පුවත්

තවත් කොරෝනා මරණ 131ක් ඊයේ (09) දිනට අදාළව සෞඛ්‍ය සේවා අධ්‍යක්ෂ ජනරාල් විසින් තහවුරු කර ඇති අතර ඊට අදාළ නිල නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (10) නිකුත්කර ඇත.

ඒ සමඟ මෙරටින් වාර්තා වූ මුළු කොරෝනා ආසාදිත මරණ සංඛ්‍යාව 10,995 ක් දක්වා ඉහළ ගොස් ඇත.

මියගිය අයගෙන් 110 ක් වයස අවුරුදු 60 ට වැඩි අය වන අතර, අවුරුදු 30 ත් 24 ත් අතර වයසේ පසුවන 20 දෙනෙක් සහ අවුරුදු 30 ට අඩු එක් අයෙකුද ඒ අතර වෙයි.

මියගිය අය අතරින් 73 දෙනෙක් පිරිමි වන අතර සහ කාන්තාවන් 58 දෙනෙකි.

ඉකුත් සතියේ මෙන්ම ආසන්න දිනවල සිදුවූ සිත් රිදවන සිදුවීම් සහ කරුණු නිසා තමන් සැලසුම් කළ දිනට පෙර ශ්‍රී ලංකා මහ බැංකුවේ අධිපති ධුරයෙන් විශ්‍රාම ගන්නා බව දේශමාන්‍ය මහාචාර්ය  ඩබ්ලිව්.ඩී. ලක්ෂ්මන් අද (10) ප්‍රකාශ කළේ ය.

ලබන මාසයට යෙදී තිබෙන තම 80 වැනි ඡන්ම දිනයේ දී විශ්‍රාම යෑමට කලින් සැලසුම් කරගෙන සිටියද පසුගිය සතියත් දින දහයත් අතර කාලයේ දී සිදු වූ සිත් රිදවන සිදුවීම් තමාගේ විශ්‍රාම යෑම ඉක්මන් කළ බව සති හයකින් පමණ ඉක්මන් කළ බව දේශමාන්‍ය මහාචාර්ය  ඩබ්ලිව්.ඩී. ලක්ෂ්මන් පැවැසීය.

මහ බැංකුවේ අධිපතිවරයා මේ අදහස් දක්වා සිටියේ සිය විශ්‍රාම යෑම දැනුම් දීම වෙනුවෙන් විඩියෝ තාක්ෂණය ඔස්සේ අද (10) පැවැති මාධ්‍ය හමුව අමතමිණි.

මේ අනුව ලබන සතියේ 14 වැනි දා සිය ධුරයෙන් විශ්‍රාම ගන්නා බව දේශමාන්‍ය මහාචාර්ය  ඩබ්ලිව්.ඩී. ලක්ෂ්මන් මෙම මාධ්‍ය හමුවේ දී පැවැසීය.

ශ්‍රී ලංකාව නියෝජනය කරමින් ජාත්‍යන්තර මූල්‍ය අරමුදලේ විකල්ප විධායක අධ්‍යක්ෂ ධුරය දරන්නැයි තමන්ට යෝජනාවක් ඉදිරිපත් වූ බවත් තමන් එය ප්‍රතික්ෂේප කළ බවත් මහාචාර්ය ඩබ්ලිව්. ඩී. ලක්ෂමන් එහිදී පැවැසීය.

මා අධිපති ධුරයේ වැඩ බාරගත් සතියකට දෙකක‌‌ට පමණ පෙර ජනාධිපති ලේකම් ආචාර්ය පී.බී. ජයසුන්දරගෙන්, ශ්‍රී ලංකා මහ බැංකුවේ අධිපති ධුරය බාරගන්නැයි තමන්ට මහත් විස්මයක් ගෙන දුන් බවත් එය කිසිසේත් අපේක්ෂා නොකළ එකක් බව ද හෙතෙම කීවේ ය.

මීට පෙර තමන්, කොළඹ විශ්වවිද්‍යාලයේ උප කුලපති ධුරය දරන සමයේ දී සිටි වකවානුවේ දී එනම් 2004 වසරේ දී තමන්ගෙන් කළ ඉල්ලීම ද තමන් ප්‍රතික්ෂේප කළ බවත් ඔහු කීය.

මෙවර කළ ඉල්ලීම ද ප්‍රතික්ෂේප කළ අවස්ථාවේ දී වසරකටවත් එම ධුරය බාරගෙන ප්‍රතිපත්ති සකසන ලෙසත් තමන් ද සහාය දුන් ආණ්ඩුවට මතවාදී ව සහාය දෙන්නැයි කළ ඉල්ලීම ද සලකා බලමින් තමන් එම ඉල්ලීම බාරගත් බවත් ද හෙතෙම පැවැසීය.

එම ඉල්ලීම බාරගෙන මේ වනවිට වසර දෙකකට ආසන්න කාලයක් මහ බැංකුවේ අධිපති ධුරයේ කටයුතු කළ බවත් තමන් නිවැරැදි යැයි විශ්වාස කරන ආර්ථික සහ මූල්‍ය ප්‍රතිපත්ති රාමුව තුළ කටයුතු කළ බවත් තමන් ධුරයේ කටයුතු කළ සමයේ ගත් කිසිදු තීරණයක් හෘදය සාක්ෂියට විරුද්ධව ගෙන නැති බවත් මහ බැංකු අධිපතිවරයා වැඩිදුරටත් කීවේ ය.

මෙරට කොරෝනා ආසාදිතයින් අතුරින් 95.8% ක් මාරාන්තික කොරෝනා ඩෙල්ටා ප්‍රභේදය වැළඳුණු අය බව ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨයේ ආසාත්මිකතා , ප්‍රතිශක්තිවේද සහ සෛල ජීව විද්‍යා අධ්‍යන අංශයේ ප්‍රධානී චන්දිම ජීවන්දර පවසයි.

මේ පිළිබඳ ඔහු සිය ට්වීටර් ගිනුමේ සටහනක් තබා ඇත.

මීට අදාළ වාර්තාවක් සෞඛ්‍ය සේවා අධ්‍යක්ෂ ජනරාල් වෙත යොමුකර ඇති බවත් වාර්තා වෙයි.

මේ අතර , රටපුරා  කොරෝනා ආසාදිතයන්ගෙන් අහඹු ලෙස ලබාගත්   ජෛව පටල සාම්පල පිළිබඳව පැවැත්වූ  ජාන විශ්ලේෂණ පරීක්ෂණයේ  අලුත්ම  වාර්තාව  ආචාර්ය චන්දිම ජීවන්දර මහතා  විසින් සෞඛ්‍ය සේවා අධ්‍යක්ෂ ජනරාල්වරයාට අද (10) බාරදෙනු ලැබීය

මේ අතර  මෙරටින් මේදක්වා සොයාගෙන ඇති  ඩෙල්ටා සැර කොරෝනා වයිරස ප්‍රභේදය ආසාදනයවූ  පුද්ගලයන් සංඛ්‍යාව  අද (10) වනවිට 359ක් දක්වා ඉහළ ගොස් තිබිණ.

වාරිමාර්ග අමාත්‍ය, රාජ්‍ය ආරක්ෂක, ආපදා කළමනාකරණ සහ ස්වදේශ කටයුතු රාජ්‍ය අමාත්‍ය චමල් රාජපක්ෂට කොවිඩි – 19 ආසාදනය වීම හේතුවෙන් කොළඹ පෞද්ගලික රෝහලකට ඇතුළත්කර ඇතැයි වාර්තා⁣ වේ.

