පුවත්

ස්වර්ණවාහිනී නාලිකාවේ live@8 ප්‍රවෘත්ති විකාශය විකාශය නොවන බව මේ වන විට වාර්තා වී ඇත.

ස්වර්ණවාහිනී සේවකයන් විසින් අද (04) උදේ සිට සේවක වැටුප් වැඩි කර දෙන මෙන් ඉල්ලා සිටින අරගලයේ ප්‍රතිඵලයක් ලෙස මේ වන විට ස්වර්ණවාහිනිය කිසිදු වැඩසටහනක් විකාශය නොවන තත්ත්වයක් බවට පත්වී තිබේ.

ප්‍රධාන විධායක නිලධාරී සුදේව හෙට්ටිආරච්චි නමැත්තා ජනාධිපති මාධ්‍ය අධ්‍යක්ෂ ජනරාල්වරයා වශයෙන් සිටිමින් ස්වර්ණවාහිනියේ ප්‍රධාන නිලධාරියා වශයෙන් කටයුතු කිරීම ද සේවකයන් විසින් ප්‍රශ්න කරනු ලැබ ඇත.

එසේම සේවකයින් වෙත විවිධ බලපෑම් කළ බවටත් චෝදනා එල්ලවී තිබිණ .

සුදේව හෙට්ටිආරච්චි සහ රංගන සිල්වා ඉවත් කිරීමට මෙය අවස්ථාවක් කර ගැනීමට පාලනාධිකාරිය උත්සාහ කරන බවත් දැනගන්නට ඇත.

මේ අතර රංගන සිල්වා තමා වෙනුවෙන් හෝ වැඩසටහන් විකාශය කරන මෙන් සේවකයන්ගෙන් ඉල්ලා ඇති නමුත් සේවකයන් පවසා ඇත්තේ ඔබ වෙනුවෙන් අපි එසේ කරන්නේ කුමන හේතුවක් නිසාද යන්නයි.

Live @ 8 වෙනුවට, ඒ වෙලාවට අද ගියේ සිංදු !

විශේෂ වාර්තාකරුවෙකු විසිනි

ආර්ථික අර්බුදය විසඳීම සම්බන්ධයෙන් පැවති සාකච්ඡාවකදී සමගි ජනබලවේගය පක්ෂයේ නායක සජිත් ප්‍රේමදාස දක්වා ඇති අදහස් හේතුවෙන් පක්ෂ අභ්‍යන්තරයේ දෙදෙරීමක් සිදුවිය හැකි බව දේශපාලන ආරංචි මාර්ග පවසයි .

විශ්වාසවන්ත දේශපාලන ආරංචි මාර්ග සඳහන් කරන ආකාරයට , මෙතෙක් කාලයක් තිස්සේ සමගි ජනබලවේගය පක්ෂයේ ආර්ථික ප්‍රතිපත්තිය මුළුමනින්ම බැහැර කරමින් රාජ්‍ය ඒකාධිකාරයකට සමීප ඉතා පටු ආර්ථික වැඩපිළිවෙළක් පක්ෂයේ ප්‍රතිපත්තිය විය යුතු බවට අදාළ සාකච්ඡාව අවස්ථාවේ පක්ෂ නායක සජිත් ප්‍රේමදාස සිය ස්ථාවරය ලෙස ප්‍රකාශ කර ඇත .

වාර්තා වන ආකාරයට මේ සාකච්ඡාව සඳහා සමගි ජනබලවේගය පක්ෂයේ නායක සජිත් ප්‍රේමදාස මෙන්ම පාර්ලිමේන්තු මන්ත්‍රීවරුන් වන රාජිත සේනාරත්න , කබීර් හෂීම් , එරාන් වික්‍රමරත්න සහ හර්ෂ ද සිල්වා ඇතුළු කිහිපදෙනෙකු එක්ව ඇත.

එහිදී හර්ෂ ද සිල්වා මන්ත්‍රීවරයා කරුණු පැහැදිලි කරමින් පවසා ඇත්තේ , වත්මන් අර්බුදය සමනය කරගෙන රට ඉදිරියට ගැනීමට නම් IMF සමග සහයෝගයෙන් ඉදිරියට යායුතු බවය. ඒ හැර වෙනත් සුදුසු විකල්පයක් රට මුහුණපා ඇති තත්ත්වය හමුවේ නැති බවත් හර්ෂ ද සිල්වා මන්ත්‍රීවරයා පවසා ඇති අතර ඊට සහභාගිවී සිටි පිරිස අතර නිහඬ එකඟතාවක් පළව ඇත.

එහෙත් එහිදී සජබ නායක සජිත් ප්‍රේමදාස පවසා ඇත්තේ , IMF එකම විකල්පය ලෙස සැලකීම රනිල් වික්‍රමසිංහ ගේ ආර්ථික ප්‍රතිපත්තිය බවයි. සජිත් ප්‍රේමදාස ආර්ථික ප්‍රතිපත්තියට අනුව IMF සමග ඉදිරියට යාම දුෂ්කර වනු ඇති බවත් ඔහු පවසා ඇත .

වාර්තා වන ආකාරයට එහිදී සජිත් ප්‍රේමදාස පවසා ඇත්තේ ,මේ මොහොතේ දී ශ්‍රී ලන්කන් ගුවන් සේවය , ඛනිජ තෙල් සංස්ථාව, ලංකා විදුලි බල මණ්ඩලය වැනි ආයතන පෞද්ගලීකරණය කිරීමට IMF යෝජනා කළහොත් තමන්ව ජනතා අප්‍රසාදයට පත්වනු ඇති බවය.

එබැවින් රනිල් වික්‍රමසිංහ ආර්ථික ප්‍රතිපත්තිය වෙනුවට සජිත් ප්‍රේමදාස ආර්ථික ප්‍රතිපත්තිය අනුව සියලු රාජ්‍ය ආයතන කාර්‍යක්ෂම කිරීමට අවශ්‍ය බවත් සජිත් ප්‍රේමදාස මන්ත්‍රීවරයා පැවසූ බවත් වාර්තා වෙයි .

වඩාත් ගැටලු සහගත තත්ත්වය වන්නේ සමගි ජනබලවේගය පක්ෂයේ ආර්ථිකය සම්බන්ධයෙන් වගකීම් පවරා ඇති පාර්ලිමේන්තු මන්ත්‍රීවරුන් වන හර්ෂ ද සිල්වා සහ එරාන් වික්‍රමරත්න ගේ මූහුණටම මේ ඉතා පසුගාමී ආර්ථික දැක්ම පැහැදිලි කර සිටීමය.

මේ ආකාරයට මෙතෙක් දැරූ ආර්ථික ප්‍රතිපත්තියට මුළුමනින්ම වෙනස් වූ සහ පසුගිය සමයේ රාජපක්ෂවරුන් අත්හදා බැලීමට ගොස් අසාර්ථක වූ, 70 දශකයේ සිරිමාවෝ පාලනය තුළත් අසාර්ථක වූ ආර්ථික ප්‍රතිපත්තියක් හදිසියේ සජිත් ප්‍රේමදාස යෝජනා කිරීම සම්බන්ධයෙන් සාකච්ඡාව සඳහා සහභාගි වූ මන්ත්‍රීවරුන් මවිතයට පත්ව සිටි බවත් වාර්තා වෙයි .

එසේම ඔවුන් සාකච්ඡාව අවසානයේදී කනස්සල්ලෙන් එකිනෙකා හා අදහස් හුවමාරු කරගෙන ඇති බවත් වාර්තා වන අතර , ආර්ථිකය සම්බන්ධයෙන් පසුගිය සමයේ සමගි ජනබලවේගය පක්ෂය වෙනුවෙන් දිගින් දිගටම අදහස් දැක්වූ මන්ත්‍රීවරයකු ආවේගයෙන් අදහස් දක්වා ඇති බවත් වාර්තා වෙයි .

කෙසේ වුවත් එහි සිටි තවත් ජ්‍යෙෂ්ඨ මන්ත්‍රීවරයකු පිරිසට පවසා ඇත්තේ , "ලොක්කා සියල්ල අත්හැර 3% පස්සේ වැටිලා " කියාය.

