පුවත්

ජාත්‍යන්තර ස්වෛරිත්ව බැඳූම්කර නිකුත් කිරීම ආරම්භයේ පටන්ම අති විශාල මූල්‍ය කොල්ලයක් සිදු කර තිබේදැයි බරපතල සැකයක් මතුවන තොරතුරු රැසක් පාර්ලිමේන්තු හැන්සාඩ් වාර්තාවකින් හෙළිවේ.

මෙම තොරතුරු 2012 නොවැම්බර් 17වෙනි දින හැන්සාඩ් වාර්තාවේ ඇතුළත් වේ. විදේශයන්ගෙන් මුල්වරට ස්වෛරිත්ව බැඳූම්කර මගින් වාණිජ ණය ලබාගෙන ඇත්තේ 2007 ඔක්තෝබර් 24 වෙනිදාය. එය කල්පිරීම 2012 ඔක්තෝබර් 23 වෙනි දිනට සිදුවී ඇත. 8.25%ක පොලී අනුපාතිකය යටතේ ඩොලර් මිලියන 500ක් මෙසේ ලබාගෙන ඇත. එවකට පැවති ඩොලරයට රුපියල් 109ක් වූ විනිමය අනුපාතය අනුව මෙම ණය මුදල් රුපියල් කෝටි 5,620කි.

එය ආපසු ගෙවීමේදී රුපියල් කෝටි 6,400ක් සහ ඊට අදාල පොලිය ලෙස රුපියල් කෝටි 2,300ක් ගෙවීමට සිදුවී ඇත. එහෙත් රුපියලේ අගය අවප්‍රමාණය වීම මත පමණක් ලංකා රජය විසින් ආපසු ගෙවිය යුතු ණය මුදල සහ පොලිය පිළිබඳව දක්වා ඇති සංඛ්‍යාලේකන බරපතල ගැටලු මතු කර තිබේ. ණය වාර්ක සහ පොලිය ආපසු ගෙවීමේදී රුපියල් කෝටි 8,700ක් වැය වූ බව එක්සටහනක දැක්වේ.

මේ අතර රුපියල අවප්‍රමාණය විමෙන් ආපසු ගෙවීමට සිදු වූ බැඳුම්කරයේ වටිනාකම රුපියල් කෝටි 800කින් ඉහළ ගොස් ඇති බව තවත් සටහනක දැක්වේ. එසේම ඊට අදාල පොලිය වැඩිපුර ගෙවීමට සිදුවීම රුපියල් කෝටි 16,100ක් බවද එම සටහනේ දැක්වේ. මේ අනුව පාර්ලිමේන්තුවට ඉදිරිපත් කරන ලද සංඛ්‍යාලේඛනවල අතිවිශාල පරස්පරයක් පවතී. ආචාර්ය හර්ශ ද සිල්වා නැගූ ප්‍රශ්නයකට එවකට සිටි නියෝජ්‍ය මුදල් ඇමති ආචාර්ය සරත් අමුණුගම ලබාදී තිබෙන පිළිතුරකින් මෙම තොරතුරු හෙළි වේ.

-lanka truth

ඉන්දියාවේ නිෂ්පාදිත නැනෝ නයිට්‍රජන් දියර පොහොර ලීටර් ලක්ෂයක්, හදිසි ඇනවුමක් ලෙස ගෙන ඒමට රජය තීරණය කර තිබේ. කොමර්ෂල් පොහොර සමාගමේ සභාපති මෙත්සිරි විජේගුණවර්ධන සඳහන් කළේ, ඉදිරි දින 2 තුළ එම පොහොර තොගය මෙරටට ගුවන් මගින් රැගෙන එන බවය.

නැනෝ රජා වැඩක් නෑ !

ඉන්දියාවේ සිට ආනයනය කරන ආන්දෝලනාත්මක නැනෝ නයිට්‍රජන් පොහොර අපේක්ෂිත ප්‍රතිඵල නොදෙන බව ගොවීන් පවසයි.

වගා බිම් සඳහා මෙකී පොහොර යෙදුවත් ඒ ප්‍රතිඵල හීන බව ඔවුන්ගේ මතය වී තිබේ.

රසායනික පොහොර ගැසට් එක ප්‍රමාදයි !

මේ අතර ඊයේ (27) නිකුත් කිරීමට නියමිතව තිබූ රසායනික පොහොර ආනයනය ට අවසර දෙන ගැසට් පත්‍රිකාව නිසි වේලාවට ප්‍රකාශයට පත්ව නැති බවත් වාර්තා වෙයි.

ජාතික පොහොර ලේකම් කාර්යාලයෙන් මේ සම්බන්ධයෙන් මාධ්‍ය සිදුකළ විමසීමකදී ඔවුන් සඳහන් කර ඇත්තේ රසායනික පොහොර නැවත ආනයනය කිරීමේ ගැසට් නිවේදනය නිකුත් කරන තෙක් ඒවා ආනයනයට අදාළ අවසර ලබාදීමේ හැකියාවක් නොමැති බවය.

රසායනික පොහොර ආනයනය සඳහා අවසර ලබාදුන්න ද පෙර පැවති තත්ත්වයට නොව ඒවා ආනයනය කිරීමේ දී යම් සීමා කිරීමක් සිදුකිරීමට සිදුවන බවත් එහිදී ජාතික පොහොර ලේකම් කාර්යාලය පවසා ඇත.

ගොවීන් කුඹුරට බැහැලා !

කෙසේ වුවත් රසායනික පොහොර ආනයන තහනම ඉවත් කර අදාළ ගැසට් නිවේදනය ඉවත්කර ගැනීම සමග ගොවිතැන් වලින් ඉවත්ව සිටි ගොවීන් රැසක් වගා කටයුතු සඳහා කඩිනමින් යොමුව ඇති බව ගොවි සංගම් පවසයි.

එය යහපත් ප්‍රවණතාවක් බව එම සංගම්වල මතය වී තිබේ.

බණ්ඩාරගම මිල්ලනිය සමුපකාර සමිතිය සඳහා නියෝජිතයන් තෝරා පත්කර ගැනීමට පැවති නිලවරණයෙන් ශ්‍රී ලංකා නිදහස් පක්ෂ නියෝජිතයන් ජයග්‍රහණය කර ඇත.

එහිදී ශ්‍රී ලංකා නිදහස් පක්ෂ සභාපති සහ උප සභාපති ධුරයන්ද ඇතුළුව අධ්‍යක්ෂ ධුර 04ක් ජයග්‍රහණය කර ඇත.

ශ්‍රී ලංකා පොදුජන පෙරමුණ නියෝජිතයන් ජයගෙන ඇත්තේ අධ්‍යක්ෂ දුර තුනක් පමණි.

දේශපාලන විචාරකයන් පවසන්නේ සමූපකාර ජන්ද බිම්මට්ටම දේශපාලන හැසිරීම යම් ප්‍රමාණයකට පෙන්නුම් කරන්නක් වන බවයි.

