පුවත්

ලක්ෂ 16 ක් පමණ වන රාජ්‍ය අංශයේ සේවයකයන් මෙන්ම ලක්ෂ 80 ක් පමණ වන පෞද්ගලික අංශයේ සේවකයන් යන දෙපිරිසම ශක්තිමත් කරමින් රටේ ආර්ථිකය ඉදිරියට ගෙනයන විධිමත් වැඩපිළිවෙලක් ජනාධිපති රනිල් වික්‍රමසිංහ  විසින් දියත් කර තිබෙන බව පාර්ලිමේන්තු මන්ත්‍රී වජිර අබේවර්ධන පැවසීය.

ජනාධිපතිවරයා ගෙන යන මෙම වැඩපිළිවෙල සාර්ථක කරගැනීම හරහා ඉදිරියේදී විදුලිය, ගෑස් සහ ඉන්ධන මිල අනිවාර්යයෙන් අඩුකල හැකි මෙන්ම ජනතාවට සහනදායී ආර්ථිකයක් නිර්මාණය කල හැකි බව පෙන්වාදුන් මන්ත්‍රීවරයා එම වැඩපිළිවෙල කඩාකප්පල් කරන කටයුතු සඳහා සහය නොදක්වන ලෙස ජනතාවගෙන් ඉල්ලා සිටින බව ද සඳහන් කළේය.

පාර්ලිමේන්තු මන්ත්‍රී වජිර අබේවර්ධන මේ බව සඳහන් කළේ 'ස්ථාවර රටකට සැවොම එක මඟකට' මැයෙන් අද (07) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී වජිර අබේවර්ධන මෙසේද පැවසීය.

රාජ්‍ය යාන්ත්‍රණය අයවැය සමඟ ගැලපීමේදී බංකොලොත් රටක් අනාගත ඉලක්ක වෙනුවෙන් ගමන් කලයුත්තේ කෙසේ ද යන්න පිළිබඳව මූලිකවම අවධානය යොමු කළ යුතුයි.

විශේෂයෙන් ආර්ථික අර්බුදය මතු වන්නේ 2019 අවුරුද්දේ අපේ පාලන තන්ත්‍රය වෙනස් වුණාට පසුවයි. එහිදී බදු ප්‍රතිපත්තිය වෙනස් කළා. මෙම බදු වෙනස් කිරීම නිසා රාජ්‍ය ආදායම අහිමිව මෙරට ආර්ථිකය වේගයෙන් කඩා වැටීමට පටන් ගත්තා. රාජ්‍ය සේවක වැටුප් ගෙවාගැනීමට ක්‍රමයක් නැතිවුණා. එහිදී මහබැංකුව හරහා මුදල් මුද්‍රණය කිරීමට යොමු වුණා. ඒ හේතුවෙන් උද්ධමනය වේගයෙන් ඉහළට ගියා.

එහිදී රටේ සමස්ත ආර්ථිකය බිඳ වැටීමකට ලක්ව නිල වශයෙන් බංකොළොත් භාවය ප්‍රකාශ කල රටක් බවට පත්වුණා. නමුත් ජනාධිපති රනිල් වික්‍රමසිංහ  මේ රටේ වගකීම බාරගත් පසුව ජාත්‍යන්තර මූල්‍ය අරමුදල, ලෝක බැංකුව සහ ආසියානු සංවර්ධන බැංකුව වැනි ජාත්‍යන්තර මූල්‍ය ආයතන ඇතුළු රටට වැදගත් වන සියළු පාර්ශ්වයන්ගේ විශ්වාසය දිනාගෙන තිබෙනවා. යළි රට ගොඩනැගීම සාර්ථකව සිදුකරගෙන යමින් තිබෙනවා. 2001 – 2003 සමයේ ද ආර්ථික අර්බුදයට ලක්වූ රට යළි ගොඩ නැගුවේ එවකට අග්‍රාමාත්‍යවරයා වූ රනිල් වික්‍රමසිංහ  විසින්. නමුත් 2004 අප්‍රේල් 10 එම පාලනය පෙරළනු ලැබුවා. 2014 වන විට දා නැවතත් රට බංකොලොත්වීමේ අවධානමකට නතුවුණා. බිඳවැටුණූ ඒ ආර්ථිකය 2015 දී නැවත ගොඩ නැගුවේ ද රනිල් වික්‍රමසිංහගේ අග්‍රමාත්‍ය ධූරය යටතේයි. එදා රාජ්‍ය සේවක වැටුප අවම රුපියල් 10,000කින් වැඩි කළා. ඒ වගේම රාජ්‍ය අංශයේ මෙන්ම පෞද්ගලික අංශය ද ශක්තිමත් කර ආර්ථික ස්ථාවරත්වයක් ඇති කිරීමට අවශ්‍ය මූලික අඩිතාලම් සැකසුවා. නමුත් අවාසනාවකට එහෙම කරපු ආණ්ඩුව 2020 රාජ්‍ය සේවකයින් සහ මහජනතාව එක්ව පෙරළා දැමුවා. අවසානයේ ඔවුන් ද පාරට වැටුණා.

එම නිසා දරුණු ආර්ථික අර්බුදයකට මුහුණ දී රට එම තත්ත්වයෙන් යළි මුදවා ගැනීමේ සාර්ථක කර්තව්‍යයක් දියත් කර ඇති මේ මොහොතේ කවුරුන් හෝ නැවත වැඩ වර්ජන රැල්ලක් ඇති කළහොත් යළි සිදුවන්නේ ඒ විපාකය විඳ සියලු දෙනාටම මහ පාරට වැටීමටයි.

සටන් පාඨ පුවරු ඔසවාගෙන වැඩ වර්ජන දියත්කල විට සිදු වන්නේ ශ්‍රී ලංකාව ජාත්‍යන්තරය තුළ හෑල්ලුවට ලක්වීමයි. නිතරම පෙළපාලි යන රටකට සංචාරකයන් පැමිණීමට බියක් දක්වනවා. එවැනි රටකට කවදාවත් දියුණු වෙන්න ලැබෙන්නෙ නැහැ. ඒ නිසා පවතින තත්ත්වය හමුවේ රජයේ වෘත්තීය සමිති හිතනවානම් පැරණි පුරුද්ද අනුව වැඩවර්ජනයකින් යමක් ලබාගත හැකි වනු ඇතැයි කියා, සැබවින්ම සිදුවන්නේ ලැබීමට ඇති දෙයත් නොලැබී යාමයි.

පවතින අඩු පාඩු හදන්න අවශ්‍යය නව නීති රීති විශාල ප්‍රමාණයක් මේ වන විටත් ගෙනවිත් තිබෙනවා. සෑම අංශයක්ම ශක්තිමත් කිරීමට මෙන්ම ජනතාව ඉල්ලූ වෙනස ඇති කිරීමට හැකි නව නීති රීති ගෙනවිත් තිබෙනවා. තවදුටත් දේශපාලන පක්ෂවලට බොරු පොරොන්දු දෙන්න නොහැකි ආකාරයට නීති රීති ගෙන එමින් තිබෙනවා.

මෙවර අය වැයේ දී රාජ්‍ය සේවකයන් ලක්ෂ 16 කගේ වැටුප් වැඩි කරන බවත් රනිල් වික්‍රමසිංහ ජනාධිපතිතුමා ප්‍රකාශ කර තිබෙනවා. පුද්ගලික අංශයේ ද වැටුප් වැඩි කරන්න තිබෙනවා.

ලක්ෂ 16 ක් පමණ වන රාජ්‍ය අංශයේ සේවයකයන් මෙන්ම ලක්ෂ 80 ක් පමණ වන පෞද්ගලික අංශයේ සේවකයන් යන දෙපිරිසම ශක්තිමත් කරමින් රටේ ආර්ථිකය ඉදිරියට ගෙනයන විධිමත් වැඩපිළිවෙලක් ජනාධිපති රනිල් වික්‍රමසිංහ මහතා විසින් දියත් කර තිබෙනවා.

මෙම වැඩපිළිවෙල සාර්ථක කරගැනීම හරහා විදුලිය, ගෑස්, ඉන්ධන මිල අනිවාර්යයෙන් අඩුකර ජනතාවට සහනදායී ආර්ථිකයක් නිර්මාණය කල හැකියි. ඒ පිළිබදව සැකයක් තියාගන්න එපා.

අප රටක් ලෙස ඉතාම බරපතල ආර්ථික අර්බුදයකට ලක්ව, මේ වන විට එයින් මිදෙමින් සිටිනවා. ආර්ථිකය ස්ථාවර කරගෙන සංවර්ධිත ර‍ටක් බවට පත්වීමට නම් මේ පවතින තත්ත්වය තේරුම් අරගෙන රාජ්‍ය අංශයත් සමස්ථ මහජනතාවත් වසර 05 ක් 10 ක් මේ රට දියුණු කරන්න අධිෂ්ඨාන කරගෙන ඉදිරියට යා යුතුයි. එසේ කළහොත් පමණයි අපට ශක්තිමත්ව ඉදිරියට ගමන් කළ හැකි වන්නේ.

ඒ වගේම සමස්ත රාජ්‍ය යාන්ත්‍රණයම ආරක්ෂා කිරීමට වර්තමාන රජය පියවර ගන්නා බව ද විශේෂයෙන්ම සඳහන් කළ යුතුයි. පවතින විශාල ණය බරින් මිදීම සදහා ලබන වසර සඳහා සංචාරකයින් ලක්ෂ සියයක් ගෙන්වීමට කටයුතු කලයුතු බව ජනාධිපතිතුමා සදහන් කර තිබෙනවා. ඒ සඳහා සංචාරකයින්ට පහසුකම් වැඩි කරන්නා සේම රාජ්‍යයේ ස්ථාවර භාවය ද පෙන්විය යුතු වනවා.