ඉන්ධන මිලදී ගැනීම, බෙදා හැරිම සහ ඉන්ධන බෙදාහැරීමේදී ප්‍රමුඛස්ථානය ලබා දෙන ක්ෂේත්‍ර කවරේදැයි යන්න පැහැදිලි කර ඒ සම්බන්ධ වාර්තාවක් ලබන 12 වැනිදාට පෙර අධිකරණයට ගොනු කරන ලෙස ශ්‍රේෂ්ඨාධිකරණය නිතිපතිවරයාට නියෝග කරනු ලැබිණ .

ඒ මේ වන විට රටේ ඇතිවී තිබෙන වත්මන් ආර්ථික අර්බුදයට දිගුකාලින සහ කෙටිකාලින විසදුම් සකස් කරන ලෙස රජයට නියෝගයක් නිකුත් කරන ලෙස ඉල්ලා ශ්‍රී ලංකා නිතිඥ සංගමය ගොනුකර ඇති මූලික අයිතිවාසිකම් පෙත්සම් දෙකක් අද (04) කැඳවනු ලැබූ අවස්ථාවේදී ය.

විජිත් මළල්ගොඩ, මහින්ද සමයවර්ධන සහ අර්ජුන ඔබේසේකර යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල මෙම නියෝගය නිකුත් නිකුත්කර ඇත .

2021 වසරේ උසස් පෙළ විභාගයේ ප්‍රතිඵල එළඹෙන අගෝස්තු 15 වැනිදා නිකුත් කිරීමට නියමිත බව අධ්‍යාපන අමාත්‍ය සුසිල් ප්‍රේමජයන්ත් පාර්ලිමේන්තුවේදි අද (04) ප්‍රකාශ කළේය. 

එමෙන්ම 2022 වසරේ උසස් පෙළ විභාගය නොවැම්බර් මාසයේදී පැවැත්වීමට නියමිත අතර එය මාසයකින් පමණ කල් යාමේ හැකියාව පවතින බවද ඇමතිවරයා පැවසීය. 

අධ්‍යාපන අමාත්‍ය සුසිල් ප්‍රේමජයන්ත් මේ බව සඳහන් කළේ පාර්ලිමේන්තු මන්ත්‍රි ශාන්ත බණ්ඩාර මහතා  පාර්ලිමේන්තුවේදි අද (04) මතු කරන ලද ප්‍රශ්නයකට පිළිතුරු දෙමිනි. 

කුරුණෑගල යක්ගහපිටිය අයි. ඕ. සී. ඉන්ධන පිරවුම් හලේදී ඉන්ධන හලේදී සිවිල් වැසියකුට පාපහරක් එල්ල කිරීම සම්බන්ධයෙන් කුරුණෑගල වැහැර පළමුවන ශ්‍රි ලංකා ජාතික ආරක්ෂක බළමුඵවේ අණ දෙන නිලධාරී ලුතිතන් කර්නල් විරාජ් කුමාරසිංහ පිළිබදව වහාම අභ්‍යන්තර විමර්ශනයක් පැවැත්වීමට පියවර ගන්නා බව හමුදා මාධ්‍ය ප්‍රකාශක බ්‍රිගේඩියර් නිලන්ත ප්‍රේමරත්න පැවසීය.

මේ සම්බන්ධයෙන් වීඩියෝ සාක්ෂි කිහිපයක් සමාජ මාධ්‍ය තුළ සංසරණය වෙමින් ඇත .

පහරදීම සිදුවන්නේ එම ස්ථානයේ රාජකාරී කළ පොලිස් නිලධාරීන් බලා සිටියදි වන අතර අසල සිටි ජනතාව ප්‍රහාරය සම්බන්ධයෙන් විරෝධය පලකරන ආකාරයක් වීඩියෝ වල දැක්වෙයි .

කෙසේ වුවත් මේ වන විට මාධ්‍ය , සමාජ මාධ්‍ය ඇතුළු දෙස් විදෙස් අවධානය දිනාගත් සිදුවීමක් බවට මෙය පත්ව ඇත .

මාධ්‍යවේදී ශානුක කරුණාරත්න අග්‍රාමාත්‍ය මාධ්‍ය ලේකම් ධුරයට පත්කිරීමට අග්‍රාමාත්‍ය ලේකම් ලේකම් සමන් ඒකනායක කටයුතු කර ඇත .

මෙසේ අග්‍රාමාත්‍ය මාධ්‍ය ලේකම් ධූරයට පත්වූ ශානුක කරුණාරත්න මීට පෙර අයි.ටී.එන් මාධ්‍ය ජාලයේ නියෝජ්‍ය සාමාන්‍යාධිකාරී ලෙස ද කටයුතු කර ඇති අතර යහපාලන සමයේ අග්‍රාමාත්‍ය කාර්ය මණ්ඩල ප්‍රධානී මාධ්‍ය ලේකම් ලෙස ද කටයුතු කළේය.

ශ්‍රී ලංකා ගුවන් විදුලි සංස්ථාවේ සහන නිවේදකයකු ලෙස මාධ්‍ය වෘත්තියට පිවිසි කරුණාරත්න පෞද්ගලික රූපවාහිනී සහ ගුවන්විදුලි ආයතන කිහිපයක ප්‍රවෘත්ති ප්‍රධානී සහ ප්‍රවෘත්ති සංස්කාරක තනතුරු දරා ඇත.

කෑගල්ල ශාන්ත මරියා විදුහලේ ආදි සිසුවකු වන ශානුක කරුණාරත්න ශ්‍රී ජයවර්ධනපුර සහ කොළඹ විශ්ව විද්‍යාල වල ජන සන්නිවේදනය සම්බන්ධයෙන් ඩිප්ලෝමාධාරියෙකි.

ජූලි මාසය අවසන් වනවිට දැනට පවතින ගෑස් හිගය සම්පූර්ණයෙන්ම අවසන් කිරීමට හැකිවනු ඇතැයි ලිට්‍රෝ සමාගම විශ්වාසය පළකරයි.

එහි සභාපති මුදිත පීරිස් මාධ්‍ය වෙත සඳහන් කර ඇත්තේ , ජූලි 31 වනදා වනවිට ගෑස් මෙට්‍රික් ටොන් 33,000 ක් නිකුත් කිරීමට අපේක්ෂා කරන බවයි.

ඒ අනුව අත්‍යවශ්‍ය සේවාවන්ට මෙන්ම ගෘහස්ථ ගෑස් සිලින්ඩර ද අඛණ්ඩව නිකුත් කළ හැකි වනු ඇතැයි සභාපතිවරයා ප්‍රකාශ කර ඇත .

ගෑස් නෞකා සඳහා අවශ්‍ය මුදල් ප්‍රමාණයෙන් සියයට 25 ක් පමණ මේනවිටත් ගෙවා අවසන් කර ඇති බව ද ලිට්‍රෝ සමාගමේ සභාපතිවරයා පවසා ඇති අතර ඒ අනුව ගැටළුවකින් තොරව ගෑස් තොග ආනයනය කිරීමට හැකියාව පවතින බව ද මෙහිදී වැඩිදුරටත් සඳහන් කර ඇත .

කෙසේ වුවත් මේ වන විට ගෑස් සැපයීම සිදුකරන්නේ අත්‍යවශ්‍ය සේවා සඳහා පමණකි .

එම තත්ත්වය මේ සතිය තුළ ද පැවැත්වෙනු ඇති බවත් ජූලි 6 මෙරටට ගෑස් නෞකාවක් පැමිණීමට නියමිත බවත් වැඩිදුරටත් වාර්තා වෙයි .

ඉන්ධන පෝලිමේ සිටි තරුණයෙකුට හමුදා නිලධාරීන් පිරිසක් විසින් අමානුෂික ලෙස පහර දෙන ආකාරයේ වීඩියෝවක් සමාජ ජාලවල හුවමාරු වෙයි.

