V2025

පුවත්

සන්නාහ සන්නද්ධ බලකාය දිවිපිදූ රණවිරුවන් සමරයි !

ශ්‍රී ලංකා යුද්ධ හමුදාවට හමුදාධිපතිවරුන් සිවි දෙනෙකු දායාද කර ඇති ශ්‍රී ලංකා සන්නාහ සන්නද්ධ බළකායේ 67 වැනි සංවත්සරය 2022 දෙසැම්බර් මස 15 වන දිනට යෙදී ඇත.

ඊට සමගාමීව පැවැත්වූ රණවිරු සැමරුම ශ්‍රී ලංකා යුද්ධ හමුදා සන්නාහ සන්නද්ධ බලකා රෙජිමේන්තු අධිපති සහ හමුදා ලේකම් මේජර් ජෙනරල් ස්වර්ණ බෝතොටගේ ප්‍රධානත්වයෙන් කලත්තෑව රණවිරු ස්මාරකය අභියසදී පැවැත්විණ.

දෛවයේ කැඳවුම කොතැනද ? යන්න තේමා කරගත් ශ්‍රී ලංකා යුද්ධ හමුදා සන්නාහ සන්නද්ධ බලකාය මෙරට පැවති තිස්අවුරුදු යුද්ධයේදී ලුතිතන් ජෙනරාල් ඩෙන්සිල් කොබ්බෑකඩුව ඇතුළු නිලධාරීන් 28 දෙනෙකු සහ සෙසු නිලයින් 415 දෙනෙකු මාතෘභූමිය වෙනුවෙන් සිය ජීවිතය පූජා කර ඇත.

මාතෘභූමියේ නිවහල්භාවය ඇති කිරීම වෙනුවෙන් ශ්‍රී ලංනා යුද්ධ හමුදාව විසින් දියත් කළ වඩමාරච්චි, බලවේගය, යාල්දේවි, රිවිරැස, සත්ජය 1/2/3, ජයසිකුරු ක්‍රියාන්විතවලදීත් අවසන් මානුෂීය මෙහෙයුමේදීත් සුවිශේෂී දායකත්වයක් ලබා දී ඇති ශ්‍රී ලංකා යුද්ධ හමුදා සන්නාහ සන්නද්ධ බලකායේ සාමාජිකයින් වීර වික්‍රම පදක්කම් 17කිත්, රණ වික්‍රම පදක්කම් 67කින් සහ රණ ශූර පදක්කම් 505 කින් පිදුම් ලබා ඇත.

රණවිරු සැමරුම් උත්සවයේ දී, ජ්‍යෙෂ්ඨ නිලධාරීන් කිහිප දෙනෙකු සහ මියගිය රණවිරුවන්ගේ පවුල්වල සාමාජිකයින් විසින් රණවිරු ස්මාරකය වෙත ගොස් සිය ආචාරය රටවෙනුවෙන් දිවිපිදූ රණවිරුන් වෙත පුද කළහ. එදින උත්සවය අවසානයේ මේජර් ජෙනරල් ස්වර්ණ බෝතොට එම අවස්ථාවට සහභාගී වූ රණවිරු පවුප්වල සාමාජිකයින් සමඟ අදහස් හුවමාරු කර ගන්නා ලදී.

IMG 20221129 WA0025

ජනාධිපති රනිල්ගෙන් සජිත්ටත් ධර්ම දානයක් !

පරාභව සූත්‍රයේ සඳහන් වන්නේ ධර්මය ගැන මිස සංඝරත්නය ගැන නොවන බවත් විපක්ෂනායකවරයා ධර්මය සහ සංඝරත්නය මිශ්‍ර කරගෙන ඇති බවත් ජනාධිපති රනිල් වික්‍රමසිංහ පෙන්වා දෙයි.

ජනාධිපතිවරයා මේ බව සඳහන් කළේ අද (29) පාර්ලිමේන්තුවේ දී අදහස් දක්වමිනි.

සංඝයා වහන්සේ ධර්මය අනුව ක්‍රියා නොකරනවිට ප්‍රශ්න ගණනාවක් ඇතිවන බවත්, එය බුදුන් වහන්සේගේ සමයේ සිට සිදුවන දෙයක් බවත් පෙන්වා දුන් ජනාධිපතිවරයා සංඝ විනය ආරක්ෂා කිරීමට මහා සංඝරත්නයට බලය ලබාදෙන කතිකාවතක් ලියාපදිංචි කිරීමේ පනත් කෙටුම්පතකට පළමුවතාවට අනුමැතිය ලබා දුන්නේ ඒ වෙනුවෙන් බව ද පැවසීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

අද ආගමික කටයුතු හා බුද්ධ ශාසන අමාත්‍යාංශයට අදාළ විෂයය පිළිබඳ සාකච්ඡා කරන අවස්ථාවේ පළමුවෙන්ම මම ස්තූතිවන්ත වෙනවා විපක්ෂ නායකතුමා පරාභව සූත්‍රය ගැන මට කළ දැනුම්දීම පිළිබඳව.

ඇත්ත වශයෙන්ම මම දන්න විදියට පරාභව සූත්‍රයේ මහා සංඝරත්නය ගැන කතා කරන්නේ නැහැ. බුදුන් වහන්සේ දේශනා කර තිබෙන්නේ ,

සුවිජානෝ භවං හෝති
සුවිජානෝ පරාභවෝ
ධම්ම කාමෝ භවං හෝති
ධම්ම දෙස්සී පරාභවෝ

(දියුණුවන පුද්ගලයා එම කරුණු අනුව දැනගත හැකිය. පිරිහෙන පුද්ගලයාද එසේම දැනගත හැකිය. දස කුසලයේ යෙදෙන තැනැත්තා දියුණුවන අතර ඊට ද්වේශ කරන කෙනා පිරිහෙයි) යනුවෙනි.

බුදු දහමේ සඳහන් වෙනවා බුද්ධ, ධම්ම, සංඝ පිළිබඳව.

පරාභ‍ව සූත්‍රයේ සඳහන් වෙන්නේ ධර්මය ගැන මිස සංඝරත්නය ගැන නොවෙයි. මම හිතන්නේ අපේ විපක්ෂ නායකතුමා ධර්මයයි, සංඝරත්නයයි දෙක මිශ්‍ර කරලා තිබෙන්නේ. අපි එය වෙන්කරගත යුතුයි. මොකද ගිහි පැවදි සියලුදෙනා ධර්මය පිළිපැදිය යුතුය. ඇතැම්විට ගිහි අයට ධර්මය පිළිපදින්නේ නැතිව ඉන්න පුළුවන්. එහෙත් අපි ජිවත්විය යුත්තේ ධර්මයට අනුවයි.

මම තව කරුණක් එතුමාට මතක් කරන්න කැමතියි.

අසන්තස්ස පියා හොන්ති
සන්තේ න කු‍රුතේ පියං
අසතං ධම්මං රෝචේති
තං පරාභවතෝ මුඛං

(මොහුට අන්‍ය ශ්‍රාස්තෘන් ප්‍රිය වෙත්ද, බුද්ධාදි සත්පුරුෂයන් ප්‍රිය නොවෙත්ද, දෙසැටක මිත්‍යාදෘෂ්ටීන් ඇති අසත්පුරුෂ ධර්මය ප්‍රිය කරන්නේ ද මේ කරුණු 03 පිරිහීමේ දෙවන දොරටුවයි.)

මම එම අවවාදය අපේ විපක්ෂ නායකතුමාට දෙන්න කැමතියි. ඇත්ත වශයෙන්ම අපේ ශාසනයේ ප්‍රශ්න ගණනාවක් තිබෙනවා. අපි පළමුව බලාපොරොත්තු වෙන්නේ ගිහි පැවිදි සියලුදෙනා ධර්මය අනුව ක්‍රියා කරනු ඇති බවයි.

අපේ සංඝයා වහන්සේ ධර්මය අනුව ක්‍රියා නොකරනවිට ප්‍රශ්න ගණනාවක් ඇති වෙනවා. ඒක බුදුන්වහන්සේගේ සමයේ සිටම සිදුවන දෙයක්. දේවදත්ත සිවුරු දරාගෙන තමයි බුදුන්වහන්සේට එරෙහිව ක්‍රියා කළේ.

අපේ ශාසනික කටයුතුවලදී අවධානය යොමුකළයුතු ප්‍රශ්න ගණනාවක් අද තිබෙනවා. ඒකයි අපි පළමුවතාවට සංඝ විනය ආරක්ෂා කිරීමට මහා සංඝරත්නයට බලතල ලබාදීමේ කතිකාවතක් ලියාපදිංචි කිරීමේ පනත් කෙටුම්පතකට අනුමැතිය ලබාදී තිබෙන්නේ. මේ සඳහා නීති සම්පාදක දෙපාර්තමේන්තුවෙන් අනුමැතිය ලැබීමෙන් පසු අපි එය මේ සභාවට ඉදිරිපත් කරනවා. මොකද යම් කිසි පාලනයක් තිබිය යුතුයි. අතීතයේ මේ රට පාලනය කළේ රජවරු. ඒ රජවරු මගින් තමයි ශාසනයේ යම් යම් ප්‍රතිසංස්කරණ සිදු වුණේ.

පරාක්‍රමබාහු රජතුමාගේ කාලයේ ඇතැම් සංඝයාවහන්සේලාට මරණ දඬුවම නියම කළා. අපිට ඒවා කරන්න බැහැ. ඒ සඳහා ව්‍යවස්ථාවෙන් අපට බලයකුත් නැහැ. ආණ්ඩුක්‍රම ව්‍යවස්ථාවේ 09 වන වගන්තිය යටතේ භික්ෂූන් වහන්සේ‍ලාගේ විනය පිළිබඳ සඳහන් වෙනවා. සියම් නිකාය, අමරපුර නිකාය සහ රාමඤ්ඤ නිකාය නමින් අපිට කතිකාවත් 03ක් තිබෙනවා. ශාසනික කටයුතුවලදී අවධානය යොමු කළ යුතු ප්‍රශ්න ගණනාවක් අද අපට තිබෙන නිසා මෙම කෙටුම්පත අවශ්‍ය වෙනවා.

මම දැක්කා විශ්වවිද්‍යාල අධ්‍යාපනය ලබන එක් භික්ෂූන් වහන්සේ නමක් අපේ මල්වතු, අස්ගිරි මහානායකහිමිවරුන්ට බනිනවා, දොෂාරෝපණය කරනවා. කවුද මේ අය, භික්ෂූන් වහන්සේලාද, වෛතුල්‍යවාදීන්ද කියලා අපිට අහන්න වෙනවා.

සිවුරු දැරුවා කියලා ධර්මයට විරුද්ධව ක්‍රියා කරන්න එයින් විශේෂ ආරක්ෂාවක් ගන්න බැහැ. ඒ නිසා මේ පනත අවශ්‍යයි. ඇතැම්විට මේ හැසිරීම තුළින් පැවිදි සමාජය තුළ තිබෙන ප්‍රශ්න ගිහි සමාජය තුළින් මතු කෙරෙනවා. මෙහිදී අපි දීර්ඝ වශයෙන් සාකච්ඡා කළයුතුයි.

අද භික්ෂුන් වහන්සේලා ලෙස විශාල පිරිසක් විශ්වවිද්‍යාලවලට ඇතුලත්වුණත් අවසන් වෙනකොට ඉන්නේ ගිහියන් විදියට. අපි පළමුවෙන්ම තීරණය කළයුතුයි භික්ෂුන් වහන්සේ‍ලා විදියට විශ්වවිද්‍යාලයට ඇතුළත් වුණොත්, භික්ෂුන් වහන්සේ ලෙසම උපාධිය ලබාගෙන ඉන් පිටවිය යුතු බව. ඒ ගැන මහානායක ස්වාමීන්වහන්සේලා සමග සාකච්ඡා කළ යුතුයි.

ඒවගේම විශ්වවිද්‍යාල තුළ හැසිරීම මේ කතිකාවන්ට සම්බන්ධ කළයුතුයි. මේ යන ක්‍රමවේදය තවදුරටත් ඉදිරියට පැවතුනොත් අපේ ශාසනය නැති වෙනවා. ඒකයි මම විශේෂයෙන්ම අද මේ ගැන කතා කළේ.

ඉන්දියාව හා සසඳන විට ශ්‍රී ලංකාවේ හින්දු ආගමේ සුවිශේෂී ස්වභාවය අප ආරක්ෂා කරන්නේ කෙසේද යන්න පිළිබඳව ද රජය සොයා බැලිය යුතුයි. හින්දු භක්තිකයන් පමණක් නොවෙයි බෞද්ධ විහාරස්ථානවලත් විවිධ හින්දු දෙවිවරුන් කී දෙනෙක් අදහනවාද?

නිදසුනක් වශයෙන්, ශිව වන්දනාව යාපනයේ බහුලව දක්නට ලැබෙනවා.

විෂ්ණු වන්දනාව හෙවත් විෂ්ණු දෙවියන් මූලික වශයෙන් දකුණු පළාතේ අදහනු ලබනවා. විෂ්ණු, කතරගම, පත්තිනි, විභීෂණ දෙවියන්ට අපි නමස්කාර කරනවා.

ඉන්දියාවේ හින්දු නමස්කාරයට වඩා ශ්‍රී ලංකාවේ හින්දු ආගමේ සුවිශේෂීභාවය පිළිබඳ වාර්තාවක් සම්පාදනය කරන ලෙස මම අමාත්‍යතුමාගෙන් ඉල්ලා සිටිනවා, සමහර විට අනෙක් පාර්ශ්වයන්ට ද මෙයට උදව් කළ හැකිය. එහිදී නැවතත් ඔබට උතුරු ඉන්දියාව සහ දකුණු ඉන්දියාව අතර වෙනසක් දක්නට ලැබෙනවා. එය අප විසින් කළයුතු දෙයක්.

ඒ වගේම අපි තීරණය කරලා තිබෙනවා ශ්‍රී ලංකාවේ ඉතිහාසය පිළිබඳ අධ්‍යයන ආයතනයක් ඇති කරන්න. අද ඉතිහාසය අමතක වෙලා තිබෙන්නෙ. විශේෂයෙන්ම මේ ආයතනය ඇති කරන්න යන්නේ අපේ රටේ ඉතිහාසය පිළිබඳ දැනුම ලබා දෙන්න. ඒ වගේම පර්යේෂණ ඇති කරන්න. මහා වංශයට වඩා අද ඉතිහාසය වෙනස් වෙලා තිබෙනවා.

මහාවංසයේ තිබෙන්නේ එක කණ්ඩායමක අදහස්. නමුත් තවත් අදහස් තිබෙනවා. අපි මේ ගැන සොයා බලා ලංකාවේ ඉතිහාසය පිළිබඳව මේ ආයතනය ඇති කරලා ඉදිරියට යන්න බලාපොරොත්තු වෙනවා.

ඒ වගේම මම සෞඛ්‍ය ඇමතිතුමාට ප්‍රශංසා කරන්න ඕනේ ඌව වෙල්ලස්ස, සබරගමුව, සහ පොලොන්නරුවේ අපට අවශ්‍ය වෛද්‍ය පීඨ 03ක් ආරම්භ කරන්න කටයුතු කිරීම පිළිබඳව.

එමගිනුත් පශ්චාත් පරීක්ෂණ වෛද්‍ය විද්‍යාව පිළිබඳ උපාධි පිරිනමන්න අපි සූදානම්. එවැනි උපාධි පිරිනමන එක් ආයතනයක් කොළඹ තිබෙනවා.

 මේ වන විට අපි සෞඛ්‍ය ක්ෂේත්‍රයේ විශාල පරිවර්තනයක් සිදු කරමින් සිටිනවා. වෛද්‍ය පර්යේෂණ ආයතනය දියුණු කරන්න අපි මුදල් ලබා දෙනවා. කොළඹ අපේ තිබෙන වෛද්‍ය පර්යේෂණ ආයතනය ඉන්දියාවේ පූනේ ප්‍රදේශය ඇති වෛද්‍ය පර්යේෂණ ආයතනය මට්ටමට ගෙන ආ යුතුයි. ඉදිරි වසර දෙක තුනවන විට අපට එම මට්ටමට ළගා විය හැකියි.