ජනාධිපතිතුමා විසින් පාර්ලිමේන්තුව තුළ “ජාතික සභාවක්” ස්ථාපිත කර තිබෙනවා. ජාතික වශයෙන් ඇති කරුණු එම ස්ථානයට ඉදිරිපත් කිරීමට සියළුම දෙනාට හැකියාව තිබෙනවා. පැරණි ක්‍රම මගින් තවදුරටත් දේශපාලනය කල නොහැකි බව සියළුම දේශපාලන පක්ෂ මතක තබාගත යුතුයි. අප විසින් දැනට සිදුකරගෙන යමින් සිටින වැඩපිළිවෙලට අමතරව වෙනත් ක්‍රමවේදයක් තිබේ නම් ලංකාවේ ඕනෑම දේශපාලන පක්ෂයකට හෝ සිවිල් සමාජයකට කරුණු ඉදිරිපත් කළ හැකියි.

ශ්‍රේෂ්ඨාධිකරණය හමුවේ අභියෝගයට ලක් කළ මාර්ගගත ක්‍රමවල සුරක්ෂිතතාව පිළිබඳ පනත් කෙටුම්පත ආණ්ඩුක්‍රම ව්‍යවස්ථාවට පටහැනි නොවන බව ශ්‍රේෂ්ඨාධිකරණය තීිරණය කර ඇත.

එම පනත් කෙටුම්පතේ ඇතැම් වගන්ති පාර්ලිමේන්තුවේ විශේෂ බහුතරයකින් සම්මත කළ යුතු බවයි ශ්‍රේෂ්ඨාධිකරණය තීරණය කර ඇත.

කෙසේවෙතත් ශ්‍රේෂ්ඨාධිකරණ තීරණය මඟින් යෝජිත සංශෝධනයන්ට යටත්ව කාරක සභා අවස්ථාවේදී අදාළ වගන්ති සංශෝධනය කරන්නේ නම් පාර්ලිමේන්තුවේ සරල බහුතරයකින් එම වගන්ති සම්මත කළ හැකි බවයි ශ්‍රේෂ්ඨාධිකරණය කතානායකවරයාට දැනුම් දී ඇත.

ශ්‍රේෂ්ඨාධිකරණයේ එම තීරණය නියෝජ්‍ය කථානායකවරයා විසින් අද පාර්ලිමේන්තුවට දැනුම් දී ඇත.

ශ්‍රී ලංකා ක්‍රිකට් ආයතනය අත්හිටුවමින් එහි කටයුතු මෙහෙය වීම සඳහා ක්‍රීඩා අමාත්‍යවරයා විසින් අතුරු පාලක කමිටුවක් පත් කිරීම සහ ඊට අදාළ ගැසට් නිවේදනය ක්‍රියාත්මක වීම වළක්වාලමින් අභියාචනාධිකරණය විසින් අතුරු තහනම් නියෝග නිකුත් කළේය.

ශ්‍රී ලංකා ක්‍රිකට් ආයතනයේ සභාපති ෂම්මි සිල්වා  විසින් ඉදිරිපත් කළ රිට් පෙත්සමක් සලකා බැලීමෙන් අනතුරුව අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ විකුම් කළුආරච්චි යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල විසින් එම නියෝග නිකුත් කරනු ලැබීය.

එම නියෝග දින 14ක කාලයකට බලපැවැත්වෙන බවත් එම නියෝගයේ සඳහන් වුණි.

ඒ අනුව ක්‍රිකට් ආයතනයේ කටයුතු අත්හිටුවමින් ක්‍රීඩා අමාත්‍යවරයා විසින් අතුරු පාලක මණ්ඩලයක් පත් කරමින් නිකුත් කළ ලද ගැසට් නිවේදනය ක්‍රියාත්මක වීම වළක්වාලමින් අධිකරණය විසින් එක් අතුරු නියෝගයක් නිකුත් කළේය.

එසේම අමාත්‍යවරයා විසින් පත්කරන ලද අර්ජුන රණතුංගගේ නායකත්වයෙන් යුත් ක්‍රිකට් අතුරු පාලක කමිටුවේ සාමාජිකයින්ට එම තනතුරුවල කටයුතු කිරීම වළක්වාලමින් තවත් අතුරු නියෝගයක් නිකුත් කරනු ලැබීය.

එසේම පෙත්සම්කරු ඇතුළු ශ්‍රී ලංකා ක්‍රිකට් ආයතනයේ නිලධාරීන්ට ඔවුන්ගේ කටයුතුවලට බාධා කිරීම වළක්වාලමින් විනිසුරු මඩුල්ල විසින් ක්‍රීඩා අමාත්‍යවරයා ඇතුළු වගඋත්තරකරුවන් වෙත තවත් අතුරු නියෝගයක් නිකුත් කර තිබේ.

බංග්ලාදේශ කණ්ඩායමේ නායක ශකිබ් අල් හසන්ට ලෝක කුසලාන තරගාවලියේ ඉදිරි තරගය අහිමිව ඇති බව වාර්තා වෙයි.

‍ඒ ඊයේ පැවති ශ්‍රී ලංකා කණ්ඩායමට එරෙහිව පැවති තරගයේදී වම් අතේ ඇඟිල්ලක ඇතිවූ ආබාධයක් හේතුවෙන් ඔහුට මෙලෙස ඉදිරි තරග අහිමිව ඇත

දිල්ලි හිදී ඔහුගේ වම් අතේ X රේ පරීක්ෂාවක් සිදුකිරීමෙන් අනතුරුව අස්ථි බිඳීමක් සිදුව ඇති බව තහවුරු වී තිබේ.

ඒ අනුව 11 වනදා පූනේහිදී ඔස්ට්‍රේලියාවට එරෙහිව පැවැත්වෙන බංග්ලාදේශ කණ්ඩායම සහභාගී වන ලෝක කුසලාන තරගාවලියේ අවසන් තරගය ඔහුට අහිමිවනු ඇත.

ඔහු ශ්‍රී ලංකාවට එරෙහිව ඊයේ පන්දු 65කදී ලකුණු 82ක් රැස් කිරීමට සමත් විය.

ශ්‍රී ලංකාවේ ක්‍රිකට් ක්ෂේත්‍රයේ පැනණැගී ඇති ගැටලු නිරාකරණය කිරීම සඳහා විශේෂ කැබිනට් අනු කමිටුවක් පත් කිරීමට අද (06) පැවති අමාත්‍ය මණ්ඩල රැස්වීමේ දී තීරණය කෙරිණි.

විදේශ කටයුතු අමාත්‍ය ජනාධිපති නීතීඥ අලි සබ්‍රි ගේ සභාපතිත්වයෙන් පත් කර ඇති මෙම කැබිනට් අනු කමිටුවේ සෙසු සාමාජිකයන් ලෙස විදුලිබල හා බලශක්ති අමාත්‍ය කංචන විජේසේකර, මහජන ආරක්ෂක අමාත්‍ය ටිරාන් අලස්, කම්කරු හා විදේශ රැකියා අමාත්‍ය මනුෂ නානායක්කාර පත් කර තිබේ.

ශ්‍රී ලංකා ක්‍රිකට් ක්‍රීඩාවේ පවතින ගැටලු විසඳීම සඳහා කඩිනම් ක්‍රියාමාර්ග නිර්දේශ කිරීම මෙම කැබිනට් අනු කමිටුවට පැවරේ.

හිටපු ප්‍රවීණ ක්‍රිකට් ක්‍රීඩකයන්ගේ ද අදහස් ලබාගනිමින් වත්මන් තත්ත්වය විමර්ශනය කිරීමට සහ අදාළ පාර්ශ්වකරුවන් සමඟ සහයෝගයෙන් කටයුතු කිරීමට කැබිනට් අනු කමිටුව කටයුතු කරනු ඇත.

මීට අමතරව, ජනාධිපති ලේකම්වරයා විසින් නම් කරන ලද ජනාධිපති අතිරේක ලේකම්වරයෙකු, මෙම අනු කමිටුවේ ලේකම්/කැදවුම්කරු ලෙස කටයුතු කරනු ඇත. කමිටුවේ කටයුතු කාර්යක්ෂමව සම්බන්ධීකරණය සහ පහසු කිරීම ලේකම්/කැඳවුම්කරුවෙකු පත්කිරීමේ අරමුණයි.

තවද, මෙම කමිටුවේ සාකච්ඡා සඳහා අවශ්‍ය යැයි සලකන ඕනෑම නිලධාරියෙකුගේ හෝ අදාළ ක්ෂේත්‍රයේ ප්‍රවීණයෙකුගේ සේවය ලබා ගැනීමට ද අමාත්‍ය මණ්ඩලය විසින් මෙම අනුකමිටුවට බලය පවරා ඇත.

ශ්‍රී ලංකාවේ ක්‍රිකට් ක්‍රීඩාව හා සම්බන්ධ ගැටලු වඩාත් සාර්ථක ලෙස විසඳීම සඳහා අවශ්‍ය විශේෂඥ දැනුම ලබා ගැනීම සහ පුළුල් පරාසයක් තුළ කරුණු සලකා බැලීම මෙම සමස්ත කටයුතුවල අරමුණයි.

ශ්‍රී ලංකා කණ්ඩායමේ මැද පෙළ පිතිකරුවකු වන ඇන්ජලෝ මැතිව්ස් ව එක් පන්දුවක් හෝ නොයවා දවා ගැනීමට බංග්ලාදේශ කණ්ඩායම අද (06) කටයුතු කළ අතර එය ක්‍රිකට් ක්‍රීඩාවේ ජීවගුණය බිංදුවට ඇද දැමීමක් ලෙස මේ වන විට විචාරකයන් අතර දැඩි දෝෂදර්ශනයට ලක්ව තිබේ.

එහිදී සිදුවූයේ ලංකා කණ්ඩායමේ සිව් වැනි කඩුල්ල ලෙස ලකුණු 135ක් ව තිබියදී සදීර සමරවික්‍රම දැවීගිය අතර ඊළඟ කඩූල්ල සඳහා මැතිව්ස් පැමිණියේය .

