පුවත්

පාර්ලිමේන්තු මන්ත්‍රී ප්‍රේමනාත් සී. දොලවත්ත විසින් පාර්ලිමේන්තුවට ඉදිරිපත් කර තිබෙන දණ්ඩ නීති සංග්‍රහය (සංශෝධන) පනත් කෙටුම්පත ආණ්ඩුක්‍රම ව්‍යවස්ථාවට පටහැනි යැයි තීන්දු කරන මෙන් ඉල්ලා ශ්‍රේෂ්ඨාධිකරණයට පෙත්සමක් ඉදිරිපත් කර තිබේ.

විශ්‍රාමික යුද හමුදා බ්‍රිගේඩියර්වරයෙකු වූ කේ. අතුල එච්. ද සිල්වා, ශෙනාලි ඩී. වඩුගේ සහ ජෙහාන් හමීඩ් යන අය විසින් මෙම පෙත්සම ගොනුකර තිබෙන අතර එහි වගඋත්තරකරුවන් ලෙස පාර්ලිමේන්තු මන්ත්‍රී ප්‍රේමනාත් සී දොලවත්ත සහ නීතිපතිවරයා නම් කර ඇත.

මෙකී පෙත්සම ගොනුකරමින් පෙත්සම්කාර පාර්ශ්වය සඳහන් කර ඇත්තේ වගඋත්තරකාර ප්‍රේමනාත් සී. දොලවත්ත මන්ත්‍රීවරයා විසින් පෞද්ගලික මන්ත්‍රී යෝජනාවක් වශයෙන් ඉදිරිපත් කර තිබෙන අදාළ පනත් කෙටුම්පත තුළින් සමලිංගික ක්‍රියාකාරකම් අපරාධමය නොවන වරදක් වශයෙන් අර්ථකථනය කිරීමට උත්සාහ කර ඇති බවත් ඒ තුළින් එම ක්‍රියාකාරකම් ප්‍රවර්ධනය කිරීමක් සිදුවන බවය.

එය දණ්ඩ නිති සංග්‍රහය පිළිබඳව ව්‍යවස්ථාදායකයේ අපේක්ෂාවන්ට පටහැනි බවත් ඒ තුළින් ආණ්ඩුක්‍රම ව්‍යවස්ථාවේ ප්‍රතිපාදන බරපතළ ලෙස උල්ලංඝනය වන බවත් පෙත්සමේ සඳහන් කර තිබේ.

එසේම බෞද්ධ, හින්දු, කිතුනු හා ඉස්ලාම් ආගමික විශ්වාසයන් අනුව පවා සමලිංගික කටයුතු අනුමත කිරීමක් සිදුකර නොමැති බව පෙන්වා දෙන පෙත්සම්කරුවන් යෝජිත පනත් කෙටුම්පතේ අන්තර්ගත ප්‍රතිපාදන එම ආගමික විශ්වාසයන්ට පටහැනි බවත් සඳහන් කර සිටියි.

තවද අදාළ පනත් කෙටුම්පතින් අපේක්ෂා කරන කරුණු මෙරට සංස්කෘතික හා ජාතික අනන්‍යතාවයන්ට ද පටහැනි බවත් පෙත්සම්කරුවන් සඳහන් කර ඇති අතර එබැවින් යෝජිත පනත් කෙටුම්පතේ අන්තර්ගත ප්‍රතිපාදනවලින් ආණ්ඩුක්‍රම ව්‍යවස්ථාවේ සඳහන් මූලික මිනිස් අයිතිවාසිකම් උල්ලංඝනයවීමක් සිදුවන හෙයින් එය සම්මත කිරීමට අවශ්‍ය නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් අනුමත විය යුතු බවට තීන්දුවක් ලබාදෙන ලෙසත් පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබේ.

විශ්වවිද්‍යාල ආචාර්යවරුන් කණ්ඩායම් උසස් පෙළ සිසුන්ගේ පිළිතුරු පත්‍ර පරීක්ෂාවෙන් මඟහැර සිටීම හේතුවෙන් රටේ සමස්ත අධ්‍යාපන පද්ධතියම අර්බුදයට ලක්වී ඇතැයි මාතලේ දිස්ත්‍රික් පාර්ලිමේන්තු මන්ත්‍රීනී රෝහිණී කවිරත්න පවසයි.

සිසුන් දෙලක්ෂ හැත්තෑ දහසකට වැඩි පිරිසක් උසස් පෙළ විභාගය පෙනී සිටි අතර, මේ දක්වාම උත්තර පත්‍ර පරීක්ෂාව ආරම්භ වී නැත. සිසුන් ලක්ෂ 5 කට වඩා මෙවර සාමාන්‍ය පෙළ විභාගයට අයඳුම්කර ඇති නමුත් මෙම අර්බුදය නිසා විභාග පැවැත්වීමට නොහැකි තත්වයක් මතුව ඇත.

විශ්වවිද්‍යාල ආචාර්යවරුන් පිරිසක් උපයන විට ගෙවීමේ බද්ධ ඉවත් කරන ලෙස ඉල්ලා සිටීම නිසා මාස 03 කට ආසන්න කාලයක් විශ්වවිද්‍යාල වසා දමා තිබු අතර විභාග පැවැත්විම සිදු නොවීය. මේ සියළු සිදුවීම් ලක්ෂ 12 ක් පමණ වන පාසල් හා විශ්වවිද්‍යාල සිසුන්ට දැඩි පීඩනයක් එල්ලකර ඇති අතර, මෙරට ද්විතීයක අධ්‍යාපනය දැවැන්ත අර්බුදයක් කරා යොමු කරමින් තිබේ.

අද වන විට සා.පෙ. විභාගයට පෙනී සිටින දරුවෙකුට පුද්ගලික විශ්වවිද්‍යාලයකින් අවුරුදු 21 දී උපාධියක් ලබා ගත හැකිය. රාජ්‍ය විශ්වවිද්‍යාලයක උපාධියක් ලබාගැනීමේ වයස අවු. 26 කි. මෙරට රාජ්‍ය විශ්වවිද්‍යාලයන් හි ඉගෙනුම ලබන සිසුන් සංඛ්‍යාව වඩා තුන් ගුණයක් පමණ මේ වන විට දේශීය හා විදේශීය විශ්වවිද්‍යාල හා අනුබද්ධ ආයතනයන් හි ඉගෙනුම ලබයි. අධ්‍යාපනය සඳහා මුදල් වැය කිරීමේ හැකියාවක් නොමැති සිසුන් බහුතරයක් සා.පෙ., උ.පෙ., උපාධි හා පශ්චාත් උපාධි පාඨමාලාවන් හි හිරවී සිටින විට පුද්ගලික විශ්වවිද්‍යාලයන් හි ඉගෙනුම් කටයුතු අඛණ්ඩව සිදු කෙරේ. මෙම ආයතනයන් හි උගන්වනු ලබන්නේ ද, මේ වන විට පිළිතුරු පත්‍ර පරීක්ෂාවට අදාළ ක්‍රියාකාරකම්වලින් ඉවත්ව සිටින විශ්වවිද්‍යාල ආචාර්යවරුන්ගෙන්ම කොටසකි.

උත්තර පත්‍ර පරීක්ෂා කිරීම සඳහා ගුරුවරුන් 12,000 ක් කැමැත්ත පළ කර ඇති අතර ඔවුන්ට එක් උත්තර පත්‍රයක් වෙනුවෙන් රු. 175 ක මුදලක් ද, රු. 2000 ක දෛනික පැමිණීමේ දීමනාවක් ද යෝජනා වී ඇත. මෙම දීමනා ප්‍රමාණවත් නොවේ නම් ඒ පිළිබඳ, අධ්‍යාපන අමාත්‍යාංශය හා ගුරු නියෝජිතයින් පොදු එකඟතාවයක් ලබා ගැනීම අත්‍යවශ්‍ය ය.

1988 – 1994 සමයේ දී මෙරට විශ්වවිද්‍යාලයන්හි විභාග පැවැත්වීම හා ප්‍රතිඑල නිකුත් කිරීමේ ප්‍රමාදයන් හේතුවෙන් දැවැන්ත විනාශයක් මෙරට අධ්‍යාපන පද්ධතියට සිදු විය. මාස තුනකට වැඩි කාලයක් දිග් ගැසුණු පිළිතුරු පත්‍ර පරීක්ෂා කිරීමේ ප්‍රමාදය, විශ්වවිද්‍යාල දේශන වර්ජනය කිරීම, සා.පෙ. විභාගය සඳහා දින නියම කළ නොහැකිවීම නැවත එවැනිම අර්බුදයක් දක්වා වර්ධනය වෙමින් තිබේ.

රටේ බදු ප්‍රතිත්තියට විරෝධය පළ කිරීමට විශ්වවිද්‍යා ආචාර්යවරුන්ට අයිතියක් ඇතත්, තමන්ගේ වෘත්තීය මත පදනම්ව සුවිශේෂ බදු සහන ලබා ගැනීමට රටේ ද්විතීය අධ්‍යාපනය ප්‍රාණ ඇපයට ගැනීමට හැකියාවක් නැත. අනෙක් අතට, රජය මේ සම්බන්ධයෙන් කිසිදු සාධනීය මැදිහත්වීමක් මේ දක්වාම සිදු කිරීමට අපොහොසත්වී ඇත. පාසල් අධ්‍යාපන පද්ධතිය තුල 9000 කට වැඩි ගුරු පුරප්පාඩු සංඛ්‍යාවක් පවතින අතර සමහර පාසල් ගුරුවරුන් නොමැතිකම නිසා සම්පූර්ණයෙන්ම වැසී යන තත්වයකට පත්වෙමින් ඇත.

