V2025

පුවත්

ස්වයංපෝෂිත කතා පැත්තක : සහල් ආනයනයට කැබිනට් අනුමැතිය !

පොන්නි සම්බා සහල් මෙට්‍රික් ටොන් ලක්ෂයක් විදේශයන්ගෙන් මෙරටට ආනයනයට කැබිනට් අනුමැතිය හිමිව ඇත.

ඒ සඳහා වන කැබිනට් පත්‍රිකාව ඉදිරිපත් කර ඇත්තේ  වෙළෙඳ අමාත්‍ය බන්දුල ගුණවර්ධනය.ආනයන සීමා කිරීමට කියමින් ආණ්ඩුව කහ පවා ආනයනය නැවැත්වූ  අතර එහිදී සඳහන් කර සිටියේ රට ස්වයංපෝෂිත කරන බවයි. 

මේ වන විට කෘෂිකර්මය කාබනික පොහොර වෙත යොමුකරන බව පවසමින් රසායනික පොහොර ආනයනය ද  නවතා ඇත. ඊට හේතු ලෙස කියනු ලැබුවේ වකුගඩු රෝග ඇතුළු රසායනික ද්‍රව්‍ය හේතුවෙන් සෞඛ්‍ය ප්‍රශ්න ඇතිවීම වලක්වන්නට කියාය.

දැන් ප්‍රශ්නය මේ ආනයනය කිරීමට යන සහල් කාබනික පොහොර භාවිතය හරහා සිදුකළ ගොවිතැන් මඟින් ලබාගත් ඒවාද යන්නය.

අනෙක් අතට මතුව ඇති පොහොර අර්බුදය නිසා මෙවර අනිවාර්යයෙන් අස්වනු අඩු වනු ඇති අතර එවිටත් සහල් ආනයනය කිරීමට සිදුවෙයි. ඒ ආනයනය කරන සහල් ද සකසා ඇත්තේ රසායනික ද්‍රව්‍ය භාවිතයෙන් ද  නැද්ද යන ගැටළුව මතුවෙයි.

ඒ අනුව මේ ආණ්ඩුවේ සිස්ටම් හැදීම  කොහොමද කියනවා නම්, ආහාර ස්වයංපෝෂිත බවත් , කාබනික ගොවිතැන ආශ්‍රිත ආහාර යන්න වෙනුවට එහි ප්‍රතිවිරෝධය ජනතාව වෙත පැමිණෙමින් තිබේ.

අගමැති - මැණික්,ස්වර්ණාභර්ණ අපනයනකරුවන් හමුවේ

මැණික් හා ස්වර්ණාභරණ අපනයනකරුවන් මුහුණ දෙන ගැටලු විසදීමට රජය අවධානය යොමු කරන බව අගමැති මහින්ද රාජපක්ෂ  අද (21) පැවසීය.

ඔහු මෙසේ පැවසුවේ මැණික් හා ස්වර්ණාභරණ අපනයනකරුවන් මුහුණ දෙන ගැටලු සම්බන්ධයෙන් එම අපනයන කරුවන් පිරිසක් සමග අරලියගහ මන්දිරයේදී අද (21)පැවති සාකච්ඡාවකදීය.

අපනයන විනිමය වර්ධනය කිරීම සඳහා සංචාරක ක්ෂේත්‍රය මෙන්ම මැණික් හා ස්වර්ණාභරණ අංශයද සැලකිය යුතු දායකත්වයක් ලබා දිය යුතු බව අගමැතිවරයා මෙහිදී පෙන්වා දුන්නේය.

මැණික් හා ස්වර්ණාභරණ අපනයනකරුවන් සඳහා සියලු පහසුකම් දැනටමත් ලබා දී ඇති බවත් අපනයනකරුවන්ගේ අලවිය මත පදනම්වූ ආදායම් බදු මෙරටදී විදේශ මුදල් භාවිතා කෙරෙන අවස්ථාවලදී නිදහස් කිරීම කෙරෙහිද අවධානය යොමු කර ඇති බවත් මහින්ද රාජපක්ෂ  පැවසීය.

මෙරට මැණික් හා ස්වර්ණාභරණ ක්ෂේත්‍රය ලෝ පුරා වඩාත් ප්‍රචලිත කිරීම කෙරෙහි ගත යුතු ක්‍රියාමාර්ග සම්බන්ධයෙන්ද මෙහිදී අගමැතිවරයාගේ අවධානය යොමු විය.

මහින්ද රාජපක්ෂ = ජනාධිපතිවරයා වශයෙන් සිටියදී 2015 වර්ෂයේ දී තමන්ට ලබා දුන් සහන පසුගිය රජය අහෝසි කළ බවත් අපනයනය කෙරෙහි සෘජුව බලපාන එම සහන යළි ලබාදෙන ලෙස ඉල්ලා සිටින බවත් මැණික් හා ස්වර්ණාභරණ අපනයනකරුවෝ පිරිසක් මෙහිදී අගමැතිවරයාගෙන් ඉල්ලා සිටියහ .

අයවැය මගින් අපනයනකරුවන් සඳහා දැනටමත් සහන ලබාදී දී ඇති බවට මෙහිදී පෙන්වා දුන් අගමැතිවරයා එම හන ප්‍රායෝගිකව ක්‍රියාත්මක වන්නේදැයි අවධානය යොමු කරන ලෙස අදාළ නිලධාරීන්ට උපදෙස් දුන්නේය .

විවෘත විශ්වවිද්‍යාලයට උපකුලපති පත්කර ගැනීමත් අවුල් කරගෙන !

ලංකා විවෘත විශ්වවිද්‍යාලය සඳහා නව උපකුලපතිවරයකු පත්කිරීම අර්බුදයට පත්ව ඇති බව වාර්තා වෙයි.

ජාතික ජනබලවේගය නිකුත්කර ඇති නිවේදනයක දැක්වෙන්නේ පුරප්පාඩු වන උපකුලපති ධුරය සඳහා විශ්වවිද්‍යාල ප්‍රතිපාදන කොමිෂන් සභාව විසින් ඉදිරිපත් කරන ලද අපේක්ෂකයින්ගේ ලැයිස්තුව අත්තනෝමතික ලෙස ජනාධිපතිවරයා විසින් ප්‍රතික්ෂේප කරනු ලැබුණු නිසා මේ අර්බුදය මතුව ඇති බවයි.

ඒ සම්බන්ධව ජාතික ජනබලවේගය පක්ෂය නිකුත්කළ නිවේදනය පහත දැක්වෙයි.

නව උපකුලපතිවරයෙකු පත් කිරීම සම්බන්ධයෙන් ශ්‍රී ලංකා විවෘත විශ්වවිද්‍යාලයේ මතුවී ඇති අර්බුදය පිළිබඳව ජාතික ජන බලවේගය දැඩි අවධානයෙන් සිටී.  මෙම තත්වය පැන නැගී ඇත්තේ ජුනි 23 වැනි දින පුරප්පාඩු වන උපකුලපති ධුරය සඳහා විශ්වවිද්‍යාල ප්‍රතිපාදන කොමිෂන් සභාව විසින් ඉදිරිපත් කරන ලද අපේක්ෂකයින්ගේ ලැයිස්තුව අත්තනෝමතික ලෙස ජනාධිපතිවරයා විසින් ප්‍රතික්ෂේප කරනු ලැබ ඇති බැවිනි.  2020 මැයි 04 වැනි දින විශ්වවිද්‍යාල ප්‍රතිපාදන කොමිෂන් සභාවේ චක්‍රලේඛ අංක 02/2020 හි නියම කර ඇති පරිදි පියවර දෙකක තේරීමේ ක්‍රියාවලියකින් පසුව මෙම කෙටි ලැයිස්තුව සකස් කරනු ලැබ තිබුණි. උත්ප‍්‍රාසාත්මක ලෙස, ජනාධිපතිවරයාගේ අත්තනෝමතික කි‍්‍රයාවෙන් ඇඟවෙන්නේ ඔහුගේ ආණ්ඩුව විසින් හඳුන්වා දුන් ක්‍රමයක් කෙරෙහි ඔහුටම විශ්වාසයක් නොමැති බවයි.  ඊට අමතරව, ජනාධිපතිවරයාගේ ක්‍රියාවන් විශ්වවිද්‍යාල කවුන්සිලයේ ස්වාධිපත්‍යය සහ අධිකාරයද ප්‍රශ්න කෙරේ. ආයතනය පාලනය කිරීමේ වගකීම පැවරී ඇති ඉහළම ආයතනය ලෙස අවසාන කෙටි ලැයිස්තුව තෝරාගෙන එය විශ්වවිද්‍යාල ප්‍රතිපාදන කොමිෂන් සභාව වෙත යොමු කරනු ලබන්නේ  විශ්වවිද්‍යාල කවුන්සිලය විසිනි.

මෙම අත්තනෝමතික ක්‍රියාව මගින් 1978 විශ්වවිද්‍යාල පනතේ හරය උල්ලංඝනය වන අතර එහි පැහැදිලිවම සඳහන් වන්නේ විශ්වවිද්‍යාල ප්‍රතිපාදන කොමිෂන් සභාව විසින් තමා වෙත ඉදිරිපත් කරන ලද නම් තුනෙන් එකක් තෝරා ගැනීම ජනාධිපතිවරයාගේ යුතුකම බවයි. නැවත තේරීමේ ක්‍රියාවලිය නැවැත්වීමට විශ්වවිද්‍යාල ප්‍රජාව විසින් කරන ලද ඉල්ලීම්වලට ජාතික ජන බලවේගය වශයෙන් අපි සහාය දෙන අතර, අත්‍යවශ්‍ය උසස් අධ්‍යාපන ආයතනයක් තවදුරටත් අර්බුදයකට ඇද වැටීමට මඟ නොසලසමින්, ස්ථාපිත පාලන මූලධර්මවලට ගරු කරන ලෙසත්, දැනටමත් පවතින කෙටි ලැයිස්තුවෙන් වහාම ශ්‍රී ලංකාවේ විවෘත විශ්වවිද්‍යාලයට උපකුලපතිවරයෙකු පත් කරන ලෙසත් ජනාධිපතිවරයාගෙන් ඉල්ලා සිටිමු.  මෙම අත්තනෝමතික ක්‍රියාමාර්ගය මගින් අද පැන නැගී ඇති රටේ වැදගත් තනතුරු සඳහා පත්වීම් සම්පුර්ණයෙන්ම දේශපාලනීකරණය කිරීම පිළිබිඹු කරන බව ජාතික ජන බලවේගය තවදුරටත් සඳහන් කරයි. මෙය, විධායකය විසින් වැදගත් රාජ්‍ය ආයතනවල ස්වාධීනත්වයට සහ ස්වාධිපත්‍යයට මැදිහත් වෙමින් ඒවා අඩපණ කරන ආකාරය පිළිබඳ තවත් උදාහරණයක් බව අපි විශ්වාස කරමු. 

රට විවිධ අභියෝගයන්ට මුහුණ දෙන මෙවැනි කාලයකදී, අපගේ රාජ්‍ය ආයතන මෙහෙයවිය යුත්තේ දක්ෂ, ඉහළ සුදුසුකම් ඇති සහ දේශපාලනික වශයෙන් පක්ෂග්‍රාහී නොවන පුද්ගලයින් විසිනි.  

