පුවත්

2023 වසරේ මාතර, වැලිගම ප්‍රදේශයේ පිහිටි 'W15' හෝටලයට වෙඩි තැබීමේ සිද්ධිය සම්බන්ධයෙන් වැඩි දුරටත් තොරතුරු දැනගැනීම සඳහා හිටපු මහජන ආරක්ෂක අමාත්‍ය ටිරාන් අලස් හෙට (සඳුදා 31) අපරාධ පරීක්ෂණ දෙපාර්තමේන්තුව වෙත කැඳවා තිබේ.

 මේ සිද්ධිය සම්බන්ධයෙන් හිටපු පොලිස්පති දේශබන්දු තෙන්නකෝන් ඇතුළු පිරිසක් අත්අඩංගුවට ගත් අතර දේශබන්දු තෙන්නකෝන් හැර සෙසු සැකකරුවන්ට ඇප ලබා දී ඇත.

කෙසේ වෙතත් මෙම සිදුවීම සම්බන්ධයෙන් හිටපු ඇමතිවරයා වැඩි දුරටත් තොරතුරු දන්නා බවට ඇතිවූ සැකය මත මෙලෙස ප්‍රශ්න කිරීමට නියමිතව ඇතැයි පොලිස් ආරංචි මාර්ග සඳහන් කරයි.

එම සිද්ධියට දින කිහිපයකට පසු (2024 ජනවාරි 18) මාධ්‍ය හමුවක් කැඳවමින් හිටපු අමාත්‍යවරයා විසින් කළ අනාවරණයන් සම්බන්ධයෙන් ද කරුණු විමසීමට නියමිතව ඇතැයි පැවසේ.

අලිමංකඩ ලුණු කර්මාන්තශාලාවේ නව මේස ලුණු නිෂ්පාදනාගාරය කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්තිගේ ප්‍රධානත්වයෙන් අද (29) විවෘත කෙරුණි.

නවීන අංගෝපාංග සහ පහසුකම්වලින් සමන්විත මෙම කර්මාන්ත ශාලාවෙන් පැයකට ලුණු මෙට්ට්‍රික් ටොන් 05ක් නිෂ්පාදනය කිරීමේ හැකියාව පවතී.

මෙහි නිෂ්පාදනය කෙරෙන අයඩීන් මිශ්‍ර ලුණු ''රජ ලුණු'' යන නමින් කිලෝග්‍රෑම් 01 සහ ග්‍රෑම් 400 මේස ලුණු පැකට් අඩුම මිලක් යටතේ ඉදිරියේදී පාරිභෝගික ජනතාවට ලබාගැනීමට හැකියාව ලැබෙනු ඇත.

අලිමංකඩ ලුණු කර්මාන්තශාලාව විවෘත කිරීමේ උත්සවයට එක් වූ කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මෙසේ පැවසීය.

