ඩෙල්ටා කොවිඩ් වෛරස ප්‍රභේදයේ බලපෑම ඉදිරි දෙසතිය තුළ ඉතා ප්‍රබලවනු ඇති බව ශ්‍රී ජයවර්ධනපුර විශ්වවිද්‍යාලයේ ආසාත්මිකතා හා ප්‍රතිශක්ති විද්‍යා සහ ශෛල්‍ය ජෛව විද්‍යායතනයේ අධ්‍යක්ෂ, වෛද්‍ය, ආචාර්ය චන්දිම ජීවන්දර අවධාරණය කරයි.
"දැනට කොළඹ නගරයේ 98%ක් මේ ඩෙල්ටා ප්‍රභේදය හේතුවෙන්නෙ රෝග ඇතිකිරීමට. අනිත් තැන්වල ඩෙල්ටා නෑ. අපි තාම ඩෙල්ටාවල මූලික අවධියේ ඉන්නෙ. පටන් ගත්තා විතරයි. ඕනෑම ප්‍රභේදයක් රටක් තුළ වාර්තාවෙලා සමාජයක් තුළ වාර්තාවෙලා රෝගීන් වැඩිවීම පටන් ගන්නෙ සති හයකින් විතර. ඒ සති හයේ සීමාවෙ තමා දැන් අපි ඉන්නෙ. මං කිව්වෙ ජුනි මාසෙ මුල පටන් ගත්තා, දැන් ජුලි අන්තිම වෙනකොට සති හය සති අට පැනලා තියෙන්නෙ. ඒ කියන්නෙ ඩෙල්ටාවලින් ඇතිවන බලපෑම පටන් ගත්තා විතරයි. මේකෙ දරුණු බව ඉදිරියට තමයි අපි බලාපොරොත්තු වෙන්නෙ. විශේෂයෙන්ම ඉදිරි සති දෙකතුන ඉතාමත්ම තීරණාත්මකයි. ඉතා විශාල ලෙස රෝගීන් වාර්තා වෙයි.
මේ රෝගය පැතිරීම ඉතාමත්ම වේගවත්. එක් පුද්ගලයෙක් ආසාදිතයෙක් හිටියොත් ඒ සියලුම දෙනාටම පාහේ රෝගය ඇතිවීමේ හැකියාව තියෙනවා. මේ ඩෙල්ටා ප්‍රභේදය කියන එක ඉතාමත්ම කරදරකාරී ප්‍රභේදයක්. පොඩි අවස්ථාවක් ඇති, තත්පර පහකට හරි අපි මේ මාස්ක් එක ගැලෙව්වොත් ඒක ඇති අපට රෝගියෙක් බවට, රෝගී ආසාදන තත්වයක් බවට පත්කරන්න. ඒක තමයි මේකෙ තියෙන දරුණු බව.
මේ ඩෙල්ටා ප්‍රභේදයෙන් ආපු හැම රටක්ම ඉතාම දරුණු ලෙස බැටකෑවා. ඉතිං අපිත් ඒ මූලික අවධියේ සිටින්නෙ. මං හිතන්නෙ මේ අවස්ථාවේදී අපි ඉතා දැඩි ක්‍රියාමාර්ග ගතයුතුයි මේක තවදුරටත් පැතිරීම වළක්වන්න. ඩෙල්ටා ප්‍රභේදයේ දරුණු බව ගැන මම තවදුරටත් සාකච්ඡා කළොත් තාම ලංකාවේ අනාරක්ෂිත ප්‍රමාණය 75%කට වැඩියි. ඒ කියන්නෙ අපි දළ වශයෙන් ගත්තොත් මිලියන පහකට මේ රෝගය හැදුණා කිව්වොත් 1%ක් මැරුණොත් මං හිතන්නෙ 50,000ක් විතර ප්‍රමාණයක් මැරෙනවා.
ඉතිං මෙතනදි ප්‍රශ්නයක් තියෙනවා දැන් රට වහනවාද ආර්ථිකය ප්‍රශ්නයක් නිසා මිනිස්සුන්ට කන්න නැතිවෙනවාද කියන එක. හැබැයි දැන් අපි යම්කිසි තැනකට ඇවිල්ලා තියෙනවා රෝහල් ධාරිතාව උපරිමම තත්වයට ගිහිල්ලා. දැන් අපට හෙට දිනයේ තියෙන ප්‍රශ්නය තමයි කන්න නැතුව මැරෙනවාද ඔක්සිජන් නැතුව මැරෙනවාද කියන එක. මේකට උත්තරයක් තමයි අපි දැන් හොයන්න ඕනෙ. කන්න නැතුව මැරෙන්නෙ නෑ, මොකද කන්න තියෙන මිනිහෙක් අපට ගෙනත් දේවි. හැබැයි ඔක්සිජන් නැතිවුණොත් අපට ජීවත් වෙන්න බෑ. ඒ ප්‍රශ්නය ඉදිරියේ තමයි අපි දැන් ඉන්නෙ. ඔක්සිජන් ප්‍රමාණය උපරිම ධාරිතාවට ඇවිත් තියෙනවා, එතනින් එහාට ඔක්සිජන් නිෂ්පාදනය කරන්න බෑ. මේ රෝගීන් මේ විදියට වැඩිවේවි ඉදිරියට ඉදිරියට ගියොත්. ඉතිං මං හිතන්නෙ ඒ සම්බන්ධයෙන් තමයි අපි හැකි ඉක්මනින් එදිනෙදාට ගැළපෙන විදියට තීරණ ගන්න ඕනෙ. මාස දෙකකට කලින් ගත්ත චක්‍රලේඛවලට දැන් වැඩ කරලා වැඩක් නෑ. අලුතින්ම නිවැරදි තීරණ අරගෙන ඉදිරියට යෑම තමයි වැදගත් වෙන්නෙ අනාගතයේ වෙන්න පුළුවන් දරුණු ඛේදවාචකය නවත්වාගන්න" යනුවෙන් ඔහු සදහන් කළේය.
ඔහු මේ බව පැවසුවේ ඊයේ (11) දෙරණ රූපවාහිනී නාලිකාවේ පැවති වැඩසටහනකට එක්වෙමිනි.