පුවත්

චීනයේ සිව් දින නිල සංචාරයක නිරත ජනාධිපති රනිල් වික්‍රමසිංහ  අද (19) චීන සන්නිවේදන ඉදිකිරීම් සංස්ථාව, සිනොපෙක් සමාගම, BYD සමාගම ඇතුළු ප්‍රධාන පෙළේ චීන සමාගම් කිහිපයක නියෝජිතයන් සමඟ සාකච්ඡා පැවැත්වීය.

ශ්‍රි ලංකාවේ අනාගත ආයෝජන අවස්ථා සහ අවකාශයන් පිළිබඳව මෙම සාකච්ඡාවලදි පුර්ණ අවධානය යොමු කෙරිණි.

වරාය නගරය අන්තර්ජාතික මූල්‍ය මධ්‍යස්ථානයක් ලෙස සංවර්ධනය කිරීම, වරාය නගර පරිශ්‍රය උදෙසා නව මුල්‍ය නීති රීති සම්පාදනය, වරාය නගර පරිශ්‍රයට සීමා වූ අධිකරණ සහ බේරුම්කාරක ක්‍රමවේදයන් සැකසීම පිළිබඳව මෙහිදී අවධානය යොමු විය.

එසේම ශ්‍රී ලංකාවේ ප්‍රවාහන පද්ධති විදුලියෙන් ක්‍රියාත්මක කිරිමේ අවකාශ, විදුලි වාහන එකළස් කිරීම, විදුලි දුම්රිය සේවා ඇතුළු ක්ෂේත්‍ර ගණනාවක් පිළිබඳව ද සාකච්ඡා කෙරිණි.

ශ්‍රී ලංකාවේ ආර්ථිකය ප්‍රවර්ධනය උදෙසා හැකි උපරිමයෙන් සහාය ලබා දෙන බවත්, ශ්‍රි ලංකාවේ ආයෝජන අවස්ථාවන්ගෙන් ප්‍රයෝජන ගන්නා බවත් සමාගම් නියෝජිතයෝ මෙහිදී ජනාධිපතිවරයා හමුවේ ප්‍රකාශ කළහ.

ජනාධිපතිවරයා සමඟ ශ්‍රී ලංකා දූත පිරිස ද මෙම අවස්ථාවට එක්ව සිටියහ.

පාර්ලිමේන්තු මන්ත්‍රී අජිත් මානප්පෙරුමගේ පාර්ලිමේන්තු සේවා  කාලය සති 4කට අත්හිටුවන බව කතානායකවරයා නිවේදනය කළේ ය. 

ඒ පාර්ලි‍මේන්තු සභා ගර්භය ඇතුළත තිබියදී සෙංකෝලය ස්පර්ශ කිරීම හේතුවෙනි.

කතානායකවරයා  ප්‍රකාශ කළේ,  පාර්ලි‍මේන්තු සභා ගර්භය‍ තුළ තිබියදී සෙංකෝලය ස්පර්ශ කිරීම  බරපතළ විනය විරෝධි ක්‍රියාවක් බවයි. 

සභාවේ කටයුතු අතරතුර වාචික ප්‍රශ්න විමසන අවස්ථාවේ මන්ත්‍රීවරුන් අතර ඇති වූ නොසන්සුන්කාරී තත්ත්වයක් මත පාර්ලිමේන්තුව විනාඩි 10කට කල් තැබීමට ද කතානායකවරයා කටයුතු කළේ ය.

පාර්ලිමේන්තු මන්ත්‍රී අජිත් මාන්නප්පෙරුමගේ සේවය අත්හිටුවමින් කතානායකවරයා කළ ප්‍රකාශය;

“ස්ථාවර නියෝග 77 3 ප්‍රකාරව බරපතළ විනය විරෝධී ක්‍රියාවක් ලෙස සෙංකෝලය පාර්ලිමේන්තුවේ සභාගර්භයේ තබා ඇති අවස්ථාවක ස්පර්ශ කිරීම පාර්ලිමේන්තු මන්ත්‍රී අජිත් මාන්නපෙරුම අද දින සභා ගර්භය තුළදී සිදු කරන ලද බැවින් එකී ස්ථාවර නියෝග ප්‍රකාවර එම පාර්ලිමේන්තු මන්ත්‍රීවරයාගේ සේවය අද දින සිට සති 4කට අත්හිටුවන බව දන්වනු කැමැත්තෙමි.”

LTTE සංවිධානය යළි නගා සිටුවිය යුතු බවට 2018 වසරේ ප්‍රකාශයක් කළේ යැයි කියන සිද්ධියක් සම්බන්ධයෙන් ඇප මත මුදාහැර සිටි හිටපු රාජ්‍ය ඇමතිනි විජයකලා මහේෂ්වරන් නීතිපති උපදෙස් මත නිදහස් කිරීමට කොළඹ මහේස්ත්‍රාත් අධිකරණය අද (ඔක්තෝම්බර් 19 වැනිදා) නියෝග කළේය.

මෙම පැමිණිල්ල කොළඹ ප්‍රධාන මහේස්ත්‍රාත් ප්‍රසන්න අල්විස් ඉදිරියේ අද කැඳවනු ලැබීය.

මීට පෙර පොලීසිය විසින් අධිකරණයට දැනුම් දී තිබුණේ මෙම සැකකාරියට එරෙහිව නඩු කටයුත්තක් පවත්වාගෙන යාමට ප්‍රමාණවත් කරුණු නොමැති බවට නීතිපතිවරයා විසින් උපදෙස් ලබාදී ඇති බවය.

