ඉරාන - ශ‍්‍රී ලංකා රාජ්‍ය නායකයින් හමුවේ : ගිවිසුම් 05 කට අත්සන් තැබේ !

ඉරානයේ දෙදින රාජ්‍ය සංචාරයක නිරත ජනාධිපති ගරු මෛතී‍්‍රපාල සිරිසේන මැතිතුමා සහ ඉරාන ජනාධිපති හසන් රූහානි මහතා අතර නිල හමුව ඊයේ  (13) සිදුව ඇත.

ටෙහෙරාන් නුවර පිහිටි ජනාධිපති මන්දිරය වන Sadabaad Palace වෙත ගිය ජනාධිපතිතුමා ඉරාන ජනාධිපති හසන් රූහානි මහතා විසින් ඉතා උණුසුම් අන්දමින් පිළිගත් බවත් ජනාධිපති මෛතී‍්‍රපාල සිරිසේන  පිළිගැනීම වෙනුවෙන් විචිත‍්‍රවත් පිළිගැනීමේ උත්සවයක්ද  මෙහිදී සංවිධානය කර තිබූ බව ජනාධිපති මාධ්‍ය අංශය නිකුත් කළ නිවේදනයේ සඳහන්ව ඇත.

ඊට අනුව නායකයින් දෙදෙනා අතර සුහද කතා බහකින් අනතුරුව ද්විපාර්ශ්වික සාකච්ඡා  ආරම්භ කර ඇති අතර අතීතයේ පටන් දෙරට අතර පවතින ආර්ථික සහ වෙළඳ සබඳතා  නව මාර්ග ඔස්සේ ඉදිරියට ගෙනයාම පිළිබඳ මෙහිදී නායකයින් දීර්ඝ වශයෙන් සාකච්ඡා කර ඇත.

එහිදී  ජනාධිපති මෛති‍්‍රපාල සිරිසේන සඳහන් කර ඇත්තේ ශ‍්‍රී ලංකාවේ ආර්ථික සමෘද්ධිය සඳහා ඉරාන රජයේ සහය අපේක්ෂා කරන බවය. 

එසේම ඛනිජ තෙල්, තේ සහ සංචාරක ක්ෂේත‍්‍රයේ දැනට පවතින සහයෝගීතාවය තවදුරටත් පුළුල් කර ගැනීමට ද නායකයින් සාකච්ඡා කර ඇත.

ජනාධිපතිවරයාගේ ඉරාන සංචාරය පිළිබඳ ජනාධිපති මාධ්‍ය අංශය නිකුත්කර ඇති නිවේදනයේ වැඩිදුරටත් මෙසේද සඳහන්ව ඇත.

"ශ‍්‍රී ලංකාවේ තෙල් පිරිපහදු කටයුතු සඳහා  මීට වසර 50 කට පමණ පෙර සිට ඉරානය සහය ලබාදෙන අතර තෙල් පිරිපහදු ක්ෂේත‍්‍රය යාවත්කාලීන කිරීමට සහ වැඩිදියුණු කිරීමට අවශ්‍ය තාක්ෂණික සහය ඉදිරියට අපේක්ෂා කරන බව ජනාධිපතිතුමා සඳහන් කළේය.

එමෙන්ම ඉරානය ශ‍්‍රී ලංකාව විසින් වැඩිවශයෙන් තේ අපනයනය කරන රටක් වන අතර එම කටයුතු ඉදිරීයේදී වැඩිදියුණු කර ගැනීම පිළිබඳවද ජනාධිපතිතුමා ඉරාන ජනාධිපතිවරයාගේ අවධානය යොමු කළේය. ඒ පිළිබඳව ඉදිරි පියවර කඩිනමින් ගන්නා බව ඉරාන ජනාධිපති හසන් රූහානි සඳහන් කළේය.

ශ‍්‍රී ලංකවේ දුම්රිය මාර්ග පද්ධතිය වැඩිදියුණු කිරීම සඳහා ඉරාන රජයේ සහය ලබා ගැනීම පිළිබ`ද මෙන්ම සංචාරක ක්ෂේත‍්‍රයේ සහයෝගිතාවය ඉහළ නංවා ගන්මින් දෙරට අතර ඝෘජු ගුවන් සේවා ආරම්භ කිරීම පිළිබඳවද මෙහිදී නායකයින්ගේ අවධානය යොමු විය.

එමෙන්ම සෞඛ්‍ය ක්ෂේත‍්‍රයේ සහයෝගිතාවය පුළුල් කර ගනිමින් දෙරට අතර ඖෂධ හුවමාරු වැඩසටහන් කි‍්‍රයාත්මක කිරීම පිළිබඳවත් පේෂකර්මාන්ත ක්ෂේත‍්‍රයේ වැඩිදියුණුව වෙනුවෙන් පුහුණු වැඩසටහන් හුවමාරුව පිළිබඳවත් අවධානය යොමු විය.