ඒ අනුව පොදුජනතාව අතර ඇති ආණ්ඩුව සම්බන්ධයෙන් අවිශ්වාසය සහ අප්‍රසාදය පෙන්නුම් කෙරෙන බවත් ඉදිරි නිලවරණ ගැන අවධානයෙන් සිටීමෙන් ඉදිරි තත්ත්වය විශ්ලේෂණය කළ හැකි බවත් විචාරක මතය වී ඇත.

මීට සමාන තත්ත්වයක් පොදුජන පෙරමුණ බිහිකළ පසුව යහපාලන ආණ්ඩුව සමයේදී ද දකින්නට ලැබුණු බවත් විචාරකයන් සිහිපත් කරයි.

රට පුරා ප්‍රදේශ කිහිපයක තිරිඟු පිටි හිගයක් ඇති වී තිබෙන බවත් ප‍්‍රදේශ කිහිපයකම බේකරි හිමියන් තමන්ට අවශ්‍ය ප්‍රමාණයට සැපයුම්කරුවන් පිටි සපයන්නේ නැති බව පවසන බවත් ආණ්ඩුව හිතවාදී වෙබ් අඩවියක් වන සී නිව්ස් වාර්තා කර ඇත.

මේ හේතුවෙන් බේකරි කර්මාන්තය කර ගැනීමට නොහැකි තත්වයක් ඇතිව තිබෙන බොහෝ ඔවුන් පෙන්වා දෙන බවත් එම පුවතේ සඳහන් වෙයි.

මේ ගැන කල විමසීමකදී වෙළඳ අමාත්‍ය බන්දුල ගුණවර්ධන සඳහන් කර ඇත්තේ කොරෝනා ව්‍යාප්තිය හේතුවෙන් නිෂ්පාදනය අඩාල වී ඇතත් ඉල්ලුම ඒ ආකාරයෙන්ම පවතින බවයි.

ඒ නිසා ඇති වන නිෂ්පාදන ඉල්ලුම මත භාණ්ඩ මිල ඉහළ යන බව ද ඔහු පවසයි.

කෙසේ වෙතත් පිටි මිල ඉහළ දැමීම සම්බන්ධයෙන් තවම අදහසක් නැති බව ද කී ඔහු පිටි සඳහා පාලන මිලක් පනවා නැති බවද සඳහන් කර ඇත.

කෙසේ වුවත් ආනයනය කරන ලද තිරිගු පිටි තොගයක් ඩොලර් හිගතාවය හේතුවෙන් වරායේ සිරවී ඇති බවත් වාර්තා වෙයි.

මේ අතර පිටකොටුව තොග වෙළඳුන් පවසන්නේ ඊයේ (27) දිනයේ සිට තිරිඟු පිටි කිලෝ ග්‍රෑම් එකක මිල රුපියල් 17 කින් ඉහළ දමා ඇති බවයි.

පාන් ගෙඩියක් අද (28) සිට රුපියල් 10කින් ඉහල දැමීමට බේකරිකරුවන්ගේ සංගමය තීරණය කර ඇති බවත් දැනගන්නට ඇත.

මේ සමග සියලු බේකරි නිෂ්පාදන මිල ඉහළ යන තත්ත්වයක් ද උද්ගතව ඇති බව වෙළෙඳ පොළ ආරංචි මාර්ග පවසයි.

රට බරපතල අර්බුදයකට මුහුණදී ඇති බවත් මේ අවස්ථාවේ තරුණ කොටස් ඉදිරියට පැමිණ රට ගොඩනැගීම සඳහා නායකත්වය ගැනීම දිවංගත හිටපු අමාත්‍ය , මංගල සමරවීර වෙනුවෙන් කළ හැකි ලොකුම උපහාරය බව, එජාප නායක හිටපු අග්‍රාමාත්‍ය රනිල් වික්‍රමසිංහ පවසයි.

හිටපු අගමැතිවරයා එබව සඳහන් කර සිටියේ, මිට තෙමසකට පෙර දැයෙන් සමුගත් හිටපු අමාත්‍ය මංගල සමරවීර මහතාට අවසන් බුහුමන් දැක්වීමේ අවස්ථාවට පසුගියදා සහභාගීවූ අවස්ථාවේ ය.

හිටපු අමාත්‍ය මංගල සමරවීරගේ භෂ්මාවශේෂ එදින පෙරවරු 10 සිට පස්වරු 6 දක්වා කොළඹ 08, බෞද්ධාලෝක මාවතේ, අංක 483 දරන ‘’රෙස්පෙක්ට්’’ ජයරත්න ප්‍රභූ මල්ශාලාවේ මහජන ගෞරවය සඳහා තැන්පත් කර තිබිණ.

එක්සත් ජාතික පක්ෂයේ නායකයා මෙම අවස්ථාවට එක්වුයේ එම පක්ෂයේ තරුණ ක්‍රියාකාරීන් පිරිසක් ද සමගිනි. පසුගියදා එම පක්ෂයේ කෘත්‍යාධිකාරී මණ්ඩලයට එක්වූ දිනුක් කොළඹගේ, කොළඹ නාගරික මන්ත්‍රී දුමිඳු ආටිගල, යොවුන් පෙරමුණේ සාමාජිකයින් වන පසිඳු ගුණරත්න, සජාන් සුරියආරච්චි ඇතුළු තරුණ දේශපාලන ක්‍රියාකාරීන් පිරිසක් ද ඔවුන් අතරවිය.

මාධ්‍යවේදීන්වේදීන් හමුවේ තවදුරටත් අදහස් දැක්වූ හිටපු අගමැතිවරයා, දේශපාලනය ගැන කලකිරීමට පත් තරුණ තරුණියන්ට අනාගතය ගැන විශ්වාසයක් ඇති කිරීමට මංගල සමරවීර පසුගිය කාලයේ විශේෂ වැඩසටහනක් ආරම්භකළ බවත්, එවැනි කටයුතු සඳහා තමන්ද කිහිපවරක් සහභාගී වූ බවත් ප්‍රකාශ කළේය.

තරුණ තරුණියන් පවතින දේශපාලනය දැඩි ලෙස පිළිකුල් කරන බවත්, ඔවුන් සියලු දෙනාගේ බලාපොරොත්තු සුන් වී ඇති බවත් ඔහු ප්‍රකාශ කළේය. එවැනි තත්ත්වයක් තුළ තරුණ තරුණියන් වෙනුවෙන් මංගල සමරවීර ඇති කළ 'ෆ්‍රීඩම් හබ් (Freedom Hub) වැනි වැඩසටහන් අතිශයින්ම කලොචිතබව ඔහු එහිදී සඳහන් කළේය.

තරුණ පිරිසට තමන්ගේ වගකීම බාරගෙන නායකත්වය ගැනීම සඳහා මෙවැනි වැඩසටහන් සමග එක් විය යුතු බව පැවසු හිටපු අගමැතිවරයා, තරුණ පිරිස් එක්වී රටේ ප්‍රශ්න වලට විසදුම් ලබා දිය යුතු බවද කියා සිටියේය.