කෙසේ වෙතත්, මෙම අත්තනෝමතික ප්‍රතික්ෂේප කිරීම මගින් උද්ගත වන පණිවිඩය දැඩි බලපෑමක් ඇති කරනු ඇත. එය සුදුසුකම් ලත් සහ දේශපාලනික වශයෙන් මධ්‍යස්ථ අපේක්ෂකයින් වැදගත් රාජ්‍ය තනතුරු සඳහා ඉල්ලුම් කිරීම අධෛර්යමත් කරනු ඇත. මෙබඳු ක්‍රියාවන් රට තුළ දැනට පවතින විවිධ අර්බුද විසඳීමට කිසිසේත්ම හිතකර නොවන අතර, රට තුළ අස්ථාවරත්වය සහ අවුල් සහගත හැඟීම උග්‍ර කරවයි. රජයේ ආයතන කෙරෙහි ඇති විශ්වාසය බිඳ වැටෙන හා දුර්වල කරන ක්‍රියාවලින් වැළකී සිටින ලෙස අපි ජනාධිපතිවරයා සහ ආණ්ඩුවේ අනෙකුත් වගකිවයුතු සාමාජිකයින්ගෙන් ඉල්ලා සිටිමු.

ජාතික ජන බලවේගය

2021. ජුනි 21 දින

ගිලුණු නැව වටා විෂ රසායන තට්ටුවක් !

ශ්‍රී ලංකාව ආසන්න මුහුදේ හානියට පත් බහාලුම් නෞකාව වන එම්වී එක්ස්ප්‍රස් පර්ල් හි බහාලුම වටා විෂ රසායනික තට්ටු දිස්වන බවත් ඒවා තෙල් තට්ටුදැයි පැහැදිලිනොවන නමුත් කිසියම් රසායනිකයක් බවත් පාරිසරික හා සමුද්‍ර ජීව විද්‍යාඥ රනිල් නානායක්කාර අදහස් දක්වා තිබේ.

නෞකාව විනාශ වී මුහුදේ ගිළී කොටසක් මතුපිටට පෙනෙමින් තිබෙන අතර සිදුවීමෙන් අනතුරව ඉන් සාගරයට එකතු වූ විෂ රසායනික ද්‍රව්‍ය හේතුවෙන් නැගෙනහිර වෙරළ තීරයේ යාපනය දක්වා වෙරළට මිය ගිය මුහුදු ජීවින්ගේ සිරුරු මේ වනවිට ගොඩගසමින් තිබේ. මේ දක්වා කැස්බෑවුන් 50කට අධික ප්‍රමාණක්ද, ඩොල්පින්, තල්මසුන් ඇතුළු තවත් මුහුදු ජීවීන් විශාල ප්‍රමාණයක්ද වෙරළට ගොඩගසමින් තිබේ.

“ශ්‍රී ලංකාවේ දරුණුතම සාගර පාරිසරික ව්‍යසනය” මෙය බවත් පවසන සමුද්‍ර ජීව විද්‍යාඥ රනිල් නානායක්කාර මහතා වැඩිදුරටත් මෙලෙස පවසයි.

“තොරතුරු හා දර්ශන වලට අනුව, රසායන කාන්දු වීමක් ඇති බව මට පෙනෙනවා. මා විශ්ලේෂණය කරන විට ජලය කොළ පැහැති කහ පැහැයට සමාන බැවින් රසායනික දූෂණයක් සේ පෙනේ. සාමාන්‍යයෙන් එවැනි පැහැයක් දිස්වන්නේ රසායනික දූෂණයක් ඇති විට පමණි මීට පෙර අපට අනාවරණය වූයේ එය ‘නයිට්‍රික් අම්ලය’ බවත්, ‘නයිට්‍රික් අම්ලය’ කාන්දු වීම නිසා ජලයේ එවැනි පැහැයක් ඇතිවීමට ඉඩ ඇති බවත් ය. තවත් හැකියාවක් තිබෙනවා විවිධ රසායනික ද්‍රව්‍ය මිශ්‍ර වූ විට ඇල්ගී ඇල්ගී පිහාටු වල අසමතුලිතතාවයක් පැවතිය හැකියි. තෙල් කාන්දුවක් ඇති බවට අපට 100% ක් සහතික විය නොහැකියි. මේ දක්වා ලැබී ඇති දර්ශනවල තෙල් කාන්දුවක් නොපෙන්වයි.” යනුවෙනි.

(lanka truth) 

(ජායාරූපය පුවත සඳහා අන්තර්ජාලයෙන් ලබාගත්තකි.  )

ලැජ්ජයි : මහ බැංකු වාර්තාවෙන් සංචිත හලයි !

රජය පසුගිය සතියේ සිට රටේ තුළ පවතින සංචිත ප්‍රමාණය ශ්‍රී ලංකා මහ බැංකු වාර්තාවෙන් ඉවත් කර ඇති බව සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා පවසයි.

මාධ්‍ය හමුවකට එක්වෙමින් මන්ත්‍රීවරයා සඳහන් කරන ලද්දේ දිනෙන් දින ශීඝ්‍රයෙන් පහත වැටෙන මෙරට සංචිත පිළිබඳ තොරතුරු මෙලෙස සැඟවීමෙන් රටේ ආර්ථික අර්බුදය වසන් කළ නොහැකි බවයි.

‘ආණ්ඩුව ගිය සතියේ ඉඳලා සංචිත තිබෙන ප්‍රමාණය මහ බැංකු වාර්තාවේ දැන්වීමෙන් ඉවත් කරලා. ආණ්ඩුව ලැජ්ජාවිය යුතුයි. මේ විදිහට කොච්චර කල් රවට්ටන්න පුළුවන් කියලද හිතන්නේ. මැයි මාසයේ සංචිත තිබුණේ ඩොලර් මිලියන හාරදාස් දහඅටයි. එයින් රත්තරන් අයින් කළාහම ඩොලර් මිලියන තුන්දාස් පන්සීය තිහයි.

මහබැංකු වාර්තාවට අනුව ඉදිරි මාස දොළහට සංචිතවල අවශ්‍යතාවය ඩොලර් මිලියන අටදාහකට ආසන්න වෙනවා. එය රජය විසින් ගෙවිය යුතු ණය, හුවමාරු ණය සහ පෞද්ගලික අංශයෙන් ගෙවිය යුතු ණය වශයෙන්.

රජයට මේ මාසයේ ඩොලර් මිලියන දහඅටක් ගෙවන්න තියෙනවා. ජූලි ඩොලර් මිලියන එක්දාස් දෙසිය විසිඅටක්
ගෙවන්න තියෙනවා. අගෝස්තුවේදී මිලියන එකසිය පනස් අටක්. සම්පූර්ණ ඩොලර් මිලියන දෙදාස් තිස්හතරක්
තියෙනවා. ඒ ආණ්ඩුවට විතරක් ඉදිරි මාස හය සඳහා ගෙවීමට ඇති ණය පමණයි. ඉන්පසු සාමාන්‍ය ව්‍යාපෘති
ණය තිබෙනවා. ඒවායේ එකතුව ඩොලර් මිලියන දෙදාස් හයසිය තිහක් විතර වෙනවා. නමුත් අතේ තිබෙන්නේ
තුන්දාස් පන්සීය ගණනක්.’

(මව්රට )

කොරෝනා ඩෙල්ටා ප්‍රභේදය ගැන විශේෂ නිවේදනයක් !

ඉන්දියාවේ වේගයෙන් ව්‍යාප්ත වූ කොරෝනා ඩෙල්ටා ප්‍රභේදය ශ්‍රී ලංකාවේ පැතිරීගෙන යාමේ දැඩි අවදානමක් ඇති බව සෞඛ්‍ය ප්‍රවර්ධන කාර්යාංශය පවසයි.

ඒ හේතුවෙන් එය ආසාදනයෙන් වැලකීමට ගත යුතු අත්‍යවශ්‍ය පියවර කිහිපයක් ඔවුන් නිවේදනය කරයි.

එම සම්පූර්ණ නිවේදනය මෙසේය.

පසුගිය දිනකදී ශ්‍රී ලංකාව තුළ, ඉන්දියාව පුරා වේගයෙන් පැතිර ගිය, කොවිඩ් වෛරසයේ ඩෙල්ටා ප්‍රභේදය හඳුනාගැනීම බොහෝ දුරට කතාබහට ලක්වුණා. මෙතෙක් ලංකාවේ පැවති ප්‍රභේද වලට වඩා සීඝ්‍රයෙන් ව්‍යාප්ත විය හැකි විභවතාවයක් පවතින මෙම ඩෙල්ටා ප්‍රභේදය සොයා ගැනීමත් සමග covid පැතිරීම තීව්‍ර දීමේ අවධානමක් ඇතිවෙනවා. එසේ සිදු නොවීමට නම් අප අත්‍යාවශ්‍යයෙන්ම ගත යුතු පියවර කිහිපයක් තිබෙනවා.

අනික් සෑම ප්‍රභේදයක් ම වගේම ඩෙල්ටා ප්‍රභේදයේ පැතිරයාම අවම කිරීමටත් ඉතාමත්ම තීරණාත්මක සාධකය වන්නේ අප විසින් හැකිතාක් අවදානම් අවස්ථා මග හැරීමයි.

1. සෙනග වැඩියෙන් ගැවසෙන ස්ථාන
2. ජනෙල් දොරවල් වසා ඇති හොඳ වාතාශ්‍රයක් නොලැබෙන අවකාශ
3. මිනිසුන් එකිනෙකා ආසන්නයේ ගැවසීමට සිදුවන ස්ථාන
එවැනි අවදානම් ස්ථාන අතරින් ප්‍රධාන වනවා.

ඩෙල්ටා ප්‍රභේදය නිසා ඇතිවිය හැකි අධි වසංගත තත්ත්වයකට රට ගමන් නොකිරීමට නම් වඩාත්ම වැදගත් වන්නේ මෙවැනි ස්ථාන මගහැර සිටීමයි.

යම්කිසි නොවැලැක්විය හැකි හේතුවක් නිසා මෙවැනි ස්ථානයකට යෑමට සිදු වුවහොත්, සියලු ආරක්ෂක පිළිවෙත් අකුරටම ක්‍රියාත්මක කිරීම මත කෙනකුගේ ආරක්ෂාව තීරණය වෙනවා.

1. නිවැරදි පරිදි මුඛ ආවරණ පැළඳීම
2. දෑත් පිරිසිදුව තබා ගැනීම
3. එකිනෙකා අතරේ අවම වශයෙන් මීටර් දෙකක වත් දුර පවත්වා ගැනීම
මේ අතරින් ඉතා වැදගත් වනවා

ඔබට යම් හෙයකින් උණ සෙම්ප්‍රතිශ්‍යා කැස්ස වැනි රෝග ලක්ෂණ කිසිවක් පවතී නම් ප්‍රතිකාර ලබා ගැනීමට මිස වෙන කිසිම දෙයකට නිවසෙන් පිට නොවීමත් වැදගත්. මෙය ඔබගේ සමාජ වගකීමක්.

