V2025

ආර්ථික

ශ්‍රි ලාංකිකයින්ට වෘත්තීයමය ක්ෂේත්‍ර 14ක ජපන් රැකියා අවස්ථා !

විදුලි සංදේශ, විදේශ රැකියා හා ක්‍රිඩා අමාත්‍ය හරින් ප්‍රනාන්දු හා ජපානයේ අධිකරණ, විදේශ කටයුතු, කම්කරු හා සුභසාධන යන අමාත්‍යවරුන් විසින් ශ්‍රි ලාංකික ශ්‍රමිකයින්ට ක්ෂේත්‍ර 14ක් යටතේ ජපානයේ වෘත්තීයමය රැකියා අවස්ථා ලබාගැනීම සදහා වූ අවබෝධතා ගිවිසුමකට හෙට දිනයේ (18) ජපානයේදී අත්සන් තැබීමට නියමිතය.

මෙම ගිවිසුම වසර 10ක කාලයක් ක්‍රියාත්මක වන අතර, එම කාලය තුලදී අසීමිත රැකියා ප්‍රමාණයක් ශ්‍රි ලාංකිකයින්ට හිමි වේ.

මෙම ගිවිසුම අනුව සාත්තු සේවිකා, ගොඩනැගිලි පිරිසිදු කරන්නන්, යන්ත්‍ර කොටස් හා එකලස්, කාර්මික යන්ත්‍ර කර්මාන්තය, විද්‍යුත් හා ඉලෙක්ට්‍රොනික් හා තොරතුරු කර්මාන්තය, ඉදිකිරීම් ක්ෂේත්‍රය, නැව් කර්මාන්තය, රථවාහන හා නඩත්තු, ගුවන්යානා කර්මාන්තය, නවාතැන් පහසුකම්, කෘෂිකර්මාන්ත, ධිවර හා ජලජීවි වගාව, ආහාර පාන නිෂ්පාදනය, ආහාර සේවා සැපයුම් යන ක්ෂේත්‍රවල රැකියා ලැබීමට නියමිතය.

ජපානයෙන් මෙම රැකියා අවස්ථා ලොව රටවල් 9ක් සදහා ලබාදෙන අතර ඉන් 7 වන ස්ථානය ශ්‍රි ලංකාවට හිමිවීම විශේෂත්වයකි. ඉදිරියේදී ජපානයේ වෘත්තීය විශේෂඥයින් මෙරටට පැමිණ අවශ්‍ය තාක්ෂණික දැනුම ලාංකිකයින්ට ලබාදී එම පුහුණු ශ්‍රමිකයින්ට රැකියා ලබාදීම මගින් ශ්‍රි ලංකාවේ වෘත්තීය අධ්‍යාපන මට්ටම ජපානයේ මට්ටමටම උසස්වීමේ හැකියාවක්ද ලැබේ.

ජපානයේ රැකියා අවස්ථා ශ්‍රි ලාංකිකයින්ට හිමිවීමත් සමගම ජපන් රැකියා ලබාදෙන බව පවසමින් විවිධ ජාවාරම්කරුවන් මුදල් රැස්කිරීමේ අවදානමක් ඇතිවීමට ඉඩ ඇති හෙයින් එවැනි ජාවාරම්කරුවන්ට හසුනොවන ලෙසත් මෙම රැකියා ලබාදීමේ වැඩසටහන සම්පූර්ණයෙන්ම ජපාන රජය හා ශ්‍රි ලංකා රජය අතර ඇතිකර ගත් ගිවිසුමක් මගින් පමණක් ක්‍රියාත්මක වන බවත් ශ්‍රි ලංකා විදේශ සේවා නියුක්ති කාර්යාංශය මහජනතාවට දන්වා සිටියි.

Comment (0) Hits: 326

IMF වෙතින් ලංකාවට: ඩොලර් මිලියන 164ක් !

ජාත්‍යන්තර මූල්‍ය අරමුදල මගින් ශ‍්‍රී ලංකාවට ලබා දෙන 05වන ණය වාරිකය නිදහස් කිරීමට එම අරමුදලේ විධායක මණ්ඩලය අනුමැතිය ලබා දී ඇති බව වාර්තා වෙයි.

ඒ අනුව ශ‍්‍රි ලංකාවට අමෙරිකානු ඩොලර් මිලියන 164ක මුදලක් හිමිවනු ඇත.

2016 වසරේ ජූනි මාසයේදී වසර 03ක ව්‍යාපෘතියක් යටතේ ජාත්‍යන්තර මූල්‍ය අරමුදල විසින් අමෙරිකානු ඩොලර් බිලියන 1.5ක මුදලක් ලබා දීමට එකඟතාව පළ කර .තිබිණ.

එම ව්‍යාපෘතියේ අවසන් වාරිකය ඉකුත් වසරේ නොවැම්බර් මාසයේදී ලබා දීමට නියමිතව තිබුණද, එවකට ශී‍්‍ර ලංකාවේ පැවැති දේශපාලන අර්බුදය හේතුවෙන් එය තාවකාලිකව අත්හිටුවා තිබු අතර මෙම ණය ව්‍යාපෘතිය තවත් වසරකින් දීර්ඝ කිරීමට ද ඊයේ (13) රැස්වූ ජාත්‍යන්තර මූල්‍ය අරමුදලේ විධායක මණ්ඩලය එකඟතාව පළ කර ඇති බව වාර්තා වෙයි.

Comment (0) Hits: 183

විශේෂ හැකියාවන් සහිත පුද්ගලයන්ට දෙන මාසික දීමනාව රුපියල් 2,000 කින් වැඩි කරයි !

විශේෂ හැකියාවන් සහිත පුද්ගලයන් සඳහා ලබා දෙන මාසික දීමනාව රුපියල් 2,000 කින් වැඩි කිරීමට රජය තීරණය කරයි.

මෙම වැඩි කිරීම ජූලි 01 වැනිදා සිට ක්‍රියාත්මක කිරීමට නියමිත අතර ඒ අනුව විශේෂ හැකියාවන් සහිත පුද්ගලයකු වෙනුවෙන් ලැබෙන මාසික දීමනාව රුපියල් 5,000 දක්වා ඉහළ යනු ඇත.

සමාජ සවිබල ගැන්වීමේ අමාත්‍යාංශය යටතේ ලියාපදිංචි 32,000 ක් පමණ වන පුද්ගලයන් හට මෙතෙක් රුපියල් 3,000ක් බැගින් මෙම දීමනාව ගෙවන ලදී. එයට අමතරව ගෙවීම් අපේක්ෂාවෙන් තවත් පුද්ගලයෝ 40,000ක් පමණ එහි ලියාපදිංචි වී සිටිති.

මුදල් අමාත්‍ය මංගල සමරවීර 2019 අයවැය මගින් යෝජනා කළ පරිදි අලුතෙන් ලියාපදිංචි වූ පුද්ගලයන් 40,000 ඇතුළු විශේෂ හැකියාවන් සහිත පුද්ගලයන් 72,000 ටම ජූලි මස පළමු වැනි දා සිට මෙම වැඩිකළ රු. 5,000 දීමනාව ගෙවනු ලැබේ.

2019 අයවැය යෝජනාව අනුව ක්‍රියාත්මක මෙම දීමනාව ඉහළ නැංවීම වෙනුවෙන් මෙම වසර සඳහා රුපියල් මිලියන 4350ක් වෙන් කර තිබේ.

 

මෙම ගෙවීම් කිරීම සඳහා අනුමැතිය ලබා දෙන චක්‍රලේඛය ප්‍රාථමික කර්මාන්ත සහ සමාජ සවිබල ගැන්වීමේ අමාත්‍යාංශය වෙත මහා භාණ්ඩාගාරය විසින් පසුගිය (11) නිකුත් කරන ලදී.

Comment (0) Hits: 200

ඇමරිකානු මූල්‍ය ප්‍රදානය පාස්කු ප්‍රහාරයට අදාළ නැත !

පාස්කු ප්‍රහාරය හරහා ලංකාවේ ආර්ථිකයට සිදුවූ බලපෑම සහ ඊට මුහුණ දෙන්නේ කෙසේද යන්න මුදල් අමාත්‍ය මංගල සමරවීර විසින් පසුගිය 26 වෙනිදා විශේෂ මාධ්‍ය හමුවක් කැඳවා කරුණු පැහැදිලි කිරීමක් සිදුකළේය.

