පුවත්

වයස අවුරුදු 18 – 30 ත් අතර පිරිස් සඳහා වන එන්නත්කරණ වැඩසටහන අද (02) සිට දිස්ත්‍රික්ක මට්ට්මින් ආරම්භ කළ බව සෞඛ්‍ය අමාත්‍ය කෙහෙළිය රඹුක්වැල්ල පවසයි.

එම වයස් කාණ්ඩයේ මිලියන 3.7ක් පමණ වන පුද්ගලයින් සඳහා කඩිනමින් එන්නත් කර අවසන් කරන ලෙස අමාත්‍යවරයා අදාළ නිලධාරින්ට උපදෙස් දුන් බව සෞඛ්‍ය අමාත්‍යංශය නිවේදනයක් නිකුත් කරමින් පවසයි.

රාජ්‍ය සේවා එක්සත් හෙද සංගමය සමග සෞඛ්‍ය අමාත්‍යංශයේදී අද (02) පැවති සාකච්ඡාවකදී අමාත්‍යවරයා මේ බව සඳහන් කර ඇත.

මේ අතර එළැඹෙන සති දෙක තුන අවසන් වීමට පෙර වයස අවුරුදු 30 ඉක්මවූ සියලු පිරිස් පූර්ණ එන්නත්කරණයට ලක් කිරීමට හැකිවනු ඇතැයි ද මෙහිදී අමාත්‍යවරයා පැවසූ බව අදාළ නිවේදනයේ සඳහන් ය.

තව ද ඔක්තෝබර් අවසානයට පෙර අවුරුදු 18 ඉක්මවූ පුරවැසියන් සඳහා වන එන්නත්කරණය අවසන් කිරීමට හැකිවනු ඇතැයි අමාත්‍යවරයා එහිදී විශ්වාසය පළ කර තිබේ.

 ”ලැබෙන එන්නත හොඳම එන්නත” ලෙස සලකා හිමිවන කුමන හෝ එන්නතක් කඩිනමින් ලබා ගන්නා ලෙස අමාත්‍යවරයා ජනතාවගෙන් ඉල්ලා සිටී.

2021 අ.පො.ස. උසස් පෙළ විභාගය සහ පහ පහ වසර ශිෂ්‍යත්ව විභාගයේ අයදුම්පත් කැඳවීමේ අවසන් දිනය සැප්තැම්බර් 15 දක්වා දීර්ඝ කළ බව අධ්‍යාපන අමාත්‍යාංශය පවසයි.

මෙවර සෑම විභාග අපේක්ෂකයකුම අයැදුම්පත් ඉදිරිපත් කළ යුත්තේ ඔන්ලයින් ක්‍රමවේදයට පමණක් බවද අධ්‍යාපන අමාත්‍යංශය දන්වා සිටී.

ඒ අනුව ඔන්ලයින් ක්‍රමයට ශ්‍රී ලංකා විභාග දෙපාර්තමේන්තුවේ නිල වෙබ් අඩවිය වන www.doenets.lk හෝ විභාග දෙපාර්තමේන්තුවෙි නිල ජංගම දුරකථනය යෙදවුම වන "DoE"වෙත පිවිස අදාළ උපදෙස් කියවා ඒ අනුවම නිවැරදි ඔන්ලයින් ක්‍රමවේදය ඔස්සේ අයදුම්පත්‍ර යොමු කළ යුතු වේ.

විභාග සඳහා ඉදිරිපත් වන රජයේ පාසල් සිසුන් අදාළ පාසලේ විදුහල්පතිවරයාට දැනටමත් ලබා දී ඇති පරිශීලක නාම හා මුරපද භාවිතයෙන් අයදුම් කළ යුතු බව අධ්‍යාපන අමාත්‍යාංශය සඳහන් කරයපෞද්ගලික අයදුම්කරුවන් පෞද්ගලිකවම අදාල උපදෙස් අනුව මාර්ගගතව අයදුම්පත්‍ර සම්පූර්ණ කළ යුතු වෙයි.ඉන් අනතුරුව එහි මුද්‍රිත පිටපතක් ලබාගෙන අවශ්‍ය අවස්ථාවලදී ඉදිරිපත් කිරීමට තමන් භාරයේ සුරක්ෂිතව තබා ගත යුතු බවත් අධ්‍යාපන අමාත්‍යාංශය සඳහන් කර සිටී.

මේ වනවිට පනවා ඇති නිරෝධායන ඇඳිරිනීතිය දීර්ඝ කරන්නේ ද එසේත් නැත්නම් ඉවත් කරන්නේ ද යන්න සම්බන්ධයෙන් හෙට (03) දිනයේ තීරණය කිරීමට නියමිත බව වාර්තා වෙයි.

ඊට අනුව ජනාධිපති ගෝඨාභය රාජපක්ෂගේ ප්‍රධානත්වයෙන් හෙට දින රැස්වන කොවිඩ් කාර්යසාධක බළකා රැස්වීමේදී මේ සම්බන්ධයෙන් අවසන් තීරණයක් ගැනීමට නියමිතව තිබේ.

මේ වනවිට දිවයිනටම බලපැවැත්වෙන පරිදි ක්‍රියාත්මක නිරෝධායන ඇඳිරිනීතිය ලබන 6 වන සඳුදා දින අලුයම 4.00 දක්වා ක්‍රියාත්මක අතර අගෝස්තු මස 20 වන දින සිට මෙම නිරෝධායන ඇඳිරිනීතිය ක්‍රියාත්මක වෙයි.

