V2025

ආර්ථික

බැඳුම්කර කොමිසමේ නිර්දේශ ක්‍රියාත්මක කිරීම දැනටමත් ආරම්භ කරලා - මුදල් මණ්ඩලය

 ජනාධිපති බැඳුම්කර කොමිසමේ වාර්තාවේ ඇතුළත් ඇතැම් නිර්දේශ දැනටමත් ශ්‍රී ලංකා මහ බැංකුව විසින් ක්‍රියාත්මක කර ඇති බවත් තවත් නිර්දේශ ක්‍රියාවට නැගීම අරඹා ඇති බවත් මුදල් මණ්ඩලය නිවේදනය කරයි.

මුදල් මණ්ඩලය විසින් එම පියවරයන් ගැනීමේ දී නිසි පරිදි නීතිපතිවරයාගේ උපදෙස් ලබාගෙන ඇති බවත් අදාළ වාර්තාවේ ඇතුළත් නිර්දේශයන්ට අදාළව මෙතෙක් ගනු ලැබ ඇති සහ ගැනෙමින් පවතින පියවරයන් සහ ක්‍රියාමාර්ග සම්බන්ධයෙන් මහජනතාව වෙත දැනුම්දීමත්, පොදු රාජ්‍ය ණය සහ සේවක අර්ථසාධක අරමුදල කළමනාකරණය කිරීමේ කටයුතු සම්බන්ධව විනිවිදභාවය වර්ධනය කිරීම සුදුසු බවත් මුදල් මණ්ඩලය එම නිවේදනයේ සඳහන් කර තා.

එසේම මුදල් මණ්ඩලය විසින් ජනාධිපති කොමිෂමේ වාර්තාව අඛණ්ඩව සැලකිල්ලට ගනු ඇති අතර සුදුසු පරිදි වැඩිදුර ක්‍රියාමාර්ග ගැනීමට කටයුතු කරනු ඇතැයි ද එම නිවේදනයේ සඳහන් වේ.

2015 පෙබරවාරි 01දා සිට 2016 මාර්තු 31දක්වා කාලය තුළ භාණ්ඩාගාර බැඳුම්කර නිකුත් කිරීම පරික්ෂා කිරීම, විමර්ශනය කිරීම සහ වාර්තා කිරීම සඳහා වූ ජනාධිපති කොමිසමේ වාර්තාවේ ඇතුළත් නිර්දේශයන් ක්‍රියාත්මක කිරීමට සලකා බැලීම සඳහා ජනාධිපති ලේකම් ඔස්ටින් ප්‍රනාන්දු මහතා විසින් ජනවාරි 10දා ශ්‍රී ලංකා මහ බැංකුවේ අධිපතිවරයා වෙත භාර දී ඇති අතර ඊට අදාලව මුදල් මණ්ඩලය මෙම නිවේදනය නිකුත් කොට තිබේ.

මුදල් මණ්ඩලය නිකුත් කර ඇති සම්පුර්ණ නිවේදනය 

 

Comment (0) Hits: 434

රුසියාවට යවන තේ කන්ටේනර් විශේෂ ධුමායනයකට

රුසියාව වෙත අපනයනය කරන මෙරට තේ ඇතුලු සියලු කෘෂි නිෂ්පාදන අඩංගු කන්ටේනර් වරායේදී විශේෂ ධූමායනයකට ලක් කිරීමට රජය තීරණය කර ඇත.

මෙරටින් අපනයනය කළ තේ කන්ටේනරයක කප්රා නම් කෘමියකු හමුවීම පාදක කරගෙන රජය මෙම තීරණය ගෙන ඇත.

එසේම ධූමායනය කරන කන්ටේනරයේ ගබඩා කරන තේ තොගය වෙනුවෙන් මෙරට ශාක නිරෝධායන ඒකකයේ සහතිකයික් ද ලබා ගැනීම අවශ්‍ය බවද තේ මණ්ඩල ආරංචිමාර්ග සඳහන් කර සිටියි.

මෙරට තේ සඳහා පසුගිය 18 වන දා රුසියාව ආනයන තහනමක් පැන වූ අතර එය හෙට (31) සිට බලපැවැත්වෙන පරිදි ඉවත් කර ඇත.

Comment (0) Hits: 384

රුපියල් මිලියන 60,000 ක මූල්‍යාධාර සමඟ “ව්‍යවසායකත්ව ශ්‍රී ලංකා” මාර්තුවේ ඇරඹේ

රැකියා දස ලක්ෂයේ ඉලක්කය සපුරා ගැනීම ඇතුළුව ශ්‍රී ලංකාවේ ආර්ථික ක්‍රියාකාරීත්වය වැඩි කිරීම වෙනුවෙන් 2018 අයවැය හරහා යෝජනා කළ “ව්‍යවසායකත්ව ශ්‍රී ලංකා” වැඩසටහන එළඹෙන මාර්තු මාසයේ ආරම්භ කෙරෙන බව මුදල් හා ජනමාධ්‍ය අමාත්‍යංශය නිවේදනය කරයි.

සහන ණය යෝජනා ක්‍රම 15ක්

මෙහිදී විශේෂයෙන් තරුණ හා කාන්තා ව්‍යවසායකයින් ඉලක්ක කර ඔවුන්ගේ ව්‍යවසාය ආරම්භ කිරීම වෙනුවෙන් ණය යෝජනා ක්‍රම 15 ක් යටතේ සහන පොලී අනුපාත සහ රජයේ ඇපකර මත රුපියල් මිලියන 60,000 ක පමණ මූල්‍ය ආධාර පහසුකම් ලබාදීමට නියමිතව ඇත.

මේ පිළිබඳ මුදල් හා ජන මාධ්‍ය අමාත්‍ය මංගල සමරවීර සහ රාජ්‍ය අමාත්‍ය ඉරාන් වික්‍රමරත්න යන මහත්වරුන් විසින් රාජ්‍ය හා පෞද්ගලික බැංකු ප්‍රධානීන් හා උසස් නිලධාරීන් සමඟ සාකච්ඡාවක් පසුගිය 10 වනදා මහා භාණ්ඩාගාරයේදී පවත්වා ඇත.

සියළු බැංකු ප්‍රධානීන්ගේ සහය ස්ථීරයි

එහිදී අපනයනය ඉලක්ක කරගෙන ආර්ථිකය පුළුල් කිරීම තුළින් නව රැකියා බිහිකිරීමේ රජයේ මෙම වැඩසටහන ක්‍රියාත්මක කිරීම සඳහා සියලු බැංකුවල සහාය අපේක්ෂා කරන බව අමාත්‍ය මංගල සමරවීර දැනුම්දී ඇති අතර ව්‍යවසායකත්ව ශ්‍රී ලංකා වැඩසටහන සාර්ථක කරගැනීමට අවශ්‍ය පූර්ණ සහාය ලබාදීමට රාජ්‍ය හා පෞද්ගලික බැංකු ප්‍රධානීන්ද එකඟතාව පළකර ඇත.