එහිදී අමාත්‍යවරයා වැඩිදුරටත් සඳහන් කර සිටියේ,

“අඳුරු වළාවන් අස්සේ මේ මාධ්‍ය හමුව අවසානයේ හොඳ ප්‍රවෘත්තියකුත් තියෙනවා කියන්න ලංකා ආර්ථිකය පැත්තෙන්ම. ලංකා ඉතිහාසයේ ලංකාවට ලැබුණු විශාලතම ප්‍රදානය ලබාදෙන්නට ඇමරිකානු මිලේනියම් චැලෙන්ජ් කෝපරේෂන් එක ඊයේ ඒ අයගේ අධ්‍යක්ෂ මණ්ඩල රැස්වීමේ දී තීන්දු කලා. ඒ අනුව අපිට US ඩොලර්ස් 480 ක් ප්‍රධාන ව්‍යාපෘති තුනකට ලැබෙන ලැබෙනවා.“ යනුවෙනි.

මේ කරුණ සම්බන්ධයෙන් සමාජය තුළ විවිධ කටකතා සහ විකෘති කරන ලද කරුණු මත පිහිටා ඇතැමුන් ප්‍රකාශ නිකුත් කරමින් සිටී. විශේෂයෙන් විපක්ෂයේ දේශපාලන නායකයන් සහ ඊට සහයෝගය දක්වන ඇතැම් කණ්ඩායම් ද මේ පිළිබඳ කරුණු විකෘති කරමින් සමාජය නොමග යවමින් සිටී.

එසේම විශේෂයෙන් මේ සම්බන්ධයෙන් කිසිදු කරුණු විමසා බැලීමකින් තොරව අගරදගුරු මැල්කම් රංජිත් පියතුමා ද මාධ්‍ය වෙත වගකීම් විරහිත ප්‍රකාශ නිකුත් කිරීම පිළිබඳ බලවත් කණගාටුව පළ කළ යුතුය.

මොකක්ද මේ මිලේනියම් අභියෝගතා කෝපරේෂන් කියන්නෙ?

ඇමරිකාවේ මිලේනියම් අභියෝගතා කෝපරේෂන් (MCC) යනු, 2004 දී එක්සත් ජනපද කොන්ග්‍රසය විසින් පිහිටුවන ලද ද්විපාර්ශ්වික එක්සත් ජනපද විදේශ ආධාර ආයතනයකි. එය ඇමරිකානු රාජ්‍ය දෙපාර්තමේන්තුවෙන් සහ ඇමරිකානු ආධාරවලින් වෙන්වූ ස්වාධීන ආයතනයකි. මෙමගින් විදේශ ආධාර ලබා දීම සඳහා සඳහා නව දර්ශනයක් යොදාගැනීම මෙහි ඇති සුවිශේෂත්වයයි.

එකී දර්ශකය මූලික අංශ තුනකට යටත්ව කාණ්ඩ 21ක් පිළිබඳ විමර්ශනය කොට සංඛ්‍යාත්මක බර තැබීමක් සිදුකරනු ලැබේ.

 සුදුසුකම් තෝරා ගැනීමේ දර්ශක

1. ආර්ථික නිදහස

i. මූල්‍ය ප්‍රතිපත්ති

ii. උද්ධමනය

iii. නියාමනයේ ගුණාත්මකභාවය

iv. වෙළඳ ප්‍රතිපත්ති

v. ආර්ථිකයේ ස්ත්‍රී පුරුෂ දායකත්වය

vi. ඉඩම් හිමිකම් හා ප්‍රවේශය

vii. ණය ප්‍රවේශය

viii. ව්‍යාපාර ආරම්භ කිරීම 

2. යුක්තිගරුක පාලනය

i. දේශපාලන අයිතීන්

ii. සිවිල් නිදහස

iii. දූෂණය පාලනය කිරීම

iv. රාජ්‍ය ඵලදායිතාව

v. නීතියේ ආධිපත්‍යය

vi. තොරතුරු දැනගැනීමේ අයිතිය

3. ජනතාව කෙරෙහි ආයෝජනය

i. සෞඛ්‍ය පිරිවැය

ii. ප්‍රාථමික අධ්‍යාපනයේ පිරිවැය

iii. ස්වාභාවික සම්පත් ආරක්ෂණය

iv. ප්‍රතිශක්තිකරණ අනුපාතය

v. ද්විතීයික අධ්‍යාපන ප්‍රවේශයේ බාලිකා අනුපාතය

vi. ළමා සෞඛ්‍ය

උක්ත දර්ශක 20 තුළින් අවම දර්ශක 11කට වැඩි ප්‍රමාණයක් සාර්ථක වී ඇති රටවල් ඇමරිකානු සහස්‍රක සංවර්ධන අභියෝගතා කෝපරේෂන් මූල්‍ය ප්‍රදානයන් සඳහා හිමිකම් කියනු ලැබේ.

එකී මුල්‍ය ප්‍රදානයන් ලබාදීමේ මූලික කොන්දේසිය වනුයේ, ඔවුන් නියම කරන කාලය තුළ අදාළ වැඩසටහන් සම්පූර්ණ කොට අවසන් කිරීමයි.

ඒ අනුව ශ්‍රී ලංකාව සම්බන්ධයෙන් සිදුකරන ලද නියාමන දර්ශක විමර්ෂණයට අනුව 2019 වර්ෂයේ දී දර්ශක 13ක සක්‍යතාව මත ඇමරිකානු ඩොලර් 480ක මූල්‍ය ප්‍රදානය ලංකාවට හිමි වී ඇත.

 ඇමෙරිකානු ඩොලර් මිලියන 480 ඇත්ත කතාව

ඇමරිකාවේ සහස්‍රක සංවර්ධන අභියෝගතා සංස්ථාව (MCC) ආරම්භක කාලසීමාවේදීම ශ්‍රී ලංකාව එහි ප්‍රදානයන් සඳහා ඉල්ලුම් පත් ඉදිරිපත් කර ඇත. නමුත් රටේ පැවැති සමාජ වාතාවරණය හමුවේ එ් සම්බන්ධයෙන් ක්‍රියාත්මක වීමක් සිදුව නැත.

ඉන් අනතුරුව මහින්ද රාජපක්ෂ ජනාධිපතිවරයා යටතේ මේ සඳහා ඉල්ලුම් කිරීමක් කර ඇති නමුත් එම උත්සාහය ද ව්‍යර්ථ වී ඇත.

2015 මේ ආණ්ඩුව පත් වූ පසුව නැවතත් MCC ප්‍රදානයන් සඳහා ඉල්ලුම් කිරීමක් සිදුකරන ලදී. ඒ අනුව 2016 දී මුල්ම මිලේනියම් අභියෝගතා කෝපරේෂන් නියෝජිත පිරිසක් ලංකාවට පැමිණ මේ සම්බන්ධයෙන් කරුණු විමර්ශනය කිරීම ආරම්භ කළේය.

ඒ අනුව ශ්‍රී ලංකාව 2017 - 2018 කාලසීමාවේ ඔවුන්ගේ නියාමන දර්ශක 20න් 13ක සාර්ථකත්වයක් අත්කර ගැනීම හේතුවෙන් 2018 වර්ෂයේ අවසන් කාර්තුවේදී මෙම මිලියන 480 ප්‍රදානය ලබාදීමට මිලේනියම් අභියෝගතා කෝපරේෂන් ආයතනය එකඟතාව පළකර තිබිණි. නමුත් ඔක්තෝබර් 26 ප්‍රජාතන්ත්‍ර විරෝධීව සිදුකරන ලද දේශපාලන ව්‍යාකූලත්වය හමුවේ එම මූල්‍ය ප්‍රදානය රටට අහිමි විය.

කෙසේ නමුත් 2018 දෙසැම්බර් යළි ප්‍රජාතන්ත්‍රවාදී ආණ්ඩුව පිහිටුවීමෙන් පසුව මුදල් අමාත්‍යවරයා විසින් MCCයට නැවත ඉල්ලුම් කිරීමක් සිදුකරන ලද අතර ඒ අනුව සිදුකරන ලද විමර්ශන අවසානයේ 2019 අප්‍රේල් 25 දින ඔවුන් ඊට එකඟතාව පළකරන ලදී. එම එකඟතාවත් සමග ශ්‍රී ලංකාව සඳහා ඇමරිකානු ඩොලර් 480ක මුල්‍ය ප්‍රදානයක් හිමි වනු ඇත. ඒ ඉදිරි වර්ෂ 5ක කාලසීමාව තුළ ප්‍රධාන ව්‍යපෘති තුනක් සම්පූර්ණ කොට අවසන් කිරීම සඳහා ය.

