V2025

පුවත්

යුරෝපා සංගමයේ රටවල් වෙත යැවෙන තැපැල් සේවාව ගැන නිවේදනයක්

යුරෝපා සංගමයට අයත් රටවල් වෙත යැවෙන තැපැල් භාණ්ඩ සම්බන්ධව යුරෝපා සංගමය ක්‍රියාත්මක කරනු ලබන බදු ප්‍රතිපත්ති ජුලි 01 වනදා සිට සංශෝධනය කර තිබේ.

තැපැල් දෙපාර්තමේන්තුව නිවේදනයක් නිකුත් කරමින් ඒ බව පෙන්වා දෙයි.

ඒ අනුව යුරෝපා සංගමයට අයත් රටවල් 26 සඳහා මෙම බදු ප්‍රතිපත්ති ක්‍රියාවට නැංවේ.

යුරෝපා සංගමය විසින් දැනුම් දී ඇති පරිදි තැපැල් පාරිභෝගිකයන්, අන්තර්ජාලය මගින් අලෙවි කටයුතුවල නිරතවන්නන් සහ අන්තර්ජාල අලෙවිසැල් විසින් යුරෝපා සංගමයට අයත් රටවල් වෙත යොමු කරන තැපැල් භාණ්ඩ සඳහා මෙම බදු ප්‍රතිපත්තීන් අදාළ වේ.

ඒ අනුව යූරෝ 150 ට අඩු වටිනාකමකින් යුත් සියලුම තැපැල් භාණ්ඩ සඳහා යවන්නා විසින් යුරෝපා සංගමයට අයත් අදාළ රට වෙත සෘජුවම මෙම වැට් බදු ගෙවිය යුතු බව තැපැල්පතිවරයා අදාළ නිවේදනය මගින් පෙන්වාදී ඇත.

එමෙන්ම යූරෝ 150 ට වැඩි වටිනාකමකින් යුත් භාණ්ඩ සඳහා අදාළ රටේ බදු ප්‍රතිපත්තියට අමතරව අදාළ රජය විසින් තීරණය කරනු ලබන අනෙකුත් තීරු බදු ප්‍රතිපත්තීන්ට ද යටත් වන බැවින් තැපැල් භාණ්ඩ සඳහා වූ සියලුම බදු ගමනාන්තයේදී එම රටවල රේගුව විසින් භාණ්ඩය ලබාගන්නාගෙන් අය කර ගැනීමට කටයුතු කරන බවද තැපැල්පතිවරයා සඳහන් කරයි.

කෙසේවෙතත් වැට් බදු මුදල් සහ මෙහෙයුම් ගාස්තු ගෙවා භාණ්ඩය භාර ගැනීමට ක්‍රියා නොකළහොත් අදාළ රටේ තැපැල් පරිපාලනය හෝ රේගුව මෙම භාණ්ඩ සම්බන්ධව ගනු ලබන ඉදිරි ක්‍රියාමාර්ගයන් පිළිබඳ පාරිභෝගිකයින්ට වගකීමක් දැරීමට සිදුවන අතර ශ්‍රී ලංකා තැපැල් දෙපාර්තමේන්තුව මෙම බදු හෝ අනෙකුත් බදු ගෙවීම් පිළිබඳ කිසිදු අයුරකින් වගකීමක් නොදරන බවද තැපැල්පතිවරයා මෙරට ජනතාවට දැනුම් දෙයි.

මේ පිළිබද වැඩිදුරටත් විස්තර දැනගැනීම සදහා නිවේදනය පහත සදහන් වේ.

01

02

ජනාධිපතිගේ කතාවේ රාජතාන්ත්‍රික අවුලක් !

ජනාධිපතිවරයාගේ කතාවේ වාක්‍යක රාජ්‍යතාන්ත්‍රික භාවයේ ප්‍රශ්නයක් ඇති බව දේශපාලන විචාරකයන් පෙන්වා දෙයි.

ඒ ජනාධිපතිවරයා ජාතිය ඇමතීමේදී වසංගතයේ ආරම්භය චීනය බවත් එය ලොව පුරා පැතිරුණේ චීනයෙන් බවත් හැඟීයන ආකාරයට ප්‍රකාශ කර සිටිමය.

ජනාධිපති සිදුකළ කතාවේ මෙසේ සඳහන් වෙයි.

"මා ජනාධිපතිවරයා වශයෙන් පත් වී මාසයක් ගතවන්නටත් පෙර කොවිඩ් 19 වසංගතය චීනයෙන් ආරම්භ වී ලොව පුරා පැතිරෙන්නට පටන් ගත්තා."

මේ බව පෙන්වා දෙමින් විචාරකයන් පවසන්නේ කොරෝනා වෛරසය , වසංගතයක් ලෙස පැතිර යාමෙන් පසු චීනය විසින් ඔවුන් එය පාලනය කිරීමට කටයුතු කරන අතරම රාජ්‍යතාන්ත්‍රිකව එය ආරම්භ වූයේ චීනයෙන් නොවන බවට ලෝකය දැනුවත් කිරීමට විශාල පරිශ්‍රමයක් දැරූ බවය.

මෙම නිශ්චිත මොහොතේ පවා චීනයේ නිල ස්ථාවරය වන්නේ වෛරසය පැතිරීම ආරම්භ වූයේ චීනයෙන් නොවන බව යයිද දේශපාලන විචාරක මතය වී තිබේ.

ඔවුන් වැඩිදුරටත් පෙන්වා දෙන ආකාරයට ඇමෙරිකාවේ හිටපු ජනාධිපති ඩොනල්ඩ් ට්‍රම්ප් විසින් මෙය චීන වෛරසය ලෙස නවීකරණය කළ ද එය චීනයෙන් ආරම්භ වූවා යන කතාව නොකිරීමට පරිස්සම් වූ බවයි.

ලෝක සෞඛ්‍ය සංවිධානයත් ඇමරිකාවේ නව පරිපාලනය විසිනුත් විධිමත් පරීක්ෂණ කීපයක්ම පැවැත්වීමට කටයුතු කළත් තාමත් චීනය මෙහි ආරම්භය ලෙස නිල වශයෙන් පිළිගෙන නැත.

මෙම තත්ත්වය ලෝක දේශපාලනයේ තිබියදී ජනාධිපති විසින් මෙසේ පැවසීම සම්බන්ධව චීන ප්‍රතිචාරය කෙසේ වේදැයි ප්‍රශ්නයක් තිබෙන බව විචාරක අදහසයි.

මේ මත දැක්වීම චීනය කෙතරම් ඉවසයි ද යන්න අපට දැනගැනීමට හැකිවන්නේ ඉදිරියේදී ජනාධිපතිවරයා සම්බන්ධයෙන් ඔවුන් කටයුතු කරන ආකාරය අනුව බවත් දේශපාලන විචාරකයන් පවසයි.

රටේ රාජ්‍ය නායකයාගේ කතාවක් සැකසීම සහ ඊට සහභාගී වන උපදේශකයන් කතාවේ වචන, පෙළගැස්ම සහ අන්තර්ගතය ගැන කොතරම් සැලකිලිමත් වූවාද යන ප්‍රශ්නය මෙහිදී ඇතිවන බවත් ඔවුන් මතුකර දක්වයි.

දුමින්දගේ නිදහසට ප්‍රශ්න පිට ප්‍රශ්න : මෙවර සමගි නීතිඥ එකමුතුව !

මරණ දඬුවම නියමව සිටි හිටපු පාර්ලිමේන්තු මන්ත්‍රී දුමින්ද සිල්වාට විශේෂ ජනාධිපති සමාව ලබා දීමට අදාල වාර්තා සහ නිර්දේශ වහාම ප්‍රසිද්ධ කරන ලෙස සමගි තරුණ බලවේගයේ සමගි නීතිඥ එකමුතුව ජනාධිපති ගෝඨාභය රාජපක්ෂගෙන් ඉල්ලා සිටියි.

