පුවත්

"මම මේ රට භාරගත්තේ රට ඉදිරියට ගෙනියන්නයි. හුගක් අය කිව්වා, මම මේක භාරගත්තේ රාජපක්ෂලා ආරක්ෂා කරන්න කියලා. හැබැයි මම ගෝඨාභය රාජපක්ෂ ජනාධිපති හමුවෙලා අගමැතිකම ඉල්ලුවේ නැහැ. මට කිව්ව නිසයි මම භාරගත්තේ. ජනාධිපතිවරයා ඇවිල්ලා ආණ්ඩුවක් හදන්න කියලා කිව්වම මට ඒකට බැහැ කියන්න බැහැ. ඉතින් එහෙම කරපු මම රාජපක්ෂ ආරක්ෂා කරනවා නම්, රාජපක්ෂට ලියුම් ලියලා අගමැතිකම ඉල්ලපු අයට මොකද කියන්න ඕන? මම ආවේ එක වැඩකටයි. මම ආවේ ශ්‍රී ලංකාවේ ඉන්න හැම කෙනාම ආරක්ෂා කරන්නයි."

ජනාධිපති රනිල් වික්‍රමසිංහ මේ කතාව කිව්වේ පසුගියදා පැවති, එක්සත් ජාතික පක්ෂ විශේෂ සම්මේලනයේදීය.

දැන් ප්‍රශ්නය වන්නේ ශ්‍රී ලංකාවේ ඉන්න හැමෝම ආරක්ෂා කරන්න කියා බලය ගැනීමට එකඟවූ ජනාධිපති රනිල් වික්‍රමසිංහ, ඒ බාරගත් වැඩේ හරියට කළාද යන්නය.

සංඛ්‍යා දත්ත සහ හාත්පස විමසීමේදී නම් , දැන් පෝලිම් යුගයක් නැත. අත්‍යවශ්‍ය භාණ්ඩ හිඟ නැත. විදුලි කප්පාදුවක් ද නැත. කර්මාන්ත ශාලා වැසීයන තත්ත්වයක් නැත. වැඩිම උද්ධමනය ඇති ලෝකයේ රටවල් ලැයිස්තුවේ ඉහළින් සිටි මේ රට දැන් ඒ අහලකවත් නැත. එනිසා හෙට දවස කන්න ලැබෙයිද ? රැකියාව අහිමි වෙයිද ? විදුලි කප්පාදුව නිසා කර්මාන්තය වහන්න වෙයිද ? තෙල් නැතුව හයර් එකක්වත් දුවන්න බැරුව වාහනය සීස් වෙයිද ? වගේ ප්‍රශ්න නැත.

ඒ කියන්නේ ජනාධිපති රනිල් වික්‍රමසිංහ ඉතිහාසයේ මේ රට මුහුණදුන් දරුණුතම ආර්ථික අර්බුදයෙන් රට මුදවා ගත්තා කියාද ? දැන් සේරම ප්‍රශ්න අවසන් කියාද ?
ඒ ගැන කවුරු මොනවා කිව්වත් ජනාධිපති රනිල් වික්‍රමසිංහ නම් මොකුත්ම කියන්නේ නැත. ඒ වෙනුවට ජනාධිපති රනිල් වික්‍රමසිංහ කියන්නේ වෙන කතාවක් ය. පසුගියදා කොළඹ රාජකීය විද්‍යාලයේ පැවති, " රීඩ් මාවතේ සියවස් සමරුව " උත්සවයට එක්වෙමින් ද කිව්වේ , " දේශපාලන වෙනස්කම් තියාගමු , නමුත් රට ගොඩදාන වැඩේට එක්වෙමු " කියාය.

ඒ කියන්නේ රට ගොඩදාන වැඩේ තවමත් අවසන් නොමැති බවය. සරලව නම් මේ කියන්නේ , ඉතිහාසයේ ප්‍රථම වතාවට නිල වශයෙන් බංකොලොත් භාවය ප්‍රකාශයට පත්කර , ඉතිහාසයේ දරුණුතම ආර්ථික අර්බුදයට ලක්ව, තිබූ රට යන්තම් සාමාන්‍ය තත්ත්වයට ගැනීමට හැකිව තිබෙන බවය. තවත් සරලව කිව්වොත් , එදා වේල කන්නත් නැතිව හිටපු රට , වේල යන්තමින් පිරිමහන්න පුළුවන් වන තැනට ගෙනවිත් දී ඇති බවය. ඊට සාහිත්‍යයත් එක්කලොත්, දැඩි සත්කාර ඒකකයේ සිටි රෝගියා , සාමාන්‍ය වාට්ටුට යැවීමට හැකියාව ඇති බවට නිරීක්ෂණය වෙන්නට ගෙන ඇති බවය. ඒ හැර රෝගියා ටිකට් කපා ගෙදර යවන්න පුළුවන් බවක් ජනාධිපති කියන්නේ නැත.

ඒ වෙනුවට ජනාධිපති රනිල් වික්‍රමසිංහ දිගින් දිගටම කියන්නේ 2022 තිබූ අභාවාචී තත්ත්වයෙන් තත්වයෙන් මිදී ඇති නමුත් , යළිත් එම අභාවාචී අත්දැකීම නොලබන්න නම් සිදුකළ යුතු ප්‍රතිසංස්කරණ රැසක් ඇති බවය. ඒ වෙනුවෙන් වන වැඩපිළිවෙළ ක්‍රියාත්මක කිරීම මෙරට ප්‍රමුඛතම ජාතික අභිලාෂය බැවින් ඒ සඳහා සියලු දෙනා එක්විය යුතු බවය. එසේ නොවුනොත් 2022 ලැබූ අභාවාචී අත්දැකීමට වඩා අතිශය දරුණු තැනකට රට පත්වීමේ අවධානම ප්‍රතික්ෂේප කළ නොහැකි බවය.

ජනාධිපති රනිල් වික්‍රමසිංහ එසේ අවධාරණය කරන විට, ජාත්‍යන්තර මූල්‍ය අරමුදල , ලෝක බැංකුව , ආසියානු සංවර්ධන බැංකුව ඇතුළු ගෝලීය මූල්‍ය ආයතන, සංවිධාන , චීනය , ඉන්දියාව , පැරිස් සමාජය ඇතුළු බටහිර රටවල් කියන්නේ මොකක්ද ? ඔවුන් සියලු දෙනා ගේ ද පොදු අදහස වී තිබෙන්නේ , ලංකාව පසුගිය සමයේ හිටපු තත්ත්වය සමඟ සැසඳීමේදී විශාල ප්‍රගතියක් මේ වන විට ලබා ඇති බවය. නමුත් අර්බුදයෙන් මුළුමනින්ම ගැලවී, ආර්ථික ස්ථාවරත්වයක් ඇතිකර ගැනීමට නම් යෝජිත ප්‍රතිසංස්කරණ නියමිත ආකාරයට සිදුකළ යුතු බවය. එසේම ඒ වෙනුවෙන් වන සාර්ථක පදනමක් ඇතිකර ගෙන තිබෙන බවය.

සැබවින්ම ජාත්‍යන්තර මූල්‍ය අරමුදල සමග වන විස්තීරණ ණය මුදල ගැනීමට අදාළ පළමු සමාලෝචනය තුළ පරිසාධනය නොවූ කාරණා තිබියදී පවා, දෙවැනි වාරිකය නිදහස් කිරීමට අදාළ කර්‍ය මණ්ඩල මට්ටමේ එකඟතාව පවා හිමිවූයේ එකී විශ්වාසය නිසාය.

එසේ නම් මේ සියල්ල විසින් තහවුරු කර ඇත්තේ ජනාධිපති රනිල් වික්‍රමසිංහ නිවැරදි දිශානතිය වෙත රටේ ආර්ථිකය ගෙන යමින් තිබෙන බවය.

ඒ බව තවත් තහවුරු වන්නේ , 2024 අයවැය අභිමුව වෘත්තීය සමිති මාෆියාව , සිය සම්ප්‍රදායික සටන් පාඨ දක්වා පසුබැස තිබීම හමුවේය.

එළැඹෙන වසර සඳහා වන අයවැය වාර්තාව සාමාන්‍යයෙන් ඉදිරිපත් කරන්නේ ඊට පෙර වසරේ නොවැම්බර් මාසයේ දී ය. ඊට අදාළව , වැටුප් වැඩිවීමක් ඇතුළු විවිධ ඉල්ලීම් ඉදිරිපත් කරමින් ඔක්තෝබර් මාසයේ අවසානය සහ නොවැම්බර් මාසය හැඩි කිරීම වෘත්තීය සමිති මාෆියාවේ සම්ප්‍රදායික අංගයක් ය. ඒ අනුව යමින් මෙවර අයවැය අවස්ථාවේ ද වෘත්තීය සමිති මාෆියාව සම්ප්‍රදායික සටන් පාඨ කරට ගෙන පාරට බැස ඇත.

මෙවර එහි ප්‍රධාන සටන් පාඨය කරගෙන ඇත්තේ , රාජ්‍ය සේවකයන් සඳහා රුපියල් 20,000ක වැටුප් වැඩිවීමක් ය. එය අයවැය හරහා ලබා නොදුන්නොත් , රාජ්‍ය සේවය අනර්මණ්‍ය කරන , දීප ව්‍යාප්ත වර්ජනයක් සමග රට අරාජික කිරීමේ තර්ජන රැසක් රජය වෙත එල්ල කරමින් ඇත.

මෙරට පසුගිය සමයේ අහන්න දකින්න ලැබුණේ #go home දේශපාලන සටන් පාඨය. ගෝඨා ගෝ හෝම් , මහින්ද ගෝ හෝම් , 225 ම ගෝ හෝම් ඒ අතර විය. රට ඉතිහාසයේ දරුණුතම ආර්ථික අර්බුදයට මුහුණදී සිටි ඒ සමයේ පවා "ගෝ හෝම්" සටන් පාඨ මිසක් , දරුණු අඝාධයකට වැටී තිබූ ආර්ථිකයක්, දිනෙන් දින දරුණු වූ අරගලයක් සහිත ප්‍රචණ්ඩත්වයක් , දිග්ගැස්සෙන අරාජිකත්වයක් නිර්මාණය වෙමින් සෑම ක්ශේත්‍රයකම " සොහොන් ලකුණු " පමණක් පෙන්නුම් කළ රට එයින් මුදාගන්නා සැලැස්මක් කවුරුත් ඉදිරිපත් කරේ නැත. එදා ඒ රට ගොඩදාන වැඩපිළිවෙළ තිබුණේ ජනාධිපති රනිල් වික්‍රමසිංහ ට පමණය.