 මිලේනියම් චැලෙන්ජ් ව්‍යාපෘති

1. ප්‍රවාහන කළමනාකරණ පද්ධති වැඩිදියුණු කිරීම.

විශේෂයෙන් මේ යටතේ රථවාහන කළමනාකරණ පද්ධතිය සංවර්ධනය කිරීමත් බස් ප්‍රවාහන පද්ධතිය වැඩිදියුණු කිරීමත් සිදු කෙරෙනු ඇත. රථවාහන කළමනාකරණය පද්ධතිය සංවර්ධනය සඳහා මෙම ඇමරිකානු ඩොලර් 480න් 159.9ක් ද බස් ප්‍රවාහන පද්ධතිය වැඩිදියුණු කිරීම සඳහා ඇමරිකානු ඩොලර් 50.00ක මුදලක් ද වෙන් කර ඇත.

විශේෂයෙන් කොළඹ ප්‍රධාන නගර ප්‍රදේශයේ පවත්නා මාර්ග තදබදය අඩු කිරීම සඳහා සහ වාහන තදබදයකින් තොරව රථවාහන කළමනාකරණ පද්ධතිය දියුණු කිරීම සඳහාත් ගමනාගමනය සඳහා ගතවන කාලය අඩුකිරීම සඳහාත් වායු විමෝචනය අඩු කර අනතුරු සිදුවීම් වැලැක්වීමද මෙම ව්‍යාපෘතියට ඇතුළත් වේ.

එසේම මගී බස් ප්‍රවාහන සේවාව වඩාත් දියුණු ආකාරයට පත්කිරීම සඳහා රජයේ හා පෞද්ගලික ඒකාබද්ධ සේවාවක් ස්ථාපිත කිරීමත්, මගීන්ට වඩාත් පහසුකම් සහිත බස් මිලදී ගැනීමත් වඩාත් පහසුකම් සහිත මගී ප්‍රවාහන සේවාවක් ස්ථාපිත කිරිම ද මේ යටතේ සිදුකරනු ලැබේ.

 2. මධ්‍යම පර්යන්ත මාර්ග සංවර්ධනය කිරීම.

මධ්‍යම පර්යන්ත මාර්ග සංවර්ධන ව්‍යාපෘතිය යටතේ කිලෝමීටර් 131 මාර්ග ජාලයක් වැඩිදියුණු කිරීමට කටයුතු කෙරේ. ඒ සඳහා ඇමරිකානු ඩොලර් මිලියන 140.1ක් වෙන් කොට ඇත.

මේ යටතේ,

01. අවිස්සාවේල්ල සිට පැල්මඩුල්ල

02. බෙරගල සිට වැල්ලවාය

03. නාවුල සිට දඹුල්ල

04. දඹුල්ල සිට බකමූණ හරහා කළුගහවැව දක්වා වූ මාර්ග සංවර්ධනය කිරීම සිදුකරනු ඇත.

 3. ඉඩම් පරිපාලන වැඩසටහන

මේ යටතේ ගම්පහ, කෑගල්ල, මාතලේ, මහනුවර, කුරුණෑගල, අනුරාධපුර, පොළොන්නරුව සහ ත්‍රිකුණාමලය යන දිස්ත්‍රික්ක 8ක් ආවරණය වන පරිදි රජයේ සහ පෞද්ගලික ඉඩම් මිනුම්ගත කරනු ලබන අතර ඉඩම් හිමිකම් අහිමි ජනතාවට ඉඩම් හිමිකම් පැවරීම සිදුකෙරේ. එසේම ඉඩම් ලියාපදිංචි කාර්යාල දහයක් උත්ශ්‍රේණිගත කිරීම ද දිස්ත්‍රික් 8 තුළ නවීන තාක්ෂණික ක්‍රමවේද හරහා ඉඩම් සිතුවම්ගත කර ඉඩම්වලට අදාළව සියලු පිඹුරු සකස් කර එහි දත්ත ගබඩා කිරීමට සැලසුම් කරනු ලැබේ. මෙමගින් මැනුම් දෙපාර්තමේන්තුවේ කටයුතු වලට පහසුකම් සලසනු ඇත.

මේ ව්‍යාපෘතිය සඳහා වෙන්කොට ඇති මුදල් ප්‍රමාණය ඇමරිකානු ඩොලර් 67.3කි.

මෙම ප්‍රධාන ව්‍යාපෘති තුනට අදාළ අධීක්ෂණය හා ඇගයීම සඳහා ඇමරිකානු ඩොලර් 12.7ක් ද පරිපාලනය කළමනාකරණ කටයුතු සඳහා ඇමරිකානු ඩොලර් 50.0ක මුදලක් ද වෙන් කොට ඇත.

මෙම ව්‍යාපෘති 03 ඉදිරි වසර පහක් තුළ ක්‍රියාත්මක කිරීම සඳහා ඇමෙරිකාවෙන් මෙම ඩොලර් මිලියන 480 ක ප්‍රදානය ලැබෙනු ඇත.

රටේ සංවර්ධන ව්‍යාපෘති ක්‍රියාත්මක කිරීමට ආණ්ඩුව විසින් ගන්නා වූ උත්සාහයන් ව්‍යර්ථ කිරීමට ඇතැම් විපක්ෂ කණ්ඩායම් හිතාමතා කරුණු විකෘති කොට සමාජය නොමග යැවීමට ගන්නා වූ සෑම උත්සාහයක්ම පිළිකුළෙන් යුතුව හෙළා දකිමු.

Comment (0) Hits: 205

එක ඉන්ධනයක පමණක් රු: 3.00 ක මිල වැඩිවීමක් !

මිල සූත්‍රය යටතේ මිළ සංශෝධනයට ලක් කරන ඉන්ධන වර්ග 4න් 3කම මිළ මෙවර වැඩි නොකිරීමට රජය තීරණය කර ඇත.

එහෙත් ඔක්ටේන් 92 වර්ගයේ පෙට්‍රල් ලීටරයක මිළ රුපියල් 03කින් වැඩිවන අතර ඒ අනුව එහි ලීටරයක සිල්ලර මිළ රුපියල් 138 වේ.

පසුගිය මාර්තු මස සිට ලෝක වෙළඳ පොලේ ඉන්ධන මිළ වැඩිවූවද, උත්සව සමය හේතුවෙන් පාරිබෝගික ජනතාවට සහන සළසනු වස් දේශීය වෙළඳ පොලේ ඉන්ධන මිල වැඩි කලේ නැත.

මේ දිනවල ජාත්‍යන්තර වෙළඳපොලේ තෙල්මිළ අඩුවීමේ ප්‍රවනතාවයක් පෙනෙන්නට තිබේ.

ඒ අනුව එම මෙම තත්වය දිගින් දිගටම පැවැතිය හොත් එහි වාසිය පාරිබෝගික ජනතාවට ලබා දීමට කටයුතු කරනු ලැබේ.

Comment (0) Hits: 177

සංචාරක කර්මාන්තයට අදාළ ව්‍යාපාර සඳහා බදු සමාවක් - ඇමති මංගල

පුද්ගලයන් 250කට අධික පිරිසකට මරු කැඳවමින් එල්ල වු පාස්කු ප්‍රහාරය හේතුවෙන් බලපෑම් එල්ල වූ සංචාරක කර්මාන්තයට අදාළ ව්‍යාපාර සඳහා බදු සමාවක් ලබා දීම සම්බන්ධයෙන් අවධානය යොමුව ඇතැයි මුදල් අමාත්‍ය මංගල සමරවීර පවසයි.

විදේශිකයන් සහ කතෝලික බැතිමතුන් ඉල්ලක කර එල්ල වූ ත්‍රස්ත ප්‍රහාරයෙන් පසු ඇති වූ ආරක්ෂක තත්ත්වයන් සැලකිල්ලට ගනිමින් අදාළ කර්මාන්තකරුවන් විසින් ද මෙම බදු විරාම පිළිබඳ ඉල්ලීම් කර ඇති බව බ්ලූම්බර්ග් රූපවාහිනිය සමග සම්මුඛ සාකච්ඡාවකට එක් වෙමින් අමාත්‍යවරයා පවසයි.