නමුත් ඔහු කඩුල්ලට පැමිණ සිය ස්ථානය ලකුණු කර ගැනීමට පෙර ඔහුගේ හිස් ආවරණයේ යම් ගැටලුවක් හේතුවෙන් ඔහු නැවත හිස් ආවරණයක් ඉල්ලා සිටියේය.

එම අතර තුර කාලයේදී බංග්ලාදේශ නායක ෂකීබ් අල් හසන් විනිසුරුවන්ගෙන් ඉල්ලීමක් කළේ විනාඩි 3 ඇතුළත තම පළමු පන්දුවට පහර නොදුන් හෙයින් ඔහු ව දැවී ගිය ක්‍රීඩකයෙක් ලෙස නම්කරන ලෙසයි.

ඒ අනුව විනිසුරු එරස්මස් තීරණය කළේ මැතිව්ස් දැවීගිය ක්‍රීඩකයෙක් බවය.

එහිදී මැතිව්ස් බංග්ලාදේශ කණ්ඩායමේ නායක අල් හසන් වෙත ගොස් තමාට සිදුවූ දෙය සම්බන්ධයෙන් විමසුවද ඔහු සිය ඉල්ලීම ඉල්ලා අස්කර ගැනීමට එකඟ බවක් පළකෙරුණේ නැත.

ඒ අනුව මැතිව්ස් 5 වන කඩුල්ල ලෙස නැවත ක්‍රීඩාගාරයට ගියේ කිසිම පංදුවක් සඳහා මුහුණ නොදී වන අතර එය ලෝක කුසලාන තරගාවලියක මෙන්ම ජාත්‍යන්තර ක්‍රිකට් තරගාවලිය ක පළමු වතාවට සිදුවූ සිදුවීමක් ලෙසත් වාර්තා වෙයි .

ජනප්‍රිය ගායන ශිල්පී අතුල ශ්‍රී ගමගේ අද (06) අභාවප්‍රාප්ත වී ඇති අතර ඒ වන විට ඔහු 60 වන වියේ පසුව තිබේ.

ඔහුගේ දේහය අංක 196/1 පට්ටිය වත්ත පාර ,කොතලාවල, කඩුවෙල නිවසේ තැන්පත් කර ඇති අතර අවසන් කටයුතු පසුව දැනුම් දෙන බව පවුලේ ආරංචි මාර්ග පවසයි .

සුසුම වී මගේ ,හැඟුමන් පාවී හැඟුමන් යාවී ,නිල් නුවන් පියවිලා ,ආත්මයෙන් ආත්මයේ, කඳුලක් දෙවන්නද, අප්සරාවක් දෝ ඔබ, කර බඳින රත්තරන් ,සිත මා හඬ හඬා, ඉකි බිඳ හඬා මා, වැනි ගීත රැසක් ගායනා කළ ඔහු 90 දශකයේ ජනප්‍රිය ගායකයෙකි.

යෝජිත 2024 අයවැය මඟින් අධ්‍යාපන අමාත්‍යංශයේ වැය ශීර්ෂය සඳහා රුපියල් බිලියන 237ක මුදලක් වෙන් කිරීමට සැළසුම් කර ඇති බව අධ්‍යාපන අමාත්‍ය සුසිල් ප්‍රේමජයන්ත පැවසීය.

එම ප්‍රමාණය අධ්‍යපානය වෙනුවෙන් වෙන්කල සමස්ත මුදල නොවන බවත් පළාත් සභා යටතේ වෙන්වන වැය ශීර්ෂය හරහා ද පළාත් 09 ආවරණය පරිදි අධ්‍යාපන ක්ෂේත්‍රයේ ප්‍රාග්ධන හා පුනරාවර්තන වියදම් සඳහා මුදල් වෙන් වන බවත් අමාත්‍යවරයා පෙන්වා දුන්නේය.

එසේම 2024 පෙබරවාරි 19 වනදා නව වසරේ පළමු පාසැල් වාරය ආරම්භ කරන බව සඳහන් කළ අමාත්‍යවරයා, ඒ අනුව පළමු වසරේ සිට එකොළහ වසර දක්වා විෂය නිර්දේශයන් එම වසර තුළම අවසන් කිරීමට හැකි බවත් සඳහන් කළේය.

අධ්‍යාපන අමාත්‍ය සුසිල් ප්‍රේමජයන්ත මේ බව සඳහන් කළේ 'ස්ථාවර රටකට සැවොම එක මඟකට' මැයෙන් අද (06) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ අධ්‍යාපන අමාත්‍ය සුසිල් ප්‍රේමජයන්ත මෙසේද පැවසීය.

පසුගිය සමයේ රටේ පැවති තත්ත්වය හමුවේ 2023 වර්ෂයේ පළමු පාසැල් වාරය ආරම්භ කිරීම ප්‍රමාද වූවා. කෙසේ වුවත් 2023 මාර්තු 27 වනදා එම පාසැල් වාරය ආරම්භ කිරීමට අපට හැකියාව ලැබුණා. නමුත් එම ප්‍රමාදයන් වළක්වමින් 2024 වර්ෂයේ පෙබරවාරි 19 වැනිදා නව වසරේ පළමු පාසැල් වාරයේ ආරම්භය කිරීමට හැකියාව ලැබී තිබෙනවා. ඒ අනුව පළමු වසරේ සිට එකොලහ වසර දක්වා විෂය නිර්දේශයන් එම වසර තුළම අවසන් කිරීමට අප බලාපොරොත්තු වෙනවා. ඒ අනුව 2025 පාසැල් වර්ෂය සාමාන්‍ය තත්ත්වයෙන්ම පැවත්වීමට අපට හැකියාව ලැබෙනවා.

ඒ වගේම උසස් පෙළ විභාගය ද අප පැවැත්වීමට කටයුතු කලා. නමුත් වෘත්තීය ක්‍රියාමාර්ගයන් හේතුවෙන් පිළිතුරු පත්‍ර සමීක්ෂණය කල් ගියා. තවත් පිරිසක් අධිකරණයට ගොස් තිබෙනවා. නමුත් මේ වන විට නියමිත ආකාරයට කාලසටහන් නිකුත් කිරීමට අප පියවර ගෙන තිබෙනවා. පවතින තත්ත්වයන් කෙසේ වුවත්, කාලය කළමනාකරණය කරමින් නියමිත කාලයට විභාග පැවැත්වීම අපගේ අපේක්ෂාවයි.

එමෙන්ම පැවති සාමාන්‍ය පෙළ විභාගයේ ප්‍රතිඵල මේ මස තෙවන සතියේ නිකුත් කිරීමට අප සූදානම්ව සිටිනවා. මෙතැන දී අපට අභියෝගයන් කිහිපයකට මුහුණ දෙන්න සිදුව තිබෙනවා. යෝජිත සාමාන්‍ය පෙළ විභාගය මැයි මස දක්වා කල්යන විට, අලුතින් එකොලහ වසරට පැමිණෙන දරුවන් ද පෙබරවාරි මස 19 වන විට එම පන්තිවලටම පැමිණෙනවා. එම තත්ත්වය පාසැල් මට්ටමින් කළමනාකරණය කරගන්නා ලෙස උපදෙස් දී තිබෙනවා.

ඒ වගේම අප බාරගන්නා විට අධ්‍යාපන පරිපාලන ක්ෂේත්‍රයේ පුරප්පාඩු 808ක් තිබුණා. එම ප්‍රමාණයෙන් 50%ක් බඳවා ගැනීමට භාණ්ඩාගාර අනුමැතිය ලැබුණා. ඒ වෙනුවෙන් අදාළ විභාගය මේ වන විට පවත්වා අවසන් බැවින් කඩිනමින් සම්මුඛ පරීක්ෂණ පවත්වා බඳවාගැනීම් සිදු කිරීමට අප කටයුතු කරනවා.

එමෙන්ම ගුරු අධ්‍යාපනඥ සේවය සඳහා පුරප්පාඩු 707ක බදවා ගැනීම් සඳහා අනුමැතිය හිමිවී තිබෙනවා. රාජ්‍ය සේවා කොමිසන් සභාවේ අනුමැතිය ලැබුණු වහාම ඔවුන් සේවයේ පිහිටුවීමට අප කටයුතු කරනවා. එමගින් පීඨ 19ක් සදහා ගුරුවරුන් පුහුණු කිරීම සිදුවනවා. ගුරු සේවයේ සියලූම ශ්‍රේණීන් සඳහා පවතින පුරප්පාඩු සියල්ල ලබන පාසැල් වාරයට ප්‍රථමයෙන් සම්පූර්ණ කිරීමට අප බලාපොරොත්තු වනවා.

රාජ්‍ය සේවයෙන් සහ සංවර්ධන නිලධාරීන්, උපාධිධාරීන් ලෙස ගුරු සේවයට බඳවා ගැනීමට සදහා සූදානම් වූ මොහොතේ ඊට එරෙහිව පිරිසක් අධිකරණයට ගොස් තිබෙනවා. එහි විසඳුම ලබෙන තෙක් පළාත් මට්ටමින් විශ්‍රාමික ගුරු පුරප්පාඩු සහ සේවය හැර ගිය ගුරුවරු වෙනුවෙන් සියලූම පළාත් ආවරණය වන පරිදි බඳවා ගැනීම් සිදුකරගෙන යමින් සිටිනවා.

ඒ වගේම විද්‍යාව, ගණිතය, ඉංග්‍රීසි, විදේශ භාෂා සහ තාක්ෂණ විෂයන් සඳහා ගුරුවරුන් 5450ක් බඳවාගැනීමට භාණ්ඩාගාර අනුමැතිය හිමි වී තිබෙනවා. එය පළාත් මට්ටමින් සිදුකරගෙන යමින් සිටිනවා. ඒ වගේම ජාතික පාසැල් සඳහා ද බඳවාගැනීම වෙනුවෙන් මේ සතිය වන විට ගැසට් නිවේදනය නිකුත්වීමට නියමිතව තිබෙනවා.