මේ අතර දැනට ක්‍රියාත්මක රට වසා දැමීමේ ප්‍රතිඵල ලබාගැනීමට නම් බීජෞෂණ සමයන් දෙකක්වත් ගත යුතු විය යුතු බව සෞඛ්‍ය අමාත්‍යාංශයේ නියෝජ්‍ය අධ්‍යක්ෂ ජනරාල් විශේෂඥ වෛද්‍ය හේමන්ත හේරත් සඳහන් කරයි.

තවත් සති දෙකක්වත් සංචරණ සීමා පවත්වා ගැනීම හා අන්තර්පුද්ගල සබඳතා පැවැත්වීම වැළැක්වීමෙන් වඩා සාර්ථක ප්‍රතිඵල ලබාගත හැකි බවද ඔහු පැවසීය.

යම් ලෙසකින් සදුදා දිනයේ සංචරණ සීමා ලිහිල් කරන්නේ නම් ප්‍රසිද්ධ ස්ථානයන්හි ජනතාව ඒකරාශී කිරීම පාලනය කටයුතු කිරීම අත්‍යවශ්‍ය බව ද ඊට අවශ්‍ය විධිවිධාන දැන්ම සැලසුම් කළ යුතු බවත් ඔහු කියා සිටියේය.

එසේ සිදු නොකර නැවතත් සෞඛ්‍ය අංශවලට චෝදනා නොකරන්නැයි ඉල්ලීමක් කරන බවද සෞඛ්‍ය නියෝජ්‍ය අධ්‍යක්ෂ ජනරාල් කියා සිටියේ සෞඛ්‍ය ප්‍රවර්ධන කාර්යාලයේ පැවති මාධ්‍ය හමුවකදීය.

වෛරසයෙන් ආරක්ෂාව සඳහා ගත යුතු ක්‍රියාමාර්ග වලට අනුගත නොවී රට වසා දැමීමෙන් පමණක් ප්‍රශ්නය විසඳා ගත නොහැකි බවත් ඔහු තවදුරටත් පැවසීය.

රට වසා දැමීමට වඩා වැදගත් වන්නේ රෝගය බෝවීම වළක්වා ගැනීමේ චර්යාධර්ම වලට ජනතාව හුරු වීම බවද ඔහු එහිදී අවධාරණය කළේය.

ශ්‍රී ලංකා නිදහස් පක්ෂය නැමැති රූක්ෂ ගස කඳින් කපා වෙන් කළ ද නැවත ශක්තිමත්ව ලියලනු ඇති බවත් රූක්ෂ ගස බිහි වන දා තමා ජීවතුන් අතර සිටී දැයි නොදන්නා නමුත් ලියලා ගෙන එන රූක්ෂ ගසට ශක්තියක් දෙන්න අවශ්‍ය තරුණ පරපුරක් හදන්නට තමා උර දෙන බවද චන්ද්‍රිකා කුමාරණතුංග පවසයි.

හිටපු ජනාධිපතිනිය මේ බව සඳහන් කරන්නේ, ශ්‍රී ලංකා නිදහස් පක්ෂයට වසර 70ක් පිරීම නිමිත්තෙන් විශේෂ වීඩියෝවක් සමාජ මාධ්‍ය වෙත යොමුකරමිනි.

පක්ෂය සම්පූර්ණයෙන් විනාශ කරන්නට බැරි බවත් ශක්තිමත් පදනමක් නිර්මල දර්ශනයක් තිබෙන ශ්‍රේෂ්ඨ මිනිසුන් කීප දෙනෙක්ගේ ලෙයින් සනිටුහන් කළ ඉතිහාසයක් තිබෙන පක්ෂය විනාශ කරන්න බැරි බවත් ඇය පවසයි.

මෙම වීඩියෝව හරහා හිටපු ජනාධිපතිය මේ මොහොතේ පක්ෂය දුර්වල කිරීමට අදාළව හිටපු ජනාධිපති, වත්මන් ශ්‍රීලනිප සභාපති මෛත්‍රීපාල සිරිසේන සහ වත්මන් අගමැති මහින්ද රාජපක්ෂ වෙත චෝදනා කර සිටියේය.

අදාළ වීඩියෝව පහත දැක්වෙයි.

එන්නත්කරණය සහ රෝගය ව්‍යාප්ත වීමේ වේගය මත ලබන ඔක්තෝබර් මස අවසාන සතිය වනවිට කොරෝනා වසංගතයෙන් රට තුළ මතුව ඇති අවදානම් සහ පීඩාකාරී තත්ත්වය පහව යනු ඇතැයි පුරෝකතනය කළ හැකි බව ජයවර්ධනපුර විශ්වවිද්‍යාලයේ අසාත්මිකතා හා ප්‍රතිශක්ති විද්‍යාව හා සෛල ජෛව විද්‍යායතනයේ අධ්‍යක්ෂ ආචාර්ය චන්දිම ජීවන්දර පවසයි.

එන්නත්කරණයේ ප්‍රතිශක්තිය එම කාලය තුළ වර්ධනය වීමත්, ස්වාභාවික ආකාරයෙන් ජනතාවගේ ප්‍රතිශක්තිය ඉහළ ගොස් රෝගය සුව වී තිබීමත් ඊට හේතුව බවත් එහිදී ඔහු පැවසීය.