ව්‍යාපාර ඇරඹීමට 75% ක මුදලක් සහන පොළීයට

මුදල් හා ජනමාධ්‍ය අමාත්‍යංශයේ ප්‍රවෘත්ති අධ්‍යක්ෂ විසින් නිකුත් කළ නිවේදනයේ මේ බව සඳහන් වන අතර මෙම ව්‍යසායකත්ව ශ්‍රී ලංකා වැඩසටහන යටතේ තරුණයන්ට, කාන්තාවන්ට හා විශේෂ හැකියා ඇති පුද්ගලයන්ට තමන්ගේ යැයි ව්‍යාපාර ඇරඹීමට සහ කෘෂිකර්මාන්තය, කර්මාන්ත හා ධීවර ඇතුළු ඕනෑම ක්ෂේත්‍රයක කර්මාන්ත හෝ ව්‍යාපාර ඇරඹීම සඳහා 75% ක සහනදායී පොලීමත රාජ්‍ය හා පෞද්ගලික බැංකු හරහා ණය ලබාදෙන බවද එහි සඳහන්ව ඇත.

පොළියෙන් කොටසක් රජය දරණවා

මෙම සහනදායී පොලිය රජය මගින් දරනු ලබන අතර එකී පොලිය ගෙවීම සඳහා රු. මිලියන 5,000 ක් භාණ්ඩාගාරය විසින් වෙන්කර ඇති බවද එහි සඳහන්ව ඇත.

සාර්ථක ව්‍යාපෘති සඳහා ඇප අනවශ්‍යයි

එසේම ස්වයං රැකියා ඇතුළු සුළු හා මධ්‍ය පරිමාණ ව්‍යාපාරික අංශය පුළුල් කිරීම සඳහා ක්ෂේත්‍රයට පිවිසීමේදී ප්‍රාග්ධන පිරිවැය හා ණය ලබාගැනීම සඳහා ඇප තැබීමට නොහැකි වීම හේතුවෙන් බැංකු මගින් ණය ප්‍රතික්ෂේප වීමට මින් මතුවට රජය ඉඩ නොතබන බව ද එම සාකච්ඡාවේදී අමාත්‍ය මංගල සමරවීර බැංකු ප්‍රධානීන් වෙත දැනුම් දී ඇත.

තවද ව්‍යාපාරිකයන්ගෙන් බැංකු අපේක්ෂා කරන ඇප රජය විසින් ලබාදීමට කටයුතු යොදා ඇති බැවින් මින් මතුවට ව්‍යාපෘති යෝජනාවේ ශක්‍යතාවය පමණක් සැලකිල්ලට ගෙන සහන පොලී පදනම මත ණය ලබා දීමට හැකිවන පරිදි රජය විසින් ණයකරුවන් වෙනුවෙන් ඇපකරයක් නිකුත් කිරීමට අවශ්‍ය කටයුතු යොදා ඇති බවද එම නිවේදනයේ සඳහන්ව තිබේ.

කාන්තාවන්ට වැඩි සහන

ව්‍යාපාර හා කර්මාන්ත ක්ෂේත්‍රයට කාන්තා සහභාගීත්වයද ලබාගැනීමේ අරමුණින් ව්‍යවසායකත්ව ශ්‍රී ලංකා වැඩසටහනට එක්වන කාන්තාවන්ට ණය ලබාදීමේදී 75% ක පොලී සහනයට අමතරව තවත් 10% ක අතිරික්ත පොලී සහනයක්ද, විශේෂ හැකියාවන් ඇති පුද්ගලයන්හට 15% ක අතිරික්ත පොලී සහනයක්ද රජය විසින් භාණ්ඩාගාර ඇපකර සමගින් ලබාදීමට තීරණය කර තිබේ.

එසේම කාන්තාවන්ට වැඩි අයිතියක් හිමි, අවම වශයෙන් කොටස්කරුවන් 10 දෙනෙකුගෙන් සමන්විතව එක් කොටස්කරුවෙකුගෙන් රු. 10,000 ක අවම ප්‍රාග්ධනය සමඟ ආරම්භ කරනු ලබන සමාගම් වලට මූල්‍ය නොවන තාක්ෂණික පහසුකම්ද රජය විසින් ලබාදෙනු ඇත.

තවද එවන් සමාගම්වලින් කල්බදු ක්‍රමයට ලබාගනු ලබන යන්ත්‍ර සූත්‍රවල කල්බදු පිරිවැයෙන් 75% ක් රජය විසින් දරනු ලබන බවත් ඒ සඳහා අවශ්‍ය ඇපකරයද භාණ්ඩාගාරය විසින් අදාළ බැංකු වෙත නිකුත් කරනු ලබන බවද මුදල් හා ජනමාධ්‍ය අමාත්‍යංශය නිකුත් කළ නිවේදනයේ සඳහන්ව ඇත.

View the embedded image gallery online at:
http://newstube.lk/economy?start=198#sigProId389dc255ca

Comment (0) Hits: 596

ඇමරිකානු GSP සහනය යළි ගන්න විදෙස් අමාත්‍යංශය වැඩ

හෙට දිනයෙන් (31) අවසන් වීමට නියමිත අමෙරිකාවට භාණ්ඩ අපනයනය කිරීමේදී ලබාදුන් GSP තීරු බදු සහනය යළි බලාත්මක කරවා ගැනීම සඳහා උත්සහ කරන බව විදේශ කටයුතු අමාත්‍යංශ ආරංචිමාර්ග සඳහන් කරයි.

ඒ වෙනුවෙන් ඉදිරියේදී රාජතාන්ත්‍රික මැදිහත්වීමක් සිදුකිරීමට අපේක්ෂා කරන බවද එම ආරංචිමාර්ග වැඩිදුරටත් සඳහන් කරයි.

මෙරට ඇතුලු රටවල් 120 කට ලබා දුන් මෙම තීරු බදු සහනය මෙම වර්ෂය සඳහා කටයුතු කල් තැබීමට පෙර අමෙරිකානු කොංග්‍රසය එය නැවත බලාත්මක කර නොමැති වීම මීට හේතුවී ඇත.

එසේම නිවේදනයක් නිකුත් කරමින් කොළඹ අමෙරිකානු තානාපති කාර්යාලයද එය තහවුරු කර තිබිණ.

ඒ අනුව ඇමරිකානු GSP අවසන්වීම හේතුවෙන් ශ්‍රී ලංකාව මෙන්ම එම සහනය ලැබූ අනෙක් රටවලට අමෙරිකානු වෙළඳපොල වෙත භාණ්ඩ අපනයනය කරන විට 2018 ජනවාරි‍ 01 වන දා සිට වරණීය නොවන තීරු බදුවලට යටත් වීමට සිදුවේ.

2016 වසරේදී මෙරට ඩොලර් බිලියන 2.8 වටිනාකමකින් යුතු භාණ්ඩ ඇමරිකාවට අපනයනය කර තිබු අතර මෙරට ප්‍රමුඛතම භාණ්ඩ අපනයනය කරන රටද අමෙරිකාව ය.

සංවර්ධනය වෙමින් පවතින රටවල ආර්ථික වර්ධනය කර ගැනීම සඳහා අමෙරිකාව මෙම වරණීය තීරු බදු සහන ක්‍රමය ක්‍රියාවට නංවනු ලැබුවේ 1976 වසරේ සිට ය.