‘‘ටියුනීසියාව, බාලි වගේ මේ වගේ තත්ත්වයන්ට මුහුණ දුන් රටවල් දිහා බලපුවා ම අපිට කියන්න පුළුවන් නිසි ක්‍රියාමාර්ග යටතේ වසරක, වසර එක හමාරක වගේ කාලයක් තුළ මෙරට සංචාරක කර්මාන්තය නැවත යථා තත්ත්වයට පත් වෙයි කියල‘‘. අමාත්‍යවරයා පැවැසීය.

මෙම ප්‍රහාර හේතුවෙන් ඇ.ඩො. බිලියන 87ක් පමණ වන සංචාරක ආදායමට 5%ක පමණ බලපෑමක් වනු ඇතැයි අපේක්ෂා කරනවා.

2009න් අවසන් වූ දශක තුනක යුද්ධයෙන් වගේ ම පසුගිය දා ඇති වූ දේශපාලන අර්බුදයෙන් අපේ ආර්ථික වර්ධනයට බලපෑම් එල්ල වුණා. යුද්ධයෙන් පස්සෙ පස් ගුණයකින් විතර සංචාරකයන් පැමිණීම ආදායම් වාර්තා බිඳ හෙළන මට්ටමට වර්ධනය වුණා.‘‘

‘‘ලොකුම අවධානම විය හැක්කේ මෙවැනි ප්‍රහාර දිගින් දිගටම ඇති වීමයි. අපි හිතනව එය අපට කළමනාකරණය කර ගන්න පුළුවන් වෙයි කියල. ඒ වගේ ම මෙවැනි ප්‍රහාර නැවත ඇති නොවෙයි කියලත් අපි හිතනවා. ශ්‍රී ලංකාවේ ආර්ථිකය හෙමින් නමුත් ස්ථාවර ලෙස ඉදිරියට යමින් තියෙනවා.‘‘ යැයි ද අමාත්‍යවරයා පැවැසීය.

මෙහිදී මහ බැංකු අධිපති ආචාර්ය ඉන්ද්‍රජිත් කුමාරස්වාමි කියා සිටියේ හතර වැනි කාර්තුවේ 1.8%ක පැවැති ආර්ථික වර්ධන වේගයට සංචාරක ව්‍යාපාරය පහත වැටීමෙන් එල්ල විය හැකි බලපෑම ප්‍රකාශ කිරීමට තරම් කාලය ගතවී නොමැති බවයි.

Comment (0) Hits: 217

සුරැකුම්පත්වල විදෙස් ආයෝජන : සතියක දී රු. මිලියන 700කින් ඉහළට !

2019 මැයි 22 සිට මැයි 29 දක්වා සතියක කාලපරිච්ඡේදය තුළ දී රජයේ සුරැක්ම්පත්වල විදෙස් හිමිකාරීත්වය රු. මිලියන 716කින් වැඩි වී ඇති බව ශ්‍රී ලංකා මහ බැංකුවේ නවතමවාර්තාවක සඳහන් වේ.

2019 මැයි 22 දිනට රජයේ සුරැකුම්පත්වල විදේශකයින් විසින් කර ඇති ආයෝජනවල මුළු වටිනාකම රු. මිලියන 145,400 ක් ලෙසින් වාර්තා වන අතර එම වටිනාකම මැයි 29 දින වන විට රු. මිලියන 146,116ක් දක්වා ඉහළ ගොස් තිබේ.

Comment (0) Hits: 199

රුසියානු සංචාරකයින් පිරිසක් සමඟ සංචාරක කර්මාන්තය ඔසවයි !

ශ්‍රී  ලංකාවට සංචාරකයන්ගේ පැමිණීම බොහෝ සෙයින් බිඳ වැටී තිබියදීත්, රුසියානු සංචාරකයන් 52 ගෙන් සමන්විත පිරිසක් මොස්කව් නුවර සිට අද(01) උදෑසන කටුනායක ගුවන් තොටුපළ වෙත පැමිණ තිබේ.

මොවුන් රුසියාවේ මොස්කව් නුවර සිට පැමිණි, රුසියානු ගුවන් සේවයට අයත් එස්.යූ- 6265 දරන ගුවන් යානයෙන් අද උදෑසන 8.20 ට කටුනායක ගුවන් තොටුපළ වෙත පැමිණ ඇත.

මෙහිදී අදහස් දැක්වූ සංචාරකයන් පිරිස කියා සිටියේ , වර්තමාන ශ්‍රී ලංකාවේ තත්ත්වය පිළිබඳව රුසියාවට ද ආරංචි වූ බවත් , එහෙත් තමන් නොබියව , සැලසුම් කළ පරිදි මෙම සංචාරය සඳහා ශ්‍රී ලංකාවට පැමිණි බවත්ය.

මෙම රුසියානු සංචාරකයන් පිරිස ශ්‍රී ලංකාවේ දින 12 ක් ගත කිරීමට අපේක්ෂා කරන අතර , ඔවුන් වැලිගම , හික්කඩුව , බෙන්තොට ආදී ප්‍රදේශවල නවාතැන් ගැනීමට සැලසුම් කර ඇති අතර , ඊට අමතරව සීගිරිය , නුවරඑළිය සහ ඇල්ල ආදී ප්‍රදේශ නැරඹීමට යාමට ද නියමිතය.

මෙම සංචාරය ශ්‍රී ලංකාවේ පෞද්ගලික සංචාරක ප්‍රවර්ධන ආයතනයක් විසින් සංවිධානය කර තිබුණි.

Comment (0) Hits: 224

එන්ටර්ප්‍රයිස් ශ්‍රී ලංකා ණය යෝජනා ක්‍රම යටතේ තවත් සහන රැසක් !

වසරක් තුළ ව්‍යවසායකයන් ලක්ෂයක් බිහි කිරීමේ අරමුණෙන් ක්‍රියාත්මක එන්ටර්ප්‍රයිස් ශ්‍රී ලංකා රජයේ පොලී සහන ණය යෝජනා ක්‍රමය තව දුරටත් පුළුල් කරමින් අලුතෙන් ණය යෝජනා ක්‍රම අටක් සඳහා ද මූල්‍ය පහසුකම් ලබා දීමට රජය තීරණය කරයි. 2019 අයවැය යටතේ යෝජිත මෙම ණය යෝජනා ක්‍රම පුළුල් කිරීම සඳහා මුදල් අමාත්‍ය මංගල සමරවීර ඉදිරිපත් කළ සංදේශයට අමාත්‍ය මණ්ඩලයේ අනුමැතිය ලැබී ඇත.

එන්ටර්ප්‍රයිස් ශ්‍රී ලංකා ණය යෝජනා ක්‍රමය යටතේ කෘෂිකර්මාන්තයේ ඵලදායීතාව සඳහා ක්‍රියාත්මක රන් අස්වැන්න ණය යෝජනා ක්‍රමය හරහා සංචාරක කර්මාන්තය නගා සිටුවීමේ අරමුණෙන් සංචාරක බෝට්ටු සහ ජලාශ්‍රිත ක්‍රියාකාරකම් සඳහා වන උපකරණ මිල දී ගැනීමට ද ණය පහසුකම් ලබා දේ. රුපියල් මිලියන 250ක උපරිමයක් දක්වා මෙම ණය මුදල ලබා ගත හැකි වේ.

නව පාසල් බස් රථ ලබා ගැනීම සඳහා ක්‍රියාත්මක රිය ශක්ති ණය යෝජනා ක්‍රමය දිස්ත්‍රික් මට්ටමින් ක්‍රියාත්මක පාසල් බස් රථ හිමියන්ගේ සංගම්වල නිර්දේශ මත එහි සාමාජිකයන්ට ද බස් රථ මිල දී ගැනීම සඳහා සහන දායී ණය ලබා ගත හැකි ය.

මීට පෙර ක්‍රියාත්මක මූ මැදි ආදායම් නිවාස යෝජනා ක්‍රමය යටතේ ලබා දුන් රුපියල් මිලියන 5ක නිවාස ණය වෙනුවට ‘හෝම් ස්වීට් හෝම්‘ ණය යෝජනා ක්‍රමය හඳුන්වා දෙමින් එම ණය මුදල රුපියල් මිලියන 10 දක්වා ඉහළ දමා තිබේ. වසර 25ක් දක්වා ගෙවීමේ පහසුකම් සලසා ඇති මෙම ණය මුදල වෙනුවෙන් ණයකාර පාර්ශ්වය ගෙවිය යුතු පොලී අනුපාතය 6%කි. මෙතෙක් වසර 05ක කාලයක් සඳහා පමණක් හිමි වූ එම පොලී සහනය වසර 15ක් දක්වා දීර්ඝ කර ඇත.