මේ වන විට ක්‍රියාකාරී තරුණ තරුණියන් විශාල පිරිසක් තමන් සමග එකතු වීම සදහා සාකච්ජා කරමින් සිටින බව ද රනිල් වික්‍රමසිංහ හිටපු අග්‍රාමාත්‍ය මෙහිදී සඳහන් කළේය.

ශ්‍රී ලංකා නිදහස් පක්ෂය සහ පොදුජන පෙරමුණ අතර මතුව ඇති දැඩි දේශපාලන අර්බුදය මේ වන විට පැහැදිලි බෙදී වෙන්වීමක් දක්වා ඔඩුදුවා ඇති බව දේශපාලන ආරංචි මාර්ග සඳහන් කරයි.

මේ අතර මාධ්‍ය හමුවකදී අදහස් දක්වමින් පක්ෂයේ ජ්‍යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස සඳහන් කර සිටින්නේ , වත්මන් ආණ්ඩුව කිසිම දැක්මක් නැති අයාලේ යන එදාවේල දුවන ආණ්ඩුවක් බවයි.

තුනෙන් දෙකේ බලය බලය සහිතව තම පක්ෂ නායකයන්ට දඬුවම් කරන බවට ආණ්ඩුවේ නායකයන් තර්ජනය කරන බව ද ඔහු පවසයි.

කෙසේ නමුත් ඊට ප්‍රතිචාර දක්වමින් තම පක්ෂ නායකයා කළ ප්‍රකාශයෙන් පසු ඔවුන් නිරුත්තර වී ඇතැයිද ශ්‍රීලනිප ජ්‍යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස පවසයි.

ඉදිරි අයවැය ඡන්ද විමසීමේ දී ගන්නා තීන්දුව පිළිබඳව සාකච්ඡා කිරීමට ශ්‍රී ලංකා නිදහස් පක්ෂයේ මධ්‍යම කාරක සභාව කැඳවා ඇති අතර ආණ්ඩු විසින් දිගින් දිගටම පක්ෂයට එල්ල කරන චෝදනා සම්බන්ධයෙන් එහිදී දැඩි සැලකිල්ලට ලක් කිරීමටද නියමිතව ඇති බවත් වාර්තා වෙයි.

නැනෝ නයිට්‍රජන් පොහොර ආනයනය කිරීමේ දී විෂය භාර රාජ්‍ය අමාත්‍ය ශෂීන්ද්‍ර රාජපක්ෂ මහතා රුපියල් කෝටි 1100 වංචා කළා ද ?’ යනුවෙන් පාර්ලිමේන්තුවේදී තමන් සිදු කළ ප්‍රකාශයත් සමඟ තිස්ස කුට්ටිආරච්චි මන්ත්‍රීවරයා යොදවා තමන් අපහසුතාවයට පත්වන ආකාරයෙන් පහත් ලෙස ප්‍රකාශයක් සිදුකළ බව සමගි ජන බලවේගය පාර්ලිමේන්තු මන්ත්‍රිනී රෝහිණී කවිරත්න ආණ්ඩුවට චෝදනා කරයි.

තමන්ගේ ප්‍රකාශය අදාළ හොරකම කළ පුද්ගලයාට වැදුණු නිසා ආණ්ඩුවේ ප්‍රබල බළල් අතක් තිස්ස කුට්ටිආරච්චි මන්ත්‍රීවරයා යොදවා පහත් ආකාරයෙන් තමා විවේචනය කළ බව රෝහිණී කවිරත්න මන්ත්‍රීවරිය පෙන්වා දෙයි.

ඇය මෙසේ සඳහන් කර සිටියේ අන්තර්ජාල නාලිකාවක සාකච්චාවකට ඒක්වෙමිනි.

නැනෝ නයිට්‍රජන් ගෙන්වීමේදී එකකින් ඩොලර් නවයේ පනහක වංචාවක් සිදුව ඇති බව කවිරත්න මන්ත්‍රීවරිය වැඩිදුරටත් සඳහන් කරයි.

ඒ අනුව නෑලු නයිට්‍රිජන් පොහොර ගෙන්වීමේදී සිදුව ඇති සමස්ත පාඩුව කෝටි 1100 බව මන්ත්‍රීවරිය පෙන්වා දෙයි..

තමා ව විවේචනය කිරීමට තිස්ස කුට්ටිආරච්චි මන්ත්‍රීවරයා යොදාගත් ආණ්ඩුවේ ප්‍රබල බළල් අත පිළිබඳව රටේ ජනතාව අද කතා කරමින් සිටින බව ද රෝහිණී කවිරත්න මන්ත්‍රීවරිය පෙන්වා දෙයි.

එහිදී ඇය සඳහන් කළේ ශෂීන්ද්‍ර රාජපක්ෂ මහතාගෙන් සහ මහින්දානන්ද අලුත්ගමගේ මහතාගෙන් ප්‍රශ්න කිරීමක් සිදු කළොත් සැබෑ හොරුන් හඳුනාගත හැකි බවයි.

අද රටේ තීන්දු තීරණ ගන්නේ එකම පවුලක සහෝදරවරුන් කිප දෙනෙක් බවත් ඒම එම තීරණ මහපොළොව තුළ ප්‍රායෝගික නොවන බවත් කවිරත්න මහත්මිය වැඩිදුරටත් සඳහන් කරයි.

මේ අතර ආණ්ඩුවේ පිරිසක් ඉදිරියේදී විපක්ෂය සමග එක්වීමට නියමිත බවත් මේ මොහොතේ හෙළි කළ නොහැකි බවත් කවිරත්න මන්ත්‍රීවරිය සඳහන් කරයි.

ඔවුන් මේ මොහොතේ විපක්ෂය සමග සාකච්ඡා කරමින් සිටින බවත් ඒවා දේශපාලන රහස් නිසාවෙන් කිසිවක් හෙළි කළ නොහැකි බවත් මන්ත්‍රීවරිය වැඩිදුරටත් සඳහන් කළාය.

රටේ පවතින ආර්ථික ප්‍රශ්නෙට පිලියමක් ලෙස නිසි නීති රීති රාමුවක් තුළ ගංජා වගාව නීතිගත කළ යුතු බවද රෝහිණී කවිරත්න මන්ත්‍රීවරිය සඳහන් කරයි.

පාර්ලිමේන්තුවේ වතමන් කතානායක මහින්ද යාපා අබේවර්ධන අපක්ෂපාතීව කටයුතු නොකරන බව ද ඇය සඳහන් කරයි.

පසුගිය විසිපස්වන දා රාති‍්‍රයේ, ටින්කරින් ලසන්ත වෙනුවෙන් පෙනී සිටින නීතීඥවරයා වන සංජය ආරියදාස, ශ‍්‍රී ලංකා නීතීඥ සංගමයේ සභාපතිවරයා වන සාලිය පිරීස් මහතා අමතා, තමන්ගේ සේවාදායකගේ ජීවිතය අනතුරක තිබෙන බව දැනුම් දී තිබේ.