රජයේ පාසල්, විභාගය හා විශ්වවිද්‍යාල පද්ධතියේ පවතින මෙම අර්බුදය රටේ ද්විතීයික අධ්‍යාපනය මුළුමනින්ම අවුල් කිරීමටත්, අත මිට ඇති පිරිස පුද්ගලික විශ්වවිද්‍යාල වෙතයොමු කිරීමටත් හේතු වී ඇත. රජය, වෘත්තීය සමිති සහ බලපෑම් කණ්ඩායම් මෙම තත්වය වෙනස් කර ලක්ෂ 12 කට වැඩි සා.පෙ., උසස් පෙල හා විශ්වවිද්‍යාල සිසුන්ගේ අධ්‍යාපන කටයුතු වෙනුවෙන් මැදිහත්විය යුතුව ඇත.

මේ දිනවල පවතින අධික උෂ්ණත්වය නිසා ඇතිවන සෞඛ්‍ය ගැටලු මගහරවා ගැනීමට සෞඛ්‍ය ප්‍රවර්ධන කාර්යාංශය විසින් උපදෙස් මාලාවක් නිකුත් කර ඇති අතර එය පහත දැක්වෙයි.

අධික උෂ්ණත්වය නිසා ඇතිවන සෞඛ්‍ය ගැටලු මගහරවා ගැනීමට පහත පියවර දැඩි අවධානයෙන් අනුගමනය කරමු.

1. පිපාසය දැනෙනතෙක් නොසිට නිතර නිතර හැකිතාක් ජලය පානය කිරීම (වැඩිහිටි කෙනෙකුට අවම වශයෙන් දිනකට ලීටර 2.5ක් වත්)
2. පිපාසයට, ජලය වෙනුවට පැණි බීම පානය කිරීමෙන් වැළකීම
3. පෙරවරු 11 සිට පස්වරු 3 දක්වා අධික හිරු රශ්මියට නිරාවරණය වෙමින් ගත කරනා කාලය අවම කිරීම
4. හැකි පමණ ලා පැහැති සැහැල්ලු කපු ඇඳුම් වලට යොමු වීම
5. එළිමහනෙහි ගැවසීමේදී කුඩ සහ තොප්පි භාවිතයට (hats) හැකිතාක් යොමුවීම
6. වයෝවෘද්ධ හෝ රෝගී පුද්ගලයන් මෙන්ම කුඩා දරුවන් මේ තත්ත්වය යටතේ පීඩාවට ලක් වීමේ අවධානම වැඩි බැවින් ඔවුන් පිළිබඳ විශේෂයෙන් විමසිලිමත් වීම

මෙම අවදානම් තත්ත්වය උද්ගතව ඇත්තේ දිවයිනේ බොහෝ ප්‍රදේශ වල (විශේෂයෙන් බටහිර හා දකුණුදිග වෙරළ තීරයන් හි) පවතින අධික වියළි කාලගුණයත් සමග උෂ්ණත්වය වෙනදාට වඩා සැලකිය යුතු ලෙස ඉහළ යාමත් සමඟයි.

මෙම උෂ්ණත්වය අධික වකවානුවේ තමන්ගේ මෙන්ම අන් අයගේ ද යහ පැවැත්ම උදෙසා ඉහත කරුණු පිළිබඳව සැලකිලිමත් වන ලෙස ඔබට අප යළිත් සිහිපත් කරමු

සෞඛ්‍ය ප්‍රවර්ධන කාර්යාංශය

චීනයට ශ්‍රී ලංකාවෙන් රිලවුන් ලබාදිය හැකි වන්නේ ඒ සම්බන්ධව අමාත්‍ය මණ්ඩලයේ අනුමැතිය මත පත්කරන කමිටුව නිර්දේශ ලැබුණහොත් පමණක් බව කෘෂිකර්ම අමාත්‍ය මහින්ද අමරවීර පවසයි.

එසේම චීනයේ පුද්ගලික සත්ත්වෝද්‍යාන 1,000ක් පමණ පවත්වාගෙන යන සමාගමක් විසින් ඔවුන්ගේ සත්ත්වෝද්‍යාන සඳහා ශ්‍රී ලංකාවේ රිළවුන් ලබාදෙන ලෙස ඉල්ලීමක් කළ බවද අමාත්‍යවරයා සඳහන් කර සිටියි.

මේ සම්බන්ධව වැඩිදුරටත් අදහස් දක්වමින් කෘෂිකර්ම අමාත්‍ය මහින්ද අමරවීර මෙසේද පවසා තිබේ.

"එම ඉල්ලීම සම්බන්ධව මේ වනවිට විවිධ පාර්ශ්ව විවිධ අදහස් පළ කර තිබෙනවා. කෘෂිකර්ම අමාත්‍යාංශය වශයෙන් වගාවන්ට සිදුවන සත්ත්ව හානි සම්බන්ධව ඉදිරිපත් වන කාරණා ගැන නියම තොරතුරු අපි දන්නවා. බොහෝ පරිසරවේදීන් හා පරිසර සංවිධාන වගාවන්ට සතුන්ගෙන් සිදුවන හානි සම්බන්ධව වගකීමක් සහිතව කටයුතු කරනවා . ඒ වගේම තවත් සමහරු වල්ගේ පාගා ගෙන කතා කරන බවකුත් පෙනෙනවා. අපේ රටේ රිළවු ලබාදෙන ලෙස චීනයෙන් ඉල්ලීම ඉදිරිපත් වුණත් ඒ සම්බන්ධව මෙතෙක් අවසන් තීරණයක් ගෙන නැහැ. මෙම කටයුතු පිළිබඳව පවතින නීත්‍යානුකූලභාවය ගැනත් අපි සලකාබැලිය යුතුයි.

"ඒ සඳහා වනජීවි දෙපාර්තමේන්තුව, සත්ත්ව උද්‍යාන දෙපාර්තමේන්තුව, නීතිපති දෙපාර්තමේන්තුව, කෘෂිකර්ම අමාත්‍යාංශය හා කෘෂිකර්ම දෙපාර්තමේන්තුව ඇතුළු අංශවල නියෝජිතයින්ගෙන් සමන්විත කමිටුවක් පත්කරනවා. එම කමිටුව පත් කරන්නේ අමාත්‍ය මණ්ඩලයේ අනුමැතිය මතයි. මේ සඳහා මම කෘෂිකර්ම අමාත්‍යවරයා වශයෙන් අමාත්‍ය මණ්ඩල පත්‍රිකාවක් ඉදිරිපත් කරනවා. චීනයට රිළවුන් ලබාදීම සිදුකරන්නේ අමාත්‍ය මණ්ඩලය විසින් පත්කරන කමිටුවේ නිර්දේශය මත පමණයි."

"යම් හෙයකින් කමිටුව තීන්දු කළහොත් චීනයට අපේ රිළවුන් දීමට හැකියාවක් නැති බවට මෙම කාරණය එතැනින් අවසන් වෙනවා. ඒ නිසා බොරුවට කලබලවීමේ අවශ්‍යතාවයක් නැහැ. නමුත් වගා හානි සම්බන්ධව රිළවුන්ගෙන් එල්ල වන තර්ජනයත් සුළුපටු නැහැ. 2022 වසරේ පළමු මාස හය තුළ මේ රටේ පොල් ගෙඩි මිලියන 93ක් රිළවුන් හා දඬුලේනුන් විසින් විසින් විනාශ කර තිබෙනවා."

"2022 වසර අවසන් වනවිට එම ප්‍රමාණය පොල් ගෙඩි මිලියන 200 ඉක්මවා තිබෙනවා. රිළවුන් නිසා වගාවන්ට සිදුවන හානි ගැන ගොවි ජනතාව වෙතින් අසා දැනගත හැකියි. ඒ නිසා මෙම ගැටලුව කාලයක් තිස්සේ පවතින කිසිදු විසඳුමක් නැතිව පවතින ප්‍රශ්නයක්. රිළවු චීනෙට ලබාදීමට විරුද්ධව අදහස් දක්වන අය ඒ සඳහා විකල්ප විසඳුම් ඉදිරිපත් කරන්නෙත් නැහැ. ඒ නිසා මෙම ගැටලුව පිළිබඳව විවෘත මනසකින් යුක්තව කතාකළ යුතු මාතෘකාවක් බවට පත්ව තිබෙනවා

ජනාධිපතිවරයා විසින් සියලු පාර්ලිමේන්තු මන්ත්‍රීවරුන් වෙත ජාතික ආණ්ඩුවක් සඳහා ආරාධනයක් සිදුකිරීමේ සූදානමක් පවතින බව පාර්ලිමේන්තු මන්ත්‍රී මනෝ ගනේෂන් පවසයි.

මේ වන විටත් තමා ඇතුළු පක්ෂ නියෝජිතයින් කිහිපදෙනෙකුට ඒ සම්බන්ධයෙන් සාකච්ඡා කිරීමට ජනාධිපතිවරයා ආරාධනා කර ඇති බවත් ඔහු සඳහන් කළේය.

ඒ අනුව මේ පිළිබඳව සාකච්ඡා කර ඉදිරියේදී තීරණයකට එළඹීමට අපේක්ෂා කරන බවද මන්ත්‍රීවරයා වැඩිදුරටත් සඳහන් කළේය.