අදාළ වීඩියෝව අනුව හමුදා සෙබළුන් දෙදෙනෙකු විසින් එම තරුණයාගේ දෑත් දෙපසට කර අල්ලාගෙන සිටියදී හමුදා නිලධාරියෙකු විසින් අමානුෂික අන්දමට පා පහරක් එල්ල කරයි.

අදාළ වීඩියෝව සහ ඊට අදාළ සිරස news 1st වාර්තාව පහත දැක්වෙයි . 

ඉන්ධන අර්බුදය හේතුවෙන් නොමිලේ සපයන සුවසැරිය ගිලන් රථ සේවාව ද වෙනදා මෙන් කාර්යක්ෂමව සැපයීමේ බාධා මතුව ඇති බව එහි කළමනාකාරීත්වය පවසයි .

සුවසැරිය ගිලන් රථ සේවය මගින් සිදුකරන දෛනික රෝහල්ගත කිරීම් 600කින් පමණ වැඩිවී, මේ වනවිට දිනකට 1600 ඉක්මවා ඇති බවත් ඔවුන් පවසයි .

කෙසේ වුවත් ඉන්ධන අර්බුදය හේතුවෙන් සිය කාර්ය මණ්ඩලවලට පවා සේවා සැපයීම් සඳහා පැමිණීමේ අභියෝගයට මුහුණ දී ඇති බැවින් යම් ප්‍රමාදයක් සිදුවිය හැකි බවට එම සේවාව දැනුම් දී සිටියි.

අදාළ නිවේදනය පහත දැක්වෙයි .

ජුලි මස 8-9 සහ ජුලි 11-14 යන දිනයන් හිදී මෙරටට ඩීසල් මෙට්ට්‍රික් ටොන් 40,000 බැගින් වූ ඉන්ධන නෞකාවන් දෙකක් මෙරටට ලඟා වීමට නියමිත බව බලශක්ති අමාත්‍ය කාංචන විජේසේකර සඳහන් කර සිටියි.

ඉන්දියාවේ IOC සමාගම ඇතුළු විවිධ සමාගම් හරහා සිදුකළ ඉල්ලීම් අනුව මෙම ඉන්ධන නෞකාවන් මෙරටට ගෙන්වා ගැනීම සඳහා කටයුතු කර ඇති බවත් අමාත්‍යවරයා පවසයි .

මේ අතර ජුලි මස 22-23 යන දිනයන් හිදී LIOC සමාගම හරහා මිලදී ගනු ලැබූ පෙට්ට්‍රල් නෞකාවක් මෙරටට ලඟා වීමට නියමිත බවත් අමාත්‍යවරයා සඳහන් කර ඇත .

එම පෙට්ට්‍රල් නෞකාව වෙනුවෙන් මේ වන විට අමෙරිකානු ඩොලර් මිලියන 19.5ක මුදලක් පියවා ඇති බවත් ලබන ජුලි මස 08 වෙනිදාට තවත් ඩොලර් මිලියන 19.5ක මුදලක් පියවීමට සිදුව ඇති බවද අමාත්‍යවරයා පවසයි .

එම නෞකාවට ගෙවීමට ඇති ඉතිරි මුදල වන ඇමෙරිකානු ඩොලර් මිලියන 20ක මුදල ඉන්දියානු ණය යෝජනා ක්‍රමය යටතේ ඉතිරිව ඇති මුදල පියවීමට නියමිතව ඇති බවත් මෙහිදී අමාත්‍යවරයා සඳහන් කර ඇත .

මේ අතර තවත් ඩීසල් නෞකාවක් මෙම මස 15-17 යන දිනයන් හිදී මෙරටට ලබාදීමට හැකි බව ලංකා IOC සමාගම සඳහන් කර සිටි බවත් ඒ සඳහා හෙට දිනයේදී ඇනවුමේ සීයයට 50ක් ගෙවන ලෙසත් ඉතිරි සීයයට 50 කොටස ලබන බදාදා වන විට ගෙවීමට කටයුතු කරන ලෙස දැනුම් දී ඇති බවත් පැවසීය .

කෙසේ වුවද මෙරටට ඉතා ඉක්මනින් පෙට්ට්‍රල් නෞකාවක් ලබා ගැනීමට ඇති බැවින් ඒ සඳහා මුලික මුදලක් පියවීමට සිදුවන බැවින් මෙම ඩීසල් ඇනවුම සඳහා වටිනාකමෙන් සීයයට 30ක් පමණක් පියවීමට අවසර ඉල්ලා ඇතිබව අමාත්‍යවරයා සඳහන් කළ අතර ඒ සඳහා ලංකා IOC සමාගමේ අවසර ලැබෙන අයුරින් ගෙවීම් කටයුතු සිදුකිරීමට පියවර ගන්නා බවත් පැවසීය .

මේ අතර රටට අවශ්‍ය ඉන්ධන සැපයුම ලබා ගැනීම සඳහා මැලේසියානු රජයෙන් ඉල්ලීමක් සිදුකර තිබෙන බවත් එහිදී මැලේසියානු රජය විසින් පෙට්ට්‍රල් මෙට්ට්‍රික් ටොන් 50,000ක් සහ භූමිතෙල් මෙට්ට්‍රික් ටොන් 10,000ක් ලබාදීමට අනුමැතිය හිමිව ඇති බවත් එම ඉන්ධන ඉක්මනින් ලබාදීමට අවශ්‍ය පියවර ගන්නා බවට දැනුම් දී ඇති බවද අමාත්‍යවරයා සඳහන් කර සිටියේ ය.

මේ අතර ජුලි මස 10-11 සහ අගෝස්තු මස 9-12 යන දිනයන් තුලදී මෙරටට බොර තෙල් මෙට්ට්‍රික් ටොන් 135,000 බැගින් වූ නෞකා දෙකක් ලඟා වීමට නියමිත බව අමාත්‍යවරයා කියා සිටියා. මෙම බොර තෙල් නෞකා දෙක ඉන්දියානු සමාගමක් හරහා සිදුකරන බවත් බලශක්ති අමාත්‍යවරයා කියා සිටියේය .

මෙම ඉන්ධන සැපයුම් ක්‍රියාවලිය සඳහා අමෙරිකානු ඩොලර් මිලියන 582ක් වැය වන බවත්, එය සොයා ගැනීම ලෙහෙසි පහසු කාර්යයක් නොවුවද ඒ සඳහා මුදල් ලබාදීමට ශ්‍රී ලංකා මහ බැංකුව ඇතුළු පාර්ශව කිහිපයකගේ සහය ලබා ගැනීම බලාපොරොත්තු වන බවත් අමාත්‍යවරයා පවසා ඇත .

මූලාශ්‍රය - නෙත් news

" මේ රට කරන ගෑස් ගණුදෙනු, තෙල් ගණුදෙනු, ගල් අඟුරුවලින් වහාම රාජපක්ෂ පවුල ඉවත් විය යුතුයි. ඒ ඩීල් වලින් ඔවුන් ඉවත් විය යුතුයි. ඔවුන් තමයි මේ අවුල කරන්නේ. මැද්දට පැනලා. ඒ නිසා ඒ ඒ සම්බන්ධයෙන් අපි බොහොම පැහැදිලිව කියනවා වහාම දේශපාලනයෙන් ඉවත් වෙලා පැත්තකට වෙලා ඉන්න"' යැයි 43 සේනාංකයේ නායක , පාර්ලිමේන්තු මන්ත්‍රී පාඨලී චම්පික රණවක පවසයි .

මාධ්‍ය හමුවකදී අදහස් දක්වමින් මන්ත්‍රීවරයා මේ බව සඳහන් කළ අතර ඒ සම්බන්ධයෙන් මාධ්‍ය ඒකකය නිකුත්කළ නිවේදනයක් පහත දැක්වෙයි .

අපේ රට වැටී තිබෙන අර්බුදයෙන් ගොඩ ගැනීම සඳහා ඉදිරි සතිය තුළ කරුණු 4 කින් යුතු වැඩපිළිවෙලකට සියලු දෙනා එක්විය යුතු බව 43 සේනාංකය පවසයි.