2024ට අදාළව අධ්‍යාපන අමාත්‍යංශයේ වැය ශීර්ෂය සඳහා රුපියල් බිලියන 237ක් වෙන්වී තිබෙනවා. මෙය සමස්ථ අධ්‍යාපනය වෙනුවෙන්ම වෙන්කල මුදල නොවෙයි. පළාත් සභා වැය ශීර්ෂය යටතේ ද පලාත් 09ට අදාළව අධ්‍යාපන ක්ෂේත්‍රයේ ප්‍රාග්ධන සහ පුනරාවර්තන වියදම් වෙන් කෙරෙනවා.

එමෙන්ම අධ්‍යාපන ප්‍රතිසංස්කරණ සදහා ප්‍රතිපත්ති රාමුව අමාත්‍ය මණ්ඩලය අනුමත කලා. එය පාර්ලිමේන්තුවේ ආංශික අධීක්ෂණ කාරක සභාවේ අනුමතවීමෙන් පසු පාර්ලිමේන්තුවේ සම්මත කිරීමට බලාපොරොත්තු වනවා. ඒ හැර අධ්‍යාපන ප්‍රතිපත්තිය ආණ්ඩුවෙන් ආණ්ඩුවට හෝ අමාත්‍යවරයාගෙන් අමාත්‍යවරයාට වෙනස් නොවිය යුතු බව අපේ ස්ථාවරයයි. නව අධ්‍යාපන ප්‍රතිසංස්කරණ සඳහා ගෙනෙන යෝජනා ක්ෂේත්‍ර හතරක් ඔස්සේ ඉදිරියට ගෙන යනවා. මෙමගින් අප සූදානම් වන්නේ විභාග පාදක ක්‍රමයෙන් විතැන්වී පන්ති කාමරයේ ඇති තක්සේරු ක්‍රමය යන ද්විත්වයම එක්කොට විභාගයේ ඇති තරඟකාරී ස්වභාවය හැකිතාක් දුරට අඩුකිරීමටයි. එමගින් දරුවන්ට නිදහසේ අධ්‍යාපනය ලැබීමට මෙන්ම ගුරුවරුන්ට නිදහසේ අධ්‍යාපනය ලබාදීමේ වටපිටාවක් නිර්මාණ කිරීමට හැකියාව ලැබෙනවා.

මේ වන විට 2024ට අදාළ පෙළපොත් බෙදාදීමේ කටයුතු සුදානම් කර තිබෙනවා. පාසැල් නිළ ඇදුම් බෙදාදීමේ කටයුතු ද 80%කින් අවසන් කර තිබෙනවා. සියලුම පාසැල් සිසුන් සඳහා ලබන වසරේ සිට දිවා ආහාරය ලබා දීමටත් සැලසුම් කර තිබෙනවා. 2030 වන විට සෑම පාසැල් දරුවෙකුට දිවා ආහාරයක් ලබාදීමත් අපගේ අරමුණයි. ඒ සදහා ලෝක ආහාර වැඩසටහන, USAID සහ පෞද්ගලික අංශය ද එක්ව වැඩසටහනක් ආරම්භ කර තිබෙනවා.

සාමාන්‍ය පෙළ සහ උසස් පෙළ විභාගයෙන් පසු සිසුන්ට නිපුණතා සහ තාක්ෂණ අංශයේ වෘත්තීය පුහුණුව ලබා දීමටත් රජය වැඩසටහන් රැසක් ආරම්භ කර තිබෙනවා. එහිදී මාස හතරක කාලයක් සඳහා තෝරාගත් පාසැල්වල සවස් කාලයේදී මාර්ගෝපදේශණය, ඉංග්‍රීසි, තොරතුරු තාක්ෂණය හෝ තමන් තෝරාගන්නා පාඨාමාලාවකට අදාළව අධ්‍යයන කටයුතුවල නියැලිය හැකි වනවා.

ක්‍රීඩා අමාත්‍ය රොෂාන් රණසිංහ විසින් ශ්‍රී ලංකා ක්‍රිකට් තේරීම් කමිටුව සම්බන්ධයෙන් චෝදනා නගමින් පසුගිය 03 වනදා නිකුත්කළ මාධ්‍ය නිවේදනය ක්‍රිකට් තේරීම් කමිටුව තරයේ ප්‍රතිකේෂ්ප කර සිටියි.

ඊට අදාළව ලිපියක් ක්‍රීඩා අමාත්‍යවරයා වෙත යොමුකර ඇති ක්‍රිකට් තේරීම් කමිටුව එහිදී තම නිර්දෝෂීභාවය වෙනුවෙන් එකිනෙක කරුණු දැක්වීමක් ද සිදුකර ඇත.

ඉන්දියාව හමුවේ අවස්ථා දෙකකදී ක්‍රිකට් කණ්ඩායම ලැබූ අවසනාවන්ත පරාජය හමුවේ ක්‍රිකට් තේරීම් කමිටුවද කම්පනයට හා කනස්සල්ලට පත්ව ඇති බව සඳහන් කරන එම ලිපියේ වැඩිදුරටත් අවධාරණය කර ඇත්තේ පසුබෑම් හමුවේ දේශපාලනික හෝ පෞද්ගලික වාසි සඳහා එම පසුබෑම් දඩමීමා කර ගැනීමට තැත් කිරීම නොව, පසුබෑමට හේතු විද්‍යාත්මකව සොයා විකල්ප හඳුනාගැනීම බවයි .

ශ්‍රී ලංකා ක්‍රිකට් තේරීම් කමිටුව වෙනුවෙන් එහි සභාපති ප්‍රමෝදය වික්‍රමසිංහ සහ සෙසු සාමාජිකයන් වූ
රොමේෂ් කළුවිතාරණ හා
හේමන්ත වික්‍රමරත්න ගේ නමින් ක්‍රීඩා අමාත්‍යවරයා වෙත යොමුකළ එම ලිපිය පහත දැක්වෙයි .

 රොෂාන් රණසිංහ මැතිතුමා,
ගරු අමාත්‍ය
ක්‍රීඩා සහ යෞවන කටයුතු අමාත්‍යංශය,
කොළඹ-07

වර්ෂ 2023.11.03 දින නිකුත් කරන ලද මාධ්‍ය නිවේදනයක් මඟින් ක්‍රිකට් තේරීම් කමිටුවට එරෙහිව නඟන ලද චෝදනා ප්‍රතික්ෂේප කිරීම

ගරු ඇමතිතුමනි,

ඔබ තුමන්ගේ උපදෙස් පරිදි ක්‍රීඩා අමාත්‍යංශයේ මාධ්‍ය ඒකකය විසින් වර්ෂ 2023.11.03 දින නිකුත් කරන ලද මාධ්‍ය නිවේදනයක් මගින් ශ්‍රී ලංකා ක්‍රිකට් කණ්ඩායමේ තරග පරාජයන් තේරීම් කමිටුව හා ශ්‍රී ලංකා ක්‍රිකට් ආයතනය භාරගත යුතුයි යන මැයෙන් මාධ්‍යයට නිකුත් කරන ලද ඒකපාර්ශ්වික චෝදනාවට අදාළව ක්‍රිකට් තේරීම් කමිටුවේ සාමාජිකයන් වශයෙන් අපගේ අවධානය යොමුවී තිබේ. ඒ සඳහා පිළිතුරු සැපයීම අපගේ වගකීමක් යැයි සිතමු.

මෙහිලා අප කරුණු දක්වන්නේ ශ්‍රී ලංකා ක්‍රිකට් තේරීම් කමිටුවට අදාළව ඉදිරිපත් කොට ඇති චෝදනා සම්බන්දයෙන් පමනක් බව අවධාරණය කළ යුතුය.
ශ්‍රී ලංකා තේරීම් ක්‍රිකට් තේරීම් කමිටුවේ සාමාජිකයන් වන අප ගරු අමාත්‍යවරයාට, වර්ෂ 1974 සැප්තැම්බර් මස 20 වැනි දින, අංක 130 දරන ගැසට් නිවේදනය මගින් හා 1986 ජනවාරි මස 20 වැනි දින නිකුත් කරන ලද අංක 385/7A ගැසට් නිවේදනය මත පැවරී ඇති බලතල මත පත්කොට ඇති නිල සාමාජිකත්වයක් දරන කමිටුවකි.

එවන් සාමාජිකත්වයක නිල ක්‍රියා පිළිවෙත පිලිබඳව අප්‍රසාදයක් හෝ විවේචනයක් වේ නම් එය යොමුකළ යුතු නෛතික හා වෘත්තීයමය ක්‍රමවේදයන් පවතින බව ගරු අමාත්‍යවරයා නොදැන සිටීම අප පුදුමයට පත් කරවන්නකි. එකී සියළු ශීලාචාර ක්‍රමවේදයන් පවතිද්දී මාධ්‍ය හමුවේ අපට එරෙහිව ඒකපාර්ශ්වික චෝදනාවක් එල්ල කොට ඒ මත අපට එරෙහිව මහජන මතයක් ගොඩනැගීමට කටයුතු කිරීම අප තුළ ඉමහත් කනස්සල්ක් ඇති කොට තිබේ.

අප විශ්වාස කරන්නේ මෙම චෝදනාවන් හුදු තවත් ජනප්‍රිය දේශපාලනික හැසිරීමක් මිස කිසිසේත්ම වෘත්තීය භාවයකින් යුතුව ශ්‍රී ලංකාවේ ක්‍රිකට් ක්‍රීඩාව දියුණු කිරීමේ පරම පවිත්‍ර චේතනාවෙන් යුතුව අපවෙත යොමු කරන ලද චෝදනාවක් නොවන බවයි.

පළමුව කිව යුත්තේ ඔබගේ අණින් නිකුත්වු මාධ්‍ය නිවේදනය තුල ක්‍රිකට් තේරීම් කමිටුවට අදාළව සඳහන් කොට ඇති කරුණු අසත්‍ය හා අර්ධ සත්‍යයන් මත ගොඩනැගු අවිද්‍යාත්මක තර්කනයන් සහිත අභූත චෝදනාවන්ගෙන් සමන්විත වන බවයි.