කෙසේ වුවත් මීට පෙර මනෝ ගනේෂන් මන්ත්‍රීවරයා සඳහන් කර සිටියේ එක්සත් ජාතික පක්ෂය සහ සජබ අතර දේශපාලන සන්ධානයක් ඇතිකර ගැනීම සම්බන්ධව තමන් සහ රවුෆ් හකීම් මන්ත්‍රීවරයා මැදිහත්ව සිටියත් ඊට සජබ නායකත්වය වෙතින් ලැබුණු සෘණාත්මක ප්‍රතිචාරය හේතුවෙන් එය අත්හැර දැමුණු බවය.

එම සාකච්ඡාවලදී අග්‍රාමාත්‍ය ධුරය විපක්ෂ නායක සජිත් ප්‍රේමදාසට පිරිනැමීමේ සූදානමක් ගැනත් මාධ්‍ය වාර්තා පළවුවත් මනෝ ගනේෂන් මන්ත්‍රීවරයා එය ප්‍රතික්ෂේප කර නිවේදනයක්ද නිකුත්කර තිබිණ.

මේ අතර දේශපාලන විචාරකයන් පවසන්නේ IMF ගිවිසුම ඇතුළු ආර්ථික අර්බුදයෙන් රට ගොඩනගන වැඩපිළිවෙල සඳහා සහය ලබාදීමට එකඟ නමුත් විපක්ෂ නායක සජිත් ප්‍රමුඛ කිහිපදෙනෙකුගේ බලපෑම මත ඒ සඳහා ඉදිරිපත්වීමට පසුබටව සිටින මන්ත්‍රී කණ්ඩායමක් ආණ්ඩුවට එක්කර ගැනීම වෙනුවෙන් යළිත් වරක් ජනාධිපතිවරයා වෙතින් මෙවැනි ජාතික ආණ්ඩු යෝජනාවක් ඉදිරිපත් වනු ඇති බවය.

එසේම මේ වන විට රටේ සිදුව ඇති වෙනස්කම් හේතුවෙන් ජනාධිපති රනිල් වික්‍රමසිංහ සම්බන්ධව ජනතාව අතර අප්‍රකාශිත ප්‍රසාදයක් පැහැදිළිව නිරීක්ෂණය වන බවත් මේ ආකාරයට ඉදිරි කාලය තුළද සාර්ථක ලෙස ආර්ථිකය හසුරවන අතර ජනතා පීඩනය අවම කිරීමට කටයුතු යෙදුණහොත් රටේ පැහැදිළි ස්ථානයක් ජනාධිපතිවරයා වෙත ලැබීම වළක්වාලිය නොහැකි වනු ඇති බවත් විචාරක මතය වී තිබේ.

අතීතය වරෙක සියලු ආශීර්වාදයන්ගෙන් බුහුමන් ලබන්නේය. තවත් වරෙක සාපයෙන් ගැරහුම් ලබන්නේය. ඇත­ැමුන් අතීතය අමතක කිරීමට කැමැති අතර ඇතැමුන් අතීතයේ ළගින්නට ප්‍රිය කරන්නේය. ඇතමුන් අතීතයට පෙම් බඳින අතර ඇතමුන් අතීතයට වෛර කරන්නේය . මේ කොහොම මොනවා කළත් සජීවී මනුස්ස ප්‍රාණයකට අතීතයෙන් ගැලවීමක් නැත්තේමය. අතීතය සමඟ වන ගනුදෙනුව හරියට බේරගන්න අවශ්‍ය වන්නේ ද අන්න ඒ නිසාය. එසේ නම්, කළ යුතුව ඇත්තේ අතීතය උගත් පාඩම් ඇසුරෙන් වර්තමානය සකස් කර ගැනීම සහ ඒ අනුව අනාගතය ගොඩනැඟීම ය.

එය මොනවට පසක් කර සිටියේ උදාවූ 2023 සිංහල දෙමළ අලුත් අවුරුද්දය. අපේ රටේ ජනතාවට සිංහල, දෙමළ අලුත් අවුරුද්ද කියන්නේ ඇති හැකි අයත් නැති බැරි අයත් වෙනසක් නොමැතිව සමරන සංස්කෘතික අංගයක්ය. උපයාගත් දේ බෙදාහදාගෙන කා බී ප්‍රීතිවන උත්සවයක්ය. ආසියානු වැඩවසම් සංස්කෘතික දේහය තුළ ලෝකෝත්තර ජීවිතය සංස්කෘතිය ලෙස කාවද්ද­ාගත් ශ්‍රී ලාංකිකයාට ලෞකික සුව - රස අත්විඳින්නට ඇති එකම සංස්කෘතික අංගය සිංහල හින්දු අලුත් අවුරුද්ද ලෙස හැඳින්වුවාට වැරදි නැත. ඊටත් වඩා වැදගත් කාරණය වන්නේ අලුත් අවුරුද්ද සිංහල - දෙමළ ජාතිකත්ව දෙක විසින්ම සමරනු ලබන පොදු සංස්කෘතික උත්සවයක් වීමය.

පසුබිම එසේ වුවත් 2023 සිංහල දෙමළ අලුත් අවුරුදු උදාව තවත් එක් අලුත් අවුරුද්දක් වුණේ නැත. එය හැම අතින්ම විශේෂ විය. එක් අතකින් 2020 සහ 2021 අලුත් අවුරුද්ද කොවිඩ් වසංගතය හේතුවෙන් මෙරට ජනතාවට එම වසරවල හිතේ හැටියට අවුරුදු සමරන්න ලැබුණේ නැත. 2022 වසරේ අවුරුදු සැමරීමක් තබා හිතන්නවත් දෙයක් තිබුණේ නැත. මිනිසුන් හිටියේ ගෑස්, ඉන්ධන කිරිපිටි පෝලිම්වලය. භාණ්ඩ හා සේවා සියල්ලෙහි මිල අහස උසට ගොස් තිබිණ. වැඩි මිලක් යටතේ හෝ මිලදී ගන්න භාණ්ඩ වෙළඳපොළ තුළ තිබුණේ නැත. ඖෂධ හිඟය ද ඊට දෙවැනි නොවීය. හෙටක් ගැන අදහසක් තබා ඊළඟ වේල පිරිමහ ගැනීම යන්නත් තිබුණේ දැඩි අභියෝගයක් ලෙසය. බැලූ බැලු සැම අතම කියාපෑවේ තුන් බිය පැමිණි විශාලා මහනුවර නූතන පිටපතක සලකුණුය. ඉන්ධන හිඟය, විදුලි කප්පාදුව, කර්මාන්ත වැසීයාම, විරැකියාව ඇතුළු දහසක් ආර්ථික සමාජ ප්‍රශ්නවලින් පිරි පීඩිත ජනතාව සිටියේ පැවති පාලනයට එරෙහිව වීදි සටනකය. වෙනදා මතවාදී වශයෙන් සමාජය වෙනස් කළ මෙරට මධ්‍යම පන්තිය, මතය හැදීමට එහා ගොස් පළමු වරට අරගල බිමට පැමිණියේය. ඒ අතර තුර ආගමන විගමන දෙපාර්තමේන්තුව කාර්ය බහුල වූයේ ජනතාවගෙන් සැලකිය යුතු ප්‍රමාණයක් මේ රට හැර ලෝකයේ ඕන රටකට යන්න හිත හදාගෙන තිබූ නිසාය.

ගොඩ එන දවස

2022 අප්‍රේල් 09 වනදා එවකට පාලකයා එළවා දැමීමට ඔහු විසින්ම විරෝධතා සඳහා නම් කළ ස්ථානය මූලික කරගෙන " ගෝඨාගෝගම "අරගල මූල කඳවුරක් පිහිටවනු ලැබූ අතර, පැවති පාලනයේ අසමත් බව නිල වශයෙන් තහවුරු කරමින් 2022 පරණ අවුරුද්දට පෙරදා එනම්, අප්‍රේල් 12 වනදා ශ්‍රී ලංකා රජය විසින් ශ්‍රී ලංකාවට විදේශ ණය ගෙවීමට නොහැකි බව හෙවත් රටේ බංකොලොත්භාවය ප්‍රකාශයට පත්කරනු ලැබිණ. 2022 අලුත් අවුරුද්ද උදා වූයේ එහෙම පසුබිමකය. එදා ආර්ථිකය සම්බන්ධව වඩාත් උනන්දු ගෝලීය ආයතන මෙරට හඳුන්වනු ලැබුවේ "ගොඩ එන දවස ගැන පුරෝකථනයක් තබා එවැන්නක් ගැන හිතන්නවත් බැරි අවාසනාවන්ත කුඩා දිවයින් රාජ්‍යයක්" ලෙසය.

2023 සිංහල දෙමළ අලුත් අවුරුද්ද සුවිශේෂී වූයේ දින 365ක් ඉක්ම යන්නට පෙර, එනම් ඊළඟ සූර්ය සංක්‍රාන්තියට පෙර 2022 පැවති තත්ත්වය මුළුමනින්ම වෙනස් කරන්නට හැකිවූ නිසාය. පළමුව ඉන්ධන, ගෑස් , ඇතුළු සියලු ආකාරයේ පෝලිම් අවසන් කෙරිණ. අත්‍යවශ්‍ය භාණ්ඩ ක්‍රමයෙන් වෙළඳපොළට යොමු කෙරුණු අතර, උද්ධමනය ද ක්‍රමයෙන් පහළට පැමිණෙන තත්ත්වයක් ඇති කෙරිණ. අඛණ්ඩ විදුලි සැපයුමක් සහතික කෙරිණ. රාජ්‍ය ආයතන, පාසල් , පෞද්ගලික ආයතන, ප්‍රවාහනය ඇතුළු අක්‍රීයව පැවති සියලු යාන්ත්‍රණ සක්‍රීය කෙරිණ. රාජ්‍ය ආදායම් ඉහළ නැංවීම වෙනුවෙන් බදු ප්‍රතිසංස්කරණය හඳුන්වා දුන් අතර ඊට සමගාමීව IMF මූල්‍ය සහය ලබා ගැනීමට අවශ්‍ය ප්‍රතිසංස්කරණ ද කඩිනම් කෙරිණ.