පැමිණිල්ල අද කැඳවනු ලැබූ අවස්ථාවේදී සැකකාර විජයකලා මහේෂ්වරන් අධිකරණය හමුවේ පෙනී සිටියාය.

මහේස්ත්‍රාත්වරයා සඳහන් කළේ සැකකාරියට එරෙහිව නඩු කටයුත්තක් පවත්වාගෙන නොයන බවට නීතිපතිවරයා තීරණය කර ඇති හෙයින් ඇය නිදහස් කිරීමට නියම කරන බවය.

2018 වසරේ ජූලි මස 2 වැනිදා යාපනය වීරසිංහම් ශාලාවේ පැවති රැස්වීමක දී LTTE සංවිධානය යළි නඟාසිටුවිය යුතු බවට ප්‍රකාශයක් කළේ යැයි කියන සිද්ධියක් සම්බන්ධයෙන් හිටපු රාජ්‍ය ඇමතිනි විජයකලා මහේෂ්වරන්ට එරෙහිව කොළඹ සංවිධානාත්මක අපරාධ විමර්ශන ඒකකය විසින් මෙම පැමිණිල්ල කොළඹ මහේස්ත්‍රාත් අධිකරණය හමුවේ ගොනු කර තිබුණි.

එල්.ටී.ටී.ඊ සංවිධානය පිළිබඳ ප්‍රසිද්ධ උත්සවයකදී කළ ප්‍රකාශයක් සම්බන්ධයෙන් (2018 ඔක්තෝබර් 8වැනිදා) අත්අඩංගුවට ගන්නා ලද විජයකලා මහේෂ්වරන් මන්ත්‍රීවරිය පසුව ඇප මත මුදා හැරිණ.

විදුලිය, ඉන්ධන, සෞඛ්‍ය ඇතුළු සේවාවන් කිහිපයක් අත්‍යවශ්‍ය සේවා ලෙස ප්‍රකාශයට පත් කරමින් ජනාධිපති ලේකම් සමන් ඒකනායක විසින් අති විශේෂ ගැසට් නිවේදනයක් නිකුත් කර තිබේ.

ඒ ජනාධිපති රනිල් වික්‍රමසිංහ ගේ අණ පරිදි ය.

ඊට අනුව විදුලිබල සැපයීම සම්බන්ධ සියලු සේවාවන්, ඛනිජ තෙල් නිෂ්පාදන හා ඉන්ධන සැපයීම හෝ බෙදා හැරීම, රෝහල්වල සාත්තු නිවාසවල බෙහෙත් ශාලා සහ වෙනත් සමාන ආයතනවල රෝගී නඩත්තු කිරීම සහ පිළිගැනීම, රැකවරණය, පෝෂණය කිරීම සහ ප්‍රතිකාර කිරීම සම්බන්ධව අවශ්‍ය හෝ කළ යුතු ඕනෑම විස්තරයක සියලුම සේවා වැඩ හෝ ශ්‍රමය අත්‍යවශ්‍ය සේවා බවට පත්කර ඇත.

රාජ්‍ය ඇමතිනී ඩයනා ගමගේ ගේ පාර්ලිමේන්තු මන්ත්‍රී ධුරය බලරහිත කිරීමේ නියෝගයක් නිකුත් කරන ලෙස ඉල්ලා ගොනු කෙරුණු පෙත්සමේ තීන්දුව ප්‍රකාශයට පත්කිරීම මේ මස 31 වනදා දක්වා කල්තැබීමට අභියාචනාධිකරණය නියෝග කර ඇත.

මෙම පෙත්සමේ තීන්දුව අද (18) අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න, ඛේමා ස්වර්ණාධිපති සහ ඒ. මරික්කාර් යන ත්‍රිපුද්ගල අභියාචනාධිකරණ විනිසුරු මඩුල්ල ඉදිරියේ ප්‍රකාශයට පත් කිරීමට නියමිතව තිබුණි.

එහෙත් නඩුව අද කැඳවූ අවස්ථාවේදී අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සඳහන් කළේ අදාළ තීන්දුව මේ මස 31 වනදා ප්‍රකාශයට පත් කරන බවය.

ඕෂල හේරත් විසින් මෙම පෙත්සම ඉදිරිපත් කර තිබු අතර ඒ ඩයනා ගමගේ රාජ්‍ය අමාත්‍යවරිය බ්‍රිතාන්‍ය පුරවැසිභාවය හිමි තැනැත්තියක් බව සඳහන් කරමින්ය.

මාර්ගගත ක්‍රමවල සුරක්ෂිතතාව පිළිබඳ පනත් කෙටුම්පතට එරෙහිව පෙත්සම් 45ක් මේ වන විට ලැබී ඇති බව කථානායක මහින්ද යාපා අබේවර්ධන පවසයි.

කථානායකවරයා මේ බව සඳහන් කර සිටියේ අද (18) දින පාර්ලිමේන්තුවේදී ප්‍රකාශයක් කරමින් ය.