අපේ බලාපොරොත්තුව තමයි රටේ ජනතාවගේ අවශ්‍යතාවයට සරිලන ලුණු ටික නිෂ්පාදනය කරල අතිරික්ත ලුණු අපනයන ආදායමට එක්කර ගන්න. ඒ කියන්නේ රටට අවශ්‍ය ඩොලර් ගේන්න. මම හිතනව තව අවුරුදු 02ක් හෝ 03ක් ඇතුළත අපිට ඒ ඉලක්කයට ළඟා වෙන්න පුලුවන් වෙයි කියලා. ඒ වගේම තමයි මේ අලිමංකඩ ලුණු ලේවායෙන් නිපදවෙන ලුණු ප්‍රමාණය මදි මේ යන්ත්‍ර සූත්‍රවලින් උපරිම නිෂ්පාදනය අපට ලබා ගන්න. ඒ නිසා මෙතනට එහා පැත්තෙ තියෙනවා කුරින්චතිව් (Kurinchathivu) ලේවාය. ඒ කොටස යුද්ධ කාලෙදී ලුණු නිෂ්පාදනය අතහැරල දාලා තිබුණු කොටසක්, ඒ ලේවායෙත් වැඩ ඉක්මනට පටන් ගන්න අපි බලාපොරොත්තු වෙනවා. ඒක සංවර්ධනය කිරීමට අවශ්‍ය කැබිනට් අනුමැතියත් අපි ඉල්ලලා තියෙන්නේ. රජය හැටියට අපි රාජ්‍ය ව්‍යාපාර පවත්වාගෙන යන්නේ ජනතාව පීඩාවට පත් කරමින් උපරිම ලාභ ලබන්න නෙවෙයි. ජනතාවට අවශ්‍ය සහන ලබා දෙන්න. අපේ මේ ලුණු සමාගමෙන් වගේම අනෙකුත් හැම ව්‍යාපාරයකින්ම අපි බලාපොරොත්තු වෙන්නේ රජයට සාධාරණ බදු ගෙවීම, ජනතාවට රැකියා සැපයීම, ජනතාවට අඩුම මිලට භාණ්ඩ සැපයීම, ඒවගේම පෞද්ගලික අංශයෙන් ජනතාවට අසාධරණයක් වෙනවා නම් ඒ අසාධාරණ මිලට එරෙහිව සාධාරණ මිල ස්ථාපිත කිරීම වැනි දේවල් සඳහා. ඒ වගේම අපි ඉදිරියේ දී උතුරු පළාත සංවර්ධනය කර රටේ සංවර්ධනයට දායක කරගන්න අවශ්‍ය ව්‍යාපෘති කිහිපයකුත් ආරම්භ කරන්න සැලැසුම් සකස් කරල තියෙන්නේ. ඒ අතර පරන්තන් රසායනික කලාපය, මාන්කුලම් සහ කන්කසන්තුරය අපනයන කලාප ආරම්භ කිරීම, කන්කසන්තුරය වරාය සංවර්ධනය කිරීමේ ව්‍යාපෘති විශේෂයි”

පොලිස්පති දේශබන්දු තෙන්නකෝන්ට සැඟව සිටීමට ආධාර අනුබල දුන් පුද්ගලයින් දෙදෙනෙකු අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන තිබේ.

පොලීසිය පැවසුවේ, විශේෂ ආරක්ෂණ කොට්ඨාසයේ කොස්තාපල්වරයෙකු සහ සිවිල් පුද්ගලයෙකු එලෙස අත්අඩංගුවට ගෙන ඇති බවයි.

අධිකරණයට භාර වන්නැයි වරෙන්තු නිකුත් කර තිබියදී සැකකරුවන් විසින් දේශබන්දු තෙන්නකෝන් ට සැඟව සිටීමට ආධාර අනුබල ලබාදී ඇතැයි ද පොලීසිය සඳහන් කළේ ය.

මාතර මහේස්ත්‍රාත් අධිකරණයට පසුගිය දා ඉදිරිපත්වීමෙන් අනතුරුව අත්අඩංගුවට ගත් දේශබන්දු තෙන්නකෝන්  ලබන 03 වැනි දා දක්වා රක්ෂිත බන්ධනාගාරගත කෙරුණි.

බස්නාහිර, සබරගමුව, දකුණු, මධ්‍යම සහ ඌව පළාත්වලත් කුරුණෑගල දිස්ත්‍රික්කයේත් ප.ව. 2.00 න් පමණ පසුව තැනින් තැන වැසි හෝ ගිගුරුම් සහිත වැසි ඇතිවන බව කාලගුණ විද්‍යා දෙපාර්තමේන්තුව නිවේදනය කරයි.

සබරගමුව සහ දකුණු පළාත්වල ඇතැම් ස්ථාන වලට මි.මි. 50ට වැඩි තරමක තද වැසි ඇතිවිය හැක.

බස්නාහිර,සබරගමුව, මධ්‍යම සහ ඌව පළාත්වලත් ගාල්ල, මාතර සහ කුරුණෑගල දිස්ත්‍රික්කවලත් ඇතැම් ස්ථානවල උදෑසන කාලයේදී මීදුම් සහිත තත්ත්වයක් පැවතිය හැක.

ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

අනුරාධපුර ශික්ෂණ රෝහලේ වෛද්‍යවරියකට හිංසන සිදුකළ සැකකරු එම වෛද්‍යවරිය විසින් හඳුනාගැනීමේ පෙරෙට්ටුවේදී අද හදුනා ගැණිනි.