ඔබ මේ වන විට එන්නත්කරණය සම්පූර්ණ කර ඇති අයකු වුවද, ඔබටත් කොව්ඩි රෝගය වැළඳීමේ යම් අවදානමක් තියෙනවා. එන්නත්කරණයෙන් ලැබුණු ආරක්ෂාව නිසා, ඔබට දැඩි සත්කාර අවශ්‍ය හෝ මාරාන්තික අවස්ථාවකට පත් වීමට ඇති ඉඩකඩ අඩු වුවද, ඔබ විසින් ඔබේ පවුලේ ආදරණීයයන්ට රෝගය සම්ප්‍රේෂණය කිරීමක් සිදුවිය හැකියි.

සංචරණ සීමා වල යම්තාක් දුරකට ලිහිල් කිරීමක් සිදු වන අවස්ථාවකදී, ඉහත උපදෙස් අකුරටම පිළිපැදීම තුලින් ඔබටත් ඔබගේ පවුලේ ආදරණීයයන්ටත් අන් කොවිඩ් ප්‍රභේද වලින් වගේම ඩෙල්ටා කොවිඩ් ප්‍රභේදයෙනුත් ආරක්ෂාව සපයා ගත හැකියි.

– HPB

එහෙනම් චමල්ගේ වාරිමාර්ගත් කෘෂිකර්මයට දෙන්න : වාසු ගේමට !

කෘෂිකර්මයට පොහොර අවශ්‍ය නිසා පොස්පේට් සමාගම තිබිය යුත්තේ කෘෂිකර්ම අමාත්‍යාංශය යටතේ නම් ඒ අර්ථයෙන්ම වාරිමාර්ග දෙපාර්තමේන්තුව ද තිබිය යුත්තේ කෘෂිකර්ම අමාත්‍යාංශය යටතේ බවත් එනිසා දැනට චමල් රාජපක්ෂ මහතා යටතේ තිබෙන වාරිමාර්ග දෙපාර්තමේන්තුව ද කෘෂිකර්ම අමාත්‍යාංශය යටතට පවරා පැවරිය යුතු බව අමාත්‍ය වාසුදේව නානායක්කාර පවසයි.

අමාත්‍යවරයා සිය අමාත්‍යංශයේ මාධ්‍ය හමුවක අදහස් දක්වමින් මේ බව සඳහන් කළ අතර එහිදී වත්මන් ආණ්ඩු බලය හොබවන සන්ධානය  නියෝජනය කරන්න සුළු පක්ෂ සිටින්නේ පීඩනයෙන් බවත් පැවසීය. 

විමල් වීරවංශ සහ උදය ගම්මන්පිල ඇමතිවරුන්ට ඇතිකර තිබෙන තත්ත්වයන් යුක්තිසහගත නැති බවද පෙන්වාදුන් වාසුදේව අමාත්‍යවරයා විමල් වීරවංශ මහතාගේ යටතේ තිබූ පොස්පේට් සමාගම අලාභ ලබන තත්ත්වය සිට ලාභ ලබන තත්ත්වයට ගෙනැවිත් තිබියදී එය ඉවත් කිරීම කුඩා පක්ෂ මත ඇති කරන ලද පීඩනයක් හා සිත් රිදවීමක් යයිද පැවසීය.

දිස්ත්‍රික්ක 12ක ග්‍රාම නිලධාරී වසම් 24ක් හෙට (21) සිට LOCKDOWN…

හෙට (21) අලුයම 4 සිට බලපැවැත්වෙන පරිදි දිස්ත්‍රික්ක 12ක ග්‍රාම නිලධාරී කොට්ඨාස 24ක්  හුදකලා කරන බව යුද හමුදාපති, ජෙනරාල් ශවේන්ද්‍ර සිල්වා  පවසයි.

එලෙස හුදකලා කරනු ලබන ප්‍රදේශ ලැයිස්තුව පහතින්

1

2

සංචරණ සීමා ඉවත් නොකරන්නැයි ශ්‍රී ලංකා වෛද්‍ය සංගමය ඉල්ලයි

හෙට (21) දිනයේ සංචරණ සීමා ඉවත් නොකර තවදුරටත් අඛණ්ඩව පවත්වාගෙන යන ලෙස ශ්‍රී ලංකා වෛද්‍ය සංගමය ජනාධිපති ගෝඨාභය රාජපක්ෂගෙන් ඉල්ලීමක් කර ඇතැයි වාර්තා වෙයි.

ජනාධිපතිවරයා වෙත ලිපියක් යොමු කරමින් එම සංගමය පෙන්වා දී ඇත්තේ දින කිහිපයකට හෝ සංචරණ සීමා ඉවත් කිරීමෙන් අප්‍රේල් මාසයේ පැවති දරුණු තත්ත්වයට රට යළි ගමන් කිරීමේ අවදානමක් නිර්මාණය වනු ඇති බවය.

පවතින තත්ත්වය හමුවේ සංචරණ සීමා ලබන 28 වෙනි දින දක්වා හෝ දීර්ඝ කරන ලෙස සිය සංගමය මීට පෙර ඉල්ලීමක් කර තිබූ අතර ලබන 21 වනදා සිට 23 වනදා දක්වා දින කිහිපයක් සංචරණ සීමා ඉවත් කර යළි පැනවීමේ පදනම කුමක් ද යන්න පැහැදිලි නොවන බවද ඔවුන් පවසයි.

සංචරණ සීමා ක්‍රියාත්මක වර්තමානයේ ද දෛනිකව නව ආසාදිතයින් 2,000 ඉක්මවූ සංඛ්‍යාවක් සහ මරණ 50 ඉක්මවා වාර්තා වන බවත් ශීඝ්‍ර ව්‍යාප්තියක් සහිත ඩෙල්ටා කොවිඩ් ප්‍රභේදය ද මෙරට සමාජයෙන් හමුවීමෙන් පවතින අවදානම තවදුරටත් ඉහළ යන බවත් ශ්‍රී ලංකා වෛද්‍ය සංගමය පෙන්වා දෙයි.

මේ හේතුවෙන් මෙම තීරණාත්මක මොහොතේ සංචරණ සීමා ඉවත් කිරීමකින් තොරව තවදුරටත් අඛණ්ඩව ක්‍රියාත්මක කරන ලෙස ඔවුන් ජනාධිපතිවරයාගෙන් ඉල්ලා ඇත.

එසේ නොවුනහොත් සති තුනක කාලයක් සංචරණ සීමා ක්‍රියාත්මක කරමින්, වෛරස ව්‍යාප්තිය පාලනය සඳහා සිදුකළ කැපකිරීම ප්‍රතිඵල රහිත වනු ඇති බව ද ශ්‍රී ලංකා වෛද්‍ය සංගමය ජනාධිපතිවරයා වෙත යොමු කළ ලිපියේ වැඩිදුරටත් සඳහන්ය.

මේ අතර සංචාරණ සීමා ඉවත් කිරිමෙන් පසුවද ජනතාව නිසි මාර්ගෝපදේශ අනුව කටයුතු කළ යුතු බව රජයේ වෛද්‍ය නිළධාරින්ගේ සංගමය පවසයි.

එම සංගමයේ මාධ්‍ය කමිටු සාමාජික වෛද්‍ය ප්‍රසාද් කොළඹගේ  ජනතාවගෙන් ඉල්ලා සිටින්නේ අත්‍යාවශ්‍ය කටයුත්තකට හැර නිවසින් බැහැරව නොයන ලෙසය.

(දෙරණ)

ආණ්ඩුව අභ්‍යන්තරයේ කුමණ්ත්‍රණයක් : ශ්‍රිලනිප මහ ලේකම් අනාවරණයක් !

ආණ්ඩුව අභ්‍යන්තරයේ ක්‍රියාත්මක කුමණ්ත්‍රණයක් සම්බන්ධව ශ්‍රී ලංකා නිදහස් පක්ෂයේ මහ ලේකම් රාජ්‍ය අමාත්‍ය  දයාසිරි ජයසේකර අවධාරණය කරයි.

ශ්‍රී ලංකා පොදුජන පෙරමුණ සමඟ සම්බන්ධව සිටින සෙසු පක්ෂ ආණ්ඩුවෙන් ඉවත් කිරීම එම කුමන්ත්‍රණ යැයි ද ඇමැතිවරයා පවසයි.

මාධ්‍ය වෙත ප්‍රකාශයක් කරමින් ඔහු මේ බව සඳහන් කරන අතර ආණ්ඩුව බිහි කිරීමට ශක්තිය දුන් පක්ෂ නායකයන් කැබිනෙට්ටුවෙන් ඉවත් කිරීමට එම පක්‍ෂ ආණ්ඩුවෙන් ඉවත් කිරීමට සැලසුමක් සැලසුමක් ඇතැයි ද පැවසූ ඔහු මෙයාකාරයට ගියොත් අනාගතයේදී ශ්‍රී ලංකා නිදහස් පක්ෂයද මෙම තත්ත්වය අත් බවද පෙන්වාදෙයි.

ඉන්ධන මිල වැඩි කරන ලද්දේ උදය ගම්මන්පිල අමාත්‍යවරයාගේ තනි කැමැත්තෙන් නොවන බවත්, තෙල් මිල ඉහළ දැමීම අග්‍රාමාත්‍යවරයා ප්‍රමුඛ  ආණ්ඩුවේ තීරණයක් බවද කී අමාත්‍යවරයා ගම්මන්පිල ට එරෙහිව ගෙන ආ විශ්වාසභංගය මෙම ආණ්ඩුවේ දෙපාර්ශවයක් අතර ඇති මතයෙන් භේදය වාසි ලබාගැනීම සඳහා විපක්ෂයේ සැලසුමක් යයිද පැවසීය.

තෙල් මිළ වැඩි කලේ ජාත්‍යන්තර මූල්‍ය අරමුදලෙන් ඩොලර් මිලියන 785 ක් ගන්නද?

නොබෝදා මුදල් අමාත්‍යංශයත් ජනාධිපති කාර්යාලයත් බලශක්ති අමාත්‍යංශයත් ඒකාබද්ධව මෑත ඉතිහාසයේ කරන ලද වැඩිම තෙල් මිළ ඉහල දැමීම කරන ලදී.
 
එය බලශක්ති ඇමතිගේ ක්‍රියාවක් ලෙස හුවා දක්වන්නට බලයේ සිටින පොදු ජන පෙරමුණ උත්සාහ කලත් පැය 24 ක් නිහඬව සිට ජනාධිපති මාධ්‍ය අංශය විසින් නිවේදනයක් නිකුත් කරනු ලැබුවේ රජයේ ජීවන වියදම් අනු කමිටුව විසින් ගන්නා ලද තීරණයක් මත තෙල් මිළ වැඩි කිරීමට කටයුතු කරන ලද බවයි. 
 