වෛද්‍ය විද්‍යාවට අවශ්‍ය දියුණුව අපි ලබා දී තිබෙනවා. මේ වන විට එක වෛද්‍ය පීඨ ශිෂ්‍යයෙක් වෙනුවෙන් ලක්ෂ හැටක් රජය වියදම් කරනවා. මේ ඔක්කොම වියදම් කරන්නෙ ඔවුන් අපේ රටේ රඳව ගන්න. නමුත් උපාධිය ලබා ගත්තට පස්සේ බොහෝ දෙනා පිටරට යනවා. මේක විශාල ප්‍රශ්නයක්.

මෙහිදී අපි ගතයුතු පියවර කුමක්ද කියලා සාකච්ඡා කළයුතුයි. මොන ආණ්ඩුව ආවත් මේ ප්‍රශ්නය තිබෙනවා. එහෙම බැලුවම අපේ වෛද්‍යවරු පුහුණු කරලා අපේ රටින් අනිත් රටවල්වලට ලබාදෙන ආධාර, විදේශ රටවලින් අපේ රටට සෞඛ්‍ය සඳහා දෙන ආධාර වලට වඩා වැඩි බවයි පේන්න තිබෙන්නේ. පිටරට යන අපේ වෛද්‍යවරු සුදුසුකම් සහ අත්දැකීම සහිත අය. මේ පිළිබඳ අපි අවධානය යොමු කළ යුතුයි. වෛද්‍ය විද්‍යාව සහ ඉංජිනේරු විද්‍යාව හදාරන සිසුන්ට අපි මොකක්ද කරන්නේ කියලා සාකච්ඡා කළ යුතුයි. මේ සඳහා පිළිතුරක් අපි සෙවිය යුතුයි.

 

සාගරයි සංජීවයි තරගයක් : රෝ එක බැසිල් හම්බෙලා !

මොල හතක් තියෙනවයි කියන බැසිල් රාජපක්ෂ, ලංකාවට ආපු දවසේ ඉඳලා , එක මිනිත්තුවක් නිකං නෑ කියලයි, පොහොට්ටුවේ එක ප්‍රකාශකයෙක් කිව්වේ. ප්‍රකාශකයා වෙන කවුරුවත් නෙවෙයි. සංජීව එදිරිමාන්න. සංජීව කියන්නේ බැසිල්ගෙ ළඟටම වෙලා ඉඳලා, බැසිල්ව අයිති තමන්ට කියලා හිතාගෙන, වැඩ කරන මන්ත්‍රීවරයෙක් කියලයි, අපි දන්නෙ. හැබැයි ඒකටත් ඕන් දැන් තරගයක්.

තරගයක් කිව්වම, ඒ කාත් එක්කද කියලා ඕගොල්ලෝ බලාවි. ඇත්තම කියනවා නම්, කාලෙක ඉඳලා බැසිල්ගෙ ළඟම ගෝලයා වෙන්න, පක්ෂයෙ මහලේකම්, සාගර කාරියවසමුයි සංජීවයි අතර , පුංචි නිහඬ සටනක් පටන් ගෙන තිබුණා. සංජීව කාලෙකදි ඉස්සරහට ආවා. ඒත් මේ දවස් වල නං සංජීව පරද්දල ඉදිරියට එන්න, සාගර සමත් වෙලා...

ඒ දෙන්නගෙ සටනත් හරියට, football world cup එකේ, සහභාගි වෙන, අන්තිම තරගාවලිය නිසා , වාර්තාවක් තියන්න, රොනාල්ඩෝ යි මෙසීයි අතර තියන තරගය වගේම තමයි....

පහුගිය දවස්වල, පත්තර වලට මීඩියා වලට කතා කරමින්, බැසිල්ගේ තොරතුරු කියන්න, බැසිල් පිලිබද නිවුස් දෙන්න, මැසේජ් ගැන සුභවාදී ප්‍රකාශ නිකුත් කරන්න, එදිරිමාන්න මොනතරම් මහන්සි වුණත්, ඊට වඩා ලොකු දෙයක්, සාගර එක වොයිස් කට් එකෙන් කරලා දැම්මා...

ඔන්න ඔය අස්සෙ තමයි, බැසිල් ගිය ඉරිදා ආපු වෙලාවේ, ගුවන්තොටුපලේ විශේෂ ප්‍රභූන් වෙනුවෙන් තියන, පර්යන්ත හා වරප්‍රසාද පාවිච්චි කරමින්, රජයේ මුදල් අවභාවිතා කරලා කියන, චෝදනාව එළියට ආවේ.

සමාජ මාධ්‍ය වලින් , මේ චෝදනාව, තදටම බැසිල්ට එරෙහිව එල්ල කළා. ඒ වෙලාවේ, පක්ෂය වෙනුවෙන් කතා කරමින් , එහෙම දෙයක් වුණේ නෑ කියලා , කරුණු පැහැදිලි කරන්න ඉදිරිපත් වුණේ සාගර...

"කිසිම මුදල් අවභාවිතාවක් වෙලා නෑ... රජයේ මුදල් සතයක්වත්, බැසිල් මහත්තයාගේ ආගමනය වෙනුවෙන්, වියදම් වෙන්න විදියක් නෑ... මොකද ඒ සියලුම මුදල්, පක්ෂය විසින් ගෙවා දැමුවා..."

ඔන්න ඔය අස්සේ මාධ්‍ය අතර ඉන්න, කවුදෝ දග පන්දු කාරයෙක්, සාගරගෙ කකුල් දෙක මුලටම , දුස්රාවක් දැම්මෙ මෙන්න මෙහෙම.

"රෝ සංවිධානයේ නියෝජිතයෝ වගයක් ඇවිල්ලා, බැසිල් මහත්තයා හම්බෙලා, සාකච්ඡාවක් කරා කියලත් ආරංචියි..."

සාගර පසු පාදයට ගිහින්, බැට් එකයි පාදයයි දෙකම ඉස්සරහට දාලා, විකට් එක බේරගත්තේ මෙන්න මෙහෙම....

"ඇයි... එතුමට ඒ වගේ කවුරු හරි හම්බවෙන්න, තහනමක් කරලා තියෙනවද..?"

"ඒ කියන්නේ එහෙනම් හම්බ වෙලා තියෙනවා...?"

"ඒක මන් දන්නෑ.... ඒක අහන්න ඕන එතුමාගෙන්. හැබැයි එතුමට ඒ කවුරුවත් හම්බවෙන්න තහනමක් නෑ..."

රෝ එකයි බැසිලුයි කළයි කියන සාකච්ඡාව, කොහොම වෙතත්, මේ දවස් වල රෝ එක ගැන නම්, අපේ දේශපාලන කරලියේ කතා-බස් බහුලයි. ලබන අවුරුද්දේ, ලංකාවේ දේශපාලනය තුළ, පෙරළියක් කරන්න, දැන් ඉඳලම, රෝ එක වැඩ කරන්න පටන් අරන් කියලා, පුංචි කතාබහක්, පහුගිය දා පාර්ලිමේන්තු ආලින්දයකත් ඇතිවුණා.

හැබැයි එතන, ආණ්ඩුවේ මන්ත්‍රීවරු කවුරුවත් හිටියේ නෑ. හිටපු ඔක්කොම විපක්ෂයේ හා, ආණ්ඩුවෙන් ඉවත් වෙච්ච කණ්ඩායම් වල අය...

මේ කට්ටිය කතා උනේ, ලබන අවුරුද්දේ මැද විතර වෙනකොට ආණ්ඩුවට, නිසැකයෙන්ම මහ ඡන්දයක් පවත්වන්න සිද්ධ වෙනවා , කියලා තැන ඉදන්...

"ඡන්දයක් තියන්නේ නෑ කියලා, රනිල් කියලා ඉවරයි... ඔයගොල්ලො බොරුවට දගලනවා." ප්‍රශ්න ටිකක් මධ්‍යස්ථව දකින, එක් මන්ත්‍රීවරයෙක් එහෙම කිව්වා...

"ඔයා කතා කරන්නේ, දැන් තියෙන තත්ත්වය ගැන. හැබැයි ලබන අවුරුද්දේ ඡන්දයක් තියන්න කියලා, ඉල්ලලා, සජබේ මූලිකත්වයෙන්, ජවිපෙයි , පෙරටුගාමීන් සහ විපක්ෂයේ පක්ෂයි, පාරට බැහැලා උද්ඝෝෂණය කරන කොට, රනිල් කොහොමද ඡන්ද නොතියා ඉන්නේ.

මාර්තු වල නිසි කාලේ ආවම, අනිවාර්යයෙන් ම, එයාට ආණ්ඩුව විසුරුවාලා , ඡන්දයක් තියන්න වෙනවා. ඒකට ජාත්‍යන්තරයෙ සපෝට් එකක් තියෙනවා. විශේෂයෙන් රෝ එකේ..." මන්ත්‍රීවරයා එහෙම කිව්වේ, කාරණා කාරණා දැනමුත්තෙක් විදිහට.

"රෝ එක්ක ඉන්නේ ,රනිල් එක්කනේ..." තවත් මන්ත්‍රීවරයෙක් කිව්වා.

"ඒ ඉස්සර... 2015දී system change කරන්න රනිල්ට ඒගොල්ලො උදව් කලා තමයි. එකේ හිලව්වට රනිල් මොනාද ඉන්දියාවට කළේ...හම්බන්තොට චීනට දුන්නා. පෝට් සිටිය නතර කරනවා, කියලා කිව්වට, කළේ නෑ... අන්තිමේ ඉඩමත් වැඩි කරල දුන්නා. ඉන්දියාවට කළගුණ සළකන්නට රනිල්ට බැරි වුණා..." ජාත්‍යන්තර සබඳතා බහුශෘතයෙකු වගේ ඒ මන්ත්‍රීත්, මෙන්න මෙහෙම විස්තර, කියාගෙන කියාගෙන ගියා.

දේශපාලන වාර්තාකරු

A 9ක් ගත්ත සිදුවාට : භූමිතෙල් ගසා ගිනි තිබ්බේ කවුද ?

මෙවර අපොස සාමාන්‍ය පෙළ විභාගය ඒ සමාර්ථ නවයක් සමඟින් සමත් වූ අම්පිටිය ප්‍රදේශයේ පදිංචි 16 හැවිරිදි පාසල් සිසුවකුගේ ශරීරයට භූමිතෙල් දමා ගිනි තැබීම හේතුවෙන් බරපතළ තුවාල ලත් සිසුවා ප්‍රතිකාර සඳහා මහනුවර ජාතික රෝහලට ඇතුළත් කර තිබේ.

අම්පිටිය ශාන්ත බෙනඩික් විදුහලේ අධ්‍යාපනය ලබමින් සිට ඇති මෙම සිසුවා තමන් ලද විශිෂ්ට ප්‍රතිපලය මිත්තණියට දැනුම් දීම සඳහා 26 දින රාත්‍රියේ යමින් සිටියදී මී කණුව එකේ කණුවේ දී මෙම සිද්ධියට මුහුණ දී තිබෙන බව පොලිස් පරීක්ෂණ මගින් අනාවරණය වී ඇත.

අම්පිටිය මැද්දේගම ප්‍රදේශයේ පදිංචි සිසුවා ඔහුගේ නි‍ෙවස ආසන්නයේදීම මෙම ප්‍රහාරයට ලක්ව තිබෙන්නේ පියා ද ළඟ සිටියදීය. ඉදිරියට පැමිණි පුද්ගලයකු ලාම්පුතෙල් ඉස ගිනි තබා පලා ගිය බවද තම පුතාට ගිනි තැබූ පුද්ගලයා හඳුනා ගැනීමට නොහැකි බවද පියා පොලිසියට පවසා ඇත.

සිද්ධිය සම්බන්ධයෙන් ලැබුණු තොරතුරු මත මත්කුඩුවලට ඇබ්බැහිවූ අම්පිටිය මීකණුව ප්‍රදේශයේම පදිංචි පුද්ගලයකු අත්අඩංගුවට ගැනීමට පොලිසිය පරීක්ෂණ පවත්වයි. සැකකරු ප්‍රදේශයෙන් පලාගොස් තිබෙන අතර ඔහු අත්අඩංගුවට ගැනීමට පොලිස් කණ්ඩායම් තුනක් යොදවා තිබෙන බව මහනුවර කොට්ඨාස භාර ජ්‍යේෂ්ඨ පොලිස් අධිකාරී චමිල් රත්නායක මහතා පවසයි.

භූමිතෙල් ගිනිගෙන දැවීම නිසා සිසුවාගේ ගෙල ප්‍රදේශයේ සිට පහළට සම්පූර්ණයෙන්ම පිළිස්සී ඇති අතර ඊයේ (28) පෙරවරුවේ ඔහු සැත්කමකට ලක්කර ඇත. ඉදිරියේ දී ඔහු තවත් සැත්කමකට ලක් කිරීමට නියමිතය.

අම්පිටිය ප්‍රදේශය බිය ගන්වමින් කලක පටන් ක්‍රියාත්මක වන මැර කල්ලියක සාමාජිකයකු මෙම ගිනි තැබීම සිදුකර තිබෙන බවත් සිසුවාගේ පවුලේ උදවිය ඔවුන්ට ඇති බිය නිසා සිද්ධිය වසන් කරන බවත් ප්‍රදේශවාසීහු පවසති.

පසුගිය කාලය පුරා මෙවැනි අමානුෂික ක්‍රියා ගණනාවක් මෙම මැර කල්ලි විසින් සිදුකළ නමුත් පොලීසිය ඒ සම්බන්ධයෙන් විධිමත් ක්‍රියාමාර්ග නොගත් බවට ප්‍රදේශවාසීහූ චෝදනා කරති.

හෙරෝයින්, ගංජා ඇතුළු විවිධ මත්ද්‍රව්‍ය ජාවාරම්කරුවන් මෙන්ම භාවිත කරන්නන් කලක පටන් අම්පිටිය හා ඒ ආශ්‍රිත ප්‍රදේශවල ජනතාව භීතියට පත් කරමින් එළිපිට කප්පම් ගැනීම් සිදු කරන නමුත් ජීවිතාරක්ෂාව වෙනුවෙන් නිහඬව සිටීමට සිදුව ඇතැයි පෙන්වා දෙන ප්‍රදේශවාසීන් අපරාධකරුවන් සම්බන්ධයෙන් පොලීසියට තොරතුරු ලබාදුන් විට ඇතැම් නිලධාරීන් තොරතුරු ලබාදුන් පුද්ගලයන්ගේ අන්‍යන්‍යතාව අපරාධකරුවන් හමුවේ හෙළි කිරීම නිසා කිසිවකුත් මෙම මැර කල්ලිවලට එරෙහිව කටයුතු කරන්නට ඉදිරිපත් නොවන බවත් පවසති.

නිවසට වී අධ්‍යාපන කටයුතුවලට මූලිකත්වය දී ජීවත්වන අහිංසක දරුවන්ට ජීවත් වීමට නොහැකි ලෙස මේ වනවිට අම්පිටිය ප්‍රදේශය කප්පම්කරුවන්ගේ හා මැර කල්ලිවල ග්‍රහණයට අසුව ඇතත් පොලිසිය ඒ සම්බන්ධයෙන් සැලකිය යුතු ක්‍රියා මාර්ග නොගන්නා බව ප්‍රදේශවාසීහු පවසති.

අපේ දරුවාට සිදුවූ විපත අපි බලා ගන්නම් මේවා මාධ්‍ය මගින් හෙළි කරලා අපිටත් පාරේ බැහැලා යන්න ලැබෙන්නේ නැතැයි සිසුවාගේ ඥාතීන් පවසන අතර ඔවුන් අද පත්ව සිටින අසරණ තත්ත්වය එයින්ම පැහැදිලි කර ගැනීමට පුළුවන.

- දිනමිණ

ලංවීම ප්‍රතිව්‍යුහගත කරන්න : කැබිනට් අනුමැතිය !

විදුලිබල මණ්ඩලය ප්‍රතිව්‍යුහගත කිරීමට පත් කරන ලද කමිටුව විසින් ලබා දුන් යෝජනාවලියට කැබිනට් මණ්ඩලයේ අනුමැතිය හිමි වූ බව විදුලිබල හා බලශක්ති අමාත්‍ය කංචන විජේසේකර පවසයි.

ඊයේ(28) සිය ගිණුමේ ට්විටර් සටහනක් තබමින් අමාත්‍යවරයා මේ බව සදහන් කර තිබේ.

ඒ අනුව විදුලිබල ප්‍රතිව්‍යුහගත පනත මසක් තුල සකස් කිරීමට සහ එම ප්‍රතිව්‍යුහගත ක්‍රියාවලිය කඩිනමින් ක්‍රියාත්මක කිරීමට කටයුතු හෙට සිට ක්‍රියාත්මක වන බවත් අමාත්‍යවරයා සඳහන් කර ඇත.