සමගි තරුණ බලවේගයේ සමගි නීතිඥ එකමුතුව මාධ්‍ය නිවේදනයක් නිකුත්කරමින් මෙම ඉල්ලීම සිදුකර ඇති අතර ජනාධිපති සමාව ලබා දීම සම්බන්ධ ක්‍රමවේදය මහජනතාවට වගකියන අන්දමින් සංශෝධනය කරන ලෙසත් යෝජනා කර ඇත.

එම නීතිඥ එකමුතුව නිකුත් කොට ඇති මාධ්‍ය නිවේදනය පහත දැක්වෙයි.

"මරණ දණ්ඩණයට නියමවී සිටි හිටපු පා.ම දුමින්ද සිල්වාට ඊයේ (24) දින ජනාධිපතිවරයාට නීතියෙන් හිමිව ඇති බලය දැඩි ලෙස අවභාවිතා කරමින්, රටේ නීතියේ ආධිපත්‍යය, අධිකරණයේ ස්වාධීනත්වය හා යුක්ති මුලධර්මයන් පිලිබඳ කිසිඳු තැකීමක් සිදුනොකොට විශේෂ ජනාධිපති සමාවක් ලබා දීම තරුණ ප්‍රජාව ලෙස අප දැඩි ලෙස හෙලා දකිනෙමු.

ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ 34 (1) වන වගන්තිය යටතේ පුර්ණ හෝ කොන්දේසිවලට යටත්ව සමාවක් ප්‍රධානය කිරීමට ජනාධිපතිවරයා හට බලයක් හා අභිමතයක් තිබුණද එය අවභාවිතා කිරීමට කිසිඳු ජනාධිපතිවරයෙකුට සදාචාරාත්මක අයිතියක් නොමැත.

ජනාධිපති සමාව ලබාදීම සඳහා දහස් ගණන් මරණ දණ්ඩණයට නියමවුවන් අතරින් දුමින්ද සිල්වා තෝරාගත් පදනම අතිශය ප්‍රශ්ණ සහගතය. එය වත්මන් ජනාධිපති ගෝඨාභය රාජපක්ෂ මහතා ආරක්ෂක ලේකම් ධුරය දරන සමයේ ආරක්ෂක අමාත්‍යංශයේ අධීක්ෂණ මන්ත්‍රීවරයා ලෙස දුමින්ද සිල්වා සමඟ කටයුතු කිරීමේදි පැවැති සුවිශේෂි සම්බන්ධතාවයද යන්න මතුවන පැනයකි.

ජනාධිපතිවරයෙක් ජනාධිපති සමාවක් ලබාදීමේදි ව්‍යවස්ථාවේ 34(1) ප්‍රතිපාදනයන්ට යටත්ව අනුගමනය කල ක්‍රමවේදයක් පැහැදිලිව දැක්වේ. එම ක්‍රමවේදයට අනුව මරණ දඬුවම නියම කළ විනිසුරුවරුන්ගෙන් ලබා ගන්නා ලද වාර්තාව, නීතිපති උපදෙස් වෙත යොමු කොට නීතිපති නිර්දේශය සහිතව අධිකරණ අමාත්‍යවරයා වෙත යොමු කළ යුතුය. අමාත්‍යවරයා විසින් තම නිර්දේශය ජනාධිපතිවරයා වෙත ලබා දිය යුත්තේ ඉන් අනතුරුවය.

මෙහිදී මෙම ක්‍රමවේදයට අනුගතව කටයුතු කර නොමැති බව පෙනෙන්නට ඇති අතර ඒ පිළිබදව නිවැරදිව දැන ගැනීමට ජනතාවට අයිතියක් ඇත.

ආණ්ඩුක්‍රම ව්‍යවස්ථාවේ සඳහන් ක්‍රමවේදයට පිටින් යම් හිටපු ජනාධිපතිවරු සේම සහ වත්මන් ජනාධිපතිවරයාද තමාට පැවරී ඇති බලය අවභාවිතා කරමින් ජනාධිපති සමාව ලබාදී ඇත්තේ තමන්ගේ තීරණයට එරෙහිව අභියෝග කරන්නට කිසිවෙකුටත් හැකියාවක් නොමැති යන ඒකාධිපති පාලකයකුගේ අධි මානසිකත්වය නිසාවෙන්මය.

රටක ජනතාව සේම පාලකයන්ද එකසේ රටේ පවතින නීති රාමුවට යටත් විය යුතු අතර , සැමට එක සමාන ලෙස නීතිය ක්‍රියාත්මක කිරීමට ඉඩ දිය යුතුය. එය රටේ යහපැවැත්මට අත්‍යවශ්‍ය අංගයකි.

එක රටක්- එක් නීතියක් යන්න තම ප්‍රතිපත්තිය බව සෞභාග්‍යයේ දැක්ම තුලින් ප්‍රකාශ කරමින් බලය ලබා ගන්නා ලද වත්මන් ජනාධිපතිවරයා ඇතුළු ආණ්ඩුව අද අත්තනෝමතිකව තම සගයින් 'නිදොස් කොට නිදහස් කිරීම' සිය ප්‍රමුඛ තේමා පාඨය කරගැනීම පිලිබඳ සමස්ථ ප්‍රජාව තුල ඇත්තේ දැඩි පිලිකුළකි.

නීතියේ ආධිපත්‍යය හෑල්ලු කරමින් ජනාධිපති සමාව දීම සාධාරණීකරණය කරන ආණ්ඩුවෙන් අපට ඇසීමට ඇත්තේ නීතිය යනු ජනපති නම් - කුමට ‍මෙරට අධිකරණය - නීතිය හා විනිසුරන් යනුවෙනි.

දුමින්ද සිල්වා වැනි වැරදිකරුවන් වෙනුවෙන් පමණක් ක්‍රියාත්මක වන මෙම සුවිශේෂි වරප්‍රසාදය ලබා ගැනීමට හැකිවන්නේ දේශපාලනික , ආර්ථික හා ‍බලයක් සහිත පාර්ශවයන්ට පමණක් බව දැන් සක්සුදක් සේ පැහැදිලිය.

තවදුරටත් රටේ පුරවැසියන් ලෙස අපට මෙ⁣ම තත්වය අනුමත කල නොහැකිය.

දේශපාලන ආධාරකරුවන් රැකගැනීමේ අවියක් ලෙස භාවිතා කරන ජනාධිපති සමාව අවම ලෙසවත් යුක්තිසහගත ලෙස ක්‍රියාවට නොනඟන තත්වය තුල මෙ⁣ම ක්‍රමවේදය වහාම වෙනසකට ලක් කල යුතුව ඇත. මෙම ක්‍රමවේදය මහජනතාවට වගකියන ක්‍රමවේදයකට අනුව සංශෝධනය කරන ලෙස අප රජයට බල කර සිටිමු.

සමස්ථ ශ්‍රී ලංකාවේ නීති පද්ධතිය කෙරෙහිම පවතින විශ්වාසය පළුදු කර ඇති මෙම ⁣තත්වයට අදාල වාර්ථා හා නිර්දේශ වහාම ප්‍රසිද්ධ කරන ලෙස අප රජයට බල කර සිටිමු. මෙවැනි අත්තනෝමතික ක්‍රියාවන්ට එරෙහිව සිදුකරන අපගේ අරගලය ජයග්‍රහණය කරවීමට පෙරට එන ලෙස සමස්ථ තරුණ ප්‍රජාවගෙන් හා රට වැසියන්ගෙන් අප ඉල්ලා සිටිමු. "

තරුණ නීතිඥ එකමුතුව සමගි තරුණ බලවේගය

රනිල්ගේ සූදානම වෙනස් කරන්න බැරි වෙන්න : 19 යළිත් ගේන්න !