මේ සම්බන්ධව තීරණය ගත් කමිටු රැස්වීමට ජනාධිපතිතුමා අගමැතිතුමා නාමල් රාජපක්ෂ ඇමතිතුමා සහ තවත් අමාත්‍යායවරු කිහිප දෙනෙකු සහ උසස් නිලධාරීන්ද සහභාගි වූ අතර  තෙල් මිළ වැඩි කිරීමේ නාටකයේ පොතේ ගුරාගේ කාර්යය පමනක් බලශක්ති ඇමති ගම්මන්පිල  විසින් කරනු ලැබූ අතර ඉන් පසුව එය නාට්‍යානුසාරයෙන් ජනතාව වෙත ගෙන එන ලදී.
 
 රජයට ඩොලර් නොමැති බව ඛණිජ තෙල් නීතිගත සංස්ථාව මහා පරිමාණයෙන් පාඩු ලබන බව ඒ නිසාම රාජ්‍ය බැංකු දෙක මූල්‍ය අවදානමට   ලක්ව ඇති බව ආදි කී නොකී කතා  රාශියක් ජනගත කරන ලදී.
 
එහෙත් මේ නිදහසට කියන කාරනා සියල්ලම අර්ධ සත්‍යක් පමණි.
 
මෙම තීරනයත් සමග ආන්ඩුවේ මධුසමය  අවසන් වී ඇති බවත් සෞභාග්‍යයේ රජයේ පශ්චාත් කොරෝනා ආර්ථික  ගමන් මඟ ආරම්භ වී ඇති බව ජනතාව තේරුම් ගත යුතුය.
 
රජයේ නව දැක්ම කුමක්ද?
 
මීට මාස කිහිපයකට  පෙර අග්‍රාමාත්‍ය / මුදල් අමාත්‍ය මහින්ද රාජපක්ෂ  ප්‍රකාශ කළේ මොන තරම් බාධක පැමිණියත් ජාත්‍යන්තර මූල්‍ය අරමුදල පසුපස තම රජය නොයන බවයි. 
 
ඔවුන්ගේ කොන්දේසිවලට යට වී ජනතාව අපහසුතාවයට පත් කරන තීන්දු තීරණ නොගන්නා බවයි.
 
එහෙත් ලෝකය වටේම ඩොලර් මිලියන 100, 200 හෝ ණය පහසුකම් සොයා ගියත් ,හැකි තරම් දුරට ආනයනයන් සඳහා සීමාවන් දැමුවත් ඉදිරියට යාමට නොහැකි බව දන්නා රජය  ජාත්‍යන්තර මූල්‍ය අරමුදල සමඟ ලංකාවට ලබා ගත  හැකි නය සීමාව පිලිබද සාකච්ඡා ආරම්භ කර ඇති අතර ඩොලර් මිලියන 785 ක ණය මුදලක් ලබා  ගැනීමට කටයුතු කරමින් සිටින බව නොරහසකි.
 
යහපාලන රජය බලයට පත් වූ විගසම ඒ අවස්ථාවේ තිබූ විදේශ සංචිත ශක්තිමත් කර ගැනීමටත් විදේශ ණය ගෙවීම ආදිය සඳහාත් ඩොලර් මිලියන 1300 ක ණයක් ගත් බව අප දන්නා කාරුණකි.
 
ඒ සඳහා ජාත්‍යන්තර මූල්‍ය අරමුදලේ කොන්දේසි ක්‍රියාත්මක කිරීමට යහපාලන රජයට සිදුවිය.
 
රාජ්‍ය ආයතනවලට බඳවා ගැනීම් සම්පූර්ණයෙන් නතර කිරීමට සිදු වූ අතර අප්‍රිකාවේ ගානා රාජ්‍ය වෙත ජාත්‍යන්තර මූල්‍ය අරමුදල විසින් හඳුන්වා දෙන ලද ආදායම් බදු පණත ඒ ආකාරයෙන්ම ශ්‍රී ලංකාවට හඳුන්වා දීමත් සිදු විය. උපයන විට ගෙවීමේ සිට ලක්ෂ 100,000 කට වඩා ආදායම් ලබන සෑම අයෙකුටම ස්වයංක්‍රීයව බදු ලිපි ගොණුවක් විවෘත විය. රුපියල් බිලියන 1000 මට්ටමක  තිබූ රාජ්‍ය ආදායම 2018 වන විට රුපියල් බිලියන 1800 දක්වා ඉහළ ගියේය.
 
ඒ ජාත්‍යන්තර මූල්‍ය අරමුදලේ  කොන්දේසි ක්‍රියාත්මක කිරීම නිසාය.
 
ණය හෝ අත්තිකාරම් ලබා දී කොන්දේසි පණවන පුරුද්දක් ජාත්‍යන්තර මූල්‍ය අරමුදලට නැත. මේ පූර්ව කොන්දේසිය නිසා ණය මුදල ලබා දීමට  පෙර ආර්ථිකය  පාලනයට නතු කිරීම, අනවශ්‍ය වියදම් කපා හැරීම ,බදු අනුපාත ඉහළ දැමීම, සහනාධාර කපා හැරීම යන සියල්ල කිරීමට රජයට සිදුවනු ඇත. එසේ කිරීමට රජය අපොහොසත් නම් ඩොලර් මිලියන 785 ක ණය මුදල නොලැබෙනු ඇත.
 
ශ්‍රී ලංකාවේ ණය ශ්‍රේනි ගත කිරීම මේ වන විට. CCC මට්ටමට පහල දමා ඇත. රටක් ඉදිරියට යාමට ආයෝජන ආකර්ශනය කර ගැනීමට නම් මේ දර්ශක නැවත සකසා ගත යුතුය.
 
අවම වශයෙන් දැනට ශ්‍රී ලංකා මහ බැංකුව සතුව පවතින ඩොලර් සංචිතය ඩොලර් මිලියන 4.3 සිට අඩුම වශයෙන් මිලියන 8.6 ක ප්‍රමාණයකට ඉහළ නංවා ගත යුතුය.රජයේ වියදම් අඩුකරගෙන පෞද්ගලික අංශය ශක්තිමත් කිරීමට සිදුවනු ඇත.
 
සිදුවිය හැක්කේ කුමක් ද?
 
රජයටත් බදු ආදායමක් ලැබෙන පරිදි ලෝක වෙළඳපළේ මිළට සමාන්තරව තෙල් මිළ වැඩි කළාක් මෙන් ඉදිරියේදී ගෑස් මිළ ඉන්පසු ජලය විදුලිය, දුරකථන සේවා යන ගාස්තු වැඩි රාජ්‍ය අංශය  කර සංවිධානයට ලක් කිරිමට සිදුවනු ඇත.
 
මේ හා සමානව පෞද්ගලික අංශය විසින්ද  ප්‍රවාහන ගාස්තු, මගී ප්‍රවාහන ගාස්තු ආහාර ද්‍රව්‍ය මිළ, ගුවන් ගමන් ගාස්තු හෝටල් ගාස්තු ආදී සියලුම සේවා මිළ ඉහළ දමනු ඇත.
 
එබැවින් ආන්ඩුවේ මේ ජිමික්ස් දෙස බලා සිටිනවා වෙනුවට ‍රටේ ජනතාව මේ සැබෑ ආර්ථික අර්බූදයට මුහුණදීමට පෙළ ගැසිය යුතුව ඇති බව පමනක් අවධාරණය කරමු.
 
විශේෂ ලියුම්කරුවකු විසිනි 

පොල් මිල ගැසට් පත්‍රය ඉවතට !

පොල් සඳහා පනවා තිබූ උපරිම සිල්ලර මිල ඉවත් කළ බව පාරිභෝගික කටයුතු පිළිබඳ අධිකාරිය පවසයි. 

එම අධිකාරිය විසින් ඊට අදාළ ගැසට් නිවේදනය ඊයේ (18) ප්‍රකාශයට පත් කර ඇත. 

2020 සැප්තැම්බර් 25 වන දින අංක 2194/73 දරණ ගැසට් පත්‍රය මඟින් පොල් සඳහා උපරිම සිල්ලර මිලක් පනවා තිබුණි.

එම ගැසට් නිවේදනයට අනුව වට ප්‍රමාණය අඟල් 13 වැඩි පොල් සඳහා රුපියල් 70ක උපරිම සිල්ලර මිලක් ද, වට ප්‍රමාණය අඟල් 12 – 13 අතර පොල් සඳහා රුපියල් 65ක් සහ වට ප්‍රමාණය අඟල් 12ට අඩු පොල් සඳහා රුපියල් 60 උපරිම සිල්ලර මිලක් ද නියම කළේය.

කෙසේ වෙතත් ගැසට් පත්‍රයේ  මිලට වඩා ඉතා අධික මිලකට වෙළදපොලේ පොල් අලෙවි විය.

පාසල් සිසුන්ට යහපාලනය නොමිලේ දෙන්න ගිය ටැබ් ! මේ ආණ්ඩුවෙන් ගෙවීමේ ක්‍රමයට !

යහපාලන ආණ්ඩුව විසින් පාසල් සිසුවියන් වෙනුවෙන් නොමිලේ ටැබ් පරිගණක ලබාදීමට එවකට විපක්ෂයේ සිටි ගම්මන්පිල වැනි මන්ත්‍රීවරුන් විරුද්ධ විය.

ඒ ටැබ් භාවිතය නිසා ඇතිවන දරුණු ලෙඩ රෝග ගැන පවා බිල්ලන් මවමින්ය.

නමුත් අමාත්‍ය නාමල් රාජපක්ෂ පවසන්නේ පාසල් සිසු සිසුවියන්ට සහනදායක ක්‍රමයකට ‘ටැබ්’ පරිගණක යන්ත්‍ර ලබාදීමේ වැඩසටහනක් ළඟදීම ආරම්භ කරන බවයි.

අධ්‍යපන අමාත්‍යාංශයේ ‘ඊ තක්සලාව’ වැඩසටහන් සමඟ එක්ව මෙම ටැබ් පරිගණක පාසැල් දරු දැරියන්ට ලබා දෙන බවද ඔහු පැවසීය.

එමෙන්ම දත්ත නොමිලේ පහසුකම් ලබා දෙමින් අධ්‍යාපන කටයුතු වඩාත් පහසුවෙන් කරගෙන යාමේ හැකියාව මෙමගින් හිමිවන බවද අමාත්‍යවරයා කියා සිටියේය.

එදාා ආණ්ඩුවේ ප්‍රතිපත්තියට විරුද්ධ වූ ගම්මන්පිල අමාත්‍යවරයා අද නිහඬය.

ඒකාබද්ධ විපක්ෂය ලෙස එදාා සිට් සියල්ලන් නිහඬය.මේ ආණ්ඩුවේ සේරම වැඩ රිවර්ස් නිසා කියන දේවල් කෙරෙයිද නැද්ද දන්නේ නැත.

නමුත් මේවා කෙරෙන්න ඕන වැඩය.

අධ්‍යයනයට වඩා පොලිසියට වැඩි බරක් !

ශ්‍රී ලංකා පොලිස් දෙපාර්තමේන්තුවට අලුතින් පොලිස් ස්ථාන 197ක් ස්ථාපිත කිරීමට කටයුතු යොදා ඇති බව මහජන ආරක්ෂාව පිළිබඳ කැබිනට් අමාත්‍ය සරත් වීරසේකර මහතා පවසයි.