කොවිඩ් වසංගතය අවස්ථාවේ ද , ආර්ථික දුෂ්කරතා නිසා එදාත් වැටුප් වැඩිවීමක් ඉල්ලා වෘත්තීය සමිති මාෆියාව කෙඳිරි ගෑවා අපිට මතකය. එදා මුදල් ඇමති වූ බැසිල් ඒ ඉල්ලීම පිළිගත්තේ, ඔවුන්ගේ ක්‍රමය වූ අලුතෙන් මුදල් මුද්‍රණය කර වැටුප් වැඩිවීමක් ලබාදිය හැකි බව සඳහන් කරමින්ය . නමුත් මෙරට ආර්ථික විශේෂඥයන් මෙන්ම විශේෂයෙන් ආර්ථිකය සම්බන්ධයෙන් වගකිවයුතු නිලධාරීන් රැසක් එහිදී ඊට විරෝධය පලකර සිටියේ , අලුතෙන් මුදල් මුද්‍රණය කිරීම ඒ වන විටත් සීමාව ඉක්මවා ගොස් ඇති බැවින් එය කොහෙත්ම අනුමත කළ නොහැකි බව පෙන්වා දෙමින් ය.

එදා වෘත්තීය සමිති මාෆියාවේ කෙඳිරිල්ලට දේශපාලනය බේරගන්න ගියා නම් උද්ධමනය ඉහළ යන්නේ 64% - 70% ක් ලෙස නොව , 90% ටය. එසේ වූවා නම් සොච්චමක් ලෙස වුවත් , වැටුප් වැඩිවීමක් ගත්තා කියා වෘත්තීය සමිති මාෆියාව ආඩම්බර ය. අර්බුදය හමුවේ පවා වැටුප් වැඩිවීමක් දුන්නා කියා ආණ්ඩුව ද පාරම් බාන්න තිබිණ. නමුත් අධි උද්ධමනයක් ඇතිව , විල්බැරෝවක් පිරින්න මුදල් ගෙනිහින් පාන් බාගයක් හෝ හාල් ග්‍රෑම් 500ක් ගේන්න වෙන පුඩිය කන්න වෙන්නේ මිලියන 22 ක සමස්ථ ජනතාවටමය.

ඒ කතා මොනවා වුණත් , එදා ගෝඨාභය පාලන සමයේ වැටුප් වැඩිවීම ඉල්ලූ ආකාරය සහ වෘත්තීය සමිති මාෆියාව අද එය ඉල්ලන ආකාරය අතර ඇති ලස්සනම කාරණයක් ඇත. එනම් වෘත්තීය සමිති මාෆියාව එදා වැටුප් වැඩිවීමක් ඉල්ලා සිදුකළ කෙඳිරිල්ල අද තර්ජනයක් ව තිබීමය. මෙහි ලස්සන පෙනෙන්නේ, අදාළ ඉල්ලීම සිදුකිරීම සඳහා වෘත්තීය සමිති මාෆියාව පවතින වාස්ථවික තත්ත්වය සම්බන්ධයෙන් කරන තක්සේරුව තේරුම් අරගත් විටය. ඒ අනුව එදා වැටුප් වැඩිවීමක් වෙනුවෙන් කෙඳිරීමක් පමණක් වන තක්සේරුව සිදුවන්නේ , සැබවින්ම වැටුප් වැඩිවීමක් කිරීමට නොහැකි තත්ත්වයක් පැවති නිසාය. එදා පැවති සැබෑ තත්ත්වය වූයේ වැටුප් වැඩිවීමක් නොව , තිබෙන වැටුපත් ගෙවා ගන්නට නොහැකි තැනකට ආර්ථිකය ඇදගෙන වැටී තිබීමය.

නමුත් අද සද්ද දමා වැටුප් වැඩිවීමක් ඉල්ලන තැනට වෘත්තීය සමිති මාෆියාව තක්සේරුව සිදුකරන්නේ , ඒ වැටුප් ගෙවීමටත් නොහැකි , අවධානමේ පැවති තත්ත්වයෙන් ජනාධිපති රනිල් වික්‍රමසිංහ ආර්ථිකය ගලවා ගෙන ඇති බවය. ඒ ගලවා ගැනීම ගැන කොතරම් ඉහළ තක්සේරුවක් වෘත්තීය සමිති මාෆියාව සතුද කියනවා නම් , රුපියල් 20000ක වත් වැටුප් වැඩිවීමක් ඉල්ලා මිස, නැත්නම් සේරම ලකුණු ජනාධිපති රනිල් වික්‍රමසිංහ ට බව සහතික නිසාය.

කොහොමටත් ජනාධිපති රනිල් වික්‍රමසිංහ මෙන්ම මුදල් රාජ්‍ය අමාත්‍යවරුන් ද පසුගිය අවස්ථා කිහිපයකදීම පවසා සිටියේ, 2024 අයවැය හරහා සැලකිය යුතු සහන ප්‍රමාණයක් ලබාදීමට හැකිවනු ඇති බවය. ඒ කතා අස්සේ වැටුප් වැඩිවීමක් ගැනත් අහන්න ලැබිණ. සැබවින්ම ඒ සමයේ අද රුපියල් 20000ක වැටුප් වැඩිවීමක් ඉල්ලන වෘත්තීය සමිති මාෆියාව සිටියේ තම වෙන්ඩ ජනාධිපති නායකයා ගේ ජනහමු වලට බස් වලින් සෙනග අදිමින් ය.

මෙරට වෘත්තීය සමිති මාෆියාව කොතරම් දෙබිඩිද යන්නත් කොතරම් නරුමද යන්නත් තේරුම් ගන්න නම් මේ පැහැදිලි සත්‍ය හොඳටම ප්‍රමාණවත් ය. සැබවින්ම මේ 20000ක වැටුප් වැඩිවීමක් ඉල්ලීම පිටුපස තිබෙන එකම දුෂ්ඨ චේතනාව 2024 අයවැය හරහා ජනතාව වෙත සහන ප්‍රමාණයක් ලබාදුන්නොත්, මේ වන විටත් ජනාධිපති සිහිනෙක ගිලී වම දකුණ පටලවාගෙන සිටින නායකයාගේ ලකුණු කැපෙයි කියන භීතිකාව ය. ඔවුන්ගේ තක්කඩි නරුම අපේක්ෂාව , රට ගොඩනැගීම කෙසේ වෙතත් පොඩියට හෝ වැටුප් වැඩිවීමක් සිදුවුවහොත් ඒ ලකුණු තමන්ගේ වෙන්ඩ ජනාධිපති නායකයා ගේ ගිනුමට එක්කර ගන්නය.

කොහොමටත් අද ජනප්‍රිය දේශපාලනයේ කරවටක් ගිලීගොස් සිටින ඊනියා වම්මුන්ගේ වෘත්තීය සමිති මාෆියාව ඉතිහාසය පුරාම කළේ, අනුන්ගේ දේ පැහැර ගැනීම මිස තමන් දෙයක් ගොඩනැගීම නොවේය. ඔවුන් විප්ලවය කියන අකුරු පහත් ඉතිහාසය තුළ කැත විදිහට දූෂණය කළේ, තියෙන එකාගේ දේ පැහැරගෙන නැති එකාට දීම ලෙස එය අරුත් ගන්වමින් ය.

දැන් ප්‍රශ්නය වන්නේ , ලකුණු පාට පක්ෂයේ නම වෙනස් කළ පමණින් ඔවුන් වෙනස් වෙලාද යන්නය. නැත. මේ සූදානමත් ඒ බව පෙන්වන සැත්කමත් " 20000" සටන් පාඨය මතම තබා සිදුකරන්නය.

වෘත්තීය සමිති මාෆියාව 20000 ක වැටුප් වැඩිවීම ඉල්ලන සටන් පාඨය සාධාරණීකරණය කරන්නේ වසර 7කින් වැටුප් වැඩිවීමක් නොවූ බව කියමින් ය. ඒ කතාව ඇත්තය. ජනාධිපති රනිල් වික්‍රමසිංහ එවකට අග්‍රාමාත්‍ය ලෙස සිටියදී රාජ්‍ය අංශය වැටුප් අවම රුපියල් 10000 ක් වන ලෙස , එතැන් සිට ඉහළට වැටුප් වැඩිවීමක් කළේය. එදා ඔහු ඒ වෙනුවෙන් මුදල් අමාත්‍යවරයා ව මෙහෙයවූයේ, ඊට පෙර සිටි මුදල් ඇමති වූ මහින්ද රාජපක්ෂ රුපියල් 2000කට වඩා වැටුප් වැඩිවීමක් කිරීමට නොහැකි බව සඵත කර තිබියදී ය.

එදා රාජ්‍ය සේවයට ඉතිහාසයේ වැඩිම වැටුප් වැඩිවීම සිදුකිරීමට තම අමාත්‍යවරයා ව මෙහෙයවූ නායකයා ඒ කළේ රාජ්‍ය ආදායම් ඉහළ දැමීම ඇතුළු නිවැරදි උපායමාර්ගික වැඩපිළිවෙළක් ඔස්සේ ය.

නමුත් මේ මොහොතේ වාස්ථවික තත්ත්වය වෙනස් ය. මේ වන විට රාජ්‍ය අංශය ලක්ෂ 15ක් පමණ සේවය කරන අතර මාසිකව වැටුප් ගෙවීමට පමණක් රුපියල් බිලියන 80කට අධික මුදලක් ඊට වැයවන්නේ ය.

එවන් පසුබිමක රුපියල් 20,000ක වැටුප් වැඩිවීමක් කියන්නේ , ලක්ෂ 15 × රුපියල් 20000ලෙස ගතහොත් තවත් මාසිකව රුපියල් බිලියන 30ක් ඒ සඳහා යෙදවීමට සිදුවෙයි.