අනුරාධපුර මහේස්ත්‍රාත්වරයාගේ නිල කාමරයේ දී හඳුනාගැනීමේ පෙරෙට්ටුව පවත්වා ඇත.

එහිදී සැකකරු හඳුනාගැනීමට වෛද්‍යවරියට හැකිවී ඇත.

වෛද්‍යවරිය බිය ගන්වා ලිංගික හිංසනයට ලක් කිරිමේ සිද්ධියට අදාළ සැකකරු පැය 24ක් යාමටත් පෙර ගල්නෑව ප්‍රදේශයේදී අත්අඩංගුවට ගැනීමට පොලිසිය හැකි විය.

ඒ සඳහා පොලිස් කණ්ඩායම් 05ක් යොදවා තිබුණි.

විද්‍යා පීඨ ගුරුවරුන් 3,987ක් ගුරු සේවයට බඳවා ගැනීමට අධ්‍යාපන අමාත්‍යාංශය තීරණය කර තිබේ.

ලබන මස 10 වැනිදා ඔවුන්ට පත්වීම් ලබා දෙන අතර,  6 ශ්‍රේණියේ සිට 11 ශ්‍රේණිය දක්වා විෂයන් ඉගැන්වීමට ගුරුවරුන් බඳවා ගැනීමට නියමිතයි.

ඔවුන් ජාතික හා පළාත් පාසල්වල ගුරු හිඟය පවතින පාසල් වෙත අනියුක්ත කරන බව අමාත්‍යංශය ප්‍රකාශ කළේ ය.

ඊයේ (27) රාත්‍රියේ කොළඹ සෞඛ්‍ය අමාත්‍යාංශය ඉදිරිපිට පැවති සත්‍යග්‍රහයේදී අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වන මධුෂාන් චන්ද්‍රජිත් ඇතුළු ශිෂ්‍ය ක්‍රියාකාරීන් 27 දෙනෙකු පොලීසිය විසින් අත්අඩංගුවට ගෙන තිබේ.

රාජ්‍ය විශ්වවිද්‍යාලවලින් සම සෞඛ්‍ය උපාධිධාරීන් වහාම රාජ්‍ය අංශයට බඳවා ගන්නා ලෙස ඉල්ලා ඔවුන් මෙම සත්‍යග්‍රහය ආරම්භ කර තිබුණි.

පසුව ඊයේ (27) රාත්‍රීයේ පොලීසිය පැමිණ විරෝධතාකරුවන් එම ස්ථානයෙන් බලහත්කාරයෙන් ඉවත් කළ අවස්ථාවේ ඇතිවූ නොසන්සුන්කාරී තත්ත්වය මත ඔවුන් මෙලෙස අත්අඩංගුවට ගෙන ඇතැයි වාර්තාවේ.

මරදාන පොලිස් වසමේ රෝහල් චතුරශ්‍රය, සෞඛ්‍ය අමාත්‍යංශයට ඇතුලු‍වීම හා ඒ අවට මාර්ග අවහිර වන ලෙස උද්ඝෝෂණ හා පෙළපාලි පැවැත්වීම තහනම් කරමින් ඔවුන්ට මාළිගාකන්ද මහේස්ත්‍රාත් අධිකරණයෙන් නියෝගයක් ද නිකුත් කර තිබුණි.

නඩු තුනක් සම්බන්ධයෙන් අද (27) දිනයේ අධිකරණයට ඉදිරිපත් කළ පාර්ලිමේන්තු මන්ත්‍රී චාමර සම්පත් දසනායක නඩු දෙකකින් ඇප හිමි වුවත් එක නඩුවකට අදාළව රක්ෂිත බන්ධනාගාරගත කර ඇත.

ඒ අනුව චාමර සම්පත් දසනායක  අප්‍රේල් 01 දක්වා රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය නියෝග කළේය.

ඒ, රාජ්‍ය බැංකුවකින් මුදල් ඉල්ලා, කළමණාකාරවරයා එය ලබා දීම ප්‍රතික්ෂේප කිරීමෙන් පසුව පළාත් සභාව පවත්වාගෙන ගිය සියලු ස්ථාවර තැම්පතු එම බැංකුවෙන් ඉවත් කර ගැනීම නිසා රුපියල් මිලියන 23 ක පාඩුවක් රජයට සිදු කිරීම සම්බන්ධයෙන් වන චෝදනාව යටතේ ය.