ඇමති චමල් රාජපක්ෂ කොවිඩ් ආසාදිතයෙකුගේ ආශ්‍රිතයෙකු වීම හේතුවෙන් සිය නිවසේ නිරෝධායනයට ලක්කර සිටියදී සිදු කළ PCR පරීක්ෂණයේදී මෙලෙස ඔහුද ආසාදිතයෙකු බව අනාවරණය වී ඇත.

දිවයිනටම බලපැවැත්වෙන පරිදි දැනට පනවා ඇති නිරෝධායන ඇඳිරිනීතිය ලබන 21 වනදා දක්වා දීර්ඝ කිරීමට තීරණය කර තිබේ.

ඒ එදින අලුයම 4.00 දක්වාය.

ට්විටර් පණිවුඩයක් නිකුත් කරමින් ජනාධිපති මාධ්‍ය ප්‍රකාශකවරයා සඳහන් කළේ ජනාධිපතිවරයාගේ ප්‍රධානත්වයෙන් පැවැත්වෙන කොවිඩ් මර්දන විශේෂ කමිටු සාකච්ඡාවේදී අදාළ තීරණයට එළඹි බවය.

මෙයට පෙර ගත් තීරණය අනුව නිරෝධායන ඇඳිරි නීතිය අවසන් වීමට නියමිතව තිබුණේ ලබන 13 වැනිදා සඳුදාය.

කොරෝනා පැතිරීම පාලනය කිරීමේ පියවරක් ලෙස ජනාධිපතිවරයා විසින් රට පුරා නිරෝධායන ඇඳිරි නීතිය පනවණු ලැබුවේ පසුගිය අගෝස්තු මස 20 වැනිදාය.

මේ වනවිටත් රට පුරා මගඩි රැසක් ක්‍රියාත්මක වන අතර,එක් පැත්තකින් දත්ත මැකීමේ මගඩිය,තව පැත්තකින් ඇන්ටිජන් මගඩිය ,තවත් පැත්තකින් ඖෂධ ජාවාරම ජයටම සිදුවෙන බවත් මේ සියලු ව්‍යසන මැද ජනතාව අති මහත් පීඩනයකින් දුක් විඳින බවත් විපක්ෂ නායක සජිත් ප්‍රේමදාස පැවසීය .

අල්ලසට දූෂණයට මගඩියට උපරිම ඉඩ  සලසන ආණ්ඩුවක් රටේ ක්‍රියාත්මක වන අතර  විපක්ෂය හැටියට සමගි ජන බලවේගය ආණ්ඩුවක් විසින් කළ යුතු ජනතාවාදී කටයුතු සිදුකරමින් සිටින බව ද විපක්ෂනායකවරයා පැවසීය.

ජනතාවට සේවය කිරීම ආණ්ඩුවේ වගකීම වුවත් ආණ්ඩුව සේවය කරමින් සිටින්නේ ගජ මිතුරන් වෙනුවෙන් බව පැවසූ විපක්ෂ නායකතුමා,ඔවුන්ට දිය යුතු සියලු පහසුකම් ආණ්ඩුව  ලබාදෙන බවද සඳහන් කර සිටියේය.

විපක්ෂ නායකවරයා මේ අදහස් දක්වා සිටියේ "විපක්ෂයෙන් හුස්මක්"25වන අදියර යටතේ කෑගල්ල ශික්ෂණ රෝහලට  රුපියල් තිස්ලක්ෂ අනූදහසක  (රු.3,090,000.00)  වටිනා රෝහල් උපකරණ පරිත්‍යාග කිරීමේ වැඩසටහනට එක් වෙමිනි.

අදාල පරිත්‍යාගය අද(09) විපක්ෂ නායක කාර්යාලයේදී සිදුකෙරිණ.

මේ ව්‍යසනකාරී මොහොතේත් සංවර්ධන කටයුතු  අධීක්ෂණ මන්ත්‍රීවරු පත්කරමින් මහජන ධනය විනාශ කිරීමට ආණ්ඩුව කටයුතු කරන අතර සැබැවින්ම ජනතාව කෙරෙහි ආදරයක් ඇත්නම් ආණ්ඩුව කළ යුත්තේ  මන්ත්‍රීවරු පෝෂණය කරමින් ඔවුන්ව සංවර්ධනය කිරීම නොව ,ජනතාවගේ ජීවිත සුරක්ෂිත කිරීම බවද එම අවස්ථාවේ සජිත් ප්‍රේමදාස විපක්ෂනායකවරයා පැවසීය.

ආණ්ඩුවේ මන්ත්‍රීවරුන්ට සියලු වරදාන වරප්‍රසාද ලබා දීමට ආණ්ඩුව කටයුතු කළත්  ජනතාව වෙනුවෙන් කිසිවක් ලබා දීමට ආණ්ඩුව  සූදානම් නැති බව පැවසූ ඔහු , මේ සියලු දේ සිදුවන්නේ මහජනතාවගේ බදු මුදලින් බව ආණ්ඩුව තේරුම් ගත යුතු යැයි ද පැවසීය .

රෝහල් උපකරණ ලබාදීමේ " විපක්ෂයේ හුස්මක්" වැඩසටහන මේ දක්වා වට 24 ක් පුරා දියත් වී ඇති බව පැවසූ විපක්ෂ නායකවරයා ඒ හරහා ලක්ෂ හත්සිය හතළිහකට වැඩි රෝහල් උපකරණ ලබාදී ඇතැයිද පැවසීය.

මේ ජනතාවාදී වැඩපිළිවෙළ ඉදිරියටත් නොනවත්වා කන්ඩ පවත්වාගෙන යන බවද ඔහු පැවසීය.

කොරෝනා ව්‍යසනය හේතුකොටගෙන මුලුමහත් ශ්‍රී ලංකාවම බලවත් පීඩාවකට පත්ව සිටින අවස්ථාවේ අපේම ජනතාව වෙනුවෙන් ප්‍රායෝගිකවම කිසියම් මෙහෙවරක් කළ යුතුයැයි යන විශ්වාස පෙරදැරිව  සමගි ජන බලවේගය විසින් "විපක්ෂයෙන් හුස්මක්" වැඩසටහන ආරම්භ කළ අතර ඊට සමගාමීව සුවපත් දේශයක් බිහි කිරීම අරමුණු කොටගෙන විපක්ෂ නායක සජිත් ප්‍රේමදාස මහතා  විසින් දියත් කරනු ලබන  'ජන සුවය' ව්‍යාපෘතියෙන් සිදුකරන ලද සමාජ සත්කාර වැඩසටහනෙහි 25 වන පියවර ලෙස රුපියල් තිස්ලක්ෂ අනූදහසක  (රු.3,090,000.00)  වටිනා රෝහල් උපකරණ කෑගල්ල ශික්ෂණ රෝහල් අධ්‍යක්ෂ වෛද්‍ය වයි.ජේ. සමරසිංහ වෙත පරිත්‍යාග කරනු ලැබීය. ඒ අනුව,

01.රුපියල් ලක්ෂ පහක් (රු500,000.00) වටිනා Multipara Monitors (Edan) උපකරණ  02ක් 

රුපියල් දොළොස් ලක්ෂ හතලිස්දහසක් (රු.1,240,000.00)වටිනාOpti flow nasal therapy උපකරණයක් සහ රුපියල් දහතුන් ලක්ෂ පනස්දහසක් වටිනා  (රු.1,350,000.00)Opti flow nasal therapy (Donations for Australia Melban Art Circle)උපකරණයක් මෙලෙස පරිත්‍යාග ලෙස ලබාදීම සිදුවිය.