පසුගිය සමයේ දරුණු ආර්ථික අර්බුදය හමුවේ දුෂ්කරතා වලට මුහුණ දුන්නේ රාජ්‍ය අංශය පමණක් නොවේය. මෙරට සිටින මිලියන 22 ක ජනතාවම එහි සමාන ඉරණම්කරුවන් විය. ඒ අනුව මේ මොහොත කියන්නේ ද, සියලු දෙනාම අමාරුවෙන් සිටින මොහොතක් ය. රජයට කෙතරම් මුදල් නැතත් අවශ්‍ය නම් මුදල් මුද්‍රණය කර හෝ රාජ්‍ය සේවක වැටුප් ගෙවිය හැකි බව ඇත්ත ය.එවිට ලක්ෂ 65ක් සේවය කරන පෞද්ගලික අංශය කරන්නේ මොකක්ද ? පෞද්ගලික අංශයට පවතින ආර්ථික තත්ත්වය හමුවේ පාඩු සිදු වෙනවා නම්, එම කාර්‍ය මණ්ඩල සඳහා ගෙවීමට මුදල් මුද්‍රණය කිරීමට හැකියාවක් නැත. රජයට මුදල් මුද්‍රණය කිරීමට හැකි නිසා පමණක් මේ ඉල්ලීම සිදුකර ඇත්නම් ඒ නිසා ඇතිවෙන උද්ධමනයට සහ බඩු මිල ඉහළ යාමට මුහුණ දෙන්නේ රාජ්‍ය සේවකයන් පමණක් ද ? අනෙක් අතට රාජ්‍ය සේවකයන්ට වැටුප්ගෙ වන්නේ ද බදු ගෙවන ජනතාවගේ මුදලෙන් ය. භාණ්ඩාගාර බිල්පත් නිකුත් කර මහ බැංකුව රජයට අරමුදල් දෙන්නේ මුදල් මුද්‍රණය කිරීමෙන් වන නිසා ඒවා ද පසුව පොලියත් සමග පියවිය යුතුය . ඒ බර දරන්නේ ද රාජ්‍ය අංශය නොව පොදු ජනයාය. ආර්ථික අර්බුදය කෙතරම් දරණු වුවත් රාජ්‍ය සේවකයන්ගේ රැකියා අහිමි වූයේ නැත. වැටුප් කප්පාදුවක් සිදුවූයේ ද නැත. එහෙත් පසුගිය සමයේ පෞද්ගලික අංශය ඔය අන්තරා දෙකටම සෘජුව ලක්විය. එසේම ආයතන වසා දැමිණ . සුළු හා මධ්‍ය පරිමාණ ව්‍යාපාර ගැන කියන්නත් දෙයක් නැත. තවත් තමන්ගේම ව්‍යාපාර කරන අයට නිෂ්පාදන වියදම් විශාල ලෙස ඉහළ ගොස් තම ව්‍යාපාර කටයුතු කිරීමට අපහසු තත්ත්වයන්ට මුහුණ දී ඇත. එනම් ඔවුන්ට දැන් කලින් ලැබුණු ආදායමවත් නොලැබෙන අතර පාඩු විඳීමට ද සිදුව ඇත. මේ නිසා රාජ්‍ය සේවක වැටුප් වැඩි කිරීමේ තීරණය මේ සියලු දෙනාම තවත් අමාරුවට සහ පීඩාවට පත් කිරීමක් ය. මේ කියන්නේ රාජ්‍ය සේවක වැටුප් වැඩි නොකළ යුතු බවක් නොවේය. නමුත් මේ මිලියන 22 කම අමාරුවෙන් හුස්ම ගන්න පටන් ගත්තා පමණය. ඒ නිසා කළ යුතු වන්නේ රාජ්‍ය සේකයන් ද ඇතුළුව සියලු ජනතාවට පොදුවේ සහනයක් ලබාදෙන වැඩපිළිවෙළක් ය. අවශ්‍ය කරන්නේ ආර්ථිකය ගොඩ ගැනීමේ සාමූහික මෙහෙයුමක් ය.

ඒ පසුබිමේ ලක්ෂ 15 ක් වෙනුවෙන් ලක්ෂ 65ක් නොතකන මේ සටන් පාඨ වල අවිඥානය නම් පෞද්ගලික අංශයේ සේවකයන් ධනපතියන් ලෙස සිතීමය. ඒ ගැන ඇති ඊර්ෂ්‍යාව ය. ඔවුන් ඉතිහාසයේ පටන්ම පන්ති වෛරය පිරුමැහුවේම පීඩිතයන් ගෙන් ය.

එස්. එම්. ලියනගේ

එළැඹෙන ජනාධිපතිවරණය සඳහා ඉදිරිපත් වීමට තමන්ටද අදහසක් ඇති බවට සමගි ජනබලවේගය පක්ෂයේ සභාපති , පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා සම්බන්ධයෙන් විනය ක්‍රියාමාර්ග ගැනීමට එම පක්ෂය ගෙන තිබූ තීරණය සංශෝධනය වී තිබේ.

ඒ බව සඳහන් කරමින් පක්ෂයේ ජාතික සංවිධායක පාර්ලිමේන්තු මන්ත්‍රී තිස්ස අත්තනායක විසින් මාධ්‍ය වෙත අදහස් දක්වා තිබේ .

එහිදී ඔහු පවසා ඇත්තේ සරත් ෆොන්සේකා මන්ත්‍රීවරයා සමගි ජන බලවේගයේ සභාපතිධුරයෙන් ඉවත් කිරීමට හෝ විනය පියවර ගැනීමට හෝ කිසිදු සාකච්ඡාවක් පක්ෂය තුළ සිදුකර නොමැති බවය.

සමගි ජන බලවේගයේ සභාපති සරත් ෆොන්සේකා  පිළිබඳ පළවන මාධ්‍ය වාර්ථා සම්බන්ධයෙන් ප්‍රතාචාර දක්වමින් ඔහු මේ බව සඳහන් කර ඇත .

සරත් ෆොන්සේකා සම්බන්ධයෙන් පලවන මාධ්‍ය වාර්ථා පිලිබඳ පක්ෂයේ ජ්‍යෙෂ්ඨයන් ඔහු මුන ගැසී සාකච්ඡා කළ බවත් යම් යම් සීමා ඔස්සේ කටයුතු කිරිමේ එකඟතාවයකට එහිදී පැමිණි බවත් මන්ත්‍රීවරයා වැඩිදුරටත් සඳහන් කර ඇත.

කෙසේ වුවත් මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ පාර්ලිමේන්තු මන්ත්‍රී සරත් ෆොන්සේකා පක්ෂයේ ස්ථාවරයට පටහැනි ලෙස ක්‍රියාකිරීම හේතුවෙන් විනය පියවර ගැනීමට නියමිත බව ප්‍රචාරය වූයේ පක්ෂ අභ්‍යන්තර ආරංචි මාර්ග හරහා බවයි.

ඕනම පක්ෂයක් විසින් ඒ ආකාරයට නිල නොවන ලෙස මාධ්‍ය වෙත තොරතුරු ලබාදීමේ උපක්‍රමයක් අනුගමනය කරන බවත් , එම පුවත් දේශපාලන ආරංචි මාර්ග ලෙස හෝ අභ්‍යන්තර ආරංචි මාර්ග සඳහන් කළ බවක් දක්වමින් මාධ්‍යවල දේශපාලන පුවත් ප්‍රචාරය වන බවත් ඔවුන් පෙන්වා දෙයි.

ඒ ආකාරයට අදාළ පුවත බොහෝ දේශපාලන ගොසිප් පළකරන මාධ්‍ය තුළ පළවූ බවක් නිරීක්ෂණය කරන දේශපාලන විචාරකයන් වැඩිදුරටත් සඳහන් කරන්නේ පාර්ලිමේන්තු මන්ත්‍රී සරත් ෆොන්සේකා සම්බන්ධයෙන් සජබ විසින් ගැනීමට ගිය තීන්දුවක් ආපසු හැරවූ බවක් මේ හරහා හැඟීයන බවයි.

නොවැම්බර් 13 වනදා පාර්ලිමේන්තුවට ඉදිරිපත් කිරීමට යෝජිත අයවැය යෝජනාවලිය මගින් සියළුම රජයේ සේවකයින්ගේ වැටුප් වැඩි කිරීමට පියවර ගන්නා බව ජනාධිපති රනිල් වික්‍රමසිංහ අද (30) අමාත්‍ය මණ්ඩලය අමතා පැවසූ බව වාර්තා වෙයි .

රජයේ සේවකයින්ගේ වැටුප් වැඩි වීමට සමගාමීව පෞද්ගලික අංශයේ පඩියද වැඩි කරන ලෙස ඉල්ලීමක් කරන බවද එහිදී ජනාධිපතිවරයා සඳහන් කර ඇති බවත් වාර්තා වෙයි .

ආණ්ඩුව රජයේ සේවකයින්ගේ වැටුප් වැඩි කරන බව දැනගෙන ජනතා විමුක්ති පෙරමුණ ඇතුළු ඇතැම් කණ්ඩායම් එය ඔවුන්ගේ බලපෑම අනුව සිදු වූ බවට පැවසීමට උත්සාහ දැරීම කිසිදු පදනමක් නැති කතාවක් බව එහිදී ජනාධිපති රනිල් වික්‍රමසිංහ සඳහන් කර ඇති බවත් වාර්තා වෙයි.

එසේම දිනෙන් දිනම බඩු මිල වැඩි වෙනවා මිස අඩු වීමක් සිදු නොවන තත්ත්වය යටතේ වැඩ කරන ජනතාවගේ වැටුප් ඉහළ දැමීම වත්මන් රජයේ ප්‍රතිපත්තිය බව සඳහන් කර ඇති බවත් වැඩිදුරටත් වාර්තා වෙයි .

කුරුණෑගල ප්‍රදේශයේ පිහිටි රජයේ වී ගබඩා දෙකකින් වී තොග ලක්ෂ 7ක ප්‍රමාණයක් අස්ථානගත වී ඇති බව වී අලෙවි මණ්ඩලයේ සභාපතිවරයා පවසයි.

මේ සම්බන්ධව නිලධාරීන් දෙදෙනෙකුගේ වැඩ තහනම් කර ඇති බව ද වී අලෙවි මණ්ඩලයේ සභාපතිවරයා දැනුම්දී සිටියි.

ඔහු වැඩිදුරටත් සඳහන් කර සිටින්නේ අස්ථානගත වී ඇති වී තොගවල වටිනාකම රුපියල් ලක්ෂ 650 - 700ත් අතර බව ඇස්තමේන්තු ගත කර ඇති බවය.

අස්වැසුම සුබසාධක ප්‍රතිලාභ වැඩසටහනේ ‍පවතින ගැටළු විසඳීමට නොවැම්බර් 06 වැනිදා සිට 11 වැනිදා දක්වා ‘අස්වැසුම සතියක්’ ක්‍රියාත්මක කිරීමට මුදල් අමාත්‍යාංශය සැලසුම් කර තිබේ.

අස්වැසුම ප්‍රතිලාභීන් ලෙස සුදුසුකම් ලබා ඇති නමුත් මෙතෙක් ප්‍රතිලාභ ලැබී නොමැති පවුල් මෙන්ම තාක්ෂණික ගැටළු හේතුවෙන් ප්‍රතිලාභ ප්‍රමාදවී ඇති පවුල් සඳහා කඩිනමින් ප්‍රතිලාභ ලබාදීමට මෙමඟින් හැකිවන බව මුදල් රාජ්‍ය අමාත්‍ය ෂෙහාන් සේමසිංහ පැවසීය.

රාජ්‍ය අමාත්‍ය ෂෙහාන් සේමසිංහ මෙම අදහස් පළ කළේ, "ස්ථාවර රටකට- සැවොම එක මගකට" මැයෙන් අද (30) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි .

ජනාධිපති ලේකම් කාර්යාලය, මුදල් අමාත්‍යංශය, රාජ්‍ය පරිපාලන අමාත්‍යාංශය හා සියළුම ප්‍රාදේශිය ලේකම් කාර්යාල එක්ව මෙම සතිය තුළදී අස්වැසුම ප්‍රතිලාභීන්ගේ ගැටළු විසඳීමට අපේක්ෂා කරන බවද රාජ්‍ය මුදල් අමාත්‍යවරයා කියා සිටියේය.

මේ අතර ජූලි මාසය සඳහා සියලුම ගෙවීම් අස්වැසුම ප්‍රතිලාභීන්ට ගෙවා ඇති අතර අගෝස්තු මාසය සඳහා ගෙවීම් කටයුතු ලබන බදාදා සිට ආරම්භ කරන බවද ෂෙහාන් සේමසිංහ රාජ්‍ය අමාත්‍යවරයා සඳහන් කළේය.