සිහින මාලිගා ක්‍රියාත්මකයි !

විදේශ ගත ශ්‍රමිකයන්ට මෙරට නිවාස ඉදි කර ගැනීම සඳහා ‘සිහින මාලිගා‘ ණය යෝජනා ක්‍රමය ක්‍රියාත්මක වූ අතර බොහෝ ශ්‍රමිකයන් අදාළ සේවා යෝජකයන් සමග වසර දෙකක් වැනි කෙටි කාලීන ගිවිසුම්වලට එළඹෙන බැවින් රුපියල් මිලියන 10ක උපරිම ණය මුදලක් වසර 15ක් වැනි කාලයක් සඳහා එක වර ලබා දීමේ හැකියාවක් නොමැත. එබැවින් නව සංශෝධනය යටතේ අදාළ ණය මුදල කොටස් වශයෙන් ලබා දීමට යෝජිත අතර නිවාස යෝජනා ක්‍රමවලින් නිවාස මිලදී ගැනීම සඳහා ද මෙමගින් ණය ලබා දෙනු ලබයි. නව නිවසක් ඉදි කර ගැනීම, පවත්නා නිවස අලුත්වැඩියා කිරීම, දැනට පවතින නිවස ඉවත් කර අලුත් නිවසක් ඉදි කිරීම, ඉඩමක් මිල දී ගෙන නිවසක් ඉදි කිරීම සහ නිවසක් මිල දී ගෙන අලුත්වැඩියා කිරීමට මෙම ණය මුදල ලබා ගත හැකි ය.

අලුත් බස් ගන්න - සිටී රයිඩ් !

බස් රථ මිල දී ගැනීම සඳහා වන සිටි රයිඩ් ණය යෝජනා ක්‍රමය යටතේ ණය ආපසු ගෙවීම සඳහා වසර 05ක කාලයක් හිමි වන අතර ඒ අතරින් දැනට මාර්ග බලපත්‍ර හිමි හෝ අපනයන ප්‍රමුඛ ආයතනය සඳහා ප්‍රවාහන පහසුකම් දැනටමත් ලබා දෙනු ලබන බස් රථ හිමියන් වෙත ණය ගෙවීමේ සහන කාලයක් අවශ්‍ය නොවේ.

එන්ටර්ප්‍රයිස් ශ්‍රී ලංකා ණය යෝජනා ක්‍රමයේ ව්‍යාවසායකන් බිහි කිරීමේ ප්‍රදානතම ණය යෝජනා ක්‍රමය වන ජය ඉසුර ණය යෝජනා ක්‍රමය යටතේ තොරතුරු තාක්ෂණ ආශ්‍රිත ව්‍යපාරවල නිරත වූවන්ගේ නවෝත්පාදනවලට සහ ව්‍යාපාර පුළුල් කිරීමට ද පහසුකම් සැලසේ.

මිනි ටැක්සි සහ විදුලි ත්‍රිරෝද රථ ණය යෝජනා ක්‍රමය යටතේ ලබා දෙනු ලබන ණය මුදල රුපියල් 250,000කින් ඉහළ දමා තිබේ. වාහනවල මිල ඉහළ යාමට සාපේක්ෂව ඉහළ දැමෙන මෙම මුදලත් සමග මේ යටතේ ලැබෙන උපරිම ණය මුදල රුපියල් 2,250,000 දක්වා වැඩි කෙරේ.

රජයේ විශ්ව විද්‍යාල වල අවස්ථාව අහිමි නම් !

රජයේ විශ්ව විද්‍යාලවලින් උපාධියක් හැදෑරීමට අවස්ථාව අහිමි වන්නන් වෙනුවෙන් උසස් අධ්‍යාපනය ලබා ගැනීම සඳහා ක්‍රියාත්මක ‘මගේ අනාගතය‘ ණය යෝජනා ක්‍රමය යටතේ රාජ්‍ය නොවන විශ්ව විද්‍යාලයකින් අදාළ පාඨමාලාව හැදෑරීම සඳහා අවස්ථාව හිමි වන අතර ඒ වෙනුවෙන් රුපියල් ලක්ෂ 11ක ණය මුදලක් ලබා දෙනු ලබයි. ඒ වෙනුවෙන් වූ පොලී අනුපාතය වාර්ෂික සඵල පොලී අනුපාතය, (Average Weighted Prime Lending Rate) + 2% වෙනස් කෙරේ.

එසේ ම අදාළ උපාධිය හෝ පාඨමාලාව සම්පූර්ණ කිරීමට වූ, ණය පියවීමට නොහැකි වූ හෝ සාධාරණ ලෙස ණය පියවිය නොහැකි වූ අවස්ථාවන් හි දී ණය ශේෂය අදාළ උපාධි අපේක්ෂකයාගෙන් හෝ ඇපකරුගෙන් අය කර ගත යුතුය. එම මුදල අය කර ගත නොහැකි වුවහොත් රජය විසින් අදාළ උපචිත පොලිය සමග ණය මුදලේ ශේෂය බැංකුව වෙත ගෙවනු ලැබේ.

එන්ටර්ප්‍රයිස් ශ්‍රී ලංකා රජයේ පොලී සහන ණය යෝජනා ක්‍රමය යටතේ පොලී සහන ණය යෝජනා ක්‍රමය 17ක්, ප්‍රතිමූල්‍ය ණය යෝජන ක්‍රම 03ක් සහ මූල්‍ය නොවන වැඩසටහන් 02ක් ලෙස සමස්ත යෝජනා ක්‍රමය 22ක් ක්‍රියාත්මක කෙරේ. පොලී සහන ණය යෝජනා ක්‍රම යටතේ පමණක් රුපියල් බිලියන 81කට ආසන්න ණය මුදලක් මේ වන විට අනුමත කර ඇති අතර ඉන් රුපියල් බිලියන 55ක මුදලක් රාජ්‍ය සහ පෞද්ගලික බැංකු මගින් ණය ලෙස ලබා දී තිබේ.

Comment (0) Hits: 188

ADB මහ සමුළුවට : ඇමැති මංගල ඇතුළු පිරිසක් ෆීජි යයි !

ආසියානු සංවර්ධන බැංකුවේ 52 වැනි වාර්ෂික මහ සභා රැස්වීමට සහභාගී වීම සඳහා මුදල් අමාත්‍ය මංගල සමරවීර ඇතුළු දූත පිරිස ෆීජි රාජ්‍ය බලා පිටත්ව ගොස් තිබේ.

රැස්වීම මැයි මස 2 වැනි ද සිට 5 වැනි දා දක්වා පැවැත්වෙයි.

මේ බව මුදල් අමාත්‍යාංශය නිකුත්කර ඇති නිවේදනයක සදහන් වන අතර එහි මෙසේද සදහන් වෙයි.

ආසියානු සංවර්ධන බැංකු නියෝජිතයන්, රාජ්‍ය නොවන සංවිධාන නියෝජිතයන්, නිරීක්ෂණ රටවල නියෝජිතයන්, ජාත්‍යන්තර සංවිධානවල නියෝජිතයන් සේම පෞද්ගලික අංශයේ නියෝජිතයන් සමග අන්‍යෝන්‍ය සබඳතා වර්ධනය කර ගැනීමට මෙම රැස්වීමේ දී සාමාජික රටවල නියෝජිතයන්ට අවස්ථාව ලැබෙනු ඇත.

ආසියා ෆැසිපික් කලාපයේ ආර්ථික සහ සමාජ සංවර්ධනය පිළිබඳ කරුණු සාකච්ඡා කිරීමට ආසියානු සංවර්ධන බැංකුවේ වාර්ෂික සමුළුව කදිම අවස්ථාවකි. සාමාජික රටවල් 67ක නියෝජිතයන් සහභාගී වන මෙම මහා සභා රැස්වීම සඳහා මුදල් අමාත්‍යං මංගල සමරවීර මහතා සමගින් ශ්‍රී ලංකාව නියෝජනය කරමින් භාණ්ඩාගාර ලේකම් ආචාර්ය ආර්.එච්.එස්. සමරතුංග, නියෝජ්‍ය ලේකම් ඒ.එම්.පී.එම්.බී. අතපත්තු, විදේශ සම්පත් දෙපාර්තමේන්තුවේ අධ්‍යක්ෂ ජනරාල් ප්‍රියන්ත රත්නායක සහ ජාතික ක්‍රම සම්පාදන දෙපාර්තමේන්තුවේ අධ්‍යක්ෂ ජනරාල් එස්.එස්. මුදලිගේ යන මහත්වරු ඇතුළු මුදල් අමාත්‍යාංශයේ ජ්‍යෙෂ්ඨ නිලධාරීහු ද සහභාගී වෙති.