Comment (0) Hits: 446

සිංහල අවුරුද්දට මිනිස්සු කන්නෙ බැඳුම්කර වාර්තාවද ?: පාරිභෝගික අයිතීන් සුරකීමේ ව්‍යාපාරය

පොහොර නොමැතිවීම නිසා මෙම කන්නයේ අස්වැන්න අඩුවන තත්ත්වයක් මතුව ඇති බැවින් අත්‍යවශ්‍ය ද්‍රව්‍ය මිල ඉහළයාම නැවැත්විය නොහැකිවන අවධානමක් මතුව ඇති බවත් ඒ පසුබිමේ එළඹෙන සිංහල හින්දු අවුරැද්දට ජනතාවට කන්න සිදුවන්නේ බැදුම්කර වාර්තාවද යන්න රජයෙන් ඇසීමට සිදුවන බව පාරිභෝගික අයිතීන් සුරැකීමේ ජාතික ව්‍යාපාරය ප්‍රශ්නකර සිටියි.

නිවේදනයක් නිකුත් කරමින් මේ බව සඳහන් කරන එම සංවිධානය වැඩිදුරටත් පෙන්වා දෙන්නේ බැඳුම්කර ගනුදෙනුව පිළිබඳ වාර්තාව හිඟන්නාගේ තුවාලයක් බවට පත්කර ගන්නේ නැතිව එය ප්‍රසිද්ධ කර කඩිනමින් චූදිතයන් නීතිය හමුවට පැමිණවීමට ජනාධිපතිවරයා කටයුතු කළයුතු බවය.

එසේම ජනාධිපති ලේකම්වරයා පවසා ඇති ආකාරයට එළඹෙන 17 වනදා බැඳුම්කර වාර්තාවෙන් කොටස් 26 ක් පමණක් පාර්ලි‌‌මේන්තුවට ඉදිරිපත් කරන්නේ නම් ටෙලි නාට්‍යයක් නරඔනසේ බැදුම්කර කොමිෂන් සභා වාර්තාව බලා ගැනීමට ජනතාවට සිදුවනු ඇති බවද එම නිවේදනයේ සඳහන්ව ඇත.

එහෙයින් අත්‍යාවශ්‍ය භාණ්ඩ මිල සීග්‍රයෙන් ඉහළ යමින් සහ ගොවියාට තම ගොවිතැන කර ගැනීමට පොහොර නැති පසුබිමේ බැඳුම්කරය රටේ ප්‍රධාන ප්‍රශ්නය කර නොගතයුතු බව එම නිවේදනයේ වැඩිදුරටත් අවධාරණය කර ඇත.

Comment (0) Hits: 431

ජනවාරි 01 සිට මත්පැන් බලපත්‍ර ගාස්තු වෙනස් වෙන හැටි මෙන්න

2018 වසරට බලපැවැත්වෙන පරිදි සිදුකර තිබෙන මත්පැන් බලපත්‍ර ගාස්තු සංශෝධනය හරහා සංචාරක හෝටල් සදහා ලබා දෙන රට බීම බලපත‍්‍ර ගාස්තුවල කැපී පෙනෙන වෙනසක් සිදුව තිබේ.

සුරා බදු ආඥාපනත යටතේ 2017 දෙසැම්බර් 11 දින අංක 2049/4 දරන අතිවිශේෂ ගැසට් පත්‍රය මගින් මෙම සංශෝධනය සිදුකර ඇති අතර එම නව සංශෝධනය අනුව ස්කාගාර බලපත්‍ර, නිෂ්පාදකයින්ගේ තොග වෙළෙඳ අරක්කු/ බියර්/ විදේශීය මත්පැන් බෙදාහැරීමේ බලපත්‍ර, රා බෝතල්ගත කිරීමේ බලපත්‍ර, විනාකිරි නිෂ්පාදනාගාර බලපත‍්‍ර, මත්පැන් සදහා තොග හා සිල්ලර වෙළෙද බලපත‍්‍ර ගාස්තුවල වෙනස්වීමක් සිදුව නැත.

තවද අදාළ සංශෝධනයට අනුව සංචාරක මණ්ඩලය අනුමැතිය සහිත සහ සංචාරක මණ්ඩල අනුමැතිය රහිත හෝටල් කාමර 5 හෝ ඊට වැඩි කාණ්ඩයේ හොටල් බලපත‍්‍ර ගාස්තුද අඩුකර ඇත.

මෙම සංශෝධනයක් 2018 ජනවාරි 01 වැනි දින සිට කි‍්‍රයාත්මක වීමට නියමිත අතර ඊට අදාලව නිකුත් කර ඇති ගැසට් නිවේදනය පහත දැක්වේ.

2049 04 S 1

2049 04 S 2

2049 04 S 3

Comment (0) Hits: 491

මාර්ග තදබදයට විසඳුමක් : බොරැල්ල සිට මරදානට ප‍්‍රමුඛතා මංතීරු ක‍්‍රමයක්

මාර්ග තදබදය අවම කිරීම සඳහා උපක්‍රමයක් ලෙස බොරැල්ල සිට මරදාන දක්වා ප්‍රමුඛතා මංතීරු ක්‍රමයක් හඳුන්වාදුන් බව මහානගර හා බස්නාහිර සංවර්ධන අමාත්‍ය පාඨලී චම්පික රණවක සඳහන් කරයි.

අමාත්‍යවරයා මේ බව සඳහන් කර සිටියේ ඊයේ (10 බොරැල්ල සිට මරදාන දක්වා බස් ප‍්‍රමුඛතා මංතීරු හඳුන්වාදීමේ වැඩසටහනේ සමාරම්භක අවස්ථාවට සහභාගී වෙමිනි.

එහිදී අදහස් දැක්වූ අමාත්‍යවරයා වැඩිදුරටත් අදහස් දක්වමින් සඳහන් කර සිටියේ ඉදිරියේදී බොරැල්ල සිට පිටකොටුව දෙසට තිබෙන මාර්ගයේ බස් ප‍්‍රමුඛතා මංතීරු හඳුන්වාදීමට බලාපොරොත්තු වන බවත් එය උදය වරුවේ ඇති වී තිබෙන මාර්ග තදබදයට විසඳුමක් ඇති කර ගැනීම සඳහා එක්තරා ආකාරයක පරීක්‍ෂණයක් ලෙස සිදුකරන බවත්ය.

එසේම පාර්ලිමේන්තු මංසන්දියේ සිට ආයුර්වේද මංසන්දියට තිබූ බස් ප‍්‍රමුඛතා මංතීරුව රාජගිරිය පාලම නිසා තාවකාලිකව අත්හිටුවීමට සිදුවූ බවත් පාලමේ යට කොටසේ තිබෙන සංවර්ධන කටයුතු නිමකර මාර්ග සංවර්ධන අධිකාරියේ අවසරයා ලැබුණු විගස එය නැවත විවෘත කිරීමට බලාපොරොත්තු වන බවද අමාත්‍යවරයා එහිදී සඳහන් කර සිටියේය.

එමෙන්ම මෙරට අද තිබෙන මාර්ග තදබදයේ ගැටළුව විසඳා ගැනීමට අනිවාර්යෙන්ම හැකියාව පවතින්නේ බස්රිය සහ දුම්රිය ඇතුළත් පොදු ප‍්‍රවාහන සේවය ශක්තිමත් කිරීමෙන් පමණක් එනිසාම ඉදිරි කාලයේදී විශේෂයෙන්ම මගී ප‍්‍රවාහන සේවයේ නවීකරණයක් අවශ්‍ය බවද අමාත්‍යවරයා පැවසීය.