කොරෝනා ව්‍යසනය හේතුකොටගෙන පීඩාවට පත් ජනතාවට සෞඛ්‍යමය සහන සලසනු වස් සමගි ජන බලවේගයේ මන්ත්‍රී කණ්ඩායම, සංවිධායකයින්, සාමාජිකයින්, සමගි ජන බලවේගයේ විදේශීය ශාඛා,  දෙස් විදෙස් ආධාරකරුවන් සහ "ජනසුවය" ව්‍යාපෘතිය එක්ව "විපක්ෂයෙන් හුස්මක්" වැඩසටහන ක්‍රියාත්මක කරන අතර මේ දක්වා වට 24 ක් තුළ රුපියල් ලක්ෂ හත්සිය දහනවයක (රු. 71,904,000)රෝහල් උපකරණ පරිත්‍යාග කරනු ලැබීය.

 ශ්‍රීලංකා වෛද්‍ය සංගමය ඉල්ලා ඇත්තේ සයිනොෆාම් එන්නත් දෙකම ලබාදුන් නමුත් 60 ට වැඩි වැඩිහිටි ප්‍රජාවට සහ ප්‍රතිශක්තිකරණ පද්ධතිය දුර්වල පිරිස වෙත තෙවන මාත්‍රාවක් ලබාදීමට අවශ්‍ය බවයි.

එම සංගමය නිර්දේශ කරන්නේ මේ සඳහා ඇස්ට්‍රාසෙනෙකා, ෆයිසර් හෝ මොඩර්නා යන එන්නත් වර්ග භාවිත කරන ලෙසය.

බහරේන රාජ්‍යයේ සිදු කරන ලද පරීක්ෂණයක දත්ත උපුටා දක්වමින් ශ්‍රී ලංකා වෛද්‍ය සංගමය මේ නිර්දේශ ඉදිරිපත් කර ඇත.

ඊට අනුව සයිනෝෆාම් එන්නත් ලබාගත් අවුරුදු 50 වැඩි පුද්ගලයින් මරණයට පත්වීම සහ රෝහල් ගතවීමේ අනුපාතය ඇස්ට්‍රාසෙනෙකා, ෆයිසර් සහ මොඩර්නා යන එන්නත් ලබාගත් අයට සාපේකේෂව ඉහළ අගයක් ගන්නා බව අනාවරණය කරගෙන ඇත.

තවද ශ්‍රී ජයවර්ධනපුර විශ්වවිද්‍යාලය කරන ලද පරීක්ෂයකින් ද අනාවරණය කරගෙන ඇත්තේ ඇස්ට්‍රාසෙනෙකා එන්නත ලබාගත් 60 වැඩි පුද්ගලයින් සෑම කෙනෙකුගේම ප්‍රතිදේහ නිපදවෙන බවටත් සයිනෝෆාම් එන්න ලබාගත් සියයට 7%කට එම තත්ත්වය ඇති නොවන බවත් සනාථ වී ඇති බව යැයිද ලංකා වෛද්‍ය සංගමය පෙන්වා දෙයි.

මෙම පර්යේෂණ පදනම් කර ගනිමින් ශ්‍රී ලංකා වෛද්‍ය සංගමය පවසන්නේ, 18ත් 60ත් අතර බරපතල රෝග තත්ත්වයන් නොමැති සියලුම පුද්ගලයින්ට සයිනෝෆාම් එන්නත ලබාදෙන ලෙසයි .

12 ත් 18 ත් අතර රෝගී තත්ත්වයන් සහිත දරුවන්ට ෆයිසර් එන්නත් මාත්‍රා දෙකක් නිර්දේශ කරන බව ද ශ්‍රී ලංකා වෛද්‍ය සංගමය සඳහන් කරයි.

තවද ස්පුට්නික් පළමු මාත්‍රාව ලබා සිටින පුද්ගලයින්ට එහි දෙවන මාත්‍රාව ලබාදිය නොහැකි නම් ඒ වෙනුවට ඇස්ට්‍රාසෙනෙකා, ෆයිසර් හෝ මොඩර්නා එක් මාත්‍රාවක් ලබාදෙන ලෙසත් වෛද්‍ය සංගමය ඉල්ලා ඇත.

ඇස්ට්‍රාසෙනෙකා, ෆයිසර් සහ මොඩර්නා එන්නත්වල සඵලතාවය අවම වශයෙන් මාස 06 ක් පවතින බවට සනාථ වී ඇති බැවින් ඇස්ට්‍රාසෙනෙකා එන්නතේ මාත්‍රා දෙකම ලබා සිටින 60 වැඩි පුද්ගලයින් සඳහා අවම වශයෙන් දෙවන මාත්‍රාවෙන් මාස 6 කට පසු එම වර්ගයෙන්ම හෝ වෙනත් වර්ගයකින් තුන්වන මාත්‍රාවක් දිය යුතු බව ද ශ්‍රී ලංකා වෛද්‍ය සංගමයේ නිර්දේශ අතරට ඇතුළත් වේ.

තවත් කොවිඩ් මරණ 175ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

ඊයේ (08) දින තහවුරු කර ඇති එම මරණ 175ත් සමග මෙරට සිදුවී ඇති සමස්ත කොවිඩ් මරණ සංඛ්‍යාව 10,864ක් දක්වා ඉහළගොස් ඇත.

කාන්තාවන් 79 දෙනෙකු සහ පිරිමි පුද්ගලයින් 96 දෙනෙකු ඊයේ තහවුරු කළ මරණ අතරට අයත්ය.

අවුරුදු 30ට අඩු එක් මරණයක් ද වාර්තා වී තිබේ.

අත්‍යවශ්‍ය නොවන තෝරාගත් භාණ්ඩ ආනයනය කිරීමේ දී 100% ආන්තික මුදල් තැන්පතු අවශ්‍යතාවක් වහාම ක්‍රියාත්මක වන පරිදි පැනවීමට මුදල් මණ්ඩලය තිරණය කර ඇතැයි ශ්‍රී ලංකා මහ බැංකුව පවසයි.

ඒ, බලපත්‍ර ලාභී වාණිජ බැංකු සහ ජාතික ඉතිරි කිරීමේ බැංකුවේ ණයවර ලිපි හා ප්‍රතිග්‍රහණය මත ලියවිලි ලබාදීමේ කොන්දේසි යටතේය.

2021 සැප්තැම්බර් මස 08 වන දින පැවති රැස්වීමේදී ඒ බව තීරණය කර තිබේ.

ජාතික සත්වෝද්‍යාන දෙපාර්තමේන්තුවේ අධ්‍යක්ෂ ජනරාල් ඉෂිනි වික්‍රමසිංහ  සිය ධූරයෙන් ඉල්ලා අස්වී තිබේ. ඇය සඳහන් කළේ, මේ බව දැනුම් දෙමින් විෂය භාර අමාත්‍යවරයාට ලිපියක් යොමු කළ බවය.

මෙම ඉල්ලා අස්වීම සිදුවන්නේ ජාතික සත්වෝද්‍යාන දෙපාර්තමේන්තුව භාරයේ නඩු භාණ්ඩ ලෙස රඳවා සිටි හීලෑ අලි , ඇතුන් මුල් හිමිකරුවන්ට මුදාහරින ලෙස නියෝග කර ඇති පසුබිමකදී ය.

නීතිපතිවරයා කළ ඉල්ලීමකට අනුව කොටුව අතිරේක මහේස්ත්‍රාත්වරයාගේ නියෝගයකින් අලි ඇතුන් 13 දෙනෙකු මුල් හිමිකරුවන්ට ලබාදීමට නියම කෙරිණි.

පරිසර ක්‍රියාකාරිකයෙකු වන ඉෂිනි වික්‍රමසිංහ දෙපාර්තමේන්තුවේ ප්‍රගතිශීලී වෙනස්කම් කිහිපයක් හඳුන්වා දීමට මූලික වූ අයෙකි.