ආසියානු සංවර්ධන බැංකුව ශ්‍රී ලංකාවේ ව්‍යාපෘති වෙනුවෙන් වාර්ෂිකව ඇ.ඩො. මිලියන 800ක පමණ සහන ණය ලබා දෙනු ලබන අතර 2019 වසර වෙනුවෙන් ව්‍යාපෘති යෝජනා 8ක් සඳහා ඇ.ඩො. මිලියන 815ක් ලබා දීමට නියමිත ය. වරාය පිවිසුම් අධිවේගී මාර්ග ව්‍යාපෘතිය මේ වන විටත් ක්‍රියාත්මක අතර ඒ වෙනුවෙන් වැය කෙරෙන මුදල ඇ.ඩො. මිලියන 300කි. මීට අමතරව දුම්රිය සේවය කාර්යයක්ෂම කිරීම සඳහා පැරැණි සංඥා සහ ප්‍රවේශපත් ක්‍රමවේදයන් නවීකරණය කිරීම සඳහා වූ ව්‍යාපෘතිය පිළිබඳ සාකච්ඡා මැයි මාසයේ කොළඹ දී පැවැත්වෙයි. ඊට වැය කිරීමට අපේක්ෂිත මුදල ඇ.ඩො. මිලියන 160කි.

ආසියානු සංවර්ධන බැංකුවේ වාර්ෂික සමුළුවට සමගාමීව සාර්ක් කලාපීය රටවල මුදල් අමාත්‍යවරුන්ගේ රැස්වීම ද ෆිජි දූපතේ නදී නගරයේ දී මැයි 02 දා පැවැත්වීමට කටයුතු සංවිධානය කර ඇත.

Comment (0) Hits: 219

ස්විට්සර්ලන්තය මෙරටට පනවා තිබූ සංචාරක බාධා ලිහිල් කරයි !

පාස්කු ඉරිදා ප්‍රහාරයෙන් අනතුරුව ශ්‍රී ලංකාවේ සංචාරය කිරීම සම්බන්ධයෙන් පනවා තිබූ බාධාවන් ලිහිල් කිරිමට ස්විට්සර්ලන්තය කටයුතු කර තිබේ.

ඒ අනුව තවදුරටත් අත්‍යාවශ්‍ය නොවන කටයුත සඳහා ශ්‍රී ලංකාවේ සංචාරය කිරීමෙන් වළකින ලෙසට ඔවුන් පනවා තිබූ සංචාරක උපදේශනය ඉවත් කර තිබේ.

කෙසේ වෙතත් ශ්‍රී ලංකාවේ සංචාරය කිරීමේදී තම පෞද්ගලික ආරක්ෂාව පිළිබඳව වැඩි අවධානයක් යොමුකරන ලෙස එරට විදේශ කටයුතු පිළිබඳ ෆෙඩරල් දෙපාර්තමේන්තුව දන්වා තිබේ.

ශ්‍රී ලංකාවේ දේශපාලන හා සාමාජිය නොසන්සුන්කාරී තත්ත්වයන් ඉහළ අගයක පවතින බවත් ඒවා කුමන මොහොතක හෝ ගැටුම්කාරී තත්ත්වයන් හැරිය හැකි බවත් එම දෙපාර්තමේන්තුව නිකුත් කළ නිවේදනයක දැක්වෙයි.

එය මේ වසරේ දෙසැම්බර් මාසයේ පැවැත්වීමට නියමිත ජාතික මැතිවරණය තෙක් පැවැතය හැකි බවත් ශ්‍රී ලංකාව පුරාම ත්‍රස්තවාදි ප්‍රහාර ඇතිවීමේ අවධානමක් ඇති බවත් ඔවුන් සඳහන් කරයි.

Comment (0) Hits: 189

පසුගිය වසරේ ව්‍යාපෘති වෙනුවෙන් රු.බිලියන 84ක් ගෙවා අවසන් !

රජයේ අමාත්‍යාංශ හා විවිධ ආයතන මගින් ක්‍රියාත්මක කරන ලද විවිධ වැඩසටහන් සඳහා 2018 දෙසැම්බර් 31 වනවිට ගෙවිය යුතුව තිබූ රු. මිලියන 84,461 ක මුදලක් මේ වනවිට මහා භාණ්ඩාගාරය විසින් අදාළ අංශ වෙත ගෙවා ඇති බව මුදල් අමාත්‍යංශය සඳහන් කරයි.

නිවේදනයක් නිකුත් කරමින් අමාත්‍යංශය මේ බව සඳහන් කරන අතර අදාළ නිවේදනයේ මෙසේද දැක්වෙයි.

2018 දෙසැම්බර් 31 වනවිට විවිධ ව්‍යාපෘති ක්‍රියාත්මක කිරීම වෙනුවෙන් හා අනෙකුත් ගෙවීම් සඳහා රු. මිලියන 99,415 ක බිල් පවත්නා බව මහා භාණ්ඩාගාරය වෙත දැනුම් දී තිබුණි. එයින් 85% ක් මේ වනවිට ගෙවා ඇති අතර, ඉතිරි ගෙවීම් වලට අදාළ අඩුපාඩු පවතින බැවින් ඒවා නිරවුල් කළ වහාම එම මුදල්ද ගෙවීමට කටයුතු කරන බව මහා භාණ්ඩාගාරයේ ලේකම් ආචාර්ය ආර්.එච්.එස්. සමරතුංග මහතා පැවසීය.

රජයේ අමාත්‍යාංශ හා විවිධ ආයතන මගින් ක්‍රියාත්මක කරන ලද කොන්ත්‍රාත්, ඉදිකිරීම් හා ප්‍රසම්පාදන කටයුතු වෙනුවෙන් ගෙවිය යුතු මුදල් පිළිබඳ ඉල්ලීම් සෑම වසරකම දෙසැම්බර් මස අවසන් වනවිට ලැබූවිට එම මුදල් එළඹෙන වසරේ මුල් මාස 3 – 4 ක් ඇතුළත ගෙවීම් කිරීම 2015 වසරේ සිට අඛණ්ඩව සිදුවෙමින් පවතී.

එහෙත්, 2018 වසරේ අවසාන කාර්තුවේ අවිනිශ්චිත තත්ත්වයක් ඇතිවූ හෙයින් නියමිත පරිදි මෙම හිඟ මුදල් ගෙවීමේ ප්‍රමාදයක් විය. එමෙන්ම 2019 සඳහා වන අයවැය 2018 වසරේදී සම්මත කරගැනීමටද නොහැකි විය. 2019 වසර සඳහා වන අයවැය පාර්ලිමේන්තුවේ සම්මත කරගැනීම මේ වසරේ අප්‍රේල් 05 දක්වා ප්‍රමාද විය. මේ හේතුවෙන් 2018 වසරේ අවසාන වන විට ගෙවිය යුතු මුදල් පෙර වසර වලට වඩා විශාල ප්‍රමාණයෙන් එක්රැස් විය. ඒ අනුව 2018 වසර සඳහා ගෙවිය යුතුව තිබූ හිඟ මුදල් නිරවුල් කිරීම ප්‍රමාද වීමට මෙයද බලපෑවේය.

රජයේ ප්‍රසම්පාදන ක්‍රියාවලිය ඩිජිටල්කරණය කිරීම සඳහා මුදල් අමාත්‍ය මංගල සමරවීර මහතාගේ උපදෙස් මත භාණ්ඩාගාරයේ රාජ්‍ය මුදල් දෙපාර්තමේන්තුව විසින් කටයුතු සම්පාදනය කරමින් තිබෙන බැවින් 2015 වසරේද ආරම්භ කළ පරිදි යළිත් මෙම වසරේ සිට රජයේ සියලු ප්‍රසම්පාදන කටයුතු සඳහා ගෙවිය යුතු සියලු ගෙවීම් අදාළ ව්‍යාපෘතිය නිමවීමත් සමග ගෙවීමට හැකි වනු ඇත. 