එහි තීරණාත්මක සලකුණක් වූයේ IMF මූල්‍ය සහය වශයෙන් ඩොලර් බිලියන 2.9ක් සමඟ වැඩසටහනට ඇතුල්වීමට අවස්ථාව උදා කර ගැනීමය. මේ ගිවිසුම්ගත වීමේ ඇති සුවිශේෂීම වටිනාකම වන්නේ , 2022 අප්‍රේල් මාසයේදී ණය ගෙවීමට නොහැකි රටක් බවට පත්ව, එනිසාම ණයක් ලැබීමට නුසුදුසු රටක් බවට පත්වීමෙන් ගැලවීමක් ලැබීමය. ඒ හරහා ඉදිරි වර්ෂවලටදී බහු පාර්ශ්වීය සහ ද්වී පාර්ශ්වීය මෙන්ම විවෘත වෙළඳපොළ ප්‍රභවයන් වෙතින් ණය ලැබීමට සුදුසුකම ලැබීමය. එසේම 2019 දී නිකුත් කිරීම් අත්හිටවනු ලැබූ ජාත්‍යන්තර ස්වෛරීත්ව බැඳුම්කර නිකුත් කිරීම හරහා විවෘත වෙළඳපොළ තුළින්ද ණය ලබා ගැනීමටද අවස්ථාව හිමිවීමය. ඒ අර්ථයෙන් 2023 අලුත් අවුරුදු උදාව වන විට ශ්‍රී ලංකාව " බංකොලොත්" ලේබලය ගැලවුණු, ණය ලැබීමට සුදුසු මෙන්ම ගෙවීමට හැකියාවක් ඇති රටක් ලෙස දෙපයින් සිටුවා තිබිණ.

ආශ්චර්යයේ නිර්මාපකයා

වොෂින්ටනයේ මේ වන විට පැවැත්වෙන ජාත්‍යන්තර මූල්‍ය අරමුදලේ සහ ලෝක බැංකුවේ වසන්ත රැස්වීම්වලදී ශ්‍රී ලංකාවේ සිදු වූ මේ අදහාගත නොහැකි ශීඝ්‍රගාමී වෙනස රාජ්‍යතාන්ත්‍රික බුහුමනට පාත්‍රවුයේ "ඓශ්චර්යයක්" ලෙසය. ඒ ඓශ්චර්යයේ නිර්මාපකයා වෙනත් කවුරුත් නොව ජනාධිපති රනිල් වික්‍රමසිංහය. ඔහු පසුගිය වසරේ භාරගත්තේ ඉතිහාසයේ දරුණුම ආර්ථික අර්බුදයෙන් පරිපීඩිතවූ, ඊට එරෙහි ජනතා නැඟීසිටීම හමුවේ අරාජිකව දිග්ගැස්සෙන ප්‍රචණ්ඩත්වයක් දක්වා ඇදෙමින් තිබූ, කිසිදු සම්ප්‍රදායික දේශපාලන නායකත්වයක් භාර නොගත්, පියෙක් නොමැතිව නිරුවතින් දුවන අවජාතක ළමිස්සියක් බඳු රටක් කීවාට වැරදි නැත. පළමුව නීතිය සහ සාමය ස්ථාවර කළ ජනාධිපති රනිල් වික්‍රමසිංහ අනතුරුව සිය සැලැස්ම ක්‍රියාවට නැංවීය. මෙහිදී අවධාරණය කළ යුතු කරුණක් වූයේ මේ ඉතිහාසයේ දරුණුතම ආර්ථික අගාධයට ඇද වැටුණු රට ගොඩනඟන කර්තව්‍යයේ මල් වට්ටියට අත ගහන්න පැමිණෙන ලෙස කොතෙක් වාරයක් ආරාධනා කළ ද විපක්ෂය ඊට එක් නොවූ බවය. එපමණක් නොව රට ගොඩනඟන ජනාධිපති රනිල් වික්‍රමසිංහගේ වැඩපිළිවෙළ අඩාළ කිරීම සඳහා ඇදිය හැකි හැම අංචියක්මත් ඇද්ද බවය.

විපක්ෂයේ ඒ කිසිදු නාඩගමක් සාර්ථක නොවුණේ, අනෙකාගේ අධෝවාතයටත් පාරට බහින අතීසාරය වැලඳුණු කෑ කෝ පප්පන්ගේ සහ ජනතාවගේ නිහඬ බහුතරයේ වෙනස නිසාය. සැබවින්ම ජනාධිපති රනිල් වික්‍රමසිංහ සාර්ථක වූයේ සහ හුදකළා මිනිසෙකුට, සිය ඓතිහාසික දේශපාලන පසමිතුරු කඳවුරේ සහයෙන් සාර්ථක ලෙස ආණ්ඩුව මෙහෙයවමින් මෙතෙක් මේ ගමන එන්නට හැකි වූයේ රටේ නිහඬ බහුතරය රනිල් ගැන තැබූ විශ්වාසය ජනාධිපති රනිල් අකුරටම ඉටු කළ නිසාය. මෙරට නිහඬ බහුතරය තමන් සම්බන්ධව තැබූ විශ්වාසය නිවැරදි බව ගතවන දිනක් පාසා ඔප්පු කරමින් සිටින නිසාය.

අලුත් අවුරුද්ද එළඹෙන්න පෙර අනුරාධපුර ගුවන් හමුදා කඳවුරේදී ත්‍රිවිධ හමුදාව සහ පොලීසිය අමතා විශේෂ ප්‍රකාශයක් කරමින්ද ජනාධිපති රනිල් කිව්වේ, තමා සිටින්නේ හරි දේ කිරීමට මිස ජනප්‍රිය දේ කිරීමට නොවන බවය. අනතුරුව මුදල් අමාත්‍යාංශ ශ්‍රවණාගාරයේ පැවති ජාත්‍යන්තර මූල්‍ය අරමුදල වැඩසටහන පිළිබඳ විශ්වවිද්‍යාල ආර්ථික විද්‍යා අධ්‍යයනාංශයන්හි ආචාර්යවරුන් දැනුම්වත් කිරීමේ අවස්ථාව අමතමින්ද ජනාධිපතිවරයා කිව්වේ, 18 වන වතාවටත් ජාත්‍යන්තර මූල්‍ය අරමුදල වෙත යාමට කිසිසේත්ම බලාපොරොත්තු නොවන බවය.

විශ්වාසයේ සහතිකය

ජනාධිපති රනිල් මේ සහතිකය දෙන්නේ ද , මෙතෙක් ඔහුව විශ්වාස කළ මෙරට සැබෑ බලවේගය වන නිහඬ බහුතරය වෙතය. නිහඬ බහුතරයට ද රනිල් විශ්වාසය. ඒ නිසා මුදලට මීඩියා වොයිස්කට් දෙන කිහිප දෙනෙකු හැරෙන්න, 2023 සිංහල දෙමළ අලුත් අවුරුද්ද කවුරු කවුරුත් ඇති හැකි ලෙස සැමරූ බව අතිශයෝක්තියක් නොවේය. ඔවුන් සමරුවේ අලුත් අවුරුද්දම පමණක් නොව, ඉතිහාසයේ දරුණුතම ආර්ථික අගාධයෙන් ගොඩ ඒමට ඇති හැකියාව ගැන දින 365 කට අඩු කාලයක් තුළ ජනාධිපතිවරයා ලබා දුන් විශ්වාසයේ සහතිකය ද ඒ සැමරුම තුළ වූ බවත් අතිශයෝක්තියක් නොවේය. අතිශයෝක්තියක් වන්නේ පසුගිය වසරවල මෙරට ජනතාවට අත්විඳීමට සිදු වූ පීඩාව පිළිබඳ සළකා බලන විට මේ වන විට ජනාධිපති රනිල් සියල්ල අංග සම්පූර්ණ කර ඇතැයි පැවසූවා නම්ය. සැබවින්ම මෙවර ජනතාව සිංහල දෙමළ අලු‍ත් අවුරුද්ද සැමරූ ආකාරය කියා පාන්නේ රටේ ආර්ථිකයේ දැවැන්ත වෙනසක් සඳහා වන ආරම්භයකට ඉඩ සලසා ඇතැයි යන්නට සහතිකයක් සමස්ත ජනතාවට ලැබී ඇති බවය. ඒ සහතිකය ඔවුන් විශ්වාස කරන බවය. විශේෂයෙන් නිහඬ බහුතරය ජනාධිපතිවරයාගේ වැඩපිළිවෙළ විශ්වාස කරනවා පමණක් නොව ඊට සක්‍රීය සහයක් ලබාදීමට අවශ්‍ය ඕනෑම වෙලාවක භෞතිකව මැදිහත්වීමට වුවත් සූදානමකින් පසුවන බවය.