එහිදී ඔහු පැවසුවේ, "ආණ්ඩුක්‍රම ව්‍යාවස්ථාවේ 121 1 ව්‍යවස්ථාව ප්‍රකාරව මාර්ගගත ක්‍රමවල සුරක්ෂිතතාවය නැමැති පනත් කෙටුම්පත සම්බන්ධයෙන් 2023 ඔක්තෝම්බර් 04, 06 සහ 17 දිනයන් හි මා විසින් නිවේදනය කරන ලද පෙත්සම් 34ට අමතරව ශ්‍රේෂ්ඨාධිකරණය වෙත ඉදිරිපත් කරන ලද තවත් පෙත්සම් 11ක පිටපත් මා වෙත ලැබී ඇති බව පාර්ලිමේන්තුවට දැන්වීමට කැමැත්තෙමි," යනුවෙනි.

ආරක්ෂක අමාත්‍යවරයා ලෙස ජනාධිපති රනිල් වික්‍රමසිංහ  ද පොලීසිය බාරව සිටින මහජන ආරක්ෂක අමාත්‍ය ටිරාන් අලස්  ද දිවයිනේ නොමැති අවස්ථාවේදී පොලිස්පති සී.ඩී.වික්‍රමරත්න ධුරයෙන් ඉවත් කිරීමට ආණ්ඩුක්‍රම ව්‍යවස්ථා සභාව ගත් තීරණය නැවත ආපසු හරවමින් පොලිස්පතිවරයා ධුරයේ පිහිටවීමට ජනාධිපති රනිල් වික්‍රමසිංහ  අද (17) පියවර ගත්තේය.

පොලිස්පතිවරයා නැවත ධුරයට පත් කරනු ලැබූයේ ආණ්ඩුක්‍රම ව්‍යවස්ථා සභාව විසින් අද ඔහු තනතුරෙන් ඉවත් කර පැයක් ගත වීමටත් මත්තෙනි.

පොලිස්පතිවරයා යළි පත් කිරීමට අදාළ විධිවිධාන ක්‍රියාත්මක කිරීම සඳහා ජනාධිපති රනිල් වික්‍රමසිංහ චීනයේ බීජිං නුවර සිට අවශ්‍ය නියෝග සියල්ලම වහ වහා ලබා දුන්නේය.

ආරක්ෂක අමාත්‍යවරයා ලෙස ජනාධිපති රනිල් වික්‍රමසිංහත් පොලිසිය බාර අමාත්‍යවරයා ලෙස ටිරාන් අලස්ත් දිවයිනේ නො සිටින අවස්ථාවක පොලිස්පතිවරයා ඉවත් කිරීමට ආණ්ඩුක්‍රම ව්‍යවස්ථා සභාව කටයුතු කිරීම බරපතළ වරදකියි රජයේ ජ්‍යෙෂ්ඨ අමාත්‍යවරයෙක් ප්‍රකාශ කළේය.

දිවයිනෙන් පිටත්ව ගිය ජනාධිපති රනිල් වික්‍රමසිංහ  තවත් දින දෙකකින් පැමිණීමට තිබෙන පසුබිම යටතේ පොලිස්පතිවරයා ඉවත් කිරීම කුමන්ත්‍රණයක ප්‍රතිඵලයක් බවට ප්‍රබල සැකයක් මතුවන බව ජ්‍යෙෂ්ඨ අමාත්‍යවරයා වැඩිදුරටත් පැවසීය.

ජනාධිපතිවරයාත් පොලිසිය බාර අමාත්‍යවරයාත් රටේ නොසිටින අවස්ථාවක පොලිස්පතිවරයා ඉවත් කිරීම රටේ සමස්ත පොලිසියම වසා දැමීමකට සමාන යැයිද අමාත්‍යවරයා සඳහන් කළේය.

ධුර කාලය ඉක්ම ගොස් තිබූ පොලිස්පති සී. ඩී .වික්‍රමරත්නට තවත් සති තුනක් සඳහා සේවා දිගුවක් ලබා දීමට මීට පෙර දී පියවර ගෙන තිබිණි.

• Lankadeepa

ජාත්‍යන්තර සහයෝගීතාව සඳහා වන “එක් තීරයක් – එක් මාවතක්” තෙවැනි සමුළුව හෙට බීජීං නුවරදී ආරම්භවීමට නියමිත අතර ඒ සඳහා සහභාගි වීමට එක්සත් ජාතීන්ගේ මහ ලේකම් ඇන්ටෝනියෝ ගුටරෙස් සහ රුසියානු ජනාධිපති ව්ලැද්මීර් පුටින් චීනයේ බීජීං නුවරට පැමිණ ඇති බව විදෙස් මාධ්‍ය වාර්තා පවසයි .

මෙම සමුළුවට රටවල් 130ක සහ ගෝලීය සංවිධාන 30ක පමණ නියෝජිතයින් සහභාගී වීමට නියමිත බවද එම වාර්තා වල සඳහන් වෙයි.

 මේ අතර රුසියානු ජනාධිපති ව්ලැද්මීර් පුටින් ගේ චීන ආගමනය පිළිබඳ විශේෂ අවධානයක් විදෙස් මාධ්‍ය විසින් යොමුකර ඇති අතර ඒ යුක්රේන යුද්ධයට අදාළව ජාත්‍යන්තර අපරාධ අධිකරණය රුසියන් ජනාධිපති පුටින් අත්අඩංගුවට ගැනීම සඳහා වරෙන්තු නිකුත් කර ඇති පසුබිමක එය සිදුව ඇති නිසාය .