පොලිසිය, ආයුද පෙන්වීමට යැයි කියමින් ටින්කරින් ලසන්ත එළියට ගෙන ගොස් ඝාතනය කිරීමේ සැලැස්මක් තිබෙන බව ඒ වන විටත් විදෙස්ගතව සිටින මාධ්‍යවේදී උවිදු කුරුකුලසූරිය ඔහුගේ ෆේස්බුක් ගිනුමේ සටහන් කර තිබුනි.

නීතීඥ සංජය ආරියදාසගෙන් පණිවිඩය ලැබුණු සැනින්, නීතීඥ සංගමයේ සභාපතිවරයා විසින් මේ බව පොලිස්පතිවරයාට ඊමේල් පණිවිඩයක් සහ කෙටි පණිවිඩයක් හරහා දැනුම් දී තිබේ.

ඊට අමතරව, නීතීඥ සංගමයේ සභාපතිවරයා මේ බව ශ‍්‍රී ලංකා මානව හිමිකම් කොමිසමේ කොමසාරිස්වරයාටත්, දකුණු පළාත් ආණ්ඩුකාර ජීවන් ත්‍යාගරාජා මහතාටත් දැනුම් දී තිබේ. මානව හිමිකම් කොමිසමේ කොමසාරිස්වරයා සහ දකුණු පළාත් ආණ්ඩුකාර ජීවන් ත්‍යාගරාජා යන දෙදෙනාම, නීතීඥ සංගමයේ සභාපතිවරයාගෙන් තමන්ට දැන ගන්නට ලැබුණු ආරංචිය පිළිබදව අදාල බළධාරීන් දැනුවත් කර තිබෙන බවද තහවුරු කර තිබේ.

එමෙන්ම ඔවුන් දෙදෙනා විසින්ම අදාල සැකකරුගේ ජීවිත ආරක්ෂාව පිළිබදව සැලකිලිමත් වන ලෙසද අදාල බලධාරීන්ගෙන් ඉල්ලා තිබේ.

එසේ තිබිය දීත්, ඊයේ උදෑසන මාධ්‍යය වාර්තා කර තිබුණේ, කලින් දා රාති‍්‍රයේ ටින්කරින් ලසන්ත යන සැකකරු පොලිසිය මගින් ආයුධ පෙන්වීම සදහා රැගෙන ගොස් ඇති බවත්, එහිදී සැකකරු පොලිසියට අත්බෝම්බ ප‍්‍රහාරයක් එල්ල කිරීමට සූදානම් වූ බවත්, එම අවස්ථාවේ දී පොලිසිය ඔහුට වෙඩි තබා ඇති බවත් ය.

පොලිස් වෙඩි පහරින් අදාල සැකකරු ජීවතක්ෂයට පත්ව ඇති බවත් ය.

-mawrata

ගණිකා වෘත්තිය නීතිගත කිරීමට එකග බව ජනතා විමුක්ති පෙරමුණේ පාර්ලිමේන්තු මන්ත්‍රිනී හරිනි අමරසූරිය සඳහන් කරයි.

ස්වාධීන රූපවාහිනී සේවයේ පැවති වැඩසටහනකදී ඇය කියා සිටියේ ස්ත‍්‍රියකගේ ශරීරය ගැන තීරණය කල යුත්තේ ඇය බවත් ඕනෑම වෘත්තීයකට ආරක්‍ෂාව ලැබිය යුතු බවත්ය.

එම වැඩසටහනට සහභාගී වූ ආණ්ඩුව නියෝජනය කරන පාර්ලිමේන්තු මන්ත්‍රීනියයන් කෝකිලා ගුණවර්ධන සහ ඩයනා ගමගේ යන මන්ත්‍රීවරියන් ද කියා සිටියේ ගණිකා වෘත්තිය නීතිගත කිරීම කළ යුතු බවකි.

රට පුරා ගෘහස්ථ ගෑස් සිලිණ්ඩර අනතුරු දිගින් දිගටම වාර්තාවීම සමග ආනයනික ගෑස් වල ප්‍රමිතිය පරීක්ෂා කිරීමට පියවර ගෙන ඇත.

මේ බව පාරිභෝගික කටයුතු රාජ්‍ය අමාත්‍ය ලසන්ත අලගියවන්න පවසා සිටියි.

මේ වන විට කොට්ටාව , පන්නිපිටිය ප්‍රදේශයේ නිවසක ගෑස් කාන්දුවක් හේතුවෙන් සිදුවූ පිපිරීමක් සම්බන්ධයෙන් පොලිස් පරීක්ෂණ ආරම්භ වී තිබේ.

පොලීසිය සඳහන් කළේ, ඉන් ජීවිත හානි සිදුව නැතත්, මුළුතැන්ගෙයි තිබූ දේපොළවලට හානි සිදුව ඇති බවයි.

සිද්ධිය වූ ස්ථානය රජයේ රස පරීක්ෂක විසින් පරීක්ෂාවට ලක්කර ඇතැයි පොලීසිය සඳහන් කළේ ය.

මෙය මෙම මාසය තුළ ගෑස් ආශ්‍රිතව සිදුවූ සිව්වන අනතුරයි. ගෑස් අනතුරු ආශ්‍රිතව ජීවිත හානි පවා වාර්තා වී ඇති බැවින් සමාජයේ දැඩි අවධානයක් මේ සම්බන්ධයෙන් යොමුව පවතී.

එසේම පහත දැක්වෙන්නේ පසුගිය සමයේ සිදුවූ ගෑස් අනතුරු සම්බන්ධයෙන් news 1st පළකල වාර්තාවකි.

තැන තැන වූ ගෑස් පිපිරිලි !

නොවැම්බර් (25)ත් ගෑස් පිපිරීමකින් සිදුවූ අනතුරක් වාර්තා විය. මේ පසුගිය මේ මාසය තුළ ගෑස් සිලින්ඩර ආශ්‍රිතව සිදුවූ සිව්වන අනතුරයි.

කොට්ටාව පන්නිපිටිය විද්‍යාල හංදිය ආසන්නයේ නිවසක අද අලුයම මෙම අනතුර සිදුවී තිබුණි.

අනතුරින් නිවසට හානි සිදුව ඇති අතර කිසිවකුටත් අනතුරක් සිදුව නොමැත.

2021 මාර්තු 03 වනදා මරදාන සංඝරාජ මාවතේ පිහිටි හෝටලයක ද ගෑස් කාන්දුවක් හේතුවෙන් පිපිරීමක් පුද්ගලයෙකු මරුට

2021 නොවැබ්මර් 04 වනදා

වැලිගම කප්පරතොට සංචාරක නවාතැන්පළක් තුළ අලුයම පිපිරීමක් . ගෑස් කාන්දුවක් බවට අනාවරණයක්.