බැසිල්ගේ යෝජනාවට රනිල් අවනත වෙලා නෑ !

දේශපාලන කරලියේ, බැසිල් රාජපක්ෂ හිටපු ඇමතිවරයාට, හොඳ කියන අය හොයාගන්න ලේසි නෑ. හැබැයි නරක කියන අය නම්, ඕන තරම්...

මේ කියන්නේ, පාර්ලිමේන්තු මන්ත්‍රීවරු අතර නම් නෙවෙයි.... රටේ පොදු ජනතාව අතර කියලා කිව්වොත්, වරදක් නැති වෙයි.

හැබැයි ඉතින් අපි මේ කතා කරන්නේ, එක්තරා ඡන්දෙකදී, ගම්පහ දිස්ත්‍රිකයේ , වැඩිම මනාප අරන් වාර්තාවක් තියපු කෙනෙක් ගැන. කලකදි රහ, කලකදි වහ වෙනවාලු කියලා, අපේ ජනවහරෙ තියෙන බව දන්න අප,ට ඕවා ප්‍රශ්න නෙවෙයි.

බැසිල් ආපු වෙලාවේ, බැසිල් ආවේ ඇයි කියලා, හදිසියට කතා කරපු හුඟ දෙනෙකුට, බැසිල්ගේ පාට ගැන හොයන්න බැරි වුණා.

ලංකාවෙන් ගියපු කළු බැසිල් වෙනුවට, ලංකාවට ආවේ සුදු වෙච්ච බැසිල් කෙනෙක්...

නෑ නෑ... අපි මේ කතා කළේ, බැසිල්ගේ චරිතය හරි , දේශපාලන චරිතය ගැන හරි නෙවෙයි. යනකොට අපූරුවට කලු වෙලා තිබිච්ච කොන්ඩෙ, එනකොට සුදුම සුදු වෙලා තිබිච්ච එක ගැන.

ඒ වෙලාවේ ඒක, කවුරුවත් දැක්කේ නැති බව ඇත්ත

හැබැයි ඔන්න දවසක් දෙක තුනක් ගත වෙලා ගියාට පස්සෙ, ඒකත් ටක්කෙටම දැනිච්ච අය ඉන්නව...

"බැසිල් ආවෙ නිකං නෙවෙයි... අයවැයේදී ආණ්ඩුව පෙරළන්න බලාගෙන ඉන්න විපක්ෂයට, ගේමක් දෙන්න..."සමහරු එහෙම කිව්වා.

"රනිල් පොහොට්ටුවට සලකන එක අඩු කරලා. හුඟ දෙනෙකුට ඇමතිකම් දීලාත් නෑ. ඒ උනාට ආණ්ඩුව තියෙන්නෙ, පොහොට්ටුව නිසා. බැසිල් ආවේ, මේ වෙලාවේ නිවැරදි කේවල් කිරීම කරලා, පොහොට්ටුවට අහිමි වෙයි වෙච්ච තැන දිනලා දෙන්න "සමහර අයනම් එහෙමත් හිතන්න ඇති...

ඒත් බැසිල් ගැන නොදන්නා අය මොනව කිව්වත්, දන්න අය නම් එහෙම හිතුවේ නෑ..

"බැසිල් කියන්නේ සැලැස්මක් ඇතුව, වැඩක් කරන මිනිහෙක් මිසක්, සූදානම් නොවී වැඩ කරන කෙනෙක් නෙවෙයි "

ඔහු ගැන දන්න දේශපාලන නිරීක්ෂකයෝ, එහෙම කිව්වා.

"බැසිල් මේ ඇවිත් තියෙන්නේ, ප්ලෑන් කරලා වැඩක් කරන්න ආපු ගමනක් නෙවෙයි. මොකක් හරි ප්‍රශ්නයක් නිසා, හදිස්සියේ කඩාගෙන බිඳගෙන ආපු ගමනක් ." අඩුම තරමින් ඔහුගේ කොණ්ඩය ගැනවත් හිතන්න, ඔහුට ඉස්පාසුවක් නැති බව දැකපු, ඔහු ගැන දන්න දන්නා බොහෝ අය, එහෙම හිතපු එක වැරදිත් නෑ... මොකද බැසිල් කියන්නේ, තමන්ගේ පෙනුම ගැන, පෞරුෂය ගැන, ඕනවටත් වඩා හිතන කෙනෙක් මිස, මහණ දම් පුරන තවුසෙක් වගේ, රූපය ගැන හිතන කෙනෙක් නොවන නිසා..

බැසිල්ගේ මේ ගමන එක්ක, අපේ දේශපාලන කරළියේ කට කතා කීපයකුත්, පැතිර යන්නට වුණා. ආණ්ඩුවේ අය-වැයේ ඇතැම් වැය ශීර්ෂ කීපයක් පරාජය කරන්න, බැසිල්ගේ සැලැස්මක් තියනවා කියලත් , කතාවක් පැතිර ගියා.

ඇත්තටම මේ කතා පැතිර යන්න ,ඔහුගේ හැසිරීමත් එක්තරා හේතුවක් වුණා. ආපු දවසෙ පටන්ම, ඔහු කළේ, ප්‍රසිද්ධියේ එක සාකච්ඡාවක් කරනකොට, අප්‍රසිද්ධියේ රෑට කලුවරේ සාකච්ඡා කීපයක් කරන එක. රෑට රෑට ඔහුගේ මිතුරන්ගේ ගෙවල්වල, හොර රහසෙ හමුවෙලා මේ කතා කරන්නේ, ආර්ථිකය ගොඩ ගොඩ ගන්න හැටි ගැන නම් වෙන්න බෑ...

කොහොම හරි වටින් ගොඩින් ආරංචි උනේ, රනිලුත් මේ ගැන යම් දෙයක් දැනගෙන, බැසිල්ට පුංචි තරවටුවකුත් කරලා තිබුණා කියලයි.

මේ කතාවක් අතරේ, දෙදෙනා අතර හමුවකුත් , පසුගිය දින රාත්‍රියක සිදු වූ බවත් , වාර්තා වුණා. නොයෙකුත් දුෂ්කරතා විඳිමින් , තවමත් ආණ්ඩුව ආරක්ෂා කරගන්නට කැපවන මන්ත්‍රීවරුන් වෙනුවෙන් , ඇමතිකම් ලබා දීලා , නව කැබිනට් සංශෝධනයක් ඇති කරන්න යෝජනාවකුත් , එවෙලේ බැසිල් ගෙනා බවයි කියන්නේ.

රනිල් ඒකට සෘජු එකඟත්වයක් පළ කර නෑ. දෙසැම්බර් 8 වැනිදා වන විට, ඒ වගේ වෙනසක් ඇති විය යුතුයි කියලා, බැසිල් කියා තිබුනත්, රනිල් ඊට අවනත වෙලා නෑ කියලයි කියන්නේ,

දේශපාලන වාර්තාකරු

දේශීය කිරි පිටරටින් ආනයනය කරලා !

රංජිත් සියඹලාපිටිය රාජ්‍ය ඇමැති, පහුගිය දවස් වල, පස්ස කැඩිච්ච කඩියා වගේ, ඒ මේ අත දිවුවේ, අයවැය හින්ද කාර්යබහුල වෙලා විතරක් නෙවෙයි. එයාගේ අමාත්‍යංශයට අයත්, අනෙකුත් බාහිර ආයතන වලත්, ලොකු ලොකු ප්‍රශ්න නිසා ලු..

ඒ වගේ ප්‍රශ්නකාරී එක තැනක් තමයි, රේගුව.

දැන් මේ සති දෙක තුනක ඉඳලා, රේගුවයි, ලංකාවේ ආනයන අපනයන පාලකයි, කිරිපිටි නිෂ්පාදන වලට සම්බන්ධ, ව්‍යාපාරිකයෝ ටිකකුයි හිටියෙ, ලොකු කඹ ඇදිල්ලක. ඒක තුන්කොන් කඹ ඇදිල්ලක් කිව්වත් වරදක් නෑ...

ප්‍රශ්නය වුණේ, මේ රටේ දේශීය කිරිපිටි නිෂ්පාදනය කරන, සමාගම් කීපෙකුයි , යෝගට් වගේ රසකැවිලි හදන සමාගම් කීපයකුයි එකතු වෙලා, පිටරටින් ගෙන්නපු කිරිපිටි නිෂ්පාදන තොගයක් , වරායෙන් නිදහස් නොකරපු එක.

මේක හින්දා රටේ කිරිපිටි හිඟයක් ඇති වේවි කියලා, කිරි පිටි නිෂ්පාදකයො කිව්වා. නිෂ්පාදන තොගය නිදහස් කරන්න, ආනයන අපනයන පාලකයින්ගෙන්, නිසි අවසර ලැබිණ නෑ කියලා, රේගුව කිව්වා. නිසි අවසර දෙන්න තරම්, මේ ගෙන්නලා තියෙන කිරි ආහාර තොගය, නීත්‍යානුකූල නෑ කියලා, ආනයන අපනයන පාලක කිව්වා....

දැන් බලනකොට, ඒක මහා පටලැවිල්ලක්. පටක් පොටක් නැති, අලකලංචියක්... මේ අලකලංචිය විසඳන්න තමයි, සියබලාපිටිය මැදිහත් වෙලා තිබුනේ..

පහුගිය සතියෙ මේක ගැන, දේශීය කිරිපිටි නිෂ්පාදකයෝ ටිකක් එකතුවෙලා, පුවත්පත් සාකච්ඡාවක් කරනවත් අපි දැක්කා තමයි... ඒත් ඉතිං මේකේ හරි කතාව ආරංචි උනේ පස්සෙනේ.

දේශීයව කිරිපිටි හා, කිරි වලින් යෝගට් නිපදවන, මේ කර්මාන්ත කාරයෝ, තමන්ගේ නිෂ්පාදන හදන්නෙ, දේශීය කිරිපිටි වලින් නම්, මොන මගුලටද, මේ නිෂ්පාදන පිටරටින් ගේන්නේ කියලා අහන්න තරම්, කවුරුවත් ඉස්සර උනේ නෑ... සමහරවිට, සබ්ජෙක්ට් එක ගැන දන්නේ නැති නිසා, වෙන්න පුළුවන්.

හැබැයි ආනයන අපනයන පාලක, ඕක ගැන හොඳට දැනගෙන හිටියා.

එයාගේ නම උපුල්මලී ප්‍රේමතිලක. දරන තනතුර බරපතළ වුණත්, එයා ඒකට සුදුසු බව පෙන්නලා ඉවරයි.

කාන්තාවක් ඒ වගේ වගකිවයුතු තනතුරකට පත් වුණාම, සමහර අය හිතන්නේ, ලද බොළඳ කාන්තාවක් එක්ක, වංගුවක් දෙකක් ගහන එක, අමාරු නෑ කියලා. නුවනත් හැදිමිටේ තරමටයි දිග කියලනෙ කියන්නේ.

හැබැයි උපුල් මලිගේ නුවණ නම්, හැඳිමිටේ තරමට වඩා, යාර ගානක් දිග බව ඔප්පු කරලා පෙන්නුවා.

"මේක නීති විරෝධී ආනයනයක්. මේ ගෙන්නලා තියෙන්නෙ, කිරිපිටි නිෂ්පාදනයට අවශ්‍ය වන, කිරි නිපදවන අමුද්‍රව්‍ය වගයක්. ඒවට රජය මෙයාලට අවසර දීල නෑ. ඒ නිසා මේ කිරිපිටි අමුද්‍රව්‍ය තොග නිදහස් කරන්න බෑ " උපුල්මලී කෙලින්ම කිව්වේ, අන්න එහෙමයි.

"මේ ප්‍රශ්නෙ, පහුගිය සතියේ දුර දිග ගියා වැඩියි. කිරිපිටි තොගය, රාජසන්තක කරලා, සත්ත්ව ආහාරවලට විකුණලා දාලා, ඒකෙන් තෑගි මුදල් අරගන්න, රේගුව උත්සාහ කරනවා කියලයි, කිරිපිටි නිෂ්පාදකයෝ කියන්න ගත්තේ. නීතියට වංගුවක් ගහලා, තහනම් භාණ්ඩ ලංකාවට ගේන්න, තමන්ගත් උත්සාහය ගැන, ඔවුන් කතාවක් නෑ.

කාගෙ කාගෙත් කිල්ලෝටවල හුණු එමටයි කියන ගමේ කතාව, කොයි තරම් ඇත්තද කියලා, අපිට මතක් උනේ, අන්න ඒ කතාව අහනකොට...

මේ කෝක වුනත්, අපට නම් ඇතිවුණේ, බයක් හා සැකයක්

"එතකොට දෙයියනේ දේශීය කිරි එලදෙනුන්ගෙන් නිපදවන, දේශීය කිරිපිටි කියන සන්නාමය යටතේ, අපි මෙච්චර දවසක් බීල තියෙන්නේ, පිටරටින් ගෙන්නපු දේශීය කිරි ද ?

ඒක මහා හතරබීරි කතාවක්... "පිට රටින් ගෙන්නන අමුද්‍රව්‍ය වලින් හදන දේශීය කිරි" .

කොහොමද ඒක ?

දේශපාලන වාර්තාකරු

බැසිල්ගේ කටුනායක බිල ගැන : පොහොට්ටුවෙන් නිවේදනයක් !

ශ්‍රී ලංකා පොදුජන පෙරමුණේ ජාතික සංවිධායක හිටපු අමාත්‍ය බැසිල් රාජපක්ෂ පෞද්ගලික සංචාරයකින් පසුව නැවත ශ්‍රී ලංකාවට පැමිණි පසුගිය 20 වෙනිදා අනීතික හෝ අසම්මත කිසිවක් සිදුනොවූ බවත් ඒ සම්බන්ධයෙන් ගෙන යන ප්‍රචාරයන් සත්‍යයෙන් තොර බවත් පොදුජන පෙරමුණේ මහලේකම්, පාර්ලිමේන්තු මන්ත්‍රී, සාගර කාරියවසම් පවසයි .

නිවේදනයක් නිකුත් කරමින් මහ ලේකම්වරයා මේ බව සඳහන් කරන අතර බැසිල් රාජපක්ෂ සහ ඒ මහතාගේ බිරිද ප්‍රභූ පර්යන්තය පාවිච්චි කිරීම සඳහා එක් අයෙකුට ඩොලර් 200 බැගින් ඩොලර් 400 ක් ද, තේ පැන් සංග්‍රහය සඳහා මුදල් ද, ගෙවා ඇති බවත් එම සියලු පහසුකම් සාමාන්‍ය ක්‍රියා පටිපාටිය අනුව ලබාගෙන ඇති බවත් සඳහන් කර ඇත .

පොදුජන පෙරමුණේ මහ ලේකම් සාගර කාරියවසම් මන්ත්‍රීවරයා නිකුත්කළ සම්පූර්ණ නිවේදනය පහත දැක්වෙයි .

IMG 9928

IMG 9929

අමරවීර සිරිසේනගෙන් ගේම ඉල්ලයි !

ශ්‍රී ලංකා නිදහස් පක්ෂයේ අභ්‍යන්තර අර්බුදය තවත් උග්‍රවන තත්ත්වයක් පෙන්නුම් කෙරෙයි.

ඒ එක්සත් ජනතා නිදහස් සන්ධානයේ මහලේකම්වරයා ලෙස තමා තවදුරටත් කටයුතු කරන බව අමාත්‍ය මහින්ද අමරවීර විසින් මැතිවරණ කොමිසමට දන්වා තිබීමත් සමගය.

එක්සත් ජනතා නිදහස් සන්ධානයේ පක්ෂ නායකයින් විසින් නව මහලේකම්වරයෙකු පත් කිරීම සම්බන්ධයෙන් කිසිදු දැනුම්දීමක් කර නොමැති බවද අමාත්‍යවරයා මෙහිදී දැනුම්දී ඇත .

ශ්‍රී ලංකා නිදහස් පක්ෂය විසින් එක්සත් ජනතා නිදහස් සන්ධානයේ මහ ලේකම්වරයා ලෙස තිලංග සුමතිපාල පත් කරන ලද බව නිවේදනය කරන ලදී.