විපක්ෂයට ඇති ප්‍රධානම අභියෝගය ද ඒකය. නමුත්, ඔවුන් ඒ ගැන නිවැරදි තක්සේරුවක් කර ඇත්දැයි සැක සහිතය. ඒ බව තහවුරු කරමින් පසුගිය දිනක ජවිපෙ හිටපු මන්ත්‍රී වසන්ත සමරසිංහ කියා තිබුණේ, ජනතාවගේ මේසය මත තිබිය යුතු අවුරුදු කෑම ටික රනිල් රාජපක්ෂලාගේ මේස මත ඇති බවය. එසේම ජනතාවගේ අවුරුදු මේසයට ආහාර ටික සොයාගෙන ඇත්තේ පරණ බඩු විකුණා බවත්, ඒ තරමට ආණ්ඩුව ජනතාව පාවා දුන් බවත් ඔහු පවසා තිබිණ. වැඩිදුරටත් අදහස් දක්වමින් වසන්ත කියා තිබුණේ, මිනිස්සුන්ගේ බඩගින්න වත් නොදැනෙන අන්දමට ආණ්ඩුව අද කටයුතු කරමින් සිටින බවය. එනිසා අවුරුදුවලින් පසු ජනතාවගේ නිදහස් අරගලයක් සහිත සටනක් ආරම්භ කළ යුතු බවත් ඊට ජනතාව එක්වනු ඇතැයි විශ්වාස කරන බවත්ය.

අවුරුදු කෑම මේසය

ජවිපෙ හිටපු මන්ත්‍රී වසන්ත එසේ සඳහන් කරන විට තවත් ජවිපෙ හිටපු මන්ත්‍රීවරයකු සමාජ මාධ්‍ය තුළ වෛරල් වී සිටියේ අලුත් අවුරුදු නැකත් චාරිත්‍ර ඉටුකිරීමේ ඡායාරූප පෙළක් සමඟය.

ඒ හිටපු ජවිපෙ මන්ත්‍රී වෛද්‍ය නලින්ද ජයතිස්සය. ඡායාරූපවල දැක්වූයේ, ඔහු පවුලේ උදවිය සමඟ අලුත් අවුරුද්දට ආහාර අනුභව කර, වැඩ ඇල්ලූ ආකාරය ය. රාජසිංහ රජ්ජුරුවන්ගේ කෑම මේසය මෙන් නොවුණත් නලින්දගෙ අවුරුදු කෑම මේසයේ අඩුවක් තිබුණේ නැත.

ඒ අනුව නම් නැඟිය හැකි සාධාරණ ප්‍රශ්න කිහිපයක් ඇත. ඒ, "වසන්ත කියන විදිහට 2023 සිංහල දෙමළ අලුත් අවුරුද්ද ජනතාව හිටියේ හාමතේ නම් යන්තම් කන්න ටික හොයාගත්තේ පරණ බඩු විකුණලා නම්, ජවිපෙ නලින්ද අඩුවක් නැතුව අවුරුදු සැමරුවේ මොන හිතකින්ද ?", "සාතිශය බහුතරයක් ජනතාව හාමතේ සිටියදී නලින්ද අඩුවක් නැති අවුරුදු කෑම මේසයක් අවුරුදු සැමරීමේ ඡායාරූප සිය ෆේස්බුක් ගිණුමට එක්කළේ ඇයි ?", " වසන්තට ඇති පන්ති කැක්කුම නලින්දට නැද්ද ? නලින්ද වසන්තට වඩා සුළු ධනේශ්වර ද ?", " නලින්ද වගේම වසන්තත් අඩුවක් නැතුව, නැත්නම් නලින්දටත් වඩා ජයට අවුරුද්ද සැමරූ වසන්ත මාධ්‍ය ඉස්සරහා බොරු ෂෝ දාගෙන මර්සි ටෝක් දෙනවාද ?" මේ ආකාරයට ප්‍රශ්නාවලියක් "වසන්ත - නලින්ද" අලුත් අවුරුදු වැඩ ඇල්ලීම හරහා ඉස්මතු කළ හැකිය.

මේ ප්‍රශ්නවලට මොන පිළිතුරු දුන්නත්, මේ ඊනියා වම්මුන්ගේ, ආණ්ඩු විරෝධීන්ගේ දෙබිඩි බව අනාවරණය වීම වැළැක්වීමට නම් කොහෙත්ම හැකියාවක් නැත. එසේම ජවිපෙ වසන්තට සාපේක්ෂව ජවිපෙ නලින්ද කියන්නේ අවංකයෙකු බවත් සඳහන් කළ යුතුය. මන්ද නලින්ද අවුරුද්ද සමරුවේ සහ ඒ ගැන ප්‍රසිද්ධියේ ඡායාරූප සමාජ මාධ්‍ය වෙත යොමුකළේ මේ රටේ අද ප්‍රසිද්ධියේ "සැමරිය හැකි " තත්ත්වයක් බිහිකර ඇති බව නලින්දගේ අවිඥානය පිළිගෙන ඇති නිසාය. එය ප්‍රසිද්ධියේ කියා ජනාධිපතිට ස්තූති නොකරන්නේ නලින්ද ජවිපෙ වීම නිසාය.

ඒ කෙසේ වුවත් නලින්ද මෙහෙම ප්‍රසිද්ධියේ අවුරුද්ද සමරන විට සහ හොරෙන් අවුරුදු සැමරූ වසන්ත එළිපිට බොරු ෂෝ දාන විට ජනාධිපති රනිල් හිටියේ ශ්‍රී ලංකාවේ ණය ප්‍රතිව්‍යුහගත කිරීමේ වැඩසටහන සම්බන්ධයෙන් සිය සැලැස්ම ප්‍රකාශයට පත්කිරීමට ජපානය, ප්‍රංශය සහ ඉන්දියාව පැවැත්වූ ප්‍රවෘත්ති සාකච්ඡාවට සූම් තාක්ෂණය ඔස්සේ සහභාගීවය.

භාර ගත් වගකීම

රාජකීය අවුරුදු මේසය මාධ්‍ය හරහා රටටම පෙන්වනවා භාර ගත් වගකීම අකුරට ඉටුකරන රාජ්‍ය නායකයකුගේ හැසිරීම එහෙමය. සජිත්ලා , වසන්තලා නොදන්නා පූර්ණ කාලීන දේශපාලනය කියන්නේ අන්න ඒ හැසිරීමටය. මේ රටේ නිහඬ බහුතරය මෙතෙක් සේව්වේද ? අර්බුදය සහ අරගලය මැදින් ඔවුන්ට හමුවුනේද අන්න එහෙම නායකයෙක්ය. අතීත පාඩම් ඇසුරෙන් වර්තමානය සකස් කරන මේ නායකයා සමඟ අනාගතය ගොඩනැඟීමේ ගමන කොන්දේසි විරහිතව යාම නිහඬ බහුතරයේ තීරණය වී ඇත. පසුගිය වසරේ දේශපාලනඥයන්ට තහනම් බිමක් වූ අරගලය පැවති ගෝල්ෆේස් බිමේ ජනාධිපති කාර්යාලයේ මූලිකත්වයෙන් "වසත් සිරිය 2023" නමින් සිංහල දෙමළ අලුත් අවුරුදු උත්සවය පැවැත්වීමට හැකියාව ලැබී ඇත්තේ ඒ නිසාය. අප්‍රේල් 22 වනදා එය පැවැත්වෙන අතර 2023 අලුත් අවුරුද්ද සමරන්නම ඕන අවුරුද්දක් වෙන්න තවත් හේතු මොකටද ?

එස්. එම්.ලියනගේ

දිනමිණ - 2023-04-17

සමගි ජන බලවේගයේ කළුතර දිස්ත්‍රික් පාර්ලිමේන්තු මන්ත්‍රී වෛද්‍ය රාජිත සේනාරත්නට ඇමැති තනතුරක් දෙන්නේ නම් එම දිස්ත්‍රික්කයේ පාර්ලිමේන්තු මන්ත්‍රී රෝහිත අබේගුණවර්ධනටද ඇමැති තනතුරක් දෙන්නැයි ශ්‍රී ලංකා පොදුජන පෙරමුණ ජනාධිපති රනිල් වික්‍රමසිංහගෙන් ඉල්ලීමක් කර ඇත.

"රෝහිතට නොදී රාජිතට විතරක් ඇමැති තනතුරක් දෙන්න එපා" යැයි ජනාධිපතිවරයාගෙන් විශේෂ ඉල්ලීමක් කළ බව ශ්‍රී ලංකා පොදුජන පෙරමුණේ ජ්‍යෙෂ්ඨ ප්‍රකාශකයෙක් මාධ්‍ය වෙත පවසා ඇත.

රෝහිත අබේගුණවර්ධන  පක්ෂයේ දියුණුව වෙනුවෙන් විශාල කැපවීමක් කළ අයකු වන හෙයින් රාජිත සේනාරත්නට පමණක් ඇමැති තනතුරක් දුනහොත් එය රෝහිතට කරන බරපතළ අසාධාරණයක් බව පක්ෂය ජනාධිපතිවරයාට වැඩිදුරටත් දැනුම්දී ඇතැයිද ඔහු එහිදී සඳහන් කර තිබේ.

රාජිත සේනාරත්න  නව අමාත්‍ය ධුරයක් ළඟදීම බාරගැනීමට සූදානමින් සිටින බව පසුගිය සති කිහිපය පුරාම විවිධ මාධ්‍ය වාර්තා පළවිය. මේ අතර ඇමැති ධූර ගැනීම සඳහා ශ්‍රී ලංකා පොදුජන පෙරමුණේ නම් ලයිස්තුවක්ද කලකට පෙර ජනාධිපතිවරයාට බාරදී තිබුණේය. එම ලැයිස්තුවටද රෝහිත අබේගුණවර්ධන  ඇතුළත් ව සිටියේ ය.