කෙසේවෙතත් අලුත් කොරෝනා ප්‍රබේදවලින් ගැටලුවක් මතු නොවණහොත් පමණක් මෙම තත්ත්වය බලපොරොත්තු විය හැකි බවද ජයවර්ධනපුර විශ්වවිද්‍යාලයේ අසාත්මිකතා හා ප්‍රතිශක්ති විද්‍යාව හා සෛල ජෛව විද්‍යායතනයේ අධ්‍යක්ෂ ආචාර්ය චන්දිම ජීවන්දර සඳහන් කල අතර ඔහු මෙසේ අදහස් දක්වා සිටියේ රූපවාහිනී නාලිකාවක වැඩසටහනකට එක්වෙමිනි.

ශ්‍රී ලංකාව ඇතුළුව රටවල් 03 ක කොරෝනා මරණ සංඛ්‍යාව අගෝස්තු මාසය අවසන් වන විට 15% කින් ඉහළ ගොස් ඇති බව ලෝක සෞඛ්‍ය සංවිධානය පවසා ඇත.

ලෝක සෞඛ්‍ය සංවිධානය සතියකට වරක් නිකුත් කරන වාර්තාවට අනුව දකුණු ආසියානු කලාපයේ සෙසු රටවල කොරෝනා මරණ සංඛ්‍යාව පහළ ගොස් ඇති බව වාර්තා වේ.

අදාළ වාර්තාව පෙන්වා දෙන්නේ දකුණු ආසියානු කලාපයේ මරණ සංඛ්‍යාව පහළ යද්දී ශ්‍රී ලංකාවේ මරණ සංඛ්‍යාව 19% කින්, ටිමෝර් ලෙස්ටේ රාජ්‍යයේ 32% කින් සහ ඉන්දියාවේ 17% ක් ලෙස ඉහළ ගොස් ඇති බවයි.

පසුගිය සතිය සමග සසඳන විට කාලපයෙන් නව මරණ 14 ,000 ක් වාර්තා වී ඇති අතර එය සාපේක්ෂ වශයෙන් 20% ක අඩුවීමක් බවත් අදාළ වාර්තාව පවසයි.

රුපියලේ අගය විශාල ලෙස බාල්දු වීම හමුවේ භාණ්ඩ මිල සීග්‍රයෙන් ඉහළ යාමත් සමග, ශ්‍රී ලංකාව හදිසි ආර්ථික තත්ත්වයක් ප්‍රකාශයට පත් කර තිබේ.

ආණ්ඩුව පවසන්නේ මිල ඉහළ යෑම පාලනය කිරීම සඳහා සහල් සහ සීනි ඇතුළු අත්‍යාවශ්‍ය ආහාර සැපයුම සිය පාලනය යටතේ සිදුවනු ඇති බවය.

ඉහළ යන බඩු මිල පාලනය කිරීමේ උත්සාහයක් වශයෙන් සහතික මිලක් හඳුන්වා දීමට කටයුතු කරන බවත් ආණ්ඩුව කියා සිටියි.

මේ වසරේදී රුපියල, ඇමරිකානු ඩොලරයට සාපේක්ෂව 7.5%ක අගයකින් අවප්‍රමාණය වී ඇත.

අඟහරුවාදා (අගෝස්තු 31) සිට පුළුල් පරාසයක හදිසි ක්‍රියාමාර්ග ක්‍රියාත්මක වේ.

ආණ්ඩුව විසින් අත්‍යාවශ්‍ය සේවා කොමිසමේ ප්‍රධානියා ලෙස හමුදාවේ හිටපු ජෙනරාල්වරයෙකු පත් කරනු ලැබ ඇත.

වෙළෙන්දන් සහ කඩ හිමියන් සතු 'සඟවා ඇති' භාණ්ඩ තොග සිය භාරයට ගැනීමට ඔහුට බලය හිමි වේ.

ජනාධිපතිගෙන් නිවේදනයක්

"වී, සහල්, සීනි ඇතුළු අත්‍යාවශ්‍ය ආහාර තොග සැඟවීම්, අධික මිල ගණන් අයකිරීම මගින් පාරිභෝගික ජනතාව අපහසුතාවයට පත්කරන වෙළඳපොළ අක්‍රමිකතා වැළැක්වීම සඳහා රජයේ සහතික මිලට හෝ රේගුවේදී ආනයනය කළ මිල ගණන් පදනම් කරගෙන වී, සහල්, සීනි ඇතුළු අත්‍යවශ්‍ය ආහාර තොග මිලදීගෙන ජනතාවට සාධාරණ මිල ගණන්වලට ලබා දීමට බලය ලත් නිලධාරීන් කටයුතු කරනු" ඇතැයි ජනාධිපති ගෝඨාභය රාජපක්ෂ නිකුත් කළ නිවේදනයක දැක්වේ.

ඒ බව නිවේදනය කෙරුනේ සීනි, අල සහ ළූණු වැනි අත්‍යාවශ්‍ය ආහාරවල මිල විශාල ලෙස ඉහළ යාමත් සමගය.

පසුගිය දිනවල කිරි පිටි, භූමිතෙල් සහ ගෑස් සිලින්ඩර්වල හිඟය හේතුවෙන් වෙළඳසැල් අසල දිගු පෝලිම් දක්නට ලැබිණි.

විදේශ විනිමය අනුපාතයේ ඉහළ යාම ද පසුගිය වසරක කාලය පුරා බොහෝ භාණ්ඩ මිල ඉහළ යාම කෙරෙහි බලපෑ එක් හේතුවක් වන බව ජන හා සංඛ්‍යාලේඛන දෙපාර්තමේන්තුව පැවසීය.