යුනෙස්කෝ ලෝක උරුම තෙත් කලාපීය වැසි වනාන්තරයක් වන සිංහාරජ රක්ෂිතයේ නැගෙනහිර බෑවුමට මායිම්ව පිහිටි කොලොන්න ප්‍රාදේශීය ලෙකම් කොට්ඨාසය තුල පිහිටා ඇති බොහෝ ඉඩම් ප්‍රමාණයක් අයිති වන්නේ ඉඩම් අමාත්‍යංශයට අයත් ඉඩම් ප්‍රතිසංස්කරණ කොමිෂන් සභාව(LRC) යටතටයි. මෙම ඉඩම් අතුරින් බොහෝ ඒවා වනාන්තර හෝ ජල පෝෂක ඉඩම් ලෙස පවතින ඉඩම් කැබලි වන අතර එම ඉඩම් කැබලි සිංහාරය වනාන්තරයට පවරා ගැනීමට කටයුතු සිදුවෙමින් පවතී. එලෙස පවතින ඉඩම් කැබලි වර්තමානය වන විටදී ඉඩම් ප්‍රතිසංස්කරණ කොමිෂන් සභාව(LRC) විසින්ම මංකොල්ල කමින් පවතී.

මීට වසර 50 කට ආසන්න කාලයකට පෙර සිරිමාවෝ බණ්ඩාරනායක මහත්මිය විසින් (LRC), පිහිටුවන ලද්දේ එවකට පවුල් 6000කට අයිතිව තිබු, ඉඩම් අක්කර ලක්ෂ 15කට ආසන්න ඉඩම් ප්‍රමාණයක් පවරාගෙන රජය යටතට පත්කිරීම සඳහාය.එවකට එසේ පිහිට වූ එම ආයතනය වර්තමානය වන විට අමාත්‍යවරුන් හට,දූෂිත නිලධාරීන් හට මුදල් උපයා ගැනීම සඳහා ක්‍රියාත්මක වන කොමිෂන් සභාවක් බවට පත්ව ඇත.

LRC විසින් ඉඩම් පවරාගත් පාර්ශ්වයන්ට හිලව් ඉඩම් ලබාදීම පවා සම්පුර්ණ කරනොමැති පසුබිමක, ඉඩම් නොමැති දුප්පත් මිනිසුන්ගේ ඉඩම් අවශ්‍යතාව සඳහා ඉඩම් වෙන්කර නොමැති පසුබිමක ඉඩම් ප්‍රතිසංස්කරණ කොමිෂන් සභාවට හිතෙන හිතෙන ආකාරයට දේශපාලන, ව්‍යපාරික, පෞද්ගලික ආදී විවිධ පාර්ෂවයන් හට ලාභ හෝ දේශපාලන අවශ්‍යතා මත අක්‍රමවත් අයුරින් ඉඩම් බැහැරකිරීම මහා අපරාධයකි.

යම් යම් පාර්ශව විසින් මෙසේ ලබාගන්නා ඉඩම් වනසා මුදල් උපයා ගැනීමත්, එසේ නොමැතිනම් වෙනත් පාර්ෂව වලට අධික ලාබහයකට නැවත බදුදීමත් මෙන්ම මෙවැනි ඉඩම්වල පස්කැපීම, කළුගල් කැඩීම මෙන්ම වෙනත් ඛනිජ කැනීම්ද, LRC න් ලබාදිය යුතු ඉඩම් වෙනුවට ජනතා වතුසංවර්ධන මණ්ඩලය (JEDB) වටිනා ඉඩම් ලබාදීමට/විකිණීමට උත්සාහ කිරීම, යම් යම් ප්‍රදේශවල LRC ඉඩම් එහි නිලධාරීන් විසින් කූඨ ලෙස විකිණීම ඇතුළු වංචා දුෂණ අක්‍රමිකතා මෙම ආයතනයෙන් විශාල ලෙස වාර්තාවේ. මේවාට වගකිවයුතු වන්නේ ඉඩම් අමාත්‍යතුමා ඇතුළු ඉඩම් ප්‍රතිසංස්කරණ කොමිෂන් සභාවේ දූෂිත නිලධාරීන්වේ.

ඉඩම් ප්‍රතිසංස්කරණ කොමිෂන් සභාව LRC , ජනාධිපති කාර්යාලය, අපරාධ පරීක්ෂණ දෙපාර්තමේන්තුව, අල්ලස් හා දුෂණ විමර්ශන කොමිෂන් සභාව ඇතුළු ආයතන විශාල ප්‍රමාණයකට අප විසින් මෙම ඉඩම් අවභාවිතාවන් සහ කොල්ලයන් සම්බන්ධව පැමිණිලි මේ වන විටත් ඉදිරිපත් කර අති අතර ඒ අනුව පළමු ඉඩම් කොල්ලය වනුයේ රත්නපුර දිස්ත්‍රික්කයේ කොලොන්න ප්‍රාදේශීය ලේකම් කොට්ඨාසයේ උල්ලිදුවාව ග්‍රාමසේවා වසමේ ඇඹිලිපිටිය ඉඩම් ප්‍රතිසංස්කරණ කොමිෂන් සභා කාර්යාලයට අයත් ප්‍රදේශයේ (අධ්‍යක්ෂ රංජන් වීරසිංහ සහ ක්ෂෙත්‍ර නිලධාරී සමන්ත) යන අය විසින් අයුතු ලෙස ඉඩම් අල්ලාගැනීමට යම් යම් පාර්ශ්වයන්ට අවසර ලබාදීමයි. ගම්මුන් අප වෙත ලබාදුන් ප්‍රකාශ අනුව මෙලෙස ඉඩම් ලබාදීමේදී සන්තෝෂම් ලෙස දශ ලක්ෂ ගණනක් (ඔවුන්ට අනුව ලක්ෂ 60 ත් - 70ත් අතර මුදලක් මුදලක්) ලබාගෙන ඇති බව පවසයි.

සිංහරාජ රක්ෂිතයට පෙනෙන මායිම පිහිටි මෙම ප්‍රදේශය ගින් ගඟෙහි පෝෂක කලාපයක් වන අතර වන සංරක්ෂණ දෙපාර්තමේන්තුවට පවරාදී වනාන්තර ලෙස පවත්වාගෙන යාම විනා වෙනත් කටයුත්තක් සිදුකළ හැකි භූමියක් නොවන්නේ මෙම බෑවුම නාය යාමේ අධි අවධානම් කලාපයක් ලෙස නම් කර අවදානම් නිවේදන පවා නිකුත් කර ඇති නිසාය.

එසේම, අප විසින් කළ සොයාබැලීමේදී ඇඹිලිපිටිය ඉඩම් ප්‍රතිසංස්කරණ කාර්යාලයෙන් දැනගැනීමට ලැබුනේ ප්‍රධාන කාර්යාලයෙන් එවන ලද ලැයිස්තුවකට අනුව ඉඩම් ලබාදෙන්නේට කටයුතු කළ බවත්, එය මේ වන විට අක්කර 100 ක පමණ ප්‍රමාණයක් බවත්, තමන් මේ සම්බන්ධව තීරණ නොගත් බවත්ය. කෙසේ නමුත් ප්‍රදේශවාසීන් පවසන්නේ මේ වනවිටත් එක් එක් අය විසින් තමාගේ යයි සලකුණු කර ඇති ප්‍රදේශය අක්කර සිය ගණනක් බවයි. එසේනම්, මෙසේ ඉඩම් අවභාවිතාකර කොල්ලකෑමට හැරීමෙන් මුදල් ගරන්නෝ කවරහුද? ඉඩම් ලබාදීමට අනුගමනය කළ ක්‍රමවේද මොනවාද? ලැයිස්තු සැකසුවේ කවුරුන්ද? එසේම ඇඹිලිපිටිය නගරයේ ව්‍යාපාරිකයින්ට ඉඩම් ලබාදුන්නේ කෙසේද? යන්න විශාල ගැටළුවකි.