බංග්ලාදේශය විසින් 2021 මැයි මාසයේ දී ශ්‍රී ලංකාවට ලබාදුන් ඩොලර් මිලියන 200ක ණය මුදල නැවත ගෙවීම ආරම්භ කිරීමට තවත් මාස 06ක කාලයක් ශ්‍රී ලංකාවට ලබාදීමට එරට රජය තීරණය කර තිබේ.

ඒ අනුව,ලංකාව විසින් එම ණය මුදලේ පළමු වාරිකය අගෝස්තු මාසයේදීත් දෙවැනි වාරිකය සැප්තැම්බර් මාසයේදීත් බංග්ලාදේශයට ලබාදීය යුතුව තිබේ.

බංග්ලාදේශ මාධ්‍ය වාර්තා කළේ, ශ්‍රී ලංකා මහ බැංකුව මේ වසරේ මාර්තු මාසය වන විට ඩොලර් මිලියන 200 ක පළමු වාරිකය ගෙවීමට බංග්ලාදේශයෙන් කාලය ඉල්ලා සිටි බවත්, ඒ වන විට එහි ණය ප්‍රතිව්‍යුහගත කිරීමට හැකි වනු ඇතැයි අපේක්ෂා කරන බවත්ය.

ඉතිහාසයේ දරුණුතම ආර්ථික අර්බුදයට මුහුණ දෙන ශ්‍රී ලංකාව 2021 මැයි මාසයේදී මෙම ණය ලබා ගත්තේය.

උත්සව සමය වෙනුවෙන් ඉහළ දැමුණු ඉන්ධන කෝටාව එලෙසම පවත්වාගෙන යෑම සම්බන්ධයෙන් අද (17) දිනයේ දී තීරණය කරන බව විදුලි බල සහ බලශක්ති අමාත්‍යංශය පවසයි.

පසුගිය 04 වනදා මධ්‍යම රාත්‍රියේ සිට ක්‍රියාත්මක වන පරිදි ඉන්ධන කෝටාව ඉහළ දැමීමට රජය පියවර ගැනුණු අතර එහිදී තීන්දු කර තිබුණේ හෙට (18) සිට පෙර පැවැති ආකාරයටම ඉන්ධන කෝටාව ක්‍රියාත්මක කිරීමටය.

පසුගිය 4 වෙනිදා සිදුකළ ඉන්ධන කොටාවේ ඉහළ දැමීමට අනුව ත්‍රිරෝද රථ සඳහා වු ලීටර් 5ක කෝටාව ලීටර් 8ක් දක්වාත් යතුරු පැදි සඳහා ලීටර් 4ක ඉන්ධන කෝටාව ලීටර් 7ක් දක්වාත් ඉහළ නැංවිණ.

එසේම බස්රථ සඳහා ඉන්ධන කෝටාව ලීටර් 40 සිට ලීටර් 60 දක්වාත් මෝටර්රථ සඳහා ඉන්ධන කෝටාව ලීටර් 20 සිට ලීටර් 30 දක්වාත් ලොරිරථ සඳහා ලබාදෙන ඉන්ධන කෝටාව ලීටර් 50 සිට ලීටර් 75 දක්වාත් වෑන්රථ සඳහා ලබාදෙන ඉන්ධන කෝටාව ලීටර් 20 සිට ලීටර් 30ක් දක්වා ඉහළ දැමුණි.

ඉහළ දැමු කෝටා අගයන් ඒ ආකාරයෙන්ම පවත්වාගෙන යන්නේ ද නැතහොත් පෙර පැවැති අගයන් යළි ක්‍රියාත්මක කරන්නේ ද යන්න සම්බන්ධයෙන් තවදුරටත් අවසන් එකඟතාවකට පැමිණ නොමැති බව බලශක්ති අමාත්‍යංශය වැඩිදුරටත් සඳහන් කරයි.

එක්සත් ජාතික පක්ෂය සහ සමගි ජනබලවේගය අතර සන්ධානයක් ගොඩනැගීමට උත්සාහ කළ නමුත් සජබ නායකත්වයෙන් ඊට යහපත් ප්‍රතිචාරයක් නොදැක්වූ නිසා එම උත්සාහය අත්හළ බව සජබ කොළඹ දිස්ත්‍රික් පාර්ලිමේන්තු මන්ත්‍රී මනෝ ගනේෂන් පවසයි.

තමන් සමඟ ශ්‍රී ලංකා මුස්ලීම් කොංග්‍රසයේ නායක පාර්ලිමේන්තු මන්ත්‍රී රවුෆ් හකීම් ද මේ උත්සාහය ගත් බවද ඔහු සඳහන් කරයි.

කෙසේ වෙතත් "අගමැතිකම" පිළිබඳව එහිදී කිසිවක් සාකච්ඡා නොවූ බවද මනෝ ගනේෂන් මන්ත්‍රීවරයා අවධාරණය කර සිටියි.

දමිළ ප්‍රගතිශීලී සන්ධානයේ නායක මනෝ ගනේෂන් මේ බව සඳහන් කර ඇත්තේ පසුගිය 15 දා මාධ්‍ය නිවේදනයක් නිකුත්කරමින් ය.

සජිත් ප්‍රේමදාස අගමැති කිරීම සඳහා ඔහු ජනාධිපතිවරයා සමග සාකච්ජා කර ඇතැයි ඇතැම් මාධ්‍යවල පළව ඇති වාර්තා සම්බන්ධයෙන් ද එහි සඳහන් අතර අදාළ නිවේදනය පහත දැක්වෙයි.

'' එක්සත් ජාතික පක්ෂයත්, සමගි ජන බලවේගයත් එක සංධානයකට ගැනීමට ජනාධිපති රනිල් වික්‍රමසිංහ මහතා සමග මා සාකච්ඡා පැවැත්වූ බව ඇත්ත.

නමුත් මේ සාකච්ඡාවේ කිසිදු අවස්ථාවක අගමැති තනතුර පිළිබදව කතා කළේ නැහැ. ඒ ගැන අදහස් ඉඅදිරිපත් කිරීමට ඉක්මන් වැඩිය යන අවබෝධය මා තුළ තිබුණා.

කෙසේ වෙතත් මේ සංධානගත වීම පිළිබඳ, විපක්ෂ නායක හා සමගි ජන බලවේගයේ නායක සජිත් ප්‍රේමදාස මහතාගේ පාර්ශවයෙන් කිසිදු යහපත් ප්‍රතිචාරයක් ලැබුණේ නැහැ. ඒ නිසා එම සාකච්ඡාව ඉදිරියට ගෙනයෑම මා විසින් අත්හිටුවා දැම්මා.

එසේ තිබිය දී, ජනාධිපති රනිල් වික්‍රමසිංහ මහතා විපක්ෂ නායක සජිත් ප්‍රේමදාස මහතාට අගමැති තනතුර ලබා දීමට සූදානම් බවට මා හරහා පණිවිඩයක් ලබා දී ඇතැයි පවසමින් ඇතැම් මාධ්‍යයන් විසින් ගෙන යන ප්‍රචාරය සම්පූර්ණයෙන්ම අසත්‍යක්.

ඒ වගේම මම පණිවිඩකරුවන් නොවෙමි. සද්භාවයෙන් මතවාදීව යම් සාකච්ඡාවක දී මැදිහත්කරුවකු ලෙස ඉදිරිපත් වීමට හැකියාවක් ඇතැත් පණිවිඩකරුවාගේ භූමිකාව මා විසින් නොකරන බවත් ප්‍රකාශ කර සිටීමට කැමැත්තෙමි.''

රැකියා විරහිත තරුණයන් වෙනුවෙන් මෙම වසරේ එළුවන් 70,000ක් නොමිලයේ ලබා දීමට කෘෂිකර්ම අමාත්‍යාංශය තීරණය කර තිබෙි.

ලංකාවෙි එළු පාලනය පුළුල් මට්ටමින් සිදු නොවෙන නිසා එළු පාලනය ආශ්‍රිත නිෂ්පාදන වන එළු මස් හා එළු කිරි වැඩි ප්‍රමාණයක් විදේශ රටවලින් ආනයනය කරනු ලබයි.

එමෙන්ම එළු සම් ලබා ගැනීම හා එළු පොහොර නිෂ්පාදනය මගින්ද ඉහළ ආදායමක් ලබා ගැනීමට ද හැකියාව පවතී.

මෙම තත්ත්වය සැලකිල්ලට ගනිමින් මෙම වසරේ ග්‍රාමීය වශයෙන් එළු පාලනය ඉහළ නැංවීම සඳහා මෙම පියවර ගෙන තිබෙි.

මීට කෘෂිකර්ම අමාත්‍යාංශය වැය කිරීමට යෝජිත මුදල රුපියල් මිලියන 150කි.

ඒ අනුව මෙම වසර අවසන් වන විට එළුවන් 70,000ක් ලබා දෙන අතරම 2024 වසරේ දී එම ප්‍රමාණය තවදුරටත් ඉහළ නැංවීම අරමුණ වේ.

ජම්නපාරී, කොට්ටුකච්චි, බෝයර් හා සානන් යන එළු විශේෂ මේ යටතේ බෙදාදීමට නියමිතය.

ජපන් ආධාර යටතේ මෙරට ක්‍රියාත්මක වූ ව්‍යාපෘති නැවත ආරම්භ කිරීම සඳහා ඉතාමත් උනන්දුවෙන් බලා සිටින බව ජපාන ජාත්‍යන්තර සහයෝගීතා නියෝජිත ආයතනයේ දකුණු ආසියානු කලාපයේ ජ්‍යෙෂ්ඨ උප සභාපතිනි ඉමොටෝ සචිකෝ පවසා ඇත.