මින් ඉදිරියට කිසිවෙකුටත් වෙනස් කළ නොහැකි පරිදි 19 වන ව්‍යවස්ථා සංශෝධනය යළි ගෙන ඒම තම අනාගත දේශපාලන සැලැස්ම බව, හිටපු අග්‍රාමාත්‍ය , එක්සත් ජාතික පක්ෂ නායක පාර්ලිමේන්තු මන්ත්‍රී රනිල් වික්‍රමසිංහ පවසයි .

ඒ නෙත් නිව්ස් සමග සිදුකර ඇති සාකච්ඡාවකදීය.

පවතින කොරෝනා තත්ත්වය හමුවේ බලය අත්පත් කර ගැනීම පෙසක තබා තමන් තනිවම සිය අරමුණ වෙනුවෙන් කටයුතු කරන බවත් ඔහු එහිදී සඳහන් කරයි.

අදාළ සම්මුඛ සාකච්ඡාව පහත දැක්වෙයි.

තවත් ප්‍රදේශ කිහිපයක් හුදකලා කෙරේ

අද (26) අලුයම 6.00 සිට ක්‍රියාත්මක වන පරිදි තවත් ප්‍රදේශ කිහිපයක් හුදකලා කිරීමට තීරණය කර ඇත.

කෑගල්ල දිස්ත්‍රික්කයේ ග්‍රාම නිලධරී වසම් 4 ක් හුදකලා කර තිබේ. කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානී, යුද හමුදාපති ජෙනරල් ශවේන්ද්‍ර සිල්වා පැවසුවේ, මාවනැල්ල, දෙහිඕවිට සහ කෑගල්ල යන පොලිස් බල ප්‍රදේශවල ග්‍රාම නිලධරී වසම් 4 ක් අද (26) උදෑසන 6.00 සිට එලෙස හුදකලා කළ බවයි.

මේ අතර කිරිබත්ගොඩ, නාහේන ග්‍රාම නිලධාරී වසමේ හුදෙකලා බව ඉවත් කර තිබේ.

cf20aefd isolation 2021 06 26 page 001

 

සිවිල් සමාජ ක්‍රියාකාරී අසේල සම්පත්ව නාඳුනන පිරිසක් පැහැරගෙන !

ආපනශාලා හිමියන්ගේ සංගමයේ සහ මහජන අයිතීන් සුරැකීමේ පදනමේ සභාපති වන අසේල සම්පත්ව පැහැරගෙන ගොස් ඇති බවට ඔහුගේ පවුලේ සාමාජිකයන් චෝදනා කර සිටියි.

වෑන් රථයකින් පැමිණි අපරාධ පරීක්ෂණ දෙපාර්තුමේන්තුවේ යැයි හඳුන්වාගත් පුද්ගලයින් 20ක් පමණ මෙසේ ඔහුව රැගෙන ගිය නමුත් ඔවුන් නිල ඇඳුම් නොපැළඳ සිටි බවත් ඔවුන් අසේල සම්පත්ව එසේ රැගෙන යාමට කිසිඳු හේතුවන් නොදැන්වූ බවත් ඔහුගේ දියණිය සමාජ මාධ්‍ය ඔස්සේ සජීවී ලෙස පෙනී සිටිමින් ප්‍රකාශ කළාය.

ඇය ඇතුළු පවුලේ සාමාජිකයින් පිරිසක් මේවනවිට පිළියන්දල පොලිසිය වෙත ගොස් මෙම පැහැරගැනීම සම්බන්ධයෙන් පැමිණිලි කර තිබේ.

විමල්ගේ තුනක් බැසිල් ගලවලා ?

ආණ්ඩුව තුළ නිර්මාණය කරගෙන තිබෙනකුඩා පක්ෂ එකමුතුවෙන් පක්ෂ කිහිපයක්ම ඉදිරි සති දෙක තුළ එයින් ඉවත්වීමට සූදානම් වන අතර විමල් වීරවංසගේ පක්ෂයේ මන්ත්‍රීවරුන් තිදෙනෙකුද ඒ සමගම පොදුජන පෙරමුණේ සාමාජිකත්වය ලබාගැනීමට සූදානම් වන බවට තොරතුරු අනාවරණය වේ. 

රත්නපුර දිස්ත්‍රික්කය නියෝජනය කරන වීරවංසගේ මන්ත්‍රීවරයා, මහනුවර දිස්ත්‍රික්කයේ මන්ත්‍රීවරයා සහ තවත් මන්ත්‍රීවරයෙකු එම පක්ෂයෙන් ඉවත්වීමට සූදානම් බවද අනාවරණය වේ.

බැසිල් රාජපක්ෂ පාර්ලිමේන්තු මන්ත්‍රීවරයෙකු වශයෙන් දිවුරුම්දීමට සමගාමීව ආණ්ඩුව අභ්‍යන්තරයේ මෙම දේශපාලන වෙනස්වීම සිදුකෙරෙමින් පවතී.

වාසුදේව නානායක්කාර සහ මුස්ලිම් මන්ත්‍රීවරයෙකු කුඩා පක්ෂ සංවිධානයෙන් ඉවත්වීමට මේ වනවිටද කැමැත්ත පල කර ඇත. එසේම අතුරලියේ රතන හිමි වෙත මන්ත්‍රී ධුරය තහවුරු කර ගැනීම සඳහා කටයුතු කරමින් පවතින බවද හෙළි වේ. ශ්‍රී ලංකා කොමියුනිස්ට් පක්ෂය මේ වනවිට නව තත්වය පිළිබඳව කිසිදු ස්ථාවරයකට පැමිණ නැත.

මේ අනුව ඉදිරි සති කිහිපය තුළ බැසිල් රාජපක්ෂ තමන්ට විරෝධීව සිටින කුඩා පක්ෂවල මන්ත්‍රීවරුන් තමන්වෙත දිනාගැනීමේ මෙහෙයුම සාර්ථක කරගනු ඇති බවට අනාවැකි පල වී තිබේ.

(Lanka truth )

MSC මෙසීනා නැවෙත් ගින්නක් !

Express pearl නෞකාවේ ගින්න සමගින් මෙරට සමස්ත සාගරික කලාපයටම අති දැවැන්ත පාරිසරික හානියක් සිදු වී එහි උණුසුම පහව යනටත් පෙර කොළඹ වරායේ සිට සිංගප්පුරුව බලා යාත්‍රා කරමින් තිබු MSC MESSINA නම් බහාලුම් ප්‍රවාහන නෞකාවේ එන්ජිම අයත් කුටියේ ගින්නක් හටගෙන ඇති බව වාර්තා වෙයි.

කිරින්ද මහා රාවණ ප්‍රදීපාගාරයේ සිට නාවික සැතපුම් 480ක් දුරින් වූ මුහුදු ප්‍රදේශයේදී නෞකාවේ ගින්න හටගෙන තිබේ.

නාවික හමුදා මාධ්‍ය ප්‍රකාශක, කපිතාන් ඉන්දික ද සිල්වා සඳහන් කළේ අදාළ නෞකාවේ එන්ජින් කාමරයේ එම ගින්න හටගෙන ඇති බවට වාර්තාවී ඇති බවය.

ඒ අනුව අදාළ නෞකාව අසලින් ගමන්ගන්නා නෞකාවලට මේ පිළිබඳව දැනුම් දී ගින්න නිවීම සඳහා සහයෝගය ඉල්ලා ඇති බව නාවික හමුදාව සඳහන් කළේය.

මාධ්‍ය වාර්තා වැඩිදුරටත් සඳහන් කරන්නේ නෞකාව ඊයේ (24) රාත්‍රියේ මෙලෙස ගිනි ගැනීමට ලක්ව ඇති බවය. මෙම නෞකාව කොළඹ සිට සිංගප්පූරුව බලා ගමන් කළ ලයිබීරියා ධජය සහිත භාණ්ඩ ප්‍රවාහන නෞකාවකි.