එහෙත් සන්ධානය නියෝජනය කරන වෙනත් පක්ෂ නායකයන් නිවේදනයක් නිකුත්කරමින් කියා සිටියේ කිසිදු දැනුම්දීමක් නොමැතිව අත්තනෝමතික ලෙස සිදුකළ මෙම නව මහ ලේකම් තමන් පිළිනොගන්නා බවය.

එසේම පක්ෂයේ සිටීම ගැටලුවක් නම් අලුත් පක්ෂයක් වුවත් බිහිකිරීමට සූදානම් බව අමාත්‍ය මහින්ද අමරවීර ද මීට පෙර මාධ්‍ය හමුවකදී සදහන් කර තිබිණ .

විමල්ට එරෙහි නඩුවක : මූලික විරෝධතාවලට දින දෙයි !

අමාත්‍යවරයෙකු වශයෙන් කටයුතු කරමින් රුපියල් මිලියන 75කට අධික වත්කම් සහ මුදල් අයතා ලෙස අත්පත් කරගත්තේ යැයි චෝදනා කරමින් හිටපු අමාත්‍ය විමල් වීරවංශට එරෙහිව ගොනුකර ඇති නඩුවේ මූලික විරෝධතාවලට අදාළ ලිඛිත දේශන තිබේ නම් ඒවා ජනවාරි මස 16 වනදාට පෙර ගොනුකරන ලෙස කොළඹ මහාධිකරණය නියම කර තිබේ.

මෙම නඩුව අද (28) කොළඹ මහාධිකරණ විනිසුරු නවරත්න මාරසිංහ ඉදිරියේ කැඳවනු ලැබීය.

එහිදී විත්තිය වෙනුවෙන් පෙනී සිටින ජනාධිපති නීතිඥ ශවීන්ද්‍ර ප්‍රනාන්දු මීට පෙර දින මූලික විරෝධතාවක් මතු කරමින් අල්ලස් පනත යටතේ පාර්ලිමේන්තු මන්ත්‍රීවරු රජයේ සේවකයින් වශයෙන් අර්ථකථනය කර නොමැති හෙයින් එම පනත යටතේ තම සේවාදායකයාට නඩු පැවරීමට හැකියාවක් නොමැති බවට කරුණු දක්වා තිබුණි.

එම මූලික විරෝධතාවලට අදාළ ලිඛිත දේශන තිබේ නම් ජනවාරි මස 16වනදාට පෙර ඉදිරිපත් කිරීමට පියවර ගන්නා ලෙස විනිසුරුවරයා විසින් පැමිණිලිකාර අල්ලස් කොමිසම සහ විත්තිය නීතිඥවරුන්ට දැනුම් දුන්නේය.

2010 වසරේ සිට 2014 වසර දක්වා කාලසීමාව තුළ පාර්ලිමේන්තු මන්ත්‍රීවරයකු වශයෙන් කටයුතු කරමින් රුපියල් මිලියන 75කට අධික වත්කම් සහ මුදල් අයථා ලෙස උපයා ගැනීම තුළින් අල්ලස් පනත යටතේ වරදක් සිදුකොට ඇති බවට චෝදනා කොට හිටපු අමාත්‍ය විමල් වීරවංශ මහතාට එරෙහිව ඉකුත් යහපාලන රජය සමයේ මෙම නඩුව ගොනුකර තිබුණි.

රට ගොඩනැගිය හැකි පරිණත නායකයා රනිල් : වෙල්ගම ප්‍රසිද්ධියේ කියයි !

අද මෙරට සිටින පරිණතම දේශපාලනඥයා ජනාධිපති රනිල් වික්‍රමසිංහ බවත් ජාත්‍යන්තර සබඳතා මඟින් රට ගොඩ ගැනීමට හැකියාව තිබෙන නායකයා ද ඔහු බවත් හිටපු අමාත්‍ය , පාර්ලිමේන්තු මන්ත්‍රී කුමාර වෙල්ගම පවසයි .

ඔහු මේ බව සඳහන් කර සිටියේ කළුතර දී මාධ්‍ය වෙත අදහස් දක්වමින්ය .

රට මේ තත්වයට පත්වීම සම්බන්ධයෙන් තමා ඇතුළු දේශපාලඥයන් සියලු දෙනා වගකිව යුතු බවත් මන්ත්‍රීවරයා එහිදී පැවසීය .

දේශපාලනඥයන්ගේ කළු සල්ලි තිබෙන්නේ තොරතුරු පිටතට නොදෙන විදෙස් බැංකුවල බවද සොරකම් කරන අයගේ මුදල් මෙරට නැති බවත් ඒවා ඇත්තේ ලංකාවේ ගිණුම් වල නම් ඒ වෙන අයගේ නම්වලින් බවත් පැවසීය.

තමනට එසේ උපයන ලද මුදල් නැති බවත් තම පියා හොඳ ව්‍යාපාරිකයෙක් බවත් ඔහු විසින් ධනයක් උපයා ඇති බවත් මන්ත‍්‍රීවරයා වැඩිදුරටත් පැවසීය

"මට වැඩියෙන් සතුටු A9ක් ලැබුණ එකට නෙවෙයි" - ෂාෆිගේ දියණිය කී කතාව !

"මට වැඩියෙන් ම සතුටක් දැනුණෙ සාමාන්‍ය පෙළ විභාගයට A සාමාර්ථ නවයක් ලැබුණු බව දැනගත්ත වෙලාවේ නෙවෙයි, මගේ තාත්තා නිර්දෝශීයි කියලා අධිකරණය තීන්දු කරපු දවසෙයි," බීබීසී සිංහල සේවයට මෙසේ පැවසුවේ, මීට වසර කිහිපයකට පෙර වඳ සැත්කම් චෝදනාවකට ගොදුරු වූ වෛද්‍ය ෂිහාබ්දීන් මොහොමඩ් ෂාෆිගේ වැඩිමල් දියණිය යි.

සාමාන්‍ය පෙළ විභාගය සඳහා A සාමාර්ථ නවයක් ලබා ගැනීම දුර්ලභ සිද්ධියක් නොවුණ ද, මෙහිදී ඇති විශේෂත්වය වන්නේ 2019 වසරේ දී සිය පියාට සමාජයෙන් ද, තමාට පාසලේ ශිෂ්‍යාවන්ගෙන් එල්ලවූ පීඩනය පසෙකලා 2021 වසරේ සාමාන්‍ය පෙළ විභාගය ජයගැනීමට ඇය සමත්වීම යි.

මොහොමඩ් ෂාෆි ෆාතිමා සෙයිනම් සිංහල භාෂාව සහ සාහිත්‍යය ද ඇතුළුව සියලු විෂයයන්ට A සාමාර්ථ ලබාගෙන ඇති අතර, ඇය ඒ පිළිබඳව දැක්වූයේ මෙවන් අදහසකි.

"මේ සැරේ සාමාන්‍ය පෙළට මුහුණදුන්න ගොඩක් දෙනෙක් A සාමාර්ථ නවයක් ගත්තත් අද මගේ A නවය ගැන ගොඩක්දෙනෙක් කතා කරන්නේ මම බාධක මැද්දේ - හැමෝම දන්නවා අපේ පවුලට වෙච්ච ප්‍රශ්න, එල්ල වෙච්ච දේවල් - ගොඩක් පීඩාවන්ට මුහුණදීලා තමයි අද මෙතනට ඇවිත් ඉන්නේ. මගේ ජයග්‍රහණය ගැන මං අවංකවම ආඩම්බර වෙනවා. මේ ජයග්‍රහණය මම දකින්නේ වචනයකින් හරි මට උදව් කරපු සමාජයත් එක්ක මම ලබපු ජයග්‍රහණයක් විදිහට යි."

ඇය පැවසූ පරිදි සිය පියාට එල්ල වූ චෝදනා හමුවේ ඇගේ "සමවයසේ ශිෂ්‍යාවන්ගෙන් එල්ලවූ දැඩි පීඩනය මැද ඇයට පාසල් කිහිපයකට මාරු වීමට සිදුවී" තිබිණි.

"කුරුණෑගල ශුද්ධ වූ පවුලේ කන්‍යාරාමයෙන් ආරම්භ වෙන්නෙ මගේ පාසල් දිවිය. ඊට පස්සෙ කුරුණෑගල මලියදේව බාලිකාව. ඊට පස්සෙ තාත්තාගේ ප්‍රශ්නවලින් පස්සෙ කොළඹ මුස්ලිම් කාන්තා විදුහල. ඊට පස්සෙ කල්මුණේ මහ්මූද් බාලිකා විදුහලට යන්න සිදුවෙනවා. අවසාන වශයෙන් මහනුවර බදියුදීන් මහ්මූද් කාන්තා විද්‍යාලයේ තමයි මම අධ්‍යාපනය ලැබුවේ," ඇය පැවසීය.

ඇයට "අමිහිරි අත්දැකීමකට" මුහුණදීමට සිදුවුව ද සෙයිනම් කුරුණෑගල මලියදේව බාලිකා විද්‍යාලයට දක්වන ගෞරවය අඩු වී නැතැ යි ඇය පැවසුවාය.

"මලියදේවය කියලා කියන්නේ මට මගේ දක්ෂතා එළිදක්වන්න තිබුණ හොඳ තැනක්. ඇත්තටම පාසලට මම චෝදනාවක්වත්, විරුද්ධතාවක්වත් එල්ල කරන්න කිසිසේත්ම කැමති නෑ. මොකද, මම ඉහළින්ම ගරු කරන පාසලක් තමයි මලියදේවය කියන්නේ. ඒත් ඒ කාලෙ හිටිය ශිෂ්‍යාවන්ට පොවල තිබුණ විෂ, සමාජගත කරල තිබුණ දේ නිසා එයාලට ඇති වුණ මානසික තත්ත්වයත් එක්ක මට හිත රිදවීම්වලට මුහුණ දෙන්න සිද්ධ වුණා."

ඇය සඳහන් කළේ, තමන් පීඩාවට පත්කළ කිසිවෙකු සමග තමන් තුළ "කිසිදු තරහක් නොමැති" බව යි.

"මම අදටත් එයාලා ගැන කිසිම තරහක්වත්, කිසිම චෝදනාවක්වත් එයාලට එල්ල කරන්න කැමතිත් නෑ. මොකද, ඒ තමයි අපේ රටේ ඉහළ තැන්වලින් සමාජගත කරල තිබ්බ විෂ. ඉතින් ඒක එයාලගේ වරදක් විදිහට මම දකින්නෙ නෑ. අදටත් මට වැරදි විදිහට කතා කරපු මගේ හිත රිදවපු අය ගැන කිසිම තරහක් නෑ."

"ළමයින්ගෙ ලෝකෙ විෂ අඩුයි. විෂ තියෙන්නේ වැඩිහිටියන්ගේ ලෝකෙ තමයි. ඒ විෂ සමාජගත කරන්නෙ වැඩිහිටියන් විසින්. ඉස්සෙල්ලාම රටේ ඉහළම තැන් හරියාකාරව හැදුණොත්, ඒ වගේම ශ්‍රී ලංකාවේ තියෙන ප්‍රශ්නය තමයි, මිනිස්සු තමන්ගේ බලය, තනතුර, පදවිය වෙනුවෙන් ජාතිවාදය කියන අවිය පාවිච්චි කරනවා. අපි හැමෝම සිංහල, දෙමළ, මුස්ලිම්, බර්ගර් කියලා වෙන්වුණාට වැඩක් නෑ. අන්තිමට ඒ ආගම් සියල්ල අත හැරියොත් අපි හැමෝම මිනිස්සු. අපි අදහන්න ඕන මනුෂ්‍යත්වය කියන ආගම. ඒ මනුෂ්‍යත්වය කියන ආගම අදහනකොට කවදාවත් වෙන කෙනෙකුට වැරැද්දක් කරන්න හිතෙන්නෙ නෑ. ඒ නිසා වෙන කෙනෙකුට චෝදනාවක් කරනකොට හිතල බලන්න, තමන්ට ඒ දේ වුණොත් තමන් කොච්චර අසරණ වෙයි ද කියලා."

තමන්ට එල්ල වූ පීඩනය සහ බලපෑම් හමුවේ මානසික මට්ටම පහළ වැටීමට ඉඩ නොදී අධ්‍යාපන කටයුතු සාර්ථකව කරගෙන ගියේ කෙසේ ද? එම ප්‍රශ්නයට ඇය දුන් පිළිතුරයි මේ.

"මේක මම කවදාවත් නොහිතපු දෙයක්. ඒ ඇති වුණ පීඩනය නිසා මම අධ්‍යාපනය ලබපු පාසල මට නැති වුණා. එදිනෙදා මගේ සාමාන්‍ය කටයුතු කරගෙන යන්න පුළුවන් වාතාවරණයක් මට ලැබුණේ නෑ. විශාල පීඩනයක්. තාත්තා ගෙදර නෑ. තාත්තාව නිදහස් කර ගන්න අම්මා වින්ද දුක, එතකොට මල්ලි, නංගි අපේ පවුල සීසීකඩ වුණා. මෙහෙම වෙද්දි පුංචි ළමයෙක් හැටියට මම ගොඩක් හිතින් කඩාගෙන වැටුණා. මගේ අම්මා තාත්තාව බේර ගන්නත් මහන්සි වුණා. ඒ වගේම අපේ වගකීමුත් ඉටු කරන්න ඇය කවදාවත් අමතක කළේ නෑ. ඇය හින්ද තමයි මම හිතන්නෙ මම මනසින් ශක්තිමත් වෙලා ඉන්නෙ."

තමන් මුහුණදුන් අත්දැකීමට වෙනත් දරුවෙකුට හෝ දැරියකට මුහුණදීමට සිදුවුවහොත් මනසින් ශක්තිමත්ව නැගී සිටින්නේ කෙසේදැ යි ඇය පැහැදිලි කළා ය.

"අපේ ජීවිතය කියල කියන්නේ රෝසමල් යහනාවක් නෙවේ. ජීවිතය කියල කියන්නේ අභියෝග පිරුණු දෙයක්. අභියෝග තමයි ජීවිතය ලස්සන කරන්නේ. ගංගාවක් ගලා යන්න ඕනෙ බාධක, හැලහැප්පීම් මැද. එතකොට තමයි ගලන ගඟේ සුන්දරත්වය තියෙන්නේ. වැටෙන තැන් තියෙනවා. ඇඬුවට කමක් නෑ. අපි මානසිකව වැටුණා ම අපට ජීවිතය නැති කරන්න හිතෙනවා. ඒ වුණාට කිසි ම ප්‍රශ්නයක දී ජීවිතය නැතිකර ගැනීම නෙවෙයි එක ම පිළිතුර."

ඇගේ අනාගත අපේක්ෂා මොනවා ද?

බීබීසී සිංහල සේවයට ඇය පවසූ පරිදි ඇයගේ අනාගත අපේක්ෂාව වී ඇත්තේ, උසස් පෙළ විද්‍යා අශයෙන් හදාරා සිය පියාගේ අඩිපාරේ යමින් වෛද්‍යවරියකවීම ය.

ඇය තමන් උගන්නා දේ තමන්ගේ මව්බිමේ වෙසෙන මිනිසුන්ට උපකාරයක් පිණිස භාවිත කිරීමට කැමැත්තෙන් පසුවන්නී ය.

"රට අතඇරලා යන්න ඕන තරම් හිතිලා තියෙනවා ඒ දවස්වල. ඒ වුණාට අද හිතෙනවා අපට වැරදි කරපු මිනිස්සුන්ට දෙන්න පුළුවන් හොඳම පිළිතුර තමයි, අපි එයාලත් එක්ක එකට ඉන්න එක. මම කැමතියි මගේ රටට සේවයක් කරන්න," ඇය ප්‍රකාශ කළා ය.

වෛද්‍ය ෂාෆිට එල්ල කළ චෝදනා !

2019 මැයි 23 වෙනිදා දිවයින පුවත්පත "තවුහිද් ජමාත් දොස්තර සිංහල බෞද්ධ මව්වරුන් හාරදහසක් වඳ කරලා, සාක්ෂි සහිතව තොරතුරු හෙළිවේ" යනුවෙන් පළකර තිබූ ප්‍රධාන පුවතත් සමග ෂිහාබ්දීන් මොහොමඩ් ෂාෆි වෛද්‍යවරයා සම්බන්ධයෙන් දැඩි ආන්දෝලනයක් ඇතිවිය.

ඒ අනුව, එම වෛද්‍යවරයා 2019 වසරේ මැයි 25 වන දා පොලිසිය විසින් අත්අඩංගුවට ගනුලැබීය.