LRC සතුව සිංහරාජය වටා සහ අවශේෂ කලාප වන මෙම ප්‍රදේශයේ වනාන්තර සහ අධි සංවේදී ඉඩම් විශාල ප්‍රමාණයක් ඇත. මෙම ඉඩම් ආශ්‍රිතව පසුගිය දිනක "ඉ***"(නම සංස්කරණය කර ඇත ) හිමිද LRC ඉඩමක් අලාගන්නනට කරක් ගසන ලද අතර එය ඉතා හොඳින් වැඩුණු ඝන වනාන්තර කොටසකින්ද යුතු ඉඩමක් වූ අතර ගම්මුන්ගේ විරෝධය හමුවේ LRC ය හැරීගිය නමුත් එක් එක් අයගේ අවශ්‍යතාවන්ට LRC ඉඩම් වැනසීම සහ LRC වනාන්තර ඉඩම් වැනසීම දිගින් දිගටම සිදුවෙමින් පවතී.

සිංහාරජ රක්ෂිත වනාන්තරයට පවාරා ගැනීම සඳහා කටයුතු සිදුකෙරෙමින් පවතින ඉඩම් ප්‍රතිසංස්කරණ කොමිෂන් සභාව(LRC) සතු වනාන්තර ප්‍රදේශ එම කොමිශන් සභාවේ නිලධාරීන් විසින්ම අවිධිමත් ලෙස භාහිර පිරිස් වෙත ලබා දීම සහ අනවරෙන් ඉඩම් අල්ලා ගන්නා පුද්ගලයන් හට නීතිය ක්‍රියාත්මක නොකර සිටීම බරපතල ගැටළුවක් වේ. සිංහාරජ රක්ෂිත වනාන්තරයේ පේරණ කලාප භූමිය මෙලෙස වීනාශ කිරීම ලෝක උරුම වනාන්තරයකට කිසිසේත් උචිත ක්‍රියාවක් නොවන අතර අදාල නිලධාරීන් මේ පිලීබඳව සොයා බලා මෙම විනාශ සිදූවෙමින් පවතින ප්‍රදේශය සංරක්ෂණය කිරීම සඳහා කඩිනම් ක්‍රියා මාර්ගයක් ගන්නා ලෙස වැසිවනාන්තර සුරකින්නෝ සංවිධානය බලධාරීන්ගෙන් ඉල්ලා සිටී.

ජයන්ත විජේසිංහ

කැඳවුම්කරු

වැසිවනාන්තර සුරකින්නෝ සංවිධානය

තවත් කොරෝනා මරණ 185 ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ තිබේ.

මියගිය පිරිස අතරින් 102 දෙනෙකු පිරිමි පුද්ගලයින් වන අතර ඉතිරි 83 දෙනා කාන්තාවන් ය.

වාර්තා වූ කොරෝනා මරණ අතර වයස අවුරුදු 30ට අඩු එක් ආසාදිතයෙකු සිටී.

මියගිය පිරිස අතර අවුරුදු 30 – 59 ත් අතර වයසේ පසුවන 44 දෙනෙකු සිටින අතර ඉතිරි මරණකරුවන් 140 දෙනා ම වයස අවුරුදු 60 සහ එම වයස් සීමාව ඉක්ම වූ පුද්ගලයින් වේ.

මහින්ද රාජපක්ෂ අගමැතිවරයා සහ විදේශ කටයුතු ඇමතිවරයා ඉතාලියේ සංචාරයක නිරත වෙමින් පාප්වහන්සේට පාස්කු දින ප්‍රහාරය සම්බන්ධයෙන් කරුණු දැක්වීමට සූදානම් වීම පිළිබඳව අද (08) දින පැවති මාධ්‍ය හමුවේදී මැල්කම් රංජිත් කාදිනල්තුමා විසින් විවේචනාත්මකව අදහස් දක්වනු ලැබිණ.

"අගමැතිවරයා සහ විදේශ ඇමතිවරයා ජාත්‍යන්තරයට ගිහිල්ලා ඒක අස්සේ හැංගෙන්න හදන එක ළඳ බොළඳ වැඩක්. ඒක නිසා කරුණාකරලා ඔය බාල්දු වන වැඩේ කරන්න යන්න එපා” යනුවෙන් කාදිනල් හිමි එහිදී පැවසීය.

එහිදී වැඩිදුරටත් අදහස් දක්වමින් කාදිනල්තුමන් “ජනාධිපතිතුමා බලයට එන විට වේදිකාවල මොර දුන්නේ එක රටක් එක නීතියක් කියලා. දැන් අපිට පේනවා එක රටක්. හැබැයි ඕගොල්ලන්ට එක නීතියක්, අපිට එක නීතියක්. අපි නිතරම විරෝධතා පවත්වමින් ඉල්ලා සිටියේ අපිට සාධාරණය ඉටු කරන්න කියලා. ජාතිය හෝ ආගම හෝ භාෂාව පදනම් කරගෙනවත් ආණ්ඩුවේ කොටස්කාරයෙක් නිසාවත් මේකෙන් කට්ටිය බේරන්න බෑ. තමන්ව ආරක්ෂා කරගන්න ජාත්‍යන්තරයට ගිහිල්ලා ජාත්‍යන්තරයේ උදව්ව ඉල්ලගෙන හැංගිලා යන්න හදන එක පිටකොන්ද තියෙන මිනිස්සු කරන්නෑ, අවංක දේශපාලන නායකයන්ගෙන් මේක නෙවෙයි, බලාපොරොත්තු වෙන්නේ” යනුවෙන් ද පැවසීය.

විදෙස් අමාත්‍යංශ ප්‍රතිචාරය !

කෙසේ වුවත් මේ සම්බන්ධයෙන් ප්‍රතිචාර දක්වමින් විදෙස් අමාත්‍යංශය නිවේදනය කරන්නේ අති උතුම් පාප් වහන්සේ හමුවීමට අග්‍රාමාත්‍යවරයා කිසිදු ඉල්ලීමක් කර නොමැති බවත් වතිකානයෙන් එවැනි ආරාධනයක් සිදු කර නොමැති බවත්ය.

අග්‍රාමාත්‍යවරයා ජාත්‍යන්තර සමුළුවක ප්‍රධාන දේශනයක් වෙනුවෙන් ඉතාලිය බලා පිටත් යන බව පසුගිය 06 වැනිදා විදේශ කටයුතු අමාත්‍යවරයා පැහැදිලිව සඳහන් කළ බව ද එම නිවේදනයේ සඳහන් කර ඇත.

ඒ අනුව, අද(08) රාත්‍රියේ අග්‍රාමාත්‍යවරයා ප්‍රමුඛ පිරිසක් ජාත්‍යන්තර සමුළුවකට සහභාගිවීම සඳහා ඉතාලිය බලා පිටත්ව යෑමට නියමිතය.

සංචාරක අධිකාරියේ සභාපතිනි කිමාර්ලි ප්‍රනාන්දු විසින් සැප්තැම්බර් 7 වැනිදා සෞඛ්‍ය අමාත්‍යාංශයේ සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධනට යොමුකළ ලිපියක් කොරෝනා මර්දන වැඩපිළිවෙළට සිදුකළ බලපෑමක් බව සෞඛ්‍ය ක්ශේත්‍රයේ විරෝධයක් මතුව තිබේ.

සභාපතිනිය අදාළ ලිපිය මගින් දැනුම් දෙන්නේ, සංචාරක කර්මාන්තයට සහයෝගය දෙමින් වහාම පහත තීරණවලට අවනත වන්නට ය. 

ඊට අදාළ තීරණ මෙසේය.