2021 නොවැම්බර් 16 වනදා තවත් ගෑස් කාන්දුවකින් රත්නපුර බස්නැවතුම්පළ අතර ගුඩ්ශෙඩ් මාවතේ පෞද්ගලික ආහාර අලවිසැලක පිපිරීමක්

2021 නොවැම්බර් 20 වනදා කොළඹ රීඩ් මාවතේ ගොඩනැගිල්ලක පිහිටි ජාත්‍යන්තර ආහාර සැකසුම් සමාගමකට අයත් අවන්හල් පරිශ්‍රයක තවත් ගෑස් පිපිරීමක්

රජයේ රස පරීක්ෂක දෙපාර්තමේන්තුව පවසන්නේ , කොළඹ 07 සහ වැලිගම සිදුවූ අනතුරු දෙක ගෑස් කාන්දුවක් හේතුවෙන් සිදුවූ අනතුරු බවට නිගමනය කර ඇති බවයි.

කොළඹ 07 අවන්හලේ ගින්න හට ගෙන ඇත්තේ, ද්‍රව පෙට්‍රෝලියම් වායුව අවහන්හල තුළ කාන්දුවී එම අවස්ථාවේ ක්‍රියාකාරීව පැවති විදුලි උපකරණයකින් නිකුත්වූ විදුලි පුලිඟුවක් හේතුවෙන් බව නිවේදයක් නිකුත් කරමින් රජයේ රස පරීක්ෂක දෙපාර්තමේන්තුව පෙන්වා දෙයි.

පසුගිය අගෝස්තු මාසයේ මාවත විද්වත් කථිකාවට එක්වූ එවක පාරිභෝගික අධිකාරියේ විධායක අධ්‍යක්ෂවරයා ගෑස් සංයුතිය පිළිබඳව සැකයක් මතු කළේ ය.

”ගෑස් සිලින්ඩරයට SLS එකක් තියෙනවා. යකඩ සිලින්ඩරයට . ගෑස් සංයුතියට කිසිදු ප්‍රමිතියක් නැහැ. ඒ කියන්නේ කොම්පැනියට ඕනේ එකක් ඕකේ දාලා දෙන්න පුළුවන්. මෙච්චර කල් ගෑස්වල සංයුතිය තිබිලා තියෙන්නේ 20 %ක් ප්‍රොපේන්, 80% ක් බියුටේන්. ෆූවල් වැලියු එක තියෙන්නේ බියූටේන්වල. ප්‍රොපේන්වල නෙමෙයි. මේ සංයුතිය මෙච්චර කල් තිබුණා. මේ ලීටර් 18 එක දානවා කියලා කළේ, අර බියුටේන් 50% කරලා , ප්‍රොපේන් 50%කෙරුවා. ප්‍රොපේන් කියන්නේ ඉන්ඩස්ට්‍රියල් ගෑස් එකක්. ප්‍රොපේන් ඩොමස්ටික් ගෑස් එකක් නෙමෙයි. ප්‍රොපේන් කොහොමද ගෙදරක් ඇතුලේ තියා ගන්නේ. වෙන රටවල් වල මේක කරන්නේ නැහැ”

වත්මන් ආණ්ඩුවේ පාර්ශ්ව පාස්කු ප්‍රහාරය සම්බන්ධයෙන් හිටපු ජනාධිපති මෛත්‍රීපාල සිරිසේන වෙත චෝදනා එල්ල කිරීමට උත්සාහ කළත්, ජාතිකවාදී සංවිධාන ඊට වෙනස් මතයක් ගැනීම හමුවේ ආණ්ඩුව අභ්‍යන්තරයේ අර්බුදය තවත් ව්‍යාකූල විය හැකි බව දේශපාලන විචාරකයන් පවසයි.

ඔවුන් පෙන්වා දෙන්නේ ආණ්ඩුවේ බැසිල් විරෝධී පාර්ශ්ව මේ වන විට ශක්තිමත් වෙමින් ඇති බවත් ඒ හමුවේ හිතන තරම් පහසුවෙන් කටයුතු කිරීම ආණ්ඩුවට දුෂ්කර වනු ඇති බවයි.

මේ බව තහවුරු කෙරෙන පුවතක් ජාතිකවාදී සංවිධාන සමග කිට්ටුවෙන් කටයුතු කරන , ආණ්ඩුවේ අමාත්‍ය විමල් වීරවංශ හිතවාදී ලංකා ලීඩ් නිව්ස් වෙබ් අඩවිය ද පළකර ඇත.

ඒ පුවත මෙසේය.

ලංකා ලීඩ් කියන ජාතිකවාදී සංවිධාන මතය මෙන්න !

පාස්කු ප්‍රහාරයට වගකිව යුතු අයට දඬුවම් කිරීම සඳහා නව පනතක් ගෙන ඒම සම්බන්ධයෙන් ජනාධිපති තුමා සිදු කළ ප්‍රකාශය සම්බන්ධයෙන් ලංකා ලීඩ් වෙබ් අඩවිය ජාතික සංවිධානවල මතය විමසන ලදී.

ජාතික සංවිධාන එකමුතුවේ මාධ්‍යය ප්‍රකාශක, වෛද්‍යය වසන්ත බණ්ඩාර මහතාගේ අදහස්, ඔහුගේ වචන්යෙන්, “ඉස්ලාම් අන්තවාදය පිළිබඳව ඇස් කන් පියාගෙන සිටීම සම්බන්ධයෙන් හිටපු ජනාධිපතිට දේශපාලන වරදක් පැටවෙනවා.ඒ අර්ථයෙන් ගත්තහම අන්තවාදීන්ට ඇමතිකම් දීල ඔවුන්ව ඉහලට එසවීම සම්බන්ධයෙන් බැසිල් රාජපක්ෂ මහතා ඊට වඩා වග කියන්න ඕන.

අන්තවාදීන් නිදැල්ලේ සිටියදී මද්‍රසා පාසල් සියල්ල එසේම තිබියදී මෛත්‍රීගේ ප්‍රජා අයිතිය අහෝසි කළ පමණින් ප්‍රශ්නය විසඳෙන්නේ නැහැ. එයින් පටු දේශපාලන වුවමනාවක් පමණක් ඉටුකරගත හැකියි. පනතක් ගෙන එනවානම් ගෙන එන්න ඕන අපරාධ යුක්ති කොමිෂන් සභාව වගේ කොමිසමක් මගින් අන්තවාදය ප්‍රචලිත කරණ අයටත් දඬුවම් කිරීමටයි. බෝම්බ තියන්න උදව් කළ අයට පමණක් දඬුවම් කරල වැඩක් නැහැ. ඒක කරන්නේ නැතිව වෙන දේවල් කරල 69 ලක්ෂයේ ණය ගෙවන්න බැහැ.”

මෛත්‍රීට ගහන්න යන ගේම් බැසිල්ට පත්තු වෙයි!

මේ සම්බන්ධයෙන් වැඩිදුරටත් අදහස් දක්වමින් දේශපාලන විචාරකයන් පවසන්නේ වත්මන් දේශපාලන පෙළගැසීම තුළ මෛත්‍රීපාල සිරිසේන හිටපු ජනාධිපති කොටුකිරීම දුෂ්කර වනු ඇති බවයි.