ඉරානය සහ ලංකාව අතර පවතින ගනුදෙනු පහසුකර ගැනීමට මුදල් හුවමාරුව සදහා විධිමත් බැංකු සේවාවක් පවත්වාගෙන යාමේ අවශ්‍යතාවය මෙහිදී ජනාධිපති මෛතී‍්‍රපාල සිරිසේන  පෙන්වා දුන් අතර ඒ සදහා ඉතා ඉක්මණින් ගිවිසුමකට එළැඹීමට කටයුතු කරන ඉරාන ජනාධිපතිවරයා සඳහන් කළේය.

ද්විපාර්ශ්වික ආර්ථික හා තාක්ෂණික සහයෝගිතාව සඳහා වූ එකාබද්ධ කොමිසම යටතේ මෙම සියලූ කටයුතු ශක්තිමත්ව ඉදිරියට කි‍්‍රයාත්මක කරන බව ඉරාන ජනාධිපතිතුමා සඳහන් කළේය.

එමෙන්ම 2004 වසරේ දෙරට අතර ඇතිකර ගත් දෙරටේ වෙළඳ භාණ්ඩවලට ප‍්‍රමුඛතාව ලබාදීමේ ගිවිසුම ඉදිරියට කි‍්‍රයාත්මක කිරීමට ද නායකයින් එකඟ වූහ.

ආසියානු සහයෝගිතා සංගමයේ සහ නොබැඳි ජාතින්ගේ සාමාජික රටවල් ලෙස ජාත්‍යන්තර වේදිකාවේදී සහයෝගයෙන් කටයුතු කිරීමටත් ලෝක ත‍්‍රස්තවාදය පිටුදැකීම මෙන්ම මත්ද්‍රව්‍ය උවදුර තුරන් කිරීම වැනි කටයුතුවලදී සාමුහිකව කටයුතු කිරීමටත් නායකයින් සපථ වූහ. 

මෙහිදී ජනාධිපති මෛතී‍්‍රපාල සිරිසේන  විශේෂයෙන් සඳහන් කළේ නොබැඳි ජාතින්ගේ සාමාජික රටක් ලෙස සියලූ මිතුරු රාජ්‍යයන් එක ලෙස පිළිගනිමින් මධ්‍යස්ථ විදේශ ප‍්‍රතිපත්තියක් ඔස්සේ සියලූ රටවල් සමග සහයෝගයෙන් කටයුතු කිරීම අද ශ‍්‍රී ලංකාවේ විදේශ පිළිවෙත බවයි. 

ශ‍්‍රී ලංකාව සහ ඉරානය අතර ද්විපාර්ශ්වික සබඳතා ආරම්භ කෙරෙන්නේ වසර 61 කට ඉහතදී වුවද වසර දහස් ගණනක ඈතකට දිව යන දෙරට අතර මිතුදම පිළිබඳ මෙහිදී ජනාධිපති මෛතී‍්‍රපාල සිරිසේන  සිහිපත් කළේය. 

උමා ඔය ව්‍යාපෘතියට සහ ග‍්‍රාමීය ප‍්‍රදේශවලට විදුලිබලය සැපයීම සහ දුම්රිය ක්ෂේත‍්‍රයේ දියුණුව වෙනුවෙන් අඛණ්ඩව ලබාදෙන සහය වෙනුවෙන් මෙහිදී ජනාධිපතිතුමා ඉරාන රජය වෙත සිය ස්තූතිය පිරිනැමීය.

ඉන් අනතුරුව දෙරට අතර නව අවබෝධතා ගිවිසුම් 05 කට ද රාජ්‍ය නායකයින් ඉදිරියේ අත්සන් තැබිණි.

සෞඛ්‍ය, වෛද්‍ය විද්‍යාව, ඖෂධීය සහ වෛද්‍ය උපකරණ, 

ප‍්‍රමිතිකරණය, මිනුම්විද්‍යාව හා පුහුණුව

නීතිවිරෝධි මත්ද්‍රව්‍ය ජාවාරම මැඩලීම

සිනමාව සහ රූපවාහිනි

සංස්කෘතිය, විද්‍යා හා තාක්ෂණය යන ක්ෂේත‍්‍රවලට අදාළවය.

unnamed

unnamed 1

Leave your comments

Post comment as a guest

0
Your comments are subjected to administrator's moderation.
terms and condition.
  • No comments found