1. පූර්ණ ලෙස එන්නත ලබා දී ඇති ගුවන් කාර්ය මණ්ඩලය සඳහා PPE ඇඳීමේ අවශ්‍යතාවය ඉවත් කිරීම.

2. පූර්ණ ලෙස එන්නත ලබා ගෙන ඇති සංචාරකයින් සඳහා ගොඩ වීමට පැය 72 කට පෙර සිදුකර යුතු PCR පරීක්ෂණ අවශ්‍යතාවය ඉවත් කිරීම.

3. යුරෝපා සංගම් රෙගුලාසිවලට අනුකූලව අවුරුදු 12 ට අඩු ළමුන් සඳහා PCR පරීක්ෂණ ඉවත් කරන්න.

4. සංචාරක මාර්ගයේ පැමිණෙන පූර්ණ ලෙස එන්නත ලබා ඇති මගීන් සඳහා ගුවන්තොටුපලේදී කඩිනම් RAPID පරීක්ෂණ වලට ඉඩ දීම. ය.

අදාළ ලිපියේ ඇය වැඩිදුරටත් සඳහන් කර ඇත්තේ , "සංචාරක ව්‍යාපාරයට අපේක්‍ෂිත ප්‍රතිඵල ලබා ගැනීම සඳහා පසුගිය සතියේ අතිගරු ජනාධිපතිතුමාගේ ප්‍රධානත්වයෙන් පැවති රැස්වීමේදී සඳහන් කළ පරිදි සංචාරක ව්‍යාපාරයට සහයෝගය දැක්වීම සඳහා පහත සඳහන් කරුණු සැලකීමට ගත යුතුය." යනුවෙනි.

ඒ අනුව මෙය කොරෝනා මර්දනයට අදාළ සෞඛ්‍ය නිර්දේශ සංශෝධනය කිරීමට සිදුකර ඇති බලපෑමක් බව සෞඛ්‍ය ක්ශේත්‍රයේ පිරිස් වල විවේචනය වී තිබේ.

එසේම එම ආරංචි මාර්ග පවසන්නේ මේ හරහා ලෝකයේ ඇති තවත් කොරෝනා ප්‍රභේද මෙරටට ඇතුල්වීමේ අවධානමක් ඇති බවයි.

කොරෝනා වසංගතය මෙරට තුළ දරුණු ලෙස ව්‍යාප්තිය සිදුවෙමින් ඇති පසුබිමක ඒ ගැන කිසිදු තැකීමකින් තොරව මේ යොමුකළ බවක් පෙන්නුම් කර ඇතැයිද ඔවුන් පවසයි.

තවද කොරෝනා වසංගතය තීව්‍රව ඇති කිසිදු රටක් මේ ආකාරයට සෞඛ්‍ය බලධාරීන්ට බලපෑම් සිදුකර නොමැති බවත් ඔවුන් පෙන්වා දෙයි.

වඩාත් සුවිශේෂ කරුණක් වන්නේ විශේෂඥ උපදෙස් නොතකා කටයුතු සිදුවීම හේතුවෙන් මෙරට කොරෝනා මර්දන තාක්ෂණික උපදෙස් නිකුත්කරන කමිටුවේ විශේෂඥයන් ඉල්ලා අස්වෙන්න ගෙන ඇති පසුබිමක මෙවැනි ලිපියක් යොමුවීමය.

පහත දැක්වෙන්නේ සංචාරක අධිකාරියේ සභාපතිනිය විසින් සෞඛ්‍ය සේවා අධ්‍යක්ෂ ජනරාල් වෙත යොමුකර ඇති ලිපියයි.

කොරෝනා මර්ධන කමිටුවෙන් විශේෂඥ වෛද්‍ය ආනන්ද විජේවික්‍රම ඉවත්වීම සමාන වන්නේ යුද්ධය යන අතරවාරයේදී සරත් ෆොන්සේකා හමුදාපති ධුරයෙන් ඉවත් වීම සමාන තත්වයකට බව හිටපු අමාත්‍ය ,, පාර්ලිමේන්තු මන්ත්‍රී චම්පික රණවක සඳහන් කරයි.

කොළඹ පැවති මාධ්‍ය හමුවකදී ඔහු මේ බව පැවසීය.

ආදායම් බදු නොගෙවා වංචා කළ පුද්ගලයන් මෙන්ම, වංචාවන් සම්බන්ධයෙන් නඩු පැවරී නැති අය එම වංචනික මුදල් යළි භාවිතයට ගැනීම සඳහා ආයෝජනය කිරීම හෝ තැන්පත් කිරීම සඳහා මෙම පනතින් අවකාශ සලසා ඇති බව ද හෙතෙම පෙන්වා දෙයි.

මෙහිදී චම්පික රණවක මන්ත්‍රීවරයා වැඩිදුරටත් සඳහන් කළේ සියළුම නීති පසෙකලා බදු වංචාකරුවන්ට දැවැන්ත බදු සහන ලබාදුන් ආණ්ඩුව, එම වංචාකරුවන්ට නඩු පැවරීම සඳහා දේශීය ආදායම් දෙපාර්තමේන්තුවට ඇති හැකියාව මොට කරමින් ධන කුවේරයන්ට තවදුරටත් සහන සැළසීමේ අරමුණෙන් මෙම පනත ඉදිරිපත් කර ඇති බවය.

එසේ බදු සහන ලබාදුන්න ද, ආයෝජනයන් වැඩි නොවූ බවත්, ගෝඨාභය රජයේ මුල් මාස 3 තුළ ආර්ථික වර්ධන වේගය -1.6% දක්වා පසු බෑ බව ද ඔහු පෙන්වා දුන්නේය.

එමෙන්ම කිසිම ආකාරයක නිල ව්‍යාපාරික කටයුත්තකින් උපයා නොගත් මුදල් එනම් කළු සල්ලි සුදු කරගැනීම සඳහා ආණ්ඩුව විසින් අවස්ථාව සළසා දී ඇති බවත් ඔහු පැවසීය.

“මේ ආණ්ඩුව සත්ගුණවත්, ධර්මපාලතුමාගේ අවතාරය කියපු අය. මේ ආණ්ඩුව බෞද්ධ පංචශීලය මත ක්‍රියාත්මක වෙන බවට ජනතාවට පොරොන්දු දීපු අය. කුලියට මිනී කරපු මිනිස්සුන්ගේ සල්ලි නීතිගත කරන්න මත් කුඩු ජාවාරම් කාරයින්ගේ සල්ලි නීතිගත කරන්න රාජ්‍ය දේපල මංකොල්ල කාපු අයගේ සල්ලි නීතිගත කරන්න දරන මේ උත්සාහයට මොන විදිහේ ප්‍රතිචාරයක් දක්වයිද කියලා අපි බලන් ඉන්නවා. ඒ වගේම වාමාංශික සටන් පාඨ කියමින් ධනපතියන්ට බැනවදිමින් ධනේශ්වර ක්‍රමය නව ලිබරල්වාදය ගැන සටන් පාඨ කියපු අයට කිසිම නව ලිබරල්වාදියෙක්වත් පසුගිය කාලවල් වල යෝජනා නොකර විදිහට තක්කඩි රංචු වලට, මංකොල්ලකාරයින්ට දඬුවම් දෙනවා වෙනුවට බදු සහන දීපු ආණ්ඩුවේ මේකට අද කොහොමද ඡන්දෙ දෙන්නේ කියන එක මත ඒගොල්ලන්ගේ වාමාංශික ඉතිහාසයත් තීරණය වෙන බව ප්‍රකාශ කරන්න කැමතියි.”