සුමුදු මද්දුමආරච්චි

මිලානෝ.

ඉතාලිය.

වැලිකඩ සහ මහර මරණ දඬුවම ලැබූ සිරකරුවන් : ආහාර වර්ජනයක !

මහර සහ වැලිකඩ බන්ධනාගාරවල මරණ දඬුවම හිමිවූ රැඳවියන් පිරිසක් ආරම්භ කර ඇති ආහාර වර්ජනය තවදුරටත් ක්‍රියාත්මක බව වාර්තා වෙයි.

වාර්තා වන ආකාරයට තමන්ට ලබා දී ඇති මරණ දඞුවම ජීවිතාන්තය දක්වා වු සිරදඬුවමක් බවට පත් කිරීම ඔවුන්ගේ ඉල්ලීම වී ඇති බවත් වාර්තා වෙයි.

විරෝධතාවයේ නිරත රැඳවියන් පිරිසක් වැලිකඩ බන්ධනාගාරයේ වහලය මතට ද නැග සිටි බවත් වාර්තා වෙයි. භාරත ලක්ෂ්මන් ප්‍රේමචන්ද්‍ර ගේ ඝාතනය සම්බන්ධව මරණ දඬුවම ලබා සිටි දුමින්ද සිල්වා ඊයේ (24) ජනාධිපති සමාව යටතේ නිදහස් කරනු ලැබිණ.

සිරගෙවල් - නීතිය - විනිසුරුවරුන් කුමකටද? : හිරුණිකා ජනාධිපතිට ලියයි !

ගරු ජනාධිපතිතුමනි,
 
"ඔබතුමාගේ සහෝදරයා වන හිටපු ජනාධිපති මහින්ද රාජපක්ෂ මහතාගේ වෘත්තීය සමිති කටයුතු පිළිබඳ උපදේශකවරයා මෙන්ම හිටපු පාර්ලිමේන්තු මන්ත්‍රීවරයකු ද වූ භාරත ලක්ෂ්මන් ප්‍රේමචන්ද්‍රගේ දියණිය මම වෙමි. " යනුවෙන් ආමන්ත්‍රණය කරමින් දුමින්ද සිල්වා ගේ නිදහස සම්බන්ධව ප්‍රතිචාර දක්වමින් හිටපු පාර්ලිමේන්තු මන්ත්‍රීනි හිරුණිකා ප්‍රේමචන්ද්‍ර විසින් ජනාධිපති ගෝඨාභය රාජපක්ෂ වෙත ලිපියක් යොමුකර ඇත.
 
"එක රටක් එක නීතියක් යන තේමාව යටතේ ඔබ ජනාධිපතිවරණය ජයග්‍රහණය කරන ලදී. එහෙක් අද එම තේමාව හුදෙක් මැතිවරණය ජයග්‍රහණය සඳහා යොදාගත් වචන පෙළක් පමණි. " යනුවෙන් සහ "මෙසේ වැරදිකරුවන් හිතුමතේ ජනාධිපති සමාව යටතේ නිදහස් කරනවා නම් සිරගෙවල් කුමකටද? නීතිය කුමකටද? විනිසුරුවරුන් කුමකටද?" යනුවෙන් ද  හිටපු මන්ත්‍රීවරිය විසින් ජනාධිපතිගේ ක්‍රියාව ප්‍රශ්න කර ඇත.
 
 අදාළ ලිපියේ වැඩිදුරටත් මෙසේද සඳහන් කර ඇත.
 
"විනිසුරුවරුන් හත් දෙනකුගේ තීන්දු ඉවත දම්මින් ඔබ විසින් අද නිදහස් කරන ලද දුමින්ද සිල්වා ඉදිරියේදී මහ ඇමැති අපේක්ෂකයකු ලෙස හෝ දේශපාලනයට ගෙනැවිත් ඔහු ජයග්‍රහණය කළ ද මම පුදුම නොවෙමි.
 
 හේතුව මේ රට දැන් ස්වාමියා විසින් විනාශය කරා දක්කන වහලුන් සිටින රටක් බවට පරිවර්ථනය වී ඇති බැවිනි. ජනතාව මෙම අසාධාරණකම් සදාකල නොඉවසනු ඇත. ඔබ පාලනය යටතේ වැඩෙමින් පවතින මෙම අයුක්තිය නැමැති යදම් බිඳදා මහජනතාව ඔබට එරෙහිව නැගී සිටින දිනය වැඩි ඈතක නොවන්නේය. එවැනි අනාගතයක ඔබ වැනි කශේරුකාවක් නොමැති නීතියට ගරු කිරීමක් නැති පුද්ගලයන්ට කිසිදු දේශපාලන අනාගතයක් නොමැති වනු ඇත."
 
ස්තුතියි.
 
මෙයට.
විශ්වාසි.
 
හිරුණිකා ප්‍රේමචන්ද්‍ර
ඝාතනය කරන ලද භාරත ලක්ෂ්මන් ප්‍රේමවන්ද්‍රගේ දියණිය,
 
අදාළ සම්පූර්ණ ලිපිය පහත දැක්වෙයි.
 FB IMG 1624599814113

FB IMG 1624599824549

FB IMG 1624599833988

FB IMG 1624599838873

 
 

දුමින්දගේ නිදහස : එජාපයත් ජනාධිපතිගෙන් ප්‍රශ්න කරයි !

මිනීමැරුමකට වැරදිකරු වී 2016 දී මරණ දඩුවම් නියම වූ හිටපු පාර්ලිමේන්තු මන්ත්‍රී දුමින්ද සිල්වා නිදහස් කිරීමට ගත් තීරණය සම්බන්ධයෙන් එක්සත් ජාතික පක්ෂය ජනාධිපතිවරයාගෙන් ප්‍රශ්න කර නිවේදනයක් නිකුත්කර ඇත.  

ජුනි 24 නිකුත් කරන ලද ජනාධිපති සමාව ලැයිස්තුවට හිටපු පාර්ලිමේන්තු මන්ත්‍රීවරයා ඇතුළත් කිරීමට ගත් තීරණය ජනාධිපතිවරයා විසින් පැහැදිලි කළ යුතු බව එහි සඳහන්ය  එසේම ජනාධිපති සමාව සඳහා සුදුසුකම් ඇති අය තීරණය කිරීමේදී භාවිතා කරන නිර්ණායක මොනවාද? යනුවෙන් විමසා ඇති අතර වැඩිදුරටත් මෙසේද සඳහන් කර ඇත.  

මෙම විශේෂිත නඩුව විශාල මහජන උනන්දුවක් ඇති වූ අතර, එම සමාව ලබා දීමට ඔහු තෝරාගත්තේ මන්දැයි ජනාධිපතිවරයා රටේ පුරවැසියන්ට පැහැදිලි කළ යුතුය. 

ජනාධිපති සමාව අසීමිත ලෙස භාවිතා කිරීම තුළින් අධිකරණය අවභාවිතා නොකරන ලෙස එක්සත් ජතික පක්ෂය තවදුරටත් ජනාධිපතිවරයාගෙන් ඉල්ලා සිටී. 

එවැනි සමාව නිකුත් කිරීමේදී අනුගමනය කළ යුතු නිශ්චිත ක්‍රියා පටිපාටියක් තිබේ, මෙම ක්‍රියා පටිපාටිය මෙම තත්වය තුළ අනුගමනය කළේද?

 රට තුළ අධිකරණයේ අඛණ්ඩ ස්වාධීනත්වය සඳහා වූ කැප වන බව එක්සත් ජාතික පක්ෂය යළිත් වරක් ප්‍රකාශ කරයි.

දුමින්දගේ නිදහසේ විස්තරය දෙන්න : නීතිඥ සංගමය ජනාධිපතිගෙන් ඉල්ලයි !