අද පැවති මාධ්‍ය හමුවකදී ඒ පිළිබඳව වැඩිදුරටත් අදහස් දැක්වූ 43 සේනාංකය නායක පාඨලී චම්පික රණවක මහතා මේ කරුණු අවධාරණය කළේය.

පුළුල් සන්ධානයකට, එක වේදිකාවකට එළඹෙමින් දැනට ඉදිරිපත් කර තිබෙන, 22 වෙනි ආණ්ඩුක්‍රම ව්‍යවස්ථා සංශෝධනය, ප්‍රශස්ත මට්ටමෙන්, හැකි ඉක්මනින් සම්මත කරගත යුතුය.

“ඒක අපි බලාපොරොත්තු වුණු 19 වෙනි සංශෝධනය නෙවෙයි. ඊට වඩා දියාරු කරපු, ගෝඨාභය රාජපක්ෂට යම් යම් බලතල ලබා දීපු, සංශෝධනයක්. ඒ නිසා එයට වැදගත් වෙනස්කම් ඉටුකරලා පාර්ලිමේන්තුව තුල ඒ අදාළ නීති කටයුතු අවසන් වූ පසු අධිකරණයේ ප්‍රශස්ත මට්ටමෙන් 22 වෙනි ආණ්ඩුක්‍රම ව්‍යවස්ථාව සම්මත කරලා පාර්ලිමේන්තුවයි ජනාධිපති ධූරයයි අතර තියෙන මේ බලතුලනය ශක්තිමත් කරලා ස්වාධීන අධිකරණයක්, ස්වාධීන පොලීසියක්, ඒ වගේම ස්වාධීන මැතිවරණ කොමිසමක්, ස්වාධීන රාජ්‍ය සේවයක්, ස්වාධීන ප්‍රසම්පාදන, ස්වාධීන විගණන කොමිසමක් ස්ථාපිත කරලා මේ රට ඉදිරියට ගෙන යාමට අවශ්‍ය වැඩපිළිවෙල හැකි ඉක්මනින් ගන්න. පක්ෂ, පාට, භේදයෙන් තොරව බැසිල් රාජපක්ෂගේ යටින් කරන කකුලෙන් ඇදිලි පරාජය කරලා ඉදිරියට යන්න. "

පාර්ලිමේන්තුව තුළ සිටින පක්ෂ, ස්වාධීන කණ්ඩායම් වල නායකයන් එක්ව අවබෝධතා ගිවිසුම් සකස් කරගෙන තිබෙන ප්‍රතිපත්ති පිළිබඳ තීරණ ගැනීමේ සභාවක් පිහිටුවිය යුතුය.

“විශේෂයෙන්ම පාර්ලිමේන්තු මන්ත්‍රීවරුන් 224 දෙනාම අදාළ අමාත්‍යාංශවලට අනුයුක්ත කොට, ඒ අමාත්‍යාංශවල පාලනය පාලනය පිළිබඳ වගකීම ලබාදී, අමාත්‍යවරයා ඒ අමාත්‍ය සංසදයේ සභාපතිවරයෙක් බවට පත් කරන්න ඕනේ. පාර්ලිමේන්තුවේ මේ 224 දෙනාටම වගකීම දීලා විවෘත විනිවිදන ස්වභාවයෙන් ඒ කටයුත්ත ඉදිරියට ගෙනියන්න ඕනේ.”

“ගෝඨාභය රාජපක්ෂ පාලනය තියෙන තාක්කල් අපට මොනම ආකාරයේවත් විදේශ සහයක් ලැබෙන්නේ නැහැ. අඩු ම තරමින් ශ්‍රී ලංකාවෙන් පිටත ජීවත් වෙන තිස් ලක්ෂයක් වෙච්ච විදේශගත ශ්‍රී ලාංකිකයන්ගේ සහයවත් මොහුට ලැබෙන්නේ නැහැ. ඒ සහයවත් අපට හරියට ලැබුණා නම් අපට ලොකු විදේශ සහයකින් තොරව මේ අර්බුදය පියමං කර ගන්න තිබුණා.”

වැදගත් ආයතන වලට කාටත් පිළිගත හැකි වෘත්තීය මට්ටමේ නායකත්වයන් පත් කළ යුතුය. අන්තර් කාලීන පොදු වැඩපිළිවෙලක් සකස් කර ගත යුතුය.

“තෙල් සංස්ථාවට, ඛනිජ තෙල් පර්යන්තයට, ලංකා විදුලිබල මණ්ඩලයට දේශපාලන පත්වීමක් තියෙන්නේ. වෘත්තීය මට්ටමේ පිරිස් මෙතනට පත් කරන්න ඕනේ. මුල්‍ය ක්ෂේත්‍රය දේශපාලන පත්වීම් ඉවත් කළ යුතුයි. ඒ වෙනුවට පිළිගත හැකි වෘත්තීය මට්ටමේ පිරිස් ඒවට පත් කරන්න ඕන. රටේ අනෙකුත් ප්‍රධාන සැපයුම් ක්ෂේත්‍ර වන ප්‍රවාහන, ජල සම්පාදන ක්ෂේත්‍ර වැනි දෑට ඒ ඒ ආයතනවල ඉන්න වෘත්තීය මට්ටමේ පිරිස් වලට ඉඩ දීලා ඒක ඉදිරියට ගෙන යාමේ වගකීම ඔවුන්ට ලබා දෙන්න ඕනේ ස්වාධීනව. එහෙම නොවුණොත් කිසිම විශ්වාසයක් මේ පාර මහමගට වැටිලා විදේශිකයෝ තුළවත්, විදේශවල ජීවත්වෙන ශ්‍රී ලාංකිකයෝ තුළවත් ඇති වෙන්නේ නැහැ.”

“2015 මහ මැතිවරණයට පෙර දින 100 වැඩපිළිවෙල කියලා එකක් තිබුණා. අපි විශේෂයෙන්ම අවධාරණය කරනවා මාස හයකට හෝ මහනායක හිමිවරුන් යෝජනා කරලා තියෙන විදිහට මාස 18 කට හෝ කවර හෝ කලකට පොදු අන්තර් කාලීන වැඩපිළිවෙලකට. අපි සූදානම් ඒ අවම වැඩපිළිවෙල තනන්න. මේ රටේ වෘත්තීයවේදීන්ගෙන්, වැඩකරන ජනතාවගෙන්, ව්‍යාපාරික ප්‍රජාවගෙන් ඒ හැම කෙනාගේම එකඟත්වය, සාමූහිකත්වය, ඒ අවම වැඩපිළිවෙලට ලබාගත යුතුයි. සති දෙකක් වැනි කෙටි කලක් තුළ, ඒ කටයුත්ත සිදුකරගත යුතුයි. පාර්ලිමේන්තුවේත් මැදිහත්වීම ඇතුළේ.”

ගෝඨාභය රාජපක්ෂ මහතා ධුරයෙන් ඉවත් වී 24 පැයක් තුළ පාර්ලිමේන්තුව මගින් රටට නව ජනපතිවරයෙක් පත්
කරදීමට අවස්ථාව උදා කර දිය යුතුය.

“මේ කරුණු හතර අනිවාර්යයෙන්ම අපි ඉෂ්ට කරගත්තේ නැත්නම්, මේ මහ මගට බැහැලා ඉන්න අපේ ජනතාවට සහනය ලැබෙන්නේ නැහැ. රට තවත් දේශපාලන පිපිරීම්, සමාජ පිපිරීම් ඉදිරියේ මේ රට ඇතැම් විට ලේ ගංගාවක් වීමට ඉඩකඩ තිබෙනවා. ඒ යෝජනාව අපි සියලුම පක්ෂ වලට යෝජනා කරනවා. ඒ වගේම පාර්ලිමේන්තුව නියෝජනය කරන සියලුම දේශපාලන පක්ෂ වලට මේ ආරාධනය මේ ඊළඟ සතිය ඇතුලත සිදු කරන්න අපි බලාපොරොත්තු වෙනවා.” යනුවෙන් 43 සේනාංකය ප්‍රධානියා වැඩිදුරටත් අවධාරණය කළේය.