මේ රටේ පාසල් දරුවන්, දෙමාපියන්, ගුරුවරුන් හා විදුහල්පතිවරුන් අද මුහුණ දී තිබෙන අධ්‍යාපනයේ අර්බුදය සම්බන්ධයෙන් සිය අවධානය යොමු කරන රණවක මහතා සඳහන් කළේ නිවෙස්වලට කොටු වී සිටින දරුවන්ට අධ්‍යාපනය ද අහිමිව ඇති බවය.

ගුරුවරු විදුහල්පතිවරුන් අසහනයට පත්ව වෘත්තීය ක්‍රියාමාර්ග සඳහා යොමුව තිබෙන වකවානුවක පාසල් නැවත විවෘත කිරීම සම්බන්ධයෙන් නිසි වැඩපිළිවෙලක් ආණ්ඩුවට නැත. රජයේ නායකයන්ගේ දරුවන් විදේශ රටවල ජීවත්වන නිසා ඔවුන්ට ඒ පිළිබඳව සහකම්පනයක් නැත.

විධිමත් වැඩපිළිවෙලක් යටතේ ජනවාරි 01 වැනිදා සිට හෝ රටේ පාසල් විවෘත කිරීමට කටයුතු කරන ලෙස ද හෙතෙම ආණ්ඩුවෙන් ඉල්ලා සිටියි. අවුරුදු 12 ත් 18 ත් අතර දරුවන්ට සංකූලතා අඩුම එන්නත ලබා දීමේ දී ප්‍රමුඛතාවය ලබා දිය යුතුය. තරුණ කටයුතු අමාත්‍යවරයාගේ පෞද්ගලික උවමනාවට එන්නත දේශපාලන සූදුවක නොයොදවා රටේ දරු පරපුර වෙනුවෙන් කොවිඩ් එන්නත යොදා ගන්නා ලෙස ද රණවක මන්ත්‍රීවරයා අවධාරණය කළේය.

සෞඛ්‍ය මාර්ගෝපදේශයන්ට හා විද්‍යාත්මක ක්‍රමවේදයන්ට සම්පූර්ණ පටහැනිව සිදුකරන එන්නත් කරන වැඩපිළිවෙල නිසා සෞඛ්‍ය අමාත්‍යාංශය මෙන්ම සෞඛ්‍ය විශේෂඥයන් ව්‍යාකූලත්වයට පත්ව තිබේ.

“මේ විකාරය නවත්තලා එන්නත විදේශගත වෙන ශිෂ්‍යයන්ට මෙන්ම මේ රටේ අපේ හතළිස් ලක්ෂයකට අධික පාසල් දරුවන්ටත් වහාම ලබා දෙන්න කටයුතු කරන හැටියට අපි ආණ්ඩුවට කියනවා. එහෙම නැත්නම් ඒක මේ රටේ දරුවන්ට කරපු සාහසික අපරාධය මේ අවුරුදු එකහමාරක් තුළ තවත් ඉදිරියට ගෙනයාමක්.”

අද ගුරුවරයා ඉතාම නින්දාසහගත තත්ත්වයකට පත් කරලා තියෙනවා. ඒ නිසා, මේ ගුරු ප් රශ්නය ඒ ගුරුවරුන්ට ලැබිය යුතු ගෞරවය හිමිකර දෙමින්, ගුරුවරුන්ට කාලකන්ණි කියමින්, ගුරුවරුන්ට අවමාන කරමින්, මිය යන මේ උද්ඝෝෂණ නිසා මියගිය බවට සමාජ මාධ් යවල පතුරවමින් ගුරුවරුන්ට එරෙහිව මේක යුද්ධයක් කර ගන්න එපා. මේක ගුරුවරු කියන්නේ මේ රටේ අනාගතය තනන ගුරු දෙගුරු කියලා අපි කිව්වේ. අපේ සංස්කෘතියේ දෙමාපියන්ට කලින් තමයි ගුරුවරයාව තිබ්බේ. ගුරු දෙගුරු කිව්වේ ඒකයි. ඒ සංස්කෘතිය ගැන කිසිම හැඟීමක් නැති පාදඩ රංචුවක් අද ඒ ගුරුවරුන්ට එරෙහිව යුද්ධයක් දියත් කරලා තියෙනවා.”

අද වන විට කොරෝනා රෝගයේ යම්කිසි පාලනයක් ඇතිවෙමින් පවතින බව වෛද්‍ය විශේෂඥයන් පවසයි. රෝගයේ ව්‍යාප්තිය උපරිම තත්ත්වයට පත්ව පසුව අඩුවීගෙන යාමේ ස්වාභාවික වක්‍රය ඊට හේතුව බව ඔවුන් පෙන්වා දෙයි. ඒ අනුව එම උපරිම තත්ත්වය පසුවූවාද නැද්ද යන්න විමර්ශනය කිරීම ආණ්ඩුවේ වගකීම බව ද හෙතෙම පෙන්වා දුන්නේය.

“රෝගය අද අතිවිශාල පිරිසකට වැළඳිලා ඉවරයි. ඔය පී. සී. ආර්. හෝ ඇන්ටිජන් පරීක්ෂණය කරපු නැති අතිවිශාල පිරිසකට මේ රෝගය වැළඳිලා, සමහරු දන්නෙත් නෑ, තමන්ට රෝගය වැළඳිලා සුව වුණා කියලා. මොකද, සීයට හැත්තෑවකට මේ රෝග ලක්ෂණ එන්නේ නෑ. ඒ නිසා රටේ සැලකිය යුතු පිරිසකට මේ රෝගය වැළඳිලා ස්වභාවික ප් රතිශක්තිය ඔවුන්ගේ සිරුරු තුළ ඇතිවෙලා තියෙන බව දැන් පැහැදිලියි මාස ගානක් යනකම් ඒ ශක්තිය පවතිනවා. තුන්වෙනි කාරණය එන්නත් කරනය රටේ ජනගහනයෙන් සියයට හතළිහකට අධික ප් රමාණයකට එන්නත් දෙකම ලබාදීම නිසා කෘතීම ප්‍රතිශක්තියක් ඇතිවෙලා තියෙනවා. ඒ එන්නත් කරනය ලබා දීම ගැන සෞඛ්‍ය බලධාරීන්ට හා ආරක්ෂක අංශවල අයට අපගේ ප්‍රණාමය පිරිනමනවා.”

එම සියළු කාරණා තිබියදී එන්නත්කරණය නිසි ආකාරයෙන් සිදුකළා නම් සිදුවූ මරණ සංඛ්‍යාව ද අවම කරගත හැකිව තිබිණි. දරුවන්ගේ අධ්‍යාපනය ද ශක්තිමත්ව කරගත හැකි ව තිබිණි.

බොහෝ දෙනෙකුගේ ඉල්ලීම මත, අගුළු දැමීමේ ප්‍රතිඵලයක් හැටියට මේ රෝග ව්‍යාප්තිය යම් ප්‍රමාණයකට පාලනය වී තිබේ.

“එන්නත් කරන්න තිබුණේ, 2020 ඔක්තෝබර් මාසේ. ධම්මික පැණියයි, කලුගෙඩි සෙල්ලමයි දදා අපේ ජනතාව මේ මරණය කරා දැක්කුවා. මේ ආණ්ඩුව. මේවා සිදුවුණේ ඝාතන, ඝාතන දහදාහක් සිදුවුණේ. ඒ බව අපි අමතක කළ යුතු නැහැ. ඒවා බේරාගත හැකිව තිබිච්ච ජීවිත නැති වුණේ.”

පස්වෙනි කොරෝනා රැල්ලක් පැමිණීමේ අවදානමක් ද පවතින බව පෙන්වා දෙන හිටපු අමාත්‍යවරයා ඊට මුහුණ දිය හැක්කේ, විශේෂඥයින්ගේ සහයෙන් මිසක, ආඩම්බරකාර මුග්ධ, උද්දච්ච, එවගේම එන්නතනුත් ගසා කන එවැනි දේශපාලන ක්‍රියාදාමයකින් නොවන බව අවධාරණය කළේය.

