයේ මුල් මාස 4 ක කාලසීමාව වෙනුවෙන් වන රජයේ වියදම් ආවරණය කරගැනීම පිණිස අතුරු සම්මත ගිණුමකත් 2018 දෙසැම්බර් 21 වන දින පාර්ලිමේන්තුවට ඉදිරිපත් කරන ලද අතර එදිනම එය පාර්ලිමේන්තුව විසින් සම්මත කරන ලදී.

ඒ අනුව අතුරු සම්මත ගිණුම මගින් ආවරණය කරනු ලබන 2019 වර්ෂයේ මුල් මාස 04 සඳහා වන වියදම්ද ඇතුළත් කරමින්, 2019 වර්ෂය සඳහා නව විසර්ජන පනත් කෙටුම්පතක් පාර්ලිමේන්තුවට ඉදිරිපත් කර සම්මත කර ගත යුතුවේ.

ඒ අනුව, 2019 වර්ෂය සඳහා වන ජාතික අයවැය, දැනට සිදු කෙරෙමින් පවතින රාජ්‍ය මූල්‍ය ඒකාග්‍රතා වැඩසටහන ශක්තිමත් කිරීමේ අරමුණින් සහ 2021 වර්ෂය වන විට අත්පත් කරගැනීමට සැලසුම් කර ඇති පහත සඳහන් මධ්‍යකාලීන රාජ්‍ය ඉලක්ක සාක්ෂාත් කරගත හැකි වන පරිදි පිළියෙල කිරීම පිණිස මුදල් හා ජනමාධ්‍ය අමාත්‍ය මංගල සමරවීර මහතා ඉදිරිපත් කළ යෝජනාව අමාත්‍ය මණ්ඩලය අනුමත කරන ලදී.

1. රජයේ ආදායම දළ දේශීය නිෂ්පාදිතයෙන් 17% කට වඩා වැඩි කිරීම.
2. රජයේ ප්‍රනරාවර්තන වියදම් දළ දේශීය නිෂ්පාදිතයෙන් 15% ක ප්‍රතිශතයකට සීමා කිරීම.
3. රජයේ ආයෝජන දළ දේශීය නිෂ්පාදිතයෙන් 5.5% ක ප්‍රතිශතයක පවත්වාගෙන යාම.
4. අයවැය හිඟය දළ දේශීය නිෂ්පාදිතයෙන් 3.5%ක ප්‍රතිශතයකට සීමා කිරීම.
5. නොපියවූ රාජ්‍ය ණය දළ දේශීය නිෂ්පාදිතයෙන් 70%ක ප්‍රතිශතයකට වඩා අඩුවෙන් පවත්වාගෙන යාම.

Comment (0) Hits: 404

රුපියල ශක්තිමත් වෙයි !

2019 වසරේ ජනවාරි මස 28 වැනි දින දක්වා කාලපරිච්ඡේදය තුළ දී ශ්‍රී ලංකා රුපියල, එක්සත් ජනපද ඩොලරයට සාපේක්ෂව සියයට 0.6 කින් අතිප්‍රමාණය වී ඇති බව ශ්‍රී ලංකා මහ බැංකුවේ නවතම වාර්තාවක සඳහන් වේ.

මෙහිදී අනෙකුත් විදේශ ව්‍යවහාර මුදල්වල හැසිරීම පිළිබිඹු කරමින් මෙම කාලපරිච්ඡේදය තුළ දී ශ්‍රී ලංකා රුපියල, යූරෝ හා ඉන්දියානු රුපියලට සාපේක්ෂව ද අතිප්‍රමාණය වූ අතර අනෙකුත් ප්‍රධාන ව්‍යවහාර මුදල් ඒකකවලට සාපේක්ෂව අවප්‍රමාණය වී තිබේ.