ආහාර මිලගනනන් ඉහළයාම හේතුවෙන් අගෝස්තු මස උද්දමනය සියයට 6ක් දක්වා අගයකට ඉහළ ගියේය.

සිය ආහාර සහ අනෙකුත් මූලික අවශ්‍යතාවන්ගෙන් වැඩි කොටසක් රට තුළට ආනයනය කරන ශ්‍රී ලංකාවේ විදේශ විනිමය උපයන ප්‍රධාන මාර්ගයක් වන සංචාරක කර්මාන්තය ද කොවිඩ් වසංගතය හමුවේ අකර්මන්‍ය වී ඇත.

සංචාරකයන් පැමිණීම පහළ බැසීමේ ප්‍රතිඵලයක් වශයෙන් පසුගිය වසරේදී ශ්‍රී ලංකාවේ ආර්ථිකය 3.6%ක වාර්තාගත අගයකින් සංකෝචනය විය.

ආණ්ඩුව විදේශ විනිමය රටෙන් පිටවීම වළකා ගැනීමේ අරමුණින් පසුගිය වසරේ මාර්තු මස දී මෝටර් රථ සහ තවත් භාණ්ඩ රැසක් ආනයනය කිරීම තහනම් කළේය.

මුදල් සංචිත ගලා යාම පාලනය කිරීමේ උත්සාහයක් වශයෙන් පොලී අනුපාත ඉහළ නැංවූ කලාපයේ පළමු රට බවට ශ්‍රී ලංකාව පසුගිය මාසයේදීපත් විය.

කොවිඩ් මරණ සහ රෝගීන් සීග්‍රයෙන් ඉහළ යාමත් සමග මේ වන විට රට පුරා අගුළු දැමීමක් ක්‍රියාත්මක වේ.

(බීබීසී )

අද (01) නිකුත් කළ කොවිඩ් – 19 මරණ පිළිබඳ වාර්තාව අනුව පුද්ගලයින් 215 දෙනෙකු ඊයේ (31) මරණයට පත්ව තිබේ.

ඒ අනුව කාන්තාවන් 100 දෙනෙකු සහ පිරිමි පුද්ගලයින් 115 දෙනෙකු මෙලෙස මරණයට පත්ව ඇත.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 46 දෙනෙකු සිටින අතර ඉතිරි ආසාදිතයින් 167 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

ඒ අනුව මෙරටින් නිල ලෙස නිවේදනය කර ඇති මියගිය කොවිඩ් ආසාදිත පුද්ගලයින්ගේ ගණන 9,400ක් දක්වා ඉහළ ගොස් ඇත.

ශ්‍රී ලංකාව මේ වනවිට ලෝකයේ වැඩිම ආසාදිතයින් වාර්තාවන රටවල් අතර 60 වන ස්ථානයේ පසුවේ.

එමෙන්ම වැඩිම දෛනික මරණ වාර්තාවන රටවල් අතර ශ්‍රී ලංකාව මේ වනවිට පසුවන්නේ 09වන ස්ථානයේය.

පාස්කු ඉරුදින ත්‍රස්ත ප්‍රහාරයේ පරීක්‍ෂණවලට අදාළව රජය ගෙන ඇති පියවර සම්බන්ධයෙන් දැනුම්දීම සඳහා සාකච්ඡාවකට පැමිණෙන්නැයි විදේශ අමාත්‍ය මහාචාර්ය ජී.එල් පීරිස් සිදුකර ඇති ආරාධනය පිළිගැනීමට නම් ප්‍රහාරයට අදාළ විමර්ශන විනිවිදභාවයකින් සිදුවන බවට විශ්වාසයක් තමා තුළ ඇතිවිය යුතු බව මැල්කම් කාදිනල් රංජිත් කොළඹ අගරදගුරු අමාත්‍යවරයා වෙත දැනුම්දී ඇති බව වාර්තා වෙයි.

ඒ අනුව ලිඛිතව මෙම දැනුම්දීම සිදුකර ඇත.

එහිදී සඳහන් කර ඇති ආකාරයට සාකච්ඡා කරන්නට තමන් විවෘත නමුත් ඒ සඳහා කොන්දේසි කිහිපයක් සම්පූර්ණ විය යුතු බවත් එම කොන්දේසි සම්පූර්ණ වන තුරු සාකච්ඡාවට නොඑන බවත් කාදිනල්තුමා අමාත්‍යවරයා වෙත පැහැදිලිව දැනුම් දී ඇතැයි කතෝලික සභාවේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමා පවසයි.

පාස්කු ප්‍රහාරය හා සම්බන්ධ විමර්ශන විශ්වාසනීයත්වයෙන් යුතුව සිදුවීමේ වැදගත්බවත්, එම විශ්වාසය ගොඩනැගීමට නම් පාස්කු ප්‍රහාරය පිළිබඳ විමර්ශනය කළ ජනාධිපති කොමිෂන් සභාවේ වාර්තාවෙන් ඉදිරිපත් කර ඇති නිර්දේශ ක්‍රියාත්මක කිරීම ආරම්භ විය යුතු බවත් කාදිනල් සිය ලිපියෙන් අමාත්‍යවරයාට දැනුම් දී ඇතැයි ද සිරිල් ගාමිණී ප්‍රනාන්දු පියතුමා වැඩිදුරටත් පවසයි.

සිරිල් ගාමිණී පියතුමන් මේ බව පැවසුවේ මාධ්‍ය වෙත විශේෂ ප්‍රකාශයක් කරමිනි.