“අද මේ රටේ වසංගත රෝග අංශයේ ඉන්න අපේ ප්‍රධානියා වෛද්‍ය ආනන්ද විජේවික්‍රම මේ ක්‍රමය යටතේ තමන්ට තවදුරටත් ඉන්ඩ බෑයි කියලා ඉල්ලා අස්වෙලා තියෙනවා. බොහොම නිහතමානී වෛද්‍යවරයෙක්. මීට ප් රථම අර එන්. එම්. ආර්. එකේ සේවය කරපු වැදගත් වෘත්තීයවේදී වෛද්‍යවරු කිහිපදෙනෙක් මහාචාර්ය මලවිගේ ඇතුළු ඉල්ලා අස් වුණා. ඒ වගේම වෛද්‍ය ලක් කුමාර ඇතුළු පිරිස් ඉවත් කළා. විශේෂඥයෝ ඉවත් කර කර එහි යොදා ගත්තා. නම් පට බැඳිලා තිබුණට අපි දන්නවා වෛද්‍ය විශේෂඥයෝ වෙන්නේ නෑ. ඒගොල්ලෝ එහෙයියෝ. එහෙම එහෙයි යොදාගෙන මේක කරන්න පටන් ගත්තා. ඇත්තටම විජේවික්‍රම මහත්මයාගේ මේ ඉවත්වීම තීරණාත්මක දෙයක්.”

ආර්ථික විශේෂඥයින්ට ආර්ථිකයත් වෛද්‍ය විශේෂඥයින්ට වසංගත මර්ධනයත්, භාරගත යුතු කාලය එළඹී ඇති බව ආණ්ඩුවට මතක් කරන බව ද පාඨලී චම්පික රණවක මන්ත්‍රීවරයා අවධාරණය කළේය.

යළිත් වතාවක් ශ්‍රී ලංකා මහ බැංකුවේ අධිපති ධුරය බාර ගැනීම සඳහා මුදල් රාජ්‍ය අමාත්‍ය අජිත් නිවාඩ් කබ්රාල් පාර්ලිමේන්තු මන්ත්‍රී ධුරයෙන් ඉල්ලා අස් වුවහොත් පුරප්පාඩු වන ජාතික ලැයිස්තු මන්ත්‍රීධූරය සඳහා නම් දෙකක් යෝජනා වී ඇත.

දේශපාලන ආරංචි මාර්ග පවසන ආකාරයට ඒ, හිටපු පාර්ලිමේන්තු මන්ත්‍රී ජයන්ත කැටගොඩ සහ අග්‍රාමාත්‍ය කාර්‍ය මණ්ඩල ප්‍රධානී යෝෂිත රාජපක්ෂ ය.

යෝෂිත රාජපක්ෂ සම්බන්ධ යෝජනාව අග්‍රාමාත්‍යවරයා ගේ පාර්ශවයෙන් ඉදිරිපත් වී ඇති බවත් වාර්තා වෙයි.

කෙසේ වුවත් වැඩිදුරටත් වාර්තා වන්නේ හිටපු පාර්ලිමේන්තු මන්ත්‍රී ජයන්ත කැටගොඩ යළි පත් කිරීමට මුදල් අමාත්‍ය බැසිල් රාජපක්ෂ තීරණය කර ඇති බවය.

ශ්‍රී  ලංකා පොදුජන පෙරමුණේ ජාතික ලැයිස්තු මන්ත්‍රී වරයෙකු ලෙස ජයන්ත කැටගොඩ පත් කර සිටියද බැසිල් රාජපක්ෂට පාර්ලිමේන්තු ඒම සඳහා ඔහු එම ධුරයෙන් ඉල්ලා අස්විය.

මහ බැංකුවේ අධිපති ධුරය භාරගන්නා ලෙස ජනාධිපතිවරයා විසින් පසුගියදා රාජ්‍ය අමාත්‍ය කබ්රාල් ගෙන් ඉල්ලීමක් කර තිබු අතර එහිදී ඔහු කොන්දේසි කිහිපයක් ඉදිරිපත් කර තිබු බව ද ඉහත ආරංචිමාර්ග වැඩිදුරටත් පවසයි.

මේ මොහොතේ රටේ පවතින මූල්‍ය අර්බුදය විසඳා ගැනීමට කටයුතු කරනවා වෙනුවට ආණ්ඩුව කළු සල්ලි සුදු කිරීමේ ජාවාරමට අත තියා ඇති බවත් ,ඒ හරහා ජාවාරම් කාරයින්ට තමන්ගේ කළු සල්ලි විශුද්ධිකරණය කරගැනීමට හැකි බවත් විපක්ෂ නායක සජිත් ප්‍රේමදාස පවසයි.

ඊයේ (07) ඔහු මේ බව සඳහන් කර සිටි අතර කිසිවෙක් බදු නොගෙවා සඟවාගෙන සිටිනවා නම් රජය කළ යුත්තේ ඔවුන්ට එරෙහිව නීතිය ක්‍රියාත්මක කිරීම බවත් ඊට ඕනෑ තරම් ප්‍රතිපාදන ඇති බවත් පැවසීය.

ඒ වෙනුවට ආණ්ඩුව සිදු කරන්නට උත්සාහ කරන්නේ 1% තරම් වූ සොච්චම් ප්‍රතිශතයකට, ජාවාරම්කාරයන්ට සහ සමහර ධන කුවේරයින්ට බදු සහන සලසා දීමට කටයුතු කිරීම යැයි ද පැවසීය.

ආණ්ඩුව මෙයින් උත්සාහ කරන්නේ ලුම්පන් ධනවාදයට රට තුළ ඉඩක් සලසා දෙමින් සමාජ සාධාරණත්වය උල්ලංඝනය කිරීමට බව පැවසූ විපක්ෂ නායකවරයා ,අසාධාරණ ලෙස ධනය උපයා ගෙන බදු මුදල් සඟවාගෙන සිටින ජාවාරම්කාරයන්ට මේ පනත හරහා රැකවරණය සැලසෙන බවද පැවසීය.

ආණ්ඩුවේ මෙම ක්‍රියා පිළිවෙතට සමගි ජන බලවේගයත් විපක්ෂයත් තරයේම විරුද්ධ වන බවද ඔහු පැවසීය.

ලංකාවේ ඇතුළු රටවල් කිහිපයක සංචාරය නොකරන ලෙස ඇමෙරිකා එක්සත් ජනපදය විසින් සිය පුරවැසියන්ට අනතුරු අඟවා ඇත.

ඒ ශ්‍රීලංකාවද කොරෝනා අවධානම ඉහළින්ම ඇති හතරවන මට්ටමේ රටක් බව සඳහන් කරමිනි.

ලංකාවේ කොවිඩ්19 ව්‍යාප්තිය හමුවේ පූර්ණ එන්නත්කරණයට ලක්වූ පුද්ගලයන්ටද වෛරසය ආසාදනයවීමේ හැකියාව මෙන්ම පැතිරවීමේ හැකියාව පවතින බවත් ඔවුන් සඳහන් කර ඇත.

ඒ අනුව එම ගමනාන්ත වෙත ගමන් කිරීමෙන් වළකින්නැයි ඇමරිකානුවන්ගෙන් එරට රජය ඉල්ලා සිටියි.

මේ සම්බන්ධයෙන් වැඩිදුරටත් තොරතුරු සඳහන් රොයිටර් පුවත් වාර්තාවක් පහත දැක්වෙයි

U.S. CDC warns against travel to Sri Lanka, Jamaica, and Brunei