එහිදී වැඩිදුරටත් අදහස් දැක්වූ මුදල් රාජ්‍ය අමාත්‍ය ෂෙහාන් සේමසිංහ මෙසේ ද පැවසීය.

අස්වැසුම සුබසාධක ප්‍රතිලාභ වැඩසටහන මේ වන විට විශාල ප්‍රගතියක් ලබා තිබෙනවා. නමුත් තවදුරටත් අස්වැසුම ප්‍රතිලාභීන්ට තිබෙන ගැටළු විසඳා ගැනීමට ‘අස්වැසුම’ විශේෂ සතියක් ක්‍රියාත්මක කිරීමට බලාපොරොත්තු වෙනවා. මෙම වසර සඳහා ඉදිරිපත් කර ඇති අයදුම්පත් සම්බන්ධයෙන් විසඳී නොමැති ගැටළු මෙහිදී නිරාකරණය කරන්න බලාපොරොත්තු වනවා.

මෙය කිසිසේත්ම ලබන වසර සඳහා අස්වැසුම ප්‍රතිලාභීන් තොරාගනු ලබන අයදුම්පත් කැඳවීමක් නොවෙයි. මේ පිළිබඳව සුබසාධක මණ්ඩලය විසින් සියලුම ප්‍රාදේශය ලේකම් කාර්යාල දැනුවත් කිරිමට කටයුතු කරමින් සිටිනවා. මෙම වසරේ තෝරාගෙන ඇති ප්‍රතිලාභීන්ට තිබෙන ගැටළු නිරාකරණය කර ගැනීමෙන් පසු ලබන වසර සඳහා අයදුම්පත් කැඳවීමට සුබසාධක මණ්ඩලයට හැකියාව ලැබෙනවා.

අද සහ හෙට දිනය වන විට ප්‍රතිලාභීන් දහතුන් ලක්ෂ හැටපන් දහසක් සඳහා (1365,000) රුපියල් බිලියන 8.5ක මුදලක් ලබාදීමට අප කටයුතු කරනවා. ඒ අනුව ලබන බදාදා දිනයේ සිට ප්‍රතිලාභීන්ට නියමිත මුදල් ලබා ගත හැකියි. ඉන් පසුව සැප්තැම්බර් මාසය සඳහා ගෙවීම් ලබන මාසය අවසන් වීමට පෙර ගෙවීමට බලාපොරොත්තු වෙනවා. ජූලි මාසයට අදාළ ගෙවීම සිදු කළේ අදියර 07ක් යටතේයි. සැප්තැම්බර් මාසය වන විට මුදල් ලැබූ ප්‍රතිලාභීන් සංඛ්‍යාව මීට වඩා වැඩි විය හැකියි. අස්වැසුම ගෙවීම් කඩිනම් කරන ලෙස ජනාධිපති රනිල් වික්‍රමසිංහ ද අදාළ අංශවලට උපදෙස් ලබාදී තිබෙනවා.

අස්වැසුමට අදාළ ගෙවීම්වලදි මුදල් සම්බන්ධයෙන් ගැටළු මතු වී නැහැ. නමුත් මුදල් ලබාදීමේදී තාක්ෂණික ගැටළු මතුවී තිබෙනවා. එනිසා එම ගැටලු විසඳා ගෙවීම් කඩිනම් කිරීමට බලාපොරොත්තු වෙනවා. ප්‍රතිලාභීන් බැංකු ගිණුම් නිසිලෙස විවෘත නොකිරීම සම්බන්ධව ගැටළු තිබුණා. එම ගැටලුද විසඳීමට අප මේ සතිය තුළ කටයුතු කරනවා.

රටේ සිදුවූ ආර්ථික අවපාතයේදී දිළිදු කණ්ඩායම්වලට සිදුවූ බලපෑම අතිමහත් බව කිව යුතුයි. ඒ පිළිබඳ රජයට හොඳ අවබෝධයක් තිබෙනවා. ඒ නිසා මුදල් ලබාදීම කඩිනම් කිරීමට අප කටයුතු කරනවා. ජූලි මාසයේ සිට දෙසැම්බර් මාසය දක්වා වන ගෙවීම් දෙසැම්බර් මාසය වන විට අවසන් කිරීමට බලාපොරොත්තු වෙනවා. ලබන වසරේ අස්වැසුම සුබසාධක වැඩසටහන සඳහා අයදුම්පත් කැඳවීමේදී මෙම කටයුතු තවත් විධිමත් කර ගැනීමට අප බලාපොරොත්තු වෙනවා.

ජනාධිපතිතුමා හා රජය ආර්ථිකය සම්බන්ධයෙන් ගත් තීන්දු තීරණ ජනප්‍රිය නොවුණට එය මේ වන විට ඇති වී තිබෙන ආර්ථික ස්ථාවරත්වයට විශාල ලෙස දායක වී තිබෙනවා. රාජ්‍ය සේවකයින්ට මෙන්ම අනෙකුත් ජනතාවට මෙහි ප්‍රතිලාභ ලැබෙනවා. ශක්තිමත් ආර්ථිකයකට රට ගෙනයාමට හැකි පරිසරය රජයක් ලෙස අප ගොඩනගමින් සිටිනවා.

ලෝක බැංකුවේ මෙහෙයුම් කටයුතු පිළිබඳ කළමනාකාර අධ්‍යක්ෂ ඇනා බ්යාර්ඩේ (Anna Bjerde) සහ දකුණු ආසියාව සඳහා ලෝක බැංකුවේ කලාපීය උප සභාපති මාර්ටින් රයිසර් (Martin Raiser) ඇතුළු නියෝජිත පිරිසක් ඊයේ (29) අනුරාධපුර, තිරප්පනේ පිහිටි දේශගුණික සුහුරු ගොවි පුහුණු පාසලේ (FTS) ක්ෂේත්‍ර චාරිකාවකට එක් වූහ.

දේශගුණික සුහුරු වාරි කෘෂිකර්ම ව්‍යාපෘතියේ (Climate Smart Irrigated Agriculture Project -CSIAP) ප්‍රගතිය විමසා බැලීම මෙම සංචාරයේ අරමුණ විය.

ජනාධිපති රනිල් වික්‍රමසිංහ සිය එක්සත් ජනපද නිල සංචාරය අතරතුරදී ලෝක බැංකු සභාපති අජේ බංගා (Ajay Banga) සමඟ පැවැත්වු විශේෂ සාකච්ඡාවේදී ශ්‍රී ලංකාවේ දේශගුණික හිතකාමී තිරසාර කෘෂිකාර්මික වැඩසටහන ඉදිරියට ගෙන යාම සඳහා සහාය වන ලෙස කළ ඉල්ලීමට අනුව ඒ පිළිබඳ සොයා බැලිම සඳහා ලෝක බැංකුවේ මෙහෙයුම් පිළිබඳ කළමනාකාර අධ්‍යක්ෂ ඇනා බ්යාර්ඩේ පළමුවරට ශ්‍රී ලංකාවේ සංචාරයකට එක්ව සිටී.

අනුරාධපුර දිස්ත්‍රික්කයේ තිරප්පනේ, මාන්නම්කුලම ගම්මානයේ "දේශගුණික සුහුරු ගොවි පුහුණු පාසල" නමින් ගොවි පුහුණු පාසලක් පිහිටුවීමට දේශගුණික සුහුරු වාරි කෘෂිකර්ම ව්‍යාපෘතිය යටතේ පියවර ගෙන තිබේ. දේශගුණික සුහුරු කෘෂිකර්මය භාවිතයන් සහ අති නවීන කෘෂිකාර්මික තාක්ෂණයන් පිළිබඳ ප්‍රායෝගික අත්දැකීම් ගොවීන් වෙත ලබාදීම මෙම ගොවි පුහුණු පාසල මඟින් සිදු කරනු ලැබේ.

ඒ අනුව දේශගුණ සුහුරු වාරි කෘෂිකර්මය පිළිබඳ පුහුණුව ලැබූ ගොවීන්ට සහතික පත් පිළිගැන්වීම ද මෙහිදී ලෝක බැංකුවේ මෙහෙයුම් කටයුතු පිළිබඳ කළමනාකාර අධ්‍යක්ෂිකා ඇනා බ්යාර්ඩේ (Anna Bjerde) සහ දකුණු ආසියාව සඳහා ලෝක බැංකුවේ කලාපීය උප සභාපති මාර්ටින් රයිසර් (Martin Raiser) ගේ සහභාගිත්වයෙන් සිදු විය.

ලෝක බැංකු ආධාර මත කෘෂිකර්ම අමාත්‍යංශය මගින් ක්‍රියාත්මක කෘෂි නවීකරණ ව්‍යාපෘතිය යටතේ අපනයනය ඉලක්ක කර ගත් රාජාංගනය ඇඹුල් කෙසෙල් වගා ව්‍යාපෘතිය නිරීක්ෂණය කිරීමට ද අනතුරුව නියෝජිත පිරිස එක් වුහ.

අදාළ ප්‍රදේශවල කුඩා වතු හිමියන්ගේ සහ ගොවි පවුලවල ආදායම සැලකිය යුතු මට්ටමින් වැඩිදියුණු කිරීමට මෙම ව්‍යාපෘතිය ඉවහල් වී තිබෙන අතර රටේ අපනයන ආදායම ඉහළ නැංවීමට ද සැලකිය යුතු දායකත්වයක් ලබා දෙයි.

මෙහිදී අදහස් දැක්වු ලෝක බැංකුවේ මෙහෙයුම් කටයුතු පිළිබඳ කළමනාකාර අධ්‍යක්ෂ ඇනා බ්යාර්ඩේ කලාපයේ ගොවීන් සඳහා දේශගුණික විපර්යාස හා නවීන කෘෂිකර්මාන්තය කෙරෙහි අවධානය යොමු කෙරෙන පුහුණු පාසලක වැදගත්කම පෙන්වා දුන් අතර එම දැනුමෙන් ගොවීන් සන්නද්ධ කිරීමෙන් ලබාගත හැකි ප්‍රතිලාභ පිළිබඳව ද පෙන්වා දුන්නාය.

සූර්ය බලය ඇතුළු පුනර්ජනනීය බලශක්ති ප්‍රභවය වෙත ප්‍රවේශ වීම, අධික ලෙස ඩීසල් මත යැපීම අවම වීම සහ ස්ථාවර ජීවනෝපාය මාර්ග ඇති කිරීම මෙන්ම උසස් අධ්‍යාපනය ඇතුළු අධ්‍යාපනය සඳහා ප්‍රවේශවීමට දරුවන්ට අවස්ථාව ලැබීම, විවිධාංගීකරණය වූ තිරසාර බෝග අස්වැන්න, වඩා හොඳ පෝෂණයක් සහතික කිරීම මෙහි ප්‍රධාන ප්‍රතිලාභ ලෙස ඇය පෙන්වා දුන්නාය.