මහජනතාවට පොලිස් පැමිණිලි කිරීමේදී ඇතිවන අපහසුතා මඟහරවා ගනිමින් පහසුවෙන් පැමිණිලි කිරීම සඳහා නව පොලිස් ස්ථාන ආරම්භ කිරීමට නියමිත බවයි. එම වැඩපිළිවෙල යටතේ පොලිස් ස්ථාන 57ක් දැනටමත් ස්ථාපිත කර ඇති බවත්, ඉතිරි පොලිස් ස්ථානද හැකි ඉක්මනින් ස්ථාපිත කිරීමට කටයුතු කරන බවත් ඇමතිවරයා පවසයි.

නව පොලිස් ස්ථාන හරහා මහජනතාව සමඟ පොලිසිය වැඩි වැඩියෙන් සම්බන්ධ වන විට අපරාධ කිරීමට සමාජයේ පවතින ඉඩ ඇහිරෙන බවද රජයේ ප්‍රවෘත්ති දෙපාර්තමේන්තු පරිශ්‍රයේ ඊයේ (18) දින පැවති ප්‍රවෘත්ති සාකච්ඡාවකදී ඇමතිවරයා වැඩිදුරටත් පවසා තිබේ.

සමාජයක අපරාධ අඩු කිරීමටත් නීතිගරුක, විනයගරුක, ශික්ෂණයක් සහිත පුරවැසියන් බිහි කිරීමටත් අපේ රටේ අධ්‍යාපන පද්ධතිය මඟින් විශාල කාර්යභාරයක් ඉටුකරනු ලබයි. කොවිඩ් වසංගතය රට පුරා පැතිරීම හමුවේ මෙරට පාසල් අධ්‍යාපනය මෙන්ම උසස් අධ්‍යාපනයද කඩා වැටී ඇති අතර ඔන්ලයින් අධ්‍යාපන පහසුකම් අහිමි වීමෙන් සිසුන් මෙන්ම දෙමාපියන්ද අතිශය පීඩාවට පත්ව සිටී. එවන් පසුබිමක අධ්‍යාපන පද්ධතිය ශක්තිමත් කරනවා වෙනුවට ආණ්ඩුව අලුතින් පොලිසි කොපමණ ප්‍රමාණයක් ඉදිකරනු ලැබුවත් මහජන ආරක්ෂාව, නීතිගරුක සමාජයක් ගොඩනැගිය නොහැකි බව දේශපාලන විශ්ලේෂකයෝ පවසති.

(Lanka truth )

පොස්පේට් නැතිවුණ විමල් බුකියේ තැබූ සටහන මෙන්න !

විමල් වීරවංශ ගේ කර්මාන්ත අමාත්‍යාංශය යටතේ තිබූ ලංකා පොස්පේට් සමාගම එම අමාත්‍යාංශයෙන් ඉවත් කර මහින්දානන්ද අලුත්ගමගේ අමාත්‍යවරයා වන  කෘෂිකර්ම අමාත්‍යංශය යටතට පත්කර ඇත.

ජනාධිපති ගෝඨාභය රාජපක්ෂ ගේ ගැසට් නිවේදනයක් හරහා මේ සිදුව ඇති අතර ඊට  පසු කර්මාන්ත අමාත්‍ය විමල් වීරවංශ  ඒ සම්බන්ධයෙන් තම ෆේස්බුක් ගිනුමේ  සටහනක් තබා තිබේ.

එම සම්පූර්ණ සටහන මෙසේය.

1974 දී ආරම්භ කල ලංකා පොස්පෙට් ආයතනය එකල පැවතියේ භූ විද්‍යා හා පතල් කාර්යාංශය යටතේයි. ජාතියට අගන දායාදයක් වූ එප්පාවල පොස්පේට් නිධිය ආශ්‍රිතව ලංකා පොස්පේට් සමාගම 1991 වසරේදී සමාගමක් බවට පත්කොට ජාතික ආර්ථිකය ශක්තිමත් කල හැකි පරිදි යොදාගැනීමට සැළසුම් කොට තිබූ වටිනා සම්පතක්. 2000 වසරේදී පෞද්ගලික සමාගමකට කුණු කොල්ලයට විකිණීමට යෝජිතව තිබු ලංකා පොස්පේට් සමාගම රජරට ජනතාවගේ සහ සමස්ථ ශ්‍රී ලාංකීය දේශමාමක ජනතාවයේ කැපවීමෙන් ඓතිහාසික නඩු තීන්දුවක් මගින් නැවත රාජ්‍ය ව්‍යවසායක් බවට පත්විය. එදා පටන් කර්මාන්ත අමාත්‍යාංශය යටතේ ක්‍රියාත්මක වූ ලංකා පොස්පේට් සමාගම 2015 යහපාලන ආණ්ඩු සමයේ දුමින්ද දිසානායක කෘෂිකර්ම අමාත්‍යවරයා යටතේ කෘෂිකර්ම අමාත්‍යංශයට ගැසට් කොට තිබුණි. ඊට හේතු වුවේ කෘෂිකර්ම අමාත්‍යවරයාගේ දිස්ත්‍රික්කයේ මෙන්ම ඔහු නියෝජනය කල ආසනයේම ලංකා පොස්පේට් සමගම පිහිටා තිබීමයි.

2015 සිට 2020 වසර දක්වා ක්‍රමයෙන් පාඩු ලබන තත්වයට පත්වෙමින් තිබූ ලංකා පොස්පෙට් සමාගම 2020 අවසන් කාර්තුවේ සිට කර්මාන්ත අමාත්‍යංශය යටතේ අමාත්‍යවරයා ලෙසත්, ලංකා පොස්පේට් සමාගමේ සභාපතිවරයා ඇතුළු කාර්ය මණ්ඩලයේ කැපවීම නිසාත් නැවත ලාබ ලබන තත්වයට ගෙන ඒමට හැකියාව ලැබුනා. එප්පාවල පොස්පේට් සමාගමේ නව සභාපතිවරයා හා අධ්‍යක්ෂ මණ්ඩලය පත් වීමෙන් පසු අමාත්‍යාංශ ලේකම්තුමන් ද සහභාගී කරවාගෙන සාකච්ඡා ගණනාවක් පවත්වා එප්පාවල පොස්පේට් නිධියෙන් රටටත්, ගොවි ජනතාවටත් උපරිම ඵලයක් ලබා දීම පිණිස කටයුතු කළා. ඒ අනුව එප්පාවල පොස්පේට් පොහොරවලට වටිනාකමක් එකතු කිරීමත්, කාබනික පොහොරවල ඇති පොස්පරස් ඌනතාව වැළැක්විය හැකි ‘එප්පාවල රොක් පොස්පේට් (ඊ.ආර්.පී) ඇසුරුමක්’ හඳුන්වාදීමටත් තීරණ කළා. එප්පාවල රොක් පොස්පේට් වෙනත් පොහොර නිෂ්පාදකයන්ට තොග වශයෙන් ලබා දීම නතර කර ඊට අගයක් එකතු කර ‘සුපර් පොස්පේට්’ පොහොර නිෂ්පාදනය කර ලංකා පොස්පේට් සමාගම මගින්ම අලෙවි කිරීම ආරම්භ කිරීම ද එම කාලවකවානුව්දී සිදු උනා.

කොවිඩ් වසංගතයත් සමඟ සෞභාග්‍යයේ දැක්ම අනුව ගෙවතු වගා සංග්‍රාමයක් අරුඹූ මොහොතේ කාබනික පොහොර සඳහා ඉතා විශාල ඉල්ලුමක් ඇතිවූ අවස්ථාවේ අපට අපේ දෙවන තීරණය කඩිනමින්ම ක්‍රියාත්මක කිරීමේ හැකියාව ලැබුණා. ‘අපිට පොහොර අපිම හදමු’ තේමාව යටතේ කාබනික පොහොර කිලෝ 20කට එකතු කළ හැකි එප්පාවල රොක් පොස්පේට් (ඊ.ආර්.පී) කිලෝ 01 ක පැකට්ටුවක් ‘එප්පාවල පොහොර’ නමින් හඳුන්වා දීම සිදුකිරීමටත් අපට හැකියාව ලැබුනා. සාමාන්‍ය වෙළදපොළේ මිල රුපියල් 30ක්ව පැවති එම පොහොර අපි ලබාදුන්නේ රුපියල් 10 කට. ඒ අනුව අපට රසායනික පොහොර වෙනුවට ‘සවිබල ගැන්වූ කාබනික පොහොර’ ගොවි ජනතාවට හා ගෙවතු වගාවෙහි නිරත පිරිස්වලට ලබා දීමට හැකිව ලැබුනා. කාබනික පොහොරවල නයිට්‍රජන් හා පොටෑසියම් සංඝටක ප්‍රමාණවත් ලෙස තිබෙන නමුත් පොස්පරස් සංඝටකය අවම වීම අප හඳුන්වා දුන් එප්පාවල පොහොර මිශ්‍රණයෙන් මඟ හරවා ගැනීමේ හැකියාව ලැබුනා. එමගින් ආනයනික පොහොර සදහා වසරකට වැයවන රුපියල් බිලියන 33ක මුදල රට තුළම ඉතිරි කර ගැනීමේ ඉඩකඩ නිර්මාණය වීමට මෙම තීන්දුව මූලික පසුබිම සැකසුවා.

එතැනින් නොනැවතුණු ලංකා පොස්පේට් සමාගම ක්ෂේත්‍රයේ ප්‍රවීණයන්, වෛද්‍යවරුන් සහ පර්යේෂකයන් එක් කරගනිමින් ”ජෛව හරිත පොස්පේට්” නිෂ්පාදනය කිරීමේ විශේෂ ව්‍යාපෘතිය ඇරඹීමට තීරණය කොට ඒ වෙනුවෙන් අවශ්‍ය පර්යේෂණ කටයුතු ඇතුළු නිෂ්පාදනයට අවශ්‍ය සියලු පසුබිම සකසා අවසන් කොට ජනගත කිරීමට සුදානමින් සිටියත් කොවිඩ් අර්බුධය සමග අවස්ථා කිහිපයකදී එය ප්‍රමාද උනා. නමුත් මේ මස 23 වනදා අමාත්‍යාංශයේදී ”ජෛව හරිත පොස්පේට්” පොහොර ව්‍යාපෘතිය ආරම්භ කිරීම සහ පවත්වාගෙන යෑම පිළිබදව එකගතා ගිවිසුම අත්සන් තැබීම සිදු කිරීමට නියමිතව තිබුනා.

කර්මාන්ත ඇමතිවරයා වශයෙන් වසර එකහාමකට ආසන්න කාලයක් ලංකා පොස්පේට් සමාගමට ඔවුන්ගේ කටයුතු සාර්ථකව කරගෙන යාමට අවශ්‍ය සහයෝගය හැකි හැම ආකාරයෙන්ම ලබාදුන් අතර එම ආයතනයේ පරිපාලනයට හෝ ක්‍රියාවලියට කිසිදු ආකාරයේ බලපෑමක් සිදු නොකර සාර්ථකව ආයතනය ගෙන යාමට සහයෝගය ලබා දුන්නා. අඩුම තරමේ එම කාලය තුළ කිසිදු නව සේවකයෙක් හෝ එම ආයතනයට පත් නොකළ අතර ආයතනය තුල පවතින ක්‍රියාදාමයට කිසිදු බලපෑමක් නොකිරීමට පියවර ගනු ලැබුවා. ඊට අමතරව ලංකා පොස්පේට් සමාගම සමග එක්ව ඉදිරි වසර කිහිපය තුළ නව ව්‍යාපෘති කිහිපයක්ම ඇරඹීමට සැළසුම් කරමින් තිබුනා.