මෙහිදී රාජපක්ෂ පවුලට විශේෂ මතක් කිරීමක් කිරීමට ද රණවක මහතා කටයුතු කළේ මෙලෙසිනි.

“බොහොම කරුණාවෙන් සහ මේ රටේ ජනතාවගේ පැත්තෙන් කිව්වොත්, ඉතාම ආවේගයෙන් ප්‍රකාශ කරන්න තියෙන්නේ ඔය නාමල් රාජපක්ෂ මහත්තයලට කරුණාකරලා ලංකාවේ දේශපාලනයෙන් ඉවත් වෙන්න. කරුණාකරලා ඔබලා විසින් මේ රටෙන් මංකොල්ල කන ලද ධනය, මේ රටේ ජනතාවට ලබා දෙන්න. ඔබලා සම්බන්ධයෙන් මේ රටේ ජනතාව තුල තියෙන්නේ අතිශය පිළිකුල් සහගත තත්වයක්. ඊළඟ මැතිවරණයෙන් ඔය පොහොට්ටුවේ කයි කාරයින්ට තේරෙයි මොකක්ද තත්වේ කියලා. මතක තියාගන්න මැයි 9 වෙනිදා මේ රටේ ජනතාව පාඩමක් ඉගැන්නුවා බේරේ වැව වටේදි. ඒ පාඩමවත් සිහියේ තබාගෙන දේශපාලනයෙන් කරුණාකරලා මේවට මැදිහත් නොවී ඉවත් වෙලා ඉන්න. ඔබලා මේවට ඇඟිලි ගහන වාරයක් පාසා වෙන්නේ මොකක්ද? රටේ ජනතාවගේ ප්‍රකෝපය තව ඉහළ නංවන එක විතරයි. විශේෂයෙන්ම මේ රට කරන ගෑස් ගණුදෙනු, තෙල් ගණුදෙනු, ගල් අඟුරුවලින් වහාම රාජපක්ෂ පවුල ඉවත් විය යුතුයි. ඒ ඩීල් වලින් ඔවුන් ඉවත් විය යුතුයි. ඔවුන් තමයි මේ අවුල කරන්නේ. මැද්දට පැනලා. ඒ නිසා ඒ ඒ සම්බන්ධයෙන් අපි බොහොම පැහැදිලිව කියනවා වහාම දේශපාලනයෙන් ඉවත් වෙලා පැත්තකට වෙලා ඉන්න. මම දන්නේ නැහැ වාසුදේව නානායක්කාර මහත්තයාට මොනවා කියලා තියෙනවද කියලා. වහාම පැත්තකට වෙලා ඉන්න. ඒක තමයි මේ මොහොතේ ඔබේ පවුලටත්, මේ රටටත් කරන්න පුළුවන් ලොකුම උපකාරය.”

මෙහිදී මාධ්‍යවේදීන් නැගු ප්‍රශ්නවලට පිළිතුරු දුන් රණවක මන්ත්‍රීවරයා ;

ඔබතුමන්ලා මේ සර්වපාක්ෂික රජයක් පිහිටුවන්න ගෙන එන යෝජනා කොච්චර යෝජනා ගෙනාවත් වැඩි බලය තියෙන්නේ පොහොට්ටුවට ?

පොහොට්ටුවට බලයක් නැති බව පෙනෙයි. පොහොට්ටුවේ ඉන්න විශාල පිරිසක් ස්වාධීන වෙලා තියෙන්නේ. අපි ආරාධනා කරනවා ඒ පොහොට්ටුවේ ඉන්න සියලුම ප්‍රගතිශීලි බලවේග වලට මේ රාජපක්ෂ ශාපයෙන් කරුණාකරලා දැන්වත් ගැලවෙන්න. 3% යි අද රාජපක්ෂලාට රටේ තියෙන්නේ. ඒ නිසා පොහොට්ටුවේ ඉන්න ජනපදනමක් තියෙන, දූෂණයට යට නොවුණු පිරිස් වලට මේ අවස්ථාව රට වෙනුවෙන් ඉදිරිපත් වෙන්න. නැත්නම් ඒ පොහොට්ටුවේ ඉන්න වැදගත් මිනිස්සු ටිකටත් රාජපක්ෂලා එක්කම දේශපාලනමය වශයෙන් අවසන් ගමන් යන්න පුළුවන්.

මාධ්‍යවේදීන් හැටියට අපිත් සෑහෙන අසරණ භාවයට පත්වෙලා තියෙනවා මේ අත්‍යවශ්‍ය සේවාවන් අපි අත්‍යවශ්‍ය දේකටවත් නැතුව ගෙවල් ඇතුලේ සීමා කරලා තියෙනවා. මොකද හිතෙන්නේ ?

මාධ්‍ය ආයතන බොහොමයක් මාධ්‍යවේදීනුත් මේවා වාර්තාකරණයෙන් වළක්වා ගැනීමට විය යුතුයි අනිවාර්යෙන්ම මේ ඉන්ධන ගැටලුවට ඔවුන්ව හිර කරලා තියෙන්නේ. මාධ්‍ය ආයතන වලටත් අද ප්‍රශ්ණයක් තියෙනවා. මුද්‍රිත මාධ්‍ය ආයතන වලට කොළ නෑ. ඒ ආයතන වලට ඉස්සර තමන්ගේ පත්තර ටික රට වටේ ගෙනියන්න තමන්ගේම වූ ප්‍රවාහන මාධ්‍යයක් තිබුණා. දැන් ඒ ලොරි රථ ටික ක්‍රියාත්මක කරන්න විදිහක් නෑ. ඩීසල් නෑ. අර සීඝ්‍රගාමී බස් රථත් දැන් සෑහෙන්න ප්‍රමාණයක් අඩු වෙලා තියෙනවා. ඒ නිසා මේ ඉදිරි කාලයේදී මුද්‍රිත මාධ්‍ය සම්පූර්ණයෙන් වැහිලා යන්න නියමිතයි.

සැප්තැම්බර් මාසෙන් පස්සේ ගල් අඟුරු නෑ. ඒ නිසා දැනට කරන ඉලෙක්ට්‍රොනික මාධ්‍ය වලටත් අවශ්‍ය විදුලි බලය සම්පාදනය කිරීම විශාල බරපතල ගැටළුවක් වෙන්න පුළුවන්. ඒ නිසා මේ මාධ්‍ය ආයතන, මාධ්‍යවේදීන් කියන ඒවා පවත්වා ගැනීම රටේ අත්‍යවශ්‍ය කාරණයක්. ඇත්තටම මේකත් එක්ක අපිට පේනවා ඉතාමත්ම නරක විදිහට ආරක්ෂක අංශ යුධ හමුදාව, ගුවන් හමුදාව, නාවුක හමුදාව, සිවිල් ආරක්ෂක බලඇණිය හා පොලීසියේ ඇතැම් නොහික්මුණු පිරිස් මේ ප්‍රශ්නයට මැදිහත් කරන්න උත්සාහ කරමින් ඉන්නවා ආණ්ඩුවත් දේශපාලන ගැති යම් පිරිසකුත්. ඒ නිසා රඹුක්කන සිද්ධිය වගේ රතුපස්වල සිද්ධිය වගේ සිද්ධි ඇති කර ගන්නේ නැතුව ශ්‍රී ලංකා ආරක්ෂක හමුදාවල ඉන්න හමුදාපතිවරුන්ගේ වගකීම තමයි තමන් ගැන නිසා ඇතිවෙච්ච ඒ මහා ගරුත්වය රාජපක්ෂ පවුල රකින්න ගිහිල්ලා නැති කරගන්න එපා. මොකද ආරක්ෂක හමුදාවල සාමාජිකයනුත් අපා දුක් විඳිනවා.