අදාළ නිවේදන‍යෙන් පැවසන්නේ ක්‍රිකට් පරාජයන්හි වගකීම වසර 4 පුරා තේරිම් කටයුතු සිදුකළ තේරීම් කමිටුව භාරගත යුතු බවයි. නමුත් ඔබතුමන්ගේ අමාත්‍යංශය සතු නිල වාර්තා නිසි ලෙස පරිශීලනය කළහොත් වැටහෙනු ඇත්තේ වර්තමාන කමිටුව පත් කොට ගතවී ඇත්තේ වසර දෙකහමාරක් පමණක් බවය.
එසේම එම මාධ්‍ය නිවේදනයේ අවධාරණය නොවන අතිශය වැදගත් කරුණ වන්නේ වර්තමාන තේරීම් කමිටුව පත් කිරීමට පෙරාතුව අපගේ ජාතික ක්‍රිකට් කණ්ඩායම මුහුණදෙමින් සිටි ඛේදනීය තත්වය පිලිබඳව ක්‍රීඩා ඇමති වරයාට ඇති නොවැටහීමයි.

ඒ අතීතය ඔබට සිහිපත්කරදීම මේ මොහොතේ අපගේ යුතුකමක් ලෙස සිතමු. ඒ අනුව 2017 අගෝස්තු මස 20 වැනිදා දඹුල්ල ජාත්‍යන්තර ක්‍රිකට් ක්‍රීඩාංගණයේ පැවැති ඉන්දියාව සහ ශ්‍රී ලංකාව අතර තරගයේදී ශ්‍රී ලංකාව කඩුලු 9කින් පරාජය වූ විට ක්‍රිකට් ප්‍රේක්ෂකයන් කණ්ඩායමට ක්‍රීඩාංගණයෙන් පිටතට යෑමටද නොදී හූ කිව්වා ඔබට මතකද? එය එක් පරාජයක් නිසා සිදුවූවක් නොව පරාජයන් රැල්ලක ජනතා වේදනාව පුපුරායැමක් විය. ඉන්දියාව සමග පැවැති එම තරගාවලියට පෙර ශ්‍රී ලංකා කණ්ඩායම අප රටේදීම අප සිම්බාබ්වේ සමග එක්දින තරගාවලිය පැරදුණා ඔබට මතකද? තරග අංශ තුනෙන්ම ශ්‍රී ලංකා කණ්ඩාය‍ම් දිගින් දිගටම දැක්වූ දුර්වල ක්‍රීඩා විලාසය හමුවේ මීළඟ පන්දුවාර 20 ලෝක කුසලානයට සෘජු සුදුසුකම් අහිමිවූ බව ඔබට මතකද? තරුණ ක්‍රීඩකයන්ට අවස්ථාව දෙමින් දෙවැනි පෙළක් නිර්මානය කර නොතිබූ යුගය ඔබට අමතකද? ක්‍රීඩකයන් පමණක් නොව තේරීම් කමිටුවටද තරග පාවාදීමේ චෝදනා එල්ලවෙමින් ශ්‍රී ලංකාව ලොව දූෂිතම ක්‍රිකට් රාජ්‍යය ලෙසින් ජාත්‍යන්තර ක්‍රිකට් කවුන්සිලයේ දූෂණ විරෝධී විමර්ශන කමිටුව විසින් ප්‍රකාශ කරනු ලැබූ බව ඔබට අමතකද? එදා ඒ චෝදනා එල්ලවූ සමහරෙක් මේ අවස්ථාවේදී ක්‍රිකට් සම්බන්ධයෙන් ඔබේ අනුශාසකයන් ලෙසින් කටයුතු කරන බව ඔබ පිළිගන්නවාද?

 ඔබතුමන් විසින් අමතක කොට ඇති යථාර්ථය වන්නේ එවැනි ව්‍යාකූල තැනකට වැටී තිබූ අපගේ ක්‍රිකට් ක්‍රීඩාව, පසුගිය වසර දෙක හමාරක කාල වකවානුව තුළ වර්ථමාන තේරීම් කමිටුවද මැදිහත්වනු ලැබු සාමුහික ක්‍රියාත්මකවීමක් මගින්, එකී කණගාටුදායක තත්වය පරාජය කරමින් අත්කර දුන් ප්‍රගතිය කෙසේ වීද යන්නයි.

ක්‍රීඩා ලෝලීන් ක්‍රිකට් ක්‍රීඩාව නැරඹා වියෝවන යුගයක සිට අප නැවතත් ක්‍රිකට් ක්‍රීඩාව පිලිබඳව බලාපොරොත්තුවක් ඇති කරවන තැනට කටයුතු කළේය.

අපගේ මැදිහත්වීම සිදුවන්නේ නිසි කුසලතාවයක් සහිත ක්‍රීඩකයන් තෝරා ගැනීම තුල පමණක් බව මෙහිලා සඳහන් කල යුතුව තිබේ. අප විසින් ජාතික ක්‍රිකට් කණ්ඩායමට තෝරා දෙනු ලැබු ක්‍රීඩකයන් පහත දැක්වෙන ජයග්‍රහණ පසුගිය වසර දෙකහමාරක කාලය අතරතුර රටට අත්කොට දී තිබේ. එම ජයග්‍රහණ පිලිබඳව අපට ඇත්තේ නිහතමානී ආඩම්බරයකි. එකී ජයග්‍රහණ වන්නේ:
ඔස්ට්‍රේලියාවට එරෙහි පන්දුවාර ක්‍රීඩාවලිය 3-2 ලෙස ලැබු ථෛතිහාසික ජයග්‍රහණය (මෙය දෙරට අතර මෙරට පැවැති එක්දින තරගාවලියකදී වසර 30කට පසුව ලැබූ පළමු තරගාවලි ජයග්‍රහණ විය)
වසර 08 කට පසුව, ආසියානු කුසලාන ජයග්‍රහණයක් අප රටට හිමිකර දීම,
වසර 09 කට පසුව ආසියානු කුසලාන එක්දින තරඟාවලියේ අනුශූරතාවය අප රටට හිමිකර දීම,
ලෝක ටෙස්ට් ශූරතා තරගාවලියේ පස්වන තැනට ශ්‍රීලංකාව පත්වීම,
ඉන්දියාව සමග T-20 තරගාවලියක් වසර 7 කට පසුව ජයග්‍රහණය කිරීම,
නවසීලන්තය සමග T-20 තරගයක් වසර 7 කට පසුව ජයග්‍රහණය කිරීම
ලෝක කුසලානයට සුදුසුකම් ලැබීමේ තරඟාවලියේ ශූරතාවය දිනා ගැනීම.
2016න් පසු පළමු වරට T-20 ලෝක කුසලානක් සඳහා සෘජු සුදුසකම් සනාථ කිරීම
තවත් වසර ‍දහයක් ක්‍රීඩා කිරීමට හැකියාව සහිත අනාගතයේදී ලෝක කුසලාන ජයග්‍රහණයක් ලබාගත හැකි කණ්ඩායමක් ගොඩනැගීම

මේ අනුව පෙනී යායුත්තේ ගරු ඇමතිවරයාගේ අනින් නිකුත්වු මාධ්‍ය නිවේදනය මඟින් දක්වා ඇති අයුරින් ශ්‍රී ලංකා ක්‍රිකට් තේරීම් කමිටුව විසින් තෝරා දෙනු ලැබූ ජාතික ක්‍රිකට් කණ්ඩායම දිගින් දිගටම පරාජයන් ගෙන එනු ලැබු කණ්ඩායමක් නොවු බවය. මෑත යුගයේ ඉහළම ප්‍රතිඵල පෙන්වා ඇති කණ්ඩායම බවය.

ඉතා අසීරු අවධියක සිට ක්‍රමිකව තරගකාරී ක්‍රිකට් ක්‍රීඩාවකට යොමුවෙමින් සිටින තරුන ජවයකින් හෙබි කණ්ඩායමක් දැන් බිහිවී ඇති බව මෙහිලා අවධාරණය කළ යුත්තේය.

ගරු ක්‍රීඩා අමාත්‍යවරයාට ක්‍රිකට් තේරීම් කමිටුවක කාර්යභාරය හා එහි වපසරිය පිළිබඳව නිසි අවබෝදයක් නොමැතිවීම පිළිබඳව අපට ඇත්තේ කණගාටුවකි. ආර්ථිකයක් බංකොලොත්කල රටක ක්‍රීඩාව පිලිබඳව ගැඹුරක් නොදැකීම පුදුමයක් නොවේ.

වරෙක තේරීම් කමිටුවක කාර්යභාරය පිළිබඳව ඉන්දීය හිටපු ක්‍රිකට් නායක හා වර්තමාන ඉන්දීය ප්‍රධාන පුහුණුකරු ලෙස කටයුතු කරන රාහුල් ඩ්‍රාවිඩ් මෙසේ පවසා තිබේ; “
“You don’t win or loose the games because 11 you select. You win or loose with what those 11 do on the field”.

ශ්‍රී ලාංකික සමාජය හොඳින් දන්නා පරිදි ක්‍රිකට් තේරීම් කමිටුව ලෙස පසුගිය වසර දෙකහමාරක කාලයේදී පිටිය තුළ දස්කම් පෑහැකි හොඳම ක්‍රීඩකයන්, පවතින තත්වයන් යටතේ තෝරා දී තිබේ. ඒ සඳහා අපගේ පලමු නිර්නායකය වුයේ යෞවන ක්‍රීඩකයන් පෙරට ගැනීමයි. අනාගතයට ආයෝජනයක් විය හැකි තරුණ විශිෂ්ඨයන් විශාල පිරිසක් අප විසින් මේවන විටත් රටට හඳුන්වාදී තිබේ. එම තරුණ ක්‍රීඩකයන් පෙරට ගන්නා අතරතුරෙහිදීම ඔවුන් හා ජ්‍යේෂ්ඨයන් අතර සමබරතාවය රැක ගැනීමටද අප කටයුතු කොට තිබේ.