මෙම ව්‍යාපෘතියට සහාය දැක්වීමට ලෝක බැංකුවට හැකිවීම පිළිබඳ සතුට පළ කළ ඇනා බ්යාර්ඩේ දේශගුණික විපර්යාස මගින් එල්ල වන අභියෝග අවම කර ගැනීමට මෙවැනි ව්‍යාපෘතිවල ඇති වැදගත්කම ද පෙන්වා දුන්නාය.

ගොවි ජනතාවගේ ජීවිත සහ ජීවනෝපාය මාර්ගයන් යහපත් කිරීම සඳහා ධනාත්මක බලපෑම් එල්ල කළ හැකි අන්දම පිළිබඳ ලබා ගන්නා ආදර්ශයන් සහ අත්දැකීම් මත මෙම ව්‍යාපෘතිය අඛණ්ඩව ඉදිරියට ගෙන යා හැකි බවද ඇය සඳහන් කළාය.

කෘෂිකර්ම හා වැවිලි කර්මාන්ත අමාත්‍ය මහින්ද අමරවීර, මුදල් රාජ්‍ය අමාත්‍ය ෂෙහාන් සේමසිංහ, පාර්ලිමේන්තු මන්ත්‍රී දුමින්ද දිසානායක යන සහ ආසියානු සංවර්ධන බැංකුවේ මෙරට අධ්‍යක්ෂ ටකෆුමි කඩොනෝ (Takafumi Kadono), ලෝක බැංකුවෙ ශ්‍රී ලංකාව සහ මාලදිවයින සඳහා වන කළමනාකරු චියෝ කන්දා (Chiyo Kanda), ජාත්‍යන්තර සංවර්ධනය පිළිබඳ එක්සත් ජනපද නියෝජිතායතනයෙහි (USAID) නියෝජ්‍ය සහකාර පාලක අංජලී කෞර් (Anjali Kaur), ලෝක බැංකුවේ මාලදිවයින, නේපාලය සහ ශ්‍රී ලංකාව සඳහා වන අධ්‍යක්ෂ ෆාරිස් හදාද් සර්වොස් ((Faris Hadad-Zervos) ජපාන ජාත්‍යන්තර සහයෝගීතා නියෝජිතායතනයෙහි (JICA) දකුණු ආසියා ජ්‍යේෂ්ඨ උප සභාපති සචිකෝ ඉමෝටෝ (Sachiko Imoto) සහ ජපාන ජාත්‍යන්තර සහයෝගීතා නියෝජිතායතනය (JICA) සහ ජාත්‍යන්තර සංවර්ධනය පිළිබඳ එක්සත් ජනපද නියෝජිතායතනය (USAID) යන ආයතනවල නියෝජිතයන්, කෘෂිකර්ම අමාත්‍යාංශයේ නිලධාරීහු ඇතුළු පිරිසක් මීට එක්ව සිටියහ.

2025 වර්ෂයේ සිට නව දේපොළ බද්දක් හඳුන්වාදීමට සැලසුම් කර ඇති බව මුදල් රාජ්‍ය අමාත්‍ය රංජිත් සියඹලාපිටිය  පවසයි.

 ජාත්‍යන්තර මූල්‍ය අරමුදලේ නිර්දේශවලට අනුව අදාළ බද්ද හඳුන්වාදීම සඳහා සැලසුම් සකස් කර ඇති බව රාජ්‍ය අමාත්‍යවරයා සදහන් කරයි.

විශාල වශයෙන් දේපොළ පවතින පුද්ගලයින්ගෙන් එම බද්ද අය කිරීමට බලාපොරොත්තු වන බව රංජිත් සියඹලාපිටිය රාජ්‍ය අමාත්‍යවරයා සඳහන් කළේය.

පලස්තීන සිරකරුවන් නිදහස් කිරීමට ඊශ්‍රායලය එකඟ වන්නේ නම් සිය භාරයේ සිටින ප්‍රාණ ඇපකරුවන් නිදහස් කිරීමට සූදානම් බව හමාස් සංවිධානය පවසයි.

ඊශ්‍රායලයේ සිරමැදිරි තුළ සිටින සියලු පලස්තීන වැසියන් කොන්දේසි විරහිතව නිදහස් කළ යුතු බව ඔවුන් වැඩිදුරටත් පවසා ඇත.

එසේ නොකළහොත් ප්‍රාණ ඇපකරුවන් නිදහස් කිරීම පිළිබඳ ඊශ්‍රායලයේ අරමුණු සපුරා ගැනීමට අපහසු වනු ඇතැයි, හමාස් සංවිධානය පෙන්වා දෙයි.

කෙසේවෙතත් ඊට ප්‍රතිචාර දක්වමින් ඊශ්‍රායල අග්‍රාමාත්‍ය බෙන්ජමින් නෙතන්යාහු පවසන්නේ, පලස්තීන සිරකරුවන් නිදහස් කිරීම සඳහා තමන් සූදානම් නොමැති බවයි.

ප්‍රාණ ඇපකරුවන් ආරක්ෂිතව නිදහස් කරගැනීමට තමන් සෑම විකල්පයක්ම යොදන බව නෙතන්යාහු වැඩිදුරටත් පවසයි.

මේ අතර ඊශ්‍රායල අග්‍රාමාත්‍යවරයා සඳහන් කළේ, හමාස් සංවිධානය සමග පවතින ගැටුම්වල දෙවන අදියර ආරම්භ වී ඇති බවයි.

ඊයේ (28) රාත්‍රියේ ගාසා තීරයේ පිපිරීම්වල වැඩිවීමක් දක්නට ලැබුණු බව, විදෙස් මාධ්‍ය පවසයි.

ඉදිරි මැතිවරණවලට විපක්ෂයේ පොදු දේශපාලන සන්ධානයක් පිහිටුවා තරග කිරීම සම්බන්ධයෙන් සමගි ජන බලවේගය ඇතුළු පක්ෂ සමග සාකච්ඡා කිරීම ඩලස් අලහප්පෙරුම

මන්ත්‍රීවරයාගේ ප්‍රධානත්වයෙන් සිදුකිරීමට නිදහස ජනතා සභාව තීරණය කර ඇතැයි වාර්තා වේ.

නිදහස ජනතා සභාවේ මන්ත්‍රීවරුන් කිහිපදෙනකු දේශපාලන සන්ධානය සම්බන්ධයෙන් සමගි ජන බලවේගය සමග වෙන වෙනම සාකච්ඡා කිරීම කණ්ඩායමේ සමගියට බාධාවක් බැවින්, එම කටයුතු ඩලස් අලහප්පෙරුම ගේ ප්‍රධානත්වයෙන් සිදුකිරීමට තීරණය කර ඇතැයි එම ආරංචි මාර්ග සඳහන් කරයි.

ඉදිරියේ දී පැවැත්වෙන ජනාධිපතිවරණයට හෝ මහ මැතිවරණයට විපක්ෂයේ පොදු සංධානයකින් තරග කිරීම කෙරෙහි එම කණ්ඩායමේ අවධානය යොමුවී ඇති අතර, ඒ සඳහා වන මූලික පියවරක් ලෙස මෙම සාකච්ඡා ආරම්භ කරනු ඇතැයි දැනගන්නට තිබේ.

ඩලස් අලහප්පෙරුම මන්ත්‍රීවරයා එම සාකච්ඡාවලට සම්බන්ධ වි එහි ප්‍රගතිය පිළිබඳව මන්ත්‍රී කණ්ඩායම දැනුවත් කරනු ඇතැයි එම කණ්ඩායමේ ප්‍රකාශකයෙක් සඳහන් කළේය.

(lankadeepa.lk)

එක්සත් ජාතීන්ගේ සංවිධානයේ මහා මණ්ඩලයේ විශේෂ සැසියක් අතරතුරදී මැදපෙරදිග කලාපයට ඉක්මන් සහ තිරසාර මානූෂීය සටන් විරාමයක් ඉල්ලා කළ යෝජනාව සම්මත වී තිබේ.

සාමාජිකයින් 193 දෙනෙකුගෙන් යුත් මෙම සැසියේ දී යෝජනාව සඳහා පක්ෂව ඡන්ද 120ක් ලැබි ඇති අතර විපක්ෂව ඡන්ද 14ක් ලැබී ඇත.

ශ්‍රී ලංකාව මේ සඳහා පක්ෂව සහාය ලබා දී අති අතර රටවල් 45ක් ඡන්දය භාවිත කිරීමෙන් වැළකී සිට තිබේ.

ඊශ්‍රායලය සහ අමෙරිකා එක්සත් ජනපදය ඊට විරුද්ධව ඡන්දය ප්‍රකාශ කර ඇත.

මෙහිදී ඊශ්‍රායලයේ එක්සත් ජාතීන්ගේ තානාපති ගිලාඩ් එර්ඩන් ඔක්තෝබර් 07වැනිදා හැඳින්වූයේ “අපකීර්තියට පත්වන දිනයක්” යනුවෙනි. හමාස් විනාශ කිරීමට ඇති එකම මාර්ගය වන්නේ ඔවුන්ගේ උමං මාර්ගවලින් සහ භීෂණයේ භූගත නගරයෙන් ඔවුන් මුලිනුපුටා දැමීම බව ඔහු පැවසීය.

හමාස් ප්‍රහාරවලින් ඊශ්‍රායල ජාතිකයන් 1400ක් පමණ මිය ගොස් ඇති අතර ඊශ්‍රායලයේ ප්‍රතිප්‍රහාර ගුවන් ප්‍රහාරවලින් පලස්තීනුවන් 7000කට වැඩි පිරිසක් මිය ගොස් ඇතැයි ගාසා සෞඛ්‍ය අමාත්‍යාංශය පවසයි. ගාසා තීරයේ තීව්‍ර වන මරණ සංඛ්‍යාව සහ විනාශය, ගාසා තීරයේ මිලියන 2.3 ක ජනතාවට අත්‍යවශ්‍ය ආහාර, ජලය, ඖෂධ සහ ඉන්ධන ලබා ගැනීම සඳහා “මානුෂීය සටන් විරාම” සඳහා ජාත්‍යන්තර සහයෝගය ඉහළ නංවා ඇත.

රාජ්‍ය අමාත්‍ය සනත් නිශාන්ත ට එරෙහිව ගොනු කර ඇති පෙත්සම විභාගයකින් අභියාචනාධිකරණ විනිසුරු චමත් මොරායස් ඉවත් වී ඇති බව වාර්තා වෙයි .

ගාලු මුවදොර අරගලකරුවන්ට ඇප ලබා දීමේදී අධිකරණයේ විනිසුරුවන් කටයුතු කළ ආකාරය විවේචනය කිරීමෙන් සනත් නිශාන්ත මන්ත්‍රීවරයා අධිකරණයට අපහාස කර ඇති බවට චෝදනා කරමින් ඔහුට එරෙහිව මෙම පැමිණිල්ල ගොනු තිබේ.

මෙම පෙත්සම් විභාගය ලබන 31 වැනිදා නැවත කැඳවීමට දින නියම කර ඇති බවත් වාර්තා වෙයි .