මෙහිදී වැඩිදුරටත් අදහස් දැක්වූ අමාත්‍යවරයා සඳහන් කර සිටියේ සැහැල්ලූ දුම්රිය පද්ධති හඳුන්වාදීම පිළිබඳ වැඩකටයුතු මේ වසරේදී ආරම්භ කිරීමට බලාපොරොත්තු බවත් එය 2023 වන විට අවසන් කරලීමට අපේක්ෂා කරන බවත්ය. එසේම මෙම වසරේදී බස් සීග‍්‍රගාමී කි‍්‍රයාවලිය සඳහාද පියවර තබන බවද අමාත්‍යවරයා පැවසීය.

03 1

Comment (0) Hits: 445

ප්‍රංශ රජයෙන් යූරෝ මිලියන 13.9 ක සහන ණයක්

ප්‍රංශය විසින් යුරෝ මිලියන 13.9 ක (රුපියාල් මිලියන 2514 කට ආසන්න ) සහනදායි ණය මුදලක් මෙරටට ලබාදීමට එකඟතාව පළකර ඇති අතර ඊට අදාළ එකඟතා ගිවිසුම ඊයේ (27) මුදල් හා ජනමාධ්‍ය අමාත්‍යාංශයේදී අත්සන් තබා ඇත.

මුදල් හා ජනමාධ්‍ය අමාත්‍යාංශයේ ලේකම් ආචාර්ය ආර්.එච්.එස්. සමරතුංග සහ ශ්‍රී ලංකාවේ ප්‍රංශ තානාපති කාර්යාලයේ නියෝජ්‍ය ප්‍රධානි Isabelle Miscot මහත්මිය අතර එම අවබෝධතා ගිවිසුම අත්සන් තැබිණ.

French Agreement27122017

ආදාල සහන ණය මුදල මෙරටට හිමිවන්නේ කුඩා ප්‍රමාණයේ කිරි සැකසීමේ මධ්‍යස්ථාන 6ක් සංවර්ධනය කිරීමේ ව්‍යාපෘතිය සඳහාය.

යෝජිත ව්‍යාපෘතිය මඟින් දිනකට පැස්ටරීකරණය සහ ජීවානුකරණය කරන ලද කිරි ලීටර් 4500ක් පමණ නිෂ්පාදනය කල හැකි වන පරිදි පෙර තෝරාගන්නා ලද කුඩා ප්‍රමාණයේ කිරි නිෂ්පාදන සැකසීමේ සමුපකාර සමිති සහ සංවිධාන 6ක නවීන උපකරණ ස්ථාපනය කිරීම හරහා නවීකරණය කිරීමට අපේක්ෂිතය.

එසේම මෙම නවීකරණයෙන් පසුව ඉහල ගුණත්වයේ කිරි ආශ්‍රිත නිපැයුම් නිෂ්පාදනයට මෙන්ම අදාළ ක්‍රියාවලිය පරිගණක ආශ්‍රයෙන් නිරීක්ෂණය කිරීමටද හැකියාව ලැබේ.

මුදල් අමාත්‍යංශ ආරංචිමාර්ග සඳහන් කරන ආකාරයට 2020 වර්ෂය වන විට කිරි ආශ්‍රිත නිෂ්පාදනයන්ගෙන් ස්වයංපෝෂිත වීම සඳහා වූ රජයේ ඉලක්කය මෙන්ම කිරි ආශ්‍රිත නිෂ්පාදන සඳහා වන දේශීය ඉල්ලුම සහ සැපයුම අතර පරතරය අවම කිරීමට දායකත්වය සැපයීමද අදාළ ව්‍යාපෘතියේ අරමුණ වෙයි.

Comment (0) Hits: 432

රාජ්‍ය මූල්‍ය ප්‍රාථමික ගිණුමේ අතිරික්තයක්

රජයේ සාර්ථක ආදායම් සහ වියදම් කළමනාකරණයේ ප්‍රතිඵලයක් ලෙස වසර 63 කට පසුව අයවැයේ රාජ්‍ය මුල්‍ය ප්‍රාථමික ශේෂයේ රුපියල් බිලියන 21.9 ක් වාර්තා වී ඇති බව මුදල් හා ජනමාධ්‍ය අමාත්‍යංශය වාර්තා කරයි.

නිදහස ලැබීමෙන් පසුව අයවැය අතිරික්තයක් මේ අයුරින් වාර්තා වී ඇත්තේ මීට පෙර 1954 වන බවත් එය දළ දේශීය නිෂ්පාදිතයෙන් 0.5%ක් බවද අමාත්‍යංශය නිකුත් කර ඇති නිවේදනයේ සඳහන්ව තිබේ.

එම නිවේදනය අමාත්‍යංශයේ ප්‍රවෘත්ති අධ්‍යක්ෂ එම.ඒ. හසන්ගේ අත්සනින් යුතුව නිකුත් කර ඇති අතර එහි වැඩි දුරටත් සඳහන් වන්නේ 1950 සිට 1970 දක්වාත්, 1973 සිට 1993 දක්වාත් අයවැය ජංගම ගිණුමේ අතිරික්තයක් වාර්තා විය. එහෙත් 1994 සිට මේ දක්වා අයවැය පරතරය, ජංගම ගිණුමේ පරතරය සහ රාජ්‍ය මූල්‍ය ප්‍රාථමික ගිණුමේ පරතරයේ ද ඍණ අගයක් එම කාලවල අඛණ්ඩව පැවැති බවය.

2017 වසරේ ගෙවී ගිය මාස දහයක කාලය අවසානයේ රාජ්‍ය ප්‍රාථමික මූල්‍ය ශේෂය රුපියල් බිලියන 21.9ක් ලෙස දැක්වෙන බවත් 2016 වසරේ මුල් මාස දහය අවසානයේ එම අගය දැක් වූයේ රුපියල් බිලියන 37ක ඍණ අගයක් ලෙස වාර්තා කරමින් ප්‍රාථමික ශේෂයේ අතිරික්තයක් වාර්තා වීම රටක ආර්ථිකයේ වර්ධනීය ලක්ෂණයක් වන අතර මෙය ණය ගෙවීමේ කළමනාකරණ හැකියාව මෙමගින් තවත් ඉහළ යනු ඇති බවද එහි සඳහන්ය.

මුදල් හා ජනමාධ්‍ය අමාත්‍යංශය වෙනුවෙන් එහි ප්‍රවෘත්ති අධ්‍යක්ෂ එම.ඒ. හසන්ගේ අත්සනින් යුතුව නිකුත් කල මාධ්‍ය නිවේදනය පහත දැක්වේ.

Comment (0) Hits: 468

රත්මලාන ගුවන් තොටුපළේ සිවිල් ගුවන්සේවා අරඹයි

රත්මලාන ගුවන් තොටුපළ සිවිල් ගුවන්සේවා සඳහා යොදාගත හැකි ආකාරයට සංවර්ධනය කිරීම කෙරෙහි රජයේ අවධානය යොමුව ඇත.

 වාර්තා වන ආකාරයට අක්කර 460 කින් සමන් විත රත්මලාන ගුවන් තොටුපළේ අක්කර 25ක කොටසක් මෙසේ සිවිල් ගුවන් සේවා කටයුතු සඳහා යොදා ගැනීමට නියමිතව ඇති අතර කොළඹ නගරයට ඉතා ආසන්නව පවතින මෙම ගුවන්තොටුපොළේ සිවිල් ගුවන් මෙහෙයුම් කටයුතු ප්‍රවර්ධනය කිරීම මඟින් විශාල ප්‍රතිලාභයක් ලබාගැනීම මෙහි අපේක්ෂාව වී තිබේ.