මුදල් රාජ්‍ය අමාත්‍ය ශෙහාන් සේමසිංහ සහ ඉමොටෝ සචිකෝ අතර පැවති හමුවකදී ඇය මේ බව පවසා තිබේ.

වොෂින්ටනයේ පැවැත්වුන ජාත්‍යන්තර මූල්‍ය අරමුදලේ සහ ලෝක බැංකුවේ වසන්ත රැස්වීම් වලට සමගාමීව මෙම හමුව සිදුව ඇත.

එසේම ජපාන ජාත්‍යන්තර සහයෝගීතා නියෝජිත ආයතනයේ ශ්‍රී ලංකාවේ ආර්ථිකය යථා තත්ත්වයට පත් කිරීම සඳහා සහාය වීමට කැපවී සිටින බවද ඉමොටෝ සචිකෝ පවසා තිබේ.

මුදල් රාජ්‍ය අමාත්‍ය රංජිත් සියඹලාපිටිය ගමන් ගත් කැබ් රථය කරවනැල්ල කහටගස් තැන්න ප්‍රදේශයේ දී තාප්පයක ගැටීමෙන් අමාත්‍යවරයා ඇතුළු තිදෙනෙකු තුවාල ලබා රෝහල් ගත කළ බව රුවන්වැල්ල පොලිසිය පවසයි .

අමාත්‍යවරයා ගමන්ගත් කැබ් රථය රුවන්වැල්ල සිට කරවනැල්ල දෙසට ධාවනය වෙමින් දී මාර්ගයේ ලිස්සා ගොස් තාප්පයක ගැටීමෙන් මෙම අනතුර වී ඇත. අනතුරින් කැබ් රථය ඉදිරිපසට බරපතළ අලාභ සිදු වී ඇත.

මෙම අනතුරින් අමාත්‍යවරයාගේ ආරක්ෂකයා ද තුවාල ලබා ඇති බවත් සඳහන් වෙයි.

රිලවුන් විදේශයන් වෙත යැවීමට විරුද්ධ පිරිස් වෙත රිලා ක්‍රියාකාරකම් හේතුවෙන් දාඩි පීඩාවන්ටපත් ගොවීන් විසින් විකල්ප යෝජනාවක් ඉදිරිපත් කර තිබේ.

ඒ රිලවුන් විදේශයන් වෙත යැවීමට විරුද්ධ පිරිස් විසින් වගාවන්ට ඉමහත් හානි පමුණුවන රිලවුන් කුඩා රංචු වශයෙන් භාරකාරත්වය ගැනීමය.

ඒ සඳහා එකඟ නම් අවශ්‍ය රිලා රංචු කොටුකර දීම සඳහා ශ්‍රම දායකත්වය සැපයීමට තමන්ද සූදානම් බවත් එම ගොවීන් පවසයි .

කොළඹ සිට සත්ව ප්‍රේමය සහ කෘෂිකර්මය ගැන නංදොඩවන කිසිවකු තමන් මුහුණදී සිටින අර්බුදය සම්බන්ධයෙන් සංවේදී නොමැති බවත් ඔවුන් පවසයි .

මේ සම්බන්ධයෙන් ගොවි මහතකු වැඩිදුරටත් මෙසේ අදහස් දැක්වීය.

" ඔය පරිසරවේදින් , සත්වවේදින් එක්කො අපේ යෝජනාවට එකඟ වෙන්න ඕන . ඔය රිලා ප්‍රේමය තනිකරම ප්‍රෝඩාවක්. ඇයි රිලවුන් ගැන තියෙන කැක්කුම අනිත් සත්තු ගැන නැත්තේ ? ඇයි අපිට සිදුවෙන වගා හානිය ගැන නැත්තේ ? එක රංචුවක් ඇවිත් මාස ගාණක් තිස්සේ අමාරුවෙන් ගොඩදාපු හේන් වගා ටික වනසනවා. එක ඩිංගක් ඉතුරු කරන්නේ නෑ . සමහර ලොකුරංචු ගමක් පිටින් විනාශ කරනවා. ඒ දේවල් විනාශ කරාට පස්සේ වියලි සහනාධාර ඇතිළු හාල් තුනපහ ටික උස්සන්න ගෙවල් වලට පණිනවා. අපි කාලයක් තිස්සේ මේ ගැන පැමිණිලි කරන්නේ . ඒත් විසඳුමක් ලැබුණේ නෑ . දැන් සැනසීමක් ලබන්න ආරංචියක් ආවහම කොහේද හිටපු රිලා ප්‍රේමීන් ටිකක් මැදට පැනලා. ඒ නිසා ඒ උදවියට රිලා වාසයට ඉඩදීලා අපි වගා කටයුතු කරන්න රිලා වදයට විසඳුමක් දෙන්න. අපේ වගා අපේ අස්වනු රිලව් කෑවහම ඒ පාඩුව අපිට, පීඩාව අපේ අඹු දරුවන්ට මිසක් ඔය කාටවත් නෙවෙයි "

ජනාධිපති කාර්යාලය, අග්‍රාමාත්‍ය කාර්යාලය, රාජ්‍ය පරිපාලන අමාත්‍යාංශය ඇතුළු සියලු අමාත්‍යාංශ හා රාජ්‍ය අංශයේ ආයතන ගණනාවක කාර්ය මණ්ඩලවල එකමුතුවෙන් සියලු ශ්‍රී ලාංකිකයන්ට විවෘත තරග හා විදේශිකයන් සඳහා ද විශේෂිත තරගවලින් සමන්විතව පැවැත්වෙන “වසත් සිරිය 2023” සිංහල හා දෙමළ අලුත් අවුරුදු උත්සවය අප්‍රේල් 22 වන සෙනසුරාදා කොළඹ ගාලු මුවදොර හරිත භූමියේ දී පැවැත් වේ.

පෙ.ව 7.00 සිට ප.ව 5.00 දක්වා පැවැත්වෙන අලුත් අවුරුදු ක්‍රීඩා හා තරග ඉසව්වලින් අනතුරුව ප.ව 6.00 සිට රාත්‍රී 12.00 දක්වා මියැසි ප්‍රසංගයක් ද සංවිධානය කර තිබේ.

රාජ්‍ය අංශය, විවෘත අංශය සහ ආගන්තුක අංශය යන කොටස් 03ක් යටතේ තරග ඉසව් සංවිධානය කර ඇත.

අමාත්‍යාංශ හා රාජ්‍ය ආයතනයන්හි කාර්ය මණ්ඩලවල සාමාජික, සාමාජිකාවන්, පවුලේ හිතවතුන් සහ ළමුන් වෙනුවෙන් කාන්තා සහ පිරමි තරග ඉසව් 18 ක් පැවැත්වෙන අතර ගස් ලබු ගෙඩියේ ඇට ගණන් කිරීම, සැඟවුණු අමුත්තා සෙවීම, අලියාට ඇස තැබීම, කණා මුට්ටිය බිඳීම, පොල් අතු විවීම, පොල් ගෑම, කොට්ටපොර ගැසීම, බනිස් කෑම, සූප්පුවෙන් බීම බීම, ඉඳිකටුවට නූල දැමීම, මීටර් 100 දිවීම, අන්ධයාට කිරි කැවීම, බාධක දිවීම, බැලුම් පිපිරවීම, ඉටිපන්දම් දැල්වීම, දෙහි ගෙඩිය හැන්ද මත තබාගෙන දිවීම, කඹ ඇදීම, සංගීත පුටු තරගය, සංගීත තොප්පි තරගය, ජන ගී ගායනය, ටොෆි ඇහිදීම, හොඳම හිනාව, ලොකුම බඩ තේරීම එම තරග ඉසව් අතරට අයත්ය.

ඕනෑම ශ්‍රී ලාංකිකයෙකුට සහභාගිවිය හැකි විවෘත අංශයක් ද තරග 16ක් සහිතව මීට ඇතුළත් අතර “පුර සැරිය” ස්ටෑන්ඩඩ් බයිසිකල් තරගය, මැරතන් ධාවන තරගය, ලිස්සන ගහ, කඹ ඇඳීම, කොට්ටාපොර ගැසීම, ඉටිපන්දම් දැල්වීම, බැලුම් පිපිරවීම, අලියට ඇස තැබීම, ටොෆි ඇහිදීම, හොඳම හිනාව අවුරුදු කුමරා සහ කුමරිය ඇතුළුව ලොකු කුඩා සැමට සහභාගිවිය හැකි තරග ඉසව් ඊට ඇතුළත් වේ.

එමෙන්ම විදේශකයින්, තානාපති කාර්යාල, විදේශ ආයතන සහ අවට හෝටල් වල සිටින පිරිස් වෙනුවෙන් ආගන්තුක අංශයක් ද විවෘත අතර විදේශිකයන්ට විනෝද විය හැකි තරග ඉසව් 10කින් එය සමන්විතය.

අතීත ගැමි සමාජයේ ගම සහ ගැමි ගෙදර අතර පැවති සුන්දර සබැදියාව විදහා දක්වමින් ගැමි ගෙදරක් සහිත පරිසරයක අකෘතියක් ද මෙහි ප්‍රතිනිර්මාණය කෙරේ. කැවිලි පෙවිලි, ඇදුම් පැළදුම්, සිංහල අවුරුදු චාරිත්‍ර ඇතුළත් ගැමි ගෙදරක ස්වරූපය ඉන් ප්‍රදර්ශයනය කෙරෙන අතර රබන් ගැසීම, පංච කෙළිය, ඔළිඳ කෙළිය, චක්ගුඩු, ජන සංගීතය, පොරපොල් ගැසීම, අං කෙළිය ඇතුළු ගැමි ක්‍රීඩා සහ ප්‍රදර්ශනාත්මක අංග රැසක් ඊට ඇතුළත්ය. කතුරු ඔංචිල්ලා, උණ වෙඩි සංදර්ශන, කඩමණ්ඩිය සහ, වෙද ගෙදරකින් ද භූමිය විචිත්‍රවත් කර තිබේ.