නීති විද්‍යාල ප්‍රවේශ තරග විභාගයේදී පිළිතුරු සටහන් තොගයක් ළඟ තබාගෙන පිළිතුරු ලියූ බව පැවසෙන දකුණු පළාතේ පාර්ලිමේන්තු මන්ත්‍රීවරයකු සම්බන්ධයෙන් පරීක්ෂණයක් ආරම්භ කර ඇති බව විශ්වාස කටයුතු ආරංචි මාර්ගවලින් පැවසේ.

නීති විද්‍යාල විද්‍යාල ප්‍රවේශ විභාගය විභාග දෙපාර්තමේන්තුව විසින් පවත්වනු ලබන්නේ දැඩි විභාග කොන්දේසි යටතේය.

මෙම මන්ත්‍රීවරයා සටහන් තොගයක් ළඟ තබාගෙන විභාගයට පිළිතුරු ලියා ඇති බවට තොරතුරු හෙළිවීමත් සමග මෙම පරීක්ෂණය ආරම්භ කර ඇත.

ඒ අනුව අදාල මන්ත්‍රීවරයා මෙම පරීක්ෂණය වළක්වා ගැනීම සඳහා දේශපාලඥයන් පසුපස යමින් දැඩි ප්‍රයත්නයක් දරමින් සිටින බව වාර්තා වේ.

මේ සම්බන්ධයෙන් අප අධිකරණ, බන්ධනාගාර කටයුතු සහ ආණ්ඩුක්‍රම ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ ගෙන් කළ විමසුමකදී ඔහු පැවසුවේ මේ පිළිබඳව තමාටත් යම් යම් ආරංචි ලැබෙමින් පවතින බවයි.

• Lankadeepa

නැ‍ගෙනහිර පළාතේ ඉඩම් බෙදාදීමේ ක්‍රියාවලිය නීත්‍යානුකූලව මහවැලි අමාත්‍යාංශය මගින් සිදුකරන බවත්, එම කටයුතු කිසිවිටෙකත් වාර්ගික හා ආගමික පදනමින් සිදු නොකරන බවත් නැගෙනහිර පළාත් ආණ්ඩුකාර සෙන්දිල් තොණ්ඩමන් පැවසීය.

එසේම නැගෙනහිර පළාතේ ඉඩම් බෙදාදීමේ කටයුතු කඩාකප්පල් කිරීමට උත්සාහ දරන පාර්ශ්වවලට එරෙහිව පොලිසිය විසින් නීතිමය පියවර ගනු ඇති බවත් ආණ්ඩුකාරවරයා සඳහන් කළේය.

නැගෙනහිර පළාත් ආණ්ඩුකාර සෙන්දිල්තොණ්ඩමන් මේ බව සඳහන් කළේ ඊයේ (27) ජනාධිපති මාධ්‍ය කේන්ද්‍රයේ පැවති විශේෂ ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ නැගෙනහිර පළාත් ආණ්ඩුකාර සෙන්තිල් තොණ්ඩමන් මෙසේද පැවසීය.

යුද්ධය අවසන් වී වසර කිහිපයකට පසුව නැගෙනහිර පළාතේ මයිලත්තමඩු - දිවුලපතාන ප්‍රදේශයේ ජීවත් වූ ජනතාව ක්‍රමක්‍රමයෙන් යළි එම ප්‍රදේශවල පදිංචි වීමට පටන් ගෙන තිබෙනවා. ඒ අනුව කෘෂිකාර්මික සහ කිරි ගොවීන් වෙනුවෙන් අදාළ ඉඩම් ලබාදීමට කටයුතු කළා.

මයිලත්තමඩු ප්‍රදේශයේ නැවත පදිංචි කිරීමේදී පොළොන්නරුව සහ අම්පාර ප්‍රදේශවලින් විශාල පිරිසක් ගෙන්වාගෙන තිබෙනවා. ඔවුන්ගේ කෘෂිකාර්මික කටයුතු ආරක්ෂා කර ගැනීම සඳහා පිට දිස්ත්‍රික්කවල සිට පැමිණි ගොවීන්ට තාවකාලිකව දිරි දීමනා මුදලක් ලබාදීමට ද ජනාධිපති රනිල් වික්‍රමසිංහ උපදෙස් දී තිබෙනවා.

අම්පාර සහ පොළොන්නරුව ප්‍රදේශවල ජනතාව ද මේ ප්‍රදේශවල ඉක්මනින් පදිංචි කිරීම පිළිබඳව ද සොයා බලමින්තිබෙනවා. එ‍සේම යුද්ධයට පෙර මයිලත්තමඩු - දිවුලපතාන ප්‍රදේශයේ ජීවත් වූ ජනතාව ඔවුන්ගේ ඉඩම්වල නැවත පදිංචි කිරීමේ කටයුතු ජනාධිපතිතුමාගේ උපදෙස් මත මහවැලි අමාත්‍යාංශය මගින් නීත්‍යානුකූලව කරගෙන යනු ලබනවා.

මීට අමතරව රජයේ ඉඩම්වල අනවසරයෙන් පදිංචිව සිටින අයගේ ඉඩම් පවරා ගනිමින් ඔවුන් රජයේ ඉඩම්වල නීත්‍යානුකූලව පදිංචි කිරීමට ද මේ වන විට කටයුතු කරමින් සිටිනවා.

ඒ සමඟම මහවැලි ව්‍යාපාරය සඳහා නැඟෙනහිර කෝරළයිපත්තු ප්‍රදේශයෙන් දෙමළ ජනතාව ද, නාවලඩි ප්‍රදේශයෙන් මුස්ලිම් ජනතාව ද ඉවත් කිරීමේ කටයුතු සිදු කෙරෙන්නේ ජාති ආගම් මත පදනම්ව නොවන බවත් අවධාරණය කළ යුතුයි. එම කටයුතු මුළුමණින්ම සිදු කරන්නේ නීත්‍යානුකූල ආකාරයටයි. එමෙන්ම ඉඩම් බෙදාදීමේ කටයුතු සිදුකෙරෙන්නේ ද ග්‍රාම සේවක නිලධාරීන් ලබාදෙන දත්ත පදනම් කරගෙනයි.

එම සියලු කරුණු සැලකිල්ලට ගෙන සියලුම ජනවර්ග සඳහා ශ්‍රී ලාංකිකයෙකු ලෙස නීතිය ක්‍රියාත්මක කිරීමට කටයුතු කරනවා. එම නිසා නැගෙනහිර පළාතේ ඉඩම් නිදහස් කිරීම සම්බන්ධව තෙවැනි පාර්ශ්වයන් අනවශ්‍ය ලෙස අදහස් ප්‍රකාශ කිරීමට උත්සාහ නොකරන ලෙස සියලුම දෙනාගෙන් ඉල්ලා සිටිනවා.

ශ්‍රී ලංකාවේ කර්මාන්ත සඳහා වෙන් කර ඇති ඉඩම් ප්‍රමාණය ඉතා සීමිත බැවින් රටේ මුළු භූමි ප්‍රමාණයෙන් 1%ක් කර්මාන්ත සඳහා වෙන් කිරීම රජයේ ඉලක්කය බව කර්මාන්ත හා සෞඛ්‍ය අමාත්‍ය රමේෂ් පතිරණ පැවසීය.

ආනයන සීමා කිරීම් ක්‍රියාත්මක වූ වකවානුව තුළ ජාතික නිෂ්පාදනය ඉහළ නැංවීමට මෙන්ම අපනයනය ඉහළ නැංවීමට ද මෙරට ව්‍යවසායකයින් ඉහළ මට්ටමේ දායකත්වයක් ලබාදුන් බවත් ඒ අනුව 2022 වර්ෂය අවසන් වන විට මෙරට ඉතිහාසයේ වැඩිම අපනයන ආදායම ලෙස ඩොලර් බිලියන 13.1ක් උපයා ගැනීමට හැකි වූ බවත් අමාත්‍යවරයා පෙන්වා දුන්නේය.

කර්මාන්ත හා සෞඛ්‍ය අමාත්‍ය රමේෂ් පතිරණ මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් ඊයේ (27) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය.

පසුගිය කොවිඩ් සහ ආර්ථික අර්බුදකාරී තත්ත්වයන් තුළ කුඩා, මධ්‍යම හා මහා පරිමාණ ව්‍යවසායකයින් ඇතුළු සියලු දෙනාම අප රටේ නිෂ්පාදනය ඉහළ නැංවීමට කැපවීමෙන් කටයුතු කළා. ඒ පිළිබඳව අප ඔවුන්ට අපේ කෘතඥතාව පළ කළ යුතුයි.

විශේෂයෙන්ම අපේ රටේ ආනයන සීමා කිරීම් ක්‍රියාත්මක වූ වකවානුව තුළ ජාතික නිෂ්පාදනය ඉහළ නැංවීමට මෙන්ම අපනයනය ඉහළ නැංවීමට ද මෙරට ව්‍යවසායකයින් ඉහළ දායකත්වයක් ලබා දී තිබෙනවා. ඒ හේතුවෙන් 2022 වසර අවසාන වන විට ඉතිහාසයේ වැඩිම අපනයන ආදායම ලෙස ඩොලර් බිලියන 13.1ක් උපයා ගැනීමට හැකිවුණා.

ඒවගේම ශ්‍රී ලංකාවේ කර්මාන්ත සඳහා වෙන් කර ඇති ඉඩම් ප්‍රමාණය ඉතා සීමිතයි. මේ නිසා අපේ රටේ කර්මාන්ත ප්‍රමාණවත් ලෙස දියුණු වී නැහැ. ඒ නිසා මෙම ඉඩම් ප්‍රමාණය වැඩි කිරීමට අප මේ වනවිට පියවර ගනිමින් සිටිනවා. අපේ ඉලක්කය වී තිබෙන්නේ රටේ මුළු භූමි ප්‍රමාණයෙන් 1%ක් කර්මාන්ත සඳහා වෙන් කිරීමටයි.

මේ වන විටත් ශ්‍රී ලංකාවේ කර්මාන්ත සංවර්ධනය සඳහා වන ජාතික ප්‍රතිපත්තිය (NAPID) සකස් කර අමාත්‍ය මණ්ඩල සඳහා ඉදිරිපත් කර තිබෙනවා. එය ශ්‍රී ලංකාවේ ජාතික ප්‍රතිපත්ති රාමුවට (2023-2048) ඇතුලත් කිරීමට ආර්ථික ස්ථායීකරණය පුනර්ජීවන සහ වර්ධනය ඉහළ නැංවීම පිළිබඳ කමිටුව තීරණය කර තිබෙනවා.

කර්මාන්ත ප්‍රතිපත්තියට අදාළ පස් අවුරුදු උපාය මාර්ගික සැලැස්ම ද සකස් කර අවසන්. එය ක්‍රියාත්මක කිරීමේ කටයුතු අමාත්‍යාංශය විසින් දැනටමත් ආරම්භ කර තිබෙනවා.