මිනීමැරුමකට සම්බන්ධ වැරදිකරුවකු වන දුමින්ද සිල්වාට සමාව ලබා දීමේදී නියමිත ක්‍රියාදාමය අනුගමනය කළේද යන්න  ප්‍රශ්න කරමින් ශ්‍රී ලංකා නීතීඥ සංගමය ජනාධිපතිවරයාට ලිපියක් යොමු කර ඇත.

ශ්‍රී ලංකා නීතිඥ සංගමය නිකුත්කළ නිවේදනයක මේ බව සඳහන් කර ඇත.

ඊට අනූව මිනීමැරුම් වැරදිකරුවෙකුට සමාව දෙන විට ඒ සඳහා නඩු විභාගයේ විනිසුරුවරු, නීතිපති සහ අධිකරණ අමාත්‍යවරයාගේ නිර්දේශ කැඳවිය යුතු බව නීතිඥ සංගමය පෙන්වා දෙයි.

 එමෙන්ම, ජනාධිපති සමාව සඳහා දුමින්ද සිල්වා තෝරාගත් පදනම, කරුණු සහ ඔහුට විශේෂයෙන් සමාව ලැබීමට තරම් කැපී පෙනෙන හේතූන් කවරේද යන්න මහජනතාව දැනගත යුතු බවත් ශ්‍රී ලංකා නීතීඥ සංගමය සිය ලිපියෙන් ජනපතිවරයා වෙත අවධාරණය කර තිබේ.

අදාළ නිවේදනය පහත දැක්වෙයි.

bar association 1

bar association 2

දුමින්ද නිදහස් කරාට ඇමරිකාවේ විරෝධය !

ඇමරිකා එක්සත් ජනපදයද හිටපු පාර්ලිමේන්තු මන්ත්‍රී  දුමින්ද සිල්වාගේ නිදහසට විරෝධය පල කර ඇත.

ඒ බව  කොළඹ සිටින එක්සත් ජනපද තානාපතිනි අලානා ටෙප්ලිට්ස් ට්විටර් මගින් නිවේදනය කර තිබුණි. 

“ත්‍රස්තවාදය වැළක්වීමේ පනත යටතේ රඳවා තබාගෙන සිටි සිරකරුවන් කලින් නිදහස් කර යැවීම ගැන අපගේ ප්‍රසාදය හිමිවන අතර, ශ්‍රේෂ්ඨාධිකරණය විසින් 2018 දී අනුමත කරන ලද දඬුවමකට යටත් කොට සිටි දුමින්ද සිල්වා නිදහස් කර යැවීම නීතියේ ආධිපත්‍යය අනතුරේ හෙලයි,” යනුවෙන් එහි සඳහන් කර ඇත.

detrt

ශිරාල්ගේ රනිල් විරෝධය ඉවරයි : අපරාදේ අවුරුදු 10ක් !