Comment (0) Hits: 224

කොළඹ වරායේ නැගෙනහිර පර්යන්තයේ 51% ක කොටස් ලංකාවට !

කොළඹ වරායේ නැගෙනහිර බහලු පර්යන්තය සම්බන්ධයෙන් එළඹීමට අපේක්ෂිත සහයෝගීතා ගිවිසුම අනුව පර්යන්තයේ හිමිකාරීත්වය සියයට සියයක් ශ්‍රී ලංකාව සතුවන බව වරාය අධිකාරිය කියයි.

වරාය අධිකාරිය මේ බව නිවේදනය කළේ කොළඹ වරායේ නැගෙනහිර බහලු පර්යන්ත සම්බන්ධයෙන් ඉන්දියාව, ජපානය සහ ශ්‍රී ලංකාව අතර එළඹීමට යෝජිත ගිවිසුම පිලිබද පළවු මාධ්‍ය වාර්තා සම්බන්ධයෙන් පැහැදිලි කිරීමක් කරමිනි.

මෙම පර්යන්තයේ මෙහෙයුම් සමාගමේ කොටස් වලින් 51% ක හිමිකාරීත්වය ශ්‍රි ලංකා රජය සතුවන අතර සෙසු පාර්ශව වලට හිමිවන්නේ 49% ක කොටස් අයිතියක් පමණක් බවද පැවසේ.

මෙම ව්‍යාපෘතිය වෙනුවෙන් ලබා ගැනීමට නියමිත ජපාන ණය ශ්‍රි ලංකාව මෙතෙක් ලබාගෙන ඇති හොදම ණය කොන්දේසි වලින් සමන්විත බවද වරාය අධිකාරිය කියා සිටී.

මෙම ණය කොන්දේසි තවමත් කෙටුම්පත් අවස්ථාවේ පවතින බවද අධිකාරිය සඳහන් කරන අතර මෙම නව ක්‍රමවේදය මගින් වේගවත් සංවර්ධන ශක්‍යතාවක් ලබා ගැනීම අරමුණ බවද වරාය අධිකාරිය සඳහන් කළේය

Comment (0) Hits: 220

සංචාරක කර්මාන්තයට දැඩි හානි !

පසුගියදා දිවයිනේ ස්ථාන කිහිපයකටම එල්ල වූ මරාගෙන මැරෙන ත්‍රස්තවාදී බෝම්බ ප්‍රහාරයන් හමුවේ මෙම වසර තුළ පුරෝකථනය කරන ලද සංචාරක ඉපැයීම් ඩොලර් බිලියන 1.5 කින් පමණ අඩුවිය හැකි බව සංචාරක කර්මාන්තකරුවන් පවසයි.

මේ සම්බන්ධයෙන් ශ්‍රී ලංකා හෝටල් සංගමයේ සභාපති සනත් උක්වත්ත, Daily FT පුවත්පත වෙත පවසා ඇත්තේ මෙය ත්‍රස්තවාදීන් විසින් මෙරට හෝටල්වල සිටින සංචාරකයින් ඉලක්ක කර ගනිමින් ප්‍රහාරයක් සිදුකළ පළමු අවස්ථාව බවයි. මෙහි ප්‍රතිඵලයක් ලෙසින් 2019 වසර තුළ ඇස්තමේන්තු කරන ලද සංචාරක ආදායම ඩොලර් බිලියන 1.5 කින් පමණ දැවැන්ත ලෙස පහළ යා හැකි බවට ඇස්තමේන්තු කරන බව ඔහු මෙහිදී වැඩිදුරටත් කියා තිබේ.

ශ්‍රී ලංකාවේ විදේශ ඉපැයීම් ගලා එන තෙවැනි ස්ථානයට විශාලතම මූලාශ්‍රය වන්නේ සංචාරක කර්මාන්තයයි. 2018 වසරේ දී සමස්ත සංචාරක ඉපැයීම් වටිනාකම ඩොලර් බිලියන 4.4 ක් වන අතර එය 2017 වසරට වඩා 11.6% ක ඉහළ යාමක් ලෙසින් සටහන් වේ.

2019 දී ශ්‍රී ලංකාව ලොව අංක එකේ සංචාරක ගමනාන්තයක් ලෙසින් Lonely Planet විසින් නම් කරනු ලැබූ අතර මෙම වසරේ දී මිලියන 3 ක සංචාරකයින් ප්‍රමාණයක් හා ඩොලර් බිලියන 5 ක සංචාරක ආදායමක් වසර ආරම්භයේ දී ඇස්තමේන්තු කරන ලදී.

ශ්‍රී ලංකා සංචාරක හා හෝටල් කළමනාකරණ ආයතනයට අනුව දිවයිනේ සියලූම සංචාරක හෝටල්වල 135,000 සිට 150,000 ක් දක්වා පිරිසක් සෘජුව සේවය කරනු ලබන බව වාර්තා වේ.

“මේ ඇති වූ ව්‍යසනකාරී තත්ත්වය හමුවේ හෝටල්කරුවන්ට මූල්‍යමය සහන ලබා දීමට පියවර ගන්නා ලෙස මම රජයෙන් ඉල්ලා සිටිනවා. අපට අප සේවකයින්ගේ ජීවිකාවන් සම්බන්ධයෙන් කටයුතු කිරීමට එය මහත් රුකුලක් වනු ඇත“යි යනුවෙන් උක්වත්ත මහතා මෙහිදී වැඩිදුරටත් කියා තිබේ.

Comment (0) Hits: 201

ආනයනික ලොකු ලූනු බද්ධ ඉහළට !

දේශීය ලොකු ලූනු අස්වැන්න වෙළෙඳපොළට පැමිණෙන බැවින් දේශීය ගොවියා ආරක්ෂා කර ගැනීමේ පියවරක් ලෙස ආනයනික ලොකු ලූනු සඳහා වන විශේෂ වෙළෙඳ භාණ්ඩ බද්ද ඊයේ (21) මධ්‍යම රාත්‍රියේ සිට ක්‍රියාත්මක වන පරිදි ඉහළ දමා තිබේ.

මේ සම්බන්ධව මුදල් අමාත්‍යාංශයේ මාධ්‍ය අධ්‍යක්ෂ විසින් නිල නිවේදනයක්ද නිකුත්කර තිබේ.

ඊට අනුව ආනයනික ලොකු ලූනු කිලෝ ග්‍රෑම් එකක් සඳහා වන විශේෂ වෙළෙඳ භාණ්ඩ බද්ද රුපියල් 20/=කින් ඉහළ දමා ඇති අතර, ඊට අදාළ ගැසට් නිවේදනයට මුදල් අමාත්‍ය මංගල සමරවීර ඊයේ අත්සන් තබා ඇත.

Comment (0) Hits: 179

නිල සංචිත ඩොලර් බිලියන 7.6 ක් දක්වා ඉහළට !

ජාත්‍යන්තර ස්වෛරීත්ව බැඳුම්කර සාර්ථකව නිකුත් කිරීම හේතුවෙන් රටේ දළ නිල සංචිතය මේ වන විට එක්සත් ජනපද ඩොලර් බිලියන 7.6ක් දක්වා ඉහළ ගොස් ඇතැයි ශ්‍රී ලංකා මහ බැංකුව ප්‍රකාශ කරයි.

මේ වසරේ ජනවාරි මාසයේ දී ඩොලර් බිලියන 6.2ක් වූ නිල සංචිතය මාර්තු මාසයේ දී ඩොලර් බිලියන 7.6ක් දක්වා ඉහළ නැගීමට ප්‍රධාන වශයෙන් ඩොලර් බිලියන 2.4ක ජාත්‍යන්තර ස්වෛරීත්ව බැඳුම්කර නිකුතුව සාර්ථකව සිදු කිරීම බලපා ඇති බව මහ බැංකුව කියයි.

මේ වසර ආරම්භයේ ශ්‍රී ලංකා මහ බැංකුව කල්පිරුණු ජාත්‍යන්තර වශයෙන් පැවැති බැඳුම්කර සඳහා මුදල් ගෙවීමක් සාර්ථකව සිදු කෙළේය. ඒ නිසා රටේ නිල සංචිතය ඩොලර් බිලියන 6.2 දක්වා අඩු විය.