ඔවුනුත් මේ පාරට වැටිලා තියෙන්නේ. පොලීසියටත් ගෑස් නැහැ. පොලිසියටත් තෙල් නැහැ. යුධ හමුදාවට ගුවන් හමුදාවට නාවික හමුදාවේ පවුල් වලටත් ගෑස් නැහැ. තෙල් නැහැ. විදුලිය නැහැ. ඒක නිසා කරුණාකරලා මේ රාජපක්ෂ පවුල රකින්න ඇතැම් නිලධාරීන් කටයුතු කළාට නීතියට අනුව කටයුතු කරන්න, රටේ ජනතාවගේ පිළිකුලට භාජනය කරන්න එපා.
ඊයේ වෙනකොට අපි දැක්කා මාස 6 ක් දෙන්න මේ පාර්ලිමේන්තුව ඇතුලේ ඉන්න අය අලුතෙන් පත් කරගෙන ආණ්ඩුවක් හදන්නම් කියලා ජවිපෙ කියනවා?

අපි ජනතා විමුක්ති පෙරමුණටත් ආරාධනා කියලා කරනවා ඇත්තටම එතුමන්ලට පුළුවන් නම් එතුමන්ලටත් අවස්ථාවක් දිය යුතුයි. රට පාලනය කරලා ඔය වේදිකාවේ කතා කරන දේවල් ඔප්පු කරලා පෙන්නන්න ඔවුන්ටත් අවස්ථාවක් දිය යුතුයි. ජනතා විමුක්ති පෙරමුණත් මේ සර්වපාක්ෂික ආණ්ඩුවේ වෙන් කළ නොහැකි කොටසක්. පාර්ලිමේන්තුවෙත් බහුතරය එකඟ නම් කිසි ප්‍රශ්නයක් නෑ.

බහුතරය එකඟ නම් අග්‍රාමාත්‍ය ධූරය අනුර දිසානායක මහත්තයාට දුන්නට කිසිම ප්‍රශ්ණයක් නැහැ?

එතුමාගේ ප්‍රතිපත්ති සහ සමස්තය මතයි අපි කටයුතු කරන්නේ පුද්ගලයෝ මත නෙවෙයි. සර්ව පාක්ෂික ආණ්ඩුවක් හැදෙනවා නම් අන්තර් කාලීන අවම පොදු වැඩපිළිවෙලකට එකඟ නම් ඒ වගේම ජනාධිපති ගෝඨාභය රාජපක්ෂ ගෙදර යවන වැඩසටහනක් තියෙනවා නම් සහ 22 වෙනි සංශෝධනය ප්‍රශස්ත මට්ටමෙන් සම්මත කරගන්න එකඟතාවයක් තියෙනවා නම් පාර්ලිමේන්තුවේ බහුතරයේ කැමැත්ත තියෙනවා නම් ඒ මත අපි තීරණය ගන්නවා. අපිට ප්‍රශ්ණයක් නැහැ මේ අනුර දිසානායකද, සජිත් ප්‍රේමදාසද, කවුද කියන එක ගැන අපිට ගැටළුවක් නැහැ එතන.

මේ මාධ්‍ය හමුවට එක්වූ 43 සේනාංකය සභාපති කරු පරණවිතාන සඳහන් කළේ, අර්බුදයට වගකිවයුත්තන් වන රාජපක්ෂලා මේ වන විට අර්බුදය මැද්දෙන් ‘බිස්නස්’ කරමින් රට අරාජිකත්වය කරා යාමට ඉඩ සලසමින් සිටින බවය.

“අප්‍රේල් 9 වෙනිදා සිද්ධිය එන්නට කලින් බොහෝ කලින් ඒ වගේම මේ අර්බුදය මෙච්චර ගැඹුරු වෙන්නට කලින්ම 43 සේනාංකයේ අපි මෙතනම මාධ්‍ය සාකච්ඡාවක් පවත්වලා මාර්තු 25 වෙනිදා ප්‍රකාශ කළා මේ අර්බුදය යන දිහාව දැකලා මේකට තිබෙන්න ඕනේ මෙන්න මේ ආකාරයේ විසඳුමක් කියලා. ඒක තමයි ගෝඨාභය රාජපක්ෂ ජනාධිපතිවරයාගේ සහ මේ බලතල සීමා කරපු, නැවත 19 වෙනි ව්‍යවස්ථා සංශෝධනයේ බලගැන්වෙන, අලුත් ආණ්ඩුක්‍රම ව්‍යවස්ථා සංශෝධනයකින් රටේ ප්‍රජාතන්ත්‍රවාදී ප්‍රතිසංස්කරණ කෙරෙන්නට ඕනේ. ඒ වගේම තමයි මේ වර්තමාන අර්බුදයෙන් රට මුදාගැනීම සඳහා සර්ව පාක්ෂික ආණ්ඩුවක් පිහිටුවන්නට ඕනේ. ඒ වගේම තමයි ඒ ආණ්ඩුව පොදු අවම වැඩපිළිවෙලක්. රටට ඉදිරිපත් කරන්නට ඕනේ. කියන ක්‍රියාමාර්ග ගත යුතුයි කියලා අපි යෝජනා කළා. රාජපක්ෂලා නොවන සියලු දේශපාලන බලවේග වලට අපි යෝජනා කළා. සමගි ජන බලවේගයට, ජනතා විමුක්ති පෙරමුණට, සුළු දේශපාලන පක්ෂ වලට. ඒ වගේම තමයි මේ වනවිට ආණ්ඩුවෙන් කැඩිලා ඉන්න ස්වාධීන කණ්ඩායම් සියලු දෙනාටම අපි යෝජනා කළේ එකතුවෙලා, පොදු අවම වැඩපිළිවෙලකට එන්න කියලා.”

මේ අවස්ථාවට 43 සේනාංකය විධායක සභිකයන් වන බන්දුල චන්ද්‍රසේකර සහ තීක්ෂණ ගම්මන්පිල ද එක්ව සිටියහ.

ලංකාවෙ වාර්ෂික ඒක පුද්ගල තෙල් පරිභෝජනය ලීටර්350.5ක්අ සල්වැසි ඉන්දියාවෙ 198යි, පකිස්තානෙ 158 බංග්ලාදේශයෙ 41යි.

ලංකාව මේ මෙහොතෙ මූනදීල තියන ප්‍රශ්නෙන් ගොඩ එන්න ඒක පුද්ගල තෙල් පරිභෝජනය අඩකටවත් අඩුකරන්න ඕනෙ.

මේක කරන්නෙ කොහොමද?

1 විදුලි නිශ්පාදනයට වැයවන තෙල් ප්‍රමානය අඩුකල යුතුයි. ඒ සදහා සුනිත්‍ය බලශක්තිය කඩිනමින් වැඩිකලයුතුයි. ලංකාවෙ සුනිත්‍ය බල ශක්තිය වැඩිකිරීමට දිගින් දිගටම භාදා කලේ විදුලිබල මංඩලේ නිලධාරී මාෆියාව.
2 පුද්ගලික වාහන භාවිතය අඩුකල යුතුයි.

උදා1- අපි පාසල් යන කාලෙ පාසලට ලමයි ආවෙ පාසල් බස් රථ වල, විදුහල්පති හැර වෙන කිසිම ගුරුවරයෙක් පුද්ගලික කාර් එකක ආවෙ නෑ.

දැන් ඕනෑම පාසලක ගුරුවරියන්ගෙ පොඩිකාර් කීයක් පාසලේ ගාල් කරල තියනවද? ලමයින්වත් අම්ම හරි තාත්ත හරි බයික් එකක ,වීල් එකක හරි කාර් එකක හරි ගෙනිහින්දාල එක්කන් එනව

මේ වෙනස උනේ කොහොමද ?

උදා2- ලංකාවෙ රාජ්‍යසේවයෙ ඉහල නිලධාරීන්ට පාවිච්චි කරන්න තියෙන වාහන මොනවද? prado 150, නිලවශයෙන් එකයි. පූල් එකෙන් දාල තව එකක් හරි දෙකක් හරි.
අමාත්‍යාංශයට එන්න යන්න එකයි. ගෙදර වයිෆ් ගෙ ලමයින්ගෙ පාවිච්චියට, බල්ලට බේත් ගේන්න යන්න, අනියම් බිරිදව ගිහින් බස්සන්න.

https://m.facebook.com/story.php?story_fbid=10228170111868166&id=1537473825

මේ නව මැද පංතියෙ පුලුල්වීමත් සමග බලයට ආපු සියලු රජයවල් ඩීල් කලේ ඔවුන්ගෙ හීන එක්ක, රාජපක්ෂලා ඒක කරපු හැටි ඉහත ලිපියෙ තියනව. යහපාලන ආණ්ඩුකාලෙත් මංගලගෙ v2022 campaign එකේ base එක ඒක. හැමෝටම ගෙයක් ගන්න , වාහනයක් ගන්න loan එකක්.