2019 ජූනි මාසයේ දී අපරාධ පරීක්ෂණ දෙපාර්තමේන්තුව (CID) අධිකරණයට දන්වා සිටියේ වෛද්‍ය ෂාෆිට එරෙහිව එල්ල කර ඇති චෝදනා සනාථ කිරීමට සාක්ෂ්‍ය නොමැති බව ය.

පසුව ඔහු නිර්දෝෂීබව සනාථවූ අතර පසුගිය වසරේ දී හිඟ වැටුප් ද සහිතව යළි සේවයේ පිහිටුවන ලදී.

ඔහු තමන්ට හිමිවූ හිඟ වැටුප් කොරෝනා මර්දනයට අවශ්‍ය ඖෂධ මිල දී ගැනීම සඳහා සෞඛ්‍ය අමාත්‍යංශයට ලබාදෙන බවට ප්‍රකාශයක් කළේ ය.

බීබීසී - සිංහල

සීයට අනුවක් ප්‍රශ්න ඇති කළේ නිලධාරීන් - හිටපු මුදල් ඇමති රවී !

"දේශපාලඥයන් රජයේ නිලධාරීන් දෙදෙනාගෙම වැරදි තියෙනවා. නමුත් සියයට 90ක් රජයේ නිලධාරීන් තමයි ප්‍රශ්න ඇති කරලා තියෙන්නේ" යනුවෙන් හිටපු මුදල් අමාත්‍ය රවී කරුණානායක පවසයි.

හිටපු අමාත්‍යවරයා මේ බව සඳහන් කර සිටියේ youtube චැනලයක් සමඟ සම්මුඛ සාකච්ඡාවක් සඳහා එක්වෙමිනි.

එහිදී හිටපු අමාත්‍යවරයා වැඩිදුරටත් දැක්වූ අදහස් පහත දැක්වෙයි.

ඔබ නිහඬව සිටියේ ඇයි ?

වැරදි වැටහීම් තියෙනකොට නිහඬතාවයක් තියෙන එක හොඳයි. කාලෙකට පස්සේ මම මාධ්‍යකට ආවේ, මේ අවස්ථාවේ රටට අපෙන් දිය යුතු අදහස් තියෙනවා ඒ ටික දීලා අපේ යුතුකම ඉටු කළ යුතු නිසා.

අයවැය කතා බහක් යන වෙලාවක්. දැඩි ආර්ථික අර්බුදයක් සමඟ රට යන විදිය ගැන ඔබේ අදහස ?

අමාරු තත්වයක්. නිදහස ලැබූ දා සිට නිකං කන්න ගිහින් තමයි මේ අමාරුවේ වැටුණේ. එය විඳින්න ගත්තම තමයි එහි උග්‍ර බව දැනෙන්නේ. මම හිතන්නේ මේක එවන් කාලයක්. අද දේශපාලඥන්ට බනිනවා . ප්‍රශ්නේ 225න් ඉවර වෙන්නේ නැහැ. රජයේ නිලධාරීන්ගේ වැරදි ක්‍රියාත් මේකට ප්‍රධාන හේතුවක්.

ඇයි එහෙම කියන්නේ ?

හැම අමාත්‍යංශයකම ප්‍රධාන නිලධාරී ඇමති නෙමෙයි එතන ඉන්න රජයේ ප්‍රධාන නිලධාරියා. ඒවගේම දෙගොල්ලෝ හවුල්වෙලත් සිදුවිය හැකියි. දැන් මිනිස්සු ලෙස සියලු දෙනා කොහෙද ප්‍රශ්නේ තියෙන්න කියන එක පසුවිපරම් කර බැලිය යුතුයි.

ලොකුම ප්‍රශ්නේ රාජ්‍ය නිලධාරී නම් ඔවුන්ව සහ රාජ්‍ය ආයතන යාන්ත්‍රණය සැකසිය හැක්කේ කෙසේද ?

ටෙන්ඩර් ක්‍රියා පටිපාටියේ සිට සිදුවන දේවල් නතර කර ගත යුතුයි. දේශපාලඥයන් රජයේ නිලධාරීන් දෙදෙනාගෙම වැරදි තියෙනවා. නමුත් සියයට 90ක් රජයේ නිලධාරීන් තමයි ප්‍රශ්න ඇති කරලා තියෙන්නේ. වානිජකරණය කළ යුතුයි.

තරුණ අරගලයක් ක්‍රියාත්මක වෙමින් සිස්ටම් චේන්ජ් එකක් අවශ්‍ය බව පැවසුවා. මේ ගැන ඔබේ අදහස ?

මේ ප්‍රශ්න නිදහස ලැබුන දා සිට තිබුණා. නිකන් ලැබුණාම මෙහෙම ප්‍රශ්න වෙනවා. නිකං ලැබෙන්නේ ඇයි කියන ප්‍රශ්නේ එදා ඇහුවේ නැති නිසා අද පිපිරිලා. නිදහස් අධ්‍යාපනය ගැන කතා කරනවා. මෙහෙ විශ්ව විද්‍යාලය වල අවුරුදු ගණන් ඉන්න අය ඉන්නවා. මෙහෙ බෝර්ඩ් ලෑලි අල්ලලා රට යනවා. රට ගිහිං බෝර්ඩ් ලෑලි අල්ලන්නේ නැහැනේ. රටට තියෙන ආදරේ මෙහෙ නැති එක පිට රට ගිහිං වෙනවා ද ? ඇයි රැග් කරන්න ඉඩ දෙන්නේ. වැරදියට වටහා ගන්න එපා. වැඩ කරන කෙනාට ගහලා නැති කරනවා. ප්‍රශ්න වලට උත්තර දෙනකොට හොරෙක් වංචනිකයෙක් කියනවා. වංචා කරන කරන අය ඒවා දිගටම කරගෙන යනවා. මේක තමයි තත්වේ

ළඟම ඉන්න අය නෙමෙයි ද මෙහෙම ගැහුවේ ?

ඔව් ඒක ඉතින් ලංකාවේ සිරිතක්.

අයවැය IMF එකට අනුකූලව සැකසිලා කියලා විවේචනයක් තියෙනවා. මේ ගැන ඔබේ අදහස මොකද්ද ?

අපි 2015 මේවට උත්තර දුන්නා යම් ක්‍රියාවලියක් ඒවා නැත්තට නැති කළා. ජාත්‍යන්තර මුල්‍ය අරමුදලෙ විශ්වාසය දිනා ගැනීම අවශ්‍යයි. නමුත් එයාලට ඕන දේවල් නෙමෙයි මේකෙන් කර ගන්න ඕන ඒවා අපි දැන ගන්න ඕන. බදු ගෙවීම් වැඩියි. ණය ගන්න ඕන ගෙවන්න බැරි ප්‍රමාණයෙන් ගැනීම වැරදියි.

කඩා වැටුණු ආර්ථිකේ නිසා ජනතාවට පටිතද කර ගන්න වෙලා. ජනතාවටත් සහනත් දීලා ආර්ථිකයත් ගොඩනැගිය හැකි ක්‍රම වේදයක් නැත්ද ?

මේ රටේ හැමදේම සහනාධාර වලට ගැනීම සිමා කළ යුතුයි. ආර්ථිකකය ඩිජිටල් කිරීමෙන් හොරකම් නතර කල හැකියි.

ඒවගේම බොරු ෂෝ වැඩියි. මේවා නතර කළා නම් රට දියුණු වෙනවා.

මන්දපෝෂණය තත්වයට විසඳුමක් තියෙනවා ද ?

මේක නිදහසේ සිට තිබෙන ප්‍රශ්නයක්. සමෘද්ධි වගේ දේවල් හරියට දියත් කළා නම් මේ දේවල් වෙනවා ද ? අවශ්‍ය කෙනාට නෙමෙයි මේ දේවල් ලැබෙන්නේ. ආර්ථිකේ ඩිජිටල් කළා නම් මේ දේවල් නතර වෙනවා. දුප්පත්කම ඇති කරන්නේ දේශපාලන අරමුණින්. ප්‍රශ්න නිවැරදි කරලා උත්තර හොයලා නැවත රට පුනර්ජීවනය කළ යුතු වෙලාවක් මේක. කරන්න බැරි නෙමෙයි කරන්න වුවමනාවක් නැහැ. මිනිස්සු විතරක් නෙමෙයි හැමකෙනාම කැප විය යුතුයි. අපි මේවා එදා කිවුවා. 2015 අපි හැදුවා නමුත් එකතු වෙලා අපිට ගැහුවේ. දෙවියෝ උඩ ඉන්නවා. මේවා පේනවා.

කොහෙන්ද හදන්නේ කියන තැනේදී, ඇයි ඔබ එකතු නොවෙන්නේ ?

අපිට නිවාඩුවක් ගන්න තිබ්බා. එය වැරදි මත නිවැරදි කරන්න අවස්ථාවක්. දැන් තේරෙනවා ඇති.

වත්මන් ජනාධිපති සමඟ ඔබ තවම සමීපව කටයුතු කරනවා නේ ?

මගේ පක්ෂයේ නායකතුමා. මෙතුමාට තමයි මේ අවස්ථාවේ රට ඉදිරියට ගෙන යා හැකි එකම පුද්ගලයා. අපිටත් ප්‍රශ්න ඇති කරලා තියෙනවා. අපි කවුරුත් අංගසම්පුර්ණ නැහැ. පක්ෂ තුල යම් ගට්ඨන ඇති කරලා ප්‍රශ්න වුණා. ඒවාත් නිවැරදි කරලා, පක්ෂේට ආදරය කරන තත්වෙකට පක්ෂේ ගෙන යා යුතුයි.

එජාපය සහ පොදුජන එක්ව වැඩ කිරීම ගැන එජාපයේ පාක්‍ෂිකයන් විවේචනයට ලක් කරනවා?

මම හිතන්නේ මේක පාට කරන්න අවශ්‍ය නැහැ. මේ රට වැටිලා තියෙන වලෙන් ගොඩ එන්න හැමෝගෙම අදහස් යොමු කිරීම වැදගත්. හැමෝගෙම විශ්වාසය මත රට වෙනුවෙන් හැමෝම එකතු කිරීම වැදගත්. නමුත් කුහකකම් නිසා එවැනි තත්වයන් ඇති වෙන්නේ නැහැ.

ඒ කියන්නේ කුහකකම් එජාපය තුල ද ?

එජාපය තුලත් තියෙනවා. අනෙක් තැන වලත් තියෙනවා. මේක නැති කරනකල් අපේ රට හදන්න බැහැ විධායක ජනාධිපති ක්‍රමය අහෝසි කිරීම, ව්‍යවස්ථාව වෙනස් කිරීම කළ යුතුයි. මේ වගේ බොහෝ දේ තියෙනවා. ඉන්දියාව චීනය හැප්පීම කළ නොකලය යුතුයි. කරන්න පුළුවන් දේවල් නොකළ අනවශ්‍ය දේවල් වලට ඇගිලි ගහනවා.

ඔබට එජාපයේ ඉහළ තනතුරක් ලැබෙන බවට වාර්තා පල වෙනවා ?

එහි සත්‍යතාවයක් නැහැ. කණ්ඩායමේ අය තනතුරු දරමින් සිටිනවා. ඒකරාශිව කණ්ඩායමක් ඇති කළ යුතුයි. හැමදෙනාගෙම හිත් දිනාගෙන ජනතාවගේ විශ්වාසයක් ඇති කළ යුතු අවස්ථාවක් මේක. යම් පෙරළියක් ඇති කරන්න අපේ මුළු ශක්තියම ලබා දී එජාපය රකින්න අවශ්‍යයි. ඊට මට දශමෙකින් හෝ උදව් කළ හැකි නම් මම කැමැත්තෙන්ම එය කරනවා. ඒ වගේම හැකියාවත් තියෙනවා. නමුත් අපිටත් ප්‍රශ්න ඇති වෙලා තියෙනවා. ඊර්ශියා රෝගයෙන් පෙළෙන අය ඉන්නවා. මම මේකෙන් ජිවත් වෙන්නේ නැහැ. මේ සියල්ල මම දේශපාලනය එන්න ප්‍රථම ගත්ත දේවල්.

නත්තල වගේම නව වසරත් එළෙඹෙනවා, ජනතාවට දෙන්න තියෙන පණිවිඩය මොකද්ද ?

අවුරුදු 74ක් නිදහස ලැබුණට, අපිට ආර්ථික නිදහසක් ලැබී නැහැ. තරුණයෝ මුල් කරගෙන අපි සියලු දෙනාම ඒකරාශී වෙමු. වයෝවෘද්ධ අයටත් සතුටින් ජිවත් විය හැකි මාර්ගයක් ඇති කරමු. ආර්ථිකේ යම් අය වැට්ටුවට අපිට ලෝකය තරණය කළ හැකි අවස්ථා තියෙනවා. "හැමදේම නිකන් ලැබෙන්නේ නැහැ" කියන සංකල්පයෙන් අපි හැමදෙනාම මහන්සියෙන්

ඉදිරියට යන්න පුළුවන් ගමනක් ආරම්භ කරමු. කුහකකම් දුරුලා නව වසර අපි අලුත් ගමනක් යන්න ආරම්භයක් ඇති ගන්න අත්වැල් බැද ගමු.

- lankaadeepa (රතු කට්ට විශේෂාංගයෙනි )

පූල් එකේ නානවට වඩා ආර්ථික අපරාධ බරපතළයි !

රටේ දේශපාලකයන් ආර්ථික අපරාධ කර ඇතැයි ජාත්‍යන්තරය විසින් නිගමනය කිරීම අරගලයේ තරුණ තරුණියන් ජනාධිපතිගේ පූල් එකට පැන නානවාට වඩා බරපතළ සිද්ධියක් බව දේශපාලකයන් අවබෝධ කරගත යුතු බව ජාතික ජනබලවේගයේ මන්ත්‍රීනී හරිනි අමරසූරිය පවසයි.

ඇය මේ බව සඳහන් කර සිටියේ පාර්ලිමේන්තුවේ පැවති විදේශ කටයුතු අමාත්‍යංශය සහ ජනමාධ්‍ය අමාත්‍යාංශයේ වැය ශීර්ෂ පිළිබඳ කාරක සභා අවස්ථා විවාදයට සහභාගී වෙමින්ය

අරගලයේ තරුණ තරුණියන්ගේ හැසිරීම රටේ බ්‍රෑන්ඩ් එකට ප්‍රශ්නයක් වී ඇතැයි අමාත්‍යවරයකුගෙන් ප්‍රකාශ වූ බවත් තරුණ තරුණියන් ගේ හැසිරීම බලන්නට පෙර පාලකයන්ගේ හැසිරීම බලන එක හොඳ බවත් මන්ත්‍රීවරිය එහිදී සඳහන් කළාය.

විශේෂ වෙළෙඳ භාණ්ඩ බදු අනුපාතය අඩු කිරීමෙන් : ලොකු ලූණු මිලට සහනයක් !

විශේෂ වෙළෙඳ භාණ්ඩ බදු (SCL) අනුපාතය අඩු කිරීමට ආහාර ප්‍රතිපත්ති කමිටුව පසුගිය 24 දා රැස් වූ අවස්ථාවේදී නිර්දේශ කෙරුණු අතර ඒ අනුව වෙළඳපොලේ ලොකු ලූණු මිල දී ගැනීමේ හැකියාව වැඩි වී ඇත.

මේ සම්බන්ධයෙන් ජනාධිපති මාධ්‍ය ඒකකය නිවේදනයක් නිකුත්කර ඇති අතර එහි මෙසේද සඳහන් වෙයි.