සිංහල බෞද්ධ ස්වෝත්තමවාදී අදහස් පතුරමින් පොදුජන පෙරමුණ ආණ්ඩුව වෙත සිංහල බෞද්ධ හැඩය ලබාදුන් සංවිධාන බැසිල් විරෝධී ප්‍රවණතාවක් පෙන්නුම් කරන බවයි, ඒ තුළ රාජපක්ෂ කඳවුර බෙදීමක් මිස ශක්තිමත් වීමක් පෙන්නුම් නොකරන බවත් විචාරක මතය වී ඇත.

රටේ ආර්ථික විනාශය පිටුපස සිටින්නේ පී.බී ජයසුන්දර බවත් අද රටේ සිටින්නේ පී.බී ජයසුන්දර පිටුපස නැටවෙන ජනාධිපතිවරයකු සහ රටේ ඉන්නේ පී.බී ජයසුන්දරගේ ඕනෑ එපාකම් අනුව කටයුතු කරන අගමැතිවරයකු බවත් ජනතා විමුක්ති පෙරමුණේ නායක , පාර්ලිමේන්තු මන්ත්‍රී අනුර කුමාර දිසානායක චෝදනා කරයි.

පී.බීගේ එකම සුදුසුකම පවුලකට සල්ලි දෙන එක යැයිද පවුලේ අය සල්ලි ඉල්ලුවම ඔහු කොහෙන් හරි හොයා ඒ මුදල් ලබා දෙන්නේ යැයිද අනුර දිසානායක මන්ත්‍රීවරයා වැඩිදුරටත් සඳහන් කරයි.

ජවිපෙ නායක පාර්ලිමේන්තු මන්ත්‍රී අනුර කුමාර දිසානායක මේ බව සඳහන් කර සිටියේ අද (26) පාර්ලිමේන්තුවේදී අදහස් දක්වමින් ය.

විස සහිත ටීඑස්පී පොහොර ආනයනයට අවසර දුන්නේ ආණ්ඩුව බවත් මේ පිටුපස ඇතැම් ඇමැතිවරුන්ද සිටින බවත් මන්ත්‍රීවරයා මෙහිදී පැවසීය.

විස පොහොර නිදහස් කිරීමට අනුමැතිය ලබාදී ඇත්තේ ජනාධිපති ලේකම්වරයා සිටි සාකච්ඡාවකදී බවත් මෙම විස පොහොර තොගයේ ආසනික් කිලෝග්‍රෑම් එකකට මිලි ග්‍රෑම් 38ක් තිබෙන බවත් මන්ත්‍රී අනුර දිසානාක සඳහන් කළේය. ලෙඩ් කිලෝවකට මිලි ග්‍රෑම් 49ක් තිබී සොයාගත් බවද ඔහු පැවසුවේය.

මෙම ජාවාරමට සම්බන්ධවුණු ඇමතිවරුන්, නිලධාරීන් ගණනාවකගේ මල්ල තරවූ බව පැවසූ මන්ත්‍රීවරයා ආණ්ඩුවේ කාබනික විප්ලවයේ අවසන් ප්‍රතිඵලය මෙය බවද සඳහන් කළේය. මෙම පොහොර ප්‍රමිතියෙන් තොර බවද ඔහු පැවසුවේය.

කාබනික පොහොර ගැන තිබූ ඉතාමත් පැහැදිලි නිරවුල් විශ්වාසය මේ වැඩපිළිවෙළ නිසා විනාශවූ බවත් රටේ කෘෂිකර්මාන්තය මෙම අර්බුදය නිසා අගාධයකට ඇද වැටුණු බවත් ජවිපෙ නායක අනුර දිසානායක මන්ත්‍රීවරයා සඳහන් කළේය.

අනුර අලුත් කරේ විමල්ගේ චෝදනා !

මීට පෙර එනම්, මහින්ද රාජපක්ෂ ජනාධිපති සමයේ එවකට අමාත්‍යවරයකු වූ විමල් වීරවංශ ප්‍රසිද්ධියේ චෝදනා කර සිටියේ එවකට ආණ්ඩුවේ මුදල් අමාත්‍යංශයේ ලේකම් වූ පීබී ජයසුන්දර ආර්ථික ඝාතකයකු බවයි.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ එදා විමල් වීරවංශ අමාත්‍යවරයා සිදුකළ චෝදනා අද ජවිපෙ නායක අනුර කුමාර දිසානායක අලුත් කරමින් සිටින බවයි.

හිටපු ජනාධිපති මෛත්‍රීපාල සිරිසේන මහතා පාස්කු ප්‍රහාරයට සම්පූර්ණයෙන්ම වගකිවයුතු බැවින් ඔහුට එරෙහිව නීතිමය ක්‍රියාමාර්ග ගත යුතුයි යන්න තමාගේ ස්ථාවරය බව අමාත්‍ය ප්‍රසන්න රණතුංග පවසයි.

ගම්පහ දිස්ත්‍රික්කයේ ජනතාවට ජල පහසුකම් ලබාදීම වැඩි දියුණු කිරීම සඳහා යක්කල වීදියවත්ත ප්‍රදේශයේ ජල කුළුණක් ඉදි කිරීම සඳහා මුල්ගල තැබීම අද (26 )පෙරවරුවේ සිදු කෙරුණ අතර එම උත්සව සභාවෙන් අනතුරුව මාධ්‍යවේදීන් නැගූ ප්‍රශ්නයකට පිළිතුරු දෙමින් අමාත්‍යවරයා මේ බව සඳහන් කළේය.

මෙහිදී වැඩිදුරටත් අදහස් දැක්වූ අමාත්‍ය ප්‍රසන්න රණතුංග මෙසේද පැවසීය.

මම ශ්‍රී ලංකා නිදහස් පක්ෂයත් එක්ක තරහ කෙනෙක් නෙවෙයි. ශ්‍රී ලංකා නිදහස් පක්ෂය තමයි අපේ ආරම්භය. ඒ නිසා ශ්‍රී ලංකා නිදහස් පක්ෂයට ඒ ගෞරවය දෙනවා. නමුත් පසුගිය කාලයේ ශ්‍රී ලංකා නිදහස් පක්ෂය මෙහෙයවපු පුද්ගලයන් පිළිබඳව අපට ගැටලුවක් තියෙනවා. ඒ නිසා තමයි පසුගිය පාර්ලිමේන්තු මැතිවරණයේදී මම කිව්වේ ශ්‍රී ලංකා නිදහස් පක්ෂයට ගෑවිච්ච එකෙකුට ඡන්දෙ දෙන්න එපා කියලා. හිටපු ජනාධිපති මෛත්‍රීපාල සිරිසේන පක්ෂය විනාශ කලා.

ඒගොල්ලො අද මේ ආණ්ඩුවත් විනාශ කරන්න හදන්නේ. පාස්කු ප්‍රහාරයට හිටපු ජනාධිපතිවරයා සම්පූර්ණයෙන්ම වග කියන්න ඕනේ. හැමදාම එතුමාට විරුද්ධව ක්‍රියාත්මක වෙන්න ඕනේ කියන තැන ඉඳගෙන මම කතා කරනවා. පසුගිය කාලයේ ශ්‍රී ලංකා නිදහස් පක්ෂ මන්ත්‍රීවරු එළියෙ කතා කරන දේවල් අපි අහගෙන හිටියා.