2018 වසර තුළ දී ශ්‍රී ලංකා රුපියල එක්සත් ජනපද ඩොලරයට සාපේක්ෂව සියයට 16.4 කින් අවප්‍රමාණය වූ අතර, අනෙකුත් ප්‍රධාන මුදල් ඒකකවලට සාපේක්ෂව ද අවප්‍රමාණය වූ බව මෙම වාර්තාවේ වැඩිදුරටත් සඳහන් වේ.

(දෙරණ)

press 20190128 external sector performace 2018 november s 11

press 20190128 external sector performace 2018 november s 11A

Comment (0) Hits: 463

ෆිෆ්ටි කේ ඕකිඞ් සුපිරි අවන්හල විවෘත වෙයි !

වෝටර්ස් ඒජ් ආයතනයේ ෆිෆ්ටි කේ ඕකිඞ් සුපිරි අවන්හල විවෘත කිරීම පසුගියදා සිදුවූ අතර රාජ්‍ය ආයතන 100ක් පමණ එම පරිශ්‍රය ආසන්නයට ගෙන ඒමට අපේක්ෂා කරන බව මහානගර හා බස්නාහිර සංවර්ධන අමාත්‍ය පාඨලී චම්පික රණවක එහිදී පැවසීය.

චම්පික රණවක අමාත්‍යවරයාගේ සංකල්පයකට අනුව ඉදිකෙරුණු එම අවහන්හල අග්‍රාමාත්‍ය රනිල් වික්‍රමසිංහ ගේ ප්‍රධානත්වයෙන් අමාත්‍ය රාජිත සේනාරත්න, අමාත්‍ය මංගල සමරවීර යන මැති ඇමතිවරුන්ගේ සහභාගීත්වයෙන් සිදු කෙරුණි.

තවද ලංකාවේ ප්‍රධාන පෙලේ ව්‍යාපාරිකයින් වන ධම්මික පෙරේරා, ඩබ්.කේ.එස්. වෑගපිටිය, අශෝක පතිරගේ, සුමල් පෙරේරා, අස්ගි අක්බර් අලී, රාසි පෙස්තන්ජි යන මහත්වරුන්ද සහභාගී විය.

එහිදී අදහස් දැක්වූ අමාත්‍යවරයා, අද වෝටර්ස් ඒජ් ආයතනයට අද අලුත් අංගයක් එකතු කළා. ඒ තමයි මේ ඕකිඞ් උද්‍යානය. 50,000 ක් ඕකිඞ් මල් සහිත මේ උද්‍යානය විශේෂයෙන්ම විවාහ අපේක්‍ෂාවෙන් සිටින, මංගල උත්සව සඳහා සුවිශේෂී ස්ථානයක් බවට අනාගතයේ පරිවර්ථනය වනවා ඇති. මෙම ආයතනය රජය සතු ආයතනයක් උවත් රටේ අනෙකුත් ඕනම පෞද්ගලික මට්ටමේ පවත්වාගෙන යන හෝටල් සංකීර්ණවලට තරඟයක් දෙන්න පුලුවන් ආකාරයේ ස්ථානයක් බවට අපි මේ ස්ථානය පරිවර්ථනය කර තිබෙනවා. ඉදිරි කාලයේදී මේ ස්ථානය ඉතාමත්ම වැදගත් ස්ථානයක් වනවා මොකද මේ කලාපය අපි පරිපාලන නගරය ලෙස හඳුනාගෙන තිබෙන නිසා. ඒ වගේම මේ ස්ථානය හරහා තව වසර කිහිපයකින් කඩුවෙල සිට පිටකොටුව දක්වා දිවෙන සැහැල්ලු දුම්රිය පද්ධතියක් ක්‍රියාත්මකයි. ඊට අමතරව අපි බලාපොරොත්තු වෙනවා කොළඹ නගරය අවට තිබෙන රාජ්‍ය ආයතන 100 කට ආසන්න ප්‍රමාණයක් මේ කලාපයට ගෙන එන්න. එවිට මේ ස්ථානය වටා ඉතා වැදගත් පරිසර පද්ධතියත් ආරක්‍ෂා කරගෙන නව නාගරික වටපිටාවක් ගොඩනැගෙනවා. එයට සරිලන පරිද්දෙන්, විශේෂයෙන්ම අපේ මධ්‍යම පන්තියට ගැලපෙන ආකාරයට මේ ස්ථානය වර්ධනය කර ගැනීමයි අපේ අරමුණ.