ලොකු ලූණු සඳහා ජාතික අවශ්‍යතාවය වසරකට මෙට්‍ර්ක් ටොන් 300,000 ක් පමණ වන අතර එම අවශ්‍යතාවය ප්‍රධාන වශයෙන් සපුරාලනු ලබන්නේ ආනයන (86%) මගිනි. ඒ අනුව, ලොකු ලූණුවල ස්වයංපූරිත අනුපාතය වාර්ෂික අවශ්‍යතාවයෙන් 14% කි. නොවැම්බර් මස තුන්වන සතිය වන විට ආනයනික ලොකු ලූණු කිලෝග්‍රෑමයක සිල්ලර මිල රු. 290 - 390 අතරත්, දේශීය ලොකු ලූණු කිලෝග්‍රැමයක මිල රු.340 - රු.400 අතරත් විචලනය විය. නොවැම්බර් මස තුන්වන සතිය තුළ ආනයනික ලොකු ලූණු කිලෝග්‍රෑමයක සාමාන්‍ය මි.ර.ගැ.මිල (CIF අගය) රු. 95.30ක් වූ අතර, 2022 අගෝස්තු මැද සිට එකී මිල ගණන්වල සාපේක්ෂ සාමාන්‍ය වැඩිවීමක් පමණක් පෙන්නුම් කර ඇත

2022 වර්ෂයේ සැප්තැම්බර් මස 22 වැනි දින සිට රජය විසින් ආනයනික ලොකු ලූණු කිලෝග්‍රෑමයක් සඳහා අදාළ විශේෂ වෙළඳ භාණ්ඩ බද්ද (SCL) රු. 10/- සිට රු. 50/- දක්වා වැඩි කරන ලදී. ඉන් අනතුරුව, ලොකු ලූණු ආනයනය විශාල ලෙස පහත වැටෙන්නට විය. අගෝස්තු මාසය තුළ මෙට්‍ර්ක් ටොන් 27,889 ක් වූ ලොකු ලූණු ආනයන ප්‍රමාණය නොවැම්බර් මස (තෙවන සතිය වන විට) මෙට්‍ර්ක් ටොන් 13,496 දක්වා පහත වැටුණි. මෙම පහත වැටීමේ ප්‍රතිඵලයක් ලෙස, අගෝස්තු මාසය තුළ කිලෝග්‍රෑමයක් රු. 175ක් පමණ වූ ආනයනික ලොකු ළූණු මිල නොවැම්බර් මස තෙවන සතිය වන විට රු. 328 දක්වා ඉහළ යාමට හේතු විය. එසේ වුවද, නොවැම්බර් 22 වැනි දින සිට ලොක ලූණු කිලෝග්‍රෑමයක මිල රු. 250 දක්වා තියුණු පහත වැටීමක් පෙන්වා ඇති නමුත්, විශේෂ වෙළඳ භාණ්ඩ බදු අනුපාතය (SCL) වැඩිවීම තෙක් වූ කාලපරිච්ඡේදයට සාපේක්ෂව මිල තවමත් ඉහළ මට්ටමක පවතී.

අගෝස්තු මාසයේ සිට ආනයනික ලොකු ලූණුවල මි.ර.ගැ. මිල (CIF අගය) ඉහළ ගොස් ඇත්තේ සුළු වශයෙන් පමණක් වන අතර , මෙම හදිසි මිල ඉහළ යාමට හේතුව විය හැක්කේ සැප්තැම්බර් මාසයේදී සිදුවූ විශේෂ වෙළඳ භාණ්ඩ බදු (SCL) අනුපාතයේ වැඩි වීමයි.

රනිල්ව කොමිටල් කරන්න ගිය විපක්ෂයට වෙච්ච දේ !

රැයක් දවාලක් විවේකයක් වත් නැතුව, සතියේ හැම දවසෙම වගේ, අයවැය විවාද තියෙන නිසා, මේ දවස්වල පාර්ලිමේන්තුව හරිම උණුසුම්. ආණ්ඩුවයි විපක්ෂයයි තකට තක කිව්වොත් වැරදි නෑ. විපක්ෂයට සපෝට් එකට, ආන්ඩුවේ කොටසකුත් දැන් දෙතුන් පැත්තකින් සෙට් වෙලා නිසා සජිත්ලා , ෆොන්සේකාලා, මුජිබර්ලා , මරික්කාර්ලා , නලින් බණ්ඩාරලා , හේෂලා ඔක්කොම වීරයට ඇඳලා ඉන්නේ.

ඒ උනාට තනි අලියා වගේ ඉන්න රනිලුත්, අරින්නෙම නෑ. ජනාධිපතිකම පැත්තක තියලා, වෙලාවකට ගේමට බහින්නේ , හොඳ හොඳ ආයුධ අතට අරන්. එක වෙලාවකට, අභිධර්මය ගේනවා. තව වෙලාවකට, ඉතිහාසය ගේනවා.

මතකනේ දවසක් මානවම්ම ගැන කතා කරලා, සංවාදයකදි කරපු හරිය. අන්න ඒ වගේ තමයි. තනි අලියා, අරවින්දලා, සනත්ලා බැට් කරනවා වගේ, ලවක් දෙවක් නැතුව පිටිය වටේටම නෙලනවා.

අපේ පාර්ලිමේන්තුවේ ඉන්න සමහර කථිකයෝ, වාද විවාදවලදි කටට එන දේ කිව්වත්, දැන් නම් රනිල් ඉස්සරහ, ඒ වගේ දේවල් කියන්න ටිකක් බයයි. ඊයේ පෙරේදා අනුර දිසානායකටත් බුද්ධාගම ගැන පාඩමක් කියල දුන්නා.

ඒ වගේ සන්තෑසිය කට මුහුණ දෙන්න, මුජිබර් රහුමාන් ටත් සිද්ධ වුණේ, රනිල්ට තුම්බිය හැදිල කියලා කියපු කතාවක් නිසා...

"මට තුන්බිය කියලා මුජිබර් මන්ත්‍රිතුමා, ඒ කියන්නේ තුන්බිය ගැන දන්නේ නැතුව. තුන්බිය පුද්ගලයෙකුට හැදෙන්න විදියක් නෑ. ඒක හැදෙන්නේ, ජන සමාජයකට. විසාලා මහනුවර ජනතාවට එදා, රෝග බිය, මරණ බිය, අමනුෂ්‍ය බිය කියලා හැදුනු, තුන් බිය නිසා තමයි, බුදුන් වහන්සේ රතන සූත්‍රය කිව්වේ. එතුමත් රතන සූත්‍රය අහල හිටියනං හොඳයි. ඔබතුමා දැනගන්න මරික්කාර්ට බයයි හරි , හිරුනිකාට බයයි හරි , රෝසිට බයයි හරි කියන්නේ තුන්බිය නෙවෙයි..."

විපක්ෂයේ සමහර අය, මේ වගේ අයවැයත් එක්ක තියෙන, විෂයපථ ගැන කතා කරන්නෙ නැතුව, ජනාධිපති රනිල්ව, කොමිටල් කරන්න ගිහින් , අන්තිමේ ඒ අයම, කොමිටල් උන පාටක් තමයි පේන්න තිබුනේ.

ඔය අස්සෙ විපක්ෂයේ ඉන්න, රාජිත සේනාරත්නල වගේ, මාස්ටර් බ්ලාස්ටර්ලා, මොකද මේ වෙලාවේ සද්ද නැත්තෙ කියලත්, සමහරු කතා වෙනවා. වෙනදනම් බලන්න එපායැ , අයවැය විවාදෙකදී රාජිතලාගේ සද්දෙ. රාජිතලා වැඩි සද්ද බද්ද දාන්නෙ නැත්තෙ, ඉස්සරහට කැබිනට් සංශෝධනේ දී ,උන්දැටත් ඇමතිකමක් ෂුවර් හින්දා කියලයි, සමහරු කියන්නේ.

අපිටනං කෙරෙන කන් ඕව ගැන විස්වාසයක් නෑ.

දේශපාලන වාර්තාකරු

හිටපු ආයෝජන ප්‍රවර්ධන ඇමති ගේ සමාගම් නිල් වලා ද්‍රෝණියේ මැටි කැණීමට එයි !

පරදුව යායේ ගොවීහු කුඹුරට පැමිණියේ යල් කන්නයේ අස්වනු ලැබූ ඉපනැල්ල පෙරළා බිඳ නැවුම් පස පෙරළුණු පිණිසය. ඉල් මහේ ඇදවැටුණු මහ වැසි කුඹුරු ලියැදිවල පිරී පැවතිණි. මාස් කන්නය අස්වද්දනු පිණිස ගොවීහු කුඹුරු යායේ මඩ කළල් කරන්නට පටන් ගත්තේය. ඔවුන්ගේ විලාසයේ තිබුණේ මහ පොළොවටත් නොරිදෙන රිද්මයකි. යායේ අනෙක් කෙළවර දැවැන්ත බැකෝ යන්ත්‍ර මොර දෙමින් මහ පොළොවත් කපා හාරා තුවාල කර මහා පතල් කපන්නට පටන් ගත්තේය. ගිජු ලිහිණියෙකු ට ගොදුරුවූ හාවෙකුගේ අතුණුබහන් ඇද කන්නාක් මෙන් පොළොව අභ්‍යන්තරයේ ඇති මැටි නිධි සමාගමට අයත් බැකෝ යන්ත්‍ර විසින් ගොඩට ඇද ටිපර් රථ වලට පටවනු ලැබිණි. මේ විනාශය දෙස සංවේගයෙන් බලා සිටිනු වෙනුවට සිය මුතුන්මිත්තන්ගෙන් දායාද වශයෙන් ලැබුණු මේ කුඹුරු යායේ මැටි කැනීමට ගොවිහු එක හෙළා සිය විරෝධය ප්‍රකාශ කළේය. මේ මහා පරිසර විනාශයට එරෙහිව උපදේශයේ මැටි කර්මාන්ත කරුවෝත් සිවිල් සංවිධාන පරිසර සංවිධාන හා අකුරැස්ස ගොවි සංවිධාන සමූහයත් එක්ව ගම සුරකින සමගි පවුර නම් සංවිධානයක් ද පිහිටුවා ගනු ලැබීය. සමාගමේ මොර දුන් බැකෝ යන්ත්‍ර ගොලු වූයේ ඉන් පසුවයි. එහෙත් ඒ වන විටත් මැට් කියූබ් පහලොවක මැටි තොග සමාගම විසින් නීති විරෝධීව සිය කර්මාන්ත ශාලා වෙත ප්‍රවාහනය කරගෙන තිබිණි. මැටි කණිනු ලැබූ සමාගම පවසන්නේ කෙසේ හෝ මේ මැටි නිධිය ගොඩට ගැනීමට තමන් කටයුතු කරන බවයි. විද්‍යාත්මක ක්‍රමවේදයක්‍ ඔස්සේ එය කිරීමට අපේක්ෂා කරන බව ද සමාගමේ නියෝජිතයකු අපට පැවසීය. ඒ අනුව මේ නිහැඬියාව ඔවුන්ගේ විද්‍යාත්මක ක්‍රමවේදය සොයාගන්නා තුරු පමණක් බව පැහැදිලිය.

විකිණීම සහ මිලදී ගැනීම.

අකුරැස්ස ප්‍රාදේශීය ලේකම් කොට්ඨාශයට අයත් පරදුව උතුර දකුණ සහ නැගෙනහිර ග්‍රාම නිලධාරී වසම් තුල පිහිටි පරදුව වත්ත බ්‍රිතාන්‍ය සමයේ උක් වගාව සඳහා යොදාගෙන තිබූ කෘෂිකාර්මික භූමියකි. අක්කර 300ක් පමණ ඊට අයත්ව තිබූ බව සඳහන්. ඉන් අක්කර අනූවක් පමණ ගොඩ ඉඩම් වන අතර අනෙක් සියල්ලම මඩ ඉඩම් හෙවත්කුඹුරු ඉඩම් ය. රබර් සහ පොල් වගාවට යොදාගත් අක්කර 90ක කොටස හැරුණු කොට සෙසු සියලු ම කුඹුරු ඉඩම්" අඳය" හෙවත් අඳ ගොවියන් විසින් සරුසාර කරනු ලැබීය. පරදුව උතුර-දකුණ නැගෙනහිර ගොවි පවුල් 400ක් පමණ පරදුව වත්තට අයත් උක්වත්ත යාය ඇතුළු කුඹුරු ඉඩම් සරුසාර කෙත් යායක් ලෙස පවත්වාගෙන එනු ලැබීය. එක් කන්නයක් හෝ අත් නොහැර "අඳය" නිසි පරිදි වතු සමාගමට ලබා දෙමින් ඔවුහු මේ කාර්යයේ නිරත විය. එක්දාස් නවසිය හැත්තෑ දෙකේ ඩී පරදුව වත්ත අයිතිව තිබුණේ මාකර් මරික්කාර් නම් පුද්ගලයකුටය. පසුව ඒ එම් එස් මරික්කාර් එම් ජේ එම් මුබාරක් ඇතුළු පුද්ගලයන් දහතුන් දෙනෙකුට මේ ඉඩම් බෙදී ගොස් තිබූ බව සඳහන්. ඉක්බිතිව පරදූව වත්ත සඳහා නීත්‍යානුකූල නොවන ඔප්පුවක් පිළියෙල කර ඇත්තේ ඊට අක්කර 299 ක් රූඩ් 02 ක් පර්චස් 31.49 ක්‍ අයිතිව ඇති බව පෙන්වා දෙමිනි.2021 මාර්තු 10 වන දින සී.පී හෝල්ඩින්ග්ස් (cp holding (pvt) සමාගමට පරදුව වත්ත විකිණීමට පියවර ගෙන ඇත්තේ එම ඉඩම් ප්‍රමාණය ඇතුළත් කරමිනි. අඳය හෙවත් අඳ ගොවීන්ගේ අයිතීන් කුඹුරු පනතේ දක්වා ඇති නිසා පරදුව වත්ත වතු සමාගම සිය අක්කර 299 ට කුඹුරු ඉඩම් අයත් බව ඔප්පුවේ සටහන් කර නැත.

මැටි කැපීමෙන් එළියට ආ රහස්

අඳ ගොවියන්ට නොදන්වා පරදුව වත්ත වැවිලි සමාගම සී පී හෝල්ඩින්ග්ස් සමාගමට විකිණීමට එරෙහිව පරදුව යායේ ගොවීහු නව සමාගමට "අඳය" දීම නවතා දැමූහ. ඒ 2021 මාර්තු මස දහ වන දින සිටය. එතෙක් වසර 100 කට වැඩි කාලයක් තමන්ගේ මුතුන් මිත්තන් අඳය හෙවත් අස්වැද්දූ කුඹුරු අස්වැන්නෙන් හතරෙන් පංගුවක් පරදුව වත්ත වැවිලි සමාගමට පුදනු ලැබීය. නව සමාගම හෙවත් සී පී හෝල්ඩින්ග්ස් සමාගමට පරවේණිය හෙවත් අඳගොවියන් විසින් ගෙවිය යුතු අස්වනු බද්ද ප්‍රශ්නයක් නොවීය. ඔවුන්ට අවශ්‍යව තිබුනේ සමාගම සතු අයිතිය පෙන්වා අඳ ගොවියන් මේ ඉඩම් වලින් පන්නා දමා මේ සරුසාර කෙත් යායේ පතල් කපා නිල්වලා ද්‍රෝණියේ ඇති බෝල මැටි නිධිය කැණීම ය. සමාගමට මෙසේ මැටි කැණීමට බලපත්‍ර ලැබුණේ කෙසේදැයි ගොවීහු තොරතුරු රැස් කරන්නට විය. දුෂිත ගනුදෙනු එළියට ගලා ආවේය. ඒවා පුදුම සහගතය.

මුලා කිරීමේ සිතියම හමුවීම.

1972 අංක 1 දරන ඉඩම් ප්‍රතිසංස්කරණ කොමිෂන් සභා පනත මගින් අක්කර 50ට වැඩි ඉඩම් ඉඩම් ප්‍රතිසංස්කරණ කොමිෂන් සභාව මගින් රජයට පවරාගැනීම ට කටයුතු කෙරිණ.පනතේ විධිවිධාන වලට අනුව එහි පළමු කොටසේ කෘෂිකාර්මික ඉඩම් පිළිබඳ උපරිමය ඡේදය යටතේ දක්වා ඇත්තේ " මේ පනත ආරම්භ වීමේ දිනයෙහි හා ඉන් පසු යම් තැනැත්තකු විසින් අයිතිව තබාගතහැකි මේ පනතෙහි උපරිමය යනුවෙන් සඳහන් කරනු ලබන වැඩිම කෘෂිකාර්මික ඉඩම් ප්‍රමාණය (අ ) එම ඉඩම තනිකරම කුඹුරු වලින් සමන්විත නම් අක්කර 25 ක් විය යුතුය. නැතහොත් (ආ ) එම ඉඩම් තනිකරම කුඹුරු වලින් සමන්විත නොවේ නම් අක්කර 50ක් විය යුතුය එහෙත් ඒ අක්කර 50 ට කුඹුරු කිසිවක් අඩංගු වේ නම් ඒ කුඹුරු වල මුළු ප්‍රමාණය(අ ) ඡේදයෙහි නිශ්චිතව සඳහන් කුඹුරු පිළිබඳ උපරිමයට වැඩි නොවිය යුතුය. යන්නය. පනතේ දහ වැනි වගන්තියේ දක්වා ඇත්තේ " මේ පනතෙහි විධිවිධාන යටතේ යම් කෘෂිකාර්මික ඉඩමක අයිතිය වෙනස් වීමෙන් 1958 අංක 1 දරණ කුඹුරු පනත යටතේ අඳය "ගොවීන්ගේ අයිතිවාසිකම් කෙරෙහි බලපෑමක් ඇති නොවිය යුතු බවය.