කුමන අමාත්‍යාංශයක් යටතේ වුවද ජාතියට දායාදයක් වූ, අනාගතයට ආයෝජනයක් වූ එප්පාවල පොස්පේට් නිධිය සහ ලංකා පොස්පේට් සමාගම වඩා වඩාත් දියුණු වෙමින් සාර්ථකත්වයට පත්වෙනු දැකීම මාගේ අභිප්‍රායයි. අප විසින් 2020/2021 වසරේ ලාභ ලබන තත්වයට ගෙන ආ ලංකා පොස්පේට් සමාගම ඉදිරියටත් ලාභ ලබන රාජ්‍ය ව්‍යවසායක් ලෙස පවත්වාගෙන යනු ඇතැයි අප බලාපොරොත්තු වන්නෙමු..!

– විමල් වීරවංශ (කර්මාන්ත අමාත්‍ය)

වීරවංසගේ කෑල්ලක් මහින්දානන්ද යටතට..

කර්මාන්ත අමාත්‍යාංශය යටතේ තිබූ ලංකා පොස්පේට් සමාගම කෘෂිකර්ම අමාත්‍යංශය යටතට පවරමින් අතිවිශේෂ ගැසට් නිවේදනයක් නිකුත් කර තිබේ.

ජනාධිපතිවරයා විසින් ඊයේ (18) දිනයේදී සිදු කර තිබෙන්නේ අංක 2232/39 අතිවිශේෂ ගැසට් පත්‍රය මඟින් මෙම පැවරීම සිදු කර තිබේ.

මෙතෙක් එම ආයතනය අයත්ව තිබුණේ වීරවංස ඇමතිවරයා යටතේ ඇති කර්මාන්ත අමාත්‍යාංශයට වේ.

නව පැවරීමත් සමඟ එම ආයතනය මහින්දානන්ද ඇමතිවරයා යටතේ ඇති කෘෂිකර්ම අමාත්‍යංයට අයත් වේ. මෙම පැවරීම ජුනි මස 17 වන දින සිට ක්‍රියාත්මක බව එම ගැසට් නිවේදනයේ දැක්වේ.

එසේම ඊයේ දිනයේ කර්මාන්ත අමාත්‍යංයේ ලේකම්වරයා ලෙස කටයුතු කරනු ලැබූ අනූෂ පැල්පිට මහතා එම තනතුරින් ඉල්ලා අස්වූ අතර එම පුරප්පාඩු වූ තනතුර සඳහා වරයා අධිකාරියේ සභාපතිවරයා ලෙස කටයුතු කරනු ලැබූ හිටපු හමුදාපතිවරයකු වන දයා රත්නායක පත් කර ඇති බවයි.

දයා රත්නායක  ජනාධිපතිවරයාගේ සමීපතමයකු ලෙසද වාර්තා වේ.

ලංකා පොස්පේට් සමාගම කෘෂිකර්ම අමාත්‍යාංශය යටතට පවරමින් නිකුත් කළ අතිවිශේෂ ගැසට් නිවේදනය පහත දැක්වේ.

0111

මේ පිළිබද ඇමති වීරවංශ ඔහුගේ මුහුණු පොතේ පල කර ඇති පෝස්ටුව පහත පළවේ.

Screenshot 20210619 141925 Facebook

Screenshot 20210619 142130 Facebook

විශේෂඥ වෛද්‍ය සුදත් සමරවීරට ස්ථාන මාරුවක්..

වසංගත රෝග විද්‍යා ඒකකයේ අධ්‍යක්ෂ විශේෂඥ වෛද්‍ය සුදත් සමරවීරට ස්ථාන මාරුවක් ලබා දී තිබේ.

සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන  සඳහන් කළේ සුදත් සමරවීර  සෞඛ්‍ය අමාත්‍යාංශයේ ඩෙංගු මර්දන ඒකකයේ අධ්‍යක්ෂවරයා ලෙස පත් කළ බවය.

එම ස්ථාන මාරුව ඊයේ(18) දින සිදුකර තිබේ.

වසංගත රෝග විද්‍යා ඒකකයේ වැඩබලන අධ්‍යක්ෂවරයා ලෙස විශේෂඥ වෛද්‍ය සමිත ගිනිගේ පත් කර ඇති බව සෞඛ්‍ය සේවා අධ්‍යක්ෂ ජනරාල්වරයා සඳහන් කළේය.

මේ අතර ඩෙංගු මර්දන ඒකකයේ අධ්‍යක්ෂවරයා ලෙස කටයුතු කළ වෛද්‍ය අරුණ ජයසේකර  මහනුවර ජාතික රෝහලේ වැඩබලන අධ්‍යක්ෂවරයා ලෙස පත් කර තිබේ.

රනිල් - සජිත් ගැටුමෙන් මන්ත්‍රීවරුන් 750 කගේ තනතුරු අහිමිවේද? : කියවන්නම ඕන ලිපියක් !

මන්ත්‍රී  ධූර අහිමි වන පිරිසගෙන් කොටසක් එජාපය තම පරම සතුරා බවට පත් කර ගනු ඇත. රනිල් - සජිත් බල අරගලය තම තනතුර, දේශපාලන ජීවිතය අවසන් කළ බව සිතන තවත් විශාලම පිරිසක් ලැයිස්තුවට එක් වනු ඇත.
 
ඉතිහාසය පුරාම කැරළිකරුවන්, ඉඟුරු කල්ලි, දෝෂාභියෝග, නායකත්ව සටන්, පුද්ගලික ඉදිරිවාදිකම් මහජන නියෝජිතයින්ට තනතුරු අහිමි කර ඇත. අද සිදුවෙමින් ඇත්තේ ටිකක් වෙනස් ක්‍රියාවකි.
 
ප්‍රශ්නය  හා අතීත කතාව !
 
එජාපයෙන් තේරී පත් පලාත් පාලන නියෝජිතයින් බහුතරය පසුගිය මහා මැතිවරණයේ දී සජබ ට සහාය දුන් නිසා එජාපය 3% ක වැටුණේය. ඔවුන් අතරින් 10 කට ආසන්න පිරිසකට විනය පරීක්ෂණ පවත්වා තනතුරු අහිමි කර ඇත. 69 ක් සාමුහික අධිකරණ ක්‍රියාමාර්ගය  පරාජය වී ඉවත් කිරීමේ නිවේදනයට එජාපය මහ ලේකම් අත්සන් තබා ඇත. ගම්පොල නඟර සභාවේ සභාපති සමන්ත අතුළු පිරිසක් නැවත එජාපයට එක් වි තම තනතුර රැකගෙන ඇත. එම අවස්ථාව අතහැර දැමූ තංගල්ල සභාපතිවරයාට සියල්ල අහිමි වී ඇත. කලක් රනිල් විරෝධී සටනේ පෙරගමන්කරුවෙකු වූ, රනිල් එපා යැයි නිසාම පක්ෂ තහනමට ලක් වූ පාලිත රංග බණ්ඩාර මහ ලේකම්වරයාගේ පරණ කතා සජබ සමාජ මාධ්‍ය  කණ්ඩායම නැවත පළ කරමින් සිටී. නාටක රැසකි.
 
නඩු ගිය එජාපයෙන් මන්ත්‍රීවරුන්ට  මන්ත්‍රී  ආසන රැක ගැනීමට අවස්ථාවක් තිබුණේ ද? ඉතිරි පිරිසට තනතුරු අහිමිවිවේ ද? මේ ලිපිය ඉතිහාසයේ තවත් දුර්වලම විපක්ෂයක් බිහි කළ එජාප - සජබ ගැටුම ගැන නොවේ. හෙට (පෙහොට්ටුව ද ඇතුළු) ඕනෑම මහජන නියෝජිතයෙකුට අදාල විය හැකි ‘ඉවත් කිරීමේ ව්‍යවහාරය ගැන ය.
පාර්ලිමේන්තු, පළාත් සභා හා පලාත් පාලන මන්ත්‍රීවරුන්  පක්ෂයෙන් නෙරපීම/ඉවත් කිරීම/තනතුර අහිමි කිරීම පිළිබඳ ඇත්තේ එකම නීතිය කි. ව්‍යවහාරයකි. එසේ නම්, (පක්ෂ මාරු කරන) පාර්ලිමේන්තු මන්ත්‍රීවරුන්ගේ  තනතුර රැකෙන්නටත්, පොඩ්ඩන්ට මන්ත්‍රී  ධූරය අහිමිවන්නටත් හේතුවක් නැත.
 
තනතුර අහිමි වන්නේ විනය පරීක්ෂණ, අධිකරණ ක්‍රියාදාමයේ දී සිදුවන ‘කරුණු ඉදිරිපත් කිරීමේ හා අවස්ථාවට මුහුණදීමේ‘ වැරදි නිසාම ය.
 
හේතුවක් ඇතිව හෝ නැතිව (විනය පරීක්ෂණයකින් වරදකරු වී හෝ නොවී) පක්ෂ සාමාජිකත්වය අත්හිටුවීම/තහනම් කිරීම, පක්ෂයෙන් ඉවත් කිරීම හෝ වෙනත් කරුණු මත පක්ෂ ලේකම්වරයෙකු නිකුත් කරනු ලබන ලිපියක් ලැබුණු විට අදාළ මන්ත්‍රීවරයා  එයට එරෙහිව (දිසා) අධිකරණයේ පිහිට පැතිය හැකිය. ලේකම්වරයා ගේ ලිපියෙන් දින 21 යාමට පෙර තහනම් නියෝගයක් ලබා සිය පුටුවට වෙනත් අයෙකු පත් කිරීම වලක්වා ගත හැකිය. එසේ රැකගත්, රැකගෙන සිටින මන්ත්‍රීවරුන්  රැසකි. තහනම් නියෝගයක් ලබා ගත නොහැකි නම්, මහ ලේකම් ගේ ලිපියට අනුව, දින 21 කට පසුව මැතිවරණ කොමිසම අනිවාර්යයෙන්ම අලුත් මන්ත්‍රීවරයා  ගැසට් කළ යුතුමය. (එසේ නොවූ අවස්ථාවක මැතිවරණ කාර්යාලයට එරෙහිව එක් මහ ලේකම්වරයෙක් නඩුවක් පවා කෙටුම්පත් කළේය. එය දැනගත් විගසම නව මන්ත්‍රීවරයා  ගැසට් කිරීමෙන් අර්බුදය නිමා විය)
 