මේ මැද පංතික ජීවිතයෙ විකාරය විසින් සමාජයත් , පුද්ගලිකව ඔවුනුත් විශාල පීඩාවකට ලක්වෙලා තියෙන්නෙ

මාසික වැටුපෙන් වැඩිම පංගුවක් වාහනේ ලීස් ගෙවන්න නිවාස නය ගෙවන්න යොදවන මෙයාල ඇත්තටම හරියට කන්නෙත් නෑ.

මමත් නය අරන් තියනව. ඒ ව්‍යාපාර කරන්න.

මට තවම බයික් එක හැරුනාම වෙන පුද්ගලික වාහනයක් නෑ.

ගෙදර වාහනය දෙකතුනක් තියන මගෙ යාලුවන්ගෙ ගෙදරකට ගියහම "මචන් අඩියක් ගහමුද?, බත් ටිකක් කමුද? " අහන්න උන් ඇබරෙන විදිහ දැක්කහම දුක හිතෙනව. අපේ ගෙදරට යන එන උන් දන්නව. ඒක සීමා නැති නවාතැන් පොලක්, කවුරුත් අහල නෙමේ එන්නෙ, නවතින්න. දවස ,දෙක නෙමේ මාස ගනන් නැවතිලා ඉන්න අය ඕනෙ තරම්, ගෑනිට කම්මැලි හිතුනාම උයාගෙන කාපල්ල කියන එක හැරුනාම වෙන විරෝධයක් කවදාවත් කාටවත් ඇවිල්ලනෑ. බොනව කිව්වම Prasanna AbeywickramatNayantha Prasad Sanjeewani Hangawaththa (උපුල්)

ජීවිතේ කියන්නෙ නයවෙලා ගේ ඉස්සරහ කාර් එකක් නවත්තන් ඉන්න එක නෙමේ. කාල බීල, ඇවිදල විදින දෙයක්. මේ වෙනසට සමාජෙ ගේන එක ලේසිනෑ. ඒක ඇත්තටම විප්ලවයක් , system change එකක්.

ඒක කරන්න නම්

මැද පංතියට බය නැතුව දේශපාලනය කරන්න පුලුවන් කණ්ඩායමක් ඕනෙ. අද ගාලුමුවදොර අරගලය කියන්නෙ , සිරසෙන් promote කරන්නෙ , ජවිපෙන් කරන්නෙ මේ මැද පංතියේ අපේක්ෂාභංගත්වයේ අරගලය. ඇත්ත අරගලය තියෙන්නෙ ඒකට විරුද්ධව.

විදුලිබල මංඩලේ රංජන් ජයලාල්ල එක්ක , පෙට්‍රෝලියම් එකේ රංවලල එක්ක, පාරට බහින ලාල්කාන්තට, ශ්‍රීලංකන් එක්ක පාරට බහින වසන්ත "මත්තයට" මේ system change එක කරන්න පුලුවන්ද ?

මැද පංතියට බය නැතුව මේ අරගලය කරන්න පුලුවන්

එක්කෝ සැබෑ වමේ නායකත්වයකට

නැත්නම් hierarchy ධනේශ්වර නායකයෙකුට.

මම ඉන්නෙ දකුනෙ

දකුනට එන්න බැරි අය සැබෑ වමක් හොයාගන්න , මැද පංතියට බය නැති වමක්.

වරුණ දීප්ත රාජපක්ෂ ගේ ෆේස්බුක් ගිනුමෙනි

ඉන්ධන අර්බුදය මුල්කරගෙන ඇතිවී තිබෙන තත්ත්වය සැළකිල්ලට ගෙන හෙට (04) සිට ලබන 08 වෙනිදා දක්වා රජයේ සහ රජයේ අනුමත සියලුම පාසල් සඳහා සතියක නිවාඩුවක් ප්‍රකාශයට පත්කර ඇත.

අධ්‍යාපන අමාත්‍යංශය විසින් මෙසේ සතියක නිවාඩුව ප්‍රකාශයට පත්කර ඇත .

අධ්‍යාපන අමාත්‍යංශය පවසන්නේ ඉකුත් දෙසතිය තුළ විවෘතව තිබුණු ග්‍රාමීය පාසල් සඳහා දරුවන්ගේ සහ ගුරුවරුන්ගේ පැමිණිම සමාලෝචනය කරමින් මේ තීන්දුව ගනුලැබූ බවය.

ගෑස් මිලදී ගැනීමේදී කිසියම් අක්‍රමිකතාවක් සිදුවි ඇත්දැයි විමර්ශනය කිරීම සඳහා ජූලි 05 වනදා පස්වරු 2.00 ට ලිට්‍රෝ ගෑස් සමාගමේ නියෝජිතයින් පාර්ලිමේන්තුවේ පොදු ව්‍යපාර පිළිබඳ කාරක සභාව හමුවට කැඳවා ඇති බව වාර්තා වෙයි .

කෝප් කමිටුවේ සභාපති මහාචාර්ය චරිත හේරත් මේ බව තහවුරු කර ඇත .

පසුගියදා සමගි ජන බලවේගයේ පාර්ලිමේන්තු මන්ත්‍රී කෝප් කමිටු සාමාජික එස්. එම්. මරික්කාර් ලිපියක් යොමුකර කෝප් කමිටු සභාපතිවරයා වෙතින් ඉල්ලා සිටියේ, ලිට්‍රෝ සමාගම වැඩි මුදලට ගෑස් මෙට්රික් ටොන් ලක්ෂයක් ලබා ගැනීමට පවතින සූදානම පිළිබඳව වහාම විමර්ශනක් කරන ලෙසය.

ඒ අනුව, ලිට්‍රෝ සමාගමේ සභාපතිවරයා, අධ්‍යක්ෂ මණ්ඩලය ඇතුළු නිලධාරීන්, ලිට්‍රෝ සමාගමේ මව් සමාගම වන ශ්‍රී ලංකා රක්ෂණ සංස්ථාවේ සභාපතිවරයා සහ අධ්‍යක්ෂ මණ්ඩලය මෙන්ම මුදල් අමාත්‍යාංශ ලේකම්වරයා ද කෝප් කමිටුව හෙවත් පොදු ව්‍යාපාර පිළිබඳ කාරක සභාව හමුවට කැඳවා ඇතැයි මහාචාර්ය චරිත හේරත් සඳහන් කර ඇත .

දුම්රිය ප්‍රවේශ පත්‍ර ගාස්තුව මේ මාසය තුළ වැඩි කරන බව දුම්රිය සාමානාධිකාරි ධම්මික ජයසුන්දර පවසයි .

මේ වන විට ඊට කැබිනට් අනුමැතිය ලැබී ඇති බවත් ඒ අනුව බස් ගාස්තුවෙන් 40% ක් දක්වා දුම්රිය ප්‍රවේශපත්‍ර ගාස්තුව මේ මාසය තුළ ඉහළ යනු ඇති බවත් ඔහු පවසයි .

දුම්රිය සාමාන්‍යාධිකාරිවරයා සඳහන් කරන ආකාරයට වත්මන් ප්‍රවේශපත්‍ර ගාස්තු හමුවේ දුම්රිය දෙපාර්තමේන්තුව දිනකට රුපියල් මිලියන 30 ක පමණ අලාභයක් ලබයි.

ඒ දෛනිකව දුම්රිය දෙපාර්තමේන්තුව ඉන්ධන සඳහා වැය කරන මුදල රුපියල් මිලියන 45 ක් වීමත්, නමුත් දෛනික සමස්ත ආදායම රුපියල් මිලියන 15 කට පමණ ආසන්න වීමත් නිසාය .