1990 අංක 46 දරණ කර්මාන්ත ප්‍රවර්ධන පනත වත්මන් හා අනාගත අවශ්‍යතාවයන්ට ගැලපෙන අයුරින් සංශෝධනය කිරීමේ කටයුතු ද මේ වන විට අවසන් කර තිබෙනවා. එහි මුලික කෙටුම්පත සඳහා නීති කෙටුම්පත් දෙපාර්තමේන්තුවේ නිර්දේශ ලබා දී තිබෙනවා.

මෝටර් රථ නිෂ්පාදනය - එකලස් කිරීම සහ මෝටර් රථ උපාංග නිෂ්පාදනයට අදාළ ජාතික ප්‍රතිපත්තිය සැකසීමට අදාළ 2 වන කෙටුම්පත ද මේ වන විට සකසා අවසන් කර තිබෙනවා. ඒ වගේම එම කෙටුම්පත අදාළ පාර්ශවකරුවන්ට ඉදිරිපත් කර ඔවුන් සමඟ ද සාකච්ඡා කර අවසන්. ඒ අනුව වාහන එකලස් කිරීමට අදාළ ජාතික ප්‍රතිපත්තිය කඩිනමින් අවසන් කිරීමට නියමිතයි.

විද්‍යුත් වාහන සඳහා මාර්ගෝපදේශ (E-Vehicle Guideline) පිළිබඳව පළමුවන කෙටුම්පතෙහි කරුණු පිළිබඳව අධ්‍යනය කිරීම සඳහා පත්කරන ලද කමිටුව මඟින් ඔවුන්ගේ යෝජනා ඇතුළත් වාර්තා ලබා දී තිබෙනවා. එම වාර්තා සැලකිල්ලට ගනිමින් සංශෝධිත මාර්ගෝපදේශ සැකසීම ආරම්භ කර ඇති අතර එය කඩිනමින් අවසන් කිරීමට අපේක්ෂා කරනවා. තවද මෝටර් රථ එකලස් කිරීම සහ මෝටර් රථ උපාංග නිෂ්පාදනයට අදාළ නව ආයතන 15ක් සඳහා 2023 වසරේදී අනුමැතිය ලබා දී තිබෙනවා.

ප්‍රාදේශීය හා දිස්ත්‍රික් මට්ටමින් කර්මාන්ත කලාප/කර්මාන්තපුර ස්ථාපනය කිරීමේ විශේෂ ජාතික වැඩසටහන යටතේ ප්‍රාදේශීය මට්ටමින් ඉඩම් හඳුනාගත්, කඩිනමින් නිම කළ හැකි කර්මාන්තපුරවල මූලික සංවර්ධන කටයුතු සිදු කරමින් පවතිනවා. මේ යටතේ දැනටමත් තිබෙන කර්මාන්තපුර 32 ක සහ නව කර්මාන්තපුර 6ක (අලුතපොල, දඹුල්ල, සඳමල්ගම, සූරියවැව, මහව සහ වැල්ලවාය) සංවර්ධන කටයුතු ක්‍රියාත්මකයි. විද්‍යුත් වාහන එකලස් කිරීම හා උපාංග නිෂ්පාදනයට අවශ්‍ය පහසුකම් සහිත කර්මාන්තපුරයක් කටුනායක කටාන ප්‍රදේශයේ අක්කර 100 ක භූමි ප්‍රමාණයක ස්ථාපිත කිරීමට ද කටයුතු ආරම්භ කර තිබෙනවා.

ඒ වගේම අප දැනටමත් නව කර්මාන්ත පුර 03 ක් ආරම්භ කිරීමට පියවර ගෙන තිබෙනවා. ඒ කළුතර දිස්ත්‍රික්කයේ මිල්ලනිය, ගාල්ල දිස්ත්‍රික්කයේ ඇල්පිටිය, මහනුවර දිස්ත්‍රික්කයේ පොත්තපිටිය වශයෙන්.

ලංකා ඛණිජ වැලි සමාගමේ ඛණිජ වැලි විකිණීම සඳහා නව විකුණුම් ක්‍රමවේදයක් හඳුන්වා දීමත් සමඟ ලංසුකරුවන්ට මාර්ගගත ක්‍රමවේදය ඔස්සේ තම මිල ගණන් ඉදිරිපත් කිරීමට හැකියාව පවතිනවා. මිල ගණන් විවෘත කරන අවස්ථාවේදීම සුදුසුම ලංසුකරු පිළිබඳ තොරතුරු ප්‍රකාශයට පත් කිරීමට හැකියාව තිබෙනවා. එම ක්‍රමවේදය භාවිතා කර ප්‍රථම අලෙවිය සිදු කරන ලද අතර එමඟින් ඛනිජ වැලි මෙට්‍රික් ටොන් 62,150 ක් සඳහා ඇමරිකන් ඩොලර් මිලියන 20.33 ක් ලබා ගැනීමට හැකි වුණා.

දෙවන අලෙවිය මඟින් සර්කෝන් මෙට්‍රික් ටොන් 30,000 ක් වෙනුවෙන් ඇමරිකන් ඩොලර් මිලියන 14.1ක ආදායමක් ලබා ගැනීමට හැකිවුණා. එමඟින් ලැබූ ආදායමෙන් රුපියල් මිලියන 1726 ක මුදලක් ලාභාංශ ලෙස භාණ්ඩාගාරයට ලබා දීමට ද අප කටයුතු කලා.

හරින් ප්‍රනාන්දු සහ මනුෂ නානායක්කාර යන අමාත්‍යවරුන් පක්ෂ සාමාජිකත්වයෙන් නෙරපීමේ තීරණය සමගි ජන බලවේගයේ කෘත්‍යාධිකාරි මණ්ඩලය හරහා නිසියාකාර ව අනුමත වී නොමැති බවත් එම පක්ෂයේ ව්‍යවස්ථාවට පටහැනි අයුරින් එම නෙරපීම සිදු කර තිබෙන බවත් ඔවුන් ගේ නීතිඥවරුන් අද (27) ශ්‍රේෂ්ඨාධිකරණය හමුවේ චෝදනා කර ඇත.

සිය පක්ෂ සාමාජිකත්වය අහිමි කිරීමට සමගි ජන බලවේගය ගත් තීරණය නීතියට පටහැනි යැයි තීන්දු කරන ලෙස ඉල්ලා හරීන් ප්‍රනාන්දු සහ මනුෂ නානායක්කාර යන අමාත්‍යවරු ඉදිරිපත් කර තිබෙන පෙත්සම් විභාගයට ගත් අවස්ථාවේ දී ඔවුන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා සහ ජනාධිපති නීතිඥ ෆයිසර් මුස්තාෆා යන මහත්වරු එම කරුණු දක්වා තිබේ.

විජිත් මලල්ගොඩ, අචල වෙංගප්පුලි සහ අර්ජුන ඔබේසේකර යන මහත්වරුන් ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල ඉදිරියේ පෙත්සම් විභාගය පැවැත්වී තිබේ.

මනූෂ නානායක්කාර අමාත්‍යවරයා වෙනුවෙන් පෙනී සිටි ජනාධිපති නීතිඥ ෆයිසර් මුස්තාපා මහතා අධිකරණය හමුවේ කරුණු දක්වමින් යම් සාමාජිකයෙකු ගේ පක්ෂ සාමාජිකත්වය අත්හිටුවීම, නෙරපීම සඳහා සමගි ජන බලවේගයේ කෘත්‍යාධිකාරී මණ්ඩලයට බලය පැවරී තිබුණ ද ඒ සඳහා විධිමත් විනය ක්‍රියා පටිපාටියක් අනුගමනය කළ යුතු බව සඳහන් කර ඇත.

නමුත් සිය සේවාදායකයා ගේ පක්ෂ සාමාජිකත්වය නෙරපීමට, අදාළ ලිපියේ එවැනි විනය ක්‍රියා පටිපාටියක් අනුගමනය කර තිබෙන බවක් පෙනී නොයන බවත් ජනාධිපති නීතිඥවරයා සඳහන් කර තිබේ.

යම් සාමාජිකයෙකු ගෙන් නිදහසට කරුණු විමසීමේ බලය හා විනය පියවර ගැනීමේ බලය මුළුමනින්ම පක්ෂයේ කෘත්‍යාධිකාරී මණ්ඩලය වෙත පැවරී තිබෙන බවත් පක්ෂ නායකත්වයට ඒ සම්බන්ධයෙන් බලයක් නොමැති බවත් ඔහු පෙන්වා දෙයි.

තම සේවාදායකයාට එරෙහි ව විනය පියවර ගැනීම සඳහා ජනාධිපති නීතිඥ නලින් දිසානායක මහතා ගේ ප්‍රධානත්වයෙන් යුත් විනය කමිටුවක් කෘත්‍යාධිකාරී මණ්ඩලය විසින් පත් කළ බව සඳහන් කළ ද ඒ බව තහවුරු කෙරෙන කිසිදු සාක්ෂියක් වගඋත්තරකරුවන් විසින් අධිකරණයට ඉදිරිපත් කර නොමැති බවත් ජනාධිපති නීතිඥවරයා අවධාරණය කර ඇත.

සිය සේවාදායකයාට එරෙහි චෝදනා පත්‍රයට අත්සන් තැබීම විනය කමිටුවේ සභාපතිවරයා විසින් සිදු කර ඇති බවත් එය සම්පූර්ණයෙන්ම නීතියට පටහැනි බවත් සඳහන් කළ ජනාධිපති නීතිඥවරයා, පෙත්සම්කරු පක්ෂයෙන් නෙරපීමට අදාළ තීන්දුව ගනු ලැබූ රැස්වීමට පක්ෂයේ මහලේකම්වරයා සහභාගි වී නොතිබු බවත් කියා සිටියේය.

එමෙන්ම නෙරපීමට අදාළ ලිපිය නිකුත් කර තිබෙන්නේ, පක්ෂයේ නියෝජ්‍ය මහලේකම්වරයා බවත් ඔහුට එවැනි ලිපියක් නිකුත් කිරීමට බලයක් නොමැති බවත් ජනාධිපති නීතිඥවරයා පෙන්වා දී ඇත.

අමාත්‍ය හරින් ප්‍රනාන්දු මහතා වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා කරුණු දක්වමින් සමගි ජන බලවේගයේ ව්‍යවස්ථාවට අනුව යම් සාමාජිකයෙකු පක්ෂ සාමාජිකත්වයෙන් නෙරපීමේ බලය පක්ෂයේ කෘත්‍යාධිකාරී මණ්ඩලයට හිමි වී තිබෙන බව සඳහන් කළේය.

සිය සේවාදායකයා පක්ෂ සාමාජිකත්වයෙන් නෙරපීමේ දී සාක්ෂි වශයෙන් යොදාගෙන තිබෙන්නේ, පුවත්පත් වාර්තා සහ වීඩියෝ දර්ශන පමණක් යැයි සඳහන් කළ ජනාධිපති නීතිඥවරයා, ඔහුට සාධාරණ හා ස්වාධීන විනය පරීක්ෂණයක් නොලැබුණු බවත් අවධාරණය කර ඇර්ග.