1995 කොළඹ මහ නගර සභාවේ මන්ත්‍රී  ධූරය හේතුවෙන් මතු වූ ‘සිරිවර්ධන එදිරිව ෆාරුක්‘ ශ්‍රේෂ්ඨාධිකරණයේ  826/94 නඩු තීන්දුව දින 21 නීතිය පැහැදිලි කරයි. ශ්‍රී  ලංකා මුස්ලිම් කොන්ග්‍රස්  මන්ත්‍රී  ෆාරුක් ට තනතුර අහිමි වූ අතර, දින 21 ක් තුල තහනම් නියෝගයක් ලබා ගැනීමට ෆාරුක්ට නොහැකි විය. (තහනම් නියෝගය ලැබුණේ 22 වන දිනයේ දී ය.) එවිට මැතිවරණ දෙපාර්තමේන්තුවේ එදා සිටි සිරිවර්ධන මහතා පුරප්පාඩුවට වෙතන් මන්ත්‍රීවරයෙකු  ගැසට් කළේය. දින 21 කට පෙර තහනම් නියෝගයක් ගැනීම ‘අමාත්‍යමය තීරණයක්‘ බැවින් එය සිදු නොවන තැන තමන්ට නව සභිකයා පත් නොකර සිටීමට බලයක් නොමැති බව මැතිවරණ දෙපාර්තමේන්තුව කියූ අතර, මන්ත්‍රී  ෆාරුක් නඩුවෙන් පැරදුණේය.
නීතිය අතිශයින්ම පැහැදිලි හා නිරවුල් ය. මන්ත්‍රීවරයෙකු  ඉවත් කිරීම වැලැක්වීමට නම් දින 21 ක් තුල අතුරු තහනම් නියෝගයක් ලබා ගැනීම අත්‍යවශ්‍යය. නමුත්,
යම් පලාත් පාලන මන්ත්‍රීවරයෙකු  ගේ ධුරය අහිමි කරනු ලැබු විට එයට විරුද්ධව පලාත් පාලන විෂය භාර අමාත්‍යවරයාට (උදා- ප්‍රධාන  අමාත්‍යවරයාට ) නැතිනම් අද තත්වය අනුව ආණ්ඩුකාරවරයාට අභියාචනයක් ඉදිරිපත් කළ හැකිය. එවිට සිදුවන්නේ කුමක්දැයි අවශ්‍ය නම් කෙනෙකුට අවශ්‍ය  නම් තනතුර අහිමි කරන මන්ත්‍රීවරයෙකුට දැන් පරීක්ෂා කර බැලිය හැකිය.
 
ඉතා මෑතක දී මනෝ ගනේෂන් ගේ පක්ෂයේ (ඉනිමග) උඩපලාත ප්‍රා.සභාවේ මන්ත්‍රී  කනගරත්නම් ඉවත් කිරීමට එම පක්ෂය තීරණය කළේය. කනගරත්නම් නඩුවක් පැවරීය. එක දවසකින් හෝ දෙකකින් ඔහු මන්ත්‍රී  ධූරයෙන් ඉවත් කිරීමට එරෙහිව තහනම් නියෝගයක් නිකුත් විය. කනගරත්නම් අදටත් උඩපලාත සභාවේ මන්ත්‍රීවරයෙකි.
මනෝ ගේ පක්ෂයේම මහනුවර මහ නගර සභාවේ මන්ත්‍රී  විග්නේෂ්වරන් සිය ගේ තනතුර රැකගන්න අභියාචනාධිකරණයට ගියේය. දැන් ඔහුගේ තනතුරට මහයියාවේ විමලචන්ද්‍රන් පත්ව ඇත. අභියාචනාධිකරණ නඩුව තවම විභාගයට ගෙන හෝ නැත. මනෝ ගේ පක්ෂයේ ම පන්විල ප්‍රා.සභාවේ විජේනද්‍රන් කිසිදු අධිකරණයට ගියේ නැතිවම තනතුර අහිමි කර ගත්තේය.
 
අනෙක් මෑතම උදාහරණය මඩකලපුවෙනි. ප්ලොට් සංවිධානය, ඉලංකෙයි තමිල් අරසු කච්චි පක්ෂයේ (ගෙය) සන්ධානගත පක්ෂයකි. 20 වන ව්‍යවස්ථා  සංශෝධනයට එම පක්ෂයේ මඩකලපුව මන්ත්‍රී  විලේන්ද්‍රන්   මහතා ආණ්ඩුව සමඟ ඡන්දය දුන් අතර ඔහුගේ සමීපතම ආධාරකරුවන් වූ පලාත් පාලන නියෝජිතයින් සිව් දෙනෙකු විනය පරීක්ෂණයක් හෝ තියන්නේ නැතිව නෙරපා හරින්නට ද්‍රවිඩ  සන්ධානය කටයුතු කළේය. එයට යාපනය මහාධිකරණයේ නඩුවක් පැවරුණි. ලිඛිත විරෝධතාවයෙන් පසුව ද්‍රවිඩ  සන්ධානය අවම වශයෙන් අධිකරණයට නීතිඥයෙකු හෝ යොමුු කළේ නැත. එම මන්ත්‍රීවරුන්  සිව් දෙනාගෙන් තිදෙනෙකුගේ මන්ත්‍රී  ධූර දැන් රැකී ඇත. අනෙක් මන්ත්‍රීවරයාගේ  තීන්දුව ඉදිරියේ ප්‍රකාශයට  පත් කිරීමට නියමිතය.
 
සමගි ජනබලවේගයට සහාය දුන් එජාප මන්ත්‍රීවරුන්  ගේ තනතුරු අහිමි වූ නමුත් එකම ආකාරයේ, එකම සිද්ධිවලට ඉනිමග, ගෙය ලකුණින් තරඟ කළ අය ගේ තනතුරු රැකී ඇත! විනය ක්‍රියාමාර්ගයක් සම්බන්ධයෙන් තාර්කික ප්‍ර වේශයක් ගත් සියළු දෙනාගේ මන්ත්‍රී ධූර රැකී ඇත!!
 
‘අපේ මන්ත්‍රී  ධූර රැකගත හැකිද?‘‘
 
පිළිතුර ‘ඔව්‘ යන්නය. දැන් නඩුවෙන් පැරදී ඇති 72 ත් විනය පරීක්ෂණයෙන් වරදකරු වී නියමිත කාලය තුල අධිකරණයට නොගිය පිරිසත් හැර අන් සියල්ලගේම මන්ත්‍රී  ධූර රැක ගත හැකිය.
 
සූරියවැව මන්ත්‍රී  සුජිත් මුතුකුමාරණ සිද්ධියේ දී ඔහුගේ තනතුර රැකුණේ නීතිඥ ගුණරත්න වන්නිනායක, අනුරුද්ධ ලියනගේ, කොල්ලුරේ ඇතුළු පිරිස නිසාය. හිටපු ආණ්ඩුකාර මෛත්‍රී  ගුණරත්න කෙහෙල්ඇවරිය පක්ෂයේ මන්ත්‍රීවරුන්  ගණනාවක ගේ තනතුරු අහිමි කළේය. එයට පෙර උසාවියට ගොස් එජාප මන්ත්‍රීවරුන්ගේ  තනතුරු රැක දුන්නේ ය. දේශපාලන පක්ෂ ගණනාවක මන්ත්‍රීවරුන්ට  ඔවුන්ගේ තනතුර රැකගන්නට මම පාර කියා දුන්නෙමි. මේ ගැන විශේඥතාව සහිත පරිපාලන සේවයේ නිලධාරීන් රැසකි. 2015 බල පෙරළියට පාර කැපූ 2012 ඔක්තෝබර් 18 හයිඩ් පාර්ක් රැළිය නිසා පක්ෂ තහනමට ලක් වූ අශෝක් අබේසිංහ, පාලිත රංගේබණ්ඩාර හා පාලිත තෙවරප්පෙරුම ගේ මන්ත්‍රී ධූර රැකුනේය. අද ඒ පාලිත රංගේ බණ්ඩාර මහ ලේකම්වරයා වී එජාප මන්ත්‍රීවරුන්  ඉවත් කිරීමට අත්සන යොදන්නේය. සිරිකොත තාප්ප පෙරලූ, කුරුදු  පොළු සටන් කළ, කෘත්‍යාධිකාරී  මණ්ඩලය තියන්නට පාරට තාර දැමූ දිනයේ කරු - සජිත් වෙනුවෙන් සටන් කළ කිසිදු මන්ත්‍රීවරුන්  ද තනතුරු රැක ගත්තේය. නීතිඥ ජගත් ලියනාරච්චි ගේ ශාස්ත්‍රීය  පරිචය, ශිරාල් ලක්තිලක ගේ සටන් අත නොහැරීමේ ගුණය නිසාය.
 
2020 මහා මැතිවරණ සමයේ එජාපය හා සජබ අතර මන්ත්‍රීවරු රැක ගැනීමට තිබුණේ දැවැන්ත සටනකි. එජාපය තෝරාගත් පිරිසකට විනය පරීක්ෂණ ලිපි යැවීය. පක්ෂයෙන් ඉවත් කිරීමේ ලිපි ද යැවීය. සජබ මේ මන්ත්‍රීවරුන්ගේ මොරාල් නංවන්නට එම ලිපි මත පදනම්ව නඩු පැවරීය.
 
විනය පරීක්ෂණයකට ලිපියක් ලැබුණු පමණින් තහනම් නියෝගයක් ඉල්ලීම ‘දේශපාලනිකව තාර්කික වූ නමුත්‘ මගේ අදහසට අනුව නම් ‘ජම්ප් ද ගන්‘ පන්නයේ (අනුවණ) ක්‍රියාවකි . වැරදි දේශපාලන තීරණයකි. නීතිය වගේම දේශපාලන සාධක ද එහි දී සැලකිය යුතුව තිබුණි. කිසිදු මන්ත්‍රීවරයෙකු  එජාපයෙන් නෙරපා හැර නව මන්ත්‍රීවරුන්  පත් කර නොතිබූ නිසා සජබ නීතිඥයින් ඉල්ලා සිටි ‘තහනම් නියෝගය‘ ලැබුණේ නැත. සැබවින්ම, එවැනි තහනම් නියෝගයක් ලබාදීමේ පදනමක් ද නොතිබූ අතර, ඉතිහාසයේ කිසිම දවසකට විනය පරීක්ෂණ ලිපියකට දිසා අධිකරණයක් තහනම් නියෝග ලබාදී ද නැත.
 
මහා මැතිවරණය අවසන් විය. සජබ ට සහාය දුන් මන්ත්‍රීවරුන්ගේ  මන්ත්‍රී ධූර රැක ගැනීමට කොළඹ  පලාත් අභියාචන මහාධිකරණය ද, පසුව ශ්‍රේෂ්ඨාධිකරණයේ ද නඩු පැවරුණි. දැන් එම නඩු දෙකම පරාජයට පත්ව ඇත.
 
දිසා අධිකරණයේ තහනම් නියෝග ලබා ගැනීම නීතිඥයින් සතු කටයුත්තකි. නමුත්, එය දේශපාලන තීරණයක් වූ වේ නඩුවේ ප්‍රමුඛ  නීතිඥයින් දිසා අධිකරණවලට යාමට දැක්වූ නොකැමැත්ත නිසා ය. (සිය රියදුරා වෙනුවෙන් නීතිඥ කබාය දමාගත් ලලිත් - ගාමිණි යුවල මට සිහි වේ) ශ්‍රේෂ්ඨාධිකරණ  නඩුවේ තාක්ෂණික දෝෂ තිබූ බව කියවේ. නඩුවේ ලේඛනගත නීතිඥයා ම දිවුරුම් ප්‍රකාශ  අත්සන් කිරීම වැනි මුලික ව්‍යාකරණ  වැරදීම පුදුම සහගත ය. මේ නඩු කටයුත්ත පිළිබඳ සැබෑ උනන්දුවක්, වෘත්තීය භාවයක් තිබුනාදැයි මට සැකය.
 