එසේම අප හඳුන්වාදුන් දෙවන නිර්නායකය වුයේ ක්‍රීඩකයන් අවශ්‍යයෙන්ම පවත්වාගෙන යායුතුව තිබෙන ශාරිරික යෝග්‍යතාවයයි. නමුත් විවිධ අංශයන්ගෙන් ගොඩනැගුනු විවිධාකාර පීඩන හමුවේ එකී නිර්නායකය අවධාරනය කිරීමේ හැකියාව අවම මට්ටමක පවත්වා ගෙන යන්නට අපට සිදුවු බව නොරහසකි. අද එය ක්‍රීඩකයන්ගේ ගිවිසුමේ කොටසකට පමනක් සීමාවී තිබේ.

ඒ කෙසේ වෙතත් ක්‍රීඩකයන් ශාරිරික ආභාදයන්ට ලක්වීමෙන් මුදා ගැනීම අපවෙත පැවරෙන වගකීමක් නොවේ. එවැනි අවස්තාවක අපගේ වගකීම වන්නේ ආබභාදයට ලක්වු ක්‍රීඩකයාට පවතින විකල්පය කන්ඩායමට හඳුන්වාදීම බව කිව යුතුව තිබේ.

තේරීම් කමිටුව සතු කාර්යභාරයක් නොවුනද ක්‍රීඩකයන්ගේ නිසි මානසික යහපැවත්ම පිලිබඳව අවධානය යොමු කිරීමටද අප කටයුතු කොට තිබේ.

අවසාන වශයෙන් ගත් කල පිටියට එලඹෙන ක්‍රීඩකයන් 11 දෙනා පිලිබඳ තේරීම ප්‍රධාන පුහුණුකරු සහ කණ්ඩායම් නායකයාගේ තීරණයන්ට යටත්ව ගනු ලබන සාමුහික තීරණයක් වන්නේය. එහිදී සමබර කණ්ඩායමක් නිර්නය කිරීම එකී සාමුහික තීරණයේ ප්‍රථිභලයක් වන්නේය.

ඒ අනුව බලන කල ඉන්දියාව හමුවේ අඩු ලකුණු සංඛ්‍යාවකට දැවී ගිය ශ්‍රී ලංකා කණ්ඩායම, පැවතුන තත්වයන් යටතේ තෝරාගත හැකිව තිබු හොඳම සමබර කණ්ඩායම වන බවද මෙහි ලා සිහිපත් කරනු වටී.

පරාජය පිලිබඳව විවේචනයක් එල්ල කරනු විනා එදිනට ක්‍රීඩා කළ යුතුව තිබුණු, නමුත් අප විසින් තෝරා ගැනීම මඟ හරිනු ලැබු විකල්ප ක්‍රීඩකයන් වුයේ කව්ද ඒ කුමන හේතුවෙන්ද යන්න පිලිබඳව සඳහනක් හෝ ඔබ නිවේදනයේ දක්නට නොලැබීම එම නිවේදනය තුල පවතින හිස් බව තහවුරු කරයි.

ඔබගේ නිවේදනයේ සදහන් කර ඇති දිනේෂ් චන්දිමාල් සහ ඇන්ජලෝ මැතිව්ස් යන ක්‍රීඩකයන් දෙදෙනා අපගේ තේරීම් කමිටුව විසින් ජ්‍යේෂ්ඨත්වයේ අවශ්‍යතාව සලකා යොදාගත් අවස්ථා මෙන්ම එම ලබාදුන් අවස්ථාවන් වෙනුවෙන් සාධාරණයක් ඉටුකිරීමට එම ක්‍රීඩකයන්ට හැකිවූයේද යන්න ඔබ විසින් විමසා බැලුවේ නම් මැනවි. නමුත් ඔබ විසින් මෙලෙස ක්‍රීඩකයන්ව නම් වශයෙන් දක්වා සිටීම තේරීම් කමිටුවේ ස්වාධීනත්වය සම්බන්ධයෙන් ක්‍රීඩා ඇමතිවරයා විසින් සිදුකළ සෘජු බලපෑමක් ලෙසින් අපි දකිමු.

තේරීම් කමිටුවේ කාර්යභාරය ඉටු කරන්නේ ශ්‍රී ලංකා ක්‍රිකට් ආයතනය විසින් ඒ දක්වා ගොඩනඟා ඇති විශිෂ්ඨයන් අතරින් අති විශිෂ්ඨයන් කණ්ඩායමක් පිටියට හඳුන්වාදීම පමණක් බව මෙහිලා සඳහන් කළයුතුව තිබේ.

එම ක්‍රීඩකයන්ටද පිටියට ගොස් ක්‍රීඩා කිරීමට වරම් ලැබෙනුයේ ක්‍රීඩා පනතට අනුව ඇමතිවරයා සතු බලතල අනුව එම ක්‍රීඩක ලැයිස්තුව අනුමත කරන්නේ නම් පමනකි. නමුත් පසු ගිය වසර දෙකහමාරක කාලයක් තුළ අමාත්‍යවරයකු එවැනි අප තෝරාදුන් එවැනි ක්‍රීඩක ලැයිස්තුවක් ප්‍රතික්ශේප කරනු ලැබුයේ නැත. එවැනි පසුබිමක ශ්‍රී ලංකාවේ ක්‍රිකට් පරාජයන් සඳහා තේරීම් කමිටුව වගකිව යුතු යයි පැවසීම හාස්‍යයක් වනවා සේම එම තේරීම වැරදි නම් එවැනි ‍වැරදී තේරීමක් අනුමත කළ ක්‍රීඩා අමාත්‍යවරයාද එහි වගකිවයුත්තෙක් වන්නේය.

අප වගකීමෙන් ප්‍රකාශ කරනුයේ ක්‍රිකට් තේරීම් කමිටුව ලෙස අපගේ වගකීම නිසි අවධානයෙන් යුතුවද නිසි වෘත්තික භාවයෙන් යුතුවද රට කෙරෙහි වූ උපරිම භක්තියෙන් යුතුවද මෙතෙක් ඉටු කර ඇති බවයි.

නමුත් අමාත්‍යවරයාගේ අවසාන අනුමැතියට යටත්ව පත් කරනු ලබන ක්‍රිකට් තේරීම් කමිටුවට මේතාක් සිය කාර්යභාරය මෙන්ම සිය වගකීම් හා යුතුකම් පිලිබඳව නිල ලියවිල්ලක් හෝ ලබා දීමට අමාත්‍යංශ්‍ය හෝ ජාතික ක්‍රීඩා උපදේශක සභාව ක්‍රියාකර නොමැති බව මෙහිලා සඳහන් කරනු වටී.

එවන් පසුබිමක සිට අමාත්‍යවරයාගේ අනින් සිය මාධ්‍ය ඒකකය විසින් නිකුත් කළ හුදු නිවේදනයක් මගින් ක්‍රිකට් තේරීම් කමිටුවේ නිල කාර්යයන් කිසිදු පදනමකින් තොරව විවේචනය කිරීම හුදු වචී මාත්‍රික දේශපාලනික ප්‍රකාශයක් පමණක් බව කිව යුතුව තිබේ.

ඉන්දියාව හමුවේ අවස්ථා දෙකකදී අපගේ ක්‍රිකට් කණ්ඩායම ලැබූ අවසනාවන්ත පරාජය හමුවේ ක්‍රිකට් තේරීම් කමිටුවද කම්පනයට හා කනස්සල්ලට පත්ව ඇති බව මෙහිලා කිව යුතුව තිබේ.

නමුත් එයට පිලියම වනුයේ එම පසුබෑම් හමුවේ දේශපාලනික හෝ පෞද්ගලික වාසි සඳහා එම පසුබෑම් දඩමීමා කර ගැනීමට තැත් කිරීම නොව, පසුබෑමට හේතු විද්‍යාත්මකව සොයා විකල්ප හඳුනාගැනීම බව අප ගෞරවයෙන් යුතුව සඳහන් කර සිටිමු.

උක්ත කරුණු ඔස්සේ ඔබතුමන්ගේ මාධ්‍ය නිවේදනය මගින් අපවෙත එල්ල කරන ලද චෝදනා හමුවේ අප සතු නිර්දෝශිබව මෙහිලා අවධාරණය කරන්නෙමු.

මෙයට විශ්වාසී,

ක්‍රිකට් තේරීම කමිටුව

ප්‍රමෝදය වික්‍රමසිංහ - සභාපති
රොමේෂ් කළුවිතාරණ - සාමාජික
හේමන්ත වික්‍රමරත්න - සාමාජික

 පිටපත් - අතිගරු ජනාධිපතිතුමා
මුද්‍රිත මාධ්‍ය

ප්‍රබල අකුණු පිළිබඳව අවවාදාත්මක නිවේදනයක් කාලගුණවිද්‍යා දෙපාර්තමේන්තුව විසින් නිකුත් කර තිබේ.

ඒ අනුව බස්නාහිර, මධ්‍යම, සබරගමුව, උතුරු මැද, වයඹ, ඌව සහ දකුණු පළාත්වලත් මුලතිව් සහ මන්නාරම් දිස්ත්‍රික්කවලත් සවස් කාලයේ දී හෝ රාත්‍රී කාලයේ දී තැනින් තැන ගිගුරුම් සහිත වැසි සමග ප්‍රබල අකුණු ඇති වීමේ වැඩි හැකියාවක් පවතින බව සඳහන් වේ.

ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ඇති විය හැකිය.

අකුණු මඟින් සිදුවන අනතුරු අවම කරගැනීමට අවශ්‍ය පියවර ගන්නා ලෙස ද කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටියි.