රත්මලාන ගුවන්තොටුපොළ 1938 වර්ෂයේදී පිහිටුවන ලද අතර 1969 වර්ෂයේදී කටුනායක ගුවන්තොටුපොළ විවෘත කරනු ලබන තෙක් දේශීය හා ජාත්‍යන්තර ගුවන් මෙහෙයුම් සඳහා ද භාවිත කළේ එම ගුවන් තොටුපොළයි.

ඒ අනුව වාණිජ සිවිල් ගුවන් යානා මෙහෙයුම් සඳහා ශ්‍රී ලංකාවේ පිහිටුවන ලද පළමු ගුවන්තොටුපොළ ලෙසද වාර්තා වන්නේ රත්මලාන ගුවන් තොටුපළ යි.

 

Comment (0) Hits: 537

මෙරට රැකියා ඇබෑර්තු 4 97 302ක්

මෙරට විවිධ ක්ෂේත්‍ර ආශ්‍රිතව රැකියා ඇබෑර්තු 4 97 302ක් පවතින බව ජන ලේඛන සහ සංඛ්‍යාලේඛන දෙපාර්තමේන්තුව පෙන්වා දෙයි.

එම ඇබෑර්තුවලින් වැඩිම සංඛ්‍යාවක් යන්ත්‍ර ක්‍රියාකරුවන් සහ ආරක්ෂක නියාමකයින් සඳහා වූ රැකියා ඇබෑර්තුය.

ජන ලේඛන සහ සංඛ්‍යාලේඛන දෙපාර්තමේන්තුව මේ බව දක්වා ඇත්තේ පසුගිය වසරට අදාළ ව නිකුත් කල ශ්‍රම ඉල්ලුම පිළිබඳ සමීක්ෂණ වාර්තාව ප්‍රකාශයට පත්කරමින්ය.

මෙරට මිලියන 5 කට ආසන්න පිරිසක් පෞද්ගලික අංශයේ රැකියාවල නිරතව සිටින බවද එම වාර්තාවේ සඳහන්ව ඇත.

Comment (0) Hits: 552

ලංකාව ලෝකයේ ජනප්‍රියම සංචාරක ගමනාන්තයක් - Eurasia Review

ලෝකයේ වඩාත් ජනප්‍රිය සංචාරක ගමනාන්තයක් බවට ශ්‍රී ලංකාව පත්ව ඇතැයි ජාත්‍යන්තර ජනප්‍රිය සඟරාවක් වන Eurasia Review වාර්තා කර ඇත.

ඕස්ට්‍රේලියාවේ Virtuse Luxe 2018 වාර්තාව පාදක කොටගෙන එම වාර්තාව සකස්කර ඇත.

එසේම මීට පෙර Family Traveler Awards උළෙල හා ලන්ඩන්හි පැවැති Travel Bulletin Star Awards උළෙලේ දීද ඉතා වැදගත් සංචාරක ගමනාන්තයක් වශයෙන් සම්මාන දිනා ගැනීමට ද ශ්‍රී ලංකාව සමත්ව ඇත.

තවද National Geographic Channel, Lonely Planet හා අනෙකුත් නාලිකා ගණනාවකද ශ්‍රී ලංකාව මේ වන විට නිවාඩු ගතකිරීමට සහ සංචාරය සඳහා හිතකරවී ඇති බවට වාර්තා පලවී තිබිණ.

එහිදී එම වාර්තා පෙන්වාදී ඇත්තේ මෙරට සාම ක්‍රියාවලිය සාර්ථකවී ඇති අතර සංචාරකයන්ගේ ආරක්ෂාවද ඒ තුළ තහවුරුව ඇති බවය.

Comment (0) Hits: 445

ආනයනික පොල් මද ඉදිරි සතියේ වෙළඳපොළට

මෙරට වෙළඳපොලේ ඉහළ ගොස් තිබෙන පොල් මිල පාලනය සඳහා ආනයනය කරන්නට යෙදුනු පොල් මද එළඹෙන සතියේදී මෙරට වෙළඳපොළට නිකුත් කිරීමට හැකිවනු ඇති බව වැවිලි කර්මාන්ත අමාත්‍යංශය සඳහන් කරයි.

වාර්තා වන ආකාරයට අදාළ පොල් මද තොග මෙරටට ළඟාවීමෙන් පසුව ඒවා ශාඛ නිරෝධායන ආයතනය මඟින් පරීක්ෂා කිරීමෙන් පසුව වෙළඳපොලට නිකුත් කෙරෙණු ඇත.

පොල් මද ආනයනය කිරීම සඳහා රජය අවසරදීමත් සමඟ ආනයනකරුවන් 11 දෙනෙකු ඒ සඳහා ඉල්ලුම් කර ඇති අතර ඉදිරියේදී පිලිපීනයෙන්ද පොල් මද තොග ආනයනය කිරීමට නියමිත බවද වාර්තා වෙයි.

එසේම මේ වන විට පොල් ගෙඩියක් සඳහා රුපියල් 75 ක උපරිම සිල්ලර මිලක් නියම කර ඇති අතර ඊට වැඩි මුදලට පොල් විකුණන වෙළෙන්දන් වැටලීම සඳහා පාරිභෝගික සේවා අධිකාරියේ වැටලීම් නිලධාරීන් යොදවා ඇති බවත් වැඩි මිලට අලෙවි කරන පුද්ගලයින් සොයා වැටලීම් අඛණ්ඩව සිදු කරන බවත් පාරිභෝගික අධිකාරිය සඳහන් කරයි.

Comment (0) Hits: 451

දෙද්දූව සංචාරක කලාපය රටටත් ජනතාවටත් ආර්ථික ශක්තියක් - ඇමති සාගල

දෙද්දූව සංචාරක කලාපය ඇති කිරීමෙන් රටට නවමු අත්දැකීමක් එක්වන බවත් ඒ හරහා දෙද්දූව අවට ජනතාවගේ ආර්ථිකය ශක්තිමත් කිරීම ප්‍රධාන අරමුණ බවත් නීතිය හා සාමය සහ දක්ෂීණ සංවර්ධන අමාත්‍යය සාගල රත්නායක ප්‍රකාශ කරයි.

අමාත්‍යවරයා මේ බව ප්‍රතාශ කරන ලද්දේ දෙද්දූව සංචාරක කලාපය ඉදිකිරීමට නියමිත භූමියේ මූලික සැකසුම් කටයුතු පිළිබඳ නිරීක්‍ෂණ චාරිකාවට එක්වෙමිනි.

එහිදී අදහස් දැක්වූ අමාත්‍යවරයා මෙසේද පැවසීය.

මේක අක්කර 1800ක ව්‍යාපෘතියක්. එයින් 60% ක ප්‍රමාණය ජලය , 40% ක ප්‍රමාණය ගොඩබිම වශයෙන් තමයි අපි මේ ව්‍යාපෘතිය දියත් කරන්නේ. මේ ව්‍යාපෘතියේ විශේෂත්වය තමයි අපි පරිසරය ආරක්ෂා කරගෙන සියලු සංවර්ධන කටයුතු සිදුකිරීම. ඒ වගේම තමයි සංචාරකයන්ට ඔවුන්ගේ නිවාඩුව ගත කරද්දී විවිධ ක්‍රියාකාරකම් සමඟ ඒකරාශි වෙමින් ඒ කාලය තුළ මේ සංචාරක කලාපය තුළ ගත කරන්නට හැකි වීම.