අක්කර හතළිස් නවයක් පෙන්වා අක්කර දෙසිය පනහක් ක්‍ සැඟවීම හෙවත් ග්‍රාම නිලධාරීවරයාගේ උප්පරවැට්ටිය

1972 අංක 1 දරණ ඉඩම් ප්‍රතිසංස්කරණ කොමිෂන් සභා පනතට අනුව පරදුව වත්තට අයිති ඉඩම් ප්‍රමාණයක් ඊට අදාල ඔප්පුවත් සකස් කර දීමේ වගකීම බාරගෙන තිබුනේ ඒවා කට පරදුව උතුර (359) ග්‍රාම නිලධාරී ඩි. වයි. කරුණාදාස මහතාය. මැනීමේ නියෝගය අනුව මිනින්දෝරු දෙපාර්තමේන්තුවේ නිලධාරීන්ට මායිම් පෙන්වා දුන්නේ ඔහු විසිනි. ඒ බව මාර 569/302 මූලික පිඹුරේ පැහැදිලිව සටහන් කර ඇත. අක්කර දෙසිය අනු නවයක් හිමිව තිබූ පරදූව වත්ත අක්කර 49 යි රුඩ් 3 පර්චස් 14 කට මැනීම්කටයුතු කර තිබුනේ ඊට කුඹුරු අක්කර හතරක් ද ඇතුළත් බව පෙන්වා දෙමිනි. පරදුව වත්තට අයිති නීත්‍යානුකූල කොටස එයයි.එවකට පරදුව වත්තේ හිමිකරු ලෙස නම් කර තිබුණේ, කොළඹ 3 ගෝල්ෆේස් කෝට් 2හි අංක 26 පදිංචි ඒ එච් මාකන් මාකර් නමැත්තෙකු ය. කැණීම් කටයුතු අවසන් කර ඊට අදාළ පත්තිරු සකස් කර තිබුණේ 1976.11.05 දිනය. මේ මැනීම් කටයුතු සිදු කරද්දී පරදුව වත්තට අයත් නොවන ඔවුන් විසින් භුක්ති විඳි බව පෙන්වා දෙමින් අක්කර 25 ක්‌ ඉඩම් ප්‍රතිසංස්කරණ කොමිෂන් සභාවට පවරා දීමට ක්‍රියා කෙරිණි. රජයට පවරා ගත් එම අක්කර 25 න් අක්කර පහ ක්‌ පරදූව ජිනරතන හිමි ට ත් අක්කර හයක් කසල ප්‍රතිචක්‍රීයකරණ ව්‍යාපෘතියක් සඳහා අකුරැස්ස ප්‍රාදේශීය සභාවටත් ඉතිරි අක්කර දාහතර පොදු ව්‍යාපෘතියක් ක්‍රියාත්මක කිරීම සඳහා හිටපු අමාත්‍ය එච්.ජී සිරිසේන මහතාටත් ලබාදී තිබේ. අමාත්‍යවරයා ලබාගත් අක්කර දාහතරේ පොදු ව්‍යාපෘති කිසිවක් ක්‍රියාත්මක වූයේ නැත. අද එම ඉඩම එච් ජී. සිරිසේනගේ පුද්ගලික පොල්වත්ත කි. සියලු කටයුතු අවසානයේ පරදුව වත්තට අක්කර 49 ක නීත්‍යානුකූල ඔප්පුවක් සකස් කරදීමට පරදුව උතුර ග්‍රාම නිලධාරි ඩි. වයි. කරුණාදාස ක්‍රියාකර තිබුණි. සත්‍ය වශයෙන්ම අක්කර දෙසිය අනූ නවයෙන් අක්කර 49ක් පමණක් පෙන්වා දී ග්‍රාම නිලධාරිවරයා කළේ ඉඩම් ප්‍රතිසංස්කරණ කොමිෂන් සභාව සමග රජය නොමඟ යැවීම ය. අක්කර 250 ක් සඟවා තැබීම ය. මේ අක්කර 250 තුළ පිහිටියේ පරදුව උතුර දකුණ නැගෙනහිර ග්‍රාමසේවා වසම් වල අඳ ගොවියන්ගේ කුඹුරු ඉඩම් ය. පරවේණිය හෙවත් අස්වනු බද්ද ලබා ගනිමින් පරදුව වත්ත සමාගම ඔප්පු රහිතව මේ අක්කර 250 පවත්වාගෙන යාමට කටයුතු කර තිබිණි. ඊට සහාය දුන් ග්‍රාම නිලධාරීවරයාගේ මේ වංචනික ක්‍රියාව වෙනුවෙන් එවකට පරදුව වත්ත පාලනාධිකාරිය ග්‍රාමනිලධාරී ඩී. වයි. කරුණාදාස ට අක්කර දෙකක ඉඩමක් තෑගි කර තිබුණි.

ආයෝජන ප්‍රවර්ධන අමාත්‍ය වරයාගේ සමාගමක් විසින් පරදුව වත්ත මිලට ගැනීම.

අකුරැස්ස පරදුව වත්ත සීමාසහිත පරදුව වතු පුද්ගලික සමාගමෙන් 2021 මාර්තු මස දහ වන දින සී පී හොල්ඩින්ග්ස් පුද්ගලික සමාගම මිලදී ගත් බව 2021.03.23 දිනැති ලිපියෙන් එහි අධ්‍යක්ෂ ජේ. එම්. ජේ. පී. ලියනගේ මාතර දිස්ත්‍රික් ගොවිජන කොමසාරිස් වෙත දැනුම් දී තිබේ. අදාල සමගම රෝයල් සෙරමික් ලංකා පී. එල්. සී හා ලංකා ටයිල්ස් පී. එල්. සී සමාගම් වල උප සමාගමක් බව ද එම ලිපියේ දැක්වේ මේ සමාගම් ජාලය හිටපු ආයෝජන ප්‍රවර්ධන අමාත්‍ය ධම්මික පෙරේරාට අයත් ඒවාය.2022.11.12 වන දින මාතර දිස්ත්‍රික් ගොවිජන සංවර්ධන නියෝජ්‍ය කොමසාරිස් එස්. එම්. පී. එස් නිරෝශනි imi/c/n/30u/ball clay/2022/6351 දරන බෝල මැටි අයදුම්පත සම්බන්ධයෙන් අකුරැස්ස ප්‍රාදේශීය ලේකම්වරයාට දන්වා ඇත්තේ අඳ ගොවියන්ට නොදන්වා කුඹුරු ඉඩම් විකිණීම ක්‌ සම්බන්ධයෙන් 2011 අංක 46 දරන ගොවිජන සංවර්ධන ( සංශෝධිත ) පනතින් සංශෝධිත 2000 අංක 46 දරන ගොවිජන සංවර්ධන 2(5) ගන්තිය යටතේ අඳ ගොවි අයිතිවාසිකම් කියාපාන පාර්ශව 45 ක් විසින් පරදුව යායෙ හිටපු සහ දැනට සිටින පාලනාධිකාරියට විරුද්ධව පැමිණිලි 45 ක්‍ තමන් වෙත ලැබී ඇති බවයි. පැමිණිලි සම්බන්ධයෙන් විමර්ශන කටයුතු තම කාර්යාලයේදී දී සිදු වන බව ද වැඩිදුරටත් දන්වා ඇත.

පාරදූව වත්ත විකිණීම නීති විරෝධී බව පෙන්වා දෙන ගොවිජන සංවර්ධන පනත

2000 අංක 46 දරණ ගොවිජන සංවර්ධන පනත තුළින් කුඹුරු ඉඩම් විකිණීම සම්බන්ධයෙන් සුවිශේෂී සීමාවන් පනවා ඇත. පනතේ 2(1) වගන්තිය අනුව කුඹුරු හිමියා විසින් කුඹුරු ඉඩම් විකිණීමට අදහස් කරන්නේ නම් ද පළමුකොටම එම ඉඩමේ අඳ ගොවියෙකු සිටීනම් ද අඳ ගොවියාට ඉඩම් මිල ගනන් සඳහන් කරමින් මිලදී ගැනීමේ අවස්ථාව පිරිනැමිය යුතුය. එම දැන්වීමේ පිටපතක් ප්‍රදේශයේ ගොවිජන සංවර්ධන සභාව වෙත ලියා පදිංචි තැපෑලෙන් යොමු කළ යුතුය. අයිතිකරු විසින් යෝජනා කරන ලද මිලට අඳ ගොවියා ඉඩම මිලට ගැනීමට කැමති වන්නේ නම් ඔහු විසින් තම කැමැත්ත ඉඩම් හිමියාට සහ ගොවිජන සංවර්ධන සභාවට ලියාපදිංචි තැපෑලෙන් දැනුම් දිය යුතුය. ඉන් අනතුරුව පැවරුම සම්පූර්ණ කළයුතු කාලය සභාව විසින් තීරණය කරනු ඇත. (2(2) එබදු මිල ගණන් ඉදිරිපත් කිරීමකදී අයිතිකරු විසින් යෝජනා කළ මිල අධිකතර බව අඳ ගොවියා ප්‍රකාශ කර සිටී නම් වෙළෙඳපොල මිල සලකා බැලීමෙන් පසු සභාව විසින් මිල තීරණය කරනු ඇත.2(3)(අ ) එලෙස මිල ගනන් නිශ්චය කරගත් පසු සභාව විසින් නියම කරන කාලයක් තුළ පැවරීම සම්පූර්ණ කළ යුතුය. (2(3)(ආ ) යම් අද ගොවියකු විසින් 2(2),2(3) වගන්ති අනුව ක්‍රියාකිරීම කඩ කර ඇත්නම් එම අද ගොවියා එම කුඹුරු ඉඩම් ප්‍රමාණයෙන් අස් කිරීමට ගොවිජන සේවා කොමසාරිස් ජනරාල්වරයාට බලය ඇත. යම් කුඹුරු හිමියකු විසින් පෙරකී විධිවිධාන කඩකර කුඹුරු ඉඩමක් පවරනු ලැබුවේ නම් ගොවිජන සේවා කොමසාරිස් ජනරාල්වරයා විසින් කරනු ලබන පරීක්ෂණයකින් පසුව එකී පැවරීම ශුන්‍ය හා බල රහිත බව කොමසාරිස්වරයා විසින් ප්‍රකාශ කල හැකිය. එසේම එම පැවරීම යටතේ එම කුඹුරු ඉඩම් ප්‍රමාණය භුක්තිවිදින තැනැත්තා පනතේ අටවන වගන්තිය අනුව නෙරපා දැමිය හැකිය. (3(5). යම් පැවරීමක් ශූන්‍ය හා බල රහිත බව 3(5) වගන්තිය යටතේ ප්‍රකාශ කරනු ලැබූ විට එම ප්‍රකාශය අදාළ ඉඩම් රෙජිස්ටාර් කාර්යාලය වෙත ද යොමු කරනු ලැබිය යුතුය.3(6)ගොවිජන සංවර්ධන පනතේ 8 වන වගන්තිය අනුව ගොවිජන සේවා කොමසාරිස් වරයා වෙත යොමු කරන පැමිණිලි විභාග කිරීමට ඔහුට දිසා අධිකරණය සතු බලතල ඇත. පාරදූව වත්ත විකිණීමේදී කුඹුරු පනත හෝ ගොවිජන සංවර්ධන පනත හෝ ඒවායේ සඳහන් විධි විධාන කිසිවක් සම්පූර්ණ කර නැත. ඒ අනුව බැලු බැල්මටම පරදූව වත්ත විකිණීම කළ එම වතු සමාගමත් වත්ත මිලදී ගත් නව සමාගමත් දෙකම අද ගොවියන්ගේ ඉඩම් අයිතියට පයින් ගසා ඇත.

ජනාධිපතිවරයාට පැමිණිලි.

සමාගමට මේ මැටි නිධිය කැණීම තවත් ව්‍යාපාරික කටයුත්තක් වුවත් පරදුව යායේ ගොවීන්ට නම් ඒය තමන්ගේ අනාගත පරම්පරාවේ බඩගින්න පිළිබඳ සැක සංකා මතු කරන්නකි. සමාගම මේ සරුසාර යායේ මැටි ගොඩ දැමීමට පතල් කැණීමෙන් එතෙක් මෙතෙක් තමන්ගේ ගොවිතැන වගා බිම් අහිමි වීම යනු අඳ ගොවීන්ට ඔවුන්ට ඔවුන්ගේ ජීවිතය අහිමි වීම මිස අන් යමක් නොවේ. පරදුව ග්‍රාමයේ පවුල් 1100 ක පුද්ගලයන් 5370 ක්‌ ජීවත්වන බව ප්‍රාදේශීය ලේකම් කාර්යාල වාර්තාවල දැක්වේ. පරදුව "වල වෙල " පාරම්පරික මැටි කර්මාන්තයේ නිරත වූ කර්මාන්තකරුවන් මැටි ලබාගත්තේ ද මේ පරදුව යාය ආශ්‍රිතවය. අනාදිමත් කාලයක සිට ඔවුන් මේ කර්මාන්තයේ නිරත වූයේ පරිසර හානියක් නොවන ලෙස මැටි වලවල් නැවත වසා දමමින. මහා පරිමාණ පතල් කැපුවේ නැත. නිල්වලා ගංගා ද්‍රෝණියේ පහළ නිම්නයේ ජීවත්වෙන පරදුව වැසියන් අසාර්ථක නිල්වලා යෝජනා ක්‍රමයෙන් අප්‍රමාණ ගැහැට විඳින්නේ ය. ඉහළ නිම්නයට ඇදවැටෙන සුළු වර්ෂාවකදී පවා ප්‍රදේශයේ ගංවතුර තත්ත්වයක් ඇති වේ. කියාඬුව රක්ෂිතයෙන් පටන්ගෙන ගලන නා ගහ දොල ඇල ගලා බසින්නේ ද මේ වත්ත මැදිනි. සරුසාර තෙත් බිමක් වූ පරදුව රකින නිල්වලා ද්‍රෝණියේ පිහිටි බෝල මැටි මහා පරිමාණයෙන් කැණීම් කළ පසුව ප්‍රදේශයේ ළිං ජලය සිඳී යාම හා ගොවිබිම් වියලී යාම ගොවියන්ට කුඹුරු ඉඩම් අහිමි විම කිරි කර්මාන්තයේ නිරත ගොවීන්ට තණ බිම් අහිමි වීම ඇතුළු කෘෂිකාර්මික හා පාරිසරික ගැටලු රැසක් මතුවන බව ගම සුරකින සමගි පවුර නම් සංවිධානය පෙන්වා දෙයි. ඔවුන් මේ විනාශයට එරෙහිව පියවර ගන්නා ලෙස ජනාධිපතිවරයා ගෙන් ලිඛිතවම ඉල්ලා තිබේ. ඊට අමතරව අත්සන් දහසක පෙත්සමක් ජනාධිපතිවරයාට භාර දීමට ද ක්‍රියා කරමින් සිටී.

ගොවියන්ට දැනුම් නොදී මේ කුඹුරු ඉඩම් විකිණීමට අපි විරුද්ධයි...! ඒ. කේ.නෙවිල් කුමාර - සභාපති පරදුව උතුර ගොවි සංවිධානය

20221115 103934" පරදුව වත්ත විකිණීමට කලින් අපි හිතුවේ අපි අඳේට වැඩ කළ කුඹුරු ඉඩම් පරදුව වත්තට අයිතියි කියලා. උක්වත්ත යායේ අක්කර 150 ක්‌ විතර තියෙනවා. සමාගම ට මේවා අයිති නැ. සමාගමට මේ කුඹුරු ඉඩම් වලට ඔප්පු නෑ. අපිට අයිතියක් ඇත්තෙත් නෑ අපිට ඔප්පු නෑ ඒත් අපේ පරම්පරාව ජීවත් වුණේ මේ කුඹුරු ඉඩම් වලින්. මැටි කපන්න දෙන්න බෑ අපි මේකට විරුද්ද යි.