කෙසේ වුවත් විදෙස් මාධ්‍ය වැඩිදුරටත් සඳහන් කර ඇත්තේ ජාත්‍යන්තර අපරාධ අධිකරණයේ සාමාජික රටවල් 123ට චීනය අයත් නොවීම හේතුවෙන් රුසියානු ජනාධිපතිවරයා චීනය සංචාරයට බාධාවක් නොමැති බවය.

දකුණුදිග ලෙබනනයේ සේවයේ නිරතව සිටින සියලු ශ්‍රී ලාංකිකයින් වෙත එරට ශ්‍රී ලංකා තානාපති කාර්යාලය විසින් විශේෂ දැනුම්දීමක් සිදුකර තිබේ.

ඒ අනුව තමන්ගේ නම සහ දුරකථන අංක හැකි ඉක්මණින් ශ්‍රී ලංකා තානාපති කාර්යාලය වෙතට දැනුම්දෙන ලෙස තානාපති කාර්යාලය දැනුම්දී ඇත.

අදාළ තොරතුරු,

070386754 – පළමු ලේකම් සනත් බාලසූරිය
071960810 – පරිවාරක නිලධාරී ප්‍රියන්ත දසනායක

විද්‍යුත් ලිපිනය – This email address is being protected from spambots. You need JavaScript enabled to view it. වෙත ලබාදිය හැකිය.

“එක් තීරයක් - එක් මාවතක්” ජාත්‍යන්තර සමුළුව සඳහා සහභාගිවීමට චීනයට ගොස් සිටින ජනාධිපති රනිල් වික්‍රමසිංහ  සහ පාකිස්ථාන අගමැති අන්වාර්-උල්-හක් කකාර් (Anwaar-ul-Haq Kakar)  අතර නිල හමුව අද (17) පස්වරුවේ බීජිං නුවරදී පැවැත්විණි.

ජාති, ආගම් සහ ජනවර්ග භේද මත එකිනෙකා අතර වෛරය, ක්‍රෝධය වර්ධනය නොකෙරෙන මනුෂ්‍යත්වයෙන් පිරි පොදු සමාජයක් නිර්මාණය කිරීම මුළු ලෝකයේම අනාගත අභියෝගය බව නායක දෙපළ මෙහිදී අවධාරණය කළහ.

පාකිස්ථානය සහ ශ්‍රී ලංකාව මුහුණ දෙමින් සිටින ආර්ථික අර්බුද සහ එයින් යළි ගොඩඒමේ මාර්ග පිළිබඳව ද ජනාධිපති රනිල් වික්‍රමසිංහ  සහ පාකිස්ථාන අග්‍රාමාත්‍යවරයා මෙහිදී දීර්ඝ ලෙස සාකච්ඡා කළහ.

ගාසා තීරයේ මතු වී ඇති ගැටලු පිළිබඳව ද නායකයන් අදහස් හුවමාරු කර ගත් අතර ඒ පිළිබඳ ඒකාබද්ධ නිවේදනයක් නිකුත් කිරීමට ද දෙපාර්ශ්වය එකඟ වූහ.

පාකිස්ථාන මුදල් ඇමතිනි ෂම්ෂාඩ් අක්තාර් (Shamshad Akhtar)  ඇතුළු එරට දූත පිරිසක් ද, ශ්‍රී ලංකා විදේශ අමාත්‍ය අලි සබ්‍රි  ඇතුළු දූත පිරිස ද මෙම අවස්ථාවට එක්ව සිටියහ.

හිටපු අමාත්‍ය නසීර් අහමඩ්ගේ මන්ත්‍රී ධුරය අහෝසි වීමෙන් පුරප්පාඩු වු මන්ත්‍රී ධුරය සඳහා ශ්‍රී ලංකා මුස්ලිම් කොංග්‍රසයේ අලි සහීර් මව්ලානා සෙයියාද්  පාර්ලිමේන්තු මන්ත්‍රී ධුරයේ අද (17) දිවුරුම් දුන්නේය.

නසීර් අහමඩ්  ශ්‍රී ලංකා මුස්ලිම් කොංග්‍රසයෙන් නෙරපා හැරීමට එම පක්ෂය ගත් තීරණය නිත්‍යානුකූල බවට අධිකරණය පසුගිය දා තීන්දු කළේය.

නසීර් අහමඩ්ගේ මන්ත්‍රී ධුරය පුරප්පාඩු වී ඇති බව පාර්ලිමේන්තු මහා ලේකම්වරයා මැතිවරණ කොමිසමට දැනුම් දුන්නේය.

ඒ අනුව පුරප්පාඩු වූ පාර්ලිමේන්තු මන්ත්‍රී ධූරයට මව්ලානාව පත් කරන බව මැතිවරණ කොමිෂන් සභාව විශේෂ ගැසට් නිවේදනයක් මගින් ඔක්තෝබර් 11 වැනිදා නිවේදනය කළේය.

ඒ අනුව ශ්‍රී ලංකා මුස්ලිම් කොංග්‍රසයේ අලි සහීර් මව්ලානා  අද පාර්ලිමේන්තුවේ දී කතානායක මහින්ද යාපා අබේවර්ධන  ඉදිරියේ පාර්ලිමේන්තු මන්ත්‍රී ධුරයේ දිවුරුම් දුන්නේය.

පොලිස් නිලධාරීන්ගේ විෂමාචාර ක්‍රියා සහ ඔවුන් සම්බන්ධයෙන් පැමිණිලි කිරීමට කෙටි ඇමතුම් අංකයක් ප්‍රසිද්ධ කර ඇත.