මේ අක්කර 1800 ක භූමි ප්‍රදේශය තුළ ජල ක්‍රීඩා කරන්න, වාණිජ්‍ය කටයුතු, රෙස්ටෝරන්ට්, හෝටල් ඉතා ඉහළ ගුණාත්මකභාවයකින් යුතුව ඇති කරනවා.

ඒ විතරක් නෙවෙයි මේ කටයුතුවලට මේ ප්‍රදේශයේ ජනතාවටත් එකතු වෙන්න පුළුවන් වෙනවා.

මේ ව්‍යාපෘතිය නිසා ප්‍රදේශයේ ජනතාවට අතිරේක ආදායම් මාර්ග විවෘත වෙනවා. ඔවුන් දැනට සිදු කරන කර්මාන්තත් සංචරක ව්‍යාපාරය සමඟ ඒකරාශී කරගෙන කටයුතු කරන්න අවශ්‍ය පුහුණුව ලබා දෙන්නත් අපි කටයුතු කරනවා.

මේ අලුත් කර්මාන්ත , අලුත් රැකියා අවස්ථා පවා මේ නිසා ඇති වෙනවා. මේ සංචාරක කලාපය නිසා හැමෝටම ආර්ථික වශයෙන් ශක්තිමත් තත්ත්වයක් ඇති වෙනවා. මේ ව්‍යාපෘතියේ දී අපි පරිසර අධ්‍යයනයක් විතරක් නෙවෙයි ජලය සම්බන්ධ අධ්‍යයනයකුත් කරලා තමයි වැඩ කටයුතු ආරම්භ කරන්නේ.

ඒ නිසා තමයි ඉඩඩම් අත්පත්කර ගැනීමේ කටයුතු අවසන් කරලා වත් මාස කීපයක කාලයක් ඒ අධ්‍යයන සඳහා වෙන් කරලා මාර්තු මාසයේ දී මේකට හොඳම හොඳම වටිනාකම ගෙනැල්ලා දෙන වැඩසටහන ක්‍රියාත්මක කරන්න සැලසුම් කර තිබෙන්නෙ.

මෙම අවස්ථාවට අග්‍රාමාත්‍ය රනිල් වික්‍රමසිංහ , පාර්ලිමේන්තු ප්‍රතිසංස්කරණ හා ඉඩම් අමාත්‍ය ගයන්ත කරුණාතිලක, සංචාරක සංවර්ධන මණ්ඩලයේ සභාපති කාවන් රත්නායක , දක්ෂිණ සංවර්ධන මණ්ඩලයේ සභාපති ශිරන්ත හේරත් ඇතුළු පිරිසක් එක්ව සිටියහ.

Comment (0) Hits: 463

ජනාධිපති, කෝටි 250කින් පොහොර ගැටලුව විසඳන්න යයි

මේ දිනවල මතුව ඇති පොහොර හිඟයට විසඳුම් සැපයීම සඳහා රුපියල් කෝටි 250ක් නිදහස් කිරීමට ජනාධිපතිවරයා දැනුම්දී ඇති බව වාර්තා වෙයි.

ඊයේ(30) පොළොන්නරුව බැඳීවැව ප්‍රදේශයේ ජනහමුවකදී ජනාධිපතිවරයා මේ බව පැවසු අතර පොහොර ලබා ගැනීමට අවශ්‍ය මුදල් බැංකුවලට ලැබී නොමැති බවට ලැබුණු තොරතුරකට අනුව මෙම තීරණය ලබාදුන් බවත් අදාල මුදල් ගොවි ජනතාවගේ ගිණුම් වෙත යොමු කිරීමට උපදෙස් දී ඇති බවද ජනාධිපතිවරයා එහිදී සඳහන් කර ඇත.

එසේම සංවර්ධනය සඳහා අවශ්‍ය මුදල්වල කිසිදු අඩුපාඩුවක් නොමැති බවත් ඒ සඳහා අවශ්‍ය වන්නේ, ගමේ සංවර්ධනයට කැපවෙන ජනතා නියෝජිතයින් පිරිසක් බවත් එහිදී වැඩිදුරටත් අදහස් දක්වමින් ජනාධිපතිවරයා සඳහන් කර ඇත.

 

 

Comment (0) Hits: 616

e ෂෝර්ට් නෝට්2: රාජ්‍ය සේවකයන්ට ප්‍රසාද දීමනා

2017 වර්ෂයට අදාළ රාජ්‍ය සංස්ථා සහ රජය සතු සමාගම් වල සේවයේ නිරත කාර්ය මණ්ඩලවලට ප්‍රසාද දීමනා ගෙවීම සඳහා කැබිනට් අනුමැතිය හිමිව ඇත.

ඒ අනුව මෙවර ප්‍රසාද දීමනාවේ උපරිමය රුපියල් පහළොස් දාහක්ය. අවමය රුපියල් තුන්දහසක්ය.

මුදල් සහ ජනමාධ්‍ය අමාත්‍යංශයේ ප්‍රවෘත්ති අධ්‍යක්ෂ එම්.ඒ .හසන් ගේ අත්සනින් යුතුව නිකුත් කර ඇති මාධ්‍ය නිවේදනයට අනුව ඛාණ්ඩ හතරක් යටතේ මෙම ප්‍රසාද දීමනා ලබාදීමට නියමිතව ඇත.

ඒ 1. “පෙර වර්ෂයේ අලාභදායි තත්ත්වයන් වළක්වා මෙම වර්ෂය තුළ දී ලාභය උපයාගෙන ඇති දිරි දීමනා ගෙවනු නොලබන ආයතනවල සේවකයන් වෙනුවෙන් රුපියල් 15,000ක් ප්‍රසාද දීමනා ලෙස ගෙවිය හැකි ය.

2. පෙර වර්ෂයේ පැවැති අලාභදායි තත්ත්වය මෙම වර්ෂය තුළ දී ලාභදායී තත්ත්වයට පත් කරගෙන ඇති දිරි දීමනා ගෙවා ඇති ආයතනවල සේවකයන් වෙනුවෙන් රුපියල් 13,500ක ප්‍රසාද දීමනාවක් අනුමත කර ඇත.

3.අදාළ වර්ෂය තුළ අලාභදායී තත්ත්වයක් වාර්තා කළ ද පෙර වර්ෂයට සාපේක්ෂව අලාභය අවම කරගෙන ඇති ආයතනවල සේවකයන් වෙත මෙතෙක් ගෙවූ රුපියල් 3,000 ප්‍රසාද දීමනාව රුපියල් 5,000ක් දක්වා වැඩි කර ගෙවීමට අනුමැතිය ලබා දී තිබේ.

4.අදාළ වර්ෂය තුළ අලාභදායී තත්ත්වයක් වාර්තා කර එම අලාභය පෙර වර්ෂයට වඩා අඩු කර ගැනීමට නොහැකි වූ ආයතනවල සේවකයන් වෙනුවෙන් රුපියල් 3,000ක ප්‍රසාද දීමනා හිමි වෙයි.

වශයෙන්ය.