ජනාධිපති කොමිෂන් සභා වාර්තාවේ ඇති පරිදි විමර්ශන ආරම්භ කළොත් කාදිනල්තුමන්, කතෝලික සභාව හා ජනතාව තුළ විශ්වාසයක් ගොඩනැගෙන බවත් එය ගොඩනැගිය හැක්කේ රජයට පමණක් බවත් ඔහු පැවසූ අතර ජනාධිපති කාර්යාලයේ නීති අධ්‍යක්‍ෂවරයා සහ පොලිස්පතිවරයා ඉකුත් දා මාධ්‍ය හමුවේ කළ ප්‍රකාශය තුළ ඇතුළත් යම් කරුණුවලින් විශ්වාසය ගොඩනැගීමට වඩා විශ්වාසය පලුදු වී ඇතැයි ද පැවසීය.

කොරෝනා වෛරස පාලනය සඳහා එන්නත් කෙරෙන මොඩර්නා එන්නතේ එක් මාත්‍රාවක් මඟින් ඇතිකරන ප්‍රතිදේහ ෆයිසර් එන්නත් මාත්‍රාවකින් ඇතිකරන ප්‍රතිදේහ මෙන් දෙගුණයකටත් වඩා වැඩි බව පර්‍යේෂකයන් පවසයි.

ශ්‍රී ජයවර්ධනපුර විශ්වවිද්‍යාලයේ ප්‍රතිජීව විද්‍යා හා අණුක විද්‍යා අධ්‍යයන අංශයේ ආචාර්ය, චන්දිම ජීවන්දර උපුටා දක්වමින් මාධ්‍ය වාර්තා මේ බව පවසයි.

මෙම එන්නත් දෙවර්ගය අලලා බෙල්ජියමේ දී කරන ලද අධ්‍යයනයකින් පසුව මේ කරුණු අනාවරණය කරගෙන ඇති බවත් සඳහන් වෙයි.

කොවිඩ් පැතිරීම පාලනය කර ගැනීම සඳහා නිරෝධායන ඇඳිරි නීතිය තව සති දෙකක්වත් දීර්ඝ කළ යුතු බව තමාගේ පෞද්ගලික මතය යැයි කොරෝනා මර්දන රාජ්‍ය ඇමැතිනී විශේෂඥ වෛද්‍ය සුදර්ශනී ප්‍රනාන්දුපුල්ලේ  පැවසුවාය.

මේ අතර කොවිඩ් ආසාදිතයන් පන්දහසක් පමණ දෛනිකව වාර්තා වුවත් සමාජයේ ආසාදිතයන් පනස් දහසක් පමණ සිටින බව විශේෂඥ මතය යැයිද ඇය සඳහන් කළාය.

කොවිඩ් රෝගීන්ගේ සහ කොවිඩ් මරණවල සැලකිය යුතු අඩුවක් පෙනෙන්නට නැති හෙයින් රෝග ව්‍යාප්තිය පාලනය කර ගැනීම සඳහා ජනතාව ඒකරාශීවීම වැළැක්වීම තවදුරටත් කළ යුතු බව පැවසූ ප්‍රනාන්දුපුල්ලේ  සමාජයේ පවුල් පිටින් කොවිඩ් ආසාදනයවන තත්වයක් පෙනෙන්නට ඇතැයිද කීවාය.

රෝග ලක්ෂණ නැති අය සමාජයේ සිටීම භයානක බවද ඇය පැවසුවාය.

දැනට පවතින කොවිඩ් පැතිරීම පාලනය කිරීම සඳහා රට ලොක්ඩවුන් කළද එය රටක් හැටියට දීර්ඝ කාලීනව කළ හැකි දෙයක් නොවන බවත් ඉදිරියේදී ජනතාවට කොවිඩ් රෝගය හමුවේ ඊට අනුගතව සෞඛ්‍යාරක්ෂිතව ජීවත්වීමට සිදුවනු ඇති බවත් සුදර්ශනී ප්‍රනාන්දුපුල්ලේ  ප්‍රකාශ කළාය.

දකුණු අප්‍රිකාවේ පැතිර යන සැර කොරෝනා ප්‍රභේදය දැනට එංගලන්තයටද පැතිර ඇති හෙයින් එය ශ්‍රී ලංකාවටද පැමිණීමේ අවදානමක් තිබෙන බව රාජ්‍ය ඇමැතිවරිය වැඩිදුරටත් පැවසීය.

ගුරුවරුන්ට හිමිවිය යුතු වැටුප් වර්ධක ලබාදීම සම්බන්ධයෙන් සලකා බැලීමට පත්කළ ඇමති අනු කමිටුවේ යෝජනා පවා නොතකා හරිමින් ආණ්ඩුව ලබාදීමට සූදානම් වන රුපියල් 5,000ක දීමනාව ප්‍රතික්ෂේප කරන අතර එය කොරෝනා මර්දන කටයුතු සඳහා යොදවන ලෙස ගුරු සහ විදුහල්පති සංගම් ආණ්ඩුවට දන්වා ඇත.

ඊයේ (30) කැබිනට් මණ්ඩලය විසින් රුපියල් 5,000ක දීමනාවක් ලබාදීමට කර තිබෙන යෝජනාව කිසිසේත් බාර නොගන්නා බව ඒකාබද්ධ ගුරු සහ විදුහල්පති වෘත්තීය සංගම් අද (31) ආණ්ඩුවට නිල වශයෙන් දැනුම් දී තිබේ.