පොලිස් ආරංචි මාර්ග සඳහන් කරන ආකාරයට එම කෙටි දුරකථන අංකය 118 ලෙස මහජන ආරක්ෂක අමාත්‍යාංශය මගින් පවත්වාගන යනු ලබයි.

පොලිස් මූලස්ථාන ආරංචි මාර්ග සඳහන් කරන ආකාරයට මීට පෙර 118 කෙටි දුරකතනය ඔස්සේ දිවයිනේ සිදුවන විවිධ අපරාධ, විෂ මත්ද්‍රව්‍ය, සම්බන්ධයෙන් තොරතුරු ලබා හැකියාව තිබු අතර , එම තොරතුරු වලට අමතරව පොලිස් නිලධාරීන් සම්බන්ධයෙන් ද දැනුම් දිය හැකිව තිබේ.

තොරතුරු ලබා දෙන්නාගේ අනන්‍යතාවට හෙළි කරමින් හෝ නොකිරීමෙන් ඔවුනට තොරතුරු ලබා දිමේ හැකියාව පවතියි මෙම කෙටි අංකය පැය 24 පුරාම ක්‍රියාත්මක වන අතර මහජනය ලබා දෙන තොරතුරුවල රහස්‍යභාවය සුරක්ෂිත වන බවද පොලිස් මුලස්ථානය වැඩිදුරටත් පවසයි.

ශ්‍රි ලංකාවේ මෘදුකාංග හා දෘඩාංග ඉංජිනේරුවන් වාර්ෂිකව බිහි කිරීමේ අධ්‍යයන වැඩසටහනක් වෙනුවෙන් සහාය ලබාදීමට තම සමාගම සූදානම් බව චීනයේ හුවාවි (Huawei) තාක්ෂණ ආයතනයේ ජ්‍යෙෂ්ඨ උප සභාපති සහ හුවාවි ආසියා පැසිෆික් කලාපීය සභාපති සයිමන් ලින් (Simon Lin)  පැවසීය.

තම සමාගම දැනටමත් තාක්ෂණ හා යටිතල පහසුකම් සැපයිමේ කාර්යයට අමතරව ශ්‍රී ලංකාවේ විශ්වවිද්‍යාල කිහිපයක් සමගම අධ්‍යයන කාර්යයන්ට සම්බන්ධ ආධාර උපකාර සැපයීමේ ක්‍රියාවලියක් ආරම්භ කර තිබෙන බව ද ඔහු වැඩිදුරටත් පෙන්වා දුන්නේය.

චීනයේ සිව් දින නිල සංචාරයක නිරත ජනාධිපති රනිල් වික්‍රමසිංහ  ප්‍රමුඛ දූත පිරිස අද (17) පෙරවරුවේ බීජිං නුවර හුවාවි සමාගමේ පර්යේෂණ හා සංවර්ධන මධ්‍යස්ථානයේ සංචාරයක නිරත වූ අතර එහිදී සයිමන් ලින්ග් මේ බව ප්‍රකාශ කළේය.

මෙහිදී අදහස් දැක්වූ ජනාධිපති රනිල් වික්‍රමසිංහ  සඳහන් කළේ තමන් මෙවර හුවාවි කේන්ද්‍රස්ථානයට පැමිණියේ ශ්‍රී ලංකාවේ අනාගතය පිළිබඳව සාකච්ඡා කිරීමට බවයි.

ඩිජිටල් අධ්‍යාපන ක්‍රමවේදය සහ හරිත බලශක්ති නිෂ්පාදනය සම්බන්ධයෙන් චීන රජයේ මෙන්ම හුවාවි සමාගමේ සහාය ද ශ්‍රී ලංකාවට ඉතා වැදගත් බව ජනාධිපතිවරයා මෙහිදී අවධාරණය කළේය.

අනාගත ලෝකයට ශක්තිමත්ව මුහුණදීම සඳහා ශ්‍රී ලංකාවේ ඉතා තරගකාරී ඩිජිටල් සහ හරිත ආර්ථිකයක් නිර්මාණය කළයුතු බවත්, ඒ සඳහා මූලික පදනම දැන් සැකසෙමින් පවතින බවත් ජනාධිපති රනිල් වික්‍රමසිංහ  වැඩිදුරටත් පෙන්වා දුන්නේය.

ආර්ථිකය සමගම ලාංකේය පුරවැසියන්ද ඩිජිටල් තාක්ෂණයෙන් බල ගැන්වීමේ වැදගත්කම පිළිබඳ මෙහිදී පුළුල් ලෙස සාකච්ඡාවට ලක් වූ අතර හුවාවි සමාගම විසින් සිදුකරන ජාත්‍යන්තර සේවාවන් පිළිබඳව මෙන්ම ඔවුන්ගේ නවතම තාක්ෂණ ක්‍රමවේදයන් සහ උපකරණ පිළිබඳවද මෙහිදී ශ්‍රී ලංකා නියෝජිත පිරිස දැනුවත් කෙරිණි.

එසේම ශ්‍රී ලංකාවේ පාසල් ඩිජිටල්කරණය සඳහා හුවාවි සමාගමේ සහාය ලබාදීම පිළිබඳ ගිවිසුමකට අත්සන් තැබීම ද සිදු විය.

විදේශ කටයුතු අමාත්‍ය අලි සබ්‍රි, ප්‍රවාහන හා ජනමාධ්‍ය අමාත්‍ය බන්දුල ගුණවර්ධන, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක යන අය ද මෙම අවස්ථාවට එක්ව සිටියහ.