ඒ අනුව ප්‍රවේශ පත්‍ර ගාස්තුව වැඩි කිරීමෙන් දුම්රිය දෙපාර්තමේන්තුවේ අලාභය රුපියල් බිලියන 6 කින් පමණ අඩුවනු ඇති බව ඔහුගේ අපේක්ෂාව වී තිබේ.

දැනට දුම්රිය ප්‍රවේශ පත්‍ර ගාස්තුව බස් ගාස්තුවට සාපේක්ෂව පවතින්නේ 20% ක පමණය.

ඊයේ (02) රාත්‍රියේ සිට ඇදහැළුනු තද වැසි හමුවේ කළු ගඟ සහ ගිං ගඟ පිටාර මට්ටමට පැමිණ ඇති බවත් , ඒ සම්බන්ධයෙන් මේ ගංගා ආශ්‍රිත පහත්බිම් වල සිටින ජනතාව අවධානයෙන් සිටින ලෙසත් බලධාරීන් දැනුම්දෙයි.

මේ සම්බන්ධයෙන් වැඩිදුරටත් තොරතුරු වාර්තා කරමින් වාරිමාර්ග දෙපාර්තමේන්තුව සඳහන් කළේ, ගිං ගඟ ද්‍රෝණියේ පහත්බිම් ආශ්‍රිතව ඉදිරි පැය 24 තුළ සුළු ගංවතුර තත්ත්වයක් ඇතිවිය හැකි බවය.

ඊට අනුව වැලිවිටිය – දිවිතුර, බද්දේගම, කොටපොල, හික්කඩුව, නියාගම, නෙළුව, තවලම, අක්මීමන, නාගොඩ, ඇල්පිටිය, බෝපේ පොද්දල සහ ගාල්ල කඩවල් සතර ප්‍රාදේශීය ලේකම් කොට්ඨාශවලට අයත් පහත් බිම් ප්‍රදේශවලට සුළු ගංවතුර තත්ත්වයක් ඇතිවිය හැකි බව වාරිමාර්ග දෙපාර්තමේන්තුව පවසයි .

තවද අඅදාළ ප්‍රදේශවල පදිංචි ජනතාව මෙන්ම ඒ ප්‍රදේශයේ ගමන් ගන්නා රියැදුරන් ඒ පිළිබඳ දැඩි ලෙස අවධානය යොමු කරන්නැයි වාරිමාර්ග දොපර්තමේන්තුව දැනුම්දී ඇත.

මේ අතර අධික වර්ෂාව හේතුවෙන් කළු ගඟේ ජල මට්ටම රත්නපුර නගරය ආශ්‍රිත ප්‍රදේශයෙන් ඉහළ ගොස් ඇති අතර පහත්බිම් රැසක් ද ජලයෙන් යට වී ඇති බවත් වාර්තා වෙයි .

මේ අතර හැටන් – අවිස්සාවේල්ල මාර්ගය භාවිත කිරීමේදී විමසිලිමත් වන්නැයි ආපදා කළමනාකරණ මධ්‍යස්ථානය රියැදුරන්ට දැනුම් දෙයි.

මේ අතර කාලගුණ විද්‍යා දෙපාර්තමේන්තුවේ ස්වභාවිත විපත් පිළිබඳ පුර්ව අනතුරු ඇඟවීමේ මධ්‍යස්ථානය සඳහන් කළේ, පවතින වර්ෂාවත් සමග කඳුකර ප්‍රදේශවල විශේෂයෙන් නායයාම් අවදානම් සහිත ප්‍රදේශවල සහ ගංගා ආශ්‍රිත පහත් බිම්වල ජීවත්වන ජනතාව සැලකිලිමත් විය යුතු බවයි.

පොදුජන පෙරමුණ සහ එක්සත් ජාතික පක්ෂය හැර අනෙක් සියලු පක්ෂ ඒකාබද්ධ විපක්ෂයක් සන්ධාන ගතකිරීමේ සූදානමක් සම්බන්ධයෙන් දේශපාලන ආරංචි මාර්ග පවසයි .

වාර්තා වන ආකාරයට සමගි ජනබලවේගය , ජාතික ජනබලවේගය මෙහි මූලිකත්වය ගෙන ඇත .

සමගි ජනබලවේගය පක්ෂයේ අභ්‍යන්තර දේශපාලන ආරංචි මාර්ග සඳහන් කරන්නේ , ජාතික ජනබලවේගය පක්ෂයේ නායක අනුර කුමාර දිසානායක සිදුකළ අදහස් දැක්වීමක් පදනම් කරගෙන විපක්ෂ නායක සජිත් ප්‍රේමදාස මේ කටයුත්ත සඳහා මුලපුරා ඇති බවය.

අනුර කියපු කතාව !

දේශපාලන ආරංචි මාර්ග සඳහන් කරන ආකාරයට පසුගිය සතියේ ජාතික ජනබලවේගය විරෝධතා වලදී එහි නායක අනුර කුමාර දිසානායක මන්ත්‍රීවරයා සඳහන් කර ඇත්තේ වත්මන් දුර්දාන්ත පාලනය නිමා කිරීම සඳහා පක්ෂ පාට භේදයෙන් තොරව සියලු පක්ෂ එකමුතු විය යුතු බවය.

එසේ එකතුව සියලු දෙනා පාරට බැසිය යුතු බවත්, එම දිනය තමන් විසින් නුදුරේදීම තීන්දු කරන බවත් අනුර එහිදී අවධාරණය කර සිටියේය.

මෙම සටන අවසන් කරන්නේ ජනාධිපතිවරයාත්, ආණ්ඩුවත් පලවා හැර බව මෙහිදී කියා සිටි අනුර, ඉන් අනතුරුව අප සර්වපාක්ෂික ආණ්ඩුවක් පිහිටුවන බවත්, මාස හයක් ඇතුළත මහ මැතිවරණයක් පවත්වා රට තුළ මතුව ඇති දේශපාලන අස්ථාවරත්වය අවසන් කරන බවත් කියා සිටියේය.

සජිත්ගේ සැලැස්ම !

අනුර විසින් මෙම ප්‍රකාශය සිදු කිරීමත් සමග සමගි ජන බලවේගයේ මන්ත්‍රී කණ්ඩායම රැස්කළ සජිත් පවසා ඇත්තේ විපක්ෂය එකමුතු කරන වැඩපිළිවෙළ වහාම ආරම්භ කළ යුතු බවය.

ඉදිරි දින 6 ඇතුළත විපක්ෂයේ සියලු දේශපාලන පක්ෂ හමුවී සාකච්ඡා කිරීමට සැලසුම් කර ඇති බව ත් එහිදී සජිත් පවසා ඇත .

පක්ෂ 82 න් 80ක් සඳහා ආරාධනා !

මේ අනුව සජිත් සැලසුම් කර ඇත්තේ , මෙරට ලියාපදිංචි දේශපාලන පක්ෂ 82න් 80 ක් සඳහා ආරාධනා කර අදාළ සංධානය ගොඩනගන්න ය.

ඒ අනුව පොදුජන පෙරමුණ සහ එක්සත් ජාතික පක්ෂය කිසිම ලෙසකින් මේ සඳහා සහභාගි කර නොගත්තට ද සජිත් තීරණය කර ඇත .

මේ සම්බන්ධයෙන් ප්‍රතිචාර දැනගන්නට සජබ හිතවාදී මාධ්‍ය හරහා තොරතුරු නිකුත්කරන ලෙසත් සමගි ජනබලවේගය පක්ෂයේ නායක සජිත් ප්‍රේමදාස උපදෙස් දී ඇති බවත් දේශපාලන ආරංචි මාර්ග පවසයි .

ඒ අනුව මේ සති අන්තයේ සජබ හිතවාදී මාධ්‍ය මේ නව සන්ධානය ගැන වැඩි ඉඩක් වෙන්කර ඇති බවත් දේශපාලන ආරංචි මාර්ග වැඩිදුරටත් පවසයි .