පොලිස්පතිවරයා ලෙස පත්කිරීමට සී.ඩී. වික්‍රමරත්නගේ නම හැර වෙනත් නමක් තමන් ආණ්ඩුක්‍රම ව්‍යවස්ථා සභාවට නිර්දේශ කර නැතැයි ජනාධිපති රනිල් වික්‍රමසිංහ ව්‍යවස්ථාදායක සභාවේ ප්‍රධානී කතානායක මහින්ද යාපා අබේවර්ධනට මේ සතියේ ලිඛිතව දැනුම් දී තිබේ.

ජනාධිපතිවරයා මෙම ලිඛිත දැනුම්දීම සිදුකර ඇත්තේ ආරක්ෂක අමාත්‍යංශ ලේකම්වරයා වෙත ලිපියක් යොමුකරමින් පොලිස්පති ධූරයට පත්කිරීම සඳහා සුදුසුකම් ඇති ජ්‍යෙෂ්ඨ නියෝජ්‍ය පොලිස්පතිවරුන් සිව්දෙනකුගේ නම් ලැයිස්තුවක් ඉල්ලා සිටීමෙන් පසුවය.

ජනාධිපතිවරයා කතානායකවරයා වෙත යොමුකර ඇති ලිපිය මගින් ව්‍යවස්ථා සභාව විසින් කළ යුතු පත්කිරීම්වලට අදාළ ආණ්ඩුක්‍රම ව්‍යවස්ථාවේ 41 වැනි වගන්තිය හා ඊට අදාළ උප වගන්තිද උපුටා දක්වා ඇත. එම ව්‍යවස්ථානුකූල තත්ත්වය අනුව ව්‍යවස්ථා සභාවට ජනාධිපතිවරයා විසින් නමක් නිර්දේශ කර නොතිබූ අවස්ථාවක අමාත්‍යංශ ලේකම්වරයාගෙන් ලිඛිතව ජ්‍යෙෂ්ඨතා ලැයිස්තුවක් ව්‍යවස්ථා සභාව විසින් ඉල්ලා සිටින්නේ කවර නීතිමය පදනමක් යටතේදැයි ජනාධිපතිවරයා සිය ලිපිය මගින් ප්‍රශ්න කර ඇත.

එසේම ශ්‍රී ලංකාවේ ජාතික ආරක්ෂාව පිළිබඳ වගකීම ජනාධිපතිවරයාට පැවරෙන බව නඩු තීන්දු ගණනාවක් මගින්ද තහවුරු කර ඇතැයි ජනාධිපතිවරයා යැවූ ලිපියේ සඳහන් වෙයි. අනතුරුව මේ ගැන කතානායක මහින්ද යාපා අබේවර්ධන මහතා ද ජනාධිපති ලේකම් කාර්යාලය විසින් දැනුම්වත් කර තිබේ. ඒ සමඟ කතානායකවරයා ජනාධිපති කාර්යාලයට දන්වා ඇත්තේ සී.ඩී. වික්‍රමරත්න මහතාගේ නම ව්‍යවස්ථා සභාව විසින් දෙවරක්ම පොලිස්පති ලෙස ජනාධිපතිවරයාට නිර්දේශ කර ඇති බැවින් ඊට අදාළව ඉදිරි පියවර ගැනීමට ජනාධිපතිවරයා අපේක්ෂා කරන්නේ නම් ඊට බාධාවක් නොමැති බවය.

• deshaya

දූෂණ වංචා සහ අක්‍රමිකතා පිළිබඳව විමසීම සඳහා ආයතන පහක ප්‍රධානීහු පොදු ව්‍යාපාර පිළිබඳ පාර්ලිමේන්තු කාරක සභාව(කෝපා) සහ රාජ්‍ය ගිණුම් පිළිබඳ පාර්ලිමේන්තු කාරක සභාව (කෝපා) හමුවට හෙටින් (06) ඇරඹෙන සතියේ කැඳවීමට නියමිත බව වාර්තා වෙයි .

ඛනිජ තෙල් නීතිගත සංස්ථාව, ශ්‍රී ලංකා ප්‍රමිති ආයතනය සහ සබරගමු විශ්වවිද්‍යාලය කෝප් කමිටුව හමුවට කැඳවෙන ආයතනයන් වෙයි.

ඒ අනුව ඛනිජ තෙල් නීතිගත සංස්ථාව කෝප් කමිටුව හමුවට හෙට (06) කැඳවා ඇත.

ශ්‍රී ලංකා පමිති ආයතනය කෝප් කමිටුව හමුවට අනිද්දා (7) කැඳවා ඇති අතර සබරගමුව විශ්වවිද්‍යාලයේ ප්‍රධානීන් කෝප් කමිටුව හමුවට කැඳවා ඇත්තේ ලබන( 8) වනදාය .

මේ අතර අධ්‍යාපන අමාත්‍යාංශය සහ ජාතික ප්‍රජා ජල දෙපාර්තමේන්තුව රාජ්‍ය ගිණුම් පිළිබඳ පාර්ලිමේන්තු කාරක සභාවට (කෝපා ) අනිද්දා (8) කැඳවීමට නියමිතය.

පාර්ලිමේන්තුව හෙට (6) සිට 10 වැනිදා දක්වා රැස්වීමට නියමිතය.

ශ්‍රී ලංකාවට අලුතින් පත්ව පැමිණි තානාපතිවරු දස දෙනෙක් අද (05) පෙරවරුවේ මහනුවර ජනාධිපති මන්දිරයේ දී ජනාධිපති රනිල් වික්‍රමසිංහ වෙත සිය අක්ත පත්‍ර භාර දුන්හ.

ලැට්වියා රජරජය, පිලිපීනය, කාම්බෝජියාව, පෘතුගාලය, සුරිනාම් ජනරජය, ජිබුටි ජනරජය, ඇංගෝලා ජනරජය, පින්ලන්තය, බොලිවාරියානු වෙනිසුවේලා ජනරජය සහ නෝර්වේ ජනරජය සඳහා මෙලෙස නව තානාපතිවරු පත්ව සිටිති.

අද අක්ත පත්‍ර භාරදුන් නව තානාපතිවරුන්ගේ නම් පහත පරිදි වේ.

කොළඹ, විහාරමහා දේවි උද්‍යානයේ භාරකාරිත්වය කොළඹ මහ නගර සභාවට පැවරීමට අනුමැතිය හිමිවී තිබේ.

නාගරික සංවර්ධන අධිකාරියේ අධ්‍යක්ෂ ජෙනරාල් එම්.පී.කේ රණවීර සඳහන් කලේ සිය අධිකාරිය සතුව පැවති භාරකාරිත්වය කොළඹ මහ නගර සභාවට පැවරීමට අනුමැතිය ලැබුණු බවයි.

කොළඹ මහ නගර සභාව යටතේ පැවති විහාරමහාදේවී උද්‍යානය 2011 වසරේ දී නවීකරණ කටයුතු සඳහා නාගරික සංවර්ධන අධිකාරිය යටතට පවරා ගනු ලැබීය.

ඒ අනුව, නාගරික සංවර්ධන අධිකාරිය ලෝක බැංකු ආධාර මත ක්‍රියාත්මක කළ කොළඹ අගනගර ආශ්‍රිත නගර සංවර්ධන ව්‍යාපෘතිය යටතේ විහාරමහාදේවී උද්‍යානය නවීකරණය කර 2013 වසරේ දී විවෘත කර තිබුණි.

අක්කර 50කට ආසන්න භූමි ප්‍රදේශයක් හිමි විහාරමහාදේවී උද්‍යානය කොළඹ ධර්මපාල මාවත, ශ්‍රීමත් මාකස් ප්‍රනාන්දු මාවත, ඇල්බට් චන්ද්‍රවංකය, ආචාර්ය සී.ඩබ්ලිව්.ඩබ්ලිව් කන්නංගර මාවත යන මාර්ගවලට මායිම්ව පිහිටා තිබේ.

විහාරමහාදේවී උද්‍යානය නවීකරණය කර මේ වනවිට වසර 10කට අධික කාලයක් ගත වන බැවින් පවතින සුළු ප්‍රතිසංස්කරණ කටයුතු කඩිනමින් අවසන් කර එම උද්‍යානය කොළඹ නගර සභාවට පැවරීමට කටයුතු කරන ලෙස ප්‍රසන්න රණතුංග අමාත්‍යවරයා නාගරික සංවර්ධන අධිකාරියට උපදෙස් ලබාදී ඇති බවද වාර්තා වේ.

2024 සඳහා වන අයවැයෙන් රජයේ සේවකයන්ට රුපියල් 10,000/- ක පමණ වැටුප් වර්ධකයක් හිමිවනු ඇතැයි රජයේ ආරංචි මාර්ග සඳහන් කරයි.

ලබන ජනවාරි මස සිට ලක්ෂ 15ක් පමණ වන රාජ්‍ය සේවකයන්ට මෙම වැටුප් වර්ධකය හිමිවනු ඇතැයි ඉහත ආරංචි මාර්ග වැඩිදුරටත් පවසයි.

එළඹෙන අයවැය යෝජනාවලිය මගින් සියළුම රජයේ සේවකයින්ගේ වැටුප් වැඩි කිරීමට පියවර ගන්නා බව ජනාධිපති රනිල් වික්‍රමසිංහ පසුගිය 30 දා අමාත්‍ය මණ්ඩලය අමතා ප්‍රකාශ කර තිබේ.

රජයේ සේවකයින්ගේ වැටුප් වැඩි වීමට සමගාමීව පෞද්ගලික අංශයේ පඩියද වැඩි කරන ලෙස ඉල්ලීමක් කරන බවද ජනාධිපති රනිල් වික්‍රමසිංහ එහිදී වැඩිදුරටත් සඳහන් කර ඇත.

ආණ්ඩුව රජයේ සේවකයින්ගේ වැටුප් වැඩි කරන බව දැනගෙන ජනතා විමුක්ති පෙරමුණ ඇතුළු ඇතැම් කණ්ඩායම් එය ඔවුන්ගේ බලපෑම අනුව සිදු වූ බවට පැවසීමට උත්සාහ දැරීම කිසිදු පදනමක් නැති කතාවක් යැයිද ජනාධිපති රනිල් වික්‍රමසිංහ කැබිනට් මණ්ඩල රැස්වීමේදී පවසා තිබේ.