එසේම ජනාධිපති රනිල් වික්‍රමසිංහ  ප්‍රමුඛ ශ්‍රී ලංකා දූත පිරිස චීනයේ සිවිල් ඉංජිනේරු ඉදිකිරීම් සංස්ථාව ඇතුළු ප්‍රමුඛ පෙළේ ව්‍යවසායක ආයතන ගණනාවක ප්‍රධානීන් සමඟද සාකච්ඡා පැවැත්වූහ.

ජාතික සංහිදියාව තහවුරු කිරීම වෙනුවෙන් ජනාධිපති රනිල් වික්‍රමසිංහ මහතා නම්‍යශීලී ප්‍රතිපත්තියක සිට කටයුතු කරන නායකයෙකු වන බැවින් දමිළ දේශපාලන නායකයන් දමිල ජනතාවගේ ප්‍රශ්ණ විසදා ගැනීම සදහා සහයෝගයෙන් කටයුතු කළයුතු බව වෙළද රාජ්‍ය අමාත්‍ය එස්.වියාලේන්ද්‍රන්  පැවසීය.

පසුගිය සමයේ ජනාතාව මුහුණ දුන් ආර්ථික දුෂ්කරතා මේ වන විට යම් ප්‍රමාණයකට සමනය වී ඇති බව පෙන්වා දුන් රාජ්‍ය අමාත්‍යවරයා ආර්ථික අර්බුදයෙන් රට මුලුමනින්ම ගොඩගැනීම සදහා ජනාධිපතිවරයා ප්‍රමුඛ රජය ගෙන යන වැඩපිළිවෙල අඛණ්ඩව හා කාර්යක්ෂමව ඉදිරියට ගෙන යාමට සියලු දෙනා සහාය දියයුතු බවත් අවධාරණය කළේය.

වෙළද රාජ්‍ය අමාත්‍ය එස්. වියාලේන්ද්‍රන්  මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (17) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය.

රටේ පැවති ආර්ථික අවපාතය මේ වන විට ක්‍රමයෙන් යථා තත්ත්වයට පත්වෙමින් තිබෙනවා. නමුත් එය තවමත් අසම්පූර්ණයි. ජනතාවගේ ජීවන බර සම්පූර්ණයෙන් අඩුව ඇති බවක් කියන්න බැහැ. එහෙත් පසුගිය ආර්ථික අර්බුදයේදී ජනතාව මුහුණ දුන් දුෂ්කරතා බොහොමයක් අඩුව තිබෙනවා. තවදුරටත් ජනතාව මුහුණ දෙන අපහසුතාවයන්ට අප තවදුරටත් පිළියම් යෙදිය යුතුයි.

ජනාධිපති රනිල් වික්‍රමසිංහ  ඇතුළු අදාළ අමාත්‍යාංශ ඒ වෙනුවෙන් අවශ්‍ය කටයුතු සිදු කරමින් සිටිනවා. එය අඛණ්ඩව හා කාර්යක්ෂමව සිදු කළ යුත්තක් වනවා. ඒ සඳහා අප සියලු දෙනාම එක්ව කටයුතු කළ යුතුයි.

විෂය භාර රාජ්‍ය ඇමැතිවරයා විදියට රටේ අත්‍යවශ්‍ය භාණ්ඩ මිල තවත් අඩු කිරීම අපේ වගකීමක් වනවා.

අත්‍යාවශ්‍ය භාණ්ඩ මිල වැඩි වීම බලපාන්නේ මේ රටේ ජීවත් වන සාමාන්‍ය ජනතාවට. ඒ නිසා ජනතාවගේ බලාපොරොත්තු ඉටු වන පරිදි භාණ්ඩ මිල අඩු කළ යුතුයි. අපෙන් ඉටුවිය යුතු‍ වැදගත්ම දේ එය බැවින් අත්‍යාවශ්‍ය භාණ්ඩ අඩු මිලට ජනතාවට ලබාදීමට අවශ්‍ය පියවර ගැනීමට වෙළද අමාත්‍යාංශය කටයුතු කරමින් සිටිනවා.

ඒ යටතේ අත්‍යාවශ්‍ය භාණ්ඩ රැසක මිල අඩු කළ ද වෙළෙඳුන් කිහිප දෙනෙකු විසින් තවමත් ඇතැම් භාණ්ඩවල මිල අඩු කර නැහැ. ඇතැම් නිෂ්පාදන තවමත් වැඩි මිළට අලෙවි කිරීමේ තත්ත්වයක් පෙන්නුම් කරනවා. එබැවින් එවැනි නිෂ්පාදන අළෙවි කරන පුද්ගලයින්ට එරෙහිව නීතිමය පියවර ගන්නා ලෙස අපි පාරිභෝගික කටයුතු අධිකාරියේ නිලධාරීන්ට උපදෙස් දී තිබෙනවා.