මියැසි ප්‍රසංගය රාත්‍රී 7.00 ට එම ස්ථානයේ දී ආරම්භ වේ. සහන් රන්වල ප්‍රමුඛ රන්වල බලකාය විසින් ඉදිරිපත් කරනු ලබන අවුරුදු ප්‍රාසාංගික අත්දැකීම මෙහිදී එළිදැක්වෙන අතර ඉන් අනතුරුව දිවයිනේ ජනප්‍රිය සංගීත කණ්ඩායමක් වන මීඩ් ලෑන්ඩ් සංගීත කණ්ඩායම ප්‍රසංගය ආරම්භ කරනු ඇත.

එය වර්ණවත් කිරිම සඳහා රූකාන්ත ගුණතිලක, සනුක වික්‍රමසිංහ, වින්ඩි ගුණතිලක, ටෂ්නි පෙරේරා, දුල්මිණ පෙරේරා,හිජාස් ටලීෂ්, අශන්‍යා ප්‍රේමදාස ඇතුළු දිවයිනේ ජනප්‍රිය ගායක ගායිකාවන් සහභාගී වීමට නියමිතය.

ජනාධිපති මාධ්‍ය ඒකකය විසින් නිකුත්කළ නිවේදනයක මේ බව සඳහන් වෙයි.

රජයේ සියලුම පාසල් වාර සටහනට අනුව හෙට (17) ආරම්භ කරන බව අධ්‍යාපන අමාත්‍යාංශය පවසයි.

අලුත් අවුරුද්ද වෙනුවෙන් පසුගිය 05 වැනිදා සිට පාසල් සඳහා නිවාඩු ලබාදීමට අධ්‍යාපන අමාත්‍යංශය පියවර ගනු ලැබිය.

පාසල් වාර සටහනට අනුව එම නිවාඩුවෙන් පසු පාසල් යළිත් හෙට දිනයේ සිට ආරම්භ කරන බව අධ්‍යාපන අමාත්‍යංශය නිවේදනය කරයි.

අධ්‍යයන පොදු සහතික පත්‍ර සාමාන්‍ය පෙළ විභාගය හේතුවෙන් පාසල් සඳහා මැයි මස 13 වැනිදා සිට යළි නිවාඩු ලබාදීමට මීට පෙර සැලසුම් කර තිබුණ ද උසස් පෙළ පිළිතුරු පත්‍ර ඇගයීම් ප්‍රමාදය හේතුවෙන් සාමාන්‍ය පෙළ විභාගය සති දෙකකින් කල් දැමීමට සිදුවන බව විභාග දෙපාර්තමේන්තුව පසුගියදා නිවේදනය කළේය.

ඒ අනුව සාමාන්‍ය පෙළ විභාගය මැයි මස 29 වනදා සිට ජුනි මස 08 වැනිදා දක්වා පැවැත්වෙන අතර එම විභාගය හේතුවෙන් පාසල් සඳහා නිවාඩු ලබාදෙන ආකාරය පසුව දැනුම් දෙනු ඇත.

එමෙන්ම අප්‍රේල් මස 20 වැනි දින සිට බලපැවැත්වෙන පරිදි ජාතික පාසල්වල අතරමැදි පන්ති සඳහා සිසුන් ඇතුළත් කිරීමට අදාළව නව චක්‍රලේකය නිකුත් කරන බැවින් අධ්‍යාපන අමාත්‍යාංශය විසින් අතරමැදි පන්ති සඳහා සිසුන් ඇතුළත් කිරීමේ ලිපි නිකුත් නොකරන බව ද අධ්‍යාපන අමාත්‍යාංශය නිකුත් කළ නිවේදනයේ සඳහන් වේ.

අප්‍රේල් 20 වැනි දින සූර්යග්‍රහණයක් සිදුවන අතර එය දෙමුහුන් සූර්යග්‍රහණයක් ලෙස හඳුන්වනු ලබන බව කොළඹ විශ්වවිද්‍යාලයයේ තාරකා විද්‍යා සහ අභාවකාශ විද්‍යා ඒකකයේ අධ්‍යක්‍ෂ මහාචාර්ය චන්දන ජයරත්න පවසයි.

එයට හේතුව ලෙස මහාචාර්යවරයා පෙන්වා දුන්නේ එකම සූර්ය ග්‍රහණය තුළ එය පූර්ණ සූර්යග්‍රහණයක සිට වළයාකාර සූර්යග්‍රහණයක් දක්වා මාරු වීම බවයි.

 සූර්යග්‍රහණයේ ගමන් මාර්ගයේ ලොව සමහර ස්ථානවල සිටින නරඹන්නන් පූර්ණ සූර්යග්‍රහණයක් දකින අතර අනෙක් කොටස්වල සිටින අය වළයාකාර සූර්යග්‍රහණයක් දකිනු ඇත.

ශ්‍රී ලංකා සම්මත වේලාවට අනුව සූර්යග්‍රහණය, අප්‍රේල් 20 දින ඉන්දියන් සාගරයෙන් පෙරවරු 7.04ට ආරම්භ වී දහවල් 12.29ට පැසිෆික් සාගරයෙන් අවසන් වීමට නියමිතය.

සූර්ය ග්‍රහණය, වළයකාර අවස්ථාවේ සිට පූර්ණ අවස්ථාවට සංක්‍රමණය වී නැවත වළයාකාර අවස්ථාවට සංක්‍රමණය වීම දැකගත හැකි ස්ථාන දෙකක් පමණක් පෘථිවියේ ඇත.

කෙසේ වෙතත්, අවාසනාවන්ත ලෙස මෙම ස්ථාන දෙක ද සාගරේ මැද පිහිටා ඇති බව ද කොළඹ විශ්වවිද්‍යාලයයේ තාරකා විද්‍යා සහ අභාවකාශ විද්‍යා ඒකකයේ අධ්‍යක්‍ෂ මහාචාර්ය චන්දන ජයරත්න  සඳහන් කර තිබේ.

එම සූර්යග්‍රහණය ශ්‍රී ලංකාවට මෙන්ම ලෝකයේ බොහෝ රටවලට දෘෂ්‍යමාන නොවේ.

කෙසේ වෙතත්, බටහිර ඔස්ට්‍රේලියාව, නැගෙනහිර ටිමෝරය සහ නැගෙනහිර ඉන්දුනීසියානු දූපත්වල සිටින අයට සූර්යග්‍රහණය දෘශ්‍යමාන වන අතර, ඔවුන් ජීවිත කාලයටම එක්වරක් පමණක් විය හැකි මෙම අහස් සංදර්ශනය නැරඹීමට සූදානම් වෙති.

මෙම සූර්යග්‍රහණය දැකිය හැක්කේ ලෝක ජනගහනයෙන් 8.77% කට තරම් සුළු කොටසකට පමණි.

දෙමුහුන් සූර්යග්‍රහණ ඉතා දුර්ලභ වන අතර අවසන් දෙමුහුන් සූර්යග්‍රහණය මීට වසර 10 කට පමණ පෙර එනම් 2013 නොවැම්බර් 3 වන දින සිදු වූ අතර මීළඟ දෙමුහුන් සූර්යග්‍රහණය 2031 නොවැම්බර් මාසයේදී සිදුවනු ඇත.

මෙම සූර්ය ග්‍රහණය ශ්‍රී ලංකාවට දිස් නොවෙන නමුත් නාසා වෙබ් අඩවි ඔස්සේ සජීව විකාශනය අපට නැරඹිය හැකි බව කොළඹ විශ්වවිද්‍යාලයයේ තාරකා විද්‍යා සහ අභාවකාශ විද්‍යා ඒකකයේ අධ්‍යක්‍ෂ මහාචාර්ය චන්දන ජයරත්න වැඩිදුරටත් කියා සිටියේය.

ණය අර්බුදය විසඳා ගැනීමටත් ආර්ථික වර්ධනය ළඟා කර ගැනීමටත් ශ්‍රී ලංකාව දරන උත්සාහයට චීනයේ අඛණ්ඩ සහාය හිමි වන බව චීන නියෝජ්‍ය මුදල් අමාත්‍ය වැන්ග් දොන්ග් වෙයි ප්‍රකාශ කර ඇත.

වොෂින්ටනයේ පැවැත්වෙන ජාත්‍යන්තර මූල්‍ය අරමුදලේ සහ ලෝක බැංකුවේ වසන්ත රැස්වීම්වලට සමගාමීව මුදල් රාජ්‍ය අමාත්‍ය ශෙහාන් සේමසිංහ සමඟ පැවති හමුවකදී චීන නියෝජ්‍ය මුදල් අමාත්‍ය වැන්ග් දොන්ග් වෙයි මේ බව පවසා තිබේ.

චීන නියෝජ්‍ය මුදල් අමාත්‍ය වැන්ග් දොන්ග් වෙයි සමග ඵලදායී සාකච්ඡාවක් පැවැත්වූ බවත් එහිදී දෙපාර්ශ්වයට ම වැදගත් වන කරුණු රැසක් සාකච්ඡා කළ බවත් හමුව පිළිබඳ අදහස් දක්වමින් මුදල් රාජ්‍ය අමාත්‍ය ශෙහාන් සේමසිංහ ප්‍රකාශ කර ඇත.