ඇමති අනු කමිටුව නිර්දේශ කර තිබෙන වැටුප් වර්ධක පවා ලබා නොදී එය අවස්ථා කිහිපයකදී වාරික වශයෙන් ඉහල දැමීමට ආණ්ඩුව කුමන්ත්‍රණකාරී ලෙස සිදුකරන කටයුතුවලට හසු නොවන බවද එම සංගම් අවධාරණය කර ඇත. ගුරුවරුන්ට හිමිවිය යුතු වර්ධක නියමිත ප්‍රමාණය වෙනුවට ඇමති අනු කමිටුව රුපියල් 3,750/- සිට 11,820/- දක්වා ලබාදිය යුතු බවත් විදුහල්පති ශ්‍රේණි සඳහා රුපියල් 6,895/- සිට 12,020/- දක්වා ලබා දියයුතු බවත් එම අනු කමිටුවෙන් නිර්දේශ කර ඇත.

ගුරු විදුහල්පති වැටුප් විෂමතා විසඳීම වෙනුවෙන් අමාත්‍ය මණ්ඩලය ඊයේ (30) ගත් තීන්දු සම්බන්ධයෙන් තම ස්ථාවරය ප්‍රකාශ කිරීම සඳහා කොළඹ දී අද (31) පැවති මාධ්‍ය හමුවකදී එම නියෝජිතයෝ මේ බව සඳහන් කළහ.

එහිදී අදහස් දැක්වූ ලංකා ගුරු සංගමයේ ප්‍රධාන ලේකම් ජෝසප් ස්ටාලින්  පැවසුවේ තම ගැටලුව විසඳීමට බව කියමින් කැබිනට් මණ්ඩලය සම්මතර කර ඇමතිවරයා විසින් ප්‍රකාශයට පත්කළ වූ යෝජනා තමන් ප්‍රතික්‍ෂේප කරන බවයි.

ගුරු විදුහල්පති සංගම් ඉකුත් 26 වැනිදා නව අධ්‍යාපන ඇමතිවරයා හමුවී ඇමති අනුකාරක සභාව යෝජනා කරන 2018 වැටුප් යෝජනාව සුබෝධනී කමිටු වාර්තා කොටසක් ලෙස ගෙන එන ලෙස යෝජනා කළ බවත්, ඇමතිවරයා අනුකාරක සභාව හෝ කැබිනට් මණ්ඩලය එම යෝජනාව සැලකිල්ලට ගෙන නොමැති බවත්ය.

ආණ්ඩුව වෘත්තීය සමිතිවල ඉල්ලීම නොසලකා කටයුතු කරන්නේ නම් ඉල්ලීම් ලබාදෙන තුරු මේ වන විට දින 51ක් තිස්සේ ඔන්ලයින් අධ්‍යාපන කටයුතුවලින් ඉවත්වෙමින් ඉතා ශක්තිමත්ව කැපවීමෙන් දියත් කර ඇති අරගලය තවදුරටත් පෙරට ගෙනයාමට සිදුවන බව ද ඔහු කීවේය.

සමස්ත ලංකා එක්සත් ගුරු සංගමයේ සභාපති යල්වෙල පඤ්ඤාසේකර හිමියෝ සහ ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ, ශ්‍රී ලංකා ජාතික විදුහල්පති සංගමයේ සභාපති පරාක්‍රම වීරසිංහ යන අය මෙම මාධ්‍ය හමුවේ දී අදහස් දැක්වූහ.

පාස්කු ප්‍රහාරය සම්බන්ධයෙන් මාධ්‍ය හමුවකදී අදහස් ප්‍රකාශ කිරීම හේතුවෙන් අපරාධ පරීක්ෂණ දෙපාර්තමේන්තුව හමුවට කැඳවීම් ලැබූ ෂෙහාන් මාලක ගමගේ අද (07) වැනි දිනයටත් එම දෙපාර්තමේන්තුව හමුවට පමුණුවා ඇත.

ෂෙශාන් මාලක පසුගියදා පැවති මාධ්‍ය හමුවකදී, ඔහු සිදුකළ නිරීක්ෂණයක තොරතුරු හෙලිදරව් කළේය.

එම නිරීක්ෂණයට අනුව වත්මන් ජනාධිපතිවරයා සහ ආණ්ඩුව බලයට ගෙනඒමට කටයුතු කළ පුද්ගලයන් පවා, වත්මන් ආණ්ඩුව පාස්කු ප්‍රහාරයෙන් මියගිය පුද්ගලයන්ට සාධාරණය ඉටු කරනු ඇතැයි විස්වාසයක් නොමැති බව ඔහු සඳහන් කළේය.

මෙම අනාවරණයත් සමග ෂෙහාන් මාලකට අපරාධ පරීක්ෂණ දෙපාර්තමේන්තුව හමුවේ පෙනී සිටින්නැයි දන්වා තිබිණි.

ඊයේ හයවැනි දිනයටත් අපරාධ පරීක්ෂණ දෙපාර්තමේන්තුව වෙත ප්‍රකාශ ලබාදීමෙන් පසුව මාධ්‍ය වෙත අදහස් දැක්වූ ෂෙහාන් ප්‍රකාශ කළේ, තමා පිළිබඳව උපන් දා සිට මේ දක්වා සියලු තොරතුරු අපරාධ පරීක්ෂණ දෙපාර්තමේන්තු නිළධාරීන් සොයාගෙන ඇති බවයි. කෙසේ නමුත් තමාගේ සුළු හෝ වැරැද්දක් සොයා ගැනීමට ඔවුන් අසමත් වී ඇති බවයි ඔහු පවසන්නේ.