නමුත් නැවත වතාවක් සාර්ථක බැඳුම්කර නිකුතුවක් සමඟ අරමුදල් තර කර ගැනීම නිසා සංචිතය ඉහළ ගොස් ඇත. මේ සංචිතය දළ වශයෙන් අප රටේ මාස 4.3ක ආනයනික වියදමට සමාන අගයක් ගන්නා බව ද මහ බැංකුව පවසයි.

Comment (0) Hits: 221

IDA වෙතින් ලංකාවට ඩොලර් මිලියන 70 ක් !

ප්‍රාදේශීය සංවර්ධන සහායක ව්‍යාපෘතිය (LDSP) සඳහා ලෝක බැංකුවේ ජාත්‍යන්තර සංවර්ධන සමායතනය (IDA) වෙතින් ඇමරිකානු එක්සත් ජනපද ඩොලර් මිලියන 70 ක ණය මුදලක් ලබාගැනීම වෙනුවෙන් වූ ණය ගිවිසුම අත්සන් කිරීම 2019 මැයි 14 වන දින පෙ.ව 11.30 ට මුදල් අමාත්‍යාංශයේදී, ශ්‍රී ලංකා රජය වෙනුවෙන් මුදල් අමාත්‍යාංශ ලේකම් ආචාර්ය ආර්. එච්. එස්. සමරතුංග සහ ලෝක බැංකුව වෙනුවෙන් ශ්‍රී ලංකාව හා මාලදිවයින සඳහා ලෝක බැංකු අධ්‍යක්ෂ Idah z-Pswarayi-Riddihaugh, මිය විසින් සිදු කරන ලදී.

මෙම ව්‍යාපෘතියෙහි සංවර්ධන ඉලක්කය වනුයේ වගකීමෙන් හා වගවිය යුතු ආකාරයෙන් ප්‍රජාව වෙත සේවා සැපයීම සඳහා ප්‍රාදේශීය සැලසුම් පද්ධති ශක්තිමත් කිරීම, ප්‍රාදේශීය සේවා වැඩිදියුණු කිරීම හා ආර්ථික යටිතල පහසුකම් හා ආයතනික සංවර්ධනය තුළින් අදාළ පළාත් තුළ ආර්ථික සංවර්ධනයට සහාය වීම තුළින් පළාත් පාලන ආයතන සවිබල ගන්වමින් පළාත්වල ආර්ථික හා යටිතල පහසුකම් සංවර්ධනයට සහාය වීමයි.

මෙම ව්‍යාපෘතිය සඳහා මුළු ඇස්තමේන්තුගත පිරිවැය ඇමරිකානු එක්සත් ජනපද ඩොලර් මිලියන 100ක් වන අතර එයින් ඇමරිකානු ඩොලර් මිලියන 70ක මුදල ජාත්‍යන්තර සංවර්ධන සමායතනය වෙතින්ද රජය වෙතින් ඇමරිකානු ඩොලර් මිලියන 7ක් හා ඉතිරිය යුරෝපා සංගමය වෙතින් ප්‍රධානයක් ලෙසද ලබා ගනු ලැබේ.

අදාළ ව්‍යාපෘතිය ක්‍රියාත්මක කිරීමේ සමස්ථ වගකීම පළාත් සභා, පළාත් පාලන හා ක්‍රීඩා අමාත්‍යාංශය වෙත පැවරෙන අතර උතුරු, නැගෙනහිර, උතුරු මැද හා ඌව යන පළාත්වල පළාත් පාලන ආයතන 134 ක් ආවරණය වන පරිදි, මෙම ව්‍යාපෘතිය ක්‍රියාත්මක කිරීමට නියමිතය.

ඉහත ව්‍යාපෘතිය ක්‍රියාත්මක කිරීම සඳහා ලෝක බැංකුවේ අන්තර්ජාතික සංවර්ධන ආයතනය (IDA) විසින් ඇමෙරිකා එක්සත් ජනපද ඩොලර් මිලියන‍ 70 ක ණය පහසුකමක් ලබා දීමට එකඟතාවය පළකර ඇත.

 

 

 

 

Comment (0) Hits: 205

ඇමති මංගල : සංවර්ධනය සඳහා ණය 2019 සමුළුවේ !

ඉරන්ගා රොනඩා රජුගේ සෘජු ආරාධනාව මත මුදල් ඇමැති මංගල සමරවීර ශ්‍රී ලංකාව නියෝජනය කරමින් නිව්යෝර්ක් නුවර පැවැති එක්සත් ජාතීන්ගේ සංවර්ධන කටයුතු සඳහා මූල්‍ය සේවා සැපැයීමේ ආර්ථික සහ සමාජ උපදේශන සමුළුවේ මුදල් ඇමැතිවරුන්ගේ රැස්වීමට සහභාගී විය.

මෙහි දී අමාත්‍යවරයා 'පරිපූර්ණ වර්ධනය ප්‍රවර්ධනය කිරීමෙන් අසමානතාව අවම වේ' යන මාතෘකාව යටතේ මෙවර පැවැති සාකච්ඡා සභාවේ දී ශ්‍රී ලංකාව මේ සම්බන්ධයෙන් ගෙන ඇති ක්‍රියාමාර්ග විස්තර කරමින්, 2018 වසරේ මැද භාගයේ සිට විශේෂයෙන් ග්‍රාමීය ප්‍රදේශ පදනම් කරගෙන තරුණ ව්‍යවසායකයන් 100,000ක් බිහි කිරීමේ අරමුණ ඇතිව ආරම්භ කළ එන්ටර්ප්‍රයිස් ශ්‍රී ලංකා ණය වැඩසටහන ඇතුළු සංවර්ධන කටයුතු සඳහා මූල්‍ය සම්පාදනයට ගත් ක්‍රියාමාර්ග ගැන තොරතුරු බෙදාගත්තේය.

සංවර්ධනය සඳහා ණය ලබා දීම තේමාව කරගත් මෙම සමුළුවේ ප්‍රධාන කටයුත්ත වූ 'සංවර්ධනය සඳහා ණය 2019 සමුළුව' අඩිස් අබාබා ක්‍රියාකාරී න්‍යාය පත්‍රය හඳුන්වා දී මෙතෙක් ගෙවී ඇති වසර 4 ඇතුළත ලබා දී ඇති ණයවලින් ඉටු වී ඇති කාර්යභාර පසු විපරම් කිරීමට, වේගයෙන් ව්‍යාප්ත වන සහ වෙනස් වන ප්‍රතිපත්ති හමුවේ සංගණනයන් පැවැත්වීම, නැඟී එන ආර්ථික සහ ආර්ථික නොවන අවදානම්වලට එරෙහිව ගතයුතු පියවර හඳුනා ගැනීම මෙහි දී සිදුවිය.

තිරසාර සහ සාධාරණ සංවර්ධනයක් වෙනුවෙන් හඳුනාගත් අභියෝග ජය ගැනීමට ශ්‍රී ලංකාව 2019 අයවැයෙන් ගෙන ඇති පියවර අමාත්‍යවරයා මෙහි දී ගෙන හැර දැක්වීය. මූල්‍යමය බාධා සහිත ශ්‍රී ලංකාව වැනි කාලගුණික විපර්යාසවලින් බැටකන රටවල්වලට මූල්‍ය සහාය ලබා දීමේ දී අන්තර්ජාතික සහයෝගය තිරසාර සංවර්ධන ඉලක්ක ජයගැනීමේ දී ඉතා වැදගත් වන බව අමාත්‍ය සමරවීර මෙම සමුළුව හමුවේ වැඩිදුරටත් කීවේය.

මෙම සංචාරයේ දී අමාත්‍යවරයා යුනිසෙෆ් සංවිධානයේ විධායක අධ්‍යක්ෂ හෙන්රිටා එච්. ෆෝ හමුවී පූර්ව ළමා විය සංවර්ධනය සම්බන්ධ කරුණු සාකච්ඡා කළේය. එක්සත් ජාතීන්ගේ සාමය ගොඩනැඟීමේ සහායක කාර්යාලයේ ක්‍රියාකාරකම් රැසකට ද සහභාගී වූ අමාත්‍යවරයා එක්සත් ජාතීන්ගේ මහා ලේකම්වරයා ඊයේ (17දා) හමුවීමටද නියමිතව තිබිණි.

Comment (0) Hits: 205

Page 2 of 13