පසුගිය කාලයේ අපේ ආර්ථිකයේ ක්‍ෂෙත්‍ර දෙකක් වර්ධන උනා. එකක් ඉදිකිරීම් ක්‍ෂෙත්‍රය. එයටත් අපේ අමාත්‍යාංශය සම්බන්ධයි. අනෙක සංචාරක ක්‍ෂෙත්‍රයට. සංචාරක ක්‍ෂෙත්‍රයට අපට තිබෙන එකම සම්බන්ධය මේ ආයතනය. ඉතින් අපි බලාපොරොත්තු වෙනවා මේ මගින් යම් ආදර්ශයක් ලබාදෙන්න. ස්ථානීය අගයක් ලබාදෙන්න. සංචාරක ක්‍ෂෙත්‍රයේ ප්‍රගමනය සඳහා. නාගරික සංවර්ධනය පැත්තෙනුත් මේ කලාපය ඉතා වැදගත් කලාපයක් බවට ඉදිරි වසර කිහිපය තුළදී පරිවර්ථනය උනහම මේ ප්‍රදේශය වැදගත් දියුණුවක්, ආර්ථිකයට ජවන ශක්තියක් මේ මගින් ලැබෙයි කියා අපි බලාපොරොත්තු වෙනවා යැයි පැවසීය.

 D5A1023

 D5A1198

Comment (0) Hits: 434

ලෝක බැංකුවෙන් ඩොලර් මිලියන 200ක් !

ප්‍රාථමික සෞඛ්‍යාරක්ෂණ සේවා පද්ධතිය සවිමත් කිරීමේ ව්‍යාපෘතිය ක්‍රියාත්මක කිරීම සඳහා ලෝක බැංකුවෙන් ඩොලර් මිලියන 200 ක් ශ්‍රී ලංකාවට ලබා දීමට නියමිතය.

යෝජිත ව්‍යාපෘතියේ සංවර්ධන අරමුණ වන්නේ "රට තුළ තෝරාගත් ප්‍රාදේශයන්හි අධි අවදානම් සහිත ජනගහණ කාණ්ඩවල බෝ නොවන රෝග හඳුනාගෙන ඒවා පාලනය කිරීම සඳහා ප්‍රාථමික සෞඛ්‍ය සේවා භාවිතය හා ගුණාත්මකභාවය ඉහළ නැංවීම" ය.

ශ්‍රී ලංකාවේ ප්‍රාථමික සෞඛ්‍ය සේවා පද්ධතිය ප්‍රතිසංවිධානය හා ශක්තිමත් කිරීම සඳහා මෙම ව්‍යාපෘතින් අරමුණවේ. අරමුණ සපුරා ඇත. විශේෂයෙන්, මෙම ව්‍යාපෘතිය මගින් සෞඛ්‍ය ක්ෂේත්‍රයේ ප්‍රතිපත්ති හා ප්‍රමිතීන් සංවර්ධනය කිරීම සහ විවිධාකාර උපකාරක පද්ධතීන් ශක්තිමත් කිරීම සිදුවේ. මෙම ව්‍යාපෘතිය වඩාත් සංකීර්ණ, සම්බන්ධිකාරක හා මහජන කේන්ද්‍රගත සෞඛ්‍ය සේවා පද්ධතියක් සඳහා පදනම් වනු ඇත.