තමාව ප්‍රශ්න කිරීමෙන් පසුව හෝ පාස්කු ප්‍රහාරය සම්බන්ධයෙන් විමර්ශන කඩිනම් කර ඊට වගකිව යුතු පුද්ගලයන්ට දඬුවම් ලබාදීමට කටයුතු කරනු ඇතැයි බලාපොරොත්තු වන බවත්, විශේෂයෙන් පාස්කු කොමිසමේ වාර්තාවෙන් ඉදිරිපත් කර ඇති නිර්දේශ ක්‍රියාත්මක කිරීමට කටයුතු කරනු ඇතැයි බලාපොරොත්තු වන බවත් ඔහු පවසයි.

LNW

සෞඛ්‍ය කාර්ය මණ්ඩල සාමාජිකයන් කොරෝනා ආසාදිතයන් බවට පත් වීම වැළැක්වීම සඳහා සහ පුරවැසියන්ගේ පරීක්ෂණ අයිතිය තවුරු කිරීමට පී.සී.ආර්. සහ ආර්.ඒ .ටී. ඇතුළු කොරෝනා පරීක්ෂණ පහසුකම් රෝහල් බහිර රෝගී අංශයට ලබා දෙන්න ලෙස වෛද්‍ය රසායනාගාර විද්‍යාඥ වෘත්තීයවේදීන්ගේ විද්වත් සංගමය ජනාධිපති ගෝඨාභය රාජපක්ෂගෙන් ඉල්ලා තිබේ.

අදාළ ඉල්ලීම ලිඛිතව සිදුකර ඇති අතර ඒ වෛද්‍ය රසායනාගාර විද්‍යාඥ වෘත්තීයවේදීන්ගේ විද්වත් සංගමයේ සභාපති රවී කුමුදේශ් විසිනි.

රෝගියෙකු රෝහලට ඇතුලුවීමේදී බාහිර රෝගී අංශය තුළ පී.සී.ආර්. සහ ක්ෂණික ප්‍රතිදේහ පරීක්ෂණ සිදු කිරීමේ පහසුකම ඇති කිරීම මගින් සෞඛ්‍ය සේවකයන් කොරෝනා ආසාදිතයන් බවට පත්වීම වැළැක්වීම මෙන්ම වසංගතය පැතිරයෑම වැළැක්වීම ද සිදුවන බවත් අදාළ ලිපියේ අවධාරණය කර ඇත.

වෛද්‍ය ජයරුවන් බණ්ඩාරට අපරාධ පරීක්ෂණ දෙපාර්තමේන්තුව (CID) හමුවේ පෙනී සිටීමට දින 14 ක කාලයක් ලබා දෙන ලෙස නීතිඥයින් අද(31) අපරාධ පරීක්ෂණ දෙපාර්තමේන්තුවෙන් ඉල්ලීමක් කර ඇත.

ඒ වෛද්‍ය ජයරුවන් බණ්ඩාරට අද අපරාධ පරීක්ෂණ දෙපාර්තමේන්තුවට කැඳවා තිබුණු පසුබිමකය.

අදාළ කැඳවීම සිදුකර තිබුනේ youtube නාලිකාවක් සමග පැවති සම්මුඛ සාකච්ඡාවකදී වැරදි තොරතුරු ජනතාවට ලබාදුන් බවට සිදුකර තිබුණු පැමිණිල්ලකට අනුවය.

පැමිණිල්ල සිදුකර ඇත්තේ, රාජ්‍ය ඖෂධ නීතිගත සංස්ථාවේ හා රාජ්‍ය ඖෂධ නිෂ්පාදන සංස්ථාවේ සභාපතිවරුන් විසිනි.

මේ සම්බන්ධව අදහස් දැක්වූ ජනාධිපති නීතිඥ තිසත් විජේගුණවර්ධන සඳහන් කර සිටියේ,

"වෛද්‍ය ජයරුවන් බණ්ඩාර මහත්මයා කොවිඩ් ආසාදනය වෙලා දැනට කොවිඩ් සුව වීමෙන් පසුව ඇති වෙන යම් යම් සංකූලතා හේතුවෙන් යම් යම් උපදෙස් මත විවේක සුවයෙන් ගත කළ යුතුයි කියන වෛද්‍ය උපදෙස් ලබා දීලා තියන නිසා අපි අපරාධ පරීක්ෂණ දෙපාර්තමේන්තුවට ලිපියක් මගින් දැනුම් දුන්නා. වෛද්‍ය ජයරුවන් බණ්ඩාර මහත්තයාට දින 14 ක කායලක් එම ප්‍රකාශය ලබා දීම සඳහා ලබා දෙන්න කියලා. දින 14 කට පස්සේ ජයරුවන් බණ්ඩාර මහත්තයා ඇවිල්ලා සාකච්ඡාවේදී යම් කිසි කරුණක් හෙළිදරව් කරලා යම් කිසි ප්‍රශ්නයක් අහන්න තියනවා නම් ඒ සම්බන්ධයෙන් සම්පූර්ණ ප්‍රකාශයක් ලබා දෙයි." යනුවෙනි.

එක්සත් ජනපද ඩොලරයක විකුණුම් මිල අද (31) දිනයේ දී රු. 204.89 ක් බව ශ්‍රී ලංකා මහ බැංකුවේ දෛනික විනිමය අනුපාතික සටහන පෙන්වා දෙයි.