සජිත් ප්‍රේමදාස වෙත එක්සත් ජාතික පක්ෂයේ නායකත්වය ගෙනදීමට පාගමන් ගිය, සජබ පිහිටුවීමටත් සැලකිය යුතු වැඩකොටසක් කළ නීතිඥ ශිරාල් ලක්තිලක තමන් දැන් රනිල් විරෝධියෙක් නොවන බව ප්‍රසිද්ධියේ සඳහන් කර ඇත.
ඒ සිය  ෆේස්බුක් ගිනුමෙහි සටහනක් තබමින්ය.
එම සටහන පහත දැක්වෙයි.
මම දැන් රනිල් විරෝධී නැත !
මම දැන් රනිල් විරෝධී නැත!  
හැබැයි නැවත රනිල්ගේ ඔඩොක්කුවට යන්නේ ද නැත!
රනිල් හා එජාපය අවශ්‍යවන්නේ ප්‍රජාතන්ත්‍රවාදය ජයගැනීමටය!
අප විසින් රනිල් මහතා පාර්ලිමේන්තුවේ දී දැක්වු අදහස් පිලිබඳව ප්‍රසාදයෙන් කතා කිරීම පිලිබඳව ඇතමුන් කුපිතවී ඇති බවක් ඊට බුකියේ දැක්වු ප්‍රතිචාර තුලින් පෙනෙන්ට තිබේ.
මම අදටත් රනිල් සම්බන්දව විසම්මුතිකයෙකි. එසේම රනිල්ට පක්ෂව කතා කොට සජිත්ට විරුද්ධවිමට හෝ රනිල් හා සජිත් කොටවා චම්පිකට වාසියක් ලබා දීමට මගේ කිසිදු බලාපොරොත්තුවක්ද නැත.
එසේම ඇතමුන් කියන පරිදි අප විසින් මා මෛත්‍රී ජනාධිපති සමග කටයුතු කරන සමයේ මෛත්‍රී රනිල් කෙටවීමට කිසිදා කටයුතු කර නැත. පිරිමියකු හා ප්‍රතිපත්ති ගරුක දේශපාලන අදහස් දරන්නකු වන මම එවැනි කුඨ ක්‍රියාවල යෙදී නැත.
මා දේශපාලනයේ යෙදෙන්නේ ද අදහස් දක්වන්නේද වාසි තකා නොවේ. අනාගතයටත් එය එසේමය.
දේශපාලනය විචාරකයකු ලෙස අප සිදු කලේ රනිල් මහතා පාර්ලිමේන්තුවේදී සිදු කල කතාවේ හරය අගයීමට ලක් කිරිම පමනකි. 
මගේ විචාරනයට අනුව රනිල් මතු කලේ කේන්ද්‍රීය දේශපාලන ප්‍රශ්න දෙකකි. එය වර්ථමාන දේශපාලනයේ හරයට සම්බන්ද වන ප්‍රකාෂ දෙකක් වන බව අපගේ හැඟීම වන්නේය. 
රනිල්ගේ ප්‍රකාෂයේ පලමු හරය ලෙස ඉදිරියට ගතහැක්කේ ඔහුගේ පහත ප්‍රකාෂයෙනි:
1. රට බංකොලොත්වෙන්න යනව නම් IMF එකත් එක්ක කතා කරන්න එහෙම නැතිනම් විකල්පය දක්වන්න.
සැබවින්ම ගත් කල රට බංකොලොත්විම තව මාස ගනනනාවක් පිලිබඳ ප්‍රශ්නයක් නම් ( අප එසේ සඳහන් කරන්නේ අතිශය කම්පාවෙන් යුතුවය) අප ඉන් මිදීමට ඇති මග පිලිබඳව වගකිව යුතු පුරවැසියන් ලෙස කතිකාවක් ඇති කරගතයුතුව තිබේ. අපට අනුව ඉන් මිදීමට අපට සොයා බැලිය යුතු ඇති මාර්ග 3ක් වන්නේය.
ඉන් පලමු වැන්න වන්නේ රනිල් කියන IMF මාර්ගයයි. දෙවැන්න චීන මාවතයි. තුන්වැන්න විසඳුමක් නොමැති අගාධයට අප රැගෙන යන මාවත වන්නේ සිම්බාබ්වේ මාවතයි. 
ඉදින් රනිල් හරියට හො වැරදියට පලමු වරට IMF එක සමග ගනුදෙනු කරන්නට යැයි කීම නිර්භීත සහ ප්‍රතිපත්තිමය අවංක භාවයක් ප්‍රකාෂ කිරීමක් යයි මම විශ්වාස කරමි. එසේ නම් රනිල්ට එසේ සැලියුට් කිරීම වරදක් යයි මම නොසිතමි.
රනිල් පාර්ලිමේන්තුවේදී ඉදිරිපත් කරන ලද දෙවැනි කරුනද අපේ රට ප්‍රජාතන්ත්‍රවාදී අනාගතයට දැවැන්ත ලෙස වැදගත් වන්නකි. එනම්;
2. කොවිඩ් මර්ධන ක්‍රියාවලිය කාර්ය සාධන බලකායකින් මෙහෙයවන එක වැරදි වගේම අසාර්තක බවත් එය මෙහෙයවීමේ බලතල කැබිනට්ටුව අතට ගතයුතු බවයි. රනිල් අසන්නේ දෙපාර්තමේන්තු ප්‍රධානියකු වන හමුදාපතිවරයා ඔහුට ඉහලින් ඇති අනෙක් අමාත්‍යංශ ප්‍රධානීන්ට අනදෙන්නෙ සහ අන ක්‍රියාත්මක කරන්නේ කෙලෙසටද යන්නයි
මෙම ප්‍රකාෂය අප සැලකිල්ලට ගතයුත්තේ කොවිඩ් මර්ධන ක්‍රියාවලිය තුල සිදුවු වරදක් හෝ අඩුපාඩුවක් ලෙස නොවේ. එය දැවැන්ත දේශපාලනික ප්‍රශ්නයක් ලෙසටය.
රනිල් අපට මතක් කර දෙන්නේ පසුගිය මාස 18 ක කාලය තුල කොවිඩ් මර්ධනය අරබයා කැබිනට්ටුවක් මගින් තීරන ගන්නා ප්‍රජාතානත්‍රික රජයක පාලනයක් අප රට තුල නොපැවති බවයි. (එම පාලනයේ දිගුවක් ලෙස මුදල් අමාත්‍යංශය මගින් ඔන්ලයින් ක්‍රමයට අරක්කු විකිනීම නවත්වනේ ද හමුදාපති තුමාය)
එසේම රනිල් අනතුරු අඟවන්නේ අනාගත අධිකාරීවදී සිවිල් මිලිටරි බලයක පෙරනිමිති දැන් දැන් පහල වෙමින් පවතින බවයි. 
ඒ සඳහා ඔහු උදාහරනයකට ගෙන එන්නේ ජාත්‍යන්තර ආයෝජන සමලුවේ කතිකයකු ලෙස හමුදාපතිවරයාගේ සහභාගීත්වයයි. 
සැබවින්ම අප ඉහතින් සඳහන් කල බංකොලොත්භාවයට විකල්පයක් ලෙස පවතින චීන මාවතේ ගමන් කිීම සඳහා හෝ විසඳුමක් නොමැති කරවටටක් එරුන සිම්බාබ්වේ මාවතේ ගමන් කිීමට වර්තමානජනාධිපතිවරයාට අවශ්‍ය අධිකාරීවාදී පාලන ක්‍රමය කොරෝනා මර්ධනය හා කලමනාකරනය මුවාවෙන් මේවනවිටත් ජනාධිපතිවරයා අත්හදා බලමින් බලමින් සිටින බව රනිල් අපට එය සිහිපත් කර සිටී.
රනිල් මහතා පාර්ලිමේන්තුව තුලදී ආයතන ප්‍රධානියකු වන හමුදාපති වරයාට අමාත්‍යංශ ලේකම් වරුන්ට අනදිය හැකිදැයි අසන්නේ මෙම සංකීර්න රාජ්‍ය පාලන උභතෝකෝටිකය ඉස්මතු කරදීමටය.
ඉදින් එසේ රටක ප්‍රජාතන්ත්‍රවාදී අනාගතය  අනතුරේ වැටෙමින් තිබෙන තත්වයක් පෙන්වාදීම පිලිබඳව රනිල්ට  සැලියුට් කිරීමක් වරදක් ලෙස මම නොදකමි.
මේ ප්‍රශ්න දෙකම වර්ථමාන විපක්ෂයට අහුනොවුනු නමුත් මතු කලයුතුව තිබු කේන්ද්‍රීය ප්‍රතිපත්තිය ප්‍රශ්න වන්නේ යයි මාගේ මතයයි. 
ඉතින් ඒ ගැන කතාකිරිම රනිල්ගෙ ඔඩොක්වට යාමක් නොවේ.  එසේම සජිත් විවේචනය කිරීමක් ද නොවේ. එය ඇත්ත ඇති සැටියෙන් දැකිමකි
අවාසනාවකට එදා රනිල් අසල කැරකුන ගොට්ටන් පිරිසක් මෙන්ම අද දවසේ සජිත් වටාත් ගොට්ටන් පිරිසක් සංවිධානය වී ඇති සෙයක් පෙනෙන්නේය. අද අපට අවලාද කියන රනිල් විරෝධී සජිත් වාදීන් එදා රනිල් ට එරෙහිව අප අරගල කරන කල හිටියේ තම වල්ගය දෙපැරැන්දේ දමාගෙනය.
අපහට කියන්නට තිබෙන්නේ අද ඔවුන් සජිත්වාදී බව පෙන්වීමට දැන් රනිල්ට එරෙහිව විපක්ෂය තුල පෙන්වන මාරානතික විරෝධය අපට කරුනු බොහෝමයක් නිසා අදාල නැති බවයි.
අපට දැන් රනිල් සමග බේරාගන්නට ගනුදෙනුවක් නොමැති බව කිවයුතුව තිබේ. 
රනිල්ට එරෙහිව ජනමතයක් ඇතිකොට සජිත්ව සමාජයයේ කරලියට ගෙනාවේ අපය. එය දස අව්රුද්දක ප්‍රතිපලයකි.