සියලු සංවිධාන ඒකාබද්ද කරගෙන මේ විනාශය ට විරෝධය දක්වනවා. ලශිකා ජයලත් - සමාජ ක්‍රියාකාරී අකුරැස්ස.

"මේක පරදුව වත්තේ කුඹුරු ගොවියන්ට බලපාන ප්‍රශ්නයක් විතරක් නෙවෙයි මේක නිල්වලා ගඟෙන් වතුර බොන ලක්ෂ තුනකට වැඩි ජනතාවට බලපාන ප්‍රශ්නයක්. කළුතර මීටියාගොඩ යන ප්‍රදේශවල මැටි නිධි කැණීම් කරලා කරපු විනාසය නිල්වලා ගංගා ද්‍රෝණියට ගේන්න එපා. සමාගම කියන්නේ මුල් අදියරේ අක්කර 15 ක ගොඩ ඉඩම් වල මැටි කැණීම් කරනවා කියලා ඒ මුල් අදියර පස්සේ තමයි වෙළටත් බහින්නේ.අපි සියලු සංවිධාන ඒකාබද්ධ කරගෙන විනාසයට විරෝධය දක්වනවා.

වගකිවයුතු නිලධාරීන් තීරණ ගත යුතුයි. කුමාරසිරි පතිරණ - පරදුව උතුර ගොවි සංවිධානය.

" මේ පරිසර විනාශයට එරෙහිව වගකිවයුතු නිලධාරීන් නිවැරදි තීරණ ගත යුතුයි. පරදුව කියන්නේ තේ පොල් රබර් කුරුඳු ගම්මිරිස් ආදී අපනයන බෝග සරුවට වැවෙන බිමක් කිරි ගොවීන් මැටි කර්මාන්තකරුවන් කුඹුරු ගොවීන් පවුල් 2000 කට ආසන්නයි. මහා පරිමාණ පතල් කැපීමෙන් යාය විතරක් නෙවෙයි මේ ප්‍රදේශයම මේ ප්‍රශ්නයට ගොදුරු වෙනවා. කුඹුරු ඉඩම් විකුනපු විදියත් වැරදියි ගොවිජන සංවර්ධන පනත ට අනුවගොවිජන සංවර්ධන කොමසාරිස්ට මේ විකිණීම ශූන්‍ය කරන්න පුළුවන්.

මේ පරිසර විනාශය ට එරෙහිව අපි සටන් කරනවා. ජනක හිත්තැටිය ගේ - යාය ගොවි.

" භූ විද්‍යා පතල් කැනීම් කාර්යාංශය මධ්‍යම පරිසර අධිකාරිය ජන සංවර්ධන දෙපාර්තමේන්තුව ප්‍රාදේශීය ලේකම් කාර්යාලය කියන මේ රාජ්‍ය ආයතන සමාගමේ මේ මැටි කැපීමේ20221115 104819 ව්‍යාපෘතිය නවතා දැමිය යුතුයි. මේක රටටම බලපාන ප්‍රශ්නයක් සමාගමට ඩොලර් පිපාසය තිබුනට අපිට තියෙන්නේ බඩගින්න පිළිබඳ ප්‍රශ්නයක් මේ කුඹුරු වගා කරලා තමයි අපේ පරම්පරාවම බඩගිනි නිවා ගත්තේ මේක මැටි හාරන්න දෙන්න බෑ මේ විනාශයට එරෙහිව අපි සටන් කරනවා.මොකද මේක අපේ දරුවන්ගේ අනාගතයට බලපාන ප්‍රශ්නයක්.

රතුපස්වල කරපු දේවල් මෙහෙ කරන්න එන්න එපා.නිල්වලා ද්‍රෝණිය වනසන්න ඉඩ දෙන්නේ නෑ.ආර්. කේ අනුර ( විශ්‍රාමික ගුරු ) සභාපති ගම සුරකින සමගි පවුර සංවිධානය

" සමාගමට උවමනා විදියට සමහර රාජ්‍ය ආයතන කටයුතු කරන්න පුළුවන් එහෙම අත්දැකීම් අපට තියෙනවා. මේ ටයිල් සමාගම් පවත්වාගෙන යාමට මැටි කැණීම් කරන්න ඕනේ මේ සරුසාර වෙල් යායවල් වනසල නෙවෙයි. ඒකට සුදුසු බිම් ඔවුන් සොයා ගත යුතුයි. පරදුව මැටි නිදිය තියෙන්නේ නිල්වලා ගඟ ද්‍රෝණියේ. මාතර දිස්ත්‍රික්කයේ සියයට අනුවක් පානීය ජලය සපයා ගන්නේ බලකා වල, කද්දුව, නාදුගල පොම්පාගර වලින් පිරිසිදු කරන නිල්වලා ගඟේ ජලය පරදුවට ඉතාම කිට්ටුවෙන් මේවා තියෙන්නේ මැටි ගොඩ දාන්න පතල් කපන්නේ මේ සංවේදී කලාපයේ එංගලන්තයෙන් කුණු ගෙනාපු ව්‍යාපාරිකයෙක් ගේ සමාගම ක්‌ මේක කරන්නේ ඒ ගෙනාපු කුණු මේ මැටි වල වල් වල පුරවලා මේවා වහලා දාන්නත් පුළුවන් අපි මේකට ඉඩදිය යුතු නෑ. රතුපස්වල කරපු වැඩ මෙහෙ කරන්න එපා.

අඳ ගොවියන්ට විතරක් බලපාන ප්‍රශ්නයක් නෙවෙයි. මුළු ගමම මේකට විරුද්ධයි . ගුණපාල උඩගෙ.- විශ්‍රාමික රාජ්‍ය නිලධාරී, යාය ගොවි.

"සමාගමට පරවේණිය දුන්නේ නෑ කියලා පරදුව වත්තෙ හිටපු වතු අධිකාරී මිල්ලවාන ගොවියන් හතරකට නඩු දැම්මා. ගොවිජන සංවර්ධන පනත ට අනුව අද ගොවියන්ට විරුද්ධව නඩු පැවරිය යුත්තේ ඉඩම් හිමියා විසින් හෝ ඔහුගේ බලයලත් නියෝජිතයකු විසින් මිල්ලවාන ට එසේ බලය පවරා නැහැ. ඉඩම් හිමියා මාකර් මරික්කාර් ඔහු ජීවතුන් අතර නැහැ. කොහොම උනත් අපි පෙනී ඉන්නේ අද ගොවියන්ගේ කුඹුරු ඉඩම් කැණීමට එරෙහිව පමණක් නෙවෙයි. මේක රටටම බලපාන පොදු ප්‍රශ්නයක් රට ආහාර හිඟයකට මුහුණ දෙන බව කියලා කුඹුරු යායවල් මැටි කපලා විනාශ කරන්න ඉඩදෙන්න පුලුවන්ද.....?

මම තෑගි ගත්තෙ නෑ.- ඩි. වයි කරුණාදාස - විශ්‍රාමික ග්‍රාම නිලධාරී පරදුව උතුර

ප්‍රශ්න ය - පරදුව වත්ත මැනුම් කටයුතු කරද්දී ඔබ ඊට සහාය දුන්නා ද ඔබට ඒ වෙනුවෙන් පරදුව වත්තෙන් අක්කර දෙකක් තෑගිත් ලැබුණාද..?

" මම තෑගි ගත්තෙ නෑ කවුද කියන්නෙ මම ඒ ඉඩම ගත්තේ මාකර් මරික්කාර් ගෙන් රුපියල් හතලිස් දාහක් ඒකට මම දුන්නා ඔප්පු තිබුණේ නෑ. මම පස්සෙ ඔප්පුවක් හදාගත්තා. වත්ත මනින්න සහය දුන්න කියල කවුද කිව්වේ...? පත්තිරුවේ නම තියෙනවා කිව්වට මම ඒක දැක්කෙ නෑ.. මම තෑගි ගත්තේ නෑ වත්තෙන් අක්කර දෙකක් මට මාකර් මරික්කාර් දුන්නා.

තියෙන සම්පත නැති කරගෙන ඩොලර් ගේන්න මැටි කැපුවම ගොවියන්ටත් ඩොලර් බෙදනවා ද...? ආර්. කේ. චන්ද්‍රසිරි- ලේකම් පරදුව උතුර ගොවි සංවිධානය.

" සමාගම රැස්වීමක් තියලා අපට කිව්වේ රටට ඩොලර් ගෙන මේ ව්‍යාපෘතියට අකුල් හෙලන්න එපා කියලා. ගොවියෝ ඇහුවේ මැටි කපන්න කුඹුරු දුන්නම අපිටත් ඩොලර් බෙදනවා ද කියලා ඒකට සමාගම ට කටඋත්තර නැති උනා. මුලදී පෙන්නන හොඳ මැටි කපා ගෙන යද්දි නැහැ. ඊට පස්සේ එන ප්‍රශ්න වලටත් සමාගම උත්තර දෙන්නෙ නැහැ.

අපිට ජීවත් වෙන්න තියෙන මැටි ටික සමාගම කපාගෙන ගියාම අපි මැටි ගේන්නේ කොහෙන්ද? මැටි කර්මාන්ත ශිල්පිනී ඩබ්ලිව්. එච්. සිරියාවතී - පරදුව දකුණ මැදගොඩ.

" අපේ පරම්පරාවම ජීවත් වුණේ මේ මැටි කර්මාන්තයේන් අවුරුදු සීයකට වැඩි ඉතිහාසයක් අපට තියෙනවා අපි මැටි ගත්තෙ වල වෙල යායෙන්. මැටි ගත්තට පස්සේ අපි ඒ වලවල් එදාම වැහුවා. යන්ත්‍ර සූත්‍ර යොදාගෙන මහා වලවල් කැපුවේ නෑ. සමාගම කරන්නේ බිත්තර දාන කිකිළි මරාගෙන කෑවා වගේ වැඩක් නේ. ඒගොල්ලො පතල් කපල මැටි ඔක්කොම අරගෙන ගියාම අපි ජීවත් වෙන්නෙ කොහොම ද .....

"කෙසේවත් එකග වෙන්න බෑ මේක මහා අපරාධයක්" මාතර හම්බන්තොට දෙදිසාවේ ප්‍රධාන අධිකරණ සංඝනායක, බමුණුගම ධම්මරතන හිමි - පහුරංවල ශ්‍රී ධර්මරාජ විහාරය

" මේ අඳ ගොවියන්ගේ කරල පැහුනෝත් තමයි මට දානේ ලැබෙන්නේ මේ පන්සල අවට ජීවත් වෙන්නේ මැටි කර්මාන්තයෙන් ජීවත්වෙන අහිංසක පවුල් මේ ගම ගොවි ජනපදයක් මේක වනසන්න ඉඩ දෙන්න බැහැ.. මේ මැටි කැපිල්ලට අපි විරුද්ධයි කෙසේවත් එකඟ වෙන්න බැහැ.

අපි විද්‍යාත්මකව මේ මැටි නිධිය ගොඩට ගන්න කටයුතු කරනවා. ජේෂ්ඨ කළමනාකරු උපදේශක ආචාර්ය පත්මසිරි රණවක - සී. පී. හෝල්ඩින්ග්ස් පුද්ගලික සමාගම

" ඉඩම මිලදී ගැනීමේදී ඉඩම ලබා දුන් සමාගමත් අපිත් අතර අඩුපාඩු තියෙනවා. නමුත් අපි මැටි සාම්පල් ලබා ගත්තේ භූ විද්‍යා හා පතල් කැනීම් කාර්යාංශයේ අවසර ඇතිවයි. මැටි කියන්නේ පොලොව යට තියෙන සම්පතක් ඒක පරදුව වත්තේ අක්කර 100 ක විතර පැතිරිලා තියෙනවා. මේවා රටේ සංවර්ධනයට යොදා ගන්න ධනාත්මකව හිතන්න ඕනේ. පවතින නීතියට එකඟව අපි මේ මැටි නිධිය විද්‍යාත්මකව ගොඩට ගන්න කටයුතු කරනවා.

වත්ත මිලදී ගත්තේ මැටි කපන්න මේක කරන්න අපිට ඉඩ දෙන්න කමල් කුඩාහෙට්ටි - සාමාන්‍යාධිකාරී ලංකා සෙරමික් පී එල් සී

" මුල් අදියරේ අපි කැණීම් කරන්නේ ගොඩ ඉඩම් වල විතරයි නිෂ්පාදන පරීක්ෂාවන් කරන්න ඕනේ නිසා මැටි සාම්පල් අපි ගොඩට ගත්තා. මේ බෝල මැටි නිධිය අක්කර 100 ක විතර පැතිරිලා තියෙනවා මේ වර්ගය කාලයක් තිස්සේ ගලාගෙන ගිහින් ගංගාද්‍රෝණි වල තැන්පත්වලා තියෙනවා. කළුතර මැටි නිධි අවසන් වෙමින් තියෙන්නේ අපි මේ මැටි නිදිය සොයාගත්තේ ටයිල් කර්මාන්තය පවත්වාගෙන යන්න. නමුත් කලින් අත්දැකීම් නිසා අපේ රටේ කිසිවක්කරන්න බෑ රට දියුණු කරන්න හිතෙනවා නම් මේ මැටි නිධිය ගොඩට අරගෙන ඒකට වටිනාකමක් දෙන්න.ඕනේ. අපි අවුරුදු හතලිහක් විතර මේ කර්මාන්තයේ නිරත වෙනවා. පරදුව වත්තේ ගොඩ මඩ ඉඩම් කොටස් දෙකේම මේ බෝල මැටි නිධිය තියෙනවා තවමත් අපි කැනීම් බලපත්‍ර ලබා ගත්තේ නැහැ. ඒ සඳහා ක්‍රියා කරමිනුයි ඉන්නේ කුඹුරු ඉඩම් සම්බන්ධ ව වෙනම ගැටලුවක් තිබෙනවා. ඒ එක වෙන ප්‍රශ්නයක් අපේ නිෂ්පාදන වලින් 5% අපි අපනයනය කරනවා. ඉතිරිය මේ රටට. මැටි කපන්නේ නැතුව මේ කර්මාන්තය පවත්වාගෙන යන්න බැහැ. ඒක නිසා නිල්වලා ද්‍රෝණියේ මේ මැටි නිධිය ගොඩට ගන්න අපිට ඉඩ දෙන්න. අපි කරගෙන යන විදිය පරික්ෂා කරලා තීරණයක් දෙන්න.

දයා නෙත්තසිංහ

ආගමික ස්ථානවල විදුලිබිලට සහනයක් : විදුලි කප්පාදුව දීර්ඝ වෙයි

විහාරස්ථාන ඇතුළු ආගමික ස්ථානවල විදුලි බිල සඳහා ලබාදුන් සහනය මේ වන විට ක්‍රියාත්මක බව මහජන උපයෝගීතා කොමිසම පවසයි.

එම සහනය විදුලි බිලට ඇතුළත් කිරීමේ කටයුතු මේ වන විටත් සිදුවෙමින් පවතින බව එහි සභාපති ජනක රත්නායක සඳහන් කළේය. 

ඒ අනුව සියලුම විහාරස්ථාන ඇතුළු ආගමික ස්ථාන සඳහා අගොස්තු මාසයේ සිට ආදාළ සහනය ක්‍රියාත්මක කිරීමට නියමිතය.

කිසිදු ආගමික ස්ථානයක් නම්කර සහන ලබා නොදෙන අතර ලංකා විදුලිබල මණ්ඩලයේ බිල්පත් ක්‍රමවේදයට අනුව එම සහනය ක්‍රමානුකුලව සියලු ආගමික ස්ථාන වෙත හිමිවන බව මහජන උපයෝගීතා කොමිසමේ සභාපති ජනක රත්නායක ම සඳහන් කළේය.

විදුලි කප්පාදුව තවත් දීර්ඝ වෙයි

මේ අතර හෙට (28) සහ අනිද්දා (29) යන දින දෙක තුළ පැය දෙකයි මිනිත්තු 20ක විදුලි කප්පාදුවක් සිදුකිරීමට නියමිතව තිබේ.

මහජන උපයෝගීතා කොමිසම සඳහන් කළේ, දිවා කාලයේ පැයක් සහ රාත්‍රී කාලයේ පැයයි මිනිත්තු 20ක විදුලි කප්පාදුවක් සිදුකරන බවය.

 

Page 228 of 442