ප්‍රකාශයක් දීම සදහා පැමිණි අවස්ථාවේ චෝදනා තුනක් යටතේ අල්ලස් කොමිසම, අද පෙරවරුවේ ඔහු අත්අඩංගුවට ගත්තේ ය.

රාජ්‍ය බැංකු දෙකකින්, රුපියල් මිලියන දෙකහමාරක මුදලක් ඌව පළාත් සභාවට ලබා ගෙන එම මුදල් චාමර සම්පත් දසනායකගේ පදනමේ ගිණුමට බැර කරවා ගැනීම ඉන් එක් චෝදනාවකි.

තවත් රාජ්‍ය බැංකුවකින් පළාත් සභාවට ලබා ගත් රුපියල් මිලියනයක මුදලක් ප්‍රධාන අමාත්‍යවරයා ලෙස බැංකු ශාඛාවකින් කෙලින්ම ඔහු අතට ලබා ගැනීම, අනෙක් චෝදනාවයි.

දූෂණ චෝදනා මත සැකපිට අත්අඩංගුවට ගත් පාර්ලිමේන්තු මන්ත්‍රී චාමර සම්පත් දසනායක ඇප මත මුදා හරින ලෙස කොළඹ මහේස්ත්‍රාත් අධිකරණය නියම කළේය.

අද (27) දින ප්‍රකාශයක් සටහන් කරගැනීමෙන් අනතුරුව සැකකාර මන්ත්‍රීවරයා අල්ලස් කොමිසම විසින් අත්අඩංගුවට ගෙන තිබිණි.

ඉන් පසුව කොළඹ ප්‍රධාන මහේස්ත්‍රාත් තනූජා ලක්මාලී  හමුවට ඉදිරිපත් කිරීමෙන් අනතුරුව ඉදිරිපත් වූ කරුණු සලකා බැලූ මහේස්ත්‍රාත්වරිය, සැකකරු රුපියල් 50,000ක මුදල් ඇප සහ රුපියල් මිලියන 5 බැගින් වූ ශරීර 2ක් මතමුදා හැරීමට නියම කළේය.

සැකකරුගේ විදේශ ගමන් තහනම් කළ මහේස්ත්‍රාත්වරිය, ඔහුගේ විදේශ ගමන් බලපත්‍රය අධිකරණයට භාර දිය යුතු බවටත් නියෝග කර ඇත.

ඇප කොන්දේසි සම්පූර්ණ කිරීමෙන් අනතුරුව සැකකරු ඇප මත මුදාහරිණ ලෙසත් මහේස්ත්‍රාත් වරිය නියම කළේය.

පළාත් පාලන ආයතන ඡන්ද විමසීමේ තැපැල් ඡන්දය සලකුණු කිරීමේ දින නියම කර තිබෙයි.

ඒ අනුව පළාත් පාලන ආයතන 339 හි තැපැල් ඡන්ද පත්‍රිකා නිකුත් කිරීම අප්‍රේල් මස 7 වන දින එක් එක් දිස්ත්‍රික් ලේකම් කාර්යාවල දී සිදුකරන බව මැතිවරණ කොමිසම දැනුම් දී ඇත.

ඒ අනුව තැපැල් ඡන්ද සලකුණු දිනයන් පහතින් දැක්වේ.

සිංහල දෙමළ අලුත් අවුරුදු සමය වෙනුවෙන් සහන මිලට ලබාදෙන අත්‍යවශ්‍ය ආහාර ද්‍රව්‍ය පැකේජය ලබන 01 වැනි දා සිට 13 වැනි දා දක්වා නිකුත් කිරීමට තීරණය කර තිබේ.

දිවයින පුර පිහිටි ලංකා සතොස සහ කෝප්ෆෙඩ් අලෙවිසැල්වලින් මෙම ආහාර පැකේජය ලබාගත හැකියි.

ඒ අනුව රුපියල් 5000ක් වටිනා ආහාර මල්ලක් රුපියල් 2500ක් වැනි මුදලකට ලබාගත හැකි වනු ඇත.