ව්‍යාපෘතියේ මූලික ප්‍රතිලාභීන් වනුයේ තෝරාගත් ප්‍රජාවන්හි පොදු ප්‍රාථමික සෞඛ්‍යය මධ්‍යස්ථාන භාවිතා කරන්නන් වන අතර, මෙම ජනතාව ජනගහනයේ අඩු ආදායම්ලාභී කොටස් වේ. ව්‍යාපෘතිය මගින් ආධාර සපයන ප්‍රජාවන් තුළ බරපතල හෝ විනාශකාරී නොවන බෝ නොවන රෝග ඇතිවීම හෝ වැඩි දියුණු වීමේ අවදානමක් ඇති අය මෙම ව්‍යාපෘතියේ මූලික ඉලක්කය වනු ඇත. ව්‍යාපෘතියේ යෙදවීම් මධ්‍යම හා පළාත් මට්ටමින් සෞඛ්‍ය අංශයේ සේවකයින්ට ද ප්‍රයෝජනවත් වනු ඇත. ඔවුන්ගේ හැකියාවන් ශක්තිමත් කිරීම හා සම්පත් දායකත්වය සැපයීම සඳහා උපාය මාර්ග සැලසුම් කිරීම හා ක්‍රියාත්මක කිරීම සඳහා සම්පත් ලබා දීම මෙම ව්‍යාපෘතිය මගින් සිදුවේ

මෙම ව්‍යාපෘතිය පහත සඳහන් සංරචකවලින් සමන්විත වේ:

• ප්‍රාථමික සෞඛ්‍ය සේවා පද්ධතිය ප්‍රතිසංවිධානය හා ශක්තිමත් කිරීමේ උපාය මාර්ග ක්‍රියාත්මක කිරීම

• ව්‍යාපෘති ක්‍රියාත්මක කිරීමේ සහ නවෝත්පාදක ප්‍රදාන

• අනිවාර්ය හදිසි ප්‍රතිචාර සංඝටකය

මේ සඳහා ව්‍යාපෘති කළමනාකරණ කමිටුවක් පිහිටුවා ඇති අතර, සෞඛ්‍ය, පෝෂණ සහ දේශීය වෛද්‍ය අමාත්‍යාංශයේ සහ අභ්‍යන්තර හා ස්වදේශ කටයුතු සහ පළාත් සභා හා පළාත් පාලන අමාත්‍යාංශය යන අමාත්‍යාංශ ලේකම්වරු එහි සම සභාපතිත්වයට පත් කෙරේ. අතිරේක සාමාජිකයින් ලෙස මුදල් කොමිෂන් සභාවේ ලේකම්, පළාත් ප්‍රධාන ලේකම්වරු 9 ක් සහ සෞඛ්‍ය, පෝෂණ හා දේශීය වෛද්‍ය අමාත්‍යාශයේ සහ පළාත් සෞඛ්‍ය, පෝෂණ හා දේශීය වෛද්‍ය අමාත්‍යාංශයේ නියෝජිතයින්ගෙන් පත්කරු ලබන ඇත.

ඉහත ව්‍යාපෘතියේ මුල්‍ය ගිවිසුම ශ්‍රී ලංකා රජය වෙනුවෙන් මුදල් හා ක්‍රමසම්පාදන අමාත්‍යාංශයේ ලේකම් ආචාර්ය ආර්.එච්.එස්. සමරතුංග සහ ලෝක බැංකුව වෙනුවෙන් ශ්‍රී ලංකාවේ සහ මාලදිවයින සඳහා වන ලෝක බැංකුවේ අධ්‍යක්ෂ Ms. Idah Pswarayi – Riddihough, යන මහත්ම මහත්මීන් විසින් 2019 ජනවාරි මස 23 වන දින මුදල් හා ජනමාධ්‍ය අමාත්‍යාංශයේ දී අත්සන් කරන ලදී.

Comment (0) Hits: 460

තවත් පවුල් ලක්ෂ 08කට සමෘද්ධිය !

පොරොත්තු ලේඛනයේ සිටින දිළිදු පවුල් ලක්ෂ 08ක් සඳහා මේ වසර තුළ සමෘද්ධි දිමනාව ලබාදීමට කටයුතු කරන බව දයා ගමගේ අමාත්‍යවරයා පවසයි.