තම සේවාදායකයා  සමගි ජන බලවේගයේ ව්‍යවස්ථාව උල්ලංඝනය කළ බව සඳහන් කරමින් ඔහු නෙරපා හැරීමට කටයුතු කෙරුණ ද ඔහු විසින් උල්ලංඝනය කර තිබෙන්නේ, ව්‍යවස්ථාවේ කුමන ප්‍රතිපාදනය ද යන්න පැහැදිලි කිරීමට වගඋත්තරකරුවන් අපොහොසත් වී ඇති බවත් ඒ අනුව පෙත්සම්කරු ගේ පක්ෂ සාමාජිකත්වයෙන් නෙරපීමට වගඋත්තරකරුවන් ගත් තීරණය සම්පූර්ණයෙන්ම නීතියට පටහැනි බවත් ඔහු සඳහන් කර සිටියේය.

ඉන් අනතුරු ව වැඩිදුර පෙත්සම් විභාගය නොවැම්බර් මස 14 වැනිදා දක්වා කල් තැබිණි.

- derana 

කවුරුන් විසින් ප්‍රශ්නය ඇති කළත් වගකීම් භාරගත් අය වශයෙන් නිවැරදි විසඳුම් ලබාදීමට තමා කටයුතු කරන බවත්, අභියෝග රැසක් පැවති සමයක තමා අධ්‍යාපන විෂය භාර අමාත්‍යවරයා වශයෙන් පත් වූ අතර පියවරෙන් පියවර එම අභියෝගවලට විසඳුම් සපයමින් ඉදිරියට යාම තම අපේක්ෂාව බවත් අධ්‍යාපන අමාත්‍ය සුසිල් ප්‍රේමජයන්ත පැවසීය.

අමාත්‍යවරයා මේ අදහස් පළ කළේ කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ දී පැවති උත්සව අවස්ථාවකට එක්වෙමිනි.

පසුගියදා ඇති වූ ගුරු විදුහල්පතිවරුන්ගේ උද්ඝෝෂණය මර්දනය කිරීම සම්බන්ධව මෙහිදී මාධ්‍යවේදීන් විසින් කරන විමසීම් හමුවේ අදහස් දැක්වූ අමාත්‍යවරයා, ‘ගුරු සංගම් එක්ක මම දිගින් දිගටම සාකච්ඡා කරමින් මෙතෙක් කලක් ඇති වූ ඒ අයගේ ගැටළු විසඳාගනිමින් ආවා. අයවැය ලේඛනයකුත් ලංවෙන නිසා අපි යෝජනා කරල තියෙනවා, ගුරු විදුහල්පති පමණක් නෙවෙයි සෙසු සේවාවලත් ඇතිව තිබෙන වැටුප් විෂමතා සමනය කිරීමට අයවැයෙන් යම් ප්‍රතිපාදනයක් වෙන් කරල ඒ සම්බන්ධයෙන් පියවර ගන්නේ කොහොමද කියන කාරණය අපි පෙන්වා දීලා තියෙනවා. නමුත් රටේ තියෙන ආර්ථිකයත් එක්ක තමයි භාණ්ඩාගාරය ඒ සම්බන්ධව අවධානය යොමු කරන්නෙ. අපේ යුතුකම අපි ඉටු කරල තියෙනවා.. යැයි පැවසීය.

මෙහි දී විභාග ප්‍රශ්නපත්‍ර සම්බන්ධයෙන් මාධ්‍යවේදියෙකු විසින් කළ විමසීමකට පිළිතුරු ලබාදෙමින් අමාත්‍යවරයා, විභාග දෙපාර්තමේන්තුව ප්‍රමිතියක් අනුව ප්‍රශ්න පත්‍ර සකස් කරන බවත්, ඒ ප්‍රමිතිය එදා සිට අද දක්වාම ආරක්ෂා කරගෙන සිටින බවත්, මෙවැනි විවේචන එල්ලවන්නේ ඒවා කර්මාන්තයක් කරගත් අය විසින් බවත් ඔවුන්ගේ ප්‍රතිචාරවලට කලබල වීම නිෂ්ඵල බවත් සඳහන් කළේ ය.

මාධ්‍ය ඒකකය

සුළු හා මධ්‍යම පාන්තික ජනතාව වෙනුවෙන් කොළඹ නගරයේ නිවාස ව්‍යාපෘති පහක් ආරම්භ කරන බව නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු පැවසීය.

ඊට අදාළ එකඟතාව පසුගියදා ජනාධිපති රනිල් වික්‍රමසිංහ  විසින් චීන රජය වෙතින් ලබාගෙන ඇති බව ද රාජ්‍ය අමාත්‍යවරයා සඳහන් කළේය.

නිවාස සංවර්ධන අධිකාරිය විසින් ආරම්භ කර මේ වනවිට නවත්වා තිබෙන ව්‍යාපෘති 2024 වසර සඳහා වන නව අයවැය සමඟ යළි ඇරඹීමට පියවර ගන්නා බව ද ඔහු පැවසීය.

නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (26) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය.

අපේ රට සියලුම භූ විෂමතාවලින් සමන්විත, දේශගුණික කලාපවලින්, ස්වභාවික සම්පත්වලින් බහුල සුන්දර දිවයිනක්. වටිනා ඛනිජ සම්පත්, ලෝකයේ ස්වභාවික අනතුරු අවම යහපත් ගුණාංග රැසක් රට තුළ තිබෙනවා.

අපේ රටේ වටිනාම සම්පතක් ලෙස ඉඩම් හැදින්විය හැකියි. ජනගහනය වැඩි වන විට එම වටිනාකම දිනෙන් දින වැඩි වෙනවා. නගරාසන්න ප්‍රදේශ දෙස බැලීමේදීත් ඉඩම් වල වටිනාකම දිනෙන් දින වැඩි වෙනවා. ඒ වගේම නාගරික සංවර්ධන අධිකාරිය සතුව විශාල භූමි ප්‍රමාණයක් තිබෙනවා. ඇතැම් ඉඩම් සමබන්ධ තොරතුරු ප්‍රමාණවත් තරම් නැහැ. මේ නිසා එම තොරතුරු ලබා ගැනීමටත් අමාත්‍යංශය ලෙස කටයුතු කරමින් පවතිනවා.

නාගරික සංවර්ධන අධිකාරිය පවරා ගත් ඉඩම් ද තිබෙනවා. එහි ඇතැම් ව්‍යාපෘති රජය විසින් සිදුකර තිබෙනවා. නගර නිර්මාණ සැළසුම්කරණය සහ නගර පුළුල් කිරීම වැනි කටයුතු සිදු කර තිබෙනවා. ඒ වගේම දෙස් විදෙස් ආයෝජන සඳහා අවශ්‍ය ඉඩම් අප සතුව තිබෙනවා. ඕනෑම අයෙකුට රජය සතු ඉඩම් භාවිත කරමින් ආයෝජන අවස්ථා ලබාගත හැකියි. නාගරික සංවර්ධන අධිකාරිය ඩිජිටල්කරණය කිරීමෙන් පසු ඕනෑම අයෙකුට නාගරික සංවර්ධන අධිකාරිය හරහා එම ආයතනය සතු ඉඩම් මොනවාදැයි දැනගත හැකියි.

මෙහිදී අපි විශේෂ අවධානයක් යොමුකර තිබෙන්නේ අප සතු ඉඩම් මුදල් ඉපැයීම සඳහා යොදා ගැනීම සම්බන්ධවයි. උදාහරණයක් ලෙස මැකලම් පාරේ වටිනා ඉඩම පෙන්වා දෙන්න පුළුවන්.

තවද මහනුවර නගරය, බෝගම්බර සිරගෙදර, නුවරඑළිය ඇතුළු සෑම නගරවලම නාගරික සංවර්ධන අධිකාරිය සතු ඉඩම් තිබෙනවා. බෝගම්බර සිරගෙදර පිහිටි ඉඩම කේන්ද්‍ර කරගනිමින් නව ආයෝජන අවස්ථා විවෘත කිරීමට ද සැලසුමක් තිබෙනවා.

ජනාධිපති රනිල් වික්‍රමසිංහ මහතාගේ නිසි මූල්‍ය කළමනාකරණය නිසා නිවාස සංවර්ධන අධිකාරිය විසින් ආරම්භ කර මේ වනවිට නවත්වා තිබෙන ව්‍යාපෘති යළි ඇරඹීමට හැකි තත්ත්වයක් පෙන්නුම් කරනවා. එම කටයුතු 2024 වසර සඳහා වන නව අයවැය සමඟ ආරම්භ කිරීමට අප බලාපොරොත්තු වනවා. ඒ වගේම

ඇතැම් ව්‍යාපෘතිවල වංචා දූෂණ සිදුව තිබෙනවා. එම වැරදි නිවැරදි කිරීම සඳහා අමාත්‍යාංශය ලෙස අවශ්‍ය පියවර ගනිමින් තිබෙනවා.

ඒ වගේම සුළු හා මධ්‍ය ආදායම් ලබන ජනතාව වෙනුවෙන් කොළඹ නිවාස ව්‍යාපෘති පහක් ආරම්භ කිරීමට නියමිතයි. ඩොලර් මිලියන 350ක් වැය වන අතර එය ප්‍රධානයක් ලෙස ලබාදීමට චීන රජය විසින් ජනාධිපති රනිල් වික්‍රමසිංහ මහතාට එකඟතාව පළකර තිබෙනවා. එයින් ඇමෙරිකානු ඩොලර් මිලියන 200ක් මේ වන විට ලැබී තිබෙනවා. මෙය නිවාස 2500ක විශාල ව්‍යාපෘතියක් බව පැවසිය යුතුයි.

ඒ සමග කොළඹ ගංවතුර පාලනයට පහත් බිම් සංවර්ධන අධිකාරිය විශාල වැඩකොටසක් කරනවා. කඩොලාන, වගුරු බිම් ආරක්ෂා කිරීමටත් කටයුතු කරනවා.

ගංවතුර පාලනය වෙනුවෙන් ජනතාවගෙන් ලබාගත් ඇතැම් ඉඩම් විනාශ කර තිබෙනවා. ඇතැමුන්ට ඉඩම් පවරා ගැනීමේ දී ලබාදිය යුතු වන්දි පවා නිසි ලෙස ලබා දී නැහැ. අප එම තත්ත්වය වෙනස් කර කොළඹ නගරයේ ප්‍රධාන ඉඩම් ලබා ගන්නා විට විද්‍යාත්මක ක්‍රමයකට එම ඉඩම් අත්පත් කර ගැනීමට බලාපොරොත්තු වෙනවා.

ජනාධිපති රනිල් වික්‍රමසිංහ මහතා රට සංවර්ධනය කරා ගෙන යන ගමනේදී අමාත්‍යාංශයක් ලෙස ඒ වෙනුවෙන් උපරිම දායකත්වය ලබා දීමට අප සූදානම්.