එසේම එය දැවැන්ත දේශපාලනික කැප කිරීම් හා සිරගත වීම් හරහා දිනාගත් ජයග්‍රහනයකි. 
නමුත් දැන් අපට අවශ්‍යව තිබෙන්නේ ප්‍රජාතන්ත්‍රවාදය ජයග්‍රහනය කරවීමටය. සජිත් ජනාධිපති කිීම අපේ කාර්යක් නොවේ. එය ජනතාවගේ කාර්යකි.
ප්‍රජාතන්ත්‍රවාදය ජයග්‍රහනය කිරීමෙන් තොරව මීලඟ මැතිවරනයක් ගැන සිතීමෙන් පලක්වන්නේ නැත.
ප්‍රජාතන්ත්‍රවාදය ජයග්‍රහනය කිරීමට සජිත් හා රනිල් නැවත එක්විය යුතුය. එනම් ලිබරල් කඳවුර එක කොඩියක් යටතට ගතයුතුය.
එවන් සන්දර්භයක් තුල මට රනිල් හා පසමිතුරු බවක් තවදුරටත් අවැසි නැත.
සංස්කාරක සටහන : ශිරාල්ගේ රනිල් විරෝධය ඉවරයි !
මෙහෙම සටහනක් තබන්න හිතුනේ නීතිඥ ශිරාල් ලක්තිලක තමන්ගේ සටහන ආරම්භයේ තබා තිබූ "මම දැන් රනිල් විරෝධී නෑ !" වචන නිසාය.
 ඒ වගේම ශිරාල් ගේ සටහනේ මෙන්න මේ උපුටා ගැනීම හැර අනිත් සියල්ලත් පැහැදිලිය. 
රනිල්ට එරෙහිව ජනමතයක් ඇතිකොට සජිත්ව සමාජයයේ කරලියට ගෙනාවේ අපය. එය දස අව්රුද්දක ප්‍රතිපලයකි.
එසේම එය දැවැන්ත දේශපාලනික කැප කිරීම් හා සිරගත වීම් හරහා දිනාගත් ජයග්‍රහනයකි. 
ශිරාල් ලක්තිලක මේ කියන්නේ මොකක්ද ? ශිරාල් ලක්තිලක මේ කියන්නේ සජිත් ප්‍රේමදාස ව මේ මොහොතේ විපක්ෂ නායක කිරීම හෝ පසුගිය ජනාධිපතිවරණය අවස්ථාවේ අපේක්ෂකයා කිරීම ජයග්‍රහණක් කියාද ? පැහැදිලි නැත.
අපට අනුව නම් වසර 10 ක් තිස්සේ සිදුව ඇත්තේ ශිරාල් ලක්තිලක ට රනිල් වික්‍රමසිංහ වෙනුවට විකල්පයක් සොයාගැනීමට නොහැකි වීමය.
ශිරාල් ලක්තිලක පළමුවෙන් එක්සත් ජාතික පක්ෂය තුළ අභ්‍යන්තර සටනක් දියත්කර සජිත් ප්‍රේමදාස ව පක්ෂ නායකත්වය ට ගෙන ඒමට උත්සාහ කළේය. ඒ සිවිල්  යුද්ධය කාලයේය.  මහින්ද ජනාධිපති හිටියේ රටේම අප්පච්චි වෙන්න ඔන්න මෙන්නය.
නමුත් සජිත්ව නායකයා කරන්න ලැබුණේ නැත. ඒ වැඩේ අවසන් වුනේ ශිරාල් එක්සත් ජාතික පක්ෂයෙන් එළියට යාමෙන්ය. ඒ ගිය ශිරාල් නැවතුණේ මෛත්‍රී ළඟය. මෛත්‍රී ව්‍යවස්ථා විරෝධී කුමණ්ත්‍රණ ආණ්ඩුව හැදූ අතර ශිරාල් හිටියේ ඒ දේශපාලන කුමන්ත්‍රණය මෙහෙයවූ ජනාධිපතිගේ උපදේශකයකු ලෙසය. එදාා ශිරාල් මෛත්‍රීගෙන් සමුගත්තේ නැත. ශිරාල් දිගටම මෛත්‍රී ළඟ සිටියේය.
යළිත් ජනාධිපතිවරණයට ඉදිරිපත් වීමට නොහැකි වූ මෛත්‍රී පසුගිය ජනාධිපතිවරණය අවස්ථාවේ මහින්දගේ නායකත්වය පිළිගෙන දන ගැසුවේය. ශිරාල් මහින්ද ගේ නායකත්වය පිළිගෙන ගියේ නැත. ඒ ගෞරවය ශිරාල් ට හිමිය.
එහෙත් ශිරාල් කාලයක් දේශපාලන නායකත්වයේ තියාගෙන සිටි මෛත්‍රී, ශිරාල් ලක්තිලක ගේ සියළු දේශපාලන විශ්වාස සහ පෙනීසිටිම් වල ප්‍රතිවිරෝධය පිළිගෙන එහි ජයග්‍රහණය වෙනුවෙන් කැපවිය. ඔහු දැනුත් එතනය. ඒ කියන්නේ ශිරාල්ට එතන තවත් පෑහීමක් නැති බවය.
සජිත්ව එජාප  නායකයා කරන්න ගිහින් ශිරාල්ට පක්ෂයෙන් එළියට බහින්න සිදුවිය. ශිරාල් ගියාට සජිත් එළියට ආවේ නැත. එහෙත්  ශිරාල්ලා කෙසේ හෝ වෙහෙසී සජිත්ව ජනාධිපතිවරණයට ගෙනාවේය. ඒ රනිල් එන එක වලක්වමින්ය. ජනාධිපතිවරණයන් සජිත්ව කෙසේහෝ දිනවන්නත් ශිරාල්ලා උත්සාහ කළේය. 
සජිත් ජනාධිපතිවරණය පරාදය. (ඒ පරාජය සිදුවීමට බොහෝදුරට ඉඩතිබුවක් මිස සජිත්ගේ පෞද්ගලික අර්බුදයක් නොවේය. )
පසුව ශිරාල් ලක්තිලක සජිත් ප්‍රේමදාසව එක්සත් ජාතික පක්ෂයෙන් ඉවත් කරගෙන සමගි ජනබලවේගය හැදුවේය. සජිත් ප්‍රේමදාස මැතිවරණ පරාජයෙන් පසුව විපක්ෂ නායක විය. අඩුවකට දැන් සජිත්ට නැත්තේ ජනාධිපති ධූරයය.
එජාප ජන්ද පදනම උස්සා හැදූ පක්ෂයක නායකයා සජිත්ය. විපක්ෂ නයකත් සජිත්ය. හරි නම් ශිරාල් සතුටෙන් සූදානම් විය යුත්තේ සජිත් 2024 ජනාධිපති කරන්නය. එහෙත් දැන් සජිත් ළඟ ශිරාල් නැත. දැන් ශිරාල්ව  අපි දකින්නේ පාඨලී සමඟය.
වඩාත් සිත්ගන්නා සුළු කරුණ වන්නේ රනිල් තවමත් ඉස්සර රනිල්ම වීමය. ඔහුගේ දැක්මේ වැඩ කලාවේ , අදහස් වල විශේෂ වෙනසක් දකින්න නැත. සජිත්ගේද එසේමය. අදටත් අදහස් සහ වැඩ කලාව තුළ අපි දකින්නේ සිරිකොත ඉස්සරහා මහින්ද තාර දම්මවන විට හිටපු සජිත්ය. වෙනසකට ඇත්තේ ඔහු අද පක්ෂයක නායකයකු සහ විපක්ෂ නායක ලෙස සිටීමය. රනිල් තනි මන්ත්‍රීවරයකු ලෙස දුර්වලව ඇත. නමුත් අදහස් අතින්, දේශපාලන පරිණත බව තුළ, ඔහු සමඟ හැරෙන්නටවත් සජිත්ට නොහැක. ඒ බව තනියම පාර්ලිමේන්තු පැමිණි රනිල් එක කතාවෙන් ඔප්පු කර පෙන්වීය. 
කොහොම නමුත් ශිරාල්ට වසර 10 කට පසුව සජිත්ව එපා වී ඇත. තනි මන්ත්‍රීවරයකු ලෙස පැමිණි රනිල් සමස්ථ විපක්ෂයට පමණක් නොව මහින්දටත් අවශ්‍ය තරමට "ලයින් එක" දුන්නේය. ඒ දැක්කේද සිරිකොත ඉස්සරහා මහින්ද තාර දම්මවන  විට හිටපු රනිල්ය. දැන් ශිරාල්ගේ රනිල් විරෝධය ඉවරය. ඒ ඉවර වෙනකොට ශිරාල්ගේ අවුරුදු 10 අපතේ ගොස් ඇතුවා පමණක් නොව, දුර්වල විපක්ෂ නායකයෙකුද ලැබී ඇත. 
වැඩේ කියන්නේ ශිරාල් "සජිත් අප්සෙට්" බවත් "රනිල්ට විකල්පය සජිත් නොවන බව" තේරුම් ගන්න වසර 10ක් ගිය එකය. ශිරාල් "රන්දිව පුවත්පතට ලියු "රැල්ල" ලිපි පෙළ, එදා රන්දිව කතුවැකියකින් සහ වෙනම ලිපියකින් ඔබේ  "රැල්ල" විවේචනය කළා මතකද ? ඒ මාධ්‍යවේදියාම මේ වෙබ් පිටුවෙන් අද  කියන්නේ, "ශිරාල්, අපිට ඕන විදියට නායකයාව හදාගන්න බෑ. නමුත් වඩාත් ගැළපෙන නායකයා තෝරගන්න අපිට පුළුවන්. කාවහරි අරගෙන කොහොම හරි නායකයා කරන්න යනවට වඩා මොකුත් නොකර සිටීමත් මාර වැඩක් (සජිත්). අපිට පහසුවෙන් හසුරවන්න පුළුවන් නායකයෙක් ගැන හීන දකින්න පුළුවන්. නමුත් ඒ නියම නායකයෙක් නෙවෙයි (මෛත්‍රී). ගෙවුණු වසර 10 ජයග්‍රහණයක් වෙන්නේ මෙන්න මේ සරල දේ ඔයා හරියට කියවගත්තොත්!" 
 