එය මෙතෙක් ඉතිහාසයේ ඒක්සත් ජනපද ඩොලරයක් වෙනුවෙන් ‌වාර්තා වූ වැඩිම ‌රුපියල් අගය වේ. මීට පෙර වාර්තා වූ ඉහළම අගය වූයේ 2021 අප්‍රේල් 15 දින ඩොලරයේ විකුණුම් මිල රු. 204.62 ක් ලෙසින් වාර්තා වීමය.

මේ අතර මෙරට විනිමය වෙළඳපොළ පාලනය කිරීමේ ශක්තිය සම්පූර්ණයෙන්ම මහ බැංකුවෙන් ගිලිහී තිබෙන බවත් එය නීති රීති දමා හෝ තර්ජනය කර හෝ මහ බැංකුවේ බලතල පාවිච්චි කර පාලනය කිරීමට නොහැකි වනු ඇති බවත් අනාවරණය කරයි.

“මේ වනවිට කළු කඩය තුළ ඩොලර් එකක් රුපියල් 240, රුපියල් 250, රුපියල් 260 වගේ මිල ගණන් වලට අලෙවි වෙනවා. ඒ කියන්නේ විනිමය වෙළඳපොළ පාලනය කිරීමේ ශක්තිය සම්පූර්ණයෙන්ම මේ වනවිට මහ බැංකුවෙන් ගිලිහී ගොස් තිබෙනවා. නීති රීති දාල හෝ තර්ජනය කරලා හෝ මහ බැංකුවේ බලතල පාවිච්චි කරලා, මහ බැංකුවට මේක පාලනය කරන්න ලැබෙන්නෙ නෑ.“

යනුවෙන් ශ්‍රී ලංකා මහ බැංකුවේ හිටපු නියෝජ්‍ය අධිපති ආචාර්ය ඩබ්ලිව්. ඒ. විජේවර්ධන පවසා ඇති අතර ඒ අන්තර්ජාල youtube නාලිකාවක් සමඟ පැවති සම්මුඛ සාකච්ඡාවකදීය.

එසේම ලංකාවේ ණය වර්ගීකරණයේ ඉදිරි දැක්ම ස්ටෑන්ඩර්ඩ් ඇන්ඩ් පුවර්ස් ජාත්‍යන්තර ණය වර්ගීකරණ ආයතනය CCC සෘණ මට්ටම දක්වා පහත දමා ඇති බවත් මූඩීස් ණය වර්ගීකරණ ආයතනය ලංකාවට අනතුරු හඟවා තිබෙන බවත් මෙවැනි තත්ත්වයක් තුළ 2022 කල් පිරෙන බැඳුම්කර ශ්‍රී ලංකාවට නැවත ගෙවීමට නොහැකිවේ යැයි විශ්වාසයක් මේ වනවිට ආයෝජකයින් තුළ ඇතිවී තිබෙන බවත් ඔහු සඳහන් කර තිබේ.

තවත් මරණ 194ක් ඊයේ (30) දිනට අදාළව සෞඛ්‍ය සේවා අධ්‍යක්ෂක ජනරාල්වරයා විසින් තහවුරු කර ඇත.

ඊට අදාළ නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (31) නිකුත්කර තිබේ.

ඒ අනුව මෙරට සමස්ත කොවිඩ් ආසාදිත මරණ සංඛ්‍යාව 9,185ක් දක්වා ඉහළ ගොස් ඇත.

මේ අතර එළැඹෙන සැප්තැම්බර් 06 වනදායින් පසු තවදුරටත් රට වසා තබන්නේද? නැද්ද? යන්න සම්බන්ධයෙන් අද පැවති කැබිනට් තීන්දු දැනුම්දීමේ මාධ්‍ය හමුවේදී විමසනු ලැබිණ.

ඊට ප්‍රතිචාර දක්වමින් සම කැබිනට් ප්‍රකාශක අමාත්‍ය රමේෂ් පතිරණ පවසා සිටියේ පවතින තත්ත්වයන් අධ්‍යයනය කර ඒ සම්බන්ධයෙන් තීරණය කරනු ඇති බවය.

පින්නවල අලි අනාථාගාරයේදි පළමු වරට නිවුන් අලි පැටවුන් උපතක් සිදුව තිබේ.

අද අළුයම 4.00ට පමණ පළමු පැටවා උපත ලැබූ අතර, දෙවන පැටවා දහවල් 12.00ට පමණ උපත ලබා තිබේ.

පින්නවල අලි අනාථාගාරයේ නිවුන් අලි උපතක් සිදු වූයේ ප්‍රථම අවස්ථාවේ මෙයයි.

අවුරුදු 24ක් පමණ වයසැති ‘සුරංගි’ නම් කෙනරක් මෙම අලි පැටවුන් බිහි කර ඇත. 1996 වසරේ ත්‍රිකුණාමලය සුරංගල්ගම ප්‍රදේශයේ උපත ලැබූ එම මෙම කෙනර 1997 වසරේදී පින්නවල අලි රංචුවට එක් වූ අතර ඇය 2009 වසරේදී කනක නම් අලි පැටවෙකු ද බිහි කළාය.

අලි අනාථාගාර නිලධාරීන් ප්‍රකාශ කළේ, කෙනෙර සහ පැටවුන් දෙදෙනා නිරෝගී සුවයෙන් පසුවන බවය.

වවුනියාව සෙට්ටිකුලම් ප්‍රදේශයෙන් හමු වූ පණ්ඩු නම් ‘හස්තියා’ මෙම අලි පැටවුන් දෙදෙනාගේ පියා ලෙස සැලකෙයි.