හැමදාම කටවහගෙන ඉන්න බැහැ. ඒ කියන දේවල් වලට උත්තර දෙනකොට සමහර අයට රිදෙනවා. එහෙම රිදෙන කොට ඒගොල්ලො කියන දේවල් වලට වඩා ගොඩක් දේවල් අපිට කියන්න වෙයි.

මම හැමදාම මගේ මතය කියපු කෙනෙක්. ආණ්ඩුව හැටියට ශක්තිමත්ව ඉදිරියට යන්න නම් සෘජු තීරණ වලට යන්න ඕනේ. ආණ්ඩුව ඇතුළේ කවුරුහරි ඉන්න බැරි කෙනෙක් ඉන්නවනම් ඇතුලේ ඉඳගෙන සියලු වරප්‍රසාද අරගෙන බොරුවට කෑ ගහන්නේ නැතුව එලියට යන්න පුළුවන්.එහෙම නැත්නම් ආණ්ඩුවත් එක්ක සාමූහික වගකීම ආරක්ෂා කරගෙන කටයුතු කරන්න ඕනේ.

ආණ්ඩුවක් ගෙනියන්න තුනෙන් දෙකේ බලයක් අවශ්‍ය නැහැ. චන්ද්‍රිකා මැතිනිය ආණ්ඩුවක් ගෙනිච්චා එක මන්ත්‍රී කෙනෙක්ගෙන්. යන අය ඔක්කොම එළියට ගියත් අපිට ආණ්ඩුව ගෙනියන්න පුළුවන්.

පදනම් විරහිත චෝදනා හේතුවෙන් චීන පොහොර නැව දින් 70ක් තිස්සේ ලංකා මුහුදේ නවතා ඇති බවත්, මේ තත්ත්වය හේතුවෙන් දුකේදීත් සැපේදීත් ළග සිටි චීන මිතුරා මේ වනවිට වරසකයෙන් සිටින බවත් රාජ්‍ය අමාත්‍ය ශෂීන්ද්‍ර රාජපක්ෂ පැවසීය.

අද(26) පාර්ලිමේන්තුවේදී විශේෂ ප්‍රකාශයක් කරමින් රාජ්‍ය අමාත්‍යවරයා කියා සිටියේ චීනය ඔවුන්ගේ වේදනාව අපට හඩ ගා කියන බවකි.

මේ සදහා පක්ෂ විපක්ෂ මාධ්‍ය වග කිව යුතු බවද ඔහු පැවසීය.

මහින්දානන්ද අලුත්ගමගේ වෙනම මතයක ?

කෙසේ වුවත් පසුගිය අවස්ථා කිහිපයකදි අදහස් දක්වමින් කෘෂිකර්ම අමාත්‍ය මහින්දානන්ද අලුත්ගමගේ සඳහන් කර සිටියේ , පර්‍යේෂණ වලදි දෙවරක් අසමත් වූ මෙකී පොහොර කිසිසේත් මෙරට ගොඩබෑමට අවස්ථාව නොදෙන බවයි.

ඒ වෙනුවට නැවත හැරීගොස් , සාම්පල පරීක්ෂණ වලින් සමත් වියහැකි පොහොර තොග සැපයීම සිදුකළ යුතු බවත් ය.

සාම්පල් පරීක්ෂණයට පෙර LC විවෘත කරලා !

එසේම මේ වන විට පක්ෂ විපක්ෂ සහ මාධ්‍ය අසන පොදු ප්‍රශ්නයක් වී ඇත්තේ , අදාළ පොහොර සාම්පල පරීක්ෂණ කිරීමට පෙර බැංකු ණයකර ලිපි විවෘත කළේ ඇයිද යන්නයි.

ශ්‍රී ලංකාව මේ වන විට මුහුණ දී සිටින විදේශ විනිමය අර්බුදය හේතුවෙන් ජාත්‍යන්තර මූල්‍ය අරමුදලට සමග එකඟතාවයට පැමිණීම හැර වෙනත් විකල්ප නැති බව, හිටපු අග්‍රාමාත්‍ය , එක්සත් ජාතික පක්ෂ නායක පාර්ලිමේන්තු මන්ත්‍රී රනිල් වික්‍රමසිංහ සඳහන් කරයි.

හිටපු අග්‍රාමාත්‍යවරයා මෙම අදහස් පල කරන ලද්දේ එක්සත් ජාතික පක්‍ෂ ප‍්‍රධානීන් සමග අන්තර්ජාලය ඔස්සේ පැවති සාකච්ඡාවකදී ය.

ජාත්‍යන්තර මූල්‍ය අරමුදල සමග එකඟතාවකට පැමිණියහොත් අනෙකුත් ජාත්‍යන්තර මුල්‍ය ආයතන වෙතින් ද ණය පහසුකම් ලබා ගැනීමට හැකිවනු ඇතැයිද එහිදී ඔහු පැවසීය.

ජාත්‍යයන්තර මූල්‍ය අරමුදල සමග ගනුදෙනු කිරීම සෙසු මූල්‍ය ආයතනවලින් ණය ලබා ගැනීමට සහතිකයක් වනු ඇති බවද ඔහු පෙන්වා දෙයි.

එළැඹෙන වසර මැද භාගය වන විට ශ්‍රී ලංකාව ඩොලර් බිලියන 6 ක පමණ ණය මුදලක් ගෙවීමට ඇති නිසා ජාත්‍යන්තර මුල්‍ය අරමුදල වෙත යාම හැර වෙනත් විකල්පයක් ශ්‍රී ලංකාවට නැතැයි ද ඔහු කියා සිටියි.

ජාත්‍යන්තර මූල්‍ය අරමුදල සමග එකඟතාවකට පැමිණියහොත් ඇමරිකානු ඩොලරයක් රුපියල් 240 සීමාවේ පමණ තබා ගත හැකි වනු ඇති බවත් එසේ නො කළහොත් ඩොලරය රුපියල් 300 පමණ ඉක්මවනු ඇති බවත් ඔහු තව දුරටත් පැවසීය.

කෙරවලපිටිය යුගදනවි බලාගාරය හිමි සමාගමේ රජය සතු කොටස් අමෙරිකානු සමාගමක් වෙත පැවරීමට අමාත්‍ය මණ්ඩලය විසින් ගෙන තිබෙන තීරණය සහ ගෑස් සැපයීමේ ඒකාධිකාරය අදාළ ඇමරිකානු සමාගම වෙත පැවරීමට ගෙන තිබෙන තීරණය බලරහිත කිරීමේ නියෝගයක් නිකුත් කරන්නැයි ඉල්ලා ගොනු කර තිබෙන මූලික අයිතිවාසිකම් පෙත්සම් සලකා බැලීම සඳහා පංච පුද්ගල ශ්‍රේෂ්ඨාධිකරණ විනිසුරු මඩුල්ලක් නම් කර තිබේ.