රජයේ රස්සාවක් කිරීම ඇතැමුන්ගේ සිහිනයක් වන අතර තවත් සමහරුන් රාජ්‍ය සේවය දෙස බලා බත් කන්නත් කැමති නැත. කැමැත්ත කියන දේ ගැන එක් එක් පුද්ගලයන්ට විවිධ අදහස් ඇත. ඒ නිසා පෞද්ගලික රුචි අරුචිකම් මෙතැනට අදාළ නැත.

නමුත් රටේ ආර්ථිකයත් රාජ්‍ය සේවයත් අතර ඇත්තේ දැඩි සම්බන්ධයකි. පසුගිය වසර කිහිපය තුළ විශ්‍රාම වැටුප් ගෙවීම පවා හය ගුණයකින් වර්ධනය වී ඇත. එසේම ඉහත ප්‍රසාද දීමනා පවා කාර්ය සාධනය සහ ප්‍රගතිය පදනම් කරගෙන සකස්කර ඇති නමුත් පාඩුව අවම කරගනු ලබන ආයතනයේ සේවකයාට පසුගිය අවස්ථාවන්ට වඩා රුපියල් 2000ක වැඩිපුර ප්‍රසාද දීමනාවක් ලබාදී ඇත. පාඩු ලබන ආයතන වල සේවකයන්ට පවා රුපියල් 3000 ක අවම ප්‍රසාද දීමනාවක් හිමිව ඇත.

ඒ කියන්නේ රාජ්‍ය සේවකයා සාමාන්‍ය රැකියාවක් කරන අයෙකුට වඩා සැලකිය යුතු සමාජ ආරක්ෂණයක් ලබන බවය. එනම් ඔහුගේ හෝ ඇයගේ සේවය සැළකිල්ලට නොගෙන සමස්ථ රටේ ජනතාවගේ බදු මුදලින් ඔවුන් නඩත්තු කරන බවය. වේලක් අතපසු කරන්න සීනි අල්ලට ගෙන කහට කෝප්පය බොන අය පවා ඊට දායකවී ඇත. ඒ සියල්ල පසුපස ඇති එකම අපේක්ෂාව රාජ්‍ය සේවකයා සමස්ථ රාජ්‍යයේ ජනතාව වෙනුවෙන් සිය සේවය නිසිලෙස ලබාදෙනු ඇති බවය.

ඒ හැර පාඩු ලබන ආයතනයක සේවකයෙකුට ප්‍රසාද දීමනා ගෙවීමට තමන්ගේ බදු මුදල් ගැනීම අසාධාරණ බව කියා කවුරුත් කෑ ගහන්නේ නැත. ඒ පසුබිමේ රාජ්‍ය සේවක සියලුම දෙනාටද වගකීමක් ඇත. එනම් එක් එක් රාජ්‍ය සේවකයා තමන් සතු වගකීම නිසි ලෙස ඉටුකිරීමය. වැඩි දෙයක් අවශ්‍ය නැත, ලොක්කන් සමඟ හැපීමට යාමේදී පොඩි මිනිහාව නොතලන්න වගබලා ගන්න. දැනට ඒ හොඳටම ප්‍රමාණවත්ය.

මුදල් හා ජනමාධ්‍ය අමාත්‍යංශය නිකුත් කළ නිවේදනය පහත දැක්වේ.

ceb f 1

ceb f 2

Comment (0) Hits: 518

e ෂෝර්ට් නෝට් 3: ඇමරිකානු GSP අහිමිවීම ඇඟලුම් කර්මාන්තයට ගැටළුවක් නොවේ

ඇමරිකානු GSP සහනය අහිමිවීම මෙරට ඇඟලුම් කර්මාන්තයට ගැටළුවක් නොවන බව වෙළඳපොල ආරංචිමාර්ග අවධාරණය කරයි.

ඒ ඇමරිකානු වෙළඳපොල වෙත මෙරටින් අපනයනය කරන ප්‍රධාන භාණ්ඩය ඇඟලුම් වුවත් එම සහනය ඇඟලුම් සඳහා කොහොමටත් නොතිබූ නිසාය.

ඒ අනුව ඇමරිකානු GSP සහනය ලැබීමට අදාලව මෙරට අපනයන අතර ප්‍රධාන තැනක් ගෙන තිබුණේ ස්වර්ණාභරණ නිෂ්පාදනයේදී භාවිතා කෙරෙන අමුද්‍රව්‍ය, තෝරාගත් කෘෂිකාර්මික සහ මත්ස්‍ය නිෂ්පාදන, සහ තෝරාගත් රසායනික ද්‍රව්‍ය, ඛනිජ ද්‍රව්‍ය හා කිරිගරුඬ පාෂාණ සහ බුමුතුරුණු වැනි භාණ්ඩ වන අතර සහනය අහිමිවීම හේතුවෙන් මෙම අපනයන සඳහා යම් බලපෑමක් ඇතිවිය හැකි බවද වෙළඳපොල ආරංචිමාර්ග පෙන්වා දෙයි.

කෙසේ වුවත් ශ්‍රී ලංකාවේ තනි විශාලතම අපනයන වෙළෙඳපොළ වන්නේ ඇමරිකා එක්සත් ජනපදයයි. මෙරට සමස්ථ අපනයනයෙන් 27.5 % කට අධික ප්‍රමාණයක් ඇමරිකාව වෙත අපනයනය කරන අතර 2017 වසරේ පළමු මාස 10 තුළ පමණක් එක්සත් ජනපදයට සිදුකළ අපනයනවල වටිනාකම ඩොලර් බිලියන 2.4 ක් පමණ වෙයි. එසේම 2016 වසරේ දී ඇමරිකාවට සිදුකල අපනයනවල වටිනාකම ඇමරිකානු ඩොලර් බිලියන 2.8 ක පමණ අගයක් ගෙන ඇත. 2016 වසරේ මෙරට සමස්ථ අපනයන ආදායම ඇමරිකානු ඩොලර් බිලියන 10.3 ක් පමණ වූ අතර ඒ පසුබිම අනුව ඇමරිකානු වෙළඳපොල මෙරට අපනයන වෙළඳපොළට තීරණාත්මක වැදගත් කමක් ඇති බව ප්‍රතික්ෂේප කල නොහැකිය.

ඇමරිකානු GSP සහනය 1974 ඇමරිකා එක්සත් ජනපද වෙළඳ පනත හරහා බලාත්මක්ක කෙරුණක් වන අතර එය ක්‍රියාත්මක කෙරුණේ 1976 ජනවාරි 01 වනදා සිටය. එහි අපේක්ෂාව වුයේ සංවර්ධනය වෙමින් පවතින රටවල ආර්ථික වර්ධනය ප්‍රවර්ධනය කිරීමට සහය දැක්වීමය.

මෙම බදු සහන ක්‍රමය කාලාන්තරව කල් ඉකුත් වන අතර එය ක්‍රියාකාරී තත්ත්වයේ පවත්වා ගැනීම සඳහා එක්සත් ජනපද කොංග්‍රස් මණ්ඩලය විසින් එය යළි බලාත්මක කළ යුතුව ඇත. ඒ අනුව 2015 වසරේදී කරනු ලැබූ බලාත්මක කිරීම (එච්.ආර්. 1295) 2017 දෙසැම්බර් මස 31 වැනිදා කල් ඉකුත් වේ. නමුත් මේ වන විට මතුව ඇති ගැටලුව වන්නේ 2017 වසර සඳහා කොංග්‍රස් මණ්ඩලය කල් තැබීමට පෙර එය බලාත්මක නොකිරීමය.