ඒ වගේම ජනවාර්ගික ගැටලුවට විසඳුම් සෙවීමට සහ සංහිදියාව තහවුරු කිරීමට ද අප කටයුතු කරනවා. ඒ සම්බන්ධව ජනාධිපතිවරයා විසින් පාර්ලිමේන්තුව තුළත් ඉන් පිටතත්, ආණ්ඩු පක්ෂයේ සහ විපක්ෂයේ මන්ත්‍රීවරුන් සමග සාකච්ඡා වට කිහිපයක් පැවැත්වීමට කටයුතු කළා. එහිදී 13 වැනි සංශෝධනය සහ ඒ ආශ්‍රිත කරුණු සම්බන්ධයෙන් සාකච්ඡා කළා. එම සාකච්ඡා තවමත් සිදුවෙමින් පවතිනවා. ඒ සම්බන්ධයෙන් විවිධ පාර්ශව විවිධ මත ඉදිරිපත් කර තිබෙනවා. නමුත් අපේ ස්ථාවරය නම් ජනතා අපේක්ෂා ඉටුකිරීමයි.

තවද ජනාධිපති රනිල් වික්‍රමසිංහ මහතා විසින් ප්‍රථම වරට දමිළ ජාතිකයෙකු නැගෙනහිර පළාතේ ආණ්ඩුකාරවරයා ලෙස පත් කර තිබෙනවා. ඒ ගැන අපි ජනාධිපතිතුමාට ස්තුතිවන්ත විය යුතුයි. වත්මන් ජනාධිපතිවරයා විශේෂයෙන්ම දෙමළ ජනතාවගේ ප්‍රශ්නය අවසන් කිරීමට විශේෂ උනන්දුවකින් කටයුතු කරනවා. ඒ වගේම රනිල් වික්‍රමසිංහ ජනාධිපතිතුමා ඉතාම නම්‍යශීලීයි. ඒ නිසා ඔහු සමඟ සාකච්ඡා කර අපේ ප්‍රශ්න විසඳා ගැනීමට දෙමළ නායකයන් ඉදිරිපත් විය යුතුයි. එය ඔවුන්ගේ වගකීමක් ලෙස ගත යුතුයි. දෙමළ නායකයන්, සිවිල් සමාජ ක්‍රියාකාරීන් සමඟ සාකච්ඡා කළ යුතුයි. අපේ ප්‍රශ්න ගැනත් අපි ඔවුන් සමඟ සාකච්ඡා කළ යුතුයි. අපි එම කටයුතු වේගවත් කළ යුතුයි.

අපට ලැබුණු කෙටි කාලසීමාව තුළ අප හැකි තරම් ව්‍යාපෘති ක්‍රියාත්මක කර තිබෙන බවත් සිහිපත් කළ යුතුයි. ඒ වගේම ඉදිරියටත් මාර්ග සංවර්ධන, පාලම් ඉදිකිරීම්, කෘෂිකාර්මික සහ ධීවර ක්ෂේත්‍ර ආශ්‍රිත මෙන්ම ජනතාවගේ ජීවනෝපාය වැඩිදියුණු කිරීම් වැනි සංවර්ධන වැඩසටහන් අපි හැකිතාක් ක්‍රියාත්මක කරනවා. නැගෙනහිර පළාතේ දිගින් දිගටම සිදුවන අනවසර වැලි ගොඩදැමීම් වැළැක්වීමට ද අප පියවර ගෙන තිබෙනවා.

ඉන්දියන් සාගරයේ අනන්‍යතාව ශක්තිමත් කරමින් ශ්‍රී ලංකාව සහ ඉන්දුනීසියාව අතර දේශපාලන, ආර්ථික සහ සංස්කෘතික සබඳතා ශක්තිමත් කර ගැනීමට පියවර ගත යුතු බව ජනාධිපති රනිල් වික්‍රමසිංහ  අවධාරණය කළේය.

“එක් තීරයක් - එක් මාවතක්” ජාත්‍යන්තර සමුළුව සඳහා සහභාගිවීමට චීනයට ගොස් සිටින ජනාධිපති රනිල් වික්‍රමසිංහ මහතා සහ ඉන්දුනීසියා ජනාධිපති ජොකෝ විදොදෝ (Joko Widodo)  අතර නිල හමුව අද (17) පෙරවරුවේ බීජිං නුවරදී සිදු වූ අතර එහිදී නායකයින් මේ පිළිබඳ දිර්ඝ ලෙස සාකච්ඡා කළහ.

පසුගිය සමයේ පැවති ආර්ථික අර්බුදය හේතුවෙන් සහ ෆාම් ඔයිල් තහනම හේතුවෙන් දෙරට අතර ආනයන, අපනයන කාර්යයන් සඳහා ඇති වූ බලපෑම පිළිබඳව ද මෙහිදී අවධානය යෙමු විය.

ආසියානු රටවල් ගණනාවක් සමඟ නිදහස් වෙළඳ ගිවිසුම්වලට එළැඹීමටත්, ඉන්දියාව සමග ඇති නිදහස් වෙළෙඳ ගිවිසුම වඩාත් විධිමත් කර ගැනීමටත් ශ්‍රී ලංකාව කටයුතු කරමින් සිටින බව ජනාධිපති රනිල් වික්‍රමසිංහ මෙහිදී පෙන්වා දුන්නේය.

ඉන්දුනිසියාව සහ ශ්‍රී ලංකාව අතර නිදහස් වෙළෙඳ ගිවිසුමක් ඇති කර ගැනීමට කටයුතු කිරීම වඩාත් කාලෝචිත බව ඉන්දිනිසියානු ජනාධිපතිවරයා සඳහන් කළේය.