ඵ් සඳහා අස්වැසුම ප්‍රතිලාභ අපේක්ෂාවෙන් අලුතින් අයදුම්පත් ඉදිරිපත් කරනු ලැබ ඇති 812,753ක් වන අයදුම්කරුවන් අතුරින් යෝග්‍ය ප්‍රතිලාභීන් තෝරා ගැනීමට අපේක්ෂා කරනු ලබන බව රජය පවසයි.

ඒ අනුව, 2025-04-01 දින සිට 2025–04–13 දින දක්වා කාලය තුළ රටපුරා පිහිටි ලංකා සතොස අලෙවිසැල් ජාලය සහ COOPFED අලෙවිසැල් මඟින් ආහාර පැකේජය ප්‍රතිලාභීන් වෙත ලබා දීම පිණිස අවශ්‍ය පියවර ගැනීම සඳහා කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යතුමා සහ වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යතුමා ඉදිරිපත් කළ ඒකාබද්ධ යෝජනාව අමාත්‍ය මණ්ඩලය විසින් අනුමත කරන ලදී.

ජනමාධ්‍ය ප්‍රතිසංස්කරණ සම්බන්ධයෙන් ආණ්ඩුවේ වගවීම සහතික කළ යුතු බව දන්වමින් නිදහස් මාධ්‍ය ව්‍යාපාරය මාධ්‍ය නිවේදනයක් නිකුත් කර ඇත.

නිදහස් මාධ්‍ය ව්‍යාපාරයේ කැඳවුම්කාරිනී හනා ඊබ්‍රහිම්ගේ සහ එම ව්‍යාපාරයේ ලේකම් ලසන්ත ද සිල්වාගේ අත්සනින් යුතුව නිකත් කර ඇති මෙම නිවේදනයේ සඳහන් වන පරිදි ශ්‍රී ලංකා රූපවාහිනී සංස්ථාව, ගුවන්විදුලි සංස්ථාව සහ ස්වාධීන රූපවාහිනිය යන රාජ්‍ය මාධ්‍ය ත්‍රිත්වය පාඩු ලබන බැවින් ඒකාබද්ධ පාලන ව්‍යුහයක් තුළ ප්‍රතිව්‍යුහගත කිරීමේ සැලස්මක් රජය පාර්ශ්වයෙන් ඉදිරිපත් කර ඇත.

ඒ අනුව ජනාධිපති අනුර කුමාර දිසානායක සිය නිල චීන සංචාරයේ දී අත්සන් කළ ගිවිසුම් අතරින් එකක් රාජ්‍ය මාධ්‍ය සම්බන්ධයෙන් වන බවත්, එම ගිවිසුම සම්බන්ධ තොරතුරු ජනමාධ්‍ය සංවිධාන මගින් ඉල්ලා සිටි යද මේ දක්වා හෙළිදරව් කර නැති බවත්, එබදු පසුබිමක නව ප්‍රතිව්‍යුහගතකරණ සැලැස්ම සහ අදාළ ගිවිසුම අතර සම්බන්ධයක් තිබෙන බවට සැකසංකා පහළ වී ඇති බවත් නිදහස් මාධ්‍ය ව්‍යාපාරය මෙම මාධ්‍ය නිවේදනයේ සඳහන් කර ඇත.

එබැවින් රාජ්‍ය මාධ්‍යයට අදාළව චීනය සමග අත්සන් කළ ගිවිසුම්වල සඳහන් කරුණු ප්‍රකාශයට පත්කිරීම සහ ප්‍රතිව්‍යුගතකරණ සැලැස්මක් ඇත්නම් එය ඉදිරිපත් කර ක්ෂේත්‍රයේ සහ ග්‍රාහක පුරවැසියන්ගේ ද අදහස් විමසා අවශ්‍ය කටයුතු කිරීම රජයේ වගකීම බව ද නිදහස් මාධ්‍ය ව්‍යාපාරය අවධාරණය කරයි.

මතු දැක්වෙන්නේ නිදහස් මාධ්‍ය ව්‍යාපාරය විසින් නිකුත් කරනු ලැබ ඇති සම්පූර්ණ නිවේදනය යි.