දිනෙන් දිනම බඩු මිල වැඩි වෙනවා මිස අඩු වීමක් සිදු නොවන තත්ත්වය යටතේ වැඩ කරන ජනතාවගේ වැටුප් ඉහළ දැමීම වත්මන් රජයේ ප්‍රතිපත්තිය බවද ජනාධිපතිවරයා තවදුරටත් සඳහන් කර ඇත.

ජනාධිපති රනිල් වික්‍රමසිංහ ගේ තුන්වැනි අයවැය යෝජනාවලිය නොවැම්බර් 13 වැනිදා පාර්ලිමේන්තුවට ඉදිරිපත් කිරීමට නියමිතය.

ගාසා තීරයේ රැඳී සිට ඊජිප්තුව බලා ගිය ශ්‍රී ලාංකිකයන් 11 දෙනා දිවයිනට පැමිණ තිබේ.

කටාර්හි දෝහා සිට ගුවන් යානයකින් ඔවුන් අද (05) අලුයම දිවයිනට පැමිණි බව අප වාර්තාකරු පැවසීය.

ගාසා තීරයේ රැඳී සිටි ශ්‍රී ලාංකිකයන් 11 දෙනෙකු පසුගිය 03 වැනිදා ඊජිප්තුවට පැමිණි බව පලස්තීනයේ ශ්‍රී ලංකා නියෝජිත කාර්යාලය සඳහන් කළේය.

රෆා පිවිසුම හරහා ඊජිප්තුවට පැමිණි ඔවුන් ඊජිප්තුවට හෝටලයක රැඳී සිටි බව එහි ප්‍රධානී බෙනට් කුරේ  සඳහන් කළේය.

ගාසා තීරය තුළ ශ්‍රී ලාංකිකයන් 17 දෙනෙකු රැඳී සිට ඇති අතර, ප්‍රදේශයේ පවතින අනාරක්ෂිතභාවය හේතුවෙන් ඔවුන් ගෙන් සිව් දෙනෙකුට රැඳී සිටින ස්ථානයෙන් ඉවත් වීමට නොහැකි වී තිබිණි.

වැඩි මිලට සීනි අලෙවි කරන වෙළෙඳුන් සොයා අද සිට දිවයින පුරා වැටලීම් ක්‍රියාත්මක බව බව පාරිභෝගික කටයුතු අධිකාරිය පවසයි.

එවැනි වෙළෙඳුන්ට එරෙහිව නීතිමය පියවර ගන්නා බව එම අධිකාරිය පැවසීය.

මේ අතර, සීනි සඳහා උපරිම සිල්ලර මිලක් නියම කරමින් පාරිභෝගික කටයුතු පිළිබඳ අධිකාරිය ඊයේ අති විශේෂ ගැසට් නිවේදනයක් නිකුත් කළේ ය.

එම නිවේදනයට අනුව පැකට් නොකළ සුදු සීනි කිලෝග්‍රැමයක උපරිම සිල්ලර මිල රුපියල් 275 කි.

පැකට් නොකළ දුඹුරු සිනි කිලෝග්‍රැමයක් රුපියල් 330 කට අළෙවි කළ යුතුයි.

පැකට් කල සුදු සිනි කිලෝග්‍රැමයක් උපරිම සිල්ලර මිල රුපියල් 295 කි.

පැකට් කල දුඹුරු සීනි කිලෝග්‍රැමයක උපරිම සිල්ලර මිල රුපියල් 350 ක් බව වෙයි.

මේ අතර ,ආනයනික සීනි කිලෝග්‍රෑම් එකක් මත පැවති සත 25 ක බද්ද මේ මස පළමුවැනිදා සිට රුපියල් 50 දක්වා ඉහළ දැමීමට මුදල් අමාත්‍යංශය පියවර ගනු ලැබුවේ ය.

රටේ සංවර්ධන කටයුතුවලට අදාළව ලබාදෙන උපදෙස් නිසි ලෙස ක්‍රියාත්මක නොකරන රාජ්‍ය ආයතන ප්‍රධානීන් සම්බන්ධයෙන් ඉදිරියේදී ක්‍රියාමාර්ග ගන්නා බව ජනාධිපති රනිල් වික්‍රමසිංහ ප්‍රකාශ කළේය.

දිස්ත්‍රික් සංවර්ධන කමිටු රැස්වීම්වලදී එම දිස්ත්‍රික්කවල සංවර්ධනයට අදාළව ගන්නා තීන්දු තීරණ ක්‍රියාත්මක කිරීමට රාජ්‍ය නිලධාරීන් කඩිනමින් කටයුතු කළ යුතු බව පැවසූ ජනාධිපතිවරයා රට ආපස්සට ගෙනයාමේ වැඩපිළිවෙළකට කිසිසේත් ඉඩ නොදෙන බවද අවධාරණය කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ නුවරඑළිය දිස්ත්‍රික් ලේකම් කාර්යාලයේ අද (04) පැවති විශේෂ දිස්ත්‍රික් සම්බන්ධීකරණ කමිටු රැස්වීමට එක්වෙමිනි.

දිස්ත්‍රික්කයේ දේශපාලන අධිකාරිය සහ රාජ්‍ය නිලධාරීන් යන දෙපාර්ශ්වයම මෙම අවස්ථාවට කැඳවා තිබූ අතර නුවරඑළිය දිස්ත්‍රික්කයේ සංවර්ධනය සඳහා මෙතෙක් ක්‍රියාත්මක කර ඇති වැඩපිළිවෙළ සහ ඉදිරි සංවර්ධන සැලසුම් පිළිබඳව මෙහිදී දීර්ඝ ලෙස සාකච්ඡා කෙරිණි.

එසේම 2022 දෙසැම්බර් 22 සහ 2023 අප්‍රේල් 10 වන දින ජනාධිපතිවරයාගේ ප්‍රධානත්වයෙන් පැවති සාකච්ඡාවන්හිදී ගනු ලැබු තීරණ ක්‍රියාත්මක වීමේ ප්‍රගතිය විමසා බැලීමද සිදු විය.

දිස්ත්‍රික්කයේ රෝහල්වල ඖෂධ හිඟය පියවීම, පාසල් ගුරු හිඟය පියවීම, මාර්ග පිළිසකර කිරීම පානීය ජල ගැටළුව විසඳීම ඇතුළු යටිතල පහසුකම් සංවර්ධනය සඳහා ගනු ලැබූ කඩිනම් පියවර සහ එහි ප්‍රගතිය පිළිබඳ නිලධාරීහු මෙහිදී කරුණු ඉදිරිපත් කළහ.

එමෙන්ම එම වැඩසටහන් ක්‍රියාත්මක කිරීමේ දී මතුව ඇති ගැටළු සෘජුව ජනාධිපතිවරයා වෙත ඉදිරිපත්කර නිරාකරණය කර ගැනීම ද සිදු කෙරිණි.

නුවරඑළිය දිස්ත්‍රික්කය දෙස් විදෙස් සංචාරකයන්ගේ ආකර්ශණීය මෙන්ම සුව පහසු සංචාරක ගමනාන්තයක් බවට පත්කිරීම සඳහා ගෙන තිබෙන තීන්දු කඩිනමින් ක්‍රියාත්මක කිරීම මඟින් රටේ ආර්ථිකයට විශාල දායකත්වයක් ලබාගත හැකි බවද ජනාධිපතිවරයා මෙහිදී පෙන්වා දුන්නේය.

එසේම සංචාරක ක්ෂේත්‍රය සඳහා ආයෝජකයන් ආකර්ශණය කර ගැනීමට නම් රාජ්‍ය නිලධාරීන් ලබාදී ඇති උපදෙස් අනුව කඩිනමින් තම වගකීම් ඉටුකිරීමේ අවශ්‍යතාවය ද ජනාධිපතිවරයා අවධාරණය කළේය.

රාජ්‍ය ආයතන ප්‍රධානීන් තම ආයතන විෂය පථය පිළිබඳ මනා දැනුමක් පවත්වාගත යුතු බවත් එසේ නොමැති රාජ්‍ය ආයතනවලින් ජනතාවට සේවාවක් නොලැබෙන බවත් ජනාධිපති රනිල් වික්‍රමසිංහ පෙන්වා දුන්නේය.

නුවරඑළිය නගර සංවර්ධන සැලැස්ම කඩිනම් කිරීම පිළිබඳව ද මෙහිදී පුළුල් ලෙස සාකච්ඡා කෙරිණි.

නුවරඑළිය දිස්ත්‍රික් ලේකම් කාර්යාලය වෙත අද උදෑසන පැමිණි ජනාධිපතිවරයා එහි පහත මහලයේ ස්ථාපිත කර තිබූ “මැදරට රෙදිපිළි වෙළෙඳ සැළ” විවෘත කිරීමට ද එක් විය.

අමාත්‍යවරුන් වන නිමල් සිරිපාල ද සිල්වා, කංචන විජේසේකර, ජීවන් තොන්ඩමන්, පාර්ලිමේන්තු මන්ත්‍රීවරුන් වන එස්. බී දිසානායක, වී. එස්. රාධක්‍රිෂ්නන්, රාමේෂ්වරන් මරුදපාණ්ඩි, මධ්‍යම පලාත් ආණ්ඩුකාර නීතිඥ ලලිත්. යු .ගමගේ යන මහත්වරු සහ අමාත්‍යංශ ලේකම්වරුන් ද, නුවරඑළිය දිස්ත්‍රික් ලේකම් පී.කේ. නන්දන  ඇතුළු රාජ්‍ය ආයතන ප්‍රධානීහු, ආරක්ෂක අංශ සාමාජිකයන් ඇතුළු පිරිසක් මීට එක්ව සිටියහ.