ප්‍රකට සරත් අමුණුගම නඩු තීන්දුව (SC SPL.(E) NO. 4/99) මගින් මන්ත්‍රී  ධූරය රැක ගැනීමේ ක්‍රමය  පැහැදිලිව කියා ඇත. සමහර මන්ත්‍රී  ධූර රැකුණු අන්දම ම විහිළු සහගත ය. මාතලේ මන්ත්‍රී  ඇලික් අළුවිහාරේ මිය යන විට එජාප ලැයිස්තුවේ ඊලඟට සිටි නන්දිමිත්‍ර  ඒකනායක යි. නන්දිමිත්‍ර  ඒ වන විට එජාපයෙන් ඉවත්ව, පුටුව ලකුණෙන් මධ්‍යම  පළාත් සභාවට පත්වූ මන්ත්‍රීවරයෙකි . ඇලික් මිය ගිය පසුව, 2009 ජූනි 9 දින නන්දිමිත්‍ර  නම් ශ්‍රීලනිප පලාත් සභා මන්ත්‍රීවරයා  එජාප මන්ත්‍රීවරයෙකු  ලෙස පාර්ලිමේන්තුවට ගියේය. නන්දිමිත්‍ර ට මන්ත්‍රීකම  ලැබීම වලක්වන්නට එජාපයට හැකිවූවේ නැත. මම මේ කථාවෙන් කියන්නේ, තේරී පත්වන මන්ත්‍රීවරයෙකු  ගේ තනතුර අහිමි කිරීම කොතරම් දුෂ්කර කාර්යයක් ද යන්න ය.
 
නමුත් ජූනි 18 (අද) කෑගල්ල නගර සභාවේ ලක්ෂමන් දිසානායක ගේ නඩුව ද කොළඹ දිසා අධිකරණය එජාපයට ගාස්තු ගෙවීමට යටත්ව නිෂ්ප්‍රභ  කරන ලදී. එජාපය මන්ත්‍රීවරුන්  එකිනෙකා නිශ්චිතව ඉවත් කරන විට, සජබ ට ඩයනා ගමගේ ඉවත් කරගන්න නොහැකිවීම තේරුම් ගත යුත්තේ කෙසේ ද?
 
20 වන සංශෝධනයට පක්ෂව ඡන්දය දුන් ඩයනා ගමගේ පක්ෂයෙන් ඉවත් කළ හැකි බව කියමින් මම 2020 නොවැ. 01 දීර්ඝ ශාස්ත්‍රීය  ලිපියක් පළ කළෙමි. එහි අවසන් වැකිය මෙසේය. ‘‘පක්ෂ තීන්දුවලට විරුද්ධව කටයුතු කරන පුද්ගලයින් ඉවත් කළ නොහැකි ය යන්න මිත්‍යාව කි. නමුත්, එය සිදු කිරීමට නම්, මා පෙර කී ලෙසම ‘‘විශේෂඥතාව සොයා ගත යුතු අතර, වෘත්තීය භාවය ස්ථාපනය කර ගත යුතු‘‘ ව ඇත. එක රොත්තට මන්ත්‍රීවරුන්  72 ක්, සමහරවිට 750 ක් ඉවත් කිරීමට එජාපයට හැකිවන්නේ ‘විශේෂඥතාව හා වෘත්තීය භාවය‘ එජාපයට ඇති නිසා ද?
 
වැරදි උපක්‍රමය !
 
ඕනෑම පක්ෂ තීන්දුවලට විරුද්ධව කටයුතු කරන පුද්ගලයින් ඉවත් කළ නොහැකි ය යන්න මිත්‍යාවකි. නමුත්, එය සිදු කිරීමට නම්, මා පෙර කී ලෙසම ‘‘විශේෂඥතාව සොයා ගත යුතු අතර, වෘත්තීය භාවය ස්ථාපනය කර ගත යුතු‘‘ ව ඇත.
ඕනෑම විනය පරීක්ෂණයක දී කාලය අමිල සාධකයයි. කල් ගැනීමත්, උපක්‍රමශීලීව  මුහුණදීමත් කාල තරණයේ මාවතයි. විනය ක්‍රියාමාර්ග  අවසානයේ පක්ෂයෙන් නෙරපීම සිදු කරන්නේ නම්, එයට තනි තනිව දිසා අධිකරණයේ නඩු පවරා තහනම් නියෝගයක් ගැනීමට සජබ ආධාරකරුවන් වූ එජාප මන්ත්‍රීවරුන්ට  ඇත. අද පවත්නා කොරෝනා තත්වය අනුවත්, නඩු දින ලබාදීමේ රටාවත් අනුව පලාත් පාලන ආයතනයේ කාලය ලබන වසරේ අවසන් වන තුරු පහසුවෙන්ම නඩුව ඇදගෙන යා හැකිය.
අනාගතයේ දවසක සාගර කාරියවසම් මහ ලේකම්වරයාගේ ලිපියක් ලැබෙන්නේ නම් පොහොට්ටුවේ මන්ත්‍රීවරුන්ට  ද, එය එලෙසම අදාළ වනු ඇත්තේය.
නමුත්, දැන් ප්‍රශ්නගත  මන්ත්‍රීවරුන්  69 හෝ 72 හි ඉරණම ලියැවී අවසන් ය. ඔවුන්ගෙන් අති බහුතරය මා දන්නා හදුණන රනිල් වික්‍රමසිංහ  නායකත්වයට එරෙහිව වසර 10 කට වැඩි කලක් සජිත් ප්‍රේමදාස  - කරු ජයසූරිය කඳවුරේ සිටි අයයි. සිරිකොත තාප්ප ගැලවූ, පිටකෝට්ටේ පාරට තාර දාන්නට, 2012 සජිත් ගේ මැයි දින පෙළපාලියට පැමිණි අය යි. දිස්ත්‍රික්කයේ  සජබ මතය මෙහෙයවන්නන් ය.
 
විසඳුම කුමක් ද?
 
එජාප - සජබ ප්‍රතිපත්ති  වෙනසක් නැත. ඇත්තේ කල්ලි ගැටුමකි. සජබ හා එජාප නායකයින්, තමන් වෙනුවෙන් කොට ඇද්ද මන්ත්‍රීවරු පිළිබඳ සැබෑ කැක්කුමක් ඇති නම් ඔවුන්ගේ මන්ත්‍රී  ධූර රැක දීම සඳහා නායකත්ව මට්ටමේ සාකච්ඡාවකින් ප්‍රශ්නය  විසඳාගත යුතුව ඇත. ඔය කොයි කණ්ඩායමටත් ඊලඟ ජනාධිපතිවරණයක දී හෝ පාර්ලිමේන්තු මැතිවරණයක දී බලය ලබා ගැනීමට අවශ්‍ය  බල ඇණිය දැන් මේ ගැටුමට මැදිවී සිටින 750 කට ආසන්න පිරිස ය. එකම පක්ෂයක් වෙනුවෙන්, එකම පාට තොප්පි දමාගෙන, එක කෑම පැකට් එක බෙදාගෙන කෑ පිරිසකගේ මන්ත්‍රී  ධූර අහිමි කිරීම/අහිමිවන තැනට කටයුතු යෙදීම කිසි ලෙසකින් හෝ යුක්ති යුක්ත වන්නේ නැත. අවම වශයෙන් මේ පක්ෂ දෙක මේ මන්ත්‍රී  ධූර අවුල ලිහාගන්නට හෝ සාකච්ඡා මේසයකට පැමිණිය යුතුව ඇත.
රටකට විපක්ෂය නැතිවීමේ ඛෙදවාචකය 1977 සිට 1992 දක්වා අප තේරුම් ගත යුත්තේ ය. උතුර ගින්න ඇවිලීයන්නට අමිර්තලිංගම් ලා පාර්ලිමේන්තුවෙන් ඉවත් කිරීම හේතු විය. 2010 – 2014 රටේ විපක්ෂය වූයේ එජාපය නොව සිවිල් සංවිධාන යි. විපක්ෂය දුර්වලවීම එජාප - සජබ ගැටුමේ අවසන් ප්‍රතිඑලයි. එයින් කිසිවෙකුට සිදුවන වාසියක් නම් නැත.
 
සජබ ට ඩයනා ගමගේ පාර්ලිමේන්තු මන්ත්‍රී  ධූරයෙන් ඉවත් කළ නොහැකි වූයේ ඇයි?
 
එජාපය ඉවත් කරන්නට යන මන්ත්‍රීවරුන්  750 හා සජබ මන්ත්‍රීනි  ඩයනා ගමගේ ට ඇත්තේ එකම චෝදනාව කි. ඒ පක්ෂයේ විනය කඩ කිරීම ය. නමුත්, ඩයනා ගමගේ ඉවත් කිරීම තබා, එහි මුලික අදියරට හෝ තවමත් සජබ පැමිණ නැත. (පුරවැසි භාවය පිළිබඳ නඩුවකින් ඇය ඉවත් කරන්නේ නම් එය වෙනම කාරණයකි) මෙය අහම්බයක් ද? කිසි ලෙසකින් හෝ එය අහම්බයක් නොවේ.
 
දේශපාලන පක්ෂයක් අවිධිමත් ආකාරයෙන් මහජන නියෝජිතයෙකු නෙරපා හරින්නේද? මන්ත්‍රී  ධූරය රැක ගැනීමට ඕනෑ තරම් මාවත් තිබේ. විනය චෝදනා එල්ල වූ මහනුවර සරත් අමුණුගම, කෙහෙළිය, බදුල්ලේ ලක්ෂමන් සෙනෙවිරත්න, පොළොන්නරුව අර්ල් ගුණසකර, ගාල්ල මනූෂ නානායක්කාර, ගම්පහ උපෙක්ෂා ස්වර්ණමාලී, කුරුණෑගල නිමල් විජේසිංහ, මහනුවර අබ්දුල් කාදර්, හම්බන්තොට නිහාල් ගලප්පත්ති, නියතපාල, ප්‍රදීප්  හපන්ගම, තිලක් කරුණාරත්න, හේමකුමාර, අනුර බන්ඩාරනායක මේ කිසිවෙකුට මන්ත්‍රී  ධූර අහිමි වූවේ නැත. මන්ත්‍රී  ධූරය අහිමි කර ගන්නේ නම්, එහි වරද ඔබගේම ය. මන්ත්‍රීවරුනි, අතහරින්න එපා. නිවැරදි මාවතේ උත්සහ කර බලන්න! සටන් කරන මිනිසුන්ට දිනන්නට පුළුවන් ය.
 
රජිත් කීර්ති තෙන්නකෝන්
දකුණ හා මධ්‍යම  පළාත් හිටපු ආණ්ඩුකාර

Page 169 of 172