(සටහන | ජයසිරි අලවත්ත)

සන්නද්ධ හමුදා ප්‍රධානීන්ට පැනවූ සම්බාධක සම්බන්ධයෙන් රජයේ ස්ථාවරය විදේශ කටයුතු අමාත්‍ය විජිත හේරත් මෙරට බ්‍රිතාන්‍ය මහකොමසාරිස්වරයාට දන්වා තිබෙයි.

හිටපු යුද හමුදාපතිවරුන් වන ජෙනරාල් ශවේන්ද්‍ර සිල්වා, ලුතිනන් ජනරාල් ජගත් ජයසූරිය සහ හිටපු නාවික හමුදාපති අද්මිරාල් ඔෆ් ද ෆ්ලීට් වසන්ත කරන්නාගොඩට පසුගියදා සම්බාධක පැනවීමට කටයුතු කර තිබිණි.

බන්ධනාගාරගත කර සිටින පොලිස්පති දේශබන්දු තෙන්නකෝන් ධුරයෙන් ඉවත්කිරීම සම්බන්ධයෙන් ජාතික ජන බලවේගයේ මන්ත්‍රීවරුන් අත්සන් තබා කථානායකවරයා වෙත භාරදුන් යෝජනාවෙන් ඔහුට එරෙහිව දූෂණ චෝදනා 27ක් එල්ලකර තිබේ.

මන්ත්‍රීවරු 115 දෙනෙකු අත්සන් තබන ලද එම යෝජනාව අද (25) දහවල් කථානායකවරයා වෙත භාරදී තිබුණි.

අදාළ දූෂණ චෝදනා 27 මෙතනින්

2025 අයවැය යෝජනා අනුව රාජ්‍ය සේවයේ වැටුප් සංශෝධනවලට අදාළ චක්‍රලේඛය නිකුත් වී තිබේ.

ඒ රාජ්‍ය පරිපාලන, පළාත් සහා සහ පළාත් පාලන අමාත්‍යාංශයේ ලේකම් එස්.ආලෝක බණ්ඩාර මහතාගේ අත්සනින්.

සම්පූර්ණ චක්‍රලේඛය

රාජ්‍ය සේවක වැටුප් සංශෝධන චක්‍රලේඛය නිකුත් වෙයි by poornima

සේවය අත්හිටුවා ඇති පොලිස්පති දේශබන්දු තෙන්නකෝන් එම ධුරයෙන් ඉවත් කරන ලෙස ඉල්ලා රජය විසින් ඉදිරිපත් කරන ලද යෝජනාව කථානායකවරයා වෙත ඉදිරිපත් කර තිබෙයි.

ජාතික ජන බලවේගයේ මන්ත්‍රීවරුන් 115 දෙනෙකුගේ අත්සන් සහිතව එම යෝජනාව ඉදිරිපත් කර ඇත.

ශ්‍රී ලංකාවේ ජනවාර්ගික අර්බුදය, බුදුදහම,සංස්කෘතිය ඇතුළු විෂයයන් කෙරෙහි බලපෑම් සහගත අධ්‍යයන සිදු කළ සුප්‍රකට මානව විද්‍යාඥයෙකු වූ, මහාචාර්ය ගණනාථ ඔබේසේකර මහතා අභාවප්‍රාප්ත වී තිබේ.

ඇමරිකාවේ ප්‍රින්ස්ටන් විශ්වවිද්‍යාලයේ මානව විද්‍යාව පිළිබඳ සම්මානිත මහාචාර්යවරයෙකු වන ඔබේසේකර මහතාගේ මිය යනවිට වයස අවුරුදු 96 ක් 1930 පෙබරවාරි දෙවැනිදා උපන් ගණනාථ ඔබේසේකර මහතා වයස අවුරුදු 25 වන විට, එනම් 1955 වසරේදී පේරාදෙණිය විශ්වවිද්‍යාලයේ ඉංග්‍රීසි භාෂාව පිළිබඳ ශාස්ත්‍රවේදී උපාධිය සම්පූර්ණ කළේ ය.

එයින් වසර තුනකට පසු වොෂින්ටන් විශ්වවිද්‍යාලයෙන් සිය පශ්චාත් උපාධියත් 1964 වසරේදී මානව විද්‍යාව සම්බන්ධ ආචාර්ය උපාධියත් හිමි කර ගැනීමට එතුමාට හැකිවිය.