ඔහු පවසන්නේ මේ වන විටත් සමෘද්ධිලාභින් ලක්ෂ 14ක් සිටින බවයි.

නව වසර වෙනුවෙන් අමාත්‍යාශයේ පැවැති උත්සවයකට එක්වෙමින් දයා ගමගේ අමාත්‍යවරයා මේ බව පවසා ඇත.

Comment (0) Hits: 425

මන්නාරම් බොක්කේ තෙල් ගවේෂණය යළිත් !

මන්නාරම් බොක්කේ තෙල් ගවේෂණ කටයුතු සඳහා නව ටෙන්ඩර් කැඳවීමක් සිදුකරන්නට යන බව වාර්තා වෙයි.

ඛනිජ තෙල් සම්පත් සංවර්ධන ලේකම් කාර්යාල ආරංචිමාර්ග සඳහන් කරන ආකාරයට මින් එක් සමුද්‍ර තීරයක් මීට පෙර දෙවරක් ගෑස් ඇති බව හඳුනාගත් ප්‍රදේශයක් ය.

එසේම ඉදිරියේදී මන්නාරම් සමුද්‍ර ප්‍රදේශයේ අනෙක් හඳුනාගත් කලාප වලද තෙල් හා ගෑස් ගවේෂණ කටයුතු සඳහා ටෙන්ඩර් කැඳවීමට නියමිත බවද එම ආරංචිමාර්ග සඳහන් කරයි.

Comment (0) Hits: 397

මිල අඩු කිරීම නිසා පැට්‍රල් පාවිච්චිය සියයට 30 කින් වැඩිවෙලා !

පසුගිය මාස දෙක ඇතුළත පැට්‍රල් මිල රුපියල් 25 කින් අඩු කිරීම නිසා අපේ ර‍ෙට් ජනතාව පාවිච්චි කරන පැට්‍රල් ප්‍රමාණය සියයට 30 කින් වැඩි වී ඇතැයි ප්‍රවාහන හා මුල්‍ය විශ්ලේෂක ආචාර්ය ඩී.එස්. ජයවීර මහතා පවසයි.

2007 - 2017 වසර 10 ඇතුළත පැට්‍රල් වාහන ගමන් කරන දුර ප්‍රමාණය දෙගුණ වී ඇති බවත් ඒ මහතා පෙන්වා දෙයි. ඒ අනුව 2007 දී පෙට්‍රල් වාහන ගමන් කළ කිලෝ මීටර් ගණන බිලියන 18 කි. එය 2017 දී බිලියන 40 දක්වා වැඩිවී තිබේ.

මේ තත්ත්වයට රටේ වායු දූෂණය එන්න එන්නම වැඩි වන බවත් ඔහු පෙන්වා දෙයි.

ඊට අමතරව 2010 දී මෙරට තිබූ මෝටර් සයිකල් ප්‍රමාණය 2018 දී තෙගුණ වී ඇති බවත් ත්‍රිරෝද රථ දෙගුණයකට වඩා වැඩිවී ඇති බවත් ආචාර්ය ජයවීර පවසයි. ඒ අනුව 2010 දී මෙරට තිබූ මෝටර් සයිකල් ගණන ලක්ෂ 10 කි‍. 2018 නොවැම්බර් වනවිට ඒ ගණන ලක්ෂ 32 කි.

2010 දී මෙරට තිබූ ත්‍රි‍‍රෝද රථ ගණන ලක්ෂ 4 කි. අද වනවිට ඒ රථ ගණන ලක්ෂ 10 ක් වී ඇති බවත් ආචාර්ය ජයවීර පෙන්වා දෙයි. වායු සම්පත් කේන්ද්‍රය සංවිධානය කළ වැඩමුළුවකදී ඒ මහතා මේ අදහස පළ කළේ ය.

(සිළුමිණ)

Comment (0) Hits: 433

Page 4 of 14