ලෝක ආර්ථික සහ දේශපාලන ප්‍රවණතාවයන් පිළිබඳවත්, ආසියානු කලාපයේ කුඩා රාජ්‍යයන් ලෙස එම අභියෝග හමුවේ කටයුතු කළ ආකාරය පිළිබඳවද මෙහිදී නායකයන් දීර්ඝ ලෙස අදහස් හුවමාරු කර ගත්හ.

ඉන්දුනීසියානු විදේශ අමාත්‍ය රෙට්නෝ මර්සුදි (Retno Marsudi)  ප්‍රමුඛ එරට අමාත්‍යවරුන් සහ නිලධාරීන් පිරිසක් මෙම අවස්ථාවට එක්ව සිටි අතර ශ්‍රී ලංකා පාර්ශ්වයෙන් විදේශ කටයුතු අමාත්‍ය අලි සබ්‍රි, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, මහබැංකු අධිපති ආචාර්ය නන්දලාල් වීරසිංහ යන අය එක්ව සිටියහ.

ඊශ්‍රායල,පලස්තීන යුද්ධයෙන් ශ්‍රී ලංකා ආර්ථිකය වැටෙනතුරු පිරිසක් සතුටින් බලා සිටින බව කම්කරු හා විදේශ රැකියා අමාත්‍ය මනුෂ නානායක්කාර පවසයි.

යුද්ධයේ බලපෑමත් සමඟ ලංකාවේ ආර්ථිකය කඩා වැටී ආණ්ඩුව කරගෙන යන්න බැරිවෙන තුරු අදාළ පාර්ශ්ව බලා සිටින බව සඳහන් කළ අමාත්‍යවරයා අහක යන මිසයිලයක් වැටී හෝ ආණ්ඩුව කුඩුපට්ටම් වීම ඔවුන්ගේ අභිලාසය බවද අමාත්‍යවරයා සඳහන් කළේය.

එවැනි පිරිසක් සිටින රටක දේශපාලන සාක්ෂරතාවය ඉහළ නොදමා රට ගොඩ ගන්නට නොහැකි බවද පෙන්වාදුන් අමාත්‍යවරයා එම අදහස් දක්වා සිටියේ පිටකෝට්ටේ සිරිකොත එක්සත් ජාතික පක්ෂ මූලස්ථානයේ දී පැවති මාධ්‍ය හමුවකදී ය.

රනිල් වික්‍රමසිංහට රට කරන්න බැරි වෙනවා නම් එය ඔවුන්ගේ ජයග්‍රහණය බව හිතෙන තරමට පහත් තත්වයට මේ කණ්ඩායමේ මානසිකත්වය ඇද වැටී තිබෙන බවද අමාත්‍යවරයා වැඩිදුරටත් සඳහන් කර සිටියේය.

බුදු දහම ඇතුළු අන්‍යාගම්වලට අපහාස කල බව සඳහන් සිද්ධියේ සැකකරුවකු ලෙස නම්කර සිටින දේවගැති ජෙරම් ප්‍රනාන්දුට නීතිය ඉදිරියේ විශේෂ සහන සලසා දීමට හැකියාවක් නොමැති බව නීතිපතිවරයා අද (16) අභියාචනාධිකරණය හමුවේ ප්‍රකාශ කර ඇත.

එහිදී නීතිපතිවරයා වෙනුවෙන් රජයේ ජ්‍යේෂ්ඨ නීතිඥ ශමින්ද වික්‍රම විසින් මේ දැනුම්දීම සිදුකළ අතර, ඒ තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා දේවගැති ජෙරම් ප්‍රනාන්දු විසින් ඉදිරිපත් කළ රීට් පෙත්සමක් කැඳවනු ලැබූ අවස්ථාවේදී ය.

මෙම පෙත්සම අද අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ චමත් මොරායස් යන විනිසුරු මඩුල්ල ඉදිරියේ කැඳවා තිබිණ.

මෙරට තුල ඉන්ධන බෙදා හැරීම සඳහා නැවත QR ක්‍රමවේදය හෝ වෙනත් ක්‍රමවේදයක් ක්‍රියාත්මක කිරීමේ කිසිදු සැලැස්මක් නොමැති බව විදුලිබල හා බලශක්ති අමාත්‍ය කංචන විජේසේකර පවසයි.

මාධ්‍ය වෙත අදහස දක්වමින් අමාත්‍යවරයා මේ බව සඳහන් කර සිටියේ , පලස්තීනය සහ ඊශ්‍රායලය අතර මේ වන විට පවතින යුධමය තත්වය හේතුවෙන් ඉදිරියේදී ඉන්ධන අර්බුදයක් ඇතිවිය ඇති වේ යයි අනුමාන කර ආණ්ඩුව ඉන්ධන පරිභෝජනය සීමා කිරීමට ජාතික ඉන්ධන බලපත්‍රය හෙවත් කිව්.ආර්. ක්‍රමවේදය නැවත ගෙන ඒමට සූදානම් වන වන බව ඇතැම් සමාජමාධ්‍ය තුළ සිදුකර තිබූ පළකිරීම් වලට ප්‍රතිචාර දක්වමිනි.

ආණ්ඩුව, විදුලිබල හා බලශක්ති අමාත්‍යාංශය සහ ලංකා ඛනිජ තෙල් සංස්ථාව කිව්.ආර්. ක්‍රමවේදය නැවත ගෙන ඒම සඳහා කිසිදු සාකච්ඡාවක් හෝ මේ දක්වා කර නොමැති බව ද අමාත්‍යවරයා එහිදී වැඩිදුරටත් සඳහන් කළේය.