දෙහිවල තෝර් ගේ ෂීනාටත් කොරෝනා....

දෙහිවල සත්වෝද්‍යානයේ කොවිඩ් – 19 ආසාදනයවූ “තෝර්” නැමැති සිංහයාගේ ධේනුවටද ‘‘ෂීනා‘‘ කොරෝනා ආසාදනය වී ඇතැයි පරීක්ෂණවලදී තහවුරු වී තිබේ.

මේ තත්වය යටතේ එම සිංහ ධේනුවද හුදෙකලා කර ප්‍රතිකාර ලබා දීමට පියවර ගෙන ඇත.

සිංහ ධේනුවට කොවිඩ් ආසාදනය වී ඇතැයි තහවුරු වී තිබෙන්නේ පේරාදෙණිය පශු වෛද්‍ය පීඨය සහ රාගම වෛද්‍ය පීඨය කළ පරීක්ෂණවලදීය.

සිංහ ධේනුවට කොවිඩ් ආසාදනයවී ඇතත් සත්වයාගේ තත්ත්වය අයහපත් නැතැයිද සාමාන්‍ය පරිදි ආහාර අනුභව කරමින් කාලය ගත කරන්නේ යැයිද දෙහිවල සත්වෝද්‍යානයේ ප්‍රධානීහු පවසති.

දෙහිවල සත්වෝද්‍යානය මේ වනවිට වසා දමා තිබෙන අතර ඊට පිටතින් කිසිවකුත් ඇතුලුවීමද තහනම් කර ඇත.

යුක්තිය නැති රටකට හිරු පායන්නේ නැත : භාරතගේ බිරිඳ තැබූ ෆේස්බුක් සටහන !

මරණ දඬුවම නියමව සිටි හිටපු පාර්ලිමේන්තු මන්ත්‍රී ආර්. දුමින්ද සිල්වා නිදහස් කිරීම, ඝාතනය වූ හිටපු නියෝජ්‍ය අමාත්‍යවරයකු වූ භාරත ලක්ෂ්මන් ප්‍රේමචන්ද්‍ර ගේ බිරිඳ වන සුමනා ප්‍රේමචන්ද්‍ර ගේ විවේචනයට ලක්ව ඇත.
 
ඒ බව සඳහන් කරමින් සුමනා ප්‍රේමචන්ද්‍ර " ඝාතකයා නිදැල්ලේය. යුක්තිය නැති රටකට හිරු පායන්නේ නැත!" මැයෙන් සටහනක් සිය ෆේස්බුක් ගිනුමේ තබා ඇත.
 
අදාළ සටහන පහත දැක්වෙයි.
 
ඝාතකයා නිදැල්ලේය. යුක්තිය නැති රටකට හිරු පායන්නේ නැත!
 
‘නිදොස් කොට නිදහස් කිරීම‘ ආගමක් ද, ව්‍යවහාරය ද බවට පත් කොට ගත් ගෝඨාභය රාජපක්ෂ ආණ්ඩුව භාරත ලක්ෂමන් ප්‍රේමචන්ද්‍ර සොදුරු මිනිසාගේ ඝාතකයා විශේෂ ජනාධිපති සමාවකින් නිදහස් කර ඇත. 
 
අභියාචනාධිකරණයේ විනිසුරන් තිදෙනෙකු, ශ්‍රේෂ්ඨාධිකරණයේ විනිසුරන් පස් දෙනෙකු ලබා දුන් තීන්දුව ක්‍රියාත්මක නොවන රටක් බිහිවී තිබේ.  
 
සතා සිව්පාවාගේ සිට ලක්දන සැමට සෙත සැදූ උතුම් පොහෝ දිනයක දී, හෘද සාක්ෂියක් ඇති සෑම මිනිසෙකුම වැරදිකරු යැයි හොදින්ම දන්නා ඝාතකයා නිදහස් කර ඇත. ‘එක රටක නීති රැසක් ඇති බව‘ ක්‍රියාවෙන්ම ඔප්පු කරමින් ඝාතකයා නිදහස් කර ඇත.
 
රටක් ආදරය කළ භාරත ලක්ෂ්මන් ප්‍රේමචන්ද්‍ර නම් සොදුරු මිනිසා ද, තවත් සිංහල දමිත, දෙමළ කුමර් මුස්ලිම් හශිම් තිදෙනගේ ද සිරැරු පසාරු කර වෙඩි තැබූ ඝාතකයා නිදහස ලබා ඇත. 
 
ඝාතකයා නිදහස් කර, යුක්තිය සිරගත කොට ඇත. යුක්තිය නැති රටකට හිරු පායන්නේ නැත.
නීතියක් තිබූ රටක අපරාධයකට දඩුවම් ලැබිණි. 
 
 නීතියක් නැති රටක,  දඩුවමට යුක්තිය ඉටුනොවී අපරාධකරුවන් නිදහස් ව ඇත!  
 
සුමනා ප්‍රේමචන්ද්‍ර

Screenshot 20210624 133711

 

දුමින්ද නිදහස් !

හිටපු  පාර්ලිමේන්තු මන්ත්‍රී දුමින්ද සිල්වා ජනාධිපති සමාව ලැබීමෙන් පසු අද (24) නිදහස් වීමට ඉඩ ඇති බව දේශපාලන ආරංචි මාර්ග සඳහන් කරයි.

වාර්තා වන ආකාරයට ඔහුව නිදහස් කිරීම සඳහා අවශ්‍ය කටයුතු සම්පුර්ණ කර ඇත.

හිටපු පාර්ලිමේන්තු මන්ත්‍රී භාරත ලක්ෂ්මන් ප්‍රේමචන්ද්‍ර ඝාතනය   සම්බන්ධයෙන් කොළඹ මහාධිකරණය දුමින්ද සිල්වා ඇතුළු  කිහිප දෙනෙකු වැරදිකරුවන් වීමෙන් පසු 2016 සැප්තැම්බර් මාසයේදී මරණ දඬුවම් නියමකර  සිරගත කරන ලදී.

ඒ සම්බන්ධව අභියාචන සිදුකළත් එහිදි ද හිටපු පාර්ලිමේන්තු මන්ත්‍රී දුමින්ද සිල්වා වැරදිකරු ලෙස තීන්දු විය.

ඝාතනය වන අවස්ථාව වන විට හිටපු පාර්ලිමේන්තු මන්ත්‍රී භාරත ලක්ෂ්මන් ප්‍රේමචන්ද්‍ර එවකට ජනාධිපති මහින්ද රාජපක්ෂ ගේ වෘත්තීය සමිති කටයුතු සම්බන්ධව අධ්‍යක්ෂ ජනරාල් ලෙස කටයුතු කරමින් සිටි අතර දුමින්ද සිල්වා  සිටියේ ආරක්ෂක අමාත්‍යාංශ අධීක්ෂණ මන්ත්‍රී ලෙසය.

අද රාත්‍රී‍යේ සිට 25 අලුයම දක්වා යළිත් සංචරණ සීමා

අද (23) රාත්‍රී 10.00 සිට යළිත් රටපුරා සංචරණ සීමා ක්‍රියාත්මක වන බව යුද හමුදාපති ජෙනරල් ශවේන්ද්‍ර සිල්වා පවසයි.

 එලෙස පනවන සංචරණ සීමා එළඹෙන 25 වනදා එනම් සිකුරාදා අලුයම 4.00 දක්වා බලපැවැත්වෙන වේ.

අද (23) දිනයේ මේ දක්වා කොරෝනා ආසාදිතයින් 1,358 දෙනෙකු හඳුනා ගෙන තිබේ.

ඒ සමග මෙරටින් වාර්තා වන සමස්ත කොරෝනා ආසාදිතයින් සංඛ්‍යාව 245,271 ක් දක්වා ඉහළ ගොස් ඇත.

Page 237 of 241