එම දැනුම් දීම සිදුකර ඇත්තේ අදාළ පෙත්සම් අද (26) මුර්දු ප්‍රනාන්දු, ගාමිණී අමරසේකර සහ අර්ජුන ඔබේසේකර යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැඳවනු ලැබූ අවස්ථාවේදීය.

අදාළ පෙත්සම් ලබන සඳුදා (29) අගවිනිසුරු ජයන්ත ජයසූරිය, බුවනෙක අලුවිහාරේ, ප්‍රියන්ත ජයවර්ධන, විජිත් මළල්ගොඩ සහ එල්.ටී.බී දෙහිදෙණිය යන පංච පුද්ගල විනිසුරු මඩුල්ල හමුවේ කැඳවීමට නියමිතය.

එම පෙත්සම්වල වගඋත්තරකරුවන් කර සිටින අග්‍රාමාත්‍ය මහින්ද රාජපක්ෂ ඇතුළු අමාත්‍ය මණ්ඩලයේ සාමාජිකයින් වෙනුවෙන් නීතිපතිවරයා පෙනී සිටියද එම අමාත්‍ය මණ්ඩලයේ සාමාජිකයින් වශයෙන් කටයුතු කරන විමල් වීරවංශ, වාසුදේව නානායක්කාර සහ උදය ගම්මන්පිල වෙනුවෙන් පෙනී සිටීම සඳහා පෞද්ගලික නීතිඥවරයෙකු ඉදිරිපත් කර තිබිණි.

උක්ත ඇමතිවරු තිදෙනා වෙනුවෙන් තමන් පෙනී නොසිටින බව අද අධිකරණයට දැනුම් දී ඇත.

පූජ්‍ය ඇල්ලේ ගුණවංශ හිමියන් හා කාදිනල් අතිඋතුම් මැල්කම් රංජිත් හිමිපාණන්, ජනතා විමුක්ති පෙරමුණේ හිටපු පාර්ලිමේන්තු මන්ත්‍රීවරුන් වන සුනිල් හඳුන්නෙත්ති සහ වසන්ත සමරසිංහ, සමගි ජන බලවේගයේ මහලේකම් පාර්ලිමේන්තු මන්ත්‍රී රංජිත් මද්දුම බණ්ඩාර යන පාර්ශව විසින් අදාළ පෙත්සම් ඉදිරිපත් කර තිබුණි.

එම පෙත්සම්වල වගඋත්තරකරුවන් ලෙස මහින්ද රාජපක්ෂ ඇතුළු අමාත්‍ය මණ්ඩලයට අමතරව යුගදනවි බලාගාරය හිමි වෙස්ට් කොස්ට් පවර් ප්‍රයිවට් ලිමිටඩ්, එම සමාගමේ කොටස් පවරනු ලැබූ අමෙරිකානු සමාගම වන නිව් ෆෝට්රස් එනර්ජි සමාගම සහ නීතිපතිවරයා ඇතුළු පිරිසක් නම් කර සිටී.

පෙත්සම්කරුවන් කියා සිටින්නේ, කෙරවලපිටිය යුගදනවි බලාගාරය අයත් සමාගමේ ශ්‍රී ලංකා රජයට අයත් කොටස්වලින් 40%ක් වගඋත්තරකාර අමෙරිකානු සමාගම වෙත පැවරීමට අමාත්‍ය මණ්ඩලය ගනු ලැබූ තීරණය යුක්ති සහගත නොවන බවය.

එම තීරණය ගැනීමට පෙර ජාතික ආර්ථිකය හා ජාතික ආරක්ෂාව වැනි කරුණු කෙරෙහි අවධානය යොමු කිරීමට වග උත්තරකාර අමාත්‍ය මණ්ඩලය අසමත් වී ඇති බවද ඔවුන් චෝදනා කරයි.

එමෙන්ම අදාළ කොටස් පැවරීමේ ක්‍රියාවලිය හරහා මෙරට ගෑස් නිෂ්පාදනයේ ඒකාධිකාරය වගඋත්තරකාර අමෙරිකානු සමාගම වෙත පවරා දී තිබෙන බව පෙන්වා දෙන පෙත්සම්කරු මෙම කොටස් පැවරීමේ දී විධිමත් ටෙන්ඩර් පටිපාටි අනුගමනය කර නොමැති බවද සඳහන් කරයි.

මේ හරහා අදාළ කොටස් පැවරීමේ ක්‍රියාවලිය තුළ පවතින පාරදෘශ්‍ය භාවය පිළිබඳව බරපතළ ගැටලු මතුවී තිබෙන බව ඔවූහු පෙන්වා දෙති.

එබැවින් අමාත්‍ය මණ්ඩලය විසින් කිසිදු සාධාරණ කරුණු අධ්‍යයනයකින් තොරව අදාළ කොටස් පැවරීමට ගනු ලැබූ තීරණය තුළින් රටේ මහජනතාවගේ මූලික අයිතීන් උල්ලංඝනය වන බවට තීන්දුවක් ලබාදෙන ලෙස පෙත්සම්කරුවන් ශ්‍රේෂ්ඨාධිකරණයෙන් ඉල්ලා සිටී.

එමෙන්ම යුගදනවි බලාගාරයේ සතු රජයේ කොටස් පැවරීමට අමාත්‍ය මණ්ඩලය ලැබූ තීරණය බලරහිත කිරිමේ ආඥාවක් නිකුත් කරන ඔවුන් අධිකරණයෙන් ඉල්ලා සිටී.

අධ්‍යාපන අමාත්‍යාංශයේ අතිරේක ලේකම් එල්. එම් . ඩී ධර්මසේන මහතා නව විභාග කොමසාරිස් ජනරාල් ලෙස පත් කර තිබේ.

ඔහු මේ වනවිට අධ්‍යාපන අමාත්‍යංශයේ අතිරේක ලේකම්වරයෙකු ලෙස කටයුතු කරයි.

මෙතෙක්  විභාග කොමසාරිස් ජනරාල් තනතුරේ සේවය කළ  සනත් පූජිත  අද  සිට ක්‍රියාත්මක වන පරිදි  සිය ධුරයෙන් විශ්‍රාම ගොස් ඇතැයි ද වාර්තා වෙයි.

තවත් කොරෝනා මරණ 27 ක් වාර්තා වීමත් සමග මෙරට සමස්ත කොරෝනා මරණ සංඛ්‍යාව 14,232 ක් දක්වා ඉහළ ගියේ ය.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 19 දෙනෙකු පිරිමි පුද්ගලයින් වන අතර ඉතිරි 08 දෙනා කාන්තා ආසාදිතයින් ය.

මියගිය අනෙක් පිරිස අතර වයස අවුරුදු 30 – 59 ත් අතර වයසේ පසුවන ආසාදිතයින් 07 දෙනෙකු සිටින අතර ඉතිරි ආසාදිතයින් 20 දෙනා වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (25) වාර්තා කරන ලද මෙම මරණ 27 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි