පුවත්

"ලංකාවේ ලියාපදිංචි කෘෂි රසායන වර්ග 150 ක් පමණ තිබෙනවා. ඒවාගෙන් 80 ක් (55% ක්) ම වල් නාශක. හෙට කැබ්නට් රැස්වීමේ දී එකම වල් නාශකයක් හෝ නැතිව කෘමි නාශක, දිලීර නාශක කිහිපයක් ගෙන්වන්න ආණ්ඩුව අනුමැතිය ගන්නට හදනවා. මේක ගොවියාගේ ඇස් බැඳවා කුඹුරුට හේනට දක්කන්න හදන ප්‍රෝඩාවක්. වල් නාශක නැතිව වී, ඉඩඉරිඟු, තේ වගාව කරන්න බැරි බව කෘෂි විශේෂඥයින් කියනවා. මහා පරිමාන වගාකරුවෝ සියළු දෙනා දැන් නන්නත්තාර වෙලා. නැගෙනහිර, රජරට, මහියංගනය අතුළු මහවැලි කලාපයේ ගොවියන්ට වල් නාශක, කෘමි නාශක ලැබුනේ නැත්තම් ඔවුන් සදා අනාථ වෙනවා " යැයි මාතලේ දිස්ත්‍රික් පාර්ලිමේන්තු මන්ත්‍රීණී රෝහිණී කවිරත්න පවසයි.

මාධ්‍ය වෙත නිවේදනයක් නිකුත්කරමින් විපක්ෂ මන්ත්‍රීවරිය මේ අදහස් දක්වා ඇති අතර වැඩිදුරටත් මෙසේද සඳහන් කර ඇත.

ආණ්ඩුව කියන පට්ටපල් බොරු අහලා ගොවියෝ ටික දෙනෙක් වී වගාව කරලා තියෙනවා. හැබැයි දැන් ගොවියාට වල්ටික ගලවා ගන්න බෑ. කෘෂි රාසායන මිල දැන් හතර ගුණයකට වඩා ඉහළ ගිහින්. කළු කඩේ තියෙන්නේ ප්‍රමිතියක් නැති හොර බෙහෙත්. ආණ්ඩුව දැන් මාසයක් තිස්සේ ගොවියාට බෙහෙත් ටික දෙනවා කියනවා. තවම කිසිම ආනයන අවසරයක් දීලා නෑ.

සඳුදා කැබිනට්ටුවේ දී ඇස්වහලා කෘෂි රසායන කිහිපයකට අනුමැතිය ගන්න හදනවා. නමුත්, ඒ්වායෙන් විතරක් වගාව කරන්න බෑ. මේ ලැයිස්තුවේ සියළුම වල් නාශක ඉවත් කරන්නට කාෂිකර්ම ලේකම් අද උපදෙස් දීලා තියෙනවා. මේ මහාචාර්ය ලේකම් දන්නේ නැද්ද වී වගාවේ වල්ටික දවස් 45 ක් මර්ධනය කළේ නැත්තම් වී කරල බොල් වෙනවා කියලා. වල් තියෙන කුඹුරකට ‘නැනෝ නයි රාජයා’ ගැහුවම ගොයමට වඩා වේගයෙන් වල් ටික හැදෙන බව අමුතුවෙන් කියන්න දෙයක් නෑ. මේක බොරු ඇස්බැන්දුමක්. ගොවියා මඩට දාලා, හේනට දාලා තවදුරටත් විනාශ කරන්න හදනවා. කන කර උගස් තියලා වගාවට යන ගොවියා මෙහෙම විනාශ කරන උන් මේ වැහිදවස්වල එලියට බහින්න එපා.

රාජ්‍ය අමාත්‍ය ෂෙහාන් සේමසිංහගේ අනාගත බලශක්ති ඇමති ධුරයට තමන් එක සිතින් සුභ පැතුම් එක් කරන බව බලශක්ති අමාත්‍ය උදය ගම්මන්පිල පවසා ඇති බව වාර්තා වෙයි.

ආණ්ඩුව හිතවාදී වෙබ් අඩවියක් වන සී නිව්ස් මේ බව වාර්තා කර ඇති අතර ආණ්ඩුව සම්බන්ධයෙන් තමන් සිදුකරන ලද්දේ සත්‍යවාදී ප්‍රකාශයක් බව වගකීමෙන් පවසන බවද ගම්මන්පිල අමාත්‍යවරයා පවසා ඇති බවත් එහි සඳහන් ය.

වත්මන් ආණ්ඩුව ඉතිහාසයේ දූෂිතම ආණ්ඩුවක් බවට ගම්මන්පිල අමාත්‍යවරයා කළ ප්‍රකාශයට ප්‍රතිචාර දක්වමින් රාජ්‍ය අමාත්‍ය ෂෙහාන් සේමසිංහ විසින් කළ ප්‍රකාශය ගැන විමසීමකදී අමාත්‍ය ගම්මන්පිල මෙසේ කියා සිටි බවත් එම පුවත කරුණු සඳහන් කරයි.

රජය විවේචනය කරමින් අමාත්‍ය ධුර දරන්නේ නැතිව ආණ්ඩුවෙන් එළියට යා යුතු බවත් වත්මන් ආණ්ඩුව දූශිත ආණ්ඩුවක් නම් එහි සිටින්නේ මන්දැයි රාජ්‍ය ඇමති ෂෙහාන් සේමසිංහ කහටගස්දිගිලිය නගරයේ දී සඳහන් කළේ ආන්ඩුවේ සෙසු පක්ෂ කොළඹදී පවත්වන ලද මහජන මන්ත්‍රණ සභාවෙන් පසුව බවත් එහි සඳහන් ය.

හානිකර බැක්ටීරියා සහිත චීන කාබනික පොහොර තොග රැගත් Hippo Spirit නෞකාව ශ්‍රී ලංකා මුහුදට ඇතුළු වී ඇති බව නාවික ගමනාගමන වෙබ් අඩවි තහවුරු කර තිබේ.

මේ වන විට අදාළ පොහොර තොගය නියමිත ප්‍රමිතියට නැති බව එනම් මෙරටට ඉතාම හානිකර බැක්ටීරියා ඇතුළත් බව අනාවරණය වී ඇත.

කෙසේ වුවත් චීන රාජ්‍ය තාන්ත්‍රික බලපෑම් මේ සම්බන්ධයෙන් එල්ලවී ඇති අතර පොහොර තොගයට අදාළ ගෙවීම් නොකිරීම හේතුවෙන් මහජන බැංකුව අසාදු ලේඛන ගතකළ බවත් දැනුම්දෙනු ලැබිණ.

මේ අතර මහජන බැංකුව ආශ්‍රිත ආරංචි මාර්ග සඳහන් කරන්නේ මෙරට අධිකරණයක් නිකුත්කර ඇති වාරණයක් හේතුවෙන් මුදල් ගෙවීමට නොහැකිව ඇති බවයි.

මේ අතර මෙරට සිටින ප්‍රමුඛතම පාංශු විද්‍යාඥයන් අනතුරු අඟවා ඇත්තේ මෙකී බැක්ටීරියා ඇතුළත් බවට මෙරට දී දෙවරක් තහවුරු වූ පොහොර කිසිසේත් වගාබිමට නම් මුදානොහරින ලෙසය.

එහෙත් පසුගියදා චීන තානාපති කාර්‍යාලයේ කැඳවීමට ගිය ආණ්ඩුවේ ඇමතිවරුන් තෙවැනි පාර්ශ්වයක් හරහා මේ පොහොර සාම්පල පරීක්ෂා කිරීමට එකඟව ඇති බවත් වාර්තා වෙයි.

මෙරටට කාබනික පොහොර ආනයනය කරන ලද සමාගමේ දේශීය නියෝජිත ආයතනයේ එක් අධ්‍යක්ෂකවරයෙකුට තමාගේ ඥාතිත්වයක් ඇති බව සත්‍ය නමුත් එහි ව්‍යාපාර කටයුතුවලට තමන්ගේ කිසිදු සම්බන්ධතාවයක් නැතැයි අග්‍රාමාත්‍ය ලේකම් ගාමිණී සේදර සෙනරත් සඳහන් කරයි.

එම සමාගමට ව්‍යාපාර කටයුතු සිදුකිරීමේදී තමන් කිසිදු මැදිහත්වීමක් හෝ බලපෑමක් කිසිසේත්ම සිදු කර නොමැති බව ද පවසයි.

තමන් එවන් මැදිහත්වීමක් හෝ බලපෑමක් කර ඇතැයි කිසිවෙකුට සාක්ෂි හෝ කරුණු ඇත්නම් ඒ ගැන විධිමත් පැමිණිල්ලක් සිදුකර ඕනෑම විමර්ශන ආයතනයකින් පරීක්‍ෂණ සිදු කරන ලෙසද ඔහු ඉල්ලයි.

අදාල විමර්ශන සඳහා සහාය ලබාදීමට තමන් ඉතා කැමැත්තෙන්ම ඉදිරිපත් වන බවත් ඔහු පවසයි.

මේ සම්බන්ධයෙන් අග්‍රාමාත්‍ය මාධ්‍ය අධ්‍යක්ෂ නිවේදනයක් නිකුත්කර ඇත.එම නිවේදනය පහත දැක්වෙයි.

තම ආණ්ඩුවක් යටතේ දී ගොවියට මේ තරම් ප්‍රශ්න ඇති වෙන්ට ද ඉඩ නොදෙන බවත් තමන් ගොවියා ගැන කොච්චර මේ ආණ්ඩුව සමග කතා කරත් මේ ආණ්ඩුව ඇහුම්කන් නොදෙන බවත් හිටපු ජනාධිපති මෛත්‍රීපාල සිරිසේන පවසයි.

හිටපු ජනාධිපති මෛත්‍රීපාල සිරිසේන මෙසේ අදහස් දක්වා ඇත්තේ බකමූණ නගර මධ්‍යයේ අඛණ්ඩ උපවාසයක යෙදී සිටින ගොවීන් හමුවීමට ගිය අවස්ථාවේ ය.

මොරගහකන්ද සහ ඇලහැර ගොවිජන ව්‍යාපාරයේ ගොවි සංවිධාන 41ක් ඒකාබද්ධව ගොවිතැනට පොහොර ලබා දෙන ලෙසට බලපළකරමින් ඉකුත් 24 වැනිදා අඛණ්ඩ උපවාසයක් ආරම්භ කරනු ලැබිණ.

කෘෂිකර්ම ඇමති නියරක යන්ඩ දන්න කෙනෙක් නොවන බවත් මෙහිදී හිටපු ජනාධිපති පැවසූ බව වාර්තා වෙයි.

"මම කීප වතාවක්ම කෘෂිකෘෂිකර්ම ඇමතිවරයා සමඟ ගොවියාගේ පොහොර ප්‍රශ්නය පිළිබඳව සාකච්ඡා කළා. නමුත් යහපත් ප්‍රතිචාරයක් ලැබුනේ නෑ. යම් යම් රාජ්‍ය අමාත්‍යවරුන් මට මඩ ප්‍රහාර එල්ල කරනවා. ගොවීන් මුහුණ දෙන ප්‍රශ්න නිසා මම කිව්වා පොලොන්නරුවට යන්න විදිහක් නෑ කියලා කිවුවා . ඒක පදනම් කර කරගෙන තමයි ඒ රාජ්‍ය අමාත්‍යවරුන් මට මඩ ප්‍රහාර ගහන්නේ. ඒවා මම ගණන් ගන්නේ නැහැ." යනුවෙන් ද හිටපු ජනාධිපති මෛත්‍රීපාල සිරිසේන පවසා ඇත.

එහිදී "නැවත බලයට පත්වුවහොත් වී ගොවීන් වෙනුවෙන් කුමක් කරන්නේද ?" යනුවෙන් ගොවියකු ඇසූ ප්‍රශ්නයකට පිළිතුරු දුන් හිටපු ජනාධිපති පවසා ඇත්තේ , තමා ගොවීන් අමාරුවේ නොදමන බවත්, කාබනික පොහොර භාවිතයෙන් වී ගොවිතැන් ‍ක්‍රමානුකූලව වගා කිරීමට ගොවියා හුරු කරවන බවයි.

ලෝකයේ කිසිදු රටක සීයට සීයක් කාබනික පොහොර භාවිතයෙන් ගොවිතැන් කරන්නේ නැති බවත් ,ඕස්ට්‍රේලියාව පවා වගා කටයුතු කරන්නේ කාබනික පොහොරවලින් සීයට 50කින් පමණ බවත් මෙහිදී හිටපු ජනාධිපති පවසා ඇත.

තවද තමා ගොවීන් වෙනුවෙන් පෙනී සිටියේ 1980 දශකයේ සිට පමණ බවත් ගොවීන් වෙනුවෙන්, ගොවීන් වස බී මැරෙන අවස්ථාවක තමා ගොවි ජනතාව බේරාගැනීමට පොළොන්නරුව නගරයේ උද්ඝෝෂණය කරමින් පළමුවරට මිනීපෙට්ටිවලට පවා කර ගැසූ බව කියමින් ඉතිහාසයත් ඔහු සිහිපත් කර ඇත.

අනුරාධපුර දිස්ත්‍රික්කයේ හොරොව්පොතාන, තඹුත්තේගම සහ පදවිය ප්‍රදේශවල ප්‍රාථතමික පාසල් සිසුන් 30ක් ගුරුවරුන් තිදෙනකු සහ එක් විදුහල්පතිවරයකුට කොරෝනා වයිරසය ආසාදනයවී ඇති බවට තහවුරු වූ බව අනුරාධපුර දිස්ත්‍රික් වසංගත රෝග විද්‍යාඥ වෛද්‍ය ආර්.එම්.එස්.බී. රත්නායක  පවසයි.

"අනුරාධපුර දිස්ත්‍රික්කය තුළ කොවිඩ් රෝගීන් විශාල වශයෙන් හමුවන බව පසුගිය සතිය තුළ අපිට වාර්තා වුණා. දින 5කට අපිට රෝගීන් 650 ඉක්මවා වාර්තා වුණා. අනුරාධපුර දිස්ත්‍රිකකයේ ප්‍රාථමික විදුහල්වල සිසුන් සහ ගුරුවරුන් කිහිප දෙනෙක් රෝගයට ගොදුරු වෙලා තියෙනවා."

ඔවුන් අතරින් සංකූලතා පෙන් වූ පිරිස් රෝහල් ගත කර ඇති අතර සෙසු පිරිස නිවෙස් නිරෝධායනයට යොමු කර ඇත.

එම ආසාදිතයන්ගේ ආශ්‍රිතයන් 100 පමණ නිරෝධායනයට යොමු කර ඇත.

ලංකාදීප

චීන පොහොරවලට අනිවාර්යෙන්ම ඩොලර් මිලියන 9ක් ගෙවීමට සිදුවන බව මහජන බැංකුවේ සාමාන්‍යාධිකාරී රංජිත් කොඩිතුවක්කු පවසයි.

ඔහු මේ කරුණු සඳහන් කරන්නේ චමුදිත සමරවික්‍රම සමග youtube සාකච්ජාවකට එක්වෙමින්ය.

එහිදී ඔහු පෙන්වා දුන්නේ පොහොරවල පරීක්ෂණ වාර්තා පැමිණීමට පෙර ණයවර ලිපි විවෘත කොට ඇති බවත්, රජයේ පොහොර සමාගමේ අඩුපාඩු ඊට බලපා ඇති බවත් දැන් කිසිවක් කිරීමට නොහැකි බවත් ය.

බැංකුව ණයවර ලිපි විවෘත කිරීමේදී විස්තරාත්මක තොරතුරු වාර්තා නොවන බවත්, ප්‍රමිති වාර්තාව පැමිණ ඇත්තේ ඊට පසුව බවත් ඔහු පෙපෙන්වාදී සිටියි.

එසේම වාරණ නියෝගයක් හේතුවෙන් අදාළ මුදල ගෙවීමට නොහැකි වී ඇති බව පෙන්වා දුන් මමහජන බැංකුවේ සාමාන්‍යාධිකාරීවරයා අධිකරණයට නොගියේ නම් දැනටමත් මුදල් ගෙවා ඇති බවද පවසා ඇත.

චීන තහනම හේතුවෙන් යම් අර්බුදයක් මතුවිය හැකි බවද පෙන්වා දෙන ඔහු කෙසේවෙතත් මහජන බැංකුව අත කිසිදු වැරද්දක් නොමැති බවද පවසයි.

"පක්ෂ රැස්වීමෙදී එකක් කියලා එළියට ගිහින් තව එකක් කියනකොට ඒක අපිට ඉවසන් ඉන්න බැරි වෙනවා ශ්‍රී ලංකා පොදුජන පෙරමුණ හැටියට. බල්ලා තමයි නැට්ට වනන්නේ. නැට්ටෙන් බල්ලෙක් වනලා නෑ නේ කොහෙවත්. ගැලපෙන්නැත් නම් දික්කසාද වෙන්න ඕනේ.” යැයි අමාත්‍ය රෝහිත අබේගුණවර්ධන පවසයි.

ආණ්ඩුව දූෂිත බවට පසුගිය 29 කොළඹ පැවති ආණ්ඩුවේ හවුල්කාර පක්ෂ වල මහජන මන්ත්‍රණ සභාවේ චෝදනා එල්ල කරනු ලැබුණු අතර ඊට ඉහත ආකාරයට පොදුජන පෙරමුණේ මැතිඇමතිවරුන් ආවේගවත් ප්‍රතිචාර දක්වනු ලැබිණ.

එහිදී විශේෂ කරුණක් වන්නේ ආණ්ඩුවේ හවුල්කාර පක්ෂ වහාම ඉල්ලා අස්විය යුතු බවට පොදුජන පෙරමුණේ මැති ඇමතිවරුන් අභියෝග කිරීමයි.

රාජ්‍ය අමාත්‍ය ශෙහාන් සේමසිංහ මේ සම්බන්ධයෙන් අදහස් දක්වමින් , “ගම්මන්පිල ඇමතිතුමා කිව්වා දූෂිත ආණ්ඩුවක් කියලා. ඒ තරම් දූෂිත රජයක් නම් මේක ඇයි එතුමා ඒක තුළ ඉන්නේ.” යනුවෙන් ප්‍රශ්න කර ඇත.

තවද ආණ්ඩුවේ පසුපෙළ මන්ත්‍රීවරයකු වන තිස්ස කුට්ටිආරච්චි මේ දිනවල වැඩි මාධ්‍ය අවධානයක් දිනාගැනීමට උත්සාහ කරමින් සිටියි. ඔහු කියන්නේ විමල්ලා පොහොට්ටු නායකයන්ගේ පසුපසට පහර දෙනවා නම් අප ඔවුන්ගේ පසුපසට පයින් ගැසීමට සූදානම් බවය.

මෙම ප්‍රකාශය පෙන්නුම් කරන්නේ පසුගියදා මහජන මන්ත්‍රණ සභාවේ විමල් වීරවංශ අමාත්‍යවරයා ව්‍යංගයෙන් පැවසූ දේ නිවැරැදිව ග්‍රහණය කරගන්නට තිස්ස කුට්ටි මන්ත්‍රී අසමත්ව ඇති බවයි.

සංචරණ සීමා ඉවත්‌ කිරීම ආදී තත්ත්වයන්‌ යටතේ තවත්‌ කොවිඩ් 19 රැල්ලක්‌ ඉතා ආසන්න කාලයක දී මෙරට තුළ ඇති වීමේ දැඩි අවදානමක්‌ පවතින බව ශ්‍රී ලංකා වෛද්‍ය සංගමය පවසයි.

එම අවදානම වළක්වා ගැනීම සඳහා ශ්‍රී ලංකා වෛද්‍ය සංගමය විසින් නිර්දේශ මාලාවක් ජනාධිපති ගෝඨාභය රාජපක්ෂ වෙත ලිඛිතව දැනුම් දී තිබේ.

තවත්‌ කෝවිඩ් රැල්ලක්‌ ඇති වීම වැළැක්වීම සඳහා සීමා කිරීම්‌ සහ නීති ක්‍රියාත්මක වන සන්දර්භය සලකා බැලීමේ දී මින්‌ පෙර පැවති සෑම අවස්ථාවකටම වඩා මෙම අවස්ථාවේ දී නිශ්චිත පියවර ගනු ලැබීම ඉතා වැදගත්‌ වන බව ඔවුහු අවධාරණය කරයි.

නැවත කොවිඩ් රැල්ලක්‌ ඇති වීම වැළක්වා ගැනීම සඳහා ශ්‍රී ලංකා වෛද්‍ය සංගමය නිර්දේශ කරනු ලැබූ පියවරයන් පහත දැක්වේ.

*ඉතා හොද අධීක්ෂණයක්‌ යටතේ වත්මන්‌ නීති හා සීමා කිරීම්‌ දැඩි ලෙස බලාත්මක කිරිම.

සෞඛ්‍ය අමාත්‍යාංශය මගින්‌ කොවිඩ්‌ පැතිරිම වැළැක්වීමේ අරමුණින්‌ පිළිගත හැකි හා සාධාරණ මහජන සෞඛ්‍ය මාර්ගෝපදේශ සහ රෙගුලාසි නිකුත්‌ කර ඇතත්‌, මෙම ක්‍රියාමාර්ග ක්‍රියාවට නැංවීමේ දී අතිශයින්‌ ලිහිල්‌ බවත්‌, මහජනතාව විසින්‌ ඒවාට අවනත නොවන බවත්‌ පෙනී ගොස්‌ තිබේ. බොහෝ දෙනෙක්‌ මුඛ ආවරණ පැළඳීම නිසි පරිදි සිදු නොකරන බව පෙනී ගොස්‌ ඇනි අතර කඩ සාප්පු, මහජන පොළ, පූජනීය ස්ථාන සහ අවමංගල්‍ය උත්සව වැනි පොදු ස්ථානවල සමාජ දුරස්ථභාවය නිසි පරිදි ක්‍රියාත්මක නොවේ.

මෙම රෙගුලාසි ක්‍රියාත්මක කිරීමට ප්‍රමාණවත්‌ පියවර ගන්නා ලෙස අපි රජයෙන්‌ ඉල්ලා සිටිමු. සෞඛ්‍ය සේවා අධ්‍යක්ෂ ජනරාල්‌ චිසින්‌ නිකුත්‌ කරන ලද සෞඛ්‍ය රෙගුලාසි සම්පූර්ණයෙන්ම ක්‍රියාත්මක වන බවට සමීපව නිරීක්ෂණය කිරීම සහ සහතික කිරීම අත්‍යවශ්‍ය වේ.

*ප්‍රමුඛතා කණ්ඩායම්‌ සඳහා ෆයිසර් එන්නතෙ හි තූන්වන මාත්‍රා බූස්ටරය.

ශ්‍රී ලංකාවේ සයිනොෆාම්‌ එන්නත ලබා ගත්‌ වැඩිහිටියන්ගෙන්‌ 7%ක්‌ කොවිඩ්-19 වෛරසයට එරෙහිව ප්‍රමාණවත්‌ ප්‍රතිශක්තියක්‌ වර්ධනය කර ගෙන නොමැති බව තහවුරු වී ඇත. පාසල්‌ නැවත විවෘත කිරීම සහ සංචරණ සීමාවන්‌ ඉවත්‌ කිරීම නිසා සිය මුණුපුරු මිණිපිරියන්‌ වෙත වැළඳී ඒ ඔස්සේ වෛරසය සම්ප්‍රේෂණය වීම වැනි කරුණු නිසා මෙම වැඩිහිටියන්ට කොවිඩ්-19 ආසාදනය චීමේ අවදානම වත්මන්‌ තත්ත්වය තූළ දී සැලකිය යුතු ලෙස ඉහළ ගොස්‌ ඇත. මෙම වැඩිහිටි පිරිස අනෙකුත්‌ වයස්‌ කාණ්ඩවලට වඩා කොව්ඩ්‌ වෛරසය නිසා දරුණු ලෙසින්‌ රෝගී තත්ත්වයට හා මරණයට ගොදුරු වේ.

තවද, කොච්ෂීල්ඩ්‌ එන්නන ලබා ගත්‌ සෞඛ්‍ය සේවා වෘත්තිකයන්ට දෙවන එන්නත ලබා දී මාස හයක්‌ ගත වෙමින්‌ ඇති බැවින්‌ මාස 6 ඉක්මවීමෙන්‌ පසු ඔවුන්ගේ ප්‍රතිශක්තිකරණ මට්ටම ක්‍රමයෙන්‌ අඬු වීමට පටන්‌ ගනී. මේ නිසා ඔවුන්‌ පහසුවෙන්‌ ම කොවිඩ්-19 ආසාදනය වීමේ අවදානම බෙහෙවින් ඉහළ යනු ඇත. එබැවින්‌, වයස අවුරුදු 60 ට වැඩි පුද්ගලයින්‌, ප්‍රතිශක්තිකරණ ඌනතා සහිත අවුරුදු 60 ට අඩු රෝගීන්‌ සහ සියලුම සෞඛ්‍ය සේවා වෘත්තිකයන්‌ හට ෆයිසර්‌ එන්නතෙහි තූන්වන මාත්‍රාව / බූස්ටර්‌ මාත්‍රාව ප්‍රමාදයකින්‌ තොරව ලබා දිය යුතුය. නුදුරු අනාගතයේදී තවත්‌ ආසාදන රැල්ලක්‌ ඇතිවීම වැලැක්වීම සඳහා මෙය ඉහළම ප්‍රමුඛතා කාර්යයක්‌ ලෙස සැලකිය යුතුය.

*අධි ව්‍යාප්ත වීම්‌ තත්වයන්‌ සහ සිදුවීම්‌ සීමා කරමින්‌ කටයුතු කිරිම.

පුද්ගලයන්‌ වැඩි වශයෙන්‌ ගැවසෙන සංවෘත පරිසරයන්‌ කොවිඩ්-19 ආසාදනය සඳහා අධි ව්‍යාප්ත වීමේ තත්වයන්‌ නිර්මාණය කරයි. එබැවින්‌ සංවෘත ස්ථානවල පැවැත්වෙන විවාහ උත්සව, ආගමික උත්සව, අවමංගල්‍ය උත්සව, සංගීත සංදර්ශන, සමාජ ශාලාවල රැස්වීම්‌ ආදියේ සංඛ්‍යාව සීමා කරමින්‌ පොදු උත්සවවලට අදාළ රෙගුලාසි සම්පූර්ණයෙන්ම ලිහිල්‌ කිරීම තවත්‌ කාලයක්‌ ප්‍රමාද කරන ලෙස අපි රජයෙන්‌ ඉතා ඕනෑකමින්‌ ඉල්ලා සිටින්නෙමු.

*පරීක්ෂණ සිදු කරමින්‌ කොවිඩ්‌ වැළඳී ඇති පුද්ගලයන්‌ සම්බන්ධයෙන්‌ නිරන්තර අවධානයක්‌ පවත්වා ගැනීම.

මීළඟ ආසාදන රැල්ල වැලැක්වීමට නම්‌, ආසාදනවල වැඩිවීමක්‌ කලින්‌ හඳුනා ගැනීම අතිශයින්‌ වැදගත්‌ වනු ඇත. සුපරීක්ෂාකාරිව කොව්ඩ්‌ ආසාදනය වී ඇති මට්ටම නිරීක්ෂණය කිරීම රජයට ඉක්මන්‌ ක්‍රියාමාර්ග ගැනීමට අවස්ථාව උදා කරනු ඇත. එබැවින්‌ කොවිඩ්-19 සම්බන්ධ නිරන්තරයෙන්‌ සිදු කරනු ලබන පරීක්ෂා කිරීම්‌ ක්‍රියාවලිය ශක්තිමත්‌ කිරීම ඉතා වැදගත්‌ වේ. එබැවින්‌ සෞඛ්‍ය අමාත්‍යාංශය ප්‍රජාව තූළ කොවිඩ්-19 සඳහා පරීක්ෂණ පවත්වා ගෙන යෑම ශක්තිමත්‌ ආකාරයෙන්‌ සිදු කරනු ඇතැයි අප විශ්වාස කරන අතර සියලුම ප්‍රධාන රෝහල්වල බාහිර රොගී අංශයන්හි ‘උග්‍ර ශ්වසන කලාප ආසාදන’ (SARI) නිරීක්ෂණ පද්ධති ශක්තිමත්‌ කිරීම අත්‍යවශ්‍ය වනු ඇත.

තවත් කොවිඩ් මරණ 19ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

සෞඛ්‍ය අංශ පෙන්වා දෙන්නේ එම මරණ ඊයේ (29) සිදුව ඇති බවය.

ඒ අනුව, මෙරටින් මේ දක්වා වාර්තා වී ඇති මුළු කොවිඩ් මරණ ගණන 13,725කි.

එම මරණ අතරට කාන්තාවන් 07 දෙනෙකු සහ පිරිමි පුද්ගලයින් 12 දෙනෙකු අයත්ය.

දිවයිනේ සියලු පාසල්වල 10,11,12 සහ 13 ශ්‍රේණිවල අධ්‍යයන කටයුතු නොවැම්බර් 8 වැනිදා ආරම්භ කරන බව අධ්‍යාපන අමාත්‍යාංශය පවසයි.

අපොස උසස් පෙළ සහ සාමාන්‍ය පෙළ පන්ති ආරම්භ කිරීම සඳහා වෙනම සෞඛ්‍ය මාර්ගෝපදේශ සංග්‍රහයක් සෞඛ්‍ය සේවා අධ්‍යක්ෂ ජනරාල්වරයා විසින් ඊයේ නිකුත් කරනු ලැබීය.

එම සෞඛ්‍ය මාර්ගෝපදේශ අනුව උසස් පෙළ සහ සාමාන්‍ය පෙළ පන්ති පවත්වාගෙන යා යුතු වෙයි.

වරාය, ඉන්ධන, තැපැල් , දුම්රිය දෙපාර්තමේන්තුව හා ගමනා ගමණ මණ්ඩල සේවා ඇතුළ භාණ්ඩ හා මගී ප්‍රවාහන සහ ශ්‍රී ලංකා මහ බැංකුව ඇතුළු රජයේ බැංකු ඇතුළු ආයතන කිහිපයක් අත්‍යවශ්‍ය සේවා බවට පත්කරමින් අති විශේෂ ගැසට් නිවේදනයක් නිකුත් කර ඇත.

ජනාධිපති ගෝඨාභය රාජපක්ෂගේ අණ පරිදි ජනාධිපති ලේකම් ආචාර්ය පී.බී ජයසුන්දර  විසින් ඊයේ (29) දින මෙම අති විශේෂ ගැසට් නිවේදනය නිකුත් කර ඇත.

රටේ ජන ජීවිතයට අත්‍යවශ්‍ය වන අදාළ සේවාවන් බාධාවකින් තොරව පවත්වා ගෙන යාමේ අරමුණෙන් මෙම ගැසට් නිවේදනය නිකුත් කර ඇත.

එම සේවා සැපයීමේදී සෞඛ්‍ය සේවා අධ්‍යක්ෂ ජනරාල් කොවිඩ් වසංගතය සම්බන්ධයෙන් නිකුත් කළ මාර්ගෝපදේශ කරුණු ද සැලකිල්ලට ගත යුතු බව සදහන් කර ඇත.

චීන සමාගම වෙනුවෙන් නිකුත් කර ඇති ණයවර ලිපියට මුදල් ගෙවීමට මහජන බැංකුවට නොහැකි වී ඇත්තේ අධිකරණය විසින් ගෙවීම් අත්හිටුවමින් නිකුත් කර ඇති වාරණ නියෝගය නිසා බව මහ බැංකු අධිපති අජිත් නිවාඩ් කබ්‍රාල් පවසා ඇත.

මාධ්‍ය වාර්තා සඳහන් කරන ආකාරයට අධිකරණ වාරණය නොවන්න මුදල් ගෙවීමේ ගැටලුවක් නොමැති බවත් මෙම ගැටලුව ඉක්මනින්ම විසඳා ගැනීමට හැකිවනු ඇති බවත් ඔහු සඳහන් කර ඇත.

චීන සමාගමක් විසින් මෙරටට පොහොර ගෙන්වීමෙන් පසු ඒ සඳහා අදාළ ණයවර ලිපියට අදාල මුදල් ගෙවීම පැහැර හැරයේ යැයි චීන තානාපති කාර්යාලය විසින් මහජන බැංකුව ඔවුන්ගේ අසාදු ලේඛණයට ඇතුලත් කර තිබේ.

(මූලාශ්‍රය සී නිව්ස් )

එක රටක් එක නීතියක් සංකල්පය ඉදිරියට ගෙනයාම සඳහා පත්කරන ලද ජනාධිපති කාර්යසාධන බලකායේ සභාපති ධුරයට ගලගොඩඅත්තේ ඥානසාර හිමියන් පත් කිරීම සම්බන්ධයෙන් අධිකරණ අමාත්‍ය අලි සබ්‍රි රජයට විරෝධය පළකර තිබේ.

මෙම පත්වීම සෑම ජනවර්ගයකටම සාධාරණ ලෙස ක්‍රියා කිරීමට බාධාවක්ය යන්න අමාත්‍යවරයාගේ මතය බව සඳහන්ය.

මුස්ලිම් සමාජයේ ආගමික නායක මවුලවිවරුන් අමාත්‍යවරයා වෙත සිය දැඩි විරෝධය දැක්වීමෙන් පසු ඔහු සිය විරෝධය රජයට දැනුම් දී ඇත.

මෙම කාර්යසාධන බලකාය දිගටම ක්‍රියාත්මක වුවහොත් තමන්ට තවදුරටත් අධිකරණ අමාත්‍යවරයා ලෙස සේවය කළ නොහැකි බවද ඔහු ප්‍රකාශ කර ඇතැයි වාර්තා වෙයි.

මේ අතර ගිය බ්‍රහස්පතින්දා පැවැති පක්ෂනායක රැස්වීමේදී මෙම පත්වීම ගැන පක්ෂ නායකයන් ගණනාවක් සිය අකමැත්ත පලකර තිබිණි.

– deshaya

පාර්ලිමේන්තුවේ රහස් ඡන්දයක් තබා තම ආණ්ඩුවේ තත්ත්වය මැන ගන්නා ලෙස සමගි ජන බලවේගයේ පාර්ලිමේන්තු මන්ත්‍රී පාඨලී චම්පික රණවක ජනාධිපතිවරයාගෙන් ඉල්ලා සිටියි.

මාධ්‍ය හමුවක අදහස් දක්වමින් රණවක මන්ත්‍රීවරයා මෙසේ සඳහන් කළ අතර දෙවැනි ලෝක මහා සංග්‍රාමයෙන් පසු ඉතිහාසයේ පළමු වතාවට රට සාගතයක් කරා යොමුවෙමින් පවතින බවත් පැවසීය .

අත්‍යාවශ්‍ය ආහාර ද්‍රව්‍යවල මිල ගණන් අහස උසට නගිමින් තිබේ. ඊට හේතුවී ඇත්තේ පවතින එළවළු සහ පළතුරු හිඟයයි. මහ කන්නය පිළිබඳ ඇතිව තිබෙන දෙගිඩියාව හේතුවෙන් සහල් මිල ගණන් අහස උසට නගිමින් තිබේ. දෙසැම්බර් මාසය වනවිට පවතින ප්‍රමාණයටත් වඩා විශාල පරිමාණයෙන් වැඩි වීමට නියමිතය. බඩඉරිඟු වගාව වැනි ඒ හා බැඳී තිබෙන කුකුල් මස් සහ බිත්තර සැපයීම අඩාල වීම නිසා කුකුල් මස්, බිත්තර වැනි දෑ ඉතා ඉහළ මිල ගණන් වලට ගමන් කරමින් තිබේ. රටේම ජනතාව දරාගත නොහැකි සාගත තත්ත්වයකට ගමන් කරමින් සිටී. “අනෙක් පැත්තෙන් මේ රටට ඩොලර් මිලියන එක්දාස් තුන්සීයක් පමණ උපයා දීපු තේ, පොල්, රබර්, කුරුඳු වැනි අපේ අපනයන බෝගවලට බරපතළ අභියෝගයක් එල්ල වෙලා තියෙනවා.

විශේෂයෙන්ම අපේ තේ වෙළඳාම නාමය හා නාමය සම්පූර්ණයෙන්ම බිඳ වැටිලා අපේ තරඟකරුවන්ට ඒ ස්ථානය හිමිවෙන්න යනවා. මොකක්ද මේකට හේතුව? මේකට හේතුව පසුගිය මාර්තු මාසයේ ජනාධිපතිවරයා ගත්ත තීරණයත් අනුව පසුගිය මැයි මාසේ හය වැනිදා නිකුත් කරන ලද ගැසට් නිවේදනයකින් ශ්‍රී ලංකාවට පොහොර ගෙන්වීම රසායන ද්‍රව්‍ය ගෙන්වීම හා බීජ ගෙන්වීම තහනම් කිරීම නිසා ඇතිවෙච්ච තත්ත්වයක්.” කාබනික ගොවිතැන හොඳ දෙයක් නමුත් ඊට අවශ්‍ය ද්‍රව්‍යවල මිල ගණන් සාමාන්‍ය ජනතාවට ඔරොත්තු නොදෙන බව තමන් විසින් පෙන්වා දුන් බවත්, විද්‍යාඥයන්, කෘෂි විද්‍යාඥයන්, ගොවියන්, ගොවි සංවිධාන මෙන්ම මේ පිළිබඳව සාමාන්‍ය දැනුමක් සහිත බොහෝ දෙනෙක් කරුණු කියා ඇති බවත් රණවක  ප්‍රකාශ කලේය.

“ 100% ක් කාබනික ගොවිතැන කරපු රටක් ලෝකේ නැති බව අපි බොහොම පැහැදිලිව කිව්වා. ඒ වගේම සිලෝන් ටී නාමය බිඳ වැටුනොත් සිලෝන් සිනමන් නාමය බිඳ වැටුනොත් අපේ අපනයන ආදායම් සියවස් ගානක් තිස්සේ මේ රටට ලැබිච්ච අපට නැති වෙන බව අපි බොහොම පැහැදිලිව කිව්වා.” නමුත් ජනාධිපතිවරයාගේ උද්දච්ච මානසිකත්වය සහ ඔහු වටා සිටින උපදේශකයන්ගේ කෘෂිකර්ම ඇමැති හා කෘෂිකර්ම රාජ්‍ය ඇමැති ඇතුළු සියලු දෙනාගේම තියෙන මුග්ධභාවය විසින් මේ ගොවියන්ට දේශපාලන පසුබිමක් තියෙනවා කියමින් ලේබල් අලවමින් සිටියා මිස මේ ගැටලුව විසඳීමට කිසිදු උත්සාහයක් ගත්තේ නැත. “අර ඉඳුරුවේ ආචාරියා වගේ එකක් කඩතොලු මකාගන්නට ගිහින් දෙකක් කඩතොළු ඇති කරගත්තා වගේ දැන් මේ කාබනික පොහොර ව්‍යාපෘතිය සම්පූර්ණයෙන්ම අසාර්ථක වුණාට පස්සේ බාල පොහොර හදන්න ගිහිල්ලා අනුරාධපුර පැත්තේ සම්පූර්ණයෙන්ම මහජනයාට එළිදරව් වුණාට පස්සේ මිලියන සිය ගානක් ඒ වෙනුවෙන් කාබාසිනියා කළාට පස්සේ විදේශ රටවලින් කාබනික පොහොර ගේන්න කටයුතු කළා.” චීනයෙන් කාබනික පොහොර කියමින් භයානක බැක්ටීරියාවන් තියෙන පොහොර තොගයක් ලංකාවට ගෙනා බව ඒ රසායනාගාර පරීක්ෂණවල නියැලි විද්‍යාඥයන් විසින් පැහැදිලි කරලා තිබේ.

නමුත් අද මෙය බාරගන්නැයි රාජ්‍යතාන්ත්‍රික බලපෑමක් චීනයෙන් එල්ල වී තිබේ. “මේ තොගය ලංකාවට ගෙන එන්නේ අග්‍රාමාත්‍යවරයාගේ ප්‍රධාන නිලධාරියෙකුගේ ඥාතිවරයෙක් කියන එක දැන් එළිදරව් වෙලා තියෙනවා. ඒක නැහැයි කියලා නෑ කවුරුවත්. එතකොට මේ පිටිපස්සේ තියෙන්නේ අර ජරා කොමිස් ගැහිල්ල. ජරා පොහොර වලින්. අපේ මව්බිම, අපේ සරුබිම විනාශ කරන මේ තුච්ඡ වැඩ පිළිවෙලට එරෙහිව ගොවියෝ එක්ක, කෘෂි විද්‍යාඥයෝ එක්ක අපි නැගී සිටිනවා විතරක් නෙවෙයි මේ අපරාධයට සම්බන්ධ සියලුම දේශපාලනඥයින්ට සහ මේ කෘෂි උපදේශකයින්ට අර ප්‍රසිද්ධ දොස්තර මහත්තයත් ඇතුළු සියලු දෙනාට අනාගතයේදී මේ ගැන වගකියන්න වෙයි කියන එක අපි බොහොම පැහැදිලිව කියනවා.” ඉන්දියාවෙන් ගෙන්වීමට සූදානම් වන නැනෝ නයිට්‍රජන් පිළිබඳව අදහස් දැක්වූ රණවක මහතා; “මෙය කිසිසේත්ම ප්‍රමාණවත් නෑ මේ රටේ නයිට්‍රජන් අවශ්‍යතාවයට. පළවෙනි කාරණය. අපේ කෘෂි විද්‍යාඥයෙක්, කඹුරුපිටියේ කෘෂි පීඨයේ මහාචාර්ය අරුණ කුමාර පෙන්නලා දීලා තියෙනවා හෙක්ටයාරයකට මේ නැනෝ නයිට්‍රජන් ලීටර් 1250ක් වත් ඕන කියලා. මේ ලීටරයක් දෙකක් ගහලා මේක කරන්න බෑ කියලා. ඒ අනුව කිසිසේත්ම මේක ප්‍රමාණවත් නෑ.” නැනෝ නයිට්‍රජන් දියරයේ අඩංගු නයිට්‍රජන් නිශ්චිතවම රසායනික නයිට්‍රජන් යූරියා වල තියෙන ඒවා. මේ සඳහා භාවිතා කරන නැනෝ කෙඳිවල තත්ත්වය පිළිබඳව කිසිදු පර්යේෂණයක් ලංකාවේ සිදු කරලා නෑ. ඒ අනුව මෙයින් අනාගතයේ සිදුවෙන ක්‍රියාවලිය පිළිබඳ කාටවත් වගකියන්න බෑ. තුන, මේ දියර නයිට්‍රජන් ඇතුල් වෙන්නේ පත්‍ර හරහා. කුඹුරේ තියෙන්නේ ගොයම් විතරක් නෙවෙයි. දැන් වල් නාශක නැති හින්දා වල් පත්‍රත් තියෙනවා.

එතකොට අර කවුද මෝඩ මන්ත්‍රී කෙනෙක් කිව්වා වගේ, බෝම්බයක් ගැහුවා වගේ, වල් ටිකත් වැඩෙන්න ඉඩ තියෙනවා. ඒකට වැඩපිළිවෙලක් ආණ්ඩුවට නෑ. ඒක නිසා මේ රටේ ජාතික ධනය කොල්ලකන එක නතර කරන්න කියලා වහාම ජනාධිපතිවරයාට අපි කියනවා. “ දැන් ඖෂධ, පොහොර, ආහාර, සුදුළූණු, සීනි, පොල්තෙල් සෑම දෙයකින්ම හොරකම් කරන තක්කඩි පාලනයක් මේ ආණ්ඩුව විසින් සෞභාග්‍යයේ මග නමින් ඇති කර තිබෙන බව ද රණවක මන්ත්‍රීවරයා පෙන්වා දුන්නේය. “කවුරුත් ගොවියෝ දන්නවා. වගා කරන්න ගිහාම මුලින්ම අපි මඩ පෝර ගහනවා. වී වගා කරනකොට. ඊළඟට යූරියා එකතු කරනවා පැලපතට.

ඊළඟට කරල් පීදීගෙන එනකොට ඒ කරල් පීදීමට අවශ්‍ය කරන ඒ මිශ්‍ර පොහොර අපි ගහනවා. ඒකට කියන්නේ බන්ඩි පොහොර කියලා. දැන් මොකක්ද කරලා තියෙන්නේ? බන්ඩි පොහොර කලින් ගෙනල්ලා. මඩ පොහොර නෑ. මේ අයනු ආයනුවත් දන්නැතුව මේ මුග්ධ ක්‍රියාවලියේ නියැලිලා ඉන්න මේ පාලකයින්ට අපි කියනවා ජනතාවගේ සාගතයට වග කියන්න ලෑස්ති වෙන්න.” තමන් මහා ප්‍රතිපත්තිගරුක කෙනෙක් නිසා මතු පරම්පරාව වෙනුවෙන් කිරීමට යන බව පවසමින් මතු පරම්පරාව සාගතයකින් මරා දමන්නට ජනාධිපතිවරයා ප්‍රමුඛ ආණ්ඩුව සැරසේ. ඒ වගකීමෙන් මිදීමට ජනාධිපති අගමැති කෘෂිකර්ම ඇමැතිවරුන් ඇතුළු කැබිනට් මණ්ඩලයට කිසිදු ඉඩක් නැත. “එක පැත්තකින් ජනතාවගේ ආදායම් කඩා වැටිලා. අනිත් පැත්තෙන් ආහාර හිඟය නිසා ආහාර ද්‍රව්‍ය වල මිල ඉහළ ගිහිල්ලා. අතිශය මුග්ධ ක්‍රියාවලියක් මේ වසංගතයක් අස්සේ ආහාර සුරක්ෂිතතාවය පාවාදීමට ගත්ත ක්‍රියාමාර්ගය.

ඒ වගේම දැන් ආයේ පටන් අරන් තියෙනවා මේ වකුගඩු කතාව. වකුගඩු වෙනස් වෙනවා වලට හානි සිද්ධ වෙනවයි කියලා ඇතැම් දොස්තරලා ඇවිල්ලා ප්‍රකාශ කරනවා. තමන් නොදන්න විෂයන් ගැන කතා කරන්න පටන් අරන් තියෙනවා. බොහොම පැහැදිලිව අපි කියන්න ඕනේ වකුගඩු රෝග සම්බන්ධයෙන් ලෝක සෞඛ්‍ය සංවිධානය විධිමත් අධ්‍යයනයක් කළා. ඒ අධ්‍යයනයේ ප්‍රතිඵල 2013 දි නිකුත් වුණා. එය ඉතාම පැහැදිලිව කියලා තියෙනවා. එක හේතුවක් නෙවෙයි හේතු ගණනාවක් නිසයි රජරට රෝග ව්‍යාප්තිය සිද්ධ වෙන්නේ කියලා.” ප්‍රමිතියෙන් තොර බාල පොහොර ගෙන ඒම වකුගඩු රෝගයට හේතු විනැයි කියන්නේ නම් ඊට වග කිව යුත්තේ මහින්ද රාජපක්ෂ මහතා බව ද හිටපු අමාත්‍යවරයා පෙන්වා දෙයි. “මොකද මේ ලෙඩ අනූ ගණන් වල ඉඳන් බොහොම සුළු පරිමාණයෙන් තිබුනට, මේ ලෙඩේ මහා පරිමාණයෙන් මතු වුණේ 2011 ඉඳන්. ඒ නිසා මේ නිකන් තමන් නොදන්න විෂයන් කතා කරන දොස්තරලා මේ රටේ කෘෂිකර්මයේ මේ රටේ අනුශාංගික වෙච්ච පස ගැන කතා පවත්වන්න ගිහිල්ලා මේ රට මුලාවේ දාලා තියෙනවා. ඒ සියලු දෙනාම මේ උපදේශකයොත් එක්ක සියලු දෙනාම මේ සාගතයට වගකියන්න ඕන” එමෙන්ම ජරා පොහොර ගෙන්වමින් රටේ සරුපස විනාශ කිරීමේ ආණ්ඩුවේ ක්‍රියාදාමයට එරෙහිව තමන් ගොවි ජනතාව සහ කෘෂි විශේෂඥයන් ප්‍රමුඛ මහජනතාව සමග නැගී සිට සටන් කරන බව ද හෙතෙම පවසයි.

“ඒ වගේම මම පුළුවන්නම් ජනාධිපති ගෝඨාභය රාජපක්ෂ පාර්ලිමේන්තුවේ රහසිගත ඡන්දයක් තියන්න. තියලා බලන්න තමන්ගේ ආණ්ඩු පක්ෂයේ තත්වේ. ඒ ඡන්දය අර විශේෂ ඡන්දයක් හැටියට කතානායක තෝරන ඡන්දයක් හැටියට, ඡන්දෙ දුන්නේ කවුදැයි කියලා හොයාගන්න බැරි විදිහට තියන්න. මහජන මතයට කන් දෙන්න. ඇත්තට මූණ දෙන්න. තමන්ගේ දරුවෝ ඉන්නේ ඇමරිකාවේ වෙන්න පුළුවන්. ඒ අය හොඳින් කාලා බීලා ඉන්නවා වෙන්න පුළුවන්. අපේ දරුවන්ගේ බඩගින්න වෙනුවෙන්, අපේ දරුවන්ගේ අනාගතය වෙනුවෙන්, අපේ දරුවන්ගේ හීන වෙනුවෙන් අපි නැගී සිටිනවා කියන එක බොහෝම පැහැදිලිව අපි මේ අවස්ථාවේදී ප්‍රකාශ කරනවා” පාඨලී චම්පික රණවක මහතා අවධාරණය කළේය.

යුගදනවි බලාගාරයට ගෑස් සැපයිමට අදාළ කැබිනට් පත්‍රිකාව අමාත්‍ය මණ්ඩලය තුළ සාකච්ඡාවට ලක් නොවූ බවත් මෙම ගිවිසුම හරහා ගෑස් සැපයීමේ ඒකාධිකාරිය නොපෙනෙන ඉමක් දක්වා ඇමෙරිකානු සමාගමට හිමිවන බවත් අමාත්‍ය විමල් වීරවංශ මහතා පවසයි.

එම ගිවිසුම සම්බන්ධයෙන් ජනතාව දැනුවත් කිරිමට ඊයේ (29) කොළඹ පැවැති හමුවක් අමතමින් අමාත්‍යවරයා මේ බව ප්‍රකාශ කළේය.

“ වසංගතය නිසා අමාත්‍ය මණ්ඩල පැවැත්වූයේ ඔන්ලයින් හරහායි. කැබිනට් මණ්ඩලයේ සාමාන්‍ය ක්‍රමය තමයි ප්‍රමාණවත් කාලයක ඇමති මණ්ඩලයට සන්දේශ ලැබෙන්න ඕන. ඇමති මණ්ඩලය තම තමන්ගේ මතය ඉදිරිපත් කිරීමෙන් පසුව තමයි සම්මත කර ගන්නේ. ඊට අපි හැමෝම වගකියනවා.

නමුත් නිව් ප්‍රෝට්රේස් සමාගමට ගෑස් සැපයීමේ ඒකාධිකාරිය, බොරුවට අවුරුදු කියන්න එපා අවුරුදු පහක් කියලා. අනාගතයේ නොපෙනන ඉමක් දක්වා ගැස් සැපයිම භාර දෙන්නේ ඔය ඇමෙරිකානු සමාගමට. ඇමෙරිකානු සමාගමට සදාකාලිකවම ගෑස් සැපයිමේ ඒකාධිකාරිය දෙන මේ කැබිනට් පත්‍රිකාව ආවේ කොහොමද දන්නවද?

අපි ඔන්ලයින් ඉන්නවා. සියලු අපි දන්න කැබිනට් පත්‍රිකා කතා කරලා ඉවර කරනවා. වෙනත් කරුණු කියල එකක් එනවා. ඒකෙදී ගරු මුදල් ඇමතිතුමා අහනවා කැබිනට් ලේකම්ගෙන් ‘ලේකම්තුමා මමත් අද එකක් ගෙනාවා ඒක නැත්ද?’ කියලා.

කැබිනට් ලේකම් කියනවා ‘ගරු ඇමතිතුමා ඒක මට ආවේ මම වාඩිවුණාට පස්සේ මට ඒක කියව ගන්නත් බැරිවුණා කියලා. ඔබතුමා පැහැදිලි කරන්න’ කියනවා.

සාමාන්‍ය යෙන් කැබිනට් පත්‍රිකාවක් කැබිනට් මණ්ඩලයට පැහැදිලි කරන්නේ කැබිනට් ලේකම්තුමා. කැබිනට් ලේකම් කියනවා ‘මම මෙතන වාඩි වුණාට පස්සේ ඕක ආවේ. මට කියව ගන්නත් බැරිවුණා. දන්නේ ඔබතුමානේ ඔබතුමාම ඕක කියවන්න’ කියනවා.

මම ඇමතිමණ්ඩලයේ මහා දීර්ඝ කාලයක් නොසිටියත් මම එහෙම අවස්ථාවකට මුහුණ දීලා නෑ. ඒක ඒ විදිහට ඉවර වුණා.

ඊට පස්සේ උදය ගම්මන්පිල මැතිතුමා අපි මොකද වුණේ කියලා හිතන කොට කැබිනට් මිනිස්ට් ඇවිත් තියෙනවා අහවල් කැබිනට් පත්‍රිකාවට ඇමතිතුමා දිර්ඝ ලෙස කරුණු පැහැදිලි කළ අතර දීර්ඝ සාකච්ඡාවලට පසුව මේ මේ තීරණවලට එකඟවිය කියලා.

මම බැලුවා ඔලුවට අයිස් කැටයකින් ගහගෙන මේ හීනයක්ද කියලා. මෙහෙමයි මේක අනුමත වුණේ. උසාවියට ඇවත් කියනවා. කිසිම සාකච්චාවක් වුණේ නෑ. බොරු ලියන්න එපා. කිසිම සාකච්චාවක් වුණේ නෑ.

හොරට ගෙනාවේ. තක්කඩිකමින් ගෙනවේ. කිසිම සාකච්ඡාවක් වුණේ නැ. මේ ඇමතිකට්ට වෙනුවෙන් ඔය ඔක්කොම පිළි අරගෙන හෘද සාක්ෂිය තඩි ගලකට ගැටගහලා වතුරට ඔබාගෙන ඉන්න අපිට බෑ. අපි ඒ සංස්කෘතියට අයිති අය නෙමෙයි.

මේ රටේ මිනිස්සු ගෝඨාභය රාජපක්ෂ මැතිතුමාට බලය දුන්නේ විශ්වාස කළේ. වෙන අයට කොල්ල කන්න නෙමෙයි.

විදුලි බල මණ්ඩලයෙන් දාපු ඩෙන්ඩරය මොකද්ද? ඩලස් ඇමතිතුමාට විදුලි බලයත් නැතිවුණා මම දන්නේ නෑ මේක හේතු වුණාද කියලා. එහෙමත් හිතෙනවා. ඒ අය දෙනවා ටෙන්ඩරය. ගබඩා නැව එක ටෙන්ඩරයක්. නල පද්ධතිය එළීම තව ටෙන්ඩරයක්. ගෑස් සැපයීම තියෙන්නේ විදුලි බල මණ්ඩලය අතේ.

විදුලි බල මණ්ඩලය ටෙන්ඩර් කරලා කලින් කලට විධිමත් ක්‍රියා පටිපාටියක් යටතේ එල්.එන්.ජී. ගන්නවා. දැන් ගාණ තිරණය කරලා ඉවරයි. අපි පාවිච්චි කළත් නොකළත්, අපි හිතමු වැස්ස හොඳට තිබ්බොත් එල්.එන්.ජී. පාවිච්චිය අඩුවෙනවා. පාවිච්චි කළත් නොකළත් නියමිත එල්.එන්.ජී. ප්‍රමාණය අපි මිලදී ගන්න ඕන.

ගෑස් සැපයීමේ ඒකාධිකාරිය ලැබිමෙන් ලංකාව අභ්‍යන්තරයේ දේශපාලනයේ කේවල් කිරීමේ බලය ඇමෙරිකාවට ලැබෙනවා. මේක අනාගතය පාවදීමක්. බිල්ලට දීමක්.

අපි ඇමතිකම් තිබුණත් නැතත් මේ රටේ ජිවත්වෙලා මේ රටේ මැරිලා යන්න ඉන්න මිනිස්සු. අපේ බොඩි එක කොහොවත් වෙන රටකට ගෙනි යන්නේ නෑ. අවුරුදු පහකට බලයක් අරන් මුළු ගෑස් සැපයිමේ ඒකාධිකාරය මේ රටට හතුරු රටකට හොර පාරෙන් දෙන එකට අපි කිසිසේත් එකඟ වෙන්නේ නෑ. තව ගිවිසුම් දෙකක් අත්සන් කරන්න එනවා.

අපිට ඕන නෑ මේ ආණ්ඩුව කඩලා දාන්න. අපිට ඕන නෑ විරුද්ධ පක්ෂයේ දේශපාල නන්නත්තාර වෙලා ඉන්න අයට ජිවය දෙන්න. අපිට ඕන ජනවරමට අනුකූලව මේ ආණ්ඩුව අරගෙන යන්න.

ජනවරමට පස්ස හරවන එකාගේ පස්ස පැත්තට රිදෙන්න පහර දෙන්න. ඒ වගකිම අපි අතහරින්නේ නෑ. අපි අපේ හඩ ඉදිරියටම කරගෙන යනවා. ඒ වෙනුවෙන් කරන්න තියෙන ඕනෑම කැපකිරීමකට ලෑස්ති පිට තමයි මහජන මන්ත්‍රණ සභාව ආරම්භ කළේ. ඉතිරි ගිවිසුම් දෙක අත්සන් නොකිරීමට කටයුතු කළ යුතුයි. එය නතර කිරීම සඳහා අපි ආණ්ඩුව ඇතුළේ සිට හෝ ආණ්ඩුවෙන් එළියට වැටුණත් අපි යුතුකම ඉටුකරනවා.

අපේ ආණ්ඩුව වැරැද්දක් කරන කොට සද්ධ නැතිව ඉන්න ඕනද? වැරැද්ද කවුරු කළත් වැරැද්ද. අපි ගැන තිබ්බේ නිර්මල විශ්වාසයක්. එහෙම එකක් වෙයි කියලා කවුරුත් හිතුවේ නැ. ජනතාව ගෝඨාභය රාජපක්ෂ මහතාට ඡන්දය දුන්නේ අද්භූත කැබිනට් පත්‍රිකාවලින් මේ වගේ දේවල් තීන්දු වෙන්න නෙමෙයි.

යුගදනවි බලාගාරය ඇමරිකානු සමාගමකට පවරාදීමට අදාල කැබිනට් පත‍්‍රිකාව කැබිනට් මණ්ඩලයේ දී සාකච්ඡා නොකළ බව ඇමති විමල් වීරවංශ පවසයි.

යුගදනවි බලාගාරය ඇමරිකානු සමාගමකට ලබා දීම සම්බන්ධයෙන් ජනතාවට කරුණු දැක්වීම සදහා අද පස්වරුවේ පැවති මහජන මන්ත‍්‍රණ සභාව අමතමින් අමාත්‍යවරයා මේ අදහස් පළ කරන ලදී.

මුදල් අමාත්‍යවරයා විසින් අදාල කැබිනට් පත‍්‍රිකාව කැබිනට් මණ්ඩලයට ඉදිරිපත් කළ කුමන්ත‍්‍රණකාරී ආකාරය පිළිබදව සවිස්තර කරුණු දැක්වීමක් අමාත්‍යවරයා ඉදිරිපත් කළේ ය.

ඇමති කට්ටක් වෙනුවෙන් ඕනෑම පාවාදීමක් කළ නො හැකි බවද මහජන මන්ත‍්‍රණ සභාව අමතමින් අමාත්‍යවරයා පැවසී ය.

(Mawrata)

ශ්‍රී ලංකාවේ පිහිටි චීන තානාපති කාර්යාලයේ ආර්ථික සහ වාණිජ කාර්යාල විසින් මහජන බැංකුව අසාදු ලේඛන ගත කිරීමට ප්‍රතිචාර දක්වමින් මහජන බැංකුව නිවේදනයක් නිකුත්කර ඇත.

එයින් දැනුම්දී ඇත්තේ චීන සමාගමක් වෙත ගෙවීම් නතර කිරීමට සිදුව ඇත්තේ අධිකරණයෙන් ලද අතුරු තහනම් නියෝගයක් හේතුවෙන් බවයි.

එසේම අධිකරණය තීන්දු මත ගෙවීම සම්බන්ධ ඉදිරි ක්‍රියාමාර්ග ගන්නා බවත් මහජන බැංකුව එම නිවේදනයේ සඳහන් කර ඇත.

මහජන බැංකුව විසින් නිකුත්කළ නිවේදනය පහත දැක්වෙයි.