එසේම එක්සත් ජනපද කොංග්‍රස් මණ්ඩලයෙන් GSP සහනය බලාත්මක කිරීම පමාවූ පළමු අවස්ථාව මෙය නොවේ. මීට පෙරද එවැනි තත්වයන් මතුව ඇති අතර GSP සහනය නැවත බලාත්මක කල පසුව පමා වූ කාලය තුළ අපනයනය කරනු ලැබූ අදාල භාණ්ඩ වෙනුවෙන් අය කළ තීරුබදු, ආනයනකරුවන්ට නැවත ගෙවීම සඳහා අතීතයට බලපාන ආකාරයේ ප්‍රතිපාදනයක් GSP සහන වැඩසටහනේ ඇතුළත්ය.

ඒ අනුව ඇමරිකානු GSP සහන වැඩසටහන යටතේ ශ්‍රී ලංකාව ඇතුළු රටවල් ඇමෙරිකා එක්සත් ජනපදයට අපනයනය කරනු ලබන භාණ්ඩ 2018 ජනවාරි 01 වැනිදා සිට වරණීය නොවන තීරු බදුවලට යටත් වීමට නියමිත නමුත් අදාළ සහනය යලි ලබාදීමට එක්සත් ජනපද කොන්ග්‍රස් මණ්ඩලය කටයුතු කළහොත් පමාවූ කාලයට අදාළ තීරුබදු නැවත ලැබීමේ අවස්ථාවද අපනයනකරුවන්ට ඇත.

newstube.lk වෙබ් අඩවියේ පළවන සියළු ප්‍රවෘත්ති සහ විශේෂාංග ආශ්‍රිතව කිසිවකුට හානිකර යමක් පළ වී ඇත්නම් ඒ අගතියට පත් පාර්ශවයට එයට ප‍්‍රතිචාර දැක්වීමට අදාළ පාර්ශ්වයට ඇති අයිතියට අපි ගරු කරමු. ඔබගේ ප්‍රතිචාර This email address is being protected from spambots. You need JavaScript enabled to view it. යන විද්‍යුත් ලිපිනයට යොමුකරන්න.

 

Comment (0) Hits: 445

e-ෂෝර්ට් නෝට් :1 2017 ආර්ථික වර්ධන වේගය - කෘෂිකර්මය නිසා අතරමග

2017 වසරේ තුන්වන කාර්තුවට අදාළ ආර්ථික වර්ධනය පිළිබඳ ජනලේඛන හා සංඛ්‍යාලේඛන දෙපාර්තමේන්තු වාර්තාව අනුව මේ වසරේ තුන්වන කාර්තුවේ මෙරට ආර්ථික වර්ධන වේගය 3.3%කි.

එහෙත් 2017 වසරට අදාලව රජය අපේක්ෂා කළ ආර්ථික වර්ධන වේගය වුයේ 5.5%- 6% අතර අගයක් වන අතර ඒ අනුව මේ මේ ලැබී තිබෙන්නේ රජය අපේක්ෂා කළ දත්තය නොවේය.

ජනලේඛන හා සංඛ්‍යාලේඛන දෙපාර්තමේන්තු වාර්තාවට අනුව මීට හේතු වී ඇත්තේ රටේ කෘෂි කර්මාන්ත අංශයේ සිදුව ඇති බිඳ වැටීමය. ඒ අනුව තෙවන කාර්තුවේ කෘෂි කර්මාන්ත අංශයේ වර්ධනය වාර්තා වී ඇත්තේ -1.5ක් ලෙසය.

අවම වශයෙන් කෘෂි කර්මාන්ත අංශයේ තත්ත්වය .5ක අගයක හෝ පවත්වා ගන්නට හැකි වූවා නම් නිශ්චිතවම අපේක්ෂිත ඉලක්කයට යාමට හැකියාව තිබිණ. එහෙත් දැන් සිදුව ඇත්තේ 2017 වසරේ ආර්ථික වර්ධන වේගය 4% හෝ 4.2% වැනි ආසන්න අගයක නැවතීමය.

කෘෂි අංශයේ මෙම පසුබෑමට හේතුව පසුගිය සාමය පුරා අඛණ්ඩව එල්ලවූ අයහපත් කාලගුණයේ බලපෑමය.

අයහපත් කාලගුණය මත කෘෂි කර්මාන්තය අර්බුදයට යැවුණු විට ආහාර නිෂ්පාදනය අඩුවීම අනිවාර්යයක්ය. අත්‍යාවශ්‍ය භාණ්ඩ කිහිපයක මිල පසුගිය සමයේ ඉහල ගියේද ඒ කාරණය නිසාය.

කෙසේ වුවත් රජය මීට පිළියම් යොදනු ලැබුවේ අත්‍යාවශ්‍ය භාණ්ඩ සඳහා සහන මිලක් ක්‍රමයක් හඳුන්වා දෙමින්ය. ඒ අනුව සහල්, සීනි, අල, ළුණු, ටින් මාළු, හාල්මැස්සන් ඇතුළු භාණ්ඩ 8 සඳහා මෙම මිල සහනය හිමිවේ.

සතොස වැනි රාජ්‍ය ආයතන මෙන්ම තොග වෙළඳාමේ සහ සුපර් මාර්කට් ක්ෂේත්‍රයේ නියුතු පෞද්ගලික සමාගම් හරහාද මේ සහනය නිකුත් කිරීමට රජය පියවර ගෙන ඇත.එසේම පොල් ඇතුළු තවත් නිෂ්පාදන කිහිපයක් ආනයනය කිරීමේ විශේෂ අවසරයක්ද රජය මීට පෙර නිකුත් කෙරින.

ආහාර නිෂ්පාදනය ඇතුළු කෘෂි අංශයේ පසුබෑම ජනතාවට බරක් නොවීම සඳහා තාවකාලික පිලියමක් ලෙස එය සාර්ථක වුවත් එයා දීර්ඝකාලීන උපායක් නොවිය යුතුය.

ගංවතුර, නියඟය, අධික වර්ෂාව වැනි ස්වාභාවික ආපදා මුළුමනින්ම වලකාලිය නොහැකි බවට විවාදයක් නැත. එහෙත් දේශගුණික රටාවේ වෙනස්වීම් සැලකිල්ලට ගෙන ඊට අනුව කෘෂි කර්මාන්තය ප්‍රතිසංවිධානය කිරීමට අවධානය යොමුකළ යුතුව ඇත. මෝසම් රටා වෙනස්වී ඇත්නම් මෝසම ඉලක්කකර වගා කිරීම වෙනුවට විකල්ප සොයා බැලීම ඊට එක නිදසුනක් පමණය.

එහෙත් මේ සියල්ලට වඩා වැදගත් වන්නේ කෘෂි කර්මාන්තය මත රටේ ආර්ථික වර්ධන වේගය නැවතීමට ඉඩ නොතැබීමය. විශේෂයෙන්ම කර්මාන්ත මෙන්ම සේවා අංශයේ සීඝ්‍ර වර්ධනයක් අත්කර ගැනීමට අවධානය යොමු කිරීමය. එය 2017 වසරේ තුන්වන කාර්තුවට අදාළ ආර්ථික වර්ධනයට අදාළ දත්ත ඇසුරෙන් අප උගත් පාඩම බවට පත්කර ගත යුතුව ඇත.

 

Comment (0) Hits: 501

Page 12 of 13