1968 සිට 1972 දක්වා ශ්‍රී ලංකා විශ්වවිද්‍යාලයේ සමාජ විද්‍යා අංශයේ මහාචාර්යවරයෙකු මෙන්ම ප්‍රධානියාද වූ ඔහු, 1972 වසරේ සිට වසර අටක් මානව විද්‍යාව පිළිබඳ ආචාර්යවරයෙකු ලෙස කටයුතු කළේ කැලිෆෝනියා විශ්වවිද්‍යාලයේයි.

1983 - 88 වකවානුවේ ප්‍රින්ස්ටන් විශ්ව විද්‍යාලයේ මානව විද්‍යා දෙපාර්තමේන්තුවේ සභාපතිවරයා ලෙස කටයුතු කළ ගණනාථ ඔබේසේකර මහතා අනතුරුව වසර 2000 දක්වා සිය දැනුම සිසු පරපුරට ලබා දුන්නේ ප්‍රින්ස්ටන් විශ්වවිද්‍යාලයෙනි.

දුටුගැමුණුගේ හෘදසාක්ෂිය, ප්‍රොතෙස්තන්ත බුදුදහම සහ පත් ඇදහිල්ල, සංස්කෘතියේ කාර්යය, මනෝවිශ්ලේෂණයේ සහ මානව විද්‍යාවේ සංකේතාත්මක පරිවර්තනය” ඇතුළු කෘති රැසක් ඔබේසේකර මහතා සම්පාදනය කර තිබේ.

ලෑන්ඩ් ටෙනුවර් ඉන් විලේජ් සිලෝන් ( ශ්‍රී ලංකාවේ ගමක ඉඩම් භුක්තිය ) ඔබේසේකර මහතාගේ වැදගත් කෘතීන් අතරින් එකකි.

මහාචාර්යවරයා, තමා පරිශීලනය කළ පොත් පත් රැසක් අඩංගුව තිබූ පුස්තකාලයද කලකට පෙර පේරාදෙණිය විශ්වවිද්‍යාලයට පරිත්‍යාග කළේ ය.

ශ්‍රී ලංකාවේ සිවිල් යුද්ධය අතරතුර මානව හිමිකම් උල්ලංඝනය කිරීම් සහ අපයෝජනයන් සම්බන්ධයෙන් වගකිව යුතු පුද්ගලයින්ට එක්සත් රාජධානිය විසින් අද (24) සම්බාධක පනවා තිබේ.

ඒ අනුව ශ්‍රී ලංකාවේ සිවිල් යුද්ධය අතරතුර නීති විරෝධී ඝාතන, වදහිංසා පැමිණවීම් සහ ලිංගික ප්‍රචණ්ඩත්වය සිදු කිරීම ඇතුළු බරපතළ මානව හිමිකම් උල්ලංඝනය කිරීම් සම්බන්ධව පුද්ගලයින් සිව් දෙනෙකුට එම සම්බාධක පනවා ඇති බව සඳහන් වෙයි.

එම පිරිසට හිටපු යුද හමුදාපතිවරුන් වන ජෙනරාල් ශවේන්ද්‍ර සිල්වා, සහ ලුතිනන් ජනරාල් ජගත් ජයසූරිය මෙන්ම හිටපු නාවික හමුදාපති අද්මිරාල් ඔෆ් ද ෆ්ලීට් වසන්ත කරන්නාගොඩ යන පිරිස අයත් වේ.

එමෙන්ම LTTE සංවිධානයේ කලක් සේවය කළ LTTE සංවිධානයේ නැගෙනහිර සන්නද්ධ අංශ නායකයා ලෙස කටයුතු කළ විනයාර්ගමූර්ති මුල්ලිදරන් හෙවත් කරුණා අම්මාන් ද ඇතුලත් වෙයි.

ඒ අනුව එම පිරිසට එක්සත් රාජධානියේ සංචාරය තහනම් කිරීම තහනම් කරන අතර එරට තුළ ඔවුන් සතුව ඇති වත්කම් පවතින්නේ නම් ඒවාද රාජසන්තක වනු ඇති බවයි සඳහන් වෙයි.